ИЗРАЕЛ

Ројтерс: Израел се подготвува за долготрајна војна и нова стратегија

Додека САД и Иран се обидуваат да го зацврстат примирјето и да отворат простор за поширок мировен договор, Израел паралелно го проширува своето воено присуство и зазема нови територии во соседните области, подготвувајќи се за долготраен и исцрпувачки конфликт на Блискиот Исток, објавува Ројтерс.Создавањето на таканаречени тампон-зони во Газа, Сирија и Либан се оценува како стратешки пресврт по нападите од 7 октомври 2023 година, со кој Израел влегува во состојба на постојана борбена подготвеност, според шест израелски воени и одбранбени претставници.Истовремено, ваквиот пристап претставува и признание дека целосното елиминирање на противниците не е реална опција, и покрај повеќегодишните конфликти.„Израелските лидери заклучија дека се наоѓаат во постојана војна против противници кои треба да се одвраќаат, па дури и да се разбиваат“, изјави Натан Браун од фондацијата „Карнеги“.И покрај договореното затишје меѓу САД и Иран, Израел јасно стави до знаење дека нема да ги запре операциите против либанскиот Хезболах, кој има поддршка од Техеран. По ракетните напади од 2 март, израелската армија започна копнена офанзива во јужен Либан со цел создавање тампон-зона до реката Литани, што опфаќа околу осум проценти од територијата на земјата.Во рамки на операциите, стотици илјади жители беа повикани да се евакуираат, додека израелските сили започнаа уништување на објекти за кои се сомневаат дека биле користени за воени цели.„Целта е да се ‘исчисти’ појасот од пет до десет километри од границата, со што пограничните градови ќе бидат надвор од дострел на ракетните системи на Хезболах“, изјави висок израелски воен претставник кој побарал анонимност.Тој додава дека во дел од селата биле пронајдени докази дека речиси 90 проценти од куќите содржеле оружје или опрема поврзана со Хезболах.„Тоа значи дека тие куќи се сметаат за непријателски воени позиции кои треба да бидат уништени“, изјави истиот извор.Новата безбедносна доктрина подразбира превентивно делување надвор од сопствената територија.„Пограничните заедници не можат да се бранат од самата граница. Израел повеќе не чека напад – тој ја препознава заканата и ја напаѓа превентивно“, изјави Асаф Орион, поранешен бригаден генерал и стратег.Плановите предвидуваат Израел да задржи или контролира делови од Либан, Сирија, Западниот Брег и Појасот Газа, каде веќе има значително присуство.„Во Газа – повеќе од половина од територијата. Во Сирија – од врвот на планината Хермон до реката Јармук. Во Либан – широка тампон-зона што спречува закани од инвазија“, изјави израелски воен претставник.Сепак, ваквите планови сè уште не се формално одобрени од кабинетот на премиерот Бенјамин Нетанјаху, а официјален став од неговиот кабинет не е веднаш доставен.Во меѓувреме, реториката на дел од владините функционери дополнително ја подгрева загриженоста за можно територијално проширување.„Селските куќи долж границата, кои во секој поглед служат како претстражи на Хезболах, ќе бидат уништени по примерот на Рафа и Кан Јунис“, изјави министерот за одбрана Израел Кац.Експертите за меѓународно право предупредуваат дека ваквите постапки можат да бидат спорни.„Масовното уништување на куќи кое не се темели на индивидуална проценка би било незаконско“, изјави Еран Шамир-Борер од Израелскиот институт за демократија.И покрај стратегијата на проширување, дел од израелските аналитичари предупредуваат дека ваквиот пристап носи сериозни ризици на долг рок.„На крајот би било подобро да се вратиме на меѓународната граница и да одржуваме активна одбрана без постојани позиции“, изјави Офер Шелах, директор на истражувачка програма во Институтот за национална безбедност во Тел Авив.Анкетите покажуваат и растечка скепса кај израелската јавност, при што само 26 проценти од граѓаните веруваат дека примирјето во Газа може да донесе долгорочен мир, додека мнозинството очекува ново разгорување на конфликтот.

