Најнови вести

2 нед.

Додека кршел стакло за да ги тргне возилата, повредено лице во вчерашниот пожар на стариот полигон - МВР со детали

Пожар избувнал на стариот полигон под Кале во Скопје, при што биле зафатени три возила, а едно лице се здобило со повреди, информираат од Министерството за внатрешни работи.Настанот бил пријавен на 17 април 2026 година околу 15:50 часот во СВР Скопје. Пожарот настанал на улицата „Самоилова“, каде што се запалила сува трева, по што огнот се проширил и зафатил возила паркирани во близина.Едно лице се повредило при обид да ги тргне возилата од зафатеното подрачје, кршејќи ги стаклата со цел да спречи поголема штета.На местото интервенирале полициски службеници и екипа на Бригадата за противпожарна заштита Скопје, по што пожарот бил локализиран и изгаснат.Од МВР информираат дека се преземаат мерки за целосно расчистување на случајот.

Скопје | пред 2 седмици

2 нед.

Тешко повреден велосипедист на Кејот на Вардар

Дваесет и седумгодишен скопјанец се здобил со тешки телесни повреди откако паднал од електричен велосипед на велосипедска патека на Кејот на реката Вардар, информираат од Министерството за внатрешни работи.Настанот бил пријавен на 18 април 2026 година во 01:30 часот во СВР Скопје. Според информациите, Г.А. (27) од Скопје, управувајќи електричен велосипед, изгубил контрола и паднал на патеката.По несреќата, со тешки телесни повреди бил пренесен во Ургентниот центар при Комплекс клиники „Мајка Тереза“ во Скопје, каде што му била укажана лекарска помош.За случајот е известен јавен обвинител од Основното јавно обвинителство Скопје.

Скопје | пред 2 седмици

2 нед.

Судир меѓу „пежо“ и мотор „БМВ“ – млад мотоциклист со тешки повреди

Mлад мотоциклист е тешко повреден во сообраќајна несреќа што се случила на улицата „Лазар Трповски“ во Скопје, информираат од Министерството за внатрешни работи.Несреќата била пријавена на 17 април 2026 година во 14:15 часот во СВР Скопје, а во неа учествувале патничко возило „пежо“ со кумановски регистарски ознаки, управувано од Л.А. (40) од село Матејче, липковско и мотоцикл „БМВ“ со скопски регистарски ознаки, управуван од А.С. (20) од Скопје.Во судирот било оштетено и паркирано возило „фолксваген“, сопственост на К.А. (49) од село Глуво, скопско.Со тешки телесни повреди се здобил мотоциклистот А.С., кои биле констатирани во Ургентниот центар при Комплекс клиники „Мајка Тереза“ во Скопје. Со телесни повреди се здобил и неговиот сопатник, кој бил прегледан во ЈЗУ „Св. Наум Охридски“.Од МВР информираат дека увид на местото на несреќата извршила увидна екипа од СВР Скопје.

Скопје | пред 2 седмици

2 нед.

Маж починал во угостителски објект, идентитетот се утврдува, телото на обдукција

Машко лице починало во угостителски објект на Градскиот пазар во Свети Николе, откако претходно му се слошило, информираат од Министерството за внатрешни работи.Случајот бил пријавен на 17 април 2026 година околу 16:30 часот во ОВР Свети Николе.Лекар од Итната медицинска помош констатирал смрт без видливи траги на насилство. По насоки на јавен обвинител од Основното јавно обвинителство Свети Николе, телото на починатиот е дадено на обдукција.Од МВР информираат дека се преземаат мерки за утврдување на идентитетот на починатото лице.

Македонија | пред 2 седмици

2 нед.

Власта тврди дека економијата стабилизира: „СДС ја задолжи државата“

Пратеникот на ВМРО-ДПМНЕ, Бране Петрушевски, одговарајќи на обвинувањата од СДСМ за лоши економски политики, изнесе податоци со кои, според него, се покажува спротивното.Тој посочи дека инфлацијата на храната значително е намалена во споредба со претходните години.„Во 2022 година инфлацијата на храната беше 24,8%, во 2023 година 16,8%, додека денес во 2026 година е 4,9%“, изјави Петрушевски.Според него, и цените на горивата се намалени во однос на периодот на претходната власт.„Во 2022 година цената на горивата беше 110 денари, а денес е околу 90 денари, односно околу 1,5 евра“, рече тој.Петрушевски нагласи дека се зголемуваат и платите и пензиите, посочувајќи дека во јавниот сектор се планира раст од 40 до 60 проценти до 2028 година, додека пензиите, како што рече, за година и пол се зголемени линеарно за 7.000 денари.Дополнително, тој истакна дека државата редовно враќа долгови, во просек околу две милијарди евра годишно.„Ако граѓаните сметаа дека СДС воделе добри економски политики, ќе им ја дадеа довербата на нив, а не на нас“, изјави Петрушевски.Тој додаде дека СДСМ нема кредибилитет да зборува за економија, обвинувајќи ја партијата дека во период од седум години ја задолжила државата повеќе отколку сите влади од 1991 до 2017 година.

