(Видео) Милитанти на ИСИС пукале за време на рација – ранети се седум турски полицајци

Припадници на терористичката организација Исламска држава отвориле оган врз полицијата и раниле седум полицајци за време на рација на северозападот на Турција, објавија државните медиуми.Судирот се случил во округот Елмали, во провинцијата Јалова, јужно од Истанбул, кога полицијата упаднала во куќа во која се криеле милитанти, јави агенцијата „Анадолу“. На помош биле испратени и специјални полициски единици од соседната провинција Бурса.Како што се проширил судирот на улиците, пет училишта во областа биле затворени во текот на денот, објави приватната телевизија НТВ. Властите, од претпазливост, ја прекинале снабдувањето со гас и електрична енергија, а на цивили и возила им бил забранет влез во населбата.Според „Анадолу“, ниту еден од ранетите полицајци не е во тешка состојба.Минатата недела приведени 115 екстремистиМинатата недела полицијата спроведе десетици истовремени рации и приведе 115 припадници на екстремистичката група, кои наводно планирале напади за време на божиќните и новогодишните празници. Тогаш официјални лица посочија дека групата повикувала на насилство, особено против немуслимани, за време на празничниот период.Исламска држава во последниве години изврши низа смртоносни напади во Турција, меѓу кои и пукањето во ноќен клуб во Истанбул за време на дочекот на Новата година на 1 јануари 2017 година, кога беа убиени 39 лица.

Свет | пред 4 месеци

Застрашувачка статистика во декември: 18.318 прекршоци, 123 уапсени возачи

Во периодот од 01.12.2025-28.12.2025 како резултат на редовните сообраќајни контроли што ги реализираат полициските службеници од сите сектори за внатрешни работи на патиштата низ земјава, од вкупно 18.318 издадени платни налози, 4.019 прекршоци се однесуваат на возачи кои не ја почитувале пропишаната брзина на движење.Лишени од слобода за безобзирно управување на возило согласно член 297-а од Кривичниот законик биле 123 лица, од кои 100 за возење под дејство на алкохол, 13 за возење со брзина поголема од дозволената во населено место, седум за возење со брзина поголема од дозволената надвор од населено место, три за возење во забранет правец.Понатаму, според статистичкиот преглед од полициските активности, во текот на месец декември евидентирани се 5.018 прекршоци за неправилно паркирање, 1.843 мерки се изречени за возачи што управувале возило без возачка дозвола, како и 679 санкции за возење под дејство на алкохол.Од друга страна пак, а согласно одредбите од Законот за безбедност на сообраќајот на патиштата санкционирани биле 18 возачи на мотоцикли за неносење заштитен шлем, а санкционирани се и 415 пешаци. Исто така санкционирани се 1.046 учесници во сообраќајот кои што не користеле сигурносен појас. Согласно Законот за возила, 322 возила биле отстранети од сообраќај заради тоа што биле нерегистрирани, а 172 заради техничка неисправност. Санкционирани се и 101 возач поради неисполнување на пропишаните услови во однос на затемнувањето на стаклата на возилата (фолии).Сообраќајните контроли продолжуваат и во наредните денови. Апелираме до сите учесници во сообраќајот да ги почитуваме сообраќајните правила и прописи и заеднички да придонесеме за побезбедни патишта.

Македонија | пред 4 месеци

„Па каков е тој ‘Сејф сити’ кога нема полиција по улиците за овој народ? За таа стока што вози 150 на Трета македонска бригада и на Партизанска, камерите не бркаат работа“

Ина Многуфина со остра јавна реакција го доведе во прашање ефектот од системот „Сејф сити“, оценувајќи дека камерите не можат да ја заменат присутната и активна полиција на улиците. Во објава на социјалните мрежи, таа посочи дека секојдневните сообраќајни прекршувања, особено дивеењето со големи брзини, остануваат несанкционирани во реално време, а граѓаните се оставени без чувство на безбедност.„Па каков е тој ‘Сејф сити’ кога нема полиција по улиците за овој народ? За таа стока што вози 150 на Трета македонска бригада и на Партизанска, камерите не бркаат работа“, напиша Многуфина, алудирајќи на конкретни сообраќајни инциденти забележани претходниот ден.Таа смета дека системот базиран исклучиво на видео-надзор служи претежно за наплата на казни, но не и за превенција и директна интервенција кон ризичните возачи. Според неа, проблематичните учесници во сообраќајот не се плашат од камери, туку од непосредна полициска контрола.„Си бара тоа полиција – ‘добар ден господине, документи, излезете од возилото, отворете багажник, каде брзате, дувајте тука’. Сѐ тоа“, наведува таа, потенцирајќи дека само физичкото присуство на полицијата може да делува воспитно и одвраќачки.Во продолжение, Многуфина оценува дека концептот на целосна автоматизација на контролата е погрешен и создава лажна слика за ред и безбедност. „Камери и демек завршивме работа. Камерите ќе донесат само пари од казни. Проблематичните си бараат друг третман“, заклучува таа.

Коментари | пред 4 месеци

Сомнежи за парво вирус во пансион за кучиња во Скопје: сопственичка тврди дека миленикот ѝ угинал по престој во „Ав, ав“, заразени и други миленици

