Медведев го исмејува Трамп: „Нека се сети на мртвата рака – може да биде опасна“

Поранешниот руски претседател и актуелен заменик-претседател на Советот за безбедност на Русија, Дмитриј Медведев, одговори на обвинувањата од американскиот претседател Доналд Трамп преку објава на социјалната мрежа Телеграм.Трамп претходно го нарече Медведев „пропаднат поранешен претседател“ и му порача „да внимава што зборува“ откако најави нови царини од 25% на индиски производи поради блиските економски и воени односи меѓу Индија и Русија.Медведев, пак, саркастично коментираше дека „Трамп ѝ забранил на својата платформа Truth Social да работи во Русија“, а потоа продолжи со оправдување на руската инвазија врз Украина и прикриено се закани со нуклеарен удар: „Ако зборовите на еден поранешен претседател предизвикуваат толкава нервоза кај, наводно, најмоќниот претседател во светот, тогаш тоа значи дека Русија е во право и ќе продолжи по својот пат“, напиша Медведев.Потоа, осврнувајќи се на Трамповите зборови за „мртвите економии“ на Русија и Индија, Медведев го искористи терминот „мртва рака“ – ознака за автоматизиран руски систем за нуклеарен одмазден удар:„Нека се сети на своите омилени филмови за зомби и колку опасна може да биде измислената ‘мртва рака’“, додаде тој, со емотикон што се смее.„Мртвата рака“ (или „Dead Hand“) е вистински советски систем развиен за да обезбеди автоматски нуклеарен одговор во случај руското воено раководство да биде елиминирано – симбол на крајната закана во услови на глобален конфликт.Претходно, Трамп најави воведување царини за Русија доколку Кремљ не го прекине воениот конфликт во Украина во рок од 10 дена. Медведев одговори и на тоа:„Трамп си игра со ултиматуми. Треба да запамети две работи: Русија не е ниту Израел, ниту Иран. Секој нов ултиматум е закана и чекор поблиску до војна – не со Украина, туку со сопствената држава“, порача Медведев на мрежата X.Конфликтот меѓу двете светски сили сѐ повеќе се префрла и на полето на остри јавни изјави, закани и меѓусебни обвинувања, што дополнително ја заострува меѓународната политичка клима.

Свет | пред 6 месеци

Москва тврди: „Го освоивме Часив Јар – тврдината на украинската војска, елиминирани се илјадници војници“

Руското Министерство за одбрана објави дека руските сили го зазеле градот Часив Јар во Доњецката област, кој важи за едно од најсилно утврдените украински упоришта во источна Украина. Според соопштението, „офанзивата на единиците на Јужната група на сили резултирала со ослободување на градот“, пренесе новинската агенција ТАСС.Министерството дополнително тврди дека во текот на операцијата е уништена „најголемата група украински војници во историјата на специјалната воена операција“, посочувајќи дека станува збор за „буквално илјадници“.За овие тврдења засега нема независна потврда, а украинските власти сè уште официјално не се огласиле за состојбата во Часив Јар.Падот на Часив Јар, заедно со евентуалното губење на логистичкиот центар Покровск, може значајно да ја отежни украинската одбрана во регионот.Украинските сили со месеци се бранеа од утврдените позиции во градот, одолевајќи на руските напади. Часив Јар беше една од клучните точки за задржување на руското напредување во Донбас.

Свет | пред 6 месеци

Трамп му се закани на човекот на Путин: „Кажете му на пропаднатиот поранешен претседател на Русија да внимава што зборува!“

Американскиот претседател Доналд Трамп упати остра порака до Дмитриј Медведев, поранешен претседател и еден од блиските соработници на Владимир Путин, обвинувајќи го за „опасна реторика“ во контекст на влошените односи меѓу САД, Русија и Индија.„Кажете му на Медведев, пропаднатиот поранешен претседател на Русија, кој мисли дека сè уште е претседател, да внимава што зборува. Влегува на многу опасна територија!“, напиша Трамп на својата платформа Truth Social, откако Медведев му возврати со жестока порака за неговата надворешна политика.Изјавата на Трамп доаѓа во време кога САД најавија нови царини за Индија поради нејзините блиски односи со Русија, вклучително и набавка на руско оружје и енергенси. Напнатоста дополнително ескалираше со предупредувањата кон Москва за рокови поврзани со војната во Украина.Медведев му возврати преку платформата X (поранешен Twitter), оценувајќи дека ултиматумите на Трамп не се закана само за Русија, туку и за САД: „Не оди по патот на Поспаниот Џо“, му порача, алудирајќи на Џо Бајден.Реториката меѓу поранешните и актуелните светски лидери повторно ги вжештува тензиите во нестабилен геополитички момент.

Свет | пред 6 месеци

Коцевски по интерпелацијата – наместо оставка, фотосесија: Ја чека ли изборната тишина за да „купи“ време?

