(Видео) Згради во пламен, сирените не стивнуваат – Киев ја преживеа една од најтешките ноќи од почетокот на инвазијата

Силни експлозии ја растресоа украинската престолнина во текот на ноќта, оставајќи зад себе запалени згради, урнатини и уплашени жители кои со часови се криеја во засолништа. Русија изведе масовен ноќен воздушен напад врз Киев во ноќта меѓу 13 и 14 ноември, користејќи стотици дронови и повеќе типови ракети, јавуваат украинските власти.Според најновите податоци, една личност загинала, а најмалку 24 се повредени – меѓу нив и бремена жена. Петмина од повредените се хоспитализирани. Првите детонации одекнале околу 00:45 часот по локално време, а уште два нови бранови удари следеле до околу 1:30 часот, придружени со силни воздушни сирени.Во текот на нападот, шефот на Воената управа на Киев, Тимур Ткаченко, предупреди дека „руските сили удираат директно по станбени објекти“, нагласувајќи дека високи згради биле погодени во речиси сите делови на градот.Според градоначалникот Виталиј Кличко, најмалку 11 повеќекатници се оштетени во ракетирањето. Пожар избувнал и во висок станбен блок во Десњански, зафаќајќи го просторот од петти до осми кат, каде што животот го загуби едно лице.Спасувачките тимови, кои работеле под постојани аларми, успеале да евакуираат повеќе од 40 лица од урнатините и горечките згради, соопшти Државната служба за вонредни ситуации. Извештаи за удари, пожари и евакуации пристигнувале од повеќе општини – Подилски, Дњипровски, Десњански, Соломјански, Свјатошински и Оболонски.Нападот не ги поштеди ниту јавните установи: оштетена е болница, уништени се делови од училиште и дрвени структури во спортски комплекс. Кличко соопшти и дека делови од градската грејна мрежа се тешко погодени, а екипите за итни интервенции продолжуваат со процена на целокупната штета во услови на ниски температури и висок ризик од нови удари.Ноќта зад себе остави слики какви Киев одамна не видел – чад што се издига над градските блокови, скршени прозорци, запалени кровови и граѓани кои се обидуваат да закрепнат од шокот на уште една масовна агресија.Актуелните власти предупредуваат дека воздушната закана останува висока и дека следните денови ќе бидат критични за стабилизација на инфраструктурата.

Свет | пред 1 месец

СДСМ тврди: „Скандалот со ИПАРД води до врвот на власта, вмешан кумот на Мицкоски“

На денешната прес-конференција, портпаролката на СДСМ, Богданка Кузеска, обвини дека аферата со корупција во ИПАРД-фондовите не е изолиран случај, туку дел од системска злоупотреба што, според неа, води директно до врвот на власта и до луѓе блиски до премиерот Христијан Мицкоски.Кузеска посочи дека, според информации добиени од свиркачи во Министерството за земјоделство, поранешниот директор на Агенцијата за финансиска поддршка во земјоделството, Илија Стоилев, бил активен функционер на ВМРО-ДПМНЕ и близок пријател на Игор Миќев, познат како „Панкерот“, за кого тврди дека е во кумовска врска со Мицкоски.„Свиркачите укажуваат дека токму кумот на Мицкоски, преку својата позиција и влијание, вршел притисоци врз службеници за распределба на субвенции и концесии, а неговата сопруга – кумата на премиерот – вработена во Агенцијата, давала одобрение за исплата на средствата од ИПАРД-програмата,“ изјави Кузеска.Таа побара од Обвинителството итно да ја прошири истрагата и да утврди дали, како што вели, дел од провизиите завршувале кај лица поврзани со ВМРО-ДПМНЕ.„Мицкоски треба директно да одговори дали неговите кумашини Игор и Цветанка Миќеви се под истрага, и дали постоела шема за испумпување пари преку Агенцијата за финансиска поддршка. Земјоделците, кои се најголемите жртви на овие злоупотреби, заслужуваат одговори,“ порача Кузеска.Од СДСМ потсетија дека партијата и претходно укажувала на, како што рекоа, рекет, мито и злоупотреби во институциите надлежни за распределба на европските средства, барајќи од надлежните органи да утврдат дали ИПАРД-фондовите биле користени и за партиско финансирање.

Македонија | пред 1 месец

Одбројувањето започна: до крајот на годината мора да се донесе новиот Кривичен законик

