ЦРНА ГОРА

Во костими за капење само на плажа, казни до 500 евра во за шетање во костими за капење по улица во Црна Гора

Градските власти во Улцињ воведоа нови правила со кои се забранува движење во костими за капење и разголена облека надвор од плажите и капалиштата.Според одлуката за комунален ред, туристите и граѓаните кои ќе се движат оскудно облечени по улици, плоштади, шеталишта, паркови и други јавни површини може да бидат казнети со сума од 150 до 500 евра.Од локалната власт наведуваат дека мерката има цел да се зачува комуналниот ред, достоинството на градот и уредниот изглед на јавните простори.Забраната не важи за плажите, капалиштата и непосредниот брег наменет за капење, каде посетителите и понатаму ќе можат слободно да носат костими за капење.Новите правила ќе важат и за урбаните и за приградските населби, како и за туристичките зони на општината.

Балкан | пред 4 часа

Свети Стефан повторно се отвора: Огромен интерес од целиот свет

Сопственикот на компанијата „Адриатик пропертис“, Петрос Статис, изјави дека владее огромен интерес по веста дека Свети Стефан ќе биде повторно отворен ова лето.„Реакциите од целиот свет се неверојатни. Интересот е огромен“, изјави Статис.Тој посочи дека е многу задоволен од постигнатиот договор, кој резултирал со повторно отворање на Свети Стефан, откако комплексот пет години беше затворен.Статис нагласи дека до договорот дошло затоа што Владата, ЈУ „Морско добро“ и локалната заедница сега се позрели, што, според него, овозможило повторно отворање на еден од најубавите хотели во светот.Тој рече дека во „Адриатик пропертис“ и „Аман“ веруваат дека полесно ќе ги вратат ВИП-гостите отколку работната сила, но изрази надеж дека услугата ќе биде на задоволително ниво.„Се појави огромен интерес за Свети Стефан од целиот свет“, рече Статис и најави дека лично ќе присуствува на отворањето на хотелот.Тој најави и отворање на два луксузни ресторани на Свети Стефан – „Намос“ и „Зума“.Статис оцени дека Црна Гора е прекрасна земја, но дека предуслов за поголем интерес кај високоплатежните гости е подобра патна инфраструктура, особено подобра авионска поврзаност.„Фокусот треба да биде на унапредување на аеродромите и патиштата. И веста дека доаѓа ‘Бритиш ервејс’ е една од најважните вести за луксузниот туризам“, изјави Статис.На прашањето дали Свети Стефан е најголемиот предизвик во неговата кариера, тој се присети на тешките моменти низ кои поминал.„Со Свети Стефан поминавме низ сè. Се сеќавате на црквата поради која моравме да го затвориме хотелот. Имаше сè и сешто. Но добро е, конечно повторно го отвораме“, рече Статис.Говорејќи за хотелот „Дурмитор“, кој е во сопственост на компанијата „Јану“, тој оцени дека северот на Црна Гора е иднината на туризмот.„Тоа е извонредна дестинација, мислам дека наскоро ќе го отвориме и тој хотел“, рече Статис.Тој му се заблагодари и на Новак Ѓоковиќ, посочувајќи дека неговите контакти биле многу корисни во преговорите, а најави и дека тенисерот ќе присуствува на отворањето на Свети Стефан, кое претходно беше најавено за јуни.

Магазин | пред 4 дена

Вучиќ со обраќање до граѓаните на Црна Гора: „Извинете што ве сакавме повеќе отколку вие нас“

