(Видео) Алкарас лут, покажа со прст кон камерите

Шпанскиот тенисер Карлос Алкарас изрази незадоволство поради тоа што нема приватност на тренинзите пред стартот на УС Опен.За време на загревањето на еден од споредните терени, Алкарас на својот агент му укажувал кон камерите кои ја снимаат секоја негова подготовка. „Сите терени се покриени со камери и микрофони, тоа ја нарушува подготовката на играчите“, смета Алкарас.Младиот тенисер коментирал дека камерите бележат сè, дури и доверливи разговори за ривалите, тактиката и подготовките, што, според него, создава дополнителен притисок.Алкарас својот настап на турнирот ќе го започне против Рејли Опелка, а целта му е да постигне подобар резултат од минатата година, кога беше елиминиран во второто коло од Холанѓанецот Ботик ван де Зандшулп.

Спорт | пред 8 месеци

Новак конечно дозна кого би можел да добие во второто коло на US Open

Српскиот тенисер Новак Ѓоковиќ ја доби појасната слика за својот пат на US Open, откако завршија квалификациите.Во второто коло го очекува дуел со победникот од мечот меѓу Американецот Закарија Свajда и Унгарецот Зомбор Пирош. Досега одиграле два меѓусебни дуела, и двата во корист на Свajда – во Каљари и на Ролан Гарос минатата година. Во квалификациите, Свajда беше подобар од Холмгрен, Жукаев и Хеслер, додека Пирош ги елиминираше Букије, Тиранте и Дакворт.Пред тоа, Ѓоковиќ најнапред ќе одигра премиерен меч на турнирот против Лернер Тијен, моментално 48. играч на светската ранг-листа. Дуелот е закажан за понеделник во 01:00 часот по средноевропско време и се очекува да биде посериозен тест во однос на потенцијалните ривали во второто коло.Интересно е што во половината од ждребот каде што се наоѓа Ѓоковиќ, главно има Американци, па не е исклучено речиси до завршницата да игра исклучиво против домашни тенисери.US Open започнува во недела, а Ѓоковиќ тргнува во поход по својата 25-та гренд слем титула.

Спорт | пред 8 месеци

Apple развива домашни роботи со вештачка интелигенција – еден од нив ќе има и роботска рака

Apple активно работи на развој на повеќе роботски проекти засновани на вештачка интелигенција, а најновиот извештај на Bloomberg открива детали што ја потврдуваат оваа насока. Според информациите, компанијата не создава само еден, туку неколку модели, од кои најинтересен за крајните корисници е уред налик на iPad со роботска рака.Овој уред ќе може природно да реагира на интеракции со луѓето, па дури и да се сврти кон оној што му се обраќа. За време на FaceTime повици, роботот ќе ја следи личноста и постојано ќе ја држи во кадар. Благодарение на надградената верзија на Siri, уредот ќе делува „живo“, вклучувајќи се повремено во разговор. На пример, кога двајца разговараат за вечера, роботот може да предложи ресторан во близина.Apple размислува да го користи препознатливиот Finder логотип од macOS за да му даде „личност“ и чувство на присуство. На проектот работат повеќе тимови – за хардвер, софтвер, AI и интерфејс дизајн, под раководство на Кевин Линч, кој претходно раководеше со Apple Watch и автомобилските иницијативи на компанијата.Покрај овој концепт, во оптек се и разговори за робот на тркала, сличен на Amazon Astro, па дури и за можен хуманоиден модел. Apple истовремено развива и голема индустриска роботска рака со кодно име T1333, наменета за фабричка употреба.Сепак, иако проектите напредуваат, нема гаранција дека некој од нив навистина ќе стигне до пазарот. Apple во минатото го стопираше Project Titan – автомобилот кој никогаш не беше претставен. Сепак, роботската рака во форма на AI таблет изгледа како проект со реални шанси да биде објавен.

Магазин | пред 8 месеци

Снимањето на серијата „Емили во Париз“ во Венеција прекинато поради смрт на сетот

Снимањето на новата сезона на популарната серија „Емили во Париз“ е прекинато откако 47-годишен Италијанец починал на сетот во еден хотел во Венеција. Како што потврдија градските власти, тој се онесвестил за време на сет, а и покрај сите обиди за реанимација, не успеале да му го спасат животот. Се претпоставува дека причината за смртта е срцев удар.Засега не е познато колку долго продукцијата ќе биде ставена во мирување. Иако дејството на серијата е сместено во Париз, дел од новите епизоди се снимаат во Италија, вклучително и во Рим и Венеција. Според планот, снимањето во Венеција требало да трае до понеделник, по претходните снимања што се одржаа во мај во Рим.Од „Нетфликс“ најавуваат дека петтата сезона ќе ја има својата премиера непосредно пред Божиќ.Според италијанските медиуми, починатиот бил помошник-режисер кој долг период работел во меѓународната филмска индустрија. Тој бил роден во Венеција, а трагичниот настан се случил додека се снимала една од завршните сцени во прочуениот хотел „Даниели“. Градското собрание изрази сочувство до неговото семејство.

