Најнови вести

2 ден.

(Видео) Се урна хеликоптер во Тајланд, има повеќе повредени лица

Во округот Муанг, во провинцијата Самут Пракан, во централниот дел на Тајланд, утринава се урна хеликоптер, а според првичните информации, има повеќе повредени лица.Локалниот Центар за итни интервенции примил пријава околу 9:10 часот за пад на хеликоптер со непознат сопственик во областа зад поштенското биро во административната единица Тамбон Тај Бан, пренесува дневникот „Бангкок пост“.Според првите извештаи од местото на несреќата, потврдено е дека има повеќе повредени, но засега не е познат точниот број ниту тежината на нивните повреди.Екипи на итната медицинска помош веднаш се упатиле на терен за да им укажат помош на повредените и да ги пренесат во блиските болници. Спасувачките служби и надлежните власти го обезбедиле подрачјето, а во тек е истрага за утврдување на сопственикот на леталото и причините за несреќата.

Свет | пред 2 дена

2 ден.

272643859_231847399072949_1916634926903834340_n

СДСМ: На Светскиот ден на слободата на медиумите – Македонија заслужува вистински слободни медиуми, а не Орбанова пропагандна машина

Денес го одбележуваме Светскиот ден на слободата на медиумите. За жал, во Македонија овој ден не го славиме туку го преживуваме, велат од опозициската СДСМ.„Над 40% од медиумскиот простор е под директна контрола на Орбановата мрежа во служба на Мицкоски и ВМРО-ОКГ.Дополнително владата врши притисок врз независните медиуми.Со приватниот Мосад (Black Cube) се следат и се фабрикуваат медиумски афери против политичките противници.Повампирени лица кои Мицкоски ги оживеа од периодот на Груевски, како Ивона Талевска и нејзиниот партнер Драган Павловиќ Латас, секојдневно сеат омраза, пласираат болни текстови и навреди кон опозицијата.Не е тоа слобода на медиуми туку контрола на медиуми од страна на криминална организација.СДСМ ја поздравува работата на сите независни новинарски пера и секој медиум кој работи професионално и чесно.Ние сакаме и се бориме за денот кога во Македонија нема да има ниту еден медиум под контрола на криминална група, кога никој од власта нема да се меша во уредувачката политика, кога новинарите ќе можат слободно да известуваат без страв од притисоци, закани и фабрикувани афери.Слободата на медиумите не е привилегија туку темел на демократијата.Наскоро доаѓа времето на вистината“, велат од СДСМ.

Македонија | пред 2 дена

2 ден.

Најладно утрово на Попова Шапка: -2 степени

Утрово најниска температура во земјава е измерена на Попова Шапка, каде живата во термометарот се спуштила до -2 степени Целзиусови. Нула степени се измерени во Берово, додека 1 степен е регистриран во Крушево, Маврови Анови и Лазарополе.Во останатите делови од земјата утринските температури се движеле од 3 до 8 степени, при што најтопло било во Скопје-Зајчев Рид, Велес, Кавадарци и Гевгелија.Во изминатите 24 часа најмногу врнежи се измерени во Крива Паланка (4 l/m²), потоа во Пожаране (3 l/m²), како и во Крушево и Маврови Анови (по 2 l/m²).Времето денеска ќе биде променливо облачно, со повремен слаб дожд претпладне, особено во западните делови. Попладне се очекува намалување на облачноста. Ќе дува умерен, повремено засилен северен ветер, кој на одредени места ќе достигнува и над 60 km/h. Максималната температура ќе се движи од 13 до 21 степен.Во Скопје, времето ќе биде променливо облачно со услови за слаб дожд во претпладневните часови. Во текот на денот ќе дојде до разведрување, а максималната температура ќе достигне до 19 степени.

Македонија | пред 2 дена

2 ден.

Сметките во Охрид растат до 50%: Поскапуваат услуги и такси-превоз

Граѓаните на Охрид во наредниот период ќе се соочат со значително повисоки сметки за дел од основните комунални услуги, откако Советот донесе одлуки за зголемување на цените од 30 до 50 проценти.Со новите тарифи, поскапуваат услугите на јавните претпријатија „Нискоградба“, „Билјанини Извори“, „Градски гробишта“ и „Охридски Комуналец“. Паркингот ќе биде поскап за околу 30 проценти, гробарината за дури 50 проценти, додека дел од комуналните услуги ќе бележат раст од околу 30 проценти.Од локалната власт и раководствата на претпријатијата велат дека корекцијата е неизбежна поради зголемените трошоци за гориво, материјали и плати, оценувајќи ја мерката како неопходна за одржување на нивното функционирање.Од друга страна, опозициската советничка група реагира дека одлуките доаѓаат во време на висока инфлација и претставуваат дополнителен товар за граѓаните, особено бидејќи станува збор за основни режиски трошоци.Паралелно, донесени се и нови цени за такси-превозот, кои ќе стапат во сила од 6 мај. Стартот ќе изнесува 50 денари, а цената по километар исто така 50 денари, додека ноќната тарифа ќе биде 100 денари старт.Надлежните најавуваат и мерки за поголема транспарентност, како задолжително баждарење на таксиметрите и јавно истакнување на ценовниците, со цел спречување злоупотреби.Со овие одлуки, градот влегува во период на повисоки цени, додека јавноста останува поделена меѓу аргументите за економска оправданост и загриженоста за животниот стандард.

