Лавров: До мир во Украина има уште долг и тежок пат

Рускиот министер за надворешни работи Сергеј Лавров изјави дека нема простор за ентузијазам околу притисокот што американскиот претседател Доналд Трамп го врши врз Европа и Украина, нагласувајќи дека патот до мир е сè уште долг и неизвесен. Неговите пораки доаѓаат неколку дена по разговорите во Абу Даби, кои Соединетите Американски Држави, Украина и Русија ги оценија како тешки, но конструктивни, иако Москва јасно сигнализира дека конечен договор ќе биде исклучително тешко да се постигне.Русија, според изјавите на Лавров, и натаму останува на своите почетни и максималистички позиции. Тие вклучуваат територијални претензии кон источните региони на Украина, јасно противење на членството на Украина во НАТО, како и отфрлање на можноста на украинска територија да бидат распоредени западни сили како дел од какви било безбедносни гаранции.Од украинска страна, претседателот Володимир Зеленски порача дека мирот може да се изгради исклучиво врз основа на цврсти и доверливи безбедносни гаранции. Тој предупреди дека Русија секое евентуално мировно решение би можела да го тестира преку нови напади или преку таканаречени хибридни операции, со што би се поткопала стабилноста и безбедноста во регионот.Во меѓувреме, Кремљ соопшти дека датумот за следната рунда преговори сè уште не е утврден, иако се најавува дека тие би можеле да продолжат во скоро време. Паралелно со дипломатските пораки, Русија ги продолжува и воените дејства, при што во текот на ноќта беше погоден енергетски објект во јужниот црноморски регион Одеса, во момент кога Украина и понатаму се соочува со ниски температури и сериозни енергетски предизвици.

Свет | пред 2 месеци

Пуштени семафорите на „црната точка“ кај училиштето „Љубен Лапе“

Семафорите на крстосницата на улица „Васко Карангелевски“ со улица „Ангел Димовски“, во близина на училиштето „Љубен Лапе“, се пуштени во нормална работа. Оваа раскрсница долго време беше сметана за „црна сообраќајна точка“ поради честите сообраќајни несреќи, особено во текот на минатите месеци.Граѓаните, особено родителите на учениците од „Љубен Лапе“, претходно реагираа дека раскрсницата е небезбедна и бараа ревидирање на сообраќајното решение. Со пуштањето на семафорите, се очекува значително да се подобри безбедноста за пешаците и возилата, а особено за децата кои секојдневно ја користат околината на училиштето.Локалните власти истакнуваат дека продолжуваат со континуирани напори за уредување на сообраќајот во опасните точки низ градот, со цел намалување на ризикот од сообраќајни незгоди и подобрување на безбедноста на граѓаните.

Скопје | пред 2 месеци

Студентите во студ, струја и натаму нема: што го предизвика прекинот кој трае повеќе од 24 часа?

И по повеќе од едно деноноќие, во студентскиот дом „Никола Карев“ во Охрид сè уште нема електрична енергија, а студентите остануваат без основни услови за престој. Од управата на домот нема конкретни информации за причините за прекинот, ниту пак одговор на телефонските повици и барањата за појаснување од јавноста.Единствената достапна информација е јавната објава дека проблемот треба да биде решен во текот на денешниот ден, но без прецизирање кога настанал дефектот, зошто дошло до прекин и во кој термин се очекува нормализација на снабдувањето со струја. Тие решението го чекаат од Министерството за образование и наука.Во меѓувреме, студентите и натаму престојуваат во студени простории, без греење и топла вода, во услови на целосна неизвесност и без навремено институционално информирање.

Охрид | пред 2 месеци

„Грокипедија“ на Илон Маск го претставува Гоце Делчев како Бугарин

Контроверзна содржина поврзана со Гоце Делчев се појави на „Grokipedia“, платформа што се претставува како АИ-верзија на Википедија и е поврзана со компаниите на Илон Маск. На страницата посветена на Делчев, револуционерот е опишан како „бугарски револуционерен лидер“, при што целосно се игнорира македонската историографска и научна традиција која го третира како централен лик на македонското националноослободително движење.Во објавениот текст, „Грокипедија“ го става акцентот на образованието на Делчев во училишта под егзархиска управа и од тоа извлекува заклучоци за неговата национална припадност, без да го земе предвид историскиот контекст на крајот на XIX век, кога идентитетите на Балканот биле сложени, повеќеслојни и далеку од денешните национални категории. Притоа, не се спомнуваат неговите јасно изразени ставови за автономијата на Македонија и познатата мисла за „светот како поле за културен натпревар меѓу народите“.Ваквиот едностран пристап повторно ја отвори чувствителната дебата за историскиот наратив околу Делчев, но овојпат во дигитален формат што се претставува како „фактографски“ и „проверен“. Историчари и културни работници предупредуваат дека ваквите АИ-платформи, иако технолошки напредни, често репродуцираат селективни извори и наративи.Посебна загриженост предизвикува фактот што ваквите содржини се пласираат пред глобална публика, без јасно означување на спорноста и без вклучување на различни научни гледишта. На тој начин, дигиталниот простор се претвора во ново бојно поле за историски интерпретации, каде алгоритмите, наместо научниот дијалог, ја обликуваат јавната перцепција.Македонската јавност веќе реагира дека станува збор за уште еден обид за редефинирање на македонскиот историски идентитет. Според нив, токму затоа е неопходно ваквите содржини јавно да се оспоруваат, а дигиталните платформи да преземат поголема одговорност кога обработуваат чувствителни историски теми кои директно задираат во колективната меморија и националниот идентитет.

