РУСИЈА

Иранската Револуционерна гарда со закани: „Тесла“ меѓу компаниите означени како „легитимни цели“

Иранската Исламска револуционерна гарда (ИРГЦ) ги засили заканите кон повеќе од десет американски технолошки компании, тврдејќи дека тие, наводно, му помагаат на Вашингтон во воените операции во актуелниот конфликт на Блискиот Исток. На списокот на компании кои се споменуваат како „легитимни цели“ се најде и „Тесла“.Според наводите, ИРГЦ ги поврзува овие корпорации со обезбедување вештачка интелигенција, комуникациски технологии и капацитети за разузнавачки операции. Во текстот се наведува дека први на удар биле „Амазон“ и „Оракл“, со оценка дека останува отворено прашањето дали нападите ќе продолжат и кон други фирми од листата.Како дополнително предупредување, ИРГЦ порачала дека за секој нивен воен водач кој би бил убиен во војната, „една американска компанија ќе биде уништена“, при што меѓу прозваните компании е наведена и „Тесла“.Покрај „Тесла“, како потенцијални цели се споменуваат и други големи имиња од американската технолошка и индустриска сфера, меѓу кои „Мајкрософт“, „Епл“, „Гугл“, „Мета“, како и компании од областа на мрежна инфраструктура, полупроводници и одбрана.Во објавата се посочува и дека ИРГЦ упатила повик до вработените во објектите на овие компании на Блискиот Исток веднаш да ги напуштат работните места, додека цивилите во радиус од еден километар околу тие локации биле предупредени да се засолнат на безбедно.Иако седиштето на „Тесла“ е во САД, во текстот се нагласува дека компанијата во последните години го проширила своето присуство на Блискиот Исток, со активности и инфраструктура во земји од Заливот, што според ваквите проценки ја прави ранлива во услови на ескалација.

Свет | пред 1 месец

Лавров: Западот ја „извезува“ сопствената криза кон остатокот од светот

Рускиот министер за надворешни работи Сергеј Лавров оцени дека во НАТО и во Европската унија се видливи „кризни процеси“, а западните земји, според него, настојуваат сопствените проблеми да ги префрлат и врз незападните формати и здружувања.Во своето обраќање, Лавров со иронија се повика на реплика од филмот „Сурова романса“, како алузија на логиката дека „ако не можат тие – тогаш никој нема да може“, со што ја опиша, како што тврди, доминантната позиција на западните актери во актуелните меѓународни односи.Тој нагласи дека Москва забележува обиди да се ослабне Шангајската организација за соработка (ШОС) и да се намали нејзината улога во евроазиските прашања, но порача дека Русија ќе направи „сè“ таквите тенденции да не успеат.Лавров ова го изјави на средба со генералниот секретар на ШОС, Нурлан Јермекбаев, при што потенцираше дека организацијата, според руската оценка, има значаен потенцијал за решавање предизвици во евроазискиот простор преку дијалог, конструктивни проекти и соработка во логистиката, економијата и безбедноста.Според него, специфичноста на ШОС е во тоа што ги обединува безбедносните теми со трговско-економски, социјални и транспортни проекти, што, како што рече, целосно се вклопува во мандатот на организацијата.

Свет | пред 1 месец

Медведев: Русија не треба повеќе да толерира членство на Украина во ЕУ

Заменик-претседателот на рускиот Совет за безбедност Дмитриј Медведев изјави дека Москва повеќе не треба да има „толерантен став“ кон можноста Украина да стане членка на Европската Унија.Во изјава дадена во петокот, Медведев оцени дека Европската Унија веќе не е само економска заедница, туку има потенцијал да се трансформира во воен сојуз.„ЕУ повеќе не е само економска унија. Може да се трансформира, и тоа прилично брзо, во полноправен воен сојуз, отворено непријателски настроен кон Русија и во некои аспекти полош од НАТО“, изјави Медведев.Тој додаде дека е време Русија да се откаже од досегашниот пристап кон евроинтеграцијата на соседните земји.„Време е да се откажеме од толерантниот став кон приклучувањето на нашите соседи кон оваа, сега веќе, воено-економска Европска Унија“, рече Медведев.Во однос на трансатлантските односи, тој посочи дека не очекува САД да го напуштат НАТО, но смета дека Вашингтон би можел да преземе симболични чекори, како намалување на бројот на американски војници во земјите-членки.Според Медведев, токму евентуалните поделби внатре во НАТО би можеле дополнително да ја турнат ЕУ кон трансформација од економска во поширока, безбедносна и воена структура.