Ана Пејковска тврди дека нејзиното куче починало откако било оставено на чување во пансионот за кучиња „Ав, ав“, посочувајќи дека животното било вратено во тешка здравствена состојба и заразено со парвовироза. Таа за случајот јавно проговори на социјалните мрежи, каде објави дека, според неа, во пансионот има присуство на парво вирус и ги повика сопствениците итно да ги земат своите миленици.„‘Ав, ав’ ми го убија кучето. Сите да си ги земете и однесете кучињата дома. Во хотелот има парво вирус. Земете си ги со време, пред да ви ги изгладнат без да ви кажат, со денови, и да ви умрат во раце штом ги земете“, напиша Пејковска во јавната објава.Според нејзиното сведоштво, кучето по име Мајло престојувало десет ноќи во пансионот. На 25 декември, околу 17 часот, ѝ било вратено со објаснување дека тој ден не јадел и бил нерасположен. Таа тврди дека веднаш по преземањето, уште пред да стигнат дома, кучето повратило и се онесвестило, по што било однесено на итен ветеринарен преглед.„На ветеринар ни рекоа дека има парво вирус и дека е речиси во крајна фаза. Кога ја контактирав ветеринарката за која ми беше кажано дека рекла дека кучето е добро, таа ми потврди дека имало крв во изметот – информација што јас никогаш не ја добив од пансионот. Мајло беше со обилно крвавење, од 5,5 килограми паднат под четири. Ми го вратија како сенка од куче. Ова не се случува за еден ден. Ова е резултат на денови болка, гладување и игнорирање“, наведува Пејковска.Таа посочува дека, и покрај обидите на ветеринарите со инфузии и терапии, состојбата била веќе критична и кучето починало. Според неа, доколку пансионот навреме реагирал и ја информирал за здравствените проблеми, постоела реална шанса животното да преживее.Редакцијата на „Скопје1“ утринава побара став од пансионот за кучиња „Ав, ав“, но до моментот на објавување на овој текст не добивме одговор, ниту реакција на поставените прашања.Во меѓувреме, Пејковска објави и комуникација, за која тврди дека била водена меѓу пансионот и друг корисник на нивните услуги, кој прашувал дали неговото куче било во контакт со заразениот и починат Мајло. Според објавените принт-скринови, сопственикот бил уверуван дека контакт немало, но подоцнежните тестирања покажале дека и тоа куче, иако возрасно и со претходни здравствени проблеми, било позитивно на парво вирус.Сведоштво објави и извесна Викторија Арсова, која тврди дека била еден ден на пракса во пансионот и дека таму видела, како што наведува, загрижувачка состојба. Таа во објава пишува дека кучињата биле сместени во боксови без вода, спиеле на плочки, а излегувањето надвор било краткотрајно и служело главно за фотографирање за социјалните мрежи. Арсова тврди и дека била сведок на груб однос кон животните, при што тие биле удирани со метла за да се придвижат во боксот.Дополнителни реакции се појавија и на официјалната фејсбук-страница на пансионот, каде корисници бараат објектот привремено да се затвори и да се изврши целосна дезинфекција поради сомнеж за присуство на парво вирус. Во коментарите се поставуваат и прашања дали пансионот планира јавно да информира дека просториите се потенцијално контаминирани.Во уште едно сведоштво, објавено без име, а споделено од Пејковска, сопственик на куче наведува дека неговиот миленик по шест ноќи престој во пансионот бил вратен значително ослабен и подоцна бил дијагностициран со парвовироза. „Ми рекоа дека бил под стрес и дека затоа не јадел“, стои во објавениот принт-скрин.„Скопје1“ испрати прашања и до Агенцијата за храна и ветеринарство, од каде се очекува одговор дали пансионот „Ав, ав“ поседува валидна лиценца за работа, кој орган ја издал, дали досега имало пријави против објектот и дали е извршен инспекциски надзор по актуелните наводи.Јавно реагираше и пејачката Бојана Скендеровски.Парвовирозата е тешко вирусно заболување кај кучињата, кое најчесто ги погодува помладите животни, но може да се јави и кај возрасни кучиња. Станува збор за исклучително заразна болест, при која заразените животни претставуваат сериозен ризик за останатите кучиња, поради што е неопходна изолација и строги мерки за дезинфекција. Ветеринарите предупредуваат дека навремената реакција е клучна за преживување, а институционалната контрола на објектите за чување животни е од суштинско значење за спречување вакви трагични случаи.

Скопје | пред 4 месеци

ВМРО-ДПМНЕ бара одговори од Венко Филипче околу „златната виза“ за Дубаи и евентуалните инвестиции таму

ВМРО-ДПМНЕ денеска побара од лидерот на СДСМ, Венко Филипче јавно да објасни на која основа се стекнал со таканаречена „златна виза“ во Дубаи и дали зад тоа стојат инвестиции во недвижен имот или бизнис.Реакцијата следи по сведоштвото на поранешниот соработник на Зоран Заев, Тома Аврамски, кој тврдеше дека поранешниот премиер гради облакодер од 42 ката во Дубаи. Од СДСМ и од самиот Филипче претходно потврдија дека Заев гради зграда во Дубаи, како и дека и двајцата имаат „златни визи“, но посочија дека Филипче не е партнер во проектот.Од ВМРО-ДПМНЕ потсетуваат дека Филипче во минатото изјави оти визата ја добил поради преговори за можен професионален ангажман во здравствена установа во Дубаи, но, според партијата, до јавноста досега не биле презентирани документи за тоа. Во соопштението дополнително се наведува дека за добивање „златна виза“ е потребна инвестиција од најмалку 500 илјади долари во недвижности или бизнис.Партијата се повикува и на тврдењето на Аврамски дека и Заев и Филипче поседуваат станови во Дубаи, барајќи одговор дали Филипче вложувал во недвижен имот и дали тоа е основа за визата. Во соопштението се наведува и дека, доколку навистина е вложена сума од тој износ, јавноста има право да знае од кои извори се обезбедени средствата.Од ВМРО-ДПМНЕ апелираат Филипче да обелодени документи доколку визата е поврзана со работен ангажман во странство, со цел, како што наведуваат, „да се расчистат дилемите“.

Македонија | пред 4 месеци

(ВИДЕО) Лукашенко падна на мраз за време на хокејски натпревар, соиграч му помогна да стане

71-годишниот белоруски претседател Александар Лукашенко падна на мраз за време на хокејски натпревар. Снимката од настанот брзо се прошири на социјалните мрежи.На видеото се гледа како хокеар со дрес со број 68 ненамерно го удира Лукашенко одзади, кој носеше дрес со број 01. По судирот, Лукашенко ја губи рамнотежата и паѓа на мразот, удирајќи со главата од површината на лизгалиштето.Во екипата на Лукашенко, дресот со број 68 го носел Јарослав Чуприс, поранешен играч на белоруската репрезентација. По падот, натпреварот накратко бил прекинат, а Чуприс веднаш му помогнал на Лукашенко да стане.Синот на Лукашенко постигна голСè е во ред. Се чувствувам добро, освен истегнувањето на мускул во грбот. Се подготвувам за следниот натпревар“, изјави Лукашенко по средбата.Прес-службата на Лукашенко соопшти дека натпреварот завршил нерешено 5:5 и дека неговиот син, Николај, го израмнил резултатот со гол постигнат триесет секунди пред крајот на третата третина.

Свет | пред 4 месеци

(Видео) Израелската војска доби ново моќно оружје – „Железен ласерски сноп“

Израелското Министерство за одбрана соопшти дека на израелската војска ѝ бил испорачан првиот оперативен систем за пресретнување проектили со високoенергетски ласер, развиен од компанијата „Рафаел Адванст Дифенс Системс“. Системот го носи називот Iron Beam („Железен ласерски сноп“).Системот, кој за време на обемни тестирања успешно пресретнувал ракети, минофрлачки гранати и беспилотни летала, ќе биде преземен од военото воздухопловство и ќе се вгради во повеќеслојниот систем за противвоздушна одбрана, заедно со постојните системи „Железна купола“, „Давидова пачка“ и „Стрела“.Министерот за одбрана на Израел, Израел Кац, примопредавањето го нарече „историски момент“, посочувајќи дека „за првпат во светот систем за пресретнување со високoенергетски ласер ја достигнал својата оперативна зрелост“. Тој додаде дека системот „ги менува правилата на играта и испраќа јасна порака до сите непријатели – не нè искушувајте“.Генералниот директор на Министерството за одбрана, Амир Барам, изјави дека испораката „значи премин од фаза на развој во сериско производство“, опишувајќи го „Железниот ласерски сноп“ како „само почеток на технолошка револуција“. Тој нагласи дека се очекува системот значително да ги подобри одбранбените капацитети на Израел, како и односот меѓу трошоците и заканите, бидејќи досегашните ракети-пресретнувачи се исклучително скапи.Директорот на „Рафаел“, Јоав Тургеман, изјави дека компанијата е „горда што го испорачува најнапредниот ласерски систем во светот за пресретнување воздушни закани“.Системот на хебрејски се нарекува Or Eitan („Светлината на Ејтан“), во спомен на капетанот Ејтан Остер, 22-годишен командир од единицата Егоз, кој загина во борбите против Хезболах на југот од Либан во октомври 2024 година. Неговиот татко, кој бил дел од тимот за развој на системот, на церемонијата го изговорил еврејскиот благослов Shehecheyanu, со кој се изразува благодарност за нови и посебни моменти.„Железниот ласерски сноп“ се развива повеќе од десет години, уште од неговото прво претставување во 2014 година. Во септември годинава беше прогласен за оперативен, по завршувањето на развојот и конечните тестирања.Системот не е замислен како замена за „Железна купола“ или другите противвоздушни системи, туку како нивна надополнување. Наменет е за пресретнување помали проектили, додека поголемите закани ќе продолжат да ги пресретнуваат посилните ракетни системи, како „Давидовата пачка“ и „Стрела“.Сè додека постои постојан извор на енергија за ласерот, нема ризик системот да остане без „муниција“. Поради тоа, официјални претставници го опишуваат како потенцијална пресвртница во одбраната од ракетни напади. Главниот недостаток на ваквите ласерски системи е тоа што не функционираат добро во услови на слаба видливост, вклучувајќи густа облачност.