Македонија | пред 2 седмици

2 нед.

СДСМ поднесе интерпелација за Трипуновски – обвинувања за корупција и колапс во земјоделството

СДСМ поднесе интерпелација за работата на министерот за земјоделство Цветан Трипуновски, обвинувајќи го за, како што велат, корупција, скандали и штетни политики кои го довеле секторот до колапс.Пратеникот Љупчо Николовски на прес-конференција изјави дека во изминатите две години земјоделците се соочуваат со намалена поддршка, укинати мерки и притисоци, наместо развојни политики.„Трипуновски го доведе земјоделството до колапс – од незнаење, неспособност и со закани и притисоци“, рече Николовски.Според него, намалени се субвенциите за повеќе земјоделски гранки, а дел од програмите и мерките се укинати или суспендирани. Тој посочи дека за првпат со ребаланс бил намален буџетот за земјоделство.Како клучен аргумент за интерпелацијата, Николовски ја наведе корупцијата, тврдејќи дека блиски соработници на министерот биле фатени со мито од 50.000 и 100.000 евра.„Ова не се изолирани случаи, туку доказ за системска корупција“, истакна тој.Дополнително, СДСМ обвинува за, како што велат, „мега-скандал“ со европските фондови, поради кој биле суспендирани 128 милиони евра од ИПАРД програмата, што директно ги погодило земјоделците.Николовски посочи и дека се намалени субвенциите за тутун, сточарство и други култури, додека, според него, зголемен е лимитот за субвенции за големите компании, на штета на малите производители.Од СДСМ тврдат дека се укинати и важни мерки како авансната исплата на субвенции и програмите за мали производители, како и дека нема напредок во капиталните проекти и наводнувањето.„Земјоделците се оставени сами, цените се под производствените трошоци, а резултатот е катастрофален“, рече Николовски.Тој најави дека СДСМ ќе бара политичка, а потоа и кривична одговорност, додавајќи дека интерпелацијата има цел да се изнесат сите факти и аргументи во Собранието.

Македонија | пред 2 седмици

2 нед.

Иран одбива нова рунда преговори со САД – услов се повлекување на барањата

Иран засега не прифаќа нов круг преговори со Соединетите Американски Држави, откако, според информации од ирански извори, Вашингтон поставил „претерани барања“.Како што пренесува агенцијата Тасним, повикувајќи се на неименуван извор, Техеран ја информирал американската страна дека не е подготвен да продолжи со разговорите под постојните услови.„Америчката страна беше известена преку пакистански посредник дека не прифаќаме втор круг преговори“, наведува изворот.Според истиот, Иран смета дека барањата на САД се нереални и поставил нивно повлекување како предуслов за евентуално продолжување на дипломатскиот процес.Дополнително, Техеран испратил порака дека нема намера да учествува во долготрајни преговори без конкретни резултати, нагласувајќи дека процесот мора да биде ефикасен и суштински.Овој развој доаѓа во период на зголемени тензии меѓу двете земји, кога дипломатските напори се обидуваат да најдат излез од кризата на Блискиот Исток.

Свет | пред 2 седмици

2 нед.

Техеран со порака до Вашингтон: „Трамп премногу зборува“

Заменик-министерот за надворешни работи на Иран, Саид Кхатибзаде, остро реагираше на последните изјави на американскиот претседател Доналд Трамп, оценувајќи дека „премногу зборува“ и испраќа контрадикторни пораки.Говорејќи пред новинарите на маргините на дипломатскиот форум во Анталија, Кхатибзаде беше запрашан за заканите од Трамп дека САД би можеле повторно да започнат со бомбардирање доколку не се постигне договор со Иран.„Во истата изјава изнесе контрадикторни работи. Не знам точно што мислеше“, рече Кхатибзаде.Тој нагласи дека позицијата на Иран останува непроменета – дека војната не може да донесе позитивен исход, но дека земјата е подготвена да се брани во случај на напад.„Ќе се бориме до последниот ирански војник“, порача заменик-министерот.Изјавата доаѓа во момент на засилени тензии меѓу Вашингтон и Техеран, во услови на неизвесност околу можен договор и продолжување на примирјето.

