Најнови вести

17 час.

Тошковски – Варнс: Потврдена определбата за зајакнување на стратешкото партнерство меѓу Македонија и САД

Министерот за внатрешни работи Панче Тошковски денеска оствари средба со вршителот на должност амбасадор на Соединетите Американски Држави во Македонија, Н.Е. Никол Варнс.На средбата беше потврдена заедничката определба за натамошно зацврстување на стратешкото партнерство меѓу двете земји, како и продолжување на интензивната соработка во клучните области од заеднички интерес.Соговорниците разговараа за продлабочување на соработката во областа на безбедноста, владеењето на правото и справувањето со современите безбедносни предизвици, со посебен осврт на резултатите од неодамнешната работна посета на Соединетите Американски Држави и стратешкиот дијалог што се одржа во Вашингтон.Беше констатирано дека билатералната соработка меѓу двете земји се одвива на високо ниво, при што партнерството со Соединетите Американски Држави претставува значаен придонес за унапредување на безбедносните капацитети и стабилноста во регионот.На средбата беше изразена заедничка подготвеност за понатамошно продлабочување на соработката и реализација на заеднички иницијативи во насока на јакнење на институционалните капацитети и регионалната безбедност.

Македонија | пред 17 часа

17 час.

(Вулкан) Вулканот Мајон повторно се активираше, илјадници луѓе евакуирани

Повеќе од 300 семејства се евакуирани на Филипините откако огромни количини пепел излегле од вулканот Мајон поради уривање на наслаги лава од неговите падини, соопштија денеска локалните власти.„Немаше експлозивна ерупција од Мајон, кој повремено благо еруптира од јануари, но огромните наслаги лава на неговата југозападна падина ненадејно се слеаја во лавина од врело камење, пепел и гас пред самрак во саботата“, изјави директорот на Филипинскиот институт за вулканологија и сеизмологија, Тересито Баколкол, пренесува денеска Асошиејтед прес.Според наводите на властите, немало смртни случаи ниту повредени, но масивни облаци пепел се распрснале по 87 села во три града, изненадувајќи многумина и успорувајќи ги возачите поради слаба видливост.„Одронот на пепел беше толку густ што немаше видливост дури ни на нашиот национален пат. Некои селани се испаничија, но им советувавме да се смират“, изјави Калој Балдо, градоначалник на градот Камалиг, кој се наоѓа блиску до подножјето на вулканот.„Сега повторно е мирно, но опасноста секогаш постои“, рече Баколкол за моменталната состојба на Мајон.Властите на Филипините го подигнаа нивото на предупредување за вулканот Мајон на ниво 3 од можни 5 во јануари, по серија ерупции кои предизвикаа повремени одрони камења од неговиот кратер, заедно со пирокластични текови, односно лавини од врело камење, пепел и гас.Предупредувањето од петто ниво значи дека е во тек експлозивна и животозагрозувачка ерупција со смртоносна вулканска лава, пирокластични текови и обилни количества пепел, потсетува АП.

Свет | пред 17 часа

17 час.

Укинати сите ограничувања: Авионите повторно летаат над Емиратите

Генералниот директор на компанијата „Дубаи аеродроми“, Пол Грифитс, изјави денеска дека операциите постепено се зголемуваат откако Обединетите Арапски Емирати ги укинале сите ограничувања за летови воведени од почетокот на војната меѓу САД и Израел против Иран.Од крајот на февруари, аеродромите „Дубаи Интернешенал Ерпорт“ и „Дубаи Ворлд Сентрал“ безбедно опслужиле повеќе од шест милиони патници, преку 32.000 операции на летови и повеќе од 213.000 тони клучен товар, наведе Грифитс во порака на „ЛинкдИн“, пренесува „Ал Џазира“.„Побарувачката за патувања преку Дубаи останува голема и… системот е во добра позиција постепено да ги зголемува капацитетите и да ги поддржи авиокомпаниите и патниците во период на понатамошно прилагодување“, додаде тој.По избивањето на војната против Иран, Техеран одговори со напади на цивилна инфраструктура низ Персискиот Залив, вклучувајќи аеродроми, енергетски постројки и пристаништа, наведува катарската телевизија.Обединетите Арапски Емирати, кои ги нормализираа односите со Израел во 2020 година, биле меѓу најпогодените од ракетни и напади со дронови.

Свет | пред 17 часа

17 час.

