ЛЕВИЦА

(Видео) Левица: Митески плаќа 36 милиони денари за одржување - урбана опрема во распад

Левица – Аеродром преку објава на социјалните мрежи обвини дека Општина Аеродром троши милиони денари за одржување на урбаната опрема, додека состојбата на терен, според нив, останува лоша.Советничката Слободанка Ќириќ посочи дека од општинскиот буџет биле издвоени 36 милиони денари за приватна фирма задолжена за одржување, но дека граѓаните секојдневно се соочуваат со искршени канти, оштетени клупи и небезбедни детски игралишта.Од Левица тврдат дека официјалните информации и фотографии објавени на интернет-страницата на Општината прикажуваат сосема поинаква слика од реалната состојба на терен.Во реакцијата се наведува дека градоначалникот Дејан Митески преку, како што велат, „лажна стварност“ се обидува да ја прикрие неспособноста во управувањето со Општината.„Водењето општина не е исто што и лепење плакати. Функцијата градоначалник бара капацитет и вистинска работа, а не ПР и празни ветувања“, стои во објавата на Левица – Аеродром.

Македонија | пред 4 седмици

Левица: Поради “твојот човек” Аеродром со преполни контејнери и испразнет буџет

Левица – Аеродром преку соопштение обвини дека новиот правилник на Државна изборна комисија неправедно го оптоварува буџетот на Општина Аеродром, додека граѓаните се соочуваат со лоша јавна хигиена и комунален хаос.Од партијата тврдат дека со новиот правилник, донесен со поддршка од мнозинството на ВМРО-ДПМНЕ, скопските општини ќе треба самостојно да ги покријат трошоците за дневници на изборните комисии за локалните избори, наместо тие да се делат со Град Скопје.Според Левица, ова ќе значи дополнителен товар од над 16 милиони денари, односно околу 260.000 евра за Општина Аеродром.Од партијата прашуваат зошто општина која, како што велат, се соочува со преполни контејнери, неисчистени јавни површини и запуштена урбана опрема, треба сама да ги покрива овие трошоци.Во соопштението се споменува и Орце Ѓорѓиевски, за кого тврдат дека е фаворизиран во распределбата на обврските поврзани со изборниот процес.„Додека Аеродром презема трошоци што треба да бидат поделени со Град Скопје, граѓаните се соочуваат со запуштена јавна хигиена, неискосена трева и искршена урбана опрема“, наведуваат од Левица – Аеродром.Од партијата оценуваат дека станува збор за партизација на институциите и неправедна распределба на јавните средства, поради што бараат итно преиспитување на правилникот и пофер распределба на трошоците за локалните избори.

Македонија | пред 4 седмици

Контролори ги казнуваат граѓаните за дефектите на ЈСП - Пораката за платен билет стигнува по половина час , велат од Левица

Контролори на ЈСП казнуваат граѓани поради доцнење на СМС-пораките за платен билет, обвини денеска политичката партија Левица преку соопштение, тврдејќи дека патниците уредно плаќале превоз преку телефон, но потврдата за успешно плаќање пристигнувала дури по 20 до 30 минути.Од партијата велат дека во меѓувреме контролорите им изрекувале казни на патниците, иако, според нив, станува збор за очигледен технички проблем во системот на ЈСП.„Во град каде автобусот доаѓа како природна непогода – непредвидливо и ретко, сега граѓаните се казнувани и за дефектите на самиот систем на ЈСП“, наведуваат од Левица.Во соопштението се оценува дека јавниот превоз во Скопје е во лоша состојба, а контролорите, наместо да покажат разбирање, „настапуваат како улични извршители“ и пишуваат казни на патници кои веќе извршиле уплата.Партијата упати критики и кон градоначалникот на Скопје, Орце Ѓорѓиевски, и кон раководството на ЈСП, обвинувајќи ги дека не ги исполниле ветувањата за подобрување на јавниот превоз.„Денес ЈСП не може навреме да испрати ниту обична порака за платен билет, но затоа експресно испраќа контролори да се закануваат и изживуваат врз патниците“, се наведува во реакцијата.Од Левица апелираат до раководството на ЈСП и до градските власти да им укажат на контролорите да не ги третираат граѓаните како измамници, туку да се насочат кон решавање на системските проблеми во јавниот превоз.

