Најнови вести

1 мес.

Чаби Алонсо повеќе не е тренер на Реал Мадрид, Арбелоа го презема првиот тим

Реал Мадрид официјално соопшти дека Чаби Алонсо повеќе не е прв тренер на „кралскиот клуб“, откако, како што наведуваат од клубот, по взаемен договор е одлучено да се прекине неговиот мандат на чело на првиот тим.Во официјалното соопштение од мадридскиот клуб се истакнува дека Алонсо ќе остане трајно поврзан со Реал Мадрид, не само како поранешен тренер, туку и како една од легендите кои секогаш ги претставувале вредностите на клубот.Од „Сантијаго Бернабеу“ нагласуваат дека клубот му изразува благодарност на Алонсо и на целиот негов стручен штаб за вложениот труд и посветеноста во изминатиот период, посакувајќи им успех во следната фаза од нивната професионална кариера.Набргу по објавата за разделбата со Алонсо, Реал Мадрид информираше и кој ќе биде неговиот наследник. Нов тренер на првиот тим е именуван Алваро Арбелоа, поранешен фудбалер на клубот и долгогодишен член на тренерскиот кадар во младинската школа.Арбелоа од јуни 2025 година беше тренер на Кастиља, а целата своја тренерска кариера ја гради во системот на Реал Мадрид од 2020 година наваму. Во тој период ги водеше тимовите Инфантил А, Кадете А и Јувенил А, со кои оствари значајни резултати, вклучувајќи и тројна круна во сезоната 2022/23 – шампионска титула, Куп на кралот и Куп на шампионите, како и уште една титула во сезоната 2024/25.Како фудбалер, Арбелоа беше дел од една од најуспешните ери во историјата на Реал Мадрид. Тој го носеше дресот на клубот од 2009 до 2016 година, одигра 238 официјални натпревари и освои осум трофеи, меѓу кои две титули во Лигата на шампионите и една титула во шпанското првенство.Арбелоа има и блескава репрезентативна кариера, како дел од златната генерација на Шпанија која го освои Светското првенство во 2010 година, како и Европските првенства во 2008 и 2012 година, при што за националниот тим забележа 56 настапи.Со оваа одлука, Реал Мадрид започнува ново поглавје на тренерската клупа, доверувајќи му ја првата екипа на човек кој, како што истакнуваат од клубот, длабоко ги познава традицијата, вредностите и системот на „кралскиот клуб“.

Спорт | пред 1 месец

1 мес.

(Видео) Осомничениот за смртното прегазување на жената во Капиштец сам се фалел со дивеење зад воланот на социјалните мрежи

Саит Саити, осомничен дека ја усмртил 79-годишната Љуба Јаковлеска во сообраќајната несреќа во скопската населба Капиштец, на социјалните мрежи јавно се фалел со брзо и опасно возење, вклучително и со автомобил „фолксваген пасат“, какв што, според МВРуправувал и на денот на трагедијата.Иако немал возачка дозвола, на неговиот Инстаграм-профил можат да се најдат објави и „сториња“ на кои се гледа како управува возило низ градска средина. Уште поалармантна е објава од 2024 година, кога Саити имал само 17 години, на која е прикажано возење по автопат со брзина од околу 180 километри на час, а на видеото се гледаат само раце и таблата за брзина. Овие снимки оставаат впечаток дека за осомничениот управувањето автомобил без возачка дозвола и со прекумерна брзина не било изолиран инцидент.Трагичниот настан во Капиштец се случи кога Саити, управувајќи возило без дозвола и со неприспособена брзина, удрил во пешакот Љуба Јаковлеска, која од здобиените повреди подоцна почина. По несреќата, осомничениот не ѝ укажал помош на повредената, туку го напуштил местото на настанот и станал недостапен за органите на прогонот.Министерството за внатрешни работи по него распиша централна и меѓународна потерница по барање на Основното јавно обвинителство Скопје, поради сомнение за сторено кривично дело тешки дела против безбедноста на луѓето и имотот во сообраќајот. Истрагата утврди дека по несреќата тој со помош на други лица ја напуштил државата, по што беа приведени и осомничени лица за помагање.Случајот предизвика силни реакции во јавноста, особено поради фактот што станува збор за младо лице без возачка дозвола, кое, според достапните докази од социјалните мрежи, подолг период демонстрирало опасно и неодговорно однесување во сообраќајот.

Настани | пред 1 месец

1 мес.