Откако доби интерпелација изгласана од пратениците што го избраа, државниот обвинител Љупчо Коцевски – наместо оставка или барем став – си продолжи по агенда. Нема одговор до јавноста, без прикажано чувство на морална обврска, тој испрати покана до медиумите. За фотографирање.„Јавниот обвинител на Република Северна Македонија Љупчо Коцевски и Основниот јавен обвинител на ОЈО Битола Оливера Нечаковска на 31.07.2025 година (четврток) во 12:00 часот ќе го означат официјалниот старт на работата на Истражниот центар во Основното јавно обвинителство Битола. Ви проследуваме покана за настанот“ – стои во официјалната покана до медиумите.Додека институционалната доверба се распаѓа, Коцевски се фотографира пред нов истражен центар, како ништо да не се случило. Истражниот центар – чија работа можеше да започне и без неговото присуство – стана уште еден пример за квази-свечености во правосудството, каде формата го јаде суштинското.Според неофицијални извори, Коцевски нема намера да поднесе оставка, иако му е изгласана интерпелација. А имал и тактика – да добие на време. Ова останува непотврдено.Скоро е извесно распишување на локалните избори, а со тоа стапува на сила законска забрана да нема разрешувања и нови именувања. Ова му овозможува на државниот обвинител „да се шлепа“ до завршување на изборите, да продолжи со мандатот како ништо да не се случува, и да инкасира плата од државата, додека репутацијата на обвинителството паѓа, а довербата се урива.Во меѓувреме, критики доаѓаат од сите страни – и од владејачкото мнозинство, и од опозицијата. Обвинителството се обвинува за селективна правда, за тивка соработка со моќни политички актери, и за неспособност да одговори на високиот јавен интерес.

Македонија | пред 6 месеци

(Видео) Први снимки – Москва молчи, расте загриженоста: Што се случи со базата преполна со нуклеарно оружје по разорниот земјотрес?

По катастрофалниот земјотрес од 8,8 степени што ја погоди руската Камчатка, во јавноста се појавија првите снимки од оштетувања во пристаништето Петропавловск-Камчатски. Но токму она што ги вознемирува светските аналитичари е – молкот на Москва. Само 120 километри од епицентарот се наоѓа Вилучинск – најголемата база на руската Пацифичка флота, дом на стратешките нуклеарни подморници од класата „Бореј“ и „Бореј-А“, опремени со интерконтинентални ракети „Булова“. Тоа е единствената база на рускиот Далечен исток со инфраструктура за одржување на вакво оружје.И додека социјалните мрежи се полнат со снимки од пукнати пристаништа и разнишани објекти, од Министерството за одбрана на Русија – тишина. Нема информација дали некоја подморница била на ремонт или во морето во моментот на потресот, ниту каква е состојбата со безбедноста на нуклеарните системи. Камчатка е дел од таканаречениот „Пацфички огнен прстен“, познат по земјотреси и вулканска активност. Но никогаш досега силен потрес не ја погоди толку блиску најчуваната воена тајна на Русија. „Овие бродови не носат само ракети – тие се мобилни нуклеарни силоси“, предупредуваат аналитичари. Во отсуство на официјални информации, загриженоста се претвора во шпекулации – дали нешто навистина се случило? И ако да, зошто никој не зборува за тоа?Светот сега не го загрижува само природниот удар – туку и тишината што доаѓа од една база преполна со нуклеарно оружје.

Свет | пред 6 месеци

Ревизорите алармираат: Неконтролирани долгови и судски тужби од странски клиники за ФЗОМ

Фондот за здравствено осигурување на Македонија (ФЗОМ) повторно е предмет на сериозни забелешки од страна на Државниот завод за ревизија. Во последниот извештај за 2023 година, ревизорите изразија „мислење со резерва“ и нотираа бројни системски недостатоци – од нерешен имотен статус на објекти, преку слабости во информациските системи, до ризици при лекувањето на осигуреници во странство.Голем дел од недвижностите со кои располага ФЗО не се заведени во деловните книги и немаат регулиран правен статус. Дел од објектите потекнуваат од стечајни постапки, но не се проценети, а некои ги користат трети лица без формален договор, при што постои опасност од нивно отуѓување.Ревизијата укажува и на значително зголемени побарувања од странски здравствени установи, кои во 2023 година достигнале износ од 300 милиони денари. Недоволната контрола врз доставените фактури и медицинската документација довела до судски тужби од странски болници.Во извештајот се посочува и дека Фондот функционира без усвоена ИТ стратегија и без соодветен ИТ кадар, што довело до сериозни последици. Во 2023 година, ФЗО бил цел на сајбер напад кој довел до парализа на системот. Исто така, ревизорите предупредуваат дека не се користат сите лиценцирани софтвери, а повеќе модули се нефункционални или се користат само делумно.Од вкупно 12 препораки што биле дадени при претходната ревизија, дел останале неспроведени. Заводот за ревизија сега повторно бара итни чекори – од ажурирање на ИТ стратегијата и пополнување на празните раководни позиции, до воспоставување комплетна контрола врз финансиските и имотните процеси.И покрај досегашните обиди за подобрување, Фондот, според ревизорите, сè уште се соочува со сериозни структурни предизвици. Најавената ИТ ревизија за 2025 година треба да покаже дали институцијата ќе доживее суштинска трансформација или ќе продолжи да работи под зголемени ризици кои можат да ја загрозат здравствената заштита на осигурениците.

Македонија | пред 6 месеци

Од ноември нови авиолинии од Скопје до Мадрид и Стокхолм, од декември и до Прага, Бари и Келн

