Раководители, директор и поранешен заменик-министер под истрага: Од државните стокови резерви исчезнале „зрна“ вредни 780.000 евра

По налог на обвинител, полициски екипи денеска спроведоа широка акција во Скопје, Куманово и Тетово, при што беа претресени домови и деловни простории поврзани со сомнежи за организирана злоупотреба на државните стокови резерви. Целта на претресите е прибирање докази кои треба да расветлат голема проневера со земјоделски производи.Истражните органи утврдиле дека петмина осомничени – меѓу кои раководители во Агенцијата за стокови резерви, директорот на институцијата, вешто лице од Бирото за процена и поранешен заменик-министер за земјоделство – во 2021 и 2022 година ја злоупотребиле службената позиција и овластувања.Според обвинителството, осомничените овозможиле незаконски да се отпишат 1.500 тони пченица и 500 тони јачмен од државните резерви, со што буџетот бил оштетен за околу 780.000 евра.Акцијата ја спроведува Одделот за спречување организиран и сериозен криминал при МВР, во координација со ОЈО Скопје. Опфатени се службени лица од Агенцијата за стокови резерви, „Агроберза“ и Министерството за земјоделство.За кривичното дело „злоупотреба на службена положба и овластување“ засега се осомничени:– Н.Р. и Т.К., раководители во Агенцијата за стокови резерви,– Р.А., директор на Агенцијата,– М.П., вешто лице од Бирото за процена,– Т.Д., поранешен заменик-министер за земјоделство, шумарство и водостопанство.Истрагата продолжува во насока на утврдување на целата шема и можни дополнителни вмешани лица.

Македонија | пред 5 месеци

Адвокатот Јанаки Митревски: „Не е победа на Јанкулоска, туку вообичаена процедура во Стразбур“

Станува збор за вообичаена постапка на Европскиот суд за човекови права, а не за некаква победа, појасни адвокатот Јанаки Митровски во објава на ФБ, откако вчера поранешната министерка за внатрешни работи, Гордана Јанкуловска објави дека Судот во Стразбур отворил сериозни прашања во врска со предметот „Тенк“, за кој таа е осудена на затворска казна. Митровски потенцира дека вакви прашања Судот редовно испраќа како дел од стандардната процедура и дека тоа не значи победа на Јанкуловска.Цел ден се шири лажен пропаганден наратив небаре е одлучено по апликацијата на Гордана Јанкуловска по предметот Тенк. Па те Стразбур ја строел Македонија и минатата Влада, отворил сериозни прашања за македонското судство и останати манипулации. Вистината е следна:- Секогаш кога се поднесува апликација првично ја разгледува судија поединец кој може да ја отфрли на старт како недопуштена или да го помине овој прв филтер ако не е очигледно неоснована. Внимавајте судот во прв филтер прифатил дека апликацијата не е очигледно неоснована, што не е исто што и основана.-Во следна фаза, која е токму оваа, Судот комуницира со Владата и поставува прашања на кои очекува одговор и кои се во насока на утврдување на битни факти за конечна одлука. Ова е ВООБИЧАЕНО во СИТЕ апикации кои го минале првиот филтер, и не претставува никаков огромен успех на апликантот како што се обидува да се претстави. Најнормалана комуникација меѓу судот и странките.-Дури потоа предметот оди на одлучување, или пред стандарден Совет од седум судии или пред Голем судски совет од седумнаесет судии доколку се работи за прашање за кое Судот смета дека е особено важно во насока на заштита на правата од Конвенција.Да бидеме јасни, сите прашања упатени до Владата се легитимни, и темпото со кое е судена Јанкуловска, и пристапот до доказите, правото на одбрана итн. Но претставување на оваа, ВООБИЧАЕНА фаза од процесот како "голема победа на Јанкуловска" е едноставно лага!

Македонија | пред 5 месеци

Јавно погубен маж во Иран поради силување

Врховниот судија на покраината Семнан ознани дека во Бастам јавно е извршена смртна казна врз лице осудено за силување и принуда на две жени.Главниот судија на покраината Семнан, Акбари, изјави дека случајот бил под посебна истрага, за време на која е утврдено дека обвинетиот измамил две жени и извршил силување со сила и принуда.Обвнетиот се користел со „заплашување и закани“ за да предизвика страв кај жртвите од оштетување на нивниот углед.Судијата Акбари нагласи дека извршувањето на казната е во согласност со исламските и судските прописи, како дел од решителна акција против злосторствата што го загрозуваат моралот и безбедноста на општеството.

Свет | пред 5 месеци

Партијата на пензионери бара лимитот за бесплатно болничко лекување да изнесува 25.000 денари

Пензионерите не се задовилни од висината на износот за бесплатно болничко лекување. Партијата на пензионери повторно излезе со апел до Владата и бара веднаш да го покачи утврдениот износ за бесплатно здравствено лекување во болница за пензионерите со мали примања.“Владата мора да покаже поголема грижа за пензионерите. Бараме тој да изнесува 25.000 денари од јануари 2026 година, а во иднина, истиот да биде константно врзан со висината на минималната плат”, велат од партијата.Според нив, постојниот лимит е недоволен и не ги покрива основните потреби на оваа категорија граѓани.“Бараме итно решение кое ќе им овозможи достоинствено лекување на нашите членови”, порачаа од партијата.

Македонија | пред 5 месеци

Обвинителството отвори истрага за мистериозната смрт на тетовецот пронајден со прострена рана во главата

По пронаоѓањето на телото на 42-годишен жител на Тетово, кој претходно бил пријавен за исчезнат, надлежните институции отворија истрага за утврдување на околностите околу случајот.Од Јавното обвинителство соопштија дека на местото на настанот бил извршен увид и дека се преземаат сите потребни мерки за расчистување на случајот и идентификација на можна сторителска одговорност.„Извршен е увид на лице место, дадени се повеќе насоки и наредби со цел откривање на сторителите поради сомненија дека смртта е резултат на кривично дело. Дадена е наредба за обдукција, наредба за подигање на возилото и други траги од лице место на кои ќе се врши вештачење, наредба за обезбедување на снимки од видео надзор, како и други докази,“ соопштија од Обвинителството.Оттаму додаваат дека по наредбите веќе се постапува, а истрагата продолжува во насока на утврдување на мотивите и можните сторители.

