АЛБАНИЈА

Транспарент „Скопје е со Албанија“ на протест во Скопје, Муамеди реагира: Македонците ќе даваат поддршка, но со знамиња на Македонија

Граѓаните во Албанија трет ден по ред излегоа на улиците на Тирана во знак на протест против планираниот луксузен туристички комплекс на албанското крајбрежје, проект што е поврзан со американскиот инвеститор Џаред Кушнер, зет на американскиот претседател Доналд Трамп.Демонстрантите бараат стопирање на проектот во заштитеното подрачје Звернец, предупредувајќи на можни сериозни еколошки последици.Поддршка за протестите пристигна и од Македонија. Неколку граѓани од Скопје во четврток напладне протестираа пред Амбасадата на Албанија. На собирот беа забележани транспаренти со пораки „Скопје е со Албанија“ и „Немаме земја за да му ја продаваме на кој било“, додека дел од учесниците носеа и симболи со фламинга, како предупредување за можната штета врз природниот екосистем.Во меѓувреме, реакција на социјалните мрежи имаше Ујмер Муамеди, кој го критикуваше присуството на дел од учесниците од Македонија.„Денес се собрале неколку луѓе, меѓу кои и Рамадан Рамадани, кој еднаш протестира за џамија, еднаш против црква, еднаш за Албанија, еднаш за Турција, еднаш беше со Бранко, па после со Заев итн., нормално без македонско знаме, да даваат поддршка за протестите во Албанија. Не во наше име! Македонците ќе даваат поддршка за младите во Албанија, но тоа ќе се прави на цивилизиран начин со знамиња на Македонија. Албанците во Албанија се цивилизирани луѓе и не прифаќаат некој што не ја почитува сопствената држава да им даде поддршка“, напиша Муамеди.

Македонија | пред 16 часа

Европскиот Тајланд се наоѓа во Албанија: Скриениот бисер што го освојува интернетот

Реката Шала во северна Албанија станува една од најпосетуваните природни атракции во регионот благодарение на тиркизната вода, планинскиот пејзаж и недопрената природа што ја опкружува. Поради нејзината егзотична убавина, многумина ја нарекуваат „европски Тајланд“.Албанија во последните години бележи раст на туристичкиот интерес како подостапна алтернатива на многу медитерански дестинации. Покрај популарните летувалишта како Ксамил и Саранда, сè поголемо внимание привлекуваат и помалку познатите природни локации.Една од нив е Луми и Шалес, живописна увала на реката Шала, чии фотографии и видеа станаа вистински хит на социјалните мрежи, особено на TikTok.Патеписната блогерка Ели од блогот „The Ginger Wanderlust“ ја опишува Луми и Шалес како едно од најубавите места во Албанија и врвно доживување од нејзиното патување низ земјата.До оваа природна оаза може да се стигне преку еднодневни екскурзии од Тирана или од Скадар. Од Тирана патувањето трае околу четири часа, додека од Скадар посетителите најпрво патуваат со минибус до Команското Езеро, а потоа следува приближно еден час пловидба со брод до увалата.Поради ограничената инфраструктура, пристапот понекогаш може да биде предизвик, особено во летниот период кога нивото на водата опаѓа и делови од коритото мора да се преминуваат пеш.На бреговите на реката се изградени дрвени мостови што ги поврзуваат сместувачките капацитети, а цените за ноќевање во екот на сезоната започнуваат од околу 40 евра. Посетителите можат да изнајмат лежалки и чадори, а на располагање им се и активности како зип-лајн, кајакарење, нуркање и планинарење.Со својата комбинација од кристално чиста вода и спектакуларна природа, Реката Шала сè почесто се наоѓа на листата на најатрактивни туристички дестинации на Балканот.

Магазин | пред 21 час

Додека растат протестите, Иванка Трамп зборува за ресортот на Сазан: „Тоа е приватен остров“

Додека во Албанија се засилуваат протестите против изградбата на луксузни туристички комплекси поврзани со Џаред Кушнер, сопругата на американскиот инвеститор и ќерка на претседателот Доналд Трамп, Иванка Трамп, јавно зборуваше за амбициозниот проект на островот Сазан, опишувајќи го како еден од најзначајните во нивната кариера.Во интервју за британски медиум, Иванка Трамп откри дека идејата за развој на островот се родила откако таа и Кушнер случајно го посетиле Сазан за време на пловење по Медитеранот.„Тоа е неверојатен приватен остров со огромен потенцијал. Сакавме архитектурата целосно да се вклопи во природата и да биде дел од неа“, изјави Иванка.Преку компанијата „Афинити партнерс“, Кушнер планира развој на две локации во Албанија – островот Сазан и полуостровот Звернец. Проектите предвидуваат изградба на луксузни вили, хотели, ресторани и приватни пристаништа, а инвестицијата се проценува на околу 1,4 милијарди долари.Сепак, плановите предизвикаа силни реакции кај локалното население и еколошките организации. Според критичарите, проектите се реализираат во чувствителни природни подрачја и може да имаат сериозни последици врз животната средина.Организациите за заштита на природата предупредуваат дека изградбата може да ги загрози живеалиштата на ретки и заштитени видови птици, морски желки и други животни во регионот на лагуната Вјоса-Нарта и Звернец.Незадоволството дополнително се зголеми по измените на албанскиот Закон за заштитени подрачја во 2024 година, со кои беше овозможена изградба на стратешки туристички проекти во дел од заштитените зони. Противниците тврдат дека законските измени биле донесени токму за да се овозможи реализација на проектите поврзани со Кушнер.Албанската влада, предводена од премиерот Еди Рама, останува на ставот дека инвестициите ќе донесат економски развој, нови работни места и ќе ја зацврстат позицијата на земјата како атрактивна туристичка дестинација.Во меѓувреме, протестите продолжуваат, а еколошките организации и дел од локалното население најавуваат дека ќе продолжат да се спротивставуваат на проектите сè додека не се преиспита нивното влијание врз природата и јавниот интерес.

