ИЗРАЕЛ

Израел по нападот во Бејрут: „Ниту еден терорист нема имунитет“

Израелскиот премиер Бенјамин Нетанјаху ја коментираше ликвидацијата на висок командант на Хезболах во Бејрут, оценувајќи дека целта на нападот погрешно верувала дека е безбедна во либанската престолнина.Израелските одбранбени сили претходно соопштија дека во напад врз јужниот дел на Бејрут бил убиен командант на елитната единица „Радван“, во прв ваков напад врз главниот град на Либан по речиси еден месец.„Синоќа во срцето на Бејрут го елиминиравме командантот на единицата Радван. Тој го предводеше планот за напад врз северот“, изјави Нетанјаху во видео-порака.Тој додаде дека командантот, според израелските проценки, продолжил да координира напади врз израелските сили и населби од засолниште во Бејрут, верувајќи дека таму нема да биде цел на израелски операции.Нетанјаху истакна дека во изминатиот месец Израел ликвидирал повеќе од 200 припадници на Хезболах за кои тврди дека учествувале во активности против израелски граѓани и војници.Израелскиот премиер нагласи дека истата стратегија се применува и во Газа, со продолжување на операциите против, како што рече, „терористички ќелии“.Хезболах засега официјално не се огласи за нападот и тврдењата на израелската страна.

Свет | пред 3 седмици

Израел тврди дека од примирјето убил 220 борци на Хезболах

Израелската армија соопшти дека од примирјето, договорено во средината на април со посредство на Вашингтон, убила 220 припадници на Хезболах.Во соопштението на портпаролот на израелската војска, Авичај Адрае, се наведува дека само во текот на изминатата седмица биле ликвидирани 85 борци на Хезболах, а погодени повеќе од 180 воени објекти поврзани со групата.Од друга страна, либанското Министерство за здравство тврди дека од 2 март досега во израелските напади загинале повеќе од 2.700 луѓе. Меѓу жртвите има и десетици лица убиени по почетокот на примирјето.И покрај договорот за прекин на огнот, тензиите и вооружените судири меѓу Израел и Хезболах продолжуваат, а двете страни меѓусебно се обвинуваат за прекршување на договорените услови.

Свет | пред 3 седмици

Смртоносни напади во Либан: десетици жртви, меѓу кои и висок командант на Хезболах

Израел во средата навечер изведе воздушен напад врз јужните предградија на Бејрут, прв во речиси еден месец, при што, според извор близок до Хезболах, е убиен високопозициониран командант на групата.Во меѓувреме, во одделни воздушни напади во јужен и источен Либан, според податоци на Министерството за здравство, загинале најмалку 11 лица, додека Израел продолжува со воени операции и покрај примирјето што стапи на сила на 17 април.Ист извор наведува дека во напад во областа Саксакејех, меѓу Сидон и Тир, загинале четири лица, а 33 се ранети, меѓу кои и шест деца.Во одделен инцидент, четворица израелски војници се ранети во јужен Либан, а еден од нив потешко, по напад со експлозивен дрон, соопшти израелската армија.Во Бејрут е убиен Малек Балут, командант на операциите на елитната единица „Ал Радван“, потврди извор близок до Хезболах. Израелскиот премиер Бенјамин Нетанјаху и министерот за одбрана потврдија дека нападот бил насочен кон „неутрализација“ на командантот, без да го наведат неговото име.Нападот се случил во населбата Гобеири во јужното предградие на либанската престолнина, каде што, според извештаи, бил погоден стан во кој се одржувал состанок на припадници на елитната единица.Хезболах возвратил со напади врз израелски сили во неколку погранични области, тврдејќи дека дејствува како одговор на кршење на примирјето.Во меѓувреме, израелски воен претставник изјави дека армијата ќе ја искористи секоја можност за дополнително ослабување на Хезболах.Според податоци на либанските власти, од почетокот на конфликтот во март се убиени речиси 2.700 лица, а над 8.200 се ранети, додека околу еден милион жители се раселени.Светската здравствена организација исто така предупреди на сериозни последици по здравствениот систем, со над 150 напади врз медицински установи, десетици затворени болници и значителни оштетувања на здравствената инфраструктура.

