Трамп воведе глобална царина од 10 отсто, мерките стапуваат на сила следната недела

Американскиот претседател Доналд Трамп соопшти дека потпишал извршни наредби за воведување глобална царина од 10 отсто на увоз од сите земји, која, како што наведе, ќе стапи на сила речиси веднаш.Трамп објави дека документите ги потпишал во Овалната соба, нагласувајќи дека мерката претставува значаен чекор во економската политика на неговата администрација. Новите царини ќе започнат да се применуваат од 24 февруари и се засноваат на член 122 од Законот за трговија од 1974 година.Одлуката следува откако Врховен суд на САД ги поништи претходните сеопфатни царини воведени врз основа на Законот за меѓународни вонредни економски овластувања од 1977 година, оценувајќи дека тој правен основ не може да се користи за ваков вид трговски мерки. Белата куќа соопшти дека дел од претходните тарифни мерки ќе бидат укинати, но новите ќе ја заменат нивната суштина со поинаква правна рамка.Според новите наредби, продолжуваат одредени изземања, меѓу кои за воздухопловни производи, патнички возила и дел од лесните товарни возила, како и за одредени производи од Мексико и Канада во рамки на трговскиот договор со САД. Исклучоци се предвидени и за фармацевтски производи, критични минерали и одредени земјоделски артикли.Американскиот министер за финансии Скот Бесент изјави дека новите царини од 10 отсто, како и можните дополнителни мерки според член 301 за нефер трговски практики и член 232 за национална безбедност, ќе резултираат со речиси непроменети приходи од царини во 2026 година. Тој додаде дека администрацијата располага со алтернативни механизми за заштита на економските интереси на земјата.Член 122 овозможува воведување царини до 15 отсто во период до 150 дена без спроведување истрага, со образложение дека постои „голем и сериозен“ проблем во платниот биланс. За продолжување на мерките по истекот на тој рок потребно е одобрување од Конгресот.Трамп најави и нови истраги насочени кон одделни земји врз основа на член 301 од Законот за трговија, со цел справување со нефер трговски практики. Истраги веќе се покренати против Кина и Бразил, а можни цели се и други големи трговски партнери, вклучително и Виетнам и Канада.Со новите потези, администрацијата настојува да ја зачува трговската стратегија и преговарачката позиција, и покрај ограничувањата поставени со судската одлука.

Свет | пред 3 седмици

СДСМ: Пет тони дрога минале граница без контрола, институциите мора да одговорат

Социјалдемократскиот сојуз на Македонија обвини дека последните информации од Обвинителството за случајот со запленети пет тони дрога потврдуваат сериозни пропусти во безбедносниот систем, посочувајќи дека недозволената стока „повеќекратно“ ја поминала македонската граница без да биде откриена.Според наводите на партијата, дрогата претходно била транспортирана во поголеми количини со товарни и патнички возила од објект на правно лице во Скопје до локација во атарот на Свети Николе, поточно во селото Сарамзалино, каде што бил извршен претовар. Потоа било организирано и нејзиното изнесување од државата.Од СДСМ оценуваат дека фактот што толкава количина недозволена стока се движела низ повеќе делови од земјата без да биде запрена отвора прашања за функционирањето на контролите на граничните премини и за улогата на Министерството за внатрешни работи. Опозицијата јавно прашува каде биле институциите и системите за видеонадзор додека се одвивал транспортот.Во реакцијата се споменува и изјава на министерот за внатрешни работи Панче Тошковски, кој во телевизиско гостување посочил дека прашањето не е како дрогата излегла од Македонија, туку како влегла во Србија. Од СДСМ велат дека јавноста очекува одговор и за тоа кој дозволил недозволената пратка да ја напушти државата.Партијата наведува дека во Србија е уапсен функционер поврзан со владејачката партија таму, а случајот, според нив, отвора сомнежи за можни врски и на домашна политичка сцена.СДСМ бара целосна и транспарентна истрага, со утврдување индивидуална одговорност за сите инволвирани, оценувајќи дека станува збор за најголем нарко-скандал досега, кој мора да биде расчистен до крај.

