Мијалков побарал да излезе порано од затвор: Кривичен го одбил, спас бара во Апелација

Ексдиректорот на УБК, Сашо Мијалков кој призна вина во „Империја“ и доби три години затвор, барал условен отпуст, дознава „Скопје1“. Ова е можност која ја имаат сите затвореници кои ќе издржат половина од казната, а поради добро поведение, може да побараат да изезат побрзо. Кривичниот суд постапувал по неговото барање, но не му го одобрил, со што, тој треба да остане во струшкиот затвор до крај на казната.Сепак, Мијалков спас ќе бара во Апелација. Решението на Кривичниот совет од Кривичен суд го обжалил пред апелационите судии. Сега, второстепениот суд ќе може да му ја прифати жалбата и да му даде отпуст или пак да го потврди решението.Освен за случајот „Империја“ каде сам призна вина и се договори со обвинителката Лиле Стефанова да добие помала казна, Мијалков нема да понесе никаква одговорност за најголем дел од другите предмети каде беше обвинет. Застаре најголемиот предмет „Таргет-тврдина“ за прислушувањето, како и „Титаник 2“ за изборни нерегуларности. Не се знае иднината на предметот „Трезор“ за набавката на британската опрема за следење на комуникации. Мијалков има уште една условна казна, а тоа е за предметот „Плацови на Водно“.Казната за „Империја“ ја издржуваше во струшкиот затвор. Станува збор за отворен тип на затвор, што значи, тој излегува денски, се враќа ноќе. Тами треба само да преспие, ако се следи правилникот.Последно, Мијлакови успеаа да си ги повратат и становите кои им беа конфискувани од „Империја“, и тоа за џ'блк цени.

Македонија | пред 1 година

Затворски полицајци од Шутка завршија во притвор во Грција: едниот на боледување, другиот со слободни денови шверцувале мигранти

Затворски полицајци од затворот „Скопје“ во Шутка се уапсени во Грција, дознава „Скопје1“. Според нашите извори, тие биле запрени на контрола, кога грчката полиција во нивните возила нашла мигранти кои ги превезувале. Станува збор за лицата Кире Т. и Мурат В. кои во истражниот затвор биле чувари.Двајцата биле изведени пред истражен судија во Грција, каде им бил одреден притвор. Извори за „Скопје1“ брифираат дека едниот полицаец бил на боледување кога правел шверц со мигранти, додека другиот користел слободни денови.„Скопје1“ побара детали од истражните органи во Грција во врска со случајот, од каде очекуваме одговори.

Македонија | пред 1 година

Вети транспарентност, но нема одговор дали МВР ќе се тресе поради издавање документи без „северна“ изминатите пет години

Новоизбраниот државен јавен обвинител, Љупчо Коцевски кажа дека ќе биде транспарентен, но веќе на првото прашање за отворање на предмет поради издавање на документи без „северна“ – немаше одговор. Вети дека ќе биде отчетен, но не кажа дали Обвинителството ќе започне предистрага за лицата во МВР кои изминатите пет години нарачувале и пуштале во промет стари обрасци и не овозможиле издавање на документи со новото уставно име, како што било пропишано.„Во оваа прилика знам дека голем интерес на јавноста е за предметите кои се во тек и тие кои ќе се отворат. Но во денешниот ден, не би навлегувал во детали. Јавното обвинителство ќе формира предмети по поднесени пријави, кои по чуен глас ќе допре до јавниот обвинител и ќе нема селекција при гонење на кривичните дела. Ако има доволно докази, јавното обвинителство ќе поведе постапка“, рече Коцевски во првата изјава за медиумите.За потсетување, адвокатот Владимир Туфегџиќ посочи дека за ова треба да има одговорност.„Тој што во изминатите 5 години нарачувал и пуштал во промет стари обрасци и овозможил изработка и издавање на лични документи со важност подолго од 12.02.2024 иако знаел дека важноста на истите е до 12.02.2024, на 13.02.2024 сабајле во 08,00 треба да биде во Јавно обвинителство“, напиша Туфегџиќ пред три денаПо заклетвата, новиот државен обвинител посочи дека ќе постапува според Уставот и законите, па додаде дека искуството ќе му помогне да биде одговорен шеф.„Со моето долгогодишно знаење мислам дека можам да одговорам на функцијата. Во програмата која ја дадов, основните начела се транспарентноста, а тоа ќе ја поттикне ефикасноста кај јавните обвинители и ќе ја подобри довербата кај јавноста. Тоа треба да биде единствениот орган кој се бори со корупцијата. Ова што го ветувам ценам дека ќе го исполнам. Сега пред јавноста изјавувам дека Обвинителството и јас ќе бидеме отворени за јавноста, ќе бидеме во секое време отворени за информации“, додаде Коцевски.Неговата биографија не е јавно објавена. Познато е дека ако не беше избран на функцијата, за неколку месеци ќе беше пензиониран.

Македонија | пред 1 година

Ако не го избраа за државен обвинител, годинава ќе одеше во пензија - Коцевски во шест страни кажа што ќе прави шест години на функцијата

Шест страници со многу сликички, од кои, на две се приоритетите, а на по една се клучните стратегии, планираните активности и заклучокот - вака изгледа програмата на новиот државен обвинител Љупчо Коцевски, кој во следните шест години треба да раководи со Републичкото обвинителство. Во старт објаснува што за него значи одговорно лидерство, па покажува дека ја знае организациската структура, по што посочува: „оваа програма ја отсликува мојата визија за приоритетите на обвинителството...“. Коцевски има 63 години, а според информации на „Скопје1“ годинава полни 64 години, што значи би заминал во пензија. Но бидејќи доби мандат од шест години, пензијата ќе почека.Во приоритети, Коцевски, за кого не се знае многу, наведува дека е решен да го разбие криминалот, да ја зголеми ефикасноста во работењето, но и транспарентноста.„Посветено ќе се залагам за бескомпромисен кривичен прогон на сите сторители на кривични дела. Приоритетите на обвинителството ќе бидат усогласени со приоритетите на ЕМПАКТ платформата (Европска мултидисциплинарнa платформa за сузбивање на криминални закани), надополнети со она што, согласно статистичките показатели во Република Северна Македонија е криминалитет, од кој граѓаните се најмногу засегнати. Централно место во овие приоритети зазема борбата против корупцијата, сузбивањето на организираниот криминал, тероризмот, компјутерскиот криминал, трговијата со луѓе, сексуалната експлоатација на деца, трговијата со мигранти, трговијата со наркотични дроги, измамите, економскиот и финансискиот криминал, еколошкиот криминал, трговијата со оружје, семејното и родово базирано насилство, насилството извршено преку интернет и слично“, стои во делот за борбата против криминалот.Приоритети ќе му бидат отчетноста и транспарентноста, финансиската самостојност, унапредување на меѓународната соработка, промовирање на култура на интегритет. Скоро сите се точки, за кои и кај неговите претходници кажувале дека им се најважни. Потоа во делот на „клучни стратегии“, наведува дека најважно е имплементирање на препораките од Европската Унија и меѓународната заедница, па споменува и куп планови кои ги има.Има и дел со планирани активности, па и тука повторува дека ќе внимава на отчетноста и транспарентноста, а ќе унапредува и меѓуинституционална соработка. Осврт става на конфискација на имот, финансиски истраги и стратешко партнерство.„Да се биде јавен обвинител на Република Северна Македонија е одговорна задача која бара познавање на состојбите и предизвиците со кои се соочува обвинителството, искуство во кривичниот прогон, раководни и комуникациски вештини, професионален авторитет и доверба кај колегите. Искрено верувам дека можам да одговорам на предизвикот да го водам Јавното обвинителство, за што имам конкретна визија и план, но и решителност тие визии и планови да ги остварам. Свесен сум дека ме очекуваат навистина големи предизвици: од успешно спроведување на дигитализацијата, преку унапредување на условите и квалитетот на работењето, па се до етаблирање на обвинителството како орган на кој граѓаните ќе му веруваат и каде ќе се обратат за заштита на нивните права. Доколку бидам избран на функцијата, посветено ќе работам со единствена цел - градење на домашниот и меѓународниот кредибилитет на јавното обвинителство како вистински партнер на институциите и на сите граѓани, заштитник на сигурноста и на јавниот интерес, ефикасен борец против сите облици на криминал“, пишува Коцевски кој стана државен обвинител.Програмата погледнете ја тука.

