РУСИЈА

Естонија предупредува: Русија не е искрено заинтересирана за мир

Русија се соочува со сè поголеми внатрешни проблеми поради неуспесите на фронтот во Украина и економските тешкотии, изјави Каупо Росин, директор на естонската надворешна разузнавачка служба.Во интервју за The Kyiv Independent, Росин оцени дека времето во моментов не работи во корист на Владимир Путин, сè додека Западот продолжува со санкциите и поддршката за Украина.„Нема вистински успех на бојното поле за Русија и покрај огромната цена што ја плаќа“, изјави Росин.Тој посочи дека во Русија расте незадоволството поради ограничувањата на интернетот, зголемувањето на даноците и инфлацијата, додека руското напредување на фронтот забавува.Според него, украинските напади со беспилотни летала стануваат сè поефикасни и веќе погодуваат цели и во московскиот регион.Росин смета дека Кремљ моментално не е искрено заинтересиран за мировни преговори и предупреди дека евентуално украинско откажување од Донбас нема да донесе траен мир.„Русија веројатно би дошла со нови барања и повторно би почнала преговори од почеток“, рече тој.Шефот на естонското разузнавање оцени и дека Москва верува оти може да го „надмудри Западот“, додека САД и понатаму остануваат главен противник за Русија.Иако смета дека руската армија моментално нема капацитет за напад врз Естонија, Росин предупреди дека Западот не смее да се опушти.„Мораме да дејствуваме веднаш“, порача тој.

Свет | пред 1 седмица

Украински сили: Ситуацијата кај Покровск станува сè потешка

Украинските сили кои држат позиции северно од Покровск се „речиси отсечени“, додека руските сили сè повеќе доминираат во воздухот, логистичките правци и возвишенијата околу градот во Доњецката област, пренесува Kyiv Independent.Во проценката објавена од украинскиот 7. корпус за брзо дејствување се наведува дека руските дронови создаваат огромен притисок врз украинските единици, поради што ротациите, евакуациите и снабдувањето станале речиси невозможни.Според украинските сили, Русија ги контролира возвишенијата и високите згради околу Покровск и користи системи за надзор и електронско војување за доминација над воздушниот простор.Покровск со месеци е едно од главните жаришта на борбите во Доњецката област, бидејќи претставува важен логистички јазол за украинската армија.Украинскиот корпус опиша и таканаречена „зона на уништување“ долга околу 25 километри северно од градот, која е под постојан надзор на руски оператори со дронови.„Нашата логистика до тие позиции е сведена на минимум и е можна само по воздушен пат – со дронови“, наведуваат украинските сили.Тие додаваат дека руските FPV-дронови веднаш уништуваат беспилотни копнени возила, а украинските пешадиски единици често мораат пеш да минуваат десетици километри низ шумски и ридски терени за да избегнат откривање.Според украинската проценка, движењето кон фронтот е претворено во „игра на криенка со смртта“, бидејќи извидувачките дронови постојано кружат над теренот, по што следуваат прецизни артилериски напади.

Свет | пред 1 седмица

Путин и Си ќе разговараат за гасот, нафтата и „Силата на Сибир 2“

Енергетската соработка меѓу Русија и Кина ќе биде една од главните теми на разговорите меѓу Владимир Путин и Си Џинпинг за време на претстојната посета на Путин на Пекинг.Ова денеска го изјави помошникот на Кремљ за надворешна политика, Јуриј Ушаков.Според него, детално ќе се разговара за соработката во секторот на јаглеводороди, испораките на гас и проектот за гасоводот „Сила на Сибир 2“.Ушаков изјави дека руските испораки на нафта во Кина во првиот квартал од годинава пораснале за повеќе од 35 проценти и достигнале 31 милион тони.Тој додаде дека Русија останува еден од најголемите извозници на природен и течен гас во Кина.„Енергетската соработка е локомотива на економските односи меѓу Русија и Кина“, рече Ушаков, додавајќи дека трговската размена меѓу двете земји во 2023 година достигнала речиси 240 милијарди долари.Според него, плаќањата во национални валути помогнале билатералната трговија да биде заштитена од надворешни притисоци и нестабилност на глобалните пазари.Ушаков најави и дека Путин ќе учествува на самитите на БРИКС и Шангајската организација за соработка подоцна годинава.

Свет | пред 1 седмица

Украинските напади ја погодија руската нафтена индустрија, тврди Зеленски

Украинскиот претседател Володимир Зеленски денеска изјави дека руските нафтени капацитети се значително погодени од украинските далекусежни напади и санкциите.Според Зеленски, Русија била принудена да го намали бројот на активни нафтени извори и капацитетите за преработка на нафта.„Поради специфичностите на руското производство на нафта, ова се сериозни загуби, бидејќи повторното активирање на нафтените извори во Русија е многу потешко отколку во другите земји производители“, изјави Зеленски.Тој тврди дека само една руска нафтена компанија затворила околу 400 нафтени извори, иако не станува збор за најголемата компанија во секторот.Украинскиот претседател додаде дека руската преработка на нафта паднала за најмалку 10 проценти во првите месеци од годинава.Зеленски предупреди и на, како што наведе, знаци на растечка банкарска криза во Русија и зголемен дефицит на федералниот буџет.Според него, дефицитот на рускиот буџет до мај достигнал речиси 80 милијарди долари, додека многу регионални буџети се соочуваат со ризик од банкрот.Тој исто така обвини дека Русија се обидува да извезува жито од анектираниот Крим и да привлече инвестиции и технологии од западни земји во арктичките нафтени и гасни проекти.