Македонија | пред 2 дена

2 ден.

Трагедија на Скадарското Езеро: Превртен чамец однесе живот, потрага по исчезнато лице

Маж на возраст од околу 40 години загина во саботата навечер во несреќа на Скадарското Езеро, откако се превртел чамец во Плавничкиот канал, јавуваат црногорските медиуми.Според информациите од локалната полициска управа, уште едно лице кое било во чамецот е повредено, додека по трето лице сè уште се трага.„Станува збор за несреќен случај при превртување на чамец. Според досегашните податоци, едно лице го загубило животот, едно се здобило со повреди и се јавило во Ургентниот центар при Клиничко-болничкиот центар, додека по третото лице се трага“, соопштија од полицијата.Надлежните посочуваат дека увидот е во тек, а причините за несреќата засега не се утврдени. За случајот е известен и надлежен обвинител.

Балкан | пред 2 дена

2 ден.

Нов адут на фронтот: Украина лансира дрон со двојно поголем дострел

Една од најголемите украински компании за одбранбена технологија, General Cherry, го претстави својот прв ударен дрон со среден дострел, наречен „Хмаринка“, кој, според наводите, може да носи седумпати поголем товар и да има двојно поголем дострел од стандардните ФПВ-дронови.Иако од компанијата го претставуваат како значаен исчекор, станува збор за технологија која не е целосно нова, бидејќи на украинскиот пазар веќе постојат слични решенија. „Хмаринка“ е инспирирана од рускиот дрон „Молнија“, кој се појави на бојното поле во 2024 година и брзо стана сериозна закана за украинските сили.Овие летала се релативно лесни, чинат околу 1.000 долари и можат да носат од пет до осум килограми експлозив на оддалеченост до 50 километри. Нивната способност да пренесуваат повеќекратно поголем товар од класичните квадкоптери и да погодуваат цели во подлабока позадина значително го промени начинот на водење на борбите.Клучна предност на ваквите дронови е нивната отпорност на електронско попречување. Тие работат на широк спектар на фреквенции, што го отежнува нивното неутрализирање со системи за електронско војување. Украинските експерти посочуваат дека единствена ефикасна противмерка е откривање на сигналот од контролерот за да се утврди точната фреквенција.Украинската верзија на вакви дронови првично се развивала преку обратен инженеринг на запленети руски летала, а „Хмаринка“ е дизајнирана за брзо и евтино масовно производство – фактор што се смета за пресуден во современите конфликти.Дронот има распон на крилја од речиси два метра, максимален дострел до 50 километри и може да лета околу еден час, достигнувајќи брзина до 140 километри на час. Компанијата најави дека првите 150 примероци ќе бидат испорачани бесплатно на украинските сили за тестирање во реални услови.Основана во 2023 година, General Cherry веќе се позиционира како значаен производител на беспилотни летала, со амбиција да го прошири производството и надвор од Украина.

Свет | пред 2 дена

2 ден.

Три години по „Рибникар“: момчето е во установа, постапките против родителите продолжуваат

Денес, 3 мај 2026 година, се навршуваат три години од масовното убиство во Основното училиште „Владислав Рибникар“ во Белград – настан што ја потресе Србија и регионот и остави трајни последици врз чувството на безбедност во училиштата.Според информациите, тогаш тринаесетгодишниот ученик К.К. во училиштето употребил два пиштоли кои му припаѓале на неговиот татко и усмртил девет ученици и училишен чувар, а ранил уште пет ученици и наставничка по историја. Осум ученици и чуварот починале на самото место, додека едно девојче подоцна им подлегнало на повредите.И по три години, К.К. – кој во моментот на злосторството не бил кривично одговорен бидејќи немал наполнети 14 години – се наоѓа во психијатриска здравствена установа.Судењето и правните постапки против неговите родители, Владимир и Милјана Кецмановиќ, продолжуваат. Вишиот суд во Белград кон крајот на 2024 година изрече првостепена пресуда, но Апелациониот суд ја укина и наложи повторување на постапката. Таткото од 3 мај 2023 година е во притвор, додека мајката се брани од слобода.Покрај кривичниот предмет, водени се и повеќе граѓански постапки по тужби на повредените и семејствата на убиените. Првостепено, судот ги задолжил родителите и училиштето да исплатат над 411 милиони динари отштета, а се очекува Апелациониот суд да донесе конечни одлуки.Во меѓувреме, државата воведе и официјално одбележување на датумите на сеќавање: на 19 септември 2024 година беше донесена одлука 3 и 4 мај да бидат Денови на сеќавање на жртвите од масовните убиства – во „Рибникар“, како и во Орашје и Дубона кај Младеновац, каде што следниот ден се случи друго масовно убиство.