Македонија | пред 1 година

Уште пред да ги изберат, се знаеше дека ќе бидат тие: Пеливанов и Сарамандова си одат во Вишо

Обвинителите Наташа Сарамандова и Трајче Пеливанов се избрани за обвинители во Вишо обвинителство, како што најави „Скопје1“ утринава пред седницата. Нивниот избор беше договорен уште пред седницата, за што брифираа извори од Советот на јавни обвинители за „Скопје1“. На седницата по кратките пофалби, двајцата обвинители го добија само мнозинството гласови.Изборот на Пеливанов во повисокото обвинителство доаѓа во период кога за него беше објавен скандл. „Алфа“ пишуваше дека додека тимот на Катица Јанева го гонеше, Пеливанов се допишувал со сега избеганиот Исмет Гури од ДУИ – а пораки го открија пријателството. За него има дисциплинска постапка и пред Советот на јавни обвинители, истото тело кое денеска планира да го избере во Вишото обвинителство-Скопје. Тој е познат и како „наследникот на Русковска“, бидејќи беше в.д. шеф кога Вилма беше супсендирана поради дисциплинската постапка која се водеше против неа. Пред да стане дел од Јавното обвинителство за гонење организиран криминал и корупција, минатиот април, Пеливанов беше дел до тимот на поранешната специјална обвинителка Катица Јанева. Обвинителот Пеливанов, како обвинител од СЈО во група со обвинителката Ленче Ристоска и Артан Ајро го застапуваше обвинението за масовното незаконско прислушување, но и за нелегалната набавка на британска опрема за следење за кои Сашо Мијалков.Сарамандова пак, се обиде да стане обвинтиелка во Обвинителството за гонење организиран криминал и корупција, но неуспешен. Сарамандова е позната по четири предмети, од кои едниот е поврзан со гонењето на Здравко Савески поради фрлањето боја за време на шарената револуција врз државните фасади. Второто обвинение покренато од неа е против поранешниот судија кој сега е во затвор Владимир Панчевски за злоупотреба на АКМИС-системот. Последно во низата е обвинението против Емил Јакимовски за заканите против новинарки и семејно насилство, каде беше досудена дваесетмесечна затворска казна. Последниот е поврзан со гонење на десет лица од кои пет се од МВР, осомнични за шверцување на лускузнзи автомобили.Пеливанов и Сарамандова на чекор до Вишо – кои предмети ги водеа, за да сега бидат унапредени - Скопје1.мк (skopje1.mk)(Видео) Додека тимот на Катица Јанева го гонеше, Пеливанов се допишувал со сега избеганиот Исмет Гури од ДУИ – пораки го открија пријателството - Скопје1.мк (skopje1.mk)

Македонија | пред 1 година

(Видео) Возачките да важат до крајот на годината е законското решение кое ќе го гласаат пратениците

Пратениците ќе гласаат измени на закон со кој возачките дозволи ќе важат до крајот на годината. Со 88 гласа „за“ предлогот се најде на седница, а потоа беше пратен на разгледување на комисиите. Ќе се носи по скратена постапка. За законот има консензус од сите политички партии.„Се работи за мали измени на законското решение, во одредбата каде што стои 12 февруари, се заменуваат со 31 декември 2024 година или до крајот на годината. Сметаме дека ова законско решение кое ќе помогне во надминување на проблемите со личните документи, ќе донесе намалување на напнатоста и редиците на чекање“, рече Никола Мицевски.Законското решение откако ќе биде разгледано на матичните комисии, ќе биде ставено на гласање на пленарна седница. Продолжението на пленарната седница ќе биде во 16:20 минути.

Македонија | пред 1 година

Нови детали од истрагата за Вања: Се бара реконструкција, сослушани клучни сведоци - ќе има ли нов тек на случајот

Реконструкција на киднапирањето на Вања Ѓорчевска со кое ќе се утврди релевантноста на исказите и ќе се докаже дека таткото Александар Ѓорчевски немал вина, бара адвокатот Владимир Туфегџиќ. Тој во изјава за „Скопје1“ посочува дека изминатиот период се сослушани клучни сведоци кои биле во контакт со таткото во критичниот период кога Вања беше киднапирана и убиена. Тврди дека од обвинителката Жаклина Крстевска Јосифоска не добиле ниту еден доказ од кој може да потекнува сомнението дека таткото учествувал во чинот на киднапирање.„Со проактивниот пристап на одбраната до сега се сослушани сите клучни сведоци кои биле во комуникација со таткото на детето во критичниот период. До сега ниту на мене ниту на мојот клиент не ни е презентиран ниту еден вербален или материјален доказ од кој произлегува основаното сомневање за сторено кривично дело кое му се става на товар“, вели Туфегџиќ за „Скопје1“.Упатено е обвинителката да направи реконструкција на настанот, бидејќи според адвокатот, на тој начин, ќе се утврди дали исказите против таткото се релевантни.„Очекувам Јавниот обвинител да превземе дејствие реконструкција на настанот во и околу зградата на ул. Наум Наумовски Борче, бидејќи само на тој начин, со непосредно забележување и опис на дејствијата на лице место може да ја утврди и провери релевантноста на досега изнесените наводи кои се однесуваат на таткото на детето. Реконструкцијата може да биде направена компјутерски заради комплексноста на самата локација. Убеден сум дека со оваа постапка е направена уште една голема трагедија но времето е најголем сојузник до вистината“, посочува адвокатот Туфегџиќ.Тој се сомнева дека поради недостаток на докази, притворот за таткото на Вања ќе се правда со потребата да се заврши екстрадицијата на осомничениот за организација и реализација на двете убиства, Љупчо Палевски.„Во наредниот период Јавното обвинителство веројатно ќе ја правда потребата од мерката притвор поради фактот што сѐ уште не е екстрадиран Љупчо Палевски, за чија екстрадиција не сум убеден дека ќе оди со динамика како што тоа во јавноста се обидуваат да го претстават политичките чинители, особено сега во предизборниот период. По однос на ова прашање не добивме одговор од надлежните, дали Палевски се наоѓа во екстрадиционен притвор или во привремен затвор како што е објавено во јавноста, бидејќи екстрадиционата постапка не познава категорија привремен затвор“, додаде Туфегџиќ за „Скопје1“.Според него, прес-конференцијата на Оливер Спасовски и Гаврил Бубевски, создала амбиент за линч на таткото. Туфегџиќ е дециден дека некој имал мотив таткото да го прикаже како проблематичен случај.„После онаа несреќна и непрофесионална прес конференцијата на министерот и Јавниот обвинител, на која се изнесени низа нелогичности и претпоставки и се создаде амбиент на колективен јавен линч на таткото на детето, се надевам дека во текот на постапка ќе го добиеме одговорот на клучното прашање а тоа е кој, зошто и со кои аргументи имал мотив уште од првиот ден таткото на детето да биде прикажан во јавноста како проблематичен социјален случај, иако однапред се знаело дека тоа нема врска со вистината, а неговото семејство е познато и пристојно финансиски ситуирано“, додаде адвокатот.Според него, ова е важно прашање, па потсети и дека политичари создавале простор за сатанизација на Ѓорчевски. Во тој период, фотографија од таткото објави и актуелниот пратеник од СДСМ, Мартин Костовски кој за осомничениот меѓудругото напиша: „... ти не си татко, ти си р’ѓa монструозна“.„Ова е клучно прашање на кое одговор треба да дадат и некои актуелни политичари кои со објави на своите ФБ профили имаат огромен придонес во создавањето на ваквиот амбиент на сатанизирање и јавен линч“, додава Туфегџиќ.Истрагата за двете убиства и натаму е во тек. Обвинителстовото ги доби двата обдукциски наоди за убиствата, но не сподели ништо со јавноста. Се молчи и за фактот дали е најдено оружјето со кое се убиени Вања и Панче, а истовремено, обвинителката Жаклина Крстевска Јосифоска презема и други истражни дејствија.Во овој случај, Љупчо Палевски-Палчо е осомничен дека бил планерот, организаторот и реализаторот на двете убиства. Велибор Манев, Боре Видевски и Влатко Кешишев се осомничени за киднапирање и убиство на двете жртви. Александар Ѓорчевски, татко на убиената Вања се сомничи дека му дал информации на Палчо поврзани со времето кога неговата ќерка ја напушта зградата и оди на училиште. Последниот осомничен е Стефан Димковски, кој беше уапсен за помагање на бегството на Палчо бидејќи отишол до Белград да го земе Палевски и да го однесе во Турција. Палевски-Палчо е во екстрадиционен притвор во Турција, додека останатите осомничени се во притвор.Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Велес и Скопје на 3 декември.