Пет нови директни авиолинии ќе бидат воспоставени од скопскиот аеродром до европски дестинации – најави вицепремиерот и министер за транспорт Александар Николоски на денешната прес-конференција. Според него, веќе е потпишан договорот за новите линии, кои ќе донесат повеќе туристи, бизнис можности и поврзаност за македонските граѓани.„Потпишавме договор за пет нови дестинации кои што ќе се оперираат од скопскиот аеродром. Пет нови авиолетови кои ќе значат повеќе туристи во Македонија, повеќе бизнис во Македонија и повеќе можности за сите граѓани на Македонија“, изјави Николоски.Првите летови ќе започнат во ноември и декември годинава„Веќе од месец ноември почнува редовна авионска линија Стокхолм – Скопје. Исто така, веќе од месец ноември почнува редовна авионска линија Мадрид – Скопје, а од декември почнува редовна авионска линија Бари – Скопје, од декември Келн – Скопје и исто така од декември почнува и редовна авионска линија Прага – Скопје“, информираше вицепремиерот.Со ова, бројот на новоотворени линии во изминатата година се искачува на 16.„Со 11 нови линии кои што веќе ги отворивме и овие 5, веќе зборуваме за 16 нови авиолинии кои ги отворивме за само една година“, нагласи Николоски.Министерот посочи и дека бројките покажуваат раст на патничкиот сообраќај на двата македонски аеродрома.„Само во првата половина од оваа година од скопскиот и охридскиот аеродром вкупно се превезени 1,5 милион патници, што е зголемување за 5 % од скопскиот аеродром и 11 % на охридскиот аеродром.“Николоски најави и нови позитивни вести во следниот период.„Ќе има уште нови авиолинии. Нека се со среќа авиолиниите од Стокхолм, Мадрид, Бари, Келн и Прага кои што ќе значат многу повеќе туристи за Македонија, многу повеќе бизниси и повеќе можности за граѓаните на Македонија. Нека е аирлија!“, порача Николоски.

Македонија | пред 6 месеци

Намалување на работното време на 6 часа за млади родители до шесттата година на детето! Левица поднесе пакет закони

Левица поднесе пакет закони за младите и младите брачни паровиПратеничката група на Левица во Собранието поднесе пакет на предлог-закони за млади, како одговор на тоа како државата да ги стимулира младите да останат и формираат семејство во државата. Пратеникот Амар Мециновиќ на прес-конференциja истакна дека овој иницијален пакет од шест предлог-закони произлегува директно од предлози на младите, a целта е да се овозможат подобри услови за формирање на семејство и за стапување во брачна заедница.Пакетот закони на Левица ги опфаќа следниве предлози:1. Воведување горна граница на кириите (моментално има само долна граница);2. Државна поддршка за купување на прв дом за млади, односно државна гаранција за 95% од станбените кредити (наместо сегашното барање за 15% учество за станбен кредит, тој да се намали на најмногу 5% и државата да ја гарантира отплатата на тие кредити за младите);3. Простување на дел од станбените кредити при добивање второ, трето дете итн.4. Ваучер од 6.000 денари за неформална родителска грижа;5. Намалување на работното време на 6 часа за млади родители до шесттата година на детето;6.Бесплатен јавен превоз за родители со деца до 6 години.Како што истакна Мециновиќ, овој пакет закони произлегува после апсурдната понуда на владата за воведување на данок на немажени и неженети. И во ситуација на апсурдни предлози од владата, Левица како опозиција смета дека младите треба да посочат кон какви предизвици треба да се фокусираме како Собрание и која институционална помош е потребна на нашите млади.Левица цени дека државата нема да ги стимулира младите да формираат семејство со дополнителна репресија и нерационални мерки како најавениот данок за немажени/неженети. Единствен стимул, според партијата, е решавање на горливите проблеми и обезбедување на достоинствени услови за живот.

Македонија | пред 6 месеци

Поддржувачот на српските студенти доби отказ! „Да не ми ја пренесеа веста студентите, немаше ни да знам дека сум отпуштен“

Српскиот режисер, сценарист и писател Горан Марковиќ, кој јавно застана зад повеќемесечните студентски протести, соопшти дека е отпуштен од Академијата за уметности во Нови Сад. Тој вели дека за тоа дознал од приватна комуникација со студенти, а како можно образложение за отказот ја наведува неговата поддршка за движењата против апсењата на студенти и професори, пренесува телевизијата Н1.„Да не ми ја пренесоа оваа вест приватно – немаше ни да знам дека сум отпуштен“, напиша Марковиќ на својот профил на Фејсбук.Според неговото објаснување, станува збор за студенти од докторските студии на Академијата за уметности, кои го информирале дека повеќе не е дел од наставниот кадар по предметот Поетика на големите режисери.„Претпоставувам дека оваа одлука е донесена поради мојата поддршка на студентските протести и изјавата дека нема да држам настава додека факултетот е под блокада, а студентите и професорите се апсени“, напиша Марковиќ.Тој додава дека есента потпишал нов договор за продолжување на соработката, но откако се случила трагедијата на железничката станица во Нови Сад, при што загинале 16 лица, добил информација дека часовите се одложуваат до понатамошно известување. Од тогаш, вели, никој од Академијата не го контактирал, договорот не му бил раскинат, ниту му биле исплатени средствата за одржаната настава.„Ако сега ме поканат да продолжам да предавам – не би се согласил со тоа, ниту директно, ниту преку интернет, сè додека блокадата на факултетот продолжува, додека полицијата апси и безмилосно тепа студенти и бунтовни граѓани во Нови Сад и другите градови во Србија“, изјави Марковиќ.Горан Марковиќ е истакнат автор кој припаѓа на генерацијата на т.н. „прашка школа“, заедно со режисерите Рајко Грлиќ, Лордан Зафрановиќ, Горан Паскаљевиќ и Срѓан Карановиќ. Предавал режија на Факултетот за драмски уметности во Белград, член е на Европската академија за филмска уметност во Брисел и е добитник на повеќе од 30 југословенски, српски и меѓународни награди за филм и театар.фото: Х

Свет | пред 6 месеци

Палестина добива нова поддршка: Канада и Малта ќе ја признаат во септември!

