Најнови вести

10 мин.

СДСМ со критики до Владата: „Роаминг наместо реформи“

СДСМ преку соопштение ја обвини Владата, предводена од ВМРО-ДПМНЕ, дека наместо да спроведува суштински реформи за приближување кон Европската Унија, се обидува да прикаже како сопствен успех процеси кои, според опозициската партија, одамна се започнати и претставуваат европски обврски.Од СДСМ реагираа на најавите поврзани со иницијативата „Роаминг како дома“, оценувајќи дека станува збор за европска политика што ја спроведуваат сите земји кандидати за членство во ЕУ.„Ова не е проект покренат и реализиран од ВМРО. Процесот е потпишан и започнат уште во времето на владата, предводена од СДСМ“, велат од партијата.Според нив, додека власта се фали со намалување на трошоците за роаминг, граѓаните се соочуваат со други проблеми.„Додека се фалат со роаминг, граѓаните немаат пари за патувања, а оние што патуваат чекаат и по 10 часа на граница“, наведуваат од СДСМ.Партијата ја критикува и работата на Владата во делот на реформите во правосудството, посочувајќи дека предложените законски решенија не добиле позитивни оценки.„Единствениот закон што се обидоа да го протуркаат – Законот за Судскиот совет, Европа го врати на повторно реформирање. Толку за нивната посветеност на европскиот пат“, се наведува во реакцијата.Од СДСМ обвинуваат дека ВМРО-ДПМНЕ нема вистинска волја за независно и европско правосудство, бидејќи, како што тврдат, тоа би значело поголема одговорност и крај на политичките влијанија врз институциите.„Доста е со лаги. Реформи сега“, порачаа од опозициската партија.

Македонија | пред 10 минути

28 мин.

Токсичниот инсектицид ланате е отровот што деца го пронајдоа во близина на детско игралиште во Кисела Вода, утврди Институтот за судска медицина

Институтот за судска медицина потврдил присуство на високо токсичниот инсектицид метомил, во јавноста познат како ланате, во парчињата салама пронајдени во близина на детско игралиште во населбата Расадник во Кисела Вода, информираат од ЈП Лајка.Станува збор за инсектицид кој е одамна забранет за употреба и увоз во Македонија и во земјите од Европската Унија поради неговата екстремна токсичност и честата злоупотреба за труење животни.Од ЈП Лајка потсетуваат дека токму во Расадник на 15 мај беше регистрирано масовно труење, при што угинаа повеќе домашни и улични кучиња и мачки, а отровната супстанца била расфрлана и пред влезови на станбени згради. Благодарение на предупредувањата што претходно ги споделиле совесни граѓани, децата кои сега ги забележале сомнителните парчиња салама веднаш ги известиле своите родители.Загрижени родители потоа се обратиле до ЈП Лајка, по што храната била доставена на токсиколошка анализа во Институтот за судска медицина, каде што било потврдено присуството на ланате.„Станува збор за отров од кој животните умираат во агонија, со појава на грчеви, пена од уста, губење сила и гушење. Опасен е при голтање, вдишување и контакт преку кожа, а само еден грам од овој инсектицид може да предизвика смрт кај човек тежок 70 килограми“, предупредуваат од ЈП Лајка.Оттаму истакнуваат дека труењето со ланате во современите држави се третира како еколошки криминал и сериозна закана по јавното здравје, а потсетуваат дека и во Македонија веќе се регистрирани смртни последици кај луѓе кои дошле во контакт со оваа супстанца.ЈП Лајка апелира до надлежните институции итно да утврдат кој ја расфрла отровната материја на јавни површини и на кој начин таа се внесува во земјава.До граѓаните е упатен повик, доколку забележат сомнителна храна со бела прашкаста материја, да не ја допираат без заштитни ракавици, веднаш да ги оддалечат децата и животните, случајот да го пријават во МВР и ЈП Лајка, да ја фотографираат локацијата и да ја предупредат јавноста.Од претпријатието изразуваат сериозна загриженост, нагласувајќи дека во овој случај не се загрозени само животите на животните, туку и безбедноста на сите граѓани, особено на децата.

Македонија | пред 28 минути

33 мин.

Воен аналитичар: Иран не е поразен, Техеран сè уште има силен адут

Најновите ирански напади врз американски воени цели на Блискиот Исток покажуваат дека Техеран не е поразен и покрај очекувањата во Вашингтон, оценува воениот аналитичар на Sky News, Шон Бел.Според Бел, американскиот претседател Доналд Трамп верувал дека заедничката воена кампања на САД и Израел ќе доведе до целосно слабеење на иранските воени капацитети и ќе го принуди Техеран на отстапки.Сепак, по најновите одмазднички напади врз американски цели во Бахреин, Јордан и Кувајт, ваквата проценка повеќе не изгледа убедливо.„Она што е очигледно од овие напади и од сè што се случува е дека Иран е далеку од тоа да биде поразен“, изјави Бел.Тој оценува дека Иран и понатаму располага со значителни капацитети за одговор, што му дава одредена предност во евентуалните идни дипломатски разговори.„Иран сега има одредена преговарачка моќ, што значи дека секој иден разговор неизбежно ќе бара одредени компромиси. Тоа ќе му биде многу тешко прифатливо на претседателот Трамп“, посочи аналитичарот.Според Бел, актуелниот развој на настаните укажува дека конфликтот влегува во нова фаза, во која, покрај воените активности, сè поголема улога ќе имаат дипломатските напори и барањето политичко решение меѓу Вашингтон и Техеран.

