ИРАН

Иран: Доколку САД повторно нè нападне, ќе збогатиме ураниум до ниво на нуклеарна бомба

Иранскиот парламент ќе разгледува можност за збогатување на ураниум до 90 проценти во случај на нов американски напад, изјави пратеникот Ебрахим Резаи.Резаи, кој е портпарол на парламентарниот Комитет за национална безбедност и надворешна политика, навел дека тоа е една од клучните опции за кои ќе се разговара во Техеран.„Една од иранските опции во случај на повторен напад би можело да биде збогатување до 90 проценти. Тоа ќе го анализираме во парламентот“, изјавил Резаи.За работа на нуклеарни електрани обично е потребен ураниум збогатен меѓу 3 и 5 проценти, додека за производство на нуклеарно оружје се бара ниво од 90 проценти.Заканата доаѓа откако американските медиуми објавија дека американскиот претседател Доналд Трамп разгледува нови удари врз Иран со цел да ја ослабне неговата преговарачка позиција.Трамп претходно ја оправдуваше војната со тврдењето дека на Иран никогаш не смее да му биде дозволен развој на нуклеарно оружје.

Свет | пред 2 часа

САД воведуваат нови санкции поради испораките на иранска нафта во Кина

Американската влада воведе санкции против три лица и девет компании, меѓу кои фирми со седиште во Хонг Конг и Обединетите Арапски Емирати, поради наводна помош на Иран во извозот на нафта во Кина.Одлуката на американското Министерство за финансии доаѓа неколку дена пред најавената средба меѓу американскиот претседател Доналд Трамп и кинескиот претседател Си Ѓинпинг, на која се очекува да се разговара и за кризата со Иран и повторното отворање на Ормутскиот теснец.Американските власти соопштија дека санкциите на Канцеларијата за контрола на странски средства се насочени кон лица и компании кои ѝ помагале на Иранската револуционерна гарда во продажба и транспорт на иранска нафта во Кина преку мрежа од параван-компании.Американскиот министер за финансии Скот Бесент изјави дека администрацијата на Трамп ќе продолжи да користи санкции за да го спречи финансирањето на иранската војска, оружените програми и регионалните сојузници на Техеран.„Министерството за финансии ќе продолжи да го отсекува иранскиот режим од финансиските мрежи што ги користи за терористички активности и дестабилизација на глобалната економија“, изјави Бесент.Американскиот Стејт департмент истовремено понуди награда до 15 милиони долари за информации што би помогнале во нарушување на финансиските механизми на Иранската револуционерна гарда.Меѓу санкционираните компании се „Хонг Конг Блу Оушн“, „Хонг Конг Санму“, „Оушн Алијанц Шипинг“ од Дубаи и „Атик Енерџи“ од Шарџа, за кои Вашингтон тврди дека учествувале во транспорт и продажба на иранска нафта преку таканаречената „сенковна флота“.На листата се најдоа и компании од Оман и Дубаи, како и фирми за кои САД тврдат дека склучувале договори вредни десетици милиони долари за купување иранска нафта.

Свет | пред 2 часа

Иран до Трамп: Не мисли дека ќе влезеш триумфално во Пекинг

Иран испрати остра порака до американскиот претседател Доналд Трамп пред неговото патување во Пекинг на средба со кинескиот лидер Си Џинпинг.Советникот на иранскиот врховен лидер, Али Акбар Велајати, порача дека Трамп не треба да го толкува моменталниот прекин на борбите како победа на САД.„Господине Трамп, немојте ни да помислите дека, користејќи го моменталното затишје во Иран, ќе можете триумфално да влезете во Пекинг“, изјави Велајати, а пренесе иранската полуофицијална агенција Тасним.Тој додаде дека Иран ги победил САД „на бојното поле“ и предупреди Вашингтон да не се однесува како победник ниту во дипломатијата.„Ве победивме на бојното поле, затоа никогаш немојте да мислите дека ќе излезете како победник и во дипломатијата“, рече Велајати.Изјавата доаѓа откако Трамп во понеделникот кажа дека едномесечното примирје меѓу САД и Иран е „на апарати“.И покрај формалниот прекин на огнот, во изминатиот период двете страни продолжија со меѓусебни напади и тензии во стратешки важниот Ормуски теснец.

