Рутинска интервенција на крајници со фатален крај за четири годишно девојче: мајката на Ема од Чачак со тешки сомнежи

Четиригодишното девојче Ема М. почина по операција на третиот крајник во болница во Чачак, а трагичниот исход на интервенцијата што важи за рутинска, ја потресе јавноста во Србија. Точната причина за смртта на детето ќе биде позната по завршување на обдукцијата, која е побарана од семејството.Сања, мајката на Ема, вели дека нејзината ќерка немала никакви здравствени проблеми, освен зголемени крајници, и дека во болница влегле со уверување дека станува збор за едноставна и безбедна интервенција. Наместо тоа, како што раскажува, следеле часови на неизвесност и страв.Според нејзините зборови, по операцијата една од медицинските сестри ѝ соопштила дека интервенцијата е завршена и дека детето се буди, но потоа повторно влегла во операционата сала и таму останала со часови. Кога излегла, ѝ рекла дека не знае што точно се случува, дека состојбата е тешка и дека се моли детето да преживее. Подоцна, хирургот изјавил дека операцијата поминала добро, но дека при будењето било утврдено крварење во белите дробови.Мајката наведува дека ѝ било кажано дека во тубусот се појавила крв и дека детето мора итно да се транспортира во Белград, но дека никој јасно не ѝ објаснил што точно се случувало во салата. Таа изразува сомнеж дека можеби дошло до повреда при повторното поставување на тубусот, посочувајќи дека детето претходно било целосно здраво. До обезбедувањето транспорт, како што вели, поминало долго време, а во Белград, Ема пристигнала со исклучително низок крвен притисок.Сања истакнува дека лекарите во Белград направиле сѐ што било во нивна моќ, но дека семејството се сомнева оти пропустот се случил во болницата во Чачак. Обдукцијата е извршена на барање на родителите и на Институтот за мајка и дете, со цел да се утврди вистината.„Најважно е да знаеме зошто го изгубивме нашето дете“, вели мајката, додавајќи дека без одговори и јасни факти, болката и сомнежите ќе останат.

Свет | пред 2 месеци

Приватните автобуси „фатени“ на црвено поради должината и метежот, превозниците бараат да бидат „посебна категорија“

Дел од приватните превозници реагираат дека системот „Сејф сити“ неправедно ги санкционира автобусите, без да ги земе предвид специфичните услови во кои тие сообраќаат низ градот. Јовица Зафировски, претставник на приватните превозници во Град Скопје, за „Сител“ вели дека проблемот најчесто се јавува во услови на густ сообраќај и отсуство на посебни жолти ленти, кога долгите автобуси влегуваат на раскрсница на трепкаво зелено светло, но поради должината не успеваат целосно да ја поминат пред да се вклучи црвеното.Во такви случаи, како што посочува Зафировски, камерите автоматски го регистрираат поминувањето како прекршок за црвено светло, по што следуваат високи парични казни и одземање на возачката дозвола.Превозниците предупредуваат дека ваквите санкции може да предизвикаат сериозни последици за јавниот превоз, бидејќи немаат доволен број возачи за замена, а поголем број изречени забрани за управување би можеле да доведат до паркирање на автобусите и нарушување на редовниот сообраќај.Тие бараат автобусите да бидат третирани како посебна категорија со поголема толеранција во рамки на системот „Сејф сити“, а како можност за надминување на проблемот предлагаат и поврзување на ГПС-системите во автобусите со семафорите, со што би се овозможило нивно вклучување во „паметниот“ зелен бран и избегнување на ваквите ситуации.

Скопје | пред 2 месеци

Штрајк на шпанските железници по смртоносните несреќи: „Доста е од занемарена инфраструктура“

Вработените во шпанските железници започнаа тридневен штрајк, протестирајќи против, како што наведуваат, долгогодишното занемарување на инфраструктурата и недоволното финансирање, кои, според синдикатите, директно придонеле за двете тешки железнички несреќи во јануари, во кои загинаа 47 лица.Синдикалните претставници посочуваат дека со години предупредувале на потребата од подобро одржување и посериозни инвестиции во железничката мрежа. Според нив, железничарите се исцрпени од систем што, наместо безбедноста, приоритет им дава на кратењата на услугите. Протестите кулминираа со собири во повеќе градови, меѓу кои и Мадрид, каде што беше испратена пораката дека состојбата повеќе е неодржлива.Дополнителен проблем, според синдикатите, претставува и значително зголемениот број на патници. Во последната деценија, бројот на корисници на железничкиот превоз се зголемил од околу десет милиони на повеќе од 22 милиони годишно, што создава дополнителен притисок врз мрежата која, како што тврдат, не е соодветно модернизирана и контролирана.Во јануари, две сериозни несреќи ја потресоа шпанската јавност. Во Андалузија и Каталонија животот го загубија двајца машиновозачи и неколку десетици патници. Најтешката несреќа се случи на линијата Малага–Мадрид, кога последните три вагони од возот се одвоиле и завршиле на спротивната пруга, по што во нив удрил воз од спротивен правец со брзина од околу 210 километри на час, при што загинаа најмалку 46 лица.Шпанија располага со најголемата железничка мрежа во Европа и втората најголема во светот, веднаш по Кина, но синдикатите предупредуваат дека без итни инвестиции и сериозни реформи, безбедноста на патниците и вработените останува сериозно загрозена.

