УКРАИНА

Зеленски е согласен да разговара за планот на Трамп: „Отворени сме за чесна работа со САД“

Планот за мир во Украина – за кој деновиве се шпекулираше без официјална потврда – конечно доби појасни контури. Киев добил нацрт-документ подготвен од администрацијата на Доналд Трамп, а претседателот Володимир Зеленски порача дека е подготвен да разговара и да работи со Вашингтон на понудената рамка, иако таа носи сериозни отстапки за Украина.Според делови од планот што ги пренесоа американските медиуми, од Украина се бара целосно да се повлече од Донбас, да ја намали армијата на 600.000 војници и да гарантира дека нема да се приклучи на НАТО. Како компензација, во Полска би биле распоредени европски борбени авиони како дел од „цврсти безбедносни гаранции“, а Русија постепено би била реинтегрирана во светската економија преку укинување на санкциите и враќање во Г8.„Американската страна ја изложи својата визија. Ние ги презентиравме нашите принципи. Се договоривме тимовите да продолжат да работат на точките“, изјави Зеленски, додавајќи дека ќе разговара со Доналд Трамп во наредните денови.Белата куќа тврди дека планот не бара „драматични отстапки“ и дека е прифатлив за двете страни, а Москва се обидува да го минимизира значењето на иницијативата, нагласувајќи дека „не се во тек вистински консултации“.Зеленски и неговиот кабинет уверуваат дека Украина ќе учествува во процесот само доколку исходот значи „праведен крај на војната“.

Свет | пред 6 месеци

Трамп ја започна најконтроверзната мировна иницијатива за Украина — планот бара големи украински отстапки

Администрацијата на американскиот претседател Доналд Трамп покрена нов обид за завршување на војната во Украина, преку мировен план што, според украинските власти, силно оди во корист на Русија. Детали од документ од 28 точки, за кој се тврди дека е изготвен во тајност, протекоа во јавноста и предизвикаа сериозни реакции во Киев и во европските дипломатски кругови.Планот, предвидува Украина да се откаже од источниот дел на Донбас, да ги намали своите вооружени сили и да се повлече од дел од системите за наоружување. Извор од Белата куќа потврдил дека Вашингтон веќе ги известува Киев и европските партнери за содржината на документот.Од кабинетот на украинскиот претседател Володимир Зеленски велат дека планот е „длабоко разочарувачки“ и дека создава впечаток дека Вашингтон ги прифаќа условите на Москва. Кремљ, пак, по последните украински слабости на фронтот и корупцискиот скандал околу најтесниот круг на Зеленски, ги зацврсти своите барања, барајќи формално откажување од територии и ограничување на украинската армија.Во Киев денес пристигна висока воена делегација на Пентагон, предводена од американскиот секретар за армија Ден Дрискол, со цел да разговара за текот на конфликтот и можен прекин на огнот. Делегацијата, која претставува највисоко ниво на американско воено присуство во Украина откако Трамп ја презеде функцијата, се сретна со премиерката Јулија Свириденко, а се очекува и средба со Зеленски.Еден висок украински функционер за CBS News изјави дека Трамп и Зеленски веќе постигнале начелен договор за прекин на борбите по постојните фронтовски линии и обезбедување на безбедносни гаранции. По Киев, американската делегација ќе отпатува и во Москва, на разговори со руски претставници.Иако Вашингтон и Москва официјално не го потврдија планот, државниот секретар Марко Рубио на социјалната мрежа X објави дека „траен мир ќе бара тешки, но неопходни компромиси“. Трамп пак, изјави дека е „решен да го заврши овој војна како и сите претходни“, додавајќи дека „само со Владимир Путин останува уште еден недовршен конфликт“.Од Кремљ, портпаролот Дмитриј Песков потврди дека постојат „контакти со САД“, но не и формални преговори. Европските партнери, пак, изразија загриженост дека се исклучени од процесот, предупредувајќи дека никаков мировен договор не може да биде успешен без Украина и ЕУ.Вестите за планот се појавија во ист ден кога руските сили извршија ракетен напад врз градот Тернопил, при што загинаа најмалку 26 цивили, меѓу кои и деца, а 22 лица се водат како исчезнати.По нападот, Зеленски изјави дека „само САД и претседателот Трамп имаат доволна сила да ја запрат овој војна“, нагласувајќи дека Киев е подготвен да поддржи секој ‘праведен и одржлив’ предлог.Во меѓувреме, специјалниот пратеник за Украина Кит Келог, долгогодишен сојузник на Клим и силен поддржувач на Киев во Белата куќа, ќе ја напушти функцијата во јануари, што дополнително ја зголемува неизвесноста околу американскиот курс кон Украина.

Свет | пред 6 месеци

САД подготвуваат таен мировен план за Украина во 28 точки – наводно усогласен со Русија!

Американскиот портал „Аксиос“ објави дека во Вашингтон интензивно се работи на нов мировен предлог за Украина, кој наводно содржи 28 точки и се подготвува во координација со Русија. Според пишувањето, планот по структура потсетува на претходниот предлог на претседателот Доналд Трамп за прекин на огнот во Газа.Неименувани американски извори тврдат дека документот опфаќа четири столба: „мир во Украина, безбедносни гаранции, безбедност во Европа и идните односи меѓу САД, Русија и Украина“. Нацрт-планот го креира специјалниот претставник Стив Виткоф, кој ги води разговорите со рускиот претставник Кирил Дмитриев и со украинскиот советник за безбедност Рустем Умеров.Според информациите на „Аксиос“, САД веќе почнале дискретно да ги информираат европските партнери за предлогот, кој сè уште не е официјално презентиран. Белата куќа засега не даде коментар за овие наводи.

Свет | пред 6 месеци

Украина обезбеди увоз на американски гас од Грција за да ги покрие потребите за време на зимата

Украина обезбеди увоз на американски течен природен гас (ЛНГ) од Грција за да ги покрие зимските потреби од декември до март следната година, изјавија во неделата грчки и украински претставници за време на посетата на претседателот Володимир Зеленски на Атина. Украина ќе увезува гас преку гасовод што минува низ Балканскиот Полуостров за да обезбеди критични количини по руските напади врз енергетската инфраструктура и постројките за производство на гас.Грчката гасна компанија DEPA и украинската државна компанија Нафтогаз во заедничко соопштение наведоа дека договорот стапува во сила од декември. Зеленски на заедничката прес-конференција со грчкиот премиер Киријакос Мицотакис изјави дека испораките ќе започнат во јануари.Грција станува извор на енергетска безбедност„Се зафатуваме со обнова секојпат кога Русите ја уништуваат енергетската инфраструктура и постројките за производство на гас, но тоа навистина бара многу време, напор и опрема. А кога станува збор за гасот, ни е потребен увоз за да ја надоместиме нашата уништена домашна производство“, им изјави Зеленски на новинарите.„Грција станува обезбедувач на енергетска безбедност за вашата татковина“, му порача Мицотакис на Зеленски, додавајќи дека договорот ќе придонесе за независноста на Европа од рускиот гас.Во пресрет на посетата на Грција, Зеленски изјави дека Киев обезбедил две милијарди евра од европските партнери и банки за увоз на гас, со гаранција од Европската комисија, како и од украинските банки.

