Клексан на рецепт, ќе се зема во аптека, најави Клековски!

Два лека антикоагуланси, кои се употребуваат во третмани против згрутчување на крвта, од крајот на ноември ќе може да се земаат на рецепт во аптека.Ова денеска го истакна генералниот директор на Фондот за здравствено осигурување, Сашо Клековски.Тој по брифингот со новинарите изјави дека станува збор за двата антикоагуланси Еноксапарин и Надропарин, кои досега беа на болничката позитивната листа и за домашно лекување граѓаните мораа да користат рефундации.– Граѓаните веќе не мора да се малтретираат по шалтерите на Фондот за да ги рефундираат средствата за овие лекови, ќе има полесен пристап до лековите, а ние ќе имаме помал протисок за работа и ќе можеме да се концентираме на други прашања – рече Клековски.

Македонија | пред 6 месеци

Филипче: Во општините каде немаме кандидат членовите да гласаат по сопствено убедување и вредностите

Претседателот на Социјалдемократскиот сојуз на Македонија, д-р Венко Филипче, на денешната прес-конференција, порача дека во општините каде што СДСМ нема кандидат за градоначалник во вториот круг, нема да има калкулации, членовите да гласаат според сопственото убедување и за вредности кои се  блиски до социјалдемократијата.„Ние нема да навлегуваме, ниту навлеговме, во калкулации или во некакви задкулисни договори. Секој граѓанин, секој член, секој симпатизер има целосно право да одлучи согласно сопственото убедување според тоа кој кандидат носи вредности блиски до социјалдемократската идеја и до социјалдемократските вредности за чесно владеење, за почит, за еднаквост и за развој“, рече Филипче.На прес-конференцијата Филипче посочи дека на втори ноември, во недела секој глас може да направи разлика и ги повика граѓаните да гласаат за локална власт која ќе биде секогаш отворена за нив и нивните потреби.„Гласајте и изберете локална власт која е вистински сервис за граѓаните, за кандидати што нема да ја затворат вратата. После изборите таа врата ќе биде отворена за секој, кога било кој граѓанин ќе има потреба и кога некој граѓанин ќе сака да биде слушнат. Тоа е глас за луѓе кои ги исполнуваат ветувањата и кои интензивно и силно и посветено ќе работат да живееме подобри општини и градови во иднина“, порача претседателот на СДСМ, Венко Филипче.

Македонија | пред 6 месеци

„Во случај ако сте заборавиле во сето утринско брзање – гушнете си ги блиските денес“

Новинарката Мери Јордановска на својот профил објави емотивен статус кој за кратко време привлече големо внимание на социјалните мрежи. Иако текстот започнува со приказна за изгубеното маче Тајсон, всушност претставува длабока лична и општествена рефлексија за современото отуѓување, брзото темпо на живот и загубата на емпатијата.Јордановска раскажува дека речиси 24 часа не забележала дека нејзиното маче, „слепиот дебел господин Тајсон“, исчезнало од станот. Подоцна дознала дека комшија, чиј идентитет не го знае и покрај тоа што живеат во иста зграда 16 години, го пронашол исплашен и го спасил.„24 часа не сме забележале дека живо суштество, од крв и од месо, го нема во станот. Отсутно сме влегувале и излегувале, не приметувајќи дека дебелиот господин кој секогаш е прв на врата, го нема. Оти само физички сум била во својот дом, а со мислите некаде далеку“, напиша Јордановска, опишувајќи ја својата апатија и умор од секојдневните грижи и притисоци.Таа признава дека мислите ѝ биле „во расипаната кола, во крпењето до крајот на месецот, во иднината, во стравовите, во социјалните мрежи, во разочараноста од себе и во локалните избори што патем нема да ѝ сменат ништо во животот“.Во текстот, Јордановска ја користи приказната за Тајсон како метафора за духовното и емоционалното губење на луѓето во ерата на постојана брзина и материјална трка.„Ова не е статус за изгубено маче. Ова е порака, од Тајсон. За тоа колку станавме отуѓени, пред сѐ од себе, а потоа од блиските... И за тоа како џвака ова проклето капиталистичко секојдневие што понекогаш знае да парализира до степен на целосно отсуство од фокусот на сегашноста“, напиша таа.Статусот завршува со едноставна, но моќна порака:„Во случај ако сте заборавиле во сето утринско брзање – гушнете си ги блиските денес.“

Коментари | пред 6 месеци

Илјадници се собираат во Нови Сад – една година по трагедијата на железничката станица

Илјадници студенти од различни градови во Србија се упатуваат кон Нови Сад, каде што утре ќе се одржи комеморативен собир во чест на 16-те жртви загинати при падот на бетонската настрешница на железничката станица пред една година.Дводневниот марш, кој започна вчера од Белград, го предводат студенти и граѓани што веќе една година се во блокада и организираат протести со барање за одговорност од властите. Дел од учесниците пешачат десетици километри за да стигнат до Нови Сад, нагласувајќи дека нивниот марш не е само пат меѓу два града, туку пат меѓу неправдата и одговорноста – симболичен чин на совест, солидарност и достоинство.Утре ќе се одржи централниот комеморативен собир, на кој студентите и граѓаните ќе им оддадат почит на загинатите. Засега не е познато како точно ќе изгледа собирот, но медиумите јавуваат дека се очекува масовно присуство на луѓе од целата држава.И покрај една година протести, никој сè уште не е повикан на одговорност за трагедијата во која загинаа 16 лица. Јавното обвинителство за организиран криминал поднесе обвинение против 13 лица поради штета на буџетот од 115 милиони долари при реконструкцијата на пругата Нови Сад–Келебија, но без значителен напредок. Поранешниот министер за градежништво, транспорт и инфраструктура, Горан Весиќ, сè уште не е сослушан, поради, како што се наведува, здравствени причини.

