ИЗРАЕЛ

Уапсени 13 лица по обид за принесување животинска жртва за време на празник во Ерусалим

Израелската полиција уапси 13 лица кои се обиделе да принесат животинска жртва на Ридот на храмот во Ерусалим по повод еврејскиот празник Шавуот.Според соопштението на полицијата, осомничените ги пробиле оградите и втрчале во комплексот на Ридот на храмот со цел да го изведат обредот.Официјално не е потврдено за кое животно станува збор и каква жртва планирале да принесат, пренесува „Тајмс оф Израел“.Евреите речиси две илјади години не принесуваат животински жртви, уште од уништувањето на Вториот храм, наведуваат израелските медиуми.Помали радикални групи секоја година се обидуваат да го обноват овој древен ритуал, што предизвикува тензии.Ридот на храмот е најсветото место во јудаизмот и едно од најсветите места во исламот, каде што се наоѓаат џамијата Ал Акса и Куполата на карпата.На оваа локација е забрането принесување животински жртви и јавно еврејско молење со цел да се одржи постојниот статус кво.Инцидентот се случил во особено чувствителен период, со оглед на тоа што крајнодесничарскиот израелски министер за национална безбедност Итамар Бен Гвир отворено се залага за промена на статус кво состојбата на Ридот на храмот.

Свет | пред 1 седмица

(Видео) Израелски министер понижувал активисти, ЕУ размислува за санкции

Меѓународната заедница, вклучително и САД, Европската Унија и повеќе европски земји, остро реагираше на постапувањето на израелскиот министер за национална безбедност, Итамар Бен-Гвир, кон активистите од флотилата со хуманитарна помош за Појасот Газа.Израелски полицајци вчера ги принудиле активистите да клечат на земја со врзани раце, додека Бен-Гвир го набљудувал инцидентот и снимката ја објавил на социјалните мрежи. На видеото тој им се потсмева на активистите додека поминува покрај нив со израелско знаме.Американскиот амбасадор во Израел, Мајк Хакаби, оцени дека иако флотилата била „глупав потег“, Бен-Гвир со своето однесување го нарушил достоинството на Израел.Претседателот на Европскиот совет, Антонио Кошта, изјави дека е „згрозен“ од односот кон активистите и побара нивно итно ослободување.Критики стигнаа и од израелската влада. Премиерот Бенјамин Нетанјаху го оправда пресретнувањето на флотилата, но нагласи дека постапувањето на Бен-Гвир „не е во согласност со вредностите и нормите на Израел“.Израелскиот министер за надворешни работи, Гидеон Саар, исто така го осуди Бен-Гвир, наведувајќи дека со „срамниот приказ“ му нанел штета на Израел и ја поткопал работата на израелските дипломати и војници.Инцидентот предизвика и дипломатски реакции низ Европа. Италија побара од Европската Унија да воведе санкции против Бен-Гвир, додека Полска најави дека сака да му забрани влез во земјата. Велика Британија, Франција, Холандија и други држави ги повикаа израелските дипломати на разговор.Шпанскиот премиер, Педро Санчез, порача дека сцените се „неприфатливи“ и најави дека Мадрид ќе бара забраната за влез на Бен-Гвир да се прошири на целата ЕУ.Италијанските обвинители отворија и кривична истрага за наводно малтретирање на активистите во израелското пристаниште Ашдод. Според дел од активистите, тие биле физички нападнати и понижувани.Активистите од флотилата во четвртокот беа ослободени од израелскиот затвор и во текот на денот треба да бидат депортирани во Турција.

Свет | пред 1 седмица

Трамп и Израел наводно сакале Ахмадинеџад да ја преземе власта во Иран

Поранешниот ирански претседател Махмуд Ахмадинеџад наводно бил дел од план на САД и Израел за промена на власта во Иран, објавуваат „Њујорк тајмс“ и „Атлантик“, повикувајќи се на американски извори.Според наводите, една од првичните цели на војната била Ахмадинеџад да биде ослободен од домашен притвор и поставен како нов лидер на Иран.Во првите денови од конфликтот, неговиот дом во Техеран бил погоден во израелски напад, кој наводно имал цел да ги елиминира чуварите и да му овозможи бегство. Ахмадинеџад преживеал, но по нападот наводно се повлекол од целиот план.Американски претставници тврдат дека Израел и САД сметале оти тој би можел да предводи нова власт во Иран, иако токму Ахмадинеџад за време на својот мандат бил познат по остри антиамерикански и антиизраелски ставови.Во текстот се наведува дека планот за промена на режимот бил дел од поширока стратегија која предвидувала воздушни напади, ликвидации на ирански лидери и создавање политичка нестабилност што би довела до колапс на власта.Иако американскиот претседател Доналд Трамп јавно тврдеше дека целта на операцијата била уништување на иранските нуклеарни и воени капацитети, извештаите посочуваат дека зад сцената постоел и план за поставување ново раководство во Техеран.Според американските медиуми, по првичните напади станало јасно дека иранската власт не се распаднала како што очекувале западните сојузници, а целиот план постепено пропаднал.