Свет | пред 2 месеци

Клековски: И во ФЗО ќе се применува моделот за етапно зголемување на платите до 2028 година

Директорот на Фондот за здравствено осигурување на Македонија, Сашо Клековски, информираше дека Фондот е целосно посветен на обезбедување пораст на платите за своите вработени, по моделот што е договорен за јавната администрација. Тој денеска остварил конструктивна средба со претставниците на Синдикатот на УПОЗ, како репрезентативен синдикат во Фондот, на која се разговарало за натамошните чекори во насока на подобрување на материјалниот статус на вработените.Клековски го поздрави постигнатиот договор меѓу Владата, УПОЗ и САДУ за етапно зголемување на платите во јавната администрација за вкупно 40 проценти до 2028 година, оценувајќи го како значаен исчекор за илјадници вработени. Според него, Фондот ќе се залага истиот модел да се примени и за 771 вработен во ФЗО, со цел растот на платите да биде усогласен со оној во јавната администрација.На средбата било отворено и прашањето за нерамномерниот обем на работа во подрачните служби на Фондот, кој произлегува од различниот однос меѓу бројот на вработени и бројот на осигуреници. Клековски истакна дека станува збор за сериозен предизвик и дека институцијата ќе продолжи да работи на изнаоѓање системско решение преку дијалог со синдикатите.Директорот потсети дека во изминатите две години веќе се постигнати конкретни резултати во подобрувањето на платите во ФЗО. Најниската нето плата во Фондот во периодот од 2023 до 2025 година е зголемена за 36,3 проценти, од 23.775 на 32.394 денари, при што во 2025 година таа е за речиси 33 проценти повисока од минималната плата во државата. Во исто време, просечната нето плата во Фондот пораснала за 25,1 процент и во 2025 година достигнала 95 проценти од просечната плата на национално ниво, наспроти 88 проценти во 2023 година.Клековски порача дека преку социјален дијалог, партнерство и заеднички напор со синдикатите, Фондот ќе продолжи да работи на соодветно вреднување на трудот на секој вработен и на создавање подобри услови за работа во здравствениот систем.

Македонија | пред 2 месеци

(Видео) Државниот врв е за набавка на нов авион оти овој се рарсипува, за опозицијата тоа е „расипништво“

Треба да се набави нов државен авион за официјални и државни потреби, порача директорот на Службата за општи и заеднички работи, Ивица Томовски, оценувајќи дека државата, доколку сака да се претставува сериозно на меѓународно ниво, мора да располага со соодветни транспортни капацитети.Според Томовски, постојниот авион не ги задоволува потребите на државните институции. Тој посочи дека леталото е склоно на чести дефекти, повеќепати било испраќано на сервисирање, има ограничен капацитет од околу шест седишта и не овозможува превоз на соодветни делегации. Во таа насока, Томовски оцени дека сериозен државен имиџ подразбира и сериозни возила и авион.Изјавата веднаш предизвика реакции од опозициската СДСМ, од каде што ја обвинија Владата дека, во време на економски притисоци и ниски приходи, приоритет ѝ е луксузот, а не животниот стандард на граѓаните. Од партијата посочија дека додека работниците тешко ги покриваат основните трошоци за живот и додека минималната плата не се зголемува, Владата размислува за купување авион за премиерот и за, како што велат, туристички патувања.Според СДСМ, за зголемување на минималната плата и за поддршка на приватниот сектор би биле потребни околу 200 милиони евра, додека за авион се споменуваат уште стотици милиони евра. Опозицијата оцени дека власта одбива да обезбеди повисоки плати, но не се откажува од луксузните трошоци.Во реакцијата, од СДСМ направија и споредба со претходните влади, наведувајќи дека поранешниот премиер Никола Груевски купувал луксузни автомобили и скапи лични предмети со пари на граѓаните, а дека актуелниот премиер Христијан Мицкоски, според нив, сака да оди чекор понатаму преку набавка на авион вреден стотици милиони евра.Полемиката околу државниот авион ја отвори пошироката дебата за владините приоритети, односно дали во услови на економски предизвици и барања за повисоки плати, државата треба да инвестира во скап авион или средствата да ги насочи кон подобрување на животниот стандард на граѓаните.

Македонија | пред 2 месеци

Македонското вино чекор поблиску до светската елита на саемот Wine Paris

Македонските винарии од 9 до 11 февруари ќе се претстават на еден од највлијателните меѓународни вински саеми, Wine Paris, преку заеднички национален штанд под името „Macedonian Wines“, со што ќе го промовираат квалитетот, потенцијалот и автентичноста на македонското винарство пред светската винска јавност.Настапот се реализира со поддршка на Министерството за земјоделство, шумарство и водостопанство, преку Програмата за финансиска поддршка на руралниот развој, како дел од стратешките напори за зголемување на извозот и унапредување на меѓународната препознатливост на македонските вина.Рамо до рамо со најреномираните светски винарии, македонските производители ќе ги претстават автохтоните вински сорти, специфичниот тероар и современите технологии во производството, испраќајќи порака дека Македонија сè посигурно го зазема своето место на глобалната винска мапа.Покрај официјалниот настап на саемот, во Париз ќе се одржи и посебен промотивен настан под наслов „Nuit du Vin Macédonien“ – „Ноќ на македонските вина“, наменет за презентација и дегустација пред внимателно селектирана публика од вински професионалци, дистрибутери, медиуми и познавачи на виното.Настанот е реализиран со поддршка и заложба на амбасадорот на Република Македонија во Франција, Игор Николов, кој имал значајна улога и во координацијата на настапот на македонските винарии на Wine Paris.Со овој настап, македонското вино испраќа јасна порака дека со својот квалитет, традиција и автентичност е подготвено за посилно и повидливо присуство на еден од најпребирливите и највлијателни светски пазари.

