ИТАЛИЈА

Разоткриен нелегален систем за стриминг што им нанел штета од 300 милиони евра на Нетфликс, Дизни+, Спотифај, Скај и ДАЗН

Италијанската финансиска полиција Гвардија ди Финанца соопшти дека разбила софистицирана пиратска мрежа за стриминг која им нанела штета од околу 300 милиони евра на компаниите Нетфликс, Дизни+, Спотифај, Скај и ДАЗН.Според властите, мрежата користела технолошки напреден систем поврзан со апликацијата „Синемагоал“, преку која илјадници корисници добивале нелегален пристап до заштитени содржини.Истражителите откриле дека виртуелни сервери во Италија на секои неколку минути пресретнувале и повторно емитувале кодови за пристап од легални претплати регистрирани на лажни профили. На тој начин биле заобиколувани безбедносните системи на стриминг-платформите.Во акцијата, спроведена во соработка со Евроџаст, биле запленети сервери во странство на кои се чувале податоците за дешифрирање и изворниот код на апликацијата. Паралелни операции биле изведени и во Франција и Германија.Полицијата открила и користење на нелегални уреди за стриминг, познати во Италија како „пецото“. За околу 1.000 идентификувани корисници ќе бидат изречени парични казни од 154 до 5.000 евра.

Свет | пред 1 ден

Земјотрес со јачина од 4,4 степени го погоди Неапол

Земјотрес со јачина од 4,4 степени според Рихтеровата скала утрово го погоди регионот на Неапол во Италија.Потресот бил регистриран во 5.51 часот, а силно бил почувствуван во Неапол и околните градови, пренесува агенцијата Анса.Според податоците на Европско-медитеранскиот сеизмолошки центар, епицентарот бил на длабочина од три километри, на околу 15 километри југозападно од Неапол.Засега нема пријави за материјална штета или повредени лица.

Свет | пред 2 дена

(Видео) Турист скокна во Фонтаната ди Треви, Италијанците бараат построги казни

Турист од Нов Зеланд предизвика бурни реакции во Италија откако скокна и се капеше во познатата Фонтана ди Треви.Триесетгодишниот турист, облечен во фармерки, маица и чевли, влезе во фонтаната и пливаше и покрај предупредувањата од полицијата да излезе.На крајот, тој беше казнет со 500 евра и доби забрана за враќање на локацијата.Снимката од инцидентот брзо се прошири на социјалните мрежи, а многу Италијанци побараа значително построги казни за туристите кои се однесуваат несоодветно.Инцидентот се случи само неколку дена по тепачка меѓу две римски банди во близина на фонтаната, што дополнително отвори дебата за безбедноста околу една од најпосетуваните туристички атракции во Рим.Фонтаната е под 24-часовен полициски надзор, а од февруари туристите плаќаат по две евра за пристап до базенот.Роберто Гуалтиери претходно изјави дека системот со билети бил успешен и дека средствата се користат за одржување на културното наследство.Фонтаната ди Треви, изградена во 1762 година, е една од најпознатите знаменитости во Италија, а туристите често се инспирирани од сцената на Анита Екберг од филмот La Dolce Vita.

Свет | пред 4 дена

(Вознемирувачко видео) Автомобил удри во пешаци, се заби во продавница, па возачот нападна минувач со нож

Седум лица се повредени во саботата кога автомобил со голема брзина се забил во пешаци во центарот на северниот италијански град Модена, соопшти полицијата.Полицијата наведе дека возачот, маж во триесеттите години, е уапсен и дека повеќе нема опасност.Претходно италијанските медиуми јавија дека возилото по ударот во пешаците се забило во излог на продавница, а возачот потоа со нож нападнал минувач кој се обидел да го запре.

Свет | пред 6 дена

(Видео) Пукале во воздух и мавтале со „калашникови“ за време на трка со коњи

Снимка од илегална трка со коњи на Сицилија, на која се гледа како присутните пукаат во воздух и мавтаат со „калашникови“, предизвика полициска истрага и заплена на животни.Видеото, кое наводно било снимено минатиот петок, прикажува двајца џокеи кои со голема брзина управуваат коњски запреги по селски патишта во местото Палагонија, во близина на Катанија.Зад нив се движеле десетици лица на скутери, додека дел од присутните пукале во воздух.Снимката на социјалните мрежи ја објавил активистот за права на животните, Енрико Рици.Полицијата соопшти дека по добиените пријави започнала истрага во квартот Сан Кристофоро во Катанија, по што двајца мажи на возраст од 40 и 45 години биле пријавени во обвинителството.Во акцијата биле извршени контроли во повеќе штали, а коњите користени во трката биле запленети и сместени на безбедно.Според италијанските медиуми, истрагата продолжува, а неколку лица биле приведени на распит.Илегалните трки со коњи и натаму се чест проблем на Сицилија, но и во Калабрија и Кампанија. Претходни истраги покажале дека ваквите настани често ги организираат мафијашки семејства поврзани со Коза Ностра, Камора и Ндрангета.Организациите за заштита на животните предупредуваат дека коњите често се изложени на насилство, нехигиенски услови и користење забранети супстанци.