(Фото) Објавен идентитетот на момчето кое ја усмрти жената во Капиштец и избега преку Табановце, распишана потерница

На официјалната интернет-страница на Министерството за внатрешни работи е објавена централна и меѓународна потерница за лицето осомничено за сообраќајната несреќа со смртен исход што неодамна се случи во скопската населба Капиштец.Станува збор за Саитов Саит, роден на 6 април 2007 година во Скопје, од татко Берти и мајка Ганимете, со последна пријавена адреса на улицата „Дом Ндуе Битичи“ во Скопје. По него се трага по барање на Основното јавно обвинителство Скопје, поради сомнение за сторено кривично дело „тешки дела против безбедноста на луѓето и имотот во сообраќајот“, казниво по член 300 од Кривичниот законик.Потерницата е распишана откако осомничениот, по сообраќајната несреќа во која беше смртно прегазена жена, го напуштил местото на настанот и станал недостапен за органите на прогонот. Надлежните институции апелираат до граѓаните, доколку имаат сознанија за неговото движење или престој, веднаш да ја известат полицијата.Од МВР информираат дека потрагата се води интензивно, во координација со домашни и меѓународни служби, со цел осомничениот да биде лоциран, лишен од слобода и изведен пред лицето на правдата.Детали за несреќата:

Македонија | пред 1 месец

1 мес.

„Моите деца не се должни да го дишат вашиот чад“ – готвачот Виктор Настески во одбрана на законот за пушење

Готвачот Виктор Настески јавно и недвосмислено застана во одбрана на најавеното законско решение за ограничување на пушењето, нагласувајќи дека тој и неговите деца не се должни да ги трпат последиците од туѓиот избор. Во својот став, Настески реагира на, како што вели, бран реакции исполнети со себичност, во кои дел од пушачите тврдат дека им се кратат правата.Тој посочува дека пушењето не е уставно загарантирано право, туку лична навика и зависност, и дека секој има слобода да одлучи што ќе прави со сопственото здравје. Но, според него, таа слобода завршува таму каде што започнува здравјето на другите, особено на децата и непушачите.Настески прави јасна разлика меѓу приватниот и јавниот простор. Во сопствениот дом, вели тој, секој сам носи одговорност за своите постапки и никој нема право да се меша. Но, во ресторан, кафуле или друг јавен објект, никој нема право „да дува во врат“ на другиот додека тој јаде, пие кафе или поминува време со семејството.„Моите деца не се должни да го трпат вашиот избор и да ме прашуваат зошто им печат очите и зошто мириса неподносливо“, порачува Настески, нагласувајќи дека децата имаат право да дишат воздух, а не тутунски чад, кога ќе седнат во угостителски објект.Во продолжение, тој наведува дека за пушачите не претставува никаква трагедија да излезат надвор неколку минути за цигара, додавајќи дека угостителите нема да претрпат штета, туку напротив – објектите ќе се наполнат со луѓе на кои им е преку глава од чад и смрдеа. Според него, оној што сака да излезе во град, ќе го направи тоа и со закон и без закон.Настески потсетува дека сите гости ја плаќаат истата сметка, но не го добиваат истото искуство. Додека едните уживаат во својата навика, другите се гушат и гледаат што побрзо да си заминат. „Моите пари не вредат помалку од вашите за да морам да ја трпам вашата пасија за тутун“, истакнува тој.На крајот, готвачот порачува дека законот не е насочен против пушачите, туку во корист на сите граѓани, со цел јавните простори конечно да станат места каде што може слободно да се дише. Тој изразува надеж дека најавите нема да останат само на хартија, туку дека навистина ќе се стави крај на, како што ги нарекува, „гасните комори“ во угостителските објекти.

Коментари | пред 1 месец

1 мес.

Миа Костова со иронија за законот за пушење: „Ајде тогаш да го забраниме и алкохолот“

Инфлуенсерката Миа Костова реагираше со ироничен и саркастичен статус по повод најавениот закон за рестрикции за пушење, посочувајќи дека, следејќи ја истата логика, можеби треба целосно да се забрани и алкохолот.„Ја мислам дека и алкохол треба да се забрани сегде, затоа што реално е далеку поопасен по живот и за здравје и за последиците што ги носи по другите. Замислете само дискотеки и барови у кои луѓето мирисаат на ванила и лижат сладолед или пијат кокос во 2:45 сабајле. Па нема ни нервоза кон конобари : ʼдечко две ванила ти нарачав пред 15минʼ … па дечко праќа овошна салата за девојките со витамински маски на второ сепаре. Сите играат на подиум и коњопој се резервира со 2 литра цеден сок од портокал. И после сите дома си одат кој со точак кој со ролери кој со тапкање баскет накај дома у 4:20 на фајрон“; напиша Костова.Со завршната забелешка „Сѐ ли мене да ми текнува?“, Костова јасно дава до знаење дека нејзиниот статус е иронија насочена кон јавната дебата за рестрикциите, отворајќи прашање за тоа каде е границата меѓу заштитата на здравјето и апсурдот на целосните забрани.

Коментари | пред 1 месец

1 мес.