Свет | пред 6 месеци

Хотел со 4 ѕвезди крадел струја, откриена голема кражба во центарот на Скопје

Екипите на „Електродистрибуција“ откриле сериозен случај на нелегално приклучување на електричната мрежа во хотел со четири ѕвезди на улицата „Луј Пастер“ во центарот на Скопје.За делото соопштија и на нивната официјална страница на ФБ:ОТКРИЕНА ГОЛЕМА КРАЖБА НА ЕЛЕКТРИЧНА ЕНЕРГИЈА ВО ЦЕНТАРОТ НА СКОПЈЕ!Хотел со 4 ѕвезди на ул. „Луј Пастер” нелегално приклучен на мрежа.При техничка контрола во станбена зграда која граничи со хотел на улицата „Луј Пастер”, нашите екипи пронајдоа три нелегални и изгорени кабли како последица на преголема оптовареност.Каблите веднаш беа исклучени бидејќи претставуваа директна и огромна општа опасност од настанување на пожар. За време на дополнителна контрола се утвди дека хотелот повторно бил приклучен на еден од нелегалните кабли.Екипите беа попречени во вршењето на должноста при влезот во хотелскиот објект.Случајот е документиран и за истиот е поднесена Пријава за нелегално приклучување на мрежа и предизвикување на општа опасност од пожар до Министерството за внатрешни работи, соопшти компанијата.

Скопје | пред 6 месеци

(Видео) „Мицко и Соте се во страшен очај“ - Јакимовски со реакција за фотографијата на Лукровски со Мојсова

И Стевче Јакимовски кој в недела ќе се бори за уште еден градоначалнички мандат во Карпош реагираше на фотографијата на неговиот противкандидат од ВМРО-ДПМНЕ, Сотир Лукровски со Маја Мојсова, која беше кандидатка на СДСМ.„Очајот нема крај, бурето нема дно. Мицко и Соте се во страшен очај. Јас во моментов сум во една кафеана и поставив стража. Немој случајно да дојде (Лукровски) и со мене да се слика па да кажува дека и од мене има поддршка“ вели Јакимовски во видеото.

Скопје | пред 6 месеци

Тетовец се заканувал на Фејсбук дека ќе убие жена и функционери на политичка партија, судот му определи притвор

Основното јавно обвинителство Тетово, постапувајќи по кривична пријава од СВР Тетово, поведе постапка против 49-годишен тетовец за кого постои основано сомнение дека извршил кривично дело – Загрозување на сигурноста според член 144 став 5 од Кривичниот законик.Осомничениот, на 28 октомври, од профил на социјалната мрежа Фејсбук објавил видео и текст на албански јазик во кој отворено се заканил со убиство и други тешки кривични дела кон една жена и кон функционери од една политичка партија и лица со политичко уверување. Со објавата која имала навредлива, омаловажувачка, но и заканувачка содржина кај оштетената предизвикал чувство на вознемиреност и страв.Јавниот обвинител, ценејќи ги сите околности, до судијата на претходна постапка од Основниот суд во Тетово поднесе предлог за определување мерка притвор за осомничениот. Судот го прифати предлогот и ја определи притворската мерка., соопшти ОЈО

Македонија | пред 6 месеци

Лукровски со Мојсова - уште една фотографија ја „вознемири“ јавноста, СДСМ демантира дека ќе го поддржи кандидатот на ВМРО во вториот круг

Голем број реакции во јавноста по објавата на кандидатот за градоначалник на ВМРО-ДПМНЕ за Карпош, Сотир Лукровски, со неговата противкандидатка од првиот круг од редовите на СДСМ, Маја Мојсова. Веќе се шират шпекулации дека СДСМ в недела на вториот круг од локалните избори ќе го поддржи Лукровски кој за противкандидат го има Стевче Јакимовски. СДСМ на тоа реагираше многу остро, отфрлајќи ги наводите од објавата и шпекулациите што се појавија во јавноста.„Во целост ги демантираме шпекулациите дека фотографијата на Маја Мојсовa со кандидатот на ВМРО-ДПМНЕ, Сотир Лукровски се каква било поддршка од СДСМ за Лукровски. СДСМ апсолутно не го поддржува кандидатот на Мицкоски и ВМРО-ДПМНЕ против кој се бореше партијата во првиот круг. СДСМ ќе побара објаснување од Маја Мојсова за фотографијата“.