Свет | пред 4 месеци

95 проценти усогласеност, но без конечен договор: што го кочи мирот во Украина

Американскиот претседател Доналд Трамп и украинскиот претседател Володимир Зеленски соопштија дека е постигнат значителен напредок во разговорите за завршување на војната во Украина, по нивната средба одржана на Флорида. Иако двајцата лидери ги оценија разговорите како исклучително позитивни, Трамп предупреди дека остануваат „едно или две многу чувствителни прашања“ кои допрва треба да бидат решени, при што како клучна пречка повторно го посочи прашањето за територијата.Обраќајќи се пред медиумите во Мар-а-Лаго, Зеленски изјави дека е постигната согласност за околу 90 проценти од мировниот план од 20 точки, додека Трамп наведе дека договорот за безбедносни гаранции за Украина е речиси целосно усогласен, со околу 95 проценти согласност. Сепак, американскиот претседател не даде конкретно ветување за распоредување американски трупи или за директна воена заштита од евентуални идни напади.Зеленски најави дека украинските и американските преговарачки тимови ќе продолжат со интензивни средби уште наредната недела, со цел финализирање на договорот за ставање крај на конфликтот кој трае речиси четири години. Во порака објавена на Телеграм, украинскиот претседател нагласи дека разговорите биле суштински и дека е постигнат напредок како резултат на повеќенеделната работа на двата тима.Најтешкото прашање, според Трамп, останува статусот на регионот Донбас, кој во голем дел е под руска контрола. Американскиот претседател потврди дека предлогот за трансформација на Донбас во демилитаризирана зона сè уште не е усогласен. Во моментов, Русија контролира околу 20 проценти од украинската територија, вклучувајќи околу 75 проценти од Доњецката област и речиси целосно Луганската област.„Дел од таа земја е окупиран, а дел е предмет на спор и ќе мора да се реши“, изјави Трамп, додавајќи дека станува збор за исклучително комплексно прашање. Москва бара Украина целосно да се повлече и од преостанатите делови на Донбас кои се под контрола на Киев, додека украинската страна предлага тие области да добијат статус на слободна економска зона, под украински надзор.Во дипломатска позадина на средбата со Зеленски, Трамп претходно телефонски разговарал со рускиот претседател Владимир Путин. Иако не изнесе детали, американскиот претседател изјави дека смета оти Путин „сака Украина да успее“, но истовремено призна дека Москва не е подготвена за примирје кое би овозможило одржување референдум за територијалните прашања. „Го разбирам тој став“, додаде Трамп.Рускиот советник за надворешна политика Јуриј Ушаков потврди дека разговорот бил инициран од американската страна и дека ставот на Москва е оти привремено примирје, како што предлагаат Европската Унија и Украина, само би го пролонгирало конфликтот. Трамп воедно отвори можност за тројни разговори меѓу САД, Русија и Украина, оценувајќи дека таков формат би можел да се реализира „кога ќе дојде вистинскиот момент“.Од европските сојузници стигнаа внимателно позитивни реакции. Зеленски најави дека украински претставници би можеле да ја посетат Белата куќа во јануари, можеби заедно со европски лидери. Претседателката на Европската комисија, Урсула фон дер Лајен, го поздрави „добриот напредок“ во разговорите, нагласувајќи дека цврстите безбедносни гаранции за Украина се неопходни од првиот ден.Францускиот претседател Емануел Макрон најави дека почетокот на јануари ќе донесе средба во Париз на земјите од таканаречената „Коалиција на подготвени“, со цел прецизирање на конкретните придонеси за долгорочната безбедност на Украина. Според него, фокусот ќе биде ставен на стабилен мировен договор што нема да остави простор за нова ескалација на конфликтот.

Свет | пред 4 месеци

По период на стагнација, биткоинот бележи силен раст на азиското тргување

Цената на биткоинот забележа силен раст за време на азиското тргување, надминувајќи ја границата од 90.000 долари, што се толкува како можен сигнал за опоравување на криптопазарот, по периодот на стагнација во кој најпознатата криптовалута го пропушти таканаречениот „божиќен раст“ што ги подигна берзанските индекси на рекордни нивоа.Биткоинот порасна за 3,1 процент, достигнувајќи вредност од над 90.200 долари на тргувањето во Сингапур, додека етерот забележа раст од околу 4 проценти, пробивајќи ја границата од 3.000 долари, објави „Блумберг“.За разлика од пазарот на акции, каде индексот S&P 500 пред Божиќ достигна историски највисоки вредности, биткоинот во тој период главно се движеше без значајни осцилации. Криптопазарот сè уште ги чувствува последиците од повеќенеделната распродажба што започна во октомври, кога беа ликвидирани позиции со финансиска полуга во вредност од околу 19 милијарди долари, што предизвика силен удар врз довербата на инвеститорите.По овој шок, пазарот влезе во фаза на воздржаност, а вложувачите избегнуваа поголеми ризици. Сепак, последниот раст упатува на промена на расположението. Според главниот инвестициски директор на компанијата „ReserveOne“, Себастијан Беа, актуелното движење на цената е делумно поттикнато од краткорочни мали инвеститори кои преземаат сè поголеми позиции на пазарот на фјучерси.Податоците на аналитичката платформа CryptoQuant покажуваат дека стапката на финансирање за биткоинот, еден од клучните индикатори за пазарното расположение, е на највисоко ниво од 18 октомври, што укажува на зголемена побарувачка за т.н. „биковски“ позиции на пазарот на термински договори.Воедно, отворениот интерес за фјучерс-договорите на биткоинот почна да се опоравува од неодамнешните најниски вредности, иако, според Беа, тој сè уште е значително под претходните врвови забележани во октомври, кога цената на биткоинот го достигна историскиот максимум од 126.251 долар.И покрај позитивните сигнали, поширокиот контекст останува сложен. Иако криптовалутите сè повеќе се прифаќаат од институционалните инвеститори и иако политичката клима во САД, под водство на про-крипто ориентираниот претседател Доналд Трамп, донесе неколку поволни регулаторни потези, биткоинот во текот на 2025 година сè уште бележи пад од околу 4 проценти.Последниот раст, сепак, повторно го враќа оптимизмот на криптопазарот и отвора прашање дали се работи за краткорочен технички одскок или за почеток на посериозен и подолгорочен тренд на закрепнување.

