Најнови вести

1 мес.

Шведска воведува мобилен систем за предупредување во случај на воздушни напади

Шведска годинава ќе воведе систем за предупредување преку мобилни телефони со цел навремено да го алармира населението во случај на воздушни напади во воени услови, инспириран од сличното решение применето во Украина. Веста ја соопшти надлежната агенција задолжена за проектот.Иако земјата веќе располага со надворешен систем за тревожење составен од околу 4.500 сирени поставени на покриви и други високи објекти, новото решение ќе претставува дополнување на постојната мрежа. Според Хенрик Ларсон од Шведската агенција за цивилна одбрана и отпорност, искуствата од војната покажале дека во евентуален конфликт непријателот би можел да го неутрализира надворешниот систем за предупредување. Во тој контекст се посочува и можната закана од Русија.Новиот систем, наречен SE Alert, ќе функционира така што мобилните телефони поврзани на шведската телекомуникациска мрежа автоматски ќе емитуваат гласовни пораки за предупредување, алармни сигнали и вибрации во случај на воздушна опасност. Имплементацијата се очекува да заврши во рок од шест месеци.Покрај воени закани, системот ќе може да се користи и во мирновременски услови, како при нуклеарни или хемиски несреќи и други големи кризи.Агенцијата истовремено соработува со шведската армија на развој на апликација што ќе им овозможи на граѓаните лесно да фотографираат дронови и да ги пријавуваат до надлежните служби.Шведска ги засили мерките за цивилна подготвеност и концептот на „сеопфатна одбрана“ по руската инвазија врз Украина во 2022 година. Целта е мобилизација на целото општество – од институциите и компаниите до граѓаните – со намера колективно да се спротивстават на евентуална вооружена агресија, а притоа да се обезбеди непречено функционирање на клучните општествени дејности.

Свет | пред 1 месец

1 мес.

Проверувајте го притисокот во гумите почесто во зима: Мал пад може да значи голем ризик

Соодветниот притисок во гумите е клучен за безбедноста на автомобилот, но и за долговечноста на самите гуми. Во зимски услови притисокот знае да опадне, па неопходно е да се проверува почесто од вообичаено. Неправилниот притисок директно влијае врз трајноста на гумите и може да создаде сериозни опасности при возење.Пропишаниот притисок варира од возило до возило и зависи од видот на гумите, масата на автомобилот и неговото оптоварување. Препорачаните вредности најчесто се наведени на столбот меѓу предната и задната врата од страната на возачот или на внатрешната страна од капачето на резервоарот за гориво. Доколку ги нема таму, сигурно се наведени во прирачникот на возилото.Во зависност од тоа колку често возите, староста и состојбата на гумите, надворешната температура и други фактори, притисокот во гумите не е константен. Во зима, притисокот паѓа приближно за 0,1 бар на секои 10 Целзиусови степени пониска температура, што значи дека контролата треба да биде почеста – на пример, секој вторпат кога точите гориво.Проверката и дополнувањето на воздухот се едноставни постапки. Повеќето бензински пумпи располагаат со компресор што може бесплатно да се користи. Возилото треба да се паркира така што сите гуми да бидат лесно достапни. Се одвртува капачето од вентилот, се поставува приклучокот од компресорот цврсто врз вентилот и се проверува вредноста на мерачот. Доколку е потребно, гумата се дополнува постепено, а потоа капачето повторно се завртува. Истата постапка се повторува кај сите гуми.Ако гумата е препумпана, воздухот може внимателно да се испушти со благо притискање на малата игличка во средината на вентилот, со постојана проверка на притисокот.Пренизок притисок ја зголемува контактната површина со коловозот, што доведува до поголем отпор и зголемена потрошувачка на гориво. Дополнително, гумата се деформира, стабилноста се намалува, патот на сопирање се продолжува, а во екстремни случаи може да дојде и до пукање при возење, особено во кривини и при поголема брзина.Ниту превисокиот притисок не е безбеден. Тогаш се намалува контактната површина со асфалтот, што може да ја намали потрошувачката, но го зголемува абењето и ризикот од пролизгување, подолг пат на сопирање и појава на аквапланинг.Кај повеќето модели автомобили, гумите вообичаено се напумпани на притисок од 2 до 2,4 бари, но секогаш треба да се следи вредноста што ја препорачува производителот. Таа важи и во лето и во зима, бидејќи не постојат посебни сезонски бројки.Советот е јасен – притисокот во гумите треба да се одржува точно според препораките на производителот, без импровизации, за да се обезбеди максимална безбедност и оптимални перформанси на возилото во текот на целата година.

