Манасиевски: Трендафилов јавно призна дека СДС и Левица стојат зад протестите на ССМ

Членот на Централниот комитет на ВМРО-ДПМНЕ Валентин Манасиевски изјави дека претседателот на Сојузот на синдикати на Македонија, Слободан Трендафилов, јавно признал дека зад протестите на ССМ стојат политичките партии СДС и Левица.Манасиевски посочи дека во телевизиско гостување, на Трендафилов му се „измакнала изјава“ во која рекол дека „сите се здружиле против оваа влада“, што, според ВМРО-ДПМНЕ, претставува директен доказ за политичка позадина на синдикалните активности.„Ова е првпат Трендафилов јавно да признае вакво нешто. Со таа изјава се потврдува дека протестите на ССМ не се автентична борба за работнички права, туку дел од политичка агенда на СДС и Левица“, рече Манасиевски.Тој обвини дека раководството на ССМ, по насока на овие партии, ќе направи сè за да не се прифати новиот колективен договор, со кој, како што наведе, минималното зголемување на платите во јавната администрација од април годинава би изнесувало 3.580 денари, а просечното зголемување над 6.000 денари, односно повеќе од 100 евра.Манасиевски потсети дека понудата за зголемување на платите до 40 проценти не е нова и дека постои уште од минатата година, но, според него, токму поради политичка соработка со СДС и Левица, ССМ одбива да ја прифати.„Кога СДС ја испразни државната каса и ја остави државата во длабок минус, Трендафилов и ССМ молчеа. Тогаш не бараа повисоки плати, што дополнително покажува дека нивното делување е политички мотивирано“, истакна Манасиевски.Тој нагласи дека ВМРО-ДПМНЕ не ветувала чуда, туку работа и конкретни резултати, потсетувајќи на зголемувањата на платите во образованието, здравството, полицијата, одбраната и социјалната сфера. Според него, истата политика ќе продолжи и во јавната администрација, како и со поддршка на приватниот сектор за зголемување на платите.„Никој не тврди дека состојбата е идеална, но вистината мора да се каже. ВМРО-ДПМНЕ ќе направи сè што е во нејзина моќ за да го подобри животниот стандард на граѓаните“, порача Манасиевски.

Македонија | пред 3 месеци

Тешки повреди во низа сообраќајки: Излетување од пат, судир на четири возила и несреќа со запрежно возило

Три лица се здобиле со тешки телесни повреди во три одделни сообраќајни несреќи што се случиле во изминатите два дена на подрачјето на Битола, прилепско и радовишко, информираат од Министерството за внатрешни работи.Првата сообраќајна несреќа била пријавена на 1 февруари 2026 година во 04:28 часот во СВР Битола. На улицата „Партизанска“ во Битола, патничко возило „мерцедес“ со бугарски регистарски ознаки, управувано од Б.К. (44) од Скопје, излетало од коловозот и удрило во дрво. Возачот бил пренесен во Клиничката болница Битола, каде што му биле констатирани тешки телесни повреди. Увид на местото извршила увидна екипа на СВР Битола.Втората сообраќајна несреќа била пријавена на 31 јануари 2026 година во 11:10 часот во ОВР Прилеп. На патниот правец Прилеп – Битола, во близина на селото Галичани, се случил судир меѓу четири патнички возила. Во несреќата учествувале возило „сеат“ управувано од Ј.Ј. (31) од Битола, возило „опел“ управувано од С.Т. (38) од селото Горно Оризари, битолско, возило „рено“ управувано од Л.М. (18) од селото Крклино, битолско, и возило „фиат“ управувано од Д.И. (40) од Прилеп. Со тешки телесни повреди се здобил Ј.Ј., а повредите му биле констатирани во Градската општа болница Прилеп. Увид извршила увидна екипа од ОВР Прилеп.Третата несреќа била пријавена истиот ден, 31 јануари 2026 година, во 14:30 часот во Полициската станица Радовиш. На регионалниот пат Р 2431 од планината Плачковица кон Радовиш, запрежно возило натоварено со бесправно исечени огревни дрва излетало надвор од патот. Притоа, со тешки телесни повреди се здобил Џ.Б. (23) од Радовиш, а повредите му биле констатирани во Медицинскиот центар Штип. Увид на местото извршила екипа на ОВР Радовиш.Во оваа несреќа, А.Б. (45) и К.Б., кои исто така се превезувале на запрежното возило, го напуштиле местото на настанот, но по преземени мерки од полициските службеници, возилото и огревните дрва биле пронајдени и предадени на Шумската полиција Радовиш.Од МВР информираат дека се преземаат понатамошни мерки за целосно расчистување на сите три сообраќајни несреќи.

Македонија | пред 3 месеци

Прагот на толеранција за брзо возење ќе се намалува со тек на време, проблеми од утрово нема, вели Мицкоски

Премиерот Христијан Мицкоски изјави дека на првиот ден од почетокот на казнувањето преку системот „Сејф сити“ нема евидентирани поплаки од граѓаните и дека е во постојана комуникација со министерот за внатрешни работи.Тој појасни дека Владата и Министерството за внатрешни работи одлучиле на стартот да го зголемат прагот на толеранција, со цел граѓаните постепено да се навикнат на новиот систем и да не бидат казнувани веднаш. Според него, во моментов прагот на толеранција изнесува 15 проценти, што е над европскиот стандард од 10 проценти, но најави дека со текот на времето ќе се враќаат на тие европски прагови.„Како што ќе се навикнуваат возачите, така постепено ќе се враќаме во европските рамки. Но суштината не е казнувањето, туку да нема сообраќајни незгоди и загубени човечки животи“, истакна Мицкоски.Премиерот изрази очекување дека со целосната примена на „Сејф сити“ ќе дојде до драматично намалување на бројот на сообраќајни прекршоци и изречени казни, нагласувајќи дека проектот е насочен кон зголемување на безбедноста во сообраќајот, а не кон полнење на буџетот.

Македонија | пред 3 месеци

При крајот на оваа пролет ќе се набавуваат камионите за Комунална хигиена-Скопје, а ќе стигаат до крајот на годинава

Преку Министерството за транспорт и во соработка со Светската банка ќе се набават 40 нови возила за потребите на ЈП Комунална хигиена Скопје, најави премиерот Христијан Мицкоски.Тој истакна дека со оваа набавка ќе се реши еден од најголемите долгогодишни проблеми во работењето на претпријатието – застарената и истрошена механизација, која сериозно го отежнувала одржувањето на јавната хигиена во главниот град. Според Мицкоски, состојбата дополнително била усложнета и со превработеност, како и со недоволна ефикасност на дел од вработените.„Со овие 40 камиони значително ќе се подобри состојбата со хигиената во Скопје. Хигиената ни е прв приоритет и ова е конкретен чекор за решавање на проблемот“, рече Мицкоски.Тој најави дека процесот на набавка се очекува да биде заокружен до доцна пролет, а испораката на возилата да започне до крајот на годината. Според премиерот, новата механизација ќе овозможи поефикасна работа на Комунална хигиена и видливо подобрување на чистотата во градот.