Свет | пред 2 дена

2 ден.

Приведен и малолетник: 14 возачи приведени за безобѕирно возење, седум биле под алкохол - уште се вози без возачка

Полициските служби во изминатото деноноќие лишиле од слобода 14 лица на територија на државата поради безобѕирно управување возило, при што дел од нив биле под дејство на алкохол, а меѓу приведените има и малолетник без возачка дозвола.Според податоците, пет лица управувале возило без возачка дозвола, од кои едно е малолетно, двајца возеле и покрај активна забрана, додека седуммина биле фатени како управуваат возило под дејство на алкохол.Прекршоците се регистрирани во повеќе градови низ државата – Скопје, Велес, Демир Хисар, Охрид и Тетово, додека алкохолизирани возачи биле затекнати во Свети Николе, Кочани, Кавадарци, Струмица, Гевгелија и Прилеп.Полицијата најави дека по целосно документирање на случаите ќе бидат поднесени соодветни кривични пријави.Паралелно, во Скопје била спроведена засилена акциска контрола насочена кон возачи на мотоцикли, велосипеди со помошен мотор, трицикли и четирицикли, при што биле санкционирани 113 возачи.Од нив, 45 возачи биле казнети за неносење заштитна кацига, 17 за управување без соодветна потврда, а четворица за возење со несоодветна категорија. Евидентирани се и прекршоци за нерегистрирани возила, неносење сообраќајна дозвола, како и движење по несоодветна површина.За време на контролата, еден возач бил лишен од слобода поради безобѕирно управување, согласно член 297-а од Кривичниот законик.Од МВР апелираат до граѓаните строго да ги почитуваат сообраќајните правила, нагласувајќи дека контролите ќе продолжат и во наредниот период со цел зголемување на безбедноста на патиштата.

Македонија | пред 2 дена

2 ден.

Европа пред поголем ризик од повлекувањето на американските војници: предупредуваат аналитичари

Иако најавеното повлекување на 5.000 американски војници од Германија се оценува како симболично, аналитичарите предупредуваат дека Европа се соочува со далеку посериозен проблем – продлабочен трансатлантски јаз што може да ја остави економски и безбедносно ранлива.Според проценките, вистинската закана не е бројот на повлечени војници, туку одлуката на САД да се откажат од распоредување на клучни ракетни системи во Германија, кои требаше да служат како одвраќање од потенцијални закани, особено во контекст на војната во Украина и односите со Русија.„Ова е многу поголем проблем од симболичното намалување на бројот на војници“, предупредуваат безбедносни експерти.Германија останува клучен центар за американското воено присуство во Европа, со околу 36.000 војници, дел од пошироката мрежа од 85.000 американски војници на континентот. Но, голем дел од тие сили се користат за глобални операции, а не директно за одбрана на Европа.Дополнителна загриженост предизвикува и фактот што Европа сè уште нема сопствени капацитети за напредно одвраќање, како што се далекуметни и хиперсонични ракетни системи.Паралелно со безбедносниот аспект, Европа се соочува и со економски притисок. Трговските мерки на САД, вклучително и зголемените царини за европските автомобили, како и растот на цените на енергенсите поради конфликтот со Иран, сериозно ја погодуваат германската економија.Извозот кон САД, кој беше клучен за надоместување на загубите на други пазари, веќе бележи пад, додека деловната доверба е на најниско ниво во последните шест години.Во исто време, Европа се обидува да го засили сопственото вооружување, но процесот е бавен и во голема мера зависен од американска технологија и опрема.„Сè ова заедно го зголемува безбедносниот ризик за Европа“, оценуваат аналитичарите.Заклучокот е јасен: повлекувањето на дел од американските војници е само сигнал. Вистинскиот предизвик за Европа е како да ја пополни безбедносната празнина и да се справи со економските последици од сè понапнатите односи со Вашингтон.

Свет | пред 2 дена

2 ден.

Трамп испраќа оружје вредно 8 милијарди долари на Блискиот Исток: „Ова е вонредна состојба“

Администрацијата на американскиот претседател Доналд Трамп забрза испорака на оружје вредно околу осум милијарди долари за сојузниците на Блискиот Исток, повикувајќи се на „вонредна состојба“ поради безбедносната ситуација во регионот.Според информациите, станува збор за воена опрема наменета за Израел, Катар, Обединетите Арапски Емирати и Кувајт, која вклучува системи за противвоздушна одбрана, како и ракети со ласерско наведување.За Катар, меѓу другото, се испорачуваат и проектили за американскиот систем „Патриот“, чии резерви, според анализи, се значително намалени по неколкунеделниот конфликт со Иран.Клучниот момент во одлуката е што американскиот државен секретар Марко Рубио формално утврдил дека постои „вонредна состојба“ што бара итна продажба на оружје, со што администрацијата ја заобиколила стандардната процедура и одобрувањето од Конгресот.Ова не е прв ваков потег. Веќе во март САД одобрија итна испорака на 12.000 бомби за Израел без редовна процедура, како и дополнителни пакети оружје за Емиратите, Кувајт и Јордан.Засилените испораки доаѓаат во услови на зголемени тензии по војната со Иран, при што Вашингтон паралелно води дипломатски притисок, но и ја зајакнува воената подготвеност на своите партнери во регионот.Со ваквиот пристап, САД испраќаат јасен сигнал дека, покрај дипломатските канали, остануваат фокусирани на воена стабилизација на Блискиот Исток.

