Полицаец предложен за Судски совет, а меѓу кандидатите и поранешниот правобранител од случајот со конфискацијата на Кочан

Собраниската комисија за избори и именувања денеска го предложи Аљбан Кадриу, инспектор за прекршоци во тетовската полиција, за нов член на Судскиот совет. Со осум гласа „за“ владејачкото мнозинство го прифати предлогот за тој да го замени Селим Адеми, кому утре му завршува вториот мандат.Кадриу работи 17 години во Министерството за внатрешни работи и претходно бил вработен во Владата. Тој беше оценет како најсоодветен од страна на мнозинството пратеници, иако на јавниот оглас се пријавија вкупно десет кандидати. ДУИ го предложи Арбер Исаку, поранешен член на Советот за јавни обвинители, но тој доби само еден глас.На листата кандидати беше и поранешниот државен правобранител Фехми Стафа, кој последните години беше во фокусот поради судирите со поранешните обвинители на СЈО околу неуспешната конфискација на имотот на бизнисменот Сеад Кочан во случајот „Трансмет“. Судскиот совет уште пред две години утврди сериозни пропусти во постапките, што придонеле дел од имотот да биде продаден пред државата да го преземе. Пропусти беа нотирани и во Обвинителството и во Државното правобранителство, а слични наоди утврди и Антикорупциската комисија.Стафа беше разрешен во 2022 година по поднесена неотповиклива оставка, а последно во јавноста се појави како адвокат на Љупчо Пецов – Ѓаволот, осомничен за финансиски криминал.Останатите кандидати се претежно дипломирани правници и адвокати од Тетово, Гостивар, Кратово и Скопје. Меѓу нив е и Ведат Салихи, кој претходно се пријави и за член на Советот за јавни обвинители, а работел како истражител во Обвинителството за организиран криминал.Предлогот за избор на Кадриу доаѓа во ден кога Собранието ја започна расправата за новите законски измени за Судскиот совет, со кои треба значително да се заострат критериумите за избор на „истакнат правник“ – токму статусот преку кој Кадриу беше предложен.

Македонија | пред 4 месеци

Протестите за буџетот во Бугарија пресудија: Колективна оставка на целата влада и на премиерот Желјазков

Политичката сцена во Бугарија доби пресврт денеска, откако премиерот Росен Желјазков најави дека кабинетот колективно поднесува оставка. Решението доаѓа по остри несогласувања околу буџетот за 2026 година и по неделите исполнети со масовни демонстрации низ земјата.Желјазков појасни дека коалициските партнери одржале состанок на кој ги разгледале состојбите, иако, според него, владата извесно би ја добила поддршката на гласањето за недоверба. Сепак, како што рече, одлуката ја донеле имајќи го предвид расположението на јавноста.Тој истакна дека протестите обединиле луѓе од различни заедници и генерации, испраќајќи јасен сигнал дека довербата во владата е нарушена. Желјазков нагласи дека коалицијата е формирана со проевропска ориентација, но дека демократските принципи бараат почитување на гласот на граѓаните.Во осврт на економската политика, премиерот тврдеше дека буџетската рамка што ја предложиле била насочена кон социјална поддршка и јакнење на куповната моќ, но дека јавноста или не добила доволно објаснување, или политичките опоненти ја интерпретирале на различен начин.Тој додаде дека демонстрациите биле реакција на „вредностите и на начинот на кој се спроведува демократијата“, а не само на бројките во буџетот.Со поднесувањето на оставката, земјата се соочува со нов политички момент во кој Националното собрание ќе мора да го утврди идниот расплет.

Свет | пред 4 месеци

Расправија за продолжен кабел завршила со закани дека ќе ја фрли од прозорец – тетовец кој се заканувал на сопругата доби притвор од 8 дена

Основното јавно обвинителство Тетово поведе постапка против едно лице за кое постои основано сомнение дека извршило кривично дело – Загрозување на сигурноста од член 144 став 3 во врска со став 1 од Кривичниот законик.Осомничениот, на 9 декември, во заедничкиот дом во Тетово, започнал расправија со сопругата заради продолжен кабел кој што таа го купила и не сакала да му го даде да го користи.Во момент на нервоза, тој започнал да ја пцуе и да и се заканува дека ќе ја избрка од дома заедно со нивните две малолетни деца или дека ќе ја фрли од прозорецот на 4-от кат.По предлог на јавниот обвинител, судијата на претходна постапка од Основниот суд во Тетово определи мерка притвор во траење од 8 дена за осомничениот.

Македонија | пред 4 месеци

Филипче тврди: „Мигранти во јуни, се обврзале да примат мигранти како дел од пакет-договор за кредит“

Претседателот на Социјалдемократскиот сојуз на Македонија, д-р Венко Филипче, на денешната прес-конференција, наласи дека молкот на Владата на ВМРО-ДПМНЕ за Резолуцијата на СДСМ за спречување на прием на мигранти, ги потврдува сомнежите дека нешто тајно се подготвува зад очите на јаноста.„ВМРО-ДПМНЕ не сака да ја потпише Резолуцијата. Не сака да даде гаранција на граѓаните на Македонија затоа што не може. Затоа што се обврзале да примат мигранти како дел од пакет-договор за кредит, за да продолжат да распишуваат тендери и да прават договори во четири очи за да ги трошат народните пари за своите бизнис-партнери“, рече Филипче.Во обид да избегнат одговори и да дефокусираат, како што кажа Филипче, владата на Мицкоски започна со фабиркувани приказни.„По обидите фокусот да го префрлат на измислени вести, лажни обвиненија, пријави сè, само да се дефокусира јавноста од горчливиот проблем со мигрантите. По извлекувањето и избегнувањето премиерот на Мицкоски-до пролет, после пролет, ќе бидам премиер, нема да бидам премиер, на сите ни е јасно што се подготвува.Одговорот е јасен, мигранти во јуни во Македонија“, рече Филипче.На прес-конференцијата, тој предупреди дека премиерот Мицкоски го следи моделот на Вучиќ, односно прикривање на вистинските планови до по изборите.„По моделот на Вучиќ е „ќе има литиум, нема да има, сепак ќе има“ (без да каже: по изборите), Мицкоски сега со истата техника сака да го протне проектот „Мигранти за пари“.ВМРО-ДПМНЕ, поради свои лични интереси, ја издаде Македонија“, нагласи претседателот на СДСМ, Венко Филипче.

