Најнови вести

1 мес.

Киднапирање и закани со оружје во Тетовско, приведени три лица, едно е во бегство

Три лица се лишени од слобода, а по едно лице се трага, по пријава за насилство и закани со огнено оружје во тетовското село Гајре, информира Министерството за внатрешни работи.Според пријавата, на 20 февруари 2026 година околу 20.00 часот, З.И.(39) од село Гајре бил пресретнат од Л.М. и 16-годишно малолетно лице, кои излегле од патничко моторно возило „голф“ со тетовски регистарски ознаки. Тие, според наводите, насилно го внеле во двор од куќа сопственост на Л.М., каде што му упатиле закани со огнено оружје и физички го нападнале со тврд предмет.По преземени мерки, околу 21.50 часот на улицата „Илинденска“ во Тетово, полициски службеници ги лишиле од слобода А.М.(43) и Е.М.(20) од Гајре, кои биле затекнати во истото возило „голф“, кое претходно не запрело на даден знак за запирање од полициски службеници.Во селото Гајре, во присуство на родител, од слобода било лишено и 16-годишното малолетно лице. Лицата се задржани во полициска станица, а возилото е задржано за преглед во Полициската станица Тетово.Полицијата презема мерки за пронаоѓање на Л.М., а по целосно документирање на случајот ќе биде поднесен соодветен поднесок.

Македонија | пред 1 месец

1 мес.

Едно лице загина: „Сеат ароса“ излетал од патот кон Берово

Триесет и четиригодишен возач го загуби животот во сообраќајна несреќа што се случила ноќеска на регионалниот пат на излез од Виница кон Берово, информира Министерството за внатрешни работи.Според информациите, на 21 февруари 2026 година околу 00.20 часот во ОВР Виница било пријавено дека патничко возило „сеат ароса“ со винички регистарски ознаки, управувано од М.М.(34) од село Крушево, виничко, излетало надвор од коловозот.Во несреќата возачот починал на местото на настанот, а смртта била констатирана од лекар од Итна медицинска помош.Увид на местото извршила увидна екипа од ОВР Виница, а по наредба на јавен обвинител телото на починатиот е предадено на обдукција. Причините за несреќата ќе бидат утврдени по целосното расчистување на случајот.

Македонија | пред 1 месец

1 мес.

Жан Митрев: Трансплантацијата мора да стане рутинска пракса во Македонија

Д-р Жан Митрев ја изрази својата целосна поддршка за иницијативата за заживување на трансплантацијата во Македонија, нагласувајќи дека станува збор за заложба што ја носи повеќе од 26 години, уште од почетоците на неговата професионална кариера.На јавната панел-дискусија „Органодарителство во Македонија“, одржана во Битола, Митрев истакна дека крајната цел треба да биде трансплантацијата да стане рутинска и секојдневна медицинска практика во земјава. Според него, прашањето не е само медицинско, туку длабоко човечко, бидејќи зад секој пациент што чека орган стои семејство кое живее во неизвесност, во исчекување помеѓу надежта и стравот.„Органодарителството е чин на највисока солидарност. Тоа не спасува само еден живот, туку може да врати иднина на повеќе луѓе одеднаш“, посочи Митрев, додавајќи дека бројот на пациенти на кои може да им се помогне е значителен, особено во областа на кардиоваскуларните заболувања.Тој нагласи дека тимот на Клиника „Жан Митрев“ е целосно подготвен за вакви сложени операции, но дека успехот зависи од тесна координација меѓу институциите и медицинската фела. Трансплантацијата, како што истакна, подразбира мултидисциплинарен пристап и системска организација, особено кога станува збор за комплексни пациенти.Панел-дискусијата беше посветена на теми поврзани со надежта, солидарноста и човечноста, отворајќи прашања за законската рамка, правата на пациентите, медицинските аспекти и дилеми, како и искуствата на лица што чекаат трансплантација или веќе го дочекале повикот за нов живот. Во рамки на настанот беа разгледани и ставовите на верските заедници во однос на органодарителството.Со учество на врвни лекари, трансплантациски експерти и координатори, трансплантирани пациенти и претставници на верските заедници, беше испратена порака дека трансплантацијата може да стане реална и достапна можност, доколку постојат знаење, доверба и системска поддршка.

Македонија | пред 1 месец

1 мес.