Свет | пред 6 месеци

Украина во шок: Луксуз, златен тоалет и мито во време на војна

Украинската влада се соочува со најтешкиот корупциски скандал откако Володимир Зеленски е на власт, пишува „Фајненшл тајмс“. Слики од луксузни станови во Киев – меѓу кои и еден со златен тоалет, торби полни со кеш и снимки од високи функционери кои дискутираат за перење пари – ја шокираа јавноста и предизвикаа бран негодување во земјата која се бори во војна.Во центарот на аферата се високи државни службеници обвинети за мито во проекти за енергетска одбрана, токму во време кога граѓаните живеат со секојдневни рестрикции на електричната енергија. Според истрагата на Националното биро за борба против корупцијата (НАБУ) и Специјалното обвинителство за борба против корупцијата (САПО), службеници и бизнисмени примале провизии од 10 до 15 проценти од вредноста на договорите со државната компанија „Енергоатом“.Истражителите тврдат дека низ канцелариите на осомничените поминале над 100 милиони долари нелегални средства, а меѓу главните обвинети е Тимур Миндич, пријател и поранешен деловен партнер на Зеленски, со кого тој ја коосновал продукциската компанија Квартал 95. Миндич, кој истражителите го опишуваат како „коорганизатор на шемата“, побегнал од Украина само неколку часа пред рацијата.Меѓу осомничените се и поранешниот вицепремиер Олексиј Чернишов, обвинет дека примил 1,2 милиони долари и 100.000 евра во готовина, како и министерот за правда Герман Галушченко и министерката за енергетика Свјатлана Гринчук, кои беа разрешени од функциите откако аферата стана јавна.Протечените фотографии и снимки, објавени од независните медиуми, предизвикаа јавен шок и масовно незадоволство, особено поради насловите како „Како пријателите на претседателот ја ограбија земјата за време на војна“.Зеленски првично реагирал со молк, а дури по неколку дена побарал оставки од министрите и вовел санкции кон бизнисмените вклучени во случајот. Активистите, меѓу кои и антикорупцискиот експерт Виталиј Шабунин, го нарекоа неговиот одговор „бавен и половичен“.„Привремена суспензија, дури ни отпуштање... дали тоа е реакција на претседател кој навистина не знаел ништо?“ праша Шабунин.Политичкиот аналитичар Володимир Фесенко смета дека Зеленски се обидува да се дистанцира од аферата и особено од својот долгогодишен пријател Миндич.„Сега Зеленски се дистанцира од луѓето вклучени во случајот, но штетата е веќе направена“, изјави тој.Антикорупциските организации предупредуваат дека аферата може да ја наруши довербата на западните партнери, токму во момент кога Украина се бори за одржување на финансиска и воена поддршка.„Не можеме да дозволиме украинскиот претседател да ги изгуби остатоците од легитимитетот за време на војна. Во спротивно, ризикуваме да ја изгубиме државата“, предупреди економистот и политички коментатор Серхиј Фурса.Аналитичарите проценуваат дека оваа афера може сериозно да го дестабилизира Зеленски, особено ако истрагата открие докази што водат кон неговиот најтесен круг.

Свет | пред 6 месеци

Зеленски: Никој не ги тера нашите војници да умираат поради урнатини

Украинскиот претседател Володимир Зеленски ги замоли своите сојузници од Европската Унија да ги надминат своите поделби околу користењето на замрзнатите руски средства, велејќи дека обезбедувањето ново финансирање е клучно за економијата на Украина, разурната од војна.„Се надевам дека ќе ја добиеме оваа одлука. Во спротивно, ќе мора да најдеме алтернатива, тоа е прашање на нашиот опстанок. Затоа ни е толку потребна. И сметам на нашите партнери“, изјави Зеленски за Блумберг.Безусловната западна поддршка за Киев е поткопанаЕвропската Унија ја одложи до декември одлуката за предлогот за користење на замрзнатите руски средства за „кредит за репарација“ од 140 милијарди евра за Украина. Русија, во меѓувреме, бавно напредува на бојното поле и ја напаѓа енергетската инфраструктура на Украина за да ја поткопа нејзината економија додека се приближуваат зимските месеци.Руската инвазија е во својата четврта година, додека украинската влада се бори со разорена економија и исцрпени војници во најлошиот конфликт во Европа од Втората светска војна. Покрај тоа, безусловната западна поддршка за Киев еродираше по враќањето на Доналд Трамп во Белата куќа, анализираат медиумите.Со прекинувањето на финансирањето од САД, европските влади ветија дека ќе ја зголемат помошта за да се одбранат од новата закана од Кремљ.„Русија мора да плати за оваа војна. Парите од замрзнатите средства ќе ѝ помогнат на Украина да купи повеќе воздушна одбрана од САД и Европа и да го финансира производството на беспилотни летала за напади врз руски цели. Немаме дополнителни пари. Ова е начинот и ова е фер“, тврди Зеленски.Тој посочи дека Трамп би можел да испрати „добар сигнал“ до европските лидери со тоа што ќе почне да користи милијарди руски средства замрзнати во САД. „Трамп има повеќе од пет милијарди долари руски средства, можеби ќе одлучи да ги потроши тие пари. Тоа ќе помогне“, истакна Зеленски.„Минатата американска акција, како што се енергетските санкции, исто така ги охрабри европските партнери да донесат некои силни одлуки“, додаде тој. Тој откри дека Украина започнала да произведува беспилотни летала пресретнувачи заедно со САД.Украинскиот лидер верува дека рускиот претседател Владимир Путин води намерна кампања за заплашување на Европа со неодамнешните упади на беспилотни летала и борбени авиони во воздушниот простор на НАТО. „Успеа да ги направи лидерите помалку спремни да испратат системи за воздушна одбрана во Украина. Мислам дека ги исплаши, тоа беше неговата цел и ја постигна. Без сомнение, тоа беше психолошко заплашување“, забележа тој.„Не можеме да ја напуштиме источна Украина“Тој призна дека Украина се соочува со „многу тешка“ ситуација во градот Покровск во регионот Донецк, каде што руските сили се обидуваат да ја преземат контролата по месеци интензивни борби. Зеленски инсистира дека секоја одлука за повлекување на силите е прашање на воените команданти на терен.„Никој не ги принудува да умрат заради урнатини. Ќе ги поддржам нашите војници, особено командантите што се таму. Најважно за нас се нашите војници“, нагласи тој. Тој е убеден дека Русија бара победа во Покровск за да се обиде да го убеди Трамп дека Украина треба да се повлече од целиот Донбас, кој се состои од регионите Донецк и Луганск, за да се стави крај на војната.„Не можеме да ја напуштиме источна Украина. Никој нема да го разбере тоа, луѓето нема да го разберат тоа. А главната работа е дека никој нема да ви гарантира дека ако го освојат овој или оној град, нема да одат понатаму. Нема фактор на одвраќање“, рече тој.