Балкан | пред 2 дена

„Албанија не е на продажба“ – масовни протести поради проектот на зетот на Трамп

Планираната изградба на луксузен туристички комплекс на албанскиот остров Сазан предизвика силни реакции во јавноста, а проектот поврзан со Џаред Кушнер, зет на американскиот претседател Доналд Трамп, веќе е предмет на истрага од надлежните институции.Илјадници граѓани протестираа на улиците во Тирана, изразувајќи незадоволство од инвестицијата за која стравуваат дека може да има сериозни последици врз животната средина и да отвори простор за коруптивни практики. Демонстрантите носеа транспаренти со пораки „Албанија не е на продажба“ и „Иванка, оди си дома“, алудирајќи на Иванка Трамп, сопруга на Кушнер.Главното барање на протестите е целосно запирање на проектот на островот Сазан, кој со децении бил користен како воена база и претставува чувствителна локација од безбедносен и еколошки аспект.Во меѓувреме, албанското Специјално обвинителство за борба против корупција и организиран криминал отвори истрага за околностите под кои се реализира проектот.Компанијата „Atlantic Incubation Partners LLC“, зад која стои Кушнер, планира инвестиција вредна околу 1,4 милијарди евра. Критичарите сметаат дека семејството Трамп ја користи својата политичка тежина за остварување деловни интереси, додека поддржувачите на проектот тврдат дека тој ќе придонесе за економски развој и зголемување на туристичкиот потенцијал на земјата.Албанската влада претходно му додели на проектот статус на „стратегиска инвестиција“, со што беше забрзана постапката за негово одобрување. Владата на премиерот Еди Рама веќе подолг период се обидува да привлече големи странски инвестиции во туристичкиот сектор како дел од стратегијата за економски раст.Сепак, противниците на проектот најавуваат дека протестите ќе продолжат сè додека не биде преиспитана целата постапка и не се разјаснат сите сомнежи поврзани со инвестицијата.

Балкан | пред 2 дена

Ципрас му возврати на Рама: Не ја мешајте заштитата на малцинствата со национализам

Поранешниот грчки премиер Алексис Ципрас му возврати на албанскиот премиер Еди Рама, откако Рама го обвини за национализам поради неговите критики за третманот на грчкото малцинство во Албанија.Спорот избувна по повредувањето на припадник на грчкото етничко малцинство за време на протест во јужна Албанија. Ципрас побара албанските власти да ги заштитат правата на грчката заедница, по што Рама реагираше со остра порака на социјалните мрежи.Во објава на платформата Икс, Рама оцени дека Ципрас покажал „рефлекси од минатото“ и се обидува да собира политички поени преку избрзани заклучоци за соседите и нивните суверени институции.Ципрас, пак, одговори дека изјавите на Рама се дадени „во жарот на моментот“ и потсети на Преспанскиот договор како доказ за неговата посветеност на решавање чувствителни национални прашања преку дијалог.„Нашата работа, напори и борби за промоција на мирот и соработката во регионот, вклучително и историскиот Преспански договор, не оставаат простор некој јавно да ми држи лекции што значи национализам или што претставува левицата во 21 век“, порача Ципрас.Тој нагласи дека не треба да се меша патриотската должност за заштита на правата на националните малцинства со националистичките тенденции кои, според него, повторно земаат замав во светот.Инцидентот што ја предизвика расправијата се случил во областа Звернец во јужна Албанија, каде граѓани протестирале против плановите за изградба на голем туристички комплекс во еколошки чувствителна зона.Проектот се поврзува со Џаред Кушнер, зет на американскиот претседател Доналд Трамп.Рама ја обвинил приватната агенција за обезбедување за насилството врз демонстрантите и повредувањето на еден од учесниците, но истовремено силно го бранеше проектот вреден четири милијарди евра, оценувајќи дека ќе донесе туристи со висока платежна моќ и нови работни места за локалното население.