Свет | пред 1 месец

Израел создава тампон-зони додека трае примирјето меѓу САД и Иран

Додека САД и Иран се обидуваат да го зацврстат примирјето, реалноста на теренот оди во спротивна насока – Израел постепено го проширува своето присуство и зазема нови позиции во соседните области, подготвувајќи се за долготраен и исцрпувачки конфликт на Блискиот Исток.Создавањето на таканаречени тампон-зони во Газа, Сирија, а сега и во Либан, се наметнува како клучен елемент на новата израелска стратегија, која се оформува по нападите од 7 октомври 2023 година. Наместо краткорочни воени операции со јасен крај, фокусот се префрла кон контрола на простор и создавање безбедносни појаси што треба да ја ограничат заканата од вооружени групи.Според шест израелски воени и одбранбени претставници, ваквиот пристап директно ја одразува новата реалност во која се наоѓа државата – состојба на постојана борбена подготвеност, без јасна временска рамка за завршување на конфликтите.Оваа стратегија, истовремено, претставува и признание дека досегашните цели за целосно неутрализирање на противниците се покажале како нереални. По повеќе од две и пол години судири, проценките на официјалните претставници се дека иранското верско раководство, либанскиот Хезболах, Хамас во Газа и другите вооружени групи во регионот не можат целосно да бидат елиминирани.Во такви околности, Израел се префрла кон стратегија на долгорочно управување со ризикот, наместо обид за негово целосно отстранување – пристап што сугерира дека конфликтот влегува во нова, подолга и потенцијално поопасна фаза.

Свет | пред 1 месец

Критики во Израел: Бенјамин Нетанјаху под удар поради „целосен неуспех“ во војната

Сè погласни критики се слушаат во Израел по постигнатото кревко примирје со Иран, при што најголем дел од политичката и јавната одговорност се насочува кон премиерот Бенјамин Нетанјаху, кој се соочува со обвинувања за сериозен стратегиски неуспех.Опозициските лидери остро реагираат. Јаир Лапид оцени дека Израел бил „исклучен од одлучувањето за сопствената безбедност“, додавајќи дека владата не исполнила ниту една од целите поставени пред почетокот на конфликтот. Според него, ќе бидат потребни години за да се санира политичката и безбедносната штета.Слична оценка даде и Јаир Голан, кој примирјето го нарече „еден од најтешките стратегиски неуспеси во историјата на Израел“, предупредувајќи дека последиците може да ја загрозат националната безбедност во наредните години.Во суштина, клучните цели – слабеење на иранскиот режим, заплена на нуклеарни капацитети и долгорочно намалување на заканата – не се реализирани. Напротив, според анализите, Корпус на чувари на исламската револуција останал функционален, а Иран успеал да го постигне својот главен приоритет – да преживее интензивен воен притисок.Дополнително, односите со САД отвораат нови дилеми. Иако Доналд Трамп првично испраќаше остри пораки, на крајот прифати двонеделно примирје, при што, според извештаите, Израел бил маргинализиран во клучните одлуки. Ова, според критичарите, претставува сериозен дипломатски удар за Тел Авив.Паралелно, се отвора и прашањето за пошироките последици. Поддршката за Израел во САД бележи пад, а политичкиот консензус што со децении го одржуваше партнерството е разнишан. Критики доаѓаат од различни политички спектри, што дополнително ја усложнува позицијата на израелското раководство.Во регионален контекст, Израел продолжува со операции во Либан, што носи ризик од нова ескалација со Хезболах. Аналитичарите предупредуваат дека отворањето нови фронтови по неуспехот во Иран може дополнително да ја продлабочи кризата.Внатрешно-политички, ситуацијата е особено чувствителна бидејќи Израел се наоѓа во изборна година. Нетанјаху влегува во овој период без јасен резултат од војната, и со зголемен притисок од јавноста која очекува конкретни безбедносни гаранции.Дополнително, дел од експертите укажуваат дека договорот кој сега се разгледува меѓу САД и Иран повеќе наликува на рамка слична на нуклеарниот договор од времето на Барак Обама – договор што самиот Нетанјаху со години го критикуваше.Во вакви услови, се отвора клучното прашање: по неуспешната воена стратегија и со ограничени дипломатски резултати, каква ќе биде понатамошната политичка и безбедносна насока на Израел.

Свет | пред 1 месец

Макрон го предупреди Израел: „Се обидуваат да ги заплашат француските војници“

Францускиот претседател Емануел Макрон изјави дека е „од витално значење“ двонеделното примирје меѓу САД и Иран да се прошири и на израелските напади врз Либан, оценувајќи дека состојбата во земјата е критична.Макрон, во пресрет на состанок на францускиот Совет за одбрана во средата, порача дека нападите и присуството на израелските сили во јужен Либан не претставуваат решение и повика на политички разговори меѓу Тел Авив и Бејрут, во обид да се намалат тензиите и да се спречи натамошна ескалација.Во изјавите, Франција дополнително го обвини Израел дека се обидува да ги „заплаши“ француските војници кои учествуваат во мировната мисија на Обединетите нации во регионот. Париз во изминатиот период повеќепати ги осудуваше нападите врз Либан, кој го смета за еден од најблиските партнери на Франција на Блискиот Исток.Напнатоста се зголеми по повеќекратните израелски удари врз Либан, кои следеа по нападите на Хезболах поврзан со Иран во март. Според либанските власти, во израелската офанзива загинале повеќе од 1.500 луѓе.Во меѓувреме, останува неизвесно дали примирјето меѓу Вашингтон и Техеран ќе биде продолжено и дали ќе се префрли и на либанскиот фронт. Иако пакистанскиот премиер Шехбаз Шариф најави дека прекинот на огнот би можел да има поширок опфат, израелскиот премиер Бенјамин Нетанјаху порача дека примирјето „не го вклучува Либан“.