Македонија | пред 1 година

Ексшефот на кабинет на Ковачевски е вдомен: „Недостасува уште координатор за координирање на националните координатори“

Експремиерот Димитар Ковачевски креирал специјално место кај националните координатори во Владата, за да го вдоми неговиот доскорешен шеф на Кабинет, Мартин Попов. На 9 јануари, шеснаесет дена пред Ковачевски да поднесе оставка, Владата донела решение со кое Попов го назначува за национален координатор за следење на реализација на програмата на Владата. Но, морал да остане до Ковачевски до 25 јануари, кога тој поднесе оставка.„Мартин Попов се именува за Национален координатор за следење на реализацијата на програмата на Владата, сметано од 25 јануари 2024 година“, пишува во решението на Владата“, стои во објавеното решение во Службен весник.Ваков национален координатор до овој момент немало. Тоа го покажува и веб-страницата на Владата. Тоа значи дека Попов е првиот кому му се дава функција да следи реализација на програма на Владата. „Скопје1“ стапи во контакт со Попов од кого побаравме став, но тој неколку дена не одговара на нашите прашања.[caption id="attachment_276873" align="alignnone" width="774"] Попов е на специјално креирано национално координаторско место, оти до сега не постоело[/caption]Националните координатори за првпат во јавноста станаа актуелни пред минатите парламентарни избори во 2019/2020 година. Тогаш, пред раководењето со Владата да го преземе техничката Влада, експремиерот Зоран Заев, национални координатори ги направи Бојан Маричиќ, Марјан Забрчанец, Роберт Поповски и Роберт Алаѓосовски кои останаа без функции. Тогаш се коментираше дека СДСМ ја уникала функцијата „министер без ресор“, но затоа креирала нови места како „национални координатори“.„‘Национален координатор’ - функција која се доделува секогаш кога за едно лице повеќе од месец дена лупаш глава и се прашуваш каде да го сместиш“, пишуваа граѓаните пред три години.Други пак коментираат: „Недостасува уште координатор за координирање на националните координатори“.

Македонија | пред 1 година

Нови кавги и тензии во Судски: „Личните нетрпеливости оставете си ги пред врата“

Нови кавги избија во Судскиот совет. Претседателката Весна Дамева и членот Лорета Горгиева се скараа оти Дамева укажа дека треба да се постапува ажурно, а претставките од граѓаните да не чекаат по два месеци за одговор. Горгиева реагираше бурно оти претседателката и пререче, а се надоврза и членот Селим Адеми кој се обиде да ја оправда Горгиева. Прва започна Дамева која праша дали претставката која Горгиева ја презентира е нова и од кога се постапува. Потоа следуваше првата реакција.„Јас да замолам сите членови, да внимаваме за ажурноста. Оваа претставка од 19.10, имаше и други претставки, се повеќе од 2-3 месеци. Ве молам поради јавноста колеги, молба е, бидете ажурни. По 2,5 месеци, без извиди да кажуваме на странката, ќе биде на наша штета“, рече Дамева.На ова возврати Горгиева.„Бидејќи продолжувате со исти стил на работа, да ве известам дека претставката е нова. Оваа претставка беше повлечена бидејќи стручниот соработник беше на боледување и не е на работа до ден денеска, претставките беа кај него и немаше услови за реферирање. Ве молиме да си држиме до нивото, да не правиме тензии од нешто што не постои. И потоа да зборуваме дека некој го нарушува јавниот ред и мир. Уредно и достоинствено да си работиме“, рече тааПовторно возврати Дамева.„Граѓаните не ги интересира, ако имате проблем со стручните, кажете ми ќе преземам мерки. Ова се однесува на сите не е ништо лично“, кажа претседателката, на што се надворза одново Горгиева: „Ова е лично, ве замолувам на ниво. Ова ги поминува граѓаните“.Во кавгата влета и Селим Адеми, ексзаменик претседателот кој незаконски ја разреши Дамева.„Имаме претставки и по шест месеци. Ве молам“, рече Селим Адеми.Со ова се согласи и Горгиева која на Дамева ѝ рече: „Ве замолувам како претседател, дадете допринос да работиме професионално и чесно. Личните нетрпеливости оставете си ги пред врата“.По ова продолжи седницата на која се расправа по претставки од граѓани против судиите.

Македонија | пред 1 година

Бил на распит: Се бара каде Дрин Ахмети го наполнил џипот со петарди и огномети, па ќе се одлучи дали ќе одговара пред суд

Обвинителот се труди да најде докази од каде бизнисменот Дрин Ахмети ги купил петардите и огнометите со кои беше фатен на „Пластичарска“, па ќе одлучи дали ќе го гони кривично. Тој бил на распит, потврдуваат од Обвинителството. „Скопје1“ дознава дека негирал вина и кажал дека набавката била легална, исто како во изјавата дадена за нашата редакција. Ахмети го убедувал обвинителот дека нема никаква вина. Од Обвинителството велат дека откако ќе ги соберат сите докази, ќе одлучат што ќе прават понатаму.„Извршен е распит на пријавеното лице, а надлежен јавен обвинител, имајќи го предвид извршеното вештачење, обезбедува вербални и материјални докази за набавката на пиротехничките средства, по што ќе биде донесена одлука“, велат од Обвинителството за „Скопје1“.Кај обвинителот стигна и вештачењето кое треба да покаже што превезувал Дрин Ахмети во неговиот џип со албански регистрации, во моментот кога бил запрен на рутинска контрола. Не се открива што извештачиле службениците од МВР.Претходно, Ахмети објави дека пиротехниката била купена легално и дека не била за препродажба.„Скопје1“ ги проверуваше пресудите донесени од Кривичниот суд, а кои се однесуваат на лица кои поседувале пиротехнички средства. Од нив може да се утврди дека држењето на пиротехнички средства претставува кривично дело, односно дека Обвинителството поднесувало обвиненија. Граѓани кои биле затекнати со петарди и огномети, одговарале по членот 396 став 4 во кој стои: „Ако предмет на делото од ставот на овој член е поголемо количество на распрскувачки материи наменети за дозволени забавни, свeчени и други активности, сторителот ќе се казни со парична казна или со затвор до три години“.Дрин Ахмети беше запрен од полиција на ул „Самуилова“ (Пластичарска) во Скопје. Возел „ренџ ровер“ со албански регистрации. Беше спроведен во станица, а таму се правеше и увид во возилото.

