Сведочевме на груба злоупотреба на болката и тагата, наместо молк, Јаневска и Ангелова држеа говори, велат од „Студентски отпор“

„На денешниот собир пред платото на УКИМ, на кој присуствуваа илјадници студенти со цел да оддадат почит за жртвите во трагедијата во дискотеката „Пулс“ во Кочани, сведочевме на груба злоупотреба на болката и тагата на граѓаните од страна на институциите“, велат од организацијата „Студентски отпор“ и додаваат:Наместо 7-минутен молк и достоинствено оддавање на почит, како што бараа студентите, ректорката на УКИМ, Билјана Ангелова, и министерката за образование и наука, Весна Јаневска, одлучија да држат говори. Ова се случи и покрај јасниот притисок од студентите да не се користи ваков трагичен момент за говори и политичка самопромоција.Додека тие ги читаа своите подготвени изјави, неколку студенти се почувствуваа лошо и побараа итна медицинска помош. Но, наместо внимание кон оваа ситуација, ректорката и министерката продолжија со своите говори, целосно игнорирајќи ја состојбата на студентите. За нив, поважна беше ПР кампањата отколку почитта кон жртвите и здравјето на младите кои присуствуваа на собирот.Студентите јасно и гласно порачаа дека ваквото однесување е недостоинствено и неприфатливо. Ова не беше момент за политички пораки, туку за тивка почит кон загинатите и солидарност со нивните семејства. Наместо тоа, сведочевме на срамна институционална експлоатација на трагедијата.„Студентски отпор“ го осудува ова однесување и бара одговорност од институциите. Бараме идни комеморативни настани да се организираат со вистинска почит и достоинство, без политичка инструментализација. Жртвите заслужуваат повеќе, а студентите нема да дозволат нивната болка да се користи за нечии ПР поени.Официјалните тела за студентска репрезентација не смеат да го амортизираат гневот на студентите. Доколку се обидат да го сторат тоа, „Студентски отпор“ ќе ги поведе студентите во борба за вистинско застапување на нивните интереси.

Македонија | пред 1 година

Нови цени на горивата од полноќ

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 1,29 % во однос на одлуката од 10.03.2025 година.Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 2,592%, кај дизелот намалувањето е во просек за 1,513%, кај екстра лесното масло намалувањето е за 1,550% и кај мазутот зголемувањето е за 0,172%.Курсот на денарот во однос на доларот во изминатиот период по кој беа формирани цените со претходната пресметка е понизок за 2,5506%.Од 18.3.2025 година од 00:01 часот максималните цени на нафтените деривати ќе изнесуваат:Моторен бензин ЕУРОСУПЕР БС - 95 74,50 (денари/литар)Моторен бензин ЕУРОСУПЕР БС - 98 76,50 (денари/литар)Дизел гориво ЕУРОДИЗЕЛ БС (Д-Е V) 68,50 (денари/литар)Масло за горење Екстра лесно 1 (ЕЛ-1) 68,00 (денари/литар)Мазут М-1 НС 41,345 (денари/килограм)Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се намалуваат за 1,50 ден/лит.Малопродажната цена на бензините ЕУРОСУПЕР БС-95 и ЕУРОСУПЕР БС-98 не се менува.Малопродажната цена на Мазутот М-1 НС се намалува за 0,916 ден/кг и сега ќе изнесува 41,345 ден/кг.Напоменуваме дека ова се максималните цени на нафтените деривати од 00:01 часот на 18.3.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.

Македонија | пред 1 година

Најавен собир во Скопје, во чест на загинатите во Кочани

Македонија повторно е завиена во црно. За утре, најавен е собир на плоштадот „Македонија“ во Скопје.„Уништени и во грч седиме пред екраните во исчекување на нова поголема бројка, во исчекување на нова поголема тага. 59 млади лица не го видеа денешниот ден. Дупло повеќе се во болници и тешко повредени. Ние, како и децата во дискотеката, сме повторно беспомошни и оставени сами на себе. Во овие траорни денови, Македонија треба да биде заедно. Треба да си бидеме рамо за плачење и треба да си дадеме еден на друг утеха, ако воопшто и можеме. ,,Кој е следен?” повикува на заедништво во ужасов. Ги повикуваме сите луѓе низ цела Македонија, утре во 18:00 часот да се соберат на плоштадите од своите градови и да не поминуваат низ ова сами. Повикуваме во чест на починатите да се поделат црни ленти, за како народ да покажеме дека згаснатите животи нема да бидат заборавени. Тек допрва ќе доаѓаат црните денови за нас, а низ Македонија заедно ќе се тагува и плаче. Така, ќе треба и Македонија заедно да се лечи“, напишаа организаторите.