Свет | пред 33 минути

38 мин.

Несреќата во Илинден доби судска разврска: Возач на БМВ ќе одговара по смртта на мопедист

СВР Скопје поднесе кривична пријава до Основното јавно обвинителство Скопје против 23-годишниот А.С. од Скопје, поради основано сомнение дека сторил кривично дело против безбедноста во сообраќајот.Како што информираат од МВР, кривичната пријава се однесува на сообраќајната несреќа што се случила на 28 мај годинава, околу 23 часот, на улицата „34“ во населбата Илинден.Во несреќата учествувале патничко возило „БМВ“ со скопски регистарски ознаки, управувано од пријавениот А.С., и мопед управуван од 20-годишниот П.С., двајцата од населбата Илинден.По судирот, возачот на мопедот се здобил со тешки телесни повреди и бил пренесен во Комплексот клиники „Мајка Тереза“, каде што му била укажана лекарска помош. Сепак, и покрај напорите на лекарите, тој на 1 јуни им подлегнал на повредите.Од МВР соопштија дека против 23-годишниот скопјанец е поднесена кривична пријава поради основано сомнение за кривично дело казниво по член 300 став 2, во врска со член 297 став 1 од Кривичниот законик.

Македонија | пред 38 минути

40 мин.

Трамп: „Ништо не поминува без наша дозвола, тоа е челичен ѕид“

Американскиот претседател Доналд Трамп продолжи со серијата драматични објави на социјалната мрежа Truth Social, прогласувајќи ја американската поморска блокада на Иран за „најуспешна во историјата на поморското војување“.Во најновата порака, објавена само неколку часа по масовните ирански одмазднички напади врз американски цели на Блискиот Исток, Трамп порача дека ниту еден брод не може да помине без одобрение од САД.„Лажните медиуми одбиваат да известуваат колку е ефикасна поморската БЛОКАДА на САД – најуспешната блокада во историјата на поморското војување. НИШТО НЕ ПОМИНУВА освен ако ние не го дозволиме тоа. ТОА Е ЧЕЛИЧЕН ЅИД!“, напиша Трамп.Тој дополнително оцени дека Иран се наоѓа пред целосен економски и политички колапс.„Иран не работи ништо, не ја плаќа својата војска, ниту која било од своите сметки и брзо станува ПРОПАДНАТА НАЦИЈА!“, наведе американскиот претседател.Објавата ја заврши со невообичаена порака: „Многу нафта излегува надвор. Слава на Алах! Претседател Доналд Џ. Трамп“.Ова следува по неговата претходна објава, во која тврдеше дека иранските вооружени сили се „целосно поразени“, додавајќи дека иранската морнарица и воздухопловство практично повеќе не постојат.„Тие се целосно поразени. Иран е само приказна без дела. Насилникот на Блискиот Исток е МРТОВ!!!“, напиша Трамп, обвинувајќи го Техеран дека предолго го одложувал постигнувањето договор со Вашингтон.Сепак, неговите триумфални изјави доаѓаат во момент кога ситуацијата на теренот укажува на натамошна ескалација на конфликтот. Иранските сили и Револуционерната гарда претходно извршија напади со проектили и дронови врз американски воени цели во регионот, по што беа активирани противвоздушните системи во повеќе блискоисточни држави.Во меѓувреме, неизвесноста околу состојбата во Ормускиот Теснец продолжува да создава притисок врз глобалните енергетски пазари, а стравувањата од поширок регионален конфликт остануваат високи.

Свет | пред 40 минути

43 мин.

Трамп со остра порака до Техеран: „Иран предолго чекаше, сега ќе ја плати цената“

Американскиот претседател Доналд Трамп упати нови остри критики кон Иран, оценувајќи дека Техеран предолго го одложувал постигнувањето договор со Соединетите Американски Држави и предупредувајќи дека поради тоа „сега ќе ја плати цената“.Во објава на социјалната мрежа Truth Social, Трамп повторно изнесе тврдења дека иранските вооружени сили се во целосен хаос и дека нивните поморски и воздушни капацитети речиси веќе не постојат.„Тие се целосно поразени. Иран е само приказна без дела. Насилникот на Блискиот Исток е мртов!!!“, напиша Трамп.Тој додаде дека Иран „предолго одолговлекувал“ со постигнување договор кој, според него, би бил поволен за иранската страна.„Предолго чекаа да постигнат договор. Сега ќе мора да ја платат цената!!!“, порача американскиот претседател, без да прецизира на што конкретно се однесува неговото предупредување.Изјавите на Трамп доаѓаат во период на засилени тензии меѓу Вашингтон и Техеран, по размената на воени удари и контраудари во регионот и неизвесноста околу можноста за продолжување на дипломатските разговори меѓу двете земји.

Свет | пред 43 минути

57 мин.