Македонија | пред 4 месеци

Филипче предупредува за загрозени медиумски слободи по нападот врз новинарите на „Инфомакс“

На денешната прес-конференција претседателот на СДСМ, Венко Филипче, оцени дека синоќешниот инцидент со напад врз екипата на „Инфомакс“ претставува „сериозен удар врз медиумските слободи“ и го спореди со упадот во А1 телевизија во 2010 година. Нападот се случи додека траела програмата во живо, а според СДСМ, напаѓачот е поврзан со владејачката партија.Филипче оцени дека „повиците за насилство што доаѓале од претставници и симпатизери на власта“ создаваат атмосфера која, како што рече, резултирала со вакви инциденти. Од ВМРО-ДПМНЕ засега нема реакција на овие тврдења.Во фокусот на обраќањето беа и обвинувањата за наводен договор за прифаќање мигранти во Македонија. Филипче повтори дека СДСМ „неколку дена предупредува“ за договор што, според него, премиерот Христијан Мицкоски го постигнал со меѓународни партнери, но истакна дека од Владата „нема јасен одговор“ на тие прашања.Според него, нападот врз новинарите се случил во момент кога, како што тврди, се зголемува јавниот интерес за темата со мигрантите, а инцидентот го оцени како „обид за дефокусирање од проблемот“.Филипче ги повика медиумските здруженија да реагираат и да застанат во одбрана на слободата на говор и основните демократски принципи, потсетувајќи на „борбата за медиумски слободи од 2016 година“.Владата и ВМРО-ДПМНЕ засега не излегоа со став во врска со обвинувањата.

Македонија | пред 4 месеци

(Видео) Британската телевизија GBN за мигрантите: „Ќе ве стационираме во Северна Македонија, таму може да работите и да изградите живот“

Темата за мигрантите деновиве е во фокусот на македонската јавност. Во програма на британската телевизија Great Britain News беше емитувана дискусија во која новинари и гости зборуваа за можност мигранти, за кои Велика Британија нема правна основа да ги задржи или врати во нивните земји, да бидат пренасочени кон Северна Македонија како работна сила.Во студиото, новинарката Линда Доберли објасни дека Британија се соочува со ситуација во која ниту може да ги задржи овие лица, ниту да ги депортира, поради безбедносни ризици во земјите од кои доаѓаат.„Ние не можеме да ги држиме овде, велиме не можете да останете во Обединетото Кралство, но не можеме ниту да ги вратиме од каде што се дојдени. Затоа им велиме дека ќе бидат стационирани во Северна Македонија, каде што ќе можат да работат, каде што има потреба од работна сила и да изградат живот таму. Тоа не е скапо за нас, поскапо е да ги оставиме овде“, рече пратеникот, Бери ГардинерВо продолжение, пратеникот Бери Гардинер ја образложи тезата дека Македонија би можела да биде земја-домаќин за лица кои немаат право на престој во Британија, но не може да бидат вратени назад.„Шемата за Македонија е да ги праќаме луѓето за кои ќе одлучиме дека немаат правна основа да останат во Велика Британија. Но не можеме да ги вратиме, зашто таму каде што би ги вратиле е преопасно.

Македонија | пред 4 месеци

„Човекот забега, му посакуваме побрзо оздравување“, жестока реакција кон Венко Филипче од ВМРО-ДПМНЕ

ВМРО-ДПМНЕ со остро партиско соопштение реагираше на денешната прес-конференција на Венко Филипче од СДСМ, обвинувајќи го дека „живее во паралелен универзум“ и дека во јавноста пласира теми кои, како што велат, не постојат во реалноста. Од партијата наведуваат дека се „навистина загрижени“ за неговото здравје.Според ВМРО-ДПМНЕ, Филипче зборувал за случај во соседна држава, со кој Македонија, како држава и како политички субјект, нема никаква врска. Партијата тврди дека со тоа докажал дека „забегал со своите ставови“ и отвора прашања кои не кореспондираат со фактите.Клучната точка во соопштението е повторената теза дека во Македонија нема да има мигранти. ВМРО-ДПМНЕ наведува дека на ова прашање веќе одговориле повеќепати – и премиерот Христијан Мицкоски, и партијата преку дневни прес-конференции – но дека Филипче и натаму инсистира да поставува исти прашања.„Се чудиме дали воопшто стигнува до него нашиот одговор, ама еве пак да му кажеме – мигранти нема да има“, се вели во реакцијата.Партијата дополнително го обвини Филипче дека бара потпишување резолуција што не постои. „Прво, таква резолуција немате подготвено ниту доставено. Второ, треба да видиме што пишува внатре – можеби ќе пишува изградба на мигрантски камп како во 2018, кога токму Филипче гласал за ваков камп“, се додава во текстот.Во однос на синоќешниот напад во редакцијата на „Инфомакс“, ВМРО-ДПМНЕ повтори дека инцидентот веднаш е осуден и дека партијата „отфрла било каква поврзаност“ со случајот.Соопштението завршува со најострата порака:„Му посакуваме на Филипче побрзо да се смири и да оздрави. Ваквите размислувања кои ги пласира – лажни и невистинити – му штетат на здравјето. Нека си поднесе оставка и нека се оттргне криминалот од СДС, со тоа што луѓе како него, Спасовски, Николовски, Бисера, ќе си одат од партијата.“

Македонија | пред 4 месеци

(Видео) „Ако имало јавашлук 13 години, обвинителот требало да седне на обвинителна клупа“, остро реагираше Шилегов на судењето за „Пулс“