Свет | пред 4 месеци

(Видео) Патриотска ноќ со Влатко Миладиновски: Само македонски песни, знаме со 16 краци и најголемо оро

Во спортскиот центар „Борис Трајковски“ во Скопје, Влатко Миладиновски одржа концерт кој ќе остане запаметен како редок и значаен момент за македонската музичка сцена. За првпат, во пресрет на Новата година, во салата цела вечер одекнуваше исклучиво македонска музика.Концертот прерасна во вистинска патриотска вечер, со исполнување на традиционални и современи македонски песни, додека на трибините се развеа македонското знаме со 16 краци. Во салата се формираше едно од најголемите македонски ора, во кое се вклучија и познати и непознати, обединети во заедничка игра и песна.Со Влатко Миладиновски на сцената настапија и „Некст Тајм“, кои ја изведоа народната „Ја излези Ѓурѓо“, како и Спасен Сиљановски, кој ја отпеа „Ќе ти дојдам“. Атмосферата беше исполнета со емоции, аплаузи и заедничко пеење, што дополнително ја зацврсти симболиката на вечерта.Концертот траеше до полноќ и беше дочекан со воодушевување од публиката, која ја препозна оваа музичка вечер како силна порака за значењето и континуитетот на македонската музика. Настанот се оценува како важен чекор во афирмацијата и зачувувањето на македонскиот музички идентитет, особено во период кога ваквите сцени се реткост.

Магазин | пред 4 месеци

Партијата на Албин Курти убедливо победи на изборите во Косово

Партијата на косовскиот премиер Албин Курти оствари убедлива победа на вонредните парламентарни избори одржани во неделата на Косово, покажуваат прелиминарните официјални резултати, со што се отвора можност за надминување на долготрајниот политички ќор-сокак што ја држеше земјата во институционална блокада.Според податоците на Централната изборна комисија, движењето Самоопределување (Ветевендосје) освоило 49,79 проценти од гласовите, по пребројани околу 95 проценти од гласачките места. На второто место се пласираше Демократската партија на Косово со 21,18 проценти, додека Демократската лига на Косово го зазеде третото место со 13,77 проценти од освоените гласови.По објавувањето на првичните резултати, Курти изјави дека е неопходно институциите да се конституираат без одлагање и упати повик до опозициските партии за соработка во Собранието. Тој порача дека стабилноста и функционалноста на државата мора да бидат ставени пред партиските интереси, нагласувајќи дека Косово нема време за нови политички блокади.Изборите беа одржани по неуспехот да се формира влада по гласањето во февруари, кога Самоопределување освои околу 42 проценти од гласовите, но не успеа да обезбеди парламентарно мнозинство. Тој резултат доведе до продолжување на политичката криза и повторно излегување на граѓаните на гласање. Конечните резултати се очекува да бидат објавени по пребројувањето на гласовите од дијаспората.За самостојно формирање влада, на партијата на Курти ѝ се потребни најмалку 61 пратеник од вкупно 120 во Собранието. Излезноста на овие избори изнесувала околу 45 проценти од запишаните гласачи, што претставува зголемување во однос на февруарските избори, кога гласале 40,6 проценти од електоратот.Нов неуспех во формирањето влада би ја продлабочил кризата во момент кога Косово се соочува со сериозни институционални обврски. Новиот парламентарен состав треба да избере претседател на државата и да ратификува кредитни договори во вредност од околу една милијарда евра со Европската Унија и Светската банка, чиј рок истекува во наредните месеци.Опозициските партии и натаму одбиваат коалиција со Курти, критикувајќи го неговиот однос со западните сојузници и политиките што ги води во северниот дел на Косово, населен претежно со српско население. Од друга страна, Курти ја обвинува опозицијата за институционалниот застој и за, како што наведува, блокирање на реформските процеси.Со речиси половина од освоените гласови, Самоопределување сега е во значително посилна позиција од претходно, а политичката сцена во Косово влегува во период во кој ќе се покаже дали изборниот резултат ќе донесе стабилност или ќе отвори ново поглавје на политичка неизвесност.