Свет | пред 3 часа

Си-ен-ен: Трамп губи трпение, враќањето на големи воени операции е сѐ поверојатно

Американскиот претседател Доналд Трамп станува сѐ понетрпелив поради начинот на кој Иран ги води преговорите за прекин на конфликтот, а во Белата куќа повторно сериозно се разгледува можноста за враќање на големи воени операции, објави Си-ен-ен, повикувајќи се на извори блиски до администрацијата.Според телевизијата, Трамп е особено бесен што Ормускиот теснец и натаму останува затворен, додека во исто време смета дека поделбите во иранското раководство го блокираат секој можен напредок во разговорите за нуклеарната програма.Последниот одговор што пристигнал од Техеран, Трамп јавно го оценил како „целосно неприфатлив“ и „глупав“, по што дел од американските функционери почнале да се сомневаат дали Иран воопшто сака сериозно да преговара.Во самата американска администрација, според Си-ен-ен, се создале две спротивставени струи. Дел од функционерите, меѓу кои и луѓе од Пентагон, бараат поагресивен пристап и нови таргетирани воздушни удари со цел дополнително да се ослабне позицијата на Техеран и да се принуди Иран на отстапки.Од друга страна, дел од советниците и понатаму инсистираат дипломатијата да добие уште една шанса пред евентуална нова воена ескалација.Во извештајот се наведува и дека луѓе блиски до Трамп бараат Пакистан, кој посредува во комуникацијата меѓу Вашингтон и Техеран, да биде многу подиректен кон иранските власти. Во Белата куќа постои сомнеж дека пакистанските посредници испраќаат „ублажена“ верзија од пораките и незадоволството на Трамп.Регионални извори за Си-ен-ен тврдат дека Иран бил предупреден дека ова можеби е последна можност за дипломатски договор, но дека Техеран не покажува знаци дека е подготвен да попушти.Трамп вчера повторно се сретнал со тимот за национална безбедност во Белата куќа, каде се разгледувале сите можни сценарија. Според извори на телевизијата, конечна одлука за следните чекори се очекува наскоро, пред неговото патување во Кина.

Свет | пред 3 часа

Трамп: Со Иран имав договор четири или пет пати, па се предомислуваа

Американскиот претседател Доналд Трамп изјави дека дипломатско решение за конфликтот со Иран сè уште е можно, иако, како што рече, иранското раководство постојано го менува ставот.На прашањето дали верува дека мирно решение е достижно, Трамп одговори: „Не, мислам... многу е можно“.„Имав договор со нив четири или пет пати. Потоа го менуваат мислењето. Раководството се многу нечесни луѓе“, изјави Доналд Трамп.Тој додаде дека повеќепати во бизнисот се соочувал со слични ситуации, кога договорите биле одложувани и менувани во последен момент.„Со тие луѓе ќе договорите работа, а следниот ден ќе ви испратат документ за кој му требаат пет дена да стигне, иако можел да стигне за 20 минути“, рече Трамп.Во изјавата тој алудираше и на внатрешните состојби во иранското раководство, тврдејќи дека „никој не сака да биде претседател“.Инаку, актуелен претседател на Иран е Масуд Пезешкијан, избран во 2024 година.

Свет | пред 16 часа

Трамп: Иран се согласи да се откаже од нуклеарниот материјал, па се предомисли

Американскиот претседател Доналд Трамп изјави дека Иран првично се согласил да се откаже од својот нуклеарен материјал под услов тој да биде отстранет од страна на САД, но подоцна ја повлекол таа согласност.„Се согласуваат со нас, а потоа го повлекуваат тоа што го кажале“, изјави Доналд Трамп пред новинарите.Трамп додаде дека иранскиот контрапредлог подоцна го оценил како „парче ѓубре“ и рече дека не „губел време“ читајќи го.Според американски и меѓународни медиуми, разговорите меѓу Вашингтон и Техеран остануваат блокирани околу прашањето за збогатениот ураниум и иднината на иранската нуклеарна програма.

Свет | пред 16 часа

Трамп: Имам најдобар план досега за Иран

Американскиот претседател Доналд Трамп изјави дека има „најдобар план досега“ за Иран и повторно порача дека Техеран не смее да поседува нуклеарно оружје.Одговарајќи на новинарски прашања во Овалната соба, Трамп рече дека неговиот план е „многу едноставен“.„Не знам зошто едноставно не го кажете јасно – Иран не може да има нуклеарно оружје“, изјави Доналд Трамп.Тој додаде дека со таквиот став „му се прави услуга на целиот свет“.Воедно, американскиот претседател го нарече „глупав“ иранскиот предлог до САД за завршување на војната, кој претходно го отфрли.