Магазин | пред 8 месеци

Путин: Со Трамп се гледа „светло на крајот на тунелот“

Рускиот претседател Владимир Путин изјави дека гледа „светло на крајот на тунелот“ во односите меѓу Русија и САД, притоа изразувајќи надеж дека лидерските квалитети на американскиот претседател Доналд Трамп ќе помогнат во обновувањето на врските меѓу двете земји.„Со доаѓањето на претседателот Трамп, мислам дека конечно се појави светло на крајот од тунелот. Сега имавме многу добар, значаен и искрен состанок на Алјаска“, рече Путин, одговарајќи на новинарски прашања за време на неговата посета на центар за нуклеарни истражувања.Тој додаде дека следните чекори ќе зависат од американското водство, но нагласи дека е убеден оти лидерските квалитети на Трамп се „добра гаранција“ за обновување на односите.

Свет | пред 8 месеци

Времето денеска во Македонија

Променливо облачно со сончеви периоди. Попладне во западните делови ќе има локален пороен дожд и ретки грмежи. Ќе дува слаб до умерен, а долж Повардарието засилен ветер од северен правец.Во Скопје, променливо облачно со сончеви периоди. Ќе дува умерен, повремено засилен северен ветер.

Македонија | пред 8 месеци

Администрацијата на Трамп ги проверува сите 55 милиони носители на визи во САД

Администрацијата на американскиот претседател Доналд Трамп започна обемна проверка на сите 55 милиони носители на странски визи во САД, со цел идентификување можни случаи за отповикување или депортација поради прекршувања на имиграциските правила.Претходно, Стејт департментот соопшти дека досега се одземени повеќе од 6.000 студентски визи поради различни причини – од пречекорување на дозволениот престој до случаи кога носители на визи биле фатени во возење под дејство на алкохол.„Ги разгледуваме сите достапни информации како дел од нашата проверка, вклучувајќи евиденции за спроведување на законот или имиграцијата, како и други податоци кои стануваат достапни по издавањето на визата и кои може да укажуваат на потенцијална неподобност“, се наведува во соопштението на Стејт департментот.Според портпаролот, „огромното мнозинство“ од одземените визи се поврзани со кривични дела како напад, провала, возење под дејство на алкохол, но и со „поддршка на тероризам“. При тоа, околу 4.000 лица изгубиле визи поради кршење на законот, додека од 200 до 300 визи биле одземени поради поврзаност со терористички активности или поддршка на терористички организации.Во јавноста потсетуваат дека државниот секретар Марко Рубио и администрацијата на Трамп веќе беа во центарот на вниманието на почетокот на 2025 година, кога беше притворен и депортиран студентот од Колумбија, Махмуд Калил, поради неговиот пропалестински активизам. Калил подоцна беше ослободен и поднесе тужба против федералната влада.Сегашното преиспитување на сите носители на визи претставува значително проширување на иницијалниот процес на повторна проверка, кој во почетокот беше насочен главно кон студентите инволвирани во пропалестински или антиизраелски активности.

Свет | пред 8 месеци

Клиниката за ортопедија ги помести границите - хирурзите изведоа најсложена трансплантација досега!

На Универзитетската клиника за ортопедија е реализирана најсложената трансплантација досега, со што се поместени границите на современата ортопедска хирургија во Македонија, информира Министерството за здравство.Пациент на возраст од 64 години, со втор рецидив на миксоиден липосарком на левата натколеница, бил подложен на ресекција на средишниот дел од бутната коска, потоа на реконструкција со графт од кадавер и на фиксација со клин.Интервенцијата се одвивала во два акта. Во вториот дел била изведена пластична реконструкција под раководство на др. Томислав Јовановски. Првиот хируршки тим го водел проф. д-р Милан Самарџиски, со учество на спец. д-р Бојан Будиќ, др. Теодора Тодорова и др. Гоце Гулески. За анестезија била задолжена проф. д-р Јасминка Нанчева, заедно со анестетичарот Јована Илиева. Во тимот биле и инструментарките Ерзен Муртезани и Татјана Дукадиновска, болничарот Дардан Синани и рендген техничарот Силвана Станковска.Министерството нагласува дека со овој оперативен зафат се воспоставува нова референтна точка во домашната ортопедија и уште еднаш се потврдуваат капацитетите на македонските хируршки тимови за изведување интервенции од највисок степен на сложеност.