Свет | пред 1 седмица

Русија ги повика САД да се приклучат на мировните преговори со Украина

Русија очекува продолжување на мировните преговори за завршување на војната во Украина и ги повикува Соединетите Американски Држави да се вклучат во процесот, изјави портпаролот на Кремљ, Дмитриј Песков, пренесуваат руските агенции РИА Новости, РБК и ТАСС.Песков потсети дека мировниот процес моментално е „во застој“.„Сепак, очекуваме преговорите да продолжат и нашите американски колеги во таа насока да вложат мировни и посреднички напори“, изјави тој.Портпаролот на Кремљ повторно тврдеше дека Русија во Украина гаѓа „само воени или речиси воени цели“, а истовремено обвини дека украинските вооружени сили напаѓаат инфраструктурни објекти на руска територија.Преговарачкиот процес речиси целосно е запрен од крајот на февруари и почетокот на судирите меѓу Соединетите Американски Држави и Израел од една страна и Иран од друга страна.Најавената посета на преговарачите на Доналд Трамп на Киев „по Велигден“ не беше реализирана.Украинскиот претседател Володимир Зеленски на крајот на април изјави дека Украина е подготвена за нова рунда мировни преговори со Русија во трилатерален формат.Потоа, на 14 мај, Зеленски порача дека очекува деблокада на преговорите и интензивирање на дипломатијата.

Свет | пред 1 седмица

Песков ги отфрла обвинувањата дека Русија би го нападнала НАТО преку Белорусија

Кремљ денеска ги отфрли тврдењата на украинскиот претседател Володимир Зеленски дека Русија разгледува можност за напад врз некоја членка на НАТО од територијата на Белорусија.Зеленски во петокот изјави дека Русија се обидува подлабоко да ја вовлече Белорусија во војната во Украина и дека разгледува планови за напад врз северниот дел на Украина или врз некоја земја членка на НАТО од белоруска територија.„Таквата изјава не е ништо друго освен обид за дополнително поттикнување тензии со цел продолжување на војната и ескалација. Не сметаме дека таквата изјава заслужува каков било коментар“, изјави портпаролот на Кремљ, Дмитриј Песков.Белорусија на југ граничи со Украина, а на север и запад со членките на НАТО – Полска, Литванија и Летонија.Властите во Минск ѝ дозволија на Русија да ја користи белоруската територија како појдовна точка за инвазијата врз Украина во 2022 година, а во земјата е распоредено и руско тактичко нуклеарно оружје.Белоруското Министерство за одбрана денеска соопшти дека вооружените сили на земјата, во соработка со Русија, започнале воена вежба за проверка на подготвеноста за распоредување нуклеарно оружје.Во соопштението се наведува дека вежбата не е насочена против ниту една држава и не претставува безбедносна закана за регионот.

Свет | пред 1 седмица

(Видео) Вака денес изгледа Бахмут: „Тука повеќе никогаш нема да има живот“

Центарот на Бахмут денес изгледа како целосно уништен град, една година по завршувањето на една од најкрвавите битки во војната во Украина.Украинскиот новинар Илија Пономаренко објави снимка од разрушениот град, кој го опиша како „Верден на нашето време“ и симбол на невидено уништување.Тој потсети дека Бахмут пред војната бил развиен град со повеќе од 70 илјади жители, познат по фонтаните, производството на сол и пенливо вино, како и по кафулињата, рестораните и уредените улици.„Сега нема ништо освен смрт, урнатини и празнина“, напиша Пономаренко.Битката за Бахмут беше една од најдолгите и најсмртоносните воени операции од почетокот на руската инвазија врз Украина.Со месеци се водеа жестоки улични и рововски борби, а воените аналитичари често ја споредуваа со битките кај Верден и Сталинград.Главна улога во рускиот напад имаше платеничката група „Вагнер“, предводена од Евгениј Пригожин.Руските сили користеа тактика на целосно уништување, при што беа разурнати станбени населби и цивилна инфраструктура.По речиси десет месеци борби, Бахмут во мај 2023 година целосно падна под руска контрола.На крајот од битката, од предвоените 70 илјади жители во градот останаа само неколку цивили кои преживуваа во подруми без струја, вода и греење.