29 мостови и 15 тунели: Интензивно напредува изградбата на пругата Скопје – Софија

Изградбата на втората делница од железничката пруга кон Бугарија, на потегот Бељаковце – Крива Паланка, се одвива со засилена динамика, а според вицепремиерот и министер за транспорт Александар Николоски, станува збор за еден од најголемите и најсложени инфраструктурни проекти што се реализираат во Македонија.„Интензивно се гради пругата Скопје – Софија. Втората делница претставува вистински градежен и инженерски подвиг“, истакна Николоски.Проектот опфаќа изградба на три нови железнички станици – во Романовце, Кратово и Гиновце, како и 29 мостови, 15 тунели, шест надвозници и три подвозници.Според Николоски, комплексноста на теренот и обемот на градежните зафати ја прават оваа делница една од најпредизвикувачките инвестиции во железничката инфраструктура во државата.„Станува збор за исклучително предизвикувачки проект кој има огромно значење за регионалното поврзување и развојот на транспортната инфраструктура“, нагласи тој.Со изградбата на железничкиот Коридор 8, Македонија треба да добие директна железничка врска со Бугарија, што ќе придонесе за подобра поврзаност, побрз транспорт на патници и стоки и засилување на економската соработка во регионот.„Ја градиме Македонија“, порача Николоски.

Македонија | пред 57 минути

59 мин.

„Доста ни е од бучавата“: Жителите на Капиштец утре излегуваат на протест против прекумерната бучава

Револтирани од долгогодишната бучава и, како што велат, недоволната реакција на институциите, жителите на скопската населба Капиштец утре, 11 јуни, ќе одржат мирен протест.Собирот е закажан за 19 часот кај кошаркарското игралиште, а го организира граѓанската иницијатива „За пристоен Капиштец“, која преку социјалните мрежи ги повика жителите масовно да се приклучат и јавно да го искажат своето незадоволство.„Доста ни е од бучавата, сега ние ќе бидеме гласни. Додека нас не држат будни, институциите спијат“, порачаа организаторите во повикот до граѓаните.Жителите бараат доследна примена на законските прописи, почести и поефикасни инспекциски контроли, како и поголема заштита на јавниот ред и мир. Според нив, целта на протестот е да се обезбеди мирна и безбедна средина за живот, особено за најмладите.Од иницијативата посочуваат дека проблемот со прекумерната бучава трае со години и е најизразен во вечерните и ноќните часови, кога гласната музика од угостителските објекти и собирањето на поголеми групи луѓе во јавниот простор сериозно го нарушуваат секојдневието на жителите.Тие нагласуваат дека не бараат привилегии, туку еднаков третман и доследно спроведување на законите од страна на надлежните институции.Капиштец, како една од најгусто населените населби во Скопје, во последните години сè почесто е во фокусот на јавноста поради поплаките за бучава, која жителите ја оценуваат не само како комунален, туку и како сериозен здравствен и еколошки проблем.

Скопје | пред 59 минути

1 час

Уапсен 33-годишник од Карбинци: Со месеци сексуално злоупотребувал дете и му пренел заразна болест

Триесет и тригодишен жител на село во општина Карбинци е приведен и кривично гонет поради сомнение дека извршил сексуална злоупотреба врз дете помладо од 15 години, при што, според истрагата, му пренел и заразна болест.Од Министерството за внатрешни работи информираа дека на 8 јуни во 13:50 часот полициски службеници од СВР Штип го лишиле од слобода Б.Т. (33).Според сомневањата, во периодот од јануари до март годинава, додека престојувал во домот на едно семејство во светиниколско село, тој вршел полови дејствија врз нивната малолетна ќерка, ја соблекувал и ја допирал по телото.Од МВР наведуваат дека при прегледите извршени од Институтот за судска медицина во Скопје било потврдено дека на детето му била пренесена заразна болест, а истата била констатирана и кај осомничениот.Осомничениот е задржан во полициска станица, а по целосното документирање на случајот против него е поднесена кривична пријава поради основано сомнение за сторени кривични дела „силување на дете кое не наполнило 15 години“ по член 188 и „пренесување заразна болест“ по член 205 од Кривичниот законик.

Македонија | пред 1 час

1 час

(Видео) „Силните идентитети не напаѓаат други идентитети“ – порака на Муцунски од Софија

Министерот за надворешни работи и надворешна трговија, Тимчо Муцунски, порача дека во Европа на 21. век идентитетите не треба да се градат преку негирање и напади врз другите, туку преку меѓусебна почит и прифаќање на различностите.Говорејќи за односите меѓу Македонија и Бугарија, Муцунски истакна дека силните идентитети немаат потреба да се потврдуваат на сметка на туѓите.„Јас сум цврсто убеден, како човек, дека силните идентитети немаат потреба да се градат преку напади на туѓите идентитети. Напротив, во Европа во 21. век треба да имаме капацитет да ги славиме нашите различности, да се почитуваме и да не се врзуваме со прашања поврзани со историјата, идентитетот и јазикот“, рече Муцунски.Тој оцени дека взаемен интерес и на Македонија и на Бугарија е двете држави да се движат напред кон полноправно членство во Европската Унија.„И нашата држава, но и вашата држава имаат многу да добијат од тој процес. Имаме најпозитивни намери да соработуваме во областа на одбраната и безбедноста, економијата и образованието“, нагласи министерот.Муцунски посочи дека како универзитетски професор учествувал на бројни меѓународни конференции, вклучително и во Софија, и токму затоа верува дека случувањата од последните години вештачки создале поделби меѓу народите од двете држави.„Она што е значајно е да имаме поглед кон иднината, а не да останеме заробени во прашања од минатото. Прашања поврзани со идентитетот, историјата и јазикот, бидејќи имаме иднина која треба да нѐ обедини“, истакна тој.Осврнувајќи се на договорените решенија од претходните години, Муцунски нагласи дека односите меѓу двете земји треба да се темелат на меѓусебна доверба и искрена соработка.„Треба да функционираме во систем кој ќе значи меѓусебна доверба“, порача министерот.