Претседателот на Србија, Александар Вучиќ, во историско обраќање до граѓаните на Црна Гора, во авторски текст објавен на порталот „Борба“, изнесе пет клучни ставови на Србија.На почетокот од текстот, Вучиќ истакна дека одлучил да им се обрати на граѓаните на Црна Гора по повеќегодишните лаги за Србија, нејзиното раководство, односот на Србија кон Црна Гора, како и по години на, како што наведе, „највалкани кампањи“ против него и неговото семејство.Како прва точка ја издвои: „Вистините и лагите за српскиот притисок врз црногорската независност и наводното мешање во внатрешните работи на Црна Гора“.Тој посочи дека со децении се слушаат приказни за мешање на Србија во сите работи во Црна Гора, за политички притисоци на дневно ниво, желба за ширење на територијата на сметка на Црна Гора, ширење големосрпски и антицрногорски идеи и загрозување на државноста на Црна Гора.„Но, како се мешаме и со што ѝ се закануваме на Црна Гора?“, праша Вучиќ.Тој потсети дека Србија ја прифатила секоја одлука на граѓаните на Црна Гора на демократски и цивилизиран начин, вклучително и одлуката за распад на заедничката држава, резултатите од референдумот за отцепување, па сè до влезот на Црна Гора во НАТО.„Ве доживувавме како сестри и браќа и сакавме да живееме во иста држава со вас. Признавам, виновни сме и извинете што ве сакавме повеќе отколку вие нас“, напиша Вучиќ.Како второ клучно прашање, Вучиќ постави: „Дали Србија го загрозувала територијалниот интегритет на Црна Гора или Црна Гора на Србија?“Тој нагласи дека Србија го почитува територијалниот интегритет и суверенитетот на Црна Гора и никогаш не го довела во прашање, додека Црна Гора, како што рече, само две години по напуштањето на државната заедница со Србија, ја прекршила Повелбата на Обединетите нации со признавањето на независноста на Косово.„Не ѝ одзеде Србија 14 проценти од црногорската територија, не бараше Србија ниту Пљевља, ниту Беране, ниту кое било друго место во Црна Гора, ниту ќе бара. Црна Гора, братски, веројатно токму затоа што Србија ја почитува Црна Гора, ги призна Призрен, Грачаница, Дечани и Пеќката патријаршија како дел од некоја друга, а не српска држава. И не се буниме, и понатаму ве сакаме и ве доживуваме како браќа, само немојте да ни зборувате дека ние нешто ви одземаме“, истакна Вучиќ.Потоа праша: „Што тоа Србија направи против Црна Гора, или можеби никогаш не направила?“Одговарајќи на тоа прашање, српскиот претседател посочи дека Србија никогаш, ниту посредно ниту непосредно, не ја обвинила Црна Гора или некого во Црна Гора за геноцид, додека политичари од Црна Гора трипати носеле резолуции за наводен геноцид извршен од Србите.„Патем, Србија смета дека Зоран Гопчевиќ заслужил базенот да го носи неговото име, Србија смета дека жртвите од Лора заслужуваат правда, Србија не ви го бара ниту бродот ‘Јадран’ што го изградил кралот Александар, нема да ја бараме ниту Превлака, па поради сето тоа не заслужуваме почитување, туку презир“, наведе Вучиќ.Тој порача и дека Србија нема да ја менува својата пријателска и братска политика.Четвртата клучна порака до граѓаните на Црна Гора се однесуваше на европскиот пат и прашањето „кој кого сопнува“.Вучиќ истакна дека ѝ посакува на Црна Гора успех на тој пат, и покрај тоа што, како што рече, секој состанок на црногорските функционери започнува и завршува со истакнување на разликите меѓу Црна Гора и Србија.„Ви посакуваме среќа во Европа, во НАТО, секаде каде што сакате. И ќе ви честитаме за сè. И ќе се радуваме на вашите успеси. Само не нè терајте да се радуваме на политика и резултати од политика насочена против Србија и српскиот народ. Сешто сме, мазохисти не сме“, порача Вучиќ.Последната порака на Вучиќ до народот и властите на Црна Гора беше одговор на прашањето – што Србија очекува од Црна Гора и што е подготвена да понуди?„Ја почитуваме и ќе ја почитуваме Црна Гора и нејзините граѓани. Ја напуштивте нашата заедничка фамилија и вашата одлука, повторувам, ја почитуваме. Единствено што ве молиме е, кога станува збор за српскиот јазик и српските национални обележја, да покажете почит кон една третина од вашето население, барем онолку колку што покажувате кон припадниците и политичките претставници на народите кои ви станаа придружни браќа и помагачи на европскиот пат. Само тоа. И ништо повеќе“, наведе Вучиќ.Тој својот авторски текст го заврши со реченицата: „Нека живее пријателството меѓу Србија и Црна Гора“.

Свет | пред 5 дена

Црна Гора и Србија во жестока дипломатска расправија по изјавата на Вучиќ

Вистинска дипломатска расправија избувна меѓу министерствата за надворешни работи на Црна Гора и Србија, откако српскиот претседател Александар Вучиќ соопшти дека нема да присуствува на прославата на 20 години од обновувањето на црногорската независност.Вучиќ изјави дека со прославата се „слави отцепувањето од Србија“ и додаде дека со присуство на таков настан „би си плукнал во лице“.На тоа реагираше црногорското Министерство за надворешни работи, оценувајќи дека Вучиќ продолжува со реторика што не придонесува за добрососедски односи.Од Подгорица порачаа дека Црна Гора не се „отцепила“ од Србија, туку дека двете држави биле рамноправни членки на државната заедница по распадот на СФРЈ.„Црна Гора не ја слави независноста против никого, туку слободно изразената волја на своите граѓани“, соопшти црногорското МНР.Српското Министерство за надворешни работи возврати дека Белград нема да молчи пред „обидите за бришење на историската вистина“ и оцени дека Вучиќ само изнел лично мислење без навреди кон Црна Гора.Потоа следуваше нова реакција од Подгорица, каде повторно беше нагласено дека прославата е посветена на слободата и правото на двете држави самостојно да одлучуваат за својата иднина.Црна Гора на 21 мај ќе одбележи 20 години од обновувањето на независноста, а прославата ќе кулминира со концерт на Рики Мартин во Подгорица.