Скопје | пред 6 месеци

Пронајден и уапсен возачот што го прегази 11-годишното девојче во Маџари

По дводневна потрага, полицијата го уапси 59-годишниот скопјанец кој со „фиат сеиченто“ ја удри малолетничката на улицата „Перо Наков“ и избегал од местото на несреќата. Девојчето се здобило со тешки повреди, а против возачот ќе биде поднесена кривична пријава.На 30.10.2025 околу 19:30 часот, по преземени оперативни мерки, полициски службеници од Единицата за интервентна полиција при СВР Скопје го лишија од слобода Б.Р. (59) од Скопје. Тој на 28.10.2025 околу 20:30 часот на ул.„Перо Наков“ во Скопје, со патничко возило „фиат сеиченто“ удрил во 11-годишна малолетничка од Скопје, по што со возилото го напуштил местото на настанот. Во несреќата со тешки телесни повреди се здобила малолетничката, констатирани во Комплексот клиники „Мајка Тереза“. Веднаш по добиената пријава, преземени се соодветни мерки и активности и возачот и возилото се пронајдени и Б.Р. по наредба на јавен обвинител е задржан во полициска станица, а по документирање на случајот ќе биде поднесена соодветна кривична пријава, соопшти МВР

Скопје | пред 6 месеци

(Видео) Русија удира со КАБ бомби, Украина возвраќа со дронови! Пеколна ноќ во двете земји

Украина и Русија повторно разменуваат напади, без знаци на смирување на фронтот или надвор од него. Во ноќта меѓу четвртокот и петокот, двете страни се гаѓаа меѓусебно со беспилотни летала и водени бомби, при што беа погодени енергетски објекти, индустриски зони и цивилни цели.Руски удари врз украински градовиРусија започна нов бран воздушни напади доцна синоќа, насочени кон неколку украински градови и региони. Сирени за воздушен напад одекнаа низ целата земја, а експлозии беа пријавени во Суми, Запорожје и други делови на Украина.Во Сумиската област четири лица се повредени кога руски сили лансирале десет беспилотни летала за помалку од еден час, погодувајќи цивилна инфраструктура и станбени згради.Гувернерот на Запорожје, Иван Федоров, предупреди на „постојана закана“ од водени воздушни бомби КАБ, кои Русија сè почесто ги користи во нападите. Станува збор за модернизирани прецизни бомби со долг дострел што можат да погодуваат цели до 200 километри зад фронтот.Украински одговор на руската територијаУкраина возврати со воздушни удари врз неколку руски региони, вклучувајќи ги Орјол, Владимир и Јарослав. Украинските беспилотни летала оштетија термоцентрала во Орјол и трафостаница во близина на Владимир, а експлозии беа пријавени и во близина на рафинеријата за нафта во Јарослављ.Руските власти соопштија дека нападите предизвикале материјална штета, но дека нема загинати. Се работи за објекти во сопственост на државната корпорација „Росатом“ и други енергетски компании.Ескалација без крајПоследниот синџир напади е уште една потврда дека војната меѓу Русија и Украина влегува во нова, уште поопасна фаза – каде што двете страни сè почесто ги таргетираат клучните енергетски и инфраструктурни објекти далеку од фронтот.И додека Москва ги оправдува нападите како „одговор на украински терор“, Киев возвраќа дека ќе продолжи да дејствува додека Русија не престане со уништување на украинските градови.

Свет | пред 6 месеци

Сообраќајот по суви коловози

Сообраќајот на државните патишта се одвива непречено, по суви коловози.Интензитетот на патните правци надвор од градските средини е умерен.На граничните премини од македонска страна, нема подолги задржувања за влез и излез од државата.АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност за појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Македонија | пред 6 месеци

Цената на златото во октомври со историски рекорд од 4.380 долари за унца

Во месец октомври, цената на златото достигна 4.380 долари за унца, што претставува историски рекордна вредност.Во изминатата година, цената на златото порасна за повеќе од 55 проценти во номинален износ. Ова се должи главно на геополитичките тензии, инфлацијата и побарувачката од Азија, но и голем број други фактори.Покрај основната причина, побарувачката за безбедни средства во неизвесни времиња, цената на златото е водена од стравот од инфлација и економска нестабилност, проследена со геополитички тензии.Очекуваните пониски каматни стапки и слабеењето на американскиот долар го прават златото уште попривлечно, што ја зголемува побарувачката за инвестиции. Според аналитичарите цената би можела да продолжи да расте ако тензиите и инфлацијата се влошат.

Свет | пред 6 месеци

Фатен Србин кој се обидел да пренесе 130 килограми марихуана скриена во ладилник на приколка на Табановце, поведена истрага

Основното јавно обвинителство Куманово донесе Наредба за спроведување истражна постапка против српски државјанин осомничен за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.На 29 октомври, на граничниот премин Табановце, во камион со полуприколка (ладилник) со словенечки регистарски ознаки, тој се обидел да пренесе 129,7 килограми наркотична дрога марихуана. Дрогата, во 14 торби скриени во камионот во сопственост на превозна компанија од Словенија, ги пронашле царинските службеници при контрола на возилото. Јавниот обвинител до судијата на претходна постапка од Основниот суд во Куманово достави предлог за определување мерка притвор за осомничениот, соопшти ОЈО

Македонија | пред 6 месеци

И Бахамите го чекаат ударот на „Мелиса“ – најсилниот ураган во последните 90 години пустоши низ Карибите