Скопје | пред 3 месеци

Ѓорѓиевски: Не може преку ноќ, но мора да се работи на дислокација на цементарницата

Градоначалникот на Скопје Орце Ѓорѓиевски изјави дека прашањето за дислокација на цементарницата „Усје“ претставува долгогодишен, наследен проблем, кој не може да се реши преку ноќ, но нагласи дека институциите за првпат јасно застанале на страната на граѓаните.„Тоа е наследен проблем на сите нас. Мислам дека дислокацијата е можна, но мора да се има предвид дека станува збор за приватна сопственост и не може преку ноќ да се донесе одлука за нејзино преместување. Потребно е системски да се работи на тоа, со цел идните генерации да не се соочуваат со вакви фабрики во населени подрачја“, изјави Ѓорѓиевски.Тој додаде дека Град Скопје целосно ја поддржал иницијативата за дислокација и дека институциите се на страната на граѓаните кои со години алармираат за влијанието врз животната средина и здравјето.„Апсолутно ја поддржавме иницијативата за дислокација и сме на страната на граѓаните. За првпат досега, Владата и Град Скопје застанаа зад граѓаните по ова прашање, додека претходно сите молчеа“, нагласи градоначалникот.Според него, процесот бара време, правна постапка и сериозен пристап, но отворањето на темата и институционалната поддршка, како што рече, претставуваат значаен чекор кон трајно решение на проблемот.

Скопје | пред 3 месеци

Забрзани работи на клучните сообраќајни точки во Скопје, најавен тендер за „Борис Трајковски“

Градоначалникот на Скопје Орце Ѓорѓиевски изјави дека со засилено темпо се работи на неколку клучни инфраструктурни проекти во главниот град и дека дел од нив влегуваат во завршна фаза.Тој посочи дека интензивни активности се одвиваат на клучката кај Момин Поток и на мостот „Љубљанска“, како и дека се наоѓаат при крај постапките за супервештачење, што треба да овозможи пробивање на мостот на релација Гази Баба – Аеродром. Според неговите најави, во наредните десет дена ќе биде распишан тендер за довршување на булеварот „Борис Трајковски“, проект кој, како што рече, конечно треба да биде целосно завршен.Во однос на мостот Аеродром – Керамидница, Ѓорѓиевски објасни дека постојат проблеми со околу 30 објекти кои сè уште се нерешени и се во приватна сопственост. Како што наведе, спорот се води со еден објект кај кој експропријацијата е завршена од едната страна, додека за другата страна сопственикот има повисоки финансиски барања. Поради тоа, ангажирани се супервештаци, а градоначалникот изрази уверување дека и овој процес наскоро ќе биде заокружен.Ѓорѓиевски додаде дека паралелно се работи и на стабилизирање на јавните претпријатија и дека, според него, градот постепено се враќа во нормала. „Даваме сè од себе Скопје повторно да застане на здрави нозе“, истакна градоначалникот.

Скопје | пред 3 месеци

МВР со нови приводувања за безобѕирно управување возила во Пелагонија

Полициски службеници на Министерството за внатрешни работи лишија од слобода тројца возачи во Крушево, Прилеп и Битола, откако било утврдено дека управувале моторни возила под дејство на алкохол.На 1 февруари 2026 година во 01:05 часот, на улицата „Тодор Проески“ во Крушево, полициски службеници од ОВР Крушево го привеле Д.Д. (23) од Прилеп. При сообраќајна контрола било запрено патничко возило „голф“ со прилепски регистарски ознаки, управувано од пријавениот, при што алкотестот покажал 1,58 промили алкохол во крвта.Претходно, на 31 јануари 2026 година во 18:37 часот, на место викано „Стопанство“ во Прилеп, полициски службеници од ОВР Прилеп го лишиле од слобода С.Д. (51) од селото Кривогаштани, прилепско. При контрола било запрено патничко возило „фиат“ со прилепски регистарски ознаки, а кај возачот биле измерени 3,37 промили алкохол во крвта.На 1 февруари 2026 година во 02:12 часот, на улицата „4 Ноември“ во Битола, полициски службеници од СВР Битола го привеле С.Н. (21) од селото Брусник, битолско. Тој управувал патничко возило „голф“ со битолски регистарски ознаки, а при алкотестирање било утврдено присуство на 1,54 промили алкохол во крвта.По целосно документирање на настаните, против сите три лица ќе бидат поднесени соодветни пријави за кривично дело „безобѕирно управување со моторно возило“ по член 297-а од Кривичниот законик.

Македонија | пред 3 месеци

Европски процени: Руските загуби нагло растат, мобилизацијата станува неизбежна опција

Бројот на руски војници загинати во борбите против Украина во последните неколку недели бележи нагло зголемување, а доколку ваквиот тренд продолжи, Кремљ би можел да се соочи со сериозни тешкотии во надоместувањето на загубите без нов бран мобилизација, покажуваат процени на повеќе европски влади, објави „Блумберг“.Украинскиот министер за одбрана Михајло Федоров изјави дека украинските сили во декември убиле околу 35.000 руски војници. Тој наведе дека целта на Киев е до лето тој број да се зголеми на 50.000 месечно, што би значело речиси двојно зголемување на месечниот просек што НАТО го пресметал за 2025 година.Според европските процени, зголемената ефикасност на украинската армија е резултат пред сè на интензивната и прецизна употреба на дронови. Во последниот период, односот меѓу загинати и ранети значително се поместил во корист на смртните исходи, што дополнително ја усложнува можноста за надоместување на загубите. Извори запознаени со процените наведуваат дека бројот на загинати достигнал рамниште со тековната регрутација, што би можело да го принуди Кремљ на нов мобилизациски потег.Сепак, ваквата одлука се смета за политички исклучително чувствителна. Рускиот претседател Владимир Путин досега избегнуваше повторување на мобилизацијата од септември 2022 година, кога беа повикани околу 300.000 резервисти, потег што предизвика масовно напуштање на земјата и зголемено незадоволство во руското општество.Европските анализи ја проблематизираат и нарацијата што Москва ја пласира во јавноста, а која повремено ја повторува и американскиот претседател Доналд Трамп, според која руската предност на теренот ја прави победата неизбежна. Напротив, растечките загуби би можеле да ја ослабнат преговарачката позиција на Путин во наредните месеци.Прашањето за територијата останува централно во мировните разговори што ги посредуваат САД. Русија инсистира Украина да го отстапи целиот Донбас, вклучувајќи ги регионите Доњецк и Луганск, дури и деловите кои руската армија не успеала да ги заземе. Украинскиот претседател Володимир Зеленски ја отфрли оваа можност, но посочи дека безбедносните гаранции од САД би можеле да бидат клучни за спречување нов напад по евентуален прекин на огнот.Иако руските сили продолжуваат со масовни ракетни и дронски напади врз украинската енергетска инфраструктура, оставајќи големи делови од земјата без струја и греење во зима, напредокот на боиштето останува минимален. На фронтот долг околу 1.000 километри нема значајни стратешки пробиви, а борбите главно се сведуваат на тактички судири.Клучен фактор во новата динамика на војната станува токму технологијата на дронови. Според извештај на латвиските безбедносни служби, дроновите моментално се одговорни за 70 до 80 проценти од сите загинати и ранети во руската и украинската армија. Оваа технологија овозможува постојано извидување, корекција на артилериски оган и прецизни напади, со што драстично се менува односот на силите на теренот.

