Промени тема
За нас
Нова вест Админ
site logo skopje1
иран
„Претрес“ на Жерновски: Поскапувања, политиката, лицемерието, Филипче, СДСМ...
„Претрес“ на Жерновски: Поскапувања, политиката, лицемерието, Филипче, СДСМ...

Најнови вести

1 мес.
media-library0mqu9voku8bq8ihODBh

СДСМ: Власта се нема откажано од авионот

Власта се нема откажано од авионот. Буџетот на СОЗР за оваа 2026 година беше зголемен за 124 милиони денари и тој е непроменет.  Во Категорија 48 (Капитални расходи), под ставката за опрема, оваа сума соодветствува на годишна рата за купување авион со рок на отплата од повеќе години, вели СДСМ.„Власта одбива да направи ребаланс на буџетот и парите да ги пренамени за плати.Тоа потврдува дека авионот не е избришан од Буџетот.А во Собранието пратениците на ВМРО-ОКГ не сакаат ниту да разговараат за нашиот предлог за ребаланс на Буџетот, ниту за новиот Закон за минимална плата од 600 евра.Мислат дека со дефокус ќе направат луѓето да заборават на авионот и тивко да работат во позадина за во иднина да земат нов. Луксузот на ВМРО-ОКГ не трпи, трпат само работниците.Авионот сакаат да го земат на лизинг, на рати, па тоа да го претстават поинаку, само како изнајмување за потребите на Владата.Никој не е наивен! Граѓаните ќе плаќаат, платите на работниците нема да ги зголемат. Ќе има пари за авион, мебел, луксуз, тендери, но за работниците нема да има“, се вели во соопштението.

Македонија | пред 1 месец

1 мес.
maksim

Димитриевски за домашниот притвор на Груби: Сериозна држава не смее да си дозволи такви преседани

Невиден преседан е определувањето на мерката куќен притвор за поранешниот вицепремиер Артан Груби, вели претседателот на ЗНАМ и градоначалник на Куманово, Максим Димитриевски.Тој кажа дека ако сакаме во Европа, ќе мора да споделуваме европски вредности, нагласувајќи дека сериозна држава не смее да си дозволи вакви преседани.„Оваа одлука само ги потврдува нашите ставови и како политички субјект и моите лични ставови во делот на нефункционалноста на судскиот систем. Недозволиво е лице кое подолг временски период е во бегство, се враќа во државата и да му се изрекува мерка притвор и истото од распит завршува дома. Сериозна држава не смее да си дозволи такви преседани. Но, оставам на институциите на системот да се позанимаваат со ова што тоа значи. Значи дека и Советот на јавни обвинители, но и Републичкиот судски совет ќе треба да ги разгледаат во целост овие постапки и доколку постои евентуална субјективност или одговорност кај поединци истите да ги санкционира, во спротивно не се менува ништо“, изјави Димитриевски.Тој потсети дека е легалист и дека самиот присуствувал на секое рочиште кое се водеше против него во Кумановскиот основен суд. За Димитриевски е недозволиво Груби после 14 месеци бегство да заврши во куќен притвор.„Јас сум легалист, видете кога бев обвинет, редовно се појавував на сите судски рочишта. Го повикав господинот Груби да го следи тој пример. За жал, беше отсутен од државата повеќе од 14 месеци, се врати и заврши во домашен притвор што е недозволиво за еден сериозен систем. Сакаме во Европа, сакаме да напредуваме, ќе мора да ги делиме и европските вредности во делот на поделба на правдата во државата“, изјави Димитриевски.Тој додаде дека е задоволен од работата на министерот за правда Игор Филков, а изјавите на одредени лидери, претставници на коалициски партнери, градоначалници за работата на министерот во однос на правосудниот испит, ги оцени како обид за дневна политика и собирање евтини политички поени.

Македонија | пред 1 месец

1 мес.
media-libraryk26rk79e27ch1hZZ1NI

Продолжува судењето за пожарот во „Пулс“ – денес искази на петмина сведоци

Денеска во судницата на Кривичниот суд во Идризово ќе продолжи судењето на обвинетите за пожарот во дискотеката „Пулс“ во Кочани, во кој загинаа 63 луѓе, а над 220 беа повредени. За катастрофата што се случи на 16 март 2025 година им се суди на 35 физички и на 3 правни лица, за делото Тешки дела против општата сигурност.Денес е предвидено искази да даваат петмина сведоци предложени од Јавното обвинителство.Во процесот се обвинети сопственикот на дискотеката, управителите, членовите на обезбедувањето, поранешни градоначалници на Кочани, градежни и пазарни инспектори, поранешни директори на Дирекцијата за заштота и спасување, поранешни министри за економија, службеници во Министерството за економија, за дејствија што ги преземале или не ги преземале во периодот од 2012 година до денот на пожарот, а поради што настанала катастрофата.Судењето ќе го води судијката Диана Груевска Илиевска, а обвинителството е застапувано од тим од 15 јавни обвинители