Бахамите се подготвуваат за ударот на ураганот Мелиса, кој денес пристигнува по своето разорно патување низ Карибите. Бурата, која зад себе остави пустош во Јамајка, поплави во Куба и 24 жртви во Хаити, продолжува да се движи со огромна сила, предупредуваат метеоролозите.Според Националниот центар за урагани на САД (NHC), временските услови на Бермуда ќе се влошат во доцните попладневни часови и вечерта, кога се очекуваат налети на ветер што ќе достигнат до 150 километри на час.Ураганот Мелиса, кој во вторникот ја погоди Јамајка како бура од највисоката — петта категорија според скалата Сафир-Симпсон, беше најмоќниот што стигнал до копното во последните девет децении. Ветровите со брзина од околу 300 километри на час предизвикаа масовна штета и уништени цели региони на островот.Во Куба, каде што поројните дождови предизвикаа поплави и урнување на покриви, властите соопштија дека нема човечки жртви, но материјалната штета е огромна. Сантијаго де Куба, вториот по големина град во земјата, остана без електрична енергија, а многу далноводи паднаа на земја.Во меѓувреме, Хаити, кој не беше директно погоден од ураганот, но претрпе тешки последици од обилните дождови, брои најмалку 24 загинати, меѓу кои и десет деца, додека 18 лица сè уште се водат како исчезнати, според најновиот извештај на Обединетите нации.Според најновата анализа на климатолози од Империјал колеџ во Лондон, климатските промени предизвикани од човекот придонеле ураганот Мелиса да биде значително помоќен и поразорен од сличните бури во минатото.

Свет | пред 6 месеци

Трамп ги укина санкциите кон Додик, зошто?

Укинувањето на американските санкции за Милорад Додик и групата од околу триесет негови соработници и членови на најтесното семејство претставува потврда дека актуелната администрација на Доналд Трамп испробува нов пристап кон Босна и Херцеговина, согласни се поголемиот дел од политичарите, аналитичарите и медиумите во таа земја.Канцеларијата за контрола на странски имот (OFAC) при американското Министерство за финансии во средата соопшти дека од списокот на санкционирани се отстранети Додик, членката на Претседателството на БиХ Жељка Цвијановиќ, дваесетина поранешни и сегашни функционери во институциите на БиХ и Република Српска, како и повеќе компании кои претходно се најдоа на „црната листа“ на САД поради сомнеж дека се дел од коруптивна мрежа која го одржува Додик на власт и му овозможува лично да се збогатува.OFAC не даде никакво објаснување зошто Додик, неговите соработници и тие компании повеќе не се под казнените мерки кои подразбираа забрана за патување во САД и замрзнување на имот доколку санкционираните поседуваат таков на американска територија.Подоцна од Стејт департментот појаснија дека станува збор за редовни ревизии кои се спроведуваат секоја година со цел унапредување на американските интереси, но потврдија и дека укинувањето на санкциите е директно поврзано со повлекувањето на Додик од функцијата претседател на Република Српска и поништувањето на спорните закони што претходно, по негова иницијатива, ги усвои ентитетскиот парламент.Укинати санкции„Конструктивните чекори што ги презеде Народното собрание на Република Српска во претходните недели треба да придонесат за поголема стабилност на Босна и Херцеговина и ќе овозможат партнерство со САД засновано врз заеднички интереси, економски потенцијал и заеднички просперитет“, се наведува во соопштението од Стејт департментот што го објави порталот Detektor.ba.Од таму додадоа дека планираат блиска соработка со политичките актери и учесници „од целиот политички спектар во БиХ“ за да ги унапредат заедничките приоритети, но остана нејасно зошто на списокот на санкционирани и натаму се наоѓаат некои членови на Српската демократска партија (СДС), како и Маринко Чавара од ХДЗ, претседател на Претставничкиот дом на парламентот на БиХ, кој беше санкциониран поради проценката дека е одговорен за блокирање на именувањето судии во Уставниот суд на Федерацијата БиХ додека ја извршуваше функцијата претседател на тој ентитет.Поради тоа, Чавара со месеци не може да ја прима ниту веќе заработената плата.Додик првпат беше ставен под американски санкции во 2017 година, кои останаа на сила и за време на првиот мандат на Трамп, додека администрацијата на Џо Бајден ги засили, казнувајќи го целиот круг на негови блиски соработници и спроведувачи на Додиковите сецесионистички закани и идеи.Синиша Карањ, актуелен кандидат на Додик на предвремените избори за претседател на Република Српска, беше санкциониран затоа што како министер за внатрешни работи директно работел на подготовка на закони врз основа на кои тој ентитет би се одвоил од БиХ.„Додик сè продаде за лична корист“Иако медиумите во Република Српска под контрола на власта еуфорично известуваат за укинувањето на санкциите како за „крунисана победа“ на Додик, тој самиот реагираше воздржано, заблагодарувајќи му се на Трамп за разбирањето.„Уште еднаш се покажа дека сè што беше изговорено против нас беше лага и пропаганда“, напиша Додик на мрежата X, додавајќи дека Република Српска „никогаш нема да падне“.Од опозицијата во Република Српска веднаш реагираа, оценувајќи дека укинувањето на санкциите е доказ дека Додик „сè продал“ за лична корист.„Сè уште не знаеме што сè дале, но едно е сигурно — бидејќи СДС и другите останаа на црната листа, тие не се бореле за Република Српска, туку само за себе. Сметката за овие отстапки допрва ќе ни пристигне“, изјави градоначалникот на Бања Лука и лидер на Партијата на демократскиот напредок (ПДП), Драшко Станивуковиќ.т.

Свет | пред 6 месеци

Времето во Македонија: Умерено облачно со температури до 20 степени, нови врнежи од понеделник

По утринската магла во одредени котлини во земјата, во текот на денот времето ќе биде претежно облачно со краткотрајни сончеви периоди, велат од Управата за хидрометеоролошки работи (УХМР). Ќе дува слаб до умерен југоисточен ветер.Минималните температури ќе се движат во интервал од -1 до 5 Целзиусови степени, додека максималните ќе од 15 до 20 степени.Времето во Скопје преку денот сончево со мала до умерена облачност и слаб променлив ветер. Температурите ќе се движат од минимални 4 до максимални 19 степени.За деновите од викендот УХМР најавува претежно сончево време со локална облачност.