Настани | пред 1 час

1 час

Од депонија до мега парк: Бутел добива нова зелена оаза на 8.000 квадратни метри

Простор кој со децении бил запуштен и претворен во депонија, наскоро ќе добие сосема нов лик. Во скопската општина Бутел е во тек изградбата на нов мега парк, кој ќе се простира на површина од 8.000 квадратни метри и ќе понуди содржини за граѓани од сите возрасти.Градоначалникот на Скопје, Орце Ѓорѓиевски, заедно со градоначалникот на Општина Бутел, Дарко Костовски, изврши увид во градежните активности на локацијата долж булеварот „Христијан Тодоровски-Карпош“.„Кога гледав како овој простор со децении стои запуштен, заборавен и оставен на безидејноста, знаев дека мора да добие нов живот. Си дадовме збор дека ова место повеќе нема да биде симбол на негрижа, туку пример за тоа како се работи кога има визија, волја и љубов кон градот“, истакна Ѓорѓиевски.Според најавите, новиот парк ќе содржи богати зелени површини, плоштад, детски катчиња, пешачки патеки, фитнес-зони и повеќе содржини наменети за деца, млади, семејства и пензионери.Градоначалникот посочи дека парковите не се само места за одмор и рекреација, туку простори каде што се создаваат спомени, се поттикнува дружењето и се подобрува квалитетот на животот на граѓаните. Тој нагласи дека инвестициите во зеленилото придонесуваат за почист воздух, поздрава животна средина и намалување на урбаната жештина.Ѓорѓиевски потсети дека овој проект е еден од четирите мега паркови предвидени во неговата програма, додавајќи дека паралелно се планира изградба на околу 50 помали паркови низ сите скопски општини, од кои дел веќе се реализираат.„Бутел добива нова зелена приказна, а Скопје уште еден простор со кој ќе може да се гордее“, порача градоначалникот.

Скопје | пред 1 час

1 час

Буџетот за универзитетите скокна на 8 милијарди денари, најавени нови реформи во високото образование

Македонското високо образование со години не ги дава посакуваните резултати, а токму затоа се започнати суштински и системски реформи насочени кон подобрување на квалитетот на наставата, науката и условите за работа на академскиот кадар, порача министерката за образование и наука Весна Јаневска.Говорејќи на промоцијата на АРБУ – платформата за академско рангирање на балканските истражувачи и универзитети врз основа на цитираност на Google Scholar, иницијатива на проф. д-р Марјан Бојаџиев, Јаневска истакна дека паралелно се работи на унапредување на регулативата, зголемување на буџетот и обезбедување достоинствен третман на професорите.„Длабоко верувам дека имаме квалитетен професорски кадар. Само им треба мал поттик за да ги претворат предавањата во инспирација за студентите“, рече Јаневска.Според неа, поддршката ќе биде насочена кон подобрување на материјалните услови, стимулирање и наградување на наставно-научниот труд, професионален развој, меѓународна мобилност и јасни можности за кариерен напредок.Министерката посочи дека новиот Закон за високото образование ќе обезбеди академска автономија, транспарентни критериуми за евалуација и напредување, како и механизми за поддршка на младите истражувачи.„Поттикнуваме поголема научна продукција и меѓународна видливост, што носи повеќе студенти, дополнителни приходи, нови проекти и поквалитетна академска размена“, истакна таа.Јаневска нагласи дека реформите се проследени и со конкретна финансиска поддршка. Додека буџетот за високото образование во 2022 година изнесувал помалку од три милијарди денари, во 2026 година за универзитетите се издвоени осум милијарди денари. Буџетот за наука, пак, од 380 милиони денари во 2024 година е зголемен на 773 милиони денари во 2026 година.„И секоја година ќе расте. Само со силно единство можеме да изградиме високо образование какво што заслужуваат младите и Македонија“, порача министерката.На настанот се обрати и директорката на Агенцијата за квалитет во високото образование, Христина Серафимовска, а присуствуваа и најцитираните македонски научници Сашко Кедев и Веланд Рамадани, како и проф. д-р Ивица Пуљак од Хрватска, кој според платформата е меѓу најистакнатите научници во регионот.