Канада и Малта најавија дека во септември ќе ја признаат државата Палестина, приклучувајќи се на напорите за обновување на решението со две држави (Two-state solution), предлог за решавање на израелско-палестинскиот конфликт, кој предвидува создавање две независни и суверени држави – Израел и Палестина, кои би коегзистирале една до друга во мир. Со ова се предвидува завршување на деценискиот израелско-палестински конфликт. Со тоа, двете земји, односно Канада и Малта се приклучуваат на дипломатските чекори на Франција, како и најавата на Обединетото Кралство, во пресрет на годишното заседание на Генералното собрание на Обединетите нации.Одлуката на Канада беше соопштена по седница на владата, на која премиерот Марк Карни информираше дека признавањето официјално ќе биде објавено на Генералното собрание што започнува на 23 септември. Според него, потегот ќе биде условен со одржување демократски избори во Палестина во 2026 година, без учество на Хамас, како и со целосна демилитаризација на идната палестинска држава. Овие услови, како што посочи, се веќе прифатени од палестинскиот претседател Махмуд Абас во писмо од 10 јуни.Од страна на Малта, постојаниот секретар во Министерството за надворешни работи, Кристофер Кутажар, ја објави одлуката за време на продолжената седница на Генералното собрание на ОН. Тој истакна дека Малта доследно го поддржува правото на самоопределување на палестинскиот народ и дека признанието претставува „конкретен чекор за претворање на тоа решение од концепт во реалност“. Претходно, премиерот Роберт Абела преку социјалните мрежи потврди дека оваа одлука е дел од надворешната политика на земјата за поддршка на траен мир на Блискиот Исток.Со оваа најава, Малта, како членка на Европската унија и поранешна британска колонија, ќе се приклучи на повеќе од 145 земји ширум светот кои веќе ја имаат признато Палестина, вклучувајќи и над десетина европски држави.Во вторникот, британскиот премиер Кир Стармер изјави дека Обединетото Кралство ќе ја признае Палестина пред почетокот на Генералното собрание во септември, освен ако Израел не се согласи на прекин на огнот и воспоставување долгорочен мировен процес во следните осум недели.Франција, Британија и Канада се трите најголеми западни сили членки на Г7 кои најавија ваков чекор. Израел и САД, кои остануваат против решението со две држави, го бојкотираат состанокот во ОН, иако 125 држави ја поддржуваат иницијативата.Израелскиот амбасадор во ОН, Дани Данон, остро ги критикуваше земјите учеснички, обвинувајќи ги дека со поддршката „легитимираат тероризам“ и дека „даваат празни изјави додека нашите заложници се во тунелите на Хамас во Газа“.Во одговор, Кутажар од Малта изјави дека признанието не е симболичен чин, туку „конкретен чекор кон праведен и траен мир“.На седницата, која беше прекината откако зборуваа 128 говорници, високи претставници повикаа на итна акција и изразија „непоколеблива поддршка“ за решението со две држави. Беше усвоена и „Њујоршка декларација“, седумстраничен документ кој предлага патоказ за завршување на конфликтот и формирање на независна, демилитаризирана палестинска држава што ќе коегзистира со Израел и ќе се интегрира во поширокиот регион.Дополнително, 15 западни држави усвоија документ под назив „Њујоршки повик“, со кој се повикуваат сите земји што сè уште не ја признале Палестина, да го сторат тоа. Во документот се наведуваат шест држави што веќе ја признале, девет кои најавиле позитивен став, вклучувајќи ги Малта и Канада, и седум земји кои допрва треба да се изјаснат, меѓу кои Австралија, Финска, Луксембург и Португалија.Постојаниот претставник на Саудиска Арабија во ОН, Абдулазиз Алвасил, соопшти дека финалната верзија на документот е испратена до сите 193 земји-членки и ќе остане отворена за потпишување до почетокот на септември.фото: Unsplash

Свет | пред 6 месеци

По интерпелацијата – пркос од Коцевски: „Не поднесувам оставка, имаме цврсти докази за најголемите случаи „Онкологија“, „Пулс“ и „Крмзов“

Случаите „Онкологија“, „Пулс“ и „Крмзов“ се меѓу приоритетите на обвинителството и, според државниот јавен обвинител Љупчо Коцевски, за нив веќе има силни и конкретни докази. Иако Собранието вчера му изгласа недоверба преку интерпелација, Коцевски останува на ставот дека нема да се занимава со политика и дека неговиот фокус е насочен исклучиво кон правдата.„Политиката ја оставам на политичарите и ќе употребам еден тежок збор, а тоа е пркос, пркос кон предметите за кои во моментов ве уверувам дека имаме многу цврсти докази да ги добиеме на суд: „Онкологија“ – случај за кој и лично чувствувам обврска да го докажеме, потоа случајот со струмичкиот бизнисмен Крмзов – докажуваме криминал тежок 90 милиони евра, потоа убиствата причинети од криминалните пресметки и секако случајот за кој се обврзав пред семејствата дека ќе има правна завршница, а тоа е пожарот во дискотеката „Пулс“. Ние како обвинителство обезбедивме илјада докази за два ипол месеци срочени во обвинение за сторено кривично дело „Тешки дела против општата сигурност“, сега зависи од судот за колку време случајот ќе има судска разрешница“, изјави Коцевски во интервју за весникот Вечер.Тој додава дека во овој момент не размислува за оставка.