Свет | пред 1 седмица

Кремљ: Нуклеарното оружје е темел на руската безбедност

Портпаролот на Кремљ, Дмитриј Песков, изјави дека нуклеарното оружје е основа на националната безбедност на Русија и гаранција за нејзиното постоење.Според него, рускиот нуклеарен арсенал ја штити земјата од закани и претставува клучен елемент на нуклеарното одвраќање.„Нуклеарна сила не може да биде загрозена, ниту нејзиното постоење. Тоа ни дава сигурност и е темел на нуклеарното одвраќање“, изјави Песков, пренесуваат руските медиуми.Осврнувајќи се на односите со Европа, Песков оцени дека сè поголемите дискусии во Европската унија за можни преговори со Москва претставуваат позитивен сигнал за Русија.Тој рече дека Москва е заинтересирана за обновување на дијалогот со Европа и повтори дека Русија не е виновна за прекинот на односите.Песков ја коментираше и можноста шефицата на европската дипломатија Каја Калас да биде евентуален посредник во разговорите, наведувајќи дека таа „не е во позиција“ да преговара со Русија.Претходно неделава, рускиот претседател Владимир Путин изјави дека Русија развила нуклеарни способности „без конкуренција во светот“ и дека Москва продолжува со модернизација на своите нуклеарни сили.

Свет | пред 1 седмица

Истече американското олеснување за купување руска нафта

Американската администрација не го продолжи изземањето од санкциите за купување руска нафта, кое истече на 16 мај, со што заврши привремениот период на олеснување на рестрикциите кон рускиот енергетски сектор.Мерката се однесуваше на ограничени количини руска нафта што веќе биле натоварени на танкери, а САД претходно двапати го продолжуваа изземањето – во март и април годинава.Одлуката доаѓа во период на зголемена загриженост за глобалното снабдување со енергенси поради конфликтот со Иран и нарушувањата во транспортот на нафта низ Ормускиот теснец, што доведе до раст на цените на суровата нафта на светските пазари.Европските сојузници на Вашингтон го критикуваа привременото ублажување на санкциите, оценувајќи дека тоа ѝ овозможува на Москва дополнителни приходи за финансирање на војната во Украина.Од друга страна, земји како Индија и Индонезија бараа продолжување на изземањето поради зависноста од увоз на енергенси и нестабилноста на глобалниот пазар.Американскиот министер за финансии Скот Бесент претходно изјави дека продолжувањето на мерките било неопходно за зачувување на стабилноста на светскиот енергетски пазар за време на кризата на Блискиот Исток.

Свет | пред 1 седмица

(Видео) Голем украински напад со дронови врз Москва, најмалку тројца загинати

Најмалку три лица загинаа, а 12 се повредени во голем украински напад со дронови врз Москва и околината, соопштија руските власти.Според градоначалникот на Москва, Сергеј Собјанин, во изминатите 24 часа биле соборени повеќе од 120 дронови, а во нападот не била оштетена технологијата на московската рафинерија за нафта. Сепак, оштетени биле три куќи.Руското Министерство за одбрана соопшти дека во текот на ноќта и утрото биле соборени вкупно 556 дронови, вклучително и над московскиот регион.Гувернерот на Московската област, Андреј Воробјов, изјави дека жена загинала откако била погодена куќа во градот Химки, северно од Москва. Тој додаде дека спасувачките екипи трагаат по уште едно лице под урнатините.Двајца мажи загинале и во селото Погорелки во округот Митишчи. Во нападите биле оштетени и повеќе станбени згради и инфраструктурни објекти.

Свет | пред 1 седмица

(Видео) Зеленски објави снимка од украински удари длабоко во руска територија

Украинскиот претседател Володимир Зеленски објави видео од украински напади врз руски воени и индустриски цели, нарекувајќи ги „далекуметни санкции“ против Москва.Според Зеленски, снимката прикажува само дел од операциите што украинските сили ги извеле во текот на изминатата недела, бидејќи дел од акциите сè уште траат.Тој наведе дека во нападите биле уништени руски амфибиски авион Бе-200, хеликоптер Ка-27, како и товарен брод што превезувал големо количество муниција.Меѓу погодените цели се и руски противвоздушни системи „Панцир-С1“ и „Тор“, комуникацискиот систем „Редут-2УС“, дронови и други воени објекти.Зеленски истакна дека украинските летала прелетале речиси 1.000 километри од линијата на фронтот за да ги погодат целите длабоко во руската територија.„Ова е целосно оправдан одговор на она што Русија ѝ го прави на Украина. Ќе продолжиме да го зголемуваме и дострелот и обемот на овие наши санкции“, порача украинскиот претседател.На крајот од обраќањето, Зеленски им се заблагодари на украинската армија, Службата за безбедност на Украина и разузнавачките служби за, како што рече, „исклучителната прецизност“ во нападите.