Две години по контроверзните измени на Кривичниот законик, со кои беа ослободени од одговорност бројни функционери, државата повторно се соочува со рокови и правна неизвесност. Наместо да ги поправи старите одредби, Министерството за правда најави дека до декември ќе биде усвоен сосема нов Кривичен законик, кој треба да ја замени постојната верзија.Од Министерството велат дека текстот на новиот закон е финализиран, преведен на англиски јазик и се изработуваат техничките табели што треба да ја подготват земјата за усвојување. Како што објаснуваат, станува збор за темелна ревизија на кривичните дела и нивната класификација, со цел да се воведе поголема правна прецизност и ефикасност.„Новото решение треба да овозможи полесно докажување на делата и праведна примена на законот. Особено внимание е посветено на делот за злоупотреба на службена положба и корупција, каде што воведуваме усогласеност со европските стандарди“, наведуваат од Министерството за правда за Фокус.Од таму појаснуваат дека новите правила нема да ги засегнат веќе завршените случаи – односно нема да важат ретроактивно, што значи дека функциoнерите кои се извлекоа со старите измени нема да бидат повторно предмет на кривична одговорност.На потребата за итно делување веќе укажа и претседателот на Уставниот суд, Дарко Костадиновски, кој потсети дека Судот уште во август дал рок од шест месеци за измени, но до денес Собранието не презело конкретни чекори.„Во државата владее неказнивост и неодговорност, а вака донесените измени направија сериозна штета. Ако Парламентот не постапи, ќе мораме да ја отвориме постапката и да одлучиме. Доколку Судот го укине целиот закон, тогаш во сила би се вратило старото решение,“ рече Костадиновски во гостување на Телма.Тој предупреди дека евентуално целосно укинување на законот би можело да создаде правен вакуум и уште поголем простор за злоупотреби, нагласувајќи дека ваквите системски закони не смеат да се носат „преку ноќ“ и без јавна расправа.Според најавите, Министерството за правда планира до крајот на годината законот да биде ставен на владина и потоа на собраниска процедура. Новиот Кривичен законик, доколку навремено биде донесен, треба конечно да воспостави појасна рамка за гонење на корупцијата и злоупотребите во јавниот сектор – тема која со години е меѓу најболни во македонското општество.

Македонија | пред 1 месец

Скопје ќе го добие првото „подземно чудо“ - Ѓорѓиевски најави изградба на подземна сообраќајница од Лимак до Кисела Вода

Градоначалникот на Скопје, Орце Ѓорѓиевски, денеска ја потпиша одлуката за јавна набавка за изградба на почетната фаза од првата подземна сообраќајница во Скопје која ќе биде реализирана од потегот од под „Лимак“ до влезот на Кисела Вода, односно на булеварот „Македонија“.„Со пуштањето во употреба на подземната сообраќајница под ‚Лимак‘, Скопје ќе го добие своето прво подземно сообраќајно чудо“, истакна Ѓорѓиевски, додавајќи дека ова е еден од најзначајните проекти за градот и симбол на новото време за Скопје.„По завршувањето на правната постапка, веднаш започнуваме со работа“, соопшти градоначалникот, нагласувајќи дека оваа инвестиција ќе го растовари сообраќајниот метеж во централното градско подрачје и ќе донесе нова динамика во срцето на градот. Проектот предвидува изградба на шест ленти, од кои четири се за двосмерен автомобилски сообраќај, две за јавен превоз, како и дополнителни пешачки патеки.Дополнително, ќе бидат изградени нов кружен тек кај „Нова Македонија“ и двата кружни тека на потегот кај булевар „Кочо Рацин“ и улица „Железничка“.Според Град Скопје, со завршувањето на подземната сообраќајница, централниот дел на градот ќе стане побезбеден, покомфорен и поуреден, а сообраќајот ќе се одвива непречено.

Скопје | пред 1 месец

И понатаму неизвесно за обвинителот Коцевски: „Почекајте, ќе видите“ – порача Мицкоски

Смената на државниот јавен обвинител Љупчо Коцевски веќе подолго време е во фокусот на јавноста, но и денеска премиерот Христијан Мицкоски не даде конкретен одговор за тоа дали ќе има разрешување. На новинарско прашање што ќе се случува со Коцевски, премиерот кусо одговори:„Почекајте, ќе видите.“Говорејќи за реформите во судството и обвинителството, Мицкоски изјави дека е подготвен да ја донира својата плата на судиите и обвинителите – но само под услов тие навистина да судат согласно закон. Тој нагласи дека не може да се согласи со зголемувања на плати во систем што, како што рече, нема никаква доверба меѓу граѓаните.Премиерот потсети дека државата се соочува со тешка економска состојба и дека следната година ќе треба да врати долг од две милијарди евра – износ кој, според него, претставува една третина од вкупниот буџет од шест милијарди.„Од тие пари треба да се исплатат пензии, плати, социјални трансфери и комунални обврски, а во исто време мора да вратиме над две милијарди евра. Некој неодговорно ја задолжил државата и идните генерации“, изјави Мицкоски, алудирајќи на претходната влада.Во однос на судските реформи, тој посочи дека ако сето тоа се сведува само на зголемување на платите во судството и обвинителството – тогаш таква реформа нема да ја направи. „Не можеме да одвојуваме повеќе средства за независно финансирање на судството и обвинителството отколку што тоа го прават најразвиените земји во ЕУ“, додаде тој.Премиерот истакна дека суштински промени нема, иронично забележувајќи дека единствените реформи се „за повисоки плати“, а не за вистински системски подобрувања. Како пример ја посочи измената на Кривичниот законик што, според него, била направена под притисок на Уставниот суд и овозможила политички амнестии.„Претходната влада го измени законикот и овозможи политичка амнестија за многумина. Сега, кога ние ќе поведеме постапка против некој од нив, тие ќе се повикуваат на тој закон донесен шверцерски, под европско знаме“, изјави Мицкоски, додавајќи дека дел од меѓународните извештаи тогаш „срамежливо премолчале“ за ваквите случувања.Во продолжение, премиерот се осврна и на европскиот пат на земјата, потсетувајќи на ветувањата дека промената на името ќе ја приближи Македонија до ЕУ. „Нè убедуваа дека сме ‘фронтранери’ и дека за три-четири години ќе станеме членка на Унијата. Тоа време одамна помина, а ние сè уште сме таму каде што бевме пред 25 години,“ рече Мицкоски, додавајќи дека Македонија не треба да прифаќа нови условувања што, според него, ја загрозуваат националната идентитетска позиција.