Македонија | пред 4 седмици

Левица бара разрешување на директорката Насковска: Се штитат поединци наместо децата

Скандалот со бруталното врсничко насилство во Ѓорче Петров ја вознемири јавноста до темел. Но, снимките и фотографиите кои ги видовме се уште погрозни од било каква претстава, а бидејќи градоначалникот Александар Стојкоски тврди дека ги видел - фрапантен е молкот на Општината после такви сцени, велат од Левица.„Случајот не започнал и не може да започне во реонскиот парк во Ѓорче Петров (впрочем, парк кој е практично во дворот на полициската станица и каде што треба да има чувар), туку таму ја достигнал својата најтешка форма. Во конкретното училиште изминативе години, под раководство на Насковска, постојани се натрупуваат проблеми. Советниците од Левица во континуитет укажуваа на алармантни состојби, многу мал дел познати и голем дел незнајни за јавноста. Наместо сериозна интервенција, следеа флоскули, формални одговори и повторливи изговори дека „се работи на случајот“. Во пракса ништо не се промени, а одговорноста никако не пристигнуваше.Па така, се создаде и впечатокот дека приоритет не е решавање на проблемите, туку хистерична заштита на раководниот кадар, односно Насковска. Токму затоа, денес имаме институционален молк кој е спротивен на сериозноста на случајот.Особено забележителен е двојниот пристап на Општината. Во друг случај, за друго училиште, градоначалникот Стојкоски без задршка јавно на медиумите им го посочи училиштето, генерацијата, паралелката, беа сите ставени на тапет и следеа итни разрешувања без спроведена постапка. Денес владее потполна тишина и тенденција  монстуозниот случај да се заборави што побрзо.Се штитат поединци наместо да се заштитат децата!Во вакви околности, прашањето за одговорност не може повеќе да се одложува.Левица бара итна оставка од директорката Гордана Насковска. Доколку истата не ја поднесе, бараме нејзино итно разрешување.Ова не е политичко барање, туку институционален минимум. Кога во една установа се повторуваат сериозни пропусти, кога нема превенција и нема реакција, тогаш раководството мора да сноси последици.Паралелно, ја информираме јавноста дека советничката група на Левица иницира вонредна седница во форма на надзорна расправа, на која ќе бидат повикани сите релевантни чинители - директори, стручни служби и претставници од полициската станица и слично. Целта е без фасада, да се утврди каде системот потфрла и кои конкретни мерки ќе ги преземеме за растечкиот број на скандалозни случувања во општината“, се вели во соопштението.

Скопје | пред 1 месец

(Видео) Левица: 1000 пати по 72 часа поминаа, а Аеродром се дави во ѓубре , од "напорно работиме" на Митевски во депонија се претворивме

Левица – Аеродром со објава на социјалните мрежи упати критика дека состојбата со комуналната хигиена во општината е сериозно влошена, наведувајќи дека и покрај повеќекратните најави за интервенции, проблемот со собирањето на отпадот сè уште не е решен.Во нивната реакција се посочува дека Аеродром се соочува со континуирано натрупување на ѓубре, при што, како што велат од партијата, не се гледаат резултати од претходните ветувања за нормализирање на состојбата. Тие додаваат дека наместо подобрување, теренот укажува на влошување на хигиената во урбаните делови на општината.Од Левица – Аеродром оценуваат дека изјавите за тековно работење не се потврдени со состојбата на терен, наведувајќи дека граѓаните се соочуваат со долготрајни проблеми со отпадот и недоволна реакција на надлежните служби.

Настани | пред 1 месец

Претседателот на помладокот на Левица пуштен од станица и доби казна од 550 евра за истакнување на палестинско знаме, Левица обвинува за двојни стандарди

Левица со објава на социјалните мрежи ја извести јавноста дека претседателот на помладокот на партијата – Црвена младина, Андреј Куцуловски, е пуштен од полициска станица со изречена глоба од 550 евра за поттикнување насилство и омраза, поради внесување на палестинско знаме.Од партијата во објавата наведуваат дека за овој „прекршок“ била ангажирана поголема група полициски службеници, кои привеле млад човек кој, како што тврдат, не пружил никаков отпор и не предизвикал инцидент. Според Левица, тој бил спроведен со лисици и без претходно јасно образложение за основот на приведувањето.Тие додаваат дека, истовремено, полицијата под раководство на министерот Панче Тошковски не постапува со иста ефикасност во случаи на сериозни кривични дела, вклучително и насилство и семејно насилство.„Државата казнува солидарност, а премолчува насилство“, стои во реакцијата.Левица во објавата оценува дека станува збор за селективен пристап и политички мотивирано постапување на институциите, при што, според нив, државата се става во функција на дневнополитички и надворешни агенди.Во објавата се наведува и дека Македонија историски стоела на страната на угнетените и правдата, додека денес, како што велат, се оддалечува од тие вредности.Од партијата порачуваат дека ваквите случаи претставуваат предупредување за состојбата во општеството и односот кон граѓаните со различни ставови, стои во објавата.