Македонија | пред 8 месеци

Удрил две малолетнички на тротинет во Скопје и избегал, полицијата трага по возачот

Возач на „фолксваген голф“ удрил две малолетнички на електричен тротинет скопски Капиштец и избегал од местото на несреќата. Тринаесетгодишната девојка е со тешки повреди, а нејзината 12-годишна сопатничка е полесно повредена. Полицијата трага по возачот.На 21.08.2025 во 14:30 часот во СВР Скопје било пријавено дека на ул.„Васил Ѓорѓов“ во Скопје се случила сообраќајна несреќа помеѓу патничко возило „фолксваген голф“ со скопски регистарски ознаки и електричен тротинет управуван од 13-годишна малолетничка од Скопје, по што возачот со возилото го напуштил местото на настанот. Во несреќата со тешки телесни повреди се здобила малолетничката, додека со телесни повреди нејзината 12-годишна сопатничка, констатирани во Градска општа болница „Св. Наум Охридски“ Скопје. Извршен бил увид од увидна екипа на СВР Скопје, a распишана е телеграма и се преземаат интензивни мерки за пронаоѓање на возачот и возилото и за целосно расчистување на случајот, соопшти МВР.

Скопје | пред 8 месеци

Две малолетни девојчиња загинаа во страшна сообраќајка кај Кичево - ученички во ШМК „Дрита“

Трагична сообраќајна несреќа со две малолетни жртви се случила вчера доцна попладне во близината на Кичево-На 21. 08.2025 во 18:05 часот во ОВР Кичево било пријавено дека на локален пат во с.Колибари, кичевско, 15-годишна малолетничка од с.Колибари, управувајќи четирицикл со кичевски регистарски ознаки, изгубила контрола и со четирициклот излетала од коловозот. Од здобиените повреди на местото на несреќата починале малолетничката и нејзината малолетна сопатничка од с.Грешница, кичевско. Лекар констатирал смрт, а по наредба на јавен обвинител телата на починатите биле дадени на обдукција. Извршен бил увид од увидна екипа на ОВР Кичево.Станува збор за две ученички од Школата за музичка и културна дејност „Дрита“, Ериона Рамадани и Албина Абази.„Со длабока тага и потресени срца ја примивме веста за загубата на нашите сакани ученички. Нивниот замин остави незаменлива празнина во нашите срца и во секој агол на училиштето“, наведуваат од ШМК „Дрита“.

Македонија | пред 8 месеци

СДСМ: Платите се 35 отсто од европскиот просек, а цените над 60 проценти – животниот стандард тоне

Животниот стандард на граѓаните постојано опаѓа, платите стагнираат, а цените растат – оцени СДСМ на денешната прес-конференција. Портпаролката на партијата, Богданка Кузеска, истакна дека Владата на Христијан Мицкоски ги запрела политиките на континуирано зголемување на платите што ги водеше СДСМ, доведувајќи ги граѓаните „до точка на преживување“.„Просечната плата во Македонија денеска изнесува само околу 35% од европската просечна плата, односно една третина. Од друга страна, цените достигнуваат над 60% од европскиот просек. Тоа значи дека граѓаните во маркет, на пазар, во продавница плаќаат речиси европски цени, а мора да живеат со трипати пониски плати“, рече Кузеска.Таа посочи дека синдикалната потрошувачка кошничка во август изнесувала 65.507 денари и дека „двајца вработени со минимална плата во едно семејство немаат доволно пари да ги покријат основните месечни трошоци“.„Минималната плата во Македонија е меѓу најниските во Европа и регионот. Во БиХ минималната плата е 511 евра, во Србија 500 евра, во Црна Гора од 600 до 800 евра. Во Македонија, со власта на Мицкоски, минималната плата се држи на дното, иако требаше одамна да достигне 500 евра“, нагласи таа.СДСМ смета дека „погрешните економски политики на оваа влада ги заковаа платите и животниот стандард на дното во Европа“ и критикуваше дека во буџетот од шест милијарди евра нема пари за граѓаните, но има за „луксузирање на функционерите на ВМРО-ДПМНЕ“.Кузеска порача дека потребни се итни мерки:зголемување на сите плати,покачување на минималната плата на 500 евра,укинување на ДДВ за храната, како што предлага СДСМ.„Тоа се единствените реални политики за достоинствен живот на работниците и граѓаните“, рече портпаролката на СДСМ.

