РУСИЈА

Дмитријев: Руте не може да ја заштити „пропаднатата“ НАТО алијанса

Кирил Дмитријев, претставник на рускиот претседател за инвестиции и економска соработка со странство и директор на Рускиот фонд за директни инвестиции, остро го критикуваше генералниот секретар на НАТО, Марк Руте.На социјалната мрежа X, Дмитријев напиша дека „пропаднатиот Руте не успеал да ја заштити пропаднатата НАТО алијанса“, реагирајќи на изјави на Руте за состанокот со американскиот претседател Доналд Трамп за состојбата во Алијансата.Руте претходно призна дека некои земји членки на НАТО „паднале на тестот“ поставен од САД, додека претставничката на Белата куќа, Керолина Ливит, потврди дека американскиот напад врз Иран се смета за тест за Алијансата, на кој НАТО, според САД, не успеал.

Свет | пред 1 месец

Русија уапси новинар за предавство, се товари за соработка со Украина

Руската Федерална служба за безбедност приведе новинар под обвинение за предавство, во случај што дополнително ја засилува загриженоста за состојбата со медиумските слободи во земјата, пренесуваат светските агенции.Станува збор за поранешен соработник на Радио Слободна Европа, кој бил уапсен во градот Чита, додека неговиот идентитет засега не е објавен.„Руската Федерална служба за безбедност притвори поранешен слободен новинар на Радио Слободна Европа под обвинение за предавство“, пренесуваат медиумите.Според руските власти, новинарот се сомничи дека соработувал со украинската безбедносна служба.„ФСБ го товари мажот за соработка со украинската разузнавачка служба СБУ, на која наводно преку апликацијата Телеграм ѝ доставувал информации“, пренесуваат медиумите.Од украинска страна засега нема официјална реакција на овие обвинувања.Апсењето доаѓа во услови на засилени мерки во Русија по почетокот на војната во Украина, при што законодавството за предавство и шпионажа е значително заострено.„Русија од почетокот на инвазијата на Украина значително го заостри законодавството поврзано со предавство и шпионажа, а бројот на вакви случаи нагло порасна“, пренесуваат медиумите.Во исто време, меѓународни организации за заштита на новинарите предупредуваат дека ваквите обвиненија сè почесто се користат како средство за притисок врз независните медиуми и критичките гласови.„Обвинувањата за предавство се користат и како алатка за задушување на независните медиуми и критичките гласови“, наведуваат организациите за заштита на новинарите.Радио Слободна Европа, за кое новинарот работел како хонорарен соработник, во Русија е означено како „странски агент“, а неговото работење е сериозно ограничено.

Свет | пред 1 месец

Москва со порака до Балтикот: Отворање на небото за украински дронови значи вклучување во конфликт

Русија ги предупреди балтичките држави дека би можеле да се соочат со последици ако им дозволат на украинските беспилотни летала да го користат нивниот воздушен простор за напад врз руска територија, објави британскиот весник „Тајмс“.Според весникот, Москва им соопштила на земјите-членки на НАТО во балтичкиот регион дека таков потег би можел да се протолкува како директно вклучување во конфликтот.Еден ден претходно, рускиот политиколог Сергеј Станкевич оцени дека евентуалното отворање на воздушниот простор на балтичките земји за украински беспилотни летала би значело нивно влегување во воен конфликт со Русија.Инаку,  сдпоред телеграм каналот Меш на 26 март, Литванија, Естонија и Латвија наводно им дозволиле на украинските беспилотни летала да го користат нивниот воздушен простор. Сепак, латвиското Министерство за одбрана соопшти дека балтичките држави не учествувале во планирањето или организирањето на нападите врз руска територија.Портпаролот на Кремљ, Дмитриј Песков, претходно изјави дека Киев се обидува да го искористи потенцијалот на земјите од НАТО во своја корист, што укажува на можноста за ширење на конфликтот.

Свет | пред 1 месец

Русија од војната добива неочекуван профит од историски размери

Наглото зголемување на цените на суровините по затворањето на Ормускиот теснец ѝ носи на Русија милијарди повеќе од очекуваното, предупреди во вторникот Германско-руска трговска комора.Според нивните податоци, приходите на Русија од извоз на нафта, гас и ѓубрива надминуваат 10 милијарди евра месечно.„Русија е голем добитник од новата војна на Блискиот Исток“, изјави претседателот на Комората, Матијас Шеп.Москва профитира од глобалниот раст на цените на суровините, користејќи алтернативни извозни рути. Според Шеп, тоа може да ѝ донесе „неочекуван профит од историски размери“.Со стабилна цена на нафтата од околу 100 долари по барел, Русија може да оствари дополнителни 71,8 милијарди долари годишно повеќе од планираното во буџетот.Рускиот буџет во голема мера зависи од продажбата на нафта и гас, при што е проектиран врз основа на цена од 59 долари по барел. Пред новиот конфликт, буџетот бил во дефицит поради пониските цени.„Со сегашните цени, Москва може да заработи околу 50 милијарди долари дополнителни приходи годишно само од нафта и гас“, наведува Комората.Во Москва веќе се шпекулира и за можна цена на нафтата од 200 долари по барел. Според проценките, тоа би ѝ донело приходи од 350,4 милијарди долари, односно 247 милијарди повеќе од планираното.