Македонија | пред 1 месец

1 мес.
media-library26j96d86m3ts7wv3jPO

Пленковиќ: Хрватска може да ги снабдува Унгарија и Словачка со нафта

Хрватска може долгорочно и сигурно да ги снабдува Унгарија и Словачка со нафта преку Јадранскиот нафтовод (ЈАНАФ), порача во Киев хрватскиот премиер Андреј Пленковиќ, повикувајќи ги Будимпешта и Братислава за тоа јасно да ги информираат своите граѓани.Говорејќи пред новинарите во Киев, на четвртата годишнина од руската агресија врз Украина, Пленковиќ рече дека нема никаква дилема кога станува збор за можноста Хрватска целосно енергетски да ги снабдува и Унгарија и Словачка, за што, како што наведе, Загреб цело време ги информирал партнерите, вклучително и Европската комисија, пренесува хрватски Индекс.Според Пленковиќ, досега постоел комерцијален аранжман меѓу унгарската компанија MOL и руските партнери за купување поевтина нафта од Русија, која преку нафтоводот Дружба, преку Украина, пристигнува до рафинериите во Унгарија и Словачка.Пленковиќ нагласи дека Хрватска може да обезбеди долгорочно, стабилно и сигурно енергетско снабдување преку ЈАНАФ.„Ги повикувам пријателите во Унгарија и Словачка да им објаснат на своите граѓани дека не се енергетски загрозени, дека целата нафта што им е потребна можат организирано да ја добијат преку ЈАНАФ, преку Хрватска“, истакна Пленковиќ.Тој додаде дека Хрватска сака нивното снабдување да биде долгорочно и стабилно, не преку, како што наведе, секундарен нафтовод, туку преку правец кој може да биде примарен и единствен, доколку тие тоа го посакуваат.Испораките на руска нафта за Унгарија и Словачка преку нафтоводот Дружба се прекинати од 27 јануари, кога Киев соопшти дека руски напад со дрон погодил опрема на нафтоводот во западна Украина.Будимпешта и Братислава ја обвинуваат Украина за прекинот на испораките, додека Киев порачува дека работи на санација на нафтоводот.

Свет | пред 1 месец

1 мес.
media-librarykk2alm1bqpiv76MytDs

Wizz Air најави прекин на дигиталните услуги, летовите остануваат редовни

Нискобуџетната авиокомпанија Wizz Air најави привремен прекин на работата на своите дигитални платформи поради планирано унапредување на ИТ-системот, кое треба да ја подобри доверливоста и стабилноста на услугите, како и целокупното корисничко искуство на патниците.Прекинот на пристапот до системите е планиран во периодот од 25 февруари во 23.00 часот до 26 февруари во 08.00 часот.Во тој временски интервал на патниците нема да им бидат достапни резервации на нови билети, измени на постојни резервации, онлајн чекирање, функциите на мобилната апликација, како и преземање ваучери и управување со кориснички профили.Од компанијата наведуваат дека сите летови во тој период ќе се реализираат според редот на летање и дека прекинот на системот нема да влијае врз патниците кои веќе извршиле чекирање или ги презеле своите бординг-карти.„Посветени сме на обезбедување сигурно и квалитетно искуство за нашите клиенти. Ова планирано унапредување дополнително ќе ги развие нашите системи и ќе овозможи идни подобрувања на дигиталните платформи. Им благодариме на патниците за разбирањето додека ја спроведуваме оваа важна техничка процедура“, изјави Оливија Харангоѕо, менаџерка за корпоративни комуникации во компанијата.Wizz Air им препорачува на патниците кои патуваат за време на прекинот навреме да го завршат онлајн чекирањето и да ги преземат своите бординг-карти. Доколку е потребно, компанијата во тој период ќе овозможи бесплатно чекирање на аеродром.Авиокомпанијата очекува сите дигитални услуги повторно да бидат целосно достапни веднаш по завршувањето на планираната техничка интервенција.

Магазин | пред 1 месец

1 мес.
media-librarydacqmd4guot3a0ODmT2

Балкански рис угина на сообраќајница, ќе се врши обдукција на Ветеринарниот факултет

Угинат рис е пронајден на патот Ресен – Охрид. Од Македонското еколошко друштво (МЕД) велат дека ваквиот случај не треба да нè остави рамнодушни, особено ако се земе предвид дека постојат уште само 50-ина единки на балканскиот рис.„По дојава од Здружението на ловци „Преспа-Ресен“, денеска на терен констатиравме дека е угинат рис на патот Ресен-Охрид.  Во тек е координирана акција со Министерството за животна средина и просторно планирање, Државниот инспекторат за животна средина, Агенцијата за храна и ветеринарство и Македонското еколошко друштво со цел земање примероци за анализа и транспортирање на угинатото животно на Факултетот за ветеринарна медицина при УКИМ – Скопје заради обдукција“, велат од МЕД.Од таму велат дека за зачувување на загрозените видови потребно е да се изградат зелени мостови.„Ваквите случаи не нè оставаат рамнодушни, особено ако се земе предвид дека постојат уште само 50-на единки на балканскиот рис. Истовремено, се јасен показател дека ако сакаме да ги зачуваме загрозените видови, мора да се планираат и градат зелени мостови преку кои животните ќе можат безбедно да се движат и да ги надминуваат пречките создадени од човекот“, велат од МЕД.