Свет | пред 2 седмици

2 нед.

Петрушевски: СДСМ и Филипче живеат во паралелна реалност

Пратеникот на ВМРО-ДПМНЕ, Бране Петрушевски, упати остри критики кон СДСМ и лидерот Венко Филипче, обвинувајќи ги дека, како што вели, функционираат во „паралелен свет на лаги и политичка заблуда“.Во писмено обраќање, Петрушевски оцени дека СДСМ и Филипче ги претставуваат поразите како победи и, според него, ги менуваат фактите со конструкции.„СДС и Филипче функционираат во сопствена реалност, паралелен свет во кој поразите ги претставуваат како победи, а фактите ги менуваат со конструкции“, наведува Петрушевски.Тој посочи дека СДСМ, како што тврди, ликува за изборни резултати во други држави, додека нивните сестрински партии бележат слаби резултати.Дополнително, Петрушевски обвини дека СДСМ не се дистанцира од поранешниот премиер Зоран Заев и неговите политики, туку, според него, продолжува со истата политичка матрица.Во однос на изборните резултати, тој истакна дека СДСМ освоил 18 пратеници на парламентарните избори и околу 130 илјади гласови на локалните избори, што, според него, партијата ги претставува како успех.„Време е СДС и Филипче да се разбудат од оваа политичка фантазија и конечно да се соочат со реалноста“, порача Петрушевски.

Македонија | пред 2 седмици

2 нед.

Турција со обвинувања: Израел го користи конфликтот за територијално ширење

Турскиот министер за надворешни работи Хакан Фидан го обвини Израел дека го користи актуелниот конфликт на Блискиот Исток како изговор за проширување на својата територија.Говорејќи на дипломатски форум во Анталија, Фидан изјави дека, според Анкара, израелската политика не е насочена кон обезбедување безбедност, туку кон територијална експанзија.„Израел не сака да ја обезбеди сопствената безбедност. Израел сака повеќе територија. Владата на Бенјамин Нетанјаху ја користи безбедноста како изговор за окупација на дополнителни територии“, рече Фидан.Тој посочи дека, покрај палестинските територии – Појасот Газа, Западниот Брег и Источен Ерусалим – Израел, според турските оценки, се обидува да воспостави влијание и врз делови од Либан и Сирија.„Ова е континуирана окупација и експанзионизам. Ова мора да престане“, нагласи Фидан, додавајќи дека Израел создава „илузија на меѓународно ниво“ претставувајќи ги своите потези како мерки за безбедност.Во своето обраќање, турскиот министер се осврна и на пошироките геополитички последици, истакнувајќи дека конфликтот на Блискиот Исток ги оттурнал напорите за решавање на војната меѓу Русија и Украина.„Овој конфликт ја стави војната меѓу Русија и Украина во втор план“, рече Фидан, повикувајќи на продолжување на дипломатските напори за нејзино завршување штом се стабилизира ситуацијата на Блискиот Исток.

Свет | пред 2 седмици

2 нед.

44954278_1480792018717983_2307963765280210944_n

Ветерот ја сопре жичницата на Водно, ЈСП најавува нормализација кога ќе се подобрат условите

Жичницата на Водно денеска не сообраќа поради засилен ветер, информираа од ЈСП Скопје.Од претпријатието посочуваат дека јачината на ветерот ги надминува дозволените безбедносни граници за нормално функционирање, поради што е донесена одлука за привремен прекин на работата.„Надлежните служби ја следат состојбата на терен и веднаш штом ќе се создадат соодветни временски услови, жичницата ќе продолжи со редовен превоз на патници“, велат од ЈСП.Жичницата кон Водно важи за една од најпосетените рекреативни атракции во Скопје, особено за време на викенди и празници, а ваквите прекини најчесто се воведуваат од безбедносни причини.

Скопје | пред 2 седмици

2 нед.

Претрес во гостиварско: Пронајдена марихуана, приведен 28-годишник

Полициски службеници од ОВР Гостивар лишиле од слобода 28-годишен жител на селото Сенокос, откако при претрес во неговиот дом била пронајдена марихуана.Како што информираат од Министерството за внатрешни работи, акцијата била спроведена на 17 април 2026 година, врз основа на судска наредба, при што бил извршен претрес во домот и помошните простории на Ј.А. (28).При претресот, полицијата пронашла и одзела марихуана, по што лицето било лишено од слобода.Од МВР најавуваат дека по целосно документирање на случајот, против осомничениот ќе биде поднесена соодветна кривична пријава.