Свет | пред 3 седмици

Хезболах со ракети ја напаѓа израелската војска на југот на Либан

Хезболах испалил „неколку ракети“ кон израелски војници кои дејствуваат во јужен Либан, соопшти израелската армија. Според Израелските одбранбени сили, проектилите паднале во близина на воените единици, но во нападот немало повредени.Инцидентот следи по израелски воздушен удар врз Бејрут, прв ваков напад по постигнатиот договор за прекин на огнот со Хезболах на 16 април.Израелската армија соопшти и дека во текот на претходниот ден извршила напади врз повеќе од 15 позиции на Хезболах во Либан, при што биле погодени магацини за оружје, лансирни точки и други објекти што ги користи оваа група.

Свет | пред 3 седмици

Нетанјаху бара информации за преговорите САД–Иран, загрижен поради можни американски отстапки

Израелскиот премиер Бенјамин Нетанјаху води интензивни разговори со претставници на администрацијата на американскиот претседател Доналд Трамп, со цел да добие појасна слика за текот на преговорите меѓу САД и Иран, пренесува CNN, повикувајќи се на израелски извори.Според тие извори, Нетанјаху се обидува да дознае кои опции се на маса и колку далеку може да оди евентуалниот договор меѓу Вашингтон и Техеран. Израелските власти, како што се наведува, се загрижени дека САД би можеле во завршна фаза да направат одредени отстапки со цел постигнување договор за прекин на конфликтот.Иако не е познато со кои точно американски функционери разговарал израелскиот премиер, од Белата куќа засега нема официјален коментар. Американски претставник изјавил дека Нетанјаху редовно одржува контакт со американската администрација за да биде информиран за дипломатските процеси.Главната загриженост на Израел се однесува на можноста за укинување на економските санкции против Иран, како и евентуално намалување на ограничувањата за иранските балистички проектили и мрежата на регионални сојузнички групи. Тел Авив, исто така, инсистира дека секој договор мора да му гарантира слобода на дејствување на израелската војска против заканите во регионот.Израелски функционер изјавил дека САД не го изненадиле Израел со текот на преговорите, додавајќи дека Нетанјаху е во постојана комуникација со Трамп, кој, според него, останува цврст во клучните барања, особено во однос на спречувањето на иранската нуклеарна закана.

Свет | пред 3 седмици

Израел првпат по неколку недели ги нападна јужните предградија на Бејрут

Израелската армија соопшти дека извршила напад врз јужните предградија на Бејрут, при што цел бил командант на силите Радван на Хезболах.Безбедносни извори претходно потврдија за медиумите дека нападот се случил и посочија дека станува збор за прв удар врз овој дел од либанската престолнина по неколкунеделна пауза.Засега нема официјални информации за последиците од нападот, додека тензиите во регионот и натаму остануваат високи.

Свет | пред 3 седмици

Трамп се колеба: Израел бара „ограничени удари“ врз Иран

Тел Авив бара од САД продолжување на нападите врз Иран преку „ограничени удари“, додека претседателот на САД Доналд Трамп се двоуми поради страв од реакција на јавноста и проширување на конфликтот, наведува CNN.Како што пишува CNN, Израел бара од Вашингтон да започне кампања на „ограничени удари“ врз Иран, со што би се реактивирал конфликтот кој привремено бил запрен со примирје од 7 април.Нападите би биле насочени кон енергетската инфраструктура на Иран, како и кон високи членови на неговото раководство.Израел ги започнал плановите за овие напади уште во првите недели од април, без оглед на примирјето договорено меѓу САД и Иран.„Намерата би била да се спроведе кратка кампања насочена кон вршење притисок врз Иран за да даде дополнителни отстапки во преговорите“, изјавил извор за CNN.Сепак, секоја одлука за повторно започнување на непријателствата зависи од американскиот претседател.САД се фрустрирани од застојот во преговорите и неможноста за отворање на Ормускиот теснец, но Трамп исто така сигнализира дека не сака целосна ескалација поради ставот на јавноста. Бенјамин Нетанјаху одржувал консултации во строго контролирани безбедносни форуми и им наложил на министрите да не се огласуваат јавно за Иран.