Свет | пред 6 месеци

Нови детали за експлизијата на „Северен тек“, сите траги водат кон Киев

Врвен тим германски детективи цели три години секое утро се состанувал во Потсдам, обидувајќи се да открие кој стои зад најголемиот чин на саботажа во поновата историја – бомбашкиот напад врз гасоводот „Северен тек“. Нивната истрага, како што пишува „Волстрит џурнал“, сега довела до заклучок што може да го наруши единството во поддршката за Украина, бидејќи сите траги водат токму кон Киев.Последиците од истрагата веќе се чувствуваат. Полска одбила да ѝ го екстрадира на Германија еден од осомничените, сметајќи го за херој затоа што уништил клучен извор на приходи за воената машинерија на Владимир Путин. Полскиот премиер Доналд Туск, долгогодишен критичар на германската зависност од рускиот гас, ја исмеал истрагата со зборовите: „Проблемот не е што гасоводот беше дигнат во воздух – проблемот е што воопшто беше изграден.“Во самата Германија, опозициската партија АфД го користи незадоволството на јавноста поради високите цени на енергенсите за да лобира за намалување на помошта за Киев. Притисок врз Украина се очекува и од Италија, каде наскоро треба да се донесе судска одлука за екстрадиција на уште еден украински осомничен.Германските истражители, обвинители и други извори запознаени со случајот велат дека сега имаат јасна слика. Според нив, нападите ги извела елитна украинска воена единица под директна команда на тогашниот врховен командант на украинската армија, генерал Валериј Залужни, кој денес е амбасадор во Обединетото Кралство.Мукотрпна потрага по извршителитеКомплексниот мозаик на докази почнал да се составува веднаш по експлозиите. Следејќи ги трагите на компании за изнајмување бродови, телефонски разговори и регистарски ознаки, истражителите успеале да соберат доволно материјал за да издадат потерници за тројца војници од специјалната украинска единица и четворица искусни нуркачи.Клучниот доказ бил фотографија со ниска резолуција направена од германска камера за надзор на брзината. На неа се гледало лицето на украински нуркач, кого полицијата го идентификувала со помош на софтвер за препознавање лица. За само неколку минути биле пронајдени неговите профили на социјалните мрежи и поврзаноста со другите осомничени. Но, истрагата не се одвивала без пречки.Нуркачот што го следеле до Полска бил ненадејно префрлен во Украина со црн „БМВ“ со дипломатски таблички, управуван од украински воен аташе. Киев одбил да го коментира инцидентот, а неименуван висок претставник изјавил дека дејствувале по дојава од полската влада.Апсење на командантот во ИталијаПотрагата по командантот на единицата била уште посложена. Во почетокот истражителите располагале само со фотографија од пасош издаден на лажно име. Пресврт се случил кога еден детектив се запрашал: „Каде одат Украинците на одмор?“ По неколку испратени барања до земји надвор од ЕУ, добиле резултат. Граничната полиција на една сојузничка држава идентификувала човек што одговарал на описот и патувал по службена линија.Така откриле дека станува збор за Сергеј К., 46-годишен ветеран на украинската служба за безбедност СБУ. За неговиот пасош била распишана тивка потерница, а системот се активирал на 13 август кога тој ја преминал границата меѓу Украина и Полска. Истражителите го следеле преку Чешка до Италија, користејќи податоци од патарини и хотелски резервации направени од неговата сопруга.Италијанските карабињери го уапсиле во одморалиштето Сан Клементе. На пат кон судот, Сергеј им покажал на новинарите три прста – симбол на украинскиот грб, тризабецот. Неговиот адвокат тврди дека е невин, но и дека доколку бил дел од воена операција, ужива имунитет од кривична одговорност.Одлука што може да ги наруши сојузничките односиСе очекува италијанскиот суд до декември да одлучи дали ќе го екстрадира Сергеј во Германија. Во меѓувреме, осомничениот започнал штрајк со глад, тврдејќи дека затворот не му обезбедува веганска и безглутенска исхрана. Неговото евентуално предавање на германските власти би можело да предизвика дипломатски потреси.Можно судење би ги затегнало односите меѓу Украина и Германија, нејзиниот најголем финансиски поддржувач. Притисок чувствува и германскиот канцелар Фридрих Мерц, иако неговиот кабинет уверува дека владата ќе знае како да се справи со последиците.Се смета дека германската јавност, делумно поради медиумските извештаи, веќе се навикнала на идејата дека Киев стои зад нападот. Сепак, високи функционери признаваат дека дипломатските последици би биле помали – ако германските детективи не биле толку успешни во својата работа.

Свет | пред 6 месеци

Трамп не дава „Томахавк“ ракети – аналитичар: Украинците веќе имаат нешто подобро

Украина со недели интензивно лобира во Вашингтон за добивање ракети со голем дострел „Томахавк“, а според Sky News, Пентагон наводно дал зелено светло за нивна испорака кон Киев. Американските претставници процениле дека тоа нема да влијае негативно врз американските резерви, па конечната политичка одлука останала во рацете на претседателот Доналд Трамп.Сепак, американскиот претседател категорично ја отфрли таа можност. На прашањето на новинарите дали размислува за испраќање на „Томахавк“ ракети во Украина, Трамп во неделата кусо одговори: „Не, всушност не.“Руски страв од прецизни ракетиВоениот аналитичар Мајкл Кларк смета дека Трамп е убеден во исправноста на својата одлука, но нагласува дека Русија е очигледно загрижена поради „Томахавк“ ракетите. „Загрижени се поради нивниот дострел и прецизност,“ објаснува Кларк.Тој додава дека испораката на поголем број вакви ракети би можела значително да го промени текот на војната.„Доколку САД беа подготвени да испратат доволно ракети ‘Томахавк’ – а под тоа мислам околу 200 – Украина ќе можеше да ги погодува руските рафинерии и воени цели. Тоа, според мене, ќе го променеше размислувањето на Русија за продолжување на војната,“ вели аналитичарот.Кларк верува дека страхот од такво сценарио бил причината за неодамнешниот повик на Владимир Путин до Трамп, со кој наводно се обидел да го одврати од одлуката за испорака на ракетите. Сепак, тој не очекува Трамп да го смени ставот и смета дека американскиот претседател бара начин да се дистанцира од војната.Алтернатива за „Томахавк“Ова, сепак, не значи крај на надежта за Украина, бидејќи постојат алтернативи на американските ракети. Меѓу нив се британските ракети „Сторм Шадоу“ и украинските домашно произведени ракети „Фламинго“.Според Кларк, доколку Украина успее да ја зголеми производството на „Фламинго“, тие би можеле да ја преземат улогата што моментално се очекува од „Томахавк“.„Украина може да издржи ако војната продолжи и следното лето. Украинците би можеле да откријат дека имаат значителна предност во способноста за производство на ‘Фламинго’. Но, можете да бидете сигурни дека Русите веќе ги бараат производствените локации со своите воздушни напади. Поради тоа, дел од компонентите сега се произведуваат во Европа за да се помогне на Украина. Русите, меѓутоа, очајнички ќе се обидат да ја спречат масовната продукција на ‘Фламинго’,“ заклучува Кларк.