Свет | пред 5 дена

Српското МНР реагира на нападите од Црна Гора: „Вучиќ не сака да слави одвојување на две братски држави“

Министерство за надворешни работи на Србија реагираше на критиките кои доаѓаат од Црна Гора кон српскиот претседател Александар Вучиќ, оценувајќи дека Подгорица без причина создава повод за јавен напад и им нанесува штета на меѓудржавните односи.Во соопштението се наведува дека Вучиќ „не упатил ниту еден навредлив збор“ кон Црна Гора, туку изнел легитимен став дека не сака да ја слави разделбата на „две блиски и братски држави“.Од српското МНР порачаа дека Србија уште во 2006 година без одлагање ја признала независноста на Црна Гора и воспоставила дипломатски односи, со што, како што наведуваат, покажала почит кон нејзиниот суверенитет, територијален интегритет и европски пат.„Тоа не значи дека Србија треба да молчи пред обидите да се избрише или релативизира историската вистина и фактите“, се наведува во реакцијата.Белград истакнува дека Србија и Црна Гора со векови биле дел од иста држава и имале заедничка историја, народ и судбина.Во соопштението се додава дека Вучиќ не ја оспорувал црногорската независност, туку укажал дека таа не смее да биде изговор за негирање на српскиот идентитет, култура, јазик и вера на дел од граѓаните во Црна Гора.„Неприфатливо е секое потсетување на заедничката историја или загриженост за положбата на Србите во Црна Гора да се претставува како ревизионизам или мешање“, наведува српското МНР.Од Белград порачаа дека Србија останува посветена на развојот на добрососедски односи со Црна Гора, засновани на рамноправност, меѓусебна почит и немешање во внатрешните работи, но оценија дека таквите односи не можат да се градат врз „селективно толкување на историјата и реторика што поттикнува конфронтација“.На крајот од соопштението се наведува дека одбележувањето на обновата на црногорската независност треба да биде можност двете држави да се насочат кон заедничка европска иднина „во која Србите и Црногорците ќе живеат како браќа, а не како странци“.

Балкан | пред 6 дена

Авион паркиран среде ливада во Подгорица - го купил успешен бизнисмен, еве што планира

На ливада во Подгорица веќе неколку месеци се наоѓа паркиран авион од типот „Фокер 100“, кој некогаш бил дел од флотата на националниот авиопревозник „Монтенегро Ерлајнс“.Леталото минатата година било купено на јавна лицитација од бизнисменот Бојан Драгаш, кој живее во САД, но потекнува од Црна Гора.Според најавите, авионoт во иднина би можел да биде претворен во ресторан, со зачувување на неговиот автентичен изглед.Жителите на населбата велат дека биле изненадени кога го виделе авионот на ливадата, но сметаат дека е подобро да биде пренаменет отколку да заврши како старо железо.Леталото со години стоело неискористено на аеродромот во Подгорица, без мотор и дел од опремата, но сопственикот во него гледа потенцијал за уникатен угостителски објект.

Медиасет | пред 1 седмица

Во Црна Гора уапсена малолетничка: Терала девојче да клечи, па додека ја тепала ја снимала со телефон

Црногорската полиција приведе 16-годишна малолетничка од Зета под сомнение дека извршила кривични дела злоставување, неовластено снимање и злоупотреба на туѓа снимка на штета на друга малолетничка.Според информациите од полицијата, инцидентот се случил на 7 мај пред продавница во Подгорица, во присуство на уште четири малолетнички.Осомничената, како што се наведува, ја натерала девојката да клекне и да ѝ се извини, по што ја удрила со отворена дланка по лицето, додека целиот настан го снимала со мобилен телефон.Потоа, наводно, ѝ кажала на жртвата дека снимката ќе ја објави, а подоцна ја споделила со своите другарки.Малолетничката е предадена на државен обвинител во Основното државно обвинителство во Подгорица, кој ќе преземе понатамошни мерки во случајот.

Свет | пред 1 седмица

Земјотрес со јачина од 3,4 степени во Црна Гора

Земјотрес со јачина од 3,4 степени според Рихтеровата скала е регистриран денеска во близина на Морињ, во Бококоторскиот Залив, соопшти Заводот за хидрометеорологија и сеизмологија на Црна Гора.Потресот бил регистриран околу пладне, а епицентарот се наоѓал на осум километри северно од Морињ, на длабочина од 13 километри.Според сеизмолозите, земјотрес со ваков интензитет не можел да предизвика материјална штета во епицентралното подрачје.

Балкан | пред 1 седмица

Трагедија на Скадарското Езеро: Превртен чамец однесе живот, потрага по исчезнато лице

Маж на возраст од околу 40 години загина во саботата навечер во несреќа на Скадарското Езеро, откако се превртел чамец во Плавничкиот канал, јавуваат црногорските медиуми.Според информациите од локалната полициска управа, уште едно лице кое било во чамецот е повредено, додека по трето лице сè уште се трага.„Станува збор за несреќен случај при превртување на чамец. Според досегашните податоци, едно лице го загубило животот, едно се здобило со повреди и се јавило во Ургентниот центар при Клиничко-болничкиот центар, додека по третото лице се трага“, соопштија од полицијата.Надлежните посочуваат дека увидот е во тек, а причините за несреќата засега не се утврдени. За случајот е известен и надлежен обвинител.