Свет | пред 1 месец

Нетанјаху: Двонеделното примирје не важи за Либан

Кабинетот на израелскиот премиер Бенјамин Нетанјаху соопшти дека Либан не е опфатен со двонеделното примирје што беше објавено како договор меѓу САД, Израел и Иран. Ова е првото официјално огласување од кабинетот на Нетанјаху по прогласувањето на примирјето.Во соопштението се наведува дека Израел ја поддржува одлуката на американскиот претседател Доналд Трамп за запирање на нападите врз Иран во период од две недели, но под јасни услови: Иран веднаш да го отвори клучниот морски теснец и да ги прекине сите напади врз САД, Израел и државите во регионот.Според израелската страна, токму поради ова, „двонеделното примирје не го вклучува Либан“. Со тоа, Израел практично става до знаење дека евентуалните операции поврзани со северната граница и безбедносните закани од тој правец не се дел од договорот што се однесува на прекинот на огнот во контекст на ескалацијата со Иран.Ставот на кабинетот на Нетанјаху доаѓа во спротивност со јавна изјава на пакистанскиот премиер Шехбаз Шариф, кој наведе дека договорот за прекин на огнот е поширок и дека ги опфаќа и Либан и други подрачја. Во својата изјава, американскиот претседател Трамп не го спомена Либан, што дополнително го отвора прашањето за географскиот и политичкиот опфат на примирјето.Разликите во пораките на клучните актери ја засилуваат неизвесноста околу тоа што точно значи „примирје“ на терен, во време кога регионот останува чувствителен на нови инциденти и брзи пресврти.

Свет | пред 1 месец

24 часа на работ на бездната: најавено двонеделно примирје меѓу САД и Иран, Техеран најави „отворање“ на Ормутскиот канал

Судирот меѓу Израел, Иран и САД влезе во 39. ден со драматичен пресврт: по часови исполнети со закани и ултиматуми, најавено е двонеделно примирје и пауза на планирани американски удари, додека Техеран соопшти дека во истиот период ќе го „отвори“ Ормускиот канал – една од најчувствителните точки за глобалната енергетска и трговска безбедност.Тензијата се изостри по тврдења дека американскиот претседател Доналд Трамп претходно испратил пораки со најтешка реторика, но на крајот објавил дека прифаќа двонеделно примирје и запирање на планираните напади. Иран, пак, ја претстави одлуката како сигнал за деескалација, а двете страни меѓусебно се обвинуваат дека „први попуштиле“.Во меѓувреме, на теренот неизвесноста останува: израелската војска, според изјави дадени во текот на ноќта, и понатаму изведувала удари врз цели во Иран. Паралелно, се појавија тврдења дека Израел е дел од договорот за прекин на огнот и дека прифатил да ја стопира кампањата на бомбардирање додека траат разговорите за натамошни чекори.Од иранска страна беше пренесено дека врховниот лидер наредил запирање на огнот за сите единици, со порака дека тоа не значи крај на војната, туку обврска воениот апарат да го почитува наредбениот синџир во периодот на најавената пауза.Дипломатските сигнали се засилија и преку посредници. Премиерот на Пакистан, Шебаз Шариф, ги пофали чекорите на двете страни и упати повик за разговори во Исламабад во петок, со цел да се отвори пат кон трајно решение и прекин на војната. Во исто време, се појавија информации дека Пекинг – како најголем трговски партнер на Техеран – вршел притисок Иран да прифати договор, преку посреднички канали, со што се нагласува поширокиот меѓународен интерес конфликтот да не се прелее во подолга регионална војна.Најавите за примирје веднаш се почувствуваа и на финансиските пазари. Американскиот долар ослабна на азиското тргување, а дел од инвеститорите се префрлија кон поризични позиции, реагирајќи на сигналите за привремена деескалација и избегнување на директен удар врз цивилна инфраструктура поврзана со рокот што се спомнуваше во контекст на Ормутскиот канал.Иако најавеното двонеделно примирје отвора прозорец за разговори, ситуацијата останува кревка. Ормускиот мореуз и понатаму е најсилната геополитичка полуга во оваа криза, а секоја нова размена на удари или погрешна проценка може брзо да го поништи ефектот на дипломатските објави и повторно да го поттурне регионот кон ескалација.