На денешното рочиште за случајот „Пулс“, адвокатот Петре Шилегов – бранител на обвинетиот службеник од Министерството за економија, Шефкет Хазари – остро ја нападна теоријата на случај што ја застапува обвинителството, оценувајќи дека доколку се прифатат нивните аргументи, тогаш одговорност треба да понесе и самиот обвинител.Според Шилегов, обвинителството во обвинителниот акт тврди дека во изминатите 13 години имало системски пропусти и „јавашлук“, кои, како што навел обвинителот, довеле до услови за трагедијата во март 2025 година во кочанската дискотека „Пулс“, кога загинаа 62 млади лица.„Обвинителе, ако ни тврдевте на нас дека постоел тој јавашлук, што правевте вие 13 години во Кочани? Што правевте? Ако ја прифатиме вашата теорија, тогаш обвинителот требаше да го слуша, а не да го чита обвинителниот акт!“, изјави Шилегов, алудирајќи дека обвинителството со години не реагирало на наводните пропусти.Обвинителот побарал одговори, но судијката го прекинала со образложение дека објаснувањата ќе може да се дадат на крајот од рочиштето.Шилегов истакна дека темелно размислувал дали да ги чита делата што му се ставаат на товар на Хазари, но, како што рече, морал да го стори тоа за да покаже дека обвинителниот акт нема правна суштина.„Долго размислував дали да одам со читање на кривичните дела и дека тоа мора да го сторам, затоа што, како што велам, правно поаналфабетски памфлет немам видено, бидејќи ова не заслужува да носи име обвинителен акт“, рече адвокатот.Со ова, одбраната продолжи да ја оспорува правната валидност на обвинението, тврдејќи дека обвинителството изградува случај врз претпоставки, а не врз реални докази.

Настани | пред 4 месеци

Лефков објави документ: „Филипче планирал мигрантски центар во Бардовци“

Пратеникот и член на Извршниот комитет на ВМРО-ДПМНЕ, Миле Лефков, на денешната прес-конференција изнесе низа обвинувања на адреса на поранешниот министер за здравство Венко Филипче, тврдејќи дека, како член на тогашната влада, учествувал во донесување одлука поврзана со подготвување документација за прифатен центар за мигранти во Бардовци.Лефков наведе дека станува збор за точка објавена во „Службен весник“ од 26 јануари 2018 година, каде што во планската документација е наведена: „Изработка на државно урбанистичко-планска документација за прифатен центар на странци за потребите на Секторот за гранични работи и миграции при МВР на КП бр. 35…“Според него, тоа покажувало дека Филипче „гласал со две раце“ и дека токму тој „работел на отворање мигрантски камп“ во периодот кога бил дел од Владата на Зоран Заев. Лефков оцени дека, како што рече, Филипче е „единствениот актуелен политичар кој сакал да донесе мигранти во Македонија“.Во продолжение на прес-конференцијата, Лефков изнесе политички критики кон Филипче и СДСМ, нарекувајќи ја темата за мигранти „измислена“ и оценувајќи дека се користи, како што рече, „за покривање на криминалите на поранешната влада“. Тој повтори дека „мигранти нема да има“ и побара од Филипче да ѝ се извини на јавноста.Во говорот, Лефков даде повеќе оценски изјави кон политичките опоненти, наведувајќи дека „предавничко-криминалниот двоец ќе биде декласиран“ и дека „страхот од борбата против корупцијата не може да се сокрие со измислени теми“.Тој ја заврши прес-конференцијата со став дека, според него, „сите лаги се распрснаа како меур од сапуница“.

Македонија | пред 4 месеци

Шилегов го оспори обвинението за Шефкет Хазари: „Со кои средства наводно предизвикал пожар?“

Денешното рочиште за пожарор во дискотеката „Пулс“ го стави во фокус обвинителниот акт, откако адвокатот Петре Шилегов, бранител на обвинетиот Шефкет Хазари од Министерството за економија, ја изнесе својата одбрана и го оспори товарот што му се припишува на неговиот клиент.Шилегов објасни дека одлучил да ги прочита делата што му се ставаат на товар на Хазари, нагласувајќи:„Долго размислував дали да одам со читање на кривичните дела и дека тоа мора да го сторам, затоа што, како што велам, правно поаналфабетски памфлет немам видено, бидејќи ова не заслужува да носи име обвинителен акт.“Тој додаде дека според обвинението, Хазари наводно бил свесен дека може да настане штетна последица и се согласил со нејзиното настанување:„Делото што се става на товар вели: Тој што со пожар, поплава, експлозија и јонизирачко зрачење, моторна пила, електрична или друга енергија или со друго општоопасно дејствие или средство, ќе предизвика значителна опасност за животот на луѓето или имотот, од поголеми размери, па се предвидува казната. Тоа е делото што според Обвинителството го сторил обвинетиот Хазири. Со кои средства? Лиценцата за угостителска дејност е изработена и обработена во Министерството за економија, а од Хазари била проверена,“ рече тој.Адвокатот посочи дека нема логична поврзаност меѓу административната работа на Хазари и пожарот што избувна многу години подоцна:„Нејасно е како може проверка на лиценца или давање согласност во интервал од 2013 до 2019 година да предизвика пожар на 16 март 2025 во дискотеката во Кочани.“

Македонија | пред 4 месеци

Обвинение за таткото и двете ќерки: Спречиле службени лица да одземат добиток во Крива Паланка со закани