Свет | пред 2 дена

2 ден.

Трамп најави: Драстично ќе го намали бројот на американски војници во Европа

Американскиот претседател Доналд Трамп најави дека ќе го намали бројот на американски војници во Европа, истовремено оставајќи отворена можност за нови воени акции против Иран и изразувајќи сомнеж во најновиот мировен предлог од Техеран.„Драстично ќе го намалиме бројот и ќе одиме многу подалеку од 5.000“, изјави Трамп, одговарајќи на прашање за повлекување на трупите од Германија.Изјавата доаѓа во момент кога САД разгледуваат нов ирански предлог од 14 точки, кој, според иранските медиуми, бил доставен преку Пакистан. Сепак, Трамп веднаш изрази скепса.„Не можам да замислам дека ќе биде прифатлив, со оглед на тоа што не платиле доволно висока цена за она што го направиле во последните 47 години“, напиша тој.Иако примирјето во конфликтот меѓу САД, Израел и Иран е во сила од 8 април, тензиите не стивнуваат. Вашингтон јасно стави до знаење дека нема да прифати договор без гаранции дека Иран нема да развива нуклеарно оружје, додека Техеран тврди дека неговата програма е исклучиво мирољубива.Според деталите од предлогот, Иран бара повлекување на американските сили од регионот, укинување на санкциите, деблокада на Ормутскиот теснец, како и ослободување на замрзнатите средства и исплата на отштета.Истовремено, САД предупредија дека компаниите што ќе плаќаат на Иран за безбеден премин низ Ормутскиот теснец може да се соочат со санкции. Овој клучен поморски коридор, низ кој пред конфликтот минуваа околу 20 проценти од светските енергенси, останува под силен притисок, што веќе предизвика раст на цените на нафтата за околу 50 проценти.Трамп не ја исклучи ниту можноста за нова воена интервенција.„Ако се однесуваат лошо... тоа е опција што може да се случи“, рече тој.Со ваквите пораки, Вашингтон испраќа двојна стратегија – отвореност за преговори, но и подготвеност за ескалација, додека глобалната економија внимателно ги следи случувањата околу еден од најважните енергетски коридори во светот.

Свет | пред 2 дена

2 ден.

Ќотекот не воспитува, туку создава насилство - воспитано дете нема потреба од ‘воспитни’ за да научи што е почит, алармира професорката Алексиќ

„Ќотекот не е метод на воспитување, туку извор на насилство.“ Со ваква директна порака професорката по македонски јазик Татјана Алексиќ реагира на сè почестите случаи на агресија кај младите, посочувајќи дека корените најчесто се наоѓаат во семејството.Таа потсетува дека во биографиите на голем број криминалци, ретроспективно се анализираат токму детството и односите со родителите, нагласувајќи дека насилството, било физичко или психолошко, остава трајни последици.„Почитувањето не се изнудува преку страв и закани, туку преку личен пример и многу тивко“, пишува Алексиќ, додавајќи дека децата кои удираат често се деца кои претходно биле изложени на агресија – дома, во градинка или преку содржини што ги гледаат.Според неа, проблемот не е само во родителството, туку и во средината во која растат децата – од агресивни видео игри до насилни содржини што можат да влијаат врз нивното однесување.„Разумно, емотивно стабилно воспитано дете нема потреба од ‘воспитни’ за да научи што е почит“, истакнува таа.Професорката предупредува дека на 16-годишна возраст веќе е доцна за суштинско воспитување, но не и за институционален третман кога системот и семејството потфрлиле.„Најсложениот животен процес е да воспитуваш деца. Единствената повратна инвестиција ни се тие“, наведува Алексиќ.Во пораката испратена по повод 1 Мај, таа подвлекува дека трудот вложен во воспитувањето е највредната работа, но и дека општеството мора да има јасна граница.„Не треба да се тепаат, треба да се почитуваат. Удрете по вашата фрустрација, но не и по најранливите. А за деца насилници – строги закони, без протекции“, порачува таа.Нејзиниот став е јасен: рајот не е место за насилство, а мирот во општеството почнува од домот.

Коментари | пред 2 дена

2 ден.