Македонија | пред 6 месеци

Стојаноски: Направивме многу за ГОБ „8 септември“, реконструкција на хируршкиот блок, модерна опрема и кадровско екипирање

На денешната трибина која се одржа во Штип на тема „Реформи во здравството-Ги градиме темелите на промените“, се обрати Синиша Стојаноски, член на Комисија за здравство на ВМРО-ДПМНЕ и директор на ГОБ „8 Септември“, кој истакна дека е наследена лоша состојба во здравствениот сектор, многу финансиски долгови и затворени одделенија долгови, притоа истакна дека за една година е направено многу во тој дел, со овозможување секој граѓанин да има пристап до здравствените услуги.„Пред една година кога ги наследивме институциите во здравствениот систем сфативме дека навистина треба да повлечеме една линија и да почнеме од почеток. За жал тоа не беше почнување од нула туку од минус. Начекавме институции со големи финансиски долгови, со затворени одделенија, без нови методи и без актуелни методи кои треба да ги задоволуваат потребите на граѓаните како здравствена услуга конкретно на ГОБ 8 септември“, рече Стојаноски.Стојаноски истакна дека сето она што е ветено во предизборието се остварува, со тоа што во секое одделение во ГОБ „8 септември“ е воведена една до две нови дијагностички терапевтски процедури и после 40 години е направено реновирање на хируршкиот блок.„Она што за една година успеавме да го направиме е да се држиме до она што беше предизборно ветување, најпрво да се потрудиме да направиме една рамномерна регионализација, да овозможиме пристап на граѓаните до услугите коишто секоја институција треба да ги нуди и тука морам да признаам дека веднаш наидовме на сериозна поддршка од Фондот за здравствено осигурување, тие имаа навистина слух за потребите на ГОБ „8 септември“. Секое од одделенијата доби задолжение да воведе минимум една до две нови дијагностички и терапевтски процедури, повторно наидовме на слух од Фондот за здравствено осигурување, добивме финансии како од аспект на опрема којашто е модерна и потребна за оваа цел, така и со кадровско екипирање. Се прави комплетна реконструкција на хируршкиот блок. Болницата треба и заслужува да прерасне во регионален центар, делата ќе зборуваат за нас“, вели Стојаноски.

Македонија | пред 6 месеци

Клековски: За само една година успеавме да направиме две промени во позитивната листа на лекови која не беше обновена 10 години, го зголемивме и бројот на ин витро од 3 на 6

„Не почнавме од нула, туку од минус. 10 години во Македонија не беше обновена позитивната листа на лекови. 10 години од 2014-та година ниедна промена на позитивната листа, за една година ние успеавме да направиме две промени. Во првата промена 9 генерички лекови, во последната 2 онколошки лекови кои од следниот понеделник ќе бидат достапни во аптеките“, истакна членот на ИК на ВМРО-ДПМНЕ и директор на ФЗОМ, Сашо Клековски на денешната трибина во Штип на тема „Реформи во здравството – Ги градиме темелите на промените“.Клековски продолжи и додаде:„Многу се фокусиравме на лековите, благодарејќи на поддршката на владата одвоивме неверојатни пет милијарди денари за иновативни лекови, тоа е 70% повеќе од 2024-та година или двојно повеќе до 2023-та година. Тоа се многу повеќе пари, една милијарда повеќе за онкологија, повеќе пари за хематологија, педијатрија. Ова не се само пари, ова се животи спасени и олеснети. Стабилно снабдување на онкологија и хематологија, сите пациенти на неврологија со мултипла склероза опфатени. Луѓето на кои им треба хормон раст не чекаат веќе на тоа, и многу такви примери“, вели Клековски.Клековски истакна дека бројот на ин витро што го покрива ФЗОМ наместо 3 сега е зголемено на 6 и исто така процесот за добивање известување за барателите на ин витро е дигитализиран.„Зошто збориме за ин витро? Едно од 11 или 12 бебиња што се раѓаат во Македонија се зачнуваат со ин витро, сите говориме за демографија, за демографски политики но, мора да сфатиме дека ова не е само мала потреба на мал број луѓе, туку е една голема потреба на голем број луѓе бидејќи едно од 11 бебиња се зачнува со ин витро. Тоа што се направи со промена на законот за здравствено осигурување е само дел од работите што ги зачнавме, значи се зголеми бројот на ин витро што ги поддржува ФЗОМ од 3 на 6 поддржани ин витро, меѓутоа ние направивме уште повеќе, овозможивме сите тие 6 обиди да бидат без партиципација и многу поважно, го скративме периодот на чекање од 3 месеци на 2 недели. Во ФЗОМ секоја недела работи комисијата и ажурно се одобруваат, не треба ургенции, не треба врски, не треба јавување, сите што ги исполнуваат условите имаат шанса да добијат ин витро. Уште еден чекор понатаму обезбедивме дигитализација на добар дел од процесот и наместо како до сега што ваучерите ги испраќавме по пошта се губеа некаде по пошта сега се дигитални и стигнуваат на барателите за ин витро“, заклучи Клековски.

Македонија | пред 6 месеци

Претседателката Гордана Сиљановска-Давкова прими претставници на Советот на амбасадори

Сиљановска-Давкова денеска прими претставници на Советот на амбасадори, предводени од претседателката, амбасадорката Александра Наќева Ружин. На средбата присуствуваа и амбасадорите: Мухамед Халили, Љупчо Арсовски, Иљаз Сабриу, Тихомир Илиевски и Ивица Боцевски.Тие изразија подготвеност за соработка и поддршка на институцијата Претседател, преку утврдувањето на надворешно-политичките приоритети, независни и стручни анализи, јавни дебати, совети и консултации за меѓународните прашања.Беа детектирани потенцијалните области за меѓусебна соработка и понудени идеи, предлози и иницијативи, коишто би придонеле за зајакнување на надворешно-политичките капацитети на државата.Со цел унапредување на македонската дипломатија, соговорниците ја потенцираа важноста од именување на кариерни амбасадори како прв избор, истакнувајќи го значењето на нивното искуство за соодветно и достоинствено претставување на земјава во светот.Претседателката ги поздрави амбициите на Амбасадорите за поттикнување на професионален дијалог за прашања од национален интерес и изрази подготвеност за натамошна комуникација. Укажувајќи дека првата слика за државата е најбитна, Сиљановска-Давкова посочи дека искуството и потенцијалот што го имаат членовите на Советот може да претставува драгоцена помош во носењето на одредени одлуки.На средбата таа ги реафирмираше заложбите за правична застапеност на жените во дипломатијата и придобивките од формирање на Регионален центар за извонредност за жени, мир и безбедност.Соговорниците разменија мислења за македонската надворешна политика, односите со соседите, за Преспанскиот договор и членството на државата во меѓународните организации.