Свет | пред 1 месец

Русија предупредува на можен развој на нуклеарно оружје во ЕУ

Руската надворешна разузнавачка служба (SVR) денес соопшти дека седиштето на Европската унија наводно започнало „тајно“ да разгледува можност за развој на сопствени капацитети за производство на нуклеарно оружје. Руската надворешна разузнавачка служба го оцени овој пат како опасен и предупреди дека планот на ЕУ за нов „марш на Исток“ неизбежно би довел до „поткопување на темелите на глобалната безбедносна архитектура и меѓународниот систем за неширење на оружје за масовно уништување“.Во соопштението на прес-службата на Руската надворешна разузнавачка служба се наведува дека, иако Брисел јавно се повикува на американскиот „нуклеарен чадор“, европското раководство наводно се обидува да „купува време“ за таен развој на сопствена индустриска база за нуклеарно оружје и подготовка на јавноста за политичка одлука за нејзино стекнување. Планот предвидува формирање на паневропска доктрина за нуклеарно одвраќање, заснована на постојните капацитети на Франција и Велика Британија, со финансиска и инфраструктурна поддршка од земјите на ЕУ кои не поседуваат нуклеарно оружје.Според Руската надворешна разузнавачка служба, ЕУ би ја задржала можноста за создавање целосно автономна команда на нуклеарните сили. Руската надворешна разузнавачка служба исто така наведува дека некои европски земји веќе располагаат со значителен индустриски и технолошки потенцијал за развој на компоненти за нуклеарно оружје, меѓу кои се Германија, Италија, Чешка, Белгија, Холандија, Шведска и Шпанија.Според Руската надворешна разузнавачка служба, на териториите на некои европски земји се складира голема количина озрачено нуклеарно гориво од деактивирани блокови на нуклеарни електрани. Постојат индикации за можност за неовластено отстранување на горивото со цел одвојување на плутониум погоден за изработка на атомска бомба.Во соопштението се наведува дека, според проценките на Руската надворешна разузнавачка служба, германските експерти би можеле да добијат количина на плутониум доволна за една нуклеарна експлозивна направа за околу еден месец во истражувачките лаборатории во Карлсруе, Дрезден, Ерланген и Јилих. Ураниум за оружје, пак, би можел да се добие за околу една недела во постројката за збогатување во Гронау.Руската надворешна разузнавачка служба предупредува дека развојот на нуклеарно оружје во ЕУ може да предизвика нова глобална трка во вооружувањето. Во таа насока, Руската надворешна разузнавачка служба ги повикува САД и другите земји да преземат мерки за да се спречи такво сценарио.„Укажуваме на американската администрација и на раководствата на сите други земји дека е потребно да се стори сè за да се спречи Европската унија да развие сопствено нуклеарно оружје и неизбежната нова рунда на глобалната трка во нуклеарното вооружување што би следела“, наведува Руската надворешна разузнавачка служба во соопштението.

Свет | пред 1 месец

Русија и Кина блокираа резолуција на Обединетите нации за Ормускиот теснец

Русија и Кина ставија вето на резолуцијата на Советот за безбедност на Обединетите нации за Ормускиот теснец, со што документот не беше усвоен и покрај поддршката од мнозинството членки.За резолуцијата гласаа 11 земји, две беа против, а две воздржани. Првичниот предлог, поднесен од Бахреин, предвидуваше овластување за користење „сите неопходни средства“ за да се обезбеди транзит низ Ормускиот теснец и да се спречат обиди за негово затворање. Станува збор за формулација на Обединетите нации која вклучува и можност за воена акција.Откако Русија, Кина и Франција, како постојани членки со право на вето, се спротивставија на употребата на сила, текстот беше изменет и од него беа отстранети сите референци за офанзивно дејствување. Во новата верзија се дозволуваше користење само на „сите неопходни одбранбени средства“.Сепак, Русија и Кина и на изменетиот предлог ставија вето.Пред гласањето, министерот за надворешни работи на Бахреин, Абдулатиф бин Рашид Ал Зајани, изјави дека резолуцијата не „создава нова реалност“, туку има цел да даде „сериозен одговор на повтореното непријателско однесување на Иран, однесување кое мора да запре“.„Да бидеме јасни, ако денес не делуваме, тоа ќе има тешки последици за целиот свет и човештвото“, додаде тој.По неуспехот на резолуцијата, Зајани изјави дека Советот не успеал да ја преземе својата одговорност во соочување со, како што рече, незаконското однесување кое бара итна и решителна акција.