Свет | пред 1 месец

Лидерот на израелската опозиција со жестока осуда за примирјето меѓу САД и Иран: „Израел е исфрлен од масата“

Лидерот на израелската опозиција, Јаир Лапид, упати остра критика до премиерот Бенјамин Нетанјаху по договореното двонеделно примирје меѓу Соединетите Американски Држави и Иран, оценувајќи дека станува збор за потег со директни последици врз националната безбедност на Израел.Лапид порача дека Израел не бил вклучен во разговорите и дека тоа, според него, претставува „најголема дипломатска катастрофа“ во историјата на земјата. Тој тврди дека одлуки што ја допираат „суштината“ на безбедноста биле носени без Израел да биде присутен „на масата“.Во својата реакција, опозицискиот лидер нагласи дека израелската армија, како и јавноста, ја издржале тежината на кризата, но дека владата потфрлила на дипломатски и стратешки план. Според него, Нетанјаху не исполнил ниту една од целите што самиот ги поставил, а штетата што наводно е направена ќе бара години за да се поправи.Од другата страна, Нетанјаху изјави дека ја поддржува одлуката на американскиот претседател Доналд Трамп за двонеделна пауза на нападите врз Иран, притоа додавајќи дека примирјето не се однесува на Либан. Израелскиот премиер истакна и дека Вашингтон го информирал Израел дека останува посветен на заедничките цели во претстојните преговори.Иран, пак, најави дека разговорите со Соединетите Држави треба да започнат во петок, на 10 април, во Исламабад, што дополнително ја вжешти домашната политичка дебата во Израел околу тоа колку земјата има реално влијание врз клучните одлуки што ја обликуваат безбедносната архитектура на регионот.

Свет | пред 1 месец

Израел се извини поради оштетувањето на синагога во Техеран

Израелската армија изрази жалење откако синагога во Техеран беше оштетена во ракетен напад извршен претходно денеска.„Израелските одбранбени сили жалат поради колатералната штета на синагогата и нагласуваат дека нападот бил насочен кон висок воен објект, а не кон место за богослужба“, се наведува во соопштението упатено до Си-Ен-Ен.Армијата додаде дека целта бил висок командант во штабот „Хатам ел-Анбија“, кој го користат иранските вооружени сили, и дека пред нападот биле преземени мерки за намалување на штетата врз цивилите.Оштетувањето на синагогата се случи пред завршувањето на Пасха, еврејскиот празник кој го одбележува излегувањето на Израелците од египетското ропство.Си-Ен-Ен геолокализираше фотографии и видеоснимки објавени од иранските медиуми, кои прикажуваат голема штета на синагогата „Рафи Нија“, со книги на хебрејски разфрлани меѓу урнатините.Иранската новинска агенција ISNA соопшти дека синагогата, едно од верските средишта на техеранските Евреи од периодот на Пахлави II, е „целосно уништена во воздушниот напад“.Пред револуцијата во 1979 година, во Иран живееле околу 60.000 Евреи, додека според последниот попис од 2016 година, нивниот број се намалил на нешто помалку од 10.000.

Свет | пред 1 месец

(Видео) Вооружен напад во близина на израелскиот конзулат во Истанбул: тројца загинати

Три лица загинаа, а двајца полицајци се повредени во пукотница што се случи денеска во близина на зградата каде се наоѓа израелскиот конзулат во Истанбул.Вооружениот судир се случил во важен деловен кварт на градот, каде што се наоѓаат седиштата на најголемите турски компании.Едниот напаѓач е уапсен и ранет, додека другиот е убиен. Неофицијални извори наведуваат дека осомничените отвориле оган врз полицајците кои го обезбедувале конзулатот. Сè уште не е познато дали конзулатот бил цел на нападот.Снимките на „Ројтерс“ прикажуваат полицаец кој се крие и вади оружје додека се слушаат истрели, како и лице кое лежи на земја покриено со крв.Областа околу конзулатот е под засилен полициски надзор, а по инцидентот на терен беа распоредени голем број вооружени полицајци. Властите сè уште не објавиле официјални информации за мотивите или идентитетот на напаѓачите.

Свет | пред 1 месец

Израелска одбранбена сила со предупредување: Не користете возови во Иран

Израелска одбранбена сила (ИДФ) упати јавно предупредување до граѓаните на Иран да не користат возови, наведувајќи дека нивното присуство во железничкиот сообраќај може да го загрози нивниот живот.Во објава на канал на персиски јазик на социјалната мрежа X, израелската војска апелираше патниците да избегнуваат патување со возови и движење во близина на железничките пруги до 21 часот по локално време.„Поради ваша безбедност, ве молиме да избегнувате користење на возови и патување низ Иран. Вашето присуство во возови и во близина на железничките линии го загрозува вашиот живот“, се наведува во пораката.Предупредувањето доаѓа во услови на засилени тензии и напади врз инфраструктурата, откако израелскиот министер за одбрана Израел Кац изјави дека армијата добила наредба да продолжи со напади врз, како што рече, „националната инфраструктура на иранскиот режим“.Овој повик дополнително ја засилува загриженоста за можни напади врз транспортната мрежа и потенцијалниот ризик за цивилното население во услови на ескалација на конфликтот.