Македонија | пред 4 месеци

Судењето за пожарот во „Пулс“ продолжува: Во фокусот сведочењата на оштетените

Во судницата во Идризово при Основниот кривичен суд Скопје денеска продолжува судењето за пожарот во дискотеката „Пулс“ во Кочани, една од најголемите трагедии во поновата историја на државата. На денешното рочиште е предвидено сведочење на законските застапници на оштетените, односно на семејствата на жртвите и на повредените, со што постапката влегува во чувствителна фаза во која фокусот се става врз последиците од трагедијата и барањата за правда и одговорност.На претходното рочиште, по предлог на Обвинителството, сведочеше сопственикот на авто-лимарски сервис кој се наоѓа веднаш до дискотеката „Пулс“. Тој од своја перспектива, како долгогодишен сосед на објектот, зборуваше за реновирањата што се вршеле со години, како и за кобната ноќ кога пожарот го зафати клубот. Неговото сведочење опфати и детали за условите во објектот, пристапите, излезите и хаосот што настанал во обидите за спасување на присутните.Претходно, одбраната на обвинетиот Александар Нацев во воведниот збор истакна дека во текот на постапката ќе докаже дека Нацев не бил ниту одговорно лице, ниту фактички сопственик на правното лице „Рубикон“, како и дека припадниците на обезбедувањето ноќта на трагичниот настан немале обврска да го контролираат бројот на посетители, да вршат проверки на безбедносната опрема или на сигурносните услови во објектот. Одбраната тврдеше и дека обвинетото правно лице немало законска обврска да достави план за обезбедување.На почетокот на денешното рочиште, Основниот кривичен суд Скопје донесе одлука постапката за овој предмет да се спои со друга поврзана постапка, со цел поцелосно и поефикасно утврдување на фактите и одговорноста.Во воведното излагање на Обвинителството, обвинителот Борче Јанев нагласи дека судењето претставува чекор кон утврдување и на лична и на институционална одговорност. Тој истакна дека општеството мора да се соочи со вистината за тоа кој дозволил, кој премолчел и кој не спречил дискотеката „Пулс“ да функционира во услови што ја претвориле во смртоносна стапица. Јанев порача дека не е пресудно само кој го запалил огнот, туку и кој имал моќ и должност да го спречи, посочувајќи дека трагедијата не е резултат исклучиво на пиротехничките средства, туку на долгогодишни системски пропусти, институционален молк и отсуство на ефективна контрола. Според него, правдата не се бара како одмазда, туку како неопходна последица на незаконитост и занемарување на службените обврски.Сите обвинети на почетокот на судењето изјавија дека не се чувствуваат виновни за трагедијата во која загинаа 63 лица, а над 200 беа повредени. Дел од нив изразија сочувство до семејствата на жртвите, но останаа на ставот дека не сториле тешки дела против општата сигурност.Повеќемина обвинети, преку своите бранители, ја оспорија основаноста на обвинението, тврдејќи дека не презеле дејствија што би можеле да доведат до пожарот, дека поседувале валидна документација и дека трагедијата е резултат на пошироки институционални пропусти, а не на индивидуална вина. Одбраните најавија изведување докази и сведоци со кои, според нив, ќе се потврди оваа теза.Во досегашните воведни обраќања своја одбрана изнесоа и сопственикот на дискотеката „Пулс“, Дејан Јованов, сопственикот на „МММ кафе“ Митко Стојанов, обезбедувачот Стојанчо Димитриев, како и Гроздан Милковски, сопственик на објектот. Јованов изјави дека и по девет месеци притвор не може да поверува во трагедијата и дека како родител никогаш не би дозволил небезбедни услови во клубот. Неговиот син, третообвинетиот Михаил Јованов, преку одбраната тврдеше дека против него нема ниту еден конкретен доказ и дека е обвинет исклучиво поради семејната поврзаност.Бранителите на Митко Стојанов истакнаа дека обвинението против него е неосновано и дека нема причинско-последична врска меѓу неговите постапки и пожарот, додека одбраната на Гроздан Милковски нагласи дека закупот на објектот бил законит, дека поседувал валидна документација и дека не учествувал во адаптацијата на просторот.Проектантката Милка Едровска, преку својата одбрана, наведе дека била ангажирана исклучиво за сообраќајно решение за паркинг и дека немала никаква улога во адаптацијата или во внатрешната структура на објектот. Градежните инспектори, пак, тврдат дека не можеле да постапуваат без пријава или наредба и дека трагедијата не произлегува од градежни пропусти.Поранешниот градоначалник на Општина Кочани, Ратко Димитровски, преку својот бранител оцени дека обвинението претставува преседан, наведувајќи дека уште пред отворањето на објектот поднел барање за неиздавање дозвола за работа. Одбраната на поранешните градоначалници Николчо Илијев и Љупчо Папазов тврди дека тие постапувале согласно закон, дека надзорот не бил во нивна надлежност и дека обвинението се темели на нецелосна истрага.Обвинетите од обезбедувањето, преку своите адвокати, наведоа дека обвинението е изградено врз претпоставки, дека нивните задачи биле ограничени и дека не можеле реално да го спречат внесувањето пиротехника, повторно посочувајќи ги институционалните пропусти како суштинска причина за трагедијата.Поранешните министри за економија Крешник Бектеши и Ваљон Сараќини, како и поранешните директори на Дирекцијата за заштита и спасување, во воведните говори ги негираа обвиненијата, нагласувајќи дека немаат вина. Одбраната на обвинетите службеници од Министерството за економија истакна дека тие имале исклучиво административни надлежности поврзани со лиценците, без можност за теренска инспекција, и дека работеле врз основа на документација заверена од други институции. Пазарните инспектори, пак, упатија сериозни забелешки кон Обвинителството, наведувајќи дека правната конструкција е погрешна и дека во јавноста се изнесуваат неточни информации за нивните надлежности.Пожарот во дискотеката „Пулс“ избувна на 16 март 2025 година, за време на настап на групата „ДНК“. Во трагедијата загинаа 63 лица, а над 200 беа повредени. Објектот работел со години без минимално-технички услови, со реконструкции без дозволи, без систем за противпожарна заштита и со активирање пиротехнички средства без одобрение, при што во клубот имало далеку повеќе посетители од дозволеното, меѓу кои и малолетници.Дополнителен пресврт во јавната перцепција донесоа наодите на Истражувачката репортерска лабораторија, според кои кај голем дел од жртвите примарна причина за смртта не биле изгорениците, туку интоксикацијата со отровни гасови. Овие сознанија отворија сериозни прашања за употребата на лесно запаливи и токсични материјали во ентериерот и звучната изолација, спротивно на безбедносните стандарди.Речиси една година по трагедијата, случајот „Пулс“ прераснува во симбол на борбата против неказнивоста и тест за капацитетот на правосудниот систем да обезбеди неселективна правда. Очекувањата на јавноста се дека судскиот процес ќе резултира со јасно утврдена одговорност и ќе стави крај на долгогодишната пракса на институционален молк и занемарување на безбедноста во угостителските објекти.

Македонија | пред 4 месеци

(Видео) Кина започнува големи воени вежби околу Тајван и испраќа остро предупредување

Кинеската армија денеска најави мобилизација на копнените, поморските, воздухопловните и ракетните сили за спроведување големи воени вежби во водите и воздушниот простор околу Тајван. Маневрите, кои го носат називот „Мисија правда–2025“, имаат за цел, како што соопшти Пекинг, да испратат „сериозно предупредување“ до сите кои се залагаат за независност на Тајван, како и до надворешните сили што, според кинеските власти, се мешаат во внатрешните работи на островот.Според соопштението на Источното командно подрачје на кинеската армија, вежбите ќе ја тестираат борбената подготвеност на силите, како и способностите за блокада и контрола на клучни пристаништа и критични области. Активностите со борбена муниција ќе се одвиваат во пет поморски и воздушни зони кои го опкружуваат Тајван. Владата во Тајпеј остро реагираше, обвинувајќи ја Кина за воено заплашување и за поткопување на регионалната стабилност.Најавата доаѓа во исклучително чувствителен момент за регионот. Во изминатите недели се продлабочи дипломатскиот спор меѓу Кина и Јапонија по изјави на јапонскиот премиер поврзани со Тајван, додека Вашингтон и Тајпеј претходно месецов објавија еден од најголемите договори за продажба на американско оружје на островот досега. Истовремено, тајванскиот претседател се обидува да обезбеди поддршка за историски посебен одбранбен буџет, што дополнително го разгневи Пекинг.Портпаролот на Источното командно подрачје, Ши Ји, изјави дека вежбите ќе бидат фокусирани на патроли за борбена подготвеност на море и во воздух, воспоставување целосна контрола, како и на блокада на клучни пристаништа и стратешки точки. Тој нагласи дека станува збор за легитимна и неопходна мерка за заштита на националниот суверенитет и зачувување на националното единство, алудирајќи првенствено на Соединетите Американски Држави и нивните сојузници.Во кинеските државни медиуми, воените аналитичари беа уште подиректни, поврзувајќи ги вежбите со американско-тајванскиот договор за вооружување, кој го оценија како ескалација и прикриена активност насочена против интересите на Кина. Од тајванска страна, пак, беше порачано дека овие маневри сериозно го нарушуваат безбедносниот статус кво во Тајванскиот Теснец и поширокиот индо-пацифички регион и дека претставуваат отворен предизвик за меѓународниот правен поредок.Договорот за оружје меѓу САД и Тајван, вреден 11,1 милијарди долари, вклучува ракетни системи ХИМАРС, противтенковски проектили, беспилотни летала, хаубици и воен софтвер. Иако Вашингтон официјално ја признава Народна Република Кина како единствена легитимна влада на Кина и го зема предвид ставот на Пекинг дека Тајван е дел од Кина, САД никогаш не ја прифатиле тезата за суверенитет на Комунистичката партија над островот. Соединетите Држави одржуваат блиски, но неформални односи со Тајван и законски се обврзани да му обезбедат средства за самоодбрана.Дополнителни тензии предизвика и реакцијата на Пекинг на изјавите од Јапонија, каде беше сугерирано дека Токио би можел воено да реагира доколку Кина се обиде насилно да го преземе Тајван. За кинеското раководство, прашањето за Тајван претставува црвена линија во односите со САД, а секој обид за зајакнување на врските меѓу Тајпеј и Вашингтон редовно се осудува како мешање во внатрешните работи на Кина.Покрај најавата за вежбите, кинеските медиуми објавија и пропагандни материјали со националистичка симболика, додека сè уште не е прецизирано колку долго ќе траат маневрите. Според најавите, патролите за борбена подготвеност започнуваат на 29 декември, а вежбите со борбена муниција ќе се одржат на 30 декември во затворени поморски и воздушни зони. Кинеската крајбрежна стража исто така соопшти дека започнала патроли во водите во близина на Тајван.