Македонија | пред 1 година

Се бара притвор и за Крешник Бектеши, 14 лица се осомничени, полицијата е овластена да апси секој кој има поврзаност

Одговорност кај осомничените ќе се утврдува согласно доказите, рече републичкиот обвинител Љупчо Коцевски, кој кажа дека кај најголемиот дел се испитува дали тие сториле кривично дело - тешки дела против безбедноста на луѓето.„Предвидена е казна од најмалку три години, а казната може да се движи до 20 години. Се испитува давање поткуп, како и незаконска набавка на пиротехнички средства“, рече Коцевски.Засега се задржани 14 лица во полициските станици, кои се осомничени и за сите ќе се бара притвор, вклучувајќи го и ексминистерот Крешник Бектеши. Сега, може да се одреди само 48 часовен притвор, а тој по отворање на истрагата, односно по 48 часа, да има и 30 дневен притвор.Тој додаде: „Полицијата е овластена да уапси секого, без разлика на последицата, а кој допринел со неговото однесување“, рече Коцевски.За лицата кои се во тешка здравствена состојба, а се осомничени, постапката ќе продолжи штом тие бидат подобро.

Македонија | пред 1 година

(Видео) Револт и гнев на протестот во Кочани: Не постои покрумпирана држава од Македонија!

Голем револт има во Кочани помеѓу граѓаните. Гневни се на системот, бидејќи сметаат дека не ги штити, туку оди контра нив и ги убива. Посочуваат дека нема Македонија е на врвот во светот по корупција. Покажуваат со прст кон политичарите.

Македонија | пред 1 година

„Повредите им се тешки, изгорениците покриваат и до 28% од кожата“ - лекарите од Белград за повредените од Кочани

Најмалку 59 лица загинаа во пожар што избувна ноќта меѓу саботата и неделата во дискотеката „Пулс“ во Кочани. Најмладата жртва имала само 14 години. Меѓу повредените има 150 лица, а 12 пациенти биле донесени во Белград во неделата вечерта со авион на војската на Србија, од кои некои се во Ургентниот центар во Белград.„Девет пациенти се примени на Ургентниот центар, а тројца се на ВМА. Дијагностичките процедури беа започнати и завршени за пациентите веднаш по приемот. Станува збор за повреди од изгореници кои зафатиле помеѓу два и 28 проценти од површината на телото. Сите пациенти покажуваат симптоми и знаци на оштетување или контакт со токсични гасови произведени за време на пожарот, но некои имаат и изгореници на горните дишни органи и тие се класифицирани како сериозни повреди опасни по живот“, изјавија од Ургентниот центар во Белград, пренесе Танјуг.„Засега немам дополнителни информации дали ќе дојдат уште пациенти, но ние сме подготвени за тоа. Тешко е да се зборува за прогнози за изгореници, но тоа ќе стане јасно во наредните денови. Нашите пациенти се млади, на возраст од 18 до 35 години, тие се рехабилитирани и нивниот третман продолжува бидејќи тоа е долготраен процес кој бара недели лекување. Еден пациент е на механичка вентилација и е најтешко повреден“, изјавија за медиумите од Ургентниот центар во Белград.

Свет | пред 1 година

(Видео) Инциденти во Кочани: Демолиран вториот локал на газдата на дискотеката, искршени прозори на општината

Со извикување „Убијци, убијци“, повеќе демонстранти во Кочани, демолираа дел од општината во Кочани, па потоа се упатија и кон локалот, за кој посочуваат дека е сопственост на истиот газда како и дискотеката „Пулс“ каде загинаа 59 лица. Ситуацијата кулминира, а револтот преовладува над тагата.Името на демолиранираното кафуле е „Класик“.