Македонија | пред 8 месеци

Хидросистемот Ѓавато се санира, во најскоро време ќе биде целосно функционален и оперативен

Претседателот на Владата, Христијан Мицкоски, изјави дека хидросистемот Ѓавато е во процес на санација и дека во најскоро време ќе биде целосно функционален и оперативен. Тој нагласи дека заедно со заменик-министерката за животна средина и просторно планирање Ане Лашкоска, на лице место ги утврдиле проблемите што со години наназад го попречувале системот да работи со полн капацитет. Мицкоски посочи дека голем дел од цевководите биле оштетени и нефункционални, што предизвикувало значителни загуби на вода.Премиерот истакна дека благодарение на општествено одговорна компанија веќе се пристапило кон санација на цевките и дека се очекува во наредните денови тие да бидат целосно санирани, што ќе овозможи зголемување на количината вода која се носи до резервоарот и понатаму во Дојранското Езеро. Дополнително, тој нагласи дека од предвидениот капацитет на хидросистемот од 1.000 литри во секунда, моментално функционираат само две бунарски пумпи со капацитет од по 100 литри во секунда, додека останатите не се во функција. Планот на Владата е најскоро време да се оспособат уште четири пумпи, а потоа и дополнителни две, со што ќе се достигне целосниот капацитет на системот.„Со тоа не само што ќе се подобри состојбата со Дојранското Езеро, туку ќе се помогне и на земјоделците и на граѓаните во регионот кои во одредени периоди од годината зависат од овој водовод,“ рече Мицкоски. Тој додаде дека Владата ќе донесе одлука фабриката за опрема и делови при склоп на РЕК Битола да ги демонтира и санира потребните пумпи во рок од десет дена.Мицкоски најави и поставување на соларни панели и батериски системи со вкупна моќност од околу 2 мегавати, со што ќе се намалат огромните месечни трошоци за електрична енергија, кои сега изнесуваат околу 200.000 евра. Според него, ова ќе значи заштеда од приближно 2,5 милиони евра годишно, пари кои ќе се користат за одржување на хидросистемот.„Пристапуваме системски, со цел Ѓавато да стане целосно оперативен и функционален во најскоро време,“ истакна премиерот, додавајќи дека години наназад апелите на вработените не биле слушнати од претходните власти.

Македонија | пред 8 месеци

Извештаите за работењето на Стоматолошката комора доставени до Обвинителството

Министерството за здравство ја достави целокупната документација и извештаи од надзорните комисии за работењето на Стоматолошката комора до Јавното обвинителство, за натамошно постапување согласно законските надлежности, потврдија за МИА од Министерството.Станува збор за три извештаи изготвени од комисијата за надзор над законитоста на вршењето на јавното овластување на Комората – од 25 февруари, 15 мај и 21 мај 2025 година. Дополнително, доставено е и известување до Комората од 11 март годинава, како и целосната документација од секторот за стоматолошка здравствена заштита.Од Министерството за здравство за МИА потсетуваат дека, со оглед на тоа што привремено ги презедоа надлежностите за издавање и продолжување лиценци за докторите по стоматологија, потребната документација може да се достави во нивната архива, до секторот за стоматолошка здравствена заштита.

Македонија | пред 8 месеци

Прогласен глад во Газа

Гладот ​​го погоди Појасот Газа и веројатно ќе се прошири во септември, соопшти глобалната иницијатива на IPC, во проценка што ќе го зголеми притисокот врз Израел да дозволи повеќе хуманитарна помош во палестинската енклава разорена од војната.Извештајот за Интегрирана класификација на безбедноста на храната (IPC) вели дека 514.000 луѓе, речиси една четвртина од палестинското население во Газа, страдаат од глад и дека тој број би можел да се зголеми на 641.000 до крајот на септември.Околу 280.000 од погодените луѓе се во северниот регион што го вклучува градот Газа, додека останатите се во Деир ал-Балах и Кан Јунис, централни и јужни области за кои IPC предвидува дека ќе бидат во состојба на глад до крајот на следниот месец.Критериуми за прогласување гладЗа еден регион да биде класифициран како регион во состојба на глад, најмалку 20 проценти од населението мора да страда од екстремен недостиг на храна, при што едно од три деца е акутно неухрането, а две лица од секои 10.000 жители умираат од глад, неухранетост или болест секој ден.Анализата на IPC дојде откако Велика Британија, Канада, Австралија и многу европски земји предупредија дека хуманитарната криза достигнала „незамисливи нивоа“ по речиси две години војна меѓу Израел и Хамас, палестинските милитанти. Генералниот секретар на ОН, Антонио Гутереш, долго време предупредува на „епска хуманитарна катастрофа“ во енклавата со повеќе од два милиони луѓе.Ова е петти пат во последните 14 години IPC - иницијатива во која учествуваат 21 хуманитарна организација, агенции на Обединетите нации и регионални организации, а финансирана од Европската Унија, Германија, Обединетото Кралство и Канада - да идентификува глад.IPC претходно ја процени гладта во областите на Сомалија во 2011 година, Јужен Судан во 2017 и 2020 година и Судан во 2024 година.

