„Мириса на смрт, бели дробови се луксуз, деца растат со антибиотици“: Апел на мајка од Скопје против тишината за загадениот воздух

Уметницата и мајка од Скопје, Ина Михајлова, преку својот профил на социјалните мрежи јавно и без задршки проговори за, како што ја опиша, ужасната реалност со загадениот воздух во главниот град, испраќајќи силен апел до јавноста да престане со молчењето.Во објава што предизвика бројни реакции, Михајлова со потресни зборови го опиша секојдневието на семејствата кои живеат во Скопје, нагласувајќи дека децата тука не растат со румени образи, туку со инхалации, сирупи и антибиотици. Таа посочи дека бронхитите што постојано се повторуваат, кашлиците што стануваат нормала и прозорците што не се отвораат ниту преку ден се дел од животот што полека се прифаќа како нешто вообичаено.„Мириса на смрт“, напиша Михајлова, додавајќи дека секојдневно живее со чувство на вина затоа што сака да го изнесе детето на прошетка, како здравите бели дробови да се привилегија, а не основно право. Според неа, додека граѓаните се гушат, им се сервираат приоритети што немаат никаква врска со реалноста во која живеат.Во својата порака таа јасно ги дефинира вистинските приоритети: детето да може да истрча без да се закашла, да заспие без инхалатор покрај креветот и да не знае што е антибиотик пред да научи да чита. Михајлова нагласува дека ова не е драма, туку секојдневие за илјадници семејства во Скопје.Со завршните зборови, таа испрати директен и вознемирувачки апел до општеството, предупредувајќи дека колку повеќе се молчи за загадувањето, толку подлабоко се вдишува отровот што секојдневно го уништува здравјето на граѓаните.

Коментари | пред 4 месеци

Од Скопје заминува американската амбасадорка Агелер - Трамп повлекува речиси 30 амбасадори

Администрацијата на американскиот претседател Доналд Трамп започна пошироко дипломатско преструктуирање, при што речиси 30 шефови на американски дипломатски мисии ширум светот добиле известување дека нивните мандати завршуваат во јануари. Меѓу нив е и амбасадорката на САД во Македонија, Агелер, објави Дојче веле, повикувајќи се на извори од Вашингтон.Според информациите, станува збор за амбасадори именувани за време на администрацијата на Џо Бајден, кои и по почетокот на вториот мандат на Трамп останале на своите позиции. Сега, тие биле официјално информирани дека нивните мисии завршуваат како дел од новата кадровска поставеност.Од Стејт департмент потегот го објаснуваат како вообичаена постапка при промена на администрацијата, нагласувајќи дека амбасадорите се лични претставници на претседателот. Во официјалното образложение се наведува дека претседателот има право да обезбеди дипломатски кадар кој ќе ја спроведува неговата политика и приоритетите на доктрината „Америка на прво место“.Промените ги опфаќаат најмалку 29 држави на повеќе континенти. Во Европа, освен Северна Македонија, на списокот се и Ерменија, Црна Гора и Словачка. Во Африка се најпогодени 13 земји, меѓу кои Нигерија, Сенегал, Руанда и Уганда, додека во азиско-пацифичкиот регион ќе се менуваат амбасадорите во шест држави, вклучувајќи ги Филипините и Виетнам. Промени се најавени и во делови од Блискиот Исток, Јужна Азија и Латинска Америка.Иако е вообичаено нова администрација да ги заменува политички именуваните амбасадори, аналитичарите посочуваат дека ваков опфат, кој задира и во кариерни дипломати, е поретко виден и се смета за значаен пресврт во американската дипломатска пракса.

Македонија | пред 4 месеци

Хороскоп за понеделник за сите хороскопски знаци

Еве што им подготвуваат ѕвездите на хороскопските знаци за понеделник, 22 декември 2025 година.ОвенРабота: Овој понеделник носи потреба од брза приспособливост. Плановите може да се менуваат во од, а твојата реакција ќе биде поважна од самото решение. Избегнувај расправии што ти ја трошат енергијата.Љубов: Емоциите се интензивни, но нетрпеливоста може да создаде непотребна напнатост. Дај ѝ простор на другата страна да се изрази.Здравје: Зголемена нервоза, особено во утринските часови. Движењето ќе ти помогне да се стабилизираш.БикРабота: Стабилен, но напорен почеток на неделата. Од тебе се очекува сигурност, но некој може да ги тестира твоите граници.Љубов: Бараш сигурност и потврда, но не мери сè преку конкретни гестови – емоциите не се секогаш видливи.Здравје: Чувствителност на замор и намалена концентрација, особено ако си го прескокнал одморот.БлизнациРабота: Понеделникот е исполнет со информации, пораки и разговори. Клучно е да не ветиш повеќе отколку што можеш да исполниш.Љубов: Флертот и комуникацијата ти одат лесно, но длабочината на односот зависи од искреноста.Здравје: Ментален замор – потребна ти е кратка пауза во текот на денот.РакРабота: Интуицијата денес ти помага повеќе од логиката. Внимавај на атмосферата меѓу колегите – нешто не се кажува отворено.Љубов: Нагласена е емотивната потреба за блискост. Не претпоставувај – прашај.Здравје: Променливо расположение може да се одрази на енергијата и апетитот.ЛавРабота: Имаш желба да ја преземеш контролата, но денес ќе добиеш повеќе ако препуштиш дел од одговорноста.Љубов: Привлекуваш внимание, но прашањето е дали бараш потврда или вистинска поврзаност.Здравје: Добра енергија, но внимавај на исцрпеност во вечерните часови.ДевицаРабота: Фокусирана си и ефикасна, но лесно те исфрлаат од рамнотежа ситните грешки на другите. Не мораш сè да исправиш.Љубов: Повеќе ги анализираш чувствата отколку што ги живееш – понекогаш е во ред да не го знаеш одговорот.Здравје: Напнатоста може да се манифестира преку главоболка или проблеми со сонот.ВагаРабота: Понеделникот бара одлучност, што не ти е најлесно. Одложувањето на одлука може да создаде дополнителен притисок.Љубов: Сакаш мир, но рамнотежата доаѓа дури по искрен разговор.Здравје: Недостаток на енергија – на телото му треба повеќе движење и свеж воздух.ШкорпијаРабота: Интензивен ден со можни скриени информации. Држи ги очите отворени и не ги откривај сите карти.Љубов: Емоциите се длабоки и силни, но лесно можат да преминат во љубомора или сомнеж.Здравје: Психички притисок – важно е да најдеш начин за ослободување од стресот.СтрелецРабота: Рутината те гуши, но денес мораш да го довршиш она што си го започнал. Наградата доаѓа подоцна.Љубов: Потребата за слобода е посилна од вообичаено, но некој бара појасни сигнали.Здравје: Вишок немир – физичката активност ќе ти помогне да се приземјиш.ЈарецРабота: Амбициозен почеток на неделата, но преголемите очекувања можат да создадат притисок. Работи чекор по чекор.Љубов: Емоциите се присутни, но ги покажуваш воздржано. Некој би сакал повеќе топлина.Здравје: Замор и напнатост во грбот или зглобовите.ВодолијаРабота: Неочекуваните промени бараат брза адаптација. Оригинална идеја може да те издвои од другите.Љубов: Емоционалната дистанца може да ја збуни другата страна – објасни што ти се случува.Здравје: Ментален замор – потребни ти се мир и тишина.РибиРабота: Креативноста е силна, но лесно можеш да се изгубиш во деталите. Потребна ти е структура.Љубов: Емпатијата е засилена, но внимавај да не ги преземеш туѓите проблеми како свои.Здравје: Осетлив нервен систем – избегнувај премногу дразби.