Расте бројот на жртви во Иран: потврдени најмалку 572 загинати

Бројот на загинати за време на масовните протести во Иран продолжува да расте, а според најновите податоци состојбата добива размери на сериозна хуманитарна криза. Американската организација Human Rights Activists News Agency соопшти дека досега се потврдени најмалку 572 смртни случаи, со напомена дека реалната бројка најверојатно е значително поголема.Организацијата, чии податоци и во минатото се покажале како точни и доверливи, се потпира на широка мрежа соработници на терен во Иран кои ги проверуваат и вкрстуваат информациите. Според нивната евиденција, меѓу загинатите има 503 демонстранти и 69 припадници на безбедносните сили.Истовремено, повеќе од 10.600 лица се приведени од почетокот на немирите, а протестите влегоа во третата недела. Според извештајот, регистрирани се речиси 600 протести низ сите 31 иранска покраина, што укажува на масовност и географска распространетост на незадоволството.Претседателот на иранскиот парламент, Мохамад Багер Галибаф, настапувајќи пред голем собир во главниот град, одговорот на властите го опиша како „борба против терористи“. Тој изјави дека Иран води „војна на четири фронта“, наведувајќи економска, психолошка и воена конфронтација со САД и Израел, додавајќи дека, како што рече, „денес станува збор за војна против тероризмот“.Галибаф порача дека „големиот ирански народ никогаш нема да му дозволи на непријателот да ги оствари своите цели“, додека присутните на собирот извикуваа слогани против Израел и Соединетите Американски Држави. Тој се закани дека иранските вооружени сили ќе му одржат, како што рече, „незаборавна лекција“ на американскиот претседател Доналд Трамп во случај на нов напад, предупредувајќи дека американските постројки во регионот би биле цел на одмазда.Во своето обраќање, Галибаф упати и лична порака до Трамп, повикувајќи го да не им верува, како што ги нарече, „лагите што му се пласираат“, во контекст на случувањата во Иран.

Свет | пред 1 месец

1 мес.

„Лајка“ ги заловува кучињата во Карпош кои наводно биле донесени од Албанија

Јавното претпријатие „Лајка“ информира дека викендов биле добиени повеќе пријави од граѓани за појава на поголема глутница кучиња без ушни маркици на територијата на Општина Карпош. Од утринските часови, екипите на претпријатието се на терен на посочената локација, каде што се спроведува безбедно и хумано заловување на животните, во согласност со законските процедури и стандардите за благосостојба.Од „Лајка“ посочуваат дека само во изминатите два месеци од истата локација биле заловени вкупно 19 кучиња. И покрај тоа, повторната и континуирана појава на нови животни на истото подрачје, според претпријатието, отвора сериозен сомнеж дека одредени лица или субјекти организирано вршат дислокација на бездомни кучиња во Скопје, наместо да применат законски и хумани решенија во општините од кои потекнуваат.Ваквата практика, како што нагласуваат од ЈП „Лајка“, е недозволива, нехумана и потенцијално опасна. Кучињата се изложуваат на дополнителен стрес, глад и ризик од повреди, а истовремено се зголемува и заканата по јавната безбедност. Дополнително, ваквото постапување директно го нарушува системот за контрола на популацијата на бездомни животни и ги обезвреднува напорите за стерилизација, вакцинација и одговорно управување.Од претпријатието упатуваат апел до надлежните институции за засилен надзор и соодветно санкционирање на ваквите појави, а до граѓаните – навремено да пријавуваат секој сомнителен транспорт или напуштање на кучиња. Само преку заедничка одговорност и доследно почитување на законот, потенцираат од „Лајка“, може да се обезбеди хуман, одржлив и системски пристап кон решавање на проблемот со бездомните кучиња.Претходно, Анима Мунди посочија дека се сомневаат дека кучињата се донесени од Албанија.

Скопје | пред 1 месец

1 мес.

Син си ја убил мајката во Богданци, со повеќе убоди во пределот на главата

Маж од Богданци е лишен од слобода поради сомнение дека со остар предмет ја усмртил својата мајка, а по извршувањето на делото самиот се пријавил во полиција.Како што информираат од Министерството за внатрешни работи, на 12 јануари 2026 година, полициски службеници од СВР Струмица – ОВР Гевгелија го уапсиле П.С. (39) од Богданци. Според првичните сознанија, претходната вечер околу 21 часот, во станот каде што живееле, избувнала расправија меѓу него и неговата мајка М.С. (58), која ескалирала во физичка пресметка. Во текот на конфликтот, осомничениот со остар предмет ѝ нанел повеќе убодни рани во пределот на главата.Жената починала од здобиените повреди, а смртта била констатирана од лекар од Итната медицинска помош во Гевгелија.Од МВР дополнуваат дека утрото, во 07:05 часот, осомничениот сам се пријавил во Полициската канцеларија во Богданци и го признал настанот.Увид на местото на злосторството извршиле јавен обвинител од Основното јавно обвинителство Гевгелија и екипа од ОВР Гевгелија. По наредба на обвинителот, телото на починатата е предадено на обдукција, а против осомничениот во текот на денот ќе биде поднесена кривична пријава за кривично дело убиство.

