Најнови вести

4 ден.

Белата куќа одби да коментира за новиот ирански предлог

Белата куќа во петокот соопшти дека нема да открива детали од приватните дипломатски разговори, откако беше поставено прашање за нов ирански предлог за продолжување на преговорите со САД, кој бил доставен преку посредници од Пакистан.Портпаролката Ана Кели изјави за „Ројтерс“ дека администрацијата не споделува детали од приватни дипломатски контакти, додавајќи дека американскиот претседател Доналд Трамп останува јасен во ставот дека Иран не смее да поседува нуклеарно оружје и дека разговорите продолжуваат со цел да се обезбеди краткорочна и долгорочна национална безбедност на САД.Според иранската државна агенција ИРНА, Техеран доставил нов предлог за продолжување на преговорите со САД со цел трајно завршување на конфликтот. По речиси 40 дена размена на воздушни напади меѓу Израел, САД и Иран, прекинот на огнот стапи на сила на 8 април, но мировните преговори останаа во застој.Досега е одржана само една рунда разговори, на 11 април во Пакистан, која не донесе резултат. Во меѓувреме, според извештаите, ситуацијата околу Ормускиот теснец останува напната, додека Вашингтон одржува ограничувања кон иранските пристаништа.Претходно оваа недела, Трамп одби претходен ирански предлог, кој, според „Аксиос“, предвидувал одложување на разговорите за нуклеарното прашање, што останува клучна точка на спор меѓу САД, Израел и Иран.

Свет | пред 4 дена

4 ден.

(Видео) Приведен осомничен за измама од над 88.000 евра

Од Министерството за внатрешни работи информираат дека денеска (30.04.2026) на граничниот премин Табановце е лишен од слобода Б.К. (44) од Прилеп, осомничен за сторено кривично дело „измама“.По претходно добиени сознанија, Одделот за криминалистичка полиција во координација со СВР Струмица – ОВР Валандово и Одделот за специјални полициски операции презел координирани активности за расчистување на случајот.Според информациите, во периодот од јули до ноември 2025 година, осомничениот, со намера да прибави противправна имотна корист, довел во заблуда лице од Валандово, лажно прикажувајќи дека ќе посредува во организирање лекување во странство за неговата сопруга. Во неколку наврати оштетениот уплатил вкупно околу 88.300 евра, односно 5.549.200 денари, а во меѓувреме сопругата починала.Осомничениот е изведен пред судија на претходна постапка во Основниот суд во Гевгелија, кој му изрекол мерка за претпазливост.

Македонија | пред 4 дена

4 ден.

Иран егзекутира млад каратист осуден за учество во протести

Иран изврши смртна казна над 21-годишниот каратист Сасан Азадвар, кој беше уапсен за време на протестите, во период кога Обединетите нации и организациите за човекови права предупредуваат на нагло зголемување на смртните казни и масовни апсења, пренесува Еуроњуз.Сасан Азадвар Џонкани, млад спортски првак во карате, беше погубен во затворот Дастгерд во Исфахан. Тој беше уапсен на почетокот на јануари за време на протестните собири.Според иранските правосудни органи, Азадвар бил осуден за „непријателство против Бог“ и за наводна соработка со „непријателот“. Обвиненијата се поврзани со наводни инциденти за време на протестите, вклучително и напади врз безбедносните сили.Од друга страна, организациите за човекови права тврдат дека случајот е обележан со сериозни правни нејаснотии и дека обвинетиот бил подложен на тортура со цел да се изнуди признание. Тие наведуваат и дека немало веродостојни докази против него.Според податоци на Обединетите нации, Иран од почетокот на конфликтот извршил смртна казна над најмалку 21 лице и привел повеќе од 4.000 луѓе, додека Амнести Интернешнл предупредува на зголемен број егзекуции, присилни исчезнувања и случаи на мачење.Претставници на иранското правосудство порачаа дека судските процеси ќе се водат забрзано и дека земјата нема да ги прифати меѓународните повици за прекин на извршувањето на смртните казни.

Свет | пред 4 дена

4 ден.