Свет | пред 3 седмици

Обама открива: „Нетанјаху го проба ова и претходно, тој го доби она што го сакаше, а светот ја плаќа цената“

Поранешниот американски претседател Барак Обама изјави дека израелскиот премиер Бенјамин Нетанјаху и во минатото се обидувал да ја убеди САД да започнат напад врз Иран, предупредувајќи дека таквите потези носат сериозни последици за глобалната стабилност.Обама посочи дека Нетанјаху користел слична реторика и за време на неговиот мандат, но дека тој одбил да влезе во воена конфронтација. Според него, ризиците биле преголеми и можеле да предизвикаат долгорочни последици.„Знаев што ќе се случи и одлучив дека нападот не вреди за цената што ќе се плати“, изјави Обама, додавајќи дека останува прашањето дали ваквите потези се во интерес на граѓаните на Израел или повеќе служат на политички цели.Тој се осврна и на актуелната реторика на актуелниот претседател Доналд Трамп, оценувајќи дека заканите и острите изјави можат да бидат спротивни на американските вредности и да ја продлабочат кризата.Обама предупреди дека нарушувањето на меѓународниот поредок може да има долгорочни последици и оцени дека обновата на односите со сојузниците ќе биде сериозен предизвик во иднина.

Свет | пред 3 седмици

Израел изведе воздушни напади врз југот на Либан

Израелската војска (IDF) соопшти дека започнала серија воздушни напади врз инфраструктура на Хезболах на југот на Либан, по издадени предупредувања за евакуација во четири села во регионот.Според израелските власти, целта на нападите се објекти поврзани со Хезболах, а операцијата следи по, како што тврдат, прекршувања на претходно постигнатите договори.Либанската државна новинска агенција јави дека во текот на ноќта биле погодени области во близина на градовите Кхиам и Кантара. Израел инсистира дека дејствува како одговор на активностите на Хезболах.Од друга страна, Хезболах соопшти дека ќе продолжи со нападите врз израелските сили во Либан и врз северот на Израел сè додека, како што наведуваат, Израел не престане со прекршувањата на примирјето.Иако постои договор за примирје, двете страни продолжуваат да се обвинуваат за негово кршење, што дополнително ја зголемува нестабилноста во регионот и ја одржува високата тензија на југот на Либан.

Свет | пред 3 седмици

(Видео) Сопругата на израелски министер му подарила торта за роденден со златна јамка

Израелскиот министер за национална безбедност, Итамар Бен-Гвир, го прославил својот 50. роденден со торта на која имало симбол на златна јамка, што предизвика силни реакции во јавноста и медиумите.На снимки објавени на социјалните мрежи се гледа како Бен-Гвир ја прима тортата од сопругата, Ајала Бен-Гвир, на која покрај симболот стои и порака „Среќен роденден“, со додаток „Понекогаш соништата се остваруваат“. За време на прославата, тој носел и значка со истиот симбол.Настанот, според медиумските извештаи, се одржал во приватна вила на југот од Израел, а присуствувале и високи државни претставници и службени лица од полицијата и затворскиот систем.Златната јамка претставува контроверзен симбол поврзан со политичката партија Оцма Јехудит, која се залага за построги казни, вклучително и смртна казна за одредени случаи на тероризам.Според податоци на весникот Хаарец, во периодот околу прославата, во Израел биле регистрирани нови насилни инциденти, при што бројот на жртви од почетокот на годината достигнал над 100 лица.Настанот дополнително отвори политички и етички дебати поради присуството на службени претставници на прославата и симболиката што била користена.