(Видео) Таормина: Скриен бисер на Сицилија што го одзема здивот

На источниот брег на Сицилија, над Јонското Море, сместена е Таормина, едно од најубавите и најпосетените места на островот.Овој шармантен град е познат по спојот на историја, спектакуларни пејзажи и медитерански начин на живот, кој повторно ги инспирира посетителите.Таормина со децении привлекува патници од целиот свет, од уметници и јавни личности до обични туристи во потрага по совршен одмор. Нејзината позиција на карпа нуди незаборавен поглед на морето и моќниот вулкан Етна, што ја прави единствена дестинација на Медитеранот.Она што ја издвојува Таормина од другите локации е нејзината атмосфера. Зрачи со спој на елеганција, историја и опуштеност. Тесните камени улици, богатата вегетација и мирисот на морето создаваат амбиент што остава силен впечаток на секој посетител.Градот е познат и по пријатната клима, одличните ресторани и луксузните хотели, но и по тоа што нуди искуство што одговара на различни буџети. Токму таа комбинација ја прави Таормина привлечна и за романтични патувања и за семеен одмор.Една од најпознатите атракции во Таормина е, секако, Театро Антико ди Таормина, антички театар од периодот кога градот бил грчка колонија. Тој и денес го одзема здивот со погледот кон морето и Етна. Ова место често е домаќин на различни културни настани и фестивали, што дополнително придонесува за неговата популарност.Прошетката по главната улица Корзо Умберто нуди можност за уживање во локалните продавници, кафулиња и галерии. Таму се наоѓа и Пјаца IX Априле, плоштад со еден од најубавите панорамски погледи во градот.Во подножјето на градот се наоѓа познатиот остров Изола Бела, природен резерват поврзан со копното со тесен песочен појас. Ова место е идеално за капење, нуркање и уживање во кристално чистото море.Плажите во околината на Таормина се познати по својата убавина и чистата вода, а посетителите можат да избираат помеѓу уредени плажи и скриени заливи.Таормина е позната и по богатата културна сцена, но и како омилена дестинација за филмски и уметнички настани. Секоја година тука се одржуваат фестивали што собираат уметници од целиот свет.Освен тоа, градот често бил инспирација за писатели и сликари, а неговата единствена комбинација на природа и архитектура остава силен впечаток. Токму поради тоа многумина го сметаат за едно од најубавите места на Сицилија.

Магазин | пред 17 часа

17 час.

Мелони: Не се согласувам со повлекување на американските трупи од Италија

Италијанската премиерка Џорџа Мелони изјави дека нема да поддржи евентуална одлука на американскиот претседател Доналд Трамп за повлекување на американските војници од Италија.„Тоа е одлука која не зависи од мене и со која лично не би се согласила“, им рече Мелони на новинарите во ерменската престолнина Ереван, на маргините на самитот на Европската политичка заедница.Американскиот претседател минатата недела беше прашан дали Вашингтон ќе разгледа повлекување на своите војници од Италија и Шпанија, а Трамп одговори „веројатно“.„Италија воопшто не ни помогна, а Шпанија беше ужасна, апсолутно ужасна“, им рече на новинарите во саботата.Пентагон во петокот објави дека САД ќе го намалат своето воено присуство во Германија за 5000 војници, во својата најголема европска база.Трамп во саботата изјави дека бројот на војници во Германија ќе го намали за „далеку повеќе“ од 5000.Трамп се закануваше дека ќе го намали бројот на американските војници во Германија и во други европски земји за време на двата свои мандати во Белата куќа, тврдејќи дека сака Европа да преземе поголема одговорност за сопствената одбрана наместо да зависи од Вашингтон.

Свет | пред 17 часа

18 час.

Итно известување во Дубаи: Властите предупредуваат на потенцијална ракетна закана