Магазин | пред 4 месеци

(Видео) Само на македонски, и по цена на сè: Влатко Миладиновски за музиката како отпор

Во последната емитувана епизода на Нешто конкретно се отвори прашање што со години тлее под површината, но ретко се поставува јавно и директно: како денес се брани Македонија и кој, всушност, ја брани. Во време кога патриотизмот сè помалку се докажува со зборови, а сè повеќе со лични избори, емисијата понуди сурово искрени сведоштва од луѓе кои одбиле полесен пат за да останат верни на своето.Пејачот Влатко Миладиновски, чиј глас со децении буди силни емоции кај Македонците дома и во дијаспората, беше јасен и недвосмислен. Тој порача дека пее исклучиво на македонски јазик и дека не чувствува потреба тоа да го правда. Потсети дека на почетоците, тој и неговиот брат биле исмевани од колеги кои им предвидувале неуспех поради репертоарот „само на македонски“, но времето, според него, покажало дека токму тој избор бил исправен. Во обраќање до водителката, Миладиновски направи паралела, нагласувајќи дека исто толку апсурдно е некој да биде прашан зошто води емисија на македонски јазик. Тој ја отвори и болната тема за односот кон македонската музика, посочувајќи дека додека ние често ја потценуваме, други од регионот знаат многу добро да профитираат од неа.Во контекст на дијаспората, Миладиновски, како чест гостин меѓу иселениците, оцени дека суштината не е само во заминувањето, туку во воспитувањето и вредностите што се пренесуваат на следните генерации. Според него, неопходно е државата да најде начин подобро и посистемски да ја искористи дијаспората, бидејќи таму, како што рече, има искрени и вистински Македонци.Личен и силен придонес во дебатата даде и Давид Темелков, пејач кој моментално е на привремена работа во Хрватска. Тој откри дека му била понудена можност да настапи за хрватската Евровизија, понуда која за многумина би значела пресврт во кариерата. Темелков ја одбил, со образложение дека Македонија го изградила и дека сè што чувствува кон неа го преточил во својата музика. За него, патриотизмот не е настап под туѓо знаме, туку свесна и тешка одлука да останеш свој, дури и кога сите околу тебе ти завидуваат на талентот и успехот.Од друга страна, во емисијата се вклучи и Игор Стефановски – Иџе, трикратен европски шампион во ридско-планински трки. Тој откри дека и нему му било понудено да настапува под знамиња на други држави, но дека тоа го одбил. Иако без задршка призна дека секоја година се соочува со сериозни проблеми во обезбедувањето буџет за натпреварување и дека во земјава има, како што рече, „многу продадени души“, неговиот пример, сепак, сведочи дека Македонија може да победува и надвор од своите граници ако има луѓе што чесно и упорно ја претставуваат.Особено силен впечаток остави и настапот на Тијана Илова, 20-годишна тапанџика, која без патетика ја изговори можеби најтешката вистина на вечерта. Таа предупреди дека ако младите не ја чуваат традицијата, таа ќе исчезне, потенцирајќи дека не станува збор за носталгија, туку за одговорност и страв дека, доколку оваа генерација се откаже, нема кој да продолжи по неа.Епизодата на „Нешто конкретно“ ја отвори и суштинската дилема што останува да виси во јавниот простор: дали дијаспората навистина може да ја спаси Македонија или од неа очекуваме премногу, додека дома пребрзо се откажуваме од сопствените вредности, јазик и идентитет. Прашање без едноставен одговор, но со јасна порака дека одбраната на Македонија денес почнува од личниот избор да не се откажеш од себе.

Магазин | пред 4 месеци

По убиствата во Сиднеј, властите во Австралија тргнуваат против говорот на омраза и екстремизмот

По смртоносниот масакр на плажата Бонди во Сиднеј минатата недела, австралиската сојузна држава Нов Јужен Велс најави иницијатива за забрана на јавно истакнување екстремистички знамиња и симболи. Мерката е дел од поширок пакет најавени чекори по нападот во кој беа убиени 15 лица, а десетици беа ранети на една од најпопуларните плажи во земјата, објави Newsweek.Премиерот на Нов Јужен Велс, Крис Минс, изјави дека говорот на омраза и поттикнувањето омраза немаат место во австралиското општество, нагласувајќи дека државата мора решително да одговори на настаните што ја потресоа јавноста.По нападот, властите во возилото на напаѓачот пронашле две импровизирани знамиња на Исламска држава, што дополнително ги засили повиците за законска забрана на јавното истакнување симболи поврзани со оваа и сродни екстремистички организации. Според предложените законски измени, прекршувањето на забраната би се казнувало со затворска казна до две години и високи парични глоби.Минс најави и дека со новите прописи ќе бидат забранети извици како „глобализирајте ја интифадата“, оценувајќи дека станува збор за говор кој поттикнува омраза и насилство. Тој предупреди дека користењето на вакви фрази претставува опасна игра со безбедноста на заедницата. Воедно, полицијата ќе добие проширени овластувања да побара од учесниците на протести и јавни собири да ги отстранат покривалата за лице.Нападот се случил во момент кога еврејската заедница ја одбележувала првата вечер на Ханука. Австралиските медиуми ги идентификуваа осомничените како татко и син, Саџид Акрам (50) и Навид Акрам (24), кои отвориле оган врз присутните. Саџид Акрам починал на самото место, додека неговиот син бил пренесен во болница во критична состојба. Навид Акрам е обвинет за 59 кривични дела, меѓу кои и тероризам, но австралискиот премиер Ентони Албаниз изјави дека засега нема докази дека нападот бил дел од поширока терористичка ќелија.И покрај тоа што Австралија веќе има едни од најстрогите закони за поседување оружје во светот, властите најавија дека разгледуваат и дополнителни мерки. Меѓу нив се ограничување на бројот на огнено оружје што може да го поседува едно лице и издавање дозволи исклучиво на австралиски државјани, како и национална програма за откуп на нелегално и вишок оружје.Министерката за полиција и борба против тероризмот, Јасмин Катли, за The Guardian изјави дека подготовките за ваква акција се веќе во тек, посочувајќи го примерот на Западна Австралија, каде за откуп биле издвоени десетици милиони долари и биле собрани десетици илјади парчиња оружје. Според неа, на национално ниво бројките би можеле да бидат неколкупати поголеми.Настаните во Сиднеј се случуваат во услови на изразен пораст на антисемитизмот во Австралија, каде живеат околу 117.000 Евреи. Според владината специјална пратеничка за борба против антисемитизмот, Џилијан Сегал, бројот на антисемитски инциденти, вклучувајќи физички напади, вандализам и закани, е тројно зголемен во годината по нападот на Хамас врз Израел на 7 октомври 2023 година, што дополнително ја засилува чувствителноста и притисокот врз властите да реагираат решително.