Македонија | пред 1 месец

1 мес.
271777249_656292602285397_2447550688874601774_n

Сончево со мала до умерена облачност

Времето денеска ќе биде претежно сончево со мала до умерена облачност. Ќе дува слаб до умерен ветер од северен правец, а долж Повардарието повремено ќе биде засилен и на места ќе достигнува брзина до 50 км/ч, информираат од Управата за хидрометеоролошки работи.Минималните температури ќе се движат од -2 до 6 степени, додека максималните ќе бидат меѓу 9 и 16 степени.Во Скопје ќе преовладува сончево време со мала до умерена облачност. Ќе дува слаб до умерен северен ветер, кој во одредени делови од котлината повремено ќе засилува. Утринската температура ќе се спушти до 1 степен, а дневната ќе достигне до 13 степени.Во следните денови, под влијание на висок воздушен притисок, се очекува стабилно и сончево време со мала до умерена облачност и посвежи утра. Во четврток ќе дува умерен, повремено засилен северен ветер, особено изразен долж Повардарието.

Македонија | пред 1 месец

1 мес.
media-library7hl87ej9l27e4IgfDPj

Петрушевски: Одредената мерка куќен притвор за Артан Груби е одлука на Обвинителството

Пратеникот Бране Петрушевски, од редовите на ВМРО-ДПМНЕ во гостување во емисијата „Топ тема“ на Телма телевизија се осврна на одредената мерка куќен притвор за Артан Груби, и нагласи дека не станува збор за преземено судство или пак договор, како што инсинуира опозициската партија СДС, туку дека истата мерка е одлука на обвинителството.„Јас го разбирам и револтот на јавноста и ова коешто се говори по однос на изнесената мерка куќен притвор за Артан Груби. Меѓутоа таа мерка не ја носи Владата, ја носи Јавното обвинителство, по предлог на Јавното обвинителство ја носи судската власт. Со член 98 од Уставот, судската власт е независна“, дециден е Петрушевски.Тој додаде дека обвинителтвото е со два посто доверба за кое СДС се бореше да не биде сменето, притоа посочи дека за претходното седумгодишно владеење на СДС граѓаните им станало нормално да гледаат како министри нарачуваат обвиненија, за разлика од денес кога Министерството за внатрешни работи поднесе кривична пријава против Артан Груби, Перпарим Бајрами, а во истата кривична пријава е и поранешниот премиер и претседател на СДС, Ковачевски, потенцирајќи дека можеби оттука им е и стравот и паниката на СДС.„Јас разбирам дека граѓаните веќе им станало нормално после претходното седумгодишно владеење на СДС да се шетаат министри во канцелариите на јавните обвинители, да нарачуваат обвиненија. Така што ова е истото тоа судство и обвинителство коешто има 2 проценти рејтинг против коешто јас секојдневно држам прес-конференции, коешто е под контрола на СДС и ДУИ и нивните луѓе коишто ги носеа. Кога ние излеговме и баравме комплетна смена на судскиот и обвинителскиот совет да ги разрешиме затоа што го доведоа судството до два проценти за да можеме да го ставиме на здрави нозе, токму СДС беше политичката партија којашто беше против тоа“, заклучува Петрушевски.

Македонија | пред 1 месец

1 мес.
media-libraryg0g67t8fikq8czbUtxZ

(Видео) Голман реанимираше галеб среде терен, откако беше удрен со топка

На аматерски фудбалски натпревар во Истанбул се случи редок и неочекуван инцидент кој привлече внимание на медиумите низ Турција, но и светот. За време на финалето на 1. Аматерска лига, голманот на Истанбул Јурдум Спор, Мухамед Ујаник, со топка удрил галеб кој летал над теренот, а птицата паднала на земја.Капитенот на тимот, Гани Чатан, веднаш притрчал и започнал со кардиопулмонална реанимација (CPR) на галебот. По две минути, птицата покажала знаци на живот, а потоа била предадена на медицинското лице присутно на натпреварот. Иако немал формално образование за прва помош, капитенот инстинктивно реагирал за да го спаси животот на птицата.Натпреварот бил кратко прекинат додека траела интервенцијата, а снимката и реакциите на учесниците брзо се прошириле на социјалните мрежи. По интервенцијата, утврдено е дека галебот имал повреда на крилото и моментално не може да лета, но е под лекарски надзор и во стабилна состојба.Голманот Ујаник признал дека во почетокот не сфатил што се случило, додека Чатан објаснил:„Веднаш сфатив дека птицата не дише и дека падна од ударот. Почнав со CPR и наскоро почна да се опоравува. Сакав да спасам живот. Немав формална обука, но инстинктот си го направи своето“.