Министерството за внатрешни работи на Обединетите Арапски Емирати издаде предупредување за потенцијална ракетна закана и ги повика граѓаните да побараат засолниште.„Поради моменталната ситуација и потенцијалните ракетни закани, веднаш побарајте безбедно место во најблиската обезбедена зграда, држете се подалеку од прозорци, врати и отворени простори. Почекајте дополнителни инструкции“, се наведува во известувањето испратено до граѓаните на Дубаи преку СМС-порака, објавува „Галф њуз“.Порано денес, Обединетите Арапски Емирати го обвинија Иран дека користел дронови за напад врз празен танкер за сурова нафта, во сопственост на државната нафтена компанија Абу Даби, додека се обидувал да помине низ Ормускиот теснец.Единицата за логистика на морска енергија на Националната нафтена компанија Абу Даби (ADNOC) објави дека танкерот со име „Барака“ бил празен кога бил нападнат од два дрона и дека нема повредени, објавува Ројтерс.Иран ги блокирал повеќето неирански бродови да влегуваат и излегуваат од Персискиот Залив откако САД и Израел почнаа да го напаѓаат. Техеран се закани дека ќе нападне неовластени бродови додека минуваат низ теснецот, низ кој се транспортираат околу една петтина од светските пратки со нафта и гас, потсетува агенцијата, пренесува Танјуг.

Свет | пред 18 часа

18 час.

(Видео) Србин претепан во Косово, повредена и жена која се обидела да го заштити

Мирослав Гуџиќ од Добротин во Косово е претепан во местото Донја Гуштерица и е хоспитализиран во Клиничко-болнички центар, а при обид да го заштити, повреди добила и работничка од оваа установа, која исто така е хоспитализирана.Гуџиќ, чијашто здравствена состојба е стабилна, раскажал дека на физичкиот напад од непознати напаѓачи му претходел сообраќаен инцидент, кога нешто по 11 часот тргнал од Добротин кон Донја Гуштерица.„Кај добротинските гробишта едно бело возило, мислам дека беше голф петка, почна да претекнува повеќе возила. Јас му дадов светлосен сигнал за да го предупредам дека ќе се судриме. Јас застанав, тој помина покрај мене. Јас го продолжив патот кон Гуштерица и таму, кај раскрсницата во близина на маркет, ме удри автомобил од задната десна страна“, истакна Гуџиќ.Тој додава дека, откако застанал да види колкава е материјалната штета, видел тројца млади Албанци кои, според неговите зборови, нешто му дофрлале, но не слушнал што и не ги препознал.„Во тој момент сакав да го продолжам патот, да ја избегнам целата ситуација. Тргнав со автомобилот напред, но возилото со кое се сретнав кај гробиштата ми го препречи патот. Некако успеав да ја избегнам блокадата и тргнав кон Домот на здравје, надевајќи се дека ќе се откажат. Тие продолжија да ме следат. Мислам дека беа три возила“, раскажува Гуџиќ.Гуџиќ потоа, гледајќи дека напаѓачите сакаат конфликт, се обидел да влезе во домот за здравје во Донја Гуштерица, со надеж дека ќе го избегне инцидентот.„Излегов од автомобилот и влегов во канцеларија, некаде да се тргнам. Тие, пет или шестмина, тргнаа по мене. Влетаа во канцеларијата и почнаа да ме удираат и да ме влечат. Таму имаше една работничка или медицинска сестра која се обиде да ме одбрани, ја нападнаа и неа. Потоа ме извлекоа надвор и продолжија да ме тепаат“, рече Гуџиќ.Тој нагласи дека не знае кој го нападнал и зошто, дека никого не провоцирал и дека единствен мотив, според него, е тоа што е Србин и што вози автомобил со нишки регистарски таблички.Гуџиќ изјави дека од вработените во домот на здравје побарал да повикаат полиција, што тие и го направиле.„Полицијата беше тука, дадов изјава за тоа што се случи. Случајот е отворен и ми рекоа по хоспитализацијата да се јавам во полициската станица во Грачаница“, додаде тој.Тврди дека напаѓачите постојано му се заканувале и го навредувале.„Ми се закануваа дека ќе ме најдат каде било. Врескаа и никогаш во животот не сум видел толку омраза и суровост во нечии очи“, изјави Гуџиќ.Директорот на Клиничко-болничкиот центар Приштина со седиште во Грачаница, Братислав Лазиќ, потврди дека две лица нешто по 12 часот се хоспитализирани и дека нивната состојба е стабилна.„Двајца повредени денес се примени на хируршката клиника со повреди здобиени во тепачка, според нивните наводи. Донесени се со санитетско возило и се во тек на дијагностика. Засега нивната состојба е стабилна, но за тежината на повредите ќе можеме да зборуваме по завршување на сите испитувања“, изјави Лазиќ.

Свет | пред 18 часа

18 час.