Свет | пред 3 седмици

Двајца активисти од флотилата за Газа изведени пред суд во Израел

Двајца странски активисти, учесници во флотила која се обидела да ја пробие блокадата на Газа, се појавија пред суд во Израел откако беа приведени на испитување, соопшти организацијата за човекови права Адала.Флотилата, составена од повеќе од 50 пловила, испловила од Франција, Шпанија и Италија со цел да достави хуманитарна помош во Газа. Израелските сили ја пресретнале пред три дена во меѓународни води во близина на Грција, при што биле симнати 175 активисти од бродовите.Двајцата приведени – шпанскиот државјанин Саиф Абу Кешек и Бразилецот Тијаго Авила – се појавија пред суд во градот Ашкелон. Обвинителството побара нивниот притвор да биде продолжен за уште четири дена.Според нивните адвокати, активистите биле изложени на сериозно малтретирање. Авила изјавил дека бил влечен по подот и тепан до губење на свеста, додека Абу Кешек навел дека бил врзан и држен со поврз на очите, принуден да лежи со лицето кон подот од моментот на апсењето.Од израелското Министерство за надворешни работи соопштија дека двајцата активисти се поврзани со организација санкционирана од САД – Popular Conference for Palestinians Abroad, која Хамас ја користела за прикриено делување. Шпанија ги отфрли овие обвинувања и го осуди притворањето на својот државјанин.Организаторите на флотилата тврдат дека пресретнувањето се случило повеќе од 1.000 километри од Газа и дека нивната опрема била уништена, оставајќи ги во, како што наведуваат, „смртоносна замка на море“.Претходно, слична мисија во 2025 година предизвика големо внимание, кога меѓу уапсените активисти беше и Грета Тунберг, која подоцна беше депортирана од Израел.

Свет | пред 4 седмици

Израел купува ловци од Американците

Израел ќе набави уште две ескадрили ловци F-35I и F-15IA од САД, по искуствата од неодамнешната војна во Иран, соопшти израелското Министерство за одбрана.Во текот на викендот, израелскиот Министерски комитет за набавки го одобри планот на Министерството за одбрана за набавка на четврта ескадрила F-35I од компанијата Локид Мартин и втора ескадрила F-15IA од компанијата Боинг, во зделки вредни повеќе милијарди долари, пренесува Тајмс оф Израел.Министерството наведе дека авионите „ќе служат како камен-темелник на долгорочниот развој“ на израелската војска и ќе придонесат за „решавање на проблемите на регионалните закани што се развиваат, како и зачувување на стратешката воздушна надмоќ на Израел“.Во моментов, Израел има 48 авиони F-35I, по првичната нарачка од 50.Уште 25 F-35 се нарачани во 2023 година и се очекува да бидат испорачани почнувајќи од 2028 година. Израел исто така нарачал 25 авиони F-15IA во 2024 година и се очекува првите да бидат испорачани почнувајќи од 2031 година.Министерот за одбрана Израел Кац изјави дека неодамнешната војна во Иран „уште еднаш ја покажа моќта на израелското воздухопловство и неговата одлучувачка улога во заштитата на Израел“. Лекциите од таа кампања бараат од Израел да продолжи со јакнење на силите за да обезбеди воздушна надмоќ во децениите што доаѓаат, наведе Кац.Администрацијата на претседателот на САД Доналд Трамп ги забрза одобрувањата за испорака на вооружување за Израел, Катар, Обединетите Арапски Емирати и Кувајт, во вредност од повеќе милијарди долари, соопшти синоќа Стејт департментот.

Свет | пред 4 седмици

(Видео) Најмалку 13 загинати во нови израелски напади врз јужен Либан

Во израелски воздушни напади врз јужен Либан загинаа најмалку 13 лица, меѓу кои четири жени и едно дете, соопшти либанското Министерство за здравство. Во нападите, кои се случиле и покрај продолжениот прекин на огнот, се повредени 32 лица.Според информациите, најголем број жртви се регистрирани во областа Хабуша во округот Набатије, каде што загинале осум лица, меѓу кои две жени и едно дете. Во Зрарија во округот Сидон животот го загубиле четири лица, вклучувајќи две жени, додека во Аин Баал во округот Тир загинало уште едно лице.Израелската војска издала наредба за евакуација на подрачјето Хабуша, а истовремено продолжуваат борбите меѓу Израел и Хезболах, група поддржана од Иран. Хезболах соопштил дека извршил напади врз израелски војници и воена опрема во Либан, додека Израелските одбранбени сили потврдиле дека еден нивни војник загинал во борбите на југот на Либан, со што бројот на загинати израелски војници од почетокот на март се искачи на 17.Прекинот на огнот, кој првично бил договорен во април и потоа продолжен, е под посредство на САД, но, и покрај тоа, судирите продолжуваат на југот на земјата. Американскиот претседател Доналд Трамп претходно соопшти дека договорите за прекин на огнот се продолжени по разговори меѓу страните, а САД учествуваат во надзорот преку свој воен претставник.Либанската војска соопшти дека продолжува координацијата со американските претставници, додека Вашингтон ја нагласува потребата од зајакнување на либанската државна власт и стабилноста на границите.Според податоците на либанското Министерство за здравство, од почетокот на март во Либан се убиени 2.659 лица, меѓу кои и здравствени работници, при што не се прави разлика меѓу цивили и борци. Во исто време, се бележат и загуби на израелска страна, како и жртви од нападите на Хезболах.Израелските одбранбени сили соопштиле дека во текот на последниот ден извршиле околу 50 воздушни напади врз цели на југот на Либан, за кои тврдат дека биле користени од Хезболах за воени цели.