Свет | пред 1 седмица

(Видео) Руски дрон погоди возило на Обединетите нации во Украина

Руски воен дрон погоди возило на Обединетите нации во украинскиот град Херсон, а снимка од нападот накратко беше објавена на проруски Телеграм-канал.Канцеларијата на Обединетите нации за координација на хуманитарни прашања во Украина потврди дека јасно обележано возило на организацијата било погодено со FPV-дрон додека извршувало хуманитарна мисија.Во нападот нема повредени.На снимката, се гледа нападот изведен од руска единица поврзана со групата „Дњепар“, која дејствува во Херсонската област.Од Обединетите нации соопштија дека и украинската и руската страна биле однапред известени за движењето на хуманитарната мисија.„Цивилите и хуманитарните работници не смеат да бидат цел“, изјави Андреа Де Доменико од Канцеларијата на Обединетите нации за координација на хуманитарни прашања.Според меѓународното право, напад врз јасно означено хуманитарно возило на Обединетите нации може да се смета за воено злосторство.Рускиот воен блогер што ја објавил снимката тврдеше дека мисијата немала официјално одобрение и дека секое неидентификувано возило во близина на фронтот се смета за потенцијална цел.Од Обединетите нации предупредуваат дека ова е втор напад врз нивни возила за само една недела и дека насилството врз хуманитарните работници во Украина станува сѐ почесто.

Свет | пред 1 седмица

Путин ќе ја посети Кина само неколку дена по Трамп

Рускиот претседател Владимир Путин на 19 и 20 мај ќе престојува во официјална посета на Кина, соопшти Кремљ.Посетата ќе се одржи само неколку дена по престојот на американскиот претседател Доналд Трамп во Пекинг.Според Кремљ, Путин и кинескиот претседател Си Џинпинг ќе разговараат за натамошно зајакнување на стратешкото партнерство и соработката меѓу Русија и Кина.Двајцата лидери ќе разменат мислења и за клучни меѓународни и регионални прашања, а по разговорите се очекува да потпишат и заедничка декларација.Во рамки на посетата е предвидена и средба меѓу Путин и кинескиот премиер Ли Ќијанг, посветена на економската и трговската соработка меѓу Москва и Пекинг.Кина важи за еден од најважните економски партнери на Русија и е најголем купувач на руска нафта и фосилни горива.Иако Пекинг повикува на мировни разговори за Украина, досега не ја осуди руската инвазија и се претставува како неутрална страна во конфликтот.

Свет | пред 1 седмица

Путин тврди дека економијата се стабилизира по владините мерки

Рускиот претседател Владимир Путин денес изјави дека економските мерки што ги спроведе руската влада во претходниот период почнаа да даваат први резултати во март, додавајќи дека треба да се разгледаат понатамошни чекори.„Би сакал веднаш да нагласам дека мерките и одлуките што неодамна ги спроведе руската влада почнаа да даваат одреден, иако воздржан, но сепак позитивен резултат. Ова го потврдуваат и позитивните статистики за март оваа година“, рече Путин на состанокот со членовите на владата.Рускиот претседател се осврна на извештајот на министерот за економски развој Максим Решетников, во кој се наведува дека потрошувачката активност се забрзала во март, при што продажбата на големо пораснала за осум проценти, а малопродажбата за 6,2 проценти, објави Интерфакс.Како што е наведено во извештајот, индустриското производство пораснало за 2,3 проценти во март, а производството со стапка од три проценти, додека вкупниот БДП на Русија пораснал за 1,8 проценти, потсети Путин.Министерството за економски развој проценува дека падот на рускиот БДП за периодот јануари-март 2026 година изнесувал 0,3 проценти во споредба со истиот период минатата година.Путин оцени дека е потребно дополнително да се зајакнат позитивните трендови со цел економскиот раст да стане постабилен и поодржлив, најавувајќи можни нови мерки за поддршка на економијата.Според руското Министерство за економски развој, руската економија би можела да порасне за 0,4 проценти во 2026 година, додека аналитичарите анкетирани од Интерфакс очекуваат раст од околу 0,8 проценти.

Свет | пред 1 седмица

Путин го олесни добивањето руски пасоши за жителите на Приднестровје

Рускиот претседател Владимир Путин потпиша указ со кој значително се поедноставува постапката за добивање руско државјанство за жителите на Приднестровје, регион под контрола на проруски власти, пренесува „Киев Индепендент“.Според новите правила, лицата што ги исполнуваат условите повеќе нема да мора да имаат престој во Русија, ниту да полагаат тестови по историја и граѓанско право, како и да докажуваат познавање на рускиот јазик.Приднестровје уште од почетокот на 1990-тите е под контрола на проруски структури и во голема мера зависи од поддршката на Москва.Кремљ со години ја користи политиката на масовно доделување руски пасоши на населението во региони под руски или проруски влијанија, што критичарите го оценуваат како средство за зајакнување на политичката и територијалната контрола.Слични мерки претходно беа воведени и во Абхазија и Јужна Осетија, како и во окупираните делови на Украина, каде што Путин во март годинава го продолжи олеснетиот процес за добивање државјанство на неопределено време.„Целта на новиот указ е што поголем број луѓе да добијат руски пасоши и врз нив да се изврши дополнителен притисок“, изјави за „Киев Индепендент“ правничката Наталија Јурлова од организацијата „Донбас СОС“.Аналитичарите оценуваат дека Москва преку вакви потези се обидува дополнително да го зацврсти своето влијание во регионите што ги смета за стратешки важни, користејќи го државјанството како политички инструмент.