Свет | пред 3 месеци

Охриѓанец приведен откако со дрвен предмет и нож нападнал сограѓанин

Полициски службеници од СВР Охрид синоќа, на 31 јануари 2026 година во 23:20 часот, го лишиле од слобода Г.А. (49) од Охрид, по пријава за насилен инцидент што се случил на улицата „Марко Нестороски“.Според информациите од Министерството за внатрешни работи, осомничениот најпрвин со дрвен предмет го нападнал Р.С. (40) од Охрид, по што извадил нож и замавнал кон него. Со брза интервенција на полицијата, напаѓачот бил приведен, со цел спречување на понатамошна ескалација на насилството.По целосно документирање на настанот, против Г.А. ќе биде поднесена соодветна пријава, согласно законските прописи.

Охрид | пред 3 месеци

Новак доминира во првиот сет: 6-2 против Алкараз во финалето на Австралија опен

Српскиот тенисер Новак Ѓоковиќ игра за својата 25. грен слем титула во кариерата, со што би поставил апсолутен рекорд во историјата на тенисот. Во финалето на Австралија опен во Мелбурн, Ѓоковиќ по првиот сет има водство од 1:0 против Шпанецот Карлос Алкараз, откако одигра импресивен воведен сет и славеше со убедливи 6-2.Ѓоковиќ рано го одзеде сервисот на противникот, целосно ја контролираше играта, делуваше самоуверено и стабилно од почеток до крај, а во финишот направи уште еден брејк со кој ја потврди доминацијата и го обезбеди првиот сет.Еден од навивачите на Ѓоковиќ привлече особено внимание со транспарент на кој имаше фотографија на Новак претставена како филмски плакат и порака: „Бегство од Алкараз“, што дополнително ја засили еуфоријата меѓу публиката.Ѓоковиќ со ваквиот почеток јасно најави дека е решен да испише нова страница во тениската историја и да ја освои титулата што би го издвојала како најуспешен грен слем шампион на сите времиња.

Спорт | пред 3 месеци

Маск: Мерките за спречување на неовластената руска употреба на Старлинк даваат резултати

Извршниот директор на компанијата SpaceX, Илон Маск, изјави дека мерките што компанијата ги презела за да ја спречи неовластената употреба на сателитскиот интернет-систем Старлинк од страна на Русија се покажале како успешни.„Се чини дека чекорите што ги презедовме за да ја спречиме Русија неовластено да го користи Старлинк вродија со плод. Доколку е потребно да се направи уште нешто, информирајте нè“, напиша Маск на социјалната мрежа Икс.Неговата изјава доаѓа откако Украина јавно потврди дека соработува со SpaceX со цел да се спречи користењето на Старлинк за воени цели од страна на руските сили. Украинскиот министер за дигитална трансформација и одбрана, Михајло Федоров, изјави дека Киев заедно со SpaceX работи на технички решенија кои ќе оневозможат управување со дронови преку овој систем.Украинските власти претходно соопштија дека Старлинк бил пронајден на дронови со долг дострел, користени во руски напади, што предизвика сериозна загриженост за можната злоупотреба на западната технологија.„Западната технологија мора да продолжи да му помага на демократскиот свет и да ги штити цивилите, наместо да се користи за тероризам и уништување на мирни градови“, напиша Федоров во објава на Икс.Старлинк од почетокот на војната има клучна улога во одржувањето на комуникациите во Украина, а прашањето за неговата безбедна и контролирана употреба останува едно од најчувствителните во контекст на тековниот конфликт.

Свет | пред 3 месеци

Иван Ивановски: 2026 ќе биде година на дисциплина, не на импулсивни одлуки на берза

Во услови на засилени геополитички тензии, воени конфликти и реструктурирање на глобалните синџири на снабдување, финансиските пазари влегуваат во период на зголемена неизвесност. Одлуките на големите централни банки, движењата на обврзничките пазари и економското ривалство меѓу САД, Кина и Европа сè почесто стануваат главни двигатели на берзанските трендови. Наместо стабилни циклуси, инвеститорите се соочуваат со средина во која ризикот и волатилноста се трајна состојба, а не исклучок. Во таков контекст, 2026 година се очекува да биде година на внимателно позиционирање и долгорочна стратегија, особено за малите пазари и ритејл инвеститорите.Според економистот и инвестициски експерт Иван Ивановски, геополитичката нестабилност не е спореден фактор, туку суштинска компонента на пазарната динамика.„Светот влегува во период на зголемена макроекономска неизвесност, каде геополитичките тензии, воените интервенции и реструктурирањето на глобалните синџири на снабдување директно ги диктираат пазарните движења. За инвеститорите, управувањето со ризикот сега е поважно од кога било, а волатилноста треба да се гледа не само како закана, туку и како можност за оние што размислуваат долгорочно и дејствуваат врз основа на структура, а не на емоции“, вели Ивановски.Кон крајот на 2025 многу се зборуваше за AI балонот и преценетоста на AI компаниите но вештачката интелигенција останува еден од клучните двигатели на глобалниот економски раст. Според Ивановски, AI влегува во нова, пофункционална фаза.„Растот на AI во 2026 година ќе продолжи, но веќе не како теоретски концепт, туку како практична алатка што носи реална вредност во оптимизацијата на бизнис-процесите и намалувањето на трошоците. Компаниите што ќе успеат да ја интегрираат вештачката интелигенција во своето секојдневно работење ќе стекнат стратешка предност што може да редефинира цели индустрии“, истакнува Ивановски.Покрај технологијата, неговите предвидувања за 2026 година се насочени кон сектори со долгорочна издржливост и финансиска стабилност. Наместо краткорочни трендови, фокусот останува на индустрии што можат да функционираат во различни економски циклуси.„Како инвеститори важно е да знаеме како да ги препознаеме секторите со силни биланси и стабилни основи. Во 2026 година, клучно ќе биде да се следат технологијата, енергетиката и примената на AI во медицината, бидејќи тие имаат капацитет да создаваат вредност и во услови на економски притисоци“, нагласува Ивановски.Неговата проценка е дека наредната година ќе биде тест за зрелоста на инвеститорите: дали ќе реагираат импулсивно на глобалните шокови или ќе градат портфолија врз основа на знаење, анализа и долгорочна визија. Финансиската едукација и дисциплинираниот пристап кон пазарите остануваат клучен услов за стабилен економски раст и одржлива инвестициска култура, нешто кон што Ивановски се стреми да го создаде во Македонија преку Prime Class заедницата.