Основното јавно обвинителство Крива Паланка поднесе обвинителен предлог против три лица – татко и неговите две ќерки – поради сериозен инцидент што се случил на 2 декември во местото викано „Самоков“, во близина на селото Луке. Тие се товарат дека спречиле службени лица од Агенцијата за храна и ветеринарство да постапат по правосилно решение за одземање крупен добиток.Според обвинението, таткото се заканувал на четири присутни лица, ветувајќи напад врз нивниот живот и тело, со намера да ги заплаши и да го спречи спроведувањето на службеното дејствие. Поради тоа, покрај делото „Спречување на службено лице во вршење службено дејствие“ од член 382 став 1 од Кривичниот законик, тој е обвинет и за кривичното дело „Загрозување на сигурноста“ од член 144.Една од ќерките дополнително се соочува со обвинение за „Напад врз службено лице при вршење работи на безбедноста“ од член 383, затоа што физички повредила полициски службеник кој бил повикан да асистира при одземањето на говедата. Според наодите, таа го влечела и го гребела полицаецот по лицето, нанесувајќи му телесна повреда.Како резултат на однесувањето на тројцата обвинети, службените лица од АХВ биле спречени да постапат по решението и да го одземат добитокот.Во фазата на обезбедување докази сите три лица биле лишени од слобода и сместени во притвор. Со поднесувањето на обвинителниот предлог, надлежниот јавен обвинител до Судот доставил барање притворот да биде продолжен за таткото и за едната ќерка, водејќи сметка за околностите што влијаат врз текот на постапката и опасноста од повторување на делото.

Македонија | пред 4 месеци

И ВМРО-ДПМНЕ со реакција: Партијата го осудува упадот во „Инфомакс“ и бара целосно расчистување на случајот

По насилниот упад во студиото на „Инфомакс“, кој се случи во средата доцна вечерта за време на емитување програма во живо, со реакција излезе и ВМРО-ДПМНЕ. Од партијата соопштија дека го осудуваат инцидентот и секој обид со сила да се загрози безбедноста на новинарите и медиумските работници, нагласувајќи дека ваквите напади се закана за темелните демократски вредности.„Ваквите инциденти се неприфатливи и претставуваат закана за основните демократски вредности кои треба да се заштитуваат и промовираат“, стои во реакцијата на најголемата опозициска партија. ВМРО-ДПМНЕ потсетува дека слободата на медиумите, правото на информирање и независната новинарска работа се принципи за кои партијата, како што велат, доследно се залагала.Од партијата оценуваат дека без разлика на разликите во ставовите и уредувачките политики, секој медиум мора да работи во средина која гарантира безбедност, достоинство и почитување.ВМРО-ДПМНЕ ја поздрави и брзата реакција на полицијата, која веднаш по пријавата го лиши од слобода лицето Г.С.(43) од Скопје, за кое подоцна беше утврдено дека има здравствени проблеми и претходно било третирано во Психијатриската болница Бардовци. Партијата очекува сите институции „целосно и доследно да ја истераат постапката“.„Ќе продолжиме да се залагаме за заштита на слободата на изразување и за создавање амбиент во кој јавната дебата може да се одвива без страв и притисок“, порача ВМРО-ДПМНЕ.

Македонија | пред 4 месеци

(Видео) Станкоска: Дали со еден стан Орце го реши проблемот на жените жртви на насилство?!

Советничката од Левица во Град Скопје, Евгенија Станковска, остро реагира на предлог-одлуката за обезбедување простор за жртви на семејно насилство. Таа посочи дека со отстапување на единствен стан од 30 квадратни метри – за кој, како што вели, градоначалникот Орце Ѓорѓиевски тврди дека е „сè што градот има на располагање“ – градската власт го претставува проблемот како решен.Станувa збор, нагласи Станкоска, за мал и единствен стан кој, според предлогот, треба да стане новиот простор за најранливите жени во градот.-Град Скопје нема извршено попис на сопствениот недвижен имот, не постои јасна евиденција што поседува градот, во каква состојба е имотот, колку објекти стојат празни, неискористени или пропаѓаат. А кога институцијата не знае што има, секогаш се прогласува дека „може“ само најмалку, на штета на најранливите, истакна Станкоска, советничката од Левица и укажа дека вакво „решение“ е симптом на подлабок системски хаос.Според неа понудениот стан не претставува решение за овој сериозен проблем, туку понижувачки и импровизиран обид да се создаде впечаток дека проблемот се решава. „Жртвите на семејно насилство не смеат да се третираат како ПР-позадина, туку како сериозна обврска која бара системски пристап и одговорно управување со градскиот имот.“Во своето обраќање посочи и дека секоја година во Македонија стотици жени пријавуваат семејно насилство, а земјата веќе брои повеќе случаи на фемицид кои остануваат како траен доказ за институционалниот неуспех да се спречи ескалацијата на насилството. „Во такви услови, Левица одамна предложи законски измени семејното насилство да се гони по службена должност, со што би се спречил притисокот врз жртвите да го повлекуваат пријавувањето и би се обезбедила проактивна државна заштита - но мнозинството во Собранието, предводено од ДПМНЕ, го одби овој предлог“, рече Станкоска и додаде дека токму ова одбивање е доказ дека властите не се подготвени за суштински мерки, туку остануваат на симболични гестови кои не ја менуваат реалноста на жените кои живеат под закана.

Скопје | пред 4 месеци

Детали: Приведен напаѓачот што упадна во студиото на „Инфомакс“, станува збор за пациент од Бардовци

Министерството за внатрешни работи за „Скопје1“ потврди дека лицето кое синоќа насилно влезе во студиото на „Инфомакс“ е лишено од слобода веднаш по добиената пријава.Според информациите од МВР, полициските службеници од Полициската станица Кисела Вода го привеле Г.С. (43) од Скопје, по пријава поднесена на 10 декември 2025 година во 23:45 часот од А.М., водител на емисија на порталот. Во пријавата било наведено дека додека траела програмата во живо, непознато машко лице насилно навлегло во редакцијата на улицата „Востаничка“, оштетувајќи две врати и директно попречувајќи го емитувањето на емисијата, во која гостувал поранешниот градоначалник С.Ј., а присутни биле и водителот М.Н. и камерман.Полицијата дополнително утврдила дека лицето има здравствени проблеми и дека претходно било спроведувано во Психијатриската болница „Бардовци“.МВР информира дека по целосно документирање на случајот, против Г.С. ќе биде поднесена кривична пријава по брза постапка. Од Министерството додаваат дека и во иднина ќе постапуваат брзо, неселективно и решително во сите случаи на напади врз новинари или нарушување на јавниот ред и мир, при што сторителите ќе се соочат со соодветни санкции.