СДСМ обвинува за партизација на правосудството и молк за 161 тендер

Членот на Извршниот одбор на СДСМ, Јон Фрчкоски, обвини дека судството и обвинителството се ставени под, како што наведе, директна контрола на премиерот Христијан Мицкоски, оценувајќи дека правдата во државата се урива, а институциите се партизираат.Фрчкоски тврди дека власта го сменила јавниот обвинител за да постави лице под своја контрола, при што јавно била елиминирана кандидатката Ленче Ристоска, и покрај тоа што, според него, добила максимални оценки од Советот на јавни обвинители. Тој посочи дека таа била и јавно навредувана од страна на премиерот.Според СДСМ, премиерот директно влијае врз изборот на обвинители и судии, а како примери ги наведува изборот на член на Судскиот совет и назначувања во Уставниот суд. Дополнително, Фрчкоски обвини дека од власта се врши притисок врз обвинителството и се води кампања за дискредитација на предметите на поранешното Специјално јавно обвинителство.Тој истакна дека повеќе од 80 дена нема одговор на пријавите поднесени од СДСМ до Државната комисија за спречување на корупцијата, ниту реакција од обвинителството и Финансиската полиција во врска со, како што наведе, серија сомнителни тендери.Меѓу нив ги спомена 161 тендер за фирма поврзана со семејството на Томовски, 51 тендер преку општини за фирмата „Пирамид Билдинг“, 74 тендери за „Ленди груп“, како и тендер од 1,2 милиони евра за фирма блиска до партијата ЗНАМ.Фрчкоски оцени дека додека граѓаните се соочуваат со економски предизвици, власта, според него, се впушта во луксуз и спорни јавни набавки. Тој заклучи дека, како што рече, единствениот притисок врз македонските граѓани доаѓа од актуелната власт, обвинувајќи ја за селективна правда и институционален молк.

Македонија | пред 1 месец

1 мес.

Николоски: До крајот на 2029 ќе се вози по автопатот Гостивар–Букојчани

Заменик-претседателот на Владата и министер за транспорт, Александар Николоски, изјави дека изградбата на автопатот Гостивар–Букојчани се одвива со силна динамика и дека очекува до крајот на 2029 година граѓаните да возат по оваа делница.Тој заедно со премиерот Христијан Мицкоски, времената вршителка на работите во Амбасадата на САД, Никол Варнс, како и со претставници на институциите, извршија увид во изградбата на делницата, која е дел од западното крило на Коридор 8.Според Николоски, се работи интензивно на секцијата што треба да го поврзе автопатот од Гостивар до Букојчани со постојниот автопат кон Тетово, а понатаму и со делницата кон Кичево, Охрид и Струга. Тој оцени дека проектот ќе донесе значителен економски придонес, ќе ја подобри регионалната поврзаност и ќе придонесе за развој на туризмот и бизнисот.Министерот посочи дека експропријацијата е завршена речиси 90 проценти, што, како што нагласи, е клучен предуслов за непречена реализација. Досега се исплатени околу 470 милиони евра, сума што, според него, е значајна за буџетот на државата. Тој додаде дека финансирањето се одвива навремено и дека државата ја обезбедува потребната логистика.Николоски истакна дека градежништвото бележи раст од 21 процент во третиот квартал од минатата година, што го оцени како историски резултат во независна Македонија. Посочи и дека во проектот се вклучени Градежниот и Архитектонскиот факултет, со цел студентите да стекнуваат практично искуство на реални инфраструктурни проекти.Тој најави дека покрај оваа делница, интензивно се работи и на автопатот Тетово–Гостивар, како и на делницата Прилеп–Битола, со цел да се заокружи современата патна мрежа во западниот дел од државата.

Македонија | пред 1 месец

1 мес.

Ана Чупевска по изјавата на Мицкоски за Ристоска: Изгледа некои премиери го помешале Обвинителството со сопствен избор на "мис"

Функционерката на СДСМ, Ана Чупевска, реагираше на јавните изјави на премиерот поврзани со изборот на обвинители, оценувајќи дека извршната власт не смее да си зема за право да утврдува кој е „подобен“, а кој не за гонење криминал.„Изгледа некои премиери го помешале Обвинителството со сопствен избор на ‘мис’, па почнаа јавно да оценуваат кој е ‘подобен’, а кој не“, наведува Чупевска во својата реакција.Таа посочува дека во демократски систем премиерот нема надлежност да ги бира обвинителите според лични или политички критериуми, нагласувајќи дека доколку политиката дефинира кој ќе гони криминал, тогаш наместо правда ќе има, како што вели, „нарачана послушност“.Чупевска прашува уште колку пати јавноста ќе сведочи на, според неа, сценарио на „заробена држава“, оценувајќи дека секое директно политичко влијание врз правосудството ја нарушува неговата независност.„Кога политичарот ќе влезе во судницата, правдата по дефиниција излегува низ прозорецот“, наведува таа, апелирајќи на почитување на поделбата на власта и институционалната автономија.

Коментари | пред 1 месец

1 мес.

Владата ќе ја интензивира изградбата на инфраструктурните коридори

Премиерот Христијан Мицкоски изјави дека за Владата изградбата на автопатската инфраструктура претставува стратешки приоритет, оценувајќи дека ваквите проекти ја зајакнуваат поврзаноста, логистиката и геостратешкото значење на државата.Тој посочи дека географската местоположба на земјата треба да се искористи како предност и дека позицијата на раскрсница во регионот е стратешки капитал. Според него, како членка на НАТО, државата преку реализација на ваквите коридори придонесува за зголемена отпорност и безбедност во регионот, како и на јужното крило на Алијансата.Премиерот упати благодарност до вицепремиерот и министер за транспорт, заменик-министерката, директорот на Јавното претпријатие за државни патишта, како и до институциите вклучени во реализацијата на проектот – Управата за имотно-правни работи, Министерството за финансии и Агенцијата за катастар.Мицкоски изрази очекување дека проектот ќе донесе конкретна вредност за граѓаните и ќе ја подобри логистичката мрежа низ државата, нагласувајќи дека Владата ќе направи сè изградбата да се реализира во роковите што биле претходно утврдени.Тој најави дека во наредниот период ќе се интензивира реализацијата и на други инфраструктурни проекти од сличен обем.