Балкан | пред 2 седмици

Иран запре брод со црногорски морнари: „Во тек се преговори“

Иранската национална гарда денеска во Ормускиот теснец запрела трговски брод „MSC Francesca“ на кој пловат четворица црногорски морнари. Ова го потврди црногорскиот министер за поморство Филип Радуловиќ, јавува Anadolu.Во објава на социјалната мрежа X, министерот навел дека од бродот е потврдено оти црногорските морнари, како и останатите членови на екипажот, се во добро здравје и безбедни.Радуловиќ изјавил и дека во тек се преговори меѓу бродската компанија и иранската страна, како и дека надлежните државни органи се во постојан контакт со екипажот.„На нашите морнари и нивните семејства им даваме целосна поддршка. Ќе направиме сè што е во наша моќ за позитивен исход на оваа ситуација и за безбедноста на нашите морнари“, порача Радуловиќ.Според достапните информации, иранските сили и претходно запленувале бродови во Ормускиот теснец. Во еден случај биле задржани два контејнерски брода само неколку часа по продолжувањето на примирјето од страна на американскиот претседател Доналд Трамп. Иранската револуционерна гарда тогаш соопштила дека бродовите биле задржани поради наводно кршење на правилата за пловидба и загрозување на поморската безбедност.

Свет | пред 4 седмици

Уапсен осомничениот за тројното убиство во Подгорица

Осомничениот за тројното убиство во Подгорица, В. М. (25), е уапсен вечерва, официјално соопшти Управата на полицијата на Црна Гора.Тој е уапсен под сомнение дека синоќа со употреба на ладно оружје ги лишил од живот браќата Д. Х. (28) и Н. Х. (27), како и К. М. (56).„Полициските службеници на Управата на полицијата, Регионален центар за безбедност ‘Север’, со континуирана поддршка и соработка со службениците од Регионалниот центар за безбедност ‘Центар’, по спроведени опсежни оперативни активности и прецизно изведена тактичка акција, го лоцираа во потесното градско јадро на Рожаје, на отворен простор, В. М. (25) од Рожаје, осомничен за кривично дело тешко убиство и го лишија од слобода, за што е известен државниот обвинител во Вишото државно обвинителство во Подгорица“, соопштија од полицијата.Од полицијата наведуваат дека осомничениот со кривична пријава ќе биде спроведен во Вишото државно обвинителство во Подгорица на понатамошна постапка.„По спроведување на сеопфатни истражни и доказни дејствија, јавноста ќе биде навремено и транспарентно информирана за сите релевантни околности и понатамошниот тек на постапката, каде што и во оваа фаза е собран доволен број докази и факти кои недвосмислено укажуваат дека осомничениот В. М. е директен извршител на ова кривично дело“, се наведува во соопштението.

Свет | пред 4 седмици

Тројно убиство во Подгорица: полицијата трага по млад маж од Рожаје

Тројно убиство се случило ноќеска во Подгорица, кога млад човек во изнајмен стан убил тројца свои колеги.Црногорската полиција трага по најверојатниот извршител, кого го идентификувала како Вехид Муриќ, млад човек од Рожаје, место на тромеѓето меѓу Црна Гора, Србија и Косово. Полицијата го сомничи дека ги убил тројцата колеги со кои живеел во Подгорица и работел на градежништво, по што побегнал.Црногорските медиуми јавија дека двајца од убиените се браќа, Денис Хот (28) и Незрин Хот (27) од Рожаје, како и уште еден маж чиј идентитет се утврдува. Според соопштението на црногорската полиција, постои сомнеж дека на ова кривично дело му претходеле лични расправии меѓу убиените и осомничениот.„Според прелиминарните информации, кривичното дело најверојатно е извршено со употреба на ладно оружје“, се наведува во соопштението на црногорската полиција.Осомничениот од Рожаје по злосторството заминал во родниот град, каде во семејната куќа извршил насилство врз мајка му. Семејството го пријавило случајот во полиција, по што бил откриен и неговиот злостор во Подгорица.Црногорската полиција интензивно трага по осомничениот и објавила негови фотографии во посебно соопштение, повикувајќи ги граѓаните на Црна Гора да пријават доколку го забележат, со предупредување на претпазливост.