Свет | пред 1 седмица

(Видео) Пастелни куќи и тесни улици: малото село Теларо изгледа како од разгледница

На листата на најубави мали, скриени места во Европа посебно се издвојува рибарското село Теларо, скриено на лигурискиот брег на Италија.Иако многу туристи го заобиколуваат во брзање кон попознатите дестинации, токму таа дискретност и мир го прават едно од најавтентичните приморски катчиња во Италија.Теларо се протега долж стрмни карпи што се спуштаат директно во морето, а неговите куќи во пастелни бои изгледаат како да израснале од самиот пејзаж.Тесни камени улици, скали и мали плоштади создаваат лавиринт во кој лесно се губи чувството за време, што е и дел од неговиот шарм.Ова мало рибарско село сè уште живее во ритамот на морето. Локалните рибари секојдневно излегуваат на море, а свежата риба и морските плодови се дел од секојдневната кујна во малите таверни што гледаат кон брегот.Токму таа поврзаност со традицијата му дава на Теларо посебен, речиси непроменет карактер. Покрај природната убавина, селото е познато и по својата атмосфера на тишина и опуштеност.Нема големи хотели ниту бучни туристички зони, што го прави идеално место за оние што бараат автентично медитеранско искуство далеку од гужвите.Заради спојот на природа, архитектура и едноставен начин на живот, Теларо сè почесто се појавува на листите на најубави скриени дестинации во Европа.Сепак, и понатаму успева да го задржи својот мир и идентитет, што го прави вистинско мало богатство на лигурискиот брег.

Магазин | пред 2 седмици

Италија со највисоко загадување со PM2.5 честички во Европа

Италија, земја позната по „слаткиот живот“, се соочува со сериозен еколошки проблем: највисоки локални концентрации на опасни PM2.5 честички во Европа, покажува најновиот извештај на Европската агенција за животна средина (EEA). Овие ситни честички прашина продираат длабоко во белите дробови и крвотокот и се поврзуваат со сообраќај, индустриски постројки, согорување фосилни горива и шумски пожари.Според податоците за периодот 2024–2025 година, највисоки годишни просечни вредности се измерени во јужна Италија. Градовите Ceglie Messapica и Torchiarolo забележале 117 и 113 микрограми на кубен метар, што значително ја надминува дозволената граница на Европската унија од 25 микрограми.Експертите објаснуваат дека зимското согорување на биомаса, особено во домашни печки и камини, има клучна улога во наглите зголемувања на загадувањето. Дополнително, атмосферските услови во студените месеци го отежнуваат разнесувањето на штетните честички поради пониските слоеви на атмосферата кои ја задржуваат загаденоста блиску до земјата.Освен јужниот дел, сериозен проблем е и северна Италија, како индустриски центар со високи годишни концентрации на честички кои се приближуваат до граничните вредности. Извештајот посочува дека надминувања на европските стандарди се регистрирани и во други земји, меѓу кои Полска, Хрватска, Босна и Херцеговина, Србија, Македонија, Романија и Турција.Загрижувачки податоци се забележани и во Данска, каде во Копенхаген е измерена исклучително висока концентрација, што укажува дека проблемот со загадувањето не е ограничен само на индустриски или јужноевропски региони.Извештајот укажува и на поврзаноста меѓу долготрајната изложеност на PM2.5 честички и зголемена смртност, при што најпогодени се земјите од Балканот и источна Европа. Италија е меѓу земјите со повисоки стапки, додека најниски вредности се регистрирани во северна Европа.И покрај одредени подобрувања, повеќе од девет од десет Европејци се изложени на нивоа на загадување над препораките на Светската здравствена организација, која поставува многу построга граница за PM2.5 честичките.Европската агенција за животна средина предупредува дека покрај PM2.5, значајни загадувачи се и PM10 честичките, како и приземниот озон и бензо(a)пиренот, кои дополнително го загрозуваат здравјето.Експертите препорачуваат ограничување на проветрување во периоди на сообраќаен пик, користење прочистувачи на воздух и избегнување активности на отворено кога загадувањето е високо, како и следење на податоците во реално време преку апликации.

Свет | пред 2 седмици

Колосеумот ја затегнува контролата врз продажбата на билети - суспендирани 30 туристички оператори