Свет | пред 1 седмица

Израелската армија предупредува: Ќе ни недостигаат 17.000 војници

Израелските одбранбени сили предупредија дека до јануари 2027 година би можеле да се соочат со недостиг од 17.000 војници, поради скратувањето на воениот рок и растечкиот број граѓани што избегнуваат регрутација.Бригадниот генерал Шај Тајеб, раководител на Одделот за планирање и управување со персоналот во Дирекцијата за човечки ресурси на Израелските одбранбени сили, пред Комитетот за надворешни работи и одбрана на Кнесетот изјавил дека недостигот на војници наскоро ќе се зголеми од сегашните 12.000 на 17.000.Според него, проблемот постои и покрај зголемувањето на бројот на регрути од ултраортодоксната заедница Хареди, каде што годишниот број пораснал од околу 700 на 2.800 лица.Тајеб изјавил дека моментално околу 32.000 граѓани се водат како лица што избегнуваат регрутација, додека дополнителни 50.000 добиле т.н. „Наредба 12“, која се испраќа до оние што не се појавуваат на задолжителниот повик.„Многу брзо ќе стигнеме до бројка од 80.000 до 90.000 лица што избегнуваат регрутација“, предупредил Тајеб.Предупредувањето доаѓа само неколку дена откако началникот на Генералштабот на Израелските одбранбени сили, генерал-потполковник Ејал Замир, изјави дека на армијата ѝ се потребни дополнителни војници „веднаш“, поради тековните борби на повеќе фронтови.Од армијата претходно предупредија дека поради недостигот на човечки ресурси постои ризик системот да почне да „се распаѓа“.

Свет | пред 1 седмица

Обединетите нации за израелската акција врз флотилата: Не изгледа дека е почитувано меѓународното право

Обединетите нации денеска изразија сериозна загриженост за безбедноста на активистите на бродот „Сумуд“, дел од глобалната флотила што пловела кон Појасот Газа, откако Израел ја презеде контролата врз конвојот.Портпаролот на ОН, Стефан Дижарик, изјави дека организацијата е „многу загрижена“ за безбедноста на лицата на бродот и нагласи дека мора да се почитува меѓународното право на отворено море.На прашањето дали приведувањето на активистите претставува прекршување на меѓународното право, Дижарик рече дека сè уште нема целосни информации за начинот на кој била спроведена операцијата, но додаде дека „не изгледа како да била изведена со целосно почитување на меѓународното право“.Тој повторно го повика Израел да ги олесни ограничувањата за внесување хуманитарна помош во Газа.Според ОН, ситуацијата во Газа останува критична, со недостиг од резервни делови за генератори и пумпи, натрупан отпад и недостаток на материјали за обновување на засолништата во енклавата.

Свет | пред 1 седмица

(Видео) Израелски сили пресретнаа бродови со хуманитарна помош за Газа

Организаторите на флотилата со хуманитарна помош за Газа денеска соопштија дека израелски сили се качиле на еден од нивните бродови, додека со вториот брод во источниот Медитеран бил изгубен контакт.Претходно, израелското Министерство за надворешни работи преку социјалната мрежа Икс порача дека „нема да дозволи прекршување на законската поморска блокада на Газа“.Бродовите на Глобалната флотила „Сумуд“ испловиле во четвртокот од јужниот дел на Турција, во трет обид да достават помош до Газа, откако претходните мисии биле пресретнати од Израел во меѓународни води.На видео-пренос во живо денеска можело да се види како воени бродови се приближуваат кон пловилата на флотилата.„Воени бродови во моментов ја пресретнуваат нашата флота, а израелските сили се качуваат на нашиот водечки брод, среде бел ден“, објави Глобалната флотила „Сумуд“ на Икс.Од флотилата побараа безбедно минување за, како што наведуваат, нивната законска и ненасилна хуманитарна мисија.Во своето соопштение Израел ги повика сите учесници во акцијата „да го променат курсот и веднаш да се вратат“.Претходната флотила исплови од Шпанија на 12 април, но и таа беше пресретната од израелските сили. Тогаш повеќе од 100 пропалестински активисти биле префрлени на Крит, додека две лица биле задржани во Израел.