Нови безбедносни мерки: Наместо ученици, наставници ќе дежураат во ходници и дворови, најави Јаневска

Министерството за образование и наука (МОН) најави засилени безбедносни мерки и поголем надзор во училиштата како одговор на неодамнешниот случај на врсничко насилство во Ѓорче Петров.Министерката за образование, Весна Јаневска информираше дека веќе се испратени дописи до сите градоначалници и училишта. Наместо ученици, во ходниците и дворовите сега ќе мора да дежураат наставници.Целта на оваа мерка е наставниот кадар навремено да спречува евентуални инциденти меѓу учениците.„Тоа што се случило надвор од училиштето не е оправдување. Тоа се ученици на одредено училиште и наставниците мора да имаат увид во тоа како се однесуваат нивните ученици, затоа што тоа е воспитно-образовен процес“, изјави Јаневска.Дополнително, дежурните наставници ќе мора да бидат на видно место, со цел Државниот просветен инспекторат да може полесно да врши контроли и да го констатира нивното присуство.

Македонија | пред 18 часа

19 час.

Јаглеродниот моноксид е главна причина за смртта на жртвите во „Пулс“, чадот и цијанидот само потпомогнале, велат од Судска медицина

Главната причина за смртта на 59-те жртви во пожарот во дивата дискотека „Пулс“ е труење со јаглероден моноксид, изјави директорот на Институтот за судска медицина, Александар Станков, на денешното рочиште, образложувајќи ги резултатите од обдукциските и токсиколошките анализи.Тој појасни дека кај дел од жртвите се утврдени и други супстанции, меѓу кои кај 33 лица цијаниди во крвта, кај 49 присуство на алкохол, кај осум дроги, а кај четири седативи и антидепресиви, но нагласи дека доминантна причина за смртта е насилно задушување од јаглероден моноксид, комбинирано со амбиентално и компресивно задушување, како и термичко оштетување на дишните органи.Кај четири жртви како причина за смрт се наведуваат изгореници и оштетување на белите дробови.Станков истакна дека јаглеродниот моноксид е најчест токсичен гас при пожари во затворен простор, кој брзо ја исполнува просторијата и е главен причинител за смртта, при што додаде дека не може да се исклучи влијанието на други фактори како чад, топол воздух и цијаниди.Според него, кај дел од жртвите е утврдено различно ниво на карбокси хемоглобин во крвта, од до 10 проценти кај седум лица, до над 40 проценти кај четири лица.Тој објасни дека јаглеродниот моноксид е безбоен гас без мирис кој се создава при нецелосно согорување и се врзува со хемоглобинот многу посилно од кислородот, со што го оневозможува неговиот транспорт во организмот.Симптомите на труење, како што наведе, се главоболка, вртоглавица, повраќање и смрт, при што во услови на пожар во затворен простор дејството на гасот се комбинира со други штетни фактори.Во однос на цијанидите, тој посочи дека се пронајдени кај дел од жртвите во различни концентрации, но нагласи дека не може да се земат како изолиран причинител за смртта.Токсиколошките анализи покажале и присуство на алкохол кај дел од жртвите, како и траги од седативи, антидепресиви и психоактивни супстанции, вклучително и кокаин, амфетамин и канабис кај поединечни случаи.Станков додаде дека при вакви пожари во затворен простор, освен токсичните гасови, значајна улога имаат и високата температура и чадот, кои дополнително го отежнуваат дишењето и придонесуваат за смртниот исход.Тој нагласи дека резултатите од обдукциите се комплексни и не може да се сведат на еден фактор, иако јаглеродниот моноксид е доминантен причинител.Пожарот во дискотеката „Пулс“ во Кочани избувна на 16 март 2025 година за време на настап на групата ДНК, при што загинаа 63 лица, а над 200 беа повредени. Судењето продолжува, а случајот го води судијката Дијана Груевска-Илиевска, додека обвинението го застапуваат 15 јавни обвинители.

Македонија | пред 19 часа

20 час.