Свет | пред 1 месец

„Ова е злосторство“: критики поради загуби во украински напад

Неуспешниот механизиран напад на украинската единица кај Покровск предизвика сериозни реакции во украинската јавност, со обвинувања за непотребни загуби и лошо раководење со операциите.Еден од најгласните критичари, волонтерот Серхиј Стерненко, остро реагираше по објавувањето на снимки од нападот.„Постапувањето кон нашите луѓе на ваков начин е злосторство и за тоа мора да има одговорност“, напиша Стерненко.Снимките, кои првично се појавија на Телеграм, прикажуваат уништена украинска техника, вклучително и тенк „М1 Абрамс“, борбено возило БМП-2 и оклопно возило М1117, како и удари врз војници на терен.Според достапните информации, нападот се случил на автопатот Е-50, западно од Покровск, во близина на селото Хришине, област која е предмет на борби.Стерненко оцени дека ваквите операции се дел од, како што вели, „системски расипнички пристап“ кој доведува до големи човечки загуби без значајни резултати.„Тоа што им се прави на луѓето во одредени единици не е ништо подобро од руските практики. Ова мора да престане“, додаде тој.Од единицата „Скелија“ реагираа на критиките, потврдувајќи загуба на возила и смрт на двајца војници, но тврдејќи дека операцијата била успешна.„Пешадијата успеа да ја продолжи задачата, а дел од екипажите беа евакуирани“, наведоа од единицата, додавајќи дека биле искористени оклопни возила, дронови и артилериска поддршка.Тензиите дополнително се зголемија откако единицата јавно го предизвика Стерненко да се приклучи и лично да учествува во операциите.Случајот отвори и поширока дебата за начинот на водење на операциите и улогата на врвниот командант Олександр Сирски, кој се соочува со критики за агресивен пристап и директно управување со офанзивните акции.Во меѓувреме, украинските власти најавија ревизија на загубите на бојното поле, додека експертите предупредуваат дека современото војување, со масовна употреба на дронови, значително ја намалува ефикасноста на класичните механизирани напади.

Свет | пред 1 месец

Русија испрати танкер со нафта кон Куба: „Пробивме блокада, нема да ги оставиме во тешка состојба“

Русија најави дека испраќа уште еден танкер со нафта кон Куба, со цел да се ублажи тешката енергетска криза на островот, која, според руските оценки, е продлабочена од американското ембарго и ограничувањата во снабдувањето.Министерот за енергетика на Руската Федерација, Сергеј Цивилјов, изјави дека првиот брод со околу 100.000 тони нафта веќе пристигнал на Куба и започнал со истовар. Тој нагласи дека во Санкт Петербург бил одржан состанок со кубански претставници, на кој било оценето дека островот се наоѓа „под целосна блокада и изолација“.„Рускиот брод ја проби блокадата. Сега се товари вториот. Нема да ги оставиме Кубанците во тешка состојба“, изјави Цивилјов.Според информациите објавени во веста, танкер под руско знаме натоварен со околу 700.000 барели руска нафта влегол на 31 март во кубанското пристаниште Матансас, што го потврдиле два неименувани извори запознаени со ситуацијата.Руската страна порачува дека Куба не треба да остане без поддршка и дека Москва е подготвена да обезбеди потребни испораки на гориво и во услови на ограничувања, со што се отвора нова епизода во енергетската и геополитичката динамика околу карипскиот остров.

Свет | пред 1 месец

Ормускиот теснец е отворен за Русија

Помошникот на Кремљ, Јури Ушаков, изјави дека Ормускиот теснец, клучен морски пат за транспорт на нафта, е отворен за Русија. Неговата изјава следи во време кога американско-израелскиот конфликт против Иран речиси го запре глобалниот сообраќај низ овој стратешки премин, јавува Ројтерс.„Отворен е за нас“, рече Ушаков за рускиот државен ТВ канал Вести, пренесува агенцијата Интерфакс.Конфликтот предизвика значителни пореметувања во снабдувањето со нафта, бидејќи преку теснецот поминува околу една петтина од светската нафта и течен природен гас, што доведе до зголемување на цените на глобалните пазари.На крајот на март, руското Министерство за надворешни работи соопшти дека се противи на блокадата на Ормускиот теснец од страна на Иран, но истакна дека ситуацијата треба да се следи „во контекст на пошироката глобална ситуација“.