Македонија | пред 1 месец

1 мес.

Филипче: Булингот не доаѓа од Европа, туку од ВМРО и Мицкоски

Претседателот на СДСМ, Венко Филипче, реагираше на изјавите на премиерот Христијан Мицкоски, оценувајќи дека, како што наведе, единствениот „булинг“ врз македонскиот народ го вршат ВМРО-ДПМНЕ и Мицкоски.„Наместо да ги спроведе реформите што Европа ги бара две години, Мицкоски нуди само изолација и анти-ЕУ кампања. Преку 70 проценти од граѓаните сакаат членство во ЕУ, а тој зборува за ‘булинг’ и ‘прва и втора лига’“, наведува Филипче во реакцијата.Според него, проблемот не е во односот на Европската Унија, туку во неисполнувањето на обврските поврзани со владеењето на правото, слободата на медиумите и борбата против корупцијата. Тој обвини дека ВМРО-ДПМНЕ создава конфликти со соседите и дека на критиките од Брисел одговара со напади врз Унијата.Филипче ја поврза актуелната состојба со, како што рече, изостанокот на напредок во евроинтеграциите, случајот со пет тони дрога што, според него, излегле преку македонската граница, како и состојбите во судството, обвинителството и медиумите.Во реакцијата се наведува дека Европа дала јасна шанса до 2027 година, заедно со земјите од регионот, посочувајќи дека Црна Гора и Албанија напредуваат, додека Македонија, според него, стагнира.„Мицкоски и ВМРО не сакаат ЕУ, сакаат да крадат на тендери без надзор. Тоа не е европска вредност, тоа е криминална вредност“, се наведува во соопштението на Филипче, кој заклучува дека, според него, вистинскиот притисок врз граѓаните доаѓа од актуелната власт.

Македонија | пред 1 месец

1 мес.

Уапсен бискупот на Линколн поради сомнеж за сексуален напад

Бискупот на Линколн во рамки на Англиканската црква, Stephen Conway, е уапсен поради сомнеж за сексуален напад, откако била поднесена пријава до националниот тим за заштита при Church of England.Полицијата на округот Lincolnshire Police потврди дека 68-годишен маж бил приведен во рамки на истрага што е во тек, по наводи дека машко лице било сексуално нападнато во периодот меѓу 2018 и 2025 година.Бискупот на Линколн претставува висок црковен лидер, одговорен за надзор над црквите и свештенството во источна Англија. Функцијата има и национално значење, бидејќи по службена должност бискупот има место во House of Lords, горниот дом на британскиот парламент, каде учествува во разгледување и расправа за законите на Обединетото Кралство.Од Бискупијата Линколн соопштија дека бискупот е суспендиран од службата по пријавата до националниот тим за заштита. Во соопштението се наведува дека е обезбедена поддршка за засегнатите лица и дека случајот е проследен до надлежните институции, без да се изнесат дополнителни детали за природата на наводите.Се посочува дека станува збор за „длабоко вознемирувачки период“ за заедницата. За време на суспензијата, должноста ќе ја извршува бискупот на Грантам, д-р Николас Чембрлејн.Конвеј ја извршува функцијата бискуп на Линколн од 2023 година и е пуштен на условна кауција додека трае истрагата.

Свет | пред 1 месец

1 мес.

11 возачи пијани зад волан во Велешко, две лица лишени од слобода

Министерството за внатрешни работи информира дека во текот на ноќта меѓу 20 и 21 февруари 2026 година, во периодот од 21.00 до 03.00 часот, Мобилната единица за безбедност на сообраќајот на патиштата при Секторот за сообраќајни работи спровела акциска контрола на подрачјето на СВР Велес, односно ОВР Кавадарци.Во рамки на контролата изречени се вкупно 20 мерки за сторени сообраќајни прекршоци. Од нив, 11 возачи биле санкционирани и исклучени од сообраќај поради управување моторно возило под дејство на алкохол. Две лица се лишени од слобода поради основано сомнение за сторено кривично дело по член 297-а од Кривичниот законик – „безобѕирно управување со моторно возило“, а согласно член 300 од Кривичниот законик одземени се две моторни возила. Дополнително, санкционирани се девет возачи за други сообраќајни прекршоци.Во истиот период, на целата територија на државата, полициски службеници лишиле од слобода 11 лица, од кои девет поради управување возило без возачка дозвола, а две поради управување под дејство на алкохол.Без возачка дозвола биле затекнати возачи од Тетово, Кавадарци, Скопје, Дојран, Гевгелија и Струга, при што возач од Гевгелија управувал и возило со истечена регистрација. Двајца возачи од Кочани биле фатени како управуваат возило под дејство на алкохол, со измерени 1,83 и 2,91 промили алкохол во крвта.Сите лица се приведени во полициска станица, а по целосно документирање на случаите против нив ќе бидат поднесени соодветни пријави.Од МВР најавуваат дека сообраќајните контроли ќе продолжат и во наредниот период и апелираат до сите учесници во сообраќајот да ги почитуваат правилата и прописите, нагласувајќи дека управувањето возило под дејство на алкохол и без возачка дозвола претставува сериозна закана за безбедноста на граѓаните.