Македонија | пред 2 месеци

Гази Баба субвенционира чистење на оџаци – по 1.200 денари за секое домаќинство

Градоначалникот на Општина Гази Баба, Бобан Стефковски утрово информираше дека е објавен Јавен повик за субвенционирање на граѓаните за чистење на оџаците во своите домаќинства.„Загадениот воздух е еден од најголемите предизвици со кои се соочуваме. Со редовно чистење на оџаците се овозможува подобро согорување на огревното дрво, намалување на штетните честички ПМ10 и ПМ2.5, поголема заштита од пожари и зачувување на животната средина“, истакна Стефковски во објавата на Фејсбук.Висината на субвенцијата ќе изнесува 1.200 денари по домаќинство, а персоналниот данок е на товар на Општина Гази Баба.Право на учество имаат жителите на општина Гази Баба дел од домаќинства со исчистен оџак во периодот од објавата на повикот до 30.11.2026 година, со фискална сметка и потврда од овластена фирма.Како да аплицирате?Поднесете барање со потребната документација во архивата на Општина Гази Баба, улуца „Архимедова“ бр.2, секој работен ден од 07:30 до 16:30 часот.Повеќе информации и формулари на линкот од јавниот повик: https://gazibaba.gov.mk/j-a-v-e-n-p-o-v-i-k-za.../

Скопје | пред 2 месеци

Израелскиот премиер бара ограничување на ракетните и терористичките активности на Иран

Израелскиот премиер Бенјамин Нетанјаху ќе отпатува во Вашингтон за да се обиде да влијае врз текот на преговорите со Иран, во момент кога Техеран сигнализира подготвеност за ограничени отстапки, но го одбива разговорот за ракетната програма.Нетанјаху, како што јавува „Тајмс оф Израел“, ќе се сретне со американски официјални лица и им изјавил дека неговата цел е да „врши влијание врз преговорите со Иран“.Според израелскиот функционер, премиерот смета дека секој договор не само што треба да го спречи Иран да се обиде да се вооружи со нуклеарно оружје и да ги елиминира можностите за збогатување ураниум, туку и да го ограничи развојот на балистички ракети и да обезбеди престанок на поддршката и финансирањето на терористички групи.Високите ирански и американски официјални лица минатата недела одржаа разговори во Оман, кои двете страни ги оцениле како позитивни.Техеран вчера соопшти дека е подготвен за можни отстапки во врска со залихите на збогатен ураниум, но го одбива разговорот за својата ракетна програма или поддршката на вооружени групи ширум Блискиот Исток.

Свет | пред 2 месеци

Интензивно хортикултурно уредување во Ново Лисиче – зеленило, цвеќе и нов плочник

Комуналните екипи на Општина Аеродром спроведуваат интензивно хортикултурно уредување на една од најфреквентните локации во населбата Ново Лисиче, што се наоѓа во делот меѓу станбените згради, паралелно со булеварот „Видое Смилевски-Бато“.Како што информираа од Општина Аеродром преку социјалните мрежи, за првпат по подолг период, се засадува ново зеленило, декоративни растенија и цвеќе, се оформуваат тревни површини и се уредува просторот со цел да се создаде пријатна и уредна урбана целина.Просторот добива свеж и разубавен лик, што ќе придонесе за поквалитетна животна средина, поубава секојдневна слика и попријатно движење за жителите и минувачите.Исто така, во изминатиот период целосно беше заменет и плочникот со нови елементи за безбедно движење.„Продолжуваме да вложуваме во зеленило и уредени јавни простори – затоа што чиста и здрава околина значи подобро секојдневие за сите“, порачаа од Општината.

Скопје | пред 2 месеци

„Договорот за руски гас веројатно ќе биде продолжен уште шест месеци“, вели генералниот директор на „Србијагас“

Генералниот директор на „Србијагас“, Душан Бајатовиќ, изјави дека договорот за набавка на руски гас, кој истекува крајот на март, веројатно ќе биде продолжен уште шест месеци, објави б92.Тој нагласи дека цената на гасот за домаќинствата нема да се менува, како и дека Србија има доволно енергенс до крајот на грејната сезона.Бајатовиќ објасни дека долгорочниот договор со Русија ќе биде анексиран, но дека постојат бројни проблеми, од европски санкции до тешкотии со платежниот промет, кои не се лесни за решавање.„Она што ќе се случи сега, нашиот договор од март натаму, поради големите залихи, практично до октомври, ќе изнесува шест милиони кубни метри дневно, а не 10, бидејќи не можеме да го полниме „Банатски двор“. Веројатно ќе имаме продолжување на долгорочниот договор за наредните шест месеци“, изјави Бајатовиќ за РТС.Бајатовиќ нагласи дека дури и ако не се увезат нови количини, Србија има доволно гас до крајот на грејната сезона.