Македонија | пред 1 час

1 час

Иран и САД мораат да излезат од состојбата „ниту војна ни мир“, изјави иранскиот претседател

Иранскиот претседател Масуд Пезешкијан порача дека Техеран и Вашингтон мора да најдат излез од сегашната состојба на долготрајни тензии, оценувајќи дека односите „ниту војна, ниту мир“ повеќе не се одржливи.Како што пренесе полуофицијалната иранска новинска агенција „Мехр“, Пезешкијан истакнал дека е неопходно да се дојде до политичко решение и дека преговорите се единствениот пат напред.„Ако сакаме да излеземе од состојбата ниту војна, ниту мир, што треба да направиме? Ако не разговараме, која е алтернативата?“, праша иранскиот претседател.Тој додаде дека токму врз таа основа врховниот лидер на Иран дал согласност за продолжување на разговорите, испраќајќи јасна порака: „Одете и решете го прашањето“.Од примирјето што стапи во сила на 8 април, Техеран континуирано ги обвинува Израел и САД за нарушување на договорените услови. Според иранските власти, Вашингтон изведувал напади врз ирански цели и во периодот кога се воделе индиректни преговори, додека Израел продолжил со интензивните операции во Либан и покрај ограничувањата предвидени со договорот.Во меѓувреме, американскиот претседател Доналд Трамп во повеќе наврати тврдеше дека договор со Иран е на дофат, но засега нема конкретни показатели дека разговорите довеле до значителен напредок.Изјавата на Пезешкијан доаѓа во момент на засилени регионални тензии и растечки меѓународни повици за враќање на дипломатијата како средство за спречување на поширока ескалација на конфликтот.

Свет | пред 1 час

1 час

Mozzart и годинава ја продолжува мисијата „Фудбалот е повеќе од игра“ – Битола добива нов мини-пич терен!

По успешните проекти во Охрид, Велес и Свети Николе, иницијативата на Mozzart „Фудбалот е повеќе од игра“ пристигнува во Битола – град со богата спортска традиција и срце кое чука за фудбалот.Новиот терен ќе го носи името на легендарниот Петар Упалевски – Упале, човек кој со својата страст и посветеност остави трага што инспирира генерации.Свеченото отворање ќе се одржи во петок, 12 јуни 2026 со почеток во 18:00 часот.Локација: Улица Крушевска Република бб – спортски комплекс „Петар Милошевски“Ова не е само отворање на терен – ова е празник на спортот, на младоста и на заедништвото. Ги покануваме сите љубители на играта, семејствата и младите да бидат дел од овој радосен момент и заедно да ја почувствуваме магијата на новиот почеток.Со секој ваков проект, Mozzart ја покажува својата искрена посветеност кон поддршка на младите таленти, развој на спортот и зајакнување на локалната заедница. Фудбалот е повеќе од резултат – тоа е емоција, тоа е сила што нè зближува и нè учи дека заедно можеме да постигнеме големи нешта.Да славиме иднина полна со радост, тимски дух и секој гол што ќе запали искра во очите на новата генерација. Фудбалот е повеќе од игра – тоа е љубов, тоа е животна лекција во движење!ПР

Магазин | пред 1 час

1 час

Арбен Фетаи повеќе не е вицепремиер, Собранието ја констатираше оставката

Без присуство на Арбен Фетаи и без објаснување од собраниската говорница, пратениците денеска ја констатираа оставката на досегашниот вицепремиер задолжен за добро владеење.Фетаи претходно преку јавна порака му се заблагодари на премиерот Христијан Мицкоски за можноста да биде дел од владиниот состав.Неговото заминување од функцијата отвори дополнителни прашања во јавноста, откако министерот за здравство Азир Алиу изјави дека Фетаи повеќе од два месеци не доаѓал на работа во Владата.Премиерот Мицкоски не ја потврди оваа информација, а засега нема официјален одговор дали Фетаи во периодот кога наводно не ги извршувал своите работни обврски примал плата.Воедно, Мицкоски не ја исклучи можноста поранешниот вицепремиер повторно да биде ангажиран во државните структури, посочувајќи дека Фетаи би можел да добие улога на специјален претставник во Брисел.Оставката на Фетаи доаѓа во период на политички преструктурирања во Владата, а околностите околу неговото отсуство и идниот ангажман остануваат без конкретно образложение.

Македонија | пред 1 час

2 час.

Од мастер-дипломи до свидетелства: Разоткриена криминална група што фалсификувала образовни документи во Србија

Српската полиција разби организирана криминална група осомничена за изработка и продажба на лажни дипломи и други образовни документи, при што се уапсени четири лица, а откриена е и илегална печатница во Белград.Како што соопшти Министерството за внатрешни работи на Србија, припадници на Управата за криминалистичка полиција (УКП) и СБПОК, по налог на Јавното обвинителство за организиран криминал, ги уапсиле Б.Д. (52), кој се смета за организатор на групата и е одговорно лице во средно училиште во Нови Пазар, како и И.П. (65), М.Н. (71) и В.Ѓ. (72).Според истрагата, од октомври 2025 година до денес, осомничените во илегална печатница на територијата на Белград изработиле повеќе од 120 фалсификувани документи, меѓу кои свидетелства, дипломи од средни, виши и високообразовни установи, уверенија за положени испити и мастер-дипломи.Документите биле наменети за нивните нарачатели да ги користат во правниот промет како вистински и законски стекнати исправи. На овој начин, осомничените се стекнале со противправна имотна корист од околу 20 милиони динари.При претресите на повеќе локации во Белград и Нови Пазар, полицијата пронашла десетици фалсификувани документи, мобилни телефони, печати, како и целосна опрема за изработка на лажни исправи во илегалната печатница.Запленети се и 44.550 евра во готовина.По налог на обвинителството, на осомничените ќе им биде одреден притвор до 48 часа, по што со кривична пријава ќе бидат изведени пред надлежното обвинителство за организиран криминал поради сомнение за здружување за вршење кривични дела и продолжено кривично дело фалсификување исправи.