Македонија | пред 1 месец

1 мес.

eZy-Watermark_01-10-2023_05-04-38-6720PM

Пушењето се забранува пред болници, училишта, градинки и јавни институции: Министерот Алиу со детали за законот за пушење

Законот за заштита од пушењето нема да доведе до затворање на угостителските објекти, бидејќи со него не се воведува целосна забрана за пушење цигари, туку јасно се дефинира каде тоа е дозволено, порача министерот за здравство Азир Алиу.„Бизнисите нема да се затворат, бидејќи со законот за заштита од пушењето не се забранува пушење цигари. Тие луѓе кои пушат може да пушат во одредени простории, како што се тераси отворени од три страни. Значи кафичите и локалите можат да креираат таков тип инфраструктура, ако им е битно за бизнисот“, изјави Алиу.Тој нагласи дека од економски аспект не се очекуваат негативни последици, потсетувајќи дека државата и понатаму субвенционира тутун и има извоз на тутунски производи.„Од економска гледна точка не гледаме дека ќе има некаков тип загуби. Здравството и здравствените политики се поврзуваат со здравјето, а здравјето никогаш нема цена. Од другата страна со нездраво население вие дефинитивно одмагате на бизнисот многу повеќе отколку со вакви политики против пушење на цигари во затворени простории. Направена е и таква анализа. Луѓе кои се зависници од таков тип на производи се помалку активни во секојдневната работа во државните и во приватните институции“, истакна министерот.Алиу најави дека пушењето нема да биде дозволено во близина на јавни институции, здравствени установи, училишта, градинки и министерства, без разлика дали станува збор за Клиничкиот центар или други објекти низ државата.„Пред институции, не само во Клиничкиот центар, секаде низ целата држава, пред јавни здравствени установи, но и други јавни институции, училишта, градинки, министерства, нема да биде дозволено да се пуши“, рече тој.Во однос на угостителските објекти во рамки на Клиничкиот центар, министерот посочи дека и таму може да се најдат решенија во согласност со законот.„Клиничкиот центар дефинитивно е голем, има многу институции, но исто така знаете дека има инфраструктура внатре за пиење кафе, таму најверојатно тие бизниси ќе креираат инфраструктура и за пушење на цигари, или ќе направат тераса што ќе биде отворена од трите страни. Впрочем и на крај на денот, ние како надлежна институција, сакаме да направиме закон што ќе ги штитиме сите, ќе го штитиме населението. Верувајте дека имаме многу заболувања кои директно или индиректно се поврзуваат со пушењето“, нагласи Алиу.Тој информираше дека од утре ќе започнат состаноци со сите инспекторати, со цел тие навреме да се подготват за спроведување на законот.„Јас сум свесен дека законот има добро дефинирани постапки кај може да се пуши кај не смее да се пуши. Но, исто така ќе имаме добро дефинирани правилници што ќе бидат јавно достапни, ќе знаат сите заинтересирани страни кои треба да бидат информирани или имаат дел од бизнисот што е опфатено со овој закон, за да може да се прилагодат или инфраструктурно или внатрешни правилници ако им треба“, изјави министерот.Според него, од 1 март се очекува законот да стапи во сила и да донесе суштинска промена во јавниот простор.„Сигурен сум дека од 1 март се очекува законот да биде во сила, дека ќе имаме друг тип на инфраструктура надвор од нашиот дом, а тоа значи дека во јавен транспорт, во простории што се заеднички ќе имаме чист воздух и нема да дишеме никотин. Ве уверувам дека нема да дозволам надвор од тие европски политики да креираме некој хибриден закон, бидејќи тогаш од првиот ден законот нема да биде функционален“, додаде Алиу.

Македонија | пред 1 месец

1 мес.

Лидерска средба на 14 јануари: Левица прифаќа, СДСМ одбива, ДУИ ќе одлучува

Пратеникот Амар Мециновиќ денеска соопшти дека Левица ќе учествува на најавената меѓупартиска лидерска средба што ја иницираше премиерот Христијан Мицкоски.На прес-конференција, Мециновиќ истакна дека партијата, како парламентарен субјект, подолг период настојува да воспостави комуникација со парламентарното мнозинство преку законски предлози и барање консензус за клучни државни прашања, оценувајќи дека сега е моментот за влез во суштински и конструктивен дијалог. Според него, приоритет за Левица е создавање демократска и фер атмосфера за време на изборниот процес, а во таа насока ќе бидат насочени и нивните барања.Иницијативата за лидерска средба доаѓа од премиерот Мицкоски, кој најави отворање разговори за укинување на т.н. „Пржинска влада“, модел воведен пред десет години, како и за други системски прашања. Од владината служба за односи со јавноста претходно информираа дека поканите се во фаза на испраќање и ќе бидат доставени до сите партии со пратеничка група во Собрание на Република Македонија.Премиерот минатата седмица најави дека средбата е планирана за 14 јануари и треба да се одржи во Клубот на пратениците.Иницијативата, сепак, се соочува со различни реакции во политичкиот блок. СДСМ најави дека нема да учествува на средбата, при што партискиот лидер Венко Филипче изјави дека „средба со криминалци нема да има“. Од ДУИ соопштија дека својот став ќе го соопштат откако официјално ќе ја добијат поканата.Левица, пак, повтори дека се залага за укинување на техничката влада, но под услов тоа да биде проследено со реални, а не само декларативни демократски реформи, како и со воведување на една изборна единица, што, според партијата, би обезбедило пофер и порепрезентативен изборен систем.