Свет | пред 2 месеци

По бурниот развод, Ралф Шумахер најави свадба во Сен Тропе со својот партнер

По бурниот развод од сопругата Кора, Ралф Шумахер ќе се венча со својот партнер Етјен Буске-Касањ (36) во мај. Тој го откри ова 19 месеци откако јавно објави дека е во истополова врска.Веста за свршувачката, која одекна во светските медиуми, донесе допир на радост во семејството Шумахер, објавува „Дејли меил“. Изненадувањето е уште поголемо затоа што Кора, со која Ралф водеше медиумска војна во последните години, им испрати порака за помирување и добри желби за младожениците.Свадба од соништата во Сен ТропеСпоред германскиот весник, свадбата ќе се одржи на југот на Франција, а прославата во Сен Тропе, каде што двојката го поминува поголемиот дел од годината, ќе трае дури три дена, пишува Билд. Ралф ја објави својата љубов кон Етјен во јули 2024 година.Сепак, неговата одлука за втор брак не беше одобрена од сите. Неименуван пријател наводно изјавил за Билд: „Па, ова е изненадување. Ралф, парафразирајќи го Оскар Вајлд, велел кога другите се венчавале по втор пат: „Оној што се венчава по втор пат не го заслужува својот прв развод.“Неочекувана честитка од неговата поранешна сопругаИ покрај острите зборови и јавните обвинувања што го одбележаа нивното разделување, Кора Шумахер (49) покажа неочекувана великодушност. По веста за свадбата, таа му испрати на својот поранешен сопруг порака со добри желби, што многумина ја гледаат како знак за можно помирување.„Стивен и јас им посакуваме на Ралф и Етјен се најдобро и многу среќа“, изјави Кора за БИЛД. Гореспоменатиот Стивен е нејзиниот нов партнер, 44-годишниот Американец Стивен Бо Бекендам. Пораката на Кора е уште позначајна со оглед на тоа што, според германските медиуми, таа со години немала личен контакт ниту со Ралф ниту со нивниот 24-годишен син Дејвид.Години расправии и тешки обвинувањаРалф и Кора се венчаа во 2001 година на раскошна церемонија во Салцбург и се во брак 13 години. Но, по раскинувањето, нивната врска се претвори во горчлива кавга. Во еден момент, Кора дури и ја запали нејзината венчаница и јавно го молеше својот поранешен сопруг да ја остави на мира за да може „да се опорави во мир“. Неговата објава за истополова врска предизвика лута реакција од неа, при што таа рече дека „ги потрошила своите најдобри години“ на него.Борба против гласините за „лажен брак“По разводот, Кора се соочи и со бројни гласини за природата на нивниот брак. Се појавија тврдења дека нивниот 13-годишен брак бил „лажен“ и дека била платена да се омажи за ѕвездата на Ф1 со 10-годишен договор.Кора неколку пати силно ги негираше овие обвинувања. За време на гостувањето во емисијата на германскиот комичар Оливер Похер во 2025 година, таа повторно се осврна на тие озборувања. На забелешката на Почер, „Кора, таа му е доделена; има десетгодишен договор. Кога тоа ќе заврши, ќе биде готово“, Кора одговори, „Досега ќе бев богата ако беше така“.Кога ја прашаа дали забележала нешто за време на бракот, таа призна: „Секако дека прашав неколку пати... Не знаев, инаку немаше да се омажам за него. Немаше да го фрлам животот за пари“. Таа исто така додаде дека гласините за лажниот брак ја повредиле „ужасно“. Уште во 2024 година, таа изјави за БИЛД: „Не потпишав договор за доверливост во брачниот договор. Таму не е напишано ништо такво. Инаку, никогаш немаше да се омажам“.

Магазин | пред 2 месеци

Пезешкијан: Иран не бара војна

Претседателот на Иран, Масуд Пезешкијан изјави дека Иран не бара војна, и покрај непријателството кон земјата, нагласувајќи дека целта на економскиот притисок е да „плева репутацијата“ на владата.На состанок со верски лидери по повод 47-годишнината од Исламската револуција, Пезешкијан истакна дека Иран се стреми кон мир, единство и служба на народот, пренесува „Press TV“.Тој посочи дека „непријателите на земјата“ користат економски санкции за да создадат перцепција за „неефикасност“ на исламскиот естаблишмент. Пезешкијан потсети дека Иран се соочил со обиди за странско мешање преку заговори, државни удари и војни, при што многу млади Иранци ги загубиле животите бранeјќи ја земјата и нејзиниот територијален интегритет.Тој нагласи дека сите божји религии промовираат воздржаност од конфликт и дека добродетелите се дефинирани преку добри мисли, зборови и дела.Пезешкијан исто така го критикуваше двојниот стандард на глобалните сили, тврдејќи дека поимите како „демократија“ и „човекови права“ често се користат за „оправдување на агресија и експлоатација на ресурси“, при што цивилното население, вклучувајќи деца и пациенти, е особено погодено.