Свет | пред 1 седмица

Најмалку тројца загинати и 60 повредени во новите руски напади врз Украина

Во руските напади низ Украина во изминатите 24 часа загинаа најмалку три лица, а околу 60 се ранети, соопштија украинските регионални власти.Во меѓувреме, во Киев заврши спасувачката операција по разорниот ракетен напад што вчера погоди станбена зграда во населбата Дарницки.Украинските воздухопловни сили соопштија дека Русија во текот на ноќта лансирала шест крстосувачки ракети и 141 дрон. Противвоздушната одбрана успеала да собори еден проектил и 130 беспилотни летала.Во Херсонската област загинаа две лица, а 13 биле повредени во напади врз населби долж реката Дњепар. Уште едно лице загина во Запорожје.Најмногу повредени има во Харковската област, каде што биле ранети 39 лица по напади со дронови и наведувани бомби.Повредени се пријавени и во Дњепропетровската, Одеската и Сумската област. Меѓу нив има и 17-годишно момче кое било рането во напад врз неговото село.

Свет | пред 2 седмици

Русија ја менува методологијата на анкетите по падот на рејтингот на Путин

Руската државна агенција за испитување на јавното мислење ВЦИОМ соопшти дека ја менува методологијата на своите неделни анкети за поддршката на претседателот Владимир Путин, откако на почетокот на 2026 година беше забележан остар пад на неговиот рејтинг, објави „Киев индепендент“.Според податоците на ВЦИОМ, поддршката за Путин паднала за 12,2 процентни поени меѓу крајот на декември и крајот на април и достигнала 65,6 проценти, што е најниско ниво од почетокот на војната во Украина.Досегашните анкети се спроведуваа исклучиво телефонски, преку случаен избор на мобилни броеви. Од мај, ВЦИОМ преминува на комбиниран систем – половина од испитаниците ќе бидат анкетирани телефонски, а другата половина преку лични разговори „од врата на врата“.По воведувањето на новата методологија, рејтингот на Путин за периодот од 4 до 10 мај порасна на 66,8 проценти, што е прв раст од декември 2025 година.Претставникот на ВЦИОМ, Владимир Мамонов, изјави дека во последно време недостасувале испитаници од одредени возрасни групи во телефонските анкети.Од агенцијата наведоа и дека ограничувањата во комуникацијата и филтрите против несакани повици значително ги отежнале телефонските истражувања, поради што граѓаните станале повнимателни.

Свет | пред 2 седмици

Зеленски: Русија подготвува нови ракетни и дронски напади врз Киев

Украинскиот претседател Володимир Зеленски изјави дека Русија подготвува нови ракетни и дронски напади врз клучни објекти во Украина, меѓу кои и Кабинетот на претседателот и неговата резиденција во Киев.Според Зеленски, украинската воена разузнавачка служба дошла до руски документи и сателитски снимки од 6 мај на кои се гледаат координати и податоци за речиси дваесет политички и воени цели во центарот на Киев.„Русија подготвува нови ракетни и беспилотни напади врз таканаречените ‘центри на одлучување’“, напиша Зеленски на мрежата Икс по состанокот со Генералштабот, разузнавачките служби и Службата за безбедност на Украина.Тој порача дека Украина ги зела предвид информациите, но нагласи дека „Украина не е Русија“ и дека изворот на украинската одбрана е подготвеноста на народот да се бори за независноста.„Русија мора да ја заврши војната и да преговара за достоинствен мир, наместо да бара нови начини за заплашување на Украина“, изјави Зеленски.Украинските власти претходно предупредија дека Русија започнала нов бран комбинирани воздушни напади што би можеле да продолжат и во наредниот период.Според Зеленски, само на 13 и 14 мај Русија лансирала 1.567 дронови и 56 ракети од различен тип врз Украина.