Македонија | пред 1 месец

(Видео) Приведен активист на Левица на натпреварот Македонија–Израел по истакнување палестинско знаме

За време на ракометниот натпревар меѓу кадетските репрезентации на Македонија и Израел во спортската сала „Јане Сандански“, беше приведен Андреј Куцуловски, претседател на подмладокот на Левица „Црвена младина“.Од партијата информираат дека приведувањето се случило откако Куцуловски истакнал палестинско знаме на трибините.Според нивните наводи, тој бил оттурнат и однесен со лисици во полициска станица, без да му биде образложена основата за лишување од слобода, ниту да биде наведено конкретно кривично дело или прекршок. Тврдат и дека полициските службеници не се легитимирале при интервенцијата.Од Левица го осудија настанот, оценувајќи го како непропорционална употреба на сила и најавија дека ќе ги искористат сите правни и институционални механизми за расчистување на случајот.Инаку, натпреварот заврши со победа на македонската репрезентација, која во финалето на Светското училишно првенство ја совлада селекцијата на Израел со 38-32 и го освои златниот медал.

Настани | пред 1 месец

Левица: Со изборот на Ристоски МРТ станува банкомат на ДПМНЕ - Левица предупреди за партиска местенка

Од Левица во соопштение остро реагираат на изборот на Зоран Ристоски за директор на Македонска радио-телевизија, оценувајќи дека станува збор за, како што велат, однапред договорен процес под политичко влијание.Според партијата, одлуката на Програмскиот совет била донесена и покрај предупредувањата и реакциите во јавноста, при што постапката ја оценуваат како нетранспарентна и режирана. Тврдат дека изборот бил познат уште пред да започне процедурата и дека одлуките се носеле во тесен круг блиску до премиерот Христијан Мицкоски, стои во соопштението.Од Левица во своето соопштение наведуваат дека Ристоски, според нив, не поседува доволно професионално искуство во медиумскиот сектор и дека неговиот избор отвора сомнежи за критериумите врз кои е донесена одлуката.Во соопштението се изнесуваат и наводи за негова поврзаност со маркетинг агенции и компании кои, според партијата, добивале средства од јавни институции, што според нив отвора прашања за можен судир на интереси.Дополнително во соопштението, од Левица посочуваат дека ваквиот избор е спротивен на принципите за независност на јавниот сервис и предупредуваат дека МРТ, наместо да се реформира, ризикува дополнително институционално слабеење.Партијата бара од Програмскиот совет да ги објави биографиите и програмите на сите кандидати за директор, со цел, како што велат, да се обезбеди транспарентност и отчетност во процесот, стои во соопштението.

Македонија | пред 1 месец

Левица: Македонските каратисти со сопствени средства патуваат на Европско првенство - Ристовски е задолжен за свечени приеми

Од Левица реагираат дека македонските каратисти кои ќе настапат на Европското првенство за сениори во Франкфурт, Германија, од 20 до 24 мај, патуваат со сопствени средства, бидејќи, како што наведуваат, не се обезбедени средства од надлежните институции, стои во партиското соопштение.Во соопштението од Левица се наведува дека Карате федерацијата на Македонија, слично како и за претходното јуниорско и кадетско Европско првенство во Кипар, не добила финансиска поддршка од Министерството за спорт, поради што спортистите се принудени сами да ги покриваат трошоците за пат и сместување.Од Левица оценуваат дека ваквиот однос претставува игнорирање и недоволна поддршка за индивидуалните спортови, при што спортистите, како што велат, и покрај постигнатите резултати, не добиваат соодветна државна помош, стои во соопштението.Во соопштението се поставува прашање дали, доколку каратистите се вратат со медали, ќе им биде организиран свечен прием, како што тоа било случај со претходни репрезентативци, при што Левица обвинува за неконзистентен однос кон спортските успеси.Од Левица заклучуваат дека држава која, според нив, не инвестира во своите спортисти, не може да очекува долгорочни резултати и спортски успеси, стои во соопштението.

Македонија | пред 1 месец

Левица: Ја даваме рудата го губиме ќарот - државата во зијан од концесионерите

Од Левица оценуваат дека актуелниот модел на концесии за експлоатација на мермер претставува систем кој работи на штета на државата и граѓаните, наведувајќи дека од 29 концесионери за четири години се наплатени само 1,7 милиони евра, стои во партиското соопштение на Левица.Во соопштението од Левица се наведува дека ваквите податоци укажуваат на минимални приходи за државата во споредба со реалната вредност на природните ресурси што се експлоатираат, како и на, според нив, институционални слабости во контролата, доцнење со плаќања и недоволен надзор врз концесиите.Од Левица посочуваат дека постојниот закон за рударство не обезбедува соодветни надоместоци и не ја одразува реалната вредност на ресурсите, при што, како што велат, се создава состојба во која профитот завршува кај приватни концесионери, а еколошките и финансиските последици ги сноси државата.Во соопштението се додава дека средствата за рекултивација на земјиштето по ископ се недоволни, што, според Левица, претставува ризик за долгорочна еколошка штета.Од Левица сметаат дека е потребна промена на законската рамка, зголемување на концесиските надоместоци и воведување построги механизми за контрола и обврзна рекултивација на експлоатираните површини.Во нивното соопштение се наведува и став дека државата треба да го зајакне јавниот сектор преку формирање државни претпријатија за управување со природните ресурси, со цел, како што велат, поголема контрола и задржување на додадената вредност во државата.Левица оценува дека наместо извоз на суровини, потребно е развивање на домашна индустриска преработка и поголема индустријализација, со цел создавање повисока економска вредност и нови работни места.