Македонија | пред 2 месеци

„Ќе умре и онака“: Изјава што ја одбележа расправата за терапиите на Онкологија

На судењето за случајот со Клиниката за онкологија, се отвори клучна контроверзија околу ставот дека кај тешко болни пациенти „нема потреба од терапија, бидејќи и онака ќе умрат“, што, според одбраната, произлегува од толкувањата на вештачењето.Вештото лице Маја Равник од Медицинскиот факултет во Марибор, која изработила медицинско вештачење според истории на десетици пациенти, посочи дека кај дел од случаите биле давани терапии без јасна индикација, во несоодветни дози и интервали, со што болеста напредувала побрзо, а во поединечни случаи, според неа, хемотерапијата можела и да ја забрза смртта.Одбраната на поранешниот директор на Онкологија, Нино Васев, остро реагираше, оценувајќи дека ваквиот пристап е „ригиден и теоретски“ и опасен во пракса. Адвокатот Боби Спирковски истакна дека ваквото толкување практично води до ставот дека кога лекарот ќе процени дека пациентот е „готов“, не треба да му се дава терапија, што, според него, е форма на прикриена еутаназија.„Кој може да каже колку време ќе живее пациентот за да одлучи дека веќе не треба да се лекува? Во нашата пракса, дури и кога состојбата е тешка, се дава терапија со надеж дека ќе се продолжи животот“, порача Спирковски, нагласувајќи дека лекарите често се принудени да работат со ограничени ресурси и без целосна достапност на лекови.Случајот продолжува во доказна постапка, а судот ќе треба да одмери дали станува збор за несовесно лекување или за медицински одлуки донесени во услови на тежок и ограничен здравствен систем.

Македонија | пред 2 месеци

Донесена одлука: Во Кочани ќе се гради „Патека на бесконечноста“ во спомен на 63-те жртви од трагедијата во „Пулс“

Во Кочани ќе се гради спомен-обележјето „Патека на бесконечноста“, посветено на 63-те ангели кои трагично го загубија животот во пожарот во дискотеката „Пулс“. Родителите на жртвите информираат дека ја добиле официјалната одлука со која се одобрува изградбата на меморијалот, што за нив претставува важен и долгоочекуван чекор напред.Како што соопштуваат, Советот на Општина Кочани на седницата одржана на 30 јануари 2026 година донел официјална одлука за изведување на спомен-обележјето под името „Патека на бесконечноста за 63-те ангели“. Проектот е наменет како траен спомен на младите животи што прерано згаснаа во една од најтешките трагедии што го погодија градот и државата.Според усвоената проектна документација, спомен-обележјето ќе се простира на површина од 1.053 квадратни метри. Предвидено е да биде изградено на дел од катастарската парцела број 12179, сместена меѓу улиците „Кеј на револуцијата“ и „Браќа Ставреви“, со максимална висина до три метри.Родителите посочуваат дека процесот не завршува со оваа одлука и дека во наредниот период ќе продолжат со обезбедување на останатата потребна документација, како и со прибирање финансиски средства. Поддршката, како што наведуваат, ќе доаѓа од компании и од поединци, но и преку спортски и хуманитарни настани, дел од кои веќе се одржале, а дел се планирани исклучиво со хуманитарна цел.Во своето обраќање, тие изразуваат длабока благодарност до Советот на Општина Кочани и до сите граѓани за покажаната солидарност, поддршка и човечност во овие тешки моменти. Според нив, оваа одлука е доказ дека заедницата не ги заборава своите најмлади сограѓани.Родителите истакнуваат надеж дека „Патеката на бесконечноста“ ќе биде изградена во најкраток можен рок и дека ќе претставува траен спомен, тивка болка и вечно сеќавање на 63-те млади луѓе кои прерано го напуштија овој свет.

Македонија | пред 2 месеци

Европа пред финансиски пресврт: Еврото се подготвува за поголема глобална улога

Европа мора да се подготви за значително поголема улога во светските финансии во услови на постепено слабеење на американскиот долар и да ја зајакне сопствената финансиска архитектура за да биде подготвена за зголемен пазарен удел на еврото, оценува Мартин Кохер, гувернер на Австриската централна банка и член на Управниот совет на Европска централна банка.Во изјава за медиумите, Кохер посочува дека зголемената улога на еврото е тренд што трае подолго време и дека во моментов се забележува појачан интерес од меѓународните партнери за европската валута. Според него, токму тоа е една од причините за забележливото зајакнување на еврото и за неговото сè почесто перцепирање како валута што нуди сигурност во периоди на глобална неизвесност.Во услови на кризи и нестабилност, инвеститорите традиционално се вртат кон златото, швајцарскиот франк и американскиот долар. Сепак, во изминатата година еврото зајакна за околу 14 проценти во однос на доларот, делумно како резултат на разнишаната доверба во САД поради честите промени во трговската политика. Истовремено, европските земји најавуваат зголемени инвестиции во одбраната и инфраструктурата, што дополнително ја засилува улогата на еврото.Иако доларот и понатаму има доминантна позиција со околу половина од светските девизни резерви, неговиот удел бележи надолен тренд во последната деценија. Еврото, пак, учествува со приближно 20 проценти. Според Кохер, глобалното финансиско преструктурирање може да му донесе на еврото уште поголема улога, вклучително и статус на безбедно прибежиште, за што Европа мора навреме да се подготви.Тој нагласува дека целта не е по секоја цена да се зголеми меѓународната улога на еврото, но дека околностите може да ја принудат Европа да ја преземе таа улога. Во таа насока, во рамките на Европската централна банка веќе се водат дискусии за користење на различни инструменти за стабилизација на меѓународниот финансиски систем, меѓу кои и меѓународни репо-договори, своп-линии и други механизми за обезбедување ликвидност.Претседателката на Европската централна банка, Кристин Лагард, неодамна истакна дека не постои директна врска меѓу силната меѓународна улога на една валута и нејзиното зајакнување во однос на другите валути. Таа посочи дека за една валута да биде извор на стабилност, потребни се долгорочно изградени предуслови, како што се сигурно и предвидливо правно опкружување во кое законите се почитуваат, критериум што, според неа, еврозоната веќе го исполнува.Лагард нагласи и дека постои напредок во третата клучна компонента за силна валута – трговската поврзаност со остатокот од светот. Таа оцени дека зајакнувањето на еврото зависи и од трговските договори на Европската унија со региони како Меркосур, Индија, Австралија и други партнери. Дополнително, таа истакна дека обезбедувањето ликвидност е суштински атрибут на силна валута, поради што Европската централна банка го преиспитува и унапредува својот ликвидносен рамковен систем преку репо-линии.