Свет | пред 1 месец

Ескалација на повидок: Израел се подготвува за заеднички напади со САД

Израел се подготвува за значителна ескалација на конфликтот со Иран веднаш по истекот на рокот што го постави американскиот претседател Доналд Трамп, јавуваат израелски медиуми.Според информации на јавниот сервис KAN, повикувајќи се на неименувани извори, во Израел се проценува дека САД би можеле да ги засилат нападите врз Иран, по што би следувале и координирани удари.„Подготвени сме за голема ескалација по истекот на рокот и чекаме одобрување од САД“, изјавил изворот, додавајќи дека израелските сили се веќе подготвени за дејствување.Сепак, постои и неизвесност околу конечната одлука на Вашингтон, со оглед на можноста Трамп во последен момент да се одлучи за прекин на огнот.Израелските власти, според медиумите, очекуваат „зелено светло“ за напади врз енергетски и инфраструктурни цели во Иран, а премиерот Бенјамин Нетанјаху се очекува да одржи итен безбедносен состанок со врвот на државата.Ултиматумот на Трамп предвидува Иран да го отвори Ормутски теснец и да постигне договор, во спротивно ќе се соочи со напади врз клучната инфраструктура.Во меѓувреме, конфликтот веќе однесе над илјада жртви од почетокот на заедничката офанзива на САД и Израел, додека Иран возвраќа со напади со дронови и ракети врз цели во регионот, дополнително зголемувајќи го ризикот од поширока регионална војна.

Свет | пред 1 месец

(Фото) Нетанјаху објави фотографија од иранското раководство „пред и потоа“

Израелскиот премиер Бенјамин Нетанјаху објави на социјалните мрежи фотографија на иранското раководство „пред и потоа“, со коментар дека Израел „гази ирански непријатели“.„Продолжуваме со чистење за Песах, газиме ирански непријател“, напиша Нетанјаху во објавата.Оваа изјава се вклопува во претходната реторика на израелскиот премиер, кој повеќе пати тврдел дека Израел и Соединетите Американски Држави „системски ја слабеат“ иранската власт и нејзините сојузници во регионот.Објавата предизвика внимание од меѓународните медиуми, а експертите оценуваат дека Нетанјаху со ваквите изјави испраќа јасна порака до Техеран во момент кога тензиите во регионот се зголемуваат.

Свет | пред 1 месец

Израел: Ќе продолжиме да ги ловиме еден по еден

Министерот за одбрана на Израел, Исраел Кац, реагираше по потврдата од Иран за смртта на шефот на разузнавачката служба на Револуционерната гарда, Маџид Хадеми.„Револуционерната гарда пука по цивили, а ние ги отстрануваме лидерите на терористите“, порача Кац, додавајќи дека иранското раководство сега живее со свеста дека е цел.„Ќе продолжиме да ги ловиме еден по еден“, рече тој, нагласувајќи дека Израел веќе сериозно ја оштетил иранската челична и петрохемиска индустрија и дека ќе „продолжи со разурнување на иранската национална инфраструктура“.

Свет | пред 1 месец

САД и Иран во преговори за 45-дневно примирје

САД, Иран и група регионални посредници разговараат за условите за потенцијално 45-дневно примирје кое би можело да доведе до траен крај на војната, објави Axios, повикувајќи се на четворица американски, израелски и регионални извори запознаени со преговорите.Ројтерс не можеше да ја потврди информацијата, бидејќи Белата куќа и американскиот Стејт департмент засега не одговорија на барањата за коментар.Според Axios, посредниците разговараат за условите на двофазен договор. Првата фаза би вклучувала 45-дневно примирје, во текот на кое би се воделе преговори за траен завршеток на конфликтот. Втората фаза би подразбирала конечен договор за ставање крај на војната.Се наведува и дека примирјето би можело да се продолжи доколку биде потребно дополнително време за разговори.Американскиот претседател Доналд Трамп изјави за The Wall Street Journal дека вторник навечер е крајниот рок Иран да го отвори Ормускиот Теснец или ќе се соочи со напади врз критичната инфраструктура.„Ако не направат нешто до вторник навечер, нема повеќе да имаат електрани и нема да имаат мостови“, изјави Трамп за весникот.