11 лоши навики кај мажи кои биле премногу разгалени од мајките

Премногу разгалените синови од страна на нивните мајки можат несвесно да развијат модели на однесување кои подоцна негативно се одразуваат на нивните романтични врски, се наведува во анализа објавена од порталот YourTango.Според текстот, начинот на кој примарниот старател се однесува кон детето директно влијае врз неговото однесување во зрелата возраст, а растењето со премногу заштитнички или идеализирачки настроена мајка може да создаде тешкотии во партнерските односи.Во анализата се наведува дека таквите лица често имаат постојана потреба за потврда од партнерот, тешкотии при донесување одлуки, како и тенденција да ја префрлаат одговорноста во врската на другата страна. Тоа, според стручните толкувања цитирани во текстот, може да ја наруши рамноправноста и емоционалната стабилност во односот.Исто така, се посочува дека дел од овие модели на однесување се поврзуваат со недостиг на развиена самостојност во детството, вклучително и избегнување домашни обврски, што подоцна влијае на функционирањето во секојдневниот живот.Авторите на анализата предупредуваат и на појава на несигурност, посесивност, пасивно-агресивно однесување и тешкотии при прифаќање критика, што дополнително може да ги оптовари партнерските односи.Во текстот се цитираат и психолошки истражувања кои укажуваат дека недостигот на емоционална саморегулација и прекумерната зависност од потврда од другите може да доведат до проблеми во односите во зрелата возраст.Сепак, се нагласува дека ваквите обрасци не се универзални и дека индивидуалниот развој зависи од повеќе фактори, а не само од односот со мајката.

Магазин | пред 4 дена

4 ден.

Зголемен број случаи на семејно и родово базирано насилство во Скопје и Тетово

Во текот на 1 мај 2026 година, полициските билтени на СВР Скопје и СВР Тетово регистрираа повеќе случаи на физичко насилство, вознемирување и нарушување на личната безбедност. Инцидентите опфаќаат напади од поранешни партнери, како и конфликти меѓу познаници.Според пријавите, на 30 април 2026 година, 23-годишна девојка од Скопје пријавила дека била нападната од нејзиниот поранешен партнер во Гази Баба. Во Тетово, пак, е поднесена кривична пријава против лице за напад врз поранешна сопруга, кој се случил во април.Регистриран е и случај на долготрајно вознемирување преку социјални мрежи, каде што 54-годишна жена од Скопје пријавила закани упатувани кон неа и нејзиното семејство во период од неколку месеци, со дополнителен физички напад пред пријавувањето.Покрај семејните и емотивните конфликти, евидентиран е и инцидент со елементи на кражба, при кој едно лице било физички нападнато и ограбено од лице кое претходно го познавало.Од МВР се преземаат мерки за расчистување на сите случаи, додека надлежните институции се соочуваат со зголемен број пријави за насилство и вознемирување, вклучително и преку социјални мрежи.

Македонија | пред 4 дена

4 ден.

(Видео) Доцните на летот? Рајанер има решение - телепортација

Пропуштањето лет може да биде многу фрустрирачко, особено ако тоа се случи поради работи на кои не можете да влијаете, како безбедносни контроли или промена на излезот за качување во последен момент.Сепак, понекогаш за доцнењето се виновни и самите патници, на пример кога пристигнуваат на аеродром во последен момент или се задржуваат во продавниците. Ирската нискобуџетна авиокомпанија „Рајанер“ се осврна на тоа на својот препознатлив, духовит начин.Во вирално видео објавено на Фејсбук, „Рајанер“ сатирично прикажа што мислат патниците кои го пропуштаат летот дека треба да се случи. На снимката се гледа маж кој трча по пистата додека неговиот авион веќе полетува.По неговите очајнички повици, авионот се враќа, а потоа зрак, сличен на оние од научнофантастичните филмови, го „телепортира“ директно во кабината додека леталото е сè уште во воздух. Под видеото стои опис:„Што очекуваат патниците кои го пропуштаат нашиот лет.“Објавата насмеа бројни корисници на социјалните мрежи. Многумина во коментарите истакнаа дека патниците често губат чувство за време и ги игнорираат повиците за качување, а потоа вината ја префрлаат на авиокомпанијата.„Токму така!“, напиша еден корисник, додека друг додаде: „Бесплатно би работел за овој маркетинг тим.“

Магазин | пред 4 дена

4 ден.

(Видео) Туристи останаа изненадени: Колку чини секојдневниот живот во една од најмалите држави