Свет | пред 4 седмици

(Видео) Маж плукнал на црква во Ерусалим, а потоа покажал среден прст

Ерменската патријаршија во Ерусалим објави снимка од надзорни камери на која се гледа како маж ја навредува една од најсветите ерменски цркви во Стариот град, катедралата „Свети Јаков“ во Ерменската четврт.Според објавеното видео, лицето повеќепати плука на влезот од црквата, по што покажува среден прст и прави подбивен знак на крст со раката. Настанот се случил во Ерменската четврт на Стариот град во Ерусалим, а снимката ја објави Ерменската патријаршија, пренесува агенцијата „Анадолија“, која наведува дека мажот е израелски државјанин.Инцидентот се случува во период на зголемени тензии, откако претходно била нападната калуѓерка во Источен Ерусалим. Во градот, каде што служат стотици свештеници и калуѓерки од различни делови на светот, во последните години се пријавени зголемен број напади врз христијанско и муслиманско свештенство, како и врз верски објекти.Верските институции во Источен Ерусалим повеќепати апелирале до надлежните власти да преземат мерки за спречување на вакви инциденти.

Свет | пред 4 седмици

САД повикуваат на директни преговори меѓу Либан и Израел

Амбасадата на САД во Бејрут повика на директни преговори меѓу Либан и Израел, оценувајќи дека станува збор за „две соседни земји кои никогаш не требало да бидат во војна“.Според пораката објавена на социјалните мрежи, разговорите меѓу либанскиот претседател Жозеф Аун и израелскиот премиер Бенјамин Нетанјаху би можеле да означат почеток на национална обнова за Либан.„Либан е на пресвртница. Неговиот народ има историска можност да ја врати својата земја и да ја обликува иднината како вистински суверена и независна држава“, се наведува во објавата.Во соопштението се додава дека преговорите би му овозможиле на Либан да обезбеди конкретни гаранции за целосен суверенитет, територијален интегритет, безбедни граници, хуманитарна помош и поддршка за обнова, како и целосно воспоставување на државната власт на целата територија, со гаранции од САД.„Ова е момент Либан да одлучи за сопствената судбина. САД се подготвени да застанат покрај него додека ја користи оваа можност со доверба и мудрост. Времето за двоумење помина“, порачуваат од амбасадата.Повикот доаѓа во време на обновени судири на границата, откако Израел и милитантната група Хезболах, поддржана од Иран, повторно се во вооружен конфликт од март годинава. Хезболах извршува ракетни напади врз Израел, кој возвраќа со воздушни удари и копнена офанзива во јужен Либан.

Свет | пред 4 седмици

САД испратиле 6.500 тони воена опрема во Израел за 24 часа

Министерството за одбрана на Израел соопшти дека во последните 24 часа во земјата пристигнале вкупно 6.500 тони воена опрема од САД, меѓу кои има илјадници парчиња муниција и лесни оклопни возила.Според официјалните податоци, два товарни брода пристигнале во пристаништата Хаифа и Ашдод, додека дополнителна опрема била доставена и со неколку воени транспортни авиони. Во пратката се наоѓаат „илјадници воздушни и копнени проектили, воени камиони, борбени мобилни возила од типот JLTV, како и друга воена опрема“.По истоварот, опремата е транспортирана со камиони кон воени бази низ целата земја.