Македонија | пред 4 месеци

Непознат напаѓач насилно упаднал во „Инфомакс“, загрозени биле новинарите за време на програма во живо

Здружението на новинарите на Македонија (ЗНМ) најостро го осудува бруталниот напад што синоќа се случил во редакцијата на „Инфомакс“ за време на емитување програма во живо, кога непознато лице насилно се обидело да влезе во студиото, сериозно загрозувајќи ја безбедноста на новинарите Александар Митовски и Милош Милошевски, како и на другите вработени.Според информациите од редакцијата, напаѓачот пристигнал со такси во текот на емисијата, по што агресивно удирал и тропал на главната врата, која била заклучена и обезбедена со шифра. По кратко време успеал насилно да ја скрши и да влезе во дворот на медиумот. За време на паузата од емитувањето, новинарот Милош Милошевски излегол да провери што се случува, но напаѓачот продолжил кон другиот дел од објектот, каде принудно искршил уште една врата во обид да стигне до студиото.Сведочењата на новинарите укажуваат дека лицето упатувало тешки навреди и закани по живот, а неговото насилно упаѓање довело и до насилен прекин на програмата, што претставува директно спречување на новинарите да ја извршуваат својата професионална должност и да ја информираат јавноста.Ваквото однесување, потенцираат од ЗНМ, може да се опфати со член 382 од Кривичниот законик – „Спречување службено лице во вршење службено дејствие“, за што е предвидена казна затвор до три години, имајќи го предвид насилниот упад, уништувањето на инвентарот и попречувањето на работата на новинарите.Инцидентот претставува сериозно нарушување на безбедноста на медиумските работници и фронтален напад врз слободата на изразување. ЗНМ потсетува дека е неопходно институциите да обезбедат сигурна и заштитена средина во која медиумите ќе можат да работат непречено.Здружението бара најстрога санкција за сторителот, со цел да се спречат идни напади и да се испрати порака за нулта толеранција кон насилство врз новинари.Очекуваат сите надлежни органи – полицијата, обвинителството и другите институции – да постапат професионално, брзо и без одлагање, за случајот целосно да се расчисти во најкус можен рок.ЗНМ најавува дека ќе продолжи внимателно да го следи случајот и секогаш ќе реагира кога ќе биде загрозена безбедноста на новинарите и медиумските работници.

Македонија | пред 4 месеци

Агресивни и пијани навивачи правеле хаос во лет кон Македонија: еден приведен, десет вратени назад

Приведен навивач од Словачка, на 10 други не им беше дозволен влез во државата поради агресивно и недолично однесување во авион за време на лет и по слетувањетоНа 10.12.2025 околу 20:30 часот во СВР Скопје, од службите на Меѓународен аеродром Скопје и од Регионалниот центар за гранични работи Север е пријавено дека во воздухоплов кој пристигнал од Словачка, повеќе лица под дејство на алкохол, кои се дел од навивачка група, за време на летот и по слетувањето не ги почитувале правилата, агресивно се однесувале и ги вознемирувале останатите патници и екипажот.Полициски службеници веднаш пристигнале на местото и по преземени мерки го приведоа Л.Т.(38) од Словачка, а на 10 други лица, исто така, од Словачка, не им беше дозволен влез во државата од безбедносни причини. По целосно документирање на случајот, против Л.Т. ќе биде поднесена соодветна пријава.

Скопје | пред 4 месеци

Станковиќ: Правдата мора да излезе на виделина, да се санкционираат  сите инволвирани во случајот со трагедијата во Пулс

Пратеникот од Коалицијата  предводена од ВМРО-ДПМНЕ, Малиша Станковиќ, гостуваше во ТВ 24, порача дека институциите мора целосно да го завршат судскиот процес поврзан со трагичниот настан во дискотеката „Пулс“ во Кочани, кој ја потресе јавноста, нагласувајќи дека власта нема намера да прикрива било кого и очекува одговорност за сите сторители.„Веќе гледаме дека се води судски спор којшто е активен во моментот, битно е граѓаните да знаат дека ние не сакаме да заштитиме никого, напротив сакаме секој сторител да одговара за стореното дело и кон тоа стоиме и се надевам дека ќе се смогнат сили пред се судската власт и ЈО да го истера случајот до крај а ние стоиме тука да им дадеме поддршка  на тие луѓе коишто за жал ги изгубија своите најмили, а со тоа и самата држава изгуби. Во моментот најбитно за нас како држава, како општество е сторителите да одговараат, односно сите кои се виновни да одговараат, навистина се обидуваме и преземаме се да направиме за дојдеме до правдата, нешто што го сакаат и оние кои останаа без своите најмили, без своите деца и ние како држава“, истакна Станковиќ и додаде:„Прва работа ние како власт не бегаме од ниту едно прашање и тоа го докажавме со самото тоа што и ние бевме иницијатори за покренување на иницијатива во Собранието. Ние сметавме во почетокот дека тоа ќе ги изложи овие луѓе коишто се најдиректно засегнати во дополнителни стресови и од таа морална гледна точка. Во оној момент кога разбравме дека тие самите сакаат да се обратат, ние постојано сме транспарентни и велиме сето она што мислите дека треба да го направиме ние сме отворени да го направиме и затоа ние ја потпишавме самите иницијатива не само за овој случај и за сите претходни случаи да се отворат и да се разгледаат во Собранието. Во ниту еден момент никој од власта не избегал од одговорност, од соочување или од поставување и отворање на одредени прашања“, рече Станковиќ.Станковиќ потсети дека уште на почетокот имало средби помеѓу родителите и министерот за внатрешни работи, Тошковски, со порака дека правдата мора да излезе на виделина Станковиќ повтори дека Владата останува доследна во ставот дека никој нема да биде заштитен.„Знаете дека и на самиот почетокот и министерот за внатрешни работи имаше средба со родителите, ние постојано сме во контакт не само со родителите, не само со одредена група на родители, со сите засегнати во однос на овој немил настан и ние даваме отворена поддршка на сите институции да дојде реално до правдата. Најбитно на сите ни е правдата да излезе на виделина, да се санкционираат сите на кој било начин инволвирани“, вели Станковиќ.

