БРИТАНИЈА

Британска воена вежба заврши кобно: Загинаа тројца припадници на морнарицата

Тројца припадници на британската Кралска морнарица загинаа при пад на воен хеликоптер за време на воена вежба во округот Девон, на југозападот од Англија. Несреќата се случила рано утринава во близина на Окехемптон, кога се урнал хеликоптер од типот „Мерлин Мк4“, по што била прогласена голема вонредна состојба.Кралската морнарица ја потврди трагичната загуба, наведувајќи дека семејствата на загинатите се известени и побарале приватност. Британскиот премиер Кир Стармер несреќата ја оцени како „апсолутно трагична“, изразувајќи сочувство до семејствата и блиските на загинатите.Командантот на морнарицата, генерал Сер Гвин Џенкинс, изјави дека веста претставува голем шок за целата поморска заедница. Тој потврди дека станува збор за хеликоптер „Мерлин Мк4“, кој е стациониран во воздухопловната база Јеовилтон во Сомерсет.Според сведоци, непосредно пред падот од леталото се слушале звуци што укажувале на можен механички дефект. Остатоците од хеликоптерот се пронајдени на поле во близина на местото на несреќата.Хеликоптерите „Мерлин Мк4“ се користат од Кралските маринци и се во служба на британската морнарица од 1999 година. Ова не е прва несреќа со овој тип летало. Во 2024 година еден „Мерлин Мк4“ се урна во Ла Манш за време на воена вежба, при што загина пилот.Полицијата, воздухопловните власти и Кралската морнарица започнаа истрага за утврдување на причините за несреќата, додека дел од локалните патишта во регионот беа привремено затворени.

Свет | пред 1 ден

Грк обвинет во Лондон за шпионажа во корист на Иран

Грчки државјанин е обвинет во Велика Британија за помагање на странска разузнавачка служба, за која се верува дека е поврзана со Иран, во активности насочени против новинар на лондонската телевизија „Иран Интернешнл“, соопшти британската полиција, пренесува „Ројтерс“.Британската антитерористичка полиција соопшти дека станува збор за 46-годишниот Јоанис Аидинидис, кој живеел во Минхен. Тој бил уапсен на 16 мај и обвинет според британскиот Закон за национална безбедност. Се очекува подоцна денеска да се појави пред Судот во Вестминстер.Според полицијата, обвиненијата се поврзани со соработка со Иран и следење на новинар кој работел за „Иран Интернешнл“, медиум познат по критичкото известување за властите во Техеран. Истражителите посочуваат дека засега не постои поширока закана за јавноста.Шефицата на антитерористичката полиција во Лондон, Хелен Фланаган, изјави дека случајот може да предизвика загриженост кај медиумите на персиски јазик во Велика Британија.„Продолжуваме тесно да соработуваме со повеќе организации и поединци за да им обезбедиме безбедносни совети и поддршка, вклучително и на лицето и организацијата поврзани со оваа истрага“, изјави Фланаган.Случајот доаѓа откако во април три лица беа обвинети за обид за подметнување пожар во објект поврзан со „Иран Интернешнл“ во северозападен Лондон, иако тогаш немало повредени ниту материјална штета.Британската полиција претходно соопшти дека ја истражува можната поврзаност на Иран со тој инцидент, како и со серија подметнати пожари на еврејски објекти во Лондон. Одговорноста за повеќето напади ја презеде проиранската група „Ашаб ал-Јамин ал-Исламија“ (HAYI).

Свет | пред 6 дена

Британски лекари: Мобилните и социјалните мрежи се штетни за младите колку и пушењето

Академија на медицински кралски колеџи предупреди дека неограниченото користење паметни телефони и прекумерното време пред екран претставуваат закана за здравјето на младите слична на пушењето.Во документ доставен до владата на Обединето Кралство, лекарите наведуваат дека технологијата има сериозни негативни последици врз децата и тинејџерите.Според податоците, дури 50 проценти од децата на возраст од 13 и 14 години на интернет виделе снимки со обезглавување.Лекарите предупредуваат и на растечки број кратковиди тинејџери, како и на случаи во кои деца биле изложени на екстремно насилен или опасен содржински материјал.Во документот се споменува пример со десетгодишно момче кое убило гулаб откако станало опседнато со гледање насилни видеа, како и дете кое се предозирало со лекови следејќи инструкции од интернет-видео.Истражувањата покажуваат дека децата првпат доаѓаат во контакт со порнографија околу 13-годишна возраст, а 59 проценти од нив ја виделе случајно.„Таквата содржина постепено ги презема нивните ‘feed’-ови, го потиснува нормалниот содржински материјал и го нормализира екстремниот“, наведуваат експертите.Дополнително загрижува и фактот што значителен дел од користењето на социјалните мрежи кај деца од 8 до 14 години се случува меѓу 21 часот и 5 наутро.„Штетата што им се нанесува на децата на интернет не е хипотетичка. Таа е моментална, документирана и се случува во огромни размери“, предупредува Академијата.