Македонија | пред 6 месеци

Американскиот Сенат гласаше за отфрлање на царините на Трамп за повеќе од 100 земји

Американскиот Сенат зазема став против глобалните царини на Доналд Трамп, гласајќи за поништување на таканаречените реципрочни царини кои влијаат на 100 држави.Четири републиканци се здружија со сите демократи за да гласаат со 51-47 за резолуција за укинување на царините што претседателот ги воведе со извршна наредба.Ова беше трет пат републиканците да гласаат заедно со демократите за резолуција за царини оваа недела, претходно обединувајќи се за укинување на давачките насочени кон Бразил и Канада.Гласањето против одлуки на Трамп е реткост за републиканците во неговиот втор мандат. Но, републиканските сенатори Сузан Колинс од Мејн, Мич Меконел и Ранд Пол од Кентаки и Лиза Мурковски од Алјаска се придружија на опозицијата.И покрај одлуката донесена во Сенатот, Претставничкиот дом веројатно нема да преземе слични мерки. Републиканците во Претставничкиот дом претходно оваа година создадоа правило кое ќе ги блокира гласањата за резолуциите за царините.Царинските резолуции се изразуваат несогласување со самите царини и за тоа што Трамп ги пречекорува своите овластувања кога ги донесува и го заобиколува Конгресот. Сенаторот Тим ​​Кејн, демократ од Вирџинија, им рече на новинарите дека симболичното делување на опозиција треба да го привлече вниманието на претседателот.

Свет | пред 6 месеци

Од полноќ изборен молк, во недела втор изборен круг

Кандидатите за градоначалници уште денеска имаат шанса дс ги претстават своите програми и ветувања.Од вечерва на полноќ почнува изборниот молк кој ќе трае до недела. До тогаш граѓаните можат да размислат кому ќе му го дадат својот глас.На 2 ноември ќе се одржи вториот круг од локалните избори.Во вториот круг ќе се гласа во 32 општини и во Градот Скопје, а ќе се прегласува за членови на Совет на три избирачки места во општината Шуто Оризари.Во сабота според законот ќе гласаат болните и изнемоштените, затворениците и лицата во домашен притвор.Во Градот Скопје во трката за градоначалник се кандидатот Орце Ѓорѓиевски, поддржан од ВМРО-ДПМНЕ и коалицијата и Амар Мециновиќ од Левица.Во Карпош ќе се натпреваруваат Стевче Јакимовски од коалицијата ,, Искуство за успех и кандидатот од ВМРО-ДПМНЕ, Сотир Лукровски, во Аеродром каде во игра се Дејан Митески од ВМРО-ДПМНЕ и Александар Трајановски од СДСМ, во Центар битката ќе се води меѓу Горан Герасимовски од СДСМ и Мирослав Лабудовиќ од Движењето ЗНАМ.Во втор круг во Шуто Оризари ќе се соочат Ерџан Демир поддржан од ВМРО-ДПМНЕ и Курто Дудуш од Унија на Ромите.Втор круг ќе има и во Брвеница, Валандово, Виница, Дебар, Дебрца, Демир Капија, Кичево, Конче, Кочани, Крушево, Куманово, Лозово, Македонска Каменица, Македонски Брод, Неготино, Пробиштип, Ранковце, Росоман, Струга, Студеничани, Тетово, Чешиново-Облешево и Чучер Сандево.Во Гостивар, Врапчиште, Центар Жупа и Маврово на 2 ноември нема да има гласање бидејќи во првиот круг од локалните избори не беше исполнет законскиот цензус на излезени граѓани. Тука изборната постапка почнува одново по објавувањето на конечните резултати од локалните избори.

Македонија | пред 6 месеци

Мицкоски: Скопје добива градоначалник кој ќе работи неуморно и чесно, Орце Ѓорѓиевски е човекот кој ќе воведе ред, чистота, култура

Скопје добива градоначалник кој ќе работи неуморно, вреден борец, посветен, човечен, личност која ќе направи да се гордееме сите, но и кој е свесен дека резултатите и испорачаните проекти се обврска, исто како и довербата, и дека погледите во него по изборите се вперени со двоен диоптер и многу цилиндри и ќе му се прати секој чекор и ќе се очекуваат брзи дејствија и резултати од него. Драги скопјани, токму овој човек, вашиот човек за главниот град, Орце Ѓорѓиевски, е доказ дека можат да се направат промени кога некој работи со срце, рече претседателот на ВМРО-ДПМНЕ, Христијан Мицкоски на денешниот народен митинг во Скопје во рамки на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.Мицкоски посочи дека Ѓорѓиевски е човек што не ветува без да е сигурен дека може да исполни, и кој испорачува за граѓаните.„И кога гледам што Орце направил за Кисела Вода, знам дека истиот дух, истата енергија и иста совесност ќе ја донесе во Скопје. И Скопје ќе влезе во една нова фаза на предвидливост и извршување на обврските. Орце е сериозен, приземен, прилично методичен карактер. Тој ќе го направи Скопје повторно да живее слободно и да дише слободно. Град каде што јавниот превоз нема да е изговор и да се прекршува врз суети и изговори, туку систем каде што пешачките премини значат безбедност, а не се руски рулет, каде што отпадот е ресурс, а не срам и загаденост“, рече Мицкоски.Додаде дека Скопје бара управување, не експеримент и за Орце, Скопје е мрежа на животи и сега му треба вашиот јасен мандат за Скопје да стане град на ред, чистота, култура, лесно движење, рамно развиени општини и чесна локална економија.Мицкоски исто така ги повика граѓаните да гласаат и за Сотир Лукровски во Карпош, за Дејан Митевски во Аеродром, за Ерџан Демири во Шуто Оризари, како и за Зоран Бајовски кој е во натпревар за прв човек за блиската општина до Скопје, Чучер Сандево.„Ова е вистински избор. Затоа што е избор за секој ден, не само за изборен ден. Ова е избор за твој човек, човек што работи и кога нема камери. Ова е твоето место, град во кој не си гостин. Ова е за твојата иднина, да останат и децата, и соништата“, истакна Мицкоски.