Сан Марино важи за една од најмалите држави во светот, а многумина биле изненадени од цените во тамошните маркети, кои на Јутјуб се појавија благодарение на двајца блогери.Сан Марино е една од најмалите држави во светот и се наоѓа на Апенинскиот Полуостров, целосно опкружена со Италија. Позната е како популарна туристичка дестинација, а поради својата локација многумина ја посетуваат при патувања низ Италија.Креаторите на содржини кои објавуваат на Јутјуб каналот „The Adventures of Dame Ristovski“ неодамна снимија видео со споредба на цените на намирници во супермаркетите во оваа мала европска држава во однос на остатокот од Европа.Во видеото прикажале реални цени на полиците, давајќи им на патниците и љубопитните јасен увид во трошоците за секојдневно пазарење во Сан Марино.Алкохол и пијалоциПри влез во супермаркетот почнале со одделот за пијалоци и алкохол.Џин се продава по цена од 14,50 евра, што го оцениле како сосема нормална цена. Во понудата забележале и други познати брендови и заклучиле дека тој дел од продавницата не отстапува многу од европските цени.ОвошјеКај овошјето останале помалку задоволни. Едно авокадо чини 2,50 евра, половина килограм мандарини 2,10 евра, јагоди 2,30 евра, додека спакувани портокали 2,76 евра. Особено ги изненадиле високите цени и покрај тоа што Италија е веднаш преку граница.„Реално, овошјето е скапо“, заклучиле во видеото, додавајќи дека очекувале пониски цени.Чоколади и слаткиЧоколади од 75 грама се продавале по 2,50 евра, додека еден премиум производ со бадеми чинел дури 17 евра за 250 грама.Домашни потребиОд друга страна, производите за домаќинство биле значително попристапни. Прашок за перење чинел помеѓу 3,50 и 3,60 евра, омекнувач околу 3 евра, а средства за миење садови од 1,99 до 2,99 евра.Паста за заби можела да се најде по цени од 1,99 до 2,99 евра.Храна за домашни миленициХраната за миленици исто така не била претерано скапа. Производите за мачки и кучиња се движеле околу 2,49 евра, додека некои мали грицки чинеле само 69 центи.ДеликатесиМортадела чинела 1,80 евра за 100 грама, односно околу 18 евра за килограм. Креаторите ја пофалиле мортаделата од Болоња, нарекувајќи ја „вистинска мортадела“ со посебен вкус. Панчета била поскапа, 3,50 евра за 100 грама, додека одредени салами чинеле 2,80 евра.Млечни производи, сокови и конзервирана хранаЈогуртите почнувале од 1,85 евра, Фанта била 2,99 евра, пијалак од алое вера 2,50 евра, а голема конзерва туна 3,79 евра. Кисели краставички се продавале по 2,69 евра.ТестениниОсобено ги изненадиле тестенините, бидејќи цените биле многу конкурентни. Пакувања од половина килограм чинеле околу 1,60 евра, додека популарната „Барила“ била 1,50 евра за 500 грама.„Тоа е искрено евтино“, велат во видеото.

Настани | пред 4 дена

4 ден.

Нов закон за миленици во Македонија – казни до 400 евра за несовесно чување кучиња

Според предложените одредби, лицата кои трајно ќе го напуштат својот миленик ќе добијат забрана за чување нови животни. Предлог-законот предвидува и значително зголемување на паричните казни, па така, несоодветно чување и шетање куче ќе се казнува со 400 евра, додека за сурово постапување, мачење или убивање животни е предвидена глоба до 5.000 евра.Целта на законското решение е да се намали напуштањето на милениците, неконтролираното размножување и трговијата со животни, како и да се намали бројот на бездомни кучиња на улиците.Во предлогот се наведува и забрана за постојано врзување кучиња на ланец или нивно држење во затворен простор без дневно движење надвор, како и забрана за зашеметување, колење или усмртување животни за ритуални цели. Се предвидува и задолжителна стерилизација на домашните кучиња, како и ограничување на бројот на легла кај одгледувачите.Дополнително, се планира формирање Центар за трајно згрижување и вдомување на напуштени животни, како и нов систем за регистрација на одгледувачници, продавници и пансиони за миленици, со засилени контроли од повеќе институции, меѓу кои и полицијата.Според информациите на „Телма“, предлог-законот бил изготвен од Агенцијата за храна и ветеринарство и усогласен со повеќе институции и организации, но постојат различни информации околу тоа дали веќе е доставен до Министерството за земјоделство и кога ќе влезе во владина процедура.

Македонија | пред 4 дена

4 ден.

(Видео) Украински командант: Од оваа соба се управува најсмртоносната операција во историјата

Командантот на украинските Сили за беспилотни системи, Роберт „Маџар“ Бродви, во видео-изјава зборуваше за интензивната употреба на дронови во војната против руските сили.Тој тврди дека беспилотните летала се одговорни за најголемиот број загуби на противнички војници во историјата на војувањето, наведувајќи дека преку нив се „елиминирани“ десетици илјади руски војници.„Во оваа просторија се одвива најмасовното уништување на непријателот во историјата на човештвото. За 10 месеци од формирањето достигнавме бројка од 85.000 потврдени елиминирани непријателски војници“, изјави Бродви.Тој додаде дека украинските сили со дронови убиваат повеќе руски војници отколку што руската армија успева да мобилизира, оценувајќи дека тоа претставува „пресвртна точка“ во конфликтот.Според неговите тврдења, евтина технологија, како дронови кои чинат меѓу 300 и 500 долари, се разменува за „голем број непријателски загуби“, што, како што рече, претставува најнеповолен „сооднос“ за противникот.Неговите изјави доаѓаат во период на засилена употреба на беспилотни системи на бојното поле, каде што двете страни сè повеќе се потпираат на дронска технологија за извидување и напади.

Свет | пред 4 дена

4 ден.