Македонија | пред 1 месец

Несреќа на скопска „Партизанска“: Велосипедист удрил во пешак, но тешко е повреден токму велосипедистот

Скопјанец е тешко повреден откако со велосипед удрил во пешак.На 12.11.2025 околу 16:15 часот во СВР Скопје е пријавено дека на бул.„Партизански Одреди“ во Скопје, Ж.П.(38) од Скопје, управувајќи велосипед, удрил во пешак. Во несреќата со тешки телесни повреди се здобил велосипедистот, констатирани во Градската општа болница „8 Септември“, информираа од полицијата.Извршен е увид од увидна екипа од СВР Скопје.

Скопје | пред 1 месец

Се расправале, па со автомобил се обидел да удри сограѓанин, кривична пријава против жител на Виница

Инцидентот се случил по расправија на булеварот „Маршал Тито“ во Виница.Надворешната канцеларија за криминалистички работи Виница поднесе кривична пријава против A.Г.(36) од Виница поради постоење основи на сомнение за сторено кривично дело „предизвикување на општа опасност“. На 26.06.2025 на бул.„Маршал Тито“ во Виница, по претходна расправија, пријавениот со патничко возило се обидел да удри 28-годишен маж од с.Лаки, виничко.

Македонија | пред 1 месец

Филипче го зајакнува тимот, д-р Александар Трајановски е предлог за нов потпретседател на СДСМ

Кандидатот за градоначалник на општина Аеродром од редовите на СДСМ, трауматологот д-р Александар Трајановски, ќе биде номиниран за нов потпретседател на партијата, најави денеска лидерот на СДСМ, Венко Филипче.Филипче ја соопшти оваа одлука пред вечерашниот состанок на Извршниот одбор, на кој, како што истакна, ќе бидат презентирани дел од плановите за кадровски и политички промени во рамките на партијата. Тој повика на трпение и разбирање од членовите и симпатизерите, нагласувајќи дека процесот се спроведува внимателно и со јасна стратегија.– Д-р Трајановски е човек исклучително посветен на партијата, имаше одлична и препознатлива кампања и привлече големо внимание во јавноста. Сметам дека ова е значајно кадровско зајакнување на раководното ниво на СДСМ – изјави Филипче.Александар Трајановски е специјалист ортопед и трауматолог, поранешен директор на Универзитетската клиника за трауматологија, ортопедски болести, анестезија, реанимација и интензивно лекување и Ургентен центар (ТОАРИЛУЦ). Тој е актуелен член на Извршниот одбор на СДСМ и долги години активен во партиските структури.Оваа кадровска промена следува по оставката на дотогашната потпретседателка Ана Чупеска, која ја поднесе пред вториот круг од локалните избори.На денешната прес-конференција, Филипче ги отфрли шпекулациите дека нудел функции на поранешни градоначалници и бил одбиен, нарекувајќи ги „кафански муабети“ без основа.– Во партијата нема никакво раслојување. Напротив, постои силно чувство на единство и заедничка цел – нагласи лидерот на СДСМ.

Македонија | пред 1 месец

Зеленски: Русија подготвува нова голема војна во Европа до 2030 година

Украинскиот претседател Володимир Зеленски предупреди дека Русија подготвува нова, голема офанзива на европскиот континент, која, според украинските проценки, би можела да започне во периодот меѓу 2029 и 2030 година. Тој како доказ го посочи интензивираното производство на оружје во Русија, што, според него, покажува дека Москва нема намера да ја прекине војната против Украина.Во објава на „Телеграм“, Зеленски истакна дека Москва значително ја зголемува воената индустрија, што јасно укажува дека целта на Кремљ е продолжување, а не завршување на конфликтот.„Состојбата на фронтот ни покажува дека Русија не е подготвена да сопре. Кога ги гледаме нивните фабрики, складишта и производни капацитети, станува јасно дека тие се подготвуваат за долгорочна војна,“ изјави украинскиот лидер, пренесе агенцијата „Укринформ“.Зеленски нагласи дека само здружениот меѓународен притисок може да ја принуди Русија да ја прекине агресијата, повикувајќи ги земјите-сојузници да дејствуваат сега, додека војната сè уште може да се сопре во рамките на Украина.Во меѓувреме, Министерството за финансии на САД соопшти дека воведува нови санкции против руските енергетски гиганти „Роснефт“ и „Лукоил“, барајќи од Москва итно да прифати прекин на огнот. Според проценките на Киев, овие санкции ќе ѝ нанесат на Русија загуби од најмалку 50 милијарди долари годишно.И Европската унија продолжува со притисокот врз Кремљ – високата претставничка за надворешна политика Каја Калас објави дека Унијата го усвоила 19-тиот пакет санкции насочен кон руската економија и нејзините воени капацитети.