Балкан | пред 2 часа

2 час.

Рашфорд сака да остане, но Барселона ја затвора касата

Маркус Рашфорд, според актуелната ситуација, ќе се врати во Манчестер Јунајтед, откако Барселона одлучи да не ја активира откупната клаузула од 30 милиони евра. Како што пренесува познатиот трансфер-инсајдер Фабрицио Романо, рокот за активирање на клаузулата истекува за пет дена.Сепак, тоа не значи дека англискиот репрезентативец дефинитивно ќе ја заврши својата епизода на „Камп Ноу“. Барселона и натаму е заинтересирана за неговите услуги и е подготвена да бара алтернативно решение со Манчестер Јунајтед.Една од опциите што се разгледуваат е нов договор за позајмица, доколку двата клуба успеат да постигнат договор околу условите за продолжување на соработката.Според информациите, одлуката на каталонскиот клуб е, пред сè, финансиска, а не спортска. Барселона сака приоритет да им даде на други позиции во тимот и во моментов не е подготвена веднаш да издвои 30 милиони евра, додека неколку важни трансфер-зделки остануваат отворени.Од друга страна, Рашфорд наводно сака да остане во Барселона и повеќе би сакал да ја продолжи кариерата во Каталонија отколку трајно да се врати на „Олд Трафорд“.Ситуацијата дополнително ја усложнува доаѓањето на Ентони Гордон, како и фактот дека Рафиња и Ламин Јамал остануваат клучни фигури во офанзивните планови на тренерот Ханси Флик. Поради тоа, сè уште не е јасно каква улога би имал Рашфорд во тимот следната сезона.Еден од главните фактори во целата приказна е и желбата на Барселона да го ангажира Хулијан Алварез од Атлетико Мадрид. Аргентинецот се смета за приоритетна цел на клубот, но неговиот трансфер би барал значителни финансиски средства, што директно би влијаело врз можноста Рашфорд да остане во клубот.Во меѓувреме, англискиот напаѓач е фокусиран на настапот на Светското првенство, а конечната одлука за неговата иднина се очекува да биде донесена по завршувањето на турнирот. Дотогаш, откупната клаузула на Барселона ќе истече, а секој евентуален продолжеток на соработката ќе бара нови преговори со Манчестер Јунајтед.

Спорт | пред 2 часа

2 час.

Скриен Gmail трик што малкумина го знаат: Добијте „бесконечен“ број е-пошти без нови профили

Голем број корисници и натаму отвораат нови Gmail сметки за онлајн купување, претплати и регистрации, иако популарниот сервис со години нуди функција што го прави тоа непотребно.Една од помалку познатите карактеристики на Gmail е тоа што системот ги игнорира точките во адресата на е-пошта. Така, адресите „ime.prezime@gmail.com“, „imeprezime@gmail.com“ или „ime.pre.zime@gmail.com“ за Google претставуваат една и иста адреса, а сите пораки пристигнуваат во истото сандаче.Уште покорисна е можноста за користење на таканаречени алијас-адреси со знакот „+“. Доколку вашата адреса е „imeprezime@gmail.com“, можете да се регистрирате како „imeprezime+kupuvanje@gmail.com“, „imeprezime+netflix@gmail.com“ или со која било друга комбинација.Иако различните интернет-сервиси најчесто ги третираат како посебни адреси, сите пораки повторно ќе пристигнуваат во вашето главно Gmail сандаче. На тој начин полесно ќе знаете преку кој сервис сте ја користеле одредената адреса.Овој трик може да помогне и во заштитата на приватноста. Ако почнете да добивате несакани пораки на адреса што сте ја користеле само на една веб-страница, лесно ќе откриете од каде вашата е-пошта можеби завршила кај маркетинг-компании или други испраќачи.Најдобро од сè е што не е потребно никакво дополнително подесување. Доволно е при регистрација на нов сервис да додадете точка или ознака со знакот „+“ во постојната Gmail адреса и, во повеќето случаи, ќе бидете препознаени како нов корисник, додека сите пораки ќе продолжат да пристигнуваат на истиот профил.Иако оваа можност постои со години, многумина сè уште не знаат за неа и непотребно отвораат нови Gmail сметки за работи што можат да ги решат за само неколку секунди.

Магазин | пред 2 часа

2 час.