„Со ножевите во рака тргнаа кон мене“ – вознемирувачко сведоштво од автобус во Скопје

Празничен ден, пикник и детска радост, но за неколку минути сè се претворило во сцена на страв и насилство. Скопјанката Наташа Младеновска сведочи за инцидент во автобус од Водно кон центарот на Скопје, во кој учествувале малолетници, а ситуацијата ескалирала до вадење ножеви.Според нејзиното сведоштво, сè започнало со недоразбирања меѓу деца на возраст од околу 16 години, кои брзо прераснале во провокации и закани. Клучниот момент, како што вели, бил кога дел од нив извадиле ножеви.„Добив повик од ќерка ми. Паника. Плачење. Глас кој се тресе“, раскажува Младеновска, која веднаш тргнала со автомобил за да стигне до местото на настанот.Во обид да спречи поголем инцидент, таа ги пронашла младите и директно им се обратила.„Четворица. Две девојчиња и нивните дечковци. Бесни, под дејство на алкохол, со ножеви во рака тргнаа кон мене“, наведува таа.Со присебност, вели, успеала да ја смири ситуацијата, иако, како што признава, била подготвена на сè.„Го оттурнав хаосот со зборови, а одвнатре – вулкани“, додава.Инцидентот завршил без физички последици, но според неа, суштинскиот проблем останува.„Не можам да се смирам од мислата што можеше да се случи. Денес децата носат ножеви како да е тоа нормално“, предупредува Младеновска.Таа укажува на поширок проблем – присуство на алкохол, насилство и агресија кај малолетници, како и страв кај граѓаните да реагираат.„Ова не е само приказна од еден ден. Ова е реалност. Прашањето е – до кога?“, порачува таа.

Коментари | пред 2 дена

2 ден.

Светски ден на слободата или медиуми под притисок: Каде е македонското новинарство денес

Денеска се одбележува 3 Мај, Светскиот ден на слободата на медиумите. Ова е потсетник дека слободното новинарство е темел на секое демократско општество. Одлуката за одбележување на овој ден е донесена од страна на Генералното собрание на Обединетите нации во 1993 година, по препорака на Генералната конференција на УНЕСКО.Целта била да се подигне свеста за важноста на слободата на медиумите и да се потсетат владите на нивната должност да го почитуваат и поддржуваат правото на слобода на изразување загарантирано со Универзалната декларација за човекови права.По неколку години брз напредок, Македонија почна да стагнира и да паѓа на светските листи. Според најновиот индекс на „Репортери без граници“ за 2026 година, Македонија се наоѓа на 45-то место, што претставува пад за три места во однос на 2025 година (кога беше 42-ра) и пад од девет места во однос на 2024 година (кога беше на високото 36-то место).Главни причини за падот се враќање на државното рекламирање, Измените во законот со кои се овозможи државни пари повторно да течат во приватните медиуми се оценети како ризик за „купување“ на уредувачката политика.Забележан е пораст на вербални напади и арогантен однос на високи функционери кон новинарите, што создава непријателска атмосфера.Загрижува ширењето на лажни вести и недостатокот на професионализам кај дел од медиумите, особено порталите кои ја подриваат довербата на јавноста.Состојбата во Македонија не е изолиран случај. Во 2026 година, слободата на медиумите во светот е на историски најниско ниво.За првпат во историјата на мерењата, повеќе од половина од земјите во светот сега се класифицирани во категориите „тешка“ или „многу сериозна“ состојба. Кога законите се користат за да се замолчат критичките гласови, а не да се заштитат, тогаш демократијата ја губи својата „контролна кочница“.Овој 3 Мај е повеќе од обичен ден за славење, тој е аларм дека слободата која сме ја сметале за загарантирана, многу лесно може да се изгуби.

Свет | пред 2 дена

2 ден.

Реформите да почнат од Врховниот суд – таму е корупцијата, вели ексминистерот за правда

Доколку Владата, премиерот Христијан Мицкоски и ВМРО-ДПМНЕ навистина се определени за суштинска и кредибилна реформа на судскиот систем, тогаш фокусот мора да биде насочен кон Врховниот суд, оценува поранешниот министер за правда Кренар Лога.Според него, токму таму треба да се бараат најсериозните проблеми поврзани со корупција и нечесно постапување.Лога посочува на низа појави кои, според него, укажуваат на системски слабости – од укинување пресуди и повторени судења што доведуваат до застарување на предметите, до сомневања за финансиски договори.Посебно го потенцира и, како што вели, „перфидното манипулирање“ со АКМИС системот за автоматска распределба на судските предмети, што директно влијае врз интегритетот на судските постапки.Дополнително, Лога предупредува дека ваквите состојби имаат и конкретна финансиска цена, посочувајќи дека државата губи милионски суми во постапки пред Европскиот суд за човекови права во Стразбур.

Коментари | пред 2 дена

2 ден.

Митко Чавков бара повторно судење за 27 април: Тоа е инструмент за враќање на довербата во судот!

Поранешниот министер за внатрешни работи Митко Чавков, осуден во случајот „27 април“, излезе со обраќање во кое бара повторно отворање на постапката, оценувајќи дека тоа не е привилегија, туку правен механизам признаен во европската пракса.„Повторното отворање на постапката не е привилегија. Тоа е европски признат механизам кога постојат сериозни сомневања дека правосилната пресуда е производ на нефер постапка“, наведува Чавков.Тој потенцира дека целта на ваквата иницијатива не е избегнување на одговорност, туку проверка на правдата според европските стандарди.„Повторувањето на постапката не е ‘рушење на судот’, туку инструмент за враќање на довербата во судот“, додава Чавков.Во обраќањето посочува дека правната битка ќе продолжи преку сите расположиви механизми, вклучително и пред меѓународни институции.Според него, единствено преку транспарентна и фер постапка, во која јавноста има доверба, може да се обнови нарушената доверба во правосудниот систем.