Македонија | пред 2 месеци

Грчката полиција разби мрежа за производство и шверц на илегални цигари

Грчката полиција соопшти дека разбила криминална група која на индустриско ниво произведувала и шверцувала илегални цигари, управувала три фабрики, вршела извоз на дел од продукцијата и вршела трансакции вредни милиони евра, користејќи исклучиво готовина за да избегне откривање, објави Катимерини.Во серија акции изведени во петокот и саботата во пошироката област на Атина, во соседната Вија и на островот Евиа, уапсени се 26 лица, меѓу кои двајцата претпоставени водачи на мрежата. Издадени се потерници и за уште 13 осомничени, меѓу кои и полицаец. Се верува дека групата била активна најмалку од 2018 година.Полицијата откри три фабрики за производство и пакување цигари, шест складишта и камиони. Конфискувани се повеќе од 14 милиони цигари, 20 тони тутун, 1,2 милиони евра готовина, оружје – вклучувајќи автомат, 14 пиштоли и четири пушки, повеќе од 1.600 куршуми, како и слика во стилот на грчкиот уметник Алексис Акратикаис.Нелегалните цигари биле пакувани во фалсификувани брендови и претставуваат сериозен ризик за здравјето на потрошувачите.Осомничените се товарат за членство во криминална група, фалсификување, перење пари и прекршоци по законот за оружје и царински прописи. Само за количествата конфискувани при рацијата, даноците би изнесувале повеќе од 7 милиони евра.

Свет | пред 2 месеци

ДИК–ИФЕС: Фокусирана соработка за клучните стратешки приоритети на Комисијата

Членовите на Државната изборна комисија (ДИК) одржаа работен состанок со претставници на Меѓународната фондација за изборни системи (ИФЕС), на кој беше потврдена подготвеноста за продолжување и продлабочување на соработката во рамки на програмата „Поддршка на изборите во Северна Македонија“.„Од страна на директорката на Канцеларијата во Република Северна Македонија, Јоана Косма, беше истакнато дека соработката со ДИК преку проектот на Владата на Швајцарија, „Програма за поддршка на изборите во Северна Македонија“, досега резултирала со конкретни и мерливи постигнувања, особено во делот на развојот на ИТ-решенија, јакнењето на институционалните капацитети, унапредувањето на изборните процеси и зголемена доверба на граѓаните во истите.Претседателот на Државната изборна комисија, Бојан Маричиќ, нагласи дека во текот на неговиот мандат приоритет ќе бидат зајакнувањето на кредибилитетот и видливоста на Комисијата, како и нејзината отвореност кон граѓаните. Во таа насока, тој рече дека новиот состав на Комисијата ќе продолжи со реформските процеси со јасно дефиниран фокус на клучните стратешки приоритети, меѓу кои потенцирана беше потребата од ставање во функција на Центарот за континуирана обука на ДИК. Маричиќ укажа дека Центарот за обуки веќе има воспоставена законска основа и дека во следниот период, во соработка со ИФЕС, ќе се вложат напори за негово целосно оперативно функционирање, вклучително и обезбедување соодветен кадар.Во рамки на дискусијата, потпретседателот на ДИК, Абдуш Демири, се осврна на значењето на човечките ресурси и континуираната едукација како клучен елемент за одржливост на реформите. На состанокот членовите на Комисијата, кои и во претходниот состав учествувале во работата на ДИК,  ги посочи ја досегашните искуства од соработката со ИФЕС, нагласувајќи ја важноста од надградување на постигнатите резултати и обезбедување континуитет во реформските процеси.На состанокот беше заеднички констатирано дека партнерството меѓу ДИК и ИФЕС останува стратешко и во наредниот период, со цел унапредување на изборните процеси и зајакнување на довербата на граѓаните во изборниот систем“, се вели во соопштението.

Македонија | пред 2 месеци

11-годишно дете тешко повредено, со велосипед удил во дрво

Дете од Штип (11) се здобило со тешки телесни повреди, откако изгубило контрола на својот велосипед и удрило во дрво, информираат денеска од Секторот за внатрешни работи – Штип.Во соопштението се наведува дека вчера во 12.10 часот во СВР Штип од Итна медицинска помош е пријавено дека кај нив со тешки телесни повреди било донесено 11-годишно момче од Штип.Според пријавеното, малолетникот управувајќи велосипед, во близина на место викано „Сончев град“ изгубил контрола и удрил во дрво.Малолетникот е хоспитализиран во Комплексот клиники „Мајка Тереза“ во Скопје.За настанот бил известен Јавен обвинител и извршен е увид.