Свет | пред 16 часа

Трамп: Ме чека голема група генерали за разговори за Иран

Американскиот претседател Доналд Трамп изјави дека го очекува состанок со „голема група генерали“ за разговори поврзани со Иран.Трамп ова го кажа за време на настан во Овалната соба посветен на здравствената заштита на мајките, кога им порача на присутните да бидат кратки, бидејќи мора да замине на состанок.„Не зборувајте предолго, затоа што ме чека голема група генерали, а и тоа е важно, поврзано со апсолутно прекрасната земја Иран“, изјави Доналд Трамп.Изјавата ја даде додека зад него стоеја жени кои ги претставуваа предлозите на администрацијата за подобрување на здравствената грижа за мајките и поддршка на мајчинството.Меѓу присутните била и републиканската сенаторка Кејти Брит, која ја предводи иницијативата поврзана со мајчинството.

Свет | пред 16 часа

Иран и САД далеку од компромис, тензиите повторно растат

Иран и Соединетите Американски Држави меѓусебно ги отфрлија најновите мировни предлози за завршување на конфликтот на Блискиот Исток, додека тензиите меѓу двете земји продолжуваат да растат.Техеран го обвинува американскиот претседател Доналд Трамп за неразумни барања, додека Трамп порача дека иранските контрапредлози се „целосно неприфатливи“.Минатата среда Трамп изјави дека Иран „многу сака договор“, а Техеран потврди дека разгледува нов американски мировен предлог.Сепак, иранските медиуми вчера објавија дека властите во Техеран го одбиле американскиот план, оценувајќи дека тој би значел „капитулација пред претераните барања“ на американскиот претседател.Иран испратил сопствен предлог, кој според медиумските извештаи вклучува барање за исплата на воена отштета, итен прекин на американската блокада во Хормушкиот Теснец и гаранции дека нема да има нови напади.Трамп потоа на својата социјална мрежа „Трут соушал“ напиша дека го видел одговорот на Иран.„Не ми се допаѓа – ЦЕЛОСНО НЕПРИФАТЛИВО!“, порача американскиот претседател.Иранскиот претседател Масуд Пезешкијан изјави дека Иран нема да „ја наведне главата пред непријателот“, нагласувајќи дека отворањето дијалог со Вашингтон не значи предавање или повлекување.Портпаролот на иранското Министерство за надворешни работи, Есмаил Багаеи, денеска изјави дека иранската понуда била „великодушна и одговорна“, додека Вашингтон продолжува да наметнува „неразумни барања“.Засега нема знаци за приближување на ставовите, а ситуацијата во регионот останува напната.

Свет | пред 22 часа

Цените на горивата експлодираат во Америка, американскиот министер за енергетика: Размислуваме за укинување на данокот

Американскиот министер за енергетика Крис Рајт изјави дека администрацијата на претседателот Доналд Трамп разгледува можност за привремено укинување на федералниот данок на гориво, со цел да се намалат цените на бензинските пумпи.Како што пренесува Си-Ен-Ен, Рајт нагласил дека Белата куќа поддржува „сите мерки“ што можат да помогнат во намалување на цените за американските граѓани.„Оваа администрација стои зад секој потег што може да ги намали цените на бензинските пумпи и да им олесни на Американците“, изјавил Рајт во емисијата „Мит д прес“ на телевизијата Ен-Би-Си.Министерот тврди дека администрацијата не седела со скрстени раце додека цените растат.Според него, веќе биле преземени неколку мерки, меѓу кои користење на стратешките резерви на нафта за зголемување на понудата, прилагодување на правилата на Агенцијата за заштита на животната средина поврзани со летните мешавини на бензин и барање до рафинериите да ги скратат редовните ремонти за да нема застои во производството.Сепак, Рајт одбил да прогнозира кога би можело да дојде до позначително намалување на цените, иако се приближува сезоната на летни патувања, кога побарувачката традиционално расте.Како клучен услов за стабилизирање на пазарот, министерот ја посочил ситуацијата во Персискиот Залив.„Во моментот кога пловидбата низ Ормутскиот Теснец повторно ќе стане слободна, цените на енергенсите ќе почнат да паѓаат“, изјавил Рајт.Минатиот месец тој за Си-Ен-Ен изјави дека Американците веројатно нема да видат цена на гориво под три долари за галон пред 2027 година, дури и ако теснецот се отвори порано.Таквата проценка предизвика реакција од Доналд Трамп, кој оцени дека изјавата на Рајт е „целосно погрешна“.Додека министерот предупредува на геополитичките и логистичките ризици, Трамп продолжува да тврди дека цените на горивата ќе паднат многу побрзо доколку се постигне договор со Иран.Иран практично го затвори Ормутскиот теснец по израелско-американските напади во февруари годинава, што предизвика нови потреси на светскиот пазар на нафта.