Македонија | пред 1 месец

1 мес.

(Видео) Од Врховен, преку судија и Владата до Судскиот совет: како, според Катевеновски, течела постапката за негово разрешување

Поранешниот судија на Врховниот суд, Ристо Катевеновски, во гостувањето во „Претрес со Ландов“ изнесе теза дека неговото разрешување во 2020 година било иницирано по дојава од колега судија, кој во Владата најверојатно открил дека не сакал да ја потврди пресудата за поранешната министерка за внатрешни работи Гордана Јанкуловска во предметот познат како „мерцедесот на Груевски“.Катевеновски наведе дека формално бил разрешен за предмет поврзан со бизнисменот Сеад Кочан, но посочи дека не бил разрешен на истата седница кога биле разрешени уште двајца судии, туку подоцна, откако јавно изразил став дека нема да гласа за потврдување на казната за Јанкуловска.„Не е директно до Судски совет. Додека некој не им каже, тие не постапуваат. Мора да им каже некој“, изјави Катевеновски, алудирајќи дека информацијата за неговиот став била пренесена надвор од салата каде што се водела расправата. Тој рече дека нема материјален доказ, но дека знае кое лице ја пренело информацијата.Според неговите зборови, станувало збор за судија кој имал амбиции да стане претседател на суд и кој, како што рече, бил близок до СДСМ.„Не доби награда, го зафркнаа“, додаде Катевеновски. На прашањето дали информацијата ја пренел судијата Џемаили Саити, тој одговори со „можеби“, без дополнително појаснување.Во емисијата, Катевеновски говореше и за предметот „Грчец“, за одлуките поврзани со настаните од 27 април, како и за постапката во случај во кој припадник на ЕБР беше осуден на 11 години затвор, изнесувајќи детали за текот на судската процедура и начинот на одлучување.Нечуени детали и непоставени прашања за правораздавањето:

Македонија | пред 1 месец

1 мес.

Тренчева-Боте: Дали институциите ја препознаваат силата на ноќната економија?

Креаторката на музичката платформа „Терапија“, Слободанка Тренчева-Боте, отвори јавно прашање дали институциите во земјава ја разбираат суштинската улога и потенцијалот на ноќната економија како дел од урбаниот и економскиот развој.Со долгогодишно искуство во ноќниот живот и културната сцена, таа посочува дека додека светските метрополи креираат стратегии околу ноќната култура и ја третираат како важен сегмент од урбаната политика, кај нас, како што наведува, борбата сè уште се води на терен, без системска поддршка и визија.Преку платформата „Терапија“, иницијативата има за цел да го премости јазот меѓу ентузијастите за ноќен живот, креаторите, индустриските мрежи и владините институции. Намерата, како што истакнува Тренчева-Боте, е да се изградат функционални врски што ќе овозможат посилен и одржлив екосистем на ноќната сцена.Според неа, ноќниот живот не треба да се третира исклучиво како забава, туку како простор за културна продукција, иновации и економски раст. Целта е да се инспирираат нови пристапи во урбаната политика и ноќната економија да се издигне како фактор што придонесува за социјална кохезија и економска одржливост.Со оваа иницијатива, прашањето за ноќната култура се поставува во поширок контекст – како дел од развојната стратегија на градовите, а не како маргинален сегмент што се регулира само преку рестрикции.

Коментари | пред 1 месец

1 мес.

(Видео) Функционери од Владата на СДСМ осомничени за преносот на марихуаната од Македонија кон Србија

Функционери од Владата на СДСМ се опфатени во истрагата како учесници во преносот на марихуаната од Македонија кон Србија, а откако беа фатени 4 тони. Ова го потврди премиерот Христијан Мицкоски кој одби да соопшти детали во интерес на истрагата.„Во интерес на истрагата не би одел чекор понапред. Тоа што го имав да го кажам за овој случај го кажав. Има функционери, но од претходната Влада, има фирма сопственост на поранешен претседател на СДСМ во Ново село, односно негов син“, рече Мицкоски.Постапувајќи по поднесена кривична пријава, јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против шест лица, за кои постои основано сомнение дека сториле кривично дело „Неовластено изработување и пуштање во промет на наркотична дрога, психотропни супстанции и прекурсори“.Истражната постапка се темели на докази обезбедени врз основа на документација доставена од Министерството за внатрешни работи, како и од документација од оформен предмет на Јавното обвинителство за организиран криминал на Република Србија добиена преку меѓународна правна помош.

Македонија | пред 1 месец

1 мес.