Македонија | пред 2 седмици

2 нед.

„Обележувањето на Водно е хаос – безбедноста е на раб, пешакот ги штити децата, ама системот потфрла!“, вели Ина Многуфина

Случката на Водно, каде дојде до жестока расправија меѓу планинар и велосипедист, предизвика бројни реакции во јавноста, а меѓу нив и на инфлуенсерката Ина Многуфина, која укажа на пошироките проблеми со безбедноста и однесувањето на терен.Таа посочи дека обележувањето на патеките на Водно е несоодветно и дека на истите се движат голем број пешаци, меѓу кои и деца, што ја зголемува опасноста од несреќи.„Точно е дека обележувањето на стазите на Водно е ужас и точно е дека по стазата каде се качуваат луѓето има многу деца. За беља се потребни секунди. Пешакот го разбирам, си ги штити децата“, наведува Многуфина.Во однос на велосипедистот, таа оценува дека можел да реагира поинаку, но не го направил тоа на агресивен начин.„Детево со точакот можеше да биде безобразно и да помине, но не беше“, додава таа.Сепак, според неа, најпроблематичен е односот на родителот кој, како што вели, испраќа погрешна порака.„Најголем проблем е што родителот му вика ‘мува да не те лази, уживај си, не доаѓа полиција за тоа’. Реално, доаѓа полиција ако се работи за загрозување на безбедност“, истакнува Многуфина.Таа предупредува дека ваквото охрабрување кај децата создава чувство дека се недопирливи, што може да има последици, особено во ситуации со потенцијален ризик.Дополнително, посочува дека и објавувањето на видеото од настанот може да биде спорно од правен аспект, согласно новите законски измени.Случајот повторно го отвори прашањето за безбедноста на Водно, обележувањето на патеките и потребата од јасни правила за користење на просторот од страна на пешаците и велосипедистите.

Коментари | пред 2 седмици

2 нед.

Кузеска: Граѓаните осиромашуваат, Владата доцни со мерките

СДСМ ја обвини Владата за, како што велат, „економски дебакл“, оценувајќи дека граѓаните секојдневно се соочуваат со раст на цените и пад на животниот стандард, без конкретни мерки од страна на премиерот Христијан Мицкоски.Портпаролката на партијата, Богданка Кузеска, посочи дека поминале 60 дена од почетокот на кризата на Блискиот Исток, а, според неа, Владата не презела чекори за заштита на стандардот на граѓаните.„Помина и Велигден, иако Мицкоски најавуваше нови мерки по празниците, повторно излажа – наместо мерки, продолжија поскапувањата“, рече Кузеска.Таа наведе дека според последните податоци на Државниот завод за статистика, зеленчукот поскапел за над 38 проценти, овошјето за над 10 проценти, а продажните цени во земјоделството за 23 проценти. Дополнително, според СДСМ, веќе два месеци се зголемени и цените на месото, маслото, јајцата и другите основни производи.„Ова не се обични бројки, туку секојдневие со празни фрижидери и празни џебови“, додаде Кузеска.Од СДСМ велат дека предложиле конкретни мерки – намалување на ДДВ за храна на нула проценти, намалување на акцизите, намалување на ДДВ за горивата на 5 проценти и намалување на патарините, оценувајќи дека Владата сега ги најавува истите мерки, но „доцна и половично“.Кузеска истакна дека додека во други европски земји се носат пакети за поддршка, во Македонија, според неа, Владата се задржува на анализи и најави без конкретна реализација.Во однос на економските показатели, СДСМ тврди дека странските инвестиции паднале од 1,2 милијарди евра на 467,5 милиони евра, а долгот за поврат на ДДВ кон компаниите достигнал 180 милиони евра. Дополнително, како што наведуваат, десетици фабрики се затворени, а над 1.500 работници останале без работа.„Реалноста е дека народот осиромашува. Потребни се итни мерки за намалување на цените и поддршка на граѓаните и економијата“, порача Кузеска.

Македонија | пред 2 седмици

2 нед.