Медиасет | пред 1 месец

1 мес.

Колку шравофи имаат тркалата и зошто тоа е важно за безбедноста на возилото

Бројот на шрафови, на едно тркало пред сè зависи од големината, масата и перформансите на возилото. Помалите автомобили, како градските хечбек модели и компактните седани, најчесто користат четири шрафови поради помалите оптоварувања што се создаваат врз тркалата при возење.Потешките и помоќни возила обично имаат пет, шест или повеќе шрафови, со цел да се обезбеди поголема сила на прицврстување и повисоко ниво на безбедност при забрзување, сопирање и возење со поголема брзина. Тоа, сепак, не значи дека тркалата со четири шрафови се понебезбедни. Напротив, тие имаат и одредени предности – помала маса на поединечните делови и пониски трошоци за производство, бидејќи главините и сопирачките дискови се поедноставни и поевтини за изработка.Важно е да се знае дека навртките и шрафовите за прицврстување на тркалата се разликуваат и по димензиите на навојот, па затоа секогаш треба да се користи точно пропишаната големина наведена во упатството од производителот. При замена на фелни, освен распоредот на отворите за шрафовите, потребно е да се внимава и на параметрите како што се офсетот и централниот отвор, бидејќи од нив зависи правилното налегнување на тркалото.Замена на навртките или шрафовите е неопходна кога ќе се појават оштетени навои, корозија, пукнатини или деформации, како и при вградување нови фелни што бараат поинаков тип прицврстувачи. При монтажа, исклучително е важно тие да се затегнуваат со вртежен момент што го препорачува производителот, затоа што претераното затегнување може да предизвика сериозни оштетувања и дополнителни трошоци.

Магазин | пред 1 месец

1 мес.

Tежок пораз за Белата куќа: Трамп незаконски вовел глобални царини

Врховниот суд на Соединетите Американски Држави пресуди дека претседателот Доналд Трамп го прекршил федералниот закон кога еднострано вовел широки царини на глобално ниво, оценувајќи дека ги надминал своите уставни овластувања.Одлуката претставува значаен удар за Белата куќа по прашање кое е клучно за надворешната и економската политика на претседателот. Според американските медиуми, станува збор за најсериозниот пораз што втората администрација на Трамп го претрпе пред највисоката судска инстанца.Мнозинското мислење, поддржано од шест од деветте судии, го напиша главниот судија Џон Робертс. Во образложението се наведува дека претседателот презел „вонредна моќ“ еднострано да воведува царини со неограничен износ, времетраење и обем, без јасно конгресно овластување.Судот заклучи дека повиканото вонредно овластување не е доволно за ваков обем на мерки и дека за нив е потребна експлицитна согласност од Конгресот.Одлуката доаѓа по серија претходни случаи во кои Врховниот суд застана на страната на претседателот, вклучително и во прашања поврзани со имиграцијата, раководењето со независни агенции и намалувањето на федералните трошоци.

Свет | пред 1 месец

1 мес.

Жерновски ќе бара правда преку Судскиот совет, оти смета дека портпаролката Митева знае испох од постапка која е во тек

Членот на Централниот комитет на СДСМ, Андреј Жерновски, соопшти дека поднесува претставка до Судскиот совет поради, како што наведе, јавно изнесени информации од страна на портпаролката на Владата во врска со судска постапка што сè уште е во тек.„Портпаролот на Владата, г-ѓа Митева, јавно соопшти „исход“ од судска постапка која сè уште е во тек. Признавањето како истата поседува информации дека „жалбата против претседателката е одбиена како неоснована“ е крајно сериозно и скандалозно, бидејќи второстепена одлука (од Виш управен суд) сѐ уште не е донесена. Понатаму, преку соопштение, во нов обид да манипулира со јавноста, повторно изнесе податоци поврзани со исходот од сѐ уште незавршената судска постапка, со што направи долнителен прекршок.Она што е уште поскандалозно е фактот дека конкретната судска постапка воопшто и не се води против Владата, туку против Претседателот на државата. Прашањето е едноставно: Како портпарол на Владата располага со информации за тековен судски процес во кој не се јавува како странка во постапката? Како истата располага со информации дека воопшто е донесена првостепена одлука, дека има жалба и дека истата е неоснована, во услови кога воопшто не е донесена второстепена одлука? Ова не се „гласини кои кружат во јавноста“. Тоа може да биде единствено информација добиена директно од самиот суд. Со ова само се потврдува влијанието и недозволивото мешање на извршната во судската власт, спротивно на уставните принципи на владеење на правото и поделба на власта. Поради сериозноста на ситуацијата, поднесувам претставка до Судскиот совет. Политичка и судска одговорност за овој скандал мора да има. И ќе има!“, напиша Жерновски.