Македонија | пред 3 седмици

Иран се подготвува за војна, покажале сателитски снимки

Додека САД го зголемуваат военото присуство на Блискиот Исток, Иран презема чекори што укажуваат на подготвеност за евентуален конфликт, вклучително и дополнително утврдување на нуклеарните постројки и обнова на производството на ракети.Ирански и американски претставници неделава одржаа индиректни разговори во Женева, кои траеја повеќе од три часа, но без конкретен напредок. И покрај дипломатските обиди, во Белата куќа било разгледувано сценарио според кое американската војска би можела да биде подготвена за напад веќе во наредните денови, по засиленото распоредување на воздушни и поморски сили во регионот. Американскиот претседател Доналд Трамп изјави дека размислува за ограничен воен удар со цел да изврши притисок врз Техеран да постигне договор, без да наведе дополнителни детали.По минатогодишниот израелски напад врз иранските нуклеарни и ракетни капацитети, сателитски снимки покажуваат дека Техеран ги обновува дел од оштетените бази. Во ракетната база „Имам Али“ кај Хорамабад, од повеќе уништени структури, неколку се обновени, а дел се во фаза на реконструкција. Обновени се и писти и поддржувачка инфраструктура во други воени комплекси, како и постројката за производство на ракети на цврсто гориво во Шахруд, која според анализи можеби функционира со поголем капацитет отколку пред конфликтот.Паралелно со тоа, Иран ги зајакнува и клучните нуклеарни локации. Снимки од подземниот комплекс во близина на Натанз покажуваат нови бетонски засилувања на влезовите во тунелите и дополнително закопување на објектите. Според меѓународни безбедносни аналитичари, некои од овие локации наскоро би можеле да станат исклучително тешко достапни за воздушни напади.Во внатрешнополитички план, врховниот лидер Али Хамнеи го засили влијанието на Советот за национална безбедност и формираше ново тело за управување во услови на воена закана. Истовремено, безбедносните структури спроведоа масовни апсења на опозициски фигури и демонстранти, во услови на зголемена репресија и страв од внатрешна дестабилизација.Воените вежби во Персискиот Залив дополнително ја зголемија напнатоста. Иранските Револуционерни гарди привремено затворија делови од Ормускиот теснец, низ кој минува значителен дел од светската нафта, додека САД распоредија дополнителни носачи на авиони во регионот. Во неколку наврати беа регистрирани блиски инциденти меѓу ирански и американски пловни објекти.Аналитичарите оценуваат дека Техеран испраќа порака дека евентуален конфликт би имал висока цена, додека Вашингтон сигнализира подготвеност за брза акција доколку преговорите пропаднат. Во вакви околности, Блискиот Исток повторно се наоѓа на раб на сериозна ескалација со можни глобални последици.

Свет | пред 3 седмици

„Иднината е во наши раце, или ќе бидеме во политичко мочуриште“, Мицкоски најави регионална иницијатива за 4 теравати нови капацитети

Развиваме иницијатива што ќе ги обедини земјите од Западен Балкан со цел да привлечеме 0,01 отсто од планираните 40 илјади теравати новоинсталирани енергетски капацитети, изјави премиерот Христијан Мицкоски.Според него, тоа би значело привлекување на четири теравати, односно нови производни капацитети што, како што рече, би донеле околу четири милијарди долари инвестиции во регионот во наредните десет години.„Ова зависи од нас, дали сами ќе си ја кроиме заедно иднината или ќе бидеме во политичко мочуриште“, истакна Мицкоски, додавајќи дека ваквиот проект би имал потенцијал да донесе значаен економски импулс за шесте земји од регионот.Премиерот оцени дека иницијативата претставува можност за стратешко позиционирање на Западен Балкан во рамки на глобалните енергетски и инвестициски трендови.

Македонија | пред 3 седмици

ЕУ заговара „прва и втора лига“ на земји членки, а еден од говорниците таму рече „тоа што и го правите на Македонија е криминал“, посочи Мицкоски

Македонија е жртва на булинг од земји членки кои го условуваат евроинтегративниот процес, изјави премиерот Христијан Мицкоски, посочувајќи дека земјата не се вреднува според напредокот, туку според политички услови.„Не се цени според напредок, туку тоа дали ќе го промениме Уставот, банкнотите, знамето итн. И колку повеќе тоа го игнорираме, толку потежок ќе биде тој пат и толку повеќе препреки ќе имаме. Јас сум свесен дека можеби дел од политичките гарнитури од минатото имале добри политички намери, но има и такви кои од неуспехот да се справат со криминалот и корупцијата, неуспехот кој го имаа дома, беа донесени до ѕид и побараа бел лист хартија и рекоа дајте да потпишеме сѐ што треба, за да останеме на власт“ рече премиерот Мицкоски.Во однос на актуелните политички состојби, премиерот упати критики кон СДСМ, обвинувајќи ја опозициската партија за ширење лажни вести и оценувајќи дека е во политичка криза.„Од СДСМ денеска гледаме гранапче кое се занимава со лажни вести, и е на прагот на истчезнување. Затоа оваа генерација треба да биде свесна за овој предизвик и да биде свесна за уште еден предизвик, а тоа е последната иницијатива која се зборува во Брисел“, рече тој.Мицкоски се осврна и на, како што рече, иницијативата што се разгледува во Брисел за „прва и втора лига“ земји членки на Европската Унија, предупредувајќи дека ваквиот концепт отвора прашања за идниот статус на земјите кандидатки.„Имаше многу влијателни членови на Влади, и еден од говорниците рече 'Тоа што и го правиме на Македонија е криминал'. И тоа нема никаква врска со вредностите. Затоа и добро треба да размислиме за ова прва и втора лига земји членки, со многу заштитни механизми и да донесеме одлука што мислиме и како мислиме. Треба да сме свесни со сите овие предизвици во годините што следат. Ако живееме во фантазија, нема да можеме да најдеме соодветно решение. Ова се историски моменти во политиката а тие знаат да траат со децении, а некогаш и векови. Затоа народот треба да е трпелив и мудар. А за еден народ нема полошо од корумпирани лидери на таа нација. И тие се тие кои нѐ доведоа во оваа ситуација. Наместо да гледаме во иднината, ние толкуваме чии биле учителите и нивните ученици, а меѓу нас нема некој да просведочи која била вистината“, рече Мицкоски.