Од пијалок до мода: мача зелената боја доминира во новите колекции

За сите оние чија гардероба најчесто се состои од неутрални тонови, пролетта претставува идеална можност за експериментирање со бои. Од небесно сина и сончево жолта до розови цветни нијанси, новата сезона носи бројни инспирации. Затоа не изненадува што меѓу трендовите за пролет и лето 2026 година се издвојуваат нијанси како „Yves Klein“ сина, лимон жолта и путер жолта.Сепак, најновиот тренд изгледа дека не доаѓа од природата, туку од популарен напиток, пишува Cosmopolitan.Таканаречената „ладна мача“ во изминатиот период сè почесто се појавува на социјалните мрежи и во урбаните кафулиња. Традиционалниот јапонски зелен чај со препознатлива боја постепено премина во мејнстрим културата, а сега се прошири и како естетски тренд надвор од светот на пијалаците.Во момент кога модата и гастрономијата сè повеќе се преплетуваат, нежната зелена нијанса – блиска до тоновите на жалфија и ф’стаци – од чашите се префрли и во модните гардероби. „Мача зелената“ веќе е присутна во уличната мода, а сè почесто се појавува и во колекциите на познати брендови.Пример за тоа е новата колекција на Зара, каде што оваа боја е силно застапена. Посебно се издвојува топ со халтер-оковратник и машна, кој може да се комбинира со здолништа и панталони во истата нијанса.Модните аналитичари посочуваат дека ваквите трендови уште еднаш ја потврдуваат сè поголемата поврзаност меѓу дигиталната култура, животниот стил и модната индустрија.

Магазин | пред 4 дена

4 ден.

Трамп најави царини од 25% за автомобили и камиони од ЕУ

Американскиот претседател Доналд Трамп најави дека неговата администрација веќе следната недела ќе ги зголеми царините за автомобили и камиони од Европската Унија на 25 отсто, обвинувајќи го Брисел дека не го почитува претходно договорениот трговски договор.Станува збор за нов потег, кој би можел дополнително да ги заостри трговските односи меѓу САД и ЕУ, особено во автомобилскиот сектор.Во својата објава, Трамп наведе дека договорот јасно предвидува оти нема да има царини за возила произведени во фабрики во САД. Тој додаде дека во моментов се градат голем број фабрики за автомобили и камиони, со инвестиции поголеми од 100 милијарди долари, што, како што рече, претставува историски рекорд.Трамп порача дека тие фабрики, во кои ќе работат американски работници, наскоро ќе бидат отворени, нагласувајќи дека „никогаш досега не се случило нешто слично“ во американската индустрија.

Свет | пред 4 дена

4 ден.

(Фото) Пожар во помошен објект во село Ангелци, брзо изгаснат од струмичките пожарникари

Денеска, на 1 мај 2026 година, во 14:25 часот, во село Ангелци избувнал пожар во помошен објект.На местото на настанот интервенирале пожарникарите од Територијалната противпожарна единица Струмица со едно противпожарно возило и пет пожарникари-спасители.Пожарот бил ставен под контрола и целосно изгаснат во краток временски рок по пристигнувањето на екипите, со што е спречено негово проширување и поголема материјална штета.Од надлежните служби апелираат граѓаните, во случај на пожар или друга природна непогода, да пријават на единствениот број за итни случаи 112 или на 193.

Македонија | пред 4 дена

4 ден.

Масовен излез кон Грција: над 14 илјади патници на граничниот премин „Богородица“

Повеќе од три илјади македонски државјани утринава ја поминале македонско-грчката граница на граничниот премин „Богородица“, информираат од Министерството за внатрешни работи на Северна Македонија.Од МВР наведуваат дека на истиот премин до 10 часот поминале и над 11 илјади странски државјани.Според надлежните, од македонска страна не е забележан застој на граничните премини во југоисточниот дел од земјата. Се додава дека се преземени мерки со активирање на сите човечки и технички капацитети со цел да се забрза протокот на патници и да се спроведат задолжителните гранични проверки.На социјалните мрежи граѓани споделуваат различни искуства за преминување кон Грција – од брзо поминување до чекање од околу еден час, при што најголеми задржувања се пријавуваат кај автобусите.Податоци од камерите на Јавното претпријатие за државни патишта покажуваат дека на премините „Богородица“ и „Меџитлија“ нема поголеми застои од македонска страна.Зголемениот проток на патници е очекуван поради продолжениот празничен викенд, а слични гужви се забележуваат и во други викенди поради примената на новата ЕЕС регулатива, која започна да се применува од 10 април.Од грчката влада соопштија дека системот им дава можности на земјите-членки да се справуваат со зголемениот притисок на границите и дека ќе се преземаат мерки за ефикасно опслужување на патниците, во согласност со законските правила.

Македонија | пред 4 дена

4 ден.