Свет | пред 1 седмица

Авион со британскиот министер за одбрана останал без GPS-сигнал близу руската граница

На авион на британското Кралско воено воздухопловство (RAF), во кој се наоѓал министерот за одбрана Џон Хили, му бил попречен GPS-сигналот додека летал во близина на руската граница.Инцидентот се случил во четвртокот, при враќањето на Хили од Естонија кон Велика Британија, каде што ги посетил британските војници стационирани во рамки на НАТО-операции.Според британските медиуми, постојат сомнежи дека зад пречките стои Русија.Поради прекинот на GPS-системот, пилотите за време на тричасовниот лет морале да користат алтернативни навигациски системи.За инцидентот прв објави „Тајмс“, наведувајќи дека не е познато дали министерот бил директна цел, но патеката на летот била јавно достапна преку интернет-страници за следење авиони.Ова доаѓа само ден откако беше објавено дека два руски борбени авиони минатиот месец „опасно“ пресретнале британски извидувачки авион над Црното Море.Според британското Министерство за одбрана, руски ловец Су-35 тогаш му се приближил на авионот „Rivet Joint“ толку блиску што се активирале системите за итни ситуации и бил исклучен автопилотот.Дополнително, Су-27 извел шест прелети пред британскиот авион, при што во еден момент се доближил на само шест метри.Пред инцидентот со GPS-сигналот, Хили во Естонија разговарал со британски војници кои учествуваат во НАТО-вежби во близина на руската граница.Тој ја пофалил „исклучителната професионалност“ на екипажот на RAF за време на, како што ги нарекол, „неприфатливите“ руски активности.Ова не е прв ваков случај. И во 2024 година, на авион на RAF во кој се наоѓал тогашниот британски министер за одбрана Грант Шапс му бил попречен GPS-сигналот во близина на руска територија.

Свет | пред 1 седмица

Велика Британија на удар на топлотен бран, температури до 33°C

Велика Британија се соочува со значителен топлотен бран, при што метеоролозите најавуваат температури до 33 степени Целзиусови за претстојниот викенд, што би можело да го направи овој мај еден од најтоплите досега.Според прогнозите на британската метеоролошка служба Мет Офис, највисоките температури се очекуваат во јужните делови на земјата, особено во недела и понеделник.Доколку се потврдат прогнозите, можно е да биде надминат досегашниот мајски рекорд од 32,8 степени Целзиусови.Властите предупредуваат и на зголемен ризик од пожари поради високите температури. Противпожарните служби апелираат граѓаните да бидат внимателни при користење скари на отворено, да не фрлаат догорчиња и да избегнуваат ризично однесување во природа.

Свет | пред 1 седмица

Радио во Британија по грешка објави дека кралот Чарлс Трети починал

Менаџерот на радиото „Радио Каролина“, Питер Мур, соопшти дека поради „компјутерска грешка“ во главното студио по грешка била емитувана информација дека британскиот крал Чарлс III починал.Мур јавно им се извини на кралското семејство и на слушателите.„Поради компјутерска грешка во нашето главно студио, прилогот за смртта на монархот, кој сите радиостаници во Велика Британија го чуваат подготвен за емитување доколку биде потребно, случајно беше активиран во вторникот попладне и погрешно беше објавено дека Неговото Височество кралот починал“, навел Мур на социјалните мрежи.Тој додал дека радиото веднаш ја прекинало програмата, а по повторното вклучување било прочитано официјално извинување.„Му се извинуваме на Неговото Височество кралот и на нашите слушатели за евентуалната непријатност“, изјавил Мур.Инцидентот се случил додека кралот Чарлс и неговата сопруга, Камила, престојувале во Северна Ирска, каде што присуствувале на настап на фолк-група, следеле танчери и дегустирале ирско виски во квартот Титаник во Белфаст.Радиото „Каролина“, со седиште во Малдон во Есекс, е основано во 1964 година и во минатото функционирало како пиратска радиостаница.

Свет | пред 2 седмици

Британија со нова трговска лиценца поврзана со руска нафта

Велика Британија ќе дозволи увоз и транспортни услуги поврзани со дизел и авионско гориво произведено од руска сурова нафта, доколку нафтата е преработена и рафинирана во трети земји.Одлуката е дел од новата трговска лиценца што стапува во сила денес, а со која одредени производи поврзани со руска нафта се изземаат од британските санкции, пренесува „Ројтерс“.Според новите правила, санкциите нема да важат за гориво што е обработено надвор од Русија, но компаниите ќе мора да исполнуваат одредени услови, меѓу кои и водење детална евиденција.Британските власти соопштија дека лиценцата ќе важи на неодредено време, но ќе биде предмет на периодични проверки и може да биде укината доколку се процени дека е потребно.Покрај тоа, Велика Британија усвоила и временски ограничена лиценца за поморски транспорт на природен гас и поврзани услуги во согласност со санкциите против Русија.Таа лиценца ќе важи до крајот на годината.