Македонија | пред 1 година

(Видео) Тага, шок, неверување: Јаневска не го доврши говорот на УКИМ, имаше исвиркување од публиката, на студенти им се слоши

Студенти, млади, граѓани и професори одржаа заеднички час во спомен на жртвите во пожарот во Кочани. Пред платото на УКИМ во Скопје одадоа почит на трагично загинатите во дискотеката Пулс во Кочани. Запалија свеќи, положија цвеќе и застанаа молкум со солзи и тага во очите и срцето да оддадат почит но и да побараат никогаш повеќе да не се случи ваква трагедија.Сочувство изразија и се обратија ректорката на УКИМ Биљана Ангелова и министерката за образование и наука Весна Јаневска.Роволт кај присутните створи моментот што Јаневска држеше говор додека се чекаше интервенција на Брза помош.„Очигледно е, предолго трае, вашата порака е примена“, рече Јаневска, а потоа се слушна како се бара Брза помош од страна на присутните во публиката. И потоа, се слушна „уа, уа!“.Организаторот ги замоли присутните за тишина. А по ова следуваше повторно негодуваше од присутните.Претходно, Јаневска отиде меѓу публиката, па кога се врати, реши да не продолжи со говорот.Моментот е на 20:50 секунди:

Македонија | пред 1 година

(Видео) Филипче: Пациентите се одлично третирани, не смее никој да биде поштеден, ни поранешните ни сегашните функционери

„Ова е трагедија која ја потресе целата земја, остава трага која никогаш нема да се избрише“, вака претседателот на СДСМ, Венко Филипче ја опиша болката по големата трагедија во Кочани каде во дискотеката „Пулс“ загинаа 59 лица. Тој вчера на Клиниката се видел со дел од роднините.„Сакам да ги уверам роднините и родителите и дека пациентите се одлично сместени и третирани. Сакам да ги уверам дека нивните најблиски се во добри раце и дека колегите се борат за секој еден живот“, рече Филипче.Тој упати апел до министерот Арбен Таравари да формира мобилни тимови, за психолошка помош на семејствата во Кочани, особено во пресрет на тоа што таму ќе следува.Тој рече дека мора да има целосна транспарентна и објективна истрага.„Никој не треба да биде поштеден, ниту актуелни ниту поранешни функционери и службеници. Трагедијата е преголема за да има сенка на сомнеж. Ако постои и најмала индиција дека некој се штити, тоа ќе биде удар на цело општество. Затоа апелирам до Обвинителството, до истражните органи, редовно, секојдневно да се информира што се прави“, рече Филипче.Тој порача дека треба човечност, а не политизирање на процесот.„Нема да дозволиме некој да биде поштеден, будно ќе пратиме за процесот да оди во праилна насока“, додаде тој.

Македонија | пред 1 година

(Видео) Татко на загинато дете: 21 година имаше, едно ми беше, пуштете им на големците да гледаат!

Кочани е во тага, шок и болка. Досега е познато дека од 59-те загинати, 31 се од Кочани. Татко на загинато 21 годишно дете, тагува и бара одговорност. Настраданиот му бил единствено дете кое го имал.„Има ли поголема болест од ова. 21 година дете, злато, едно ми беше, што да правам, што да живеам. Пуштете им големците, нека гледаат. О Господе, казни ги, да изгорат како деца, златни деца ни изгора..“, рече таткото.