Свет | пред 2 седмици

Германски генерал: Русија би можела да го нападне НАТО до 2029 година

Главниот инспектор на германските вооружени сили, Карстен Бројер, предупреди дека Русија би можела да биде подготвена за напад врз НАТО до 2029 година, а според него, такво сценарио е можно и порано.Во заедничко интервју за германскиот весник „Зидојче цајтунг“ со британскиот генерал Сер Ричард Најтон, Бројер изјавил дека повеќе показатели укажуваат на растечка закана од Москва.„Цела низа показатели, од повторното вооружување и зголемувањето на бројот на војници до економските и политичките промени, упатуваат на можен датум за руски напад врз НАТО – 2029 година. А дали тоа може да се случи и порано? Да“, изјавил Бројер.Тој нагласил дека НАТО мора целосно да ја зајакне својата борбена готовност до 2029 година, а до 2035 година да обезбеди технолошка супериорност.„Правецот по кој треба да се движиме е дефиниран со новата воена стратегија и профилот на способности што ги развиваме“, додал германскиот генерал.Неговиот британски колега, Сер Ричард Најтон, изјавил дека е тешко да се предвиди точниот датум, но дека опасноста очигледно расте.„Русија води војна во Украина, притоа учи и развива нови технологии. Путин покажа дека е подготвен да напаѓа суверени држави. Колку сте поблиску до руската граница, толку посилно се чувствува оваа опасност“, изјавил Најтон.Предупредувањето доаѓа откако естонската разузнавачка служба во својот годишен извештај наведе дека Русија во моментов нема намера да нападне земја членка на НАТО во текот на оваа или следната година, но дека продолжува со обновување на своите вооружени сили.Претходно и генерал-полковникот Гералд Функе, началник на Командата за здружена поддршка на Бундесверот, предупреди дека Русија би можела да нападне членки на НАТО во следните две до три години.Во меѓувреме, НАТО најави планови за создавање беспилотна роботска зона долж границата со Русија и Белорусија, каде во следните две години ќе бидат распоредени дополнителни количини оружје и воена опрема.

Свет | пред 2 седмици

Путин ја тестираше политичката зрелост на Европа

Рускиот претседател Владимир Путин ја тестирал политичката зрелост на Европската Унија кога го предложил поранешниот германски канцелар Герхард Шредер како можен преговарач за дијалог меѓу Москва и Европа, изјави денеска рускиот министер за надворешни работи Сергеј Лавров.„Претседателот Путин ја тестираше политичката зрелост и чувствителност на Европејците кога, како одговор на прашање на прес-конференцијата на 9 мај, рече дека поранешниот германски канцелар може да ги претставува Европејците во преговорите со Русија“, изјави Лавров пред новинарите.Тој додаде дека по изјавата на рускиот претседател во Европа настанало големо вознемирување, но дека одредени земји, меѓу кои и Германија, не ја отфрлиле целосно таквата можност.„Дискусијата што следеше по одговорот на нашиот претседател беше прилично забавна“, рече Лавров.Претседателот на Европскиот совет Антонио Кошта претходно изјави дека ќе разговара со лидерите на ЕУ за подготовките за евентуални преговори со Русија „кога ќе дојде вистинскиот момент за тоа“.Подоцна, одговарајќи на новинарски прашања за можен соговорник во разговорите меѓу Русија и Европа, Путин изјави дека лично би претпочитал разговорите да ги води со Герхард Шредер.Сепак, рускиот претседател нагласи дека Европската Унија сама треба да избере лидер кому му верува и кој, како што рече, не давал остри изјави против Русија.Путин исто така истакна дека Европа, а не Русија, била таа што ги одбила преговорите.

Свет | пред 2 седмици

Зеленски е бесен по масовниот руски напад: „Ја срамнија целата зграда со земја“

Украинскиот претседател Володимир Зеленски денеска повика на казнување на Москва, откако положи црвени рози на урнатините од станбена зграда во Киев, каде во руски ракетен напад загинаа 24 лица, меѓу кои и три деца.Спасувачките екипи ја завршија потрагата во уништената зграда, погодена во четвртокот за време на, како што наведуваат украинските власти, најжестокиот руски воздушен напад врз украинската престолнина оваа година.„Нашите спасувачи работеа без прекин повеќе од еден ден“, напиша Зеленски на социјалните мрежи по посетата на местото во киевската населба Дарница, каде положи цвеќе и разговараше со спасувачите.Тој изјави дека руските сили практично срамниле со земја дел од зградата со ракетен удар.Русија, која ја започна целосната инвазија врз Украина во февруари 2022 година, во текот на два последователни дена лансирала повеќе од 1.500 дронови и десетици ракети кон цели во Украина, тврдат украинските власти.Во нападите загинале и шест лица во западниот дел на Украина, далеку од линијата на фронтот.Киевските власти го прогласија петок за Ден на жалост, а државните знамиња во градот беа спуштени на половина копје. Сите забавни настани биле откажани или одложени.Граѓаните носеле цвеќе, плишани играчки и слатки на импровизираниот меморијал кај уништениот станбен блок.Министерството за внатрешни работи на Украина соопшти дека стотици спасувачи пребарувале околу 3.000 квадратни метри урнатини во текот на 28 часа.Според градските власти, извлечени биле 24 тела, додека околу 30 лица биле спасени живи. Речиси 50 луѓе се повредени, а околу 400 побарале психолошка помош.Зеленски изјави дека првичните анализи покажуваат дека зградата била погодена со неодамна произведена руска ракета Х-101.Од друга страна, Москва негира дека намерно гаѓа цивили, иако во текот на повеќе од четири години војна често биле погодени станбени згради и цивилна инфраструктура низ Украина.Во меѓувреме, Украина изврши напади со дронови врз Русија. Четири лица, меѓу кои и едно дете, загинаа денеска во напад врз рускиот град Рјазањ, каде беа оштетени станбени згради и погодено индустриско претпријатие, соопшти регионалниот гувернер.Украина потврди дека погодила руска рафинерија за нафта во Рјазањ.

