ПУЛС

По пожарот во Кочани – тивката криза: расте бројот на луѓе кои бараат психолошка помош

Речиси седум месеци по трагедијата во дискотеката „Пулс“ во Кочани, каде што животот го загубија 62 млади лица, во регионот расте бројот на граѓани кои имаат потреба, но и бараат психијатриска и психолошка поддршка. Тие не се само семејствата на загинатите и повредените, туку и луѓе кои биле индиректно засегнати од настанот – сограѓани, сведоци, пријатели или млади кои ја чувствуваат колективната траума.Директорката на Клиниката за психијатрија, д-р Славица Арсова, вели дека по вакви трагедии, потребата од психолошка интервенција не се јавува веднаш.„Тоа беше огромен шок за сите. Луѓето доживеаја криза која создаде чувство на несигурност и страв. Дел од пациентите се јавуваат кај нас, дел во регионалните центри, но има и млади кои студираат или живеат во Скопје и полесно бараат помош овде. Видливи се не само физичките последици кај повредените, туку и длабоките психички траги што остануваат кај сите засегнати“, изјави д-р Арсова по повод Светскиот ден на менталното здравје (10 октомври).Професорот Антонио Новотни вели дека во време на отуѓеност и недоверба, заедништвото и слушањето на луѓето во криза се најсилната терапија.„Семејството, локалната заедница и професионалците треба да бидат достапни, затоа што само заедничката поддршка може да спречи подлабоки последици“, рече тој.Проблемот со менталното здравје не е ограничен само на Кочани.Според последниот извештај на Институтот за јавно здравје, во Македонија над 60% од амбулантските случаи се поврзани со стрес, анксиозност и соматоформни растројства, а секој трет млад човек пријавува симптоми на депресија или анксиозност.Недостигот од психолози и психијатри во помалите градови, како Кочани, дополнително ја отежнува состојбата. ИЈЗ препорачува јакнење на локалните центри за ментално здравје, развивање мобилни тимови и воведување онлајн психолошка поддршка – особено за младите, кои се најранлива група по вакви трауми.„Со јакнење на локалните центри и навремена психолошка интервенција може да се спречат долгорочни последици. Менталното здравје мора да стане дел од сите јавни политики – од образованието, до трудот и социјалната заштита“, стои во извештајот на Институтот.

Македонија | пред 5 месеци

Судијката која го судеше Заев, ќе го суди „Пулс“: предметот е распределен преку АКМИС системот

Судијката Диана Груевска-Илиевска е назначена да го води судењето против обвинетите во случајот за пожарот во дискотеката „Пулс“, соопшти Кривичниот суд. Распределбата била направена преку АКМИС-системот на судот.Илиевска е позната по повеќе високопрофилни случаи кои ги судела, како што е трагедијата кај Ласкарци, случајот за новинарот Томислав Кежаровски, предметот „Сопот“, убиството на Ангел Петковски во Ѓорче Петров, но и случајот „Поткуп“ каде обвинет беше Зоран Заев.Советот за оцена на обвинителен акт при Основниот кривичен суд Скопје го одобри во целост обвинителниот акт за трагичниот пожар во дискотеката „Пулс“ во Кочани, во кој се опфатени 37 обвинети лица со 33 бранители. Од Кривичниот суд нагласуваат дека при постапката била земена предвид сензитивноста на случајот, јавниот интерес и чувствителноста на над 250 оштетени лица и семејства на жртвите.„Судот се обиде на најефикасен начин да ги исполни сите законски обврски и да обезбеди навремено постапување. Понатамошните процесни дејствија ќе бидат спроведени од надлежниот судија, а јавноста и странките ќе бидат известувани за текот на постапката“, соопштија од Кривичниот суд.

Македонија | пред 6 месеци

Одобрен обвинителниот акт за пожарот во „Пулс“ – судот го потврди обвинението во целост