Македонија | пред 1 година

(Видео) Обезбедувачи на дискотеката: Спасивме преку 80 луѓе, ако одлучи судот, нека нѐ затворат

Лица кои се приведени, а неофицијално се дел од обезбедувањето на дискотеката „Пулс“ во Кочани, каде загинаа 59 лица, беа спроведени во полициска станица. Еден од нив зборуваше и пред новинарите.„Па имаме спасено доста луѓе, а дали сме виновни... Ние бевме случајно таму, во патрола, се случи чудото кое се случи, спасивме доста луѓе, преку 80 луѓе, ако одлучи судот, нека нѐ затворат“, рече еден од приведените.Досега познато за уапсените:

Македонија | пред 1 година

Голем број на апсења ќе има и денеска, дури и вработени во МВР

Катастрофална била состојбата при постапувањето на институциите кои требало да преземат активности за ставање во функција на дискотеката и контрола на истата. Тој рече дека особено проблематично било постапувањето во делот на предусловите кои требало да бидат исполнети и исконтролирани.„Поради тоа и во текот на денешниот ден ќе има доста голем број на лица кои ќе бидат приведени, од различни институции, вклучувајќи го и МВР, и други институции“, рече Тошковски.Тој рече дека Македонија нема систем во кој има правила за игра, за да превенираат ваков ужасен немил настан.

Македонија | пред 1 година

(Видео) Влатко сведочи: Морничаво. 100 души лежат, фаќаш кој има пулс, тие да ги спасиме - имаше изгорени, загушени, згмечени

Македонија тагува по загинатите лица во пожарот кој избувна во дискотеката „Пулс“ во Кочани, при што животот го загубија 59 лица, а над 150 се повредени.Очевидецот Влатко Здравков за „Дојче Веле“ вели дека „Кочани е мртов град“, нема со генерации да се оправат по трагедијата.„Морничаво. 100 души лежат, фаќаш кој има пулс, тие да ги спасиме. Да се стават во коли да се носат. Тие што немаа, јасно ви е, се тргаат настрана. Изгорени, згмечени, загушени, повеќето со изгореници се починати, некои од струја. Тоа се наши деца, ни умреа децата на нас“, рече Влатко Здравков.„Оваа трагедија што нè снајде. Кочани е мртов град, со генерации нема да се оправи. Се чувстуваме како да ни починале нашите деца. Гледавме да ги спасиме прво тие што имаа пулс, околу 100 лица лежеа. Имаше изгорени, загушени од чад, згмечени, некои од струја. Тоа се наши деца, ни умреа децата“, вели Влатко Здравков за „DW Македонски“.„Во Кочани веќе нема живот“#Кочани синоќа се збогуваше од десетиците млади луѓе кои ги загубија животите во пожарот во дискотеката „Пулс“. Очевидецот Влатко Здравков раскажува како се извлекувале повредените и каква е атмосферата во градот. #macedonia #kocaniPosted by DW Македонски on Monday, March 17, 2025

Македонија | пред 1 година

МЗ: Отворена телефонска линија за психолошка поддршка на пациентите - 078 378 754

Министерството за здравство информира дека во координација со ЈЗУ Психијатриска болница и Клиниката за психијатрија се формираат мобилни тимови составени од психијатри и психолози, кои ќе обезбедуваат психолошка поддршка за семејствата и пациентите.За сите кои имаат потреба од советување или помош, достапна е телефонската линија 078 378 754, преку која стручни лица ќе обезбедуваат психолошка поддршка.Како дел од оваа иницијатива, мобилен тим од двајца лекари и еден психолог ќе биде ангажиран во Кочани, со цел да се обезбеди навремена и соодветна психолошка поддршка на граѓаните.Министерството за здравство останува посветено на унапредување на менталното здравје и обезбедување на соодветна грижа за сите граѓани.

Македонија | пред 1 година

Потресно обраќање на сопругата на загинатиот Андреј од „ДНК“: Лажни објави се дека пиротехниката е донесена од бендот!