Македонија | пред 1 месец

Исмаил: Проклетство на ресурсите!

Пратеникот од Левица, Исмаил, во соопштение остро ги критикува предложените измени на законите за минерални суровини и за концесии и јавно-приватно партнерство.Во соопштението се наведува дека, според Левица, со измените се отвора простор за забрзана експлоатација на природните ресурси од страна на странски компании, без доволна контрола врз заштитата на животната средина и јавниот интерес.Левица во соопштението тврди дека постои ризик од, како што наведуваат, „легализирање на модели во кои профитот оди кај приватни интереси, а државата има ограничена корист“.Во соопштението се посочува дека државата од концесии годишно добива 10–15 милиони евра, додека, според нив, профитите на компаниите се значително повисоки.Се наведува и дека предложените измени се поврзуваат со повеќе рударски проекти и инфраструктурни активности, кои Левица ги оценува како потенцијално штетни за локалните заедници и животната средина, стои во соопштението.Во соопштението се споменува и дека пратеничката група поднела голем број амандмани со цел да ја одложи постапката за донесување на законите.Левица повикува на поддршка од граѓаните и локалните организации, со порака дека, како што наведуваат, ќе продолжат со обидите за спречување на усвојувањето на предложените измени, стои во соопштението.

Македонија | пред 1 месец

Левица со филибастер против измените на ДПМНЕ за скандалозни концесии и легализација на упад во приватен имот

На денешната прес-конференција, координаторот на пратеничката група на Левица, Борислав Крмов, најави дека партијата ќе пристапи кон филибастер во Комисијата за економија со цел да ја одложи постапката и да ја информира јавноста за, како што оцени, штетните предлог-закони за концесии, јавно-приватно партнерство и минерални суровини.Според соопштението, Крмов истакнал дека со предложените измени се отвора можност приватни компании да иницираат јавно-приватни партнерства и потоа да учествуваат во постапките за нивна реализација, што, како што навел, може да создаде простор за однапред договорени зделки.Тој посочил и дека измените во Законот за минерални суровини би овозможиле концесионери да добиваат дозволи за експлоатација и во случаи кога имотно-правните односи не се целосно решени, преку започнување постапки за експропријација, стои во соопштението.Во соопштението се наведува дека Крмов оценил оти ваквите решенија можат да се однесуваат и на веќе започнати постапки, при што посочил дека Левица ќе ги користи сите правни механизми, вклучително и обраќање до Уставниот суд, за нивно оспорување.

Македонија | пред 1 месец

Апасиев: Државата им простува на богатите, а го товари работникот

Државата им простува илјадници евра на најбогатите, додека работниците со минимални примања се оданочуваат во целост – оцени пратеникот и лидер на Левица, Димитар Апасиев, образложувајќи ги предложените измени на Законот за придонеси од задолжително социјално осигурување, кои денес се на дневен ред во Собранието.Апасиев посочува дека во постојниот закон постои ограничување на т.н. максимална основица за плаќање придонеси, која изнесува 16 просечни плати, односно околу 16.500 евра. Според него, сè што се исплаќа како плата над оваа сума не се оптоварува со придонеси, што, како што вели, директно ги привилегира највисоките приходи.„Сè што е над оваа граница останува неоданочено. Тоа значи дека законот им дава предност на најбогатите“, наведува Апасиев.Тој го илустрира проблемот со пример, посочувајќи дека највисоката месечна плата во земјава лани достигнала околу 325.000 евра.„На оваа сума, државата пресметува придонеси само до 16.500 евра, додека останатите повеќе од 300.000 евра не се опфатени“, наведува Апасиев.Во исто време, додава тој, работниците со ниски примања немаат вакви ограничувања и нивните приходи се оданочуваат во целост.Според лидерот на Левица, ваквата законска поставеност придонесува за продлабочување на економските разлики. „Затоа богатите стануваат побогати, а сиромашните сè посиромашни“, оценува тој.Апасиев најави дека исходот од предложените измени ќе биде познат по гласањето во Собранието, каде ќе се одлучи дали ќе се стави крај на, како што ја нарекува, нефер практиката во системот на придонеси.