Свет | пред 1 месец

Хамас: Разоружувањето „не е тема“ без целосно спроведување на примирјето и повлекување на Израел од Газа

Портпаролот на вооруженото крило на Хамас, Абу Убаида, изјави дека прашањето за разоружување на движењето „нема да биде прифатено“, оценувајќи дека таквите барања се обид да се наметне нова рамка на преговорите пред целосно да се реализира првата фаза од договореното примирје во Појасот Газа.Според пораката што ја пренесоа странски медиуми, Хамас смета дека отворањето дебата за разоружување пред целосното спроведување на договорените чекори, претставува притисок кој, како што тврдат, би значел продолжување на страдањето на палестинското население. Во истата линија, движењето предупредува дека преку посредниците се пласираат услови што, од нивна перспектива, ја менуваат суштината на договорот за прекин на огнот.Темата за разоружување се појавува како една од клучните точки во разговорите за идното уредување на Газа и за тоа како би изгледала безбедносната архитектура по примирјето. Во текстот се наведува дека овој спор се надоврзува на пошироки предлози за план за Газа, чија цел е зацврстување на прекинот на огнот што претходно ја прекинал ескалацијата на терен.Во меѓувреме, Хамас, според наводите, им порачал на посредниците дека не планира да разговара за откажување од оружјето без јасни гаранции дека Израел целосно ќе се повлече од Газа. Со тоа, условите за натамошни договори се врзуваат за конкретни чекори на терен и за гаранции кои би требало да го потврдат трајниот карактер на примирјето.Изјавата на Абу Убаида дополнително ја усложнува дипломатската динамика и ја враќа во фокус суштинската дилема во преговорите: дали разоружувањето може да биде дел од политичкиот пакет уште во рана фаза, или ќе остане прашање што може да се отвори дури по исполнување на првичните обврски од договорот за прекин на огнот.

Свет | пред 1 месец

(Видео) „Не бомбардирајте – разговарајте“: Илјадници Изреалци излегоа на улиците на Тел Авив, полицијата го растури собирот

Во центарот на Тел Авив вчера вечерта се одржа масовен протест против воените операции и ширењето на фронтовите на Блискиот Исток, на кој учесниците со извици бараа прекин на бомбардирањата и отворање простор за дипломатско решение. „Не бомбардирајте! Разговарајте!“, скандираа демонстрантите собрани во метрополата.На протестот се појавија транспаренти со остри политички пораки, меѓу кои и натпис со кој премиерот Бенјамин Нетанјаху се посочува како „најголема закана за опстанокот на Израел“. Атмосферата, според сведоштва од терен, во еден момент се заострила поради полициската интервенција.По почетокот на собирот, демонстрантите биле потиснати, а дел од нив се вратиле на местото на протестот или седнале на земја, по што собирот бил растурен.Еден од организаторите, Алон-Ли Грин, ко-директор на здружението „Standing Together“, изјавил дека полицијата се обидува да ги замолчи, но оти присуството на улица е „должност“ во време кога, како што навел, продолжуваат судирите и во други жаришта, вклучително и Газа, Либан и Западниот Брег.

Свет | пред 1 месец

Ирански командант: Ќе се отворат вратите на пеколот за САД и Израел

Командантот на Хатам ал-Анбија, главната иранска команда за противвоздушна одбрана, Али Абдолахи, се закани дека за САД и Израел „ќе се отворат вратите на пеколот“ доколку конфликтот дополнително ескалира. Неговите изјави доаѓаат откако американскиот претседател Доналд Трамп му даде на Иран рок од 48 часа да постигне договор или да го отвори Oрмускиот теснец, заканувајќи се дека во спротивно „доаѓа пекол“.Абдолахи го нарече Трамп „агресивен и воено-хушкашки претседател“, а неговите закани за напади врз инфраструктурата ги опиша како „очаен, вознемирен, неурамнотежен и глуп потег“. Додаде дека, доколку САД ја нападнат иранската инфраструктура, Техеран ќе возврати со напади врз инфраструктурата што ја користат американската војска и Израел „без никакви ограничувања“.

Свет | пред 1 месец

(Видео) Најмалку петмина загинати во израелски напади врз петрохемиски постројки во Иран

Најмалку пет лица загинаа во израелските напади врз петрохемиски постројки на југозападот на Иран, објавија денеска иранските медиуми.Израелската војска претходно соопшти дека во саботата ја нападнала Специјалната петрохемиска економска зона Махшар на југозападот на Иран.Израелскиот премиер Бенјамин Нетанјаху наведе дека тој комплекс „се користел за производство на материјали за експлозив, балистички ракети и дополнително оружје“.На социјалните мрежи се појавија фотографии кои ги прикажуваат последиците од воздушните напади врз петрохемиското постројување на југозападот на Иран, на кои се гледаат густи облаци чад од пожарите, пренесе Скај њуз.Пожар во рафинеријата за нафта Ситра во Бахреин