Управата на римскиот Колосеум воведе нова процедура за продажба на билети, со цел да се справи со измамниците, како и суспензија на некои туристички оператори, пренесуваат локалните медиуми.Како што наведува Roma Today, од денес билетите за Колосеум, Римски форум и Палатин, кои важат 24 часа, ќе бидат достапни исклучиво на билетарницата на плоштадот Колосеум, каде услугата ќе биде подобрена.Билетите означени како Forum Pass SUPER ќе бидат достапни на билетарниците на плоштадот Largo della Salara Vecchia и во Римскиот форум 1.Како што е предвидено со новите мерки, 18 отсто од билетите достапни за влез во Колосеумот, кој има ограничен капацитет, ќе се продаваат секој ден физички, на лице место.Како што наведува Roma Today, досега измамниците ги купувале овие билети, а потоа ги препродавале на туристите, веднаш пред метро-станицата Колосеум.Измамниците така ги намамувале странците да набават билети преку ред, но тоа повеќе нема да биде можно.Целта на новите мерки е, со концентрирање на физичката продажба на билети на една локација, полесно да се обезбеди никој да не може да ги измами туристите кои доаѓаат да го посетат Колосеумот.Воведувањето на суспензија на акредитацијата за 30 туристички оператори е исто така неизбежна мерка, наведоа од управата на Колосеумот.Станува збор за поединци кои онлајн купуваат големи количини билети наменети за пошироката јавност, наместо да ги купуваат преку посебен онлајн канал за туристички оператори.За да ги заобиколат прописите, овие оператори наведувале лажни имиња, како што се Pipo Franco, Dua Lipa и други познати личности.Благодарение на анализа на IP адреси, управата на археолошкиот парк ги идентификувала и во наредните денови ќе ја суспендира нивната акредитација. Се очекуваат и финансиски казни, кои дополнително ќе бидат утврдени.Почнувајќи од 9 мај, ќе се применува и нова процедура за промена на името на лицето кое резервира и купува билет за Колосеум.Според новата процедура, сега ќе биде потребно да се испрати мејл, а промените ќе бидат дозволени само во три специфични случаи, и тоа правописна грешка, документирана причина од виша сила, како што е болест или смрт на блиска личност, или погрешно купен билет, како на пример билет по полна цена наместо по намалена.Како што наведоа од Колосеумот, ова ограничување има за цел да ги спречи неовластените агенции кои купуваат билети, а потоа ги препродаваат.

Магазин | пред 2 седмици

„Градот со две мориња“ е скриена тајна на Италија: Приморски рај кој туристите сѐ уште не го откриле

Сместен на брегот на Лигурија, меѓу познатите туристички места како што се Џенова и Чинкве Тере, Сестри Леванте важи за едно од најшармантните приморски места во Италија.Овој мал град во Италија освојува на прв поглед со комбинација од пастелни куќи, кристално чисто море и опуштена атмосфера која го издвојува од пренатрупаните туристички дестинации.Она по што Сестри Леванте е уникатен е неговата положба на тесен полуостров кој дели два прекрасни заливи. Тоа се Baia del Silenzio (Залив на тишината) и Baia delle Favole (Залив на бајките).Првата е позната по мирната, речиси романтична атмосфера и се смета за една од најубавите плажи во Италија, додека втората е пожива и погодна за семејства и активен одмор.Името Baia delle Favole не е случајно. Градот бил инспирација за познатиот дански писател Ханс Кристијан Андерсен, кој престојувал тука за време на своите патувања.Во негова чест, во градот секоја година се одржува фестивал посветен на бајките. Тоа дополнително го нагласува уметничкиот и културниот карактер на ова место.За разлика од погламурозните дестинации како Портофино, Сестри Леванте го задржал автентичниот дух на рибарско место. Тесните улички на стариот град, локалните ресторани со свежи морски плодови и опуштениот ритам на живот го прават идеален за патници кои бараат помирно и поавтентично доживување на Италија.Благодарение на одличната поврзаност, Сестри Леванте е совршена почетна точка за обиколка на целиот регион Лигурија.Во непосредна близина се наоѓаат живописните села Чинкве Тере, додека Џенова е оддалечена помалку од еден час возење. Оваа комбинација на мир и достапност го прави сѐ попопуларен избор меѓу патниците од Европа.Ако барате дестинација што нуди спој на природна убавина, историја и автентична италијанска култура, Сестри Леванте е место што треба да се посети што поскоро.Без преголема гужва, овој град сѐ уште ја чува својата автентичност. Токму онаа вистинска автентичност која во популарните дестинации сѐ повеќе се губи.

Магазин | пред 2 седмици

(Видео) Таормина: Скриен бисер на Сицилија што го одзема здивот

На источниот брег на Сицилија, над Јонското Море, сместена е Таормина, едно од најубавите и најпосетените места на островот.Овој шармантен град е познат по спојот на историја, спектакуларни пејзажи и медитерански начин на живот, кој повторно ги инспирира посетителите.Таормина со децении привлекува патници од целиот свет, од уметници и јавни личности до обични туристи во потрага по совршен одмор. Нејзината позиција на карпа нуди незаборавен поглед на морето и моќниот вулкан Етна, што ја прави единствена дестинација на Медитеранот.Она што ја издвојува Таормина од другите локации е нејзината атмосфера. Зрачи со спој на елеганција, историја и опуштеност. Тесните камени улици, богатата вегетација и мирисот на морето создаваат амбиент што остава силен впечаток на секој посетител.Градот е познат и по пријатната клима, одличните ресторани и луксузните хотели, но и по тоа што нуди искуство што одговара на различни буџети. Токму таа комбинација ја прави Таормина привлечна и за романтични патувања и за семеен одмор.Една од најпознатите атракции во Таормина е, секако, Театро Антико ди Таормина, антички театар од периодот кога градот бил грчка колонија. Тој и денес го одзема здивот со погледот кон морето и Етна. Ова место често е домаќин на различни културни настани и фестивали, што дополнително придонесува за неговата популарност.Прошетката по главната улица Корзо Умберто нуди можност за уживање во локалните продавници, кафулиња и галерии. Таму се наоѓа и Пјаца IX Априле, плоштад со еден од најубавите панорамски погледи во градот.Во подножјето на градот се наоѓа познатиот остров Изола Бела, природен резерват поврзан со копното со тесен песочен појас. Ова место е идеално за капење, нуркање и уживање во кристално чистото море.Плажите во околината на Таормина се познати по својата убавина и чистата вода, а посетителите можат да избираат помеѓу уредени плажи и скриени заливи.Таормина е позната и по богатата културна сцена, но и како омилена дестинација за филмски и уметнички настани. Секоја година тука се одржуваат фестивали што собираат уметници од целиот свет.Освен тоа, градот често бил инспирација за писатели и сликари, а неговата единствена комбинација на природа и архитектура остава силен впечаток. Токму поради тоа многумина го сметаат за едно од најубавите места на Сицилија.