Македонија | пред 3 седмици

„Науката се претвора во пазар“, Левица со критики за измените во високото образование

Левица реагира на предложените измени на Законот за високо образование, оценувајќи дека со нив се воведуваат зголемени критериуми за избор во наставно-научни звања кои, според партијата, ќе ја направат академската кариера недостапна за младите истражувачи без финансиска поддршка.Од Левица посочуваат дека барањето за шест до седум научни трудови, од кои најголем дел во списанија индексирани во Web of Science и Scopus, подразбира високи трошоци за објавување, кои, како што наведуваат, не се системски покриени од државата.Партијата ја критикува и одредбата според која новоизбраните редовни професори би подлежеле на реизбор по седум години, додека веќе избраните би биле изземени од таа обврска, оценувајќи дека на тој начин се создава двоен стандард и се нарушува принципот на академска стабилност.Според Левица, принципот на трајност на професорската позиција е историски воспоставен како механизам за заштита на академската слобода од политички и други влијанија, а честите реизбори можат да создадат зависност и притисоци врз наставниот кадар.Партијата се спротивставува и на предлогот за продолжување на мандатот на ректорите од три на четири години, оценувајќи дека тоа може да доведе до концентрација на моќ и политизација на универзитетите.Во соопштението се наведува и дека во законските измени недостасува социјална компонента, со повик високото образование да биде целосно бесплатно и достапно, како дел од стратегија за задржување на младите и вложување во науката.Од Левица бараат јавно финансирање на научни публикации, заштита на академската слобода и вистинска автономија на универзитетите.

Македонија | пред 3 седмици

СДСМ бара: Пари за минимална плата од 600 евра наместо за нов авион

СДСМ побара средствата планирани за набавка на нов владин авион да се пренаменат за зголемување на минималната плата на 600 евра.Од партијата посочуваат дека животот во државата станува сѐ поскап, а работниците, како што наведуваат, тешко ги покриваат основните трошоци. Според нив, синдикалната кошничка во февруари достигнала 67.400 денари, при што едно четиричлено семејство не може да ги покрие потребите ниту со три минимални плати.СДСМ тврди дека над 200 илјади работници примаат плата под 30.000 денари и дека со сегашното ниво на минималната плата не можат да се покријат трошоците за храна, сметки и други основни потреби.Во соопштението се упатуваат критики кон премиерот Христијан Мицкоски, со обвинувања за, како што наведуваат, луксузирање на сметка на граѓаните.Партијата повикува на ребаланс на Буџетот и пренамена на средствата од, како што велат, неприоритетни трошоци кон зголемување на платите, нагласувајќи дека е потребно обезбедување достоинствени примања за работниците.

Македонија | пред 3 седмици

Уништен над еден тон небезбедна „здрава храна“, изречени казни од над 20 илјади евра

Инспекциските служби на Агенција за храна и ветеринарство уништиле 1.010 килограми небезбедна „здрава храна“ кај 14 оператори, во рамки на 373 контроли спроведени неделава во објекти за производство и промет со здрава храна.Со контролите било утврдено дека 14 оператори воопшто не биле регистрирани како оператори со храна во Агенцијата. За констатираните недоследности издадени се 65 решенија, 19 опомени и 44 парични казни, во вкупна вредност од 20.550 евра во денарска противвредност.Кај девет оператори биле утврдени незадоволителни хигиенски и технички услови во објектите, додека кај седум била пронајдена храна со поминат рок на употреба. Кај двајца оператори инспекторите пронашле храна со непознато потекло.Несоодветно означување на производите било утврдено кај 18 оператори, а кај 23 вработените немале извршено задолжителен здравствен преглед. Двајца оператори немале воспоставени процедури за добра производствена и добра хигиенска пракса или не воделе соодветна документација. Исто така, кај два објекти не била спроведена задолжителна дезинфекција, дезинсекција и дератизација.