Коментари | пред 2 дена

2 ден.

Ченто: Нема да прифатам „вистина“ што е создадена на хартија, а не во реалност

Осудениот за настаните од „27 април“, Јане Ченто, излезе со сериозни обвинувања кон судот, тврдејќи дека во постапката не била утврдена материјалната вистина, туку дека одлуките биле донесени врз формални основи.„Судот не ја бараше вистината. Се сокри зад формалности“, наведува Ченто, посочувајќи дека Апелациониот суд се повикал на тоа дека нема правосилна пресуда за „лажен исказ“ и дека не е поднесена кривична пријава против обвинител.Тој информира дека во меѓувреме е поднесена кривична пријава, но нагласува дека, според него, суштинскиот проблем останува – судот, како што тврди, не ја исполнил обврската самостојно да ја утврди вистината.„Судот има обврска да ја утврди материјалната вистина и не може да ја условува оценката на доказите со постоење на друга кривична постапка“, наведува Ченто.Според него, материјалната вистина подразбира утврдување на тоа што навистина се случило, дали имало лажни искази, притисоци и дали доказите се веродостојни.„Со ваков пристап не се штити правдата, туку формата. А кога формата станува поважна од вистината – правдата умира“, порачува тој.Ченто најави дека нема да молчи и дека ќе продолжи со правната и јавната борба, оценувајќи дека вистината не може да се утврдува „само на хартија, а не во реалност“.

Коментари | пред 2 дена

2 ден.

Закани и притисоци по објавата за „незаконско унапредување“: Не заплашуваат по откривање на 15 прекршувања

Нашите платформи и личните профили на тимот станаа цел на кампања за заплашување, закани и оцрнување веднаш по јавното разоткривање на незаконското унапредување на Арбреша Беџети Ферати, реагираат од Форумот за образовни промени (ФОП).Од таму велат дека ситуацијата дополнително ескалирала, откако, како што тврдат, едно лице преку лажни и сопствени профили испраќало заканувачки и навредливи пораки, вклучително и кон семејството на извршниот директор Бленди Ходаи.„Сите случаи се пријавени во Секторот за внатрешни работи во Тетово. Се преземаат сите потребни мерки. Заканите кај нас не поминуваат“, соопштија од ФОП, додавајќи дека ќе продолжат со објавување на наодите.Ходаи потврди дека случајот е пријавен во полиција и порача дека притисоците нема да ги запрат.„Колку повеќе се закануваат, толку појасно станува дека сме допреле нешто што ве боли. Вистината ќе ја извадиме до крај. Но не пробувајте со моето семејство – тоа е црвена линија“, напиша тој.Претходно, ФОП објави дека Арбреша Беџети Ферати, сопруга на претседателот на Сенатот на Универзитетот во Тетово, Кенан Ферати, била унапредена во редовна професорка спротивно на законските процедури.Според нив, во постапката биле прекршени 15 законски и статутарни одредби, а во процесот биле вклучени повеќе универзитетски тела, меѓу кои Наставно-научниот совет на Медицинскиот факултет, Сенатот и Рецензентската комисија.Форумот наведува дека извештајот на Државниот просветен инспекторат ги потврдува нивните сомнежи, посочувајќи дека унапредувањето било дел од поширока мрежа на влијанија.„Овој случај покажува дека унапредувањата повеќе немаат врска со знаењето, туку со тоа кого познаваш“, истакнуваат од ФОП.Од таму побараа Јавното обвинителство да отвори истрага за, како што велат, „добро организирана шема“, како и поништување на изборот на Ферати во звање.Дополнително, бараат разрешување на Кенан Ферати од функцијата до расчистување на случајот, како и одговорност од актуелниот ректор Јусуф Зејнели, за кого тврдат дека не соработувал со инспекциските органи.

Македонија | пред 2 дена

2 ден.

Променливо облачно со локален дожд и засилен северен ветер

Од УХМР најавуваат променливо облачно време со повремени локални врнежи од дожд во претпладневните часови, по што кон крајот на денот се очекува постепено намалување на облачноста.Ќе дува умерен, а повремено и засилен ветер од северен правец, кој на одделни места може да надмине брзина од 60 километри на час.Минималните температури ќе се движат од 0 до 5 степени, додека максималните дневни ќе достигнат од 13 до 20 степени.Во Скопје се очекува слична временска состојба – променливо облачно со слаб локален дожд претпладне, а потоа разведрување. Ветерот ќе биде умерен, со повремени засилувања во делови од котлината, исто така од северен правец. Температурите во главниот град ќе се движат од минимални 4 до максимални 19 степени.

Македонија | пред 2 дена

3 ден.