Свет | пред 1 месец

Велигденско примирје одбиено: Русија напаѓа со стотици дронови

Украинскиот претседател Володимир Зеленски ја обвини Русија дека наместо да прифати предлог за велигденско примирје, извршила масовни напади со беспилотни летала, лансирајќи стотици дронови врз повеќе региони во Украина.Зеленски повторно ѝ понуди на Русија меѓусебен прекин на нападите врз енергетската инфраструктура.„Ако Русија е подготвена да ги запре ударите врз нашата енергетска инфраструктура, ние ќе возвратиме со истото“, изјави тој, додавајќи дека предлогот веќе бил пренесен преку САД.Минатата недела Зеленски предложи и прекин на огнот за време на Велигден, кој православните верници во Русија и Украина го одбележуваат на 13 април.Во понеделникот, по ноќниот напад врз пристаништето Одеса, во кој загинаа три лица, а најмалку 16 беа повредени, Зеленски оцени дека Русија веројатно нема да го прифати примирјето.„Повеќепати предложивме барем велигденско примирје, но за нив сите денови се исти. Ништо не е свето“, рече тој.Русија тврди дека има целосна контрола врз украинската област Луганск, што Киев го негира. Според руското Министерство за одбрана, нивните сили го презеле целиот регион во Донбас, но украински воен претставник изјави дека мали делови сè уште се под контрола на украинските сили.Во меѓувреме, руското Министерство за одбрана соопшти дека украински дронови нападнале нафтен терминал на Каспискиот нафтоводен конзорциум во јужна Русија, при што бил оштетен пристанишниот дел и се запалиле четири резервоари со нафта. Украинската армија, пак, соопшти дека цел бил друг терминал во пристаништето Новоросијск. Нафтоводот транспортира околу 1% од светската нафта и околу 80% од извозот на Казахстан.Исто така, руски брод со пченица, кој се сметаше за потонат во Азовското Море по напад со дрон, бил пронајден и извлечен до брегот, а бројот на загинати се искачи на три лица, соопшти руската државна агенција ТАСС.

Свет | пред 1 месец

Руски напад со дрон во Никопол: трагедија во центарот на градот

Три лица загинаа, а 12 се повредени во руски напад врз автобус во центарот на Никопол, Украина утрово.Веста ја објави Олександр Ханжа, началник на воената администрација на регионот Дњепропетровск, кој појасни дека нападот бил извршен со дрон. Автобусот се приближувал кон постојката во моментот на нападот, поради што имало луѓе и во возилото и на постојката.„Ова не бил случаен напад. Станува збор за намерен терор врз цивили – луѓе кои едноставно си ги извршувале своите секојдневни обврски“, изјави Ханжа.

Свет | пред 1 месец

Ученик уби професорка пред училиште во Русија

Седумнаесетгодишен ученик со нож нападнал професорка пред училиште во градот Добријанка, во Пермска област во Русија. Жената подоцна починала од здобиените повреди.Нападот се случил утринава на влезот во Училиште број 5, соопштил гувернерот Дмитриј Махонин. Според него, тинејџерот ја избол професорката, која во критична состојба била пренесена во болница.На местото на настанот била испратена и екипа на итната медицинска помош од Перм. Напаѓачот е уапсен од полицијата, а во тек е криминалистичка истрага.Подоцна гувернерот соопштил дека професорката не ги преживеала повредите.„За жал, и покрај сите напори на лекарите, Олесја Багута, професорка по руски јазик и книжевност во Училиште број 5 во Добријанка, не беше можно да се спаси“, напишал Махонин, изразувајќи сочувство до нејзиното семејство, пријателите и колегите.