Свет | пред 1 ден

Трамп бесен на Иран, доби одговор: „Всушност сме дарежливи“

Иран порача дека мировниот предлог што му го испратил на Вашингтон не е „претеран“, обвинувајќи ги САД дека и натаму поставуваат „неразумни барања“.Техеран вчера го одби планот на американскиот претседател Доналд Трамп за завршување на конфликтот, со образложение дека прифаќањето на таков договор би значело „покорување“ пред Вашингтон.Трамп веднаш реагираше на својата социјална мрежа „Трут соушал“, каде што иранскиот одговор го оцени како „целосно неприфатлив“.Портпаролот на иранското Министерство за надворешни работи, Есмаил Багаеи, денеска изјави дека Иран само се обидува да ги заштити своите основни права.Тој нагласил дека Техеран до Вашингтон испратил „великодушни и одговорни“ предлози за стабилизација на регионот.Според иранските медиуми, клучните барања на Техеран вклучуваат исплата на отштета за штетите настанати за време на воените операции, целосен прекин на американската поморска блокада во Ормутскиот теснец и гаранции дека повеќе нема да има напади, како и укинување на санкциите и запирање на економскиот притисок.„Нашето барање е легитимно: бараме крај на војната, укинување на блокадата и прекин на пиратството, како и ослободување на иранскиот имот што неправедно беше замрзнат под американски притисок“, изјавил Багаеи.Покрај економските и воените барања, Иран инсистира и на воспоставување нов безбедносен поредок во регионот.Багаеи истакнал дека слободниот поморски сообраќај низ Ормутскиот теснец и обезбедувањето стабилност во Либан се клучен дел од иранската понуда.„Тоа го сметаме за великодушен и одговорен предлог за регионална стабилност“, додал портпаролот.Во Вашингтон, пак, овие барања се доживуваат како обид Иран да ги диктира условите по серијата судири во Персискиот Залив, што администрацијата на Трамп засега категорично го одбива.Додека дипломатските тензии растат, состојбата во Ормутскиот теснец и понатаму останува на работ на нов конфликт.

Свет | пред 1 ден

Преговорите меѓу САД и Иран без напредок, цените на нафтата растат

Барел сурова нафта од типот „Брент“ поскапе за околу четири проценти, откако повторно ослабнаа надежите за мирно решавање на кризата меѓу Иран и САД.Цената на нафтата сега се движи околу 105 долари за барел, што е највисоко ниво од средината на минатата недела.Иако за време на најжестоките тензии цената во одредени моменти надмина и 120 долари за барел, најновиот раст покажува дека пазарот и натаму е исклучително чувствителен на секоја негативна вест поврзана со преговорите.Аналитичарите предупредуваат дека високите цени на нафтата веќе со месеци директно влијаат врз секојдневниот живот на граѓаните, преку повисоки сметки за енергија, но и преку поскапување на основните производи поради растечките транспортни и производствени трошоци.Според експертите, цените би можеле дополнително да растат доколку не се најде трајно решение за кризата во Персискиот Залив, а дипломатските напори засега не даваат резултати.Најновиот бран поскапувања следуваше откако Иран го одби американскиот план за завршување на конфликтот.Американскиот претседател Доналд Трамп реагираше на својата социјална мрежа, оценувајќи дека иранскиот контрапредлог, испратен до Вашингтон, е „целосно неприфатлив“.Иако деталите од понудите не се јавно објавени, јасно е дека двете страни сè уште се далеку од компромис.Додека преговорите остануваат без напредок, светските пазари продолжуваат бурно да реагираат на секоја најава за можна ескалација на конфликтот.