Македонија | пред 1 година

Нино Васев се сомничи за осум дела, осомничени се и тројца доктори-онколози заедно со организацискиот директор

Пет лица се под сомнение дека сториле злоупотреби на Клиниката за онкологија. Ова го соопшти шефот на скопските обвинители, Гаврил Бубевски. Меѓу осомничените е и ексмедицинскиот директор на Клиниката, Нино Васев кој се сомничи за седум кривични дела злоупотреба на службена положба и овластување и за измама во службата. Осомничен е и организацискиот директор Нехат Нухи, кој се сомничи за измама во службата. Останатите лица се доктори.„Наредбата е за едно лице за седум кривични дела злоупотреба на службена положба и овластување и едно кривично дело измама во службата, едно лице се сомничи за измама во службата, а за три лица за помагачки дејствија за измама во службата. За овие дејствија има истражна постапка, предвидени се повисоки казни. И затоа денеска се носи наредба за истражна постапка“, рече Бубевски.Медицинскиот и организацискиот директор набавиле лекови на реверс пред склучување на договор за јавна набавка, без согласност од ФЗОМ во период кога постапките за јавна набавка сѐ уште не биле спроведени од Министерството за здравство. Васев се гони за седум злоупотреби оти направил седум јавни набавки без објавување на оглас.„Фактурите за вака набавените лекови биле изготвени и доставени до Клиниката по склучување на договорите за јавна набавка, без почитување на начелото на конкуренција. Набавени се лекови по склучување на договор со добавувачите без согласност од ФЗОМ. За да сите овие набавки и склучени договори предизвикаат правно дејство мора да имаат согласност од ФЗОМ, без неа, немаат правно дејство. Во периодот од 2018 до 2021 година, осомничениот медицински директор не ги фактурирал лековите од биолошката терапија кон ФЗОМ, биле преземани обврски над определениот годишен буџет, Клиниката вршела делење на набавката на ист лек и спроведувала постапка со преговарање без објавување на оглас во неколку наврати за краток временски период. Она што е карактеристично за оваа постапка е недостатокот за транспаретност и субјективно однесување на учесниците во постапката. Ова отвора можност за коруптивни практики. Оваа постапка за преговарање без оглас се смета за постапка која не треба да се користи освен доколку ситуацијата не дозволува спроведување на други постапки за доделување на договори за јавни набавки“, рече обвинителката Ана Гоговска-Јакимоска.Таа кажа дека спротивно на протоколите за лекување, се препишувани лекови на пациенти каде постои недоследност во дозирањето на лековите и тајмингот на апликацијата. Прегледани се повеќе од 500 истории, а повеќе од 25.000 електронски записи на пациенти.„Тоа не значи дека е кратена или не е давана терапија, бидејќи во овој момент такво нешто не се докажа. Ова значи, народски кажано дека е требувана вишок терапија на име на пациентите. Раздолжувана е терапија повеќе од тоа што треба пациентите да го примат. Биле издавани (препишани) скапи лекови од новите генерации на имуно терапија на ден пред смртта на пациентот - а ова значи дека кога веќе било очигледно дека од апликацијата на таквиот лек дека нема да има бенефит поради статусот на пациентот, тие биле давани. Дали се дадени или не се дадени ние не можеме да тврдиме“, додаде обвинителката.Тие објаснија зошто биле направени претходните претреси пред неколку месеци. Предметот го водат двајца обвинители.„Се влегува во истражна постапка по предметот ‘Онкологија’. Според пишувањата во медиумите почнаа некакви сомненија на ниво на основи на сомненија за злоупотреби по различни начини од страна на претходните раководни лица по однос на лекувањето и злоупотреба на народните пари односно кражба на финансиски средства поврзани со буџетот. По таа основа на сомнение даваше за право да се основа предмет за криминалистичко истражување за да се даде повеќе информации и доказен материјал. Се формираше предмет во полиција, одлучија дека треба да се влезе во Онкологија бидејќи имало сознанија дека доказен материјал може да биде предмет на контаминација и уништување. Тоа е до тогаш“, рече Бубевски.

Македонија | пред 1 година

Обвинителите „се судрија“, Незири ќари слобода - на судиите не им било јасно образложнието па го пуштиле од куќен притвор

Обвинителот од скопското Обвинителство кој го гони Беким Незири од ДУИ за упадот во М-НАВ бил дециден дека осомничениот требало да остане во куќен притвор, истовремено, виш обвинител посочил дека треба да биде пуштен да се брани од слобода. Според обвинителот кој ја води истрагата против Незири, постои страв осомничениот да уништи траги, да влијае врз сведоци, а не е извршено ниту вештачењето на мобилниот, се прибираат докази. Сето ова за нивните колеги од повисокото Обвинителство не се факти за да Незири остане во куќен притвор.Судиите Тања Милев, Ѓоко Ристов и Лирие Елези Ајрулау од Апелација не разбрале зошто се бара Незири да биде во притвор оти образложението и фактите од списите не биле исти.„...Меѓутоа, по оцена на овој суд имајќи ги предвид жалбените наводи истакнати во жалбата на Основното јавно обвинителство С. против решението на Судијата на претходната постапка како и списите на предметот КПП.бр.9/24, утврди дека причините за донесување на обжаленото решение наведени во образложението на истото по однос на основите за определување на мерка куќен притвор, се нејасни и не кореспондираат со фактите кои произлегуваат од списите во предметот, во која насока е и дадениот предлогот на Вишото јавно обвинителство Скопје“, стои во решението на Апелација.Па така, Вишото обвинителство, се согласило со Апелација дека нема реални факти Незири да избега.„Воедно, видно од содржината на предлогот за определување на мерката притвор не произлегува дека во истиот се приложени докази или се истакнати факти и околности кои укажуваат на реална опасност од бегство на осомничениот, страв од попречување на кривичната постапка со влијание врз сведоците и соучениците, ниту се наведени околности кои го оправдуваат стравот дека ќе го повтори кривичното дело. Во таа насока, ниту во обжаленото решение со кое кривичниот совет при првостепениот суд определил мерка куќен притвор не се наведени образложени причини релевантни за донесување на одлуката за преиначување на решението на судијата на претходна постапка и определување на мерка куќен притвор“, стои во решението од Апелација.Тројцата судии одлуката да го ослободат Незири го гледа како човек кој нема да избега туку ќе докажува невиност.„Дотолку повеќе што се работи за семеен човек, татко на три деца, живее и престојува на позната адреса истиот е вработен, како и фактот дека не е доставен доказ по однос на осудуваноста на осомничениот, а воедно ниту во наредбата не се наведени ниту оштетените или одговорните лица и кои материјални докази треба да бидат преземени во текот на истражната постапка“, се додава во решението.Незири е осомничен дека го овозможил влезот на тепачите во кругот на М-НАВ, со што бил загрозен воздушниот сообраќај, бидејќи упадот бил во зградата каде е контролата на летање. Еден контролор беше и физички нападнат, другите добија закани.Ова дојде по прес-конференцијата на Синдикатот на котролори на летање, кои најавија повлекување од работните позиции бидејќи преку оглас имало обид за вработување на некомпетентни партиски кадри.Претходно:

Македонија | пред 1 година

Нино Васев: Тој што напиша дека се давала физиолошка терапија наместо лек треба да понесе одговорност, ако не се докаже