Македонија | пред 3 седмици

Сомнеж за незаконита експлоатација и загадување на водата во Струшко

По наредба на Основно јавно обвинителство Струга, истражните органи презеле дејствија за испитување на причините за загадувањето на водата од извориштето во селото Шум, при што затекнале работни машини на две правни лица од Велешта кои вршеле кршење, ископ и транспорт на карпи во непосредна близина на изворите.Поради сомненија за кривични дела – незаконита експлоатација на минерални суровини по член 225-а и загадување на водата за пиење по член 219 од Кривичниот законик, надлежниот јавен обвинител до судијата на претходна постапка доставил предлог за определување мерки на претпазливост.Со предлогот се бара забрана за правните лица да ги посетуваат парцелите каде што вршеле ископ, како и забрана да преземаат какви било работни активности на тоа подрачје.Од Обвинителството информираат дека продолжуваат со обезбедување докази и испитување на евентуалната кривична одговорност во врска со, како што се наведува, енормното загадување на изворите во Шум, од каде што подрачјето на Струга се снабдува со вода за пиење.

Македонија | пред 3 седмици

ВМРО-ДПМНЕ обвинува за политички прогон и монтирани случаи во време на СДС и ДУИ

ВМРО-ДПМНЕ обвини за политички прогон на поранешни функционери и за, како што наведува, злоупотреба на институциите во периодот на владеење на СДСМ и ДУИ.Од партијата тврдат дека тој период бил одбележан со политички монтирани случаи, кои, според нив, се спроведувале преку обвинителството и судството, наместо врз основа на правото. Во соопштението се наведува дека одлуки се носеле по политичка нарачка, а оние што одбивале да постапуваат на таков начин биле разрешувани.Како пример се посочува поранешниот судија на Врховниот суд, Ристо Катевеновски, кој во интервју изјави дека бил разрешен откако одбил да даде позитивно мислење за предмет поврзан со поранешната министерка за внатрешни работи, Гордана Јанкуловска. Според неговите тврдења, не постоела правна основа за поинакво постапување, а разрешувањето следувало по неговото одбивање.Од ВМРО-ДПМНЕ оценуваат дека овие наводи ја доведуваат во прашање независноста на судството во тој период и упатуваат на системски притисоци врз носителите на правосудни функции.Партијата бара сеопфатен и суштински реформски процес во правосудството, со цел враќање на довербата на граѓаните, обезбедување владеење на правото и гарантирање еднаквост пред законите, нагласувајќи дека, како што велат, одговорност мора да има.

Македонија | пред 3 седмици

Снег има на Шапка: времето ќе е променливо облачно и ветровито, температури до 13 степени

Најниската утринска температура измерена е -3 степени на Попова Шапка, информира Управа за хидрометеоролошки работи. Под нулата било и во Берово со -1 степен, додека нула степени се измерени во Маврови Анови.Еден степен се измерени во Претор, Струмица и Крушево, два во Крива Паланка, Охрид и Битола, три во Прилеп и Штип, четири во Тетово и Виница, пет во Скопје-Петровец и Велес, шест во Скопје-Зајчев Рид, Демир Капија и Гевгелија, а најтопло утринава било во Кавадарци со седум степени.Во изминатите 24 часа најмногу врнежи се регистрирани во Битола – 20 литри на квадратен метар, 15 во Претор, 14 во Охрид и Крушево, 13 во Штип и Гевгелија, 12 во Крива Паланка, Кавадарци, Пожаране и Ѓуриште. Во Прилеп, Велес и Маврови Анови измерени се 11 литри, во Виница девет, во Тетово осум, а во Скопје-Петровец, Тополчани и Попова Шапка седум литри на квадратен метар.Снежната покривка на Попова Шапка достигнува 100 сантиметри.Времето денеска ќе биде променливо облачно со сончеви периоди, а во источните делови ќе има услови за провејување на слаб снег. Ќе дува умерен, а долж Повардарието повремено засилен северен ветер, локално над 60 километри на час. Максималната температура ќе се движи од 5 до 13 степени.Во Скопје ќе преовладува променливо облачно време со кратки сончеви периоди и умерен, повремено засилен северен ветер. Максималната дневна температура ќе достигне до 10 степени.