Свет | пред 4 седмици

Свети Стефан повторно се буди: по пет години „под клуч“, елитниот комплекс треба да прими гости најдоцна до јуни 2026

Еден од најпрепознатливите симболи на црногорскиот туризам – град-хотелот Свети Стефан – треба повторно да ги отвори портите за гостите најдоцна до јуни 2026 година, по цели пет години во кои комплексот беше надвор од функција. Повторното активирање доаѓа по усвојување на условите за порамнување меѓу државата и компанијата „Адриатик пропертис“, со што се отвора пат и за завршување на спорот што се водел пред меѓународна институција во Лондон.Црногорскиот премиер Милојко Спајиќ соопшти дека се исполнети и формалните предуслови за повторно отворање на Свети Стефан, оценувајќи дека договореното решение е резултат на интензивни преговори и дека државниот интерес е заштитен, со избегнат ризик од потенцијална штета што би надминала 100 милиони евра.Во пакетот договорени мерки, според најавите, се предвидуваат поповолни финансиски услови за домашните компании „Свети Стефан хотели“ и „ХТП Милочер“. Најавено е зголемување на закупнините, како и индексирање на износите со инфлацијата уште од стартот на работата, при што разликата во пресметаната закупнина треба да биде исплатена без одлагање.Планот, исто така, подразбира продолжување на закупот за период од пет години – колку што комплексот не работеше – со јасна обврска „Адриатик пропертис“ да го отвори хотелот најдоцна до јуни 2026. Во Владата очекуваат дека ова ќе има силен позитивен ефект врз туристичкиот и меѓународниот имиџ на Црна Гора и ќе го означи враќањето на елитниот туризам на една од најпрестижните медитерански локации.Отворањето за летово го потврдија и од компаниите „Аман“ и „Адриатик пропертис“, со најави дека информацијата за точниот датум на повторното стартување ќе биде објавена во најкраток рок.

Магазин | пред 1 месец

Претседателот на Црна Гора, Јаков Милатовиќ во официјална посета на Македонија

Претседателот на Црна Гора, Јаков Милатовиќ, денеска ќе престојува во официјална посета на Република Македонија.Како што информираат од Кабинетот на претседателката Гордана Сиљановска-Давкова, таа ќе го пречека со највисоки државни и воени почести на церемонија во Вила „Водно“.Потоа се предвидени тет-а-тет средба меѓу двајцата претседатели, како и пленарен состанок на македонската и црногорската делегација.Во рамки на посетата ќе биде потпишан и меморандум за соработка меѓу младинските совети при кабинетите на двајцата претседатели.За утре е најавено Милатовиќ да положи венец на гробот на Гоце Делчев во црквата „Св. Спас“ во Скопје.Исто така, Сиљановска-Давкова и Милатовиќ ќе одржат заедничко предавање на Правниот факултет „Јустинијан Први“ при Универзитетот „Св. Кирил и Методиј“ во Скопје.

Македонија | пред 1 месец

(Видео) Снежно невреме парализира дел од Балканот: Затворени училишта и патишта во Словенија, Хрватска и Црна Гора

Во Словенија, Хрватска и Црна Гора, снегот што паѓаше во текот на вчерашниот ден и во текот на ноќта предизвика сериозни проблеми. Затворени се училишта и градинки, додека силните налети на ветер носат сè пред себе. Исто така, затворени се и бројни патни правци.Во Црна Гора снег синоќа наврна во околината на Никшиќ и Цетиње, во Плужине, Шавник, а поинтензивни врнежи имаше на Жабљак, во Колашин и на планините на северот, додека во останатите делови од земјата врнеше повремено силен дожд проследен со налети на ветер.Поради невремето, делови од Цетиње и Никшиќ со часови беа без електрична енергија, додека снабдувањето беше повторно воспоставено во Бар и Херцег Нови, каде исто така имаше прекини во напојувањето.Поради снежните врнежи, сообраќајот бил во прекин на патниот правец Никшиќ – Вилуси околу три часа, бидејќи кај Вилуси заглавиле повеќе камиони, а снег има и на автопатот „Принцеза Ксенија“.Силно невреме, проследено со ветер со брзина поголема од 100 километри на час, синоќа зафати поголем дел од Словенија, уривајќи дрвја, оштетувајќи покриви и оставајќи илјадници домаќинства без струја, додека надлежните служби апелираа граѓаните да не излегуваат од домовите.Најпогодени се регионите Приморска и Горенска, а поради исклучително неповолните временски услови, во повеќе општини е донесена одлука за затворање на училиштата и градинките.Силната бура зафати и делови од Горица и Ајдовшчина, при што ветерот однел делови од покриви на повеќе училишта низ земјата.Во одредени моменти, илјадници корисници низ Словенија останале без електрична енергија, вклучително и во подрачјата на Марибор и Љубљана, додека дефектите на далекуводите предизвикале прекини и во други делови од земјата. Според податоците, најсилните налети на ветер достигнале брзина од 103 километри на час.Поради опасноста, надлежните служби ги повикаа граѓаните да останат во затворени простории и да не излегуваат без неопходна потреба.Во хрватската престолнина Загреб, семафорите не работат, ветерот однел покрив од една зграда и урнал дрвја.Поради опасните временски услови, наставата денеска е прекината во основните и средните училишта во Загреб, одлука донесена од градските власти и Министерството за образование.Силни ветрови дуваат и во крајбрежните подрачја, каде важат забрани за одредени категории возила. Поради снег и зимски услови за возење во Горски Котар и Лика, воведени се ограничувања за камиони со приколки и влечни возила.Поради урагански ветрови, автопатот А1 меѓу јазлите Свети Рок и Поседарје е затворен за сите категории возила.Исто така, нема слободен патен правец за камиони со приколки и влечни возила од внатрешноста кон хрватското приморје и Далмација и обратно, поради зимските услови на автопатот А6, државните патишта и делници низ Горски Котар и Лика.