Македонија | пред 2 месеци

„Не може грст луѓе да трупаат пари врз здравјето на сите нас!“ – Здрава котлина утре најавува блокада

Активистите на „Здрава котлина“ најавуваат мирна блокада на три улици во Струмица како реакција на продолженото аерозагадување и недоволните мерки од надлежните. Организаторите ги повикуваат граѓаните да се приклучат и да се залагаат за чист воздух и здрав град.„По протестот и официјалното доставување на нашите барања, гледаме дека има почетна реакција од надлежните, но сè уште нема резултати за подобрување ниту пак има итни ефективни мерки против аерозагадувањето.Принципот на вградување филтри на индустријата е суштински и нема да се двоумиме да блокираме индустриски капацитети кои работат без филтри. Закани и притисоци од газдите само ќе не мотивираат повеќе, а сите такви ќе бидат соодветно пријавени.Ние сме спремни за војна со сите загадувачи, а народот нека одбере страна во таа војна!Во исто време продолжуваат палењата на бакар, а во една ситуација деновиве дури и намерно ненајавено блокирање на улица Антон Панов, од двете страни со луѓе и возила, наменски со цел прикривање на оголување на огромна количина кабел за кој претпоставуваме дека ќе се распореди и гори овие денови.Не може грст луѓе да трупаат пари врз здравјето на сите нас!Затоа, како граѓани кои бараат право на чист воздух и здрав живот, организираме мирна целосна блокада во трање од 2,5 часа на трите улици кај кружниот тек.10 февруари 202613:00 - 15:30 часотКружен тек, кај ПоштатаСѐ додека немаме ефективно чист воздух, продолжуваме со нашите иницијативи, протести и блокади во градот и околината.Низ годините се докажа дека јавниот притисок е најефикасно решение во Македонија за сите проблеми каде се бара решително преземање одговорност!Дали си за чист воздух, во чист град?Приклучи се и ти, кажи го твоето мислење!“ велат од Здрава котлина.Блокадата беше закажана за денеска, но поради најавените временски услови и дожд, блокадата се презакажа за вторник.

Македонија | пред 2 месеци

Шугата не потекнува од касарната во Велес, тврди Министерството за одбрана

Шугата е во фокусот на јавноста по информациите за неколку заболени професионални војници, но од Министерство за одбрана уверуваат дека заразата не потекнува од касарната „Алексо Демниевски Бауман“ во Велес и апелираат случајот да не се користи за манипулација и нанесување штета врз угледот на Армијата.Од Министерството нагласуваат дека станува збор за поединечен здравствен случај и дека е неточно тврдењето оти заразувањето се случило во касарнските услови. Потсетуваат дека шугата е инфективна кожна болест која се пренесува исклучиво преку директен контакт со заразено лице или преку предмети како постелнина и пешкири кои претходно биле користени од лице што веќе е носител на болеста.Според Министерството, пред приемот на професионалните војници во касарната во Велес биле преземени сите потребни подготовки. Просториите биле целосно уредени и дезинфицирани, а на војниците им биле обезбедени чисти и испрани постелнини и ќебиња. Оттаму посочуваат дека токму поради ваквите процедури, не постои основ за тврдења дека изворот на заразата е во самата касарна.Во меѓувреме, Армијата и Воено-медицинскиот центар, постапувајќи согласно здравствените протоколи, презеле мерки за спречување на евентуално натамошно ширење на болеста. Од одделението за превентивна заштита при Воено-медицинскиот центар бил извршен стручен епидемиолошки надзор, дадени биле мислења и препораки, а сите војници кои биле во контакт со заразените лица биле упатени на превентивни прегледи.За време на викендот, како што информираат од Министерството, во просториите каде што се сместени војниците била направена комплетна замена на постелнината, дезинфекција на спалните соби, ќебињата, перниците и душеците, како и перење на целокупната постелнина. Војниците биле детално информирани за симптомите на болеста и добиле насоки при појава на какви било кожни промени веднаш да се јават кај доктор.Според последните податоци од Министерството, досега се регистрирани четири лица кај кои е потврдена шугата и на сите им е пропишана соодветна медицинска терапија. Состојбата со останатите припадници се следи континуирано и се постапува според насоките на доктор епидемиолог.Од Министерството потсетуваат дека во касарната „Алексо Демниевски Бауман“, како и во другите центри за обука, на годишно ниво престојуваат голем број припадници на Армијата и на сојузничките армии, и досега не биле регистрирани вакви случаи. Токму затоа, апелираат да не се злоупотребува поединечен здравствен настан за ширење дезинформации и нарушување на угледот на Армијата.Во соопштението се нагласува и дека Министерството и Армијата, заедно со Генералштабот, континуирано работат на подобрување на условите за работа и престој. За 2026 и 2027 година се предвидени 41,3 милиони денари за реконструкција, санација и градежно-занаетчиски работи на објектите. Во изминатиот период биле обезбедени средства за реконструкција, адаптација и тековно одржување, со цел подобрување на инфраструктурата, безбедноста и условите во објектите што ги користат припадниците на Армијата, при што овој пристап ќе продолжи и во тековната година.

Македонија | пред 2 месеци

СДСМ: Додека работниците едвај врзуваат крај со крај, Владата планира купување луксузен авион

Додека работниците едвај врзуваат крај со крај, додека минималната плата не ги покрива ниту основните трошоци за живот, Владата мисли на купување авион за Мицкоски. За туристички патувања, како она во Давос, вели СДСМ.„Очигледно затоа одбива да им ги покачи платите на работниците. Одбива да се откаже од лукзуот и вели нема пари за минимална плата од 600 евра.За покачување на минималната плата и за поддршка на приватните компании се доволни 200 милиони евра, а за авион уште стотици милиони евра повеќе не се доволни.Груевски со пари на граѓаните купуваше мерцедес од 600 илјади евра и очила од 60 илјади евра.Мицкоски има часовници од 60 илјади евра вредни 150 минимални плати и сака да купува авион од стотици милиони евра, за туристички патувања.Ученикот сака да го надмине учителот во луксузирање врз грбот на народот.И Томовски запнал за авион од стотици милиони евра, како да се надева на процент од набавката за семејната фирма?Малку да не им се 161 тендер досега?Сè е бизнис во ВМРО“, се вели во соопштението.