Спорт | пред 1 месец

1 мес.
media-library6d96p4gt1vkn6g2FHgf

Братот на Епстин: Новиот извештај ќе докаже дека бил убиен

Братот Џефри Епстин, Марк Епстин, изјави во емисијата „Uncensored“ на Пирс Морган дека нов извештај ќе докаже дека Џефри бил убиен. Тој рече дека група патолози ги прегледува наодите од обдукцијата и составува извештај кој ќе покаже дека смртта не била самоповреда.Марк, кој се занимава со недвижности, нагласи дека неговата грижа е исклучиво за тоа дека неговиот брат бил убиен, без разлика на неговите дела, и агресивно го прекина интервјуто кога беше прашан за жртвите на Џефри. Тој додаде дека многу од јавните информации за злосторствата на брат му го изненадиле и дека претходно не бил свесен за нив.Џефри Епстин имаше долга историја на злосторства, со пријави за сексуално злоставување на малолетни девојчиња уште од 2002 година. Тој беше осуден во 2008 година за поттикнување на проституција со малолетници и доби условна казна со минимална безбедност.Во 2019 година, по апсењето од федералните агенти, Епстин беше пронајден мртов во својата ќелија во Метрополитен корекциониот центар во Њујорк. Главниот градски патолог ја прогласи смртта за самоубиство, но постојат серија сомнителни околности, вклучувајќи нејасни снимки од надзорните камери и службени документи кои биле скриени или цензурирани.Изјавата на тогашниот Манхатенскиот обвинител Џефри С. Берман датирана еден ден пред смртта на Епстин, што дополнително ја зголеми сомнежот во официјалната верзија на настаните.Случајот останува контроверзен и предизвикува големо внимание во јавноста, особено во контекст на бројните жртви на Џефри Епстин.

Свет | пред 1 месец

1 мес.
media-library34pq93rsgbd1ev92Xnv

Американската женска хокејска репрезентација ја одби поканата на Трамп

Американската женска хокејска репрезентација, која освои злато на Олимписките игри, ја одби поканата на претседателот Доналд Трамп да присуствува на нивниот говор за состојбата во нацијата во вторник. Исто така, покана доби и машката репрезентација.Во соопштението на женската репрезентација се наведува дека благодарноста за признанието е голема, но поради густ распоред и претходно закажани академски и професионални обврски, играчите не можеле да присуствуваат. Извор за Associated Press објаснува дека поканата била примена дури доцна во неделата, што го отежнало променувањето на патувањата; многу играчи требале да пристигнат во Северна Америка дури во понеделник вечер.Машката репрезентација пристигна со приватен лет во Мајами, додека женската со комерцијален лет во Атланта. Дополнително, натпреварувачкиот распоред бил тежок: NHL сезоната продолжува веќе во среда, а PWHL, професионалната женска лига, започнува во четврток.Трамп при упатувањето покана се шегувал дека мора да ги покани и жените, инаку „веројатно би бил разрешен“. Двете репрезентации се вратиле од Олимписките игри со златни медали по драматични финалија против Канада, завршени во продолженија.

Спорт | пред 1 месец

1 мес.
Svadba

Свадбена поворка во Крапина завршила со апсења и конфискација на пиштоли

Хрватската полиција приведе четири лица по серија инциденти во свадбена поворка во Крапина. Граѓаните пријавиле пукање од огнено оружје и опасно возење на Денот на вљубените, по што интервенирале полициски единици.Истрагата утврдила дека лица на возраст од 20 до 25 години испукале повеќе истрели од гасни пиштоли низ прозорците на автомобилите додека поворката била во движење.„Утврдено е дека од два гасни пиштоли низ отворените прозорци на автомобилите биле испукани повеќе истрели. Исто така, утврдено е дека гасните пиштоли им припаѓаат на 25-годишно девојче и 28-годишен маж и дека тие биле законски во поседување“, соопштија од полицијата.Покрај пукањето, 25-годишен возач се соочува со пријава за загрозување на безбедноста откако нагло забрзал на градскиот плоштад, предизвикувајќи пролизгување на возилото со кое за малку ќе удрел 58-годишен пешак. Полицијата веќе конфискуваше два пиштола и еден автомобил, а на уапсените им се закануваат казни од по 3.000 евра.

Магазин | пред 1 месец

1 мес.
Screenshot-2025-08-17-at-20.54.17

Се продлабочува конфликтот во ЕУ околу Украина

Европските лидери ја потврдија поддршката за Украина, додека конфликтот влегува во петта година, но разделбите меѓу земјите членки го засенчија одбележувањето.Унгарија и Словачка ја блокираа 20-та серија санкции на ЕУ против Русија и планот за финансиска помош од 90 милијарди евра, повикувајќи се на прекин на испораките на нафта преку „Дружба“. Украина тврди дека пореметувањата се последица на руски бомбардирања.Претседателот Зеленски повика на зголемување на санкциите и на повеќе воена помош, истакнувајќи дека Путин не покажува знаци за крај на конфликтот. Зеленски побара и јасен датум за членство на Украина во ЕУ, додека расколот меѓу земјите членки е најголем досега.Кремљ призна дека не ги постигнал своите воени цели и дека „специјалната воена операција продолжува“, оставајќи простор за дипломатско решение според нивните услови.