Свет | пред 1 месец

Берлин ја повика Кина да притисне врз Иран: „Искористете го вашето влијание“ за разговори со САД и безбедна пловидба низ Ормускиот Теснец

Германија ја повика Кина да го искористи своето влијание врз Иран за да се отвори пат кон преговори со Соединетите Американски Држави за ставање крај на војната и за обновување на слободната пловидба низ Ормускиот Теснец.Апелот го упати германскиот министер за надворешни работи Јохан Вадефул по телефонски разговор со својот кинески колега Ванг Ји. Според соопштението, Берлин и Пекинг споделуваат длабока загриженост поради ескалацијата на кризата на Блискиот Исток, а Германија ја нагласува „конструктивната улога“ што Кина може да ја одигра во деескалацијата.„Кина може конструктивно да го искористи своето влијание врз Иран за преговарачко решение и прекин на непријателствата против заливските држави“, порача Вадефул.Во фокусот на германската порака е безбедноста на меѓународниот поморски сообраќај, бидејќи Ормускиот Теснец е една од клучните светски рути за транспорт на енергенси и стоки. Вадефул нагласи дека блискиот германско-кинески дијалог останува важен во „предизвикувачко глобално опкружување“, и дека двете земји се посветени на брзо запирање на конфликтот и заштита на слободата и сигурноста на пловидбата.„Германија и Кина сакаат да ја обноват слободата на пловидба во Ормускиот Теснец. Се согласуваме дека поединечни земји не смеат да ги контролираат пловните патишта или да наплаќаат такси за минување“, изјави Вадефул.Повикот од Берлин доаѓа во период на засилени дипломатски контакти и растечки стравувања дека ширењето на судирите на Блискиот Исток може да предизвика нови потреси на енергетските пазари и дополнителни ризици за глобалната трговија. Германија, во тој контекст, ја гледа Кина како клучен посредник што може да придонесе за враќање на каналите за разговор и намалување на тензиите.

Свет | пред 1 месец

„И, војната стигна до Балтикот“: дронови паѓаат во Финска и Балтичките држави, руски нафтени пристаништа во застој

Војната во Украина во последните денови се доближи до границите на Финска и Естонија, откако серија напади со беспилотни летала ја прелеа безбедносната закана кон поширокиот балтички простор. Финскиот премиер Питери Орпо изјави дека не постои држава што може целосно да се одбрани од напади со дронови и дека технологијата се развива со огромна брзина.Во фокусот на случувањата се руските пристаништа Уст-Луга и Приморск во Финскиот Залив, западно и северно од Санкт Петербург, кои, според написот, биле меѓу главните цели на масовни напади со украински дронови. Наводите посочуваат дека пристаништата претрпеле тешки оштетувања и дека прометот бил запрен или значително намален, со дополнителна безбедносно-еколошка закана за регионот.„Кога ветерот дува од исток, ноќе се слушаат борбени авиони, а дење гледаме црн чад од руската страна“, изјавил жител на финското погранично место Виролахти.Се наведува и дека финските медиуми известуваат за напади врз енергетската инфраструктура во околината на Санкт Петербург, како и за зголемена готовност на руската противвоздушна одбрана и привремени затворања на воздушниот простор за цивилен сообраќај. Финските вооружени сили, според пренесените информации, потврдиле дека биле пронајдени три украински дронови на финска територија, а се трага и по четврти.Инциденти се пријавени и во соседството: една беспилотна летала погодила електрана во Естонија, додека друга се урнала во Летонија, при што тамошните власти изразиле уверување дека станува збор за „залутан“ украински дрон.Украина, според текстот, официјално им се извинила на Финска и на балтичките држави за дроновите што завршиле на нивна територија. Воедно, украинскиот министер за надворешни работи Андриј Сибиха тврдел дека Русија намерно ги насочува беспилотните летала, но фински експерти изразиле скепса кон таквото објаснување.Финскиот премиер Орпо се обидел да ја смири јавноста, нагласувајќи дека земјата е подготвена, но и дека „стопроцентна“ одбрана не постои. Според пренесените проценки, финската успешност во откривање/пресретнување во овие случаи била околу една третина, а дел од леталата биле пронајдени дури по дојави од граѓани и од погранични служби.Случувањата ја засилуваат загриженоста дека војната, преку дронови и напади врз клучна инфраструктура, сè повеќе го допира и североистокот на Европа – со ризици што ги надминуваат директните фронтовски линии и ја ставаат безбедноста на Балтикот под дополнителен притисок.

Свет | пред 1 месец

Кремљ: Путин „подготвен да помогне“ за смирување на судирот со Иран, додека војната која ја почнаа во Украина влегува во петта година

Кремљ соопшти дека Русија е подготвена да придонесе за смирување на судирот со Иран и за насочување на воената ескалација на Блискиот Исток кон „мирно решение“. Пораката беше пренесена преку портпаролот на Кремљ, Дмитриј Песков, кој нагласи дека рускиот претседател Владимир Путин е во постојани контакти со лидери од регионот.Според Песков, Москва е подготвена да помогне со цел ситуацијата што побрзо да се префрли од воена логика во дипломатска рамка, а како можност за политички разговори беше спомнат и евентуален руско-арапски самит, кој би можел да послужи како платформа за дијалог.Во истиот контекст, Кремљ се осврна и на изјавите на американскиот претседател Доналд Трамп, меѓу кои и оценките дека Вашингтон размислува за повлекување од НАТО. Песков повтори дека Русија и натаму ја гледа Алијансата како „непријателска“, додавајќи дека намалувањето на тензиите и ублажувањето на последиците од војната е можно само преку преговори.Изјавите доаѓаат во момент кога војната во Украина трае повеќе од четири години, што повторно ги отвора прашањата за позицијата на Москва на повеќе кризни фронтови и за нејзините обиди да се наметне како посредник во блискоисточната ескалација.