Свет | пред 6 месеци

(Видео) Силни експлозии во Русија: Украински дронови ја погодија рафинеријата во Саратов

Серија силни експлозии ја потресоа руската Саратовска област во текот на ноќта, при што на мета се најде нафтена рафинерија оддалечена околу 800 километри од границата со Украина, јавува Kyiv Post.Според локалните извори, нападот се случил во близина на воздухопловната база Енгелс, која Русија ја користи како појдовна точка за бомбардерите што вршат напади врз украинските градови.Жителите на Саратов и околината на Енгелс опишале „моќни експлозии на небото“, кои започнале околу 00:50 часот, проследени со воздушни сирени, блесоци и звуци на пресретнување дронови. Прорускиот канал SHOT објави дека експлозии се слушале со часови, а жители на неколку окрузи пријавиле зуење и активирање на противвоздушната одбрана.На социјалните мрежи се појавија снимки од голем пожар во регионалната рафинерија на нафта, една од најстарите во Русија. Руски воени блогери тврдат дека еден од дроновите ја погодил постројката AVT-6, која има клучна улога во преработката на сурова нафта.Руското Министерство за одбрана соопшти дека противвоздушната одбрана соборила 64 украински дронови во текот на ноќта, од кои 29 над Саратовската област, што е растојание слично на она меѓу Киев и Варшава. Од Киев засега нема официјален коментар за нападот.Нападот следува ден по ударите врз нафтените постројки во пристаништето Туапсе, на брегот на Црното Море, каде што избувнал пожар на танкер и биле оштетени згради и инфраструктура на терминалот.Извор од Службата за безбедност на Украина (СБУ) подоцна потврди за Kyiv Post дека тие стојат зад нападот во Туапсе, дел од поширока операција за погодок на руската нафтна инфраструктура.

Свет | пред 6 месеци

Трамп дефинитивно одлучи: Нема „Томахавк“ ракети за Украина

Американскиот претседател Доналд Трамп изјави дека не планира да ѝ испрати ракети со долг дострел „Томахавк“ на Украина, и покрај претходните најави дека тоа прашање е разгледувано во Белата куќа.Одговарајќи на новинарско прашање во претседателскиот авион Air Force One, дали САД размислуваат да го испратат ова оружје во Киев, Трамп кусо изјави:„Не, всушност не.“Според CNN, Пентагон веќе дал зелено светло за потенцијално снабдување со крстосувачки ракети „Томахавк“, откако проценил дека тоа нема значително да влијае врз американските воени резерви. Но, крајната политичка одлука ја има претседателот Трамп, потврдија неколку американски и европски извори запознаени со ситуацијата.Трамп претходно овој месец, за време на работниот ручек со украинскиот претседател Володимир Зеленски во Белата куќа, рекол дека не би сакал да ги испрати проектилите во Украина, бидејќи му се потребни „за заштита на САД“.Здружениот генералштаб на американската армија ја доставил својата проценка уште пред состанокот меѓу двајцата лидери. Зеленски, пак, побарал ракетите за да може поефикасно да ја таргетира руската нафтна и енергетска инфраструктура во внатрешноста на земјата.Проектилите „Томахавк“ имаат дострел од околу 1.000 километри, што би им овозможило на украинските сили да погодат цели далеку во Русија.Неколку дена пред средбата со Зеленски, Трамп изјави дека САД располагаат со „многу Томахавци“ кои би можеле да ѝ се дадат на Украина, но дека „сѐ уште не е донесена конечна одлука“. Со синоќешната изјава, таа дилема очигледно е затворена.

Свет | пред 6 месеци

Критична состојба во украински Покровск — ризик од целосно опкружување и пресек на логистиката

Украинските борбени единици во градот Покровск, на југот од Доњецката област, се соочуваат со сериозна опасност од опкружување, велат воени извори и борци на првата линија. Според сведоштва од теренот, руските сили контролираат значителни делови од градот и вршат континуиран притисок кој ја загрозува можноста за пристап и снабдување на украинскиот гарнизон.Војник кој минатиот месец бил на положбите во Покровск вели дека единицата се повлекла трипати поради брзото напредување на противникот, и дека во еден момент раздалеченоста до непријателот се намалила на околу 900 метри. Повисок офицер од секторот, кој бараше да остане анонимен, проценува дека Русите контролираат околу 60 отсто од градот и дека ситуацијата „е катастрофална“.Како причина за пробивањето на одбраната се наведува долготрајната исцрпеност на украинските единици, недостигот од пехота и отворените „провалувачки“ рути кои окупаторите ги искористиле уште од јули. Според теренските извори, руската тактика вклучува интензивирано влегување во урбаните квартови, создавање жаришта на отпор и преместување на сили во позадината, што предизвикува „хаос“ и отежнато интервенирање.Командите од украинската страна го опишуваат противничкото дејствување како „тактика на исцрпување“: пешадија пробива зад фронтот, а првите линии често остануваат парализирани или принудени на отстапување. Операторите на дронови и други елементи на поддршката почесто се вклучуваат во непосредни борби отколку во нивните примарни задачи, што ја намалува нивната ефикасност.Врховното командување прифати мерки за зајакнување и планира вклучување дополнителни сили за „чистење“ на градот, но офицерите на терен предупредуваат дека таквите мерки ќе бидат неефикасни ако не се обезбедат контролирани бокови и линија на снабдување. Еден висок функционер јавно истакна дека доставил апел за предвремено прегрупирање — апел кој, според неговите зборови, требало да биде реализиран пред повеќе недели.Уште поважен ризик е пресекувањето на логистичките патишта кон соседниот Мирнохрад: ако Покровск падне или биде целосно опкружен, пристапите кон Мирнохрад ќе бидат загрозени, што значително би го влошило одбранбениот потенцијал на целиот јужен сектор. Украинските команданти предупредуваат дека „Покровск и Мирнохрад се судбински поврзани“ — губењето на еден град ќе значи и критична опасност за другиот.На терен владее песимизам: борците кои го опишуваат моментот користат силни метафори, оценувајќи дека ситуацијата се влошува и дека, доколку не се изврши итно и координирано прегрупирање, голем број војници може да останат опколени, заробени или да ги загубат животите. Од штабовите, сепак, доаѓаат апели за зачувување на моралот и најави за контрамерки, но извештаите од првата линија укажуваат на итна потреба од конкретна и брза акција.Аналитичарите и воените извори заклучуваат дека иднината на јужниот фронт ќе зависи од способноста на украинските сили да ја зачуваат логистиката и да обезбедат соодветни резерви за прегрупирање. Доколку тоа не се случи, последиците за одбраната на регионалниот јужен фронт може да бидат далекусежни.