Свет | пред 1 ден

Трамп го отфрли иранскиот мировен предлог: „Целосно неприфатлив“

Американскиот претседател Доналд Трамп остро го отфрли најновиот мировен предлог на Иран за ставање крај на 10-неделниот конфликт на Блискиот Исток, оценувајќи го како „целосно неприфатлив“.„Штотуку го прочитав одговорот од таканаречените ирански претставници. ЦЕЛОСНО НЕПРИФАТЛИВ“, напиша Трамп на социјалните мрежи, без да открие дополнителни детали за содржината на иранскиот одговор.Иран предложи дел од резервите на високо збогатен ураниум да бидат префрлени во трета земја, додека остатокот ќе биде разреден. Сепак, Техеран категорично ја отфрлил можноста за демонтирање на своите нуклеарни постројки и побарал гаранции дека ураниумот ќе биде вратен доколку преговорите пропаднат.Полуофицијалната иранска агенција „Тасним“ демантира делови од извештајот, нагласувајќи дека Иран бара итен прекин на војната, укинување на американските санкции, ослободување на замрзнатите ирански средства и целосен суверенитет над Ормутски теснец.Иранските државни медиуми тврдат дека американскиот предлог е доживеан како обид за „капитулација“ на Техеран. Според нив, Иран побарал и воена отштета од Соединетите Американски Држави за штетите од конфликтот.Трамп, од своја страна, претходно предложи Иран да овозможи слободен премин низ Ормутскиот теснец, а Вашингтон постепено да ја прекине блокадата на иранските пристаништа и да отвори нови нуклеарни разговори.По неговата изјава, цената на нафтата повторно порасна. Суровата нафта „брент“ скокна за околу 3,5 проценти и надмина 104 долари за барел, додека американскиот долар зајакна во однос на водечките светски валути.Конфликтот меѓу САД, Израел и Иран започна на 28 февруари со американско-израелски напади врз ирански цели, по што следуваа ирански одговори против Израел и американски сојузници во Персискиот Залив, како и затворање на Ормускиот Теснец.Иако на 8 април беше постигнато привремено примирје со посредство на Пакистан, разговорите не донесоа траен договор, а последната размена на предлози повторно ги зголеми стравувањата од нова ескалација на кризата.

Свет | пред 1 ден

Нетанјаху: Војната со Иран не е завршена

Израелскиот премиер Бенјамин Нетанјаху изјави дека војната со Иран сè уште не е завршена, бидејќи Техеран и понатаму поседува збогатен ураниум и други воени капацитети што, според него, треба да бидат неутрализирани.„Мислам дека војната постигна многу, но не е готова, бидејќи Иран сè уште има нуклеарен материјал, збогатен ураниум што мора да биде изнесен од Иран“, изјави Нетанјаху во интервју за емисијата „60 минути“ на американската телевизија Си-Би-Ес.Тој додаде дека Иран и понатаму располага со постројки за збогатување ураниум, балистички ракети и регионални сојузници што Израел сака да ги ослабне.„Многу работи ослабевме, но сето тоа сè уште постои и има уште работа“, порача Нетанјаху.Израелскиот премиер не прецизираше дали мисли само на резервите високо збогатен ураниум или на сите ирански залихи.На прашањето како тој материјал треба да биде отстранет, Нетанјаху кусо одговори: „Влегувате внатре и го земате.“Тој навести дека ураниумот може да биде физички отстранет и со договор со Техеран и без него, додавајќи дека американскиот претседател Доналд Трамп ја поддржува таквата можност.Сепак, Нетанјаху избегна директно да одговори дали Израел би употребил сила ако нема договор со Иран.„Нема да зборувам за нашите воени можности. Нема да дадам временска рамка, но ќе кажам дека ова е исклучително важна мисија“, рече израелскиот премиер.

Свет | пред 1 ден

Иран ѝ се закани на Британија и Франција поради Ормускиот Теснец

Иранскиот заменик-министер за надворешни работи упати закана поради можноста Велика Британија и Франција да распоредат воени бродови во Ормускиот Теснец.„Секое распоредување и стационирање разурнувачи околу Ормускиот Теснец, под изговор на ‘заштита на поморскиот сообраќај’, не е ништо друго освен ескалација на кризата“, напиша тој на социјалните мрежи.Тој додаде дека присуството на британски и француски воени бродови, кои би можеле да учествуваат во, како што наведе, „нелегални и меѓународно незаконски акции на САД“, ќе наиде на „моментален и одлучен одговор“.Британското Министерство за одбрана вчера соопшти дека на Блискиот Исток го испраќа разурнувачот „ХМС Драгон“ како подготовка за можна мултинационална мисија за заштита на поморскиот сообраќај во Ормускиот Теснец.Велика Британија и Франција во последните денови учествуваат во разговори за повторно воспоставување безбеден премин за трговските бродови низ овој клучен поморски коридор.Според информациите, планот би барал координација со Иран, а подготвеност за учество во мисијата досега изразиле околу десет држави.