Коментари | пред 1 месец

Левица: Македонија забрзано изумира - власта не е заинтересирана за младите и наталитетот

Политичката партија Левица предупредува на сериозни демографски предизвици, посочувајќи дека, според проекциите на Државниот завод за статистика, до 2070 година значително ќе се намали бројот на млади во земјава, како што се наведува во соопштението.Според истите наводи, бројот на пензионери ќе го надмине работоспособното население, а најбројна ќе биде популацијата над 70 години, што, според Левица, укажува на сериозен дисбаланс во старосната структура, се вели во соопштението.Од партијата оценуваат дека ваквите трендови се алармантни и дека укажуваат на забрзано намалување на населението, при што додаваат дека државата не нуди доволно мерки за поддршка на семејствата, како што стои во соопштението.Левица во соопштението посочува дека, за разлика од европските земји кои обезбедуваат финансиски и системски поттик за наталитетот, во Македонија, според нив, мерките се ограничени и без значителен ефект.Како дополнителен проблем во соопштението се наведуваат ниските плати, несигурните работни места и високите трошоци за живот, што, според партијата, придонесува за иселување на младите.Од Левица заклучуваат дека без сериозни демографски и младински политики, државата ризикува во иднина да се соочи со уште поголемо стареење на населението, како што е наведено во соопштението.

Македонија | пред 1 месец

Левица: Реставрација или редизајн на Старата скопска чаршија по мерка на Љутков и Меџити

Од Левица реагираат на најновите активности за реконструкција на улици во Старата скопска чаршија, оценувајќи дека наместо вистинска реставрација, се отвораат прашања за зачувувањето на автентичноста на просторот.Од партијата посочуваат дека честите интервенции во кратки временски интервали оставаат дилема дали станува збор за претходно несоодветно изведени зафати или за континуирани ад-хок урбанистички решенија без долгорочна стратегија за заштита на културното наследство.Од Левица дополнуваат дека користењето на современи материјали, како травертин, наместо традиционалната калдрма, претставува промена на историскиот карактер на просторот, при што се губи неговата автентична текстура и занаетчиска вредност.Од партијата потсетуваат и на претходни интервенции во поширокото централно градско подрачје, за кои велат дека покажуваат недостиг на јасна визија и јавна дебата за начинот на уредување на историското јадро на Скопје.На крајот, од Левица оценуваат дека останува отворено прашањето дали станува збор за вистинска заштита на културното наследство или за негова постепена трансформација под превезот на модернизација.

Македонија | пред 1 месец

Мециновиќ: Државата од криза во криза не учи, а граѓаните ја плаќаат цената

Пратеникот од Левица, Амар Мециновиќ, на денешната собраниска седница изрази поддршка за продолжување на кризната состојба поврзана со снабдувањето со нафта, нагласувајќи дека интервенцијата е неопходна за заштита на граѓаните во услови на енергетска и геополитичка неизвесност.Сепак, тој ја критикуваше Владата дека реагира без долгорочна стратегија и дека државата постојано се соочува со исти проблеми без да извлече поуки од претходните кризи. Според него, институциите делуваат дури откако состојбите ќе ескалираат.Мециновиќ посочи дека најголемиот товар од енергетските кризи го носат граѓаните, додека, како што рече, комерцијалните оператори остваруваат профит. Тој укажа и на високите цени на горивата, кои, според него, произлегуваат од структурата на даноци и увозни трошоци.Во своето обраќање, тој се осврна и на претходни одлуки за приватизација на енергетски капацитети, оценувајќи дека тие долгорочно ја намалиле способноста на државата да реагира во кризни ситуации.Мециновиќ посочи и на, како што го нарече, картелско однесување во енергетскиот сектор, истакнувајќи дека кризите се претвораат во можност за профит, додека граѓаните остануваат незаштитени.На крајот, тој порача дека поддршката за мерката е во интерес на граѓаните, но повика Владата да започне со системски реформи и долгорочни политики за управување со идни кризи.

Македонија | пред 1 месец

Левица: ТЦ „Охриц“ тапка во место со „Кончар“, а ДПМНЕ им даде нов милионски тендер за далекувод

Левица обвини дека Владата предводена од Христијан Мицкоски продолжува со доделување, како што велат, милионски тендери на фирми кои не ги исполниле претходните договорни обврски.Од партијата наведуваат дека фирма поврзана со хрватски „Кончар“, која е ангажирана на проектот за трафостаницата во Охрид, добила нов тендер за изградба на далекувод, иако, според нив, постојниот проект со години не е завршен.Левица оценува дека ваквите практики укажуваат на нетранспарентност и недостиг на одговорност во енергетскиот сектор, при што граѓаните, како што велат, ја плаќаат цената преку повисоки сметки за електрична енергија.