Македонија | пред 1 месец

1 мес.

Сања Лукаревска: „Нови 20 милиони евра задолжување додека власта секој ден врти криминални тендери“

Пратеничката на СДСМ Сања Лукаревска денеска ја обвини Владата дека продолжува со нови задолжувања без јасна финансиска рамка, предупредувајќи дека јавниот долг оди во, како што рече, опасна насока.На изјава за медиуми, Лукаревска информираше дека во Собранието е поднесен Предлог-закон за ново задолжување од 20 милиони евра, наменети за изградба на фискултурни сали. Според неа, во законското решение не е наведена каматната стапка, што, како што оцени, отвора сериозни прашања за транспарентноста на задолжувањето.Таа наведе дека Владата, од една страна, тврди дека нема средства за зголемување на платите, за воведување минимална плата од 600 евра или за нови мерки за поддршка на животниот стандард, додека од друга страна продолжува со, како што рече, високи јавни трошоци и милионски тендери.Лукаревска посочи дека, според нејзините тврдења, во државната каса недостигаат околу една милијарда евра, а таа разлика се покрива со нови задолжувања кои ќе ги отплаќаат идните генерации.Како пример за досегашното задолжување, таа наведе дека Владата веќе земала заем од една милијарда евра од Унгарија, дополнителни 660 милиони евра на домашниот пазар, како и дека само во декември 2025 година биле издадени државни обврзници во вредност од 100 милиони евра. Дополнително, според неа, се најавува и можност за нов кредит од околу шест милијарди евра.Лукаревска се повика и на проекциите на Светската банка, според кои јавниот долг на земјата годинава би можел да достигне 62,9 проценти од бруто-домашниот производ, што, како што оцени, ја става државата меѓу најзадолжените во Западен Балкан.Од СДСМ најавија дека нивните пратеници ќе се спротивстават на предложеното задолжување и на секое наредно зголемување на јавниот долг, повикувајќи ја Владата да ги намали трошоците и да обезбеди средства за граѓаните.

Македонија | пред 1 месец

1 мес.

Под знак прашалник стартот на „Сејф сити“: ДУИ го блокира законот со бадентеровото мнозинство

Под знак прашалник е дали од 1 февруари ќе започне примената на системот „Сејф сити“ за автоматско казнување на возачите, како што најави министерот за внатрешни работи Панче Тошковски, откако во Собрание на Македонија сè уште не е обезбедено потребното двотретинско и бадентерово мнозинство за усвојување на измените на Законот за прекршоците.Опозициската ДУИ, предводена од Али Ахмети, засега не дава поддршка за законските решенија предложени од владејачкото мнозинство, а без гласовите на оваа партија не може да се обезбеди мнозинство од припадниците на заедниците, што е уставен услов за нивно донесување.Претседателот на Собранието Африм Гаши на денешниот брифинг изјави дека меѓу пратеничките групи сè уште нема договор за измените на Законот за прекршоците. Според него, доколку се постигне политички договор, измените веднаш ќе бидат ставени на дневен ред на пленарна седница. Гаши посочи дека на досегашните координации немало суштински забелешки за содржината на законските решенија, туку дека станува збор исклучиво за прашање на политички договор меѓу пратениците.Со предложените измени се предвидува прекршоците евидентирани преку камерите на „Сејф сити“ да се доставуваат по електронски пат, односно преку СМС порака или електронска пошта до сопственикот на возилото. Во известувањето ќе има линк преку кој ќе може да се преземе записникот за сторениот сообраќаен прекршок и прекршочниот платен налог. Доколку во рок од 24 часа по првото известување сопственикот не го отвори линкот, ќе следи второ известување, а рокот за преземање на документите ќе изнесува осум дена. По истекот на тој рок, доставата ќе се смета за уредно извршена, дури и ако документите не се преземени. Законот предвидува и можност доставата да се врши преку дигитална апликација, согласно важечките прописи.Покрај електронската достава на казните, со измените се воведуваат и построги санкции, меѓу кои трајно одземање на возилото за возачи фатени под дејство на алкохол или дрога, како и одземање на возачката дозвола. Сепак, без обезбедување на потребното парламентарно мнозинство, почетокот на примената на „Сејф сити“ останува неизвесен.

Македонија | пред 1 месец

1 мес.