Пожар во Трговскиот центар во Кочани, станарите избегнаа поголема трагедија оти дистрибутер видел дека гори, сведочи Крстевски

Поранешниот вршител на должност градоначалник на Кочани, Венко Крстевски, информираше дека денеска во станбено-деловниот комплекс Трговски центар, станбен блок А со 96 станови, избувнал пожар од угостителски објект, при што станарите поминале со зачадени домови и, како што наведе, огромен стрес.Според неговата објава, пожарот не се проширил благодарение на навремената интервенција на Територијалната противпожарна единица, а клучен бил и фактот што дистрибутер на стока го забележал огнот во кујната, која, како што тврди Крстевски, се наоѓа во посебен објект изграден незаконски. Во моментот на избувнување на пожарот, во кујната немало присутен персонал.Крстевски посочува дека ова не е прв ваков случај и дека во минатото имало слични инциденти во истиот објект, при што, како што наведува, повторно имало среќа што пожарите не предизвикале поголеми последици.Тој упати последен апел до кочанското обвинителство, наведувајќи дека уште на 10 јуни поднел кривична пријава поради, како што ги нарече, незаконски активности на угостителски објекти во рамки на станбениот комплекс.Од надлежните институции засега нема официјална информација за пожарот.

Македонија | пред 1 месец

1 мес.

(Видео) Според ВМРО-ДПМНЕ, сведоштвото на Катевеновски потврдува политички притисоци во правосудството

Членот на Централниот комитет на ВМРО-ДПМНЕ, Валентин Манасиевски, изјави дека за време на владеењето на СДС и ДУИ судии биле разрешувани во рок од еден ден под партиски притисоци.Тој се повика на сведоштвото на поранешниот судија на Врховниот суд, Ристо Катевеновски, кој тврди дека бил разрешен откако одбил да даде позитивно мислење во судски предмет поврзан со поранешната министерка за внатрешни работи Гордана Јанкуловска.Според наводите што ги изнесе Манасиевски, Катевеновски на судско рочиште посочил дека нема да даде позитивно мислење во конкретниот предмет и дека ќе разговара со своите колеги за понатамошното постапување. Само еден ден подоцна, како што тврди, Судскиот совет свикал итна седница и донел одлука за негово разрешување.Манасиевски истакна дека, според сведоштвото на Катевеновски, разрешувањето било резултат на притисоци од тогашните владејачки партии СДС и ДУИ, односно од нивните лидери Зоран Заев и Али Ахмети.Од ВМРО-ДПМНЕ оценуваат дека ваквите наводи претставуваат доказ за селективна правда и политичко влијание врз правосудниот систем во тој период. Според партијата, сведоштвата потврдуваат дека институциите биле партизирани и дека постоеле притисоци врз судии и обвинители.Манасиевски порача дека, како што рече, вакви практики повеќе нема да бидат дозволени и дека е неопходно утврдување одговорност за сите случаи на евентуални политички притисоци врз правосудството.

Македонија | пред 1 месец

1 мес.

Франција ќе ги анализира новите царини на Трамп, најавен принцип на реципроцитет

Францускиот претседател Емануел Макрон изјави дека одлуката на Врховен суд на САД за трговските царини воведени од американскиот претседател Доналд Трамп претставува потсетник за значењето на поделбата на власта и владеењето на правото во демократските системи.Говорејќи на годишниот земјоделски саем во Париз, Макрон посочи дека „не е лошо да се има Врховен суд и, соодветно на тоа, владеење на правото“, алудирајќи на пресудата со која се оценува дека дел од царините воведени врз основа на закон за економска вонредна состојба се незаконски.Францускиот претседател нагласи дека е важно во демократиите да постои рамнотежа меѓу институциите и механизми за контрола на извршната власт. Во однос на новите глобални царини од 10 отсто што ги најави администрацијата на Трамп, Макрон рече дека Франција внимателно ќе ги анализира последиците и ќе се приспособи на новонастанатата ситуација.Тој додаде дека Франција има интерес да продолжи со извозот на своите производи, меѓу кои земјоделски производи, луксузна и модна стока, како и делови за воздухопловната индустрија. Според него, најправедниот пристап во вакви околности е принципот на реципроцитет, наместо прифаќање на еднострани одлуки.Со ваквите ставови, Париз сигнализира дека ќе бара балансиран и правно заснован одговор на новите трговски мерки, во рамки на европските и меѓународните механизми.

Свет | пред 1 месец

1 мес.

(Фото) Доктор Ненад Лазаров предупредува на можна интернет-измама со фотографии од бебе

Доктор Ненад Лазаров предупреди на можна интернет-измама поврзана со објава за донации за наводно болно бебе, оценувајќи дека станува збор за класичен пример на злоупотреба на емотивна содржина за финансиска корист.Во јавна објава на социјалните мрежи, Лазаров посочи дека не може да поверува оти некој би бил „толку алчен“ јавно да објави лична банкарска сметка, алудирајќи дека фотографиите и повикот за донации најверојатно се преземени од интернет без дозвола.Во објавата што кружи на социјалните мрежи се наведува дека бебето било оперирано и дека му се потребни скапи лекови, при што се повикуваат граѓаните да донираат средства. Доктор Лазаров тврди дека фотографиите се преземени од интернет и побара надлежните институции, пред сè Министерството за внатрешни работи, да го испитаат случајот.„Од повеќе бебиња слики се крадени од интернет, МВР апелирам ова ве молам!“, наведува Лазаров во својата реакција.Случајот повторно ја отвора темата за злоупотреба на фотографии од деца и лажни хуманитарни апели на социјалните мрежи, како и потребата од внимателност при донирање средства преку непроверени извори.