Свет | пред 1 седмица

Демонстранти протестираа против учеството на Израел на Евровизија

Австриската полиција спроведе голема акција во близина на местото каде се одржуваше Евровизија 2026 во Виена, непосредно пред финалето, по пропалестински протест против учеството на Израел.Според медиумските извештаи, маскирани демонстранти се собрале на скалите пред главната градска библиотека, извикувајќи слогани и носејќи транспаренти. Полицијата интервенирала и оттурнала дел од демонстрантите, но набрзо на истото место се појавила нова група.Библиотеката се наоѓа во близина на арената Wiener Stadthalle, каде се одржуваше музичкиот натпревар.Претходно во текот на денот, неколку илјади луѓе учествувале на одделен протест во Виена против учеството на Израел на Евровизија. Според австриската полиција, протестот поминал мирно, без апсења и поголеми инциденти.

Свет | пред 2 седмици

Израел ликвидираше висок командант на Хамас во Газа

Палестинската милитантна група Хамас денеска потврди дека Израел го ликвидирал воениот командант на движењето, Из ал-Дин ал-Хадад.Хамас го осуди, како што наведе, „кукавичкото израелско убиство“ на ал-Хадад, кој ја предводел вооружената бригада „Ал Касам“ во Појасот Газа, пренесува Ал Џезира.Во соопштението се наведува дека ал-Хадад бил убиен во петок навечер заедно со неговата сопруга, ќерка и други палестински цивили, при што Израел се обвинува за кршење на договорот за прекин на огнот и продолжена агресија врз цивилното население.Палестинското движење „Муџахедин“ исто така соопшти дека ал-Хадад е убиен во, како што го нарекоа, израелски напад.Тие го опишаа како борец кој оставил значајно наследство во отпорот против Израел.Израелските одбранбени сили (ИДФ) претходно соопштија дека во воздушен напад во Газа е убиен лидерот на Хамас и шеф на военото крило, Из ал-Дин ал-Хадад.Според ИДФ, тој бил цел на „прецизен удар“ и е означен како еден од главните организатори на нападите од 7 октомври.

Свет | пред 2 седмици

Белата куќа: Израел и Либан се согласија да го продолжат примирјето за уште 45 дена

Израел и Либан се согласија да го продолжат за 45 дена примирјето што на 16 април го прогласи американскиот претседател Доналд Трамп, соопшти Стејт департментот.„Прекинот на непријателствата од 16 април ќе биде продолжен за 45 дена со цел да се овозможи понатамошен напредок“, изјави портпаролот на Стејт департментот, Томи Пигот, пренесува Ројтерс.Од Стејт департментот разговорите меѓу Израел и Либан, кои вчера и денеска се одржаа во Вашингтон, ги оценија како „многу продуктивни“ и најавија дека страните повторно ќе се сретнат на 2 и 3 јуни.Оваа рунда разговори беше трет состанок меѓу двете страни откако Израел ги засили воздушните напади врз Либан, по ракетниот напад на либанската милитантна група Хезболах врз Израел на 2 март, три дена по американско-израелската војна со Иран. Минатиот месец Израел ја прошири и копнената офанзива во јужен Либан.

Свет | пред 2 седмици

(Видео) Напад во Газа: Израел се обиде да го ликвидира воениот командант на Хамас

Израел во петокот изврши напад во Газа со цел ликвидација на шефот на вооруженото крило на Хамас, Из ал Дин ал Хадад, кого го смета за еден од главните организатори на нападот од 7 октомври 2023 година.Израелските власти соопштија дека Ал Хадад бил цел на воздушен удар во градот Газа. Тој ја презел командата над военото крило на Хамас по ликвидацијата на Мохамед Синвар во мај 2025 година.Во заедничко соопштение, израелскиот премиер Бенјамин Нетанјаху и министерот за одбрана Израел Кац навеле дека Ал Хадад е одговорен за убиства, киднапирања и напади врз израелски цивили и војници.Засега нема официјална потврда дали тој загинал во нападот, а Хамас не се огласи за случајот.Според болнички извори и сведоци од Газа, нападот погодил стан во населбата Римал, при што загинало најмалку едно лице, а неколку други биле повредени.Кратко по првиот напад, израелски авион погодил и возило во близина на местото на експлозијата. За евентуални жртви во вториот напад засега нема информации.