Македонија | пред 1 месец

Исмаил: Ако државата има „обезбедено“ пари за лекување, зошто граѓаните молат за донации

Пратеникот од Левица, Реџеп Исмаил, реагираше на честите апели од граѓани за собирање донации за лекување во странство, поставувајќи прашање дали државата навистина обезбедува доволно средства за ваквите случаи.Тој потсети дека при буџетската расправа за 2026 година поднел амандман за формирање посебен фонд за лекување во странство, кој бил одбиен со образложение дека веќе постојат обезбедени средства за таа намена.Исмаил наведува дека реалноста, според него, го демантира тоа тврдење, бидејќи граѓаните и понатаму се принудени сами да собираат донации за лекување. Тој прашува каде се тие средства и зошто, ако постојат, граѓаните сè уште се обраќаат за помош преку хуманитарни акции.

Македонија | пред 1 месец

Левица: Партизација и притисоци во Министерството за земјоделство

Левица обвини дека во Министерството за земјоделство, шумарство и водостопанство се спроведуваат преместувања, откази и партизација преку, како што наведуваат, измена на систематизацијата од страна на министерот Цветан Трипуновски.Од партијата посочуваат дека до нив пристигнале сведоштва од вработени кои тврдат дека десетици лица се прераспределени во подрачни единици надвор од Скопје, дел се отпуштени, а дел, како што наведуваат, биле принудени да дадат отказ поради притисоци и лоша работна атмосфера.Според Левица, со промени во систематизацијата се овозможува деградирање и преместување на стручни кадри, додека се отвора простор за поставување на лица блиски до политички структури. Од партијата предупредуваат дека вработените се загрижени поради недостиг на институционална заштита и бавни постапки пред надлежните органи.Левица бара воспоставување на мерит-систем и крај на, како што велат, партизацијата во администрацијата.

Македонија | пред 1 месец

Левица: „Уставниот суд станува антиработнички инструмент на власта“

Политичките реакции околу Колективниот договор за култура продолжуваат, откако партијата Левица излезе со остра осуда и отворена поддршка за најавениот протест на културните работници.Од Левица тврдат дека постапката пред Уставен суд на Република Северна Македонија е обид за укинување на Колективниот договор, зад кој, според нив, стои власта.„Уставниот суд презеде улога на антиработнички инструмент на власта и има намера да го укине Колективниот договор“, наведуваат од партијата, оценувајќи дека се работи за „нарачана политичка одлука“.Тие посочуваат дека договорот опфаќа над 2.300 вработени во културата и дека е резултат на долгогодишна борба за работнички права, па секој обид за негово укинување го оценуваат како директен удар врз работниците.Левица најави дека ќе го поддржи протестот закажан за 16 април пред Министерството за култура, каде вработените ќе го изразат револтот поради, како што велат, непочитување на колективните договори.Во соопштението се додава дека евентуално укинување на договорот би создало опасен преседан и би отворило можност за укинување на колективните договори и во други сектори.„Намерата за укинување на Колективниот договор е обид за одземање на веќе стекнатите права на работниците“, порачуваат од Левица, повикувајќи на целосно почитување на работничките права и запирање на постапката пред Уставниот суд.

Македонија | пред 1 месец

Левица: При неспособност да го испорача ветеното - Ѓорѓиевски почна да ги обвинува и работниците во ЈСП бидејќи ги барале своите права

Градоначалникот на Град Скопје, Орце Ѓорѓиевски, демонстрира недозволиво ниво на ароганција и неодговорност, сега обвинувајќи ги вработените во ЈСП Скопје дека со своите тужби го ʼблокираатʼ претпријатието. Со тоа, Ѓорѓиевски не само што ги дискредитира работниците кои се принудени по судски пат да ги бараат своите загарантирани права, туку директно ја префрла вината за катастрофалната состојба во ЈСП врз оние што се најмалку одговорни за неа, велат од политичката партија Левица.„Ваквиот пристап претставува опасен обид да се криминализира легитимното барање на работнички права и да се наметне наратив во кој жртвата се претставува како виновник.Наместо јавно извинување за состојбата во која се доведени вработените, градоначалникот избра јавно да ги прозива и да ги изложува на нетрпеливост, создавајќи атмосфера на притисок и стигматизација. Дали според Ѓорѓиевски работниците треба да молчат, трпат и да се откажат од своите права за да не ѝ пречат на неспособноста на раководството? Овој однос јасно ја разоткрива перцепцијата на функционерите од ДПМНЕ - дека работниците не се носители на права, туку пречка што треба да се замолчи кога бара правда.Дополнително, оваа реторика претставува очигледен дефокус од клучниот неуспех - четири години блокирање на Советот од страна на ДПМНЕ, што директно придонесе за тоа Скопје и денес да нема нови автобуси и да функционира со деградиран јавен превоз. Наместо одговори за ветените инвестиции, за нефункционалниот систем и за секојдневниот колапс, јавноста добива обиди за префрлање вина кон опозицијата, а сега и кон самите работници.Особено интересен е фактот што ваквите напади доаѓаат во момент кога се отвораат прашања за скандалозни и штетни договори во ЈСП, вклучително и оној на Игор Јанушев со „Маратон“ и приватни агенции за привремени вработувања, кои генерираат милионски загуби за претпријатието.Наместо транспарентност и одговорност за овие практики, сведочиме на агресивна комуникација и обид за замолчување на секој што укажува на проблемите.Работниците во ЈСП не се непријатели, ниту виновници, тие се луѓе што го одржуваат системот во живот и кои, со право, бараат заштита на своите права. Нападите врз нив не се само политички некоректни, туку и морално недозволиви. Обидите за префрлање вина нема да поминат. Одговорноста за состојбата во ЈСП е кај оние што управуваат, а не кај оние што ја плаќаат цената на тоа управување“, се вели во соопштението.