„Да се стопираат законите за дата-центри, огромна потрошувачка на струја, а мала корист за граѓаните“, вели Мециновиќ

Пратеникот од Левица, Амар Мециновиќ, побара од Собранието да ги повлече од дневен ред предложените измени на Законот за градење и Законот за урбанистичко планирање, кои, според него, отвораат простор за изградба на големи дата-центри без доволна транспарентност и јавна дебата.Мециновиќ оцени дека јавноста нема доволно информации за проектите, инвеститорите, нивните енергетски потреби и економските ефекти, поради што не треба да се носат законски решенија без претходна анализа и вклучување на граѓаните.„Пред да се одобрат големи центри за податоци во странска сопственост, Македонија треба да ги објави сите проектирани потреби за електрична енергија и вода, даночните аранжмани, влијанието врз вработувањето, како и структурата на сопственост и инфраструктурните барања“, изјави тој.Според пратеникот, најголем проблем е недостигот од транспарентност околу целиот процес, бидејќи, како што рече, сè уште нема јасни информации за тоа кои се инвеститорите, каде би биле лоцирани дата-центрите и какви обврски би презела државата.Тој предупреди дека ваквите капацитети можат да станат големи потрошувачи на електрична енергија, без притоа да донесат значителни придобивки за граѓаните.„Не знаеме колку мегавати ќе трошат овие центри, колкав дополнителен увоз на струја ќе биде потребен и кој ќе ја финансира новата инфраструктура – далекуводи и трафостаници – што државата ќе треба да ја изгради“, рече Мециновиќ.Според Левица, енергетските ресурси треба да се насочат кон домаќинствата, јавните услуги и домашното производство, наместо да бидат ставени во функција на профитот на мултинационалните компании.„Овде има многу капитал, но малку работни места. Во фазата на изградба ќе има привремени вработувања, но по пуштањето во работа бројот на вработени останува релативно мал“, истакна тој.Мециновиќ оцени дека доколку државата обезбедува земјиште и инфраструктура под поволни услови, граѓаните имаат право да очекуваат значителен економски бенефит.„Ова е приватизација на добивката и социјализација на трошоците. Македонија ќе ја развива инфраструктурата, а некој друг ќе го извлекува профитот“, нагласи пратеникот.Од Левица сметаат дека пред донесување на ваквите законски измени мора да се отвори широка јавна расправа за нивното влијание врз енергетскиот систем, економијата и развојните приоритети на државата.„Прашањето е дали овие мегавати треба да се насочат кон дата-центри или кон производствени капацитети, прехранбената индустрија, медицинскиот сектор и јавната инфраструктура. Затоа бараме овие точки да бидат повлечени од дневниот ред и јавноста целосно да се вклучи во дебатата“, порача Мециновиќ.

Македонија | пред 2 часа

2 час.

Велешанец фатен при обид за кражба во црква

Четириесет и тригодишен жител на велешкото село Бузалково, со живеалиште во Скопје, е лишен од слобода откако бил затекнат при обид да изврши кражба во црква кај местото викано „Ветерско“, информираат од Министерството за внатрешни работи.Инцидентот се случил ноќеска околу 2:30 часот, кога полициски службеници од СВР Велес, во близина на наплатната станица Сопот на автопатот Скопје – Велес, го забележале Д.М. (43) како излегува од патничко возило „Фолксваген туран“ со скопски регистарски ознаки и со метален предмет се обидува насилно да влезе во црковен објект.Откако ги забележал полициските службеници, осомничениот се обидел да се оддалечи од местото, но по преземените мерки и активности возилото било запрено, а тој бил приведен во полициска станица.При службениот разговор, Д.М. го признал делото, а при извршениот преглед кај него биле пронајдени пари и предмети за кои постои сомневање дека биле наменети за извршување на кражбата.За случајот бил известен јавен обвинител, а по неговото целосно документирање против осомничениот ќе биде поднесена соодветна кривична пријава.

Македонија | пред 2 часа

2 час.

Пожар на танкер кај брегот на Оман: Двајца членови на екипажот исчезнаа

Двајца членови на екипажот се водат како исчезнати откако избувнал пожар на танкер што пловел во близина на брегот на Оман, соопшти британската организација за следење на поморскиот сообраќај „United Kingdom Maritime Trade Operations“ (UKMTO).Според информациите, пожарот избувнал во машинскиот оддел на танкерот, кој во моментот на инцидентот се наоѓал на околу 37 километри североисточно од оманскиот град Сохар.Од UKMTO потврдија дека во несреќата има најмалку една жртва, но засега не се објавени детали за идентитетот на лицето ниту за тежината на повредите кај останатите членови на екипажот. Причината за избувнувањето на пожарот сè уште не е позната, а надлежните служби спроведуваат истрага за утврдување на околностите под кои се случил инцидентот.Несреќата се случува во период на зголемени тензии во регионот на Ормутскиот теснец, еден од најзначајните светски поморски коридори за транспорт на нафта и стоки.Од стапувањето во сила на примирјето во април, американските и иранските сили повеќепати спроведуваа операции насочени кон трговски бродови што минуваат низ ова подрачје. Во меѓувреме, двете страни продолжуваат со паралелни поморски блокади, поради што илјадници трговски пловила се соочуваат со доцнења и ограничувања при минувањето низ овој стратешки важен морски премин.

Свет | пред 2 часа

2 час.