Наталија Ѓоргиеска, сопруга на загинатиот Андреј Ѓоргиески се обрати до јавноста:„Во овој момент, кој е најтежок за нас, медиумите и државните институции, ме предизвикувате за прв пат да се обратам до македонската јавност. Во текот на вчерашниот ден, по потрага на својот сопруг Андреја Ѓорѓиески, да го најдам во некоја од болниците, на домашна адреса не посетила криминалистичката служба која без објаснување го барала мојот сопруг, во присуство на нашето дете.Истата служба ме побара телефонски во неколку наврати со НАЈНЕХУМАН однос да дадам информација каде е мојот сопруг со цел да даде изјава за настанот, за што истото прашање го упатив кон нив. Од медиумите, кои пренесуваат ЛАЖНИ информации, дознале дека сопругот е на домашно лекување, додека тој лежи во болницата во Кочани, мртов.Ги замолувам сите јавни медиуми да не шират дезинформации на социјалните мрежи. Ги замолувам и јавните органи да си извршат детален увид за целиот трагичен настан. Во овој тежок момент за сите нас, ЈАВНО ги замолувам институциите и медиумите да ја почитуваат пред се, нашата приватност. Лажни објави дека мојот сопруг е на домашно лекување и дека пиротехниката е донесена од страна на бендот, ве молам, НЕ ШТИТЕТЕ НЕКОЈ КОЈ ТРЕБА ДА Е ПОЗАДИ РЕШЕТКИ! Како сопруга и мајка на малолетно дете, покажете малку сочувство, а така и за поблиското семејство и пријателите...

Македонија | пред 1 година

(Видео) Сведоштво: Малолетник излегол од дискотеката оти дошла полицијата, па за 10 минути се случил хаосот

Полициски службеници упаднале во дискотеката „Пулс“ во Кочани само петнаесетина минути пред да избувне пожарот во кој загинаа најмалку 59 лица, а повеќе од 150 се тешко повредени. Ивица Вучков, чиј малолетен син кобната ноќ бил во кочанската дискотека, за српски Информер изјави дека полицијата извршила рација само петнаесет минути пред да избувне пожарот.– Син ми беше со другари. Тој бил близу вратата и кога видел дека полицијата влегла он излегол. Тоа беше околу 2:30 – вели Ивица и додава:– Таму беше со другарите и сакаше да се врати бидејќи девојка му остана внатре, но го видел девојчето и останал надвор. За 10 минути било хаос, стопено се. Внатре било хорор, паѓал таванот, се топело.. Има видеа од тие што биле внатре, како гасат, како одат едни врз други. Имало еден излез, сите прозори блокирани, топилница било внатре. $bp("TargetVideo_42204334", {"id":"34926","width":"650","height":"366","video":"2042080","autoplay":0,"shared":true});

Македонија | пред 1 година

(Видео) Ова се сите лица кои се уапсени досега по трагедијата во Кочани каде 59 лица загинаа

Министерот за внатрешни работи, на прес-конференција наброја кој се е приведен по пожарот во дискотеката „Пулс“ во Кочани, каде 59 лица го загубија животот.

Македонија | пред 1 година

„Заедно седеа во клупа, заедно заминаа кај ангелите“ – наставничката Елена се прости од Никола и Матеј кои загинаа во пожарот

Наставничката Елена Накова со емотивна објава на Фејсбук се прости од нејзините ученици Никола и Матеј, кои вчера загинаа во пожарот во дискотеката во Кочани.„Драги деца, не можам да поверувам на сопстветните очи и уши дека повеќе ве нема, не можам да го заборавам моментот кога бевте IX В одделение, кога бев ваша наставничка, моментот кога седевте во иста клупа.Николче, мило дете со твојата мила насмевка и посветеност секогаш ме воодушевуваше, од вчера ми звони во ушите твојата рецитација на песната „Која ја љубев Дениција“, која ја вежбавме за една училишна активност. Ах ах ах , Матејче уште во понеделник па последователно секој ден на излегување од училница ме испраќаше со зборовите „Убав виќен наставничќе“ иако видендот беше далеку.Еее токму овој викенд беше најлошиот викен за мене бидејки ја слушнав кобната случка и уште покобното сознаение дека многу млади деца и нечии мили деца нема да бидат веќе со нас! Патувајте мирно кон ангелите, нека Господ Бог ве приме во царството небесно и да продолжите да ја ширите позитивната енергија кај ангелите“, напиша Накова.