Советот за оцена на обвинителен акт при Основниот кривичен суд Скопје, постапувајќи по обвинението К-ООА бр.155/25, поврзано со пожарот во дискотеката „Пулс“ во Кочани, по исполнување на сите законски предвидени услови, донесе Решение со кое обвинителниот акт се одобрува во целост.„Како што наведовме во сите претходни соопштенија и медиумски одговори, со цел доследно, точно и навремено известување на јавноста, Кривичниот суд во конкретната постапка ги ангажираше сите расположливи ресурси за навремено и законито постапување, за да не се создадат непотребни пропусти кои би ја компромитирале постапката. Поради тоа, потребно е јавноста да го има хронолошкиот тек на постапката, и тоа:• Врховниот суд на РСМ на 25.06.2025 година донесе решение КР–35/25 со кое за стварно и месно надлежен за постапување по обвинителниот акт се определува Основниот кривичен суд Скопје, ценејќи дека по предметот треба да постапуваат „судии со стекнато искуство и познавање на кривичната материја кои ќе овозможат ефикасно, стручно и законито постапување, а воедно ќе придонесат за сензибилизирање на јавноста“.• На 02.07.2025 година Основниот суд во Кочани до нашиот суд го достави обвинителниот акт, а на 08.07.2025 година достави дополнение на истиот.• Веднаш по приемот на обвинителниот акт истиот е распределен во Одделението за кривично полнолетни. Со оглед дека станува збор за обвинителен акт кој согласно законските одредби треба да биде оценет од совет, актот преку АКМИС системот се распредели кај судијата Моника Бахчовановска, која постапува како Претседател на советот за оценка на обвинителен акт. Согласно Годишниот распоред во совет за оценка заедно со судијата Моника Бахчовановска, се судиите Билјана Коцевска и судијата Бранка Наумовска. Овие две судијки побараа изземање од советот за оценка, бидејќи ќерката на судијата Билјана Коцевска – адвокат Ивана Коцевска е бранител на дел од осомничените, а судијата Бранка Наумовска е во роднинска врска со една од жртвите, причини што се предвидени во законот како основ за изземање. По изземањето на овие две судии, како судии кои што ќе постапуваат во фазата на оценка поставени се двајца судии од Специјализираното одделение за судење на кривични дела од областа на организираниот криминал и корупција и тоа судијата Софче Гаврилова Ефремов и судијата Илија Трпков. Нивното определување е на начин како што актите од одделението за организиран криминал и корупција ги оценуваат судии од одделот за кривично полнолетни (а ова е од причина што судиите кои што го оценувале актот не можат да учествуваат во постапка на главна расправа, а се со цел да не се доведе Основниот кривичен суд Скопје како најголем суд во државата да нема судии кои што ќе постапуваат по овој предмет). Двата члена на советот за оценка се поставени по редослед според годишниот распоред, како што и е предвидено во Судскиот деловник.• Додека советот веќе постапуваше по предметот, на 15.07.2025 година Јавниот обвинител на РСМ до Основниот кривичен суд Скопје достави решение со кое за стварно и месно надлежно обвинителство за постапување по обвинението поврзано со пожарот се определува ОЈО Скопје.Со оглед дека станува збор за обвинителен акт во кој што има 37 обвинети лица кои што имаат 33 бранители, беше исклучително тешко да се достави обвинителниот акт до сите нив, особено од причина што на голем дел од нив мерките притвор беа заменети, па во моментот на достава Претседателот на советот за оцена имаше потешкотии да може да утврди кој обвинет каква мерка има и каде се наоѓа за да може да се изврши доставата. Особено потешкотии имаше и доставата на делот од бранителите на кои и покрај тоа што им се најавуваше терминот на достава, сепак истите не беа пронајдени во нивните канцеларии. Доставата ја вршевме преку судските служби на Основен кривичен суд Скопје, сѐ со цел да не се одолговлечи истото доколку оди по редовна пошта.Дополнителен проблем при доставата се јави поради тоа што во првично поднесениот обвинителен акт, пред истиот да биде доуреден, во диспозитивот не беа целосно наведени личните податоци на обвинетите од страна на Основниот суд Кочани, како и решенијата за адресите каде се издржува мерката куќен притвор, што дополнително мораше да го проверува Кривичниот суд.Но, и покрај сето тоа, судот во целост ја имаше предвид сензибилноста на постапката, јавниот интерес и пред сè чувствителноста на над 250 оштетени лица и семејства на починатите во пожарот. Токму поради тоа, се обиде на најефикасен начин да ги исполни сите законски обврски и да го оцени актот во предвидениот законски рок.Советот за оценка донесе Решение К-ООА бр.155/25 на 03.10.2025 година со кое го одобри обвинителен акт во целост, по што се оформи кривичен предмет К.бр. 1872/25.Како што посочивме, во претходното постапување по овој предмет од советот за оценка беа изземени судијата Билјана Коцевска и судијата Бранка Наумовска, а од постапување во кривичниот совет иземен е и судијата Ивица Стефановски, од причина што како бранители во овој предмет се јавуваат неговата сестра и бранител со кој е во кумовска врска, додека пак судијата Елизабета Постоловска, која го нема законски предвиденото искуство, неможе да постапува по овој предмет и заради сето тоа при распределбата на предметот овие судии се исклучени од автоматската распределба во АКМИС системот .Предметот согласно АКМИС системот е распредлен кај надлежен судија за понатамошно постапување, а за сите понатамошни процесни дејствија поврзани со конкретниот предмет, странките и јавноста ќе бидат известени“, велат од Кривичен суд.

Македонија | пред 6 месеци

Не е завршена постапката за Кочани, се води предистрага за УЈП и други институции поврзани со „Пулс“, уверува државниот обвинител Коцевски

Oбвинителство води предистрага за вработени во Управата за јавни приходи (УЈП), но и во други институции за десетина кривични дела во врска со пожарот во дискотека „Пулс“ во Кочани, изјави државниот јавен обвинител Љупчо Коцевски.Одговарајќи на новинарски прашања пред денешната седница на Советот на јавни обвинители, Коцевски рече дека со завршување на обвинението не значи дека завршила и постапката за Кочани и дека податоци што беа изнесени од страна на Истражувачката репортерска лабораторија не се ништо ново и дека сите овие пораки се испратени до одбраната и судот.-Јавното обвинителство уште од почетокот постапуваше по поднесена кривична пријава. Меѓутоа Јавното обвинителство водеше и предистражна постапка и во однос на сите останати други институции, што значи дека во моментот на подигање на обвинение, немаше докази во однос на инспектори во УЈП, меѓутоа предистражната постапка беше отворена веднаш и таа сè уште трае, со тоа што со завршување на обвинението не значи дека заврши и постапката за Кочани изјави Коцевски.Во однос на другиот предмет за пожарот во „Пулс“ што го води Основното јавно обвинителство за гонење организиран криминал и корупција (ОЈО ГОКК) против 13 полициски службеници и за кој сè уште нема обвинение, Коцевски рече дека тоа е така затоа што на предметот работи само еден јавен обвинител, но и дека се запазени сите рокови.-По другиот предмет постапува само еден јавен обвинител. Причината зошто е така, е затоа што сè уште немаме доволно јавни обвинители, односно сè уште имаме 70 јавни обвинители помалку. Наредните три и пол години така ќе биде и од тие причини, со оглед дека е еден јавен обвинител, постапката се води подолго време, меѓутоа таа ќе заврши наскоро, рече Коцевски.Истражувачката репортерска лабораторија во неделата објави документарен филм со наслов „Нашиот морален компромис“, во кој беа објавени нови снимки и сведоштва на родители на загинати и лица кои биле во објектот, како и разговори преку апликации меѓу сопствениците на дискотеката и инспектори на УЈП.