Свет | пред 6 месеци

Украински дронови погодија нафтен терминал и танкер во рускиот Туапсе – голем пожар и сериозни оштетувања

Украински беспилотни летала извршија напад врз нафтен терминал и танкер во градот Туапсе, во рускиот Краснодарски крај, доцна вечерта на 1 ноември, предизвикувајќи голем пожар и материјална штета, потврди извор од Безбедносната служба на Украина (СБУ) за Kyiv Independent.Според СБУ, забележани се пет директни удари со дронови. По нападот се запалил танкер, а најмалку четири пристаништа за товарење и истоварување станале неупотребливи, при што биле оштетени и неколку административни згради. Генералштабот на вооружените сили на Украина потврди дека е погодена нафтената инфраструктура на морското пристаниште Туапсе, кое се наоѓа на брегот на Црното Море.На социјалните мрежи се појавија видеоснимки кои го прикажуваат масивниот оган на пристаништето, додека руските канали на „Телеграм“ пренесоа дека избиле најмалку три пожари, меѓу кои и еден на самиот танкер.Терминалот во Туапсе е под управување на државната нафтена компанија „Росњефт“ и претставува едно од клучните извозни јазли за руска нафта, со инфраструктура од стратешко значење за руската енергетска логистика.Регионалните власти на Краснодар потврдија дека дронски напад предизвикал оштетувања на пристанишната инфраструктура, вклучувајќи надградба на пловилото, згради и терминални објекти. Според првичните информации, нема загинати.Извор од украинската СБУ изјави дека нападите врз руската енергетска инфраструктура ќе продолжат, бидејќи таа „му обезбедува на непријателот ресурси за водење на агресијата“.„Сè додека трае војната, пламенот ќе продолжи да гори во руските рафинерии,“ изјави изворот.Нападот во Туапсе е дел од поширока украинска офанзива со дронови насочена кон повеќе региони во Русија. По нападот врз Краснодар, експлозии и чад биле забележани и во градот Орјол.Ова не е првпат украинските сили да го нападнат истиот терминал – нафтеното пристаниште во Туапсе беше цел и на 24 септември, кога беше нападнато со поморски дронови.Украина редовно спроведува удари длабоко во руска територија, користејќи домашно произведени беспилотни летала, со цел да го погоди главниот извор на финансирање на Кремљ – извозот на нафта.

Свет | пред 6 месеци

Украина се соочува со сериозна криза на човечки ресурси

Сè повеќе млади Украинци ја напуштаат земјата, што претставува голем удар за напорите на Киев во војната со Русија. Откако владата дозволи на мажите од 18 до 22 години да заминат во странство, околу 100.000 преминале во Полска. Истовремено, армијата се обидува да мобилизира околу 30.000 војници месечно, но десетици илјади дезертираат, а има отворени околу 290.000 случаи за дезертерство.Недостигот на војници е толку голем што украинските единици на фронтот дејствуваат со само половина или третина од потребната бројност. Се проценува дека армијата има потреба од најмалку 200.000 нови војници. Присилните мобилизации предизвикуваат гнев и насилни инциденти низ земјата.Бегството на младите Украинци создава и политички проблем за претседателот Зеленски, но и притисок врз европските сојузници. Политичари во Полска, Германија и Литванија веќе бараат враќање на Украинците со воена возраст во татковината.Во меѓувреме, Русија со напади врз енергетската инфраструктура се обидува да предизвика нов бран бегалци. Германија е предупредена да се подготви за можен масовен прилив оваа зима.Пред Украина е најтешкиот период од почетокот на војната – загубите, студот и егзодусот на младите ја загрозуваат не само победата, туку и иднината на самата земја.

Свет | пред 6 месеци

Руски напад ја остави без струја Запорожјската област – 60.000 жители без електрична енергија

Околу 60.000 жители останаа без електрична енергија по полноќниот руски напад врз украинската Запорожјска област, која се наоѓа на линијата на фронтот. Според регионалниот гувернер Иван Федоров, во нападот се повредени две лица, а уништени се повеќе објекти и делови од инфраструктурата.„Екипите ќе ја обноват електричната енергија штом тоа го дозволи безбедносната состојба“, напиша Федоров на платформата Телеграм, објавувајќи фотографии од уништени згради со разурнати фасади и скршени прозорци.Како што се приближува зимата, Русија ги интензивира нападите со ракети и беспилотни летала врз украинската енергетска инфраструктура, со цел да предизвика прекини во снабдувањето со електрична енергија и дополнително да го оптовари Киев со итни поправки.Руското артилериско и ракетно бомбардирање речиси секојдневно ја погодува Запорожјската област, уништувајќи домови, оштетувајќи витална инфраструктура и предизвикувајќи човечки жртви. Според гувернерот, во текот на изминатите 24 часа во повеќе од 800 напади врз 18 населени места, едно лице загинало, а тројца се повредени.Федоров нагласи дека и покрај постојаните напади, локалните екипи на електроинженери и спасувачи работат непрекинато за да ја стабилизираат состојбата и да ја обноват електричната мрежа во погодените подрачја.

Свет | пред 6 месеци

(Видео) Русија удира со КАБ бомби, Украина возвраќа со дронови! Пеколна ноќ во двете земји

Украина и Русија повторно разменуваат напади, без знаци на смирување на фронтот или надвор од него. Во ноќта меѓу четвртокот и петокот, двете страни се гаѓаа меѓусебно со беспилотни летала и водени бомби, при што беа погодени енергетски објекти, индустриски зони и цивилни цели.Руски удари врз украински градовиРусија започна нов бран воздушни напади доцна синоќа, насочени кон неколку украински градови и региони. Сирени за воздушен напад одекнаа низ целата земја, а експлозии беа пријавени во Суми, Запорожје и други делови на Украина.Во Сумиската област четири лица се повредени кога руски сили лансирале десет беспилотни летала за помалку од еден час, погодувајќи цивилна инфраструктура и станбени згради.Гувернерот на Запорожје, Иван Федоров, предупреди на „постојана закана“ од водени воздушни бомби КАБ, кои Русија сè почесто ги користи во нападите. Станува збор за модернизирани прецизни бомби со долг дострел што можат да погодуваат цели до 200 километри зад фронтот.Украински одговор на руската територијаУкраина возврати со воздушни удари врз неколку руски региони, вклучувајќи ги Орјол, Владимир и Јарослав. Украинските беспилотни летала оштетија термоцентрала во Орјол и трафостаница во близина на Владимир, а експлозии беа пријавени и во близина на рафинеријата за нафта во Јарослављ.Руските власти соопштија дека нападите предизвикале материјална штета, но дека нема загинати. Се работи за објекти во сопственост на државната корпорација „Росатом“ и други енергетски компании.Ескалација без крајПоследниот синџир напади е уште една потврда дека војната меѓу Русија и Украина влегува во нова, уште поопасна фаза – каде што двете страни сè почесто ги таргетираат клучните енергетски и инфраструктурни објекти далеку од фронтот.И додека Москва ги оправдува нападите како „одговор на украински терор“, Киев возвраќа дека ќе продолжи да дејствува додека Русија не престане со уништување на украинските градови.

Свет | пред 7 месеци

Украина пред најтешка зима досега: нападите на Русија ја рушат енергетската мрежа

Руските сили систематски ги напаѓаат украинските термоелектрани на јаглен, складиштата за гас и трафостаниците, со цел – како што пишува германскиот весник Bild – „да ја замрзнат Украина оваа зима“. Секој нов напад, според извештаите, дополнително ги отежнува напорите на украинските власти да обезбедат доволно електрична енергија и топлина за населението во претстојниот студен период.Според податоците на Bild, оштетени се 55 до 60 проценти од украинската гасна инфраструктура. Весникот го цитира извршниот директор на државната енергетска компанија „Нафтогаз“ Сергиј Корецки кој предупредил дека „Русите нема да застанат“ и повикал граѓаните да ја сведат потрошувачката на енергија на минимум.Весникот дополнително наведува дека, во случај на целосен колапс на енергетската мрежа, Украина се соочува со „ладна катастрофа“. Неименувани украински функционери изјавиле дека „претстојната зима ќе биде најтешка досега“.Германскиот министер за надворешни работи Јохан Вадефул ги повика западните сојузници да ја зголемат поддршката за Украина. Во исто време, германската министерка за економија Катерина Рајхе најави дополнителни средства за Фондот за енергетска поддршка на Украина. Германија досега придонела со 390 милиони евра, а се планираат уште 60 милиони евра помош.Украинскиот претседател Володимир Зеленски соопшти дека грејната сезона во Украина започнала вчера, додека земјата активно бара дополнителна противвоздушна одбрана, енергетска опрема и финансии за увоз на гас. Според проценките, Украина мора да има најмалку 13,2 милијарди кубни метри гас во складиштата за да ја преживее зимата и разгледува можности за увоз од САД и Норвешка.