Свет | пред 8 месеци

Светската ѕвезда Ник Кејв вечерва во Скопје, музички спекаткл со специјално донесено пијано од Грција

Скопје вечерва со нетрпение го очекува концертот на легендарниот австралиски музичар Ник Кејв, кој ќе настапи во 20 часот на стадионот на АРМ во Градски парк. На сцената ќе му се придружи и Колин Гринвуд, басистот на „Редиохед“, што ќе му даде поинтимен амбиент на настапот.Клучен дел од вечерната магија е пијаното на кое Кејв ќе свири, специјално донесено од Грција за оваа пригода. Организаторите соопштија дека сите фан-пит влезници се веќе распродадени, што е доказ дека скопската публика со огромна возбуда го чека настапот на еден од најголемите музички артисти на 20. и 21. век.фото: YouTube/Print Screen

Магазин | пред 8 месеци

Уште една измама со лажна сообраќајка – тетовчанка оштетена за над 26 илјади евра

Нова измама со добро познатиот метод „лажна сообраќајка“ е пријавена во Тетово.Како што информира МВР, на 21 август 2025 година во 14:40 часот, 79-годишна тетовчанка пријавила дека била измамена од едно лице за сума од 16.000 евра и 10.700 швајцарски франци.Според пријавата, лицето ја контактирало телефонски, се претставило како лекар и ѝ кажало дека нејзината ќерка предизвикала сообраќајна несреќа, при што се здобила со тешки телесни повреди. За итна операција, наводно, биле потребни пари. Жената, верувајќи во измамата, ги фрлила парите од својот балкон на лице кое дошло да ги подигне. Подоцна сфатила дека станува збор за измама.„Се преземаат мерки за расчистување на случајот“, велат од Министерството за внатрешни работи.

Македонија | пред 8 месеци

Муцунски: Градиме нови пријателства, но остануваме верни на НАТО, ЕУ и партнерството со САД

Министерот за надворешни работи и надворешна трговија, Тимчо Муцунски, во интервју за NewsMax Balkans зборуваше за европската интеграција на државата, регионалните прашања, НАТО-членството, партнерството со ЕУ во областа на безбедноста и одбраната, како и за странските инвестиции.Тој нагласи дека Владата активно работи на проширување на меѓународните пријателства, без да ги запостави темелните стратешки приоритети – членството во НАТО, патот кон ЕУ и сојузништвото со САД.Муцунски потсети дека неодамна ја потпишал Заедничката декларација за стратешко партнерство со Велика Британија, како и билатерален договор меѓу двете влади, кој според него има историско значење поради обемот и содржината.„Благодарение на овој договор ќе се реализираат клучни инвестиции во неколку значајни сектори – меѓу кои Коридорот 10, здравствениот систем и дигиталната инфраструктура,“ истакна министерот.Како посебен пример на пријателство, Муцунски го наведе партнерството со Унгарија, кое, како што рече, веќе носи конкретни резултати – инфраструктурни проекти во повеќе општини, значителна финансиска помош за државата и директна поддршка за македонските компании.Министерот потсети дека Владата го потпишала и Договорот за партнерство со Европската Унија во сферата на безбедноста и одбраната. „Веќе е реализирана првата поддршка – Министерството за одбрана доби 20 милиони евра за набавка на опрема значајна за одбраната и безбедноста на државата,“ додаде тој.На крајот од интервјуто, Муцунски ја потенцираше конзистентноста на Владата во однос на меѓународната политика:„Активно работиме на проширување на пријателствата, но без да ги запоставиме нашите приоритети: НАТО-членството, европската интеграција и стратешкото партнерство со САД, кое е клучна гаранција за стабилноста на регионот.“