Свет | пред 1 месец

Трагедија во студентски дом во Црна Гора: Студент падна од четврти спрат и почина

Студент од Поморскиот факултет од Билеќа (19) подлегнал на повредите во Клиничкиот центар на Црна Гора, стекнати по пад од четврти спрат на Студентскиот дом „Спасиќ-Машера“ во Котор, потврди полицијата за порталот RTCG.Тој паднал од прозорецот на домот в петок, 13 март.Поради сериозноста на повредите веднаш бил пренесен во Клиничкиот центар на Црна Гора, каде по шест дена починал.За сега не е познато под кои околности се случила трагедијата.

Свет | пред 2 месеци

Филков од Подгорица: Македонија и Црна Гора ја зајакнуваат соработката во реформите во правосудството

Министерот за правда , Игор Филков, во Подгорица оствари билатерална средба со министерот за правда на Црна Гора, Бојан Божовиќ.На средбата беше потврдена силната заложба на двете држави за продлабочување на соработката во областа на владеењето на правото, независноста на судството и спроведувањето на реформите во правосудниот систем, во контекст на процесот на европска интеграција.Посебно внимание беше посветено на унапредувањето на билатералната соработка меѓу Црна Гора и Република Северна Македонија, при што беше оценето дека односите меѓу двете држави ги карактеризираат пријателство, меѓусебна доверба и континуирана поддршка во области од заеднички интерес.Министрите се осврнаа и на досегашните средби и постигнатите резултати од соработката, при што беше истакнато дека постои простор за нејзино понатамошно продлабочување, особено преку поинтензивна размена на искуства, добри практики и институционална соработка во рамки на реформските процеси и усогласувањето со европското законодавство.Филков и Божовиќ потенцирааа дека соработката меѓу двете земји претставува значаен придонес кон стабилноста и европската перспектива на регионот, изразувајќи заедничка волја за понатамошно интензивирање на билатералните односи во областа на правдата.

Македонија | пред 2 месеци

Во Подгорица фатен возач со 26 килограми марихуана

По потера, полицијата во Подгорица го уапси П.Г. (24) од црногорскиот град Тузи и во возилото што го управувал пронашла 26 килограми марихуана.Како што соопшти Полициската управа, тој возел под дејство на кокаин и марихуана.Службеници од Полициската станица за безбедност во сообраќајот, додека вршеле контрола во населбата Тушки пут, се обиделе да запрат возило „Мерцедес“ со регистарски таблички Беран поради пречекорување на максималната дозволена брзина, но возачот не застанал на издадениот знак „стоп“, туку продолжил да се движи. По кратка потера, возилото било фатено и запрено во населбата Стари Аеродром, каде што било утврдено дека го управувал П.Г. (24) од Тузи, за кого со тестирање е потврдено дека го управувал возилото под дејство на кокаин и марихуана“, соопшти полицијата.При претрес на возилото пронајдени се 25 ПВЦ пакувања со околу 26 килограми опојна дрога марихуана.Согласно наредбата на државниот обвинител при Вишото државно обвинителство во Подгорица, П.Г. е лишен од слобода поради сомнение дека сторил кривично дело неовластено производство, држење и пуштање во промет наркотични дроги и денес ќе биде приведен кај надлежниот обвинител за понатамошно постапување“, беше објавено од црногорските служби.

Свет | пред 2 месеци

Авион со евакуирани црногорски државјани слета во Подгорица

Авион со нешто повеќе од 70 евакуирани црногорски државјани слета во Подгорица. Со авионот пристигнаа црногорски државјани кои туристички престојувале во Египет и Јордан.Министерот за финансии на Црна Гора, Новица Вуковиќ, изјави дека продолжуваат активностите со цел во среда и четврток да бидат вратени уште околу 200 патници кои изразиле желба да се вратат.Сега апсолутно ги продолжуваме активностите, имаме и дополнителни средства за да вратиме околу 200 патници од Блискиот Исток во нашата земја. Министерството за надворешни работи имаше соработка на највисоко ниво и граѓаните се лоцирани на најдобар можен начин, барем оние што сакаат да се вратат“, изјави Вуковиќ, пренесе RTCG.