Свет | пред 2 дена

Рама го брани спорниот туристички проект поврзан со семејството Трамп

Контроверзниот туристички проект во Звернец, во кој се споменуваат и потенцијални инвестиции од Иванка Трамп и Џаред Кушнер, повторно ја разбранува јавноста во Албанија по протестите и инцидентите што се случија во текот на викендот.Албанскиот премиер Еди Рама ги бранеше плановите за изградба на туристички комплекс вреден околу четири милијарди евра во крајбрежната област Звернец во регионот Валона, проект кој предизвика силни реакции кај екологистите и локалното население.Проектот е поврзан со потенцијални инвестиции од Иванка Трамп и нејзиниот сопруг Џаред Кушнер, што дополнително го зголеми меѓународното внимание кон случајот.Рама ги осуди инцидентите што се случија за време на протестите во текот на викендот, при што беше повреден грчки државјанин. Албанскиот премиер одговорноста за судирите ја префрли врз приватното обезбедување, ангажирано во областа.И покрај критиките, Рама останува на ставот дека инвестицијата ќе придонесе за економски развој, отворање нови работни места и привлекување туристи со висока платежна моќ.Сепак, проектот се планира во еколошки чувствителна зона, која опфаќа лагуна и природни живеалишта на голем број видови птици. Поради тоа, еколошките организации и дел од локалното население жестоко се спротивставуваат на изградбата.Меѓу противниците на проектот има и припадници на грчкото малцинство во Албанија, кои изразуваат загриженост за заштитата на природата и сопственичките права во областа.По инцидентите реагираше и грчкото Министерство за надворешни работи, кое изрази сериозна загриженост за насилството и ја поврза ситуацијата со процесот на европска интеграција на Албанија.Во соопштението од Атина се нагласува потребата од целосно почитување на владеењето на правото, заштита на правата и имотот на припадниците на грчкото малцинство, како и зачувување на природните подрачја во согласност со европските стандарди.Албанското орнитолошко друштво, една од највлијателните организации за заштита на природата во земјата, остро се спротивставува на проектот и најави нов протест против изградбата во текот на претстојниот викенд.Спорот околу Звернец се претвора во едно од најконтроверзните прашања во Албанија, отворајќи дебата за балансот меѓу економскиот развој, странските инвестиции и заштитата на животната средина.

Балкан | пред 3 дена

Рама му возврати на Ципрас: Оставете ги „рефлексите од минатото“ и националистичката реторика

Албанскиот премиер Еди Рама остро реагираше на ставовите на новата грчка левичарска партија на Алексис Ципрас, обвинувајќи ја дека од изолиран инцидент направила политичко прашање и дека се потпира на „рефлекси од минатото“, пренесе Екатимерини.Во отворено обраќање на социјалните мрежи до својот „стар пријател“ Ципрас, Рама изрази зачуденост што новата партија брзо го поврзала инцидентот во Звернец со наводни прекршувања на правата на грчкото малцинство во Албанија и со европската интеграција на земјата.Повод за реакцијата беше соопштение на грчката партија ЕЛАС, која побара од Атина да реагира по повредувањето на грчки државјанин за време на протест против туристички проект во јужна Албанија. Проектот, според медиумските извештаи, се поврзува со инвестиции во кои е вклучен и зетот на американскиот претседател Доналд Трамп, Џаред Кушнер.Рама нагласи дека инцидентот не се случил за време на мирен протест за имотни права, туку во атмосфера на дезинформации и обиди за попречување на законски активности на меѓународни инвеститори кои работеле на приватно земјиште стекнато во согласност со албанските закони.Тој посочи дека властите веднаш реагирале, при што биле уапсени одговорните лица од приватното обезбедување, и била одземена лиценцата на компанијата и бил разрешен директорот на полицијата во Валона.„Не е ниту праведно ниту одговорно еден изолиран инцидент да се претставува како доказ за прекршување на малцинските права, имотните права или владеењето на правото“, порача Рама, додавајќи дека таквиот пристап не е во духот на европските вредности.Албанскиот премиер истакна дека грчкото национално малцинство во Албанија претставува „богатство“ за државата и дека ужива исти права и заштита како и сите други граѓани.Во пораката до Ципрас, Рама оцени дека на Европа ѝ се потребни помалку „рефлекси од минатото“, а повеќе доверба во фактите, институциите и добрососедските односи. Истовремено, му посака успех на поранешниот грчки премиер на претстојните избори, изразувајќи надеж дека неговото ново политичко движење нема да прибегнува кон националистичка реторика и брзи заклучоци за соседните држави.

Свет | пред 3 дена

(Видео) Протести во Албанија против проектот на зетот на Доналд Трамп – демонстрантите бараат оставка од Еди Рама