Свет | пред 1 ден

Обединетите Арапски Емирати пресретнаа два дрона што пристигнале од Иран

Противвоздушната одбрана на Обединетите Арапски Емирати денес пресретна два дрона што пристигнале од Иран, соопшти тамошното Министерство за одбрана.Ова е најнов во серијата инциденти насочени кон оваа богата заливска држава, која во последните денови повторно се соочува со напади по четиринеделниот период на релативен мир.Тензиите се обновија откако Соединетите Американски Држави претходно објавија примирје во конфликтот со Иран. Властите во Обединетите Арапски Емирати тврдат дека во изминатите денови земјата била цел на повеќе напади од Иран.Од друга страна, Техеран негира дека спроведува операции против Емиратите, но предупреди дека ќе следува „разорен одговор“ доколку Обединетите Арапски Емирати преземат какви било акции против Иран.Поради безбедносната состојба, властите во Обединетите Арапски Емирати привремено ја префрлија наставата во училиштата на далечина, но најавија дека учениците од утре повторно ќе се вратат во училниците.

Свет | пред 1 ден

Иран испрати одговор на американскиот предлог за крај на војната

Иран денеска преку пакистански посредници испратил одговор на најновиот американски предлог за завршување на војната, објави иранската државна новинска агенција ИРНА.„Одговорот на Исламската Република Иран на најновиот американски предлог за завршување на војната денеска е испратен преку пакистански посредник“, соопшти агенцијата.Во извештајот се наведува дека во оваа фаза разговорите ќе бидат фокусирани на завршувањето на конфликтот во регионот, без дополнителни детали за содржината на иранскиот одговор.Тензиите на Блискиот Исток нагло ескалираа откако САД и Израел на 28 февруари започнаа напади врз Иран, по што Техеран возврати со акции против Израел и американските сојузници во Персискиот Залив, како и со затворање на Ормутскиот Теснец.Примирјето стапи во сила на 8 април со посредство на Пакистан, но разговорите во Исламабад не доведоа до траен договор.Подоцна американскиот претседател Доналд Трамп го продолжи примирјето без временско ограничување, со цел да се отвори простор за дипломатија и трајно решение на конфликтот.

Свет | пред 1 ден

Ирански медиуми: Врховниот лидер издал нови директиви за продолжување на операциите

Иранската државна телевизија објави дека началникот на командата на вооружените сили, Али Абдолахи, се сретнал со врховниот лидер Мојтаба Хамнеи, кој не се појавил во јавноста откако бил именуван на функцијата во март.Според државните медиуми, Хамнеи издал „нови директиви и насоки за продолжување на операциите насочени кон спротивставување на непријателот“, но не е прецизирано кога точно се одржал состанокот.Агенцијата Франс прес потсетува дека Мојтаба Хамнеи, кој наводно бил ранет во воздушните напади на почетокот на војната на Блискиот Исток, досега се огласувал само преку писмени соопштенија. Во нападите загинал неговиот татко и претходен врховен лидер, Али Хамнеи.Во меѓувреме, портпаролот на иранската војска, Мохамад Акрамнија, изјави дека бродовите од земји што ги почитуваат американските санкции против Иран ќе се соочуваат со потешкотии при преминување низ Ормускиот Теснец.Ирански пратеници истовремено работат на закон со кој формално би се регулирала иранската контрола врз Ормускиот Теснец, вклучително и можност за забрана на пловидба за бродови од „непријателски држави“.

Свет | пред 1 ден

Катарски танкер со гас помина низ Ормус: прв извоз од регионот од почетокот на војната

Танкер со течен природен гас од Катар изгледа дека поминал низ Ормускиот теснец, што е прв извоз на една земја од регионот на Персискиот Залив од почетокот на војната во Иран, пренесува денес Блумберг.Танкерот „Ал Хараитијат“, кој бил натоварен во постројката Рас Лафан претходно овој месец, излегол од теснецот и моментално се наоѓа во Оманскиот Залив, а Пакистан е наведен како негова следна дестинација, според податоци од агенцијата за следење на бродови.Преминот на овој брод е најава дека би можело да продолжи поголем проток на течен природен гас, но тоа е далеку од нивоата пред војната од околу три пратки дневно од Персискиот Залив.Сепак, трговските бродови и понатаму се соочуваат со безбедносни закани, бидејќи и Иран и САД вовеле блокади.Овој потег следи откако Катар неколку пати претходно се обидел да испрати пратки низ Ормускиот теснец, но танкерите на крај се враќале назад.Танкерот е управуван од катарската компанија „Накилат шипинг Катар“, плови под знаме на Маршалските Острови и има капацитет од 211.986 кубни метри.Иранската Револуционерна гарда на 6 април запрела два катарски танкери за течен природен гас, „Ал Дајен“ и „Рашида“, кои се движеле кон Ормускиот теснец и им наредила да останат на местото, без да наведе причина.Катар е втор најголем извозник на течен природен гас во светот, а пратките најчесто одат кон купувачи во Азија.