Свет | пред 7 месеци

Русија со тешка техника го проби украинскиот фронт кај Покровск

И покрај дождот и густата облачност, руските сили во понеделникот го изведоа еден од најголемите напади со оклопна техника во последните месеци, северно од градот Покровск во Донецката област. Според украинските извори, во нападот учествувале најмалку 29 борбени возила, меѓу кои и тенкови со дополнителен челичен оклоп, наречени „железни куполи“. Половина од возилата биле уништени, но останатите успеале да ја пробијат украинската одбрана и да пренесат дел од војниците на нови позиции.Украинските единици – 33. и 93. механизирана бригада, 1. Азовски корпус и единици за беспилотни летала – го сопреа дел од нападот користејќи мини, артилерија и дронови со прво лице (FPV). Повеќе од половина од руските возила биле уништени, а дел од пешадијата распрсната, но според извештаите, преживеаните сили можеле да воспостават нови упоришта североисточно од Покровск, што би претставувало тактички напредок за Москва, иако со висока цена.Според 1. Азовски корпус, нападот бил „еден од најмасовните во последниот период“, а целта била Русија да ја зајакне линијата создадена уште во август. Таа позиција би можела да овозможи опколување на Покровск од север, што би ја отворило руската линија кон Краматорск и Славјанск – последните големи украински градови под државна контрола во Донецката област.Главна улога имале тенковите со заштитни конструкции, чиј засилен оклоп ги штити од напади со дронови и артилерија. Тие најчесто се движат најнапред, расчистувајќи мински полиња и отворајќи простор за пешадијата. Според украинските извештаи, Русите напредувале во мали групи од по четири до пет возила, по различни насоки и временски интервали, сметајќи дека лошите временски услови ќе го отежнат дејството на украинските беспилотни летала.Иако 15 од 29 возила биле уништени, преостанатите 14 успеале да ја извршат задачата и да донесат дел од војниците во близина на украинските позиции. Воените извештаи наведуваат дека украинските сили и натаму ги прочистуваат подрачјата каде што руските единици се пробиле. Ако не успеат целосно да ги потиснат, тоа може да создаде сериозен ризик за одбраната северно од градот.Воени аналитичари предупредуваат дека нападот покажува дека, и покрај технолошкиот напредок, дроновите не ја поништиле улогата на класичниот оклоп. „Оние што веруваат дека оклопните возила се веќе минато, треба да видат колку дронови се потребни за да се уништи добро заштитен тенк“, коментира воениот аналитичар Џомпи.Во наредните денови ќе стане појасно дали руската армија ќе успее да го зацврсти новиот фронт кај Покровск или украинските сили ќе ја повратат контролата врз изгубените положби.

Свет | пред 7 месеци

Кремљ издаде итно соопштение: Алармантно е, ги елиминираме

Информациите на Руската служба за разузнавање дека Франција има намера да испрати легија странци во Украина се алармантни, изјави портпаролот на Кремљ, Дмитриј Песков.„Нашата армија постојано слуша странски јазици на своите радиостаници. Ова значи дека таму има странци. Ги елиминираме“, им рече Песков на новинарите, коментирајќи го соопштението на СВР, пишува Спутник.Руската служба за надворешно разузнавање (СВР) претходно објави дека, според информациите што ги добила, Франција има намера воено да интервенира во Украина.Врз основа на упатствата на францускиот претседател Емануел Макрон, францускиот Генералштаб се подготвува да испрати контингент од 2.000 војници и офицери, односно членови на Легијата на странци, во Украина.

Свет | пред 7 месеци

Ќе биде комплицирано за понатамошна помош: Унгарија со Чешка и Словачка сака да формира сојуз на скептици кон Украина

Унгарија настојува да ги обедини силите со Чешка и Словачка за да формира блок на земји скептични кон понатамошната помош за Украина во рамките на Европската унија. Таквиот потег би можел значително да ги искомплицира напорите на Брисел да обезбеди континуирана финансиска и воена поддршка за Киев, пишува „Политико“.Балаш Орбан, главниот политички советник на унгарскиот премиер, изјави дека се надева на здружување со Андреј Бабиш, чија десничарска популистичка партија победи на неодамнешните парламентарни избори во Чешка, како и со словачкиот премиер Роберт Фицо. Според неговите зборови, целта е координација на ставовите пред состаноците на лидерите на ЕУ, што подразбира и одржување средби пред самите самити.Иако сè уште не е постигнат силен политички сојуз, неговото формирање би можело значително да ги отежни напорите на ЕУ за обезбедување финансиска и воена поддршка за Украина, наведува „Политико“.Тројка наместо четворка од Вишеградската група„Мислам дека тоа ќе се случи – и ќе стане сè поочигледно“, изјави Балаш Орбан на прашањето за можноста од формирање блок скептичен кон Украина во рамките на Европскиот совет.Тој потсети на моделот на соработка на таканаречената Вишеградска група (Унгарија, Чешка, Словачка и Полска) за време на миграциската криза.„Тоа многу добро функционираше во текот на миграциската криза. Така успеавме да се спротивставиме“, рече тој, алудирајќи на периодот по 2015 година, кога во Варшава беше на власт евроскептичната партија „Право и правда“.Како што наведува „Политико“, новиот сојуз би се состоел од три, а не од четири членки. Сегашниот полски премиер од центар-десницата, Доналд Туск, е цврсто проукраински ориентиран и малку е веројатно дека ќе се приклучи на каков било сојуз со унгарскиот премиер.Унгарскиот премиер, кој е на власт веќе 15 години, следната година ќе се соочи со борба за повторен избор. Според анкетите на јавното мислење што ги наведува публикацијата, партијата „Тиса“ на опозицискиот лидер Петер Мадар во моментов е популарна од владејачката „Фидес“.