Свет | пред 2 месеци

Пратениците наплаќаат патни трошоци од државата како да возат на керозин, рече Трендафилов

Денеска точно во 9 часот, работниците предводени од ССМ ги блокираа приодите кон паркингот на Собранието за да не може пратениците со возила да дојдат на работа, и да не може да наплатат тој ден патни трошоци.„Добро утро на сите освен на пратениците. Зошто освен на пратениците? Затоа што 2 години го блокираа предлогот на ССМ за зголемување на работничките плати, или за зголемување на минималната плата и зголемување на сите плати за најмалку 6000 денари. Како што им ветивме, денеска по 21 човек на две локации ќе ги блокираме да не можат да дојдат до сопствените возила на работа со кои што идат, да не можат да наплатат трошоци за превоз како да трошат керозин и ќе мора да дојдат пешки или со јавен градски превоз. Моите информации се дека голем дел на пратеници станале рано утринава за да дојдат пред 9 часот на работа за да не се соочат со работниците на улица затоа што се срамат од своите гласачи затоа што одбиваат да ја зголемат работничката плата, а од друга страна пратеничката плата ќе се зголеми не само за 9,2%, туку и за 12,6%. Тука сме за да ги блокираме и да им покажеме дека нечовечки се однесуваат кон работниците, особено затоа што ги слушавме изјавите на работниците кои жестоко ги браниеа своите плати, кои жестоко ги бранеа своите патни трошоци кои ги имаат како право а сме им го дале ние работниците, а не го оцвозможуват како такво на работниците и затоа првата дестинација е токму тука.“.Тој посочи дека без големи протести, блокади на институциите ќе продолжат, а за тоа согасно законот, потребни се само 21 работник.„Денеска не смеат да наплатат патни тошоци, не смеат да наплатат патни тршоци онака како што наплаќаат во висина над 14 милини денари во претходната година, или како што имаме рекордери кои наплатиле над 10.000 евра за една година доаѓање на работа, нешто што работниците го немаат како право. Ќе се обратиме и до претседателот на собранието да не извести кој е тој алчен пратеник кој за денешниот ден ќе наплати 100, 150 или 200 евра затоа што доаѓа на работа“, вели Трендафилов

Македонија | пред 2 месеци

Ристески: Гледам политика во раководството на ССМ, Владата нуди дијалог и решение

На синоќешното гостување на „Само вистини со Видиновски“ на Канал 5 телевизија, пратеникот Петар Ристески говореше за приоритетите на ВМРО-ДПМНЕ и Владата, а тоа е зголемување на животниот стандард и платите.„Приоритет ни е економскиот развој, подобрување на животот на граѓаните и секако повисоки плати, што и го докажавме на дело не само на зборови. И тоа беше наше предизборно ветување и гледате секаде онаму каде се појавува владата како работодавец се зголемени платите, во здравството, во образованието, 10% повеќе во МВР, кај социјалните работници и вчера бевте сведоци каде Владата се договори со синдикатите САДУ и УПОЗ за зголемување на платите до 40% до 2028 година. Ова е историско зголемување на платите онаму каде Владата е работодавец’’, вели Ристески.Во однос на ССМ и денешните протести, пратеникот Ристески истакна дека гледа политика во раководството на ССМ, со оглед на тоа дека се зголемуваат платите во сите сектори, но ССМ ниту еднаш не го поздрави тоа, а бара нереални зголемување со што директно би се одразило на економијата.„Политика гледам во раководството на ССМ, бидејќи сето тоа го прават во еден период кога Владата навистина нуди дијалог, но и нуди решение. Навистина неоспорен факт е дека оваа Влада историски како никогаш досега, се договори со сите синдикати, со синдикатот на здравството, со образованието, каде што се договори зголемување од 40%-60% зголемување на платите“, појасни Ристески и додаде:„Мислам дека раководството на ССМ има можеби некој долг кон опозицијата, конкретно кон дел од луѓето во раководството на СДС, бидејќи во тој период кога имаше некои превирања на синдикатите, беше назначен за лидер на ССМ со помош на СДС“, заклучи Ристески.

Македонија | пред 2 месеци

Потврдена причината за смртта на Кетрин О’Хара: белодробна емболија и рак на ректумот

Објавени се повеќе детали за смртта на актерката Кетрин О’Хара. Речиси две недели по веста дека ѕвездата на серијата Schitt’s Creek починала на 71-годишна возраст, како непосредна причина за смртта е наведена белодробна емболија, додека рак на ректумот бил посочен како основна причина, објави TMZ повикувајќи се на канцеларијата на судска медицина на округот Лос Анџелес.Актерката, позната по улогите во филмовите Сам дома и Бубимир, не се појави на доделувањето на Златни глобуси 2026, каде што била номинирана за споредна улога во филмот „The Studio“. Нејзиното последно јавно појавување, според текстот, било на доделувањето на Еми награди во септември 2025 година, кога имала двојна номинација за сериите „The Studio“ и The Last of Us.Став за здравјето и стареењетоПред наводната смрт, Кетрин, која со сопругот Бо Велч има два сина – Метју (32) и Лук (28) – открила дека има ретка, но најчесто не животозагрозувачка состојба наречена situs inversus со декстрокардија, при што срцето и другите внатрешни органи се наоѓаат на спротивната страна од телото.„Јас сум чудна, да!“, се пошегувала таа во интервју од 2021 година, објаснувајќи дека за состојбата дознала подоцна во животот бидејќи ретко одела на лекар. „Ја ценам западната медицина, само не сакам да бидам дел од неа.“Во подкастот „Wiser Than Me“ на Џулија Луис-Дрејфус во 2024 година, таа изјавила дека омилениот дел од нејзините седумдесетти е „што сум жива“.Во интервју за Elle Canada во септември 2024 година, О’Хара рекла дека е благодарна што сè уште може да живее исполнето.„Размислувам за годините, но ретко се гледам во огледало. Ми се чини дека приказните за луѓе на мои години денес се вртат околу смрт, разводи и болести. Затоа сум навистина среќна што имам луѓе околу мене кои ги почитуваат постарите и ми нудат нови искуства“, рекла таа.