Незадоволството поради изградбата на луксузен туристички комплекс во заштитено крајбрежно подрачје ги извади граѓаните на улиците во Албанија. Стотици демонстранти вчера протестираа против проектот што медиумите го поврзуваат со Џаред Кушнер, зет на американскиот претседател Доналд Трамп, објави „Си њуз“.Жителите се обиделе да влезат во ограденото градилиште, тврдејќи дека нивните имоти биле неправедно одземени преку процес на експропријација.Демонстрантите побараа и оставка од албанскиот премиер Еди Рама, обвинувајќи дека неговата влада го овозможила проектот преку измени на Законот за заштитени подрачја, усвоени во парламентот во февруари 2024 година.Со тие измени, заштитените зони во Албанија биле отворени за изградба на туристички комплекси со пет ѕвезди. Критичарите тврдат дека законските измени биле направени токму за реализација на проектот што се поврзува со Кушнер.Проектот, чија вредност според локалните медиуми се проценува на околу четири милијарди долари, односно 3,43 милијарди евра, опфаќа приближно 250 хектари во рамките на мочуришниот и лагунскиот екосистем Нарта–Звернец.Поради тоа, проектот наиде на силно противење од локални и меѓународни организации за заштита на животната средина.Инвеститорот, пак, тврди дека сите активности ќе се спроведуваат согласно законските процедури и дека инвестицијата ќе отвори повеќе од 10.000 работни места. Од компанијата предупредија и дека ќе преземат правни мерки против секој што ќе се обиде да го попречи проектот.Според албанскиот деловен регистар, компанијата „Звернец Саут Адријатик Девелопмент“, основана во август 2024 година, е во сопственост на холандската компанија „Јуниверзал Пропертис Проџектс БВ“. Локални и меѓународни медиуми тврдат дека компанијата е поврзана со Кушнер.Во јануари 2024 година, Џаред Кушнер и неговата сопруга Иванка Трамп, ќерка на Доналд Трамп, ја посетија Албанија за да го промовираат проектот за изградба на луксузен туристички комплекс.Активистите најавија дека протестите ќе продолжат и денес.Џаред Кушнер минатата година ја објави и својата намера да изгради луксузен хотел вреден 500 милиони долари на локацијата на зградата на Генералштабот во Белград, оштетена за време на НАТО-бомбардирањето во 1999 година. Проектот подоцна беше повлечен по бројните протести и критики во јавноста.Во меѓувреме, српското Обвинителство за организиран криминал поднесе обвинение против министерот за култура Никола Селаковиќ, секретарката на Министерството за култура Славица Јелача, вршителот на должност директор на Републичкиот завод за заштита на спомениците на културата Горан Васиќ и вршителот на должност директор на Заводот за заштита на спомениците на културата на град Белград, Александар Ивановиќ.Обвинението се однесува на наводни незаконитости при отстранувањето на статусот на културно добро од зградата на Генералштабот, објект кој за многу граѓани на Србија претставува симбол на настаните од 1999 година.

Настани | пред 3 дена

(Видео) Генералниот секретар на ВМРО-ДПМНЕ, Ковачки, говореше и на албански јазик на собир на Демократската партија

Генералниот секретар на ВМРО-ДПМНЕ, Драган Ковачки, присуствуваше на националното собрание на Демократската партија на Албанија, каде што кусо во воведот се обрати и на албански јазик, пренесувајќи поздрави од лидерот на партијата и премиер, Христијан Мицкоски.Ковачки соопшти дека присуствувал на настанот на покана од сестринската партија од Република Албанија и нагласил дека иднината на регионот треба да се гради врз заеднички вредности.Тој порача дека земјите од регионот треба да бидат дел од Европската Унија како рамноправни партнери.„Истакнав дека нашето место е во ЕУ, не понижени, туку како еднакви партнери“, наведе Ковачки.Во своето обраќање, тој се осврна и на односите меѓу Македонија и Албанија.„Македонско-албанското пријателство не е дипломатска фраза, туку е географска, историска и цивилизациска реалност“, порача генералниот секретар на ВМРО-ДПМНЕ.

Македонија | пред 5 дена

„Албанија е со Скопје“: Во Тирана ќе протестираат за правосудниот испит на албански јазик во Македонија

Студенти од Албанија најавија протест во Тирана на 26 мај, во поддршка на студентите Албанци од Македонија кои бараат правосудниот испит да може да се полага и на албански јазик.Според најавите објавени во албанските медиуми, протестот ќе започне во 17 часот во центарот на Тирана, по што демонстрантите ќе маршираат до Амбасадата на Македонија во албанската престолнина.Организаторите за слоган го избрале „Албанија е со Скопје“, нагласувајќи дека сакаат да испратат „порака за единство и поддршка на Албанците преку границите“.Студентите Албанци од неколку универзитети во Македонија веќе подолг период бараат завршните испити по право да можат да ги полагаат на албански јазик.Нивното барање не доби позитивен одговор од Министерството за правда, по што следуваа и протести во Скопје.Првиот протест беше одржан на 6 април, кога властите најавија дека ќе се бара решение за проблемот. Втор протест се одржа на 18 мај во центарот на Скопје.На протестот во Скопје беа носени албански, американски и знамиња на Европската Унија, а дел од демонстрантите извикуваа и „УЧК“. Имаше и транспаренти со пораки „Знаењето нема забранет јазик“, „Овој јазик има маченици зад себе“ и „Политиката го зароби Уставниот суд“.Во меѓувреме, Владата најави дека во рок од една недела ќе претстави решение за правосудниот испит, а заменик-премиерот Беким Сали изјави дека се работи и на поширок пакет за слични прашања.