Македонија | пред 6 месеци

Мицкоски: Имаме историска шанса да го добиеме Кичево, Кичево да биде симбол на соживот, а не на поделби

Христијан Мицкоски, претседател на ВМРО-ДПМНЕ, на денешниот митинг од пред платото на Филхармонија, се осврна и на Кичево, и кандидатот за градоначалник од редовите на ВМРО-ДПМНЕ. Според него, Кичево се наоѓа пред историска можност да избере градоначалник кој ќе ја промовира инклузивноста и соживотот меѓу сите.  Мицкоски рече дека овој избор не е прашање на етничка припадност, туку на вредности и посветеност на сите жители на Кичево со цел градот да стане симбол на единство, прогрес и историска победа за сите.,,Дваесет години таму немало градоначалник што ја носи нашата програма, нашите вредности, немало човек кој гледа за сите, туку гледал само самиот за себе си. Дваесет години градот беше под управување, кое често ги делеше луѓето по вера, народност или партија“, вели Мицкоски.Мицкоски повика на единство меѓу сите заедници во Кичево, апелирајќи до Македонците, Албанците, Турците, Власите, Ромите, Србите и Бошњаците.,,Вечерва испраќам од овде од Скопје порака до сите кичевчани  и Македонци, и Албанци, и Турци, и Власи, и Роми, Срби, Бошњаци. Излезете во недела и гласајте за човекот што ќе биде градоначалник на сите! Да се обединиме околу идејата дека Кичево може да биде симбол на соживот, а не на поделби. Да ја направиме историјата вистина, првпат по две децении, Кичево да има градоначалник кој не прашува „чиј си“, туку „што можеме да направиме заедно“, додаде Мицкоски.Тој истакна дека оваа победа ќе биде заедничка за сите граѓани на Кичево и дека Владата ќе го поддржува Кичево во напорите да го подобри животот на сите жители, и додаде дека оваа промена не е прашање на етничка припадност, туку на човечка посветеност.,,Тоа ќе е заедничка историска победа на сите граѓани на Кичево, а ние како Влада ќе го помагаме Кичево максимално, во свои напори да го подобри животот на сите негови граѓани. И тука нема етничка приказна, туку сосема човечка димензија. Ова не е повик за етничко гласање туку за гласање за човек, за човек Македонец со сопруга Албанка, кои се пример за вредности и сила, човек кој ќе работи за сите, за своите кичевчани, ќе биде градоначалник буквално за сите и за Македонците, и за Албанците, ќе ги помага и ќе биде коректен, и за Турците, Ромите, Власите, Бошњаците. Со сите кои таму живеат без разлика на партија, етникум и верска определба. Тој е човек и ќе работи за Кичево“, посочи Мицкоски.

Македонија | пред 6 месеци

Ѓорѓиевски: На 2 ноември масовно да излеземе на гласање и заедно да му го вратиме сјајот и редот на нашето Скопје

Стоиме заедно во пресрет на конечната одлука, ова е одлука за судбината на нашиот град. Одлука за тоа во каков град сакаме да имаме ние и во каков град сакаме да живеат нашите деца. Нашиот град е уморен од хаос, уморен е од нечистотија, од сообраќаен метеж во кој губиме часови од нашиот живот, од празни ветувања и од неспособност, рече кандидатот на ВМРО-ДПМНЕ за градоначалник на град Скопје, Орце Ѓорѓиевски на денешниот митинг во Скопје во рамки на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.Ѓорѓиевски посочи дека Скопје е град со сериозни, длабоки и наталожени проблеми и овие проблеми не се решаваат со учење во од и со празни фрази, туку бараат сериозни, искусни и итни решенија.„На Скопје, почитувани, не му требаат експерименти, на Скопје не му требаат луѓе кои допрва ќе се учат што е локална самоуправа. Не му требаат луѓе кои допрва ќе откриваат што е тоа Генерален урбанистички план, што е Детален урбанистички план, што е физибилити студија, што е главен проект, а што е буџетско планирање“, истакна Ѓорѓиевски.Тој вели дека градот бара човек којзнае што прави уште од првиот ден, затоа што Скопје нема време за губење, ниту пак за учење.„Немаме време некој допрва да учи колку училишта има во Скопје, да учи колку претпријатија има, да учи кои се булеварите во главниот град, да ги учи каде се скопските населби. Ние во изминатите четири години докажавме како се работи, а пред неколку дена на дуел, нивното незнаење, лажната скромност и преголемата амбиција и доживеа целосен дебакл“, рече Ѓорѓиевски.Во обраќањето до скопјани, Ѓорѓиевски истакна дека сега пред нив ја бара довербата со дела оставени зад него, посочувајќи дека за Кисела Вода вети 70 километри асфалтирани улици, и испорача, вети нови градинки, и тоа го реализиравме, и листите на чекање ги сведуваме на нула.Ѓорѓиевски рече, имаме јасен план, со стотици проекти во нашата програма и знаеме како да го решиме сообраќајниот колапс.„Ќе ја одблокираме клучката Момин Поток, ќе го пробиеме булеварот Хрватска за да ги споиме Гази Баба и Бутел, ќе го завршиме булеварот АСНОМ со новиот мост за да ги споиме Аеродром и Гази Баба, ќе го прошириме булеварот Цветан Димов во Чаир со шест ленти. Ќе го изградиме Февруарски Поход со нов мост преку Вардар, со кој Аеродром добива целосно нов коридор, ќе воведеме трета лента на булеварот Александар Македонски за да нема повеќе хаос на источниот дел од градот. Ова не се само линии на хартија, ова се артерии кои ќе го оживеат градот“, истакна Ѓорѓиевски.