Магазин | пред 2 месеци

Александар Поповски со мариборскиот „Амадеус“ гостува во МНТ

На сцената на Македонскиот народен театар на 1 април, во рамките на роденденското одбележување 81 година МНТ, ќе гостува Словенечко народно гледалиште од Марибор со претставата „Амадеус“ од наградуваниот Питер Шафер и во режија на меѓународно признаениот македонски режисер Александар Поповски.Претставата е псевдобиографска комична драма за еден од најславните композитори на сите времиња, напишана од англискиот драматург, сценарист и романописец, добитник на многубројни престижни награди. Најпознатата драма на Шафер, „Амадеус“, првпат била изведена во 1979 година, а светска слава стекнала благодарение на истоимениот филм на Милош Форман (1984). Во своето најпознато дело, Шафер ги сумира историските околности и создава прецизни психолошки профили на протагонистите. Драмата е напишана во стилот на ретроспективна драматургија, што овозможува широки епски режисерски решенија и бројни можности за врвни актерски остварувања.„Амадеус“ се темели на митот за животот и меѓусебното ривалство на композиторите Волфганг Амадеус Моцарт и Антонио Салиери. Шафер црпи инспирација од кратката драма на Александар Пушкин „Моцарт и Салиери“ од 1830 година.Во претставата играат: Алеш Валич, Жан Копривник, Јулија Клавжар, Давор Херга, Матија Стипанич, Матевж Бибер, Катарина Барбара Крњак, Софиа Тики, Тина Ројко, Ева Млакар Поштрак и Борис Каваца – глас.Нашиот Александар Поповски, покрај тоа што ја потпишува режијата на гостинската претстава „Амадеус“ е и уметнички директор на мариборската Драма.За Поповски, фасцинантна е врската меѓу уметноста и семоќниот создавач на световите. „Тоа на некој начин го потврдува феноменот Моцарт, кој својата музика ја транскрибирал – без преписи, без корекции. Она што го слушнал во својата глава го преливал на хартија. Барем така го замислил Шафер генијалниот Моцарт, иако тоа не е чиста вистина, лично за мене, божественото инспирирање, кое го добива уметникот е многу значајно. И верувам во него. Во мојот живот музиката отсекогаш имала посебно место. Меѓу сите уметности, таа е несомнено највозвишена, бидејќи само преку еден сигнал, нота или тон, отвора други светови. Во музиката нотата е или точна или погрешна. Нема средина. Интересен ми е моментот во драмата кога Салиери сфаќа дека преку музиката на Моцарт го слуша Божјиот глас. Со страв сфаќа дека Бог има друг избраник и му се спротивставува.“, вели македонскиот режисер Поповски. Во креативниот тим се потпишуваат: Вања Магиќ – сценограф, Марита Ќопо и Миа Поповска – костимографи и Росана Хрибар – кореограф. Билетите се пуштени во продажба онлајн, како и на билетарницата во МНТ.

Магазин | пред 2 месеци

Уапсен 69-годишник во Гостивар по пронаоѓање дрога

На 09.02.2026 во 15:30 часот на ул.„Шуматовска“ во Гостивар, полициски службеници од ОВР Гостивар го лишиле од слобода Ј.Џ.(69) од Гостивар. При преглед кај него и во патничкото возило „фолксваген пасат“ со гостиварски регистарски ознаки, кое го управувал, биле пронајдени и одземени три пакувања со кафеава прашкаста материја.Подоцна, со судска наредба, бил извршен претрес во неговата куќа и помошни простории во Гостивар, при што биле пронајдени и одземени три ќеси со кафеава прашкаста материја.Тој бил задржан во полициска станица и по целосно документирање на случајот против него ќе следува соодветен поднесок.

Македонија | пред 2 месеци

Трендафилов: Добро утро на сите освен на пратениците – 2 години го блокираат зголемувањето на платите

Претседателот на ССМ, Слободан Трендафилов утрово од пред Собранието им посака добро утро на сите освен на пратениците затоа што како што вели 2 години го го блокираат предлогот на ССМ за зголемување на работничките плати.„Добро утро на сите освен на пратениците. Зошто освен на пратениците? Затоа што 2 години го блокираа предлогот на ССМ за зголемување на работничките плати, или за зголемување на минималната плата и зголемување на сите плати за најмалку 6000 денари. Како што им ветивме, денеска по 21 човек на две локации ќе ги блокираме да не можат да дојдат до сопствените возила на работа со кои што идат, да не можат да наплатат трошоци за превоз како да трошат керозин и ќе мора да дојдат пешки или со јавен градски превоз. Моите информации се дека голем дел на пратеници станале рано утринава за да дојдат пред 9 часот на работа за да не се соочат со работниците на улица затоа што се срамат од своите гласачи затоа што одбиваат да ја зголемат работничката плата, а од друга страна пратеничката плата ќе се зголеми не само за 9,2%, туку и за 12,6% затоа што Уставниот суд голема е веројатноста да ја укине уредбата на Владата од претходната година. Тие се подготвени нивните коефициенти да ги намалат за 9% само за да не ги зголемат платите на работниците“.Тој најави дека блокадата ќе трае до започнување на седницата на Собранието која е закажана во 11 часот.„Ако не ги зголемат платите ќе собереме 10.000 потписи и ќе станеме овлстен прелагач и ние работниците ќе им ги намалиме нивните пратенички и функционерски плати. Не осудвуваа дека иницијативата на ССМ за намалување на нивните плати била неуставна затоа што ќе дошле на минималец, па сфатиле колку тешко ќе живеат на минималец па затоа сметаат дека е неуставно да им се намалат нивните високи плати“, изјави Трендафилов.