Свет | пред 1 месец

Тврдења за нов сојуз: Русија му дала на Иран список на цели во Израел, тврди „Џерусалем пост“

Руски разузнавачки служби наводно му доставиле на Иран детален список со 55 клучни цели во енергетската инфраструктура на Израел, објави The Jerusalem Post, повикувајќи се на извори блиски до украинските служби.Според извештајот, целите се класифицирани во три категории – од најкритични производствени капацитети, преку главни енергетски јазли во урбани средини, до локална инфраструктура како трафостаници. Како пример за примарна цел се наведува електраната „Орот Рабин“, чие евентуално уништување би можело сериозно да го наруши енергетскиот систем.Во анализата се посочува дека Израел функционира како „енергетски остров“, односно не е поврзан со соседни електроенергетски мрежи, што го прави ранлив на удари врз клучни објекти.Володимир Зеленски предупреди дека се продлабочува соработката меѓу Москва и Техеран, тврдејќи дека руското воено искуство стекнато во Украина се пренесува на Блискиот Исток.„Руското знаење од бојното поле веќе влијае и ќе влијае на други региони“, изјави Зеленски, додавајќи дека постојат индиции за технолошка и воена размена меѓу двете земји.Од друга страна, Москва ги отфрли обвинувањата. Рускиот амбасадор во Израел, Анатолиј Викторов, изјави дека ваквите тврдења се неосновани и дека Русија не доставува разузнавачки информации на Иран.

Свет | пред 1 месец

Русија ја обвини Украина: „Намерано го нападнаа нафтопроводот Касписки“

Русија денес соопшти дека украински дронови го нападнале црноморскиот терминал на Каспискиот нафтопроводен конзорциум (CPC), преку кој минуваат околу 1,5 отсто од светското снабдување со нафта.Нападот би можел да биде еден од најзначајните украински удари врз руските црноморски постројки од почетокот на војната. Киев во изминатиот месец ја зголеми фреквенцијата на напади врз руската инфраструктура, пишува Reuters.Руското министерство за одбрана соопшти дека Украина ги нападнала товарните објекти на CPC со беспилотни летала. Терминалот CPC Јужна Озерејевка извезува нафта од Казахстан, а меѓу неговите акционери се и американските компании Chevron и ExxonMobil.На веб-страницата на CPC се наведува дека станува збор за проект во кој учествуваат Русија, Казахстан и „водечки меѓународни нафтени и гасни компании“.„Киевскиот режим намерно ги нападна објектите на меѓународната компанија Касписки нафтопроводен конзорциум за да им нанесе максимална економска штета на нејзините најголеми акционери – енергетските компании од САД и Казахстан“, стои во соопштението.Терминалот CPC, сместен југозападно од Новоросијск, обработува 80 отсто од казахстанскиот извоз на сурова нафта.Два извори рекоа за Reuters дека во ноќта кон понеделник во одделен инцидент избувнал пожар на нафтениот терминал Шешарис, удавен околу 15 километри од терминалот CPC.Преку Шешарис вообичаено минуваат помеѓу 600 илјади и 700 илјади барели сурова нафта дневно. Минатата година се извезени 19,8 милиони тони нафтени деривати, пренесува Reuters.

Свет | пред 1 месец

Захарова: Јапонија ги нарушува односите со Русија

Токио сè повеќе се вклучува во украинскиот конфликт помагајќи му на киевскиот режим, со што ги нарушува односите со Русија, изјави Марија Захарова, портпаролка на Министерството за надворешни работи на Русија.„Помагајќи му на неонацистичкиот режим на Володимир Зеленски, Јапонија сè повеќе се вплеткува во конфликтот околу Украина, со што нанесува дополнителна штета на односите со Русија, кои сериозно се влошија по вина на Токио“, истакна Захарова во коментар на веб-страницата на руската дипломатска мисија.Според неа, јасно е дека ваквите одлуки не придонесуваат за брзо решение на украинската криза, туку само ги продолжуваат борбените дејствија.Дипломатката потсети дека оружјето кое претставува закана за Русија и нејзините граѓани, како и производните погони што го создаваат во Украина, претставуваат легитимни воени цели за руските вооружени сили.Како што наведе официјалната претставничка на руското МНР, Москва смета дека соработката меѓу Јапонија и Украина во создавање дронови е непријателски потег што им штети на безбедносните интереси на Русија.„Навистина, такви информации постојат. Со оглед на зачестените украински провокации и криминални акции со употреба на беспилотни летала против цивилни цели во Русија, овој потег, очигледно спроведен со поддршка на официјалните власти, го сметаме за отворено непријателски и штетен за безбедносните интереси на нашата земја, вклучително и за заштитата на цивилите“, заклучи Захарова.Претходно, Захарова порача дека секој обид на Токио да организира испорака на оружје за Киев, Русија ќе го смета за непријателски чекор, кој ќе резултира со остар одговор од Москва.