Свет | пред 2 седмици

Британски медиуми: Стармер сака да се повлече од премиерската функција

Британскиот премиер Кир Стармер наводно им соопштил на блиски соработници дека планира да поднесе оставка, објави британскиот весник „Дејли мејл“, повикувајќи се на неименувани извори од владата.Според наводите, Стармер сметал дека политичката ситуација во земјата е сериозно влошена и сакал достоинствено да се повлече од функцијата, иако засега нема официјална потврда кога би можела да биде објавена таквата одлука.Притисокот врз лидерот на лабуристите се засили по лошите резултати на локалните избори, по што речиси сто пратеници побараа негова оставка. Во меѓувреме, неколку владини функционери поднесоа оставки, меѓу кои и министерот за здравство Вес Стритинг, кој се смета за еден од можните ривали на Стармер.Британските медиуми пишуваат и дека градоначалникот на Манчестер, Енди Бернам, размислува за кандидатура за парламентот, што би му овозможило во иднина да се вклучи и во трката за премиерската функција.

Свет | пред 2 седмици

Трагедија во Виндзор: Војник загина по пад од коњ

Припадник на Кралската церемонијална и коњичка единица на британската армија им подлегнал на тешките повреди откако паднал од коњ, јавуваат британските медиуми.На повредениот војник веднаш му била укажана лекарска помош на лице место, но тој починал, пренесува „Гардијан“.Несреќата се случила по завршување на прикажување на коњичка вежба во градините на Виндзорскиот дворец, соопштила полицијата.Војникот паднал од коњ во петок навечер, по излегување од арената. И покрај брзата медицинска интервенција, тој починал на лице место.Полицијата соопшти дека случајот се третира како неразјаснет, но дека нема сомнителни околности.Манифестацијата во Виндзор продолжува според планот, но ќе биде изоставен дел од програмата на Кралската коњичка единица.Полицијата апелира сите кои имаат информации да се јават и да помогнат во истрагата.Портпарол на Бакингемската палата соопшти дека кралот Чарлс е длабоко потресен од смртта на војникот и ќе стапи во контакт со семејството за да изрази сочувство.

Свет | пред 2 седмици

Иран ѝ се закани на Британија и Франција поради Ормускиот Теснец

Иранскиот заменик-министер за надворешни работи упати закана поради можноста Велика Британија и Франција да распоредат воени бродови во Ормускиот Теснец.„Секое распоредување и стационирање разурнувачи околу Ормускиот Теснец, под изговор на ‘заштита на поморскиот сообраќај’, не е ништо друго освен ескалација на кризата“, напиша тој на социјалните мрежи.Тој додаде дека присуството на британски и француски воени бродови, кои би можеле да учествуваат во, како што наведе, „нелегални и меѓународно незаконски акции на САД“, ќе наиде на „моментален и одлучен одговор“.Британското Министерство за одбрана вчера соопшти дека на Блискиот Исток го испраќа разурнувачот „ХМС Драгон“ како подготовка за можна мултинационална мисија за заштита на поморскиот сообраќај во Ормускиот Теснец.Велика Британија и Франција во последните денови учествуваат во разговори за повторно воспоставување безбеден премин за трговските бродови низ овој клучен поморски коридор.Според информациите, планот би барал координација со Иран, а подготвеност за учество во мисијата досега изразиле околу десет држави.

Свет | пред 3 седмици

Британија испраќа брод на Блискиот Исток

Велика Британија објави дека го испраќа својот воен брод „ХМС Драгон“ на Блискиот Исток како дел од подготовките за можна меѓународна операција за заштита на бродовите во Ормускиот теснец, кога условите ќе го дозволат тоа.„ХМС Драгон“, разурнувач за противвоздушна одбрана, бил распореден во источниот Медитеран уште во март, кратко по почетокот на војната со Иран, со задача да помогне во одбраната на Кипар.Преместувањето на бродот следува по одлуката на Франција да ја распореди својата ударна група со носач на авиони во јужниот дел на Црвеното Море, додека Лондон и Париз работат на заеднички одбранбен план за враќање на довербата во оваа важна трговска рута.Портпарол на британското Министерство за одбрана изјави дека однапред позиционирање на „ХМС Драгон“ е дел од внимателното планирање за Британија да биде подготвена, заедно со Франција и други партнери, да го обезбедува теснецот кога ситуацијата ќе се стабилизира.Според информациите, Франција и Велика Британија веќе подготвуваат предлог за безбеден поморски транзит низ Ормускиот теснец по евентуално смирување на конфликтот меѓу САД и Иран. Планот би барал координација и со Иран, а интерес за учество покажале околу десет земји.Британските медиуми наведуваат дека можноста Лондон активно да учествува во ваква мисија е ограничена поради намалените капацитети на Кралската морнарица, која во последните години повлече дел од бродовите од употреба пред да бидат подготвени нивните замени.