Свет | пред 4 месеци

(Фото) Опаѓа загаденоста во Скопје, дел од мерните станици светат и зелено

Се подобрува квалитетот на воздухот во Скопје, по викендот кога главниот град се впишуваше во првите три најзагадени во Европа, а Македонија беше и меѓу првите десет држави со најзагаден воздух. Утринава, повеќе мерни станици светат зелено, што значи дека има незначително загадување, односно во рамки на дозволеното. Ниско загадување има во неколку делови од градот како Карпош 4, Карпош 1, Тафталиџе 1, Аеродром, Центар. Специфично е што високо загадување покажува мерната станица на Водно.Состојбата со воздухот во текот на викендот, кога воздухот имаше мирис на чад, погледнете ја тука:

Скопје | пред 4 месеци

АП: Русија наводно развива ново оружје за уништување на сателитите на „Старлинк“

Разузнавачките служби на две земји членки на НАТО се сомневаат дека Русија развива ново противсателитско оружје, чија цел би била „Старлинк“ на Илон Маск со деструктивни облаци од шрапнели во орбитата, со намера да се ограничи западната надмоќ во вселената, која ѝ помогна на Украина на бојното поле, пишува „Асошиејтед прес“.Според разузнавачки информации до кои имал увид „Асошиејтед прес“, таканареченото оружје со „зонски ефект“ би настојувало да ги преплави орбитите на „Старлинк“ со стотици илјади топчиња со висока густина, што потенцијално би оневозможило повеќе сателити одеднаш, но истовремено би носело ризик од катастрофална колатерална штета за други орбитални системи.Аналитичари кои не ги виделе извештаите изразуваат сомнеж дека такво оружје би можело да функционира без да предизвика неконтролиран хаос во вселената за компании и држави, вклучително и Русија и нејзината сојузничка Кина, кои се потпираат на илјадници сателити во орбитата за комуникации, одбрана и други витални потреби.Ваквите последици, вклучувајќи ги и ризиците за сопствените вселенски системи, би можеле да ја одвратат Москва од распоредување или користење на вакво оружје.Сомнежи на експертите„Не верувам во тоа. Навистина не верувам“, изјави Викторија Самсон, експертка за вселенска безбедност од фондацијата „Секјур Ворлд“. „Искрено, би била многу изненадена ако направат нешто такво.“Сепак, командантот на вселенскиот оддел на канадската војска, бригадниот генерал Кристофер Хорнер, изјави дека ваквиот руски развој не може целосно да се исклучи, имајќи ги предвид претходните американски обвинувања дека Русија развива и недискриминирачко нуклеарно оружје базирано во вселената.„Не можам да кажам дека сум запознаен со таков систем. Но не е неверојатно“, рече тој. „Ако извештаите за нуклеарен систем се точни и ако се подготвени да го развиваат и да одат толку далеку, тогаш не би ме шокирало нешто малку помалку од тоа, но подеднакво штетно, да биде во рамките на нивните развојни можности.“Портпаролот на Кремљ, Дмитриј Песков, не одговори на барањата за коментар. Русија претходно повикуваше на напори во рамките на Обединетите нации за запирање на распоредувањето оружје во орбитата, а претседателот Владимир Путин изјави дека Москва нема намера да поставува нуклеарно оружје во вселената.„Старлинк“ како клучна заканаСпоред разузнавачките податоци, Русија го смета „Старлинк“ за особено сериозна закана. Илјадници сателити во ниска орбита беа клучни за опстанокот на Украина во услови на руската инвазија, која сега е во својата четврта година.Украинските сили ја користат брзата интернет-услуга на „Старлинк“ за комуникација на бојното поле, насочување на оружје и други намени, а исто така и цивили и владини функционери во области каде што руските напади ги нарушиле комуникациите. Руски претставници повеќепати предупредуваа дека комерцијалните сателити кои ѝ служат на украинската војска би можеле да бидат легитимни цели.За разлика од ракетата што Русија ја тестираше во 2021 година за уништување на еден стар сателит од времето на Студената војна, новото оружје во развој, според разузнавачките извештаи, би целело повеќе „Старлинк“ сателити истовремено.Хорнер изјави дека е тешко да се замисли како облаците од топчиња би можеле да се ограничат само на „Старлинк“ и дека остатоците од таков напад би можеле „многу брзо да излезат од контрола“.Оружје на стравВо извештаите не се наведува кога Русија би можела да биде способна да распореди ваков систем, ниту се даваат детали дали тој е тестиран или колку е напреднато истражувањето.Сепак, се наведува дека топчињата би биле толку мали – само неколку милиметри во дијаметар – што би можеле да избегнат откривање од копнените и вселенските системи за следење, што би ѝ ја отежнало на Москва идентификацијата на одговорноста за евентуален напад.Клејтон Своуп, експерт за вселенска безбедност од Центарот за стратешки и меѓународни студии, изјави дека „луѓето би се снаоѓале“, дури и ако топчињата не можат да се следат. „Ако сателитите почнат да откажуваат со оштетувања, претпоставувам дека би можеле да ги поврзете работите“, рече тој.Вселенскиот хаос што ваквото оружје би можело да го предизвика, според него, би ѝ овозможил на Москва да им се заканува на противниците без реално да го употреби. „Дефинитивно изгледа како оружје на страв, во потрага по некакво одвраќање“, изјави Своуп.Орбитите на „Старлинк“ се наоѓаат на околу 550 километри над Земјата. Кинеската вселенска станица „Тјангонг“ и Меѓународната вселенска станица функционираат на пониски орбити, „така што и двете би биле изложени на ризици“, додаде тој.Викторија Самсон смета дека недостатоците на недискриминирачкото оружје со топчиња би можеле да ја одвратат Русија од ваков чекор. „Тие вложиле огромно количество време, пари и човечки ресурси за да бидат вселенска сила“, рече таа. Користењето на такво оружје „ефективно би им го затворило и нивниот сопствен пристап до вселената“, заклучи Самсон. „Не знам дали се подготвени да се откажат од толку многу.“