Свет | пред 4 седмици

Бенет: Израел се соочува со сериозна криза

Поранешниот израелски премиер Нафтали Бенет упати остри критики за состојбата во земјата, оценувајќи дека Израел се соочува со сериозни безбедносни и институционални предизвици. Во серија телевизиски настапи, тој изјави дека „државата се распаѓа“, посочувајќи на, како што рече, недостиг од капацитет за задржување на територии што претходно биле освоени од израелските сили.Според него, дополнителен проблем претставува фактот што десетици илјади млади ултраортодоксни мажи не ја извршуваат воената обврска, иако државата издвојува значителни буџетски средства за таа заедница.Овие изјави доаѓаат по неговото ново политичко приближување со опозицискиот лидер Јаир Лапид. Бенет најави дека, доколку повторно дојде на власт, ќе преземе решителни чекори, вклучително и смена на функционери за кои ќе оцени дека не дејствуваат во интерес на државата.Тој истакна дека работата на државните службеници ќе се оценува според нивните резултати, а не според политичките околности на нивното именување. Притоа изрази загриженост и за функционирањето на полицијата, предупредувајќи на ризик од нејзина политизација и најавувајќи засилен надзор доколку повторно ја преземе премиерската функција.

Свет | пред 4 седмици

Израелска одбранбена компанија преговара за купување фабрика на „Фолксваген“ во Германија

Израелската одбранбена компанија „Рафаел напредни одбранбени системи“ потпишала писмо за намери со германскиот автомобилски гигант „Фолксваген“ за купување на неговата фабрика во Оснабрик, во западна Германија, јавува „Тајмс оф Израел“, повикувајќи се на два независни извори запознаени со преговорите.Ниту „Фолксваген“, кој неодамна најави опсежни планови за реструктурирање на своето автомобилско производство, ниту израелската државна компанија „Рафаел“ не сакаа да го коментираат договорот. Сепак, извршниот директор на „Фолксваген“, Оливер Блуме, потврдил дека групацијата е во напредна фаза на разговори со компании од одбранбениот сектор за иднината на фабриката.„Фолксваген“ претходно најави продажба или пренамена на погоните во Оснабрик, каде што работат околу 2.300 луѓе, како дел од поширокото реструктурирање, иако првично беше исклучена можноста за производство на оружје. Сепак, според „Фајненшл тајмс“, веќе се воделе разговори за пренасочување на производството од автомобили кон системи за противракетна одбрана.„Рафаел напредни одбранбени системи“, еден од клучните развивачи на израелските системи „Железна купола“, „Стрела“ и „Давидова прачка“, би се фокусирал на производство на компоненти за ракети, вклучително и мотори. Според изворите, експлозиви нема да се произведуваат во Оснабрик, туку на друга локација, од безбедносни причини.Овој зафат го одразува поширокиот тренд на засилување на одбранбената индустрија во Германија, при што владата во Берлин вложува големи средства за модернизација на армијата. Германските власти истовремено инсистираат технологијата и контролата во одбранбениот сектор да останат во земјата.

Свет | пред 1 месец

Израел: Немаме територијални амбиции во Либан

Министерот за надворешни работи на Израел, Гидеон Саар, изјави дека неговата земја нема територијални амбиции на територијата на Либан, нагласувајќи дека активностите на израелската армија во јужниот дел на земјата се насочени исклучиво кон заштита на сопствените граѓани.Изјавата беше дадена на заедничка прес-конференција со српскиот министер за надворешни работи, при што Саар истакна дека присуството на израелските сили во пограничните подрачја има единствена цел — спречување на закани и обезбедување безбедност на северната граница на Израел.Во меѓувреме, израелската војска продолжува со операции во јужен Либан против Хезболах, која има поддршка од Иран, и покрај постојниот договор за прекин на огнот.Израелските власти нагласуваат дека активностите се одбранбени по карактер и дека целта не е проширување на територијата, туку спречување на понатамошни напади и стабилизирање на безбедносната состојба долж границата.Ситуацијата во регионот останува напната, со континуирани меѓусебни обвинувања и зголемено воено присуство од двете страни на границата, што дополнително ја комплицира примената на постојните договори за примирје.

Свет | пред 1 месец

Израел пресретна „сомнителна воздушна цел“ над јужен Либан

Израел соопшти дека неговата армија испалила ракета-пресретнувач кон „сомнителна воздушна цел“ во подрачјето на јужен Либан, во близина на зоните каде што дејствуваат израелски сили.Според военото соопштение, објектот бил забележан во воздушниот простор на регионот, но не навлегол на израелска територија. Во моментов се проверува исходот од пресретнувањето и природата на целта.Инцидентот доаѓа во период на зголемени тензии долж границата меѓу двете земји, каде во последните недели често се пријавуваат воени активности и воздушни инциденти.