Свет | пред 3 седмици

Добитник на лотарија останал без милион фунти: го пропуштил рокот за исплата

Добитник на награда од милион фунти (околу 1,15 милиони евра) во рамки на играта EuroMillions останал без наградата откако не поднел барање за исплата во предвидениот рок од шест месеци, соопшти операторот на британската лотарија Alvin.Добитниот билет бил купен на 4 ноември во подрачјето на Борнмут, Крајстчерч и Пул, но и покрај потрагата по сопственикот, не била поднесена ниту една валидна пријава до истекот на рокот на полноќ во недела, пренесува Sky News.Претставник на компанијата Енди Картер изјавил дека „мистериозниот милионер“ не ја подигнал наградата, со што ја пропуштил шансата за исплата на добивката.„И покрај обемната потрага по мистериозниот милионер, можам да потврдам дека сопственикот на тикетот не се јавил да ја подигне својата награда EuroMillions и за жал ја пропушти оваа сума пари што му го менува животот“, рекол Картер.Неисплатениот износ сега ќе биде пренасочен во фондовите на Националната лотарија на Обединетото Кралство и ќе биде наменет за финансирање проекти од јавен интерес, кои според операторот собираат околу 33 милиони фунти неделно за различни општествени иницијативи.

Медиасет | пред 4 седмици

Британија воведе санкции за регрутирање мигранти за војната во Украина

Обединето Кралство воведе санкции против 35 лица и организации поврзани со регрутирање ранливи мигранти за учество во војната во Украина, како и за производство на дронови користени во конфликтот, пренесува Ројтерс.Според соопштението на британскиот Форин офис, воведени се 17 мерки во рамки на режимот на санкции за нерегуларни миграции. Тие се однесуваат на мрежи за трговија со луѓе кои, како што наведуваат британските власти, организираат префрлање луѓе на фронтот во Украина.Дополнителни 18 санкции се воведени во рамки на режимот против Русија, при што дел од нив таргетираат програма за која Лондон тврди дека користи „измамнички методи“ за регрутирање луѓе, главно од Камерун, за производство на дронови.Британскиот министер за санкции, Стивен Даути, изјави дека „експлоатацијата на ранливи луѓе за поддршка на руската војна во Украина е варварска“, додавајќи дека новите санкции ќе ги нарушат структурите преку кои мигрантите се испраќаат на фронтот и се додаваат компоненти за руската воена индустрија.

Свет | пред 4 седмици

Чарлс ја заврши посетата на САД со средба со Трамп

Британскиот крал Чарлс и кралицата Камила ја завршуваат својата четиридневна државна посета на САД со кратка посета на Белата куќа, каде што ќе се простат од американскиот претседател Доналд Трамп, кој веќе беше домаќин на свечена вечера за нив пред два дена.Официјалната цел на кралската посета е одбележување на 250-годишнината од американската независност од британската колонијална власт. Посетата, исто така, имала цел да ги зајакне односите меѓу двете земји, кои кралот Чарлс ги опишал како „нераскинлива врска“ и „неопходен сојуз“.И покрај неодамнешните тензии околу одбивањето на Обединетото Кралство да се приклучи на воениот конфликт меѓу САД и Израел против Иран, односите меѓу Лондон и Вашингтон се оценуваат како стабилизирани. Трамп, иако критичен кон британскиот премиер Кир Стармер, изјавил дека има добри односи со кралот Чарлс, кого го нарекол „голем пријател“.За време на посетата кралскиот пар оддаде почит на жртвите од терористичките напади на 11 септември 2001 година во Њујорк, положувајќи цвеќе кај споменикот на местото на поранешниот Светски трговски центар.Чарлс се очекува да положи венец и на Националните гробишта Арлингтон, додека кралскиот пар ќе присуствува и на настан во сојузната држава Вирџинија, по што ќе отпатува за Бермудите, во рамките на продолжението на неговата турнеја.

Свет | пред 1 месец

Трампова одмазда кон Британија: Што се случува со Фолкландските Острови?