Свет | пред 2 седмици

„Иран бара алтернативи“ додека растат притисоците: Вашингтон и Техеран на раб на нова ескалација

Судирот на Блискиот Исток продолжува да се продлабочува, а Иран внимателно ги следи сигналите од Пекинг и состаноците на министрите за надворешни работи на БРИКС, барајќи „алтернативи“ во случај преговорите со САД да пропаднат, изјави иранскиот аналитичар Абас Аслани.Според него, непосредниот приоритет на Техеран е да „преживее“ во актуелната ситуација, паралелно настојувајќи да спречи Вашингтон да изгради поширока меѓународна поддршка за нов бран притисок врз Иран или чекори поврзани со Ормутскиот теснец. Аслани додаде дека Иран и понатаму ја потенцира дипломатијата како посакувано решение за кризата.„САД сакаа да ја искористат војната како карта за преговори со кинеската страна за да обезбедат отстапки. Сега бараат помош“, наведе Аслани.Во меѓувреме, Русија повика на „мирно решение“ за иранското прашање по разговорите меѓу шефот на руската дипломатија Сергеј Лавров и неговиот египетски колега Бадр Абделати, одржани на маргините на состанокот на БРИКС во Њу Делхи. Во соопштението се нагласува потребата од поголеми меѓународни напори за „одржливо долгорочно решение“.Паралелно со дипломатските пораки, теренската слика останува напната: Хезболах соопшти дека извел напади врз израелски сили на југот на Либан, но и врз цели на северот на Израел, наведувајќи дека дејствувал како одговор на, како што тврдат, прекршувања на примирјето и напади во подрачјето. Во исто време, се пренесуваат и информации за израелско гранатирање со бел фосфор на позицијата Џабал Али ал-Тахер.На дипломатски план, во Вашингтон почна и трета рунда директни разговори меѓу либанска и израелска делегација, со учество на американски претставници. Либанската страна, според наводите, ќе бара прекин на огнот, додека од израелска страна се посочува дека целта на разговорите е разоружување на Хезболах и постигнување мировен договор.Дополнително, претседателот на САД Доналд Трамп изјави дека кинескиот претседател Си му рекол оти Кина нема да го снабдува Иран со воена опрема и оти изразил поддршка за мировен договор.

Свет | пред 2 седмици

Нетанјаху најави тужба против „Њујорк тајмс“: Израел нема да молчи

Израелскиот премиер Бенјамин Нетанјаху објави на Икс дека им наложил на своите правни советници да ги разгледаат „најстрогите правни мерки“ против „Њујорк тајмс“ и неговиот колумнист Николас Кристоф.Нетанјаху реагираше откако „Њујорк тајмс“ објави текст во кој се наведува систематска сексуална злоупотреба на палестински затвореници во израелските затвори. Во написот се опишани случаи на малтретирање на палестински притвореници, вклучително и сведоштва на поранешни затвореници и наводи за постапување на израелските сили.„Чуварите се смееја додека дресирани кучиња ме силуваа“, гласи едно од сведоштвата наведени во текстот.„Денес им наложив на моите правни советници да ги разгледаат најстрогите правни мерки против ‘Њујорк тајмс’ и Николас Кристоф“, напиша Нетанјаху.Тој ги обвини весникот и колумнистот дека ги „клеветат израелските војници“ и шират, како што рече, „крвава клевета за силување“.„Се обидоа да создадат лажна симетрија меѓу геноцидните терористи на Хамас и храбрите израелски војници“, напиша израелскиот премиер.Нетанјаху порача дека Израел под негово водство нема да молчи пред ваквите обвинувања.„Под мое водство, Израел нема да молчи. Ќе се бориме против овие лаги пред јавноста и пред суд. Вистината ќе победи“, најави тој.Неговата реакција доаѓа во време кога обвинувањата за злоупотреба на палестински затвореници веќе предизвикаа сериозни реакции од организациите за човекови права.