Магазин | пред 2 седмици

Мелони: Не се согласувам со повлекување на американските трупи од Италија

Италијанската премиерка Џорџа Мелони изјави дека нема да поддржи евентуална одлука на американскиот претседател Доналд Трамп за повлекување на американските војници од Италија.„Тоа е одлука која не зависи од мене и со која лично не би се согласила“, им рече Мелони на новинарите во ерменската престолнина Ереван, на маргините на самитот на Европската политичка заедница.Американскиот претседател минатата недела беше прашан дали Вашингтон ќе разгледа повлекување на своите војници од Италија и Шпанија, а Трамп одговори „веројатно“.„Италија воопшто не ни помогна, а Шпанија беше ужасна, апсолутно ужасна“, им рече на новинарите во саботата.Пентагон во петокот објави дека САД ќе го намалат своето воено присуство во Германија за 5000 војници, во својата најголема европска база.Трамп во саботата изјави дека бројот на војници во Германија ќе го намали за „далеку повеќе“ од 5000.Трамп се закануваше дека ќе го намали бројот на американските војници во Германија и во други европски земји за време на двата свои мандати во Белата куќа, тврдејќи дека сака Европа да преземе поголема одговорност за сопствената одбрана наместо да зависи од Вашингтон.

Свет | пред 2 седмици

Речиси 40% од Италијанците чувствуваат потреба за пауза од социјалните мрежи

Речиси четири од десет Италијанци (38,1%) почувствувале потреба да направат „детоксикација“ и пауза од користењето на социјалните мрежи така што ќе ги користат помалку, ќе избришат профил или апликација.Во исто време, според извештајот изработен во соработка со групата Интеза Санпаоло, Медијасет, РАИ и ТВ2000, само 15,3 отсто од испитаниците изјавиле дека редовно прават паузи од социјалните мрежи, пренесува италијанската агенција Анса.Од оние кои почувствувале потреба да се исклучат од социјалните мрежи, повеќе од една четвртина (25,6 отсто) рекле дека тоа го направиле затоа што им одвлекувале премногу внимание од секојдневните активности.Понатаму, 20,6 отсто од испитаниците пријавиле потреба да одвојат време за себе и активности надвор од мрежите, додека 17,8 отсто признале дека имаат чувство на зависност од нивното користење.Младите на возраст од 14 до 29 години продолжуваат почесто да ги користат социјалните мрежи, и покрај благ пад, а меѓу нив 74,8 отсто изјавиле дека користат Инстаграм, што е за 3,3 отсто помалку во однос на 2024 година.Платформата Јутјуб ја користат 76,9 отсто од Италијанците, во споредба со 77,6 отсто претходната година, додека ТикТок бележи благ пораст со 64,5 отсто корисници оваа година, наспроти 64,2 отсто минатата година.

Свет | пред 2 седмици

Италијански полицајци ѝ зготвија оброк на осамена старица по итен повик

Италијанската полиција во Фиренца покажала хуманост по итен повик од осумдесет и седумгодишна жена која, чувствувајќи се осамено и изнемоштено, побарала помош затоа што била гладна и не можела да си зготви храна. Жената, која живеела сама и имала негувателка, останала без поддршка откако нејзиниот старател не се појавил, па по неколку часа неизвесност одлучила да повика итни служби.Таа им објаснила на операторите дека е уморна, гладна и дека не може да готви поради болка во раката, по што добила смирувачки одговор дека помошта е на пат. Кога полицајците пристигнале, вратата од станот не била отворена, па со помош на сосед успеале да влезат и ја пронашле жената сама во нејзината соба. Ја сместиле на удобно столче и потоа, наместо веднаш да заминат, одлучиле да ѝ помогнат на многу поинаков начин.Полицајците, идентификувани како Антонио и Џузепе, отишле во кујната и ѝ подготвиле топол оброк со тестенини, конкретно равиоли со доматен сос, со што ѝ обезбедиле основна грижа и утеха во момент на голема ранливост. Настанот повторно ја отвора темата за осаменоста кај постарите лица, особено во услови на социјална изолација, загуба на блиски и намалена подвижност.Ова не е изолиран случај, бидејќи и во минатото италијанските полицајци се вклучувале во помош на постари граѓани во слични ситуации. Во 2016 година, во Рим, полицијата интервенирала по повик од постар брачен пар во неволја и тогаш исто така подготвила едноставен оброк, при што поминале време и во разговор со нив.Ваквите примери се посочуваат како потсетник дека и малите хумани гестови можат да имаат големо значење, особено за најранливите членови на општеството.