Македонија | пред 4 месеци

„Комунална хигиена“ добива нови возила – Градот одвои 14 милиони денари

По години во кои скопските служби за одржување на јавната чистота функционираа со исцрпена и дотраена механизација, „Комунална хигиена“ влегува во фаза на значително обновување. Советот на Град Скопје донесе одлука да одвои 14 милиони денари за купување специјализирани комунални возила, со кои службата ќе може поефикасно да ја извршува својата работа низ градот.Покрај оваа финансиска поддршка, претпријатието ќе добие и две возила како донација од општествено-одговорни компании — чекор што, според градските власти, ја покажува довербата во процесот на модернизација.Градоначалникот Орце Ѓорѓиевски, преку објава на Фејсбук, порача дека решението на Советот го зацврстува концептот на рационално управување со буџетот:„Со ваквиот модел на набавка, градот заштедува и 2 милиони денари преку повратот на ДДВ, средства кои, доколку градот сам ги набавуваше возилата, ќе беа целосно потрошени. Уште поважно, веќе е почната постапката во соработка со Владата на Република Македонија и Светска банка, за набавка на повеќе од 20 нови специјализирани комунални возила. Ова значи модерна механизација, поголема ефикасност и подобра услуга за сите жители на Скопје. Набавката на нова опрема е инвестиција која се враќа веднаш.“Новите возила, кои се под гаранција, треба да стават крај на високите трошоци за сервисирање и одржување што ги создава старата механизација, дел од која е во употреба повеќе од дваесет години.

Скопје | пред 4 месеци

(Видео) Масовни протести во Бугарија: Стотици илјади граѓани бараат оставка од владата

Тензиите во Бугарија не стивнуваат. Синоќа центарот на Софија повторно беше преплавен со демонстранти, кои под слоганот „Оставка. Пеевски и Борисов надвор од власта“ исполнија целиот простор околу т.н. триаголник на власта. Според проценките, присутни биле десетици илјади граѓани — повеќе дури и од масовниот протест од 1 декември. Зад повикот стои опозициската коалиција Продолжување на промените – Демократска Бугарија.Само неколку часа пред протестот, бугарското собрание одржа долга и напната расправа за иницијативата за недоверба на владата, поднесена од ПП-ДБ. И покрај критиките насочени кон економската политика, уште во текот на дебатата стана јасно дека четирите парламентарни групи кои ја држат власта – ГЕРБ, БСП, ИТН и ДПС–Нов почеток, предводена од санкционираниот со американскиот закон „Магнитски“ Делјан Пеевски – ќе ја поддржат владата на Росен Жељасков и во четврток ќе гласаат против недовербата.Организаторите го отворија протестот со саркастичен коментар упатен кон Делјан Добрев: „Вети дека новиот буџет содржи сè што го бараат демонстрантите. Го разгледав – зборот ‘оставка’ го нема никаде.“ Веднаш по тоа, плоштадот одекна со скандирања „Оставка“Улиците околу владиниот триаголник беа буквално непроодни од масите што доаѓаа од правец на Софискиот универзитет. Дури и по повеќе од еден час од почетокот на собирот, нови толпи постојано пристигнуваа.Студентското здружение исто така даде свој глас. Неговиот претставник, Александар Танев, ги праша присутните дали навистина чувствуваат спокој додека „мафијата“ останува на власт. Тој потсети дека на најстариот универзитет во земјата веќе стои огромен транспарент: „Студентите против мафијата“. „Немаме историско време – мора да ја спасиме земјата“, предупреди Танев.Пратеникот Атанас Атанасов од ПП-ДБ им се обрати на демонстрантите, потсетувајќи дека комисијата веќе дебатирала за недовербата и дека гласањето следува в четврток. „Подарете и на Бугарија божиќен подарок – гласајте за недоверба“, порача тој. Атанасов додаде дека владејачката структура „арогантно ги злоупотребила регулаторите и ги поставила своите луѓе да служат на корупциските модели“.