Свет | пред 1 месец

Русија објави вежби во Сибир: „Тајно преместување“ на интерконтинентални ракети „Јарс“

Руските стратешки ракетни сили соопштија дека извршиле воени вежби во Сибир, во кои, според нивните наводи, било увежбувано прикриено и „тајно“ преместување на интерконтинентални балистички ракети од типот „Јарс“, способни да носат нуклеарни боеви глави.Во рамки на активностите, единиците вежбале низа постапки за сокривање на движењето на копнените ракетни системи, вклучително и користење камуфлажа и други мерки за прикривање, наведува министерството за одбрана.Според објавеното, дел од сценаријата опфатиле и реагирање на симулирани непријателски напади, како и спротивставување на средства за воздушни удари. Притоа, руските власти не соопштија дека имало лансирања на ракети.Москва редовно организира вежби на своите стратешки нуклеарни сили, кои ги претставува како проверки на борбената готовност. Ваквите демонстрации се случуваат во период на засилени тензии со земјите од НАТО, во контекст на војната во Украина.

Свет | пред 1 месец

(Видео) Напад со дронови во Русија: Пожар во рафинерија, густ чад над Уфа

Инцидентот се случил во главниот град на руската Република Башкортостан, каде, според официјалните информации, неколку дронови биле пресретнати пред да стигнат до целта, но делови од еден од нив паднале врз индустрискиот комплекс и предизвикале пожар.„Се случи напад со дрон врз Уфа. Неколку дронови беа соборени при приближување кон нафтените рафинерии, а остатоци од еден паднаа врз индустриски објект. Нема жртви. Пожарникарските служби се на терен“, изјави Радиј Хабиров.Според неговите информации, уште еден дрон погодил станбена зграда, но и таму нема повредени лица.На социјалните мрежи се појавија снимки од пожарот, на кои се гледа густ столб од црн чад што се издигнува високо над градот, додека службите интервенираат за локализирање на огнот.Нападот доаѓа во контекст на зголемени напади со беспилотни летала врз индустриски и енергетски објекти во Русија, што дополнително ја зголемува загриженоста за безбедноста на критичната инфраструктура.

Свет | пред 1 месец

Русија предупредува: Не патувајте во земји кои имаат договори за екстрадиција со САД

Руското Министерство за надворешни работи во средата ги предупреди своите граѓани да не патуваат во земји кои имаат договори за екстрадиција со САД. Во препораката за патување се наведува дека интензитетот на кривичниот прогон од страна на Вашингтон се зголемил од почетокот на војната во Украина во 2022 година и дека луѓето ризикуваат долги затворски казни доколку бидат екстрадирани во САД, пренесува „Reuters“.Министерството истакнува дека поради бројни екстериторијални санкции насочени кон стратешки сегменти на домашната економија, многу Руси, без да бидат свесни, можат да станат мета на американските правосудни и разузнавачки служби. Според соопштението, американските агенции често користат измамни шеми, привлекувајќи руски државјани со бизнис или туристички понуди во странство. Русите понекогаш се апсат веднаш по пристигнувањето во трета земја.Предупредувањето е упатено кон Руси кои имаат основани причини да веруваат дека би можеле да бидат предмет на кривичен прогон од американските власти или се на американските листи на санкции. Министерството ги наведе како ризични земји Велика Британија, Швајцарија, поголемиот дел од членките на Европската Унија, Канада, Австралија, Израел, голем дел од Латинска Америка, Либерија, Мароко и низа азиски земји.Русија тврди дека од 2008 година, кога на Тајланд бил уапсен трговецот со оружје Виктор Бут, повеќе од 100 нејзини државјани биле екстрадирани во САД.Бут во САД поминал 14 години во затвор поради трговија со оружје, перење пари и завера за убиство на американски државјани. Тој бил ослободен во 2022 година во размена за американската кошаркарка Бритни Грајнер, која во Русија била затворена поради внесување масло од канабис за електронски цигари.