236107776_365588865017693_5783337045518003885_n

„Очекуваме дополнително намалување на цените на горивата од следната недела“, вели Мицкоски

Премиерот Христијан Мицкоски изјави дека, според податоците на Меѓународниот монетарен фонд, земјата се наоѓа меѓу водечките во Европа по примена на мерки за заштита на животниот стандард на граѓаните. Тој нагласи дека цените на горивата во земјава се значително пониски во однос на соседството, како и дека Владата продолжува со мерките за намалени акцизи и повластено ДДВ за бензин и дизел, со цел одржување на стабилни и пониски цени.„Според податоците на Меѓународниот монетарен фонд, а не според податоците на Владата, Македонија е трета земја во Европа според имплементацијата на мерки со кои се штити стандардот на граѓаните.Имаме убедливо најниски горива, кои се за 30% до 50% поевтини од горивата во соседството.Во овој момент остануваме на мерката намалено ДДВ за бензините 95 и 98 октански, на 10%. Остануваме и на мерката намалени акцизи. Просекот што е на PLATTS FOB Италија за бензините ќе значи намалени акцизи за 2 денари по литар, а за дизелот ќе значи 4 денари по литар, врз основа на просекот од втората половина на април. Така ќе биде во следните две недели.Што се однесува до ДДВ-то кај дизел-горивото, тоа ќе остане на 18%, и со тоа нашето дизел-гориво денес е од 30 до 50 евроценти по литар поевтино од дизел-горивата во соседството. Очекувам од понеделник да биде и уште поевтино, имајќи предвид дека најголемиот дел од земјите од соседството ќе ги определат новите цени: Србија денес, а останатите држави од понеделник и вторник, како и ние“, вели Мицкоски.

Македонија | пред 4 дена

4 ден.

Трамп се закани со повлекување на американските војници од Италија и Шпанија

Американскиот претседател Доналд Трамп се закани со повлекување на американските војници од Италија и Шпанија, само еден ден откако изјави дека размислува за намалување на бројот на војници стационирани во Германија, пренесува „Гардијан“.Заканата кон Германија следуваше откако германскиот канцелар Фридрих Мерц изјави дека САД биле „понижени“ од Иран, како и по повеќенеделните критики на Трамп кон сојузниците од НАТО поради, како што наведе, недоволната поддршка за повторно отворање на Ормускиот теснец.Шпанскиот премиер Педро Санчез од самиот почеток се спротивставува на американско-израелските воени активности против Иран, додека Рим се обидуваше да балансира до крајот на март, кога одби да дозволи користење на воздушна база на Сицилија за американски авиони што пренесувале оружје.На прашање дали размислува за повлекување на војниците од Италија и Шпанија, Трамп одговори дека тоа е можно, додавајќи дека овие земји, според него, не дале доволна поддршка.Италијанскиот министер за одбрана, Гвидо Крозето, изјави дека не ги разбира мотивите на Трамп и ги отфрли обвинувањата дека Италија не помогнала, особено во делот на поморската безбедност. Тој нагласи дека европските бродови не го користеле Ормускиот теснец на начинот што го тврди Трамп и дека Италија понудила учество во мисии за заштита на пловидбата.Во Италија се распоредени околу 13.000 американски војници во неколку бази, додека Шпанија засега нема официјална реакција. Сепак, Мадрид претходно одби да дозволи користење на заеднички воени бази за напади врз Иран и беше меѓу најгласните критичари на американската политика во рамки на Европската унија.Според податоците, на крајот од минатата година во Европа биле стационирани околу 68.000 американски војници, од кои повеќе од половината – околу 36.400 – во Германија.

Свет | пред 4 дена

4 ден.

Трагедија во Тексас: петмина загинати во авионска несреќа

Пет лица загинаа при пад на мал авион што доцна во четвртокот се урна во близина на Остин, во сојузната држава Тексас, потврдија локалните власти.Несреќата се случила околу 23:25 часот по локално време во местото Вимберли, оддалечено околу 65 километри од Остин.Истрагата за падот на авионот од типот Сесна 421C ќе ја спроведат Националниот одбор за безбедност во сообраќајот и Федералната управа за авијација.На местото на несреќата веднаш излегле итните служби, а од Канцеларијата за домашна безбедност и управување со вонредни состојби на округот Хејс соопштија дека првичните информации укажуваат дека авионот се движел со голема брзина во моментот на ударот.Во меѓувреме, втор авион, кој се наоѓал во близина во моментот на несреќата, безбедно слетал во Њу Браунфелс.

Свет | пред 4 дена

4 ден.