Свет | пред 4 месеци

(Фото) Вандализам по украсувањето: Не помина ни една недела, а веќе има уништени макети и украдена елка

Само една недела откако беше украсен плоштадот Македонија во Скопје, дел од новогодишната декорација веќе е оштетена и украдена.Од просторот на плоштадот е украдена една елка, додека целосно се уништени четири макета – адвент-календар, поставени како дел од празничното уредување на центарот на градот.Случајот предизвика реакции кај граѓаните, кои на социјалните мрежи реагираат на неодговорното однесување и уништувањето на јавниот простор, особено во период кога градот е украсен за новогодишните и божиќните празници.Засега нема официјална информација дали случајот е пријавен и дали ќе има истрага за утврдување на одговорност.

Скопје | пред 4 месеци

Ултиматум од Вашингтон: ако Путин одбие мир, Украина да добие крстосувачки ракети

Републиканскиот американски сенатор и близок сојузник на претседателот Доналд Трамп, Линдзи Греам, порача дека Вашингтон треба драстично да го зголеми притисокот врз Москва и дури да ја снабди Украина со крстосувачки ракети „Томахок“, доколку рускиот претседател Владимир Путин одбие да го прифати договореното мировно решение. Според Греам, досегашните дипломатски напори само ѝ купуваат време на Москва за да продолжи со остварување на своите воени цели.Говорејќи во емисијата Meet the Press на NBC, сенаторот изнесе детален план и повика на решителна промена на пристапот. Тој побара претседателот да го потпише неговиот предлог-закон со поддршка од 85 ко-предлагачи, со кој би се вовеле царини за земји како Кина што купуваат евтина руска нафта, Русија да се прогласи за држава-спонзор на тероризам поради киднапирањето на околу 20.000 украински деца, како и да се запленуваат бродови што превезуваат санкционирана руска нафта, по примерот на мерките што САД ги применуваат кон Венецуела.Греам нагласи дека, доколку Путин повторно одбие, САД мора „драматично да ја сменат играта“, вклучително и со испорака на крстосувачки ракети Tomahawk за Украина, со цел да се погодат фабрики за беспилотни летала и ракетно вооружување на територијата на Русија. Според него, без значително засилен притисок, Москва ќе продолжи со силово заземање на Донбас.Изјавите доаѓаат во момент кога украински и американски претставници на Флорида ја заокружија новата рунда мировни разговори, како дел од напорите на Вашингтон да се финализира мировната рамка. Средбите следуваат по разговорите меѓу Украина и САД на 19 декември и меѓу САД и Русија на 20 декември во Мајами, со уште една американско-руска сесија закажана за 21 декември.Секретарот на Советот за национална безбедност и одбрана на Украина, Рустем Умеров, кој ја предводеше украинската делегација, ги оцени разговорите како конструктивни и продуктивни, нагласувајќи дека Украина останува целосно посветена на постигнување праведен и одржлив мир. Преговорите биле насочени кон ревидиран мировен план од 20 точки, можни безбедносни гаранции за Украина и долгорочни мерки за економски развој.Во посебна изјава по разговорите, украинскиот претседател Володимир Зеленски порача дека пристапот на Киев е сè да биде изводливо и применливо – од клучните мерки за мир и безбедност до обновата на земјата.

Свет | пред 4 месеци

Разузнавачки сомнежи: Русија наводно развива оружје за масовно онеспособување на „Старлинк“

Разузнавачките служби на две земји членки на НАТО изразуваат сериозни сомнежи дека Русија развива нов вид антисателитско оружје, наменето за напад врз сателитската констелација „Старлинк“ на Starlink, сопственост на Илон Маск. Според наводите, оружјето би функционирало преку создавање разорни облаци од метални честички во орбитата, со цел да се ограничи западната доминација во вселената, која одигра значајна улога во поддршката на Украина на бојното поле, објави Associated Press.Според разузнавачки информации до кои имал увид АП, станува збор за таканаречено оружје со „зонски ефект“, кое би распрснало стотици илјади мали, но исклучително густи метални сфери во орбитите каде што се движат сателитите на „Старлинк“. Таков напад би можел истовремено да онеспособи повеќе сателити, но истовремено би носел и ризик од катастрофална колатерална штета за други вселенски системи, без разлика на државната или комерцијалната припадност.Аналитичари кои не ги виделе конкретните извештаи изразуваат длабока скепса дека вакво оружје би можело да функционира без да предизвика неконтролиран хаос во орбитата, што би ги погодило и самата Русија и нејзините сојузници, меѓу кои и Кина. Двете држави, како и бројни приватни компании, зависат од илјадници сателити за комуникации, одбрана и други клучни функции, што дополнително го зголемува ризикот од самооштетување.Токму можните последици врз сопствените вселенски капацитети, според експертите, би можеле да ја одвратат Москва од реална примена на ваков систем. „Не верувам во тоа, навистина не верувам“, изјави Викторија Самсон, експертка за вселенска безбедност од фондацијата „Secure World“. „Искрено, би била многу изненадена доколку се одлучат на таков чекор.“Сепак, командантот на вселенскиот оддел на канадската армија, бригадниот генерал Кристофер Хорнер, оцени дека вакво сценарио не може целосно да се исклучи, особено ако се земат предвид претходните американски обвинувања дека Русија развива и недискриминаторно нуклеарно оружје базирано во вселената. „Не можам да кажам дека сум запознаен со ваков систем, но не е невозможно. Ако тврдењата за нуклеарно оружје во орбитата се точни и ако се подготвени да одат толку далеку, тогаш не би ме шокирало да развиваат и нешто малку помалку екстремно, но подеднакво штетно“, изјави Хорнер.Портпаролот на Кремљ, Дмитриј Песков, не одговори на барањата за коментар. Русија и претходно повикуваше на активности во рамки на Обединетите нации за спречување на поставување оружје во орбитата, а претседателот Владимир Путин повеќепати изјави дека Москва нема намера да поставува нуклеарно оружје во вселената.Според разузнавачките процени, Русија ја смета мрежата „Старлинк“ за особено сериозна закана. Илјадници сателити во ниска орбита одиграа клучна улога во отпорот на Украина против руската инвазија, која влезе во својата четврта година. Украинските сили ја користат брзата сателитска интернет-услуга за комуникација на бојното поле, насочување на вооружувањето и други воени цели, додека цивилното население и државните институции се потпираат на системот таму каде што руските напади ја нарушија копнената комуникациска инфраструктура. Руски функционери повеќепати предупредуваа дека комерцијалните сателити кои ѝ служат на украинската армија би можеле да бидат легитимни цели.За разлика од тестот во 2021 година, кога Русија со ракета уништи стар советски сателит и создаде опасен облак од вселенски отпад, новиот систем, доколку се развие, би имал капацитет истовремено да погоди поголем број сателити на „Старлинк“. Хорнер оцени дека е тешко да се замисли како вакви облаци од метални честички би можеле да се ограничат само на една мрежа и предупреди дека остатоците од таков напад би можеле „многу брзо да излезат од контрола“.