Македонија | пред 3 месеци

(Видео) Синот и сопругот знаеја дека чуваат дрога, раскажа мајката и сопруга на уапсените за тоните марихуана поврзани со Македонија

Членови на семејството Спасојевиќ и нивни соседи се огласија по заплената на повеќе од пет тони марихуана на семеен имот во околината на Крушевац, случај кој српските власти го оценуваат како една од најголемите акции против организираниот криминал во историјата на земјата.Ана Спасојевиќ во изјава за српскиот таблоид „Република“ изјави дека семејството било угледно и дека не била свесна што се чува на имотот. Таа наведе дека знаеле нејзиниот сопруг и синот, но дека, според она што ѝ било кажано, станувало збор за нешто што привремено било оставено таму, само неколку дена.„Не ми е важно кој го сторил тоа, сè ќе се открие во истрагата. Ова ни се случува првпат во животот, ништо слично никогаш не сме имале“, изјави Спасојевиќ, додавајќи дека целата ситуација тешко ѝ паѓа и дека поради стресот не може да спие и зема терапија за смирување.И соседите изразуваат неверување. Комшиката Радмила Тодосијевиќ изјави дека веста за пронаоѓањето на дрогата ја затекнала и ја вознемирила, нагласувајќи дека семејството го познавала како работливо и чесно. Таа посочи дека Спасојевиќи со години живеат таму и се занимаваат со земјоделство, одгледување овошје и зеленчук, додавајќи дека немала никакви сознанија за нелегални активности.Во меѓувреме, српскиот министер за одбрана Братислав Гашиќ им честиташе на припадниците на Министерството за внатрешни работи и на безбедносните служби за, како што рече, исклучително успешно спроведената акција кај Крушевац. Според него, станува збор за еден од најголемите и најзначајни успеси на српската полиција во борбата против организираниот криминал.„Оваа историска акција јасно покажува дека во Србија нема заштитени и дека секој што ќе помисли дека може да се сокрие зад партиска книшка за да врши кривични дела – нема да успее. Секој што се занимава со криминал ќе биде најстрого казнет и процесуиран согласно законот“, порача Гашиќ, нагласувајќи дека борбата против криминалот и корупцијата е апсолутен приоритет на државата и дека се води без компромиси и без исклучоци.

Свет | пред 3 месеци

ССМ и СДС се едно исто, синдикатот молчеше кога работниците со месеци беа без плата, вели ВМРО-ДПМНЕ

ВМРО-ДПМНЕ денеска соопшти дека Сојузот на синдикати на Македонија и СДС, како што наведуваат, дејствуваат како „едно исто“, обвинувајќи го синдикалното раководство дека не се грижи за реалните интереси на работниците, туку служи за дневнополитички цели на опозициската партија.Според ВМРО-ДПМНЕ, барањата за минимална плата од 600 евра и за покачување на платите, кои доаѓаат од ССМ, не претставуваат искрена борба за подобар животен стандард, туку политичка агенда. Како аргумент, од партијата посочуваат дека актуелното раководство на ССМ, предводено од Слободан Трендафилов, одбило предлог на Владата за системско зголемување на платите, со кое, според нив, до крајот на мандатот минималната плата би достигнала 600 евра, а платите на останатите вработени би се зголемиле и до 40 проценти.Во соопштението се наведува дека одбивањето на овој предлог е мотивирано од потребата ССМ и СДС да задржат тема за дневна политика, која, како што тврдат од ВМРО-ДПМНЕ, не носи конкретна корист за работниците. Дополнително, од партијата го критикуваат и предлог-законот на СДС за минимална плата од 600 евра, оценувајќи го како популистички и неподготвен, без јасно образложение за изворите на финансирање и начинот на негова реализација.ВМРО-ДПМНЕ потсетува дека пред две години, кога ја презела власта од СДС, затекнала, како што наведуваат, уништена економија, буџетски дефицити и институции со сериозни финансиски проблеми. Како пример ги посочуваат Македонски железници, Македонски шуми и „Македонија пат“, каде, според нив, вработените со месеци не добивале плата. Во тој период, велат од партијата, ССМ и неговото раководство не реагирале, што, според нив, дополнително ја потврдува поврзаноста меѓу ССМ и СДС.Од ВМРО-ДПМНЕ ги повикуваат ССМ и неговото раководство да го прифатат и потпишат новиот колективен договор, со кој, како што тврдат, во април 2026 година вработените би добиле покачување од околу 15 проценти, при што најниското зголемување би изнесувало 3.580 денари. Според партијата, со ваква динамика и системско решение, минималната плата во јавниот сектор би достигнала 600 евра до 2028 година.Во заклучокот од соопштението, ВМРО-ДПМНЕ нагласува дека не ветува „чуда“, туку, како што велат, искрен, чесен и системски пристап за постепено подобрување на животниот стандард на граѓаните.