Македонија | пред 3 седмици

Светот чека изјава од Трамп, НАСА го одреди датумот за лет околу Месечината

Додека јавноста очекува можна изјава од американскиот претседател Доналд Трамп поврзана со наводи за вонземски живот, НАСА го одреди најраниот датум за лансирање на мисијата „Артемис II“ – 6 март.Станува збор за прва мисија со екипаж што ќе лета околу Месечината по повеќе од 50 години, односно по мисијата Аполо 17 во 1972 година. Четворица астронаути ќе заминат на десетдневно патување околу далечната страна на Месечината и назад кон Земјата.Екипажот го сочинуваат тројца Американци и еден Канаѓанец, кои ќе патуваат со мегаракетата „Систем за лансирање во вселената“ (SLS), висока 98 метри. На врвот на ракетата ќе се наоѓа капсулата „Орион“, со простор приближно колку минибус, каде што астронаутите ќе живеат и работат за време на мисијата.По првиот ден во орбита околу Земјата, леталото ќе се упати кон Месечината, патување што трае околу четири дена. Екипажот ќе мине на оддалеченост од 6.500 до 9.500 километри над површината и ќе изврши набљудувања и снимања, по што ќе започне враќање и спуштање во Тихиот Океан.Доколку мисијата биде успешна, таа ќе го отвори патот за „Артемис III“, во која повторно ќе се слета на Месечината. НАСА посочува дека целта е слетување до 2028 година, иако временската рамка се оценува како амбициозна.Во меѓувреме, САД се во технолошка трка со Кина, која најавува сопствено слетување на Месечината до 2030 година. Двете држави планираат мисии кон јужниот пол на Месечината, каде се очекуваат клучни ресурси за идни лунарни бази.

Магазин | пред 3 седмици

Пецаков во официјална посета на Стар Град Белград, најавена продлабочена соработка

Градоначалникот на Охрид Кирил Пецаков, заедно со делегација од Општина Охрид, оствари официјална посета на Општина Стар Град Белград, каде што одржа работна средба со претседателот на општината Радослав Марјановиќ.На средбата се разговарало за официјализирање и продлабочување на меѓуопштинската соработка, со акцент на размена на искуства во областа на локалниот економски развој, туризмот, промоцијата на културното наследство, урбанистичкото планирање и образованието.Пецаков изразил подготвеност за воспоставување долгорочни партнерски односи насочени кон размена на добри практики и реализација на заеднички проекти од значење за граѓаните на двете општини.Во рамки на посетата, делегацијата од Охрид ги посетила и капиталните инфраструктурни проекти што се реализираат во Стар Град Белград, при што се запознала со современите пристапи во развојот на урбаната средина.Од Општина Охрид оценуваат дека ваквите средби се значајни за унапредување на меѓуинституционалната соработка и отворање нови можности за развој на градот.

Охрид | пред 3 седмици

Откриени тајни бизнис-договори меѓу принцот Ендру и Џефри Епстајн

Американскиот финансиер Џефри Епстајн планирал да обезбеди аванс од еден милион фунти за Принц Ендру во рамки на предложено партнерство со инвестицискиот гигант Кантор Фицџералд, открива британскиот весник The Telegraph.Според електронските пораки објавени од Министерство за правда на САД, планот предвидувал компанијата на поранешниот војвода од Јорк да добие аванс од еден милион фунти, како и 40 отсто од идните приходи од бизнисот. Во договорот учествувал и блискиот соработник Дејвид Стерн, кој, според преписките, требало да добие 20 отсто од профитот.Целта, според документите, била преку кралските контакти да се привлекуваат клиенти кон американската компанија за управување со средства. Разговорите се воделе во 2013 година, речиси три години по тврдењата на принцот Ендру дека ги прекинал контактите со Епстајн.Иако договорот на крајот не бил реализиран, нацрт-спогодбата предвидувала распределба од 40 отсто за принцот Ендру, 40 отсто за „Кантор Фицџералд“ и 20 отсто за Стерн, како и аванс кој формално би се водел како заем што подоцна би се отплаќал преку провизии.Објавените документи откриваат и дека во комуникацијата принцот бил означуван како „господин Т“, како и дека постоеле дискусии за можните репутациски ризици поради вмешаноста на Епстајн. Во преписките се споменува и Хауард Латник, денешен американски министер за трговија, кој во тој период бил на чело на компанијата.Откритијата повторно ги отвораат прашањата за деловните ангажмани на принцот Ендру додека бил активен член на кралското семејство и неговите врски со Епстајн, кој во 2019 година почина во затвор додека се соочуваше со обвиненија за сексуална злоупотреба.

Свет | пред 3 седмици

Повратот на пари од укинатите царини може да трае со години, вели министерот за финансии на САД

Американскиот министер за финансии Скот Бесент изјави дека прашањето за поврат на средствата по укинувањето на дел од царините од страна на Врховен суд на САД може да се решава „со недели, месеци, па и години“.Говорејќи на настан во Далас, Бесент посочи дека приходите прибрани врз основа на царините што судот ги поништи сега се „спорни“, бидејќи Врховниот суд не дал конкретни насоки за нивно враќање. Според него, за тоа ќе одлучува Меѓународниот трговски суд, а додаде и дека поранешниот претседател Доналд Трамп претходно изјавил оти очекува прашањето да заврши во судска постапка.„Проценувам дека ова може да се одолжи со недели, месеци, па и години“, рече Бесент, додавајќи дека смета оти американските граѓани можеби нема да ги видат назад тие средства.Тој и други претставници на администрацијата потврдија дека ќе продолжат со воведување царини користејќи други законски одредби. Станува збор за механизми што дозволуваат воведување царини врз увоз кој се смета за закана по националната безбедност, како и реципрочни мерки кон трговски партнери за кои САД оценуваат дека применуваат нефер трговски практики.Министерството за финансии проценува дека, и покрај судската одлука, примената на нови и прилагодени царини врз основа на одредбите 122, 232 и 301 ќе резултира со речиси непроменети приходи од царини во 2026 година.