Македонија | пред 5 месеци

Голема акција на полицијата и обвинителството, претреси во Скопје и во Куманово

Полицијата во координација со Јавното обвинитество - Скопје, спроведува голема акција, при што се вршат претреси во Скопје и Куманово под сомнение за злоупотреба на положбата.Информацијата ја потврди Обвинителството без повеќе деталиВо координација со Основното јавно обвинителство Скопје во тек е полициска акција со претреси во Скопје, Куманово и на други локации, поради сомненија за кривично дело злоупотреба на службена должност. Повеќе информации по завршување на акцијата – велат од Јавното обвинителство

Македонија | пред 5 месеци

ЕСЕ: Жените кои бегаат од семјно насилство тонат во сиромаштија - земаат кредити или позајмуваат од роднини

Со почетокот на 16-те дена на активизам против насилството врз жените, Здружението ЕСЕ предупредува дека најневидливата, но најраспространета последица од семејното насилство е длабоката економска несигурност во која западнуваат жените и децата по напуштањето на насилната заедница. Како што истакнуваат од организацијата, насилството не завршува со заминувањето од домот – тогаш започнува тешката економска борба.Според податоците на ЕСЕ, дури 80 проценти од жените биле спречени да работат од партнерот, а 42 проценти го изгубиле работното место како директна последица од насилството, што значи дека многу од нив ја започнуваат транзицијата кон нов живот со речиси уништена економска основа. Ситуацијата дополнително се влошува со високите, често приватно плаќани здравствени трошоци – лекови, хоспитализации, матичен лекар и итна помош – за кои многу жени немаат пристап до јавни услуги или навремена поддршка.По напуштањето на домот, жените се соочуваат со нови трошоци за сместување, кирија, сметки, транспорт, основен мебел и секојдневни потреби, а поради недоволната државна поддршка, над 90 проценти од нив земаат кредити или позајмици од роднини и пријатели за да преживеат во првите месеци.Издршката за децата, според анализата, исто така не ги обезбедува потребните средства: во повеќе од половина од случаите судски определената издршка е недоволна, а 70 проценти од жените се соочуваат со ненавремена или целосно неплатена издршка. Повеќето избегнуваат да ги користат законските механизми поради долгите и скапи постапки, но и поради страв од одмазда од насилниот партнер.Од ЕСЕ порачуваат дека потребни се итни системски решенија: финансиска помош во првите 6 до 12 месеци по напуштањето на насилната заедница, програми за вработување и преквалификација, функционален механизам за наплата на издршката, како и координирана институционална поддршка за надминување на економските последици од насилството.„Без економска сигурност, секоја жена што се обидува да избега од насилството ризикува сиромаштија, повторна виктимизација или враќање кај насилникот“, предупредуваат од ЕСЕ, повикувајќи ја државата да воспостави стабилен систем на финансиска и институционална поддршка за жените и децата во периодот на транзиција.

Македонија | пред 5 месеци

(Видео) Потресна снимка од Киев: Врзале ќебиња за да избегаат од запалениот стан

На социјалните мрежи се шири вознемирувачка снимка направена утрово, по синоќешниот силен руски напад врз Киев, главниот град на Украина. Во нападот изведен со дронови и ракети загинаа најмалку шест лица, а 14 беа повредени. Иако голем дел од руските дронови и ракети биле соборени, во Киев беа погодени две станбени згради, по што изби пожар.Поранешен советник во украинското Министерство за внатрешни работи на платформата „Икс“ објави снимка за која наведува дека прикажува импровизирано „јаже“ направено од ќебиња и чаршафи. Станарите на една од погодените згради го спуштиле преку прозорецот во обид да избегаат од пожарот што настанал по рускиот удар.

Свет | пред 5 месеци

ОН алармира: Секои 10 минути е убивана по една жена – фемицидите достигнаа црн рекорд во 2024 година

Минатата година, светот повторно се соочи со застрашувачки размери на насилство врз жените. Според најновите процени на Обединетите нации, во просек на секои десет минути животот го губела една жена или девојка, убиена од свој партнер или член на семејството.Овие податоци се дел од најновиот глобален извештај за фемициди, што вчера го објавија Канцеларијата на ОН за дрога и криминал (УНОДК) и UN Women. Според анализата, во 2024 година во светот биле убиени околу 83.000 жени и девојки, а речиси 60 отсто од нив биле жртви на лица со кои имале интимна или семејна врска.За споредба, кај мажите само околу 11 проценти од убиствата биле извршени од партнер или роднина – драматична разлика што дополнително ја потврдува родовата специфичност на фемицидот.Регионалните податоци покажуваат дека најголемиот број фемициди минатата година биле забележани во Африка – дури 22.600 случаи. Следува Азија со 17.400, Америка со 7.700, Европа со 2.100 жртви и Океанија со 300.Африканскиот континент, освен по бројот, е водечки и по стапката на фемициди извршени од партнери или семејни членови – три убиени жени или девојки на 100.000. Европа има најниска стапка, од 0,5 на 100.000.Податоците од 2023 година, наведени во минатогодишниот извештај, покажуваат дека од 85.000 жени и девојчиња убиени во насилни околности, 51.100 биле жртви на сопствени партнери или роднини. Новиот извештај потврдува дека трендот не само што продолжува, туку се продлабочува, поставувајќи уште поитна потреба за глобални мерки против насилството врз жените.

Свет | пред 5 месеци

Поранешната прва антикорупционерка Билјана Ивановска за Адем Чучуљ: „Сите очи ќе бидат вперени во него“

По изборот на Адем Чучуљ како единствен предлог за нов претседател на Државната комисија за спречување корупција, поранешната прва антикорупционерка, Билјана Ивановска, во гостување на ТВ Сител проговори за предизвиците што го чекаат.„Адем Чучуљ навистина има извонредно искуство. Работата останува понатаму на него да се избори да ја одигра улогата на претседател на ДКСК. Не е само искуството, бидејќи сите очи ќе бидат вперени во него. Тој треба да ја подобри транспарентноста, комуникациите со јавноста, треба да се избори и со останатите членови кои до сега беа малку потивки, поповлечени во работењето. Не знам дали ќе успее, а би требало да успее да наметне нов начин, нов принцип на работа кој ќе придонесе за надминување на овие слабости кои се нотирани во извештајот на Европската комисија“, рече Ивановска.Таа посочи дека новото раководство ќе мора да воведе повисоки стандарди на отчетност и поголема отвореност кон јавноста, доколку ДКСК сака да ја врати довербата и да ги надмине слабостите кои со години се повторуваат.

Македонија | пред 5 месеци

ЕУ воведува дигитален пасош за побрзо минување граници, но физичкиот документ останува задолжителен

Земјите од Европската унија планираат да го олеснат патувањето со воведување дигитален пасош што ќе може директно да се чува на паметен телефон. Според пишувањето на германскиот „Билд“, членките на ЕУ постигнале заеднички став за ова прашање, со што започнува клучната фаза за усвојување на новата регулатива. Главната цел е побрз и полесен премин на границите.Важно е да се нагласи дека класичниот, физички пасош и понатаму ќе остане задолжителен. Секој кој патува преку надворешните граници на Европската унија ќе мора да го има со себе. Дигиталниот пасош е предвиден само како дополнителна опција, а неговата употреба ќе биде целосно доброволна.Централниот дел на проектот е апликацијата „EU-Travel“. Преку неа, граѓаните ќе можат да зачуваат дигитална, официјално заверена верзија од својот пасош. Како и кај физичкиот документ, дигиталната верзија ќе содржи биометриски податоци како фотографија и отпечатоци од прсти, кои служат за недвосмислена идентификација.Апликацијата ќе им овозможи на патниците да ги испратат своите податоци до граничните служби уште пред пристигнувањето на граничниот премин. Се очекува ова значително да ги забрза контролите и да ги намали метежите на границите. Техничката имплементација ја спроведува агенцијата на Европската унија eu-LISA, која веќе управува со големи ИТ системи, како Визниот информативен систем (VIS) и Системот за влез/излез (EES), што ги обработуваат податоците за визи и гранични премини.