Свет | пред 1 месец

Путин нуди безбедни рути за меѓународна трговија

Рускиот претседател, Владимир Путин, денес изјави дека актуелните судири во Иран веќе директно влијаат на глобалните енергетски пазари, особено на транспортот на нафта и гас преку Ормускиот теснец.Во видео-порака до учесниците на Меѓународниот форум за транспорт и логистика, Путин истакна дека безбедноста на испораките станува клучен фактор и дека Русија може да понуди алтернативи и безбедни патеки за меѓународната трговија, пренесе Спутник.„Русија може да одигра важна улога во формирањето на новата архитектура на глобалната логистика и меѓународната трговија“, нагласи тој.Рускиот лидер додаде дека руските логистички рути можат да се користат во услови на ескалација во Иран и го потенцираше значењето на долгорочното планирање на транспортот и логистиката.Форумот се одржува по прв пат во Санкт Петербург, од 1 до 3 април.

Свет | пред 1 месец

„На Западот не му одговара што Унгарија не тоне заедно со другите, туку има став“, вели Захарова

На Западот не му одговара тоа што Унгарија развива односи со Русија и има сопствени ставови, изјави Марија Захарова, портпарол на руското Министерство за надворешни работи.„Западот не е задоволен од фактот што Унгарија не оди по тој пат, што е силна, што не тоне заедно со другите, туку има свој став – кој требало да исчезне, не требало ни да постои“, прокоментира таа.Според Захарова, на Западот, исто така, му пречи и тоа што Унгарија ги зачувала односите со Русија.„За Брисел е клучно Унгарија да ја нема таа опција. Сега во рамките на таа заедница на некои им е дозволено нешто, а зошто тоа не им е дозволено на Унгарците?“, праша Захарова.

Свет | пред 1 месец

Лавров: Во тек е разорување на светскиот поредок

Во тек е целосно разорување на стариот светски поредок и жестока борба за глобално водство, оцени рускиот министер за надворешни работи Сергеј Лавров, предупредувајќи дека трансформацијата на меѓународниот систем се одвива низ криза, а не низ стабилна транзиција.Лавров на состанок на Руското советодавно тело за меѓународни прашања посочи дека новиот светски поредок се создава преку рушење на постојниот, наместо преку постепена реформа.„Во средиштето сме на преуредување на глобалниот поредок, за кое се надеваме дека ќе доведе до воспоставување одржлив и праведен повеќеполарен свет. Но, засега таа трансформација повеќе наликува на разорување во секоја смисла на зборот“, изјави Лавров.Тој нагласи дека борбата за водечка позиција е исклучително остра и дека станува збор за суштински судир на интереси.„Борбата за водечки позиции во новиот свет е исклучително жестока – тоа е прашање на живот и смрт. Сведочиме на тоа речиси секојдневно“, изјави Лавров.Според него, меѓународното право се нарушува, а механизмите што со децении обезбедувале релативна стабилност постепено исчезнуваат. Лавров предупреди и дека одредени држави, како што рече, без правна основа поставуваат територијални претензии.„Некои земји го изгубија компасот и отворено полагаат право на одредени територии, а за своите планови не нудат ниту најмало правно оправдување“, изјави Лавров.Говорејќи за односите со западните земји, Лавров оцени дека тие се во лоша состојба, но додаде дека Москва останува отворена за дијалог, под строго дефинирани услови.„Клучно е цврсто да ги браниме нашите национални интереси. Нашата врата за дијалог и можни договори ќе остане отворена, но исклучиво на рамноправна и заемно корисна основа. Отворена е за оние кои се подготвени да се откажат од своите каприци и јасно да кажат што предлагаат“, изјави Лавров.Во однос на глобалните сојузи, тој оцени дека земјите од БРИКС и Шангајската организација за соработка се изложени на притисок.„Не се само Русија и Кина, туку и другите членки на БРИКС и Шангајската организација за соработка, како и сите повеќе или помалку независни центри на моќ и развој, стануваат мета на агресивен отпор од оние кои се навикнати да живеат на туѓа сметка“, изјави Лавров.Лавров повтори дека Русија бара итен прекин на, како што ја нарече, американската и израелската агресија врз Иран, нагласувајќи дека употребата на воена сила против цивили и цивилна инфраструктура е неприфатлива.„Сметаме дека е неприфатлива употребата на воена сила против цивили и цивилна инфраструктура, без оглед каде се наоѓаат – во Иран или во земјите од Советот за соработка во Заливот“, изјави Лавров.Тој додаде дека Москва е подготвена да помогне во изнаоѓање дипломатско решение за конфликтот на Блискиот Исток.„Подготвени сме да понудиме посредување и други форми на помош за ситуацијата да се врати на политички и дипломатски колосек“, изјави Лавров.Лавров ги обвини САД и Израел дека се обидуваат да ја спречат нормализацијата на односите меѓу Иран и земјите од Заливот.„Она на што сведочиме во регионот е обид на САД и Израел да ја спречат нормализацијата на односите меѓу Иран и неговите соседи, па дури и да ги свртат земјите од Советот за соработка во Заливот против Иран“, изјави Лавров.Тој оцени дека обидите преговорите да се искористат како прикритие за воени дејствија се неискрени и штетни за стабилноста.