Македонија | пред 3 месеци

Три лица поврзани со петте тони дрога од Македонија завршија во притвор

Вишиот суд во Белград синоќа, на 31 јануари, им одреди притвор на тројца од уапсените лица по рекордната заплена на пет тони марихуана во селото Коњух кај Крушевац. Притвор им е одреден на Н.С., Р.С. и И.Д., поради опасност од бегство, можност за влијание врз сведоци, ризик од повторување на кривичното дело, како и поради нарушување на јавниот ред и мир, соопштија од Вишиот суд, пренесуваат српските медиуми.Јавното обвинителство за организиран криминал претходно објави дека е донесена наредба за спроведување истрага против Александар Мијајловиќ, Небојша Спасојевиќ, Раде Спасојевиќ, Иван Драгниќ и Урош Младеновски. Според обвинителството, станува збор за организирана криминална група која дејствувала на меѓународно ниво и во текот на јануари 2026 година набавила повеќе од пет тони марихуана на територијата на Република Македонија.Како што наведуваат истражните органи, по план на организаторот, осомничениот Иван Драгниќ ја транспортирал дрогата преку државната граница до магацин поврзан со семејството Спасојевиќ, од каде што осомничениот Урош Младеновски ја преземал за понатамошна продажба на српскиот пазар. Според официјалните податоци, станува збор за точно 5.002.079,18 грама марихуана, што оваа заплена ја прави најголема во историјата на Србија.Особено внимание во јавноста и во истрагата предизвикува фактот што осомничениот Иван Драгниќ е косопственик на компанијата регистрирана во Скопје за производство и преработка на медицински канабис. Според српските медиуми, овој податок дополнително ја зајакнува тезата за меѓународен карактер на криминалната операција и отвора прашања за потеклото на наркотичната дрога.По сослушувањето, сите осомничени го искористиле законското право да се бранат со молчење, по што обвинителството побарало притвор за сите лица, оценувајќи дека сериозноста на делото и количината на дрогата претставуваат висок ризик за истрагата. За Александар Мијајловиќ, кој е означен како организатор на криминалната група и се наоѓа во бегство, поднесен е предлог за распишување потерница, вклучително и меѓународна.Министерот за внатрешни работи на Србија, Ивица Дачиќ, изјави дека станува збор за најголемата заплена на дрога досега во земјата, нагласувајќи дека акцијата претставува рекорд во историјата на српската полиција. Според официјалните податоци, претходниот рекорд изнесувал 1.960 килограми, додека во текот на целата мината година во Србија биле запленети вкупно 6,1 тон различни наркотични супстанци.

Свет | пред 3 месеци

Триумф на македонскиот џез: Победа на Гордан Спасовски во Холандија

Нашиот композитор, аранжер и пијанист, како и член на Националниот џез оркестар, Гордан Спасовски, вечерва оствари значаен меѓународен успех, освојувајќи ја првата награда на престижниот International Big Band Composition Contest во Холандија.Македонскиот композитор и пијанист беше прогласен за победник со својата композиција „Lioness“, која ја воодушеви меѓународната жири-комисија и ја донесе највисоката награда на овој реномиран натпревар.Ова признание претставува уште една потврда за квалитетот и меѓународниот потенцијал на македонската џез-сцена, како и за уметничкиот печат што Гордан Спасовски го остава надвор од границите на земјата.

Македонија | пред 3 месеци

Тошковски: Доброволното плаќање на казната носи поволности, но сериозните прекршоци значат и забрана за управување со возило

Министерот за внатрешни работи Панче Тошковски, во гостување во дневникот на Македонската национална телевизија, детално го објасни начинот на примена на санкциите во рамки на системот „Безбеден град“, со посебен акцент на повеќекратните прекршоци, сериозните надминувања на дозволената брзина и можностите за доброволно прифаќање и плаќање на казните.Тошковски посочи дека законската рамка јасно ги дефинира последиците за сообраќајните прекршоци и дека иако секој возач може да погреши, драстичното и опасно прекршување на правилата носи построги санкции. Како пример наведе дека доколку на делница со дозволена брзина од 50 километри на час возач управува со повеќе од 90 километри на час, покрај парична казна се изрекува и забрана за управување со моторно возило.Со таквата мерка, како што појасни министерот, лицето во одреден временски период нема да смее да управува ниту со сопственото, ниту со кое било друго возило од таа категорија, што претставува сериозна последица за оние што грубо ги кршат сообраќајните правила.Во исто време, Тошковски нагласи дека системот предвидува и механизми за стимулирање на одговорно однесување од страна на граѓаните. Доколку сторителот доброволно ја прифати одговорноста и ја плати казната во рок од осум дена, ќе плати само половина од изречениот износ. Дополнително, доколку во рок од 16 дена ја плати казната и го признае прекршокот, Министерството има можност да изрече и поблага мерка на забрана за управување.Според министерот, доколку законот предвидува минимална забрана за управување од три месеци, во ваков случај таа може значително да се намали, на пример на 45 дена. Овој модел, како што рече, е воведен со цел да се избегнат долги и непотребни судски постапки кога постојат јасни и недвосмислени докази за сторениот прекршок.Тошковски посочи дека системот „Безбеден град“ функционира врз основа на видео записи и фотографии, што обезбедува високо ниво на точност при утврдување на прекршоците. Граѓаните, нагласи тој, имаат право да поведат судска постапка доколку сметаат дека тоа е оправдано, но во таков случај не можат да ги користат поволностите што ги нуди доброволното прифаќање на одговорноста.„Целта не е казнување по секоја цена, туку подигнување на сообраќајната култура и заштита на човечките животи. Оние што прават сериозни прекршоци ќе сносат последици, а системот е дизајниран да превенира трагедии, а не само да полни буџет“, истакна министерот.Проектот „Безбеден град“, според Министерството за внатрешни работи, претставува еден од клучните чекори кон зголемување на сообраќајната дисциплина, целосна дигитализација на постапките и унапредување на безбедноста на сите учесници во сообраќајот.

Македонија | пред 3 месеци

Студено утро со дожд и снег: На Попова Шапка измерени –4 степени, врнежи во целата држава

Според податоците на УХМР, утрово се измерени ниски минимални температури низ државата. Најстудено било на Попова Шапка со –4 степени, додека –1 степен е регистриран во Берово и Маврови Анови. Во Крушево минималната температура изнесувала 0 степени, а во Претор, Радовиш – Пожар, Крива Паланка и Охрид 1 степен. Два степени се измерени во Битола, Тополчани, Пожаране и Ѓуриште, три степени во Прилеп, четири во Скопје – Зајчев Рид, Виница, Кавадарци, Велес и Тетово, пет во Скопје – Петровец, Струмица и Штип, додека најтопло утрово било во Демир Капија и Гевгелија со 7 степени.Во изминатите 24 часа најмногу врнежи се регистрирани во Гевгелија – 12 литри на квадратен метар. Во Крушево и Битола наврнале по 10 литри, во Демир Капија, Маврови Анови и на Попова Шапка по 6, во Велес и Пожаране по 4, во Ѓуриште 3, а по 2 литри во Скопје – Зајчев Рид, Тополчани, Штип, Радовиш – Пожар и Тетово. По 1 литар воден талог е измерен во Охрид, Берово, Виница, Кавадарци, Струмица, Претор и Крива Паланка.Снежната покривка утрово до 7 часот изнесувала 36 сантиметри на Попова Шапка.Времето денеска ќе биде претежно облачно со повремени врнежи од дожд, а на планините од снег. Пообилни врнежи се очекуваат во југоисточните делови од земјата, каде количината може да надмине 20 литри на квадратен метар. Поради продор на постудена воздушна маса од север, врнежите ќе преминат во снег во повисоките, како и во дел од пониските места. Ќе дува слаб до умерен ветер од променлив правец, а максималната дневна температура ќе се движи од 3 до 8 степени.Во Скопје ќе преовладува претежно облачно време со повремени врнежи од дожд. Ќе дува слаб ветер од променлив правец, а максималната температура ќе достигне околу 7 степени.