Македонија | пред 6 месеци

По шест месеци си замина дома: Младата Мелани која беше повредена во „Пулс“ излезе од болница

Осумнаесетгодишната Мелани Тасева од Скопје, една од најтешко повредените жртви во трагичниот пожар во дискотеката „Пулс“, конечно се врати дома по повеќе од шест месеци лекување, пишува „Плусинфо“.Несреќата на 16 март остави сериозни последици врз младата девојка – опасност по живот, бројни изгореници и интоксикација со гасови. Првично била хоспитализирана во приватната болница „Жан Митрев Клиник“, а потоа префрлена во Воено-медицинската академија во Белград, па вратена во Македонија.Родителите на Мелани велат дека чувството кога нивното дете повторно се вратило дома е непроценливо.„6 март беше денот кога времето застана за многу семејства. Трагедија која никој не може да ја предвиди, ниту да ја прифати. Токму тој викенд Мелани замина во Кочани, среќна што ќе оди на концерт на својот омилен бенд ДНК. Така започна нашиот кошмар. Неколку часа подоцна, наместо фотографии и пораки, добивме повик што никој родител не сака да го слушне. Кога конечно ја видовме, и покрај болката и шокот, имавме едно чувство – благодарност што е жива – изјавил таткото Александар за „Плусинфо“.Тој додава дека по долги месеци неизвесност, конечно насмевката се вратила во нивното семејство:„Мелани е дома и се опоравува. Поминавме низ многу непроспиени ноќи, стравови и надежи. Нема зборови со кои можеме да ја изразиме нашата благодарност до Клиничката болница „Аџибадем Систина“ и целиот тим што се грижеше за нашето дете. Таа беше хоспитализирана во две клиники пред тоа, но упорноста, пожртвуваноста и мултидисциплинарниот пристап на тимот во „Аџибадем Систина“ беа клучни за нејзиното излекување“, изјавил таткото.

Македонија | пред 6 месеци

Калајџиев: Обвинението за „Пулс“ е нарачка од политика, не правна грешка

Правникот и универзитетски професор Гордан Калајџиев остро реагираше на обвинението за трагедијата во дискотеката „Пулс“ во Кочани, во кое обвинителството се повикува на т.н. „верижна одговорност“.„Не е страшно што обвинителите згрешиле со ‘теоријата’ за верижна одговорност. Страшно е што не се работи за грешка, туку за нарачка од политиката,“ изјави Калајџиев.Тој посочи дека сите правни авторитети се сложиле дека таква правна конструкција „не може да издржи“, но Обвинителството сепак инсистирало на неа.„Згора на тоа, обвинителите кои ја туркаат ваквата теорија дури и се унапредуваат во кариерата,“ додаде тој.Калајџиев оцени дека уште поголем проблем е тоа што судот нема храброст да го отфрли „широкото обвинение“ и да испрати јасна порака дека такви нарачани постапки не можат да поминат.

Македонија | пред 6 месеци

„Судот мака мачи со нарачана правна конструкција без докази“, вели адвокатката Анастасовска за обвинението за „Пулс“

Адвокатката Сузана Јошевска Анастасовска, која застапува еден од обвинетите во случајот за трагичниот пожар во дискотеката „Пулс“, остро реагираше на дел од ставовите што произлегоа од Обвинителството.„Дејствија кои не можат да се доведат во контекст со последицата изразена преку кривичното дело Тешки дела против општата сигурност од чл.292 од КЗ не треба да бидат предмет на обвинение. Но, наместо јасно разграничување што е криминал директно поврзан со пожарот, што е злоупотреба и несовесно работење на службите со конкретни докази, а што е системски пропуст за кој нема индивидуална кривична одговорност, вие измислувате термини како ‘верижни пропусти’ или ‘синџир на континуирани пропусти’ за да му се додворите на власта,“ изјави Јошевска Анастасовска.Таа обвини дека обвинението е „налицкано“ со квалификации за умисла и соизвршителство, само за да изгледа „тешко“, и дека е избрзано заради кариерни поени на поединци.„Нашиот Кривичен суд, кој и самиот мака мачи што да прави, се бори со фактот дека против природата му е да удри силно и да врати обвинение со јасна порака дека ваква нарачана правна конструкција без докази не може да пројде. Во целиот тој галиматијас се прави двојна штета – семејствата на жртвите остануваат збунети и разочарани, а општеството сѐ повеќе тоне во недоверба,“ додаде таа.Адвокатката заклучи дека „синџирот е силен онолку колку што е силна најслабата алка“ и предупреди дека „траумите допрва доаѓаат“.

Коментари | пред 6 месеци

Премиерот: Секој вмешан во случајот со „Пулс“ мора да одговара пред правдата, од Обвинителстовто не сум задоволен

Претседателот на Владата на Република Македонија, Христијан Мицкоски денес одговарајќи на новинарско за вмешаност на даночни инспектори во случајот Кочани, а не биле опфатени во обвинението, изјави:„Јавниот државен обвинител Коцевски, таму видовте и вие, изминатиов период дванаесетина обвинители беа тие коишто работеа на овој случај. Ако е прашањето, дали сум задоволен од работата на обвинителството, мојот одговор ќе биде не сум задоволен. И токму тоа беше причината зошто поддржавме во Парламентот смена на Коцевски. А зошто СДСМ и ДУИ не ја поддржаа смената на Коцевски, тоа е друго прашање. Така што треба, секој оној којшто, на каков било начин и во каква било форма има каква било поврзаност со тој случај да биде изведен пред лицето на правдата.“

Македонија | пред 6 месеци

„Ураган на орли“, вели oбвинетиот во „Пулс“, Крешник Бектеши, за митингот на ДУИ откако Ахмети му се обрати на Мицкоски

Крешник Бектеши, еден од обвинетите во случајот „Пулс“, кој по неколкумесечен притвор сега ја чека судската постапка од слобода, вчера се појави на митинг на ДУИ. За своето присуство се пофали и на социјалните мрежи, каде сподели фотографија и напиша: „Ураган на орли!“. Ова доаѓа откако лидерот на ДУИ, Али Ахмети, во својот говорот користеше и метафори, порачувајќи: „Мицкоски со кучиња оди на лов на зајци, но не и на орли“. На ова ВМРО-ДПМНЕ му врати Ахмети: „Не си орел, туку обично врапче“.На собирот во Спортскиот центар „Борис Трајковски“ присутните беа поздравени со извици „УЧК, УЧК“ додека на видео-бимот се прикажуваа инсерти од војната во 2001 година. Лидерот на ДУИ, Али Ахмети, ја искористи конвенцијата за да упати силна порака до Христијан Мицкоски и ВМРО-ДПМНЕ, обвинувајќи ги за укинување на правата на Албанците, суспендирање на законот за албански јазик и нарушување на Охридскиот рамковен договор.