Свет | пред 1 месец

Израел им забрани на двајца палестински имами влез во џамијата Ал Акса

Израелските власти денеска им забранија на двајца истакнати палестински имами влез во џамијата Ал Акса во окупираниот Источен Ерусалим во траење од седум дена.Раед Салах и Камал ал-Хатиб во изјави рекоа дека израелските власти ги повикале на испрашување и им врачиле налог за забрана на влез во џамијата во период од една недела.„Добиено ни е решение со кое ни се забранува влез во џамијата Ал Акса“, изјави Салах пред новинарите.„На прашањето за нашиот одговор, рековме дека Ал Акса е исклучиво исламско право и дека имаме право да бидеме таму“, додаде тој, осудувајќи ја забраната како неважечка и неправедна.Салах ја нарече забраната напад на верата и верски прогон, истакнувајќи дека исламскиот вакуф во Ерусалим има исклучива надлежност над џамијата.Хатиб изјави дека забраната може да биде продолжена.„Јасно е дека следната недела ќе биде донесена одлука за продолжување на забраната на шест месеци од страна на командантот на полицијата на округот Ерусалим“, рече тој.„Џамијата Ал Акса им припаѓа на муслиманите и никој друг нема право ни на зрно од нејзината земја.“Израелските власти оваа година издале стотици слични налози против верски службеници и верници во Источен Ерусалим и во Израел, најчесто со почетна седумдневна забрана која може да се продолжи до шест месеци.Салах претходно бил на чело на Исламското движење во Израел, додека Хатиб бил негов заменик до забраната на организацијата во ноември 2015 година, кога израелските власти ја забранија поради наводно поттикнување на насилство.На Салах претходно му била изречена забрана за влез во Ал Акса во траење од 15 години, која завршила во 2022 година.

Свет | пред 1 месец

Нетанјаху: На Хезболах му останале околу 10% од ракетниот арсенал

Израелскиот премиер Бенјамин Нетанјаху порача дека има „слобода на дејствување“ против Хезболах, наведувајќи дека разоружувањето е клучно за преговорите со Бејрут.Тој се обрати пред високото командување на израелската армија, истакнувајќи го правото на Израел да напаѓа цели на Хезболах низ Либан, и порача дека воениот притисок ќе помогне во напредокот на дипломатските преговори со Бејрут.Говорејќи на конференција на високото воено командување, Нетанјаху ги издвои „големите успеси“ против Хезболах, вклучувајќи ја „елиминацијата“ на нивниот ракетен арсенал, како и неодамнешното повторно воспоставување на „безбедносна зона“ на југот на Либан.„Таа зона ја спречува можноста за инвазија на северот на Израел, а сега и директен противтенковски оган, додека истовремено ни овозможува да ја промениме ситуацијата во Либан“, наведе тој.Тој ја нагласи израелската „слобода на дејствување за спречување непосредни и нови закани“, што, како што рече, е „дел од договорот постигнат со САД и либанската влада“. Според условите на тековното примирје, кое беше продолжено минатата недела, Израел го задржува правото да одговори на закани од Хезболах, група поддржана од Иран.Нетанјаху рече дека во однос на почетокот на борбите минатиот месец, на Хезболах му останале околу 10% од ракетниот арсенал, но предупреди дека сè уште постојат „две клучни закани“ – ракети калибар 122 милиметри и беспилотни летала.„Ако Израел успее да ги неутрализира тие закани со комбинација на оперативни и технолошки средства... во суштина сме на пат кон разоружување на Хезболах, бидејќи тоа им е главното оружје“, рече Нетанјаху.Тој додаде дека таквиот развој би можел да помогне во преговорите што ги посредуваат САД, порачувајќи им на офицерите дека очекува да ги „решат тие два проблема“.„Верувам дека на дипломатски план ќе можеме да ги решиме работите ако го решиме ова“, нагласи тој.