Алиу-Андоновска: Обезбедени 7.500 вакцини против Хепатитис Б, наменети за здравствени работници

Министерот за здравство Азир Алиу и директорката на Институт за јавно здравје, Марија Андоновска, денеска одржаа заедничка прес конференција по повод потпишување договор за донација од страна на Министерството за здравство на Институтот за јавно здравје на 7.500 вакцини против Хепатитис Б, во вкупна вредност од 123.450 американски долари, кои се наменети за здравствените работници.-Станува збор за конкретна превентивна мерка за намалување на изложеноста на ризици по здравјето на вработените во здравствениот систем, притоа истовремено засилувајќи ја и сигурноста кај пациентите. Со овие количини ќе бидат опфатени 2.500 здравствени работници, со три дози вакцина по лице. Вакцинацијата ќе се спроведува во Институтот за јавно здравје и во Центрите за јавно здравје. Нашата одговорност како институционални носители на здравствените политики е да создадеме услови здравствените работници да не бидат оставени сами во ризиците кои ги носи извршувањето на нивните обврски, како што е контактот со крв и телесни течности, повреди со остри инструменти и слично. Вакцините се обезбедени од „Project HOPE“ - меѓународна невладина организација за глобална здравствена и хуманитарна помош, на кои им се заблагодарувам, истакна министерот Алиу во обраќањето.Тој посочи дека во рамки на заложбите за овозможување едноставен и достапен процес на вакцинација, Министерството за здравство подготви електронски модул за изразување интерес за вакцинација, кој е достапен на веб-страниците на Министерството за здравство и на Институтот за јавно здравје.-Денес обезбедуваме и дополнителна поддршка за Институтот за јавно здравје за засилување на биосигурноста. Станува збор за авионски и бродски транспортни кутии за инфективни материјали, со што овозможуваме побезбедно постапување и транспорт на инфективни материјали согласно протоколите, додаде министерот.

Македонија | пред 1 месец

1 мес.

Швајцарски суд го продолжи притворот на сопственикот на барот во кој загинаа 40 лица

Судот во Швајцарија нареди продолжување на притворот за еден од сопствениците на барот во луксузното скијалиште Кран-Монтана, каде што во пожар што избувна за Нова година загинаа 40 лица, објави денеска СРФ.Обвинителството на кантонот Вале уште во петокот нареди притворање на ко-сопственикот на барот, Жак Морети, по неговото сослушувањето и сослучувањето на неговата сопруга Џесика, а се чекаше судска одлука дали притворот е оправдан.Брачниот пар изразил жалење поради трагедијата и изјавил дека целосно ќе соработува со истрагата. Обвинителството засега не ја коментира судската одлука. Двајцата се осомничени за убиство од небрежност, нанесување телесни повреди од небрежност и предизвикување пожар од небрежност.Во катастрофалниот пожар за време на новогодишната прослава животот го загубија 40 лица, од кои мнозинството беа тинејџери, а повредени се уште 116 лица. Првичните резултати од истрагата укажуваат дека пожарот го предизвикале прскалки кои ја запалиле звучно-изолациската пена поставена на таванот од подрумот.Неговата сопруга и ко-сопственичка Џесика, која по сослушувањето била пуштена на слобода, потврдила дека во барот се користеле прскалки. „Секогаш додаваме прскалка кога сервираме шише вино во салата за јадење“, им изјавила таа на обвинителите. Истражителите дополнително проверуваат дали во барот имало противпожарни апарати и дали излезите биле во согласност со прописите.

Свет | пред 1 месец

1 мес.

Уапсено лицето го оштети стаклото на влезната врата на бугарската амбасада во Скопје

Полициски службеници денеска го лишија од слобода 54-годишниот Ш.А. од Скопје, осомничен дека го оштетил стаклото на влезната врата на Амбасадата на Република Бугарија во главниот град.Како што информира Министерството за внатрешни работи, приведувањето било извршено денеска во 12:40 часот на улицата „Кирил и Методиј“, од страна на полициски службеници од ЕВР Центар и Бит Пазар. Според полицијата, Ш.А. се сомничи дека вчера, на 11 јануари 2026 година, го извршил оштетувањето на објектот на бугарската дипломатска мисија во Скопје.Од МВР наведуваат дека веднаш по пријавувањето на инцидентот биле преземени интензивни мерки и активности за идентификување и пронаоѓање на сторителот, по што лицето било приведено.По целосно документирање на случајот, против осомничениот ќе биде поднесена соодветна пријава, соопштија од Министерството за внатрешни работи.

Скопје | пред 1 месец

1 мес.

Двајца малолетници од Скопје уапсени откако со мотор удриле во полицаец

На 09.01.2026 во 00:45 часот во Скопје, на подрачјето на Карпош, полициски службеници од СВР Скопје лишија од слобода и приведоа двајца 16-годишници од Скопје. При вршење службени дејствија, околу 00:10 часот на бул.„Митрополит Теодосиј Гологанов“ во Скопје, полициски службеници забележале мотоцикл без регистарски ознаки, кој го управувал еден од малолетниците, но тој не застанал на знак за запирање, по што со мотоциклот удрил во еден полициски службеник и му нанел повреди. Набргу, по преземени мерки мотоциклот е запрен и тие се фатени, при што малолетниот сопатник агресивно се однесувал кон полициските службеници.По целосно документирање на случајот, против двајцата ќе бидат поднесени соодветни поднесоци.