Светската јавност ја изненади информацијата дека Фолкландските Острови, архипелаг во јужниот Атлантик за кој Обединетото Кралство и Аргентина војуваа во 1982 година, повторно стануваат тема на меѓународни тензии.Според наводи пренесени во дел од британските медиуми, американскиот претседател Доналд Трамп наводно упатил закани за повлекување на американската поддршка за британскиот суверенитет над островите, што предизвикало вознемиреност во Лондон.Во извештаите се наведува дека причината за ваквиот пресврт се разликите меѓу Вашингтон и Лондон околу воената соработка во рамки на тековните операции поврзани со Иран, при што САД наводно барале поширок пристап до воени бази, меѓу кои и бази во Индискиот Океан и во Велика Британија.Британската влада, предводена од премиерот Кир Стармер, според истите наводи, делумно одбила или ограничила дел од барањата, што било оценето како недоволна поддршка од страна на Вашингтон.Во меѓувреме, во приказната се вклучува и аргентинскиот претседател Хавиер Милеј, кој, според анализите, има поблиски ставови со САД, што дополнително ги комплицира односите околу суверенитетот на островите, кои Аргентина ги нарекува Малвини.Фолкландските Острови беа предмет на воен конфликт во 1982 година, кога траеше 74 дена борби меѓу британските и аргентинските сили. Во конфликтот загинаа 255 британски и 649 аргентински војници.Британските власти официјално повторуваат дека нивниот став за суверенитетот останува непроменет и дека правото на жителите на самоопределување е клучен аргумент во спорот.И покрај ваквите тврдења, аналитичарите предупредуваат дека евентуално намалување на американската дипломатска поддршка би можело да создаде нови притисоци врз Лондон, особено во рамки на меѓународните организации, каде досега САД играа важна улога во одржување на статус кво.Од британската влада велат дека остануваат цврсти на својот став, но признаваат дека односите со Вашингтон се клучни за нивната одбранбена и разузнавачка соработка.

Свет | пред 1 месец

Грција донесе итна одлука пред летната сезона: Овие туристи ќе бидат изземени од новиот систем за влез

Британските туристи кои ова лето ќе патуваат во Грција ќе ги избегнат контроверзните нови контроли на границите на Европската унија (EES), откако Атина се откажа од земање отпечатоци од прсти и скенирање на лице.Оваа одлука доаѓа во момент кога Брисел продолжува со воведување на Системот за влез и излез (EES), кој бара сите посетители надвор од ЕУ да остават биометриски податоци на аеродромите и граничните премини.Системот предвидува на државјаните од трети земји, како Велика Британија, да им се земаат отпечатоци од прсти и фотографии при влез во Шенген зоната, која опфаќа 29 европски земји, главно членки на ЕУ.Автоматизираниот EES систем првпат беше воведен во октомври 2025 година, а аеродромите и пристаништата имаа рок до 10 април целосно да ја имплементираат оваа технологија како задолжителна.EES ќе го замени досегашниот систем на печатирање пасоши од страна на граничната полиција.При првата регистрација во системот, се фотографира лицето и се скенира пасошот. На возрасните и децата постари од 12 години им се земаат и отпечатоци од прсти.Британските патници не мора посебно да се подготвуваат, но им се препорачува да пристигнуваат порано на аеродромите поради подолги чекања на пасошката контрола.Системот – осмислен да го замени традиционалното печатирање пасоши и да ги следи правилата за престој без виза од 90 дена – веќе предизвика сериозни доцнења и фрустрации кај патниците.На туристите им беше кажано дека редиците може да траат и до четири часа (па дури и седум) во рамки на новиот режим, кој сега е целосно оперативен.Но, во обид да избегне нарушувања во екот на летната туристичка сезона, Грција засега одлучи да се изземе од системот, пишува „Дејли мејл“. Елени Скарвели, директорка на грчката Национална туристичка организација во Велика Британија, изјави дека оваа одлука „ќе обезбеди полесен и поефикасен влез во Грција“ и „значително ќе го намали времето на чекање“, како и гужвите на аеродромите.Минатата недела на аеродромот Линате во Милано, повеќе од 120 патници на „ИзиЏет“ останаа заглавени поради долги задржувања на граница, поради што го пропуштија летот за Манчестер.Според „Дејли мејл“, од 156 патници кои требало да патуваат за Манчестер, само 34 успеале да се качат, додека 122 останале. „ИзиЏет“ подоцна се извини. Во Велика Британија проблемите и натаму постојат на клучните гранични точки во Довер, Фолкстон и на лондонската станица Сент Панкрас, каде скапите EES киосци сè уште не се поврзани со француските гранични системи.Се очекува нарушувањата да траат најмалку до септември.Одлуката на Грција се смета за стратешки потег насочен кон заштита на нејзиниот витален туристички сектор, кој во голема мера зависи од британските туристи кои ги посетуваат дестинациите како Крф, Крит и Родос – места кои во сезона можат да примат и повеќе од 2.000 британски туристи дневно.Бидејќи нема потврден датум кога ова изземање ќе престане, сè погласни се шпекулациите дека и други медитерански земји би можеле да го следат овој пример.Експертите од туристичката индустрија велат дека промената веќе влијае на плановите за патување. Портпарол на британското туристичко здружение ABTA изјави дека „оваа година поради војната на Блискиот Исток расте интересот за Европа како туристичка дестинација“. Се очекува Грција да биде петта најпопуларна дестинација за Британците ова лето, по Шпанија, Франција, Италија и САД.„Сè уште е рано да се каже како оваа промена ќе влијае на бројот на посетители, бидејќи одлуките за патување зависат од повеќе фактори“, изјави портпаролот на ABTA..