Муцунски од Анталија: Коридорите 8 и 10 се клуч за развој и стабилност

Регионалната поврзаност е клучен предуслов за економски развој, стабилност и отпорност, порача министерот за надворешни работи и надворешна трговија Тимчо Муцунски на Antalya Diplomacy Forum 2026.Тој говореше на панелот „Нови можности за поврзување“, каде истакна дека во услови на геополитичка неизвесност и промени во глобалните синџири на снабдување, инфраструктурата и транспортните врски стануваат суштински фактор за одржлив раст.Муцунски нагласи дека Северна Македонија, како земја позиционирана на крстопат меѓу Европа и евроазискиот простор, има активна улога во унапредување на регионалната поврзаност, особено преку стратешките инфраструктурни проекти.Во фокусот на неговото обраќање беше Коридорот 8, кој треба да ги поврзе Јадранското и Црното Море, како и неговата целосна доизградба и функционално поврзување со соседните земји. Посебно беше истакнато и железничкото поврзување со Бугарија како дел од европските транспортни мрежи.Дополнително, министерот се осврна и на Коридорот 10, нагласувајќи дека земјата има важна улога во европските иницијативи за развој на одржлива инфраструктура што го поврзува Западен Балкан со поширокиот регион.Тој потенцираше дека за реализација на овие проекти е неопходна засилена координација меѓу владите, меѓународните финансиски институции и приватниот сектор, како и надминување на техничките и регулаторните бариери.Со учеството на форумот во Анталија, Муцунски порача дека Северна Македонија останува посветена на регионалната соработка и реализација на инфраструктурни проекти кои ќе придонесат за економски поврзана и стабилна Европа.

Македонија | пред 2 седмици

2 нед.

(Видео) Војник спречи поголема катастрофа кај Кале – со повреди извлекувал возила од пожар

Припадник на Армијата на Република Македонија со брза и пожртвувана реакција спречи поголема материјална штета при пожар што избувнал кај стариот полигон под Кале во Скопје.„На поранешниот полигон за обука за моторни возила (наспроти Националната Арена „Тодор Проевски“), професионалниот војник Христијан Божиновски, при заминување од работното место, забележал дека неколку паркирани возила се зафатени од пламен.Проценувајќи ја сериозноста на ситуацијата и опасноста пожарот да се прошири врз останатите паркирани возила, војникот Божиновски веднаш стапил во контакт со командирот на воениот стадион во Скопје, барајќи поддршка за локализирање на огнот. Припадниците на Армијата кои ја извршувале должноста на воениот стадион во Скопје, веднаш пружале помош, употребувајќи противпожарни апарати од едницата.Поради големината на пожарот, а проценувајќи дека истиот не може да се угасне, започнале со дислокација на неопожарените возила, со што успеале да го спречат ширењето на огнот.При интервенцијата, професионалниот војник Христијан Божиновски се здобил со полесни повреди на едната рака, за што му е пружена соодветна медицинска помош.Со ова дејствување, припадниците на Армијата уште еднаш го покажаа високиот професионален интегритет, како и пожртвуваноста на секој припадник без разлика дали се во униформа или не, секогаш да бидат во служба на државата и граѓаните“, велат од Армијата.

Скопје | пред 2 седмици

2 нед.

Техеран со сарказам кон Трамп за Ормускиот Теснец: „Опушти се и блокирај го Биби една недела“

Иран упати остар и саркастичен одговор на тврдењата на американскиот претседател Доналд Трамп дека Техеран се согласил „трајно“ да ја држи отворена клучната поморска рута низ Ормускиот Теснец и дека таа „никогаш повеќе нема да биде затворена“.Повод за реакцијата беа пораките што Трамп ги објави во петокот на својата платформа, оценувајќи дека станува збор за „голем и брилијантен ден за светот“ и дека теснецот повеќе нема да се користи како средство за притисок.Најгласната и најиронична реакција дојде преку објава на иранската амбасада во Зимбабве на социјалната мрежа Икс, каде што, во форма на „совети“, му порачаа на Трамп да не покажува „преголема радост“, да не размислува за „нов правен режим“ на теснецот и да ја прекине навиката на постојано објавување.„Исклучи го телефонот, опушти се, без нови објави и блокирај го Биби една недела. Јади лесна вечера и наспиј се.“Паралелно со дипломатскиот сарказам, од Техеран стигна и поостра политичка порака. Претседателот на иранскиот парламент, Мохамад Багер Калибаф, во саботата изјави дека Трамп изнел „седум лажни тврдења за еден час“ и нагласи дека Иран би можел да го затвори Ормускиот Теснец како одговор на тоа што го оценува како американска блокада.Иранските претставници, според истите наводи, ги негирале и тврдењата дека постои договор за предавање на иранскиот „нуклеарен прав“ на Соединетите Држави.Ормускиот Теснец со години е една од најчувствителните точки на глобалната енергетска и безбедносна карта, а секоја изјава за неговиот статус и можни ограничувања редовно предизвикува реакции и нервоза на меѓународните пазари и во дипломатските кругови.