Македонија | пред 1 месец

1 мес.

Познато кој е најкрадениот автомобил во Британија: таму се краде автомобил на секои десет години

Во текот на 2025 година во Велика Британија биле пријавени вкупно 54.830 кражби на возила, што претставува намалување од 11 отсто во споредба со претходната година, покажуваат податоците што ги објави специјализираниот портал „Вот Кар?“.Просечно, во земјата се крадат околу 150 возила дневно, односно едно на секои десет минути. И покрај падот на вкупната бројка, одредени модели остануваат особено атрактивни за крадците.На врвот на листата најчесто крадени автомобили убедливо се наоѓа Ford Fiesta, од која во 2025 година биле украдени 3.511 примероци. Овој модел со години важи за еден од најпопуларните во Велика Британија, што делумно ја објаснува и неговата висока застапеност во статистиката на кражби.На второто место е Volkswagen Golf со 1.625 кражби, додека трет е Ford Focus со 1.474 украдени возила. Во првите десет се вклучени и Toyota RAV4 - 1.319 кражби BMW 3 Series - 1.249 кражби Nissan Juke - 1.200 кражби Toyota C-HR - 967 кражби Lexus NX - 951 кражби Range Rover Evoque - 895 кражби Vauxhall Corsa - 874 кражби.Кога станува збор за производители со најмногу модели во првите десет, доминираат Тојота и нејзиниот сестрински бренд Лексус, со вкупно три претставници на листата.Иако бројот на кражби е во опаѓање, статистиката покажува дека популарните и широко распространети модели остануваат најчеста цел, што отвора прашања за дополнително унапредување на системите за заштита и безбедност на возилата.

Свет | пред 1 месец

1 мес.

Хонг Конг: Новите царини на Трамп се можност за нашата економија

Одлуката на американскиот претседател Доналд Трамп за воведување нова царина од 10 отсто на увозот во САД ќе има позитивен ефект врз позицијата на Хонг Конг како регионален трговски центар, изјави висок градски функционер.Секретарот за финансиски услуги и трезор на Хонг Конг, Кристофер Хуи, оцени дека актуелната царинска политика во САД претставува „фијаско“, но истовремено отвора простор за истакнување на специфичните трговски предности на градот. Тој посочи дека новата глобална царина ја нагласува улогата на Хонг Конг како флексибилна и конкурентна економија во услови на променлива меѓународна трговска средина.Во меѓувреме, властите на Тајван соопштија дека внимателно ја следат одлуката на Врховен суд на САД во врска со тарифите, како и спроведувањето на фиксната глобална царина од 10 отсто што ја воведе администрацијата на Трамп.Од кабинетот на островската влада наведоа дека првичниот ефект врз Тајван засега изгледа ограничен, но нагласија дека ќе продолжат со внимателно следење на состојбата и со блиска комуникација со американските власти. Целта, како што посочија, е навремено разбирање на конкретните механизми на спроведување на мерките и соодветно приспособување на економската политика.Реакциите од Азија укажуваат на внимателна проценка на последиците од новите американски трговски мерки, во време кога глобалната економија се соочува со зголемена неизвесност и редефинирање на трговските односи.

Свет | пред 1 месец

1 мес.

490506140_1221633092883168_4859003472972009158_n

Србија ги повика граѓаните да го напуштат Иран, откако тоа го направија Германија и Шведска

Министерството за надворешни работи на Србија препорача сите српски државјани кои се наоѓаат во Иран што поскоро да ја напуштат земјата, поради зголемените тензии и ризикот од влошување на безбедносната состојба во регионот.Претходно, американскиот претседател Доналд Трамп изјави дека размислува за ограничен воен удар со цел да изврши притисок врз Техеран да прифати нов нуклеарен договор. Тој нагласи дека и натаму е посветен на дипломатско решение, но предупреди дека ќе ја искористи воената сила доколку разговорите не донесат резултат.Според извештаи на американски медиуми, стотици американски војници биле евакуирани од базата Ал Удеид во Катар, како мерка на претпазливост во пресрет на можен напад врз Иран. Слични активности биле спроведени и во Бахреин, каде што е стационирана Петтата флота на американската морнарица.Во меѓувреме, и властите на Германија и Шведска ги повикаа своите државјани да го напуштат Иран и препорачаа да не се патува во таа земја поради растечките безбедносни ризици.Регионалната безбедносна состојба останува неизвесна, додека дипломатските канали се обидуваат да спречат натамошна ескалација на кризата.

Свет | пред 1 месец

1 мес.