Коментари | пред 6 месеци

Судот најави дека обвинителниот акт за „Пулс“ ќе биде оценет до крајот на неделата

Кривичниот суд информира дека до крајот на неделата ќе биде донесена оценка за обвинителниот акт поврзан со трагичниот пожар во дискотеката „Пулс“ во Кочани.„Судот во целост го разбира и почитува јавниот интерес за овој предмет, па токму поради тоа досега на неколку наврати ја информираше јавноста за текот на оцената и преземените чекори“, соопштија од судот.Се работи за постапка против 37 обвинети правни и физички лица, застапувани од 33 адвокати и претставници. Од приемот на обвинителниот акт, судот ги ангажирал сите ресурси за негова достава до странките и прием на приговорите. Меѓутоа, во изминатите месеци, дел од адвокатите и претставниците на правните лица биле недостапни во нивните канцеларии, поради што доставата, а со тоа и роковите за приговори, се одолговлекувале.Откако обвинителниот акт е доставен до сите обвинети и нивните бранители, на 3 октомври 2025 година истекуваат законските рокови за приговори.„Со тоа се исполнети сите услови за оцена и се очекува актот до крајот на неделата да биде оценет. Јавноста и странките ќе бидат навремено известени“, додаваат од Кривичниот суд.Од судот нагласуваат дека прават максимални напори за да се исполнат сите законски обврски и да се гарантираат правата на странките, со цел предметот да не биде компромитиран во понатамошната постапка.

Македонија | пред 6 месеци

Објавени докази за корупцијата во „Пулс“: Инспектори од МВР и УЈП предупредувале за контроли во замена за подароци и резервации, Обвинителството проверува

Иако судскиот процес за трагичниот пожар во дискотеката „Пулс“ во Кочани сè уште не е започнат, во јавноста излегуваат нови докази за лица кои воопшто не се опфатени со обвинението.„Истражувачката репортерска лабораторија“ (ИРЛ) објави текстуални разговори кои упатуваат дека сопствениците на дискотеката однапред биле предупредувани од инспектори за претстојни контроли. Според ИРЛ, дел од инспекторите од Државниот пазарен инспекторат и Управата за јавни приходи дури примале и скапи подароци за возврат, меѓу кои биле и часовник.ИРЛ објави и текстуални пораки кои покажуваат дека сопствениците на дискотеката комуницирале со инспектори од МВР кои барале привилегии – меѓу нив и резервирани маси во клубот.Додека институциите се оправдуваат, семејствата на загинатите и преживеаните продолжуваат да раскажуваат за нивната голгота.„Кога стигнавме таму – гужва, дим, пламен. Немаше струја. Наидов на зид од деца, сите беа испреплетени, без свест. Моето дете не можев да го најдам. За 500 луѓе имаше еден излез од два метри – тоа е убиство“, сведочи Сашко Алексов, татко на починатата Сара.За преживеаниот Јорданчо Ефтимов траумите се уште свежи, тој вели дека во еден момент бил помирен дека ќе умре:„Додека лежев на земјата, само кога ја протнав раката, сфатив дека ме вадат од гомилата. Тоа беше чудо“.Марија Петрушова, која го изгубила синот Андреј, раскажува за другиот син Кристијан:„Вика – јас влегов, темно, некој ќе те фати за нога, ти го влечеш надвор, не гледаш кој е“.Очевидци и родители опишуваат апокалиптична слика: преполни болници, мртви тела низ ходниците, крв и очај.„Кога влегував, пазев да не згазам некое детенце“, потресено изјави Драги Стојанов, татко на загинатиот Томче.Градот Кочани останува во тешка траума.„Нема веќе живот тука, сите бараме правда“, велат жителите.Основното јавно обвинителство реагираше на сторијата на ИРЛ со соопштение дека сите докази се земени предвид и се проверуваат:„При поднесување на обвинението и на средбата со семејствата на загинатите, појаснивме дека проверки се вршат и во однос на повеќе институции, вклучително и УЈП. Но законските надлежности на УЈП се однесуваат на даночни и финансиски прашања, а не на безбедност, па тие не беа опфатени во обвинението. Сепак, во контекст на евентуални коруптивни дела на поединци, постапките се во тек. Презентираната комуникација е веќе дел од доказниот материјал доставен до судот. Апелираме за воздржаност од изнесување непроверени информации кои можат да ја загрозат постапката“.

Македонија | пред 6 месеци

(Видео) Родителите од „Пулс“ даваат рок до 3 октомври — ако нема одговори, следуваат протести и блокади

Дел од родителите на загинатите во мартовскиот пожар во дискотеката „Пулс“ упатија остар повик до јавните обвинители и до судиите: бараат итни и јасни одговори за напредокот на постапките и најавија дека доколку до 3 октомври не добијат конкретен одговор, мирните маршеви ќе прекинат и ќе следуваат протести и блокади.„Обвинители и судии, ние, семејствата на жртвите од трагедијата во ‘Пулс’, бараме итен и јасен одговор од вас. Доста е со молчење, поминаа шест месеци. Срамота е“, рече мајка на едно од загинатите деца. Родителите појаснуваат дека до Јавното обвинителство за гонење на организиран криминал и корупција (ОЈО-ГОКК) веќе доставиле прашања и очекуваат информации за тоа до каде е постапката против вработените во МВР и кога ќе се подготви обвинителниот акт. На судиите од Кривичниот суд им упатија прашање дали ќе донесат оценка на обвинителниот акт или ќе се повлечат пред политички влијанија.„Нема повеќе трпеливост, бараме итна одговорност. Време е да заврши одолговлекувањето. Ако до петок, 3 октомври, не добиеме одговор, нема повеќе мирни маршеви — ќе има протести и блокади. Нема повторно молчење“, додаде мајката. Роднините нагласуваат дека нивниот повик не е политички мотивиран, туку е израз на бес и тага поради месеци без одговори и без правна разврска. Тие порачаа дека ќе ја бараат вистината и одговорноста „до крај“, бидејќи, како што велат, цели семејства се уништени и немаат што да изгубат, па ја повикаа правосудната власт да покаже доблест.