Австрија протера тројца руски дипломати поради наводна шпионажа

Австриските власти протераа тројца руски дипломати поради наводна шпионажа, потврди Министерството за надворешни работи на Австрија.Според наводите на австриските власти, споменатите службеници се осомничени дека спроведувале разузнавачки активности користејќи сателитска опрема поставена на покривите на руските дипломатски згради во Виена, пренесува бриселскиот портал Politico.Во средината на април, рускиот амбасадор во Виена, Андреј Јурјевич Грозов, бил повикан на разговор во австриското Министерство за надворешни работи и било побарано на тие службеници да им се укине дипломатскиот имунитет.Откако Москва не го прифатила тоа, Виена донела одлука за протерување на тројцата дипломати, кои во меѓувреме ја напуштиле земјата, наведуваат локалните австриски медиуми.Министерката за надворешни работи на Австрија, Беате Мајнл-Рајзингер, изјави за Politico дека „шпионажата е безбедносно прашање за Австрија“ и дека владата го променила пристапот и презема доследни мерки против таквите активности.Таа оцени дека е неприфатливо дипломатскиот имунитет да се користи за шпионски операции, истакнувајќи дека Австрија ќе ги заостри кривичните одредби поврзани со шпионажа.Од почетокот на војната во Украина, Австрија одзеде дипломатски статус како мерка против 14 руски службеници поради активности неспоиви со нивните функции, додека околу 220 вработени и натаму работат во руските дипломатски мисии во земјата.

Свет | пред 20 часа

20 час.

Четири мигранти пронајдени мртви, две лица во тешка состојба во Хрватска - биле превезувани во нехумани услови

Четири мигранти се пронајдени мртви во местото Доње Прилишќе кај Нетретиќ во Хрватска, додека две лица во тешка состојба се пренесени во болница. Полицијата се сомнева дека биле превезувани во нехумани услови и трага по возачот, кој побегнал.Дојавата е примена по 22.30 часот, а полицајците по пристигнувањето на терен затекнале повеќе странски државјани.Во близина на местото на настанот и некогашниот граничен премин со Словенија се пронајдени уште 12 странски државјани, пренесува Index.hr.Вкупно 13 лица се пренесени во Центарот за регистрација на баратели на меѓународна заштита Дуги Дол.Според досега утврдените информации, мигрантите на местото на настанот ги довел непознат возач на товарно возило, по што ги истоварил и побегнал.Странските државјани ѝ рекле на полицијата дека за време на превозот биле изложени на нехумани услови.На местото на настанот е извршен увид, со кој раководела жупаниската државна обвинителка. Полицијата се сомнева за кривични дела незаконско превезување мигранти и доведување во опасност на живот, а во тек е криминалистичка истрага. Телата ќе бидат подложени на обдукција за да се утврди точната причина за смртта и идентитетот на починатите.

Свет | пред 20 часа

20 час.

Германски партии со заеднички бојкот на социјалната мрежа X поради дезинформации

Германските парламентарни партии Социјалдемократската партија на Германија (SPD), Зелените и Левицата донесоа заедничка одлука да ги прекинат своите активности на социјалната мрежа X (поранешен Twitter), соопштено е во Берлин. Одлуката се однесува на сите официјални канали на партиите, како и на нивните регионални и локални организации, но и на профилите на водечките функционери.Во заедничкото соопштение, објавено под хаштагот „Го напуштаме X“, партиите наведуваат дека платформата „во последните години паднала во хаос“ и дека политичката комуникација таму сè повеќе е оптоварена со дезинформации. Според нив, X повеќе не овозможува квалитетна јавна дебата, туку придонесува за ширење неточни информации.Трите партии им препорачале и на своите членови и симпатизери да се повлечат од платформата и да преминат на алтернативни сервиси, при што посебно се споменува мрежата Bluesky како можен простор за идни политички дискусии.Одлуката се поврзува со промените во работењето на платформата по нејзиното преземање од страна на Илон Маск во октомври 2022 година, кој, како што се наведува, има и политички ставови блиски до поранешниот американски претседател Доналд Трамп.

Магазин | пред 20 часа

20 час.

САД: Американски бродови безбедно поминале низ Ормутскиот теснец

Американското Централно заповедништво (CENTCOM) соопшти дека два трговски брода под знаме на САД успешно поминале низ Ормутскиот теснец.Во краткото соопштение се наведува дека американски воени бродови, опремени со наведувани ракети, моментално делуваат во Персискиот Залив, откако исто така го поминале теснецот.САД истакнуваат дека нивните сили активно помагаат во напорите за обезбедување безбеден проток на комерцијалниот бродски сообраќај, особено во чувствителниот регион каде што во последниот период се зголемени тензиите.Во соопштението не се откриваат имињата на бродовите, ниту дополнителни детали за операцијата.

Свет | пред 20 часа

20 час.