Свет | пред 3 седмици

Сообраќајка кај првиот тунел Скопје–Велес, сообраќајот се одвива отежнато

Сообраќајна несреќа се случи кај првиот тунел на автопатот од Скопје кон Велес.Според информации од очевидци, на местото има оштетено патничко возило, а полициски екипи го обезбедуваат теренот. Засега нема официјални податоци дали во несреќата има повредени лица.Сообраќајот во овој дел се одвива забавено, а на возачите им се препорачува зголемена внимателност и прилагодување на брзината кон условите на патот.Повеќе детали се очекуваат од МВР во текот на утрешниот ден.

Македонија | пред 3 седмици

Ќе има промена на министрите во Владата најдоцна до јуни

Реконструкцијата на Владата се очекува да заврши најдоцна до јуни, најави премиерот Христијан Мицкоски, посочувајќи дека веќе има изграден став, но дека ќе следуваат разговори со коалициските партнери пред да се финализира процесот.„Во мај или најдоцна до јуни би требало да се заокружи тој процес“, изјави премиерот, додавајќи дека одлуките ќе бидат донесени по консултации во рамки на владејачката коалиција.Осврнувајќи се на можноста за предвремени парламентарни избори, Мицкоски повтори дека такво сценарио нема да има. Според него, сите релевантни мерења покажуваат дека граѓаните не даваат предност на избори пред истекот на мандатот.„Сè додека граѓаните велат дека не треба да има предвремени парламентарни избори, нема да има“, истакна премиерот, нагласувајќи дека приоритет се државата и реформските процеси.Тој потсети дека земјата веќе се приближува кон редовниот изборен циклус, што значи дека техничка влада би се формирала кон крајот на 2027 или почетокот на 2028 година, и оцени дека отворањето прашање за избори во овој период претставува политиканство.

Македонија | пред 3 седмици

По пресудата за царините, бизнисите бараат поврат на милионски износи

Директорот на компанијата за едукативни играчки „Лернинг Рисорсис“, Рик Волденберг, чија фирма беше една од странките во постапката пред Врховен суд на САД, изјави дека очекува владата да ги врати средствата наплатени врз основа на незаконските царини.Во изјава за Си-Ен-Ен, Волденберг рече дека по одлуката на судот се чувствува како правдата да е задоволена и отфрли дека повратот на средствата би претставувал преголем товар за државата. Тој го спореди процесот со поврат на данок.„Тие точно знаат што ни зеле, кога, зошто и колку. Можат едноставно да го активираат обратниот процес и да ни ги вратат парите. Тоа се наши пари. Противзаконски ни беа одземени. Мора да ги вратат“, изјави Волденберг.Тој посочи дека неговата компанија во текот на 2025 година платила повеќе од 10 милиони долари царини врз основа на Законот за меѓународни вонредни економски овластувања. Според него, одлуката за покренување тужба не била политичка, туку насочена кон заштита на вработените и семејниот бизнис.

Свет | пред 3 седмици

Апасиев: Универзитетските „дебати“ за новиот закон се фарса

Пратеникот и лидер на Левица, Димитар Апасиев, остро реагираше на јавните дебати што министерката за образование ги организира низ универзитетските кампуси по повод новиот Закон за високо образование.Апасиев оценува дека станува збор за, како што наведе, „амортизација на гневот“ од законот, кој го нарече налудничав, тврдејќи дека дебатите се селективни и однапред режирани. Според него, на средбите биле поканети само редовни професори, додека вонредните професори, доцентите, асистентите, демонстраторите и студентите биле изоставени.Тој тврди дека токму тие категории ќе бидат најпогодени од законските измени и дека со нивното маргинализирање се отвора простор за партиско влијание и кадровски решенија што, според него, не се засноваат на академски квалитет.Во објавата, Апасиев се повика и на претходни академски иницијативи, посочувајќи дека во минатото бил формиран Професорски пленум како реакција на слични политики, и алудираше дека денес недостига организиран отпор од академската заедница.Од Министерството за образование засега нема реакција на наводите изнесени од Апасиев.