Македонија | пред 6 месеци

Во Пробиштип откриена биста на полицаецот Тоше Тодоровски, жртва во „Пулс“

Во кругот на полициската станица во Пробиштип денеска беше откриена бистата на полицаецот Тоше Тодоровски, кој трагично го загуби животот во пожарот во дискотеката „Пулс“. На чинот присуствуваа неговото семејство, роднини, пријатели и колеги. Присутен беше и министерот за внатрешни работи, Панче Тошковски, со делегација од МВР.Тодоровски загина извршувајќи службени задачи за време на акција за контрола на наркотици во дискотеката. Во моментот кога избувнал пожарот, тој останал внатре и не успеал да се извлече.Трагедијата во која животот го загубија вкупно 62 лица, најголем дел млади од Кочани, Штип, Пробиштип и Скопје, останува една од најголемите во поновата историја на земјата.

Македонија | пред 6 месеци

Родителите од трагедијата во „Пулс“: Ако можевте 30 километри до Штип, можете и 300 метри до Паркот?

Здружението на граѓани „16-ти Март 2025“, во кое се обединети дел од родителите на загинатите деца во кочанската трагедија, упати порака до јавноста по големиот концерт на Дино Мерлин во Штип.„Скоро цело Кочани патуваше 30 километри до Штип на концерт. А градоначалникот на Штип, ете, предизборно најде време и срце да ги покани повредените деца и да им обезбеди маси за Дино Мерлин. Респект за гестот, респект за одзивот! А ние се прашуваме… Кочанчани, ако можевте 30 километри до Штип, зарем 300–400 метри до Паркот на револуцијата се премногу? Таму не ве чекаат ѕвезди на сцена, туку споменот на вашите другари и другарки – 62 ангели што таа кобна ноќ ја оставија младоста на овој град,“ стои во реакцијата.Од здружението додаваат дека следниот марш не е за концерт или медиуми, туку за човечка почит и за вистинска правда:„Наши сограѓани, родители – ве очекуваме на следниот марш. За 62 светлосни траги кои ја оставија младоста на овој град, за секоја насмевка што ќе недостасува, за секој срцев удар на сеќавањето – да покажеме дека споменот живее и дека љубовта и почитта остануваат засекогаш.“

Македонија | пред 6 месеци

Додека тие што се виновни се кријат зад оправдувања, јас тука сум — со раце полни цвеќе, ќе се борам за твојата правда, напиша мајката на загинатата Ивона

Стојка Иванова-Антова, мајка на Ивона Антова која загина во трагедијата во клубот „Пулс“ заедно со уште 61 лице, на социјалните мрежи објави потресна порака за својата ќерка и повика на правда.„Ивонче моја, ангеле мој... Секој цвет што го носам, секоја свеќа што ја палам — е дадена од моето скршено срце за тебе. Сè тука е подредено за твојот мир: светлина, мирис на цвеќе, мала небесна куќичка што ја направив за тебе со свои раце“, напиша таа.Во објавата таа вели дека „домот не можам да го средам — не можам да се вратам на обичноста додека ти не си тука — но за тебе можев и правам сè“.Иванова-Антова ја опиша болката за изгубеното дете: „Ти беше мојата радост, мојата насмевка, мојот живот. И она што ми го земаа — ми го зедоа без да ми дадат причини, без да ги платат со срце. Им го гледам нивното избегнување, нивните шепотења, ‘не знаевме’, ‘случајно’ — но не е случајно кога млади животи се скратени и кога некој мисли дека може да си замине без одговор. Јас нема да замолчам. Не за тебе, не за нас.“„Ако имаше барем капка совест, ќе се приближеа и ќе побараа прошка. Но прошката не ја барам затоа што ја сакам нив — ја барам за правда за тебе, за да не им се повтори на други деца, други мајки, други семејства“, продолжи таа во својата порака.„И додека тие што се виновни се кријат зад оправдувања, јас тука сум — со раце полни цвеќе, со очи полни солзи и со срце кое не може да престане да те вика. Ги редам твоите слики, го чистам твоето мало небо, иако дома не можам да најдам сила да почистам ништо друго — затоа што секое мое битие е посветено само на тебе. Твојата фотка, твојата насмевка — тоа е мојата сила да станам и да бидам тука за тебе“, напиша Иванова-Антова.Во објавата заврши со зборовите: „Ти благодарам што постоеше во мојот живот, Ивонче. Беше премногу кратко, но беше совршено по своја убавина. Ќе продолжам да те чувам, да те украсувам, да те носам во секој здив и во секоја молитва. И нема да молчам за вистината — за тебе, за сите што те сакаа, за секое малечко срце што заслужува да живее и да се смее. Каде и да си сега — гледај, јас ти средив убаво. Ти имаш небо од свеќи и ангели, а јас ќе се борам со сите сили за твојата правда. До денот кога ќе те прегрнам повторно — ти си мојата вечна љубов. Те сака мамичка највеќе од сè.“

Коментари | пред 6 месеци

Тешка исповед на мајката на загинатиот Андреј во „Пулс“: Животот ми остана темница, те изгубив легнат на кревет без изгореници...