Македонија | пред 8 месеци

Руски ракети погодија американска фабрика во Украина – пораката на Путин до Трамп е јасна

Политичките пораки ретко се појасни од руските проектили што во ноќта меѓу среда и четврток удрија врз американска фабрика во западна Украина, далеку од фронтот на војната што нема крај.Овој напад е дел од една од најжестоките руски офанзиви со дронови и ракети во последниот месец и јасно покажува што рускиот претседател Владимир Путин мисли за мировните напори на американскиот претседател Доналд Трамп, пренесува CNN.Минатата недела Трамп на Алјаска го пречека Путин со црвен тепих, а Белата куќа говореше за „историски помак“ во мировниот процес. Но, руските бомбардирања продолжуваат, цивили умираат, а Путин не покажува намера да го заврши војувањето. Најавуваниот самит меѓу украинските и руските лидери сè уште е само празно ветување.Според аналитичарите, Москва води стратегија на одложување, надевајќи се дека војската ќе оствари нови добивки на фронтот. Главниот тактичар е министерот за надворешни работи Сергеј Лавров, познат по советските опструкции, кој повторно се обиде да внесе раздор меѓу САД и Европа.Претседателот Володимир Зеленски останува на ставот дека нема да се откаже од Донбас, бидејќи тоа би ја оставило Украина ранлива за идни напади кон Киев. Иако настојува да му угоди на Трамп и да покаже подготвеност за разговори, тој не може да прифати капитулација под маска на компромис.Трамп останува единствениот светски лидер кој може да зборува со двете страни, но неговите пораки често се контрадикторни. На социјалните мрежи најави дека е невозможно да се победи во војна без удари врз земјата-агресор, но само неколку дена претходно избегна да зборува за вклучување на американски сили. Снимен е и како на францускиот претседател Емануел Макрон му вели дека Путин „сака договор за него лично“.Додека Белата куќа зборува за „светло на крајот од тунелот“ и го величи Трамп како „претседател на мирот“, реалноста е дека Русија во новите напади уби девет цивили и рани 19 лица, меѓу кои и во напад на американската фабрика Flex Ltd. „Руските сили точно знаеја каде удираат“, рече Зеленски, истакнувајќи дека целта била американска инвестиција во Украина.Една недела по самитот на Алјаска, ситуацијата е јасна: Путин сака продолжување на борбите, Зеленски не може да попушти, а Европа е немоќна без Америка. Сè зависи од Трамп – дали навистина ќе го отвори патот за мир или ќе остане заробен во сопствените контрадикции.

Свет | пред 8 месеци

(Видео) Херојски подвиг - млад Грк со СУП-даска спаси татко и неговите две деца од давење

Во Епаноми кај Солун викендов се одиграла вистинска драма со среќен крај, кога силните морски струи одвлекле две деца-туристи од Романија и нивниот татко кон отворено море. Случајно, на плажата се нашол млад човек со СУП-даска, кој успеал да го спаси таткото и да спречи трагедија, пренесе „Катимерини“.Инцидентот се случил во неделата попладне на плажата Калогрија. Двете деца, на возраст од 13 и 15 години, биле однесени од морето, а нивниот татко, обидувајќи се да ги спаси, останал целосно исцрпен и во опасност да се удави. Сцената ја забележал Евангелос Папајоану, кој сурфал во областа и веднаш им пришол.„Сурфав во областа и се враќав на брегот кога слушнав вресоци од морето. Се свртев и видов две деца, момче и девојче, во далечината, како повикуваат помош. Се приближив до нив и кога ги прашав што се случува, ми рекоа дека пливаат долго време и дека не можат да излезат“, раскажал Папајоану за грчките медиуми.Тој им објаснил дека пливаат спротивно од струјата и им кажал во која насока да се движат за брановите да им помогнат. „Не можев да повлечам двајца луѓе на даската и кога им реков дека ќе бидам со нив за да излеземе заедно на брегот, ми рекоа: ‘Ајде да одиме, одете да му помогнете на нашиот татко’“, вели Папајоану.„Веднаш почнав да гледам наоколу, но на почетокот не го видов. Се качив на даската и потоа го видов две или три секунди, бидејќи тонеше и се враќаше на површината“, опишува младиот херој.„Беше полусвесен, во паника, во шок. Не можеше да дише. Штом ме виде, малку се крена, ја зграпчи даската, но не можеше добро да се држи, се лизгаше, кашлаше и повраќаше вода. Го држев за рацете некое време за да може да се потпре на даската, бидејќи немаше сила, човекот беше целосно исцрпен“, додаде тој. По пет минути таткото се соземал, па заедно со Папајоану успеале да излезат на брегот.На плажата ги чекале децата, кои веќе успеале да испливаат и со прегратки му се заблагодариле на спасителот.„Јас и моите пријатели веќе бевме подготвени да тргнеме. Веќе бев на едно возење со даската и во последен момент решив да ја извадам камерата од автомобилот и да одам на друго возење за да снимам видео и да му го испратам на еден пријател. Оваа приказна се случи затоа што доцнев пет до десет минути до автомобилот“, вели Папајоану, додавајќи дека неговото присуство било „чиста среќа и случајност“.