Скопје | пред 1 месец

1 мес.

„Двете кандидатки не ги предложив затоа што се жени, туку заради нивната стручност и компетентност“, претседателката Силјановска Давкова за предложените членови на Судскиот совет

„Судскиот совет е рентгенот, микроскопот, во него треба да седат луѓе кои ќе треба да оценуваат врз основа на тоа што го имат како квалификација, но и врз основа на интегритетот и дигнитетот. Во правото најважни се законитоста, уставноста, етиката, бидејќи само таков орган ќе може да одлучува за дисциплинска одговорност, за избор на судии, разрешување судии.“Со оваа порака, претседателката Гордана Силјановска Давкова ја објасни логиката зад нејзините предлози за нови членки на Судскиот совет, кои денеска ги образложи пред пратениците во Собранието.Таа ги предложи Алинда Кадри Шакиновиќ и Сузана Јошевска – Анастасовска, нагласувајќи дека изборот е направен исклучиво врз основа на стручноста, компетентноста и личниот кредибилитет.„Од дискусиите овде, и не само овде туку во јавноста општо, јасно беше дека Судскиот совет стана фактор на криза во судството. Двете кандидатки не ги предложив затоа што се жени, туку пред се заради нивната стручност и компетентност“, рече Силјановска Давкова.Според неа, реформите во правосудството не можат да дадат резултат доколку не започнат токму од телото кое има надлежност да одлучува за избор, оценување и одговорност на судиите.„Ако во Судскиот совет регрутираме луѓе посветени на правото, луѓе стручни и компетентни во областа, мислам дека тоа ќе значи промовирање на исти критериуми и при изборот на судиите, одговорноста на судиите и се разбира, очекувам нешто што додека бев пратеничка не го видов – да добиваме извештаи од Советот што ќе бидат аргументирани, во кои не само што ќе се детектираат проблеми туку и начини за нивно надминување, извештаи кои ќе значат исчекор во реформите“, изјави таа.Претседателката посочи дека професионалноста без етика не е доволна и дека независното судство може да се гради само врз комбинација од знаење, интегритет и одговорност.

Македонија | пред 1 месец

1 мес.

Кучиња од Албанија со ушни маркици најдени на улица во Скопје, тврди Анима Мунди

Нашето здружение на терен пронајде кучиња со ушни маркици од Република Албанија, на улица во Скопје, факт кој отвора исклучително сериозно прашање за нелегален, па дури и прекуграничен транспорт и напуштање на животни, реагира денеска Анима Мунди. Истовремено алармира и јавно бара итна, темелна и независна истрага за сериозни индиции за организирано внесување и дислоцирање на кучиња во град Скопје, појава што веќе директно ја загрозува јавната безбедност, благосостојбата на животните и самото владеење на правото.Во општина Карпош, во изминатите денови, се појави нова глутница кучиња - животни кои се целосно непознати за локалното население, кои не се дел од постоечката улична популација и кои се појавија буквално преку ноќ. Станува збор за нестерилизирани и необележани кучиња, што јасно укажува дека ова не може да биде природен прираст, туку насилна дислокација.Јавно и одговорно тврдиме дека станува збор за организирано внесување кучиња, затоа што ЈП „Лајка“ нема оставено, ниту пак има испуштено ваква бројка нестерилизирани и необележани животни на ниту една локација во Скопје. Граѓаните со години ги познаваат кучињата во своите маала - овие животни не се нивни. Дополнително, нашето здружение на терен пронајде кучиња со ушни маркици од Република Албанија, на улица во Скопје, факт кој отвора исклучително сериозно прашање за нелегален, па дури и прекуграничен транспорт и напуштање на животни.БАРАМЕ целосна проверка на сите безбедносни камери, јавни и приватни, на локациите каде кучињата се појавиле, како и на сите влезно-излезни правци кон Скопје.Бараме МВР и Јавното обвинителство да утврдат кој, како и од каде ги транспортира и истовара овие животни, затоа што ова не е изолиран чин, туку логистички организирана активност.Масовното напуштање и дислоцирање на кучиња претставува суровост, но и сериозна општа опасност. Затоа Анима Мунди одамна бара измена на законската рамка. Поднесовме конкретни предлози за измени на Законот за заштита и благосостојба на животните, со кои бараме најстрого регулирање на сопствеништвото на кучиња, како и предлог-измени на Кривичниот законик со кои напуштањето миленик, суровоста и предизвикувањето општа опасност ќе се третираат како кривични дела, по примерот на Република Хрватска.Истовремено упатуваме јавен и итен повик до ЗЕЛС - ова прашање мора да се отвори и дискутира на ниво на сите градоначалници. Секоја општина мора да ја третира проблематиката со уличните кучиња хумано и согласно закон: со масовна стерилизација, јасна евиденција и најстроги санкции секаде каде што ќе се утврди доказ за масовно дислоцирање.Јасно укажуваме: ниту Лајка , ниту било кое јавно претпријатие, НИТУ СТО ЛАЈКИ не можат да го решат овој проблем во услови на институционална инертност и толерирање на криминал. Ова не е проблем на една општина. Ова е системска злоупотреба и мора да биде санкционирана. Бараме истрага, одговорност и итни мерки веднаш и насекаде за да се фатат сторителите и најстрого одговараат, согласно закон!