Свет | пред 1 месец

1 мес.
media-librarycmmi2693vagt6MRRAbT

Полицијата влезе во уште една фабрика за марихуана, овојпат во валандовско: нова акција на МВР и Обвинителството

По наредба на јавен обвинител од Основно јавно обвинителство Гевгелија, полициски службеници од СВР Струмица – ОВР Валандово денеска извршиле претрес во простории на правен субјект за производство на марихуана во селото Јосифово, валандовско.Од Министерство за внатрешни работи информираат дека претресот е спроведен по издадена наредба од надлежен јавен обвинител, а повеќе детали за предметот засега не се соопштуваат.Ова доаѓа откако беше објавено дека шест лиценци за производство на марихуана се одземени со одлука на Владата, донесена на денешната седница која сè уште е во тек. Засега нема официјално соопштение од Владата, а се очекуваат детали по нејзиното завршување.Според неофицијални информации, една од одземените лиценци се однесува на фабрика од која претходно беше запленета марихуана во рамки на акција во која беа одземени 40 тона.Одлуката следува по проверките што ги спровело Министерство за здравство. Министерот добил овластување да провери дали се почитуваат законските прописи за одгледување на марихуана, како и стандардите за нејзиниот квалитет.Според предлогот на комисијата при Министерството за здравство, одземање на лиценците е предложено за следните компании:– Alphafarm – констатиран кусок на сув цвет, необезбедено физичко обезбедување и видеонадзор.– Green Life – констатиран кусок на сув цвет и несоодветно пакување во сеф-соба.– CBD Medplant – кусок на сув цвет во сеф-соба и недоставување целосна документација до Комисијата за купопродажба.– Life Plant – недостиг на видеонадзор во внатрешните простории, необезбедено физичко обезбедување и недоставување документација за купопродажба.– Ata Farm – непостоење соодветен стручен кадар и необезбедено физичко обезбедување и видеонадзор.– Kanabinoids – неисполнување на законските услови, недостиг на кадар, обезбедување и видеонадзор, како и констатирани несоодветни активности во дворот на правното лице.Се очекува надлежните институции во текот на денот да излезат со подетални информации за одлуката и за понатамошните чекори во постапката.

Македонија | пред 1 месец

1 мес.
media-library0p96u6skogd921mua8v

Нема што да се расправа за судијата кој го прати Груби во куќен притвор, членот на Судски, Јошевска, одговори на прозивките од Филков

Сузана Јошевска-Анастасовска, член на Судски совет на Република Македонија, изјави дека судија не смее да изрече мерка ефективен притвор доколку од страна на јавниот обвинител има поднесен предлог за куќен притвор.„Судија НЕ СМЕЕ да изрече мерка притвор ако има предлог од обвинител за куќен притвор. Нема потреба од итна седница на Судскиот совет за да се расправа основно правило во кривичната постапка“, посочи Јошевска-Анастасовска.Нејзината реакција доаѓа откако министерот за правда, Игор Филков, јавно ги повика Судскиот совет и Совет на јавни обвинители да утврдат дали има основ за одговорност кај судијата и јавниот обвинител во врска со одлуката за куќен притвор за Артан Груби.Полемиката се отвори по одлуката наместо ефективен притвор, на Груби да му биде определен куќен притвор, што предизвика серија политички реакции и повици за институционална одговорност.

Македонија | пред 1 месец

1 мес.
media-library9h1itj50u2mndJpOFZF

Почина актерот Роберт Карадин

Роберт Карадин, 71-годишен актер познат по улогите во франшизата „Одмаздата на штреберите“ и серијата „Лизи Мекгваер“ на Дизни, почина на 23 февруари по долга борба со биполарно растројство.Семејството ја потврди смртта и посочи дека сакаат неговата борба со менталното здравје да помогне во разбирјање на стигмата околу болестите. Карадин потекнува од актерско семејство, со долгогодишна кариера во филм и телевизија, а помладата публика го памети како Сем, таткото на Лизи Мекгваер.Познатите личности, меѓу кои и Хилари Даф, се збогуваа со него, истакнувајќи ја неговата топлина, хумор и поддршка кон сите околу него.