Свет | пред 1 месец

Косата ѝ се заплеткала во машина за месење тесто, 49-годишна жена загина на работното место во Лариса

Бизарна трагедија се случи утринава во местото Дамаси, во близина на Лариса, каде што 49-годишна жена го загуби животот на своето работно место во локална пекарница. Според информациите на „tirnavospress.gr“, несреќата се случила кога косата на жената се заплеткала во индустриската машина за месење тесто, што довело до смртоносна повреда.Колегите веднаш притрчале да ѝ помогнат, а набрзо пристигнала и екипа на итната медицинска помош. И покрај брзата интервенција, лекарите не успеале да ја реанимираат, а смртта била констатирана на самото место.Полицијата веднаш почна истрага за да утврди како дошло до несреќата и дали биле почитувани сите пропишани безбедносни мерки при работа со машината.Жителите на малата заедница се во шок по трагедијата. Починатата, идентификувана со иницијалите Л.З., била позната и почитувана во Дамаси, каде што со години ја водела својата пекарница. Мештаните велат дека зад себе оставила силен печат во локалната заедница и дека сите се потресени од нејзината ненадејна и ужасна смрт.

Свет | пред 1 месец

Турција ги приземји сите 18 авиони Ц-130 по трагедијата во Грузија

Турција донесе одлука привремено да ги запре сите летови на своите воени транспортни авиони Ц-130, по трагичната несреќа што се случи во Грузија, при која загинаа сите 20 турски војници што биле во леталото. Од Министерството за одбрана соопштија дека летовите ќе останат суспендирани сè додека не се заврши целосната истрага и не се утврдат причините за падот, јавува „Си-ен-ен Турк“.Во известувањето се наведува дека сите 18 авиони од овој модел се повлечени од употреба и подложени на детални технички проверки. Во меѓувреме, експертски тимови во Анкара ја анализираат црната кутија на авионот со цел да се открие што точно довело до катастрофата.Министерството нагласува дека во оваа фаза е прерано да се изведуваат заклучоци за причините за падот, но потсетува дека авионот бил купен од Саудиска Арабија во 2012 година и редовно одржуван, при што последниот сервис бил извршен пред само еден месец.Исто така, е потврдено дека авионот немал превоз на муниција во моментот на несреќата.Несреќата се случила во вторникот, кога леталото тргнало од Азербејџан кон Турција и се урнало на територијата на Грузија, оставајќи зад себе дваесет загинати припадници на турските вооружени сили.

Свет | пред 1 месец

(Видео) Глувци на таванот во студентските тоалети во „Пелагонија“: Од управата на домот добиле отров за да ги истребат глодарите

Повеќе глувци се движат по таванот на тоалетот во студентскиот дом „Пелагонија“ во центарот на Скопје, покажува видео-снимка што вечерта ја испратија неколку студенти до порталот „Студентарија“.Снимката уште еднаш го отвора прашањето за условите во кои живеат студентите во државата, откако пред некој ден беше објавено дека не работат лифтовите во „Гоце Делчев“, па студентите до највиските катови на раве носта, торби, куфери, храна.Во овој случај, според студентите, проблемот со глодарите бил пријавен кај службите во домот, но наместо интервенција, тие добиле несоодветен и понижувачки одговор. „Од глувци ли се плашите?“ – им било речено од страна на управата, откако пријавиле дека во тоалетот има глувци кои слободно се движат по таванот.По повторно поднесените жалби, студентите тврдат дека им бил предаден отров со објаснување дека самите треба да го постават во просториите каде што се движат глодарите.Настанот повторно го актуелизира прашањето за студентскиот стандард и грижата на институциите за младите кои живеат во домовите во Скопје и низ државата – простори што треба да обезбедуваат достоинствени и безбедни услови за живеење, а не сцени што потсетуваат на запуштени подруми.

Скопје | пред 1 месец

Кривична за Блерим Беџети и вработени во Сарај и Град Скопје - ги сомничат за злоупотреби со градежни документи

Управата за финансиска полиција поднесе кривична пријава до Основното јавно обвинителство – Скопје против девет лица, меѓу кои и поранешниот градоначалник на Општина Сарај, Блерим Беџети, поранешни секретари, раководители на сектори и еден надзорен инженер.Тие се осомничени за злоупотреба на службена положба и овластување, несовесно работење во службата и фалсификување или уништување на деловни книги, според членовите 353, 353-в и 280 од Кривичниот законик.Според информациите на Финансиската полиција, во групата се наоѓаат и поранешните секретари на Општина Сарај – С.Ш. и Ќ.К., раководителите на секторот за урбанизам А.С. и Ќ.А., помладиот соработник А.Ш., раководителот на секторот за планирање и уредување на просторот во Град Скопје И.Б.Ш., како и надзорниот инженер Љ.Т.Финансиската полиција утврдила дека службените лица во Општина Сарај, иако знаеле дека за катастарската парцела КП 10405/6 КО Сарај нема донесен детален урбанистички план, сепак изготвиле и одобриле извод од план и одобрение за градба со невистинита содржина.Дополнително, изработиле пресметки за надоместок за уредување на градежно земјиште, спротивно на законските прописи. Надзорниот инженер, пак, спровел технички преглед на објектот и изготвил завршен извештај со лажни податоци, со што се овозможило незаконско користење на објектот.Со ваквото постапување, како што наведува Управата за финансиска полиција, пријавените му овозможиле на правниот субјект „Азра Идриз“ ДООЕЛ од село Глумово – Сарај, да се стекне со противправна имотна корист во износ од 108.638.840 денари.Во соопштението се нагласува дека службените лица свесно ги пречекориле своите овластувања и извршиле акти спротивни на јавниот интерес и законските обврски.Кривичната пријава е доставена до Основното јавно обвинителство – Скопје, кое треба да ја утврди одговорноста на сите пријавени и да одлучи дали ќе отвори официјална истрага.Од Финансиската полиција посочуваат дека предметот е резултат на долга финансиска и документациска анализа, а постојат сомнежи и за поширок систем на злоупотреби во урбанистичките оддели на Општина Сарај во изминатите години.