Свет | пред 7 месеци

(Видео) Морничави снимки: Русија повторно го нападна Киев со балистички ракети – има загинати и повредени

Русија синоќа изведе нов силен напад врз Киев, во кој загинаа најмалку две лица, а деветмина се повредени, јавува The Kyiv Independent. Главниот град на Украина повторно беше цел на балистички ракети и дронови, што предизвика силни експлозии и пожари во неколку делови од градот.Според првични информации, меѓу целите на руските напади биле и термоелектрани во Киев и неговата околина.Експлозиите одекнале околу четири часот утринава по локално време, а началникот на киевската воена управа, Тимур Ткаченко, потврди дека нападот има тешки последици и голема материјална штета.„По ударите избувнаа неколку пожари на левиот брег од реката Дњепар“, изјави Ткаченко, додавајќи дека пожарникарите веднаш интервенирале.Градоначалникот на Киев, Виталиј Кличко, соопшти дека екипите за спасување биле испратени во округите Дарницки и Десњански, каде што се запалиле неколку индустриски објекти. Во Дњипровскиот округ се пријавени оштетени згради, возила и детска градинка, а во дворот на една стамбена зграда останал длабок кратер од ракетен удар.Според украинското воено воздухопловство, Русија лансирала девет балистички ракети „Искандер-М“ од регионите Ростов и Курск, како и 62 борбени дрона „Шахед“. Противвоздушната одбрана успеала да пресретне 50 дрона и четири ракети, но пет ракети и 12 дрона ги погодиле своите цели на четири различни локации.Овој напад доаѓа само три дена по претходниот масовен руски удар врз украинските градови, кога загинаа шест, а беа повредени 44 лица.Русија последните недели ги засили нападите врз енергетската инфраструктура, подготвувајќи се за зимата. Украина, пак, беше принудена да воведе рестрикции на електричната енергија, додека градоначалникот Кличко предупреди дека престојната зима ќе биде најтешка од почетокот на руската инвазија.

Свет | пред 7 месеци

Мајорот Лазиук – човекот со најтешката должност во Украина

Мајорот Сергеј Лазиук има работа што никој не би ја посакал. Тој е човекот кој им ја носи најтешката можна вест на украинските семејства – дека нивниот син, сопруг или брат е мртов. Со писмо во рака и болка во очите, тој тропа на вратите низ Лавов, подготвувајќи се секојпат да слушне крик од мајка чиј живот ќе се сруши во тој миг.„Најтешко е кога луѓето сè уште имаат надеж. Мислат дека можеби има грешка“, вели Лазиук за Telegraph. Тој секогаш ги соопштува вестите лице в лице, без посредници, и ретко добива слободен ден – неговите колеги едноставно не можат да ја поднесат тежината на задачата.Работи во воениот регрутациски оддел, каде што не само што ги испраќа младите на фронтот, туку подоцна ги враќа – во ковчези. Откако Украина последен пат објави податоци во февруари, претседателот Володимир Зеленски призна дека загинале повеќе од 46.000 украински војници, иако западните аналитичари веруваат дека вистинската бројка е далеку поголема.Лазиук секогаш однапред ги известува семејствата дека мора лично да достави „запечатено писмо“. Неколку дена подоцна, тој повторно им се јавува – овојпат за да го координира враќањето на телото. Некои мајки се подготвени, бидејќи веста веќе ја добиле од фронтот, други паѓаат во несвест, а има случаи кога мора да повика Итна помош.Во Украина, мобилизацијата одамна престана да биде доброволна. Секој маж од 25 до 60 години е обврзан да служи, но ентузијазмот одамна исчезна. Повеќе од половина милион мажи се кријат за да избегнат повик.„Сите сакаат да победиме, но никој не сака да се приклучи,“ вели капетан Мирослав Трембекски, кој ги води регрутациските патроли. На улиците на Лавов, војници во униформи запираат мажи и ги носат во воените центри – сцени кои предизвикуваат страв и отпор. „Ако фронтот се сруши, можеби веќе нема да има Украина“, додава Трембекски, кој и самиот бил ранет на линијата во Покровск.Многумина се кријат по своите домови. Еден 50-годишен човек од Лавов, Микола, живее со спуштени ролетни и гледа видеа на YouTube за насилството на регрутерите. „Да завршев на фронт во мојата состојба, немаше да бидам од корист. Подобро е да помогнам со донации“, вели тој. Неговата сопруга го испратила синот во Италија за да го спаси од мобилизација.И додека многумина се обидуваат да избегаат, неколку странци доброволно доаѓаат да помогнат. Меѓу нив е и 46-годишниот Ли Џонсон од Белфаст, поранешен тренер по бокс, кој чекал мајка му да почине за да може да замине на фронтот.Неколку дена подоцна, мајорот Лазиук стои меѓу толпата на новото воено гробиште во Лавов – старото одамна е преполно. Тој присуствува на погреб на двајца војници чии семејства лично ги известил. Во џебот му е уште едно писмо – нова адреса, нова трагедија.„Сакам ова да заврши,“ вели тивко. „Но знам дека и кога ќе падне последната граната, сè уште ќе има тела што треба да се пронајдат. Ќе има мајки што чекаат одговор.“

Свет | пред 7 месеци

ЕУ со нов пакет санкции против Русија и 140 милијарди евра заем за Украина

Европските лидери се подготвуваат во Брисел да ја потврдат поддршката за Украина, само неколку дена по турбулентниот развој на настаните околу најавениот, а потоа и откажан самит меѓу американскиот претседател Доналд Трамп и рускиот лидер Владимир Путин.Според дипломатски извори, претседателот Володимир Зеленски ќе присуствува на средбата на врвот на Европската унија, каде што ќе добие уверување дека Киев може да смета на политичка и финансиска поддршка од Европа.Една од клучните точки на состанокот ќе биде планот за користење на замрзнатата руска имот во Европа за т.н. „репарациски заем“ на Украина во износ од 140 милијарди евра. Средствата би потекнувале од замрзнатите депозити на Руската централна банка што се чуваат во белгискиот финансиски депозитар „Euroclear“.Планот предвидува парите да се искористат за покривање на буџетските и воените потреби на Украина во 2026 и 2027 година, но неколку членки на ЕУ изразија резерви околу правните и финансиските ризици. Белгија, која ги држи средствата, предупреди дека ваквиот потег би можел да се толкува како незаконско одземање имот, што Русија веќе го најави како причина за можни одмазднички мерки.Истовремено, европските влади се поделени околу тоа како ќе се користат средствата — дел од земјите бараат тие целосно да се насочат кон воена помош за Киев, додека други сметаат дека дел од средствата треба да бидат пренаменети за општа буџетска поддршка и економско закрепнување.Европската комисија предложила компромис: најголемиот дел од заемот да се потроши на европско и украинско оружје, а помал дел на буџетска поддршка што Украина би можела да ја користи и за набавка на опрема од партнери надвор од Европа.Во меѓувреме, земјите-членки на ЕУ го одобрија 19-тиот пакет санкции против Русија, кој предвидува забрана за увоз на руски течен природен гас од јануари 2027 година, ограничувања за таканаречената „сенковита флота“ на танкери, како и мерки против две независни кинески рафинерии кои ѝ помагаат на Москва да ги заобиколи санкциите.Европските лидери, според дипломатите во Брисел, сакаат преку овој самит да испратат јасна порака дека Украина останува во срцето на европската политика, без разлика на американските колебања и глобалните политички притисоци.