Свет | пред 5 месеци

Масовен напад со дронови врз Русија: загинати и повредени во Ростов и Краснодар

Јужните руски региони Ростов и Краснодарскиот крај ноќеска беа цел на масовен напад со украински беспилотни летала, во кој загинаа најмалку три лица, а повеќемина се повредени. Според првичните информации објавени од руските власти и агенцијата РИА Новости, нападите предизвикале значителни оштетувања на стамбени, образовни и индустриски објекти.Гувернерот на Ростовската област, Јуриј Сљусар, соопшти дека сите загинати се жители на Таганрог и Неклиновскиот округ. Осум лица се повредени, а повеќе згради претрпеле сериозна штета. Во Таганрог се оштетени две колективни станбени згради, една приватна куќа, зградата на Машинскиот факултет, два индустриски капацитети и еден детски градинка. Локалните власти прогласија вонредна состојба на погодените локации, а оперативни служби работат на терен.Министерството за одбрана на Русија соопшти дека нивните противвоздушни сили за време на нападот собориле 16 украински дронови над Ростовската област.Во Краснодарскиот крај, попознат како Кубан, повредени се шест лица. Четворица потекнуваат од Новоросијск, каде пет станбени згради и две приватни куќи претрпеле оштетувања. Во центарот на Краснодар се пронајдени делови од беспилотни летала, а кај неколку згради се скршени прозорци. Во Туапсе се запалил кров од станбена зграда по пад на дрон, но пожарот бил брзо ставен под контрола; во истиот инцидент ранет е и заштитар во соседна установа. Во Геленџик се оштетени две приватни куќи, а повреден е и еден маж кој се наоѓал на улицата – неговиот живот не е во опасност.Рускиот одбранбен ресор објави дека над Краснодарскиот крај се соборени вкупно 76 беспилотни летала – една од најголемите операции на пресретнување дронови досега.Локалните власти засега не даваат најави за дополнителни мерки, но службите за итни интервенции остануваат распоредени на терен, а жителите предупредени да избегнуваат оштетени објекти и делови со можна опасност од пожари и експлозии.

Свет | пред 5 месеци

Коцевски: Предметите за легализациите во Чаир се поврзани и најверојатно ќе се спојат

Проблематичните постапки за легализации во Општина Чаир во моментов се разгледуваат низ два одвоени обвинителски предмета – едниот оформен по допрен глас во Основното јавно обвинителство Скопје, а вториот по пријава поднесена од поранешната градоначалничка на Град Скопје, Данела Арсовска, во Обвинителството за гонење организиран криминал и корупција.Државниот јавен обвинител Љупчо Коцевски во гостување на „360 степени“ на МРТ1 изјави дека двата случаи се меѓусебно поврзани и дека, според досегашната динамика на постапката, најверојатно ќе бидат споени. Тој нагласи дека обвинителствата располагаат со доволно докази и дека работата продолжува.Коцевски објасни дека иако во јавноста се појавиле шпекулации дека првиот предмет – оној по допрен глас – бил близу до затворање без покрената истрага, таква одлука никогаш не била донесена ниту официјално соопштена. Посочи дека обвинителите собираат докази до последниот момент пред носење на јавнообвинителска одлука и дека постапката се води во согласност со сите стандарди.Во однос на тоа дали веќе се потврдени фалсификати во документацијата за легализациите, Коцевски не откри детали, наведувајќи дека истрагата сè уште е во тек и дека конечната надлежност ќе биде утврдена откако ќе се обедини материјалот од двата предмета.Тој додаде дека интересот на јавноста за овој случај е разбирлив, особено поради тоа што во процесот има лица поврзани со актуелната владејачка гарнитура, но потенцира дека институциите ќе постапуваат независно и врз основа на докази.Предметите за сомнителните легализации во Чаир остануваат во активна фаза на постапување, а одлуката за нивно евентуално спојување се очекува во периодот што следува.

Скопје | пред 5 месеци

Продолжува мегапроцесот за трагедијата во „Пулс“: Одбраната денеска ги дава воведните зборови

Судницата во Идризово денеска треба да се одржи второто рочиште од големиот судски процес за катастрофалниот пожар во дискотеката „Пулс“ во Кочани, во кој на 16 март 2025 година животите ги загубија 63 лица, а повеќе од 200 беа повредени. По воведниот говор на обвинителството на првото рочиште, денеска се очекува обвинетите да се произнесат за вината, по што одбраната ќе ги даде своите воведни обраќања.Рочиштето повторно ќе се одвива под силни безбедносни мерки, со присуство на роднините на загинатите, новинари и голем број правни застапници. Постапката ја води судијката Диана Груевска Илиевска, која уште на почетокот најави дека ќе има нулта толеранција за недисциплина и нема да дозволи непотребни одолговлекувања.Обвинителот Борче Јанев во своето излагање минатата недела порача дека трагедијата не може да се сведе само на моментот на активирањето на пиротехниката, туку дека станува збор за „години институционален молк, игнорирање на ризици и системски пропусти“ кои го претвориле клубот во, како што рече, „смртоносна стапица“. Според обвинението, објектот функционирал повеќе од една деценија без минимални услови за работа: без противпожарен систем, со затворени прозорци, користени лесно запаливи материјали и само еден излез за евакуација.Јанев истакна дека доказите ќе покажат оти опасностите биле видливи со години, но службените лица – сопственици, управители, инспектори, поранешни градоначалници, обезбедување и други функционери – „ги наследувале и продолжувале утврдените обрасци на непостапување“. Според обвинителството, токму таквата рутина на игнорирање предупредувања довела до непрекинат причинско-последичен тек што резултирал со трагедијата.Осум месеци по пожарот, на обвинителната клупа седнаа 37 обвинети – 34 физички и три правни лица. Меѓу обвинетите се: Дејан Јованов, Митко Стојанов, Михаил Јованов, Гроздан Милковски, Милка Едровска, Тодор Јованов, Огњан Георгиев, Љупчо Стаменков, Николчо Гоцев, Ратко Димитровски, Николчо Илијев, Љупчо Папазов, Јане Јанчески, Лазар Захариев, Ивица Грозданов, Мартин Горгиев, Стојанчо Димитријев, Шабан Салиу, Аднан Џафероски, Беким Максути, Џеват Селами, Љупчо Грнчиштанов, Ваљон Сараќини, Крешник Бектеши, Џеваир Камбери, Шовкет Хазари, Зоран Николовски, Беким Хаџиу, Арлинда Касапи, Миле Ампов, Блашка Ефтимова, Весна Кузмановска, Емил Митев, Размена Чекиќ-Дуровиќ, како и правните лица „ММММ Кафе“ ДООЕЛ Кочани, „Рубикон Секјурити Солушнс“ и „Венци Проект“ ДООЕЛ Кочани.