Свет | пред 2 седмици

ОАЕ ја демантираат тајна посета на Нетанјаху

Обединетите Арапски Емирати денеска ги отфрлија извештаите дека израелскиот премиер Бенјамин Нетанјаху тајно ја посетил земјата по почетокот на американските и израелските напади врз Иран.Кабинетот на Нетанјаху вчера соопштил дека израелскиот премиер во тајност ги посетил ОАЕ за време на војната со Иран и дека бил примен од претседателот Мохамед бин Зајед.Министерството за надворешни работи на ОАЕ денеска ги демантираше овие тврдења и негираше дека било примено какво било воено израелско изасланство.„Сите тврдења за непријавени посети или необјавени аранжмани се целосно неосновани, освен ако официјално не ги потврдат надлежните власти во ОАЕ“, се наведува во соопштението.Министерството додало дека односите со Израел функционираат во рамките на Аврамовите договори и не се засноваат на неформални или „матни“ договори.Од кабинетот на Нетанјаху, пак, соопштиле дека „оваа посета довела до историски напредок во односите меѓу Израел и ОАЕ“, без дополнителни детали.Во меѓувреме, Иран остро реагирал на наводната посета.Иранската државна телевизија IRIB објавила дека министерот за надворешни работи Абас Аракчи го информирал официјален Техеран за посетата „во екот на воениот конфликт“.Аракчи, кој моментално се наоѓа во Индија, ја оценил политиката на ОАЕ како „глупав ризик“ и изјавил дека соработката меѓу ОАЕ и Израел е „непростлива“.

Свет | пред 2 седмици

Нетанјаху тајно ги посетил Обединетите Арапски Емирати среде конфликтот со Иран

Бенјамин Нетанјаху тајно ги посетил Обединетите Арапски Емирати за време на конфликтот со Иран, соопшти кабинетот на израелскиот премиер.Според соопштението, Нетанјаху за време на операцијата „Рика лав“ се сретнал со претседателот на Обединетите Арапски Емирати, шеикот Мохамед бин Зајед, пренесува Ал Џезира.„Оваа посета доведе до историски пробив во односите меѓу Израел и Обединетите Арапски Емирати“, се наведува во соопштението.Посетата се случила во период на зголемени тензии во Персискиот Залив. Според „Волстрит џурнал“, Обединетите Арапски Емирати за време на конфликтот тајно извршиле напад врз Иран како одговор на иранските удари врз емиратски цели.Во меѓувреме, Кувајт соопшти дека уапсил четворица мажи за кои тврди дека се припадници на Иранската револуционерна гарда, обвинети за обид за инфилтрација на островот Бубијан.Иран ги отфрли обвинувањата, тврдејќи дека станува збор за припадници на крајбрежната стража кои поради дефект навлегле во кувајтски води.Според извештаите, меѓу заливските држави постојат поделби околу тоа дали треба воено да се одговори на Иран или да се избегне поширока регионална ескалација.

Свет | пред 2 седмици

Израелската армија објави детали од голема операција во Либан

Израелската армија објави детали и фотографии од, како што ја нарече, „значајна операција“ спроведена северно од реката Литани во Либан.Според официјалното соопштение на Израелските одбранбени сили (ИДФ), целта на операцијата била воспоставување „оперативна контрола“ над ова стратешки важно подрачје.Во текот на акцијата, израелските трупи пронашле бази на Хезболах и системи на подземни тунели.Во нив, според тврдењата на ИДФ, биле откриени „големи количества оружје, складишта и ракетни фрлачи“.Со воздушна поддршка, копнените сили убиле „десетици“ борци на Хезболах и ја уништиле инфраструктурата на групата поддржана од Иран.До оваа операција Израел ги контролираше позициите во јужен Либан до самата река Литани, каде што беше воспоставена тампон-зона со цел заштита на северен Израел од нападите на Хезболах.Израелската војска наведе дека најновата акција се одвивала јужно од таканаречената „жолта линија“ што Израел ја повлекол по прекинот на огнот на 17 април.Таа одбранбена линија претставува строга граница, а на локалното население му е забрането враќање во областите под контрола на израелската армија.Портпаролот на ИДФ, Авихај Адраи, на својот канал на Телеграм објави фотографии за кои тврди дека ја прикажуваат операцијата кај реката Литани.На снимките се гледаат војници на терен, внатрешноста на откриените тунели и запленето оружје.Операцијата северно од Литани се смета за јасен сигнал дека Израел го проширува подрачјето под директна воена контрола, и покрај претходните договори за прекин на огнот, оправдувајќи го потегот со потребата од целосна елиминација на инфраструктурата на Хезболах долж границата.