Свет | пред 1 месец

(Видео) Израел уништува клучни ирански петрохемиски комплекси

Израел изврши серија напади врз ирански петрохемиски објекти, потврди премиерот Бенјамин Нетанјаху. Нападите следуваа по извештаите од иранските власти дека повеќе петрохемиски компании во југозападната покраина Хузестан биле погодени во саботата.Нетанјаху истакна дека Израел продолжува со „сламањето на терористичкиот режим во Техеран“ и дека претходно уништил околу седумдесет проценти од иранските капацитети за производство на челик. Со новите напади биле погодени и петрохемиски комплекси кои, според него, Иран ги користи за финансирање тероризам против Израел и целиот свет.Израелската војска соопшти дека во нападите биле уништени инфраструктурни објекти за производство на материјали за експлозиви, балистички проектили и друго оружје, што значително ќе ја намали способноста на режимот да произведува оружје насочено кон Израел.Иранската агенција Мехр објави дека пожарот предизвикан од нападот е целосно ставен под контрола и изгаснат. Според CNN, Израел во рамките на воената кампања сѐ почесто таргетира индустриски објекти во Иран, вклучувајќи челичарници, цементарници и петрохемиски комплекси.

Свет | пред 1 месец

Израел подготвува напади врз ирански енергетски објекти

Израел се подготвува за можни напади врз ирански енергетски постројки, но ја чека конечната одлука од Вашингтон, изјавил висок израелски одбранбен претставник, пренесува Ројтерс. Според него, доколку се даде зелено светло, нападите би можеле да започнат веќе следната недела.Овие најави доаѓаат откако американскиот претседател Доналд Трамп му постави ултиматум од 48 часа на Иран, дополнително заострувајќи ја ситуацијата и отворајќи прашање дали Соединетите Американски Држави ќе поддржат нова израелска воена акција.Во последните обраќања, Трамп се закани со напади врз клучната иранска енергетска инфраструктура доколку Техеран не ги прифати условите на Вашингтон, меѓу кои и отворање на Ормускиот теснец. Тој спомена и можни напади врз електрани и мостови, нагласувајќи дека Иран ќе биде погоден „исклучително силно“ доколку не попушти.Во меѓувреме, расте притисокот врз Вашингтон да донесе одлука дали ќе ја прошири воената кампања против Иран или ќе се обиде да избегне понатамошна ескалација.Конфликтот, кој трае од крајот на февруари, веќе сериозно ги наруши глобалните енергетски пазари и доведе до нагло зголемување на цените на нафтата, додека Ормускиот теснец останува една од клучните точки на тензија.

Свет | пред 1 месец

Израел го зголемува бројот на патници на летовите од Бен Гурион

Израелското Министерство за транспорт соопшти дека планира да го зголеми бројот на патници на појдовните летови од аеродромот Аеродром Бен Гурион во Тел Авив, почнувајќи од недела.Според новата рамка, на појдовните летови ќе бидат дозволени дополнителни 20 патници по лет, во однос на 50 колку што се дозволени сега, а уште 20 места ќе бидат наменети за хуманитарни случаи, со што максималниот број патници по лет ќе се зголеми на 90, пренесува денеска „Тајмс оф Израел“.Новата рамка сè уште не е конечна и може да се промени врз основа на безбедносните проценки и одлуките на надлежните владини органи.Министерството за транспорт на 23 март го намали бројот на патници дозволени на летовите од аеродромот Бен Гурион на 50, од претходните 120, откако ирански балистички ракети погодија делови од централниот и јужниот дел на Израел. Во исто време, нема ограничувања за бројот на патници на дојдовните летови.На аеродромот Бен Гурион бројот на авиони кои полетуваат или слетуваат беше ограничен на еден на час, бидејќи воздушниот простор на земјата е практично затворен за редовен комерцијален авио-сообраќај, поради тековната војна со Иран.

Свет | пред 1 месец

Нови ракетни напади од Иран врз Израел, конфликтот ескалира

Иран изврши нови ракетни напади врз Израел, и покрај заканите од американскиот претседател Доналд Трамп дека ќе таргетира иранска инфраструктура, додека конфликтот што трае повеќе од еден месец не покажува знаци на смирување.Според израелските служби за спасување, во нападите нема пријавени жртви, но е регистрирана материјална штета, меѓу која и на железничка станица во Тел Авив. Иранските медиуми објавија дека ракетите биле испалени од Корпус на исламската револуционерна гарда кон јужниот град Ејлат.Трамп повторно упати закани кон Техеран, најавувајќи нови удари врз цивилна инфраструктура.„Следни се мостовите, а потоа електраните“, порача тој.Од иранска страна, министерот за надворешни работи Абас Аракчи предупреди дека нападите врз цивилни цели нема да го принудат Иран на предавање.Паралелно со воените дејствија, расте и меѓународната загриженост поради блокадата на Хормушкиот теснец, преку кој минува значителен дел од светската трговија со нафта и гас. Околу 40 држави бараат негово итно отворање, додека во Обединети нации се разгледува резолуција за можна употреба на сила, но без постигнат консензус.Кина предупреди дека таков чекор би довел до дополнителна ескалација, додека Иран најави дека теснецот ќе остане затворен за земјите што ги смета за непријатели.Конфликтот се проширува и во регионот. Во Кувајт е погодена рафинерија, каде избувнал пожар по напад со дрон, а сирени за тревога се огласиле и во Бахреин. Во Либан, пак, повеќе од еден милион луѓе се раселени поради судирите поврзани со групата Хезболах и израелските операции.Размената на закани меѓу двете страни дополнително ги зголеми цените на нафтата, продлабочувајќи ја глобалната економска неизвесност.