Македонија | пред 5 месеци

37 обвинети, десетици пропусти и едно прашање: кој требало да спречи 63 млади животи да згаснат?

Во судницата во Идризово денеска продолжува судењето за пожарот во дискотеката „Пулс“ во Кочани, во кој загинаа 63 лица, меѓу кои и деца, а повеќе од 200 беа повредени. Процесот продолжува со произнесување вина и воведни зборови на одбраната, откако на претходното рочиште обвинителството побара одговорност по име и презиме за сите кои дозволиле, премолчеле или не ја спречиле трагедијата.Обвинителот Борче Јанев во воведниот говор нагласи дека општеството мора да се соочи со болната вистина, бидејќи „не е важно само кој го запалил огнот – важно е кој имал кофа вода и не ја истурил“. Тој истакна дека катастрофата не е последица само на пиротехниката, туку на години институционален молк, пропусти, игнорирани опасности и изостанати контроли што го претвориле клубот во „смртоносна стапица“.Јанев рече дека доказите ќе покажат оти клубот „Пулс“ бил небезбеден уште од неговото отворање. „Никулците на оваа невидена катастрофа се појавиле одамна, а сите предуслови биле поставени години наназад“, истакна тој. Според обвинителството, ниту еден од обвинетите не реагирал на опасностите, бидејќи и нивните претходници не преземале ништо.„Од изведените докази нема да видите ниту една активност што би го променила текот на настаните. Никој не излегол од долгогодишната рутина на непостапување“, додаде Јанев. Тој нагласи дека сите обвинети, како службени лица, го прифатиле молкот како службен протокол и со тоа создале „преплет од кривичноправни дејствија“ кои довеле до трагичниот исход на 16 март 2025 година.Според обвинителството, трагедијата била резултат на систематска негрижа и игнорирање на безбедносните закани: дискотеката работела без противпожарен систем, со затворени прозорци, лесно запаливи и токсични материјали, само еден излез за евакуација и без дозвола за пиротехника. Во критичната вечер бил дозволен влез на над 600 гости, меѓу кои и малолетници по полноќ, без контроли за опасни средства. При согорување, вградените материјали – особено сунѓерот на плафонот – ослободиле смртоносни гасови што довеле до масовна загуба на животи.Судењето се одвиваше под засилени безбедносни мерки, во присуство на обвинетите, роднини на загинатите, претставници на обвинителството и одбраната, како и домашни и странски новинари.Осум месеци по трагедијата, на обвинителна клупа седнаа 37 обвинети – 34 физички и три правни лица. Меѓу нив има сопственици на локали, управители, инспектори, поранешни градоначалници, членови на обезбедување и државни службеници.Обвинетите се: Дејан Јованов, Митко Стојанов, Михаил Јованов, Гроздан Милковски, Милка Едровска, Тодор Јованов, Огњан Георгиев, Љупчо Стаменков, Николчо Гоцев, Ратко Димитровски, Николчо Илијев, Љупчо Папазов, Јане Јанчески, Лазар Захариев, Ивица Грозданов, Мартин Горгиев, Стојанчо Димитријев, Шабан Салиу, Аднан Џафероски, Беким Максути, Џеват Селами, Љупчо Грнчиштанов, Ваљон Сараќини, Крешник Бектеши, Џеваир Камбери, Шовкет Хазари, Зоран Николовски, Беким Хаџиу, Арлинда Касапи, Миле Ампов, Блашка Ефтимова, Весна Кузмановска, Емил Митев, Размена Чекиќ-Дуровиќ, како и правните лица: „ММММ КАФЕ“ ДООЕЛ Кочани, „Рубикон Секјурити Солушнс“ и „Венци Проект“ ДООЕЛ Кочани.Паралелно со главниот процес, се води и постапка против полициски службеници за кои се сомничи дека повеќе од една деценија давале лажни уверувања и дозволувале дискотеката да работи без исполнети безбедносни стандарди. Некои од нив се во притвор, а други под мерки на претпазливост.Истовремено, Обвинителството отвори и постапка против група вработени во УЈП осомничени за мито и злоупотреби поврзани со истиот случај.Судењето го води судијката Диана Груевска Илиевска, а предметот го застапува тим од 15 јавни обвинители. Таа порача дека ќе бара дисциплина од сите учесници во процесот и дека секое неоправдано одлагање ќе биде санкционирано.Трагедијата од 16 март 2025 година останува најголемата цивилна несреќа во поновата македонска историја – оголен пресек на системски пропусти што годинава конечно се разгледуваат пред суд.

Македонија | пред 5 месеци

Политико: Европската унија во паника по руското одбивање на ревидираниот договор за Украина