Македонија | пред 4 месеци

Масовни протести во Бугарија: Стотици илјади граѓани бараат оставка од владата

Стотици илјади луѓе излегоа на улиците во среда навечер во Софија и во десетици други градови низ Бугарија и во странство, барајќи оставка од владата. Демонстрациите, кои се оценуваат како едни од најмасовните во последните години, опфатија широк сегмент од населението – од студенти до пензионери.Во главниот град Софија, демонстрантите го исполнија просторот од булеварот Витоша до Ректоратот на Софискиот универзитет. Студентите од неколку универзитети официјално се приклучија на протестот, кој потоа се спои со големиот собир на Плоштадот на независноста. По повеќе од три часа, протестот заврши мирно, но демонстрантите најавија дека ќе продолжат со притисок доколку нивните барања не бидат исполнети.Полицијата постави 19 контролни пунктови и спроведе засилени безбедносни мерки. Според софиската полиција, приведени се над 40 лица. Кај дел од нив биле пронајдени бомби, ножеви и други опасни предмети, а едно лице е приведено врз основа на распишана потерница. По завршувањето на протестот, краток инцидент беше забележан кај споменикот на Васил Левски, кога групи облечени во црно запалиле канти за отпадоци, но ситуацијата брзо била ставена под контрола.Настаните во Софија беа следени од голем број меѓународни медиуми, меѓу кои и Ројтерс и Агенцијата Франс Прес.Антивладините демонстрации се одржаа и во повеќе од 20 градови низ земјата. Во Благоевград студенти и жители протестираа против, како што велат, нелегитимната влада и ниските приходи. Во Варна илјадници маршираа по централните булевари, а протестот заврши на Плоштадот на независноста, без инциденти, но под силно полициско присуство.Во Бургас, централниот плоштад и околните улици беа преполни со демонстранти кои скандираа „Оставка!“ и „Мафијата надвор!“. Поради инциденти со фрлање експлозивни направи, уапсени се 10 лица. Организаторите ги идентификуваа провокаторите и ги пријавија на полицијата.Мирни, но масовни протести се одржаа и во Велика Трново, Видин, Враца, Габрово, Гоце Делчев, Добрич, Казанлак, Крџали, Ќустендил, Ловеч, Монтана, Пазарџик, Петрич, Плевен и други градови. На повеќето места протестите прераснаа во маршеви кои накратко го блокираа сообраќајот.Еден од најмасовните собири се одржа во Пловдив, каде според организаторите над 50.000 луѓе излегоа на улиците. Од плоштадот Саединение колоната се движеше по главните булевари, минувајќи го мостот над Марица и стигнувајќи до Меѓународниот саем. Илјадниците демонстранти бараа оставка од владата, крај на корупцијата, предвремени избори и системски реформи.„Сите ние сме презаситени од корупцијата. Не само младите – сите граѓани“, изјави еден демонстрант во Пловдив. Друга учесничка додаде: „Во 1997 година бевме тука со нашите деца. Сега сме со нашите внуци. Промените ги нема.“Протестите, кои засега минуваат без масовна ескалација, најавуваат долготрајна политичка криза и засилен притисок врз актуелната влада.

Свет | пред 4 месеци

„Лукоил“ доби време до 17. јануари, компанијата мора да најде купувач!

По неколкунеделни шпекулации и неизвесност околу иднината на „Лукоил“ на меѓународните пазари, конечно стигна одлука. Министерството за финансии на САД ја продолжи лиценцата на компанијата до 17 јануари. Со ова продолжување, „Лукоил“ добива простор да ги финализира преговорите и да склучува условни договори за продажба на своите средства во странство.Одлуката е објавена преку Канцеларијата за контрола на странски средства (OFAC), која појаснува дека лиценцата овозможува и извршување трансакции неопходни за редовното работење, под услов секоја таква активност да биде претходно одобрена од OFAC.Според правилата утврдени во лиценцата, сите потенцијални купувачи мора да обезбедат преземање на најмалку 50 проценти од средствата на „Лукоил“ најдоцна до 17 јануари 2026 година. Договорите ќе добијат правна важност само со зелено светло од американските регулатори.Во документот детално е објаснет и поимот „условни договори“, кој ги опфаќа извршните и принципиелни договори, проформа фактурите, понудите што може да се прифатат — вклучувајќи понуди доставени во јавни тендери — како и меморандуми за разбирање и други договорни форми со слични правни обврски.Паралелно со ова, OFAC потсетува дека финансиски трансфери кон физички или правни лица во Русија остануваат недозволени.

Свет | пред 4 месеци

(Видео) Со документи: „Филипче гласал за камп за прифаќање на мигранти во 2018 година во Бардовци“, тврди Андоновски

Стефан Андоновски, во подкастот „Претрес кај Ландов“, соопшти дека лидерот на опозицијата, Венко Филипче, во 2018 година гласал за одлука со која се предвидува изградба на камп – прифатен центар за мигранти во скопската населба Бардовци.Андоновски истакна дека е апсурд и класична манипулација тоа што токму Филипче и СДС денес обвинуваат за наводни мигрантски договори, а постои одлука на Владата од 23.01.2018 година, објавена во „Службен весник“, со која се планира прифатен центар за странци за потребите на Секторот за гранични работи и миграција при МВР, во Бардовци.Тој потсети дека по оваа одлука имало и протести на месното население во делот помеѓу Бардовци и Чучер-Сандево, каде што граѓаните јасно се спротивставиле на изградбата на ваков камп.„Апсурдно е да се зборува дека ВМРО-ДПМНЕ градело или прифаќало мигранти, без ниту еден единствен доказ дека владата предводена од ВМРО-ДПМНЕ преговарала на оваа тема. ВМРО-ДПМНЕ беше владата која го менаџираше најголемиот бран на мигранти со кој се соочи државата и ја бранеше Европа од Европа“, нагласи Андоновски.Според него, скандалозно е што „човекот кој три дена држи прес-конференции за мигранти, во 2018 година гласал за изградба на мигрантски камп во Македонија, конкретно во Бардовци“.ПОГЛЕДНЕТЕ ГИ ДОКУМЕНТИТЕ И ДЕТАЛИТЕ, НО И СУДИРОТ СО АРГУМЕНТИ ТУКА:

Македонија | пред 4 месеци

Администрацијата на Трамп во отворен судир со ЕУ: казната за X ја разгоре политичката битка