Свет | пред 4 месеци

Јон Фрчкоски во фокусот на нападите: ВМРО-ДПМНЕ тврди дека „новото“ раководство на СДСМ е блиско до Заев

Опозициската ВМРО-ДПМНЕ реагираше на составот на Извршниот одбор на Социјалдемократски сојуз на Македонија, оценувајќи дека најавените промени во партијата се, како што наведуваат, само формални и дека зад нив стојат луѓе блиски до поранешниот партиски лидер Зоран Заев.Во реакцијата, ВМРО-ДПМНЕ посебно го посочува изборот на Јон Фрчкоски за член на Извршниот одбор, наведувајќи дека неговото присуство во партиското раководство е доказ дека, според нив, СДСМ не се дистанцира од контроверзни кадри.Од партијата наведуваат дека Фрчкоски и претходно бил предмет на јавни контроверзии, по објавени фотографии и тврдења за негово однесување додека бил на функција директор на Центарот за аналитика на СДСМ. ВМРО-ДПМНЕ тврди дека за овие наводи немало јасна реакција или оградување од страна на актуелниот претседател на СДСМ, Венко Филипче.Како аргумент, од ВМРО-ДПМНЕ се повикуваат и на изјава на самиот Фрчкоски од минатата недела, во која тој навел дека неговата оставка никогаш не била разгледана од партиските органи.Во реакцијата се поставуваат и прашања за одговорноста и критериумите во СДСМ, со оценка дека дел од кадрите кои се претставуваат како „нови“ се, според нив, одамна компромитирани во јавноста.

Македонија | пред 4 месеци

Хаос на европските аеродроми по стартот на EES: Чекања до 3 часа и предупредување за уште поголеми застои од јануари

Хаотични сцени, долги редици и повеќечасовни чекања стануваат сè почеста појава на европските аеродроми по стартот на Шенген системот за влез и излез (EES), кој почна да се применува од 12 октомври 2025 година. Во услови на зголемен сообраќај, патниците на одделни аеродроми чекаат и до три часа за да ги завршат граничните процедури.Аеродромските оператори предупредуваат дека состојбата може дополнително да се влоши доколку системот не се стабилизира до почетокот на јануари. Причина за загриженост е планираното зголемување на прагот за регистрација и обработка на патници од трети земји од сегашните 10 проценти на 35 проценти, што според календарот за имплементација треба да стапи во сила од 9 јануари.ACI EUROPE, европскиот огранок на Меѓународниот совет на аеродроми, јавно ги повика Европска комисија, eu-LISA, Фронтекс и земјите членки на Шенген итно да реагираат на растечките оперативни проблеми или да обезбедат поголема флексибилност во примената на EES сè додека системот целосно не биде функционален на сите аеродроми.Од ACI EUROPE посочуваат дека постепеното воведување на регистрацијата и снимањето биометриски податоци за државјани на трети земји значително го зголемило времето на обработка на граничните контроли – во некои случаи и до 70 проценти. Во шпицовите на сообраќајот, тоа резултира со чекања кои достигнуваат и до три часа.„Ова сериозно влијае на искуството на патниците – особено засегнати се аеродромите во Франција, Германија, Грција, Исланд, Италија, Португалија и Шпанија“, наведуваат од ACI.И по два месеца од стартот на системот, според аеродромските оператори, сè уште се регистрираат технички проблеми – од прекини и недоволна стабилност на системот, до недостапност на портите за автоматска гранична контрола (ABC) за обработка на EES на голем број аеродроми. Дополнителен предизвик е и недостигот од доволен број киосци за земање биометриски податоци, како и недоволен број полициски службеници.„Значителна непријатност веќе им се нанесува на патниците, а операциите на аеродромите се засегнати со моменталниот праг за регистрација на државјани од трети земји поставен на само 10%. Освен ако сите оперативни прашања што ги покренуваме денес не се решат целосно во наредните недели, зголемувањето на овој праг за регистрација на 35% од 9 јануари – како што бара календарот за имплементација на EES – неизбежно ќе резултира со многу посериозни застои и системски нарушувања за аеродромите и авиокомпаниите. Ова веројатно ќе вклучува сериозни безбедносни опасности“, изјави Оливие Јанковец, генерален директор на ACI EUROPE.ACI EUROPE е европскиот регион на Меѓународниот совет на аеродроми и ги претставува интересите на повеќе од 600 аеродроми во 55 земји, кои заедно опслужуваат над 95 проценти од комерцијалниот воздушен сообраќај во Европа.

Свет | пред 4 месеци

(Видео) Рускиот генерал Сарваров разнесен во Москва: Експлозивот бил под неговиот автомобил, властите разгледуваат украинска трага

Во утринските часови во Москва загинал висок офицер на руските вооружени сили, откако експлозивна направа била детонирана под неговиот автомобил, соопштија надлежните институции.Како што информира Руски истражен комитет, во експлозијата животот го загубил генерал-потполковникот Фанил Сарваров. Според официјалните информации, уредот бил поставен под возилото на офицерот и активиран во момент кога тој се наоѓал во близина.Сарваров ја извршувал функцијата началник на одделот за оперативна обука во рамките на руските вооружени сили, наведуваат властите.Истрагата е во тек, а меѓу верзиите што ги разгледуваат надлежните органи е и можна вмешаност на украинските разузнавачки служби. Од украинска страна засега нема официјален коментар за настанот.