Свет | пред 1 месец

Анкета во Шпанија: Трамп е поголема закана за мирот од Путин

Шпанците веруваат дека американскиот претседател Доналд Трамп во моментов е поголема закана за светскиот мир од рускиот претседател Владимир Путин. Дополнително, мнозинството од граѓаните во таа земја смета дека Мадрид не треба воено да го поддржува Вашингтон во војна против Иран, според анкета објавена денес од шпанскиот весник „Паис“.На прашањето кои лидери претставуваат најголема закана за глобалниот мир, 81 процент од испитаниците го именувале  Трамп. Високи 79,3 проценти од анкетираните пак сметаат дека тоа е рускиот претседател Владимир Путин, а 71,2 проценти го посочиле израелскиот премиер Бенјамин Нетанјаху дека придонесува за загрозување на светскиот мир.Далеку зад нив се другите светски лидери во анкетата, како што се новиот врховен лидер на Иран, Моџтаба Хамнеи со  62,9 проценти, понатаму севернокорејскиот претседател Ким Џонг Ун со 62,2 проценти и кинескиот претседател Си Џинпинг со 49,3 проценти.Ставовите на Шпанците за меѓународните лидери, како и за други прашања, во голема мера се под влијание на идеолошките разлики, наведува весникот.Па така Трамп е најголемата закана за огромното мнозинство левоориентирани гласачи, додека Путин е најголемата загриженост кај десничарските гласачи.Според анкетата, во Шпанија сè уште постои силно противење на војната на Блискиот Исток, при што 56 проценти од испитаниците се против продолжување на воените офанзиви сè додека не се собори иранскиот режим.Исто така повеќе од половина од испитаниците се против тоа Шпанија да им обезбеди воена поддршка на САД и Израел во војната против Иран и да им даде приоритет на односите со Вашингтон.Исто така, огромното мнозинство, повеќе од 70 проценти од Шпанците поддржуваат крај на израелско-палестинскиот конфликт и се залагаат за договорно решение за политичката криза во Венецуела, а 66 проценти поддржуваат продолжување на меѓународната воена помош за Украина сè додека руската инвазија продолжува.Иако речиси две третини го поддржуваат останувањето на земјата во НАТО, а повеќе од половина се за формирање европска армија, сепак мнозинството го отфрла испраќањето шпански војници во конфликти наведува шпанскиот весник.Половина од анкетираните се убедени дека е можна нова светска војна. Исто така околу 39 проценти од испитаниците веруваат во можноста Путин да нападне земја од ЕУ.Анкетата објавена во „Паис“ исто така, покажа голем песимизам кај Шпанците и поделба во општеството во врска со клучните прашања како што се трошоците за одбрана.Зголемувањето на воените трошоци го поддржуваат 46,3 проценти од испитаниците, додека 45,3 се против тоа, при што десницата е за поголемо трошење, а левицата против тоа.Во однос на иднината, речиси 70 проценти од Шпанците се песимистични, при што половина сметаат дека ќе биде насилна, авторитарна и нееднаква, додека помалку од 10 проценти веруваат дека ќе биде попросперитетна и постабилна, наведува во својот натпиш медиумот.

Свет | пред 1 месец

Зеленски: Украинската армија ја запре руската офанзива, најдобра ситуација во последните 10 месеци

Претседателот на Украина Володимир Зеленски изјави дека ситуацијата на фронтот е најдобра од средината на минатата година.Иако војната влегува во својата петта година, борбите продолжуваат долж повеќе од 1.200 километри фронт. Руските сили и понатаму ја исцрпуваат украинската одбрана, но Киев не запира со контраофанзиви. Зеленски посочи дека, земајќи ги предвид окупираните и ослободените територии, Украина моментално е во благ „плус“, ослободувајќи околу 20 квадратни километри, без да прецизира временска рамка.„Офанзивата што ја планираа за март беше осуетена од дејствувањето на нашите вооружени сили. Поради тоа Русите сега ќе ги засилат нападите, но во овој момент не гледаме закана од поголеми размери“, изјави Зеленски.Русија контролира нешто помалку од 20 отсто од територијата на Украина, а според податоци од отворени извори, нејзиното напредување е забавено во 2026 година.„Ситуацијата е сложена, но најдобра во последните 10 месеци“, нагласи Зеленски, повикувајќи се на податоци од украинските и британските разузнавачки служби.Руските сили моментално се групираат во близина на логистичкиот јазол Покровск во Донецката област и кај Хуљајполе во Запорошката област. Украинскиот Генералштаб извести за околу 230 борбени судири во последните 24 часа.Со оглед на тоа што борбите обично се интензивираат со доаѓањето на потопло време, Зеленски истакна дека досегашните дипломатски напори не донеле резултат.