Еколошка катастрофа во Туапсе по нападите врз рафинеријата

Во рускиот крајбрежен град Туапсе на Црното Море се развива сериозна еколошка катастрофа по серија украински напади со дронови, при што настанале големи пожари и истекување на нафта, пренесуваат светски медиуми.Според извештаите, градската рафинерија, која е клучен центар за преработка и извоз на руска нафта, била погодена четири пати во последните две недели. Пожарите што избувнале по нападите се гаселе со денови, додека густ и токсичен чад се шири низ регионот.Сателитски снимки и видеоматеријали покажуваат истекување на нафта во реката Туапсе и во Црното Море, при што нафтени дамки се прошириле десетици километри од брегот. Локалните власти предупредуваат на сериозни последици по животната средина, вклучително и загадување на воздухот, почвата и водата.Руските власти соопштија дека преземаат мерки за локализирање на штетата и поставување бариери за спречување на понатамошно истекување во морето, додека се појавуваат и критики за бавната реакција на институциите.Стручњаци за животна средина предупредуваат дека станува збор за една од најсериозните еколошки кризи во регионот во последните години, со можни долгорочни последици по здравјето на населението, вклучително и зголемен ризик од респираторни и други заболувања.Во меѓувреме, конфликтот меѓу Русија и Украина продолжува со засилени напади врз енергетската инфраструктура, при што двете страни меѓусебно се обвинуваат за ескалацијата.

Свет | пред 3 дена

3 ден.

(Видео) Најмалку 13 загинати во нови израелски напади врз јужен Либан

Во израелски воздушни напади врз јужен Либан загинаа најмалку 13 лица, меѓу кои четири жени и едно дете, соопшти либанското Министерство за здравство. Во нападите, кои се случиле и покрај продолжениот прекин на огнот, се повредени 32 лица.Според информациите, најголем број жртви се регистрирани во областа Хабуша во округот Набатије, каде што загинале осум лица, меѓу кои две жени и едно дете. Во Зрарија во округот Сидон животот го загубиле четири лица, вклучувајќи две жени, додека во Аин Баал во округот Тир загинало уште едно лице.Израелската војска издала наредба за евакуација на подрачјето Хабуша, а истовремено продолжуваат борбите меѓу Израел и Хезболах, група поддржана од Иран. Хезболах соопштил дека извршил напади врз израелски војници и воена опрема во Либан, додека Израелските одбранбени сили потврдиле дека еден нивни војник загинал во борбите на југот на Либан, со што бројот на загинати израелски војници од почетокот на март се искачи на 17.Прекинот на огнот, кој првично бил договорен во април и потоа продолжен, е под посредство на САД, но, и покрај тоа, судирите продолжуваат на југот на земјата. Американскиот претседател Доналд Трамп претходно соопшти дека договорите за прекин на огнот се продолжени по разговори меѓу страните, а САД учествуваат во надзорот преку свој воен претставник.Либанската војска соопшти дека продолжува координацијата со американските претставници, додека Вашингтон ја нагласува потребата од зајакнување на либанската државна власт и стабилноста на границите.Според податоците на либанското Министерство за здравство, од почетокот на март во Либан се убиени 2.659 лица, меѓу кои и здравствени работници, при што не се прави разлика меѓу цивили и борци. Во исто време, се бележат и загуби на израелска страна, како и жртви од нападите на Хезболах.Израелските одбранбени сили соопштиле дека во текот на последниот ден извршиле околу 50 воздушни напади врз цели на југот на Либан, за кои тврдат дека биле користени од Хезболах за воени цели.

Свет | пред 3 дена

3 ден.

Американски генерал: Кина гради армија за доминација, војната нема да започне како што се очекува

Генерал-потполковникот на американските маринци, Стивен Скленка, предупреди дека Соединетите Американски Држави мора итно да започнат со зајакнување на своите воени бази поради, како што ја оцени, растечката закана од Кина.Во обраќање на изложбата „Modern Day Marine 2026“ во Вашингтон, Скленка изјави дека Кина веќе претставува рамноправен противник на САД во речиси сите области на националната моќ и дека не е точно да се смета само како држава што се приближува до таа позиција. Тој нагласи дека потенцијален конфликт меѓу двете сили би бил значително посложен од другите регионални кризи, посочувајќи дека, во споредба со тоа, евентуален судир со Иран би изгледал како помал инцидент.Тој оцени дека американските воени бази повеќе не можат да се сметаат за безбедни административни локации, туку мора да се третираат како борбени формации од клучно значење за оперативната подготвеност. Според него, современите конфликти веќе покажуваат дека ваквите објекти се изложени на напади со ракети, беспилотни летала и други форми на удари.Скленка се повика и на неодамнешни искуства од конфликтни ситуации на Блискиот Исток, наведувајќи дека напади со дронови и балистички ракети покажале колку брзо може да се наруши безбедноста на воените капацитети и сојузниците во регионот. Тој предупреди дека идните закани нема да бидат само класични воени удари, туку и кибернетски напади, дезинформациски кампањи и употреба на автономни системи.Генералот истакна дека Кина располага со силна индустриска база и брза воена модернизација, при што, според неговите оценки, значително ја зголемува својата производна и воена моќ, вклучително и во бродоградбата, ракетните системи и нуклеарниот арсенал.Тој предупреди дека првите удари во евентуален голем конфликт најверојатно нема да бидат конвенционални, туку ќе започнат со кибернетски напади врз енергетски системи, дезинформации и напади со беспилотни системи, со цел да се создаде хаос и да се наруши одлучувањето.Според него, клучно е САД да ја зајакнат својата одбранбена инфраструктура и подготвеност, бидејќи, како што рече, способноста за мобилизација и распоредување на сили зависи директно од безбедноста на воените бази.