Македонија | пред 6 месеци

(Видео) „Мајка ми ми ги чува парите, чичко ми ми е втор татко“ – емотивна исповед на Никола Станишиќ

Никола Станишиќ, победникот во музичкото шоу „Ѕвездите на Гранд“, зад сценската слава носи приказна која ја објаснува тишината помеѓу аплаузите – приказна за скромност, одговорност и семејна љубов. Роден во скопското населено место Волково, Никола во „Вечер во Охрид со Ландов“, раскажува дека животот не му го подготвил лесниот пат. Растел без присуство на татко, а улогата на столб на семејството ја презел уште тој.„Мене ме гледаа како машкото во семејството, главниот“, вели тој.Најголемата поддршка – неговата мајка.„Секогаш беше тука за мене, и во добро и во лошо. Никогаш не ме караше. Секогаш со добро ми велеше: 'Никола, не треба вака'. Да не беше таа, денар немаше да соберам. Сè уште после свирки, парите ѝ ги давам на неа – таа ми ги чува“, признава со насмевка.Во неговиот круг на доверба се и трите сестри, за кои – вели – му се и другарки и советнички. Знаејќи колку треба да вложува сега, тие му ја понудиле заштедата, за да продолжи по патот на успехот.„Седнаа сите три и ми ги дадоа сите нивни заштедени пари. ‘Никола, вложи ги, ова е за тебе’ – ми рекоа. Тоа не се заборава“, додаде тој.Особено емотивно зборува и за чичко му, кого го нарекува свој „втор татко“.„Не бил татко ми тука во најважните моменти, ама чичко ми беше. Дури и кога ќе одев на одмор, ми ставаше пари во кола. Во финалето на Гранд – дојде, ми остави пари. Тивко, без збор, само рече ‘Еве ти чичин’. Такви работи не се забораваат“, додаде тојНикола Станишиќ денес ја живее својата музичка приказна, но не заборава од каде почнал. Неговата благодарност, скромност и љубов кон семејството – остануваат столбот врз кој ја гради иднината.Целиот разговор со него, изгледајте го тука:?t=3173

Магазин | пред 6 месеци

Починало бебе, мртво е донесено на Клиника

Едноиполмесечно бебе е донесено без знаци на живот на Клиниката за детски болести во Скопје. Според информациите, бебето било донесено без знаци на живот во раните утрински часови на 29 јули, а дежурен лекар ја констатирал смртта. Настанот бил пријавен во полиција, а по наредба на јавен обвинител, телото на починатото бебе е предадено на обдукција за да се утврдат причините за смртта.-На 29.07.2025 во 07.30 часот во СВР Скопје, од Детска клиника Скопје било пријавено дека кај нив во 06.40 часот било донесено едноиполмесечно машко бебе од Скопје без знаци на живот. Лекар констатирал смрт, а по насоки на јавен обвинител телото на бебето било предадено на обдукција, информираат од МВР.

Скопје | пред 6 месеци

Лековите анастрозол и летрозол за онколошките пациенти од 4. август ќе се земаат директно од аптека

Таблетарната терапија анастрозол и летрозол, наменета за онколошки пациенти, од понеделник (4 август) ќе биде достапна во аптеките. Пациентите ќе можат да ги подигнат овие лекови со редовен рецепт, откако претходно ќе добијат извештај од онколог и ќе се обратат кај матичниот лекар за издавање на рецепт.Како што информираат од Фондот за здравствено осигурување, денеска ќе биде објавен новиот шифрарник што ќе стапи на сила од 4 август. Партиципацијата за лековите ќе изнесува околу 50 денари.Во однос на хормонската инјекција ресилиго, која исто така ја примаат дел од онколошките пациенти, од Клиниката за радиотерапија и онкологија најавуваат дека во текот на следната недела пациентите ќе добијат известување кога и каде ќе ја примаат терапијата.

Македонија | пред 6 месеци

Како Камчатка преживеа разорен земјотрес без жртви: Најсилен потрес од 1952 година, но со добар крај