Свет | пред 8 месеци

Нов асфалт и инфраструктура во село Никиштани, Ѓорче Петров нема заборавени места, вели Стојкоски

Општина Ѓорче Петров започна со градежни активности во селото Никиштани, каде што ќе се изградат нови асфалтни површини на две улици со вкупна големина од 1.500 квадратни метри.Градоначалникот Александар Стојкоски денеска беше во посета на месното население и најави дека за прв пат општината интервенира на дел од главната улица што ја поврзува џамијата со центарот на селото, а која ќе обезбеди и подобра поврзаност со локалните патишта.„Најголемиот инвестиционен проект за Никиштани е реконструкцијата на главниот пат што го поврзува селото Орман со Никиштани. Тој ќе добие целосно нов лик, ќе биде проширен, ќе се изгради пешачка патека и ќе се постави ново улично осветлување,“ изјави Стојкоски.Со оваа инвестиција, како што нагласуваат од Општината, се потврдува заложбата за рамномерен развој и вложување во сите населени места на Ѓорче Петров.

Скопје | пред 8 месеци

Само Чаирчанец може да го спаси Скопје, вели Апасиев за кандидатурата на Мециновиќ за Град Скопје

Претседателот на Левица, Димитар Апасиев, денеска го промовираше кандидатот на партијата за градоначалник на Град Скопје – пратеникот Амар Мециновиќ. Кратко по прес-конференцијата објави и фотографија.„Само Чаирчанец може да го спаси Скопје“, напиша Апасиев, кој претходно најави дека Левица на овие локални избори ќе настапи со рекорден број кандидати.Партијата, како што истакна лидерот, ќе има над 20 кандидати за градоначалници низ државата и повеќе од 62 советнички листи„Ова покажува дека Левица прераснува од мала во средно-голема политичка партија,“ рече Апасиев.

Коментари | пред 8 месеци

Ќе побара ли Апасиев од Мециновиќ да го врати пратеничкиот мандат? ВМРО-ДПМНЕ му бара да биде доследен на изјавата од пред четири години

Лидерот на Левица, Димитар Апасиев, во 2021 година побара сите пратеници кои се кандидираат за градоначалници да си поднесат оставки од пратеничката функција. Сега, кога Амар Мециновиќ се кандидираше за градоначалник на Скопје, ВМРО-ДПМНЕ го праша лидерот на Левица, дали ќе побара актуелниот пратеник да го врати мандатот.„Дали Апасиев ќе побара од Мециновиќ да си поднесе оставка од пратеник сега кога се кандидираше за градоначалник, како што бараше претходно? Очекуваме Апасиев да остане доследен до себе и да побара Мециновиќ да си поднесе оставка, велат од ВМРО-ДПМНЕ.Инаку, Мециновиќ денеска беше претставен како кандидат на Левица за градоначалник на Скопје, на престојните локални избори.

Македонија | пред 8 месеци

(Видео) Дојавата за бомба во парламентот на Република Српска, каде се дискутираше за референдумот за Додик