Нова надеж за договор меѓу Иран и САД, но главниот спор може да го сруши процесот

Иран испрати нов предлог за продолжување на преговорите со САД, во обид да се придвижи процесот што со недели е во застој, но без јасни сигнали дека договор е блиску.Според иранската државна агенција ИРНА и повеќе извори, Техеран го доставил предлогот преку посредници од Пакистан. Деталите не се објавени, но станува збор за уште еден обид да се најде решение за ставање крај на конфликтот.Веста влијаеше и на енергетските пазари, при што цените на нафтата бележат пад по претходниот раст предизвикан од блокадата на Ормускиот теснец – клучна рута низ која поминува околу 20 проценти од светските резерви на нафта и гас.Иако новиот предлог покажува дека дијалогот не е целосно прекинат, останува нејасно дали ги адресира главните точки на спор. Претседателот на САД, Доналд Трамп, претходно одбил ирански предлог со кој се барало одложување на разговорите за нуклеарната програма и фокусирање на укинување на поморската блокада во Ормускиот теснец.Вашингтон инсистира нуклеарното прашање да се решава веднаш. Предлозите доставени од американскиот пратеник Стив Виткоф вклучуваат барања Иран да не преместува збогатен ураниум од погодените постројки и да не ги обновува активностите на тие локации за време на преговорите – прашање што останува главна пречка.Во меѓувреме, неизвесна останува и судбината на Ормускиот теснец. Иран го држи затворен, додека американската морнарица го блокира извозот на иранска нафта. Иранскиот врховен лидер Мојтаба Хамнеи порача дека Техеран ќе ја задржи контролата врз овој стратешки премин, што предизвикува остри реакции кај сојузниците на САД во регионот.Советникот на претседателот на Обединетите Арапски Емирати, Анвар Гаргаш, предупреди дека не може да се има доверба во еднострани решенија од Иран по, како што рече, „агресијата врз соседните земји“.И покрај тоа што примирјето е во сила од 8 април, по речиси 40 дена израелски и американски воздушни напади врз Иран и возвратни удари од Техеран, тензиите не стивнуваат. Преговорите заглавија уште по првата рунда одржана на 11 април во Пакистан.Иран веќе ја активирал противвоздушната одбрана, проценувајќи можност за ограничен американски напад, по што би следел поширок одговор. Од Иранската револуционерна гарда предупредија дека секој нов напад би довел до „долготрајни и болни удари“ врз американски цели во регионот.Во меѓувреме, администрацијата на Трамп се соочува со рокови според Законот за воени овластувања, додека во Белата куќа се разгледуваат различни сценарија – од засилена блокада и дипломатски решенија, до можни воени операции за отворање на Ормускиот теснец за трговски сообраќај.И покрај размената на предлози, и двете страни предупредуваат дека брз напредок не се очекува. САД повторуваат дека нема да дозволат развој на нуклеарно оружје, додека Иран тврди дека неговата програма е исклучиво цивилна.Новиот предлог остава простор за продолжување на разговорите, но без решавање на клучните спорови, особено околу нуклеарната програма и контролата врз Ормускиот теснец, постои ризик застојот да продолжи и дополнително да се продлабочи.

Свет | пред 4 дена

4 ден.

САД повикуваат на директни преговори меѓу Либан и Израел

Амбасадата на САД во Бејрут повика на директни преговори меѓу Либан и Израел, оценувајќи дека станува збор за „две соседни земји кои никогаш не требало да бидат во војна“.Според пораката објавена на социјалните мрежи, разговорите меѓу либанскиот претседател Жозеф Аун и израелскиот премиер Бенјамин Нетанјаху би можеле да означат почеток на национална обнова за Либан.„Либан е на пресвртница. Неговиот народ има историска можност да ја врати својата земја и да ја обликува иднината како вистински суверена и независна држава“, се наведува во објавата.Во соопштението се додава дека преговорите би му овозможиле на Либан да обезбеди конкретни гаранции за целосен суверенитет, територијален интегритет, безбедни граници, хуманитарна помош и поддршка за обнова, како и целосно воспоставување на државната власт на целата територија, со гаранции од САД.„Ова е момент Либан да одлучи за сопствената судбина. САД се подготвени да застанат покрај него додека ја користи оваа можност со доверба и мудрост. Времето за двоумење помина“, порачуваат од амбасадата.Повикот доаѓа во време на обновени судири на границата, откако Израел и милитантната група Хезболах, поддржана од Иран, повторно се во вооружен конфликт од март годинава. Хезболах извршува ракетни напади врз Израел, кој возвраќа со воздушни удари и копнена офанзива во јужен Либан.

Свет | пред 4 дена

4 ден.