Скопје | пред 1 месец

Црни мајки, бели споменици: „Нема вода што ќе ви ја измие вината“ - повик преку пораки за Кочани

Неколку дена пред најавениот марш за правда што ќе се одржи во сабота, на 15 ноември, во Скопје, иницијативата „Кој е следен“ спроведе герила акција со моќни пораки насочени кон јавноста и институциите.На повеќе локации низ центарот на градот, меѓу кои и кај спомениците во близина на „Ибни Пајко“, утринава беа поставени транспаренти и пораки:„Нема вода што ќе ви ја измие вината“,„Правда за Кочани“,„Кога мајките се завиени во црно, совеста нема избор“,„Мајките завиени во црно се огледало на нашата тишина“.Со оваа симболична акција, иницијативата уште еднаш повика на масовна поддршка за родителите на 63-та млади животи изгубени во трагедијата во дискотеката „Пулс“.„Плачат мајки в црно преврзани,бели градој лежат ограбени,чадат села в оган запалени...“— цитираше иницијативата стихови од поетот Ванчо Николески во својата објава, додавајќи дека молкот е најголем соучесник во неправдата.Маршот, кој ќе започне во 12:05 часот од Плоштад Македонија, ќе продолжи покрај Собранието до Основниот кривичен суд, четири дена пред почетокот на судскиот процес за пожарот во Кочани.Родителите на загинатите деца повторно ќе побараат одговорност, транспарентност и правда, а граѓаните преку иницијативата „Кој е следен“ се повикуваат да им се придружат во борбата „за совеста на целата држава“.

Скопје | пред 1 месец

Путин има три идентични кабинети на различни места: Кремљ со години ја лажел јавноста за неговата локација

Истражување на Радио Слободна Европа откри дека Кремљ со години ја доведува во заблуда јавноста за вистинската локација на рускиот претседател Владимир Путин, користејќи три речиси идентични кабинети во различни делови на Русија. Истражувачката единица „Система“ утврдила дека бројни средби, за кои официјалните извори тврделе дека се одржале во близина на Москва, всушност биле снимени во Сочи или Валдај – местата каде што Путин сè почесто престојува од почетокот на војната во Украина и засилените напади со дронови, објави Радио Слободна Европа.Тајната на трите кабинетиВо телевизиски прилог од октомври 2020 година, се прикажува снимка на која Путин приоѓа кон вратата од својот кабинет во Ново Огарјово, главната претседателска резиденција. Токму овој детал ја разоткрил измамата – истрагата покажала дека положбата на рачката на вратата и уште неколку други елементи докажуваат дека снимката не е направена во близина на Москва, туку повеќе од 1.500 километри јужно – во речиси идентичен кабинет во Сочи.Единицата „Система“ открила дека не постои само еден, туку уште два верни дупликати на кабинетот од Ново Огарјово – еден во Сочи и друг во Валдај. Последниот е мал град покрај езеро, на половина пат меѓу Москва и Санкт Петербург, кој Путин го претпочита откако ја започна целосната инвазија врз Украина. Истрагата посочува дека тајновитиот Кремљ со години систематски ја прикривал вистинската локација на претседателот.Истовремено, се поставува и прашањето за времето кога навистина се одржале средбите што Кремљ ги објавува. „Система“ претходно открила дека од август наваму Кремљ објавил најмалку седум стари снимки на состаноци на Путин, претставувајќи ги како нови.Детали што ја откриваат вистинатаДо сознанијата за трите кабинети се дошло по детална анализа на околу 700 видеа и фотографии објавени од Кремљ, како и преку преглед на протечени патни податоци на лица од најтесното опкружување на Путин – обезбедувањето и новинарите на државната телевизија кои го следат.Посебно бил примерот од 2020 година: во кабинетот во Ново Огарјово, рачката на вратата покрај бирото на Путин е поставена нешто пониско од спојот меѓу ѕидните панели – што се гледа на повеќе снимки и фотографии. На снимката од 2020 година, пак, рачката е неколку сантиметри повисока, што одговара на распоредот во кабинетот во Сочи.Меѓу останатите детали што откриваат разлики меѓу наведените и вистинските локации се: шарите на Путиновите вратоврски, формата на постаментот за телевизорот, нијансата на површината на масата и структурата на дрвената кутија за документи.Патувањата како доказОва го потврдуваат и патните документи. Електронска карта набавена преку туристичка агенција поврзана со Кремљ покажала дека новинарот Сергеј Брилјов, на денот кога бил емитуван интервјуто на 27 август, летал од Сочи за Москва. Протечените документи откриле дека новинарот Павел Зарубин, кој редовно го следи Путин, често патувал во Сочи и таму снимал материјали што потоа Кремљ ги претставувал како направени во Ново Огарјово. Во еден случај, член на претседателското обезбедување преноќил во Сочи токму во времето кога е сниман материјал за кој официјално било наведено дека е снимен во близина на Москва.Резиденцијата во Сочи – „Бочаров ручеј“ – се користи уште од советскиот период, а Путин таму низ годините има примено бројни светски лидери. За време на пандемијата од ковид-19, приближно една третина од средбите што Кремљ ги прикажувал како одржани во Ново Огарјово, всушност биле во Сочи. Путин често престојува и во Валдај, каде што има кабинет речиси идентичен со оние во Москва и Сочи.Изолација и безбедностПоследниве години, особено по почетокот на инвазијата врз Украина во февруари 2022 година, Путин сè повеќе ја претпочита изолираната резиденција во Валдај. Од февруари 2023 година практично се повлекол од „Бочаров ручеј“, а анализата на снимките што ги собра „Система“ покажува дека речиси сите средби за кои Кремљ тврдел дека во 2025 година се одржале во Ново Огарјово, биле снимени токму во Валдај.Визуелните детали – положбата на ѕидните панели зад неговата фотелја, термостатот поставен во средината на ѕидот, формата на постаментот за телевизорот и шарата на дрвената кутија за документи – јасно го разликуваат кабинетот во Валдај од оние во Ново Огарјово и Сочи. Во Валдај во 2016 година бил изграден и павилјон за состаноци на местото на поранешен тениски терен, а работите ги изведувала истата компанија што ги реновирала другите претседателски резиденции.Истражувањето утврдило и дека некои постари средби, како седницата на владата три дена по пожарот во трговскиот центар во Кемерово во 2018 година, кога загинаа повеќе од 60 луѓе, исто така биле снимени во Валдај.Во неделите пред инвазијата во 2022 година, Путин преку видеоврска разговарал со тогашниот американски претседател Џо Бајден од Сочи, по што се преместил во Валдај, каде што во првите недели од војната одржал најмалку 12 состаноци. Од јануари до крајот на септември годинава, 29 од 30 негови појавувања биле снимени во Валдај.Сателитски снимки на компанијата „Максар“ покажуваат распоредени противвоздушни системи околу резиденцијата – вкупно 12, претежно „Панцир-С1“.Сoциологот Константин Гаазе, кој го проучува рускиот авторитаризам, објаснува дека причината за повлекувањето на Путин е очигледна: безбедноста. „Тоа е, секако, прашање на заштита“, вели Гаазе. Засилените мерки околу елитното предградие Ново Огарјово би привлекле премногу внимание, додека резиденцијата во Сочи е изложена поради положбата на рид. Валдај, напротив, е поскриен и полесен за обезбедување.Портпаролот на Кремљ, Дмитриј Песков, ги прочитал прашањата што му ги испратила „Система“ пред објавувањето на истражувањето, но не одговорил. Уште во 2020 година ги негирал извештаите дека Путин има два речиси идентични кабинети, а администрацијата никогаш не ги коментирала доказите дека јавноста со години била доведувана во заблуда за локациите на стотиците средби на рускиот претседател.