Македонија | пред 1 година

Градоначалникот на Кочани поднесе оставка: Ако имам одговорност, нека ме гонат

„Во овие најтешки мигови за нашата земја и за мене лично, сакам да соопштам дека поднесувам неотповиклива оставка од функцијата градоначалник на Кочани“, напиша градоначалникот на Кочани, Љупчо Папазов и додаде:Оваа загуба е огромна!Не постојат зборови што можат да ја опишат болката што ја чувствуваме сите. Тие деца беа наши деца. Ги познавав повеќето од нив, ги познавав и нивните семејства, а со дел од нив и семејни пријатели.Шокот и скршеноста што ги чувствувам ќе траат целиот мој живот. Оваа трагедија ги остави Кочани и Македонија во црнина, а празнината што остана е непреболна.Барам од сите надлежни институции да ја испитаат одговорноста на сите инволвирани! Непостапувањето е исто така одговорност. Мора да се истражат сите детали, да се најдат сите пропусти, а сите лица што придонеле кон оваа трагедија мора да одговараат. Јас се ставам целосно на располагање на институциите. Иако според закон немав директни надлежности во овој случај, подготвен сум да одговорам на сите прашања за се', како и за моите лични постапки.Нема зборови што можат да ја опишат мојата болка! Но, во овие моменти, мора да покажеме доблест, да манифестираме црлосна одговорност и да покажеме разлика во начинот на постапување. Со нашето однесување мора да дадеме пример дека се спротивставуваме на системот кој не функционира. Доколку постои било каков основ за одговорност кај мене, го повикувам обвинителството да го испита тоа и да постапи согласно законите.За мене, после оваа трагедија, ништо повеќе нема исто значење! Ова беа наши деца! Многумина, со право, забележаа зошто вчера не излегов во јавност цел ден. Но, тие што ме познаваат знаат колку сум скршен и како го доживувам ова што се случи. Тешко е, и тешко ќе го преживеам. Работев чесно и посветено целиот свој живот!Никогаш не сум ни помислил дека вака ќе заврши и мојот ангажман, но сега се повлекувам од оваа функција, молејќи го Бога за душите на нашите деца, за нивните семејства и за народот на Македонија!

Македонија | пред 1 година

Тошковски: 45 лица од повредените се во критична состојба, пиротехниката во дискотеката ја донел бендот

Тошковски информираше дека 45 лица од повредените се во критична состојба, се транспортират во странство, а владата се труди да овозможи соодветно згрижување и лекување на истите.Пиротехниката во дискотеката „Пулс“ во Кочани ја донел бендот „ДНК“, лицето кое било задолжено за нивна употреба е починато.По завршување на увидот, ќе биде доставен извештај на ОЈО, по што ќе се утврди дали истите требале да поседуваат одреден сертификат за употреба.Според Тошковски, дискотеката работела во објект чија што намена е лесна индустрија, а не угостителство. За цел клуб имало само два противпожарни апарати. Концертот бил одржан „на диво“ бидејќи немало писмен договор меѓу организаторот и оддржувачите.Приведени се 5 лица со кои се разговара и меѓу нив е и поранешен министер. Нареден е претрес кај 2 лица. Правното лице немало валидна лиценца за работа, односно приложил вчера фалсификат лиценца па и кај него ќе се врши претрес.Вчера приведени 13 лица во Штип, меѓу кои сопственик, обезбедување, продавач на билети, член на пазарен инспекторат, еден од трудов инспектор и уште некои. Сите имаат притвор од 7 дена за предизвикување на општа опасност.

Македонија | пред 1 година

Меѓу загинатите во пожарот се уште двајца млади спортисти, покрај фудбалерот Лазаров

Локалната телевизија М Нет јави дека меѓу жртвите е и 18-годишниот голман Дамјан Танески од Штип.„Низ својата млада кариера која доправа требаше да се развива и да го чува голот, настапуваше за Мал Ајакс од Штип, беше во младинските категории на скопски Вардар, потоа беше дел од Брегалница и Кит Го од Пехчево“, информира телевизијата.Меѓу загинатите е и 20-годишниот кошаркар Петар Ивановски. Трагичната вест ја потврдија од неговиот матичен клуб.„Со голема тага ја примивме веста каде што нашиот соиграч Петар Ивановски е една од жртвите во синоќешната трагедија.Тој беше голем човек со големо срце, беше голем борец и беше МВП на турнир М-14. Тагата е преголема, сочувство до семејството“, напишаа од Дино баскет.