Свет | пред 2 седмици

Трамп се закани со повлекување на американските војници од Италија и Шпанија

Американскиот претседател Доналд Трамп се закани со повлекување на американските војници од Италија и Шпанија, само еден ден откако изјави дека размислува за намалување на бројот на војници стационирани во Германија, пренесува „Гардијан“.Заканата кон Германија следуваше откако германскиот канцелар Фридрих Мерц изјави дека САД биле „понижени“ од Иран, како и по повеќенеделните критики на Трамп кон сојузниците од НАТО поради, како што наведе, недоволната поддршка за повторно отворање на Ормускиот теснец.Шпанскиот премиер Педро Санчез од самиот почеток се спротивставува на американско-израелските воени активности против Иран, додека Рим се обидуваше да балансира до крајот на март, кога одби да дозволи користење на воздушна база на Сицилија за американски авиони што пренесувале оружје.На прашање дали размислува за повлекување на војниците од Италија и Шпанија, Трамп одговори дека тоа е можно, додавајќи дека овие земји, според него, не дале доволна поддршка.Италијанскиот министер за одбрана, Гвидо Крозето, изјави дека не ги разбира мотивите на Трамп и ги отфрли обвинувањата дека Италија не помогнала, особено во делот на поморската безбедност. Тој нагласи дека европските бродови не го користеле Ормускиот теснец на начинот што го тврди Трамп и дека Италија понудила учество во мисии за заштита на пловидбата.Во Италија се распоредени околу 13.000 американски војници во неколку бази, додека Шпанија засега нема официјална реакција. Сепак, Мадрид претходно одби да дозволи користење на заеднички воени бази за напади врз Иран и беше меѓу најгласните критичари на американската политика во рамки на Европската унија.Според податоците, на крајот од минатата година во Европа биле стационирани околу 68.000 американски војници, од кои повеќе од половината – околу 36.400 – во Германија.

Свет | пред 3 седмици

(Видео) Не наседнувајте: Ова е најчестиот трик врз туристи во Рим

Турист во Рим наседнал на измама со сладолед, па на крајот платил сметка од 17 евра, што е класична замка за неискусни посетители, каде љубезни продавачи и наизглед безопасна понуда брзо прераснуваат во непријатно изненадување.Семејниот одмор во Рим добил горчлив вкус откако секојдневното купување сладолед се претворило во лекција која, како што велат, многу туристи ја учат на потешкиот начин. Еден турист на TikTok ја обвинил слаткарницата дека го измамила така што ја удвоила цената без предупредување, а неговата објава брзо станала вирална.Во видеото кое го објавил корисникот „cable2table“, објаснува како тој, сопругата и ќерката секој ден купувале гелато и слатки во истиот синџир. Поголемиот дел од патувањето два мали сладоледа плаќале околу 7 евра.Меѓутоа, еден ден цената за истата нарачка без никакво објаснување пораснала на речиси 17 евра.Кога го прашал работникот на касата за што станува збор и му го покажал изводот од банка, тврди дека му било одговорено: „Цените ги менуваме секој ден“, како и дека сепак мора да плати.Фрустриран, авторот на видеото ги повикал гледачите да го споделат неговото искуство и да ја избегнуваат споменатата слаткарница. Додал дека верува дека истото им се случува и на други туристи, особено откако на интернет пронашол рецензии со многу слични приказни. Видеото предизвикало илјадници реакции, а многу корисници на TikTok пишувале дека ситуацијата им звучи познато.„Тоа е буквално најстариот трик на светот за туристички места“, напишало едно лице и советувало: „Никогаш не плаќајте со картичка, секогаш прво прашајте за цената и плаќајте во готово. Земете и фискална сметка“.„Рим е преполн со туристи. Гарантирам дека многу продавници мамат“, „Законот налага ценовник со сите опции да биде истакнат во продавницата. Секогаш чувајте ги сметките, а ако сè уште сте во Рим, јавете се во финансиската полиција Guardia di Finanza на број 117 и пријавете ја продавницата. Сметките се доказ. Цените не се менуваат секој ден“, порачуваат луѓето.Сајтот Rome.info наведува дека „измами и туристички замки се чести во секој голем град бидејќи измамниците имаат голема публика“, и советува посетителите однапред да се информираат за вообичаените трикови.„Ако на момент ја тргнеме романтиката настрана, важно е да се едуцираме за можните туристички замки кои се вообичаени во големите градови, но и оние специфични за самиот Рим“, се наведува.Слаткарниците со гелато особено се издвојуваат како места каде туристите треба да бидат внимателни.Rome.info советува дека треба да се биде сомничав кон локали кои повеќе внимание посветуваат на впечатлив изглед отколку на квалитет.