Македонија | пред 2 седмици

Рама: Порано Албанија беше „Северна Кореја на Европа“, денес е на пат кон ЕУ

Премиерот на Албанија, Еди Рама, изјави дека неговата земја во минатото била „Северна Кореја на Европа“, но денес се движи по патот кон Европската Унија.Говорејќи на Азиската лидерска конференција во Сеул, Рама посочи дека Албанија покажува дека демократски институции можат да се изградат и покрај тешкото историско минато и долгогодишната изолација.„Албанија беше Северна Кореја на Европа, а денес оди по поинаков пат – пат на градење институции, демократска модернизација и интеграција во Европската Унија“, рече Рама.Тој ја спореди трансформацијата на Јужна Кореја со развојот на Албанија, оценувајќи дека отвореноста, стабилната демократија и иновациите се клучни за напредокот.Во рамките на посетата, Рама се сретнал и со јужнокорејскиот премиер Ким Мин-сеок, при што разговарале за соработка меѓу двете држави во повеќе области.Пред две недели, Европскиот парламент даде поддршка за европската иднина на Албанија и Црна Гора, оценувајќи дека Тирана бележи напредок во реформите, но дека остануваат предизвици поврзани со владеењето на правото, корупцијата и организираниот криминал.Албанија има цел да ги заврши пристапните преговори со ЕУ до крајот на 2027 година.

Балкан | пред 2 седмици

(Видео) Протести во Тирана: Судир меѓу полицијата и демонстрантите, фрлани молотови коктели, уапсени три лица

Насилни инциденти го одбележаа и осмиот протест на Демократска партија на Албанија и обединетата опозиција на платото пред Владата, со барање за заминување на премиерот Еди Рама и распишување нови избори.Судирите меѓу демонстрантите и полицијата, како и молотовите коктели, не изостанаа, додека полициските сили до крај го спроведоа својот план да не дозволат марш низ улиците на Тирана.За време на судирите беа регистрирани повеќе насилни инциденти, при што кон полициските службеници биле фрлани камења, огномет и молотови коктели. Како одговор на ситуацијата, полицијата интервенирала со воден топ за да ги растера собраните.На протестите биле уапсени три лица.Протестот започнал со слаба посетеност, делумно и поради дождот, без говорница, додека насобраните повеќе од 30 минути стоеле пред Владата слушајќи „невидлив“ говорник кој упатувал пораки против владата и нејзиниот лидер Еди Рама.И додека продолжението на протестот подразбирало марш кон Министерството за внатрешни работи, полицијата не се согласила со организаторите.Неколку метри од зградата на Владата, полициски кордон не им дозволил на учесниците да поминат, со образложение дека дозволата не била издадена за марш, туку само за протест пред Владата.Таму избувнал судир меѓу двете страни, додека пратениците од опозицијата се обидувале да го пробијат кордонот, а водениот топ од цистерната поставена зад единиците на специјалната полиција веднаш почнал да ги прска.Лидерот на демократите Сали Бериша ја обвини државната полиција за извршување „тежок злостор“, бидејќи го запрела маршот на демонстрантите со употреба на воден топ и полициски кордон поставен кај Министерството за внатрешни работи.„Ќе добијат заслужен одговор. Денеска извршија тежок злостор. Еди Балуку и Љуби Рама немаат место пред законот“, изјави Бериша.

Свет | пред 3 седмици

Обвиненија за капетанот и офицерот по потонувањето на товарниот брод од Албанија

Грчките надлежни служби поднесоа обвиненија за небрежност против капетанот и дежурниот офицер на товарниот брод Corsage C, кој потона во Егејското Море кај северниот дел на островот Андрос.Според досегашните информации, бродот пловел под знаме на Вануату и бил управуван од турска компанија. На патување од Хрватска кон Украина, носел околу 3.000 тони сода, кога удрил во карпи и потонал. На бродот имало девет членови на екипажот – осум турски државјани и еден државјанин на Азербејџан – и сите се извлечени без повреди.Капетанот (52) и дежурниот офицер (32) – двајцата турски државјани – се соочуваат со обвиненија што, меѓу другото, се однесуваат на небрежност. Причините за несреќата сѐ уште се предмет на истрага, а надлежните наведуваат дека временските услови во моментот биле поволни.Паралелно со кривичната постапка, во тек е голема операција за спречување еколошка штета. Бродот во резервоарите имал гориво, па е активиран план за превенција од можни истекувања. На местото на потонувањето пристигнале специјализирани пловила за чистење испратени од пристаништето Рафина, а околу локацијата е поставена пловечка брана за да се задржи евентуално гориво и да се спречи да стигне до бреговите на Андрос или до блиските острови.Во првичната спасувачка акција биле ангажирани повеќе патролни чамци, трговски бродови што се нашле во близина, рибарски брод, како и хеликоптер на воздухопловството. Двајца членови на екипажот биле извлечени од морето, а останатите биле преземени на копно.