Шест месеци по трагичниот настан во Кочани, кога меѓу жртвите беше и нејзиниот син, мајката Марија Петрушева ги сподели своите болни чувства и неизмерната тага во јавна исповед. Во емотивниот текст таа раскажува како секој ден се обидува да ја почувствува присутноста на синот Андреј преку старите пораки и снимки на мобилниот телефон.Нејзината исповед, во целост:„Син на мајка – Андреј. Сине мој, сè уште стоиш во мојот телефон како 'Син на мајка'. Секој ден повторно ги отворам нашите разговори и читам... барам трага од тебе, глас што нема да замолчи. Зборови што ми се како здив, но и како нож. Телефонот ми е во рака, проверувам – дали си ми пишал, дали имам пропуштен повик... секојпат се надевам на чудо. Сеуште ја бирам твојата шифра, почнувам порака – пишувам, пишувам – а одговор нема. Само мртва тишина.Поминаа шест месеци, сине. Шест месеци без тебе, без твојата насмевка, без твоите прегратки. И јас одбивам да прифатам дека никогаш нема да се вратиш. Душата ми е искината на милион парчиња. Секој ден ми е потежок, секој здив ми е потежок. Болката расте, а со неа и празнината.Секогаш се сеќавам на ноќта... Ноќта кога петнаесет минути неизвесност беа мојата најголема светлина. Последната вест што ја слушнав кога ве барав пред ужасот кој го затеков пред дискотеката: „Со амбулантно возило отидоа во болница, Андреј беше со слаб пулс, Кристијан е во свесна состојба, со него е...“ Петнаесет минути надеж. Петнаесет минути вера дека ќе останете живи и двајцата. А потоа... кога влегов и те видов легнат на кревет, без изгореници... не сфатив. Не прифатив. Не можев да поверувам дека е готово, дека те изгубив засекогаш. Само гласот на брат ти одекна до мене: „МАМО, МАМО, НЕ УСПЕА БРАТ МИ, ГО ИЗГУБИВМЕ ЗАСЕКОГАШ!“Тој крик ми ја распарчи душата. Се обидувавме да те анимираме, да те вратиме... Се борев да ја грабнам твојата душа назад, но Господ не ме послуша. Плачев: „Земи ме мене, Господи, остави го него. Тој е млад, тој е мојата иднина, тој е мојот живот!“ Но не... те изгубив, сине. Те изгубив засекогаш.Се враќам на тој ден – 16 март 2025 година – денот кога светот престана да постои за мене. Денот кога ми згасна сонцето. Денот кога ја изгубив мојата сила. Зошто, Андреј? Зошто не успеа? Зошто не можеше да се спасиш? Илјада прашања ми горат во мислите, но одговори нема. Само болка. Само црнина.Животот ми остана темница. Секој здив е како нож. Секој чекор е без смисла. Сине мој, ангеле мој – ми недостигаш повеќе од сè, повеќе од зборови. Те барам во сонот, те очекувам на вратата – да влезеш со насмевка и да ми речеш: „Мамо, тука сум“. Но се будам, и вистината пак ме убива. Ќе продолжам да пишувам пораки што никогаш нема да стигнат. Ќе продолжам да те барам во секоја светлина, во секој здив, во секое срце што чука околу мене. Зашто ти, Андреј мој си и ќе останеш мојата вечна љубов, мојата вечна рана, мојата вечна болка.“

Коментари | пред 6 месеци

(Видео) „6 месеци без правда“ – Скопје со ѕвездено небо се сети на жртвите од Кочани

На скопскиот плоштад, граѓани со т.н. „ѕвездено небо“ одбележаа шест месеци од трагедијата во Кочани каде загинаа 62 лица. Од плоштадот во Скопје, се испрати порака дека се чека правда. На единствениот транспарент, пишуваше „6 месеци без правда, Кочани“. View this post on Instagram A post shared by Скопје1 / Skopje1.mk (@skopje1mk)Дел од присутните носеа и маички „не умираме од несреќи, умираме од корупција“.Пред фонтаната, беше ставена фотографија од Андреј од ДНК, а пред него, свеќа. Една од присутните, носеше фотографија и од загинатата Надица која имаше 18 години, а под неа пишуваше „Почивај во мир, те сакам“. View this post on Instagram A post shared by Скопје1 / Skopje1.mk (@skopje1mk)

Скопје | пред 6 месеци

Собир во вторник на плоштад за загинатите во Кочани: „Вака веќе не може, не смееме да отрпнеме“

Движењето „Кој е следен“ најави собир на плоштадот во Скопје, а по изминувањето на шестте месеци од трагедијата во Кочани каде во дискотеката „Пулс“ загинаа 62 лица. Собирот е закажан за во вторник, во 20:16 минути.„Не беше несреќа, не беше трагедија, беше масакр. Свирепо убиство од страна на дисфункционалните институции и партискиот картел. Вторник, 16 септември, 20:16 минути, младите повикаа на тивок собир и ѕвездено небо. Вака веќе не може. Не смееме да отрпнеме. Болката мора да ја почувствуваме сите заедно. Таа болка треба да нѐ разбесни и поттикне на акција. Најважно е да не престанеме да се бориме за вистината, да не останеме мени пред неправдата, да преземеме одговронсот, секој на свој начин“, сои во највата.

Скопје | пред 6 месеци

Шест месеци од трагедијата во „Пулс“: Мајката на Ивона со потресна порака

Стојка Антова, мајката на загинатата Ивона во пожарот во дискотеката „Пулс“ во Кочани, каде животот го загубија 62 млади лица, денеска се огласи со емотивна објава на социјалните мрежи по повод шест месеци од трагедијата.„6 месеци без моето Ивонче. Шест месеци одам на гроб, а виновниците си шетаат... Мене ми ја искорнаа душата, а нив совеста не ги допира. Една беше Ивона – мојот ангел, мојот живот. Ќе ја љубам засекогаш, а правдата ќе дојде – и тогаш ќе боли таму кај што најмногу треба,“ напиша Антова.Објавата предизвика силни реакции во јавноста, потсетувајќи уште еднаш на болката на семејствата кои ги изгубија своите најблиски во најголемата понова трагедија во Македонија. Случајот „Пулс“ сè уште е во тек пред институциите, а родителите на жртвите постојано апелираат за брза и правична разрешница.