Магазин | пред 3 седмици

(Видео) Арко – тивкиот бисер покрај езерото Гарда: град меѓу Алпите и медитеранскиот здив

Во северна Италија, таму каде што Алпите го допираат сјајот на езерото Гарда, се наоѓа Арко – мал град што сè почесто се споменува како мирна, автентична алтернатива на пренатрупаните туристички точки. Наместо масовен туризам и брза динамика, Арко нуди поспоро темпо, локален пулс и чувство дека местото сè уште им припаѓа на жителите.Сместен во долината Сарка, на само неколку километри од северниот дел на Гарда, градот е опкружен со карпи, маслинови насади и планински пејзажи. Токму таа необична мешавина – алпска рамка со медитерански призвук – му дава препознатлив карактер и блага клима што го прави привлечен во текот на целата година.]За разлика од популарните места по брегот на езерото, Арко не ја носи тежината на гужвите. Иако е добро познат меѓу љубителите на природата и активниот одмор, секојдневието таму останува приземјено: мали плоштади, кафулиња со локална атмосфера и семејни ресторани, без агресивна туристичка инфраструктура што често го менува лицето на големите дестинации.Старата градска јадка се развива во полукружен облик околу карпа на која се издига средновековниот замок Кастело ди Арко. Тесните улички, историските палати и локалната архитектура создаваат чувство на континуитет – како да се шета низ тивка хроника од камен и сенки, без претерана комерцијализација.Арко е препознатлив и како „град на спортското качување“, а воедно е одлична појдовна точка за велосипедизам, пешачење и планинарење. Повеќе од 100 километри патеки и близината на езерото овозможуваат одмор што комбинира движење и природа, но без метежот типичен за најпосетените зони.Со тоа, Арко се наметнува како пример за дестинација што умее да ја задржи рамнотежата: доволно позната за да биде достапна и интересна, а доволно тивка за да остане своја. За патниците што бараат Италија со повеќе воздух, повеќе локален вкус и помалку бучава – Арко е токму таа нежна, неочекувана пауза.

Свет | пред 4 седмици

Руски водител одби да ѝ се извини на Џорџа: „Фашистка“

Рускиот новинар и телевизиски водител Владимир Соловјов денес одби да се извини за навредите што ги упати на сметка на италијанската премиерка Џорџа Мелони, туку ја обвини за „поддршка на фашистички идеи и симпатии кон Украина“.Соловјов, како што пренесува телевизијата Вести, изјави дека Мелони со „споделување идеи“ на поранешниот фашистички лидер на Италија, Бенито Мусолини, „учествува во злосторствата на фашистичка Италија“.Тој, како што пишува АНСА, додаде дека италијанската премиерка покажува симпатии кон тие злосторства „поддржувајќи ја нацистичката украинска држава, која спроведува терористички напади во Русија и не ги крие плановите за атентати, вклучително и врз него“.Соловјов во емисија изјавил и низа навреди, нарекувајќи ја Мелони „фашистка“, „идиот“, „лоша жена“ и „срам за човештвото“.Мелони претходно одговори дека „пропагандист на режим не може да држи лекции за слобода“, истакнувајќи дека Италија „нема господари“ и дека нејзин единствен водич е интересот на државата.

Свет | пред 1 месец

Италија го повика рускиот амбасадор поради тешки навреди кон Мелони

Италија денеска го повика рускиот амбасадор во земјата на разговор поради навредите упатени на сметка на италијанската премиерка Џорџа Мелони во програма на руската телевизија, изјави министерот за надворешни работи на Италија, Антонио Тајани.Тајани, како што пренесува Ројтерс, навел дека амбасадорот бил повикан во Министерството за надворешни работи поради „исклучително сериозни и навредливи изјави“ кои ги изнел телевизискиот водител Владимир Соловјов.Како што наведува Ројтерс, Соловјов во краток телевизиски прилог на италијански јазик ја навредувал Мелони нарекувајќи ја, меѓу другото, „идиот“, додека на руски јазик рекол дека е „фашистичко ѓубре“ кое ги изневерило своите гласачи.Тој исто така ја обвини италијанската премиерка дека го изневерила американскиот претседател Доналд Трамп.Како што додава Ројтерс, односите меѓу Мелони и Трамп во последно време се влошиле, откако таа се дистанцирала од војната со Иран и јавно го критикувала американскиот претседател поради нападот на папата Лав XIV.

Свет | пред 1 месец

(Видео) Вооружен грабеж во банка во Неапол со 25 заложници

Во италијанскиот град Неапол се случил вооружен грабеж на банка, кој локалните медиуми го опишуваат како „филмски“. Неколку маскирани лица упаднале во филијала на банката „Кредит Агриколе“, носејќи маски на познати филмски актери, по што ги држеле како заложници сите 25 лица кои во тој момент се наоѓале во објектот.Според информациите, полицијата со часови преговарала со напаѓачите за ослободување на заложниците, но во меѓувреме ограбувачите успеале да ги испразнат сефовите.Инцидентот завршил со бегство на сторителите, кои направиле отвор во подот на банката и побегнале преку канализацискиот систем.