Свет | пред 4 седмици

Товарен брод од Албанија се насукал и потонал кај Андрос – целиот екипаж спасен

Товарен брод под знаме на Вануату потонал откако се насукал северно од грчкиот остров Андрос, соопштија грчките власти. Инцидентот се случил кога пловилото удрило во карпест предел, по што добило сериозни оштетувања и за кратко време завршило под вода.Според информациите од надлежните служби, бродот пловел од Албанија кон Украина и превезувал околу 8.000 тони сода. Во моментот на несреќата на пловилото имало девет члена екипаж – осум државјани на Турција и еден државјанин на Азербејџан.Спасувачката акција ја координирала грчката крајбрежна стража. Две лица биле извлечени директно од морето, а останатите седум биле евакуирани од непристапна карпа со помош на спасувачки тимови, пловила што учествувале во операцијата и хеликоптер на военото воздухопловство.Екипажот бил пренесен во пристаништето на Андрос, а првичните информации говорат дека сите спасени се во добра здравствена состојба.Надлежните служби најавија истрага за да се утврдат точните околности и причините што довеле до насукувањето и потонувањето на бродот.

Свет | пред 4 седмици

Албанија и САД потпишаа 20-годишен договор за течен природен гас

Албанија и Соединетите Американски Држави потпишаа долгорочен договор од 20 години за снабдување со течен природен гас, во зделка вредна околу шест милијарди долари.Според договорот, американската компанија Venture Global и фирмата Aktor LNG USA ќе обезбедуваат извоз на американски течен гас кон Албанија. Овој чекор е дел од пошироката стратегија на Вашингтон за зајакнување на своето присуство во енергетскиот сектор во Југоисточна Европа.Со договорот се предвидува и поддршка за развој на гасна инфраструктура во регионот, што вклучува и проекти за транспорт на гас преку терминали во соседните земји и поврзување со пошироката европска мрежа за снабдување со енергенси.Енергетската соработка се оценува како значаен чекор кон диверзификација на изворите на гас во Европа и намалување на зависноста од традиционалните снабдувачи, при што Балканот станува сè поважна транзитна и енергетска зона.

Свет | пред 1 месец

(Фото) Рама објави фотографии од велигденска поворка во Корча

Албанскиот премиер Еди Рама сподели фотографии од велигденската процесија на Епитафот во градот Корча, по повод одбележувањето на Велики петок.Објавата е придружена со кратка порака и симболика поврзана со празникот.„Korçë🪺⛪️ Procesioni i Epitafit #Pashkë2026 🤍“, напиша Еди Рама.Процесијата на Епитафот е дел од традиционалните православни обичаи за Велики петок, кога верниците со поворки го одбележуваат Христовото страдање, во пресрет на Велигден.

Свет | пред 1 месец

Колони на Ќафасан: Албанците доаѓаат по поевтино гориво и храна во Македонија

Зголемената фреквенција на граничниот премин „Ќафасан“ ја покажува разликата во цените меѓу Македонија и Албанија, поради што граѓани од пограничните области масовно доаѓаат да купуваат гориво и основни намирници.Најголем интерес има за нафтени деривати и прехранбени производи, кои се поевтини во Македонија, а граничниот премин секојдневно бележи зголемен проток, особено за време на викендите.Според информации објавени од „Еуроњуз Албанија“, денеска биле создадени долги колони, при што за премин биле потребни и над два часа. Слична состојба е забележана и на преминот Какавија кон Грција.Експертите посочуваат дека ваквите движења се резултат на разликите во акцизите, даночните политики и инфлацијата, а во услови на глобални поскапувања трендот дополнително се засилува.Премиерот Христијан Мицкоски најави дека утре ќе се одржи вонредна владина седница на која ќе се разгледува намалување на акцизите за горивата, со цел да се спречи дополнително поскапување.„Имаме доволно количини и нема потреба од ограничувања. Дел од граѓаните од соседството веќе доаѓаат кај нас и ги полнат резервоарите“, изјави Мицкоски.

Македонија | пред 2 месеци

(Видео) Влора, Радхима и Орикум во трансформација - Албанија се справува со дивоградби на плажи

Албанскиот премиер Еди Рама објави дека е завршено ослободувањето на јавните површини, што отвора пат за целосна реализација на проектот „Лунгомаре 3“, кој треба значително да ја трансформира крајбрежната линија во делот Влора – Радхима – Орикум.„Завршува ослободувањето на јавните површини, што го отвора патот за целосна реализација на проектот ‘Лунгомаре 3 – Влора•Радхима•Орикум’, кој ја трансформира крајбрежната линија во таа зона“, соопшти Рама.Проектот „Лунгомаре 3“ е дел од пошироките напори за уредување и модернизација на албанското крајбрежје, со цел подобрување на инфраструктурата и зголемување на туристичката атрактивност на регионот.Со оваа фаза се очекува забрзување на градежните активности и дополнително унапредување на просторот долж јадранското крајбрежје во јужниот дел на Албанија.

Свет | пред 2 месеци

(Видео) „Ф*к ју Србија“: Објавено видео од Албанците кои позираа со симболи на „Голема Албанија“

Во јавноста се појави видео на кое се гледаат четворицата албански државјани како се снимаат додека возат по автопат низ Србија, при што упатуваат навреди кон државата.На снимката, која првично била споделена на социјалните мрежи, во еден момент се слуша како едно од лицата извикува „f*ck you Србија“, додека останатите се смеат и снимаат. На видеото се забечежува дека едниот од нив носи црвена маица со картата на „Голема Албанија“.Во продолжение на истото видео се прикажани и моменти од полициската интервенција, при што припадници на српското Министерство за внатрешни работи ги запираат и приведуваат осомничените лица.Според официјалните информации, станува збор за А. С. (1989), Е. В. (1984), Е. Г. (1978) и А. Ц. (2005), сите државјани на Албанија, кои се сомничат за сторено кривично дело „поттикнување национална, расна и верска омраза и нетрпеливост“.Ним им е одреден притвор до 48 часа, по што ќе бидат изведени пред Вишото јавно обвинителство во Белград.