Свет | пред 1 месец

Русија: Нема нафта за земји што го поддржуваат ограничувањето на цената

Русија нема да снабдува со нафта земји кои го поддржуваат ограничувањето на цената на руската нафта, изјави заменик-министерот за надворешни работи Андреј Руденко.Тој оцени дека ситуацијата на глобалните енергетски пазари е нестабилна, со недостиг и раст на трошоците, но додаде дека мерката за ограничување на цената претставува „антитржишен потег“ кој ги нарушува синџирите на снабдување.„Русија нема да снабдува со нафта земји кои го поддржуваат овој провокативен план“, изјави Руденко, пренесува Sputnik.Изјавата доаѓа во контекст на санкциските политики кон Москва, кои ги поддржуваат повеќе западни земји, меѓу кои и Јапонија, чии власти засега не најавуваат промена на курсот.Во меѓувреме, дел од други држави, како Тајланд, покажале подготвеност за набавка на руска нафта, што дополнително ги нагласува поделбите на глобалниот енергетски пазар.Одлуката на Москва се очекува дополнително да влијае врз цените и снабдувањето со енергенси на меѓународно ниво.

Свет | пред 1 месец

(Аудио) Протекоа снимки од разговори помеѓу министрите за надворешни работи на Унгарија и Русија: пренесувани се доверливи информации

Протечени аудио-снимки од телефонски разговори меѓу унгарскиот министер за надворешни работи Петер Сијарто и неговиот руски колега Сергеј Лавров откриваат длабока и контроверзна соработка меѓу Будимпешта и Кремљ, објавија меѓународни истражувачки редакции.Според објавеното, Сијарто во разговорите пренесувал доверливи информации од состаноци во Брисел, се обидувал да отстрани руски имиња од санкциските листи на Европската унија и нудел поддршка за руски компании погодени од санкциите.Во еден од разговорите, Лавров барал интервенција за сестрата на рускиот олигарх Алишер Усманов да биде тргната од санкциската листа. Сијарто одговорил дека ќе направи сè што е можно, најавувајќи координација со Словачка за поднесување предлог во ЕУ. Подоцна, барањето било реализирано.Снимките покажуваат и неформален и блиски тон меѓу двајцата министри, при што заедно ја критикувале Европската унија и нејзините политики, особено во однос на поддршката за Украина.Дополнително, во разговорите се наведува дека унгарскиот министер редовно ги прераскажувал дискусиите од состаноците на Советот за надворешни работи на ЕУ, вклучително и внатрешни несогласувања меѓу министрите.Европски дипломати оценуваат дека ваквата комуникација наликува на однос меѓу оперативец и извор, што отвора сериозни сомнежи за улогата на Унгарија во рамки на ЕУ и НАТО.Унгарската влада ги отфрли обвинувањата, оценувајќи ги како пропаганда, додека ниту Сијарто ниту Лавров не одговорија на новинарските прашања поврзани со објавените снимки.

Свет | пред 1 месец

Се огласи Кремљ за разговорот меѓу Путин и Вучиќ: „Српскиот претседател ја даде својата проценка за ситуацијата на Балканот“

Претседателот на Србија, Александар Вучиќ, и претседателот на Русија, Владимир Путин, разговарале, за ситуацијата на Балканот и го истакнале фундаменталното значење на Резолуцијата 1244 на Советот за безбедност на ОН за решавање на прашањето за Косово и Метохија, соопшти Кремљ.„Српскиот претседател ја даде својата проценка за ситуацијата на Балканот. Двете страни го истакнаа фундаменталното значење на Резолуцијата 1244 на Советот за безбедност на ОН за решавање на прашањето за Косово, како и потребата за обезбедување на правата на Република Српска во рамките на Босна и Херцеговина согласно Дејтонскиот договор“, се наведува во соопштението.Во телефонскиот разговор, кој, како што се наведува, бил инициран од српската страна, двајцата лидери разговарале и за актуелните прашања на руско-српското стратешко партнерство, вклучувајќи соработка во енергетскиот, нафтено-гасниот и нуклеарниот сектор, како и за подготовките за претстојниот априлски состанок на Руско-српскиот меѓувладин комитет за трговија, економска и научно-техничка соработка.Се наведува и дека Вучиќ изразил благодарност за продолжувањето на стабилните испораки на руски гас, кои се од клучно значење за одржување на енергетската сигурност на земјата.Темата на разговорот, додаваат, била и ситуацијата околу Украина и тековната ескалација на судирите со големи размери на Блискиот исток.Истакнуваат дека е договорено да се продолжат контактите.