Ескалација во Ормутскиот теснец: Обединетите Арапски Емирати го обвинуваат Иран за напад врз танкер

Обединетите Арапски Емирати соопштија дека танкер поврзан со државната нафтена компанија Adnoc бил погоден во Ормутскиот теснец.Во официјално соопштение од Министерството за надворешни работи се наведува дека во инцидентот нема повредени лица, но се оценува дека станува збор за сериозно нарушување на слободата на пловидба и безбедноста на меѓународните поморски рути.ОАЕ остро го осудија нападот, наведувајќи дека ваквите дејствија претставуваат закана за регионалната стабилност и глобалната енергетска безбедност. Во соопштението се повикува на почитување на релевантните резолуции на Советот за безбедност на ОН, кои ја гарантираат слободната пловидба и забрануваат напади врз трговски бродови.Исто така, Емиратите упатија повик до Иран да ги прекине нападите и да обезбеди целосно почитување на прекинот на непријателствата, како и повторно отворање на Ормутскиот теснец без ограничувања.Инцидентот дополнително ги засилува тензиите во еден од најважните светски поморски премини, преку кој поминува значаен дел од глобалната трговија со нафта.

Свет | пред 20 часа

20 час.

Шумски пожари горат во југот на Германија: Евакуации и вонредна состојба во Баварија

Германија е погодена од серија шумски пожари, предизвикани од високи температури, суша и силен ветер, при што најпогодени се регионите во Баварија и Бранденбург.Во Баварија, пожарот на планината Зауриселкоф сè уште е активен, а локалните власти соопштија дека се зафатени околу четири до пет хектари шума. Градот Траунштајн прогласи вонредна состојба, додека противпожарните служби се обидуваат да го спречат понатамошното ширење на огнот. Во гаснењето учествуваат и хеликоптери, а се очекува дополнителна воздушна поддршка.Поради чадот, властите апелираат граѓаните да ги држат прозорците затворени и да го намалат престојот на отворено поради можност од паѓање на пепел.Во Саксонија, пожарот во близина на реката Лаба сè уште не е ставен под контрола, иако засега не се шири. Во гаснењето учествуваат над 400 пожарникари, како и полициски и спасувачки екипи, а теренот дополнително го отежнуваат ветерот и високите температури. Пожарот зафатил површина нешто помала од еден квадратен километар.Во Бранденбург, пожарот на поранешен воен полигон е локализиран, а според властите не се очекува понатамошно ширење. Пожарот зафатил околу 152 хектари, а извидувачки дронови го надлетале подрачјето за проценка на штетата.Ситуацијата останува под контрола во дел од регионите, но ризикот од нови пожари и понатамошно ширење сè уште е висок поради временските услови.

Свет | пред 20 часа

20 час.

236816881_327299032472860_31726440552678132_n

Ново поскапување на горивата од 5 мај – цените се зголемуваат до 3,47%

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе одлука со која се зголемуваат малопродажните цени на нафтените деривати во просек за 3,47% во однос на претходната одлука од 27.4.2026 година.Според образложението, референтните цени на светските пазари бележат зголемување кај сите нафтени деривати, и тоа кај бензините за 5,324%, кај дизелот за 2,817%, кај екстра лесното масло за 3,394% и кај мазутот за 8,305%. Во истиот период е забележано и зголемување на курсот на денарот во однос на доларот за 0,3444%.РКЕ наведува дека во пресметката се вклучени намалувања на акцизите за дизелот и бензините, како и намалување на ДДВ за дел од горивата.Од 5.5.2026 година од 00:01 часот, максималните цени ќе изнесуваат:ЕУРОСУПЕР БС-95: 85,00 ден/литарЕУРОСУПЕР БС-98: 87,00 ден/литарЕУРОДИЗЕЛ БС (Д-Е V): 93,50 ден/литарЕкстра лесно масло (ЕЛ-1): 98,50 ден/литарМазут М-1 НС: 49,720 ден/кгВо однос на претходната одлука, бензините и екстра лесното масло поскапуваат за 2,50 денари по литар, дизелот за 2,00 денари, додека мазутот се зголемува за 3,064 денари по килограм.РКЕ напоменува дека станува збор за максимални цени, при што трговците можат да формираат и пониски малопродажни цени.

Македонија | пред 20 часа

20 час.