Свет | пред 4 месеци

ЕУ ја блокирала ИПАРД 3, програмата вредна 130 милиони евра – СДСМ обвинува за корупција во врвот на власта

Европската Унија ја суспендирала исплатата на средства од ИПАРД 3 програмата, а од опозицискиот СДСМ тврдат дека причината за ваквата одлука е корупција и злоупотреба на европски пари од страна на актуелната власт предводена од ВМРО-ДПМНЕ.Според соопштението на Социјалдемократски сојуз на Македонија, Европската комисија ја донела одлуката за суспензија на програмата поради сомнежи за неправилности во работењето на Агенцијата за финансиска поддршка во земјоделството и руралниот развој. Од партијата посочуваат дека директорот на Агенцијата, кој доаѓа од редовите на ВМРО-ДПМНЕ, бил уапсен поради сомнежи за злоупотреба на средства.Од СДСМ обвинуваат дека власта повеќе од десет дена не ја информира јавноста за одлуката на Европска комисија, додавајќи дека, според нив, станува збор за сериозен удар врз земјоделството и агробизнис секторот. Тие предупредуваат дека земјоделците и компаниите кои планирале или веќе започнале инвестиции преку ИПАРД 3 може да останат без финансиска поддршка.Опозициската партија наведува дека програмата, вредна околу 130 милиони евра, не треба да се гледа како изолиран случај, туку како дел од, како што велат, поширок модел на коруптивно однесување. Во соопштението се споменуваат и јавни набавки и тендери за кои, според СДСМ, постојат сомнежи за фаворизирање на одредени фирми.СДСМ исто така ги отфрла претходните обвинувања насочени кон поранешни функционери и тврди дека тие служеле за дефокусирање од актуелните случувања поврзани со ИПАРД програмата.Од партијата бараат брза, темелна и транспарентна истрага и одговорност од сите инволвирани во случајот, нагласувајќи дека јавноста мора да добие целосна слика за причините поради кои е доведена во прашање европската финансиска поддршка за земјоделството.

Македонија | пред 4 месеци

Американски државјанин со нигериско потекло криел цел арсенал пиштоли, куршуми и ножеви, фантомка, сајли за врзување...ОЈО бара притвор

Основното јавно обвинителство Скопје донесе Наредба за спроведување истражна постапка против американски државјанин со потекло од Нигерија, бидејќи по преземени повеќе истражни дејствија во текот на вчерашниот ден се обезбедија докази за основано сомнение дека сторил кривично дело – Неовластено држење, посредување и тргување со оружје и експлозивни материи од член 396 став 5 во врска со став 3 и став 1 од Кривичниот законик.Воедно, против него е поведена постапка за дело – Напад врз службено лице при вршење работи на безбедноста од член 383. На 21 декември во раните утрински часови, пред ноќен клуб во Градскиот парк, осомничениот нападнал полицаец кој се обидел да го легитимира.Со удари со тупаници му нанел телесна повреда на полицаецот, а потоа бил совладан и кај него бил пронајден полуавтоматски пиштол “Глок” со калибар 9мм Para, како и две рамки со 30 куршуми за тој пиштол. Откако беше утврдено дека странскиот државјанин престојува во хостел во Скопје, јавниот обвинител обезбеди наредба за претрес и во собата во која престојувал осомничениот исто така било пронајдено поголемо количество оружје и муниција – уште еден пиштол “Глок”, три рамки со по 15 куршуми, дополнителни 75 куршуми во зипер ќеси, комплет за чистење оружје, три ножа, како и други предмети – фантомка, тактички ракавици, бандажери за раце, сајли за врзување, усб и хартиени документи, за кои е издадена наредба за вештачење.Јавниот обвинител до судијата на претходна постапка достави предлог за определување мерка притвор за осомничениот, бидејќи постои реална опасност од бегство, можност да влијае врз постапката и сведоците и да ги прикрива доказите, како и опасност да изврши друго кривично дело

Скопје | пред 4 месеци

Намалена видливост предизвика проблеми во авиосообраќајот на Скопје

Поради густа магла и намалена видливост, денеска (21 декември 2025 година) е отежнат авиосообраќајот на Меѓународниот аеродром Скопје. Во периодот од полноќ до 20 часот реализирани се ограничен број летови, додека дел од нив се откажани или пренасочени.Според ажурираните информации од аеродромот, во наведениот временски период слетале вкупно 13 авиони од повеќе европски дестинации, меѓу кои Дортмунд, Виена, Хамбург, Брисел, Белград, Загреб, Франкфурт, Венеција, Париз (Буве), Берлин, Минхен (Меминген) и Цирих.Истовремено, од скопскиот аеродром полетале 13 авиони кон Виена, Белград, Загреб, Брисел, Хамбург, Баден-Баден, Франкфурт, Берлин, Варшава, Базел и Барселона, додека летовите за Рим (Фјумичино) и Малме се очекува да полетаат во текот на вечерните часови.Откажани се вкупно 20 летови, и на пристигнување и на поаѓање, а два авиона биле пренасочени кон други аеродроми поради неповолните временски услови.Од Меѓународниот аеродром Скопје апелираат патниците редовно да ги следат информациите од своите авиокомпании, бидејќи временските услови се менуваат, а секоја компанија има сопствени процедури и критериуми за слетување и полетување при намалена видливост.Надлежните информираат дека аеродромот е отворен и дека сите капацитети се ставени во функција. Персоналот и техничката опрема работат непрекинато со цел безбедно и навремено опслужување на авионите и патниците.Промените во редовниот распоред на летање се објавуваат во реално време на официјалната веб-страница на аеродромот, а патниците со дополнителни прашања можат да се обратат на информативниот пулт во терминалната зграда или на телефонскиот број 02/3148-333.

Македонија | пред 4 месеци

(Видео) Сара Јо со солзи на сцената во Скопје му посвети песна на Панчо

Српската поп-пејачка Сара Јо синоќа, на 20 декември, настапи во еден од најпознатите скопски клубови, каде што концертот доби неочекувана и длабоко емотивна димензија. Наместо исклучиво музичко уживање, присутните беа сведоци на трогателен момент кој силно ја одбележа вечерта.За време на настапот, Сара Јо им соопшти на присутните дека ќе изведе песна посветена на својот близок пријател Панчо од групата ДНК. Станува збор за нумерата „Ако утре ме нема“, песна која, како што истакна, за неа има посебна емотивна тежина.По првите стихови од песната, Сара Јо видливо се расплака.Инаку, уште пред концертот, Сара Јо преку социјалните мрежи најави дека настапот во Скопје ќе биде посветен на Панчо, споделувајќи и видео од проба на кое ја изведува истата песна со силни емоции.