Свет | пред 1 месец

Израелските напади во Либан раселија над милион луѓе

Во Либан се развива хуманитарна криза од огромни размери поради израелските напади, со значителен број цивилни жртви и повеќе од милион раселени лица, покажуваат податоците на Project HOPE.Хуманитарните работници во Бејрут предупредуваат на сериозен недостиг од чиста вода, хигиенски средства и основни лекови. „Работата е огромна. Штом ќе ги покриеме потребите во едно засолниште, веднаш се појавуваат нови“, изјави Рој Сајег, раководител на Project HOPE во Либан.Организацијата обезбедува континуирана медицинска грижа, особено за постари лица и хронично болни пациенти, за кои прекинот на терапијата може да биде животозагрозувачки. „Еден од најголемите проблеми е прекинатиот пристап до клиники, што е критично за луѓето со хипертензија или дијабетес“, додаде Сајег во изјава за CNN.Досега, мобилните медицински тимови обезбедиле бесплатна здравствена помош за повеќе од 1.200 лица, додека хигиенски пакети се доставени до околу 2.000 луѓе. Сепак, потребите на терен се далеку поголеми.Според последниот извештај на Project HOPE, околу 136.000 луѓе живеат во пренатрупани засолништа. Либанското Министерство за здравство соопшти дека во израелските напади, насочени кон Хезболах, загинале најмалку 1.345 лица, а 4.040 се повредени.

Свет | пред 1 месец

Техеран со тврда закана: „Ако се обидат со копнена инвазија, ниту еден американски војник не смее да преживее“

Врховниот командант на иранската армија, Амир Хатами, побара од оперативните штабови со „најголема прецизност“ и „од момент во момент“ да ги следат движењата на САД и Израел, подготвувајќи се за можност од копнена инвазија.Пораката беше пренесена преку видео-снимка објавена од иранската државна новинска агенција, во која Хатами е снимен на состанок со други воени лидери. Во соопштение, агенцијата ги сумираше клучните точки од неговото обраќање.„Ако непријателот се обиде да изведе копнени операции, никој од нивните војници не смее да преживее.“Во истиот контекст, Хатами инсистирал на постојано следење на „движењата и акциите на непријателот“ и на спроведување планови за спротивставување на потенцијални методи на напад. Неговите пораки доаѓаат во период на засилена регионална напнатост и зачестени остри изјави во јавниот простор, што дополнително ја подигнува загриженоста за можни сценарија на директна воена ескалација.

Свет | пред 1 месец

Нетанјаху: Израел создава нови сојузништва против Иран

Израел создава нови сојузништва со важни земји во регионот како одговор на, како што ја оцени, заедничката закана од Иран, изјави израелскиот премиер Бенјамин Нетанјаху, најавувајќи нови договори за кои, како што рече, јавноста наскоро ќе дознае повеќе.Нетанјаху не прецизираше за кои држави станува збор, но истакна дека станува збор за „важни сојузништва“ кои се градат во контекст на актуелните безбедносни предизвици во регионот. Во своето обраќање порача дека иранскиот режим, според него, „порано или подоцна ќе падне“.Тој се осврна и на воените операции на Израел, наведувајќи дека се постигнати значајни резултати како во претходниот конфликт, така и во тековната кампања.Според него, во тековните дејствија е постигнат дополнителен ефект со „разбивање на индустриските капацитети на режимот за производство на тие средства за уништување“. Нетанјаху додаде дека Иран, како што рече, напредувал во развојот на нуклеарно оружје и голем број балистички проектили.Во обраќањето се осврна и на улогата на Али Хамнеи, за кого изјави дека бил убиен на почетокот на конфликтот и дека имал намера да ги премести овие програми длабоко под земја, со цел да бидат недостапни за израелски напади.Нетанјаху истакна и дека Хезболах, која во изминатиот период извршувала напади врз северниот дел на Израел, повеќе не претставува „стратешка закана“ за земјата.Во завршницата од обраќањето, тој упати порака и до домашната јавност и опозицијата.„Што ви се случи?“, праша Нетанјаху, повикувајќи да се подигне моралот на, како што рече, „нашата страна, а не на непријателот“.

Свет | пред 2 месеци