Свет | пред 2 месеци

(Фото) Црногорка украла 70.000 евра: На дечкото му купила Голф 7, а другиот дел го криела зад кујната

Полицијата во црногорскиот град Плав ја уапси 26-годишната Р.Џ. под сомнение дека од 70-годишник украла 70.000 евра, 1.100 долари и 300 швајцарски франци. Случајот е решен за само еден ден по пријавата, а полицијата пронашла повеќе од половина од украдените пари и автомобил кој бил купен со нив.Кражбата се случила крајот на јануари, а пријавата е поднесена на 19 февруари. Полицијата во многу краток рок ја идентификувала и уапсила осомничената, а во нејзиниот стан во пронашла и одзела голем дел од украдените пари, како и возилото купено со нив.Според полицијата, се сомнева дека Р.Џ. на 24 јануари околу 19 часот, искористувајќи претходно стекната доверба, влегла во семејната куќа на 70-годишникот чија врата не била заклучена.„Се качила по скалите на катот на куќата и од спалната соба, од повеќе места – од џебовите на сакото – украла неколку коверти во кои имало вкупно 15.000 евра, 1.100 долари и 300 швајцарски франци. Потоа, како што се сомнева, знаејќи каде се наоѓа сефот, го украла и него. Откако ја напуштила куќата со парите и сефот, во својот дом со алат и физичка сила го отворила сефот и од него земала уште околу 55.000 евра“, соопшти полицијата.Осомничената, според сомнежите, парите ги ставила во пластична кутија и ги скрила во шуплина во ѕидот под скалите, зад кујнските елементи во својот стан.„Парите кои ги криела на добро замаскирано и невидливо место, почнала да ги троши на патувања, луксузна облека, накит и подароци. Дел од парите – 11.000 евра – му ги дала на својот партнер, кој со нив купил возило VW Golf VII“, наведува полицијата.По пријавата, полицијата во рок од еден ден го открила идентитетот на осомничената. При претрес на нејзиниот дом, во скривница пронашле 36.850 евра.Полицијата соопшти дека пронајдените пари ќе бидат вратени на сопственикот, а одземениот автомобил, купен со украдените пари, ќе биде вратен по спроведување на процедурите. Осомничената ќе биде изведена пред државниот обвинител во Основното државно обвинителство во Плав.

Свет | пред 2 месеци

Николоски најави можни нови авиолинии меѓу Македонија и Црна Гора

Ве информираме, заменик претседателот на Владата и министерот за транспорт Александар Николоски оствари работна средба со амбасадорот на Црна Гора во Република Македонија, Зоран Миљаниќ.На средбата се разговараше за актуелните состојби во двете земји, притоа акцент се стави за можноста за воспоставување на нови авиолинии и подобро поврзување на врските меѓу двете земји.Вицепремиерот го запозна амбасадорот Миљаниќ со инфраструктурните проекти како и со реформските процеси што се спроведуваат во насока на исполнување на европската агенда, притоа беше истакната силната инвестициска активност во изградба и модернизација на меѓународните коридори, кои имаат силно влијание врз регионалниот развој и соработка.На средбата се разговараше и за зголемување на економската соработка, трговската размена како и соработката во туризмот.@Со амбасадорот разговаравме за подобрување на билатералните односи особено за можноста за воспоставување на авио поврзување меѓу двете земји.  Исто така отворивме теми и за унапредување на трговската соработка, туризмот и се што е во интерес на  двете земји. Црна Гора е наша пријателска земја и очекуваме дека во име на таквиот партнерски однос, соработката меѓу двете земји ќе продолжи и во наредниот период”, истакна вицепремиерот Николоски.Двајцата соговорници се согласија на интензивирање на  понатамошната соработка, посебно во делот на зголемување на економските односи меѓу Македонија и Црна Гора.

Македонија | пред 3 месеци

Кнежевиќ за состојбата во Црна Гора: Ќе дојде до сериозни политички турбуленции

Претседателот на Демократската народна партија на Црна Гора (ДНП), Милан Кнежевиќ, изјави дека владата на Милојко Спајиќ формално сè уште има мнозинство откако ДНП ја напушти власта, но додаде дека очекува суштински да дојде до турбуленции.„Суштински ќе дојде до сериозни политички турбуленции, бидејќи е јасен нашиот став дека српскиот јазик треба да биде нормиран како службен и изедначен со црногорскиот, дека треба да дојде до измени и дополнувања на Законот за државјанство и дека народното знаме, тробојката од Уставот на Кнежевината од 1905 година, треба да биде нормирана во Законот за државни симболи и да дојде до сеопфатен дијалог со граѓаните“, изјави Кнежевиќ за ТВ Пинк.Тој рече дека ставот на Спајиќ, според кој наводно не дозволува уцени и поради кој наводно ги одбил барањата на ДНП, е стекнат преку консултации на црногорскиот премиер со германскиот амбасадор и амбасадорот на ЕУ во Црна Гора.„Потоа господинот Спајиќ тоа го верификуваше и на владата, велејќи дека ова се прашања кои треба да ги решаваме преку работни групи. А знаете, кога во Црна Гора ќе формирате работна група, тоа ви е како кружни текови околу кои се вртите и никогаш не можете да стигнете дома“, рече Кнежевиќ.Односот на Хрватска кон Црна ГораКоментирајќи го односот на Хрватска кон Црна Гора, Кнежевиќ праша дали со Црна Гора владеат тие двајца амбасадори и министерот за надворешни работи на Хрватска, Гордан Грлиќ Радман.„Хрватите од нас бараат да им го вратиме бродот ‘Јадран’, да им ја дадеме Превлака, да платиме воена отштета за нешто што не се случило во Моринј, да им дадеме некаква земја во Бока Которска, секојдневно им забрануваат влез во Хрватска на нашите интелектуалци и свештени лица, испорачуваат нови барања, а Црна Гора безусловно, покорно прифаќа сè што од неа го бараат Грлиќ Радман, Пленковиќ и оваа хрватска десница“, рече Кнежевиќ.Тој потсети дека неговата партија ја повлекла поддршката и за градоначалникот на Подгорица, Саша Мујовиќ, кој ќе мора или да бара поддршка од Демократската партија на социјалистите, или во Подгорица ќе мора да се распишат вонредни избори, што, како што вели Кнежевиќ, дополнително ја усложнува состојбата.