Македонија | пред 3 седмици

Американскиот министер за финансии: Судот нема да ги запре царините на Трамп

Американскиот министер за финансии Скот Бесент изјави дека судската пресуда нема да ја запре царинската стратегија на претседателот Доналд Трамп и дека администрацијата веднаш ќе се префрли на други достапни овластувања.Во објава на социјалната мрежа Икс, Бесент порача дека Трамп „секогаш ќе ја става на прво место националната безбедност на Америка и американските граѓани“, додавајќи дека претседателот располага со повеќе правни инструменти.„Да бидеме јасни: Судот не пресуди против царините на оваа администрација. Само утврди дека Законот за меѓународни вонредни економски овластувања не може да се користи за прибирање приходи“, нагласи Бесент.Изјавата следува по одлуката на Врховниот суд со која беше утврдено дека претседателот ги надминал своите овластувања кога се повикал на овој закон за воведување сеопфатни царини. Администрацијата најавува дека ќе продолжи со спроведување на царинските мерки врз основа на други законски механизми.

Свет | пред 3 седмици

Нема фотографија

Трамп: Не планираме враќање на средствата од царините

Американскиот претседател Доналд Трамп изјави дека неговата администрација не планира да враќа средства наплатени врз основа на царините што беа поништени од Врховниот суд, најавувајќи дека прашањето ќе заврши во долготрајни судски постапки.По пресудата со која судот утврди дека еднострано воведените царини биле незаконски, во фокусот се најде можниот поврат на средствата што американските увозници ги плаќале во изминатата година. Тие би можеле да побараат враќање на парите од Американската царинска и гранична служба.Според проценка на економистите од моделот Пен-Вортон за буџетска анализа, потенцијалниот трошок за федералната влада би можел да достигне околу 175 милијарди долари.Еден од судиите, Брет Кавано, кој беше во малцинство при донесувањето на одлуката, наведе дека Соединетите Американски Држави можеби ќе треба да вратат милијарди долари на увозниците што ги платиле царините, иако дел од нив можеби веќе ги префрлиле трошоците врз потрошувачите.Во јавноста се оценува дека процесот на евентуален поврат на средствата би можел да предизвика правен и административен хаос. Запрашан дали администрацијата ќе ги почитува можните обврски за враќање на парите, Трамп изјави дека очекува споровите да траат со години и ја оцени судската одлука како „страшна“ и „целосно погрешна“.Тој додаде дека прашањето не е дополнително разгледувано и дека, според него, целата тема ќе се решава пред судовите во наредните години.

Свет | пред 3 седмици

Трамп пресудата ја нарече „срамна“, најави извршна уредба за нови глобални царини

Врховниот суд на Соединетите Американски Држави пресуди дека претседателот Доналд Трамп го прекршил федералниот закон кога еднострано вовел сеопфатни царини на глобално ниво, оценувајќи дека за таков потег немал соодветно законско овластување.Одлуката претставува тежок удар за Белата куќа во прашање кое е клучно за надворешната и економската политика на претседателот. Според американските медиуми, станува збор за една од најзначајните пресуди против втората администрација на Трамп.На прес-конференција, Трамп ја нарече одлуката „срамна“ и најави дека ќе воведе нови глобални царини од 10 отсто преку друга извршна уредба, за која, како што тврди, не е потребна согласност од Врховниот суд.Поништените „реципрочни царини“ биле воведени повикувајќи се на Законот за меѓународни вонредни економски овластувања од 1977 година, кој му дозволува на претседателот да замрзнува имот и да блокира трансакции во услови на вонредна состојба, но во него не се споменуваат царини како инструмент.Трамп изјави дека ќе продолжи да ја спроведува својата економска агенда, додавајќи дека постојат „методи, практики, закони и овластувања“ кои, според него, се „дури и посилни“ од механизмите на кои се повикал претходно.Новата глобална царина од 10 отсто би се вовела врз основа на федерален закон што дозволува вакви мерки во ограничен рок од 150 дена. Доколку Конгресот го поддржи планот, мерката би можела да биде продолжена со законска процедура.

Свет | пред 3 седмици

(Видео) Драма на средба со граѓани: Вучиќ натера жена на болно дете да му признае дека не му е биолошка мајка

Видео од посетата на српскиот претседател Александар Вучиќ на Бор предизвика бурни реакции во јавноста, откако една жена, по негово инсистирање, пред своето болно дете откри дека не му е биолошка мајка.Настанот се случил за време на разговор со граѓани, кога Гордана Кариќ, корисничка на социјална помош, побарала збор за да укаже на, како што навела, деветмесечен застој во исплатата на надомест за своето болно дете, кое има срцеви проблеми и повеќе операции.Наместо директен одговор за причините за прекинот на исплатата, претседателот, според објавените видеа и медиумски извештаи, упатил прашања поврзани со проверките на имотната состојба од страна на Центарот за социјална работа, алудирајќи дека можеби постои законска пречка.Жената одговорила дека нема имот освен куќата во која живеат и нагласила дека не може да зборува за одредени детали пред детето. И покрај тоа, по натамошно инсистирање, таа низ солзи изјавила дека не може да го посвои детето, бидејќи е негова тетка, а биолошката мајка починала пред 13 години.„Не сакав да дознае на ваков начин дека не сум му мајка“, рекла таа пред присутните, додека детето седело до неа.По откривањето на семејната тајна, претседателот изјавил дека процедурите се сложени, но дека ќе се вложат напори случајот да се реши и дека ќе добие одговор во наредните денови, додавајќи дека таа, како што рекол, „секако му е мајка затоа што се грижи за него“.Сцената предизвика бројни реакции на социјалните мрежи и во медиумите во Србија, со различни толкувања за начинот на кој бил воден разговорот и за јавната експозиција на приватна семејна информација.