СДСМ: Мицкоски им порачува на граѓаните: „Летувајте во Македонија“, така изгледа изолацијата

СДСМ со соопштение реагира дека изјавата на Христијан Мицкоски, во која ги повикува граѓаните да летуваат во Македонија, претставува, како што наведуваат, показател за изолацијата на земјата.Во соопштение се наведува дека додека Мицкоски, според СДСМ, патувал со владин авион и летувал во Сплит, Хрватска, тој истовремено ги повикал граѓаните да го поминат летниот одмор во земјава, поради, како што беше посочено, метежите на границите предизвикани од ЕЕС системот.Од СДСМ додаваат дека слични кампањи за „домашен туризам“ претходно се реализирани и во Србија, посочувајќи дека ваквиот пристап потсетува на практики од, како што велат, „сестринска партија и голем политички партнер“.Во соопштението се поставува и прашањето дали, како што наведуваат од СДСМ, постои нешто што Мицкоски не го презема од тие политички модели, оценувајќи дека станува збор за политика која води кон изолација.Понатаму се тврди дека ваквите политики се поврзуваат со забавување на европските интеграции и ограничување на слободното движење на граѓаните.СДСМ обвинува дека, како што велат, приоритет се дава на политички и економски интереси поврзани со одредени центри на влијание, наместо на европската интеграција на земјата.Во завршниот дел од реакцијата се наведува дека доаѓа време на вистина, правда и одговорност.

Македонија | пред 20 часа

20 час.

Градоначалникот на Кавадарци Јанчев го осуди нападот кон ФФМ и ги брани односите со федерацијата

Како градоначалник на општина Кавадарци и доминантен сопственик на ГФК Тиквеш, Митко Јанчев во своја објава на социјалнит мрежи истакнува дека во изминатите години клубот постигнал значајни резултати, меѓу кои влез во Првата македонска фудбалска лига, опстанок во елитата, настапи во европски натпреварувања и враќање на фудбалската еуфорија во Кавадарци.Тој се оградува и најостро го осудува, како што наведува, нападот кон ФФМ, нагласувајќи дека ниту една политичка партија ниту функционер нема влијание врз работењето на ФФМ или фудбалските клубови, вклучително и ГФК Тиквеш 1930 Кавадарци.Во објавата се посочува дека постојат добри односи и соработка меѓу ФФМ, ГФК Тиквеш и него лично, како и заедничка посветеност кон развој на спортот и младинските категории во градот. Јанчев додава дека со претседателот на ФФМ, Масер Омерагиќ, досега немало недоразбирања и дека соработката секогаш била во интерес на фудбалот.Исто така, се осудуваат навреди упатени кон ФФМ и клубот од поединци поврзани со клубови од Првата македонска фудбалска лига.Како доминантен сопственик, заедно со останатите акционери, ќе се разгледа можноста за промени во стручниот штаб и во управата на клубот.Јанчев порачува дека ГФК Тиквеш ќе продолжи да настапува со транспарентност, квалитет и спортски дух, со цел нови успеси пред кавадаречката публика.

Македонија | пред 20 часа

20 час.

Пријавено пукање на семејна веселба во крушевско, приведени двајца

На 03.05.2026 година, во 23:50 часот, во село Пресил, крушевско, полициски службеници од ОВР Крушево ги лишиле од слобода Б.У. (34) и Б.М. (27), двајцата од истото село.Според пријавеното, околу 21:20 часот на семејна веселба во селото тие пукале од огнено оружје.Се преземаат мерки за целосно расчистување на настанот.

Македонија | пред 20 часа

20 час.

Битолчанец приведен во сообраќајна контрола, возел без возачка дозвола

На 03.05.2026 година, околу 13:30 часот, на улицата „Партизанска“ во Битола, полициски службеници од СВР Битола го лишиле од слобода У.Б. (47) од Битола.При сообраќајна контрола, бил запрен автомобил „фолксваген“ со битолски регистарски ознаки, кој го управувал тој. При проверката било утврдено дека возел без да поседува возачка дозвола.По целосно документирање на случајот, против него ќе биде поднесена соодветна пријава.

Македонија | пред 20 часа

20 час.

Малолетничка нападната во Прилеп, полицијата работи на расчистување на случајот

Полицијата работи на расчистување на случај во Прилеп, по пријава дека малолетно девојче било физички нападнато од повозрасно лице.Како што информира МВР, на 03.05.2026 година во СВР Битола, С.П. (29) од Прилеп пријавила дека нејзината малолетна ќерка била нападната во местото викано „Амфитеатар“ во населбата Варош во Прилеп.Од полицијата наведуваат дека се преземаат мерки за целосно расчистување на настанот и утврдување на сите околности поврзани со случајот.