Свет | пред 4 месеци

Новата 2026 година започнува со силен студ и температури под нулата: ќе има ли снег?

Новогодишната ноќ ќе помине во знакот на многу ладно и суво време, под влијание на изразено студена и сува воздушна маса која ќе продре од север. Ќе дува слаб до умерен ветер од северен правец, а времето ќе биде ведро, без облачност и без врнежи од снег, што значи дека ќе преовладува т.н. сув студ.Температурите на воздухот за време на новогодишната ноќ насекаде во Македонија ќе бидат под нулата, и ќе се движат во интервал од -10 до -3 степени, додека на повисоките населени места и на планините постојат услови тие да се спуштат и под -10 степени.Во Скопје и околината, за време на новогодишната ноќ, минималната температура се очекува да се спушти околу -5 до -6 степени.Суво и многу ладно време ќе продолжи и на 1 јануари 2026 година (четврток), што значи дека новата година ќе започне со стабилни временски услови, без врнежи од снег, но со изразено ниски температури и присутен сув студ.

Македонија | пред 4 месеци

Трамп сака да биде покровител на европската десница, но Европа не го сака

Американскиот претседател Доналд Трамп отворено ја гради својата амбиција да стане политички покровител на европскиот десничарски популизам, но најновите податоци покажуваат дека тој план наидува на сериозна и неочекувана пречка – самите европски гласачи. Дури и меѓу симпатизерите на партии кои Трамп ги смета за природни сојузници, неговата популарност е ограничена и често поделена.Според новата анкета спроведена во пет земји на повеќе од 10.000 испитаници, Трамп останува генерално непопуларен во Европа, што директно ги доведува во прашање неговите обиди да се наметне како симбол и инспирација за европската десница. Истражувањето покажува дека најголема наклонетост кон Трамп постои во Велика Британија, каде околу 50 проценти од поддржувачите на партијата „Реформ“ имаат позитивно мислење за него. Сепак, континенталната Европа ја раскажува сосема поинаква приказна.Во Франција и Германија, само околу една третина од гласачите на десничарските партии изјавуваат дека го гледаат Трамп во позитивно светло. Кај пошироката јавност, бројките се уште понеповолни – две третини од Французите и Германците имаат негативен став кон американскиот претседател, додека во Велика Британија негативно мислење изразуваат 55 проценти од испитаниците. Најлошо поминува во Канада, каде 72 проценти од граѓаните имаат негативен став кон него.Овие резултати доаѓаат во момент кога администрацијата на Трамп јавно најави стратегија за поддршка на, како што ги нарекува, „патриотските европски партии“. Но, анкетата испраќа јасно предупредување – приближувањето до Трамп може да ги чини европските десничари пошироката поддршка, особено меѓу потенцијалните нови гласачи, кои често имаат понегативен став кон него од нивното јадро на симпатизери.Поддршката за Трамп не е безрезервна ниту во рамките на самата европска десница. Во Франција, гласачите на Националниот собир на Марин Ле Пен се речиси рамномерно поделени – 38 проценти имаат негативно мислење за Трамп, а 30 проценти позитивно. Слична слика има и во Германија, каде симпатизерите на Алтернатива за Германија се речиси идентично поделени меѓу поддршка и отфрлање.Токму затоа, раководството на Националниот собир во Франција внимателно се дистанцира од отворена поврзаност со Трамп. Партиските лидери јавно ги отфрлија обидите за поддршка од Белата куќа, со пораки дека не прифаќаат „вазален однос“ и дека Европа не смее да се третира како политичка или економска колонија.Истражувањето открива и поширок парадокс: европските десничарски гласачи силно инсистираат нивните лидери да ја стават сопствената држава на прво место, вредност која во голема мера ја препознаваат кај Трамп. Но токму тој национален инстинкт може да стане точка на судир со движењето МЕГА, кое отворено ги фаворизира исклучиво американските интереси.Иако многу од поддржувачите на десницата сметаат дека политиките на Трамп се корисни за САД, истовремено веруваат дека тие штетат на европските држави. Тоа јасно се гледа и во односот кон царините што ги воведе неговата администрација – иако дел од гласачите ги сметаат за штетни, не постои силна поддршка за возвратни мерки, што дополнително укажува на резервираноста кон неговата политика.Сѐ на сѐ, анкетата покажува дека Трамп можеби инспирира дел од европската десница, но не ужива широка доверба, ниту пак автоматска поддршка. Неговите обиди да стане централна фигура на европскиот популизам засега се соочуваат со студен прием, што сугерира дека европската политичка сцена, дури и на десницата, останува значително поавтономна отколку што тој очекува.

Свет | пред 4 месеци

Нема фотографија

Трамп: Подготвен сум да зборувам во украинскиот парламент заради мир

„Во следните неколку недели ќе знаеме дали оваа војна ќе заврши. Но може да се случи и сѐ да пропадне поради некоја мала тема за која воопшто не сме размислувале. Една војна траеше 37 години, а јас ја решив за еден ден“, изјави Трамп.Тој додаде дека неговото заминување во Украина не му е приоритет, туку дека главната цел му е постигнување мировен договор.„Понудив да одам и да зборувам во нивниот парламент. Ако тоа би помогнало – не знам. Можеби би помогнало“, рече Трамп.Зеленски му одговори дека е добредојден во Украина, а Трамп условно одговори дека би го направил тоа „доколку може да помогне да се спасат 25.000 животи месечно“.