Македонија | пред 2 месеци

(Видео) Првата фаза од булеварот „Македонија“ во тек: „Скопјани за првпат ќе добијат подземна сообраќајница“

Градот Скопје започна со реализација на првата фаза од булеварот „Македонија“, проект што ќе го трансформира урбаниот пејзаж и ќе овозможи модерна сообраќајна инфраструктура. Според градоначалникот Орце Ѓорѓиевски, завршувањето на сите фази ќе донесе побрз и побезбеден проток на сообраќај и нов квалитет на живеењето во главниот град.„Интензивно и со јасна визија се работи на првата фаза од булевар „Македонија“, проект што го менува ликот на градот и ја отвора вратата кон модерно, функционално Скопје.Со завршувањето на сите фази, скопјани за првпат ќе добијат подземна сообраќајница, решение што носи побрз проток, поголема безбедност и нов квалитет на урбаното живеење.Продолжуваме со дела, одговорно и посветено, за наше Скопје“, вели Ѓорѓиевски.

Скопје | пред 2 месеци

Трифунов: Пратениците да дојдат на минималец, па да зборуваат колку е добро со минимална плата да се живее во Македонија

Утре, со почеток во 9 часот, улиците Даме, Груев и 11 октомври пред Собранието ќе бидат блокирани од работниците. Согласно закон, најмалку 21 човек ни се потребни на двете локации по 21 човек за да ги блокираме пратениците, да не се грижат тие за тоа колку луѓе ќе излезат на улица имајќи во предвид дека блокадата треба да упати порака до пратениците, дека тие го блокираат законот за минимална плата повеќе од една година, а за истиот временски период, секоја семејство е по-сиромашно за 9500 денари месечно, затоа што вредноста на синдикалната минимална кошница е зголемена за толку пари во истиот период, изјави денес на прес-конференција претседателот на ССМ, Слободан Трифунов.„Пратениците сè уште се прават глуви и слепи на иницијативата на Сојузот на синдикатите на Македонија за зголемување на минималната плата и за зголемување на останатите работнички плати за најмалку 6000 денари, но пратениците се прават глуви и слепи за последната иницијатива на Сојузот на синдикати на Македонија за намалување на нивните плати за 80%, или да си ја намалат основицата за пресметка на платите, од просечна на минимална плата, да дојдат и тие на минималец, па потоа да зборуваат колку е добро со минимална плата да се живее во Македонија.Имајќи во предвид дека, веќе најавуваат намалување на нивните коефициенти за процентот на порастот на просечната плата или колку што си пресмета гувернерот на Народна банка (1:39) за 9,2 проценти, па јавно ги прашуваме како ќе биде уставно и законски да ги намалат коефициентите на сложеност на нивните плати за 9,2 проценти, а да не ги намалат за 80 проценти. Како 9 проценти ќе биде уставно и законски, а 80 проценти е не Уставно и незаконски. Пратениците први ќе се соочат со гневот на работниците, тие нема да можат да наплатат трошоци за доаѓање на работа, кои изнесуваат од 100, па нагоре евра, и со тоа ќе им покажеме дека, онака како работниците што доаѓаат на работа пешки или со автобус, со јавен превоз, така ќе треба и тие да дојдат истиот ден, за да им покажат на работниците дека со чувствуваат со нивната мака, заради тоа што ниту трошоците за превоз и храна, како што бара Сојузот на Синдикатите на Македонија, не ги гласаат на Собрание за да имаат право работниците на таквите трошоци.Потоа, во четврток, ќе ги блокираме газдите, односно Стопанската комора, Организација на работодавачи и бизнис конфедерација на Македонија, и наредната недела, во вторник, кога владата одржува традиционално седници, ќе бидат блокирани и владините функционери“, вели Трифунов

Македонија | пред 2 месеци

„Мајчинството не смее да биде причина за отказ“, Левица бара власта да го поддржи предлог-законот

На утрешната собраниска седница, на дневен ред е предлог-законот на Левица, преку кој се воведува заштита од отказ на бремените работнички, што во минатото претставуваше најбрутален удар врз идните мајки, велат од политичката партија Левица.„Во Македонија, и покрај тоа што формално постои забрана за отказ поради бременост, реалноста покажува дека бремените жени – особено оние вработени на определено време – се меѓу најнезаштитените работнички. Работодавците масовно ја користат законската дупка со тоа што едноставно не го продолжуваат договорот на определено време, оставајќи ги жените без работа токму во момент кога им е најпотребна сигурност.Со цел да се надмине оваа неправда, пратеничката група на Левица поднесе предлог-закон за изменување и дополнување на Законот за работните односи, кој директно ја таргетира оваа системска неправда.Постојниот Закон за работните односи, во член 101, забранува отказ за време на бременост, раѓање и родителство, но во ставот 3 јасно дозволува престанок на работниот однос ако договорот е склучен на определено време и истекол рокот. Токму оваа одредба во пракса значи дека илјадници жени остануваат без работа, без приходи и без социјална и здравствена заштита – иако формално „нема отказ“.Со предложените измени, се воведува автоматска трансформација на договорот на определено во неопределено време во случај на бременост. Ова значи дека бременоста повеќе нема да биде причина жената да остане без работа по истекот на договорот. Дополнително, се предвидува јасна забрана за престанок на работниот однос на работничка на определено време доколку таа достави потврда за бременост од овластен лекар или надлежен орган. Предлог-законот предвидува санкции за работодавачите кои нема да го почитуваат законот и нема да го трансформираат работниот однос од определено во неопределено време. Иако и досега постоеа казни (член 265), во пракса тие ретко се применуваа, што дополнително ги охрабруваше злоупотребите.Овој предлог-закон на Левица претставува обид конечно да се стави крај на практиката мајчинството да се казнува со отказ. Во држава со ниска стапка на наталитет, економска несигурност и масовна миграција, заштитата на бремените жени не смее да биде декларативна, туку реална и применлива. Бремените жени не бараат привилегии. Тие бараат сигурност, достоинство и право на работа. Овој предлог-закон е чекор кон исправување на долгогодишна неправда и јасна порака дека бременоста не смее да биде причина за дискриминација, туку основ за засилена заштита“, вели Левица.