Македонија | пред 20 часа

20 час.

Скопјанка тепала новороденче - полицијата ја уапси

Во Скопје, полициски службеници од СВР Скопје ја лишиле од слобода 29-годишната С.Д. од Скопје поради сомнение дека сторила кривично дело „запуштање и малтретирање на малолетно лице“.Како што информираат од МВР, случајот бил пријавен од 56-годишна жена, која пред својот дом ја затекнала пријавената заедно со новороденче кое имало повреди.Детето и С.Д. биле пренесени во Комплексот клиники „Мајка Тереза“, каде што лекарите констатирале повреди кај новороденчето.По целосно документирање на случајот, против лицето ќе биде поднесена соодветна пријава.

Македонија | пред 20 часа

21 час

Приведени повеќе лица во Центар по физички напад врз брачен пар во Скопје

Во Скопје, на подрачјето на Центар, полициски службеници од СВР Скопје на 03.05.2026 година во 22:20 часот лишиле од слобода повеќе лица поради пријава за физички напад врз брачен пар, кој бил со нивните две малолетни деца.Според информациите од МВР, приведени се Р.М. (19), Ј.А. (18), М.Ј. (24), Е.А. (19), Н.Ј. (38), како и тројца малолетници на возраст од 17 години, сите од Скопје. Тие се сомничат дека околу 21:30 часот физички ги нападнале Д.М. (22) и нејзиниот сопруг Р.Р.По целосно документирање на случајот, против инволвираните ќе биде поднесена соодветна пријава.

Македонија | пред 21 час

21 час

Филипче: Мицкоски не сака во ЕУ, се плаши од европско судство

Во СДСМ, лидерот Венко Филипче изјави дека премиерот Христијан Мицкоски не ја води државата кон Европската Унија и дека, според него, не е подготвен за вистински реформи и европска интеграција.Филипче нагласи дека, како што рече, Мицкоски не поддржува пристигнување на европски институции во земјата, вклучително и европско обвинителство, бидејќи тоа би значело поголема независност на правосудството и одговорност на политичките структури. Според него, тоа е поврзано со намера за контрола врз институциите и избегнување одговорност.„Мицкоски не сака земјава да оди напред во Европа, не сака вистински реформи, сака да го контролира судството и институциите“, рече Филипче, додавајќи дека актуелната власт, наместо реформи, создава политички поделби и дефокус од суштинските проблеми.Тој го обвини премиерот дека, како што наведе, преку политички наративи и конфликти се обидува да го пренасочи вниманието од економските и институционалните предизвици, оценувајќи дека тоа е дел од начин на владеење кој не носи напредок кон ЕУ.Филипче истакна и дека, според него, владата нема капацитет за сериозно водење на државата и дека граѓаните веќе ги чувствуваат последиците од тоа.

Македонија | пред 21 час

21 час

Кривична за малолетничките кои тепаа и снимаа 13 годишно девојче во Ѓорче Петров - следува кривична и за родителите

Во СВР Скопје е поднесена кривична пријава против четири малолетнички – една на 17 и три на 14 години, сите од Скопје, поради сомнение за сторени две кривични дела „насилство“. Случајот се однесува на врсничко насилство врз 13-годишна малолетничка, кое се случило во два одделни настани на 27 и 30 март 2026 година.Според информациите од МВР, пријавените во двата наврати физички ја нападнале малолетничката, а за инцидентите биле објавени и видео-записи и фотографии на социјална мрежа. Кривичната пријава е доставена до Основното јавно обвинителство Скопје, а постапката се води согласно Законот за правда за децата.Од Министерството за внатрешни работи најавуваат дека во текот на утрешниот ден ќе биде поднесена кривична пријава и против родители на инволвираните малолетнички. Во меѓувреме, се преземаат мерки за целосно расчистување на случајот, а полициски службеници работат на прибирање докази и разговори со сите засегнати лица во присуство на родители.Случајот претходно беше пријавен како врсничко насилство, а според првичните информации полицијата постапува по повеќе индиции и материјални докази, вклучително и видео-снимки, со цел целосно документирање на настаните.

Македонија | пред 21 час