Македонија | пред 2 месеци

Шпанија им даде дозвола за престој на 500.000 мигранти без документи, Брисел изрази загриженост

Одлуката на шпанската влада да се легализира статусот на околу 500.000 мигранти без документи предизвика остри критики во Брисел, изјавија за Euronews функционери на Европската унија под услов на анонимност. Европската комисија изрази длабока загриженост дека овој потег би можел да биде во спротивност со моменталната политика на Унијата.Новиот правилник, објавен кон крајот на јануари, се однесува на лица кои влегле во Шпанија пред 31 декември 2025 година. За да остварат право на легализација, мигрантите без документи мораат да докажат дека живеат во Шпанија најмалку пет месеци или дека побарале азил пред крајот на 2025 година.Според новите правила, тие ќе добијат едногодишна дозвола за престој и право на работа во кој било сектор во целата земја. Министерката за миграции Елма Саиз изјави за шпанската јавна телевизија RTVE дека целта на владата со тоа е да се зајакне „економскиот раст и социјалната кохезија“.Потегот на владата на премиерот Педро Санчез наиде на неодобрување во Брисел. „Тоа не е во согласност со духот на Европската унија по прашањето на миграцијата“, изјави еден од функционерите на ЕУ за Euronews. Друг истакна дека масовната легализација ризикува да испрати порака спротивна на онаа што ЕУ моментално ја комуницира надвор од Европа со цел да ги одврати нередовните миграции.Според извори од Брисел, една од главните загрижености е можноста дека мигрантите со новиот статус би можеле да патуваат низ Европа до 90 дена во рок од 180 дена. Постојат сомнежи дека некои од нив би можеле да се обидат да се населат во други земји на ЕУ без дозвола.Европскиот комесар за внатрешни работи и миграции, Магнус Брунер, ќе се обрати за ова прашање во Европскиот парламент во вторник попладне, за време на расправата насловена „Шпанската политика на масовна легализација и нејзиното влијание врз шенгенскиот простор и миграциската политика на ЕУ“.

Свет | пред 2 месеци

Трамп посакува колапс на ЕУ, вели Макрон

Францускиот претседател Емануел Макрон испрати низа остри и предупредувачки пораки во неколку интервјуа со влијателни западни медиуми, оценувајќи дека Европа е во длабока геополитичка и геоекономска криза, со сè поизразени надворешни притисоци и внатрешни слабости кои, како што тврди, го загрозуваат самиот опстанок на Европската Унија како уникатен проект.Во интервју за „Фајненшл тајмс“, Макрон изјави дека американскиот претседател Доналд Трамп сака да ја „распадне Европската Унија“, оценувајќи дека сегашната американска администрација се однесува како „отворено антиевропска“, дека ја „презира“ Европската Унија и дека нејзината стратешка цел е да го ослабне европското единство.Макрон предупреди дека Европа не смее да ја прифати улогата на пасивен набљудувач ако притисокот од Вашингтон продолжи или се засили. „Ако отворено нè нападнат, не мислам дека треба да ги наведнеме главите или да се обидеме да постигнеме договор“, рече францускиот претседател, додавајќи дека политиката на ублажување на тензиите што Унијата ја спроведува со месеци очигледно не дава резултати.Дополнителна тежина на предупредувањата на Макрон дава неговата проценка изразена во интервју за „Економист“, во кое тој изјави дека Европа е во „вонредна состојба“, и геополитички и геоекономски. Според него, Европската Унија мора итно да инвестира во сопствената економија и да ги отстрани внатрешните пречки за раст, бидејќи во спротивно ќе биде „смачкана“ помеѓу американската технолошка доминација и масовниот увоз од Кина.Макрон нагласи дека прашањето за конкурентноста стана клучно егзистенцијално прашање за Унијата, особено пред самитот на ЕУ закажан за 12 февруари, каде што економската сила и развојниот потенцијал на Европа ќе бидат во фокусот на дискусиите на европските лидери.Во исто време, во интервју за „Зидејце Цајтунг“, францускиот претседател ја отвори темата за односите со Русија, предлагајќи им на некои европски лидери да продолжат со директниот дијалог со Москва, за да Европа избегне зависност од трети страни во разговорите за завршување на војната во Украина.Макрон потсети дека географската положба на Европа нема да се промени, „без разлика дали ни се допаѓа Русија или не“, и дека таа е трајно „пред нашата врата“. Токму поради оваа причина, како што наведе, предложил продолжување на комуникацијата, иако, според него, некои европски земји сè уште се двоумеле да го преземат тој чекор.Според Макрон, Париз веќе го обновил дијалогот со Москва на „техничко ниво“, со очекување дека Европската Унија ќе изгради унифициран и организиран пристап кон контактите со Русија во иднина. „Не треба да има премногу соговорници; потребни се мандат и јасна репрезентација“, истакна тој, додавајќи дека мора да има простор за продолжување на дијалогот.„Зошто? Затоа што денот кога ќе дојде мирот, тој мир ќе биде европски мир“, заклучи Макрон, јасно ставајќи до знаење дека, и покрај војната и длабоките политички поделби, Европа не може да си дозволи трајно отсуство на стратешка комуникација со Русија.Сите овие пораки, доставени во краток временски период, укажуваат дека францускиот претседател се обидува да отвори широка дебата за идната позиција на Европа во брзо менувачкиот свет – свет во кој, како што предупредува, Унијата повеќе нема луксуз на неодлучност, ниту пак потпирање на политичките и економските центри на моќ на другите луѓе.