Свет | пред 1 месец

(Видео) Филмска кражба во Неапол: вооружени држеле заложници, па избегале низ канализација

Вооружени разбојници држеле 25 лица како заложници во банка во Неапол, по што успеале да избегаат низ дупка во подот што води кон канализацискиот систем.Тројца мажи околу 11:30 часот упаднале во филијала на Crédit Agricole, каде што ги затвориле клиентите, вработените и директорот во една просторија и ги држеле околу два часа.Полицијата интервенирала и ги ослободила сите заложници нешто по 13:30 часот, без сериозни повреди.„Благодарение на брзата реакција, сите лица се безбедни“, изјавил напулскиот префект Микеле ди Бари.Сепак, додека службите влегле во објектот, разбојниците веќе избегале. Се претпоставува дека користеле однапред подготвен канализациски премин, преку кој исчезнале под земја.Локалните служби веќе го проверуваат канализацискиот систем, а на местото бил и обвинителот Никола Гратери. Засега не е познато дали напаѓачите успеале да однесат плен, иако се верува дека цел им биле сефовите, додека во самата експозитура немало готовина.Еден од заложниците сведочел дека разбојниците биле вооружени, но не употребиле сила, туку ги држеле затворени додека го реализирале планот.Случајот потсетува на сличен грабеж во Милано во 2020 година, кога разбојници исто така користеле канализациска мрежа за влез и бегство, што отвора сомнежи за добро организирана и однапред испланирана операција.

Свет | пред 1 месец

Израел: Одлуката на Италија нема да влијае врз нашата безбедност

Израел соопшти дека одлуката на Италија да го суспендира обновувањето на одбранбениот договор нема да има влијание врз безбедноста на земјата.Од Министерството за надворешни работи на Израел наведуваат дека не станува збор за класичен безбедносен договор, туку за меморандум за разбирање од пред многу години, кој, како што тврдат, никогаш немал суштинска оперативна содржина.„Немаме безбедносен договор со Италија“, изјави портпарол на министерството, додавајќи дека оваа одлука нема да влијае на безбедноста на Израел.Претходно, италијанската премиерка Џорџа Мелони соопшти дека Рим ја суспендира автоматската обнова на одбранбениот договор со Израел, што се толкува како значаен политички пресврт во односите меѓу двете земји.Одлуката доаѓа во услови на засилени тензии на Блискиот Исток, особено поради конфликтите во Либан.Реакција пристигна и од израелската опозиција. Лидерот Јаир Лапид ја оцени одлуката како „срамен неуспех“ на премиерот Бенјамин Нетанјаху и министерот за надворешни работи Гидеон Саар, обвинувајќи ја владата дека не успеала да ги заштити интересите на Израел дури ни кај традиционалните сојузници.

Свет | пред 1 месец

Италија го стопира обновувањето на одбранбениот договор со Израел

Италија ја суспендираше автоматската обнова на одбранбениот договор со Израел поради тековниот конфликт на Блискиот Исток, соопшти премиерката Џорџа Мелони.„Со оглед на актуелната ситуација, владата одлучи да ја запре автоматската обнова на договорот“, изјави Мелони за време на посетата на Верона. Договорот, кој е во сила од 2006 година, овозможуваше соработка во областа на одбраната преку набавки, обука и размена на воена опрема, а се обновуваше на секои пет години доколку ниту една страна не се повлече.Одлуката доаѓа во време на засилени критики од европските земји кон израелските воени операции, особено во Либан. Минатата недела, лидерите на Обединетото Кралство, Франција, Германија и Италија повикаа прекинот на огнот да се прошири и на Либан.Дополнителни тензии предизвика инцидентот во кој израелски сили испукале предупредувачки истрели кон италијански војници во рамки на мисија на Обединетите нации во Либан, при што било оштетено нивно возило.Одлуката на Рим беше остро критикувана од лидерот на израелската опозиција Јаир Лапид, кој ја оцени како „срамен неуспех“ на премиерот Бенјамин Нетанјаху и на министерот за надворешни работи Гидеон Саар.Лапид порача дека владата не успеала да ги заштити интересите на Израел дури ни кај традиционалните сојузници, нагласувајќи дека Мелони припаѓа на конзервативниот политички блок кој, според него, има разбирање за безбедносните предизвици на Израел.

Свет | пред 1 месец

Мелони: Воспоставувањето слободна пловидба низ Ормускиот теснец е клучно за Италија и ЕУ

Италијанската премиерка Џорџа Мелони изјави дека повторното воспоставување на слободната пловидба низ Ормускиот теснец е од клучно значење за Италија и Европската унија, и се обврза на соработка со партнерите за остварување на овaa цел.По американско-израелските напади, Иран го ограничи сообраќајот низ теснецот за да врши притисок врз своите противници, што предизвика раст на цените на енергенсите, бидејќи околу петтина од светската нафта и гас поминува преку овој тесен морски патВо рамките на своите предлози за завршување на војната, Техеран сака да воведе дополнителни такси за бродовите што поминуваат низ Ормускиот теснец.„Ако Иран успее да добие овластување за наплата на дополнителни царини за транзит низ теснецот, тоа може да предизвика економски последици и промени во трговските токови. Веќе соработуваме со коалицијата за Ормускиот теснец, предводена од Обединетото Кралство и која обединува повеќе од 30 земји, за да создадеме безбедносни услови за целосно обновување на слободата на пловидбата и снабдувањето.“, изјави Мелони во Долниот дом на парламентот.Меѓутоа, потпретседателот на владата Матео Салвини изјави дека Италија нема да испраќа бродови за патролирање во тој регион без мандат од Обединетите нации.Мелони ги осуди сите прекршувања на двонеделниот договор за прекин на огнот, кој порано оваа недела го договорија САД и Иран. Таа го повика и Израел да ја запре воената активност во Либан и, покрај обвинувањата на опозицијата дека е премногу блиска со американскиот претседател Доналд Трамп, повтори дека е против американската одлука за напад врз Иран.„Бевме на чекор до точка без враќање, но сега пред нас е кревка перспектива на мир која мора да ја следиме одлучно“, порача Мелони.