Свет | пред 7 месеци

Прва реакција од Русија: Трамп ја смени стратегијата — од дијалог кон ескалација

Рускиот државен медиум РИА Новости објави текст под наслов „Откриена е заверата на Трамп против Русија“, по најавата на нов пакет санкции што Соединетите Американски Држави ги воведоа против руските нафтени гиганти „Росњефт“ и „Лукоил“.Вашингтон објави дека новите мерки се насочени кон зголемување на притисокот врз Москва, поради, како што се наведува, одбивањето на Кремљ да покаже волја за вистински мировен процес во Украина. Санкциите опфаќаат и 34 подружници на двете компании, кои се дел од руската енергетска инфраструктура.Објавата следи веднаш по изјавата на американскиот претседател Доналд Трамп, кој потврди дека планираниот самит со Владимир Путин во Будимпешта е одложен на неопределено време.„Секојпат кога разговарам со Владимир, разговорите се добри, но не водат никаде“, изјави Трамп по средбата со генералниот секретар на НАТО, Марк Руте.РИА Новости ја пренесе анализата на Блумберг, според која санкциите го означуваат „пресвртниот момент во американската стратегија кон Русија“. Рускиот медиум наведува дека ова е уште една промена во тонот на Белата куќа, која досега се движеше меѓу помирливост и закани, но сега, според нив, „Трамп избрал пат на ескалација“.Овој дипломатски пресврт доаѓа само ден по руското масовно бомбардирање врз Украина, при што загинаа најмалку седум лица, меѓу нив и деца. Американските аналитичари сметаат дека потегот на Трамп е обид да се покаже цврст став кон Москва, во момент кога преговорите за прекин на огнот се во застој.Иако американскиот претседател најави дека и понатаму останува отворен за средба со Путин „во иднина“, Руската федерација засега не даде официјален одговор на новите санкции, но државните медиуми тврдат дека тие се доказ за „внатрешна поделба во Белата куќа и пропаѓање на Трамповата политика за рамнотежа меѓу дијалог и притисок“.

Свет | пред 7 месеци

BBC: Трамп го губи моментумот во дипломатската офанзива за Украина

Изгледа дека извештаите за скорешен самит меѓу американскиот претседател Доналд Трамп и рускиот лидер Владимир Путин биле претерани. Само неколку дена откако Трамп најави дека ќе се сретне со Путин во Будимпешта „за околу две недели“, состанокот е одложен на неопределено време, објави BBC.Претходно беше откажан и планираниот состанок на највисоките дипломати на двете земји. „Не сакам да имам бесмислен состанок. Не сакам да губам време“, изјави Трамп пред новинарите во Белата куќа, нагласувајќи дека состанок ќе се одржи само ако постојат реални предуслови за напредок.Ова е уште еден во серијата пресврти во неговите обиди да посредува во прекинот на војната во Украина — конфликт што трае речиси четири години. Американскиот претседател, кој неодамна успеа да постигне прекин на огнот и размена на заложници во Газа, се надеваше дека може да ја искористи истата стратегија и на источноевропското бојно поле.Сепак, според BBC, условите во Украина се далеку покомплицирани. Трамп последните девет месеци се движел меѓу притисоци врз Путин и критики кон украинскиот претседател Володимир Зеленски, но без конкретен резултат. Иако се закануваше со нови санкции за рускиот енергетски извоз и со испорака на далекусежно оружје на Украина, истовремено се плашеше од ризикот за глобалната економија и можноста за поголема ескалација.Истовремено, Трамп на кратко ја прекина воената и разузнавачка поддршка за Киев, што ги вознемири европските сојузници, за потоа повторно да ја обнови под притисок на НАТО-партнерите.Иако Трамп често се фали со својата способност за „дилови“, неговите лични средби со Путин и Зеленски не донесоа напредок. Рускиот претседател, велат аналитичари, ја користи желбата на Трамп за дипломатски успех за да го манипулира и да ја добие својата геополитичка предност.Во јули Путин наводно се согласил на самит на Алјаска токму во моментот кога Трамп требаше да ги одобри новите санкции од Конгресот — мерка која потоа беше ставена на пауза. Сличен сценарио се повтори минатата недела, кога по телефонски разговор со Путин, Трамп веднаш најави можен самит во Будимпешта, а само ден подоцна го пречека Зеленски во Белата куќа.Средбата, според американски извори, била напната. Зеленски заминал без ветена помош, а Трамп му порача дека „не дозволува никој да го искористува“. По средбата, украинскиот претседател коментираше дека секое забавување на воената помош веднаш ја намалува подготвеноста на Русија за дипломатија.На крајот, Трамп се задоволи со повик за прекин на огнот долж постојните фронтовски линии, што Москва одби да го прифати. Иако за време на својата кампања ветуваше дека „ќе го заврши војната за неколку часа“, Трамп сега признава дека тоа е „потешко отколку што изгледа“.Ова признание, како што наведува BBC, е ретка потврда на ограниченоста на неговото влијание и на реалноста дека војната во Украина нема едноставно решение, особено кога ниту една страна не е подготвена да се откаже од своите цели.

Свет | пред 7 месеци

Европските лидери ја поддржаа иницијативата на Трамп за запирање на војната во Украина – Русија останува непопустлива

Високи претставници од Велика Британија, Франција, Германија, Украина и Европската унија денеска издадоа заедничка изјава во која ја изразуваат својата поддршка за напорите на американскиот претседател Доналд Трамп за ставање крај на војната во Украина, јавува Reuters.„Цврсто го поддржуваме ставот на претседателот Трамп дека борбите треба веднаш да престанат и дека тековната линија на фронтот треба да биде основа за преговори“, се наведува во изјавата на британската влада.Во документот се додава дека ќе биде засилен притисокот врз руската економија и одбранбената индустрија, сè додека „Владимир Путин не покаже подготвеност за мир“, како и дека се развиваат мерки за користење на „целата вредност на замрзнатата руска државна имовина за поддршка на Украина“.Предлогот за замрзнување на конфликтот долж постојните линии на бојното поле би претставувал значителен отстап за Украина, која инсистира на враќање на целата територија окупирана од Русија од 2014 година, вклучително и Крим.Американскиот претседател Доналд Трамп минатата недела изјави дека е отворен за компромис и дека замрзнување на фронтот би можело да биде прв чекор кон мировен договор. Тој дури најави можен самит со рускиот претседател Владимир Путин во Будимпешта, иако подготовките за тој состанок се одложени.Руската страна остро реагираше на изјавите од Западот. Портпаролот на Кремљ, Дмитриј Песков, изјави дека „ставот на Русија останува непроменет“ и дека Москва не прифаќа замрзнување на конфликтот во сегашна форма.„Ова прашање е повеќепати покренувано во рамки на руско-американските контакти, и нашиот одговор секогаш бил ист – добро познат на сите“, рече Песков, кој ја минимизираше тежината на најавите од Вашингтон, нарекувајќи ги „новински извештаи“.Според Москва, прекинот на огнот би ѝ овозможил на Украина да се прегрупира и повторно да се вооружи, па затоа Русија инсистира на директни преговори за целосен мировен договор, но под услов да добие дополнителни територии под своја контрола.Иако Трамп минатата недела најави дека високите советници на САД и Русија ќе се сретнат, планираниот состанок меѓу американскиот државен секретар Марко Рубио и рускиот министер за надворешни работи Сергеј Лавров е одложен, потврдија извори од Белата куќа за CNN.Причината не е официјално наведена, но според дипломатски извори, две страни имаат различни визии за крајот на руската инвазија. Засега не е познато дали одложувањето ќе влијае на најавениот самит меѓу Трамп и Путин во Будимпешта.

Свет | пред 7 месеци