Свет | пред 1 месец

Кина и Русија најавуваат координација во Советот за безбедност: фокус на Ормутскиот теснец и прекин на огнот

Кина соопшти дека е подготвена да ја продолжи координацијата со Русија во Советот за безбедност на Обединетите нации со цел да се намалат тензиите на Блискиот Исток, при што како клучен чекор се посочува итен прекин на огнот. Пораката била пренесена во разговор меѓу кинескиот министер за надворешни работи Ванг Ји и неговиот руски колега Сергеј Лавров.Според Ванг, најсуштинскиот начин за решавање на ризиците околу безбедноста на пловидбата е што поскоро да се постигне прекин на огнот. Тој нагласил дека Пекинг доследно се залага за политичко решавање на кризите преку дијалог и преговори, наместо преку проширување на конфликтот.Разговорот доаѓа во пресрет на гласање во Советот за безбедност, најавено за наредната недела, за предлог-резолуција на Бахреин која се однесува на заштита на комерцијалните бродови во и околу Ормускиот теснец. Во тој контекст, Кина оценила дека постојаните членки на Советот треба да пристапат „објективно и избалансирано“ и да работат на обезбедување поширока меѓународна поддршка.Во изминатиот период Пекинг повеќепати повикуваше на запирање на борбите во регионот на Персискиот Залив и на поширокиот Блиски Исток, оценувајќи дека продолжените судири придонеле за сериозни нарушувања околу Ормускиот теснец – една од најважните глобални рути за транспорт на нафта и гас.

Свет | пред 1 месец

Персонализирана вакцина против карцином: руските научници велат дека изработката за еден пациент трае околу три месеци

Развојот на персонализирана вакцина против меланом за конкретен пациент во моментов трае приближно три месеци, но времетраењето со текот на времето треба да се скратува, изјави Владимир Гушчин, заменик-директор за истражување во рускиот Национален истражувачки центар за епидемиологија и микробиологија „Гамалеја“.Според неговите зборови, сегашниот процес на подготовка бара околу три месеци за да се создаде терапијата, а научниот тим очекува оптимизациите во технологијата и организацијата на работата да доведат до побрза изработка на вакцините во иднина.Во веста се наведува и дека првиот пациент во Русија ја примил вакцината на 1 април 2026 година, како дел од пристапот што се темели на индивидуалните особености на болеста кај секој поединец.Станува збор за персонализирана mRNA вакцина против меланом со назив „Неонковак“, произведена од Националниот медицински истражувачки центар за радиологија при руското Министерство за здравство. Проектот е развиен во соработка со „Гамалеја“ и Националниот медицински истражувачки центар за онкологија „Блохин“.Иако формулата се подготвува по мерка на пациентот, најавите од руските институции ја ставаат оваа технологија во фокусот на новите терапии што имаат цел да го насочат имунолошкиот одговор кон туморските клетки. Следните чекори за поширока примена ќе зависат од резултатите од понатамошните испитувања и организацијата на клиничката употреба.

Магазин | пред 1 месец

Основачот на Телеграм тврди дека Русија е виновна за проблемите со платниот систем

Основачот на Телеграм, милијардерот Павел Дуров, денеска изјави дека обидот на Русија да блокира виртуелни приватни мрежи (VPN) предизвикал проблеми во домашниот платен систем, додавајќи дека десетици милиони Руси се спротивставуваат на дигиталната контрола.Русија повторно блокира мобилен интернет и ѝ даде широки овластувања за прекин на масовна комуникација, истовремено ометајќи услуги за размена на пораки и VPN-ови, што дипломатите го оценија како „голема репресија“. Техничкиот проблем што се појави минатиот петок создаде хаос: дел од потрошувачите не можеле да извршат плаќање, московското метро било принудено да дозволи влез без билет, а регионалната зоолошка градина побарала од посетителите да плаќаат во готово.„Добредојдовте повторно во дигиталниот отпор“, напиша Дуров на Телеграм. „Целата нација е мобилизирана да ги заобиколи овие апсурдни ограничувања.“Најголемата руска банка, Сбербанк, потврди технички проблем, но не даде детали. Некои руски медиуми го избришаа извештајот дека проблемот произлегол од државните обиди за блокирање на одредени страници или VPN-ови.Руски функционери тврдат дека сузбивањето на VPN-овите и апликациите за пораки како WhatsApp и Телеграм е клучно за безбедноста, додека Москва се соочува со смртоносни напади во внатрешноста и наводни обиди за саботажа од западни разузнавачки агенции. Телеграм има повеќе од милијарда активни корисници и е широко користен во Украина, а Дуров е предмет на истрага во кривичен случај со обвиненија за тероризам. Руски официјални лица тврдат дека преку Teлеграм продреле украински и НАТО разузнавачки агенции, со последици врз животите на руски војници. Телеграм ги негира овие тврдења и посочува дека Кремљ се обидува да ги принуди Русите да ја користат државната апликација за пораки MAX, задолжителна во училиштата и универзитетите, што предизвикало загриженост меѓу дел од населението, објави Reuters.