Ексдиректорот на Клиниката за онкологија, Нино Васев, побара одговорност од новинарката која напишала дека пациенти наместо лек, добивале само физиолошка терапија. Тој кажа дека доколку тоа не се докаже, ќе треба да се понесе одговорност. Одговараше околу еден час на прашања од пратениците дел од Анкетната комисија.„За да се даде физиолошка терапија наместо лек, тој што тоа го напиша треба да го докаже и да понесе одговорност ако не е така“Тој пријавил две кражби извршени од медицинска сестра, која самиот тој по првата ја вратил на работа. Кажува дека било наложено, а случаите немале судска разрешница.„Пријавив два случаи, едниот јас, другиот со економскиот директор. Првиот беше кражба во дневната болница, ја пријавија три сестри со главната сестра. Викнавме служби, беше фатена со три кеси лекови по завршеток на смена. Случајот по шест месеци, кој не влезе во процедура, со адвокат таа (сестрата) беше вратена на работа, но не е ставена во дневна болница, туку на одделение да работи без можност да дојде во контакт со лекови. Истата особа, оваа година, го повтори делото со новото раководство и е отстранета од работа“, кажа Васев.Тој кажа дека ги почитувал сите министри кои раководеле со здравството.

Македонија | пред 1 година

Беким од ДУИ не е во притвор оти не може да влијае на тепаниот, а никој не вршел притисок врз обвинителот, велат од Вишо обвинителство

Беким Незири не може да влијае врз тепаниот контролор од М-НАВ, па затоа виш обвинител од Скопје му предложил на судот да го пушти од куќен притвор. Ова е оправдувањето кое го дава скопското Вишо обвинителство за „Скопје1“ по однос на мислењето Незири да остане само без пасош. Прашавме и како се сигурни дека Незири нема да го повтори делото, а со оглед дека тој се врати на работа во М-НАВ, на што скопскиот виш обвинител посочи дека Незири нема да го стори тоа оти во спротивно ќе оди во притвор.„Оштетениот дал исказ пред јавниот обвинител со што се отстранува секаква можност за да се влијае врз него по однос на неговиот исказ“, велат од Вишото обвинителство за „Скопје1“.Со оглед дека Незири е висок партиски човек на ДУИ, прашавме дали некој влијаел да се добие позитивно мислење со кое Апелација ќе го ослободи осомничениот.„Никој не вршел притисок врз јавните обвинители од Вишото јавно обвинителство Скопје по однос на нивното мислење доставено до Апелациониот суд. Обвинителите, пред да ги донесат своите одлуки, реферираа за нив пред Вишиот јавен обвинител, кој е запознаен и согласен со одлуките“, велат од Вишото обвинителство за „Скопје1“.Пред четири дена, Незири беше пуштен од притвор со одлука на Апелација.„Судот, ценејќи ги доказите приложени кон доставениот предлог за определување на мерка притвор, а имајќи предвид дека единствен доказ кој се однесува на осомничените е потврдата за привремено одземени предмети како и наводите во изјавената жалба на ОЈО Скопје против Решението на судијата на претходна постапка и образложението на обжаленото решение, оцени дека во истите не се приложени докази ниту се истакнати факти и околности кои укажуваат на реална опасност од бегство на осомничените, страв од попречување на кривичната постапка со влијание врз сведоците и соучесниците, ниту се наведени околности кои го оправдуваат стравот дека ќе го повторат кривичното дело, а имајќи ги предвид личните прилики на осомничените и нивното однесување по сторување на кривичното дело за кое се сомничат“, велат од Апелација.Незири е осомничен дека го овозможил влезот на тепачите во кругот на М-НАВ, со што бил загрозен воздушниот сообраќај, бидејќи упадот бил во зградата каде е контролата на летање. Еден контролор беше и физички нападнат, другите добија закани.Ова дојде по прес-конференцијата на Синдикатот на котролори на летање, кои најавија повлекување од работните позиции бидејќи преку оглас имало обид за вработување на некомпетентни партиски кадри.

Македонија | пред 1 година

Пациентите на уапсениот Нино Васев ќе добијат терапии, уверува директорката на Онкологија и тврди дека болницата функционира нормално

Клиниката за онкологија функционира нормално, терапии се даваат, уверува директорката и доктор, Виолета Клисаровска за „Скопје1“, а откако ексдиректорот и доктор кој води пациенти, Нино Васев беше уапсен. Таа уведува дека нема потреба од паника, бидејќи сите терапии ќе бидат дадени согласно термините кои пациентите ги има.„Универзитетската Клиника за онкологија и радиотерапија функционира нормално, во моментов течат редовни прегледи, се дава континуирано терапија и третмани за пациентите“, вели Клисаровска за „Скопје1“.Таа нема коментар за апсењата кои се случија на нејзината клиника.„Што се однесува до истрагите кои се водат и информациите од утрово, ве молиме да се обратите до надлежните институциите“, додава Клисаровска за „Скопје1“.Претходно, објавивме дека Нино Васев со лисици е изнесен од болницата. Тој е во полициска станица, а е осомничен во предметот кој го води скопското Обвинителство за кражба и злоупотреба на цитостатици. Тој ќе биде задржан во станица 24 часа, дознава „Скопје1“. Потоа, ќе се одлучува дали ќе се бара мерка за обезбедување присуство како што е приворот, куќниот притвор, одземање на патни исправи, јавување во суд.Истовремено, три лица опфатени со истрагата во моментов се недостапни за органите на прогнот и по нив се трага.

Македонија | пред 1 година

(Фото) Нино Васев е уапсен на Онкологија, со лисици однесен во полициска станица

Ексдиректорот на Клиниката за онкологија, Нино Васев е приведен на почетокот од работното време во просториите на болницата, дознава „Скопје1“. Приведувањето е по налог на обвинител, а во склоп на истрагата за кражбата на цитостатици и нивна злоупотреба. Васев има статус на осомничен во овој предмет.Според информации на „Скопје1“ тој ќе биде задржан во полициска станица 24 часа, време во кое ќе треба да даде исказ пред полицијата и обвинител. „Скопје1“ се обиде да исконтактира со Васев, но иако телефонот и натаму ѕвони, никој не одговара.Од Обвинителството само кратко потврдуваат дека акцијата е во тек, а информации најавуваат по нејзино завршување.Претходно објавивме дека има и лица кои се во бегство.

Македонија | пред 1 година

Осомничени за убиството на Вања се жалеле на здравјето во Шутка, биле носени и на прегледи во клиники

Дел од осомничените за убиството на Вања Ѓорчевска и Панче Жежовски се жалат на здравствени проблеми и се носат на контроли во болница, открива директорот на затворот „Скопје“ во Шутка, Филип Андов за „Скопје1“. Тој посочува дека состојбата им ја следи домскиот лекар. „Скопје1“ дознава дека на Клиника е носен и осомничен за кој МВР и Обвинителстовто кажаа дека признал вина во случајот и раскажал како се одвивале киднапирањата и убиствата.„Изолирани се во посебни ќелии, здравствената состојба ја следи домскиот лекар и по негово укажување се препраќаат и носат на посебни прегледи на соодветни клиники, за сите претворени лица во овој случај безбедноста е на високо ниво и се со посебен режим, достава на храна, прошетка на чист воздух“, посочува Андов за „Скопје1“.Истрагата за двете убиства и натаму е во тек. Обвинителстовото ги доби двата обдукциски наоди за убиствата, но не сподели ништо со јавноста. Се молчи и за фактот дали е најдено оружјето со кое се убиени Вања и Панче, а истовремено, обвинителката Жаклина Крстевска Јосифоска презема и други истражни дејствија.Во овој случај, Љупчо Палевски-Палчо е осомничен дека бил планерот, организаторот и реализаторот на двете убиства. Велибор Манев, Боре Видевски и Влатко Кешишев се осомничени за киднапирање и убиство на двете жртви. Александар Ѓорчевски, татко на убиената Вања се сомничи дека му дал информации на Палчо поврзани со времето кога неговата ќерка ја напушта зградата и оди на училиште. Последниот осомничен е Стефан Димковски, кој беше уапсен за помагање на бегството на Палчо бидејќи отишол до Белград да го земе Палевски и да го однесе во Турција. Палевски-Палчо е во екстрадиционен притвор во Турција, додека останатите осомничени се во притвор.Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Велес и Скопје на 3 декември.