Свет | пред 2 седмици

(Видео) Лавров бесен го исфрли новинарот од собата: „Ако не го предадете телефонот, ќе извадат оружје“

Рускиот министер за надворешни работи Сергеј Лавров денеска упати забелешка до новинар кој ја прекинал неговата прес-конференција во Индија, по што побарал обезбедувањето да го изведе од просторијата.Лавров веќе зборувал кога новинарот гласно вклучил превод на телефон или уред за симултан превод.Рускиот министер замолкнал неколку секунди, а потоа на англиски јазик прашал:„Можете ли да излезете? Кој ги произведува тие звуци – вие или вашиот телефон?“, пренесува агенцијата „РИА Новости“.Откако звукот повторно се слушнал, Лавров уште еднаш побарал новинарот да ја напушти салата, нагласувајќи дека „не се шегува“.„Момци, изведете го одовде“, им рекол Лавров на припадниците на обезбедувањето.Потоа му порачал на новинарот:„Ако не го предадете телефонот, тие ќе извадат оружје.“Лавров се наоѓа во тридневна посета на Њу Делхи, каде учествуваше на настани во рамки на БРИКС и одржа средби со министрите за надворешни работи на Индија, Тајланд, Египет, Иран и Малезија.

Свет | пред 2 седмици

Захарова: Најголем непријател на Украина не е Русија

Портпаролката на руското Министерство за надворешни работи, Марија Захарова, изјави дека најголем непријател на Украинците не е Русија, туку, како што наведе, „националистичкото малцинство кое ја презело власта во Киев“.„Главниот непријател на Украинците не е Русија ниту Русите, туку националистичкото малцинство кое ја презеде власта во Киев, претворајќи ја земјата во западна марионета и туркајќи ја во корупција и неонацизам“, напиша Захарова во коментар објавен на веб-страницата на руското Министерство за надворешни работи.Таа исто така тврдеше дека 25 руски цивили загинале во напади на украинските вооружени сили за време на примирјето што Русија го прогласила по повод Денот на победата.„Како резултат на украинското гранатирање и нападите со дронови за време на примирјето прогласено од Русија и таканареченото псевдопримирје што го прогласи Володимир Зеленски на 5 мај, загинаа 25 руски цивили, меѓу кои и едно дете, а 209 лица, вклучително и 14 деца, се повредени“, изјави Захарова.Таа додаде дека Киев, според Москва, преку „странски провокатори“ се обидел да ги наруши настаните поврзани со одбележувањето на Денот на победата во други земји.„Сите овие неонацистички обиди пропаднаа“, рече Захарова.Портпаролката на руската дипломатија се осврна и на обвинувањата дека Русија киднапирала украински деца, оценувајќи дека станува збор за „лажна антируска кампања“.„Како што повеќепати сме нагласиле, и Буча и ‘киднапираните деца’ се дел од клеветничка антируска кампања заснована на лажни тврдења. Ни Киев ни Западот не се грижат за правата на децата“, изјави таа.Русија претходно прогласи примирје од полноќ на 8 мај до 10 мај по повод одбележувањето на Денот на победата во Втората светска војна, согласно одлуката на рускиот претседател Владимир Путин.

Свет | пред 2 седмици

Војната во Украина влегува во нова фаза: Ова се трите опции што му преостануваат на Путин