Свет | пред 1 месец

(Видео) Вино, планини и спа: Италијанскиот бисер што мора да го посетите

Градчето Мерано во Италија е познато пред сè по својата велнес понуда, која произлегува од неговата планинска природа и положба, но тоа е многу повеќе од тоа. Тука може да се најде сè што му е потребно на човек за квалитетен живот – барем на неколку дена, доколку го посетите.Описот на Мерано може да започне вака: тоа е место на одлична храна, уште подобри вина, идилична природа и свеж алпски воздух што ги буди сите сетила. Накратко, сè најдобро што ви треба во животот се наоѓа на северот на Италија, далеку од гужвите и големите градови.Овде животот тече поинаку и важат други правила. Мерано се наоѓа во регионот Јужен Тирол, во покраината Трентино–Јужен Тирол, а во него живеат и Италијанци и Германци, па затоа сè функционира на двата јазика.Градот најдобро се запознава пеш. Тоа може да го направите преку прошетката Tappeiner, една од бројните патеки во Мерано која нуди одличен поглед кон градот и долината d’Adige. Оваа променада ве води од центарот кон падините на Monte di Merano.Во зависност од годишното време, околината се менува и го обликува вашето доживување – од мирисите на борови и маслинки, преку егзотични ноти на еукалиптус и бамбус, до раскошни магнолии, агави и алое кои му даваат посебен карактер на просторот. Тоа укажува на уникатна комбинација на алпска и медитеранска вегетација.Мерано се наоѓа во долина опкружена со планини, што го прави идеално место за различни активности. Ова е одлична велосипедска дестинација за љубителите на спортот, благодарение на патеките и неверојатната природа. Регионот може да се истражува и пеш, уживајќи во пределите Val d’Ultimo, Val Passiria, Val Venosta и Val Senales.Целото подрачје е познато по врвните вина, а лозјата се протегаат речиси до самиот центар на градот. Винарската традиција во Мерано е исклучително долга и значајна.Локалното население препорачува да ги пробате вината како Силванец или Ризлинг, додека квалитетот и традицијата се потврдуваат и преку Merano Wine Festival – еден од најпознатите и најпрестижни вински фестивали во Европа.Мерано сепак е најпознат по велнес понудата. Во самиот центар се наоѓаат дури 52.000 квадратни метри термални уживања, со 25 надворешни и внатрешни базени, разновидни сауни и фитнес центар. Термите нудат целосна релаксација по ден исполнет со активности и истражување.Доколку одлучите да го посетите овој планински рај, нема да зажалите – ќе се одморите како никогаш досега. За крај, вреди да се спомене дека и познатиот писател Франц Кафка го опишал Мерано како едно од најубавите места што некогаш ги видел.

Магазин | пред 1 месец

На островот од соништата бараат нови жители, нудат и 15.000 евра за преселба

Властите на Сардинија преку посебни програми им нудат финансиска поддршка на луѓето за преселување во помирни села на островот, со цел оживување на руралните средини кои со години се соочуваат со намалување на бројот на жители.Помладите генерации често заминуваат во поголеми градови поради работа, додека во помалите места останува сè постаро население, па локалните власти настојуваат да го поттикнат доаѓањето на нови жители.Според пишувањето на Мирор, преселувањето на Сардинија на многумина им се претставува како можност за живот во попријатна средина, покрај море и со поблага клима, а на социјалните мрежи оваа можност се опишува како многу привлечна.Програмата е наменета за сите кои се подготвени да пријават живеалиште во мало место на Сардинија со помалку од 3000 жители. Локалните власти нудат неповратна поддршка до 15.000 евра по домаќинство за купување или обновување на недвижност. Износот не може да надмине 50 отсто од вкупната вредност на инвестицијата.Подносителите на барањето мора да се обврзат дека ќе се вселат во рок од 18 месеци од купувањето на недвижноста или завршувањето на обновата, со цел да се обезбеди трајно населување, а не само повремен престој.Покрај почетната поддршка, предвидени се и дополнителни поттикнувања за оние кои планираат долгорочен живот на островот и формирање семејство. Паровите може да добиваат околу 600 евра месечно за прво дете и 400 евра за второ дете, сè додека децата не наполнат пет години.Регионалните власти истакнуваат дека станува збор за дел од поширока стратегија насочена кон обновување на заедниците погодени од иселување и зајакнување на локалната економија. Целта е да се поттикнат луѓето да останат да живеат во помалите средини или да се доселат, за тие повторно да станат привлечни за живот и семеен развој.За спроведување на програмата обезбеден е буџет од 45 милиони евра, што покажува дека властите ја гледаат оваа мерка како долгорочен обид за намалување на иселувањето од руралните краишта.Поддршката важи само за недвижности во мали општини, а право на аплицирање немаат оние кои веќе живеат во слични места на Сардинија.И покрај тоа, финансиската помош, побавниот начин на живот и пријатната клима го направија овој програм многу привлечен за многу луѓе, па на интернет предизвика голем интерес.

Медиасет | пред 1 месец