Македонија | пред 2 месеци

Министерството за правда му подари скенер на затворот „Идризово“

Министерството за правда соопшти дека на Казнено-поправната установа Идризово ѝ е отстапен контролен скенер за детекција на опасни материи. Со новата опрема, како што информираат оттаму, ќе се унапреди безбедноста и контролата во установата.„Министерството за правда отстапи контролен скенер за детекција на опасни материјали на КПУ Идризово.Со оваа современа опрема значително се унапредува безбедноста во установата, се подобрува контролата и се зајакнува заштитата на вработените и лицата лишени од слобода.Континуираните вложувања во безбедносната инфраструктура претставуваат важен чекор кон посигурен и поефикасен пенитенцијарен систем“, велат од Министерството за правда.

Македонија | пред 2 месеци

(Видео) Филмски вооружен напад на автопат во Италија: Разбојници кренаа во воздух возила за транспорт на пари

На автопат во Италија, кој ги поврзува Лече и Бриндизи, утрово се случи драматичен вооружен напад врз возило за транспорт на пари. Инцидентот се случи во близина на градот Тутурано.Со брзата акција на полицијата од Лече, уапсени се две лица осомничени дека се членови на банда. Тие беа лоцирани во областа на северен Саленто, каде што силите на редот веднаш го насочија пребарувањето.Истрагата е во полн ек бидејќи се бараат други членови на групата.Според последните информации, напаѓачите дигнаа во воздух дури две, а не само едно возило за транспорт на пари, како што првично се веруваше, пренесува Rai News.Нападнатото возило е на компанијата BTV Battistolli, а разбојниците, за да го спречат, попречиле друго возило на патот и го запалиле. Пожарникарите и полицијата веднаш пристигнале на местото на настанот.По нападот, државниот пат Бриндизи – Лече бил привремено затворен за сообраќај во двата правци.

Свет | пред 2 месеци

Гаши: Собранието ќе работи – пратениците нека најдат начин да дојдат, пеш или порано

Претседателот на Собранието Африм Гаши на денешниот брифинг со новинарите изјави дека Собранието утре ќе работи паралелно со протестите на Сојузот на синдикатите на Македонија (ССМ).„Се договоривме сите координатори да разговараат со пратениците да најдат начин да дојдат на седница, без да го попречиме правото на протест на граѓаните. Не верувам дека некој со кола би дошол, дали ќе дојдат пеш или порано, не знам како ќе биде. Но, се договориме дека ние треба да продолжиме да работиме, а исто така ќе го почитуваме правото на протест на граѓаните. Нема да има специјално обезбедување на Собранието. Шефот на мојот кабинет се сретна со началниците во МВР, тие си имаат редовни безбедносни протоколи. МВР ги презема сите свои мерки. Се надевам дека се ќе биде мирно и ќе тече се како што треба. Така, тие ќе си протестираат, ние ќе си работиме“, кажа Гаши на денешниот брифинг со новинарите.Во однос на прашањето за коментар за синдикалните барања, Гаши смета дека проблемот не може да се реши само со зголемување на платите.„Сите се бориме за благосостојба на граѓаните. Тоа е прв наш приоритет, но не може да се реши само со зголемувањето на платите. Тоа да зависеше од мене, веднаш би ги покачил сите плати. Треба да се земе предвид целата економска слика. Мислам дека треба да се направи нивелирање на платите по приоритет, да определиме кои функции се најбитни во државата. Од таму да одиме – Претседател на државата, на Собрание, Премиер, пратеник, директор, наставници, доктори… и да имаме поправедно нивелирање на платите. Мислам дека на таков начин најправедно би било да се реши тој проблем“, рече Гаши.