Македонија | пред 4 месеци

Пукање во Сараево: Од автомобил пукале кон маж, полицијата откри оружје и дрога

Во Сараево синоќа, во полициска акција, беа уапсени двајца мажи, Ф.П. (1998) и А.Х. (2001), поради сомнение дека сториле обид за убиство во населбата Кобиља Глава. Се сомнева дека во ноќта кон недела, во 00:35 часот, од автомобил во движење пукале кон В.Д. од Сараево, кој исто така се наоѓал во возило, но за среќа не се здобил со повреди.Пронајдени оружје и дрогаОперативната акција ја спровеле службениците на Управата на полицијата на МВР на Кантонот Сараево, под надзор на надлежното обвинителство. При претрес на возилото и станбените простории што осомничените ги користат на подрачјето на Стари Град, пронајден е цел арсенал.„Со извршениот претрес на возилото и станбените простории кои осомничените ги користат на подрачјето на Стари Град, полициските службеници пронајдоа и одзедоа една автоматска пушка, еден пиштол, два детонатори, одредена количина муниција, повеќе ПВЦ пакувања во кои имало материи што асоцираат на опојни дроги хероин, кокаин и марихуана, дробилки, дигитална вага и други предмети од интерес за истрагата“, соопштија од МВР на Кантонот Сараево.За што се товарат осомниченитеПоради низа тешки кривични дела, Ф.П. (1998) од Сараево е уапсен поради сомнение за обид за убиство, оштетување на туѓа ствар, недозволено држење оружје и експлозивни материи, како и неовластено производство и пуштање во промет на опојни дроги. Вториот осомничен, А.Х. (2001) од Сараево, се товари за обид за убиство, оштетување на туѓа ствар и кривично дело по член 74 од Законот за набавување, држење и носење оружје и муниција на Кантонот Сараево.„Осомничените се наоѓаат на криминалистичка обработка во Управата на полицијата на МВР на Кантонот Сараево, по што ќе бидат предадени на надлежното Кантонално обвинителство на Кантонот Сараево“, се додава во соопштението.

Свет | пред 4 месеци

СДСМ: Погодивме осино гнездо, ДПМНЕ дефокусира од предавството „мигранти за пари“

СДСМ денеска ја оцени кампањата на ДПМНЕ како обид за дефокусирање на јавноста од најважната тема – „мигранти за пари“, што ја објавија британските медиуми.Според партијата, ДПМНЕ е во паника и дури донесе неуставна Резолуција со која се обидува да ја ограничи слободата на говорот и да воведе цензура, за никој да не зборува за оваа тема. СДСМ ја спореди ваквата постапка со нацистичкиот пристап од 1933 година, кога преку Декретот на Адолф Хитлер беа суспендирани клучни граѓански слободи, вклучително и слободата на говор.„ДПМНЕ секојдневно организира прес-конференции за напади на СДСМ, штанцајќи лажни вести и повторувајќи стари фрази од времето на Никола Груевски. Се обидуваат да отвораат и по 50 теми дневно, но бегаат од вистината – ‘мигранти за пари’. Граѓаните ја дознаа вистината за предавството на Македонија“, се вели во соопштението на СДСМ.Партијата додава дека промената на Законот за странци од страна на ДПМНЕ им овозможува на мигрантите да се претставуваат како „економски работници“, со што, како што велат од СДСМ, се подготвува план за избори, а потоа за мигранти.„Нема да ви помине. Борбата започна!“, нагласуваат од СДСМ.

Македонија | пред 4 месеци

Густа магла предизвика проблеми со летовите на скопскиот аеродром

Поради густата магла што ја покри скопската котлина, видливоста на Меѓународниот Аеродром Скопје е значително намалена, што денеска доведе до откажување на 20 летови и пренасочување на еден лет, соопштија од ТАВ Македонија.По 11 часот на аеродромот успешно слетаа авионите од Дортмунд и Виена, а во моментов се очекува полетување на летот за Хамбург. Според најавите од метеоролозите на М-НАВ, намалената видливост ќе продолжи и во остатокот од денот, како и утре.ТАВ Македонија апелира до сите патници редовно да ги проверуваат информациите за своите летови кај авиокомпаниите, нагласувајќи дека аеродромот е отворен и сите капацитети функционираат. Аеродромот се затвора само во исклучителни ситуации, кога некој од основните капацитети за авио-операции не е во функција или во случаи на вонредни околности.Пилотите, во согласност со минималната видливост која ја прифаќа секоја авиокомпанија, одлучуваат дали летовите ќе се слетуваат или пренасочуваат на друг аеродром. Сите промени во распоредот на летови се објавуваат во реално време на веб-страницата на аеродромот https://skp.airports.com.mk/, како и на пултот за информации достапен 24/7 на телефонскиот број 02 3148 333.Вчера, истата временска состојба предизвика 16 откажани и 11 пренасочени летови, додека три авиони слетаа и три полетаа по подобрувањето на временските услови во попладневните часови.

Македонија | пред 4 месеци

Герасимовски: На Водно ја продолжуваме традицијата, бадниковите гранчиња нека донесат здравје, среќа и благосостојба

Градоначалникот на Општина Центар, Горан Герасимовски, денеска им се приклучи на скопските бадникари на јужните падини на Водно, продолжувајќи ја традицијата на собирање дабови гранчиња во пресрет на Бадник.Првите гранчиња симболично ги пресекоа бадникарскиот кум Зоран Кондратенко и здравичарот Јаков Дренковски, со што беше означен почетокот на бадникарските активности.„Секоја година, овде на Водно, се собираме за да ги зачуваме и одбележиме македонските вековни обичаи. Општина Центар секогаш ќе биде покровител на настани што ја негуваат традицијата и духовните вредности“, порача Герасимовски.На настанот, во организација на здружението „Одбор за традиционална прослава на Бадник“, граѓаните се почестија со посна трпеза и во добро расположение испратија пораки за здравје, среќа и благосостојба за празниците.Собраните бадникови гранчиња, како симбол на сила, здравје и среќа, на 6 јануари ќе бидат споделени на верниците на централната прослава во Соборниот храм.