Свет | пред 1 месец

Кремљ: Нема да стоиме на страна додека Куба страда

Русија има обврска да ѝ помогне на Куба во снабдувањето со енергенси и не може да стои на страна додека нејзиниот сојузник се соочува со сериозна енергетска криза, изјави портпаролот на Кремљ Дмитриј Песков.Тој посочи дека во услови на блокади и недостиг на гориво, на Куба ѝ се неопходни нафта и нафтени деривати за функционирање на клучните државни системи, вклучително и производство на електрична енергија и обезбедување здравствени услуги.Песков потврди дека Москва претходно комуницирала со САД за испораката на хуманитарни количества нафта, изразувајќи задоволство што пратката успешно пристигнала на островот.Испораката доаѓа во време кога рускиот танкер „Анатолиј Колодкин“ со околу 100.000 тони сурова нафта пристигна во кубанското пристаниште Матанзас, што треба да помогне во ублажување на енергетската криза која предизвика чести прекини на струја.Во изјавата, Песков се осврна и на пошироките енергетски односи, нагласувајќи дека Русија останува подготвена да биде сигурен снабдувач и за европските пазари, како и за „пријателските и братски земји“, меѓу кои ја вброи и Србија.Дополнително, тој негираше дека се подготвува нова мобилизација во Русија, оценувајќи ги таквите тврдења како неосновани.Испораките на енергенси и геополитичките позиции околу нив остануваат клучен инструмент во актуелните глобални тензии, особено во услови на нарушени пазари и растечки притисок врз снабдувањето со гориво.

Свет | пред 1 месец

Зеленски најави нова ера: Украина потпиша 10-годишни воени договори со заливските држави

Украинскиот претседател Володимир Зеленски изјави дека Украина склучила „историски“ одбранбени договори со земји од Блискиот Исток, со кои се отвора ново поглавје во воено-технолошката соработка.Договорите се потпишани со Катар, Саудиска Арабија и Обединети Арапски Емирати и предвидуваат стратешка соработка во период од десет години. Иако деталите не се јавно објавени, Зеленски откри дека тие вклучуваат и украинско искуство во справување со беспилотни летала.Клучен сегмент од соработката е размената на технологии, при што Украина нуди поевтини системи за пресретнување на дронови, како алтернатива на скапите противвоздушни ракети што ги користат земјите од Заливот.Овие договори доаѓаат во време на засилени безбедносни предизвици во регионот, каде беспилотните летала стануваат сè почесто средство во современите конфликти, што ја прави украинската експертиза особено барана на меѓународниот пазар.

Свет | пред 1 месец

Кремљ: Србија е „пријателска и братска земја“, испораките на гас продолжуваат

Русија останува посветена на исполнување на своите обврски за испорака на енергетски ресурси кон „пријателски и братски земји“, меѓу кои и Србија, изјави портпаролот на Кремљ Дмитриј Песков.Тој потврди дека Владимир Путин телефонски разговарал со Александар Вучиќ, без да навлегува во детали од разговорот, но нагласи дека контактите меѓу двете земји се континуирани, особено во делот на енергетиката.„Особено сме посветени на нашите обврски кон пријателските и братски земји како што е Србија“, изјави Песков, додавајќи дека Русија има капацитет и подготвеност да остане сигурен снабдувач на енергија и за други пазари, вклучително и европските.Претходно, Вучиќ соопшти дека со Путин постигнал договор за тримесечно продолжување на гасниот договор под поволни услови, што треба да обезбеди стабилност во снабдувањето во период на зголемена енергетска неизвесност.Разговорите доаѓаат во време на засилени глобални енергетски тензии, при што прашањето за сигурноста на снабдувањето со гас станува клучно за економската стабилност на земјите во регионот.

Свет | пред 1 месец

Куба доби нафта од Русија среде енергетска криза

Рускиот танкер Анатолиј Колодкин, кој превезува околу 100.000 тони сурова нафта, пристигна во Куба, објави руското Министерство за транспорт, пренесено од агенцијата Интерфакс.Се очекува истоварот да се изврши во пристаништето Матанзас, додека претходно податоците за поморскиот сообраќај покажуваа дека бродот се движел долж северниот брег на островот.Испораката доаѓа во момент кога Куба се соочува со сериозна енергетска криза, откако три месеци не примила ниту еден танкер со нафта. Недостигот доведе до рестрикции и чести прекини на електричната енергија во земјата со околу 10 милиони жители.САД претходно го прекинаа извозот на венецуелска нафта кон Куба по воведувањето санкции, што дополнително ја влоши состојбата. Во меѓувреме, американскиот претседател Доналд Трамп сигнализираше промена на ставот, изјавувајќи дека нема проблем со тоа други земји да испорачуваат нафта на Куба.Кубанските власти предупредуваат дека енергетската криза има директни последици врз здравствениот систем, при што е зголемен ризикот за пациентите, особено за оние со тешки заболувања.