Свет | пред 1 месец

Градоначалникот Ѓорѓиевски со порака за 13 Ноември: „Нашата должност е да ја чуваме жртвата на хероите“

Градоначалникот Орце Ѓорѓиевски утрово одржа традиционална средба со претставници од Градскиот одбор на Сојузот на борците, по повод 13 Ноември – Денот на ослободувањето на Скопје, каде што им оддаде признание за зачувувањето на споменот на хероите што го донесоа слободниот град.Утрово ја одржавме традиционалната средба по повод 13 Ноември - Денот на ослободувањето на Скопје, со претставници од Градскиот одбор на Сојузот на борците од Народноослободителната антифашистичка војна на Македонија.Им се заблагодарив за нивната пожртвуваност и храброст да го чуваат жив споменот на борците кои го положија животот пред олтарот за слободно Скопје.На денешен ден, Скопје ја дочека слободата донесена од 42-та и 50-та народноослободителна дивизија на македонската војска и 16-та македонска бригада, по неколкудневни тешки борби со фашистичкиот окупатор.Тие херои се бореа за идеја, за достоинство, иднина, за Скопје какво што денес го имаме. Нашата должност е да ја чуваме нивната жртва жива, со тоа што ќе го градиме Скопје како град на слободни, горди и обединети луѓе.Вечна слава на хероите кои го донесоа 13 Ноември!Слава на борците за слободно Скопје!, напиша градоначалникот.

Скопје | пред 1 месец

Лекарот Ненад Цоневски, кој го прегази кучето Маја, е обвинет за екстремна суровост кон животно

Македонскиот лекар Ненад Цоневски, кој работи во Софија, е обвинет за екстремна суровост кон животно, откако со автомобил го прегазил кучето Маја – маалски миленик на жителите од соседството. Случајот предизвика голем револт во јавноста, откако видеоснимка од настанот се прошири на социјалните мрежи, пишува 24 часа.бг.На видеото се гледа како автомобилот управуван од Цоневски излегува од гаража и го удира кучето со предните гуми. Потоа тој излегува од возилото, го погледнува животното кое лежи на тротоарот, се враќа во колата и заминува оставајќи го кучето на улица.Според Обвинителството во Софија, Цоневски е обвинет за „намерна суровост кон животно што резултирало со сериозни повреди“, но не и за убиство, бидејќи кучето било еутаназирано подоцна. Ветеринарната експертиза покажала дека кучето имало сериозни повреди на рбетот и сигурно немало да може да ги движи задните нозе, но имало шанси да преживее. Животното, кое било од расата хаски, било чипувано, но без сопственик, па ветеринарот по консултација решил да го еутаназира.Ако судот го прогласи за виновен, Цоневски се соочува со затворска казна од една до пет години. Додека трае истрагата, тој е суспендиран од работното место во Военомедицинската академија во Софија.Оттаму велат дека „не толерираат никакви облици на агресија или насилство, независно кон кого се насочени“ и потврдија дека соработуваат со органите на истрагата, меѓу кои и Воената полиција.