Свет | пред 2 месеци

(Фото) Позирале со симболи на „Голема Албанија“ и ја навредувале Србија па се објавиле на Фејсбук: Уапсени четворица Албанци во Србија

Припадници на Министерството за внатрешни работи на Србија ги уапсија А. С. (1989), Е. В. (1984), Е. Г. (1978) и А. Ц. (2005), сите четворица државјани на Албанија, поради сомнение дека сториле кривично дело „поттикнување национална, расна и верска омраза и нетрпеливост“ со провоцирање на годишнината од бомбардирањето од НАТО.А. С. јавно објавил видео на својот Фејсбук профил од кое се гледа како во автомобил „Ауди“ во друштво на другите осомничени лица вози по автопат низ Србија, на непримерен начин прикажувајќи ги симболите на „Голема Албанија“, како и вербално споменувајќи ја Република Србија во негативен контекст, користејќи несоодветни зборови, објаснуваат од српското МВР.На осомничените им е одреден притвор до 48 часа, по што со кривична пријава ќе бидат изведени пред Вишото јавно обвинителство во Белград, Специјално одделение за борба против високотехнолошки криминал.

Свет | пред 2 месеци

Ескалација на протестите во Албанија, опозицијата бара оставка од Рама

Опозицијата во Албанија во неделата одржа нов антивладин протест, обележан со високи тензии, вклучувајќи фрлање молотови коктели врз зградата на владата и интервенција на полицијата со солзавец, јавува Анадолија.Протестот го организираше Демократската партија (ПД) со поддршка на други опозициски партии, кои бараат оставка од премиерот Еди Рама.Демонстрантите фрлаа молотови коктели и пиротехнички средства врз зградата на албанската влада, на што полициските сили одговорија со солзавец и водни топови.За време на маршот низ улиците на главниот град, молотови коктели беа фрлени и врз зградите на неколку министерства и други институции, а неколку полициски возила беа запалени.На протестот, присуствуваше лидерот на Демократската партија и поранешен премиер Сали Бериша, како и други пратеници од опозицијата. Стотици полицајци го обезбедуваа настанот, а некои патишта во Тирана беа блокирани.

Свет | пред 2 месеци

Тирана го крена влогот: Албанскиот парламент го прогласи Иран за „државен спонзор на тероризам“

Албанскиот парламент денеска (18 март 2026) усвои резолуција со која Иран се прогласува за држава што спонзорира тероризам, а Корпусот на Исламската револуционерна гарда (ИРГЦ) се означува како терористичка организација.Документот бил предложен од Социјалистичката партија на Албанија и поминал на пленарна седница, во услови кога пратениците на Демократската партија не присуствувале на гласањето.Претседателот на пратеничката група на социјалистите, Таулант Бала, повикал резолуцијата да биде поддржана со образложение дека е поврзана со клучни прашања на меѓународната безбедност и со обврската државите да се спротивстават на тероризмот и на оние што, како што навел, го поддржуваат или толерираат.Во своето обраќање, Бала посочил дека борбата против тероризмот денес се гледа и како заштита на демократијата и владеењето на правото, како и како обид за зачувување на меѓународниот мир и стабилност. Тој нагласил дека Албанија, како членка на НАТО и кандидат за членство во Европската унија, има обврска да придонесува во колективната безбедност.Како дополнителен аргумент, било потсетено дека Албанија во 2022 година била цел на сериозен сајбер-напад врз државни институции, како и дека парламентот неодамна повторно бил изложен на нов сајбер-напад. Според изнесените ставови, целта на резолуцијата е јасна осуда на секоја форма на државна поддршка на тероризмот.

Свет | пред 2 месеци

Муцунски разговараше со Хоџа за важноста на македонското малцинство во Албанија како мост на пријателство

Министерот за надворешни работи и надворешна трговија, Тимчо Муцунски, утрово оствари телефонски разговор со министерот за Европа и надворешни работи на Република Албанија, Ферит Хоџа. Двајцата министри го потврдија заедничкото задоволство од одличните билатерални односи меѓу двете земји, нагласувајќи ја подготвеноста за нивно натамошно унапредување. Во разговорот стана збор и за европската перспектива на двете држави, како и за заедничките активности на патот кон Европската Унија. Воедно беше истакната и важноста на проектот Коридор 8, кој претставува заеднички приоритет од значење за двете земји, како и за унапредување на регионалната поврзаност и развој.Министерот Муцунски ја истакна важноста на македонското национално малцинство во Албанија, кое претставува значаен мост на пријателство и дополнително придонесува за продлабочување на односите меѓу двете држави. Воедно, министрите разговараа и за Охридското Езеро, обврските што произлегуваат од УНЕСКО, како и за заедничката одговорност за неговата заштита и одржливо управување со регионот.Двајцата министри разменија мислења и за актуелните прашања од регионалната соработка, при што ја нагласија важноста од негувањето на добрососедските односи и заедничкиот придонес на двете земји кон стабилноста и безбедноста во регионот.