Македонија | пред 6 месеци

Мицкоски: Следи период на реализација на 70 нови проекти во различни области, нова развојна фаза на Македонија

Претседателот на ВМРО-ДПМНЕ, Христијан Мицкоски се обрати на народниот митинг на ВМРО-ДПМНЕ и коалицијата „Твоја Македонија’’ од пред платото на Филхармонија каде што истакна дека  следува период на реализација на 70 нови проекти во различни области како образование, здравство, земјоделие, култура, проекти кои ќе значат нова развојна фаза на Македонија.„Нашата задача не е едноставна. Не само заради ситуацијата која ја наследивме, туку таа е многу поголема. Нашата цел не е само политичка победа, туку обновување на вербата дека Македонија може и мора да биде подобра земја. И иако оди потешко од што мислевме, сепак основите ги поставивме. Не можевме веднаш да почнеме со екстремно позитивни резултати, моравме прво да ги направиме темели. Некои мислеа дека тоа ќе оди преку ноќ. Но, темел не се прави од муабет, туку од пот и многу поминати часови на средби, планирања, анализи, патувања, размена на мислења и одлуки.И токму затоа денес можам да кажам: темелот е поставен. Сега по изборите, почнува буквално фаза на жестока работа  и големи резултати. Во наредниот период ќе почнеме со повеќе од 70 нови проекти, во инфраструктура, енергетика, здравство, образование, земјоделие, култура, технологија, правда и други области. Ќе има конкретни чекори: нови училишта, модерни болници, мерки за чист воздух, дигитална администрација и инвестиции што ќе треба да донесат достоинствени плати,“ истакна Мицкоски.Мицкоски најави серија конкретни мерки кои ќе го подобрат животот на луѓето, ќе ја зацврстат економијата и ќе донесат подобро во секој дом.„Во наредниот период, покрај проектите што ги најавивме, започнуваме со серија на конкретни мерки, кои ќе го подобрат животот на луѓето, ќе ја зацврстат економијата и ќе донесат подобро во секој дом. Овие мерки не се само лист хартија, туку планови што ќе го променат животот на луѓето. Да, животот е скап. Да, секој ден е борба со сметки, со гориво, со кирија. Но нема да чекаме да се намалат цените сами од себе. Ќе создадеме услови, за повеќе пари во џебот, за поевтино живеење, за повеќе можности. Мора да ја направиме државата сојузник на граѓаните, а не непријателски систем кој е трул и ги предизвикува да се иселуваат. Ниту еден млад човек нема да биде оставен без шанса за дом. Ниту една мајка нема да мора да избере меѓу кариера и семејство. Ниту еден бизнис нема да пропадне затоа што државата му стои на пат. Тоа е вистинската промена. Ова не е фантазија, ова е план. И како што рекол Ајзенхауер: „Планот е ништо, но планирањето е сè.“ Затоа ќе го градиме системот што во иднина ќе функционира без оглед на тоа кој е на власт, долгорочно и со коренити промени, затоа што државата не е ничија приватна фирма, туку наш заеднички дом,“ нагласи Мицкоски.

Македонија | пред 6 месеци

СДСМ се огради од Маја Мојсова по фотографијата со кандидатот на ВМРО-ДПМНЕ

Социјалдемократскиот сојуз на Македонија остро ги демантираше шпекулациите дека му дава поддршка на кандидатот на ВМРО-ДПМНЕ, Сотир Лукровски, по појавувањето на фотографија на која тој е заедно со членката на СДСМ, Маја Мојсова.„СДСМ не дава никаква поддршка за Сотир Лукровски! Во целост ги демантираме шпекулациите дека фотографијата на Маја Мојсова со кандидатот на ВМРО-ДПМНЕ, Сотир Лукровски, претставува било каква форма на поддршка од СДСМ“, соопштија од партијата.Од СДСМ нагласуваат дека партијата апсолутно не го поддржува кандидатот на Мицкоски и ВМРО-ДПМНЕ, „против кој се бореше во првиот изборен круг“, и дека ќе побараат објаснување од Маја Мојсова за објавената фотографија.