Свет | пред 1 месец

1 мес.
media-libraryvlg14l4rmfht4PWkz5x

Двајца полицајци убиени за време на сообраќајна контрола во Мисури

Двајца заменички шерифи загинаа, а уште двајца полицајци се ранети вчера во југозападниот дел на Мисури, откако возач отвори оган за време на сообраќајна контрола, соопштија властите.Инцидентот се случил околу 16 часот локално време, на автопат близу градот Хајландвил, кога двајца заменици од канцеларијата на шерифот на округот Кристијан беа нападнати. Еден од убиените е 30-годишниот Габриел Рамирез, додека идентитетите на останатите тројца вклучени полицајци не се објавени.Во потерата за напаѓачот учествувале околу сто полицајци, меѓу кои државната полиција и федерални агенти од Службата на американските маршали, Канцеларијата за алкохол, тутун, огнено оружје и експлозиви и ФБИ, изјави шерифот на округот Кристијан, Бред Коул. Гувернерот на Мисури, Мајк Кехо, бил во контакт со шерифот и ги повикал граѓаните да соработуваат со информации.Осомничениот, 45-годишниот Ричард Бард, бил лоциран синоќа откако јавноста била известена за потрагата во соседниот округ Стоун, каде бил пронајден неговиот напуштен камионет. Шерифот на округот Стоун, Даг Рејдер, потврди дека осомничениот е мртов.Шерифот Коул објасни дека Бард се обидел да се сокрие во шумско подрачје, но бил забележан од хеликоптер на сообраќајната полиција. Кога полицајците му се приближиле, тој повторно отворил оган и бил убиен кога полицајците возвратиле. Шерифот Рејдер ја опиша трагедијата како „веројатно најлошиот ден во историјата на канцеларијата на шерифот на округот Кристијан“ и додаде дека се очекува ранетите полицајци да закрепнат.

Свет | пред 1 месец

1 мес.
media-libraryd7m8obnhihku5dhVrDD

Тензии околу куќниот притвор: ДУИ бара разрешување на Филков и најавува поплаки до САД, ЕУ и ОБСЕ

Демократска унија за интеграција бара министерот за правда Игор Филков да се воздржи од, како што велат, натамошни јавни интервенции во врска со мерката куќен притвор за Артан Груби, а доколку таквата пракса продолжи – да биде разрешен.Од ДУИ обвинуваат дека Филков извршил притисок врз судиите и обвинителите со денешната изјава во која посочи дека мора да има одговорност „со име и презиме“ за одлуката Груби да биде упатен во куќен наместо во ефективен притвор.Според партијата, извршната власт нема уставно право да сугерира како ќе постапуваат судските органи, оценувајќи ја изјавата на министерот како директно мешање во тековен процес и загрозување на интегритетот на постапката.„Улогата на Министерството за правда е да го заштити интегритетот и независноста на судството, особено во чувствителни случаи кога политичката поларизација врши голем притисок врз поединци во рамките на правосудниот систем. Наместо да го заштити судскиот систем од партиска хистерија, министерот дополнително го поттикнува, создавајќи клима на однапред одредена одлука и јавно упатувајќи пораки што претставуваат притисок врз обвинителите и судиите“, наведуваат од ДУИ.Партијата на Али Ахмети апелира Филков да се воздржи од натамошни јавни коментари, а во спротивно, смета дека треба веднаш да биде разрешен „со цел заштита на независноста на судството во овој чувствителен момент“.Од ДУИ најавуваат дека ќе продолжат внимателно да го следат случајот и дека за случувањата ќе ги информираат стратешките партнери – Соединетите Американски Држави, Европската Унија и Мисијата на ОБСЕ во Македонија.Претходно денеска, министерот за правда ги повика Судски совет на Република Северна Македонија и Совет на јавни обвинители да свикаат итни седници и да утврдат дали има елементи за одговорност кај јавниот обвинител кој побарал, како и кај судијата кој одобрил куќен наместо ефективен притвор за Груби, кој вчера се појави на македонско-косовската граница по повеќе од една година отсуство од државата.

Македонија | пред 1 месец

1 мес.
nafta-696x465-1

ЕУ планира трајна забрана за увоз на руска нафта

Европската комисија планира да предложи закон кој ќе предвиди трајна забрана за увоз на руска нафта. Предлогот е предвиден да биде објавен на 15 април, три дена по парламентарните избори во Унгарија, со цел прашањето за забраната да не стане доминантна тема во предизборната кампања.ЕУ уште во 2022 година забрани увоз на руска нафта превезуван по море, со исклучок на земјите без излез на море – Чешка, Унгарија и Словачка – кои можат да увезуваат нафта преку морски транспорт ако не е можно да се користи нафтопроводот.Испораките преку нафтопроводот Дружба беа прекинати на 27 јануари по руски напад со дронови. Унгарија ја обвинува Украина дека го одложува поправувањето на нафтопроводот, па затоа го блокира 20-тиот пакет санкции против Русија и кредитот од 90 милијарди евра за Украина, при што Словачка ѝ се приклучи на Унгарија во блокадата.Со новиот закон, Комисијата сака трајно да ја забрани руската нафта. Иако во последното тромесечје ЕУ увезувала само 1 отсто руска нафта, Унгарија и Словачка не презеле мерки за намалување на зависноста, па денес речиси целосно зависат од руски енергенти.Минатиот месец, ЕУ донесе закон за целосно запирање на увозот на руски гас од есен 2027 година. Унгарија и Словачка најавија дека ќе се борат против тоа пред Судот на ЕУ.