Седницата на Народното собрание на Република Српска, закажана за изјаснување околу предлогот за организирање референдум, беше одложена поради дојава за бомба. Заседанието, кое требаше да почне во 10 часот, беше прекинато додека специјализирани полициски тимови го проверуваа просторот.„Во 10:07 стигна известување до службите на Народното собрание дека е поставена експлозивна направа и моравме да извршиме целосна евакуација“, изјави генералниот секретар на парламентот, Борана Босанчиќ.Владејачката коалиција, предводена од Сојузот на независни социјалдемократи (СНСД) на Милорад Додик, предложи Собранието да ја усвои оставката на премиерот Радован Вишковиќ, поднесена оваа недела, како и да донесе одлука за распишување референдум. На референдумот, граѓаните би се изјасниле дали треба да се почитува пресудата на Судот на БиХ со која Додик беше осуден на една година затвор, како и одлуката на Државната изборна комисија за одземање на неговиот мандат како претседател на РС.Хрватскиот европратеник Давор Иво Штир, известувач за БиХ во Европскиот парламент, оцени дека ваквите маневри на Додик се одамна видена тактика.„Додик повеќепати најавуваше референдуми и непризнавање на институциите на БиХ, за потоа сепак да ги признае. Ако продолжи да ја оспорува државноста, тоа не може добро да заврши – ни за него, ни за оние што го следат. Ако мислеше дека по победата на Доналд Трамп во САД ќе има простор за таква политика, се прецени. Тоа веќе се покажа неколку пати и ако продолжи, ќе ја влоши ситуацијата“, изјави Штир за сараевското „Ослобоѓење“.Во Република Српска досега е одржан само еден референдум – во септември 2016 година, за тоа дали 9 јануари ќе продолжи да се одбележува како „ден на РС“, и покрај одлуката на Уставниот суд на БиХ кој тоа го забрани. На тој референдум, кој беше оценет како нелегитимен, излегле околу 55% од регистрираните гласачи, а речиси сите што гласале, одговориле потврдно.

Свет | пред 8 месеци

Османи со националистички пораки во Чаир: „Не е лапсус – сакаат укинување на Рамковниот договор“

Кандидатот за градоначалник на Чаир од ДУИ, Бујар Османи, промовирајќи што ќе прави со општината, повторно се осврна на националистички прашања. Тој промовира теза дека се спрема укинување на Рамковниот договор. Ова доаѓа откако министерот за правда, Игор Филков рече „Бадентеровото мнозинство се злоупотребува, можеби е дојдено време да се ревидира“, а премиерот Христијан Мицкоски возврати: „Рамковниот договор е исполнет во целост и тоа е завршена тема“. Османи најави мобилизација, обвинувајќи дека „Македонија станува дел од српскиот свет“.„Јас мислам дека тоа не е лапсус и не е случајно, дека е дел од стратегијата на премиерот да бара од министрите да најават теми кои се многу проблематични, за потоа со празни деманти да балансира. Целта е во јавност да се пушти пробен балон, да се релативизира темата, да се навикне увото на граѓаните на таквата тема и еден ден како што направија со многу столбови на Рамковниот како јазикот, правото на одлучување на Албанците - да го поништат. Едно да кажам, нема да дозволат Албанците поништување на Рамковниот договор. Ова ќе нѐ најде мобизирани“, рече Османи.Според Османи, 461 пратеник од Европскиот парламент изгласале извештај според кој Македонија станува дел од српскиот свет.„Елементите на српскиот свет го фаќаат системот. Ова е изолација од ЕУ, станување дел од српскиот свет, кој е прокси на рускиот свет. Иднината на државата е загрозена“, рече Османи.

Македонија | пред 8 месеци

Амар Мециновиќ е кандидат за градоначалник на Скопје од Левица, Апасиев најави рекорден број кандидати на локалните избори

Претседателот на Левица, Димитар Апасиев соопшти дека кандидатот за градоначалник за Град Скопје од нивната партија ќе биде Амар Мециновиќ.„Левица ќе настапи со рекорден број на кандидати. На минатите избори имавме осум кандидати, оваа година ќе одиме со преку 20. Претходно имавме 38 советнички листи, а оваа година ќе одиме над 62. Ова покажува дека Левица прераснува од мала во средно-голема политичка партија. Почнуваме со претставување на кандидатот на градоначалник за Град Скопје, место кое ќе биде за најглавен мегдан“, рече Апасиев.Мециновиќ кажа кои ќе бидат негови приоритети, потсети дека бил и советник во Градот. Посебен фокус стави на јавниот транспорт, градската чистота, Генералниот урбанистички план, борбата со загадениот воздух.„Левица сака да ги обедини сите кои се против ВМРО-ДПМНЕ и СДСМ. Јавниот превоз ќе ни биде првиот примарен приоритет за кој ќе се залагаме. На нивна страна се парите и моќта, а за она што ние го нудиме тие немаат одговор. Ова е наша борба и наша приказна, за нашето Скопје. За граѓаните треба да биде јасно дека гласаат за политичка волја, која ни пресуди ние сега да немаме автобуси“, рече Амар Мециновиќ, кандидат за градоначалник на Центар.Мециновиќ влезе во трката со Орце Ѓорѓиевски кандидат на ВМРО-ДПМНЕ и Каја Шукова кандидатка на СДСМ.

Скопје | пред 8 месеци