Свет | пред 1 месец

Сијарто: Европската комисија треба да ја врати руската енергија наместо да повикува на штедење

Европската комисија треба да ги врати руските енергетски производи на европскиот пазар за да ја спречи енергетската криза, наместо да шири патетични повици за штедење, изјави унгарскиот министер за надворешни работи Петер Сијарто. наместо да шири патетични повици за штедење, изјави унгарскиот министер за надворешни работи Петер Сијарто.За потсетување, европскиот комесар за енергија, Дан Јоргенсен, изјави дека Европската унија се подготвува за долгорочен енергетски шок, дека се очекува понатамошно влошување на ситуацијата во наредните недели и дека цените на енергијата ќе останат високи долго време.„Европскиот комесар за енергија, Дан Јоргенсен, е секако добар во нешто, но тоа не е енергијата. Тој им се обрати на народите на Европа со драматична порака. Таа порака би можела да се каже дека е апсурдна или патетична ако не знаевме колку е драматична ситуацијата“ рече Сијарто во видео обраќање на социјалните мрежи.Сијарто додаде дека дури сега во Брисел стигнала информација дека кризата на Блискиот Исток има катастрофално влијание врз светските енергетски пазари, иако Унгарија зборува за тоа со недели.„Во таква ситуација, единствениот прифатлив чекор за Европската комисија би бил да дозволи враќање на евтината руска нафта и природен гас на европскиот пазар. Доколку тоа се случи, Европа би можела да избегне нагло зголемување на цените на енергијата, енергетски дефицит и влошување на енергетската безбедност, но за жал, тие не се флексибилни по ова прашање - рече Сијарто.

Свет | пред 1 месец

Рускиот амбасадор во Британија: „Лондон е делумно одговорен за нападите врз Иран“

Рускиот амбасадор во Велика Британија, Андреј Келин, денес оцени дека американската и израелската агресија против Иран е делумно резултат на политиката на Лондон.„Всушност, трагичните настани во Иран и пошироко во регионот се делумно резултат на политиката на Лондон, која им одеше на рака на анти-ирските јастребови во Вашингтон и придонесе за колапсот на Иранскиот нуклеарен договор од 2015 година (JCPOA)“, изјави Келин, пренесува RIA Novosti.Тој посочи на, како што рече, цинизамот на Лондон, кој ја критикува иранската одмаздничка акција без осуда на воените злосторства против иранското население.„Судирот на Блискиот исток уште еднаш го откри цинизмот на Лондон. Британската влада се прави дека не забележува кој го започнал конфликтот и кој ја извршил агресијата. Ги критикува Иран поради контранападите, како да тој го започнал конфликтот. Во меѓувреме, ги затвора очите пред воените злосторства против иранските цивили, вклучувајќи убиство на малолетници“, нагласи Келин.САД и Израел на 28 февруари почнаа да напаѓаат цели во Иран.Техеран изведува одмазднички напади врз израелска територија, како и врз американски воени објекти на Блискиот исток.

Свет | пред 1 месец

Руска блокада на VPN мрежи предизвика хаос: „Масовен банкарски колапс“

Основачот на Телеграм, Павел Дуров, изјави дека обидот на Русија да ги блокира виртуелните приватни мрежи предизвикал проблеми со домашниот систем за плаќање, предизвикувајќи хаос за десетици милиони корисници.Според Дуров, некои корисници не можеле да платат, па московското метро дозволило влез без плаќање, додека, на пример, регионалниот зоолошки парк ги приморувал посетителите да користат готовина, пренесе Ројтерс.„Нивните обиди за блокирање токму предизвикаа масовен банкарски колапс“, наведе Дуров на Телеграм, додавајќи дека целата нација се мобилизирала за да ги заобиколи дигиталните ограничувања.

Свет | пред 1 месец

Ердоган до Путин: Не го одобруваме иранскиот напад

Турскиот претседател Реџеп Тајип Ердоган денеска во телефонски разговор со рускиот претседател Владимир Путин истакна дека Анкара не го одобрува нападот врз Иран, но исто така не поддржува ниту ирански одмазднички акции против земјите во регионот, јавува Anadolu.Двајцата лидери разговарале за билатералните односи и за регионалните и глобалните прашања. Ердоган предупредил дека нападите врз цивилни бродови во Црното Море ја поткопуваат регионалната стабилност и истакна дека конфликтот на Блискиот Исток не смее да се претвори во нова точка на ескалација во кризата меѓу Русија и Украина.Турскиот претседател исто така посочил дека мора да се спречат агресивните политики на израелската влада под водство на премиерот Бенјамин Нетанјаху и дека не смеат да се дозволат потези кои го нарушуваат статусот на Ерусалим.