Македонија | пред 1 година

Судот му го вратил пасошот на рокерот Ѓорѓе Давид кој усмрти жена, за да замине во Србија, без да побара став од обвинителот

Рокерот Ѓорѓе Давид (Николиќ) замина за Белград каде ќе одржи прес-конференција, откако судот во Куманово му го вратил пасошот. Судијата не побарал мислење од обвинителот за замена на мерките, туку само донел одлука. Сега, рокерот кој прегази жена близу границата „Табановце“ треба само еднаш месечно да се јавува во кумановскиот суд.„Судија на претходна постапка од Основниот суд во Куманово донел одлука за замена на мерките на претпазливост, при што одредено е единствено лицето еднаш месечно да се јавува во Судот. Од Основното јавно обвинителство Куманово не беше побарано мислење по однос на замената на мерките“, велат од Обвинителството за „Скопје1“.Несреќата се случи пред седум дена. 49-годишна кумановка го загуби животот, додека три други лица се здобиле со повреди. Се уште не е готово ниту вештачењето кое треба да утврди дали кај рокерот има вина.

Македонија | пред 2 години

(Видео) Филмот „Једини“ за Тоше премиерно во Крушево - како сиромашното момче стана ѕвезда која блеска и денеска

Документарецот „Једини“ (Единствен) посветен на Тоше Проески, зад кој се потпишува Катерина Миловановиќ од српската „Прва Телевизија“, беше премиерно промовиран во Крушево, ден по неговиот роденден. Ладната сала во Младинскиот културен центар за момент стана сала на солзи. Како што најблиските пријатели на Тоше ги раскажуваа приватните моменти, а соработниците раскажуваа како настанувале големите хитови, така се нижеа емотивни нагони. Во документарецот, се зборува за детските денови на Тоше, моментите со пријателите, неговата желба за живот без слава, хуманоста, но и тешките моменти со семејството кое било на прагот на сиромаштијата. Миловановиќ со нејзиниот тим специјално дојде во Крушево за промоцијата. Беше придружувана со единствениот медиум во салата, покрај „Скопје1“. Се заблагодари на сите.„Кажавте многу. Морам да се заблагодарам на сите кои сте овде. Гледам многу лица кои учествуваа во изработката на филмот и многу ми е драго за тоа. Фала што ги споделивте вашите спомени и чувствата кои долго ги чувавте, што дозволивте да ги видиме снимките и сликите прикажани во филмот за првпат. Беше задоволство да се работи овој филм. Верувам дека на најдобар начин успеавме да го прикажеме балканскиот ангел“, рече Милановиќ.Моментите со Тоше и неговата приватност ја сподели Јован Шапе, другар на нашата музичка легенда, со кого ги поминал деновите во училишните клупи. Меѓу другото, раскажа и за организацијата на концертот со минимални финансии, но без откажување. Цитати од Дора Проеска, сестра на Тоше, во кои таа раскажува како тој имал проблеми со очите, а тие имале пари само за автобуски билет кога го носеле на доктор во Прилеп – донесе емоционална бура кај сите присутни.„Еден ден пред да одиме на вежби за видот, со мајка ми влеговме во продавница. Пред нас, човек купуваше кикирики во вакуум. Тоше ја праша мајка ми: ‘Дали еден ден кога ќе имаме пари, ќе ми купиш вакви кикирики?’. Никогаш не бараше многу беше свесен дека семејството ни е многу сиромашно. Нема – нема..“, стои во цитатот од сестрата на Тоше.Најпознатото место во Крушево каде Тоше поминувал многу моменти е „Планет“. Имало дупка на кровот, која тој ја поправал, а до неа, негов потпис. Пријателите токму во истото кафуле, ги споделија снимките и фотографиите направени со Тоше. Во филмот зборува и вујкото на нашата ѕвезда, Тоше.Жељко Самарџиќ споделува како се запознале со Тоше и ја покажа првата касета која ја добил од него. Андријана Јаневска за моментите кога настанала несреќата и неверувањето дека Тоше го нема. Александар Митевски за моментите во неговото студио каде се снимаше и „Македонија навива за нас“. Глигор Копров за настанувањето на песната „Усни на усни“. Текстописецот Огнен Неделковски меѓудругото посочува: „Македонската музика не може да се опорави“. Новинарката Соња Алексовска, која напиша и книга за Тоше, исто така раскажа многу за него.Од првиот настап до последниот концерт, сите снимки се дел од овој документарен филм. За наградата „Златна бубамара“, во него зборува и Ранко.Документарниот филм е преведен на македонски јазик. Засега нема најава за емитување во Македонија. Но затоа, своја телевизиска премиера ќе има на српска „Прва“, утре (недела), во 18:50.

Магазин | пред 2 години

Уште две лица кои упаднаа во М-НАВ завршија зад решетки

Уште двајца од осум осомничени лица добија притвор за упадот во М-НАВ, дознава „Скопје1“. Судија на претходна постапка од Кривичниот суд оцени дека можат да влијаат на сведоци, но и да избегаат, па им изрече ефективен притвор. Според наши извори, станува збор за Суат Шабани и Омер Абдулаху, вмешани во упадот.На двајцата им е одреден притвор од времетраење од 30-дена. Тие ќе бидат спроведени во истражниот затвор „Скопје“ во Шутка.На истражните органи им требаа две недели за да ги најдат и уапсат сите вмешани во упадот, кој резултираше и со тепање на контролор. Сите осум лица се сомничат за кривично дело загрозување на воздушниот сообраќај.Претходно, притвор им беше одреден на уште две лица, од кои едниот, уапсен на граница со Косово во обид да излезе од Македонија. За сите се бараше притвор, но Кривичен одреди останатите, меѓу кои челникот на ДУИ, Беким Незири, добија куќен притвор.Упадот се случи на 4 јануари, по прес-конференцијата на Синдикатот на котролата на летање кој најави оставки од раководните функции на повеќе лица поради оглас преку кој планот бил да се вработат партиски кадри.Владата пак, предложи, а надзорниот одбор го смени раководството. На функцијата остана само економскиот директор . Надзорниот одбор на М-НАВ ги именуваше Хекуран Асани и Милан Кораќ на местата на Фахрудин Хамиди и Љубе Стаменковски.

Македонија | пред 2 години

„Викаа 'држете го крадецот', а тоа биле тие“ - лица од МВР, министерства, агенции помагале на групата формирана да убива

Министерот за внатрешни работи, Оливер Спасовски откри дека лица од институциите оддавале информации на криминалци и членувале во нив. Ова го кажа откако кажа дека 16 лица се уапсени, а биле дел од група формирана за убива и да транспортира дрога.„Утврдивме лица од институциите кои биле соработници во криминалните активности. Ќе бидете сведоци на наредниот период на нови активности, некогаш ќе бидете и зачудени од имињата, но правдата мора да го стигне секој еден“, вели Спасовски.„Има инволвирани од многу институции – МВР, министерства, агенции. Реков, можеби ќе се зачудите во наредниот период, но тоа мора да се покаже. Тие во еден момент викаа ‘држете го крадецот’, а всушност тие биле дел од истите“, додава Спасовски.МВР, Обвинителството и Европол, кои ја спроведувале оваа акција, обезбедиле комуникации помеѓу членовите на групата, а водени на апликацијата „Скај“.