Свет | пред 3 дена

3 ден.

Австриската полиција уапси осомничен за труење на кашички за бебиња „HiPP“

Австриската полиција уапси 39-годишен маж поврзан со случај на труење на бебешка храна со отров за глувци, кој наводно бил дел од обид за изнуда, соопштија надлежните органи.Според информациите, пет тегли бебешка храна на германскиот производител „HiPP“ биле манипулирани и пронајдени во Австрија, Чешка и Словачка, пред да бидат консумирани. Шеста тегла сè уште не е пронајдена и се претпоставува дека се наоѓа во Австрија.Полицијата во покраината Бургенланд потврди дека уапсениот е 39-годишен маж, но не соопшти дополнителни детали за да не се загрози истрагата. Според медиумски извештаи, тој бил уапсен во покраината Салцбург.Истражителите наведуваат дека случајот е поврзан со обид за изнуда на пари од компанијата „HiPP“, при што во електронска порака било побарано исплата од два милиони евра во рок од шест дена. Компанијата, како што се наведува, не ја забележала пораката навреме бидејќи била испратена на групна адреса која ретко се проверува.Полицијата и понатаму ја продолжува истрагата за случајот.

Свет | пред 3 дена

3 ден.

Норвешки министер за одбрана: Русија нема шанси против НАТО

Норвешкиот министер за одбрана Торе О. Сандвик во интервју за ТВР Ворлд изјави дека Русија „нема никакви шанси“ во евентуален воен конфликт со НАТО, нагласувајќи дека воената надмоќ на Алијансата, особено во воздухопловните сили, би била одлучувачка.Тој истакна дека, за разлика од ситуацијата во Украина, каде што ниту една страна нема целосна контрола врз воздушниот простор, НАТО би воспоставил воздушна доминација многу брзо во секој можен конфликт. „НАТО има импресивна сила. Би имале целосна контрола над воздушниот простор“, изјави Сандвик, посочувајќи на напредните ловци од петта генерација и повеќедоменските операции кои ги интегрираат воздушните, поморските и кибернетските капацитети.Неговите изјави доаѓаат во период на зголемена загриженост кај балтичките и нордиските земји за можни инциденти во Балтичкото Море, додека украинскиот претседател Володимир Зеленски и шведските безбедносни служби предупредуваат на ризик од ескалација и хибридни притисоци.Сандвик додаде дека Русија е значително ослабена поради војната во Украина. „Владимир Путин не може да победи во Украина. Против НАТО нема шанси“, рече тој, оценувајќи дека руските копнени сили претрпеле големи загуби и дека нивната воена позиција е ослабена и во арктичкиот регион и долж норвешката граница и покрај зголемените активности во подводните и воздушните операции.Тој исто така порача дека Европа мора да ги зголеми инвестициите во одбраната и индустриското производство за да ја зајакне долгорочната безбедност, нагласувајќи ја потребата од поддршка за Украина со цел, како што рече, да се запре Русија.Норвешка во меѓувреме ја проширува соработката со сојузниците, вклучително и заедничка набавка на нови подморници со Германија и поголема интеграција во нордиските одбранбени системи.

Свет | пред 3 дена

3 ден.

(Видео) Маж плукнал на црква во Ерусалим, а потоа покажал среден прст

Ерменската патријаршија во Ерусалим објави снимка од надзорни камери на која се гледа како маж ја навредува една од најсветите ерменски цркви во Стариот град, катедралата „Свети Јаков“ во Ерменската четврт.Според објавеното видео, лицето повеќепати плука на влезот од црквата, по што покажува среден прст и прави подбивен знак на крст со раката. Настанот се случил во Ерменската четврт на Стариот град во Ерусалим, а снимката ја објави Ерменската патријаршија, пренесува агенцијата „Анадолија“, која наведува дека мажот е израелски државјанин.Инцидентот се случува во период на зголемени тензии, откако претходно била нападната калуѓерка во Источен Ерусалим. Во градот, каде што служат стотици свештеници и калуѓерки од различни делови на светот, во последните години се пријавени зголемен број напади врз христијанско и муслиманско свештенство, како и врз верски објекти.Верските институции во Источен Ерусалим повеќепати апелирале до надлежните власти да преземат мерки за спречување на вакви инциденти.

Свет | пред 3 дена