Свет | пред 4 месеци

Трамп: Путин сака Украина да успее

Доналд Трамп го изнесе своето гледиште за улогата на Русија во повоената обнова на Украина, тврдејќи дека Москва ќе учествува во тој процес.„Тие ќе помагаат“, рече Трамп за Русија, додавајќи: „Русија сака да го види успехот на Украина. Путин сака Украина да успее.“Тој наведе и дека рускиот претседател Владимир Путин бил „многу великодушен“ во својата желба Украина да успее, вклучувајќи и наводна понуда за „снабдување со енергија, електрична енергија и други работи по многу ниски цени“.Трамп исто така објасни зошто Путин не се согласил на прекин на огнот, наведувајќи дека „рускиот лидер не сака да ги запре борбите за подоцна повторно да мора да ги започне“.„Го разбирам тој став“, заклучи Трамп.„Претседателот Путин всушност работи со Украина на нејзино повторно отворање“, изјави Трамп. „Беше многу добар во тој поглед. Сака таа да се отвори. Не ја гаѓал со проектили“, додаде тој.

Свет | пред 4 месеци

Зеленски: Украинците во дијаспората ќе одлучуваат за мировниот договор

Володимир Зеленски потврди дека украинските државјани кои живеат надвор од земјата ќе имаат право да учествуваат во одлучувањето за каков било иден договор за завршување на војната.Одговарајќи на новинарско прашање дали дијаспората би можела да учествува на референдум за одобрување на мировниот договор, Зеленски беше јасен:„Тие имаат право на тоа“, порача претседателот, додавајќи дека за остварување на тоа право ќе биде потребно да се обезбеди и воспостави соодветна инфраструктура за гласање.

Свет | пред 4 месеци

Фон дер Лајен: Постигнат е добар напредок во преговорите за Украина

Претседателката на Европската комисија Урсула фон дер Лајен го поздрави „добриот напредок“ постигнат денес во мировните преговори за Украина.Нејзината изјава следуваше по „добар, едночасовен повик“ во кој учествувала заедно со Доналд Трамп, Володимир Зеленски и други европски лидери.„Постигнат е добар напредок, што го поздравивме. Европа е подготвена да продолжи да работи со Украина и со нашите американски партнери за овој напредок да се зацврсти“, порача фон дер Лајен.Таа нагласи и клучен услов за понатамошните чекори: „Најважно во овој напор е да се има цврсти безбедносни гаранции уште од првиот ден.“

Свет | пред 4 месеци

Вучиќ попушти: Србија оди на предвремени избори во 2026 година

Вечерва претсаделот на Србија, Александар Вучиќ присуствувапе на отстранувањето на Чациленд пред српскиот Парламент.Вучиќ им се обрати на присутните и кажа дека е прифатено барањето на студентите за вонредни избори следната година.„Го прифативме нивното главно барање. Следната година одиме на избори, само што тие нема да бидат задоволни од резултатите. Ќе ги победиме со вашата сила и љубов, тие секогаш се посилни од нивната омраза“, рече Вучиќ.Денеска студентите во блокада во сротина градови собираа потписи со барање за спроведување на предвремени парламентарни избори.

Свет | пред 4 месеци

(Видео) Курти победи на изборите во Косово, но според првичните резултати нема да има мнозинство

Движењето Самоопределување на премиерот Албин Курти освои 37,50 отсто од гласовите на денешните парламентарни избори во Косово, покажуваат првичните резултати по пребројани нешто над 50 отсто од гласачките ливчиња.На второто место се најде Демократската партија на Косово со 29,80 отсто од гласовите, додека Демократскиот сојуз на Косово освои 16,29 отсто. Алијансата за иднината на Косово (ААК) доби 7,92 отсто поддршка од гласачите.Според податоците на Централната изборна комисија, на изборите гласале 789.172 граѓани, што претставува излезност од околу 40 отсто.Во претходниот парламентарен состав, Самоопределување имаше стабилно мнозинство заедно со пратениците од етничките малцинства. Сепак, по актуелните изборни резултати, Албин Курти би можел да се соочи со потреба од нови коалициски партнери за да обезбеди мнозинство и да формира нова влада.

Свет | пред 4 месеци

СДСМ тврди дека го следат Венко Филипче - протече фотографија од лидерот на аеродром со куфер

Опозициската СДСМ попладнево реагираше со ново соопштение по објавите на социјалните мрежи во врска со патувањето на партискиот лидер Венко Филипче, откако беше споделена фотографија од него на аеродром.Од СДСМ оценуваат дека станува збор за обид за јавен линч и дека со самото објавување на фотографијата практично се признава вршење притисок преку следење, што, според нив, претставува добро позната практика од времето на поранешниот премиер Никола Груевски, кога безбедносните служби биле ставени во функција на следење на опозицијата.Во соопштението се наведува дека, освен следењето, партијата неодамна јавно алармирала и за прислушување на телефонски комуникации, оценувајќи дека државата повторно се враќа во периодот пред 2016 година, со исти методи – следење, фабрикување вести и лажни афери, со единствена цел, како што велат, дефокус од суштинските проблеми.Од СДСМ тврдат дека со овие, како што ги нарекуваат, сензационалистички приказни се прикриваат теми како договорот „мигранти за пари“, криминалот и корупцијата што, според нив, се случуваат јавно и без одговорност.Во соопштението се нагласува дека Венко Филипче патува со редовна комерцијална авиолинија и дека не заминува за Дубаи, како што се тврди на социјалните мрежи. Од партијата додаваат дека тој не користи владин авион за приватни потреби, ниту пак изнајмува приватни летала, за разлика од премиерот Христијан Мицкоски и, како што наведуваат, неговиот круг.СДСМ го споредува луксузирањето на Мицкоски со практиките од времето на Груевски, потсетувајќи на патувања на ексклузивни дестинации, користење државни ресурси за приватни цели и раскош што, како што велат, граѓаните добро го паметат. Во таа насока, посочуваат и дека Мицкоски изнајмил приватен авион на релација Истанбул–Будимпешта, што, според нив, ги чинело граѓаните 2,6 милиони денари, како и дека во владини летала се превезувале сомнителни бизнисмени од арапските земји.Дополнително, од СДСМ тврдат дека јавноста сè уште не знае дека премиерот, наводно, се подготвува да нарача нов авион за лични потреби, кој би бил платен со пари на граѓаните. Во соопштението иронично се наведува дека вестите што ги објавува ВМРО-ДПМНЕ наликуваат на реклами на туристичка агенција, со постојано спомнување дестинации како Дубаи и Венеција, како и визи и приватни летови, кои, според опозицијата, се недостапни за обичните граѓани без, како што велат, десетици тендери и милионски суми.Од СДСМ оценуваат дека по сите овие обвинувања не би било изненадување доколку власта одржи нова прес-конференција, со, како што наведуваат, нови фабрикации, алудирајќи на претходни наводи за непостоечки згради и проекти.Во завршниот дел од соопштението, партијата нагласува дека, според нив, станува збор за уште еден обид за дефокус од актуелните теми, по, како што велат, неуспешниот обид за дестабилизација на СДСМ, изостанат одговор за наводите за криминал и корупција, ограничувањето на слободата на говор и договорот „мигранти за пари“.Од СДСМ посочуваат дека не е даден одговор ниту за милионскиот тендер доделен на партнери од ЗНАМ, кој го нарекуваат прва рата за, како што тврдат, предавството на Македонија. Порачуваат дека заедно со граѓаните ќе застанат на патот на, како што ја нарекуваат, криминалната власт и ќе ја вратат државата на европскиот пат, нагласувајќи дека нивниот „АКТ“ продолжува да работи и дека одговорите што не се даваат пред јавноста, ќе се даваат пред обвинителството.Инаку, информацијата дека Венко Филипче бил забележан на аеродром се прошири на социјалните мрежи, каде се тврди дека тој заминува за Дубаи, каде би ја дочекал Новата година.