Администрацијата на американскиот претседател Доналд Трамп влезе во отворен конфликт со Европската унија, претворајќи ги долгогодишните тензии околу слободата на изразување, Украина и миграциите во официјална политика на Вашингтон, пишува „Аксис“.Ескалацијата следува по казната од 140 милиони долари што Унијата ѝ ја изрече на платформата X на Илон Маск, откако европските регулатори утврдиле дека ја довела јавноста во заблуда, прикривала информации за огласувањето и го ограничувала пристапот на истражувачите до јавни податоци.Маск жестоко возврати, обвинувајќи ја ЕУ за „бирокатска тиранија“ и задушување на слободата на говор, при што под хаштагот #UkiniteEU се собраа десничарски политичари и милиони негови следбеници. Полскиот министер за надворешни работи Радослав Сикорски порача: „Оди на Марс. Таму нема цензура на нацистички поздрави.“Американски високи функционери се ставија во одбрана на Маск. Државниот секретар Марко Рубио ја нарече казната „напад врз американските технолошки платформи“, потпретседателот Џ. Д. Ванс го оцени како „смешна пресуда“, а сенаторот Тед Круз повика Трамп да воведе санкции кон ЕУ „додека оваа срамота не биде поништена“.Во најновата американска Стратегија за национална безбедност, Европа е опишана како геополитички ривал. Документот ја обвинува Унијата за „регулаторно задушување“ и „поткопување на демократските процеси“, посочувајќи ги масовните миграции како главна спорна точка.Според Белата куќа, европските власти создале „демографски промени“ со отворање на границите, а истовремено ги замолчуваат критичарите. Илон Маск и Ванс на Минхенската безбедносна конференција отворено дадоа поддршка на европски крајнодесничарски партии, меѓу кои и германската АфД.„Ова е политичка објава на војна“, изјави поранешниот висок претставник за надворешна политика на ЕУ, Жозеп Борел. „Трамп сака бела Европа поделена на држави, зависна од неговите политички потреби. Престанете да се преправате дека не е наш противник.“Европските лидери предупредуваат и на вмешување во внатрешните политички процеси. Претседателот на Европскиот совет Антонио Кошта порача дека „вмешувањето во европскиот демократски живот е неприфатливо“.Позицијата на ЕУ беше дополнително заострена со колумната на комесарот за одбрана Андриус Кубилиус, кој оцени дека стратегијата на Вашингтон покажува „јасен антагонизам кон Унијата“ и дека зад говорот за „цивилизациски закани“ стојат исклучиво американски геополитички интереси.Трамп, во големо интервју за „Политико“, ги нарече европските лидери „слаби“ и додаде дека „Европа пропаѓа“.

Свет | пред 4 месеци

Дански донор со опасна мутација поврзан со раѓање на 197 деца во 14 европски земји – меѓу нив и Македонија, пишува Би-би-си

Најмалку 197 деца ширум Европа се родиле од сперма на дански донор кој, без да знае, носел опасна мутација на генот TP53 – ген што е клучен за спречување на ракот, пишува Би-би-си.Меѓу жените и децата кои се засегнати е и Македонија, се вели во сторијата.Истражувањето на четиринаесет јавни сервиси во рамките на Европската радиодифузна унија ја открило оваа тивка трагедија, покажувајќи како една човечка клетка со генетска грешка можела да остави трага низ четиринаесет земји и речиси две стотини семејства.Мутацијата предизвикува Ли-Фраумени синдромот (LFS), редок наследен облик на рак што носи до 90% ризик од појава на малигни болести во текот на животот. Некои од децата веќе заболеле, а неколку починале. Донорот, студент кога започнал со донации во 2005 година, останал здрав бидејќи мутацијата не е присутна во сите негови клетки, но до 20% од неговите сперматозоиди ја носеле грешката во ДНК.Спермата била продадена преку Европска банка за сперма во Данска и користена во 67 клиники низ континентот. Банката признала дека „во некои земји бројот на деца родени од истиот донор ја надминал дозволената граница“ и дека донорот е „веднаш блокиран“ по откритието.Во Белгија, на пример, едно лице може да стане родител на максимум 6 семејства, но овој донор бил користен за 38 жени, кои родиле 53 деца.Мајка од Франција, чија ќерка го наследила генот, изјавила дека „не чувствува омраза кон донорот“, но дека „неприфатливо е да се даде сперма што не била безбедна“.Иако Велика Британија има ограничување од 10 семејства по донор, не постои меѓународен закон што би спречил продажба на истата сперма во различни земји. Половина од сперматозоидите во британските клиники се увезени.Професорот Алан Пејси од Универзитетот во Манчестер предупредил:„Не може да се тестира за сè. Ако критериумите станат построги, едноставно нема да имаме донори“.Според она што го објави Би-Би-Си, спермата со генетска мутација била користена во:Србија, Ирска, Исланд, Шпанија, Грузија, Грција, Германија, Македонија, Албанија и Унгарија.Во мај оваа година беше објавен сличен случај, кога беше откриено дека 67 деца се зачнати со истиот донор на сперма, а дека 10 од нив развиле рак.Донаторот бил носител на ретка мутација во генот „TP53“, која подоцна била поврзана со синдромот Ли-Фраумени – една од најтешките наследни форми на предиспозиција за рак, објави Гардијан.Во времето на донацијата во 2008 година, не се знаело дека мутацијата е канцерогена и не можела да се открие со стандардно тестирање.Откритието се случило кога две семејства, чии деца развиле рак, независно контактирале со клиниките за ин витро оплодување.Подоцнежните анализи покажале дека вкупно 23 деца ја наследиле мутацијата, вклучувајќи случаи на леукемија и Хоџкинова болест.

Македонија | пред 4 месеци

Новите црвени таблички тестирани преку „Сејф сити“, откриен проблем со казните

Директорот на Службата за општи и заеднички работи на Владата (СОЗР), Ивица Томовски, во телевизиско гостување на откри дека новите црвени регистарски таблички за службените возила биле претходно тестирани преку системот за видео-надзор „Сејф сити“. По успешната тест-фаза, започнала и нивната изработка.Томовски објасни дека тестирањето открило значителен проблем: прекршочните пораки од системот „Безбеден град“ пристигнуваат директно до лизинг-компаниите од кои Владата ги набавила возилата. Поради тоа, дел од казните најпрво се слеваат кај нив, а потоа се пренасочуваат до СОЗР.„Сметам дека треба да плаќа оној што го направил прекршокот, а не компанијата“, рече Томовски, најавувајќи дека Владата разгледува можни законски измени за да се отстрани ваквиот практичен проблем.Во врска со идејата службените возила да добијат и ГПС-уреди за сателитско следење, тој посочи дека конечната одлука ќе зависи од анализата на резултатите од „Сејф сити“ и реалните потреби на институциите. „Ќе почекаме да видиме дали тоа навистина ќе биде неопходно“, додаде Томовски.

Македонија | пред 4 месеци