Македонија | пред 4 месеци

Кремљ: Путин е подготвен да разговара со Макрон

Рускиот претседател Владимир Путин е подготвен за разговори со францускиот колега Емануел Макрон, изјави денес портпаролот на Кремљ, Дмитриј Песков, за руската државна новинска агенција РИА Новости, а кабинетот на францускиот претседател веднаш ја поздрави оваа изјава.Песков изјави дека Путин смета оти, доколку постои обострана политичка волја, разговорите меѓу нив двајцата можат да се гледаат само позитивно.Макрон го застапува европското вклучување во мировните преговориВо петок, по европскиот самит во Брисел, Макрон изјави дека повторен разговор со Путин би можел да биде корисен за Европа и Украина, за Европа директно да се вклучи во мировните преговори, наместо тие сами да ги водат Соединетите Американски Држави.„Во спротивно, ние преговараме само со преговарачи кои потоа разговараат со Русите, а тоа не е оптимално“, рече францускиот претседател.Минатата недела, во Берлин, Украинците, Американците и Европјаните разговараа за мировно решение за Украина, која Русија ја нападна пред скоро четири години.Разговорите во Мајами влегле во нов круг за време на викендот. Американските преговарачи планираат да ги пренесат резултатите од Берлин на руските претставници.Рускиот преговарач Кирил Дмитриев го оцени првиот круг на преговори како конструктивен.Елизејската палата ја поздравува Путиновата подготвеност за дијалогФранцуското претседателство ја поздрави објавата на рускиот претседател дека е „подготвен“ да разговара со Макрон, додавајќи дека „во наредните денови“ ќе се одлучи за најдобрите начини за реализација.„Добро е што Кремљ јавно ја одобри оваа иницијатива. Затоа, во наредните денови ќе одлучиме за најдобриот начин на кој тоа ќе го спроведеме“, соопшти Елизејската палата.Париз истакна дека сите разговори со Москва ќе се водат „целосно транспарентно“ во однос на украинскиот претседател Володимир Зеленски и другите Европјани, а нивната цел останува постигнување „цврст и траен мир“ за украинскиот народ.„Инвазијата на Украина и тврдоглавоста на претседателот Путин ги прекинаа сите можности за дијалог“ во последните три години, додава Елизејската палата.„Сега, кога изгледите за прекин на огнот и мировните преговори стануваат појасни, повторно е корисно да се разговара со Путин“, се додава во соопштението.Макрон и Путин последен пат разговарале телефонски на 1 јули, првпат по три години, но тогаш можеле само да ги констатираат разликите во ставовите.

Свет | пред 4 месеци

Избувна пожар во стан во Загреб

Во Загреб денес околу 11:30 избувнал пожар, потврди Јавната противпожарна единица на Загреб.Пожарникарите примиле пријава во 11:32 часот. Пожарот го зафатил дневниот престој на станот, а опожарената површина изнесува околу пет квадрати. Во пожарот изгореле маса и плакар.Според информациите од пожарникарите, станарите успеале да ја задушат огнената стихија пред нивниот пристигнување. Една личност побарала итна медицинска помош поради вдишување чад, а полицијата повикала брза помош.Пожарникарите го изгаснале пожарот, го прегледале просторот и опожарените делови од станот ги изнеле надвор. Интервенцијата завршила без потреба од понатамошни активности.Неофицијално, причината за пожарот била свеќа.

Свет | пред 4 месеци

Петрушевски: Криминалната шема на СДС и ДУИ во ЕСМ - наместени тендери од 8 милиони евра и испрани 2 милиони

Пратеникот на ВМРО-ДПМНЕ, Бране Петрушевски, денеска обвини дека СДС и ДУИ стојат зад, како што рече, криминална шема во државната компанија ЕСМ, преку која биле испрани околу два милиони евра пари на граѓаните.Петрушевски изјави дека во 2023 година, под раководство поставено од тогашната власт на СДС и ДУИ, во ЕСМ бил наместен тендер вреден осум милиони евра. Според него, наместо спроведување транспарентна јавна набавка, биле вклучени две правни лица – едно од Скопје и едно од Куманово – со однапред утврдени улоги.Како што појасни, фирмата од Куманово настапила со непотполна документација и со повисока цена, со цел да се создаде привид на конкуренција, додека скопската фирма доставила понуда речиси идентична со проценетата вредност на тендерот, иако таа вредност, според него, воопшто не била јавно објавена во огласот.Петрушевски тврди дека по доделувањето на тендерот, за да се прикрие трагата, осомничените пуштале во оптек, примале и пренесувале средства во износ од околу два милиони евра, што, според него, претставува основ за кривично дело перење пари.„По примерот на Зоран Заев и Венко Филипче, вака се местеа тендерите во државата додека владееја СДС и ДУИ“, изјави Петрушевски, обвинувајќи ги двете партии дека молчат и не се оградуваат од случајот, туку, како што рече, го штитат криминалот.Тој порача дека токму поради ваквите случаи, СДС и ДУИ, според него, ќе останат во длабока опозиција. Од СДС и ДУИ засега нема официјален коментар на овие обвинувања.

Македонија | пред 4 месеци

Манасиевски: Мали Фрчко - новото лице на Филипче, кадар на уништениот систем

Валентин Манасиевски од ВМРО-ДПМНЕ, денеска остро ја критикуваше СДС, обвинувајќи дека партијата останува нереформирана и дека во своето раководство вклучува лица со, како што рече, сериозни контроверзии.Манасиевски изјави дека на чело на СДС, според него, стои „чуварот на фотелјата на Зоран Заев“, Венко Филипче, а во партиското раководство бил вклучен и Јон Фрчковски, син на нивниот идеолог. Тој оцени дека во раководството на СДС има „различни профили на луѓе“, кои, како што тврди, се поврзуваат со криминал, корупција и манипулации.Според Манасиевски, во јавноста пред неколку месеци се појавиле фотографии од Фрчковски, за кои тој тврди дека покажуваат користење психотропни супстанции на работно место. Како што додаде, од СДС немало ниту оградување, ниту јасна реакција, а најавената оставка, според него, не била разгледана.Тој постави низа прашања, меѓу кои и зошто надлежните институции, вклучително и Јавното обвинителство, не постапиле доколку, како што тврди, настанот се случил во државна институција, како и од каде потекнуваат спорните супстанции. Манасиевски праша дали постои привилегиран однос кон „децата на транзициската елита“.„СДС му должи извинување на народот, наместо да ги наградува луѓето кои ја злоупотребуваат доверената функција“, изјави Манасиевски, нагласувајќи дека вистински реформи во СДС се „повеќе од потребни“.Од СДС засега нема официјален одговор на овие обвинувања.

Македонија | пред 4 месеци