Македонија | пред 3 месеци

Нова жртва тврди: Епштајн ме испрати во Велика Британија за сексуален однос со принцот Ендру

Уште една жена тврди дека била испратена од Џефри Епштајн во Обединетото Кралство со цел да има сексуален однос со Принц Ендру, откри нејзиниот адвокат за британските медиуми. Наводниот настан, според тврдењата, се случил во 2010 година во „Ројал Лоџ“, резиденцијата на поранешниот британски принц, кога жената, која не е британска државјанка, била во своите дваесетти години.Според изјавата на адвокатот Бред Едвардс од адвокатската канцеларија „Едвардс Хендерсон“, ова е првпат некоја од жртвите на Епштајн да наведе дека сексуален однос се случил во рамки на кралска резиденција.Тој тврди дека по ноќта помината со принцот Ендру, на жената ѝ била организирана и тура низ Бакингемската палата, пренесува BBC.Од Бакингемската палата засега не ја потврдиле ваквата посета, наведувајќи дека без откривање на идентитетот на жената не може да се проверат евиденциите за посетители. Од кабинетот на принцот Ендру не беше доставен одговор на барањето за коментар на обвинувањата.Адвокатот Едвардс, кој застапувал повеќе од 200 жртви на Епштајн ширум светот, претходно ја застапуваше и Вирџинија Џуфре. Таа тврдеше дека во 2001 година, на 17-годишна возраст, била донесена во Лондон за да има сексуален однос со тогашниот принц, како и дека подоцна била принудена на уште два сексуални односи со него – во Њујорк и на приватен остров на Епштајн на Карибите. Принцот Ендру ги негираше сите обвинувања.Едвардс наведува дека пред наводната средба во 2010 година постоела комуникација меѓу неговата клиентка и поранешниот принц, по што, како што тврди жената, таа преноќила во неговиот дом. Тој додава дека бил во контакт со правни застапници на Ендру во САД, но дека комуникацијата престанала откако Крал Чарлс Трети формално му ги одзел титулите, стилот и кралските почести.Одземањето на титулите, според адвокатот, имало спротивен ефект, бидејќи на поранешниот принц му овозможило да тврди дека нема финансиски средства за исплата на отштета. „Со тоа, на овие жени им се дозволува само да страдаат“, изјави Едвардс, критикувајќи го однесувањето на кралското семејство.Би-Би-Си во своја истрага утврди дека Епштајн преку комерцијални летови и приватни авиони пренесувал повеќе жени во Обединетото Кралство. Од Бакингемската палата во октомври соопштија дека „нивните величества изразуваат најдлабоко сочувство и поддршка за сите жртви и преживеани од каква било форма на злоупотреба“.Адвокатот најави дека разгледува можност за поднесување нова граѓанска тужба против принцот Ендру во име на жената. Потсетува дека Вирџинија Џуфре во 2021 година поднесе тужба против него во САД, која беше завршена со вонсудска спогодба во февруари 2022 година, проценета на околу 12 милиони евра. Џуфре минатата година изврши самоубиство, додека принцот Ендру и понатаму ги негира сите обвинувања.

Свет | пред 3 месеци

Научниците предупредуваат: „AI ројеви“ ќе ги преплават социјалните мрежи со дезинформации

Социјалните мрежи наскоро би можеле да бидат преплавени од т.н. „ројеви“ на вештачка интелигенција кои ќе шират дезинформации, ќе ги вознемируваат корисниците и ќе ги поткопуваат демократските процеси, предупредуваат научници во коментар објавен на 22 јануари во реномираното научно списание Science.Според авторите, овие „AI ројеви“ претставуваат ново и исклучително опасно оружје во современите информациски војни. За разлика од досегашните ботови, кои најчесто се примитивни и релативно лесно препознатливи, новите системи ќе можат уверливо да го имитираат човечкото однесување, да се приспособуваат на заедниците во кои се инфилтрираат и да создаваат впечаток на спонтано и автентично дејствување.Како резултат на тоа, корисниците би можеле да стекнат чувство дека пред нивните очи се формира јасен став на мнозинството по одредено прашање, иако во реалноста станува збор за координирана активност управувана од вештачка интелигенција. Овој привид на консензус, според научниците, може силно да влијае врз јавното мислење, бидејќи луѓето по природа се склони да ги следат ставовите што ги доживуваат како доминантни.Коавторот на анализата, Јонас Кунст, професор по комуникации на BI Norwegian Business School, објаснува дека луѓето се конформни и често прифаќаат ставови на мнозинството затоа што тоа им дава чувство на сигурност и припадност, дури и кога не се целосно убедени дека тоа мнозинство е во право. Токму оваа психолошка слабост, предупредува Кунст, AI ројевите би можеле да ја искористат со голема ефикасност.Опасноста, сепак, не се ограничува само на манипулација со јавното мислење. Истите системи можат да се користат и за организирано дигитално вознемирување, при што лица со поинакви ставови би биле изложени на координирани напади од „вештачки корисници“, сè додека не бидат замолчени или истиснати од платформите.Авторите нагласуваат дека напредокот на големите јазични модели и автономните агенти овозможува кампањите за влијание да достигнат досега невидени размери и прецизност. Генеративните алатки можат масовно да произведуваат пропаганда и невистини со низок трошок, при што тие често делуваат „почовечки“ од содржините создадени од луѓе. Со поврзување на овие модели во повеќеагентски системи, AI ројевите можат автономно да се координираат, да се инфилтрираат во заедници и долгорочно да создаваат илузија на општествен консензус, со што директно ја загрозуваат демократијата.Научниците предупредуваат дека проблемот не е само во злоупотребата, туку и во самиот начин на кој се дизајнирани и управувани овие технологии, како и во економските модели зад нив. Поради тоа, тие не веруваат дека одговорното однесување може да се остави на добра волја на компаниите или корисниците, туку бараат јасни правила и конкретни мерки што би ја ограничиле потенцијалната штета.Иако не се наведува точен временски рок кога ваквите ројеви би можеле масовно да се појават, авторите предупредуваат дека тие ќе бидат исклучително тешки за откривање, па не е исклучено некои форми веќе да се користат. Проценките покажуваат дека и денес повеќе од половина од вкупниот интернет-сообраќај го сочинуваат ботови, што дополнително ја заматува границата меѓу автентична и автоматизирана комуникација.Како илустрација за реалноста на овој ризик, авторите потсетуваат на случајот кога платформата Reddit минатата година се закани со правни чекори против научници кои користеле AI-чатботови во експеримент за влијание врз мислењата на милиони корисници. Прелиминарните резултати покажале дека одговорите на чатботовите биле неколкукратно поубедливи од оние на луѓето.Заклучокот на научниците не е дека апокалипсата е неизбежна, туку дека станува збор за реален и растечки ризик кој бара сериозна и навремена општествена дебата. Доколку општествата не се подготват навреме, предупредуваат тие, границата меѓу вистинското јавно мислење и вештачки создадениот привид може да стане опасно нејасна.