Македонија | пред 2 месеци

Обвинителството во Хаг бара 45 години затвор за Хашим Тачи за воени злосторства

Обвинителите за воени злосторства во судот во Хаг денеска изјавија дека поранешниот претседател на Косово, Хашим Тачи, ги контролирал етничките албански герилци и дека тој треба да биде осуден за воени злосторства и да добие 45 години затвор.Тачи и тројца други поранешни команданти на Ослободителната војска на Косово (ОВК) се обвинети за прогон, убиства, тортура и присилни исчезнувања за време и кратко по востанието од 1998-1999 година, кое на крајот му донесе независност на регионот со мнозинство Албанци од Србија.„Обвинетите извршија злосторства против своите противници со цел да ја преземат контролата врз Косово“, изјави обвинителката Кимберли Вест пред судот во Хаг.Таа додаде дека во 1998 и 1999 година, повеќе од 100 политички противници и наводни соработници на српските безбедносни сили биле убиени, а стотици биле злоупотребени во околу педесет логори под администрација на ОВК.„Овој случај се однесува на целта на четворицата обвинети да добијат и да остварат контрола врз целото Косово“, рече Вест кон крајот на речиси тригодишното судење во Специјалниот суд за воени злосторства во Косово, со седиште во Хаг.Тачи, кој беше премиер, министер за надворешни работи и претседател на независно Косово помеѓу 2008 и 2020 година, и другите обвинети ги негираат сите обвиненија.Адвокатите на Тачи, кои се очекува да дадат завршни зборови во среда, претходно тврдеа дека 57-годишниот Тачи немал вистинска власт над ОВК и нејзините воени команданти за време и по востанието.Обвинителите тврдат дека Тачи и другите водачи на ОВК воделе насилна кампања против политичките противници, како и малцинствата етнички Срби и Роми, со цел да преземат целосна контрола врз Косово.Повеќето од жртвите на прогонот биле членови на етничкото албанско мнозинство во Косово, објави обвинителството.Специјализираниот суд за Косово, во кој работат меѓународни судии и адвокати, беше основан во 2015 година за да се занимава со случаи на воени злосторства според косовскиот закон против поранешните герилци на ОВК. Многу Косовари веруваат дека судот е пристрасен и ги сметаат командантите на Ослободителната војска на Косово за херои кои го ослободија Косово од репресивната српска Влада.

Свет | пред 2 месеци

РКЕ: Горивата остануваат со иста цена, поевтинува само мазутот

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши намалување на малопродажните цени на нафтените деривати во просек за 0,14% во однос на одлуката од 2.2.2026 година.Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) не се менуваат.Малопродажната цена на Мазутот М-1 НС се намалува за 0,235 ден/кг и сега ќе изнесува 33,650 ден/кг.Од 10.2.2026 година од 00:01 часот максималните цени на нафтените деривати ќе изнесуваат:Моторен бензин ЕУРОСУПЕР БС – 95 72,00 (денари/литар)Моторен бензин ЕУРОСУПЕР БС – 98 74,00 (денари/литар)Дизел гориво ЕУРОДИЗЕЛ БС (Д-Е V) 68,00 (денари/литар)Масло за горење Екстра лесно 1 (ЕЛ-1) 67,00 (денари/литар)Мазут М-1 НС 33,650 (денари/килограм)

Македонија | пред 2 месеци

Лажни лекари и сообраќајни несреќи: Притвор за маж од ресенско осомничен за серија измами, стари лица останале без 7.000 евра и злато

Министерство за внатрешни работи информира дека е лишен од слобода 40-годишен маж од ресенско, осомничен за повеќе измами врз повозрасни лица во Битола, при што судија на претходна постапка му определил мерка притвор во траење од осум дена.СВР Битола, во координација со Одделот за криминалистичка полиција, Регионалниот центар за гранични работи Запад и Регионалниот центар за гранични работи Југ, до Основното јавно обвинителство Битола поднесе кривична пријава против В.П. (40) од селото Стење, ресенско, со престој во Битола, како и против едно непознато лице, поради постоење основи на сомнение за сторено кривично дело „измама“ по член 247 став 1 од Кривичниот законик.Според информациите од МВР, на 5 февруари 2026 година, околу 11:30 часот во Битола, осомничените со цел да прибават противправна имотна корист довеле во заблуда 72-годишна битолчанка. Второосомничениот ѝ се јавил на мобилен телефон, лажно претставувајќи се и тврдејќи дека нејзината снаа е тешко повредена и дека итно се потребни пари и злато за операција. По кратко време, соучесникот дошол во домот на оштетената, која му предала златна огрлица и златно ланче со привезоци, со што сторителите се стекнале со противправна корист од околу 40.000 денари.Само еден ден подоцна, на 6 февруари 2026 година, околу 9:30 часот, во близина на Саат-кулата во Битола, истите лица измамиле уште една 76-годишна битолчанка и нејзиниот сопруг. Во овој случај, второосомничениот повторно се јавил телефонски, претставувајќи се како доктор од охридска болница и тврдејќи дека нивната внука е тешко повредена во сообраќајна несреќа и дека мора итно да се изврши операција. Оштетените, според договореното, отишле кај Саат-кулата и на првоосомничениот му предале 7.000 евра.По пријавувањето на случаите, полициските службеници презеле низа мерки и активности за нивно расчистување. Извршени биле претреси на повеќе локации што ги користел осомничениот В.П., при што биле пронајдени предмети за кои се сомнева дека потекнуваат од кривичните дела. По тоа, тој бил лишен од слобода, против него била поднесена кривична пријава, а судот му определил притвор од осум дена.Од МВР информираат дека интензивно се преземаат мерки и активности за пронаоѓање и лишување од слобода и на второосомниченото лице.

Македонија | пред 2 месеци

„Секоја џукела која мисли поинаку е обична режимска будала што заслужува да биде тепан“, Стеваноски на информативен разговор во МВР

Адвокатот Жаре Стеваноски бил повикан на разговор во Полициската станица во Прилеп на информативен разговор поврзан со негов пост на социјалните мрежи од 28 јануари 2026 година.Оваа информација, заедно со свој коментар и реобјава на постот преку социјалните мрежи ја сподели самиот Стеваноски.„Денес бев повикан во МВР ПС Прилеп заради информативен разговор за овој статус.Мојата изјава е следна: 'Точно е дека го објавив статусот на 28.01.2026 година и секоја џукела која мисли поинаку е обична режимска будала што заслужува да биде тепан'" - пишува Стеваноски во објавата.

Коментари | пред 2 месеци