Свет | пред 1 месец

Рецесија на повидок: 250.000 Британци може да останат без работа

Околу четвртина милион луѓе во Велика Британија би можеле да ги загубат работните места до средината на 2027 година поради рецесија предизвикана од војната на САД и Израел против Иран, се наведува во анализа на „Гардијан“.Министерката за економија Рејчел Ривс ги повика банкарските раководители на разговори со цел да се ублажат последиците од рецесијата, додека два извештаи на водечки сметководствени компании укажуваат на сериозноста на економската закана за Обединетото Кралство.Посебен извештај на компанијата „Делоит“ покажува дека финансиските директори на големите британски компании веќе презеле мерки кои веројатно ќе влијаат врз економската активност и вработеноста, пренесува „Гардијан“.EY Item Club соопшти дека очекува британската економија да стагнира во вториот и третиот квартал од годинава, што би можело да ја доведе земјата на работ на рецесија, дефинирана како два последователни квартали на економски пад.Компанијата предвидува дека невработеноста ќе достигне 5,8 проценти до средината на 2027 година, во однос на сегашниот петгодишен максимум од 5,2 проценти, при што речиси 250.000 луѓе би можеле да останат без работа поради кризата на Блискиот Исток.Според анализата, економскиот раст би се преполовил – од 1,4 проценти во 2025 година на 0,7 проценти оваа година, што ќе го прекине позитивниот тренд забележан во февруари, кога растот на БДП бил над очекувањата.„Растечките трошоци за енергија и нарушувањата во синџирите на снабдување би можеле да ја турнат Велика Британија на работ на техничка рецесија до средината на годината. Куповната моќ на потрошувачите ќе биде под притисок, додека поскапото финансирање и неизвесната глобална економска средина дополнително ќе ги забават инвестициите“, изјави главниот економски советник Мет Свонел.Според EY Item Club, инфлацијата во втората половина на 2026 година би можела да достигне речиси 4 проценти – речиси двојно повеќе од целта на Банката на Англија од 2 проценти, додека се очекува монетарните власти да не реагираат веднаш со зголемување на каматните стапки.Извештајот на „Делоит“ покажува дека довербата на финансиските директори во март паднала на најниско ниво од почетокот на пандемијата на КОВИД-19, а како главни ризици се посочени геополитичките настани, растот на цените на енергијата и зголемените трошоци за финансирање.Најголемите грижи кај директорите се цената на енергијата (61 процент), инфлацијата и каматните стапки (61 процент), како и порастот на сајбер напади (60 проценти).Во анализата се наведува дека кризата поврзана со Иран веќе има директно влијание врз растот на цените на енергијата, што дополнително може да влијае врз инфлацијата и монетарната политика, додека во САД се бележи зголемување на сајбер напади поврзани со Иран.Како одговор, британските компании преминуваат кон порестриктивни финансиски стратегии, со фокус на намалување на трошоците, зачувување на ликвидноста и зајакнување на билансите, додека плановите за инвестиции и нови вработувања се намалуваат.Извештајот на Меѓународниот монетарен фонд покажува дека Обединетото Кралство се соочува со најголеми ревизии на прогнозата за раст меѓу земјите од Г7, при што за 2026 година се предвидува раст од 0,8 проценти, наместо претходно очекуваните 1,3 проценти.

Свет | пред 1 месец

Лондон: Уапсени двајца за обид за палење синагога, истрага за можна странска вмешаност

Британската полиција уапсила две лица поради обид за подметнување пожар во синагога на северот од Лондон, а антитерористичката единица истражува можна поврзаност на серија неодамнешни напади врз еврејски цели со Иран.Според полицијата, приведени се 17-годишник и 19-годишник во врска со инцидентот што се случил во неделата рано наутро во синагогата Kenton United. Во пожарот е предизвикана мала штета од чад, а повредени нема.Ова е најновиот во серијата напади врз еврејски објекти во Лондон во последните недели, вклучувајќи обиди за палење други синагоги и оштетување на имот поврзан со еврејската заедница.Британските безбедносни служби предупредуваат дека по конфликтот во Газа и нападите од октомври 2023 година, се зголемил бројот на инциденти против еврејски цели, а дел од истрагите ја разгледуваат и можната употреба на посредници поврзани со ирански структури.