Свет | пред 1 месец

(Видео) Руски аналитичар тврди: „Осудени сме на пораз во Украина“

Рускиот воен аналитичар Константин Сивков, кој во 2014 година тврдеше дека Киев ќе падне „за два до три дена“, сега јавно предупредува на можен пораз на Русија во војната против Украина.Сивков, потпретседател на Академијата за геополитички проблеми и резервен капетан од прва класа во руската морнарица, во ново интервју изнесе значително поинаква и песимистичка проценка.„Осудени сме на пораз. Економскиот потенцијал на Западот повеќекратно го надминува рускиот и тој потенцијал веќе се претвора во воена предност“, изјавил Сивков.Тој предупредува дека предноста на Западот особено се гледа во производството на вооружување и беспилотни летала, наведувајќи дека масовните напади со дронови бараат и огромни количини противвоздушни ракети.Според него, Русија се соочува со две опции – или да прифати, како што вели, „понижувачки мир“, или да се обиде да постигне одлучувачка воена победа, за која признава дека во моментот нема капацитет.Војната меѓу Русија и Украина започна во 2014 година со анексијата на Крим и конфликтот во Донбас, а ескалираше во целосна инвазија во 2022 година. Наместо брз колапс на Украина, конфликтот прерасна во долготрајна војна на исцрпување, со сè поголем притисок врз воените и економските ресурси на двете страни.

Свет | пред 1 месец

Рускиот ФСБ разоткри британски дипломат во Москва – мора да ја напушти земјата

Рускиот ФСБ откри разузнавачки активности на британски дипломат во Москва, Јанс Герардус, кому му е наредено да ја напушти Русија во рок од две недели поради субверзивно дејствување.Рускиот ФСБ соопшти денес дека пронајдени се докази за разузнавачка активност на вториот секретар на британската амбасада во таа земја, Јанс Герардус, кому поради тоа му е наредено да ја напушти Русија во рок од две недели.„Рускиот ФСБ откри непрјавено присуство на британските обавештајни служби под покровителство на нивната амбасада во Москва, за време на контраразузнавачки операции“, се наведува во соопштението што го пренесува ТАСС.Според информациите од ФСБ, руското Министерство за надворешни работи му ја одзело акредитацијата на секретарот на британската амбасада и му наредило да ја напушти земјата во рок од две недели.„Докажано е дека вториот секретар Јанс ван Ренсбург Албертус Герардус (роден на 1 јуни 1996 година), кој е испратен во Москва, намерно дал лажни информации при влегувањето во нашата земја, со што го прекршил рускиот закон. Истовремено, рускиот ФСБ идентификувал докази дека овој дипломат се занимава со субверзивни разузнавачки активности кои ја загрозуваат безбедноста на Руската Федерација“, се наведува во соопштението.Додаваат дека „документирани се и обиди за добивање на чувствителни информации за време на неформални средби со руски економски експерти“.ФСБ препорача Русите да се воздржат од одржување средби со британски дипломати без одобрение од руското Министерство за надворешни работи, со цел да се избегнат негативни последици, вклучувајќи кривична одговорност.

Свет | пред 1 месец

Прв увоз по два месеца: Руски танкер со нафта пристигна во близина на Куба

Рускиот танкер „Анатолиј Колодкин“ со околу 650.000 барели сурова нафта од типот „Урал“ влезе во ексклузивната економска зона на Куба, што би можело да претставува прв увоз на руска нафта во оваа земја во последните два месеца.Рускиот танкер кој транспортира сурова нафта е детектиран во зоната на Куба, според податоците за следење на движењето на бродови, што укажува на можен нов енергетски товар кон карипската држава.Танкерот „Анатолиј Колодкин“, кој испловил од Приморск натоварен со околу 650.000 барели сурова нафта од типот „Урал“, наскоро би можел да биде истоварен во кубанското пристаниште Матанзас, доколку не го промени својот тек, покажуваат податоците од службите за следење на бродови, пренесува Ројтерс.Соединетите Американски Држави дозволиле рускиот танкер да се приближи до Куба, а американската крајбрежна стража не добила наредба да го пресретне бродот, иако располага со пловни објекти способни за таква операција во регионот. Со тоа е избегната можна директна конфронтација со Русија во близина на американскиот брег.

Свет | пред 1 месец