Свет | пред 2 седмици

2 нед.

Иран делумно го отвори воздушниот простор, конвои танкери минуваат низ Ормутскиот теснец

Иран делумно го отвори својот воздушен простор и повторно дозволи меѓународни летови над источниот дел од земјата, додека во исто време се бележи зголемено движење на танкери низ Ормутскиот теснец, во услови на кревко примирје на Блискиот Исток.Според Организацијата за цивилно воздухопловство на Иран, воздушните коридори во источниот дел се повторно активирани, а неколку аеродроми, вклучително и во Техеран, биле отворени од 7 часот по локално време. Информацијата е пренесена преку НОТАМ известување до пилотите, во контекст на актуелното примирје.Сепак, според податоците од „ФлајтРадар24“, непосредно пред отворањето немало летови над Иран, кој го затвори својот воздушен простор на крајот на февруари по почетокот на американско-израелската офанзива.Паралелно, податоците за поморски сообраќај покажуваат дека конвој од осум танкери – меѓу кои и еден голем танкер за сурова нафта (ВЛЦЦ), како и бродови за нафтени деривати, хемикалии и течен гас – успешно минал низ Ормутскиот теснец.Конвојот се движел во близина на островот Ларак, а зад него биле забележани и други бродови кои се обидуваат да го искористат краткиот период на стабилизација за да го напуштат Персискиот Залив.Стотици бродови останаа блокирани во регионот откако Иран го затвори теснецот како одговор на воените дејствија, што доведе до сериозни последици врз глобалното снабдување со нафта и гас.Ормутскиот теснец, низ кој пред конфликтот поминуваше околу една петтина од светската трговија со нафта, повторно функционира, но само во ограничени услови, додека трае примирјето посредувано од САД, кое беше постигнато меѓу Израел и Либан.И покрај привременото олеснување, ситуацијата останува неизвесна, а компаниите внимателно ги следат условите пред да донесат одлука за движење на своите бродови.

Свет | пред 2 седмици

2 нед.

Иранска ТВ: Ормутскиот теснец повторно затворен, потребно одобрување за премин

Иранската државна телевизија ИРИБ објави дека Ормутскиот теснец повторно е затворен, наведувајќи дека за секој премин низ клучниот поморски коридор ќе биде потребно одобрување од иранските власти.Во соопштение на иранската армија се наведува дека теснецот „се вратил во претходната состојба“, откако Соединетите Американски Држави одбиле да ја укинат поморската блокада на иранските пристаништа во Персискиот Залив.Овој развој следува веднаш по краток период на зголемен сообраќај низ теснецот, кој според „Ројтерс“ претставувал прво поголемо движење на бродови по седум недели од почетокот на конфликтот.Иран претходно ја ублажи блокадата по стапувањето во сила на десетдневното примирје меѓу Израел и Либан, овозможувајќи ограничен премин на танкери и трговски бродови.Американскиот претседател Доналд Трамп ја поздрави таа одлука, но истовремено потврди дека САД нема да ја укинат блокадата за бродовите што влегуваат и излегуваат од иранските пристаништа.Ормутскиот теснец, низ кој минува значителен дел од светската нафта, повторно станува жариште на геополитичка тензија, со директни импликации врз глобалните енергетски пазари и безбедноста на поморскиот сообраќај.

Свет | пред 2 седмици

2 нед.

Пресврт и нови тензии: Иран повторно го затвори Ормускиот теснец

Иран најави враќање на строга контрола врз Ормускиот теснец, како одговор на одлуката на САД да ја задржи поморската блокада на иранските пристаништа во Персискиот Залив.Од здруженото заповедништво на иранската армија соопштија дека стратешкиот пловен пат повторно е ставен под „строг надзор и управување“, откако Вашингтон одбил да ја укине блокадата, и покрај тоа што Иран претходно дозволи ограничен и контролиран премин на танкери и трговски бродови. Ова практично значи затворање на оваа клучна рута.„Сè додека САД не гарантираат целосна слобода на пловидба за иранските бродови, состојбата во Ормутскиот теснец ќе остане под строга контрола“, наведуваат од иранската војска.Засега не е целосно јасно дали ова значи целосно затворање на теснецот, иако иранската државна телевизија објави дека пловниот правец повторно е „затворен“ и дека за премин ќе биде потребно одобрување од Техеран.Податоците за движење на бродови покажуваат дека утринава имало зголемен сообраќај, што претставува прво поголемо движење низ теснецот по седум недели, но неизвесноста околу понатамошниот режим останува.Ситуацијата се развива по краткото отворање на теснецот, кое следеше по десетдневното примирје меѓу Израел и Либан, кога Иран привремено ја ублажи контролата.Американскиот претседател Доналд Трамп ја поздрави таа одлука, но истовремено потврди дека блокадата на иранските пристаништа ќе остане на сила.Ормутскиот теснец е клучна глобална енергетска артерија низ која поминува значителен дел од светскиот извоз на нафта, па секоја промена во режимот на пловидба директно влијае врз глобалните пазари и безбедносната состојба.