Македонија | пред 1 месец

1 мес.

Палевски се жали од судијата кој го осуди на доживотна робија

Љупчо Палевски – Палчо, кој првостепено е осуден на доживотна казна затвор за грабнувањето и свирепите убиства на тинејџерката Вања Ѓорчевска и велешанецот Панче Жежовски, поднел претставка до Судскиот совет, жалејќи се на, како што навел, тоа што судијата Ивица Стефановски, предолго ја пишувал писмената пресуда, која сега е во рацете на Апелација.Претставката на Палевски се најде на дневен ред на денешната седница на Судскиот совет, но по разгледувањето, членовите ја отфрлија како неоснована. Во неа, осудениот изразил незадоволство и од постапувањето на судијата Ивица Стефановски.Судијата Стефановски, пак, доставил писмено изјаснување до Судскиот совет во кое навел дека станува збор за исклучително сложен предмет, со обемен доказен материјал, бројни сведоци и повеќе обвинети, но и дека имал проблеми со здравјето па отсуствувал од работа.Паралелно со оваа постапка, Палевски по изрекувањето на доживотната казна затвор поднесе и жалба до Апелациониот суд во Скопје, со која бара да биде ослободен од вина или предметот да се врати на повторно судење. Жалбата ја поднел неговиот бранител, адвокатот Јовица Страшевски, кој во јавноста тврдеше дека во првостепената постапка биле направени сериозни процесни пропусти.Според одбраната, дел од доказите наведени во пресудата воопшто не биле изведени на главната расправа, а на одредени места, како што тврдат, судот се повикал на искази на обвинети како доказ, што, според нив, е правно недозволиво. Адвокатот најави дека на јавна седница пред Апелациониот суд детално ќе ги образложат овие наводи, особено несогласувањата во временските рамки и логичките противречности во пресудата.Судија-известител за предметот во скопска Апелација е Ѓоко Ристов, а предметот веќе е доставен на мислење до Вишото јавно обвинителство Скопје. Жалба на првостепената пресуда поднесе и Јавното обвинителство, но во делот што се однесува на ослободителната одлука за таткото на Вања, Александар Ѓорчевски, кој беше ослободен од обвинението за помагање при грабнувањето.Во првостепената пресуда, судот на Палевски и на Манев, Видевски и Кешишев им изрече по 10 години затвор за кривичното дело грабнување на Вања Ѓорчевска и Панче Жежовски, како и доживотна казна затвор за двете убиства. Иако пресудата беше донесена, мотивите за злосторствата што ја потресоа јавноста во 2023 година и понатаму не се целосно разјаснети.Се очекува Апелациониот суд во наредниот период да закаже јавна седница, по која ќе одлучи дали ќе ја потврди првостепената пресуда, ќе ја укине и ќе наложи повторно судење или ќе донесе поинаква одлука.

Македонија | пред 1 месец

1 мес.

Муцунски: Инцидентот со бугарската амбасада е изолиран, институциите реагираат брзо и ефикасно

Министерот за надворешни работи и надворешна трговија, Тимчо Муцунски, остро го осуди инцидентот со оштетувањето на стаклото од влезната врата на Амбасадата на Република Бугарија во Скопје, оценувајќи дека станува збор за изолиран настан, на кој институциите реагирале навремено и ефикасно.„Секој чин во таква форма ќе го осудиме. Според првичните информации, станува збор за изолиран инцидент, создадена е некоја материјална штета која не е во огромен обем. Без разлика на тоа, го осудуваме максимално инцидентот. Министерството за внатрешни работи дава максимум за истрагата. Оттаму треба да побарате информации. Институционално, има брз и ефикасен одговор“, изјави Муцунски.Тој нагласи дека државата не може да превенира секој поединечен кривично-правен настан, но дека одговорноста на институциите е јасна и недвосмислена.„Да, се работи за инцидент кој го осудуваме, но ние не можеме да го контролираме секој кривично-правен настан. Нашиот одговор е веднаш да го осудиме настанот, а институциите да го расветлат случајот“, додаде министерот.Изјавата на Муцунски доаѓа по инцидентот што се случи на 11 јануари, кога, според МВР, непознато лице оштетило стакло на влезната врата на Амбасадата на Република Бугарија во Скопје, по што веднаш биле преземени мерки за идентификување на сторителот и целосно расчистување на случајот.

Македонија | пред 1 месец