Трамп воведе глобална царина од 10 отсто, мерките стапуваат на сила следната недела

Американскиот претседател Доналд Трамп соопшти дека потпишал извршни наредби за воведување глобална царина од 10 отсто на увоз од сите земји, која, како што наведе, ќе стапи на сила речиси веднаш.Трамп објави дека документите ги потпишал во Овалната соба, нагласувајќи дека мерката претставува значаен чекор во економската политика на неговата администрација. Новите царини ќе започнат да се применуваат од 24 февруари и се засноваат на член 122 од Законот за трговија од 1974 година.Одлуката следува откако Врховен суд на САД ги поништи претходните сеопфатни царини воведени врз основа на Законот за меѓународни вонредни економски овластувања од 1977 година, оценувајќи дека тој правен основ не може да се користи за ваков вид трговски мерки. Белата куќа соопшти дека дел од претходните тарифни мерки ќе бидат укинати, но новите ќе ја заменат нивната суштина со поинаква правна рамка.Според новите наредби, продолжуваат одредени изземања, меѓу кои за воздухопловни производи, патнички возила и дел од лесните товарни возила, како и за одредени производи од Мексико и Канада во рамки на трговскиот договор со САД. Исклучоци се предвидени и за фармацевтски производи, критични минерали и одредени земјоделски артикли.Американскиот министер за финансии Скот Бесент изјави дека новите царини од 10 отсто, како и можните дополнителни мерки според член 301 за нефер трговски практики и член 232 за национална безбедност, ќе резултираат со речиси непроменети приходи од царини во 2026 година. Тој додаде дека администрацијата располага со алтернативни механизми за заштита на економските интереси на земјата.Член 122 овозможува воведување царини до 15 отсто во период до 150 дена без спроведување истрага, со образложение дека постои „голем и сериозен“ проблем во платниот биланс. За продолжување на мерките по истекот на тој рок потребно е одобрување од Конгресот.Трамп најави и нови истраги насочени кон одделни земји врз основа на член 301 од Законот за трговија, со цел справување со нефер трговски практики. Истраги веќе се покренати против Кина и Бразил, а можни цели се и други големи трговски партнери, вклучително и Виетнам и Канада.Со новите потези, администрацијата настојува да ја зачува трговската стратегија и преговарачката позиција, и покрај ограничувањата поставени со судската одлука.

Свет | пред 1 месец

1 мес.

СДСМ: Пет тони дрога минале граница без контрола, институциите мора да одговорат

Социјалдемократскиот сојуз на Македонија обвини дека последните информации од Обвинителството за случајот со запленети пет тони дрога потврдуваат сериозни пропусти во безбедносниот систем, посочувајќи дека недозволената стока „повеќекратно“ ја поминала македонската граница без да биде откриена.Според наводите на партијата, дрогата претходно била транспортирана во поголеми количини со товарни и патнички возила од објект на правно лице во Скопје до локација во атарот на Свети Николе, поточно во селото Сарамзалино, каде што бил извршен претовар. Потоа било организирано и нејзиното изнесување од државата.Од СДСМ оценуваат дека фактот што толкава количина недозволена стока се движела низ повеќе делови од земјата без да биде запрена отвора прашања за функционирањето на контролите на граничните премини и за улогата на Министерството за внатрешни работи. Опозицијата јавно прашува каде биле институциите и системите за видеонадзор додека се одвивал транспортот.Во реакцијата се споменува и изјава на министерот за внатрешни работи Панче Тошковски, кој во телевизиско гостување посочил дека прашањето не е како дрогата излегла од Македонија, туку како влегла во Србија. Од СДСМ велат дека јавноста очекува одговор и за тоа кој дозволил недозволената пратка да ја напушти државата.Партијата наведува дека во Србија е уапсен функционер поврзан со владејачката партија таму, а случајот, според нив, отвора сомнежи за можни врски и на домашна политичка сцена.СДСМ бара целосна и транспарентна истрага, со утврдување индивидуална одговорност за сите инволвирани, оценувајќи дека станува збор за најголем нарко-скандал досега, кој мора да биде расчистен до крај.

Македонија | пред 1 месец

1 мес.