Македонија | пред 2 месеци

Вучиќ: Се подготвуваме за можен напад од Хрватска, Албанија и Косово

Претседателот на Србија, Александар Вучиќ, во емисија во живо на Радио и телевизија на Србија (РТС) го коментираше за воениот сојуз на Хрватска, Албанија и како што тој го нарече, таканареченото Косово и рече дека верува дека се подготвуваат за напад на Србија во иднина, пренесуваат медиумите во Србија.„Се подготвуваме за нивниот напад. Тие чекаат моментот што ќе се случи во иднина да избувне поголем конфликт меѓу Европејците и Русите и уште поголем на Блискиот Исток. Сè што правиме, го правиме за да ја одбраниме нашата земја. Не можеме да ги напаѓаме земјите од НАТО, а Албанија и Хрватска се едни од нив, ама ова се нивните намери. Тие чекаат поволен момент кога ќе има општ хаос во светот. Но, луѓето не треба да се грижат, само ќе кажам дека Србија има доволно сила за одвраќање за сите тие три ентитети, две држави и еден ентитет, што и да е. Има доволно сила за да има јасна порака за одвраќање“, рече Вучиќ.Тој рече „можете мирно да спиете, граѓаните на Србија можат мирно да спијат“.„Србија е доволно силна за да го зачува својот територијален интегритет, суверенитет, слобода и безбедност на своите граѓани. Тие нема да нè нападнат затоа што знаат каков би бил одговорот“, додаде српскиот претседател.Тој потоа откри какви ракети има српската армија. Претседателот откри дека такви ракети биле користени во конфликтот меѓу Пакистан и Индија.„Зборуваме за ракети воздух-земја. Тоа се ракети со разорна моќ. Можат да тежат до 950 килограми и да имаат дострел до 400 километри. Имаме значителен број од овие ракети и ќе имаме уште повеќе. Тие беа користени во конфликтот меѓу Пакистан и Индија. Тие го уништија радарскиот систем С-400“, истакна Вучиќ.„Тоа е кинеска алатка која се покажа како исклучителна во конфликтот меѓу Пакистан и Индија. Тие успеаја да го уништат францускиот радар и радарскиот систем С-400. Имаме многу работи што не сте ги виделе и ќе продолжиме да ги набавуваме“, објасни Вучиќ.Вучиќ ја коментираше и изјавата на хрватскиот премиер Андреј Пленковиќ дека „Хрватска ќе го информира НАТО за вооружувањето на Србија“ во врска со балистичките суперсонични ракети.„Јас сум претседател на бројно мала земја. Јас не сум Трамп и Путин, големи претседатели кои решаваат сè. За мене нема мали работи, сакам моето наследство да биде мир, а не војни и конфликти. Во средината на никаде, пред вас се појавува воен сојуз – Албанија, Хрватска и таканареченото Косово. Морам да ја зачувам стабилноста во земјата“, рече Вучиќ.

Свет | пред 2 месеци

Сиљановска: Очекувам да се чујат мислењата на граѓаните околу Пустец и да се најде демократско решение

По иницијатива на Македонска алијанса за европска интеграција, Советот на Општина Пустец донесе одлука со која се изјаснува дека е против изградбата на кампови за мигранти во регионот на Преспа.Одлуката беше усвоенана седница на Советот, откако советниците од Македонска алијанса за европска интеграција побараа точката да биде ставена на дневен ред. Како што наведоа, иницијативата произлегува од загриженост за можните еколошки последици, влијанието врз туризмот и долгорочниот развој на регионот.На денешната пресконференција, претседателот на Албанија, Бајрам Бегај беше прашан дали на денешните средби ги начнале овие теми за последните случувања во Пустец и дали конкретно имале некаква консултација со Македонците во Албанија во насока на овие случувања таму.„Ние ги третираме малцинствата  со посебен закон и им се заштитени сите права што им следуваат со него“, рече Бегај додавајќи дека тоа што ќе се гради таму камп за мигранти не значи неоходно и дека ќе бидат сместувани. Според него кампот е дел од договорот со ФРОНТЕКС за обезбедување на капацитети при евентуален мигрантски наплив, но дека Албанија прави се да спречи доаѓање на илегални мигранти во земјата.„Се работи за прашање во надлежност на албанската влада. Се разбира, јас третирајќи ја Албанија како демократска држава, очекувам исто така да ги консултира граѓаните, но исто така со хомологот, да ја информира нашата влада евентуално за решенијата или за проблемите со кои се соочуваат. Не се работи за претседателска надлежност, меѓутоа токму како што рече претседателот Бегај, во духот на почитувањето на правата на малцинствата, во духот на почитувањето на демократските начела, во духот се разбира на почитувањето и на правата на локалната самоуправа, очекувам да се чујат мислењата на граѓаните околу Пустец и да се најде демократско решение“, изјави Сиљановска

Македонија | пред 3 месеци