Свет | пред 3 месеци

Техеран возвраќа на Брисел: Европските војски на иранската листа на терористи

Иран официјално ги прогласи армиите на европските земји за „терористички групи“, како одговор на одлуката на Европска унија да ја стави Иранската револуционерна гарда на листата на терористички организации. Одлуката ја соопшти претседателот на иранскиот парламент, Мохамад Багер Галибаф, обраќајќи се пред пратениците во Техеран.„Во согласност со член 7 од Законот за контрамерки поврзани со прогласувањето на Корпусот на Исламската револуционерна гарда за терористичка организација, армиите на европските држави се сметаат за терористички групи“, изјави Галибаф. Тој додаде дека со обидот да ја нападнат Револуционерната гарда, „Европјаните всушност си пукаа во нога и донесоа одлука спротивна на интересите на сопствените народи, слепо потчинувајќи се на Американците“.За време на седницата, Галибаф и дел од пратениците се појавија облечени во униформи на Иранска револуционерна гарда, како симбол на солидарност со организацијата. Засега не се јасни непосредните практични последици од ваквата одлука на иранските власти.Одлуката на Европската унија, донесена во четвртокот, претставува значајна и симболична промена во европскиот пристап кон иранското раководство. Со неа, Револуционерната гарда беше ставена на истата листа со организации како Исламска држава и Ал Каеда, по најкрвавите пресметки со протестите во Исламската Република од нејзиното основање во 1979 година.Иако дел од земјите членки на ЕУ, предводени од Франција, долго време се спротивставуваа на ваков чекор, високата претставничка за надворешна и безбедносна политика на ЕУ, Каја Калас, соопшти дека „репресијата не смее да остане без одговор“ и дека министрите за надворешни работи донеле одлучна одлука со означувањето на ИРГК како терористичка организација.Галибаф најави и дека парламентарната комисија за национална безбедност ќе разгледува можност за протерување на воените аташеа на земјите членки на ЕУ од Иран и дека по ова прашање ќе биде воспоставена координација со иранското Министерство за надворешни работи.Иранската револуционерна гарда е формирана по Исламската револуција во 1979 година со цел заштита на шиитскиот клерикален систем на власт. Со текот на децениите, таа стекна огромно влијание во земјата, контролирајќи значителни сегменти од економијата и од вооружените сили, што ја прави еден од клучните столбови на иранскиот политички и безбедносен систем.

Свет | пред 3 месеци

„Најголемиот триумфален лак во светот“: Трамп најави монументален проект во главниот град

Американскиот претседател Доналд Трамп подетално зборуваше за својата идеја за изградба на триумфален славолук во Вашингтон, опишувајќи го како монументална градба инспирирана од парискиот Arc de Triomphe. Во разговор со новинари на претседателскиот авион Air Force One, Трамп изјави дека планираниот објект ќе наликува на познатиот француски споменик, а на социјалните мрежи веќе е наречен „Arc de Trump“.Трамп истакна дека триумфални лакови постојат на многу места низ светот, но дека сака оној во Вашингтон да биде најголем. „Ние сме најголемата и најмоќната нација. Би сакал да биде најголемиот од сите“, изјави тој, додавајќи дека ќе биде формиран посебен одбор кој ќе го надгледува проектот.Славолукот е најновиот во низата архитектонски проекти со кои Трамп сака да остави личен печат во главниот град. Во тек е и изградба на луксузна балска сала на теренот на Белата куќа, поради што беше срушено старото Источно крило – потег што предизвика бројни критики во јавноста.Според пишувањето на The Washington Post, еден од плановите предвидува славолукот во Вашингтон да достигне висина од 76 метри. За споредба, парискиот Триумфален лак, завршен во 1836 година, е висок околу 50 метри. Дел од архитектите ја критикуваат предложената висина, оценувајќи дека објектот не би се вклопил во околината, додека некои историчари ја поддржуваат идејата за ваков споменик во престолнината на САД.Трамп првпат јавно ја спомена идејата во октомври, а минатата недела објави три различни дизајни на својата платформа Truth Social. Еден од предложените модели изобилува со златни украси – препознатлив естетски елемент на Трамп, кој и претходно го преуреди Овалниот кабинет со златни детали.

Свет | пред 3 месеци

Опозицијата бара 600 евра минимална плата веднаш: „Од први до први не се живее“

Од СДСМ порачаа дека е време премиерот Христијан Мицкоски да се соочи со реалноста на работниците и да „погледне во своите часовници вредни 65.000 евра“, кои, како што наведуваат, чинат колку 150 минимални плати и за кои работник со минималец би работел 12 години.Според СДСМ, на работниците им е потребна достоинствена минимална плата од 600 евра сега, а не по најави за две години, бидејќи со сегашните примања и високите трошоци едвај преживуваат. Тие посочуваат дека потрошувачката кошничка за четиричлено семејство изнесува 66.413 денари, што значи дека за покривање на основните егзистенцијални потреби се потребни 2,8 минимални плати. Со две минимални плати, нагласуваат од партијата, едно работничко семејство не може да има достоинствен живот.Опозицијата укажува дека со континуираните поскапувања на храната, електричната енергија, греењето и со инфлацијата, на граѓаните не им стигаат парите од први до први. Наместо изговори и одложувања, Владата, според СДСМ, мора веднаш да обезбеди средства за повисоки плати, додавајќи дека „не може да има пари за криминални тендери, а да нема пари за работниците“.Во реакцијата се поставува и прашањето како е можно власта да се фали дека земјата е „четврта економија во Европа“, а истовремено да биде на дното по висината на платите. СДСМ тврди дека македонските работници денес имаат најниска минимална плата во регионот и во Европа, при што наведува дека Косово ја зголемува минималната плата на 500 евра, Албанија од 1 јануари 2026 година воведе минималец од 500 евра, Србија ја зголеми минималната плата на 500 евра, а во Црна Гора таа веќе се движи меѓу 600 и 800 евра.Како последица на ваквите политики, според СДСМ, квалификуваните работници масовно заминуваат, младите се иселуваат, а државата се претвора во пазар за „економски работници“. Од партијата оценуваат дека ова води кон намерно обезвреднување на трудот и намалување на цената на работата, доколку тоа, како што велат, не е и свесна цел на актуелната власт.