Коментари | пред 6 месеци

До кога ќе се чека обвинетите да седнат на обвинителна клупа, прашаа роднините на загинатите ви “Пулс”

Родителите и семејствата на младите кои загинаа во пожарот во дискотеката „Пулс“ денеска по 21 пат излегоа на улиците на Кочани, барајќи побрза реакција на институциите и правда за своите најблиски.Протестниот „Марш за ангелите“ повторно ја помина добро познатата траса – од „Паркот на револуцијата“, покрај Трговскиот центар, Општината, Управата за јавни приходи и полициската станица, до Основниот суд и Обвинителството.Пред зградата на институциите, роднините јавно се обратија до судиите и обвинителите, потсетувајќи дека веќе три месеци се чека на оценка на обвинителниот акт.„Одолговлекување без оправдана причина е спротивно на законот и претставува основ за реакција од страна на оштетените и јавноста. Ние ве прашуваме – постои ли рок во кој Советот мора да донесе одлука? Ако не постои, барем кажете кога може да се очекува завршување на оваа постапка,“ изјави Розета Џамова, сестра на една од жртвите.Протестот се одржа само еден ден откако Обвинителството ја прошири истрагата за трагедијата. Поднесено е ново обвинение против реалниот сопственик на агенцијата за обезбедување „Рубикон Секјурити Солушн“, кој се товари за тешки дела против општата сигурност поради сериозни пропусти во организацијата и мерките за заштита во дискотеката.Истовремено, до Основниот кривичен суд Скопје е доставен предлог за продолжување на сите претходно определени мерки за обезбедување присуство на обвинетиот.

Македонија | пред 7 месеци

(Видео) „Гледате што направивме ние за шест месеци за Кочани, што направивте вие?“, остар говор на Ивановски од „Support Kocani“ пред функционерите од градот

На доделувањето на признанија по повод Денот на ослободувањето на Кочани, Иван Ивановски од „Support Kocani“ им се обрати директно на присутните функционери, советници, директори и пратеници со остри зборови. View this post on InstagramA post shared by Скопје1 / Skopje1.mk (@skopje1mk)„Многу ми е жал што за ваква работа треба да добиеме награда. Морам да бидам искрен малку. Сите сме криви за ова што ни се случи. Да, некој е повеќе крив, некој е помалку крив. Вие што седите тука и сте на функција сте малку повеќе криви од нас. Така што, запрашајте се сите, мислам дека е време да ги тргнете партиите на страна и од срце да правите работи. Ова е она што ние за шест месеци успеавме да направиме за нашиот град. Вие што направивте? Не викам дека ништо не сте направиле, ама дајте, седнете, за луѓето правете сите работи. Дајте да покажеме срце за Кочани. Ни се иселуваат луѓе, ни гинат, а ние партиски се препукуваме кој од која партија бил“, кажа Ивановски во име на „Support Kocani“ кои изминативе месеци собраа илјадници евра донации, обезбедуваа целосна логистика за купување на медицински помагала кои тие ги финансираа, помагаа на семејства погодени од трагедијата во „Пулс“.Ивановски додаде: „Дајте сега вие што сте при крај со мандатот и нови што ќе дојдат, размислувајте за Кочани, па после сите други работи. Можеби ова не беше ова добра прилика да ви го кажам, на ова место, но сега ми лежеше на срце“.

Македонија | пред 7 месеци

Обвинение против Александар Нацев, реалниот сопственик на обезбедувањето во „Пулс“: Познато за што се гони

Обвинителскиот тим кој постапува во предметот во врска со пожарот во кочанската дискотека „Пулс“ денеска до Основниот кривичен суд Скопје поднесе Обвинителен акт против уште едно лице за сторени – Тешки дела против општата сигурност од член 292 став 2 во врска со член 288 став 3 во врска со став 2 во врска со член 22 од Кривичниот законик.И овој обвинет се товари за сопствен особен придонес, бидејќи заедно со повеќе одговорни и службени лица за кои веќе е поднесен обвинителен акт кој е во фаза на оценка, како и со други за сега непознати лица, не постапил според прописите и техничките правила за мерките за заштита и со тоа предизвикал опасност за животот и телото на луѓето, како и имотот од големи размери.Поради нивните пропусти во еден подолг временски период, како и поради конкретните дејствија на дел од обвинетите, на 16.03.2025 година во угостителскиот објект во Кочани бил предизвикан пожар на место каде што биле собрани поголем број луѓе, при настап на музичката група ДНК, во целосно небезбедни и опасни услови, поради што настапила смрт кај 62 лица, со тешки телесни повреди се здобиле 157 лица, а со телесна повреда се здобиле 65 лица.Последниот обвинет, во временскиот период од септември 2022 година до денот на пожарот, во Скопје и Кочани, како одговорно лице – реален сопственик на обвинетото правно лице Друштво за обезбедување на имот и лица РУБИКОН СЕКЈУРИТИ СОЛУШН увоз-извоз ДООЕЛ Скопје, заеднички со веќе обвинетиот управител, раководел со деловниот потфат и целокупното работење на агенцијата за обезбедување.Тие, иако имале сопственичка одговорност, не постапиле согласно чл.3 од Закон за приватно обезбедување, со тоа што не презеле мерки и активности заради спречување и откривање на штетни појави и противправни дејствија кои го загрозуваат телесниот интегритет и достоинството на личноста и имотот што се обезбедува и согласно чл.6 од Закон за приватно обезбедување, односно обезбедувањето го вршеле без да имаат склучено писмен договор за приватно – физичко обезбедување со корисникот на услугата –угостителски објект „Клуб Пулс“ и без воопшто да водат грижа, контрола и надзор при исполнување на обврските на лицата кои вршеле обезбедување на имот и лица.На критичниот ден, тројца вработени во агенцијата со важечки лиценци за приватно обезбедување и со легитимации на обвинетото правно лице, како и еден обвинет без лиценца за вршење на работи на физичко обезбедување, биле задолжени да го обезбедуваат објектот во Кочани без да утврдат претходна безбедносна проценка со проверка по однос на сигурносните услови на објектот, опасностите и можностите за евакуација во случај на опасност, без проверка на влезови и излези и нивна исправност, во услови на преполнетост на капацитетот на посетители. Притоа, спротивно на законските обврски, правното лице не изготвило и не доставило План за обезбедување при одржување на јавен ред на настан од забавен карактер со присуство на поголем број на посетители и не биле ангажирани повеќе работници на обезбедување како што налагале условите во објектот.Вработените распоредени од Агенција за обезбедување „Рубикон“ не постапиле по одредбите од Закон за приватно обезбедување и не извршиле проверка на идентитетот и возраста на лица при влез на објектот што го обезбедувале и со тоа овозможиле влез на деца – лица кои не наполниле 18 години и нивно присуство во објектот по 00.00 часот. Не постапиле и согласно законската обврска да извршат преглед на лица при влез во објектот што се обезбедува, а заради пронаоѓање предмети кои може да се користат заради уништување или оштетување на имотот, како и предизвикување опасност по животот, со што не го спречиле внесот и користењето на експлозивни материии – пиротехнички средства со кои бил предизвикан пожарот.Од доказите обезбедени во текот на истрагата произлезе дека сега обвинетиот имал главна улога во обвинетото правното лице, фактички раководел со агенцијата и давал директни инструкции на обвинетите кои критичната вечер биле ангажирани како обезбедувачи. Исто така, обезбедени се докази дека по пожарот во Кочани тој презел активности во насока на формирање ново правно лице со седиште во Струмица, чија основна дејност му е исто така физичко обезбедување на имот и лица, а со цел да ја продолжи дејноста повторно затскривајќи се формално-правно во раководењето зад друго одговорно лице.Од тие причини, иако истрагата за ова лице е завршена и доказите се обезбедени, јавните обвинители кои постапуваат проценија дека се уште постојат одредени ризици за негово целосно обезбедување во текот на постапката. Имајќи предвид дека Судот, одлучувајќи по жалба на обвинетиот, веќе ја заменил претходно определената мерка притвор со мерка куќен притвор и со дополнителни забрани за напуштање на живеалиштето, за комуникација со одредени лица и одземање на патна исправа, јавното обвинителство до судот достави и предлог за продолжување на сите определени мерки и забрани.