Европските функционери вчера накратко воздивнаа, убедени дека преговорите во Женева донеле напредок и дека Доналд Трамп ќе ја сослуша нивната порака: Украина не смее да биде притисната да прифати лош мировен договор. Но оптимизмот траеше само неколку часа. Русија уште истата вечер ја отфрли ревидираната верзија на документот, јавува „Политико“.Европската радост првично беше поттикната од изјавата на претседателката на Европската комисија, Урсула фон дер Лајен, која го поздрави „добриот напредок“ постигнат благодарение на „силното европско присуство“ во преговорите. За првпат во процесот, европските и британските советници беа поканети на разговорите – нешто што изостана во оригиналниот американско-руски предлог од 28 точки, кој во Брисел предизвика вознемиреност поради прекумерната наклонетост кон Москва.Откако Русија ја отфрли ревидираната верзија, Украина се соочува со ризик Владимир Путин да ги врати преговорите на почеток – на спорниот договор за прекин на огнот што од Киев бара да отстапи дел од територијата, да се откаже од членството во НАТО и да ја намали армијата од речиси еден милион војници на околу 600.000.Во таква поставеност, претседателот Володимир Зеленски би се нашол пред драматичен избор: да го прифати договорот скроен од Трамп и Путин или да ризикува долгорочна иднина на Украина надевајќи се дека Европа конечно ќе одлучи да преземе поголем товар. Истата Европа која по четири години војна сè уште не испраќа свои сили, не го обезбедува оружјето што го бара Киев и не ги активира замрзнатите руски средства во европските банки.Американски републиканци, како Грег Свенсон од Republicans Overseas, сметаат дека Европејците се занесуваат: „Која е алтернативата? Можете да зборувате убаво, да присуствувате на дипломатски средби, но единствениот начин да се порази Путин е борба – а тие не се подготвени за тоа“, изјави Свенсон.Европските држави, пак, потсетуваат на огромната финансиска и воена помош што ја испратија во Украина, како и на економските последици од прекинот на соработката со Русија, особено во енергетиката. Но останува фактот: првиот предлог на Трамп предизвика паника во Брисел затоа што Зеленски не може да се потпира само на Европа.Тоа стана видливо на последниот самит во Брисел, кога лидерите на ЕУ беа уверени дека ќе го одобрат планот за користење на 140 милијарди евра замрзнат руски имот како „репарациски заем“ за Украина. Тој договор се распадна по неочекуваниот отпор на Белгија. Разговорите се интензивираат, но решение сè уште нема – а дел од дипломатите стравуваат дека идејата за заем ќе пропадне ако мировниот договор ја вклучи таа ставка. Првичниот американски предлог предвидуваше половина од приходите од инвестициите во Украина да одат во САД, што Европа го оцени како „скандалозно“.Дополнителен ризик е што финансискиот депозитар Euroclear – лоциран во Белгија – би можел да биде обврзан да ги врати средствата во Москва по укинувањето на санкциите, што би ги изложило европските даночни обврзници на огромни финансиски трошоци.Освен финансиските дилеми, отворено е и прашањето за безбедноста. Францускиот претседател Емануел Макрон и британскиот премиер Киер Стармер на почетокот на годинава зборуваа за меѓународни мировни сили составени од доброволни држави, па дури и за праќање војници во Украина. Но тонот се смени – и во Париз и во Лондон. Сериозноста на темата ја покажа и бурната реакција во Франција по изјавите на новиот началник на Генералштабот, Фабиен Мандон, кој ги повика локалните власти да се подготват за можен судир со Русија.Во Германија, министерот за надворешни работи Јохан Вадепфул истакна дека Берлин веќе испраќа силна поддршка со стационирање бригада во Литванија. Но за Украина тоа не е доволно: Киев бара конкретна, силна поддршка на своја територија, што европските влади сè уште не се подготвени да ја дадат.„Барем Трамп е искрен“, вели Свенсон. „Можеме да ја победиме Русија – и брзо, доколку не се употреби нуклеарно оружје. Но тоа би значело многу мртви.“Меѓу таа искреност, европската воздржаност и руската агресија – Украина повторно стои сама на средина.

Свет | пред 5 месеци

Скандал во Вашингтон: сенаторот Кели под закана од воен суд поради видео со порака до војниците

Пентагон соопшти дека отвора истрага против сенаторот од Аризона, Марк Кели, поради можни прекршувања на воениот закон – необичен и речиси преседански потег во американската политика. Кели, поранешен воен пилот и астронаут, се најде под лупа откако се појави во видео во кое, заедно со други демократи со воено искуство, ги повикува припадниците на армијата да ги одбијат незаконските наредби. Информацијата првично ја објави „Гардијан“.Во соопштението објавено на социјалните мрежи, Пентагон се повика на федерален закон што дозволува пензионирани воени лица, по наредба на министерот за одбрана, да бидат вратени во активна служба за да им се суди воен суд. Кели е пензиониран со чин капетан, по служба во американската морнарица како пилот на ловечки авиони.Според Пентагон, неговите изјави во видеото можеле да го нарушат „моралот, редот и дисциплината“ во вооружените сили. Во соопштението се наведува дека е започната „темелна проверка“ која може да резултира со повикување на Кели во активна служба и поведување воена постапка, или со административни мерки.Снимката, објавена минатиот вторник, го покажува Кели како им се обраќа директно на војниците, потсетувајќи ги дека „имаат право да одбијат незаконска наредба“. Други законодавци во видеото порачаа дека „воените лица мора да застанат во одбрана на законите и уставот“.Министерот за одбрана Пит Хегсет, кој во вториот мандат на Доналд Трамп ја води институцијата што сега е преименувана во Министерство за војна, остро го осуди видеото. Тој го нарече „гнасно, непромислено и неточно“, тврдејќи дека Кели го поткопува „секој аспект на добриот ред и дисциплина“. Трамп, пак, реагираше со уште поголема жестина – на својата мрежа Truth Social напиша дека Кели и другите учесници се впуштиле во „бунтовно однесување казниво со смрт“, а потоа сподели објава со порака „Обесете ги“.Кели возврати дека за истрагата дознал преку објавата на Пентагон на социјалните мрежи. Порача дека обидите да се исплашат законодавците нема да успеат: „Предолго сум му служел на оваа земја за да молчам пред насилници кои се грижат само за сопствената моќ.“ Потсети и на својата воена и астронаутска кариера, вклучувајќи ги и мисиите во кои преживеал експлозија покрај својот авион и учествувал во враќањето на телата на астронаутите загинати во несреќата на шатлот „Колумбија“.Сенаторот изрази и загриженост за безбедноста на своето семејство, особено имајќи предвид дека неговата сопруга, поранешната конгресменка Габриел Гифордс, едвај преживеа вооружен напад во 2011 година. Кели предупреди дека реториката на Трамп е опасна и дека тишината на дел од републиканците дополнително го поттикнува ризикот.Откако Пентагон ја објави истрагата, голем број демократи застанаа зад Кели. Сенаторот од Аризона Рубен Гаљего му порача на Пентагон: „Срам да ви е и вам и на вашата истрага“, предупредувајќи дека администрацијата на Трамп се однесува „како авторитарен режим“. Сенаторот Крис Марфи го нарече Кели „вистински Американец“, а Пети Мареј истакна дека „на земјата ѝ требаат повеќе патриоти како него, а помалку кукавици како Трамп и Хегсет“.Адам Шиф порача дека Трамп и Хегсет „имаат што да научат за службената должност“ од ветерани како Кели. Лидерот на демократите во Сенатот, Чак Шумер, предупреди дека Трамп се обидува да го претвори Пентагон во „свој личен јуришен инструмент“ и додаде: „Ова е однесување на диктатори. Стојам зад сенаторот Кели – така треба да постапи секој Американец што не сака да му владее крал.“Случајот се смета за еден од најсилните судири меѓу Пентагон, Конгресот и Белата куќа во последните години, со потенцијал да го отвори прашањето за политичката вмешаност во американската војска – тема што ја потресува земјата откако Трамп повторно ја презеде власта.