Пентагон вклучува технолошки гиганти во развој на вештачка интелигенција за воени операции

Пентагон објави дека повеќе водечки технолошки компании ќе бидат интегрирани во неговите мрежни системи со високо ниво на безбедност, со цел да се подобри обработката на податоци, разбирањето на ситуациите на терен и донесувањето одлуки во сложени оперативни услови.Меѓу компаниите се СпејсЕкс, ОпенАИ, Гугл, Енвидија, Рефлекшн, Мајкрософт и Амазон веб-сервиси, кои ќе работат на системи означени со нивоа на влијание 6 и 7.Според соопштението, овие договори треба да ја забрзаат трансформацијата на американската војска кон систем во кој вештачката интелигенција има клучна улога, со цел да се задржи предноста во донесувањето одлуки во сите домени на војување.Во меѓувреме, уште една компанија од областа на вештачката интелигенција, Антропик, се најде во спор со Пентагон околу начинот на користење на нејзините алатки. Поради загриженост за безбедносните мерки, Пентагон минатиот месец ја означи како ризична и ја стави на црна листа, забранувајќи ја нејзината употреба за себе и за своите договорни партнери.Технолошкиот портал The Information објави дека Гугл се приклучил на растечката листа компании што склучиле договори со Министерството за одбрана на САД, овозможувајќи користење на нивните модели на вештачка интелигенција за доверливи задачи.Според извештајот, договорите му дозволуваат на Пентагон да ја користи вештачката интелигенција за „секоја законска владина цел“, ставајќи ја компанијата рамо до рамо со ОпенАИ и xAI, кои исто така имаат договори за работа на доверливи проекти.

Свет | пред 4 дена

4 ден.

Момче од Србија мета на навреди на интернет поради своето хоби

Јавноста реагира по појавата на голем број негативни коментари на социјалните мрежи насочени кон 11-годишниот Виктор Митиќ од Србија, кој преку интернет објавува содржини поврзани со своето хоби – плетење. Тој активноста ја практикува со поддршка од своите родители и ја споделува со пошироката публика.Неговите објави за кратко време привлекле големо внимание, при што стекнал стотици илјади следбеници и милиони прегледи. Голем дел од корисниците ги оценуваат видеата како симпатични и го поддржуваат неговото плетење, истакнувајќи ја креативноста на детето.Сепак, паралелно со популарноста, се појавил и значителен бран негативни и навредливи коментари, што довело до проблеми со неговиот профил на една од социјалните мрежи, кој бил блокиран поради масовни пријави.Во дел од коментарите се изнесуваат ставови дека плетењето не е соодветно хоби за момчиња, додека други корисници упатуваат и навреди и дискриминаторски пораки. Дел од јавните личности и свештени лица се вклучиле во дебатата со различни ставови, при што имало и извинувања, но и одбрана на детето.Случајот повторно ја отвори темата за влијанието на социјалните мрежи и алгоритмите, каде што негативните содржини често добиваат поголема видливост и брзо се шират, особено кога се насочени кон малолетни лица.И покрај негативните реакции, дел од јавноста продолжува да го поддржува Виктор и неговото хоби, истакнувајќи дека станува збор за дете кое преку плетење успеало да стекне широка популарност и внимание.

Свет | пред 4 дена

4 ден.

Охрид со модерна пумпна станица: над 20% заштеда на електрична енергија

Градоначалникот на Охрид, Кирил Пецаков, најави дека во рамки на тековните инфраструктурни проекти ќе биде финализирана новата модерна пумпна станица „Метропол“, која обезбедува над 80 проценти од водата за пиење во градот, при што се очекуваат значителни заштеди на електрична енергија и дополнителни инвестиции во водоснабдителниот систем.„Ќе го посетиме и завршувањето на проектот на новата, модерна пумпна станица, од која преку 80% од водата за пиење во Охрид се обезбедува буквално од пумпната станица „Метропол“.Станува збор за модерно снабдување, при што во моментов се поставуваат и нови филтри, кои ќе бидат приклучени на самата пумпна станица, и во суштина ќе имаме нешто повеќе од 20% заштеда на електрична енергија. Оваа година имаме уште една постапка за уште 4 помали пумпни станици, каде што се очекува вкупната заштеда на електрична енергија — во зависност од самата берза — да биде помеѓу 25% и 30%“, изјави Пецаков.Тој додаде дека Охрид во моментов буквално е градилиште, се спроведуваат и се реализираат проекти кои, во комбинираното финансирање помеѓу Владата и локалната самоуправа, изнесуваат отприлика 15 милиони евра.

Македонија | пред 4 дена

4 ден.

АНБ за случајот со синагогата: Разбиена радикална групација поврзана со „Исламска држава“

Агенцијата за национална безбедност согласно своите надлежности презеде оперативно-технички и аналитички мерки и активности со цел идентификување на мотивите и непосредните извршители на обидот за опожарување на објектот на Еврејска заедница во Скопје.„Во таа насока од страна на Агенцијата се прибраа информации и беа идентификувани лица – најверојатни извршители и нивна логистичка мрежа, како и повеќе објекти во Скопје, кои според нашите индиции, како дел од радикална групација идеолошки надоврзани на глобалната мрежа на Исламска држава, непосредно по повикот на споменатата терористичка организација од почетокот на април, презедоа насилни активности.Во соработка со ОЈО за ГОКК и МВР на 30.04.2026 г. беше спроведена акција за лишување од слобода на лица и претреси на објекти со цел ефектуирање на кривичен прогон и елиминирање на идни активности на терористичката групација.АНБ останува посветена на планот на превентивно делување и попречување на ризици и закани по националната безбедност преку навремено обезбедување на информации и преземање на активности во соработка со други надлежни институции од земјава“, информираат од АНБ.