Македонија | пред 1 месец

Дијана Хрка примила инфузија, но продолжува со штрајкот со глад

Мајката на Стефан, момчето кое загина во уривањето на настрешницата на железничката станица во Нови Сад, Дијана Хрка била однесена во болница каде примила инфузија поради влошување на нејзиното здравје како последица од штрајкот со глад.Сепак, само по еден час изминат во здравствената установа, таа повторно се вратила назад за да, како што вели, ја продолжи нејзината борба за правда.Српскиот претседател Александар Вучиќ и вчера упатил апели да го прекине штрајкот со глад кој трае веќе 12 дена.„Од голема важност е што таа прими терапија и сите ние, кои бевме загрижени за нејзиното здравје, можеме да бидеме спокојни. Луѓето околу неа покажаа одговорност. Како претседател на Републиката, им сум благодарен за нивната одговорност и сериозност, а нивна работа е да помогнат во спасувањето на животот на една жена. Ја донесоа во болница. Моите апели ќе бидат упатени до г-ѓа Хрка секој ден да го прекине штрајкот. На нејзиното здравје и на нејзиното тело им е дадена шанса да продолжат да живеат и да се опорават, и би рекол дека ова е добра вест за сите наши граѓани“, рече Вучиќ.

Свет | пред 1 месец

Николовски за ИПАРД програмата: 130 милиони евра блокирани, загрозени 3.000 бизниси и 10.000 вработувања

Пратеникот од СДСМ и поранешен министер за земјоделство, Љупчо Николовски, реагираше на интервјуто на министерот Цветан Трипуновски кој, како што вели, иако призна дека ИПАРД програмата е суспендирана, ниту презеде одговорност ниту понуди решенија.„Министерот Трипуновски видно нервозен излезе на телевизија и наместо да понуди решение сам потврди дека ИПАРД е суспендиран– без да каже колкава е штетата, без да каже колку ќе трае проверката за корупција и криминал на неговите најблиски соработници, една од тие и негова посебна советничка“ вели Николовски.Тој предупредува дека се загрозени 130 милиони евра европски средства, пари што требало да донесат над 3.000 нови бизниси и 10.000 нови работни места.„Овие пари не се бројка на хартија, тоа се грантови за реални луѓе, за млади земјоделци, за семејства кои вложиле сопствени средства и надеж дека државата и Европа стојат зад нив. Денес се изневерени,“ истакнува Николовски.Николовски го осуди и нападот на министерот врз претходните успешни програми што создадоа над 4.000 нови мали производители и илјадници семејства кои денес живеат од сопствен труд.„Наместо да превземе одговорност, министерот нападна и претходни програми кои донесоа реални резултати, тој нападна над 4.000 нови мали производители, нови семејства кои денес живеат од сопствен труд. Програми што беа симбол на успех, сега се цел на безмислени критики.“Јас денес понудив конкретни решенија, транспарентно и одговорно, за доброто на земјоделците и државата. Тој ги одби и избра да обвинува без никакви докази, додаде Николовски.„Мојата борба не е против никого лично, туку за секој земјоделец кој денес чувствува дека е изневерен. Нудам помош и конкретни решенија и ќе ги понудам и на неговиот наследник, на секој што мисли добро за државата,“ порачува Николовски.

Македонија | пред 1 месец

Скопје го слави ослободувањето од фашизмот - Честит 13-ти Ноември!

Скопје денеска го чествува 13 Ноември – Денот на ослободувањето на градот во Втората светска војна. По тој повод, во текот на денот ќе бидат оддадени почести на сите кои ја донесоа слободата, со положување венци пред Споменикот на ослободителите на Партизанските гробишта во Бутел, на Алејата на заслужните граѓани каде почива генерал Михајло Апостолски, како и пред Споменикот на Ослободителите на Скопје пред зградата на Владата.Од Град Скопје најавија дека вечерва во Македонската опера и балет ќе се одржи традиционалната свеченост на која ќе бидат врачени годинешните награди „13 Ноември“, што се доделуваат за особени остварувања во различни општествени области.Пред точно 81 година, на 13 ноември 1944 година, скопјани ја дочекаа слободата по неколкудневни жестоки борби со фашистичкиот окупатор. Во операцијата за ослободување учествувале 42. и 50. народноослободителна дивизија на македонската војска и 16. Македонска бригада, кои по големи загуби успеале да го ослободат градот.Според сведоштвата, борбите се воделе на повеќе локации низ градот – на улицата „Илинденска“, кај главната пошта, Офицерскиот дом, Народната банка и Старата железничка станица. Македонските борци ја спасиле хидроцентралата „Матка“ од уништување, а многу цивили, невооружени, го чувале Камениот мост од минирање, со што зачувале симбол кој и денес е еден од најпрепознатливите белези на градот.Во борбите за ослободување на Скопје загинале повеќе од 420 борци, а за време на целата Втора светска војна животот го загубиле околу 4.600 скопјани – херои чие дело останува вечно врежано во колективното сеќавање на градот.