Свет | пред 2 месеци

(Видео) Хеликоптер на брза помош се урна во Либија, загинати пет лица

Хеликоптер на брза помош се урнал на базата Ал-Сара во Либија за време на враќање од мисија за медицинска евакуација, при што загинале пет лица, објавија локалните медиуми.Несреќата се случила во област околу 300 километри југoисточно од градот Куфра, објави порталот al-Wasat.Меѓу загинатите се двајца припадници на воената транспортна служба и медицинска сестра од болницата во Куфра. Преостанатите две жртви се странски државјани – пилотот на хеликоптерот и неговиот асистент.Причината за несреќата засега не е позната, а либиските власти сè уште не објавиле официјално соопштение за падот на хеликоптерот.

Свет | пред 2 месеци

Трамп се закани: Новиот мост САД–Канада нема да се отвори додека САД не бидат „целосно компензирани“

Американскиот претседател Доналд Трамп се закани дека ќе го блокира отворањето на нов мост што ги поврзува САД и Канада сè додека Вашингтон не биде „целосно компензиран“ за сè што му направил на својот северен сосед.Меѓународниот мост Горди Хау, кој ја поврзува канадската покраина Онтарио со американската држава Мичиген, нема да се отвори сè додека Отава „не се однесува праведно кон САД и со почитта што ја заслужуваме“, напиша Трамп на социјалните мрежи, пренесува Би-би-си.Во објава на неговата платформа Truth Social, Трамп рече дека САД треба да поседуваат „барем половина од овој имот“. Тој исто така тврдеше дека Канада е сопственик и на канадската и на американската страна од мостот. Според официјалната веб-страница на проектот, организацијата што го развива мостот, Windsor-Detroit Bridge Authority е во целосна сопственост на канадската влада.„Канадската влада очекува од мене, како претседател на САД, да им дозволам едноставно да ‘ја искористат Америка!’“, напиша Трамп. „Нема да дозволам овој мост да се отвори сè додека САД не бидат целосно компензирани за сè што им дадовме“, додаде тој.Не беше веднаш јасно како Трамп може да го спречи отворањето на мостот, но рече дека преговорите ќе започнат веднаш, без да даде детали.

Свет | пред 2 месеци

ВМРО-ДПМНЕ: Јанева добивала насоки а Ленче Ристоска и Гаврил Бубевски ги извршувале наредбите на Заев

Ленче Ристоска и Гаврил Бубевски во времето на СЈО  се однесувале како авторитети а денес се претставуваат како жртви, додека Кaтица Јанева предметите ги распоредувала по насока на Зоран Заев и СДС, вели ВМРО-ДПМНЕ„Според сведочењето на поранешната обвинителка во СЈО Лејла Кадриу на почетокот на работата на СЈО биле избрани само  7 од предвидените 12 обвинители, а останатите 5 биле приклучени за многу кратко време  исклучиво само и само да се обезбеди присуство на Гаврил Бубевски.Сите чекале амин од Зоран Заев за да се оформи тимот да дојде и Гаврил Бубевски за да започнат со работа.СЈО било користено исклучиво за да се задоволат интересите на СДС, Заев и врхушката околу него.Кадриу посочува дека постоел договор меѓу Катица Јанева и Заев, каде истакнува настан од 30 декември 2015 година, кога на вработените им било кажано да не доаѓаат на работа и да ги искористат празниците. Таа била една од ретките кои сепак дошле, и сведочи дека токму тој ден во просториите на СЈО биле присутни Заев, Шекеринска и други лица, кои доставувале материјали што, според неа, незаконски ги примиле Ристоска, Бубевски, Фатиме Фетаи и Лиле Стефановска.Ленче Ристоска отворено покажувала воодушевување и симпатии од присуството на Зоран Заев и Шекеринска во СЈО па се поставува прашањето дали тој пристап на Ристовска е пристрасно водење на обвинителството.За Гаврил Бубевски, Кадриу вели дека самиот се фалел оти ништо не можело да помине во СЈО без негова согласност, дека користел повеќе телефони и преку нив добивал насоки за распределба на предметите, што, според неа, укажува на директно влијание од надворешни, партиски структури врз работата на СЈО.Ристоска, Бубевски, Фетаи и Стефановска, ''бомбите'' и материјалите од Заев ги преземале без никаков записник, што е спротивно на законите и отвора дополнителен сомнеж за веродостојноста на истите.Според овие сведоштва, Ристоска, Бубевски, Фетаи и Стефановска  наместо да се претставуваат како жртви треба да превземат одговорност и да се извинат за своите постапки.Не смее да се дозволи партиски послушници и маши да ги водат правосудските органи.Правда и одговорност мора да има“, се вели во соопштението.