Свет | пред 3 седмици

(Видео) Преживеана жена сведочи како била давена во Челопек: Ме гушеше за да не викам, но не се давав

Сведоштвото на 85-годишната Росанка од селото Челопек за „Сител“ ја открива драмата што ја преживеала кога во нејзиниот дом упаднал насилникот кој се сомничи за убиството на нејзина сосетка. Додека полицијата и обвинителството истражуваат дали во регионот дејствува серија напади врз стари и немоќни жени, таа пред камерата на телевизија Сител го опиша кошмарот што, како што вели, ѝ го променил животот.Во мирното село, на околу 500 метри од главниот пат, се наоѓа домот на Росанка, која успеала да го преживее нападот и да сведочи за случувањата. Нападот се случил минатиот понеделник околу 14 часот, кога, според нејзините зборови, непознато лице влегло во куќата и без да каже збор почнало да ја напаѓа.„Ми фрли ќебе преку глава. Викам – кој е овој? Не збори ништо, само почна да ме удира. Прво ме фати за гуша, силно, за да не можам да викам“, раскажува Росанка, покажувајќи ги повредите на лицето.И покрај возраста, таа се обидела да се одбрани додека напаѓачот ја пребарувал по телото и низ собата, најверојатно во потрага по пари. Во еден момент, според нејзиното сведоштво, се обидел и сексуално да ја нападне, по што избегал.„Дојдов малку до здив и си велам – Боже, која е оваа будала? 85 години имам… што сака од мене?“, вели таа.Нападот врз Росанка се случил неколку дена пред во селото да биде пронајдено телото на 78-годишна жена, за чие убиство е приведен 25-годишен жител од соседното село Драгоманце. Локалното население стравува дека станува збор за поврзани случаи и дека само случајност и нејзината борбеност ја спасиле Росанка од фатален исход.Обвинителството и полицијата работат на утврдување дали овие настани се дел од серија напади врз стари жени во кумановскиот регион. Истрагата е во тек.

Настани | пред 3 седмици

Сиљановска-Давкова: Европа нема да биде безбедна без Западен Балкан во ЕУ

Европа не може да биде целосно безбедна сѐ додека Западен Балкан останува надвор од Европската Унија, порача претседателката Гордана Сиљановска-Давкова на свеченото отворање на Меѓународната конференција на Паневропска унија на Македонија, што се одржа во претседателскиот Кабинет во присуство на бројни дипломатски претставници и странски гости.Таа оцени дека без поцврста и поодлучна Европска Унија, Балканот останува простор во кој надворешните сили ќе продолжат да ја тестираат својата моќ, во услови на војни, геополитички тензии и хибридни закани. Говорејќи меѓу мозаиците на Глигор Чемерски, претседателката истакна дека како што секое камче е неопходно за стабилноста на мозаикот, така и Западниот Балкан е суштински дел од европската целина.Во обраќањето таа се повика на визијата на Рихард Куденхоф-Калерги за обединета Европа изградена врз вредности, како и на заложбите на Ото фон Хабсбург за интеграција на народите од Централна, Источна и Југоисточна Европа.Сиљановска-Давкова посочи дека земјата и покрај децениските реформи и направените тешки компромиси се соочува со нови политички бариери и продолжена неизвесност на европскиот пат. Таа нагласи дека на граѓаните не им се потребни сожалувања и задоцнети извинувања, туку навремени решенија за деблокада на евроинтеграцијата.Претседателката повика на обновена политичка волја и лидерство што ќе го заокружи процесот на проширување на Унијата.На конференцијата се обратија и претседателот на Паневропската унија на Македонија, Андреј Лепавцов, претседателот на Меѓународната паневропска унија, Паво Баришиќ, австрискиот амбасадор Мартин Памер и претставникот на Паневропската унија на Австрија и Институтот на регионите на Европа, Штефан Хабек.Паневропската унија на Македонија е формирана во 1993 година и се залага за промоција на европските вредности и за меѓународно лобирање за интеграција на државата во Европската Унија.

Македонија | пред 3 седмици