Свет | пред 1 месец

1 мес.
european-brown-bear-1477814960720-620x350

Маж од кичевско ќе добие 300.000 денари откако бил нападнат од мечка

Маж од кичевско ќе добие 300.000 денари надомест за физички болки и страв, откако минатата година бил нападнат од мечка. Инцидентот се случил во август 2022 година, кога човекот пеш се враќал од нива кон својот дом и без никаква провокација бил гризнат од мечката. При нападот тој се здобил со повреди на десната страна од челото и слепоочницата, како и нагмечувања на дланките и натколеницата.По инцидентот, мажот бил хоспитализиран во болницата во Прилеп, каде што му биле хируршки санирани повредите и примил вакцина против беснило. Поради психолошките последици од нападот, побарал и психијатриска помош, а според медицинските наоди, болките со силен интензитет траеле околу десет дена, особено во пределот на главата и дланките.Основниот суд во Кичево првично му досудил 350.000 денари за нематеријална штета, но по жалба случајот бил разгледан од Апелациониот суд во Гостивар, кој ја намалил отштетата на 300.000 денари. Со конечната одлука, на оштетениот му се доделени 100.000 денари за физички болки, 100.000 денари за претрпен страв, 50.000 денари за намалена општа животна активност и 50.000 денари за душевни болки поради нагрденост.Во жалбата, тужителот побарал повисок износ, наведувајќи дека институциите не презеле доволно мерки за заштита од вакви напади, но Апелациониот суд оценил дека првично досудената сума била превисока и ја намалил отштетата.

Македонија | пред 1 месец

1 мес.
raketa

Украина ги отфрли тврдењата за набавка на нуклеарно оружје

Украина ги отфрли „апсурдните“ тврдења на Русија дека Киев се обидува да набави нуклеарно оружје со помош на Велика Британија и Франција.Портпаролот на Министерството за надворешни работи на Украина, Георгиј Тихи, за Reuters изјави дека „руските официјални лица, познати по импресивен низ лаги, повторно се обидуваат да создадат стара глупост за ‘валкана бомба’“. Тој додаде: „Да бидеме јасни – Украина многупати ги демантираше овие апсурдни руски тврдења и сега официјално ги негираме. Го повикуваме меѓународното сојузништво да ги отфрли и осуди руските валкани информативни напади.“Претходно, руската Служба за надворешна разузнавачка активност (SVR), без да достави докази, ги обвини Велика Британија и Франција дека се подготвуваат тајно да ја снабдат Украина со делови за нуклеарно оружје и со технологија. Двете држави, Велика Британија и Франција, како нуклеарни сили, засега не одговориле на обвинувањето.

Свет | пред 1 месец

1 мес.
media-librarychtqnfqbo80c8e3w7ig

Хоспитализиран поранешниот норвешки премиер, пишува дека се обидел да си го одземе животот поради Епстин

Поранешниот норвешки премиер Торбјорн Јагланд (75) е примен во болница, потврди неговиот адвокат Андерс Бросвет, наведувајќи дека хоспитализацијата е последица на силен стрес по откритијата за неговите врски со осудениот сексуален престапник Џефри Епстин, објави норвешкиот медиум VG.Адвокатот ги демантираше медиумските тврдења, меѓу кои и написите на порталите Ињетер и Финансависен, дека Јагланд се обидел да си го одземе животот. Уредникот на Ињетер, Хелге Лурас, изјави дека нивниот новинар добил поинакви информации, додека уредникот на Финансависен, Штајнар Грини, одби подетален коментар.На крајот на јануари беше откриено дека Јагланд имал значително пообемни контакти со Епстин отколку што претходно тврдеше. Нивната комуникација опфаќала размена на бројни пораки и повеќе средби во периодот од 2011 до 2019 година, кога Јагланд беше генерален секретар на Совет на Европа и претседател на Норвешкиот нобелов комитет, кој ја доделува Нобеловата награда за мир.Против него е покрената истрага за тешка корупција, а норвешката служба за борба против економски и еколошки криминал Økokrim на 12 февруари извршила претрес во неговиот дом, викендичка и планинска куќа. Истражителите се сомневаат дека Јагланд примал мито од Епстин во форма на подароци или услуги додека бил на чело на Советот на Европа, но засега не е прецизирано што требало да возврати.Според наводите, нивниот однос вклучувал престои на Јагланд во луксузните станови на Епстин во Париз и Њујорк, како и посета на Епстин на резиденцијата на Јагланд во Стразбур. Јагланд од него побарал и финансиска помош за купување стан во Осло. Претходно тој ја опиша врската како дел од „вообичаени дипломатски активности“, но подоцна призна дека направил лоша проценка и дека никогаш не би стапил во контакт со Епстин доколку ги знаел денешните информации за него.Преку својот адвокат, Јагланд порача дека сака да придонесе за целосно расветлување на случајот. Покрај него, Økokrim за тешка корупција ги обвини и брачниот пар Терје Ред-Ларсен и Мона Јул поради контакти со Епстин, а сите тројца ја негираат вината.