Скопје | пред 4 дена

4 ден.

(Видео) Нов инцидент во ЗОО Скопје: Девојка се качи на оградата кај мајмуните, вработена интервенираше

На социјалните мрежи беше објавено видео на кое се гледа млада девојка качена на заштитната ограда кај делот со мајмуните во Скопската зоолошка градина.На видеото може да се забележи како една од вработените во зоолошката градина ја фаќа девојката за раката во обид да ја симне од ѕидчето на кое е качена, со цел да се избегне потенцијално опасна ситуација и вознемирување на животните.Во објавата на социјалните мрежи, авторот Стефан Кирков реагира на, како што наведува, честото непочитување на правилата од страна на посетителите.„И покрај сите препораки, табли со натписи за тоа да не се хранат и вознемируваат животните, во Скопје ЗОО постојано сме сведоци на непочитување на протоколите од страна на посетителите!Недостасува култура, едукација, недостасуваат редари и видеонадзор, како и санкционирање на сите кои не го почитуваат протоколот!Родители, наставници, учители, професори и медиуми за јавно информирање... ЕДУКАЦИЈА“, стои во објавата на Стефан Кирков.Само пред една недела, зоонегователот Виктор сподели непријатно искуство, тврдејќи дека ученици од средното училиште „Лазар Танев“ фрлале камења кон слоница, додека нивните професори седеле во кафе-објект. Во објавата тој наведе дека ваквото однесување претставува сериозен проблем и покажува недоволна грижа и почит кон животните, кои се под заштита и грижа на зоолошката градина.

Скопје | пред 4 дена

4 ден.

Мицкоски за протестот на ССМ: Тадиционални првомајски активности, демократско право е да се бараат подобри услови

Премиерот Христијан Мицкоски изјави дека денешните синдикални протести ги смета за традиционални првомајски активности, нагласувајќи дека правото на протест е демократско право кое Владата го почитува.„Дел од тие синдикати што денеска ќе ги видите на протести беа со мене на прес-конференции кога заеднички постигнувавме договори за поголеми права за вработените и повисоки плати.Така што, јас денешното нивно протестирање го класифицирам во групата на традиционални првомајски протести, кои, впрочем, и синдикатите треба да ги прават. Правото на секој граѓанин е да протестира и да се бори за повисоки права. Ние сме демократска држава, ова е демократска влада, така што ние тоа право го почитуваме“, вели Мицкоски.

Македонија | пред 4 дена

4 ден.

295526049_1046824489536443_4715120062988649436_n

„Компании кои користат попуст реекспортирале гориво во соседството“, Мицкоски предупредува за можни злоупотреби

Премиерот Христијан Мицкоски изјави дека Владата по напорни и тешки преговори успеала да се договори со ОКТА за да продолжи попустот кој претходно беше договорен до 18 мај. Тој исто така изјави дека се проверуваат информациите според кои дел од компаниите кои користат попуст за набавка на гориво од OKTA вршеле реекспорт на бензин и дизел во соседните земји.„По напорни и тешки преговори со ОКТА успеавме да го продолжиме попустот кој претходно веќе беше договорен до 18 мај. Тоа е дополнителни 2 денара по литар за бензините и 3 денара по литар за дизелот. Тоа ќе трае до 18 мај; до тогаш имаме договор. За потоа ќе видиме — се надеваме дека ќе заврши кризата и дека ќе можеме да влеземе во една нормална состојба.Важно е дека попустите продолжуваат за сите оние компании кои практично добиваат од ОКТА бензин и дизел. Она што мене ме изненади, а го проверуваме дали е точно, е фактот дека некои од компаниите кои го користат овој попуст прават реекспорт на бензините и дизелот во соседните држави. Апелирам, ако е тоа точно, а проверуваме дали е точно, дека нема потреба тоа да го прават, бидејќи ние не ги затворивме границите за граѓаните од нашите соседи. Tие и сега слободно точат гориво на бензинските пумпи во Македонија.Има држави кои забранија реекспорт, односно износ на нафта и нафтени деривати. Ние тоа не го направивме како држава, така што оние слики кои во минатото беа — кога македонските граѓани одеа во соседството да се вакцинираат за време на КОВИД-кризата — сега имаме спротивна слика: гледаме редици како од соседните држави доаѓаат кај нас за да ги наполнат своите резервоари со бензин и со дизел. Така што нема потреба од ваков тип шпекулативно внесување“, изјави Мицкоски.

Македонија | пред 4 дена