Македонија | пред 6 месеци

Николоски: Со градоначалникот Илиевски ја развиваме Брвеница, опонентите се нервозни, ветуваме специјален буџет за нови проекти

,,За општина Брвеница со идниот градоначалник Јовица Илиевски ќе реализираме нови проекти со специјален буџет преку Министерството за транспорт. Исто така донесена е одлука да се изгради нов влез и излез на автопатот. Политиката на национализам ќе доживее пораз и во општина Брвеница, а Јовица Илиевски ќе добие втор мандат за градоначалник“, истакна  потпретседателот на ВМРО ДПМНЕ, Александар Николоски на средбата со граѓани во Брвеница.,,Успешните треба да се наградуваат и затоа во општината инвестираме во повеќе проекти кои целосно ќе го променат ликот и ќе го подобрат животот на жителите“, вели Николоски.Во продолжение интегрален текст од изјавата на Николоски:,,Улицата "Браќа Јаниќ" во општина Брвеница е дел од еден поголем проект кој што го работиме заедно со Светска Банка. Тука инвестираме некаде околу 10 милиони денари, за целосно уредување на улицата и ова ќе биде една прекрасна улица, драго ми е што цела една нова населба се развива тука и драго ми е што општина Брвеница расте, луѓе доаѓаат и се доселуваат тука. Исто така, она што можам да го најавам, е дека по насока на Владата и Министерството за транспорт, Јавното претпријатие за државни патишта работи на нешто што беше децениско барање на жителите на општина Брвеница, а тоа е клучка која што ќе ја поврзува општината директно на автопатот. Знаете дека сега од едната страна има влез, од другата страна нема влез, така што, ќе имаме целосно решение кое ќе овозможи директен излез на автопат на сите населени места кои што гравитираат кон општината.  Кажа градоначалникот дека од првиот повик сите средства се искористени и сакам да му честитам за тоа. Во однос на вториот повик имаме околу 60 милиони денари, се работи за некаде десетина проекти кои што ќе ги реализираме и сакам да најавам уште една работа вечерва. Се работи за исклучително успешен градоначалник, човек кој целосно ја трансформира општината, свесен сум дека неговите опоненти заради тоа се нервозни, свесен сум дека има сериозна нервоза кај неговиот против кандидат, затоа што нема што да каже, не може да се пофали ниту со дела, ниту со проекти, ниту нешто оставил позади себе и затоа оди на национализам. Тој национализам нема да помине и градоначалникот ќе добие втор мандат, а во вториот мандат првиот состанок ќе му биде со мене. Имаме резервирано дополнителни средства во Министерството за транспорт, и најавувам дека за општина Брвеница ќе има специјален буџет, кој што ќе е дополнителен. Готовите проекти кои што ќе ги донесе градоначалникот, ќе бидат финансирани од Министерството за транспорт и ќе бидат реализирани, затоа што успешните треба да се наградуваат“.

Македонија | пред 6 месеци

(Видео) Судир меѓу Геровски и Цветковска околу случајот ‘Пулс’: Овие снимки што јас ги објавив, Сашка ги скрила

Одговорниот уредник на „Плусинфо“, Бранко Геровски, реагираше по гостувањето на Сашка Цветковска од Истражувачката лабораторија – ИРЛ во подкастот „Претрес со Ландов“, во кој таа изнесе тврдења поврзани со неговата работа. Во својата реакција, Геровски ја обвини Цветковска за изнесување невистинити информации, тврдејќи дека таа неточно изјавила оти поседува целосен фајл со доказите и снимките од случајот, а дека тој не ги поседувал.Геровски наведе дека Јавното обвинителство доставило целосен извештај со снимени материјали до Судот, и дека дел од тие снимки се наоѓаат и во негова сопственост.„Во интерес на јавноста, а секако и како доказ дека Сашка Цветковска селективно објавила дел од снимките а дел ги скрила - сега знаеме дека таа ги скрила. бидејќи вели дека го поседува целиот извештај! - јас објавив дел од снимките. Овие снимки што јас ги објавив, Сашка ги скрила. Анализата на содржината на тие снимки покажа зошто ги скрила. Е сега... Дали јас ги поседувам снимките што ги објавив или не? Во мојот коментар на бруталниот напад на ИРЛ врз мене, јавно повикав двајца новинари да дојдат кај мене и да им го покажам делот од извештајот што јас го поседувам. Она што не можам да го дозволам е тие да ги објават снимките во онаа форма во којашто ги имам, бидејќи содржат податоци што не смеат да се објават. Она што моите колеги можат да утврдат е дали ги поседувам снимките чија содржина ја објавив (поседувам и други, иако не сите), во онаа форма во која се доставени од ЈО до Судот. Со други зборови, поканив двајца мои колеги - а и натаму канам! - да утврдат кој овде ја зборува вистината, а кој лаже. Па сами нека кажат што виделе и што заклучиле“, напиша Геровски.Во реакцијата, тој нагласи дека е подготвен двајца новинари или претставници на новинарски здруженија да извршат увид во материјалите што ги поседува, со цел да се утврди точноста на неговите наводи.„Јавно ги поканувам двајца колеги да дојдат и да видат дел од извештајот што го имам. Можат да потврдат дали ги поседувам снимките што ги објавив, во формата во која биле доставени од Обвинителството до Судот“, напиша тој.Во завршницата на реакцијата, Геровски се осврна и на тврдењата во подкастот поврзани со финансиското работење на „Плусинфо“, наведувајќи дека сите податоци за бонитетот и деловните резултати на издавачот „Плусинфо издаваштво“ се јавно достапни на интернет, и ги повика заинтересираните да ги проверaт.Целиот поткаст со Цветковска:Тврдењата на Цветковска, главна уредничка на ИРЛ:

Коментари | пред 6 месеци