Скопје | пред 1 месец

Левица: Велигденските цени се доказ дека народот во Македонија веќе не ни преживува

Најавите за ограничување на профитните маржи по Велигден доаѓаат предоцна и претставуваат задоцнета реакција на една веќе продлабочена економска и социјална криза. Реалноста е јасна - народот нема пари. Огромен дел од граѓаните едвај врзуваат крај со крај, платите не ги покриваат основните трошоци, а секое ново поскапување директно удира по нивниот животен стандард, велат од Левица.„Дополнително, алармантен е фактот што повеќе од 30% од населението живее под прагот на сиромаштијата. Ова значи дека речиси секој трет граѓанин се соочува со сериозни потешкотии да обезбеди основни услови за живот. Во исто време, државата бележи рекордно задолжување кај бироата за брзи кредити, што е јасен показател дека граѓаните се принудени да позајмуваат пари со високи камати за да преживеат, за храна, сметки и најосновни потреби.Во вакви услови, улогата на владата треба да биде јасна и одлучна, да делува како регулатор и заштитник на граѓаните. Наместо тоа, сведочиме на пасивност и целосно отсуство на навремена реакција. Пазарот е оставен без контрола, што овозможува неконтролирано зголемување на цените и профитите, додека граѓаните осиромашуваат.Состојбата е до тој степен алармантна што голем дел од граѓаните немаат средства ни за преживување, а камоли да издржат нови ценовни шокови. Дополнително загрижува што вистинската криза сè уште не е ни пристигната, најавената енергетска криза може да предизвика сериозен удар врз економијата, зголемување на трошоците за производство и живот, па дури и да доведе до економски колапс доколку не се преземат навремени и сериозни мерки.Решенијата се познати и одамна предложени: ограничување на профитните маржи за основни производи, воведување контролирани или замрзнати цени за клучни прехранбени производи, намалување или укинување на ДДВ за основна храна, засилени инспекциски контроли со строги санкции за злоупотреби, како и системска поддршка за домашното производство со цел да се намали зависноста од увоз и да се стабилизира пазарот.Денес веќе не станува збор за превенција, туку за последици од лошо управување. Наместо системска заштита на граѓаните, гледаме задоцнети и недоволни мерки. А цената на тоа ја плаќа народот, кој е доведен до раб на економско преживување“, се вели во соопштението.

Македонија | пред 1 месец

Мециновиќ порача дека назначувањето на Ацо Ристов за претседател на РКЕ ќе го оспори пред Енергетската заедница

На денешната собраниска седница, на која беше избран новиот претседател на Регулаторната комисија за енергетика, Ацо Ристов, пратеникот од Левица, Амар Мециновиќ, реагираше на партизацијата на клучното тело кое директно одлучува за цената на струјата, горивата и животниот стандард на граѓаните. Ацо Ристов е поранешен градоначалник на Радовиш од редовите на ВМРО-ДПМНЕ, додека неговата сопруг Данка Ристова е членка на Судскиот совет.Мециновиќ истакна дека со крунисувањето на Мицкоски на позиција на премиер на Република Македонија започна најзагрижувачкиот период за енергетската состојба во Република Македонија, затоа што за прв пат нема премиер кој откако ќе дојде на премиерската функција, ќе стапи во бизнисот за струја, туку е директен претставник на енергетската олигархија која ги уништува животите на граѓаните со децении.„Премиерот и сите кои ќе ги назначи, вклучувајќи го и овој претседател на РКЕ, директно ќе работат за интересот на индустриските поединци и директно против интересот на граѓаните. Со новото назначување на претседателот на РКЕ, не само што нема да се смени ништо, напротив, ќе се продлабочи исцицувањето на средствата од џебовите на граѓаните! Ацо Ристов, кој е поранешен градоначалник од редовите на ДПМНЕ на општина Радовиш, е близок бизнис соработник на премиерот Мицкоски и тој не може да биде независен експерт кој ќе го води РКЕ. По тоа што ние го имаме добиено како информации, веќе има загрижување кај Енергетската заедница со седиште во Виена за назначувањето на Ристов за претседател на Регулаторната комисија. Веднаш ќе ви најавам дека јас како како приватно лице, како граѓанин на Република Македонија, ќе го оспорам ова назначување со формална претставка до Енергетската комисија во Виена. Затоа што Ацо Ристов ги нарушува критериумите на Енергетската заедница во Виена. Тој не е независен кадар, тој е директно политички кадар на ДПМНЕ. Секој пат кога ќе го видите Ристов на телевизија како ја зголемува цената на струјата, погледнете го во него лицето на Мицкоски, затоа што тој е одговорен за тоа." - заврши пратеникот од Левица.