Инфлацијата е под контрола, резервите се повисоки: Славески со порака од Кина

Гувернерот на Народната банка, Трајко Славески, од Шангај порача дека зачувувањето на ценовната стабилност останува најважниот предуслов за одржлив економски раст, особено во време на засилена глобална неизвесност и геополитички турбуленции.Славески учествуваше на панел-дискусијата „Трасирање на идниот развој“, во рамките на меѓународниот симпозиум „Навигација низ светската финансиска неизвесност – развој на финансиските пазари, инвестициските стратегии и меѓународниот монетарен систем“, организиран од Банката за меѓународни порамнувања и Народната банка на Кина.Во своето обраќање, гувернерот истакна дека централните банки денес се исправени пред едни од најголемите предизвици во последните децении, предизвикани од последователните кризи – пандемијата, геополитичките конфликти, нарушените синџири на снабдување и растот на цените на енергенсите и суровините.„Искуството од последните години покажа дека централните банки мора да останат цврсто посветени на зачувувањето на ценовната стабилност, дури и кога инфлацијата е резултат на надворешни фактори. Одложените или недоволните реакции можат да предизвикаат многу поголеми економски и социјални последици“, нагласи Славески.Осврнувајќи се на мерките што ги презеде Народната банка за време на последниот инфлациски бран, тој потсети дека институцијата реагираше со зголемување на каматните стапки, повисоки задолжителни резерви и заострување на макропрудентните мерки, со цел да се спречат секундарните инфлациски ефекти и да се зачува довербата во економијата.Славески потенцираше дека стабилниот девизен курс останува столб на макроекономската стабилност во земјата.„Во мала и отворена економија како македонската, стабилниот девизен курс е главно сидро за очекувањата и важен механизам за ограничување на преносот на надворешните ценовни шокови врз домашната економија“, рече тој.Според гувернерот, благодарение на навремените и одлучни политики, инфлацијата е значително намалена, економскиот раст останува отпорен, а финансискиот систем ја зачувал стабилноста.Тој предупреди дека неизвесноста на глобално ниво и понатаму е висока поради геополитичките тензии и нивното влијание врз енергетските пазари и светската трговија, но истакна дека Народната банка останува подготвена навремено да реагира доколку ризиците почнат да се реализираат.„Денес сме во подобра позиција отколку за време на претходниот шок. Инфлацијата е значително пониска, девизните резерви се повисоки, а довербата во домашната валута и банкарскиот систем е силна“, истакна Славески.На крајот, тој оцени дека монетарната политика не може сама да го носи товарот на приспособувањето кон глобалните предизвици и повика на координација со одговорна фискална политика и спроведување структурни реформи насочени кон повисока продуктивност, енергетска диверзификација и поголема отпорност на економијата.На панел-дискусијата, покрај Славески, учествуваа и гувернерите на централните банки на Аргентина, Исланд и Монголија.

Македонија | пред 2 часа

3 час.

Во ек на бракоразводна постапка: 48-годишник осомничен за закани и прогонување на сопругата

Триесет и осумгодишна жена од Република Албанија, со привремен престој во Тетово, пријавила во полиција дека со месеци била изложена на закани и вознемирување од нејзиниот сопруг, со кого е во бракоразводна постапка.Како што информира СВР Тетово, на 9 јуни во 17 часот жената пријавила дека нејзиниот сопруг Ј.М. (48) од гостиварско не го почитувал решението на Центарот за социјални работи Тетово во врска со средбите со нивните деца.Според пријавата, тој постојано доаѓал пред нејзиниот стан, ѝ упатувал закани преку телефонски пораки, ја омаловажувал и континуирано ја демнел.Од СВР Тетово соопштија дека се преземаат мерки за пронаоѓање на лицето и за целосно расчистување на случајот. за овој текст по атрактивен наслов

Македонија | пред 3 часа

3 час.

Мислел дека резервира стан, останал без пари: Тетовец пријавил интернет-измама

Четириесет и седумгодишен жител на Тетово пријавил во полиција дека бил измамен за 20.000 денари, откако наседнал на лажна порака поврзана со наводна резервација на стан во Скопје.Како што информира СВР Тетово, на 9 јуни во 13:30 часот, тетовецот пријавил дека на 6 јуни преку онлајн платформа добил порака во врска со наводна уплата за резервација на стан.Тој го отворил испратениот линк и ги внел податоците од својата платежна картичка, по што од неговата сметка биле повлечени 20.000 денари.Сомнежот дека станува збор за измама се појавил откако лицето кое комуницирало со него побарало дополнителни 25.000 денари.Тетовецот веднаш ја контактирал својата матична банка, по што картичката била блокирана.Од полицијата велат дека се преземаат мерки за целосно расчистување на случајот и откривање на сторителот.

Македонија | пред 3 часа

3 час.

Мајка го претепала своето три годишно дете, па го оставила на улица и заминала

Вознемирувачки случај на можно семејно насилство е пријавен во Тетово, откако жена наводно физички нападнала дете на возраст од околу три до четири години, а потоа го оставила на улица и си заминала.Како што информира СВР Тетово, на 9 јуни во 17 часот било пријавено дека околу 14:15 часот на улицата „Маршал Тито“ жена го тепала своето малолетно дете.Според пријавата, случајни минувачи реагирале и застанале да го заштитат детето, по што жената го оставила на улица и заминала со количка во која се наоѓало друго малолетно дете.За случајот биле известени јавен обвинител и Центарот за социјални работи во Тетово, а надлежните институции преземаат мерки за пронаоѓање на жената, утврдување на нејзиниот идентитет и целосно расчистување на настанот.Детето, по укажаната лекарска помош, било предадено на грижата на Центарот за социјални работи Тетово.

Македонија | пред 3 часа