Македонија | пред 2 месеци

Нема пари за минималната плата затоа што Владата планира авион за Мицкоски, вели СДСМ

Додека над 200 илјади работници едвај врзуваат крај со крај со плати под 30.000 денари, додека минималната плата не ги покрива ниту основните трошоци за живот, Владата на Мицкоски планира купување нов авион, вели СДСМ„За зголемување на минималната плата и за поддршка на приватните компании се потребни околу 200 милиони евра. Пари во буџетот има само владата треба да се откаже од луксузот и парите да ги пренамени за работниците.Со решението на СДСМ, преку ребаланс на Буџетот и кратење на луксузот на власта, службени возила, мебел, патувања, кабинети, се обезбедуваат 200 милиони евра за минимална плата од 600 евра и поддршка на приватните компании без да им се загрози ликвидноста.Но Власта го избра својот луксуз наместо егзистенцијата на работниците и не го прифаќа ова јасно и одржливо решение.Груевски купуваше мерцедес од 600 илјади евра и очила од 60 илјади евра со пари на граѓаните.Мицкоски носи часовници вредни над 60 илјади евра, или 150 минимални плати, и сега сака авион од стотици милиони евра.Нема пари за минимална плата од 600 евра, затоа што Владата планира купување нов авион за Мицкоски, за нови туристички патувања, како она во Давос“, се вели во соопштението.

Македонија | пред 2 месеци

ВМРО-ДПМНЕ: Факт е дека темелите на бизнисот за марихуана ги постави владата на Заев

Нема скандал а во тоа да не се замешани кланот Заеви и Венко Филипче. И во последниот случај со заплената на над 40 тони марихуана повторно се вплеткани имињата на Зоран Заев и Филипче. Заев сам ја потврди поврзаноста брзајќи да се оправда и да си ја тргне мувата од капата, вели ВМРО-ДПМНЕ.„Наместо да се извини Заев на граѓаните за целиот криминал, тој индиректно си ја призна вмешаноста обидувајќи се да се одбрани и оправда пред јавноста.На Заев и СДС одамна веќе никој не им верува а неговите објави на социјалните мрежи и нервозните реакции само покажуваат колку директно е погоден за случајот со запленетата марихуана.Факт е дека темелите на бизнисот за марихуана ги постави владата на Зоран Заев во 2020 додека Филипче беше министер за здравство.Факт е и дека околу 70 проценти од запленетата дрога деновиве, е на фирма во сопственост на луѓе на Заев.  Станува збор за фирма на лице кое било претседател на општинскиот одбор на СДС во Ново село. Тоа е Тони Котев познат како Мгчев кој пак бизнисите ги води со Вице Заев.Каде се се јавувал Заев при запленета на петте тони дрога во Србија, зошто набрзина Филипче се упатил кон југ?ЈО да ги истражи сите аспекти, меѓу кои и поврзаноста на Заев и Филипче“, се вели во соопштението.

Македонија | пред 2 месеци

Посебен сообраќаен режим во Скопје поради синдикалниот протест

Денеска (10.02.2026) од страна на Сојузот на синдикати на Македонија ќе биде одржан протест пред Собрание на Р.С. Македонија на ул.„11-ти Октомври“ и ул.„Даме Груев“ и доколку се појави потреба од пренасочување, сообраќајот ќе биде пренасочен по околните сообраќајници.Од тие причини Единицата за безбедност на патниот сообраќај ќе преземе мерки за посебен режим на сообраќајот во централното градско подрачје на Град Скопје.СВР Скопје апелира до сите граѓани учесници во сообраќајот да се почитуваат наредбите кои ќе ги даваат полициските службеници.

Скопје | пред 2 месеци

Ватикан со хуманитарна пратка за Украина: 80 генератори и илјадници лекови

Папата Лав XIV испрати во Украина 80 електрични генератори и илјадници медицински средства за да им помогне на цивилите да се справат со ниските зимски температури и постојаните напади, соопшти вчера Ватикан.Помошта е организирана како одговор на апелите на бискупите, кои предупредија на сè поголемите тешкотии предизвикани од руските удари врз енергетската инфраструктура и температурите под нулата низ целата земја.Три камиони со генератори и медицински средства тргнале од базиликата Света Софија во Рим и веќе пристигнале во Фастив и Киев, области тешко погодени од неодамнешните напади.Покрај генераторите, испорачани се илјадници медицински средства, вклучувајќи антибиотици, противвоспалителни лекови, додатоци во исхраната и мелатонин. Според ватиканските претставници, за мелатонин владее голема побарувачка бидејќи Украинците поради постојаните напади се соочуваат со стрес и недостиг на сон.Од Ватикан додадоа дека се во тек подготовки за испраќање уште една пратка со лекови и храна, а дистрибуцијата ќе се координира преку мрежите на парохиите низ Украина.Откако минатата година ја презеде папската служба, папата Лав повикува на „праведен и траен мир“ во Украина и понуди Ватикан да биде домаќин на мировни преговори меѓу Киев и Москва.Украинскиот претседател Зеленски ја поддржа таквата иницијатива, додека руските претставници засега го одбија предлогот.

Свет | пред 2 месеци