Свет | пред 1 месец

(Видео) Хаос во Москва: Украински агенти поставиле бомба, високи офицер бил цел на напад

Руската Федерална служба за безбедност (ФСБ) соопшти дека во Москва спречила терористички напад на висок офицер на полицијата, кој бил цел на планот на Украинската разузнавачка служба (СБУ).Според ФСБ, украински агенти ја поставиле бомбата во багажникот на електричен скутер паркиран во близина на деловен центар, а нападот требало да се активира далечински кога високиот офицер ќе пристигне до влезот на зградата, пренесува РИA Новости.Експлозивот од околу еден и пол килограм бил маскиран како полнач за електрично возило. Импровизираниот експлозив содржел метални делови, „шрафови“ и „матици“, што според ФСБ можело да предизвика голем број жртви.Членови на ФСБ успеале да го спречат нападот и да го запленат експлозивот, а во тек е потрага по лицата кои учествувале во поставувањето на бомбата.

Свет | пред 1 месец

Русија порачува: „Зеленски нема да помине како Мадуро“

Русија нема да го киднапира украинскиот претседател Володимир Зеленски како што тоа го направиле Соединетите Американски Држави со претседателот на Венецуела, Николас Мадуро, изјави денеска претседателката на Советот на Федерацијата на Русија, Валентина Матвиенко.Таа оцени дека ако Русија се однесуваше на тој начин, би ја загубила самата почит кон себе, пренесе ТАС‑С.„Дали предлагате да го киднапираме Зеленски? Не ме провоцирајте да кажам дека треба некого веднаш да киднапираме. Тоа не е нашиот стил. Ние сме земја која најмногу се почитува себе и е најпочитуваната земја во светот. Ако се однесуваме на овој начин, ќе ја изгубиме самопочитта. И второ, Соединетите Американски Држави немаа никаква корист од атентатот на ајатолахот Али Хамнеи. Но стигмата ќе остане засекогаш во историјата“, рече Матвиенко.САД на 3 јануари нападнаa цивилни и воени цели во Венецуела, заробувајќи го претседателот на таа земја Николас Мадуро и неговата сопруга Силија Флорес, а потоа ги префрлиja во притвор во Њујорк. Мадуро и Флорес се појавиле пред федерален суд во Њујорк на 5 јануари кога се изјасниле дека не се виновни по обвинувањата за вмешаност во трговија со дрога.

Свет | пред 1 месец

(Видео): Тешка железничка несреќа во Русија – воз излета од шините, десетици повредени

Десетици луѓе се повредени во тешка железничка несреќа во Русија, откако патнички воз излетал од шините. Според првичните информации, неколку вагони се превртеле, а на местото на настанот веднаш биле испратени спасувачки и медицински екипи.Несреќата се случила на линија по која сообраќал воз со повеќе од 200 патници, при што неколку вагони излегле од шините и завршиле покрај пругата. Повредените патници биле пренесени во болници, а дел од нив добиле медицинска помош на лице место.Според руските железници, сообраќајот на пругата бил привремено прекинат додека траела спасувачката операција и расчистувањето на теренот. Властите отворија истрага за причините за несреќата, а како можни фактори се споменуваат оштетување на пругата или лоши временски услови.На социјалните мрежи се појавија и видеоснимки од местото на несреќата, на кои се гледаат превртени вагони и спасувачки екипи кои им помагаат на патниците.https://x.com/Maks_NAFO_FELLA/status/2039973657569644574

Свет | пред 1 месец

Шведска заплени танкер од руската „тајна флота“: Постои сомнеж дека од него истекувала нафта

Шведските власти запленија танкер за кој се сомнева дека е дел од таканаречената руска „тајна флота“, откако се појавиле индиции дека од бродот можеби истекувала нафта во Балтичкото Море.Операцијата ја спровеле шведската крајбрежна стража и полицијата, кои се качиле на бродот во шведските територијални води за да извршат инспекција. Танкерот е ставен под истрага поради сомнежи за прекршување на поморските правила и можен еколошки ризик.Според првичните информации, бродот се поврзува со руската „тајна флота“ – мрежа на стари танкери со нејасна сопственост кои се користат за транспорт на нафта и други енергенси со цел да се заобиколат западните санкции воведени поради војната во Украина.Ваквите бродови често пловат под лажни или променети знамиња и со недоволно осигурување, што ги прави потенцијален ризик за поморската безбедност и за животната средина.Шведските власти соопштија дека истрагата е во тек и дека ќе се утврдува дали навистина имало истекување на нафта и дали танкерот ги прекршил меѓународните правила за пловидба.Во последните месеци европските држави значително ги засилија контролите врз бродови поврзани со руската „тајна флота“, кои се користат за транспорт на нафта и други ресурси и покрај санкциите.

Свет | пред 1 месец