Свет | пред 2 седмици

„Иран ве напаѓа, Израел ви помага“: Израел им испрати „Железна купола“ на Арапите

Израел испратил системи за противвоздушна одбрана „Железна купола“ во Обединетите Арапски Емирати со цел да ѝ помогне на земјата во одбраната за време на конфликтот со Иран, потврди американскиот амбасадор во Израел, Мајк Хакаби.„Железна купола“ се состои од мобилни единици кои испукуваат ракети-пресретнувачи кон дојдовни проектили и други воздушни закани.Според Хакаби, во ОАЕ биле префрлени и самите батерии и воен персонал обучен за управување со системот.Обединетите Арапски Емирати во 2020 година станаа првата арапска држава по повеќе од две децении која воспостави дипломатски односи со Израел преку Аврамовите договори.Хакаби изјави дека е оптимист оти и други земји од регионот наскоро ќе тргнат по истиот пат и ќе постигнат договори за признавање со посредство на САД.„Заливските држави сега разбираат дека мора да изберат – кој е поверојатно да ги нападне, Иран или Израел?“, изјавил Хакаби.Тој додал дека регионалните лидери јасно ја гледаат разликата во однесувањето на двете страни во актуелниот конфликт.„Тие гледаат дека Израел ни помогна, додека Иран нè нападна. Израел не се обидува да ја окупира вашата земја и не испраќа проектили кон вас“, рекол американскиот амбасадор.Испраќањето на „Железна купола“ во ОАЕ се смета за најзначаен пример на воена соработка меѓу Израел и арапските потписнички на Аврамовите договори, со што дополнително се зацврстува регионалниот сојуз против Техеран.

Свет | пред 2 седмици

Израел нападна куќа во јужен Либан, шестмина загинати

Во израелски воздушен напад врз куќа во јужен Либан загинале шест лица, а уште седум биле повредени, соопшти либанската национална новинска агенција ННА.Нападот се случил синоќа во градот Кфардоунин, а сите повредени биле итно пренесени во болници во градот Тир.Израел и Хезболах продолжуваат со размена на оган, која дополнително се интензивирала во последните денови и покрај официјалниот договор за прекин на огнот што требаше да биде вовед во мировни преговори.Двете страни меѓусебно се обвинуваат за прекршување на примирјето, додека состојбата на терен укажува дека договорот практично повеќе не функционира.Според најновите податоци на либанското Министерство за здравство, од 2 март досега во израелските напади загинале 2.869 лица, а 8.730 биле повредени.

Свет | пред 2 седмици

Нетанјаху: Иранскиот врховен лидер Моџтаба Хамнеи е жив и се крие

Израелскиот премиер Бенјамин Нетанјаху изјави дека верува оти иранскиот врховен лидер Моџтаба Хамнеи е жив.Моџтаба Хамнеи не се појавил во јавноста откако го наследи својот татко Али Хамнеи, кој беше убиен во американско-израелските воздушни напади на почетокот на војната, што предизвика бројни шпекулации за неговата состојба.Според претходни информации, новиот врховен лидер наводно бил тешко ранет во нападот во кој загинале уште пет членови на неговото семејство.Во интервју за емисијата „60 минути“ на телевизијата Си-Би-Ес, Нетанјаху изјави:„Мислам дека Моџтаба Хамнеи е жив. Во каква состојба е, тешко е да се каже.“Тој додаде дека Хамнеи се крие.„Се крие во некој бункер или на тајна локација и се обидува да го задржи својот авторитет. Мислам дека го нема истиот авторитет што го имаше неговиот татко“, изјави израелскиот премиер.Иранската агенција „Фарс“ вчера објави дека Хамнеи се сретнал со еден воен командант и дал „нови насоки за продолжување на операциите и решително спротивставување на непријателите“.Агенцијата не објави дополнителни детали.

Свет | пред 2 седмици

Израелски војник е убиен на границата со Либан, примирјето е на работ на пропаѓање

И покрај договорот за прекин на огнот, судирите на границата меѓу Израел и Либан продолжуваат, а нов напад дополнително го стави кревкото примирје под сериозен притисок.Израелската армија соопшти дека во напад со дрон на Хезболах загинал 47-годишниот резервист Александар Глованјов.Според израелските власти, во нападот загинал и еден цивилен соработник на израелската армија.Глованјов е осумнаесеттиот израелски војник што го загубил животот во јужен Либан или во близина на границата од почетокот на конфликтот со Хезболах.Инцидентот повторно ги зголеми стравувањата дека примирјето меѓу двете страни може целосно да пропадне.