По повеќемесечни неуспешни дипломатски напори и застој во преговорите што се обидуваа да ги поттикнат САД, Кремљ повторно се соочува со клучна дилема – дали да ја продолжи исцрпувачката војна или да прифати прекин на огнот што Владимир Путин го смета за пораз.Путин засега одбива каков било компромис и верува дека руската армија сè уште може да ја скрши украинската одбрана.Извори блиски до Кремљ тврдат дека Путин е убеден оти руските сили можат до есен да го освојат целиот Донбас, по што Москва би ги проширила своите територијални барања кон Украина.„Се обидував да го убедам да ја запре војната на сегашните линии на фронтот. Но тој постојано повторува: ‘Не, за ова не можам да прифатам компромис’“, изјавил извор запознаен со разговорите во Кремљ.Според британскиот весник, следниот чекор на Москва би можел да биде барање Украина да ги предаде и Херсонска област и Запорошка област, кои Русија формално ги анектираше во 2022 година, иако никогаш целосно не ги освои.Но ситуацијата на фронтот значително се променила. Украинските дронови повторно ја вртуваат војната во корист на Киев, напаѓајќи руски складишта за муниција, логистика и рафинерии длабоко зад фронтот.Русија затоа ја менува стратегијата и сè повеќе ги гаѓа украинските фабрики за дронови, воена индустрија и складишта за гориво.Во меѓувреме, независните руски медиуми Медуза и Медиазона проценуваат дека Русија има најмалку 352.000 загинати војници од почетокот на инвазијата, додека холандската разузнавачка служба смета дека вкупните трајни загуби достигнуваат 1,2 милиони луѓе, вклучително ранети и исчезнати.Како можни сценарија за Кремљ се споменуваат три опции.Првата е нова офанзива со фокус на уништување на украинската воена индустрија и производството на дронови.Втората е нова масовна мобилизација. Според украински извори, Москва размислува за регрутирање дополнителни 300.000 луѓе, слично како во 2022 година.„Русија планира нова мобилизација ако процени дека војната мора да трае уште една или две години“, изјавил Андриј Коваленко од украинскиот Центар за борба против дезинформации.Но ваквиот потег би носел сериозни ризици за руската економија и би можел да предизвика дополнително незадоволство во руското општество.Третата можност е поголемо вклучување на Белорусија. Иако Александар Лукашенко досега одбива директно учество во војната, украински извори тврдат дека руската армија веќе ја користи белоруската територија за логистика и управување со дронови.Западни аналитичари, сепак, сметаат дека Русија веќе нема капацитет за голем продор како оној од февруари 2022 година.Во текстот се наведува и дека американските избори би можеле да имаат големо влијание врз развојот на конфликтот. Поранешниот специјален пратеник на САД за Украина, Курт Волкер, оценил дека „времето работи против Путин“.Во исто време, Киев стравува дека евентуална администрација на Доналд Трамп би можела да изврши притисок врз Украина да прифати неповолен прекин на огнот и да се откаже од делови од Донбас.Според извори на „Фајненшел тајмс“, вистинските амбиции на Кремљ можеби се многу поголеми и вклучуваат доминација над источна Украина, па дури и освојување на Одеса и Киев.„Нема да го заземат Запорожје, нема да го заземат Херсон. Но запомнете, планот отсекогаш бил да се заземе Киев“, изјавил еден од соговорниците.

Свет | пред 2 седмици

Дали Путин е уморен? „Кремљ сериозно бара излез од војната“

Владимир Путин, соочен со сè поголем воен и економски притисок, почнал да го менува наративот за војната во Украина, иако сè уште не се откажува од своите максималистички цели.По најмалата парада за Денот на победата за време на неговото владеење, Путин изјави дека „мисли оти војната во Украина се ближи кон крај“, што привлече големо внимание бидејќи станува збор за прва ваква изјава во последните четири години.Тој исто така избегнал дел од триумфалистичката реторика што со години ја користеше во јавните настапи и, според аналитичарите, првпат по долго време го нарекол украинскиот претседател Володимир Зеленски – „господин Зеленски“.Аналитичарот Џон Лаф од Центарот за нови евроазиски стратегии оценува дека станува збор за „донекаде нов речник на Путин“, потсетувајќи дека рускиот лидер претходно често го навредувал Зеленски.Според Грегоар Рос од Chatham House, изјавите на Путин претставуваат „тактички популизам“ со кој на руската јавност ѝ се испраќа порака дека се гледа крајот на војната, додека кон Украина и Западот се сигнализира дека цената на мирот останува политичка капитулација.Анализата наведува дека рускиот систем е силно концентриран околу Путин и дека продолжувањето на војната директно зависи од неговата волја. И покрај дипломатските напори на Доналд Трамп, Кремљ и натаму ги задржува истите барања – територијални отстапки од Украина и признавање на окупираните територии.Во меѓувреме, ситуацијата на фронтот значително се разликува од очекувањата на Москва од 2022 година. Наместо брз пад на Киев, Русија влезе во долготрајна и исцрпувачка војна со ограничени територијални придобивки и големи загуби.Украинските дронови сè почесто напаѓаат руска инфраструктура длабоко на територијата на Русија, вклучително и рафинерии, воени аеродроми и складишта за муниција. Според професорот Дејвид Марплс од Универзитетот во Алберта, Русија губи повеќе војници отколку што може да замени без целосна мобилизација.Како знак на растечка нервоза, руските власти вовеле дополнителни ограничувања на интернетот и јавниот Wi-Fi, особено во Москва и Санкт Петербург. Според независниот медиум The Bell, контролата врз интернет-инфраструктурата сè повеќе ја презема Федерална служба за безбедност на Русија.Стравот од украински напади бил особено изразен пред парадата за Денот на победата, кога мобилниот интернет бил исклучен во делови од Москва поради опасност од напади со дронови.И покрај поблагиот тон, аналитичарите предупредуваат дека Кремљ не се откажал од своите основни цели. Русија продолжува со ракетни и дронски напади врз украинска цивилна инфраструктура и инсистира на услови што Киев ги смета за неприфатливи.Сепак, според Џон Лаф, Кремљ веќе размислува како евентуален излез од војната да го претстави како победа пред домашната јавност.Портпаролот на Кремљ Дмитриј Песков изјавил дека Москва гледа знаци дека војната се приближува кон крај, но одбил да говори за конкретни рокови.

Свет | пред 2 седмици