Македонија | пред 7 месеци

Петмина повредени од пожарот во „Пулс“ сè уште на болничко лекување, двајца се во тешка состојба

И по пет месеци од трагичниот пожар во дискотеката „Пулс“ во Кочани, пет лица сè уште се наоѓаат на болничко лекување. Двајца од нив се згрижени во здравствена установа во Турција, а тројца во домашни болници, објави „Фокус“.Од Фондот за здравствено осигурување за медиумот информираат дека двајца пациенти се лекуваат во Истанбул, при што едниот е во завршна фаза на третман и наскоро се очекува негово враќање во Македонија. Во земјава, еден пациент е згрижен на Клиниката за пластична и реконструктивна хирургија, а уште двајца се наоѓаат на болничко лекување во „Аџибадем Систина“.Од овие пациенти, двајца се во тешка состојба.-Од вкупниот број, двајца повредени се сè уште во тешка состојба, а нивниот општ здравствен статус внимателно се следи од медицинските тимови, додаваат од ФЗО.

Македонија | пред 7 месеци

(Видео) Нови болни сцени од Кочани, мајката на загинатиот диџеј со порака за неговиот роденден: Небото одекнува од твојата музика, слави го со ангелите

Во Кочани повторно се одржа марш на родителите, роднините и пријателите на младите кои трагично загинаа во пожарот во дискотеката „Пулс“. Болни сцени, солзи и тишина ја обележаа поворката, при која родителите носеа фотографии од своите деца.„Корумпираната држава ни ги украде децата. Корупцијата ни го одреди местото каде да ги славиме нивните родендени – на гробиштата. Ни го украдоа сонот, ни ја скратија иднината, а болката ја претворија во наша секојдневна реалност. Бараме правда за нашите деца, бараме крај на корупцијата, бараме животите на младите да не завршуваат во идни статистики“, пишуваше на еден од транспарентите.„Моето дете умре, беше убиено од систем кој не штити, туку убива“, порача друг транспарент.Особено емотивна порака носеше Мита Тасева, мајката на загинатиот диџеј Стефан Тасевски, чиј роденден беше вчера: „Денес небото одекнува од твојата музика, синко наш. Слави го роденденот со ангелите.“„Ние, родителите, скапо го плативме данокот на корупцијата“, стоеше напишано до фотографиите на загинатите.

Македонија | пред 7 месеци

Блупринт групата за постапката по трагедијата во Кочани: Државата треба конечно да покаже дека правдата не е апстрактен поим, туку процес што може да се види

Блупринт групата за реформи во правосудството излезе со заедничка изјава во поддршка на семејствата на жртвите од трагедијата во Кочани, кои на 17 август јавно сведочеа за своето искуство.„Тие сведочат дека наместо да добијат разбирање и поддршка, се чувствуваат нападнати и изложени на различни притисоци, што уште повеќе ја зголемува недовербата кон институциите. Во вакви околности, потребен е особено сензитивен и одговорен пристап, кој ќе покаже дека државата ги слуша и ги зема предвид нивните стравови и грижи,“ се наведува во соопштението.Групата посочува дека по завршувањето на истрагата и доставувањето на предметот во Основното јавно обвинителство, останува клучно постапката да се води целосно транспарентно и без притисоци врз семејствата, сведоците и сите вклучени.„Недовербата што ја изразуваат родителите и јавноста е гласна и оправдана реакција која се базира на одамна изгубената сигурност во институциите. Државата треба конечно да покаже дека правдата не е апстрактен поим, туку процес што може да се види, почувствува и доживее,“ се нагласува во изјавата.Воедно, апел е упатен и до медиумите да продолжат внимателно и одговорно да ја следат постапката, со почитување на достоинството на жртвите и нивните семејства, но и со упорност во откривањето на евентуални неправилности и притисоци. „Само преку внимателно известување и силна јавна контрола може да се обезбеди доверба дека правдата ќе биде достижна и достапна за сите,“ порачаа од Блупринт групата.Изјавата ја потпишаа: Институт за човекови права, Македонско здружение на млади правници, Хелсиншки комитет за човекови права, Коалиција „Сите за правично судење“, Институт за европски политики и Центар за правни истражувања и анализи.

Македонија | пред 7 месеци