И покрај разорниот земјотрес со јачина од 8,8 степени според Рихтер кој ја погоди руската Камчатка, засега не се пријавени човечки жртви, а само неколку лица се здобиле со полесни повреди. Според Руската академија на науки, станува збор за најсилен земјотрес во регијата од 1952 година наваму, и еден од десетте најсилни воопшто регистрирани во светот. Настанот предизвика и цунами со бранови високи до четири метри, кои делумно го потопија градот Северо-Курилск.Сепак, разорноста на потресот беше амортизирана од неколку клучни фактори. Епицентарот се наоѓал во Тихиот Океан, околу 125 километри оддалечен од најблискиот голем град, Петропавловск-Камчатски. Иако потресот предизвикал оштетувања на објекти, како детски градинки, клучната инфраструктура, вклучително и меѓународниот аеродром, останала функционална.Една од причините зошто последиците беа минимални е и ретката населетост на Камчатка – целиот полуостров брои околу 340.000 жители. Дополнително, како што објаснуваат експертите, локалните власти и населението имале висок степен на подготвеност. Биле спроведени навремени евакуации, вежби и редовни обуки за постапување при катастрофи. „Најважно е што нема загинати. Нашите жители се искусни, знаат како да постапат. Над 2400 лица се евакуираа навреме на повисоки предели и се безбедни“, изјави гувернерот на регионот, Валериј Лимаренко. Градоначалникот на Северо-Курилск исто така потврди дека „сите се наоѓаат над безбедносната линија за цунами“.Камчатка, како дел од т.н. „Пацифички огнен прстен“, е еден од најсеизмички активните региони на планетата, каде честопати се случуваат силни земјотреси и вулкански ерупции. Според научниците, примерот од Камчатка покажува колку се важни превенцијата, сеизмички безбедната инфраструктура и едукацијата на населението при природни катастрофи од ваков обем.

Свет | пред 6 месеци

Утревечер посебен режим на сообраќај во Скопје

На 31.07/01.08.2025 година во периодот од 20:00 до 04:00 часот, поради снимање на филм затворен ќе биде во двете насоки на движење бул.„11-ти Октомври“ на потегот од крстосница со ул.„Даме Груев“ до крстосница со бул.„Кочо Рацин“ во Скопје.Од тие причини Единицата за безбедност на патниот сообраќај ќе преземе мерки за посебен режим на сообраќај, при што сообраќајот ќе се пренасочува по околните сообраќајници.МВР апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвива настанот.

Скопје | пред 6 месеци

Обвинение за возачот на моторот кој го усмрти Југо на пешачката патека на Вардар: Го прегазил и избегал, го оставил и сопатникот

Основното јавно обвинителство Скопје поднесе обвинение против едно лице за тешки кривични дела во сообраќајот, по сообраќајна несреќа со смртни последици што се случила на 1 јули 2025 година во вечерните часови во центарот на Скопје.Според обвинението, лицето управувало мотор „Кавасаки“ по пешачката патека на улицата „Јордан Хаџи Константинов – Џинот“, и тоа без да поседува возачка дозвола. Иако моторот се движел со брзина од 35 километри на час, надлежните утврдиле дека тоа е небезбедна брзина за условите – пешачка зона на која не смее да се вози моторно возило.Обвинетиот не успеал да го запре моторот навреме и удрил во 67-годишниот пешак Југослав Николовски. При ударот, повреден бил и сопатникот на моторот. Наместо да им помогне, обвинетиот го оставил моторот и избегал од местото на несреќата.Николовски со тешки повреди бил пренесен на Ургентниот центар, каде подоцна починал. Сопатникот на моторот се здобил со полесни повреди.Обвинетиот се товари за две кривични дела:Тешки дела против безбедноста на луѓето и имотот во сообраќајот, иНеукажување помош на лице повредено во сообраќајна незгода.Обвинителството посочува дека во текот на истрагата се обезбедени доволно докази кои го потврдуваат обвинението.

Скопје | пред 6 месеци

Драматична сцена на аеродромот во Анталија: Патници евакуирани од авион кој чадел

Патници од авион на Turkish Airlines беа итно евакуирани преку тобогани откако во авионот се појавил чад по слетувањето на аеродромот во Анталија, Турција.Инцидентот се случил кога „Боинг 777“, кој полетал од Истанбул, се движел по пистата во туристичкото летувалиште Анталија. Тимовите за итни интервенции препорачале итна евакуација како мерка на претпазливост, со цел заштита на безбедноста на патниците, потврди портпаролот на авиокомпанијата, Јахја Устун. Според него, сите патници биле навреме евакуирани, без повредени. Точниот број на патници и членови на екипажот не е соопштен.Првичниот технички преглед покажал дека чадот настанал поради дефект на хидраулична цевка. Во тек се дополнителни технички проверки на леталото.

Свет | пред 6 месеци

Јапонија евакуира нуклеарна централа поради разорен, имаат страв од повторување на трагедијата од 2011 година

Моќен земјотрес со магнитуда од 8,8 степени според Рихтеровата скала во средата утрината во 11:24 часот по локално време ја погоди Камчатка, полуостров на рускиот Далечен Исток. Земјотресот предизвика серија од четири цунами бранови кои удрија во градот Северо-Курилск, во областа Сахалин.Брановите продолжија кон источниот дел на Пацификот, достигнувајќи ги и западните брегови на САД. Националната метеоролошка служба на САД соопшти дека првите покачувања на нивото на морето се регистрирани во градот Кресент Сити во северна Калифорнија, блиску до границата со Орегон, каде што е измерен бран со височина над 30 сантиметри.Најавени се и нови бранови во текот на денот.Според Податоците на Пацифичкиот центар за предупредување од цунами, бран со височина од 1,74 метри е забележан во Кахулуи, на островот Мауи, а бран од 1,5 метар е регистриран во Хилу, на Хаваите.Во Јапонија, како мерка на претпазливост, беше евакуирана нуклеарната централа Фукушима. Засега нема информации за повредени лица.Овој настан ја вознемири јавноста во Јапонија, потсетувајќи на катастрофалниот цунами од 2011 година кој предизвика нуклеарна хаварија во Фукушима Даичи и одзеде над 18.000 човечки животи.Неколку часа подоцна, првите бранови ги зафатија и Хаваите. Пацифичкиот центар за предупредување соопшти дека е намалено нивото на тревога за Хаваите. Иако не се очекува разорен цунами, предупредуваат на можно појавување на посилни бранови, поплави во ниските подрачја и опасни струи.„Граѓаните кои беа евакуирани може безбедно да се вратат во своите домови“, изјави гувернерот на Хаваи, Џош Грин.Граѓаните се повикуваат да внимаваат и да возат внимателно, особено во потенцијално поплавени зони.Меѓународниот аеродром во Хонолулу повторно е отворен, а Хавајскиот оддел за сообраќај соопшти дека и морските пристаништа ќе бидат ставени во функција.фото: Х