Свет | пред 2 седмици

Нови израелски напади врз Либан и покрај примирјето, има загинати и повредени

Две лица загинаа, а уште пет се повредени во утринскиот израелски воздушен напад врз градот Аба во јужен Либан, јави либанската државна новинска агенција ННА.Според извештаите, Израел во текот на денот извршил серија напади во повеќе делови од земјата.ННА наведува дека израелски воени авиони ги гаѓале градовите Јахмар ал Шакиф и Кфар Тебнит, додека под артилериски оган биле местата Јахмар Арнун, Набатие ал Фавка и Мајфадун.И покрај договорот за прекин на огнот постигнат со посредство на САД, Израел и Хезболах продолжуваат со меѓусебни напади и меѓусебни обвинувања за прекршување на примирјето.Израел се соочува со обвинувања дека повеќепати го прекршил договорот, при што, според извештаите, загинале цивили, а продолжило и уривањето куќи.Израелската армија, пак, тврди дека напаѓа исклучиво позиции на Хезболах.Од друга страна, либанската милитантна група Хезболах соопшти дека нејзини борци нападнале израелска воена позиција во селото Тајбех, во близина на границата, и дека наводно ги принудиле израелските сили да се повлечат.

Свет | пред 2 седмици

Нетанјаху: Обидите Израел да се прикаже како непријател на христијаните се смешни

Израелскиот премиер Бенјамин Нетанјаху остро ги отфрли тврдењата дека во Израел постои тренд на непријателство кон христијаните, нарекувајќи ги „неверојатна измислица“.Во интервју за американската телевизија Си-Би-Ес, Нетанјаху низа неодамнешни инциденти насочени против христијани ги опиша како изолирани случаи и нагласи дека Израел ги штити христијаните и ги цени заедничките корени.За време на интервјуто за емисијата „60 минути“, Нетанјаху одговарал на прашања поврзани со неколку инциденти што ги нарушиле односите меѓу Израел и христијанските заедници.Меѓу нив биле спомнати забраната за пристап на латинскиот патријарх на Ерусалим до Црквата на Светиот гроб за време на Велигден, снимка од војник на Израелските одбранбени сили кој крши статуа на Исус во јужен Либан, како и напад врз калуѓерка во Стариот град во Ерусалим.Нетанјаху оценил дека ваквите инциденти се „спротивни на израелскиот етос и почитта кон христијанството“.„Тоа не се само аномалии. Тоа се дела што се спротивни на нашите вредности и на нашата почит кон христијанството“, изјавил израелскиот премиер.Тој додал дека војникот кој ја урнал статуата бил затворен, а на лицето кое нападнало калуѓерка му се суди.Во врска со ограничувањето на пристапот на кардиналот Пјербатиста Пицабала до Црквата на Светиот гроб, Нетанјаху тврди дека веднаш интервенирал за да му биде дозволен влез.Поминале четири дена од моментот кога на кардиналот му бил забранет пристап до црквата до моментот кога му било дозволено да одржи ограничена молитва.Нетанјаху истакнал дека Израел е „единствената држава на Блискиот Исток што ги штити христијаните и го почитува христијанството“.„Постои обид да се искриви не само нашата заедничка историја, туку и сегашните настани, за овие инциденти да се прикажат како израелска политика. Тоа е смешно“, изјавил Нетанјаху.