Свет | пред 1 месец

Хезболах најавува поинтензивни операции

Тензиите меѓу Израелски одбранбени сили и Хезболах повторно ескалираат, откако двете страни меѓусебно се обвинија за прекршување на примирјето и најавија засилени активности на теренот.Од Хезболах порачаа дека повеќе нема да прифаќаат, како што наведуваат, еднострано примирје, нагласувајќи дека тие не биле дел од договорот кој беше постигнат меѓу Израел и либанските власти. Според нив, одредбите кои му дозволуваат на Израел и превентивни воени дејствија претставуваат неприфатлива практика.Во последните два до три дена, според достапните информации, Хезболах го засилил темпото на своите операции, проширувајќи ги целите не само кон израелските сили во јужен Либан, туку и кон подрачја во северен Израел.Паралелно, организацијата објави и видео порака упатена до жителите на северниот дел од Израел, во која предупредува дека безбедносната состојба е нарушена и дека тие не се целосно заштитени.Од израелска страна, пак, се повикуваат на условите од примирјето кои, според нивното толкување, дозволуваат одговор и превентивно дејствување при секоја закана, што дополнително ја продлабочува кризата и ја доведува во прашање одржливоста на договорот.

Свет | пред 1 месец

Израел ја активираше „Железна купола“ во Обединетите Арапски Емирати

Израел на Обединетите Арапски Емирати им испратил систем за противвоздушна одбрана „Железна купола“ заедно со војници задолжени за негово управување, на самиот почеток на војната со Иран, откриле за „Аксиос“ двајца израелски и еден американски функционер.Според извештајот, воената, безбедносната и разузнавачката соработка меѓу Израел и ОАЕ за време на конфликтот достигнала ново ниво, а распоредувањето на системот, како што се наведува, досега не било јавно познато.Од почетокот на војната, Обединетите Арапски Емирати биле цел на ирански напади повеќе од која било друга земја во регионот. Според податоци на министерството за одбрана на Емиратите, Иран истрелал околу 550 балистички и крстосувачки ракети, како и повеќе од 2.200 дронови. Поголемиот дел биле пресретнати, но дел погодиле воени и цивилни цели, по што земјата побарала помош од сојузниците.По разговор меѓу израелскиот премиер Бенјамин Нетанјаху и претседателот на ОАЕ Мохамед бин Зајед, израелските одбранбени сили, според израелски претставници, испратиле една единица од „Железна купола“ со пресретнувачки ракети и неколку десетици оператори.Висок израелски функционер изјавил дека ова е првпат Израел да распореди ваков систем во друга земја, додека друг навел дека системот пресретнал десетици ирански проектили.Во поширокиот контекст, двете земји ја продлабочиле воената и политичката координација, при што израелските воздушни сили, според наводите, изведувале напади врз ирански локации со ракети со краток домет.Распоредувањето на израелски војници на територија на ОАЕ се оценува како политички чувствително, но емирските претставници наведуваат дека сојузништвото во услови на војна ја променило перспективата за безбедносна соработка.Израел и Обединетите Арапски Емирати потпишаа мировен договор во 2020 година, а и покрај повремените несогласувања, двете страни оценуваат дека нивната соработка никогаш не била поблиска.

Свет | пред 1 месец

Двајца поранешни израелски премиери ги спојуваат партиите и најавуваат „оздравување на Израел“

Поранешните израелски премиери Нафтали Бенет и Јаир Лапид најавуваат заеднички политички настап на претстојните избори во Израел, преку спојување на нивните политички партии, јавува Анадолу.Според соопштение од канцеларијата на Бенет, ќе биде направен првиот чекор во процесот на, како што е наведено, „зајакнување на државата Израел“, преку обединување на партијата „Јеш Атид“ на Лапид и партијата на Бенет во нова заедничка политичка структура, која ќе ја предводи Бенет како кандидат за премиер.Во соопштението се наведува дека овој потег има цел да го обедини реформскиот политички блок, да ги намали внатрешните поделби и да создаде посилен опозициски фронт пред изборите, со фокус на освојување власт и спроведување на најавените реформи.Со оваа најава се означува нова фаза на политичко здружување во израелската опозиција, која се обидува да се консолидира и да настапи обединето против владата на премиерот Бенјамин Нетанјаху.Парламентарните избори во Израел се очекува да се одржат во октомври.

Свет | пред 1 месец