Иран се подготвува за војна, покажале сателитски снимки

Додека САД го зголемуваат военото присуство на Блискиот Исток, Иран презема чекори што укажуваат на подготвеност за евентуален конфликт, вклучително и дополнително утврдување на нуклеарните постројки и обнова на производството на ракети.Ирански и американски претставници неделава одржаа индиректни разговори во Женева, кои траеја повеќе од три часа, но без конкретен напредок. И покрај дипломатските обиди, во Белата куќа било разгледувано сценарио според кое американската војска би можела да биде подготвена за напад веќе во наредните денови, по засиленото распоредување на воздушни и поморски сили во регионот. Американскиот претседател Доналд Трамп изјави дека размислува за ограничен воен удар со цел да изврши притисок врз Техеран да постигне договор, без да наведе дополнителни детали.По минатогодишниот израелски напад врз иранските нуклеарни и ракетни капацитети, сателитски снимки покажуваат дека Техеран ги обновува дел од оштетените бази. Во ракетната база „Имам Али“ кај Хорамабад, од повеќе уништени структури, неколку се обновени, а дел се во фаза на реконструкција. Обновени се и писти и поддржувачка инфраструктура во други воени комплекси, како и постројката за производство на ракети на цврсто гориво во Шахруд, која според анализи можеби функционира со поголем капацитет отколку пред конфликтот.Паралелно со тоа, Иран ги зајакнува и клучните нуклеарни локации. Снимки од подземниот комплекс во близина на Натанз покажуваат нови бетонски засилувања на влезовите во тунелите и дополнително закопување на објектите. Според меѓународни безбедносни аналитичари, некои од овие локации наскоро би можеле да станат исклучително тешко достапни за воздушни напади.Во внатрешнополитички план, врховниот лидер Али Хамнеи го засили влијанието на Советот за национална безбедност и формираше ново тело за управување во услови на воена закана. Истовремено, безбедносните структури спроведоа масовни апсења на опозициски фигури и демонстранти, во услови на зголемена репресија и страв од внатрешна дестабилизација.Воените вежби во Персискиот Залив дополнително ја зголемија напнатоста. Иранските Револуционерни гарди привремено затворија делови од Ормускиот теснец, низ кој минува значителен дел од светската нафта, додека САД распоредија дополнителни носачи на авиони во регионот. Во неколку наврати беа регистрирани блиски инциденти меѓу ирански и американски пловни објекти.Аналитичарите оценуваат дека Техеран испраќа порака дека евентуален конфликт би имал висока цена, додека Вашингтон сигнализира подготвеност за брза акција доколку преговорите пропаднат. Во вакви околности, Блискиот Исток повторно се наоѓа на раб на сериозна ескалација со можни глобални последици.

Свет | пред 1 месец

1 мес.

sun-setting-silhouette-electricity-pylons

„Иднината е во наши раце, или ќе бидеме во политичко мочуриште“, Мицкоски најави регионална иницијатива за 4 теравати нови капацитети

Развиваме иницијатива што ќе ги обедини земјите од Западен Балкан со цел да привлечеме 0,01 отсто од планираните 40 илјади теравати новоинсталирани енергетски капацитети, изјави премиерот Христијан Мицкоски.Според него, тоа би значело привлекување на четири теравати, односно нови производни капацитети што, како што рече, би донеле околу четири милијарди долари инвестиции во регионот во наредните десет години.„Ова зависи од нас, дали сами ќе си ја кроиме заедно иднината или ќе бидеме во политичко мочуриште“, истакна Мицкоски, додавајќи дека ваквиот проект би имал потенцијал да донесе значаен економски импулс за шесте земји од регионот.Премиерот оцени дека иницијативата претставува можност за стратешко позиционирање на Западен Балкан во рамки на глобалните енергетски и инвестициски трендови.

Македонија | пред 1 месец

1 мес.

ЕУ заговара „прва и втора лига“ на земји членки, а еден од говорниците таму рече „тоа што и го правите на Македонија е криминал“, посочи Мицкоски

Македонија е жртва на булинг од земји членки кои го условуваат евроинтегративниот процес, изјави премиерот Христијан Мицкоски, посочувајќи дека земјата не се вреднува според напредокот, туку според политички услови.„Не се цени според напредок, туку тоа дали ќе го промениме Уставот, банкнотите, знамето итн. И колку повеќе тоа го игнорираме, толку потежок ќе биде тој пат и толку повеќе препреки ќе имаме. Јас сум свесен дека можеби дел од политичките гарнитури од минатото имале добри политички намери, но има и такви кои од неуспехот да се справат со криминалот и корупцијата, неуспехот кој го имаа дома, беа донесени до ѕид и побараа бел лист хартија и рекоа дајте да потпишеме сѐ што треба, за да останеме на власт“ рече премиерот Мицкоски.Во однос на актуелните политички состојби, премиерот упати критики кон СДСМ, обвинувајќи ја опозициската партија за ширење лажни вести и оценувајќи дека е во политичка криза.„Од СДСМ денеска гледаме гранапче кое се занимава со лажни вести, и е на прагот на истчезнување. Затоа оваа генерација треба да биде свесна за овој предизвик и да биде свесна за уште еден предизвик, а тоа е последната иницијатива која се зборува во Брисел“, рече тој.Мицкоски се осврна и на, како што рече, иницијативата што се разгледува во Брисел за „прва и втора лига“ земји членки на Европската Унија, предупредувајќи дека ваквиот концепт отвора прашања за идниот статус на земјите кандидатки.„Имаше многу влијателни членови на Влади, и еден од говорниците рече 'Тоа што и го правиме на Македонија е криминал'. И тоа нема никаква врска со вредностите. Затоа и добро треба да размислиме за ова прва и втора лига земји членки, со многу заштитни механизми и да донесеме одлука што мислиме и како мислиме. Треба да сме свесни со сите овие предизвици во годините што следат. Ако живееме во фантазија, нема да можеме да најдеме соодветно решение. Ова се историски моменти во политиката а тие знаат да траат со децении, а некогаш и векови. Затоа народот треба да е трпелив и мудар. А за еден народ нема полошо од корумпирани лидери на таа нација. И тие се тие кои нѐ доведоа во оваа ситуација. Наместо да гледаме во иднината, ние толкуваме чии биле учителите и нивните ученици, а меѓу нас нема некој да просведочи која била вистината“, рече Мицкоски.

Македонија | пред 1 месец