Свет | пред 2 седмици

Нетанјаху: Војната со Иран не е завршена

Израелскиот премиер Бенјамин Нетанјаху изјави дека војната со Иран сè уште не е завршена, бидејќи Техеран и понатаму поседува збогатен ураниум и други воени капацитети што, според него, треба да бидат неутрализирани.„Мислам дека војната постигна многу, но не е готова, бидејќи Иран сè уште има нуклеарен материјал, збогатен ураниум што мора да биде изнесен од Иран“, изјави Нетанјаху во интервју за емисијата „60 минути“ на американската телевизија Си-Би-Ес.Тој додаде дека Иран и понатаму располага со постројки за збогатување ураниум, балистички ракети и регионални сојузници што Израел сака да ги ослабне.„Многу работи ослабевме, но сето тоа сè уште постои и има уште работа“, порача Нетанјаху.Израелскиот премиер не прецизираше дали мисли само на резервите високо збогатен ураниум или на сите ирански залихи.На прашањето како тој материјал треба да биде отстранет, Нетанјаху кусо одговори: „Влегувате внатре и го земате.“Тој навести дека ураниумот може да биде физички отстранет и со договор со Техеран и без него, додавајќи дека американскиот претседател Доналд Трамп ја поддржува таквата можност.Сепак, Нетанјаху избегна директно да одговори дали Израел би употребил сила ако нема договор со Иран.„Нема да зборувам за нашите воени можности. Нема да дадам временска рамка, но ќе кажам дека ова е исклучително важна мисија“, рече израелскиот премиер.

Свет | пред 2 седмици

Wall Street Journal: Израел изградил тајна база во Ирак за поддршка на воздушната кампања против Иран

Израел изградил тајна воена база во ирачката пустина со цел да ја поддржи својата воздушна кампања против Иран, се наведува во извештајот на Wall Street Journal кој се повикува на американски официјални лица и извори.Како што пренесува Wall Street Journal, израелската база била изградена пред почетокот на американско-израелската војна против Иран кон крајот на февруари за да служи како логистички центар за поддршка на израелското воздухопловство.Во извештајот се додава дека базата во Ирак служела и за сместување на трупи на специјалните сили и тимови за потрага и спасување.Со цел израелските сили да ја заштитат својата позиција, биле покренати воздушни напади врз ирачките сили кои речиси ја откриле на почетокот на март, се додава во извештајот.Во нападот загинал еден ирачки војник, соопштиле ирачките власти, откако локалните медиуми пренеле дека овчар бил сведок на „невообичаена“ воена активност, пишува Times of Israel.„Оваа непромислена операција е изведена без координација или одобрение“, изјавиле ирачките власти кои првично ги обвинувале Соединетите Американски Држави за нападот.Според извештајот на „Wall Street Journal“, израелските сили успеале да ги одвратат ирачките сили од понатамошна истрага.„Изгледа дека пред нападот на теренот имало одредена сила, поддржана од воздух, која дејствувала надвор од можностите на нашите единици“, рекол тогаш висок ирачки воен официјален претставник.Извештајот исто така укажува на изјавите на командантот на израелското воздухопловство Томер Бар кога соопштил дека специјалните сили спроведувале „вонредни“ операции за време на судирот со Иран.„Трупите на специјалните единици на воздухопловството моментално спроведуваат вонредни мисии кои можат да ја разбудат имагинацијата“, рекол Бар без понатамошно објаснување.Израелската војска одбила да го коментира извештајот, пренесува „Times of Israel“.

Свет | пред 3 седмици

(Видео) Хезболах објави снимка од напад со дрон врз израелски тенк

Либанското движење Хезболах објави видеоснимка од напад со дрон врз израелски тенк, на која се гледа како припадник на израелската војска се обидува да побегне од возилото непосредно пред директниот удар.Според соопштението на Хезболах, нападот се случил во близина на градот Алма ал-Шааб, на југот на Либан. Снимката била објавена еден ден по инцидентот, во период кога и покрај договореното примирје на 16 април, судирите во регионот продолжуваат.Движењето тврди дека израелските сили најчесто го прекршуваат примирјето, продолжувајќи со бомбардирања и копнени операции на југот на Либан. Во последните напади бил погоден и Бејрут, каде што биле уништени и цели станбени згради, според истите извештаи.

Свет | пред 3 седмици

Дете и болничар меѓу жртвите во нападите на југот на Либан

Во израелски воздушни напади врз јужниот дел на Либан во изминатите 24 часа загинале најмалку 12 лица, додека десетици се повредени, соопшти либанското Министерство за здравство. Според официјалните податоци, меѓу жртвите има едно дете и болничар.Министерството навело дека во нападите врз села низ јужниот дел на државата биле повредени најмалку 37 лица, меѓу кои и колега на загинатиот болничар во местото Мајдал Селем.Нападите продолжуваат и покрај официјално прогласеното примирје, а размената на оган меѓу Израел и Хезболах и натаму трае.Третата рунда преговори меѓу Израел и Либан треба да се одржи следниот четврток и петок во Вашингтон, потврдиле извори од американскиот Стејт департмент и израелски претставници.

Свет | пред 3 седмици