Свет | пред 5 месеци

Левица алармира: системско насилство врз бремени жени – итно да се сменат законите

Левица објави потресен случај на трудница која го изгубила бебето во 27. гестациска недела, по силен стрес предизвикан од непродолжен договор за работа. Партијата го нарекува настанот „уште еден пример на институционално и системско насилство врз жена“, обелоденет токму во пресрет на кампањата „16 дена активизам против родово базирано насилство“.Жената, професионалец со 14 години работно искуство во Општата болница во Струга, била информирана дека нејзиниот договор нема да биде продолжен веднаш откако соопштила дека е бремена. „Оди дома, имаш поважна работа – бремена си“, биле зборовите на директорот, според сведочењата што ги наведе Левица.Левица најавува поднесување законски измени со кои ќе се предвиди договорите на трудниците по автоматизам да се продолжуваат, сè додека жената ги остварува правата поврзани со бременоста. Целта, велат, е да се спречат трауми какви што се случија во овој случај.Партијата ги повикува Државниот инспекторат за труд и Министерството за економија и труд ригорозно да постапат против работодавачот и да обезбедат институционална заштита за жената која го изгуби своето бебе.„Ова не смее да остане само бројка – ова е човечка трагедија што бара одговорност“, порачуваат од Левица.

Македонија | пред 5 месеци

Од план наклонет кон Москва до ‘ревидиран документ’: како мировниот предлог се смени преку ноќ

Доналд Трамп силно притиска за брз мировен договор во Украина, но Киев предупредува дека мирот не може да биде постигнат по цена на капитулација. Според анализата на Би-Би-Си, токму затоа Украина го одбила иницијалниот предлог што американската администрација се обидела да го протурка пред Денот на благодарноста, бидејќи содржел услови што речиси целосно одговарале на руските барања.Во Женева беше одржан итен круг преговори, на кои Украина испрати делегација на највисоко ниво. Цела недела, делегациите на Украина и САД се движеле меѓу две локации под строги мерки на безбедност, додека европските советници за национална безбедност од Германија, Франција и Обединетото Кралство се приклучиле со свои амандмани.Аналитичарката на Би-Би-Си успеала да го види украинскиот главен преговарач Андриј Јермак само накратко – без израз на лицето, што, како што наведува, е разбирливо: почетниот американски предлог бил толку наклонет кон Москва што државниот секретар Марко Рубио морал јавно да демантира дека текстот доаѓа од Кремљ. Но Трамп бил недвосмислен – Украина треба брзо да потпише или да се соочи со „неодредени последици“.Рубио објави дека постигнал „огромен напредок“, но одби да ги открие клучните детали. Заедничката изјава на Киев и Вашингтон сега зборува за „нов договор“ – ревидиран документ кој сè уште не е објавен. Според „Фајненшл Тајмс“, новата рамка од 19 точки задржува многу малку од иницијалниот текст.Европските предлози очигледно го промениле документот во корист на Украина. Од него исчезнале барањата за трајно ограничување на украинската армија и за автоматски вето-механизми што би го блокирале членството во НАТО. Предлогот не предвидува предавање дополнителни делови од Донбас и не содржи општа амнестија за воени злосторства. Територијалните прашања треба да се решаваат дипломатски – позиција што претседателот Володимир Зеленски и претходно ја истакнувал.Во документот се појавуваат и безбедносни гаранции, што Украина ги смета за клучни. Низа западни лидери, меѓу нив и британскиот премиер Киер Стармер, зборуваат за гаранции слични на член 5 од НАТО – обврска за директна помош во случај на нов напад. Германскиот канцелар Фридрих Мерц го опиша најновиот предлог како „значително изменет во позитивна насока“.Како текстот се претворил од верзија блиска до Кремљ во нешто што Киев барем може да разгледува, останува нејасно. Би-Би-Си потсетува дека првичниот документ бил обликуван под влијание на средбата меѓу бизнисменот Стив Виткоф и рускиот претседател Владимир Путин, по која Виткоф повторувал руски наративи речиси буквално. Новиот предлог, според проценките, е многу поприфатлив, но уште далеку од конечен договор.И самиот Трамп го промени тонот. Од жестоки критики кон Киев поради „недостаток на благодарност“, тој премина кон изјави дека „нешто добро“ може да произлезе од новиот циклус разговори. Но западните аналитичари предупредуваат дека сè додека Москва не чувствува воена слабост, нема индикации дека Путин е подготвен да се повлече.Според Карнеги центарот за Русија и Евроазија, корупциските скандали во Киев, политичките турбуленции, проблемите со мобилизацијата и руските придобивки на терен само ја зголемуваат самоувереноста на Путин. Најоптимистичките оценки велат дека притисокот на Трамп можеби го забрзал барањето за решение, но суштината не се променила.Би-Би-Си заклучува дека кругот повторно се затвора: Москва останува на позицијата „ова се нашите услови – прифатете ги или чекајте“. Украина, пак, и покрај желбата за мир, не е подготвена да плати со сопствената територија, војска или безбедност.

Свет | пред 5 месеци

Паднаа обвиненијата против поранешниот директор на ФБИ – пресуда што ја разнишува администрацијата на Трамп

Американскиот сојузен суд ја отфрли обвинителната постапка против поранешниот директор на Федералното истражно биро, Џејмс Коми, долгогодишен критичар на Доналд Трамп. Коми ја поздрави одлуката, оценувајќи дека таа покажува оти претседателот не смее да ги употребува државните институции за притисок и пресметка со политички неистомисленици.Судот утврди дека обвинителката Линдзи Халиган, која го водела предметот, не смеела да биде именувана од Министерството за правда во таа улога. Поради неправилностите при нејзиното назначување, обвинението беше укинато, но Министерството има можност повторно да го отвори случајот. Белата куќа најави дека ќе поднесе жалба.Според пишувањата на „Вашингтон пост“, Халиган била поставена за вршител на должност по заминувањето на обвинител кој проценил дека доказите против Коми не се доволни за покренување постапка. Набргу потоа, администрацијата на Трамп го разрешила. Халиган претходно работела во Белата куќа и била дел од правниот тим близок до Трамп.Во видео-изјава објавена на Инстаграм, Коми порача дека пресудата е „потсетник оти Министерството за правда не е алатка за пресметка со политички противници“. Додаде дека очекува Трамп повторно да го напаѓа, но дека „не се плаши и верува во независно судство“.Против Коми беа покренати обвиненија за лажно сведочење и попречување постапка на Конгресот, во период кога Трамп јавно вршел силен притисок врз институциите да постапат против неговите критичари. Само неколку дена претходно, Трамп на социјалните мрежи ја повикал државната обвинителка Пам Бонди да преземе мерки против лица што ги сметал за свои противници, меѓу кои и Коми.Коми беше именуван за директор на ФБИ во 2013 година од претседателот Барак Обама. За време на мандатот на Трамп тој ја водеше истрагата за можни врски меѓу кампањата на Трамп и руските напори за влијание врз изборите во 2016 година. Коми беше разрешен во 2017 година, додека истрагата сè уште траеше.Судот отфрли и второ обвинение, поднесено против државната обвинителка на Њујорк, Летитија Џејмс, исто така поради процедурни пропусти поврзани со назначувањето на Халиган. Џејмс беше обвинета за наводна измама во врска со прикажување недвижност како своја главна адреса, што таа го отфрла.Џејмс беше клучна во граѓанската постапка против Трамп, кој во 2024 година беше задолжен да плати околу 450 милиони долари за финансиски измами. Судот утврди дека тој и дел од раководството ја прикажувале вредноста на „Организацијата Трамп“ повисока од реалната за да добијат поповолни заеми и осигурителни услови. Апелациониот суд подоцна оцени дека казната е „преголема“ и нареди ново одмерување.Правните советници на Коми сметаат дека тој со оваа пресуда е целосно рехабилитиран, а правните експерти предупредуваат дека одлуката претставува сериозен удар врз напорите на Трамп да ги казни институциските функционери што му се спротивставиле.