Свет | пред 2 седмици

2 нед.

Иран поставува услови за Ормутскиот теснец: „Ќе одлучува состојбата на терен, не социјалните мрежи“

Иран поставува нови услови за користење на Ормутскиот теснец, испраќајќи јасна порака дека контролата врз една од најважните светски нафтени рути ќе зависи од развојот на ситуацијата на терен, а не од јавните изјави или притисоци.Претседателот на иранскиот парламент и шеф на преговарачката делегација, Мохамад Багер Галибаф, остро ги отфрли изјавите на американскиот претседател Доналд Трамп, оценувајќи дека „изнесол седум тврдења за еден час, од кои сите биле лажни“.„Нема да победат со лаги, ниту ќе постигнат нешто во преговорите“, изјави Галибаф.Во однос на Ормутскиот теснец, тој порача дека евентуалното продолжување на американската поморска блокада директно ќе влијае врз слободата на пловидба.„Ако продолжи блокадата, теснецот нема да остане отворен. Пловидбата ќе се одвива по одредени рути и со иранско одобрување. Дали ќе биде отворен или затворен ќе зависи од реалната состојба, а не од социјалните мрежи“, рече Галибаф.Изјавите од Техеран се разликуваат и по нијанси. Додека министерот за надворешни работи Абас Арагчи најави дека теснецот ќе остане отворен за комерцијални бродови, воени извори посочуваат дека нема да биде дозволен за воени пловила.Според информации од ирански извори, се разгледува и можноста теснецот да остане отворен само во периодот на примирјето, кое трае уште неколку дена, како и воведување на строго контролирани поморски рути.Иранската Револуционерна гарда веќе објави мапа со нови пловни коридори кои минуваат блиску до иранскиот брег, што укажува на намерата за воспоставување нов режим на управување со теснецот.Овој пристап се толкува како обид Ормутскиот теснец да се искористи како силен преговарачки адут, вклучително и можност за воведување такси за премин, со што Иран би вршел дополнителен притисок во актуелната геополитичка криза.

Свет | пред 2 седмици

2 нед.

Мицкоски му купува време на Груевски, намерно се одложува барањето за враќање, вели СДСМ

СДСМ обвини дека премиерот Христијан Мицкоски изнесува неточни информации за случајот со поранешни полски функционери и, како што велат, намерно одолговлекува со барањето за екстрадиција на Никола Груевски.Од партијата тврдат дека Мицкоски „повторно излажал“ кога изјавил дека полските функционери не добиле азил во Унгарија, посочувајќи дека, според нив, и поранешниот полски министер за правда и неговиот заменик Романовски добиле политички азил – едниот во 2026, а другиот во декември 2024 година.„Очигледно Мицкоски свесно лаже за да го прикрие непостапувањето на неговата Влада“, наведуваат од СДСМ.Во реакцијата се прави споредба со Полска, за која СДСМ тврди дека веднаш покренала постапки за враќање на лицата, додека во Македонија, како што велат, институциите не преземаат конкретни чекори.„Во Македонија гледаме спротивна слика. Владата не прави ништо и нема поднесено барање за екстрадиција на Никола Груевски“, се додава во соопштението.СДСМ оценува дека со ваквиот пристап, Мицкоски „му купува време“ на Груевски за да избегне соочување со правдата, изнесувајќи и тврдења дека тој разгледува други опции за престој, меѓу кои Русија и Белорусија.Од партијата заклучуваат дека „доаѓа времето на вистината, правдата и одговорноста“.

Македонија | пред 2 седмици

2 нед.