Македонија | пред 4 месеци

Кремљ: Трамп и Путин разговарале 75 минути

Американскиот претседател Доналд Трамп и рускиот претседател Владимир Путин оствариле телефонски разговор кој траел еден час и 15 минути. Разговорот бил инициран од американска страна и, според Кремљ, поминал во пријателски тон, со размена на божиќни честитки.Информациите за разговорот ги пренесе советникот на Кремљ за надворешна политика, Јуриј Ушаков. Тој изјави дека Трамп сакал директно да го слушне рускиот став за конфликтот во Украина, непосредно пред неговата средба со украинскиот претседател Володимир Зеленски.„Претседателот Трамп внимателно ја сослуша проценката на руската страна за состојбата на теренот и за можностите за постигнување мировен договор“, изјави Ушаков.Според него, во разговорот било нагласено дека ситуацијата околу регионот Донбас останува клучно прашање и дека, според заедничкото мислење на двајцата лидери, Киев треба без понатамошно одложување да донесе одлука за иднината на овој регион.Ушаков додаде дека и Путин и Трамп се согласиле оти натамошното одложување на решавањето на прашањето за Донбас може дополнително да ги усложни мировните напори.„Двајцата лидери сметаат дека е неопходно украинската страна во најкраток можен рок да донесе јасна одлука за иднината на Донбас“, наведе советникот на Кремљ.Дополнително, Ушаков најави дека Доналд Трамп и Владимир Путин ќе имаат уште еден телефонски разговор во текот на вечерта, веднаш по завршувањето на средбата меѓу американскиот и украинскиот претседател.Од Кремљ засега не соопштуваат дополнителни детали за содржината на разговорот, ниту за тоа какви конкретни предлози биле разгледувани, наведувајќи дека прерано изнесување информации би можело да влијае врз натамошниот тек на дипломатските контакти.

Свет | пред 4 месеци

Војната не запира пред преговори: напади врз енергетиката и рафинерии, Запорожје под лупа на ИАЕА

Состојбата во нуклеарната електрана Запорожје, која е под руска контрола, во моментов е стабилна, а снабдувањето со електрична енергија се одвива преку еден високонапонски далновод, соопшти портпарол на електраната, пренесува руската државна агенција РИА. Во непосредна близина на објектот во тек се поправки, кои се спроведуваат под надзор на тим на Меѓународната агенција за атомска енергија, по стапувањето во сила на локален прекин на огнот постигнат со посредство на агенцијата. Се очекува работите да траат неколку дена.Истовремено, борбените дејствија продолжуваат на повеќе делови од Украина. Украинските власти соопштија дека руските сили двапати ја нападнале Полтавската област, при што во еден од нападите било оштетено енергетско постројување и технолошка опрема. Според локалната администрација, во нападите нема повредени, а екипите на енергетичарите работат на санација на штетите.Украинската армија, пак, потврди дека во текот на ноќта извела успешен напад со дронови врз нафтената рафинерија Сизран во руската Самарска област. Според Генералштабот во Киев, ударот предизвикал голем пожар, а проценката на штетата е во тек. Овој напад е дел од поширока стратегија насочена кон руската енергетска инфраструктура, со цел да се намалат приходите на Москва од продажба на нафта.Во меѓувреме, Украина со напади со дронови привремено го парализираше авионскиот сообраќај во Москва, при што беа одложени и откажани стотици летови во пресрет на националните празници, соопштија руските власти.Ситуацијата дополнително ја комплицира и хуманитарната состојба. Украинското Министерство за енергетика информира дека и покрај постепеното враќање на струјата по вчерашните напади, повеќе од 19.000 домаќинства во Киевската област сè уште се без електрична енергија, а дополнителни 20.000 потрошувачи се погодени во Черниговската област.Во Харковската област, украинската Национална полиција пријави тројца повредени цивили по руските напади, меѓу кои и лица со повреди од дронови и акутни стресни реакции. Полицијата наведува дека ги документира последиците од, како што ги нарекува, воени злосторства врз цивилни населби.Сето ова се случува во чувствителен дипломатски момент. Украинскиот претседател Володимир Зеленски денеска треба да се сретне со американскиот претседател Доналд Трамп на Флорида, каде ќе се разговара за можен план за завршување на војната. Зеленски најави дека околу 90 проценти од заедничката рамка за мировен план се веќе усогласени, но клучните несогласувања остануваат околу територијата на Донбас и иднината на нуклеарната електрана Запорожје.Поранешниот британски амбасадор во Русија, сер Лори Бристоу, оцени дека главната цел на Зеленски е да го придобие Трамп, нагласувајќи дека во моментов Вашингтон не го гледа рускиот претседател Владимир Путин како главна пречка за примирје. Тој предупреди дека дури и во случај на прекин на огнот, постои сериозен ризик Русија повторно да се обиде да ја продолжи агресијата во иднина.Додека дипломатските напори се интензивираат, реалноста на теренот останува непроменета – удари, прекини на струја и нови жртви, што уште еднаш ја потврдува пораката дека патот до мирот сè уште минува низ бојното поле.

Свет | пред 4 месеци

Над 800 учесници на Дедомразовската трка на плоштадот Македонија

Над 800 маскирани учесници денеска го преплавија плоштадот „Македонија“ во Скопје, каде што се одржа Дедомразовската трка 2025. Оваа традиционална манифестација, која годинава се организираше по 11. пат, ја одбележа рекорден број учесници и создаде вистинска празнична атмосфера во срцето на градот.Трката се издвојуваше по широкиот распон на возрасни учесници – највозрасниот Дедо Мраз имаше 73 години, додека најмладите беа бебиња помали од една година, кои учествуваа заедно со своите родители. Стартот и целта беа традиционално поставени на плоштадот, а патеката од околу два километри поминуваше низ централното градско подрачје.На трката учествуваа и професионални тркачи и рекреативци, како и бројни ентузијасти кои со насмевка и празничен дух ја збогатија манифестацијата. Новогодишното расположение беше видливо и кај учесниците и кај посетителите, кои со аплауз ги бодреа Дедомразовците.Градоначалникот на Град Скопје, Орце Ѓорѓиевски, на својот фејсбук-профил напиша дека за него апсолутен победник е најмалиот учесник, стар само половина година, кој, како што истакна, претставува најубав симбол на надежта и иднината.

Магазин | пред 4 месеци