Свет | пред 5 месеци

Психолог од Струшката болница, избркана поради бременост – од стрес го изгубила бебето во седмиот месец

Психолог од ЈЗУ Општа болница Струга, воедно магистер по специјална едукација и рехабилитација и психотерапевт со 14-годишно искуство и бројни професионални обуки, останала без работа веднаш по откривањето дека е бремена. Како што објави „Сакам да кажам“, последицата од стресот што го претрпела била трагична – жената го изгубила бебето во 27-та недела од бременоста.Иако цели 23 години работела со договор на определено време, по 40 часа неделно, без прекин и без статусно решение, договорот не ѝ бил продолжен на 31 декември 2024 година – токму кога очекувала конечно вработување по ланските парламентарни и претседателски избори. На нејзино место бил примена друга, помлада кандидатка, а во исто време директорот на болницата вработил уште 65 лица од различни профили.Комисијата за спречување и заштита од дискриминација утврди дека над оштетената е извршена директна интерсекциска дискриминација – истовремено по основ на пол, возраст и бременост.Во пријавата доставила медицински докази од Универзитетската клиника за гинекологија и акушерство дека била во целосно уредна и безризична бременост.„Поради стресот што го доживеав од губењето на работното место, на 4 март 2025 година, во скоро 27 гестациска недела, го изгубив моето чедо. Јас сум здрава жена, со уредна бременост. Тортурата врз мене го направи своето“, напишала таа во пријавата.Директорот на болницата пред Комисијата не го негирал фактот дека на местото на избрканата е вработен друг психолог, ниту дека примил уште 65 лица. Сепак, под „морална и кривична одговорност“ тврдел дека никогаш не ѝ рекол да си оди дома затоа што е бремена.

Македонија | пред 5 месеци

Истрагата ќе ја завршат, ама него го нема: Македонија не успева да стигне до Артан Груби

Јавниот обвинител Љупчо Коцевски изјави дека истрагата во која е осомничен поранешниот прв вицепремиер Артан Груби е практично завршена и дека се чека единствено на неговата екстрадиција. Како што истакна во гостување во „360 степени“ на МРТ 1, сите докази се собрани, вклучително и финансиската истрага, но Обвинителството не располага со информација каде се наоѓа Груби, бидејќи тоа не е во нивна надлежност.Во однос на наодите од извештајот на Европската комисија, каде се нотира дека „корупцијата останува распространета во многу области и претставува сериозна загриженост“, Коцевски смета дека за ефикасна борба против корупцијата мора да се создадат вистински услови – истражители, истражни центри и форензичари кои ќе ја водат работата.На прашањето дали Обвинителството го дава максимумот, Коцевски тврдеше дека институцијата работи „повеќе од максимумот“, и дека јавноста добро ги знае сложените случаи со кои се соочуваат обвинителите.Посочувајќи ја реакцијата на министерот за внатрешни работи Панче Тошковски – дека МВР поднесува кривични пријави, а Обвинителството селективно постапува – Коцевски одговори дека таквата констатација е неточна.„Јавното обвинителство постапува неселективно. Доказ за тоа е и предметот за Кочани, каде работевме по пријави на МВР“, рече тој, додавајќи дека Министерството поднело околу 14.000 пријави, а вкупниот број од сите институции и граѓани надминува 20.000.Според Коцевски, Обвинителството работи на крајниот праг на своите капацитети.„Со околу 70 обвинители помалку од потребното, а претходно и со сто помалку, ние работиме во рамките на можностите – и повеќе“, нагласи тој.Коцевски се повика и на законската обврска: Обвинителството мора да постапува по секоја кривична пријава и да прибира докази врз кои ги носи одлуките.

Македонија | пред 5 месеци

Русија со жестоки напади врз Киев и повеќе украински градови – загинати и тешко оштетена енергетската инфраструктура

Русија синоќа изведе масовен комбиниран напад врз Киев и повеќе украински градови, користејќи дронови „Шахед“ и балистички ракети „Кинжал“. Според првичните информации објавени од „Kyiv Independent“, во главниот град загинала најмалку една личност, а седум се повредени.Нападите започнале околу 1 часот по полноќ, при што низ Киев одекнувале серија експлозии, а противвоздушната одбрана била активирана на повеќе локации. Градските власти потврдија дека биле погодени станбени згради и делови од критичната енергетска инфраструктура.Пожари и урнатини во повеќе населби во КиевГрадоначалникот Виталиј Кличко информираше дека пожар избувнал во неколку висококатници во централниот Печерски реон. Една од нив е зграда од 22 ката, оштетена на повеќе нивоа. Во Дњипровскиот дел од градот целосно изгорела деветкатница каде што една личност загинала, а спасувачките екипи продолжуваат да ги пребаруваат урнатините. Изгорела и гаража во истиот реон.Напади и во Киевската област – повредено 14-годишно детеВо регионот на Била Церква четири куќи се целосно уништени, а повредено е и 14-годишно момче. Активност на ракети и дронови е забележана и во Запорожје и Харковската област.Украинското Министерство за енергетика нападот го опиша како „масовен комбиниран удар врз енергетската инфраструктура“. Москва во последните месеци значително ги засили нападите врз енергетскиот систем со цел да ја воведе Украина во уште една тешка зимска криза.Нападите доаѓаат во момент на засилен притисок врз КиевЕскалацијата се случува додека САД го притискаат Киев да прифати нов мировен план што сериозно ги фаворизира руските интереси. Американскиот претседател Доналд Трамп пред само неколку дена изјави: „Зимата е студена и многу големи електрани беа нападнати, благо кажано.“Украинскиот претседател Володимир Зеленски само неколку часа пред нападите предупреди дека Русија нема намера да го намали воениот притисок, и покрај мировните разговори.„Мораме да бидеме свесни дека Русија нема да попушти. Во овие денови мора да бидеме внимателни и да реагираме на сите воздушни тревоги. Ако навистина зборуваме за крај на војната, тогаш не треба да постојат масовни ракетни напади врз Украина,“ порача Зеленски.Спасувачките служби и натаму работат на теренот, додека се очекува официјален биланс на штетите и евентуално нови информации за жртвите.