Свет | пред 3 месеци

Претставниците на ДНП најавија оставки од функциите во Владата на Црна Гора

Претставниците на Демократската народна партија (ДНП) во Владата на Црна Гора, Милун Зоговиќ и Маја Вукиќевиќ, најавија дека ќе поднесат оставки на функциите во извршната власт. Ова вчера го соопшти Зоговиќ на прес-конференција.Одлуката следува по вчерашната седница на Владата, на која премиерот Милојко Спајиќ истакна дека прашањата за идентитетот и измените на Уставот припаѓаат на надлежност на Собранието, при што се повика и на документот „Барометар 26“.Претседателството на ДНП заседава денес напладне.Вукиќевиќ ја извршува функцијата министерка за сообраќај, а Зоговиќ е потпретседател на Владата задолжен за инфраструктура и регионален развој.„На вчерашната седница на Владата разменивме мислења во врска со нашата иницијатива, но премиерот истакна дека со овие прашања треба да се занимава Собранието на Црна Гора. ДНП ги презентираше своите барања, а денес на седницата на Претседателството подетално ќе разговараме и ќе поднесеме извештаи од седницата на Владата. Ќе бидат усвоени и заклучоци“, изјави Зоговиќ.Тој појасни дека иницијативите на ДНП се засновани на коалицискиот договор и се однесуваат на уставно нормирање на српскиот јазик како службен, законско нормирање на двојното државјанство, законско нормирање на историската тробојка, како и сеопфатен дијалог на Главниот град и Општина Зета со жителите на Ботун.„Имавме седница на Владата на која немаше можност за предлагање измени на дневниот ред, бидејќи премиерот зазеде таков став. Премиерот Спајиќ истакна дека смета оти со оваа иницијатива треба да се занимава Собранието, а не Владата, и дека ни дава некакво зелено светло и одреден степен на разбирање“, нагласи Зоговиќ.Тој додаде дека целта на иницијативата е надминување на долгогодишните поделби и отстранување на дискриминацијата која, како што наведе, е последица на поранешниот диктаторски режим.

Свет | пред 3 месеци

Ер Србија воведува тарифа само со рачен багаж за летовите кон Црна Гора

Националната авиокомпанија Ер Србија од денеска воведува економска тарифа само со рачен багаж, односно „Economy Light“ тарифа, на линиите Белград – Тиват и Белград – Подгорица, соопшти компанијата.Со оваа тарифа, на патниците им се нудат поедноставни и поевтини опции за пократки патувања. „Economy Light“ е наменета за патници кои патуваат само со рачен багаж и сакаат квалитетна услуга по достапна цена.Тарифата е особено погодна за викенд-патувања, пократки одмори, како и чести деловни патувања помеѓу Србија и Црна Гора, со максимална флексибилност и контрола на трошоците.Воведувањето на новата тарифа овозможува поголем избор и дополнителна вредност за патниците, при што се задржува континуиран квалитет и сигурност на услугата. Додатните опции се дел од поширок бизнис-план на компанијата за модернизација и усогласување со актуелните очекувања на патниците, со цел зајакнување на конкурентноста и подобрување на искуството при патувањето.

Магазин | пред 3 месеци

Црногорските превозници ги прекинуваат граничните блокади по преговорите со Владата

Здружението на превозници на Црна Гора ќе ги прекине граничните блокади на товарниот сообраќај.Ваквата одлука Здружението ја донесе по преговорите со Владата.Договорено е, меѓу другото, дека на транспортните компании ДДВ ќе им се враќа во законскиот рок, дека ќе биде изготвен предлог за бенифициран работен стаж за возачите, дека за повисок поврат на акцизите ќе се разговара со европските партнери, како и за одредбите на ЕТИАС, а ќе биде продолжено и работното време на одредени гранични инспекции.

Свет | пред 3 месеци