Македонија | пред 1 месец

Одбиен предлогот за ограничување на учеството во странски војни

Предлогот на пратеничката група на Левица за измени и дополнувања на Законот за одбрана не доби поддршка во Собранието, откако пратениците од СДСМ гласаа против, а пратениците од ВМРО-ДПМНЕ не гласаа.Пратеникот и потпретседател на Левица, Реџеп Исмаил, на седницата образложи дека постојното законско решение остава „широк простор“ Владата самостојно да одлучува за учество во воени операции, без директна поврзаност со одбраната на државата.„Собранието треба да ја ограничи Владата, така што армијата ќе се користи само во мисии со меѓународен легитимитет, одобрени од Советот за безбедност на Обединетите нации“, истакна Исмаил.Тој посочи дека членството во НАТО подразбира отстапување на дел од суверенитетот, особено во делот на одбраната, и отвора можност за директно или индиректно вклучување во конфликти.Според него, досегашните интервенции на НАТО – од Југославија, преку Ирак до Либија – покажуваат примери на операции без соодветен мандат или со, како што рече, злоупотребен мандат, што резултирале со нестабилност.Во образложението беше посочено и дека постои ризик од индиректно вклучување во конфликти преку поддршка, како што е испораката на оружје за Украина, што може да има економски, енергетски и безбедносни последици.Со предложените измени, Левица бараше секое учество на армијата во странство да биде строго врзано за меѓународно право и националниот интерес, но предлогот не беше изгласан.

Македонија | пред 1 месец

Интересот за брзи кредити е доказ дека во Македонија не може да се живее од плата, велат од Левица

Растот на интересот за брзи кредити не е показател за економски напредок, туку сериозен аларм дека граѓаните сѐ потешко го преживуваат секојдневието. Кога луѓето се задолжуваат не за инвестиции или подобрување на квалитетот на живот, туку за да купат храна, да платат сметки или едноставно да го „истуркаат“ месецот, тоа значи дека економскиот систем не функционира во корист на мнозинството. Народот веќе практично и официјално не преживува од плата, туку од комбинација на задолжување, позајмици и краткорочни финансиски решенија, велат од Левица.„Ситуацијата дополнително се влошува пред празници, кога наместо олеснување, граѓаните се соочуваат со нереално високи цени на храната и основните производи. Во период кога побарувачката расте, наместо контрола или стабилизација, цените одат нагоре, што директно го урива животниот стандард. За многу семејства, празничната трпеза станува финансиски товар, а не момент на достоинство и радост.Паралелно со тоа, платите не го следат растот на цените, а трошоците за живот, особено за храна, енергија и услуги, растат побрзо од приходите. Ова создава длабок јаз кој граѓаните се принудени да го пополнуваат со кредити. Брзите кредити, со високи камати и кратки рокови, не се решение, тие се замка што дополнително ги вовлекува луѓето во циклус на долгови.Владата мора да интервенира со конкретни мерки. Прво, потребна е контрола и ограничување на цените на основните прехранбени производи во кризни периоди, особено пред празници. Второ, зголемување на минималната плата и нејзино усогласување со реалните трошоци за живот, за граѓаните да можат да преживуваат без задолжување. Трето, воведување построга регулација на брзите кредити – ограничување на каматите и подобра заштита на корисниците од злоупотреби. Четврто, таргетирани субвенции или ваучери за храна и енергија за најпогодените категории. И петто, долгорочно – инвестиции во домашно производство и стабилизирање на пазарот, со цел да се намали зависноста од увоз и ценовни шокови.Во вакви услови, не зборуваме за развој, туку за системско осиромашување. Наместо економија што создава сигурност и стабилност, добиваме економија што ги турка граѓаните да живеат на кредит, без реална перспектива дека нивната работа и плата ќе им овозможат достоинствен живот“, се вели во соопштението од партијата.

Македонија | пред 1 месец