Свет | пред 2 дена

Револуционерната гарда му се закани на САД

Иранската Револуционерна гарда се закани со напади врз американски локации на Блискиот Исток доколку нејзините танкери бидат загрозени, објавија иранските државни медиуми. Предупредувањето доаѓа во момент кога Вашингтон го чека одговорот на Техеран на најновиот предлог за мировен договор, пишува The Guardian.„Секој напад врз ирански танкери и трговски бродови ќе резултира со силен удар врз американските центри во регионот и непријателските пловила“, порачаа гардиските сили ден откако американските сили, според наводите, нападнале два ирански танкери во Оманскиот Залив.Американскиот претседател Доналд Трамп во петокот изјави дека очекува ирански одговор на најновиот предлог на Вашингтон за мировен договор. Сепак, немаше јавна потврда дека Техеран испратил одговор преку пакистански посредници, а иранскиот министер за надворешни работи Абас Арагчи изрази сомнеж во доверливоста на американското раководство.„Неодамнешната ескалација на тензиите поттикната од американските сили во Персискиот Залив и нивните бројни прекршувања на примирјето фрлаат сомнеж врз мотивите и сериозноста на американската страна кога станува збор за дипломатијата“, изјави Арагчи во разговор со својот турски колега, пренесува иранската новинска агенција ISNA.Во петокот американски борбен авион пукал и онеспособил два танкери под иранско знаме, кои Вашингтон ги обвини дека ѝ пркосат на американската блокада на иранските пристаништа. Ирански воен функционер изјавил за локалните медиуми дека морнарицата возвратила на нападите. Инцидентот следел по ескалацијата претходната ноќ во Ормутскиот Теснец. Соединетите Американски Држави порачуваат дека контролата на Техеран врз клучната нафтена рута е неприфатлива.Вашингтон преку пакистански посредници му испратил на Иран предлог за продолжување на примирјето во Заливот за да се овозможат разговори за конечно решение на конфликтот кој започна пред 10 недели со американско-израелски напади врз Иран.

Свет | пред 2 дена

Wall Street Journal: Израел изградил тајна база во Ирак за поддршка на воздушната кампања против Иран

Израел изградил тајна воена база во ирачката пустина со цел да ја поддржи својата воздушна кампања против Иран, се наведува во извештајот на Wall Street Journal кој се повикува на американски официјални лица и извори.Како што пренесува Wall Street Journal, израелската база била изградена пред почетокот на американско-израелската војна против Иран кон крајот на февруари за да служи како логистички центар за поддршка на израелското воздухопловство.Во извештајот се додава дека базата во Ирак служела и за сместување на трупи на специјалните сили и тимови за потрага и спасување.Со цел израелските сили да ја заштитат својата позиција, биле покренати воздушни напади врз ирачките сили кои речиси ја откриле на почетокот на март, се додава во извештајот.Во нападот загинал еден ирачки војник, соопштиле ирачките власти, откако локалните медиуми пренеле дека овчар бил сведок на „невообичаена“ воена активност, пишува Times of Israel.„Оваа непромислена операција е изведена без координација или одобрение“, изјавиле ирачките власти кои првично ги обвинувале Соединетите Американски Држави за нападот.Според извештајот на „Wall Street Journal“, израелските сили успеале да ги одвратат ирачките сили од понатамошна истрага.„Изгледа дека пред нападот на теренот имало одредена сила, поддржана од воздух, која дејствувала надвор од можностите на нашите единици“, рекол тогаш висок ирачки воен официјален претставник.Извештајот исто така укажува на изјавите на командантот на израелското воздухопловство Томер Бар кога соопштил дека специјалните сили спроведувале „вонредни“ операции за време на судирот со Иран.„Трупите на специјалните единици на воздухопловството моментално спроведуваат вонредни мисии кои можат да ја разбудат имагинацијата“, рекол Бар без понатамошно објаснување.Израелската војска одбила да го коментира извештајот, пренесува „Times of Israel“.