Скопје | пред 1 месец

(Видео) Потписот на Трамп означи крај на блокадата на владата на САД

Американскиот претседател Доналд Трамп го потппиша законт кој го означи крајот на најдолгата блокада на владата на САД. Претставничкиот дом на Конгресот изгласа повторно активирање на прекинатата помош за храна, исплата на стотици илјади федерални работници и обновување на системот за контрола на воздушниот сообраќај, со што.Гласањето во Претставничкиот домДомот, под контрола на републиканците, го усвои пакетот со 222 гласа „за“ и 209 „против“. Поддршката од Трамп во голема мера ја одржа неговата партија обединета, и покрај силното противење на демократите кои се револтирани затоа што 43-дневната блокада, иницирана од нивните колеги во Сенатот, не успеа да донесе договор за продолжување на федералните субвенции за здравствено осигурување.Со потписот на Трамп на законот, кој Сенатот го одобри претходно оваа недела, федералните работници ќе се вратат на своите работни места веќе од четврток, иако не е јасно колку брзо ќе се обноват сите владини услуги и операции.Финансирањето на владата со ова ќе се продолжи привремено до 30 јануари, додека државниот долг на САД, кој моментално изнесува 38 билиони долари, ќе продолжи да расте за околу 1,8 билиони долари годишно.

Свет | пред 1 месец

Голема промена воведува Рајанер

Нискобуџетната авиокомпанија „Рајанер“ (Ryanair) од денес целосно ги укинува своите шалтери за пријава на летови и преминува на систем со 100% дигитални карти за чекирање. Патниците отсега ќе мора да се пријавуваат преку интернет и да поседуваат дигитална карта на својот мобилен телефон – печатените карти повеќе нема да бидат прифатени.Нови правилаСпоред новите прописи, сите патници се должни да ја извршат пријавата преку мобилната апликација на „Рајанер“ или преку официјалната веб-страница пред пристигнување на аеродром. По успешната пријава, картата за влез на лет треба да биде зачувана во дигитална форма на паметниот телефон.Печатените карти повеќе нема да важат и нема да бидат прифатени при влез во авионот – со исклучок на летовите кон Мароко, каде што локалните регулативи сè уште бараат физичка, печатена карта.Патниците кои патуваат кон Мароко и натаму ќе можат да ја подигнат својата печатена карта директно на аеродромот.

Свет | пред 1 месец

Судењето за кочанската трагедија ќе се одржува двапати неделно, првото рочиште на 19 ноември

Судењето за трагедијата во дискотеката во Кочани, во која животот го загубија 63 лица, а беа повредени над 200, ќе почне следната недела на 19. ноември и ќе се одвива во судницата во Казнено-поправната установа Идризово.Како што соопштија од Основниот кривичен суд во Скопје и Јавното обвинителство, процесот ќе има по две рочишта неделно, со засилени безбедносни мерки и присуство на медицински тим. Првите три рочишта се закажани за 19, 25 и 26 ноември.Оштетените сведоци ќе можат да присуствуваат дури по нивното сослушување.Случајот го застапуваат 15 јавни обвинители, а обвинети се 35 физички и три правни лица. Трагедијата се случи на 16 март оваа година.

Македонија | пред 1 месец

Дијана Хрка е во тешка здравствена состојба по 11 дена гладување, одбива медицинска помош и јго продолжува штрајкот

По 11 дена штрајкување со глад пред српскиот Парламент, мајката на младиот човек кој загина при уривањето на настрешницата во Нови Сад, Дијана Хрка, се наоѓа во многу лоша здравствена состојба. Таа продолжува со протестот барајќи одговорност за трагедијата, а околу нејзиниот шатор сè повеќе се собираат граѓани, студенти и универзитетски професори кои ѝ даваат поддршка. Неколку стотици луѓе денеска се околу местото на протестот, а Хрка попладнево, во 16 часот, треба да ѝ се обрати на јавноста.Инцидент и вознемиреност се случија претпладнево пред парламентот, кога медицински тим пристигна на лице место по, наводно, анонимен повик од граѓанин. Лекарите побарале да ја прегледаат Хрка, но таа одбила медицински третман, објави Н1. Ветераните кои се со неа изјавиле дека никој од нив не повикал брза помош и дека протестот продолжува.Околу 12:30 часот, медицинскиот тим се обидел да влезе во шаторот, но барањето било одбиено. Според снимките на српските медиуми, Хрка веќе е во инвалидска количка, видливо исцрпена и ослабена. Еден од присутните ветерани изјавил дека таа е „свесна, но преморена и исцрпена“, додавајќи дека моментално не е во животна опасност.Некои медиуми јавуваат дека лекар и понатаму е во нејзина близина и дека се очекуваат официјални информации за нејзината состојба. Хрка вчера потврди дека се чувствува слабо, но решително порача дека нема да се откаже од штрајкот со глад што го започна на 2 ноември.

Свет | пред 1 месец

Нападнатo 12-годишнo дете центарот на Скопје, осомничениот го исекол со остар предмет

Полицијата трага по напаѓачот.На 11.11.2025 во 20:00 часот во СВР Скопје, Г.М.(39) од Скопје пријави дека околу 15:50 часот на подрачјето на Центар, неговиот 12-годишен син бил физички нападнат од Б.Љ., кој потоа со остар предмет му нанел расекотина и му го оштетил велосипедот. Малолетникот е пренесен во Комплексот клиники „Мајка Тереза“ за укажување на лекарска помош и се преземаат мерки за целосно расчистување на случајот.

Скопје | пред 1 месец