Свет | пред 6 месеци

Ина Многуфина: „Кога исчезнува човек, се појавуваат монструми со тастатури - жртвите не заслужуваат второ убивање со коментари“

Во моментите кога јавноста е вознемирена од исчезнување на лице, особено кога станува збор за млади, социјалните мрежи честопати стануваат простор за дезинформации, осуди и штетни коментари. Ина Многуфина реагираше со остар став на оваа појава, предупредувајќи на опасноста од ширење непроверени гласини и дополнителна виктимизација на семејствата кои веќе се соочуваат со тешка траума.Имам приметено, штом некој исчезне и почне потрага секогаш се појавува некоја бедотија мизерна и проста која ќе тргне да раскажува глупости за семејството по интернет. Веројатно за внимание бидејќи таа потреба им е поголема од емпатијата и не размислуваат дека на семејството кое во тој момент поминува низ траума не им треба екстра траума од околината.Тие луѓе, генерално непрегледани, привлекуваат иста таква проста маса во коментари за да осудуваат врз основа на никогаш легитимните информации од изворот претставен како фамилија или сосед. Па така имаме изјави од закарани членови на семејства и соседи кои прават дополнителна виктимизација на жртвите за момент внимание на интернет кое е многу побитно од све. И имаме приказни од типот:* отишла со кумот, се швалерисувале 2 години, не и е гајле сега се негде на плажа си го прчат* мајка и има швалер на девојчето го има тој грабнато дека се имаат скарано нешто, не е секој за мајка* да се провери таткото дали го крие детето во подрум он е чуден вака во продавницаСите овие три случаи завршија трагично, ништо од тоа не беше вистина. А и да има некој некакво инфо тоа во полиција се дава не се пишува во коментари. Семејството потоа продолжува да живее со траумата од загубата и измислените глупости на некоја болна будала распрскани ко трачеви под вестите со апелот за исчезнатото лице.

Коментари | пред 6 месеци

Обвинител без доверба: Дали по „последната будала“, Коцевски ќе биде првиот што не разбира кога е време да се оди?

Откако Собранието со мнозинство гласови изгласа интерпелација за државниот јавен обвинител Љупчо Коцевски, тишината што следеше од неговиот кабинет одекнува погласно од било каква одбрана. Без јавен став, без најави дали ќе си замине или ќе се држи за функцијата како последен бастион на самобендисаност, Коцевски продолжува да молчи.Интерпелацијата е јасен политички и институционален сигнал – на човекот што го избраа преку ноќ, сега не му веруваат. Но дали и самиот ќе разбере што значи тоа?Од Јавното обвинителство – молк. „Скопје1“ побара официјален одговор: дали државниот обвинител ќе си замине по поразот во институцијата која му ја даде функцијата? Одговор нема.На социјалните мрежи, реакциите беа брзи. Адвокати, универзитетски професори и граѓани го критикуваа Коцевски и целокупниот систем што дозволува партиска и нетранспарентна распределба на клучни правосудни функции.Професорот Гордан Калајџиев кратко илустрираше: „Последната будала“ – цитирајќи ја изјавата на покојниот државен обвинител Александар Прчевски, кој уште во 2006 година предвиде што ќе значи оваа функција во држава каде власта го користи обвинителството како продолжена рака.А токму тоа се потврди. Собранието донесе и заклучок дека наводите во интерпелацијата се основани. Истиот ќе биде доставен до Владата и до самиот Коцевски – за кого оставката би била морален, но и логичен чин.Но дали е тоа доволно? И што доколку одлучи да остане, игнорирајќи ја пораката од оние што го донесоа – дека ја загубил довербата?Тогаш Владата може да ја продолжи постапката за разрешување, која ја запре во моментот кога се случи трагедијата во Кочани. До нив, Советот на јавни обвинители достави мислење со кое сметаат дека Коцевски треба да остане на фукцијата, а тие со нивни став можат да го достават до Собранието, каде пратениците можат да гласаат одново за јавниот обвинител да си замине.

Македонија | пред 6 месеци

Трагичен крај по шестдневната потрага: Во Вардар пронајдено телото на исчезнатата 16-годишна Теодора

По неколкудневни напори на службите за спасување, денеска напладне е пронајдено телото на тинејџерката која исчезна во реката Вардар на 24 јули годинава.Од Министерството за внатрешни работи информираа дека вчера околу 12:10 часот, во близина на месноста Старо Градско, во водите на реката било забележано и извлечено телото на малолетната девојка.„Станува збор за 16-годишната девојка која на 24 јули 2025 година потона во реката Вардар на подрачјето на село во општина Градско. Извршен бил увид, а по насока на јавен обвинител телото е предадено на обдукција“, наведуваат од МВР.Несреќата се случи кај селото Уланци, кога двете девојчиња влегле во реката. Едната успеа да биде спасена, додека потрагата по Теодора траеше шест дена.Во деновите по исчезнувањето, семејството на Теодора – нејзиниот брат, мајка и други блиски – преку медиуми и социјални мрежи постојано апелираа за помош и информации за нејзиното пронаоѓање.

Македонија | пред 6 месеци