Македонија | пред 2 години

Нема фотографија

(Видео) Група убивала низ Македонија, членови биле 16 лица: Организаторите ги правеле плановите, а ги спроведувале и преку посредници

Група убивала и продавала дрога низ Македонија. Имале планови и дејствувале. Осомничени се 16 лица. Претреси имало на 20 локации, шестмина се уапсени, повеќе лица се надвор од Македонија, а едно лице е уапсено во Шпанија. Деталите ги сподели министерот за внатрешни работи, Оливер Спасовски.„Бирото за јавна безбедност под раководство на ОЈО-ГОКК, со поддршка на Европол, презеде активности за лишување од слобода на лица за кои постои сомневање дека биле дел од меѓународна група, вршеле продажба на дрога и учествувале во убиства. Ова е резултат на повеќемесечната истрага во рамки на која беа обезбедени доволен број на докази, дека од декември 2019 до март 2021 година, пријавениот Ш.М. заедно со уште две лица О.Б. (Орхан Бахрами) и Ј.К. формирале група. Таа била формирана за вршење на убиства. Организаторите создавале планови и носеле одлуки, а ги спроведувале лично или преку припадници“, рече Спасовски.Набавувале и дрога од Колумбија и други земји, а пренесувана била во ЕУ. Над 430 килограми кокаин се транспортирала по воден пат, а друга пак, преку Ротердам требала да стигне во Македонија.„Оваа криминална група договорите ги правела преку непосредни контакти или преку апликацијата ‘Скај’, преку енкриптирана комуникација. Имала две набавки и транспорт на кокаин од латино-американските држави“, додаде Спасовски.Дрога во Македонија се внесувала и од Албанија, како и Белгија.„Во двата случаи имало внесувања четири килограми кокаин“, додаде Спасовски.Според министерот, припадниците на групата која функционирала на меѓународно ниво, со парите купувале куќи, граделе куќи, купувале возила.„Тие се предмет на конфискација“, рече министерот.Како што објави „Скопје1“, оваа група се сомничи за убиствата од 2018 година на Наим Ајети – Беланоца и Антонио Парапулов алијас Тозо.

Македонија | пред 2 години

Нема фотографија

Ќе биде ли „ранлив“ предметот за убиството на Панче и Вања - две обвинителства, различни толкувања

Трансферирањето на предметот за убиството на Панче Жежовски од Обвинителството во Велес и спојувањето со предметот за убиството на Вања Ѓорчевска во Обвинителството во Скопје го отвори прашањето дали е запазена законската процедура. Различни толкувања за исто прашање има од Републичкото и Вишото обвинителство, додека скопското Обвинителство молчи. Ова прашање е важно бидејќи иако станува за процедура, таа може да биде проблем за предметот при евентуално судење. Како е воспоставена надлежност над предметот, испитување побара адвокатот Владимир Туфегџиќ, бранител на Александар Ѓорчевски, татко на Вања кој пак е осомничен за помагање. Евентуалното незапазување на законската процедура го прави предметот ранлив и комплициран, а отвора простор за одолговлекување на постапката.Постои законска процедура како се воспоставува надлежност над предмет. Според Туфегџиќ, тоа е членот 40 од Законот за кривична постапка, каде стои дека Вишо обвинителство треба да решава кој ќе го води предметот. „Скопје1“ постави прашање до скопското Обвинителство и обвинителката Жаклина Крстевска Јосифоска, која го води предметот за убиствата, дали ваквата процедура била испочитувана. Од нив одговор не добивме, а прашањата допатувале до Републичкото обвинителство. Тие сметаат дека нема судир на надлежност, но не објаснуваат како го презеле предметот, со оглед дека увиди вршел обвинител од велешкото обвинителство.„Кривичната пријава поднесена од Министерството за внатрешни работи е доставена до ОЈО Скопје кое како надлежно обвинителство започнало да постапува по неа. До поднесување на кривичната пријава, ОЈО Велес во координација со СВР Велес презело само дејствија за пронаоѓање на пријавено исчезнато лице. По поднесување на кривичната пријава која ги опфаќа и двете убиства, помеѓу двете обвинителства не настанал судир на надлежност, односно надлежно да постапува е ОЈО Скопје бидејќи станува збор за кривични дела помеѓу кои постои меѓусебна врска и постојат исти докази“, посочува Републичкото јавно обвинителство за „Скопје1“.[caption id="attachment_276032" align="alignnone" width="852"] „Скопје1“ прашањата ги постави и директно до шефот на ова обвинителство, Мустафа Хајрулахи, кој е дециден дека согласност за преземање на предметот не е побарано. Дополнително за предметот нема никакви информации и тврди дека му било забрането да бара.[/caption]Прашања упативме и до Вишото обвинителство. Како и во претходниот случај, одговор преку електронска пошта не добивме. „Скопје1“ прашањата ги постави и директно до шефот на ова обвинителство, Мустафа Хајрулахи, кој е дециден дека согласност за преземање на предметот не е побарано. Дополнително за предметот нема никакви информации и тврди дека му било забрането да бара.„Во врска со вашето прашање дали од страна на основниот јавен обвинител на Основното јавно обвинителство-Скопје побарано е било какво пренесување или согласност за да се преземе предмет од Основно јавно обвинителство-Велес, а кое се однесува за кривичниот настан случен на територијата на градот Велес, поточно убиството на Панче Жежовски, Ве информирам дека јавниот обвинител Љубомир Јовески, како републички обвинител, ден или два пред да му заврши мандатот, до мене достави известување со кое мене како шеф на Вишото јавно обвинителство-Скопје ми забранува да барам информации од основните јавни обвинителства за конкретни кривично правни предмети, со посебен осврт на горенаведениот настан, бидејќи според наведеното известување, јас со самото тоа што барам информација, го нарушувам принципот на самостојност во одлучувањето на јавниот обвинител од основното јавно обвинителство“, вели Хајрулахи, кој потоа упатува и критики: „Треба да се напомене дека дури и студентите од прва година на Правен факултет знаат дека барањето информација не значи влијание врз натамошниот тек на носење на одлука на јавен обвинител. Повеќе од јасно е дека Јавното обвинителство почива врз основниот постулат на ова институција, а тоа е принципот на хиерарија и субординација, кој принцип јавниот обвинител Љубомир Јовевски го наруши со донесеното известување само за да удоволи на самоволието на еден јавен обвинител“.Шефот на Вишото, Мустафа Хајрулахи, смета дека со тоа што не смее да бара информации, се врши упад во неговите надлежности. По барањето на адвокатот Туфегиќ, ќе постапува само доколку поширокиот колегиум одлучи поинаку од тоа што сега му било дадено како насока.„Се прашувам, дали кога предметите по жалба стигаат до Вишото јавно обвинителство и кога јавниот обвинител од Вишото јавно обвинителство постапува согласно своите законски надлежности со тоа што го укинува предметот по жалба и дава конкретни насоки во постапувањето на јавен обвинител од Основно обвинителство, дали и тогаш Вишото јавно обвинителство навлегува во самостојното одлучување на јавен обвинител. За наведеното, со писмен допис се обратив до јавното обвинителство на РСМ, а со цел да се свика проширен колегиум со цел да се провери дали донесеното известување е согласно законските одредби од Законот за јавно обвинителство или известувањето е донесено како резултат на самоволието на поединци. Од тие причини, јас како виш јавен обвинител немам никаква информација за конкретниот кривично правен настан бидејќи со наведеното известување не смеам да барам било каква информација од основните обвинителства, што на најдиректен начин се врши упад врз нормалното функционирање на јавното обвинителство во целина. Со ваквите непромислени и удоволувања на самоволија на одредени обвинители, се доведува под знак прашалник нормалното функционирање на јавното обвинителство во целина“, додава Хајрулахи.Од Републичкото обвинителство пак, велат дека известувањето од Јовески било испратено до сите основни и виши обвинителства.„Јавниот обвинител на Република Северна Македонија, кој согласно член 28 од Законот за јавното обвинителство е надлежен да ги носи прописите за внатрешно работење на јавните обвинителства, испрати известување до сите основни и виши јавни обвинителства кое не се однесува на еден конкретен предмет, туку ја појаснува примената на подзаконските акти кои се однесуваат на начинот на реферирање на предметите и начинот на кој се бара достава на информации за предмети од интерес на јавноста“, додаваат тие.Велешанецот Панче Жежовски бил исчезнат на 22 ноември, а исчезнувањето од неговата ќерка било пријавено на 24 ноември. При пронаоѓање на неговото тело постапувал велешки обвинител. Потоа, истрагата на МВР утврдува дека настанот се поврзува со убиството на Вања Ѓорчевска со оглед дека има исти сторители. На 4 декември се одржува прес-конференција на скопското Обвинителство и МВР каде споделуваат информации за двете убиства. На 6 декември кривичната пријава на повеќе од 100 страни се испраќа до скопското Обвинителство. Од овој момент истрагата ја води токму обвинителката Жаклина Крстевска Јосифоска од скопското Обвинителство. До поднесувањето на кривичната пријава, велешкото обвинителство отстапува се на колешката од Скопје.