Македонија | пред 3 месеци

До 200 метри, четири ленти и 24 часа контрола: што сè можат камерите на „Безбеден град“

Со стартот на системот „Безбеден град“, на македонските улици и булевари се активираше нов начин на сообраќајна контрола, базиран на стационарни радарско-видео камери со висока техничка прецизност. Иако во јавноста најчесто се зборува за казните, клучното прашање е – како функционира системот откако ќе се регистрира прекршок и што точно можат да „видат“ и измерaт овие камери.Во моментот кога возилото ќе ја надмине дозволената брзина, ќе помине на црвено светло, ќе биде регистрирано со истечена регистрација или ќе запре на недозволено место, камерата автоматски го детектира настанот. Системот работи континуирано, 24 часа дневно, без оглед на временските услови, и не зависи од физичко присуство на полиција на терен.Клучната карактеристика на овие уреди е тоа што тие не се обични надзорни камери, туку интегрирани мерни системи. Камерите користат радарска технологија за мерење на брзината, во комбинација со видео-анализа, со што се обезбедува висока точност и дополнителна потврда на прекршокот. Мерењето на брзината се врши на далечина од приближно 10 метри, па сè до над 200 метри, што значи дека прекршокот може да биде регистриран далеку пред возачот да ја забележи камерата.Техничките спецификации овозможуваат истовремено следење на повеќе сообраќајни ленти. Во зависност од поставеноста, една камера може паралелно да контролира до четири ленти, во ист или во спротивен правец на движење. Во секоја од тие ленти, системот следи повеќе возила истовремено, без мешање на податоците, при што точно се утврдува во која лента се движело конкретното возило и со која брзина.Камерите се опремени со инфрацрвено осветлување, што овозможува јасно снимање и ноќе, без заслепување на возачите. Системот чита регистарски таблички и при високи брзини, дури и над 200 километри на час, како и во услови на дожд, магла или намалена видливост. Дополнително, софтверот прави разлика меѓу типови возила – патнички, товарни, автобуси и мотоцикли – што е важно за делници со различни ограничувања.По детекцијата, камерата автоматски генерира доказен пакет. Тој вклучува јасна фотографија од регистарската табличка, фотографија од возилото во поширок сообраќаен контекст, кратко видео од движењето на возилото, како и технички податоци – точен датум и време, локација, измерена брзина и дозволена брзина за таа сообраќајница. Сите податоци се дигитално заштитени и врзани за конкретниот уред, што ја исклучува можноста за накнадна измена. Дел од нив се доставуваат до сопственикот на возилото со казната. Другите се чуваат во случај на спор или докажување дали прекршокот е сторен или не.Паралелно, системот автоматски ја чита табличката и ја споредува со базите на податоци, со што се утврдува сопственикот на возилото и статусот на регистрацијата. Во случаи кога се детектира прикриена, оштетена или нечитлива табличка, тоа се евидентира како посебен прекршок.Врз основа на овие технички податоци, се подготвува прекршочен налог согласно законските одредби. Камерата не ја одредува висината на казната, туку таа е строго дефинирана со закон, при што се применуваат и законски дозволените толеранции, особено кај мерењето на брзината.Системот „Безбеден град“, според институциите, има цел да воведе постојана и еднаква контрола за сите учесници во сообраќајот, без селективност и човечки фактор. Фокусот, како што се нагласува, не е исклучиво на казнување, туку на превенција, дисциплина и намалување на бројот на сообраќајни несреќи, особено на критичните и фреквентни сообраќајни точки.

Македонија | пред 3 месеци

(Видео) Србија ја тресе најголемата нарко-афера која води до Македонија: рекордна заплена на марихуана

Набавката на повеќе од пет тони марихуана oд територијата на Република Македонија е клучниот елемент во истрагата за најголемата заплена на дрога во историјата на Србија. Според српското Обвинителство за организиран криминал, организирана криминална група од почетокот на јануари до 29 јануари 2026 година во Македонија се стекнала со точно 5.002.079,18 грама марихуана, која потоа била транспортирана преку граница и пласирана на српскиот пазар.Како што наведуваат истражните органи, дрогата, по план на организаторот, преку државната граница ја пренесувал осомничениот Иван Драгниќ, по што била складирана во магацин поврзан со семејството Спасојевиќ. Од таму, осомничениот Урош Младеновски ја преземал марихуаната за понатамошна продажба.Особено внимание предизвикува фактот што Иван Драгниќ е косопственик на скопската компанија ALPHAPHARM, регистрирана за производство и преработка на медицински канабис, пишува Блиц. Овој податок, според српските медиуми, дополнително ја зајакнува тезата за меѓународен карактер на криминалната операција и ја отвора линијата на истрага поврзана со потеклото на дрогата.Во рамки на предметот, јавниот обвинител за организиран криминал во Србија донесе наредба за спроведување истрага против Александар Мијајловиќ, Небојша Спасојевиќ, Раде Спасојевиќ, Иван Драгниќ и Урош Младеновски, поради сомнение за неовластено производство и ставање во промет на наркотични дроги.По сослушувањето, сите осомничени го искористиле законското право да се бранат со молчење, по што обвинителството побарало притвор за сите лица од судијата за претходна постапка при Посебното одделение за организиран криминал на Вишиот суд во Белград. Предлогот е образложен со сериозноста на делото и со фактот дека станува збор за рекордна количина наркотична дрога.За Александар Мијајловиќ, кој е означен како организатор на криминалната група и се наоѓа во бегство, поднесен е и предлог за распишување потерница, вклучително и меѓународна.Министерот за внатрешни работи на Србија, Ивица Дачиќ, изјави дека станува збор за најголемата заплена на дрога досега во земјата, нагласувајќи дека акцијата претставува рекорд во историјата на српската полиција. Според официјалните податоци, претходниот рекорд изнесувал 1.960 килограми, додека во текот на целата мината година биле запленети вкупно 6,1 тон различни наркотични супстанци.

Свет | пред 3 месеци