Николоски: Скопскиот и охридскиот аеродром лидери во регионот, раст на патници и нови линии

Македонските аеродроми бележат значителен раст и остануваат меѓу водечките во регионот, тврди министерот за транспорт Александар Николоски, повикувајќи се на податоци и анализи од меѓународни извори.Според него, Меѓународниот аеродром Скопје има раст од 32 проценти во однос на истиот период лани, што го позиционира како лидер во регионот, оценка која, како што посочува, ја пренесува и специјализираниот авио-портал „Екс-Ју авиејшн њуз“.Во првите месеци од годинава, двата аеродроми – во Скопје и Охрид – бележат зголемување од околу 30 проценти на бројот на патници и околу 20 проценти по број на операции, што, според Николоски, е резултат на владините политики за развој на авиосообраќајот.Министерот посочува дека од почетокот на годината се воведени нови авиолинии од Скопје кон Неапол и Будимпешта, како и од Охрид кон Милано и Братислава. Во јули се очекува старт на нови линии од Охрид кон Катовице и Вроцлав, како и од Скопје кон Палермо и Алгеро.„За речиси две години воведовме 24 нови авиолинии кон европските центри, што е рекордна бројка“, вели Николоски.Тој најавува и продолжување на инвестициите, со проект за реконструкција, надградба и проширување на аеродромот „Св. Апостол Павле“ во Охрид, со цел зголемување на капацитетите.Според проекциите на Министерството, годинава се очекува бројот на патници да надмине 3,5 милиони, а следната година да достигне до 4 милиони.И покрај глобалните предизвици, особено конфликтот на Блискиот Исток кој довел до намалување на околу 6.000 седишта од планираните, Николоски уверува дека авиосообраќајот во земјава се одвива стабилно и без прекини.

Македонија | пред 2 седмици

2 нед.

ВМРО-ДПМНЕ: Судот во Струмица се прогласи ненадлежен за тужбата на Заев

ВМРО-ДПМНЕ реагираше по одлуката на Основниот суд во Струмица да се прогласи за месно ненадлежен по тужбата поднесена од поранешниот премиер Зоран Заев против пратеникот Бране Петрушевски, оценувајќи дека не успеал обидот за, како што велат, „замолчување“.„Правдата знае да доцни, но секогаш го наоѓа патот да излезе на виделина. Помина времето на импровизации и злоупотреби на правниот поредок за лични цели“, соопштија од партијата.Од ВМРО-ДПМНЕ наведуваат дека одлуката на судот покажува дека институциите постапуваат согласно законите, а не, како што тврдат, според влијанија на поединци.Во реакцијата се посочува дека Заев, со поднесувањето на тужбата во Струмица, очекувал поволен исход, оценувајќи дека „струмичките институции ги сметал за свој пашалак“.„Ослободени од стегите, правосудните органи одлучуваат согласно законите, а не според нарачките и желбите на поединци“, додаваат од партијата.Воедно, од ВМРО-ДПМНЕ порачуваат дека „владеење на правото и правна држава ќе има“ и дека секој кој постапувал спротивно на закон ќе сноси одговорност.

Македонија | пред 2 седмици

2 нед.

ВМРО-ДПМНЕ со жестоки критики: „СДС ќе се сведе на уште помалку гласови“

ВМРО-ДПМНЕ упати серија остри критики кон претседателот на СДСМ, Венко Филипче, обвинувајќи го дека ја води партијата во погрешна насока и дека се однесува, како што велат, „целосно оттурнат од реалноста“.Од партијата наведуваат дека СДС, наместо да се фокусира на внатрешните состојби, се занимава со политички случувања во други држави, посочувајќи ги изборите во Унгарија како пример.„СДС и Филипче стануваат сè поарогантни и делуваат целосно оттурнати од реалноста. Не се соочуваат со сопствените слабости, и покрај реакциите од јавноста и поранешни членови дека партијата се води во бездна“, велат од ВМРО-ДПМНЕ.Според нив, Филипче „се однесува како лично да има удел во победата на партијата Тиса во Унгарија“, иако, како што тврдат, станува збор за сестринска партија на ВМРО-ДПМНЕ, а не на СДС.Во реакцијата се наведуваат и низа други теми, меѓу кои изјавите за договорот со Велика Британија, тарифите со САД и постмониторингот со Советот на Европа, при што од ВМРО-ДПМНЕ тврдат дека Владата постигнала резултати, додека СДС, според нив, изнесувал неточни тврдења.„СДС се сведе на 130 илјади гласови по локалните избори и ќе се сведе на уште помалку ако Филипче продолжи вака“, наведуваат од партијата.Од ВМРО-ДПМНЕ додаваат дека СДС влегол во конфликти со сопартијци, медиуми и новинари, а истовремено, како што велат, „постојано се претставува како жртва на црни кампањи“.„СДС и Венко Филипче да почнат да се занимаваат со сопствената партија, затоа што со ова темпо ќе ја доведат до раб на исчезнување“, се наведува во реакцијата.

Македонија | пред 2 седмици