Свет | пред 1 месец

Судбината на базата Диего Гарсија под знак прашалник

Владата на Обединетото Кралство одлучи да го стави во мирување договорот за пренос на суверенитетот над островите Чагос на Маврициус, по критиките од Доналд Трамп.Според британските власти, законската процедура за договорот нема да биде ставена на дневен ред во парламентот, сè додека не се обезбеди поддршка од Соединети Американски Држави.Од кабинетот на премиерот Кир Стармер соопштија дека Лондон ќе продолжи да работи на убедување на Вашингтон да даде формално одобрение за договорот.Во центарот на спорот е стратешки важната воена база Диего Гарсија, која се наоѓа на архипелагот Чагос и претставува клучна точка за американските воени операции во Индискиот океан.Британската влада нагласува дека безбедноста и долгорочната оперативност на базата остануваат приоритет, додавајќи дека договорот ќе продолжи само доколку има јасна поддршка од САД.Одлуката доаѓа во период на зголемени тензии меѓу Лондон и Вашингтон, особено поради различните позиции околу конфликтот со Иран и користењето на британските бази за воени операции.

Свет | пред 1 месец

Стармер: „Доста ми е од Трамп“

Британскиот премиер Кир Стармер изјави дека му е „доста“ од Доналд Трамп.За време на посетата на земјите од Заливот, Стармер остро се спротивстави и на израелските напади врз Либан, порачувајќи дека тие „не смеат да се случуваат“.Тој недвосмислено ги осуди израелските воени акции, велејќи: „Ова мора да престане, тоа е мој цврст став, и затоа прашањето не е техничко – дали се работи за прекршување на договорот или не“.Иако напомена дека „не сите ги знаеме сите детали од примирјето“, додаде: „Но, да бидам сосема јасен – тие не се во право“.САД и Израел, од друга страна, тврдат дека договорот за прекин на огнот со Иран не го опфаќа Либан, додека Иран го тврди спротивното.Индекс потсетува дека во средата попладне Израел извршил изненаден напад врз централниот дел на Бејрут, при што за само 10 минути биле погодени 100 цели, во рамки на, како што наведоа, кампања за искоренување на силите на Хезболах поддржани од Иран.Според локалните власти, убиени се околу 112 лица.Израелскиот премиер Бенјамин Нетанјаху изјави дека привременото примирје со Иран нема да го вклучи Хезболах и дека Израел ќе продолжи да „удира со полна сила“.Иран се закани со повторно започнување на војната доколку Израел продолжи со бомбардирањето на Либан, а во знак на протест го запре и поминувањето на нафтени танкери низ Ормускиот теснец.

Свет | пред 1 месец

Британскиот премиер патува кон Блискиот Исток: Лондон со дипломатска офанзива по договорот меѓу САД и Иран

Британскиот премиер Кир Стармер отпатува на Блискиот Исток, каде ќе се сретне со припадници на Кралското воздухопловство кои учествуваат во заштита на сојузничкиот воздушен простор.Посетата, која била планирана и пред објавата за прекин на огнот меѓу САД и Иран, ќе вклучи и обраќање на премиерот до британските војници на терен.Во својата прва реакција на договорот за примирје, Стармер го поздрави како важен чекор кон деескалација, оценувајќи дека ќе донесе олеснување за регионот и светот.„Меѓународната заедница мора да направи сѐ за овој прекин на огнот да се одржи и да се претвори во траен договор“, изјави британскиот премиер.Тој нагласи дека стабилизацијата на Ормутскиот теснец, како клучна енергетска и трговска рута, е од суштинско значење за глобалната безбедност и економија.Во рамки на посетата, Стармер ќе одржи и билатерални средби со партнери од земјите од Заливот и други регионални лидери, иако од неговиот кабинет засега не откриваат детали за конкретните соговорници.Посетата се случува во чувствителен момент, кога дипломатските напори се насочени кон зачувување на кревкото примирје и спречување на нова ескалација во регионот.

Свет | пред 1 месец

Жена пронашла торба со оружје на улица во Лондон - ја изгубиле полицајци

Наоружани полицајци кои го чуваат лондонскиот градоначалник Садик Кан заборавиле торба со оружје пред неговата куќа, на што укажала минувачка, пренесуваат медиумите.Градежникот Џордан Грифитс изјавил за The Sun дека неговата девојка ја пронашла торбата на улица во јужен Лондон во вторник навечер.Во торбата имало полуавтоматска карабина Heckler & Koch MP5, пиштол Glock, електрошокер и муниција, јавиле весниците.„Не можев да верувам на своите очи“, изјавил Грифитс за The Sun.Работникот повикал полиција и им кажал што пронашол, по што за неколку минути дошле по оружјето.„Му беше кажано дека торбата ја оставил еден од службениците на полицијата за безбедност на Садик Кан, што има смисла бидејќи тој тука живее.“Полицијата ги потврди неговите наводи и дека оружјето е нивно.„Се верува дека торбата ја изгубиле дежурните полицајци непосредно пред минувачката да ја пронајде“, соопштија од Метрополитенската полиција.„Ова е многу сериозен инцидент и е пријавен кај Управата за професионални стандарди на Метрополитенската полиција. Сега мора да се преземат сите мерки за да се обезбеди ваков инцидент повеќе никогаш да не се повтори“, осуди портпаролот на градоначалникот.