Свет | пред 2 дена

Лавров предупредува: Нов конфликт во Персискиот Залив би бил катастрофален

Обновувањето на борбените дејства, кое би ги загрозило перспективите за стабилизација во Персискиот Залив, е неприфатливо од гледна точка на Русија, изјави денеска Лавров.Тој во телефонски разговор со министерот за надворешни работи на Обединети Арапски Емирати, Абдала бин Зајед Ал Нахјан, нагласил дека Москва смета дека е неопходно да се фокусира поддршката на преговарачките напори меѓу Иран и Соединети Американски Држави, соопшти руското Министерство за надворешни работи.Во разговорот била потврдена позицијата на Русија дека не смее да се дозволи загрозување на процесот на стабилизација преку обновување на воените дејства, пренесува РИА Новости.Американскиот претседател Доналд Трамп изјави дека примирјето меѓу САД и Иран останува на сила, откако двете страни во текот на ноќта размениле оган во Ормускиот Теснец.

Свет | пред 3 дена

Иран реагира на американскиот напад: „Тоа е разбојничко однесување“

Иранското Министерство за надворешни работи упати остро предупредување до САД, обвинувајќи ги за „авантуризам и разбојничко однесување“, по инцидент во кој, според Техеран, американски воен авион испукал врз два нафтени танкери кои пловеле кон Иран.Портпаролот на министерството, Есмаил Багаеи, преку објава на социјалната мрежа X упати жестоки критики кон Вашингтон, нарекувајќи ги американските потези резултат на „погрешни проценки и незаконска неодговорност“. Тој порача дека последиците од ваквите акции се веќе видливи на глобално ниво.Според иранските власти, американските постапки претставуваат одговор на наводната блокада на Ормускиот теснец, додека САД тврдат дека нивните мерки се реакција на иранските активности во регионот.Во меѓувреме, ситуацијата дополнително се усложнува со информациски и дипломатски конфликти, при што двете страни преку социјалните мрежи разменуваат обвинувања, што го отежнува јасното утврдување на состојбата на теренот.

Свет | пред 3 дена

Ескалација меѓу САД и Иран: нови обвинувања и напади во Ормускиот Теснец

Иранскиот министер за надворешни работи, Абас Аракчи, ги обвини САД дека се впуштаат во „безобѕирна воена авантура“ секогаш кога се појавува можност за дипломатско решение, во време на зголемени тензии во регионот на Ормускиот Теснец.Во објава на социјалната мрежа X, Аракчи порача дека Иран „никогаш нема да се покори на притисок“, додека од Вашингтон пристигнуваат пораки дека примирјето сè уште е во сила и дека дипломатските напори продолжуваат.Американскиот државен секретар, Марко Рубио, изјави дека Иран треба да одговори на американските предлози, изразувајќи надеж дека понудата е сериозна. Во меѓувреме, претседателот Доналд Трамп преку социјалните мрежи порача дека секој нов напад ќе биде возвратен со уште посилен одговор, ако Иран не постигне договор.Ситуацијата дополнително се усложнува со нови инциденти во Персискиот Залив, каде што американската Централна команда соопшти дека биле онеспособени два празни ирански танкери кои, според нив, ја прекршиле блокадата.Од иранска страна, пак, се тврди дека САД извршиле напади врз танкери и крајбрежни области, додека Вашингтон ги обвинува иранските сили за ракетни и дронски напади врз американски бродови.Ормускиот Теснец, низ кој поминува околу 20 проценти од светската нафта и гас, останува клучна точка на глобалните енергетски и безбедносни тензии, при што секое нарушување на сообраќајот предизвикува нагли движења на цените на светските пазари.

Свет | пред 3 дена

САД блокираат над 70 танкери поврзани со Иран

Американските воени сили спречуваат повеќе од 70 танкери да влезат во ирански пристаништа или да излезат од нив, соопшти американската Централна команда (CENTCOM).Според податоците на американската војска, станува збор за трговски бродови со капацитет за транспорт на повеќе од 166 милиони барели нафта, чија вкупна вредност се проценува на над 13 милијарди американски долари.Американскиот претседател Доналд Трамп на оваа мерка ѝ придава големо значење, опишувајќи ја како „челичен ѕид“. Тој смета дека силниот притисок врз иранскиот извоз на нафта може да го принуди Техеран на преговори, поради сериозното влијание врз иранската економија.

Свет | пред 3 дена