Свет | пред 5 месеци

САД започнаа директни преговори со Русија и Украина во обид да се обезбеди мировен договор

САД интензивно преговараат со Русија и Украина во обид да го финализираат новиот мировен план за ставање крај на војната, јавуваат американски и меѓународни медиуми. Американскиот министер за копнена војска, Дан Дрискол, синоќа пристигнал во Абу Даби, каде започнал средби со украинскиот разузнавачки врв и руска делегација.Според американски функционер и извори упатени во процесот, Дрискол веќе синоќа имал првични разговори со руските претставници, а преговорите продолжуваат и денес. Тој треба да оствари средба и со Кирило Буданов, шеф на украинската воена разузнавачка служба (ГУР), познат по водењето на најсложените украински операции од почетокот на војната.Напредок во Женева, нов предлог со 19 точкиСредбата во Обединетите Арапски Емирати следи по викенд-преговорите во Женева, каде што американската и украинската делегација постигнаа напредок и од почетниот контроверзен план од 28 точки произлезе нов предлог – скратен на 19 точки и, како што се наведува, „значително поповолен за Киев“.Првиот предлог на администрацијата на Доналд Трамп предвидуваше признание на руската контрола врз Крим, Донецк и Луганск, формирање демилитаризирани зони и низа геополитички отстапки кои предизвикаа остра реакција во Европа и делови од американскиот Конгрес. Најчувствителните точки сега се оставени како прашања што треба да ги договорат двајцата претседатели – Трамп и Зеленски.Буданов – клучна личност меѓу двете страниБуданов е еден од ретките украински претставници кои во текот на војната одржуваа отворени канали со Русија, што овозможи размена на илјадници заробеници и решавање дел од хуманитарните прашања. Тој е назначен како дел од официјалната украинска делегација за директни преговори со САД и Русија.Зеленски: „Некои чекори за крај на војната стануваат остварливи“Во обраќање до украинската јавност, претседателот Владимир Зеленски синоќа рече дека очекува „неопходните чекори за ставање крај на војната да станат реални“, но предупреди дека најкритичните точки од договорот допрва ќе се разгледуваат.„По Женевските разговори има помалку точки, повеќе не се 28. Многу важни елементи се земени предвид. Но ни претстои сериозна работа и директни разговори со претседателот Трамп,“ изјави Зеленски.Вашингтон: „Мора да бидеме сигурни дека Русија ќе прифати“Белата куќа останува воздржана, но внимателно оптимистична. Портпаролката Каролин Левит потврди дека за сега не е планирана средба меѓу Трамп и Зеленски, но истакна дека САД се „многу охрабрени“ од напредокот во Женева.„Мора да бидеме сигурни дека сите точки се целосно договорени – и со Украина, и со Русија. САД се ангажираат подеднакво со двете страни“, рече таа.Предизвиците допрва следуваатИако процесот е интензивиран и воден 24 часа дневно, според американските функционери, остануваат големи отворени прашања – од безбедносните гаранции за Украина, до територијалните прашања и идната улога на НАТО.За првпат од почетокот на војната, преговорите вклучуваат високо ниво претставници на трите страни, а исходот ќе зависи од тоа дали ќе се произведе рамка што истовремено е прифатлива за Киев, Москва и Вашингтон.

Свет | пред 5 месеци

(Видео) Судски пресврт по 4,5 години судење: Судот констатира судир на интереси кај вештакот во случајот на загинатиот Алек

Мирјана Радуловиќ, мајка на трагично загинатиот 17-годишен Алек Радуловиќ, за „Скопје1“ сведочи за долгата и болна судска одисеја што трае веќе четири и пол години, а сè уште нема првостепена пресуда. Нејзиниот син загина кога возач на автомобил му го пресекол патот, по што тој со мопедот починал на самото место.Според неа, најтешкиот дел од процесот бил моментот кога Судот во декември 2024 година решил предметот да го испрати на супервештачење. Тогаш, Радуловиќ добила сознанија кои, вели, предизвикале сериозни сомнежи за неговата веродостојност.Обвинувања за незаконски контакти меѓу одбраната и вештацитеРадуловиќ објаснува дека постоело основано сомнение оти адвокатот на одбраната имал недозволени контакти со супервештаците што го работеле вештачењето.„Како родител кој бара правда за своето дете, јавно укажав дека постои сомнеж во стручноста и независноста на супервештачењето. Кратко по мојата реакција, носителот на вештачењето, Јане Илијоски од Секторот за сообраќај во Град Скопје, доби дисциплинска постапка и беше суспендиран“, изјави Радуловиќ.Вештакот на суд молчел за суспензијатаНа рочиштето од 29 септември, Илијоски тврдеше дека Алек се движел со 70,2 km/h, но, како што вели мајката, се повикувал на низа претпоставки. Кога судот ѝ дозволил да поставува прашања, таа го запрашала и за неговата суспензија.„Прво избегнуваше да одговори, но по инсистирање призна дека е суспендиран поради медиумската изложеност. Судот го укори затоа што не го пријавил овој клучен податок“, вели Радуловиќ.Две недели подоцна таа добила тужба од Илијоски за наводна навреда по гостувањето во „Претрес со Ландов“.Гостувањето изгледајте го тука:Официјалните документи: вештакот навистина бил суспендиранНа последното рочиште, според неа, Обвинителството доставило официјални документи од Град Скопје и Агенцијата за администрација, со кои се потврдува суспензијата на вештакот. Одбраната на обвинетиот побарала одложување, тврдејќи дека доказите биле прибавени „нелегално“, но судот го одбил барањето.Напротив, според Радуловиќ, судот констатирал дека:вештакот е суспендиран,пред судот прикрил важни информации,против мајката води граѓанска постапка,што го прави необјективен и во судир на интереси.Поради тоа, судот реши да го отфрли супервештачењето на Илијоски, Леонардо Славески и Орце Доневски.„Не барам ништо повеќе од правда за Алек“„Како мајка која го изгуби своето дете, давам збор дека нема да застанам додека не се утврди објективната вистина. Овој процес трае предолго — 4,5 години. Секој што работи на случајот има должност да постапува чесно, транспарентно и професионално“, изјави Радуловиќ.Таа апелира и до Техничкиот факултет во Битола, кој ќе го изработи новото супервештачење:„Очекувам да постапат независно, стручнo и без никакви влијанија. Од нивната професионалност зависи дали конечно ќе се доближиме до вистината и правдата која ја чекаме предолго.“

Македонија | пред 5 месеци