Свет | пред 2 месеци

Рускиот амбасадор во Британија: „Лондон е делумно одговорен за нападите врз Иран“

Рускиот амбасадор во Велика Британија, Андреј Келин, денес оцени дека американската и израелската агресија против Иран е делумно резултат на политиката на Лондон.„Всушност, трагичните настани во Иран и пошироко во регионот се делумно резултат на политиката на Лондон, која им одеше на рака на анти-ирските јастребови во Вашингтон и придонесе за колапсот на Иранскиот нуклеарен договор од 2015 година (JCPOA)“, изјави Келин, пренесува RIA Novosti.Тој посочи на, како што рече, цинизамот на Лондон, кој ја критикува иранската одмаздничка акција без осуда на воените злосторства против иранското население.„Судирот на Блискиот исток уште еднаш го откри цинизмот на Лондон. Британската влада се прави дека не забележува кој го започнал конфликтот и кој ја извршил агресијата. Ги критикува Иран поради контранападите, како да тој го започнал конфликтот. Во меѓувреме, ги затвора очите пред воените злосторства против иранските цивили, вклучувајќи убиство на малолетници“, нагласи Келин.САД и Израел на 28 февруари почнаа да напаѓаат цели во Иран.Техеран изведува одмазднички напади врз израелска територија, како и врз американски воени објекти на Блискиот исток.

Свет | пред 2 месеци

Нови е-пораки откриваат: Питер Манделсон сакал да му „среди“ на Епстајн посета на Даунинг стрит за 15-годишно „кумче“

Нови е-пораки објавени од американското Министерство за правда откриваат дека британскиот политичар Питер Манделсон се обидел да му помогне на осудениот сексуален престапник Џефри Епстајн да организира посета на Даунинг стрит 10 и Домот на лордовите за девојче кое Епстајн го нарекувал свое „кумче“, во време кога тој издржувал затворска казна на Флорида поради случај поврзан со малолетничка.Во преписката, Епстајн пишува дека „со Питер Манделсон“ ќе организира патување до „Број 10“ и Домот на лордовите, а потоа директно му се обраќа на Манделсон, нагласувајќи дека „најважната личност“ за него, покрај самиот Манделсон, е девојчето кое ќе биде во Лондон „следната среда и четврток“ и прашува што може да се направи патувањето да биде „посебно“.Манделсон, според истите е-пораки, возвратил со кратко прашање за возраста, на што Епстајн одговорил дека станува збор за 15-годишно девојче, додавајќи дека ќе биде во придружба на родителите и дека „само десет минути“ во Домот на лордовите и Даунинг стрит 10 би ѝ значеле многу. Во продолжение, Манделсон му одговорил дека е „во ред за сè“.Објавените документи дополнително сугерираат дека Епстајн ја користел близината со Манделсон како канал за пристап до влијателни кругови и настани во Британија, иако Епстајн веќе имал статус на осуден сексуален престапник. Во друга порака, поврзана со семејството Дубин, се споменува и принцот Ендру, за кого во јавноста подолго време постоеја сериозни обвинувања поврзани со Епстајн и неговата мрежа.Е-пораките фрлаат светло и врз односот меѓу Манделсон и Епстајн во периодот пред и по апсењето на Епстајн во 2008 година. Според документите, контактот не запрел, а Манделсон наводно се поставил како неформален советник, изразувајќи поддршка и нудејќи насоки за „стратегија“ во моментот кога Епстајн се соочувал со правните последици.Во поновите преписки, се наведува дека комуникацијата меѓу двајцата траела со години, со тврдења дека тие останале во контакт најмалку до 2016 година, а во извештаи што се споменуваат во документите се сугерира дека односот се провлекувал и подоцна. Објавувањето на овие материјали повторно ги отвора прашањата за тоа како Епстајн успевал да одржува врски со високи политички и општествени фигури, и кои институционални механизми потфрлиле во навремено препознавање на ризикот и јавниот интерес.

Свет | пред 2 месеци

Стармер: Британија нема да испрати војници во Иран

Британскиот премиер Кир Стармер изјави дека Обединетото Кралство нема да испраќа војници во Иран и нема директно да се вклучи во војната.„Ова не е наша војна и нема да бидеме вовлечени во неа“, порача Стармер, додавајќи дека Лондон презема исклучиво одбранбени мерки за заштита на своите граѓани, интереси и сојузници во регионот.Тој нагласи дека Британија продолжува со дипломатските напори за повторно отворање на Ормускиот теснец, кој е клучен за глобалната трговија со нафта.Сепак, и покрај ваквата позиција, Велика Британија им дозволи на САД користење на своите воени бази за напади врз цели поврзани со заканите во теснецот, а истовремено распореди и борбени авиони за пресретнување на ирански проектили.Со ова, Лондон се обидува да одржи баланс – без директно учество на терен, но со ограничена поддршка на сојузниците во рамки на пошироката безбедносна стратегија.

Свет | пред 2 месеци