Свет | пред 1 месец

1 мес.
media-librarylb4grqvav3s821jfNql

СДСМ: Има за авион и луксуз, нема за 600 евра минимална плата

Социјалдемократски сојуз на Македонија обвини дека власта одбила зголемување на минималната плата на 600 евра, и покрај тоа што, како што наведуваат, има средства за „луксузирање, мебел и авион“.Предлогот за изменување и дополнување на Законот за минималната плата, поднесен од пратениците на СДСМ, денеска не беше прифатен на собраниската Комисија за економски прашања. Според опозицијата, за законот дебатирале само нивни пратеници, додека владејачкото мнозинство го одбило и предлогот за јавна расправа, како и разговор меѓу синдикатите, работодавачите и Владата.„Одбија решение за работниците. Одбија 600 евра минимална плата. Има пари за луксузирање на власта, за мебел, чанти, авион, ама нема за поголеми плати за работниците“, велат од СДСМ.Од партијата тврдат дека средствата за набавка на авион не се повлечени и дека нема најави за ребаланс на Буџетот, што, според нив, покажува дека власта нема намера да се откаже од таа набавка.Во реакцијата се наведува и дека, како што велат, се води координирана медиумска кампања со наратив дека „потребен е авион“, додека, според СДСМ, главната тема – зголемување на платите – се оттурнува во втор план.„Има за авион. Има за мебел. Нема за плати. Дефокус не го полни фрижидерот“, порачуваат од опозициската партија, додавајќи дека работниците не смеат да останат без решение.СДСМ апелира законските измени да бидат прифатени „заради работниците“, оценувајќи дека, како што велат, „доста беше од игри“.

Македонија | пред 1 месец

1 мес.
media-librarysadjjm8l382vcOgHxHp

Угостителите добија „битка“: одложена примената на дел од законот за заштита од пушење

Министерство за здравство прифати одложување на примената на дел од новиот закон за заштита од пушење, со што, како што беше појаснето, им се остава простор на сопствениците на угостителските објекти инфраструктурно да се прилагодат на законските барања.Министерот за здравство, Азир Алиу, на денешната прес-конференција во Владата изјави дека одложувањето се однесува на примената на одредбите за пушење на отворени тераси од три страни, кои во пракса во моментов се затворени.„Процесот за забелешки за тој закон е веќе завршен. Работните групи имаа консултации со стручни лица и со сите засегнати страни во државата. Исто така, јас и премиерот имавме состаноци со производители, потрошувачи, компании, ресторани и кафулиња. Имаше забелешки што беа логични и можеа да бидат прифатени, но и такви што не беа прифатени. Прифатено беше одложувањето на примената на законот за тераси од три страни, бидејќи им треба време за инфраструктурно да се приспособат“, изјави Алиу.Во однос на електронските цигари, министерот најави дека тие ќе бидат забранети за користење во затворени простории. Дополнително, ќе биде ограничена и нивната продажба.„Барањето кое половично е прифатено беше продажбата на електронските цигари со вкус. Има вкусови што се директно наменети за младата популација. Целта на законот е заштита на населението со фокус на младите. Ќе бидат забранети сите вкусови што се благи и атрактивни за младите, а ќе дозволиме да се продаваат само електронски цигари со неутрален вкус и со вкус на тутун“, истакна министерот.Според него, државата е меѓу водечките во Европа по користење на нетрадиционални, таканаречени модерни електронски цигари, поради што законските измени имаат за цел дополнително да ја зајакнат заштитата на младите и јавното здравје.

Македонија | пред 1 месец

1 мес.
vozacka-1

Со завршено четврто одделение сакал да извади возачка, па фалсификувал диплома

Возачки испит во земјава може да се полага со завршено основно образование, а токму овој услов бил причина 49-годишен прилепчанец да фалсификува свидетелство за завршена осмолетка за да може да се пријави во авто-школа.Од Министерство за внатрешни работи информираат дека ОВР Прилеп поднела кривична пријава против Н.А.(49) од Прилеп поради постоење основи на сомнение за сторено кривично дело „фалсификување на исправа“.„Во септември 2025 година, пријавениот направил лажна исправа – свидетелство на негово име издадено од основно училиште за завршено осмо одделение, кое имал намера да го употреби за пријавување во авто-школа за полагање на возачки испит, иако имал завршено четврто одделение“, соопштуваат од полицијата.Случајот доаѓа во период кога засилени се контролите во сообраќајот, особено по ставањето во функција на системот „Безбеден град“, кој предвидува построги санкции за возење без возачка дозвола и за други сообраќајни прекршоци.Во изминатиот период, по одземање на возила од лица кои управувале без положен возачки испит, во Битола и во други градови беа организирани протести. Дел од демонстрантите, припадници на ромската заедница, бараа можност да управуваат возила и без положен испит, повикувајќи се на фактот дека некои од нив се неписмени.Надлежните, пак, остануваат на ставот дека условите за стекнување возачка дозвола се законски пропишани и еднакво важат за сите граѓани.

Македонија | пред 1 месец

Согласност за колачиња (cookies)

Нашата веб-страница користи колачиња за подобрување на корисничкото искуство и анализа на сообраќајот.

Прочитај повеќе
Дознај ексклузивно и прв

Прв ќе ги дознаваш ударните и вонредните случувања