Македонија | пред 1 година

Нема фотографија

Денес ден на жалост и во Црна Гора поради вчерашната трагедија во Кочани

По повод трагедијата во Северна Македонија, во која загинаа 59 лица, а над 150 се повредени, понеделник, 17 март, во Црна Гора е прогласен за Ден на жалост.„Со голема тага ја примивме веста за трагичниот настан во Кочани, Северна Македонија. Владата на Црна Гора е подготвена да застане покрај пријателскиот народ на Северна Македонија на сите неопходни начини во ова тешко време и со ова ја информира јавноста дека понеделник, 17 март, во Црна Гора ќе биде Ден на жалост. Изразуваме длабоко сочувство до семејствата на жртвите, а на повредените им посакуваме брзо закрепнување. Нашите мисли и молитви се со Северна Македонија“, напиша црногорскиот премиер Милојко Спајиќ на Икс. 

Македонија | пред 1 година

Таравари: Сите хоспитализирани се во стабилна состојба, надвор од државата 51 повреден

Таравари во денешниот прес изјави дека сите хоспитализирани пациенти се во стабилна состојба, додека надвор од државата се пренесени 51 повреден. Нема пациенти во Кочани и во Штип.Испрати порака сите што не се пријавиле вчера за преглед, да се пријават денес.Во клинички центар има 49 пациенти, во „8 Септември“ 18 пациенти, стара градска болница 17, додека во регионот и Европа бројот е следниов:Турција: 9Бугарија: 14Грција: 5Србија: 17Унгарија: 2Литванија: 4Во теков на денешниов ден се планира да се упатат уште двајца во Словенија, евентуално уште двајца, потоа во Хрватска четворица, во Австрија 6 и во Србија уште 12.  

Македонија | пред 1 година

Се следи состојбата на петте млади момчиња и 18-годишната девојка згрижени во Белград

Српските медицински екипи укажаa помош на повеќе од десет лица тешко повредени во пожарот во дискотеката „Пулс“ во Кочани.Во текот на вчерашниот ден и вечерта со амбулантни возила и авион на војската на Србија биле префрлени во болниците во Белград, сместени во ВМА и Клиничкиот центар на Србија.Како што дознава Telegraf.rs, сите пациенти кои се сместени во ВМА се во шок соба. Пет од нив биле интубирани.Според неофицијални информации, станува збор за пет млади момчиња и една девојка.Младите мажи се на возраст од 18 до 27 години, а изгорениците покриваат и до 30 отсто од кожата.Девојката која е префрлена во ВМА има 18 години и изгорениците и покривале 24 отсто од кожата.Најмалку 59 лица загинаа во пожарот што избувна ноќта меѓу саботата и неделата во дискотеката Пулс во Кочани.Најмладата жртва имала само 14 години. Меѓу повредените има најмалку 150 лица, кои се префрлени во болниците во Кочани, Штип и Скопје, по што е извршен итен транспорт во околните земји.Со авион на српската армија во неделата вечерта во Белград биле донесени 12 пациенти.

Македонија | пред 1 година

Почина возач на брза помош кој цела ноќ ги пренесувал повредените од трагедијата во Кочани

Возачот на брза помош, Иле Гоцевски, кој цела ноќ ги преведувал повредените од пожарот во Кочани, починал утрово.Колегите од Општата болница Кочани, каде што Гоцевски беше дел од тимот, се во шок и неверување. Вчера, како и секој ден, извршуваше свои работни задачи, транспортирајќи пациенти и повредени лица, давајќи го својот максимум за да им помогне на оние на кои им е најпотребно. По напорниот и долг ден, се вратил дома да одмори, но, за жал, не се разбудил.За него сведочат како за пожртвуван и професионален човек, секогаш подготвен да помогне, без оглед на времето и условите. Неговата посветеност кон работата и човечноста што ја покажувал кон пациентите ќе останат запаметени меѓу колегите и сите што го познавале.Оваа ненадејна загуба е тежок удар за неговото семејство, пријателите и колегите, кои денеска се простуваат од него со голема тага. Кочани загуби човек кој животот го посвети на спасување други животи.

Македонија | пред 1 година