Македонија | пред 2 години

Оправдано е СДСМ да не гласа за сопствените министри, но не е ако тоа го прави ВМРО-ДПМНЕ - Ковачевски за техничката Влада

Оправдано е што СДСМ во 2016 година не ги гласала сопствените министри во техничката Влада, ама не е оправдано ако тоа го прави ВМРО-ДПМНЕ. Ова е ставот на премиерот Димитар Ковачевски откако новинарите го потсетија дека СДСМ е првата партија која не гласала за сопствените предлози. Според него, тоа било од оправдани причини.„Тогаш беа други услови, тогаш знаете дека Собранието беше злоупотребувано од власта. Кога се носеше буџет, пратениците од СДСМ беа исфрлани од Собранието. Инаку денеска имаме апсолутно владеење на демократијата, вие медиумите можете да потврдите поради слободата која ја имате. Порано беа распродадени вестите, па не можеше ни спортски вести да се видат“, рече Ковачевски.Владата на Емил Димитриев во 2016 година беше избрана без пратеничката група на СДСМ, а предложените технички министри на СДСМ дадоа свечена изјава по три дена. Но и натаму, Ковачевски останува на ставот дека ВМРО-ДПМНЕ не смее да го прави ова.„До недела има доволно време да се договорат сите работи и во недела да има гласање. Сите треба да бидат сериозни. Не може да се однесува некој како 13 годишно дете, да предлага и да не гласа. Никаде во свет нема предлог за министри и да бара друг да му ги гласа“, додава Ковачевски.Според него

Македонија | пред 2 години

Нема фотографија

Кој е внукот осомничен за убиството на бабата во Ново Лисиче: убиената имала и хематоми, починала поради давење

Граѓански и политички активист, твитерџија, невработен, кавгаџија на интернет, пред јавноста вели дека е хуманитарец. Вака со неколку зборa може да се опише профилот на 28-годишниот Борис С., кој се сомничи дека ја убил својата баба во Ново Лисиче. Станува збор за лице кое е познато за дел од јавноста. Имаше свои појавувања во неколку емисии, постојано активен на социјалните мрежи, но и мета на низа критики поради неговиот однос на „Твитер“ односно „Х“. За убиството на баба му, негирал вина и тврдел дека тоа ќе го докаже во постапката, а знаел за повредите кои ги имала.Сомневања како е извршено убиствотоОсомничениот Борис живеел со сега убиената баба. Во исказ пред обвинител не признал дека ја тепал баба му, ниту пак дека ја убил, дознава „Скопје1“. Според доказите со кои располагаат истражните органи, тој го направил тоа гушејќи ја и затворајќи ѝ ја устата, велат извори од истрагата за „Скопје1“. Со тоа настанало задушување. Сето ова се случувало во семејниот дом, стан во Ново Лисиче.Обдукцијата, но и полицијата утврдила дека жената имала хематоми по главата, што на истрагата ѝ укажува дека смртта била насилна.Внукот се брани28-годишниот внук, осомничен за убиство, негирал дека ја малтретирал, тепал или убил бабата. „Скопје1“ дознава дека на распит кај обвинителот тврдел дека хематомите не настанале на 18 јануари, денот кога жената била убиена. Тој бил уверен дека тоа може и да го докаже.Истовремено, осомничениот Борис точно знаел во кој предел на телото, сега убиената баба имала повреди. Тоа јасно го посочил пред истражните органи. Вината за хематомите ја префрлал на други лица.Кој е осомничениот БорисВо емисии се претставувал како хуманитарец, на „Фејсбук“ барал правда за родилката од Дебар која остана без органи, на „Твитер“ пишувал со скриено име „Арогантен666“ и го опишуваат како кавгаџија и лице кое навредувало кога нема аргументи.  Во емисија на РСЕ, снимена пред три години, тој е претставен и како човек кој се бори за промени.Интернет архивите покажуваат дека бил и оратор, каде зборува за чест, достоинство. Во 2012 година има говор на тема политика и социјална стигма.„...Општеството во кое ние денеска живееме е ужасно, затоа треба да најдете малку надеж длабоко во вас, разбудете се, борете се за својата иднина, најдете ја храброста во вас. Затоа што еден ден вие нема да бидете овде, бидејќи вашите најмили ќе бидат. Борете се за нив, во нивно име....“, вели тој дел од во ораторскиот говор од 2012 година.За него биле снимани и интернет прилози.„Имам 25 години сега, волонтирам веќе од 19 години по различни активности, во некои од нив сум бил и јас иницијатор. Основоположник сум на младинската иницијатива „Ние младите“. Дружбата, пријателствата, искреноста, во тешки моменти, во лесни моменти, во напнатост, во среќа, во радост, е максимално голема.... “, раскажува тој во прилогот снимен пред три години.Во друга емисија, тој посочува дека е портпарол во Европски независен институт за човекови права и достоинство.„Јас сум долгогодишен политички активист, ја работам мојата професија, амбиција ми е да ја спроведам правдата во нашиот Независен европски институт“, посочува во истата емисија.Најсвежото гостување му е од пред два месеци, каде коментира политика и бара финансиска помош за лице на кое му претстои тешка операција. Зборува за неправдата во државата.„Ќе има правда... Не сум политички коректен, знам да бидам безобразен...“, посочува во емисијата.МотивОбвинителството без конкретни детали - кој бил мотивот за да ја убие 73-годишната жена.„Основното јавно обвинителство Скопје донесе Наредба за спроведување истражна постапка против 28-годишен скопјанец за кого постои основано сомнение дека сторил кривично дело – Убиство од член 123 став 2 точка 2 од Кривичниот законик. На 18 јануари, во семејниот дом во Ново Лисиче, при вршење семејно насилство, осомничениот со умисла ја лишил од живот својата баба. Според првичните сознанија, тој ја нападнал удирајќи ја по главата и вратот, а потоа ја задушил“, соопштија кратко од Обвинителството.Осомничениот останува во 30-дневен притвор поради опасност од бегство и влијание врз сведоци. 

Скопје | пред 2 години