Македонија | пред 1 месец

1 мес.

Британската полиција ја претресе поранешната вила на принцот Ендрју

Британската полиција денеска ја претресе поранешната вила на Принцот Ендрју, помладиот брат на Кралот Чарлс Трети, еден ден откако беше уапсен под сомнение за несовесно вршење јавна должност.Апсењето уследи откако фотографија на членот на кралското семејство, како ја напушта полициската станица, се најде на насловните страници на светските медиуми, објави Ројтерс. Ендрју беше приведен на својот 66-ти роденден, поради сомнение дека ја злоупотребил функцијата додека бил трговски пратеник, наводно испраќајќи доверливи владини документи до покојниот финансиер и осуден сексуален престапник Џефри Епстин.По повеќе од десет часа минати во притвор, тој беше ослободен, а истрагата продолжува. Засега против него не е поднесено обвинение.Фотографијата на Ројтерс, на која видно исцрпениот Ендрју со зацрвенети очи и израз на неверување седи на задното седиште од автомобил, беше објавена на насловните страници ширум светот со наслови како „Пад“. Британскиот таблоид Daily Mail ѝ посвети 15 страници на приказната, а веста доминираше во медиумите од Австралија, каде Чарлс е шеф на државата, до Европа и САД.Кралот Чарлс соопшти дека веста за апсењето ја примил со „најдлабока загриженост“, потенцирајќи дека „законот мора да се спроведува“. Тој додаде дека следува целосна, правична и соодветна постапка во која надлежните органи ќе го истражат случајот на примерен начин. Минатата година монархот му ја одзеде титулата принц и го принуди да го напушти домот во Виндзор.Ендрју и претходно ги негираше сите неправилности поврзани со Епстин, кој во 2019 година си го одзеде животот во затвор, изразувајќи жалење за нивното пријателство. Сепак, документи објавени од американската влада покажуваат дека останале во контакт и по пресудата против Епстин во 2008 година за подведување малолетничка.Според тие документи, Ендрју наводно му доставувал на Епстин извештаи на британската влада за можности за инвестиции во Авганистан, како и проценки за Виетнам, Сингапур и други земји што ги посетил како специјален претставник за трговија и инвестиции.Апсењето на толку висок член на кралското семејство, осми во редот за наследување на тронот, претставува настан без преседан во современата британска историја. Последниот член на кралското семејство што бил уапсен во Британија бил кралот Чарлс Први, кој во 1649 година бил погубен поради велепредавство.

Свет | пред 1 месец

1 мес.

(Фото) Лица од тетовско се заканиле со масовни убиства преку „Дискорд“, инспирацијa биле убиствата во училиште во САД

Две лица се лишени од слобода по полициска акција во тетовско, откако дваесетгодишник преку социјалната апликација „Дискорд“ испратил закана дека е подготвен да изврши напад со огнено оружје.Одделот за сузбивање на организиран и сериозен криминал – Сектор за борба против тероризам до Основното јавно обвинителство за гонење организиран криминал и корупција поднесе кривична пријава против К.Х. (20) од Мала Речица за кривично дело „тероризам“ по член 394-б став 2 од Кривичниот законик. Дополнително, до Основното јавно обвинителство Тетово е поднесена пријава против 89-годишник за кривично дело „недозволено изработување, држење, посредување и тргување со оружје или распрскувачки материи“ по член 396 од КЗ.Според информациите, осомничениот на крајот на јануари преку „Дискорд“ испратил сериозна закана дека ќе изврши напад со автоматска пушка АК-47, при што навел дека има нарушено психичко здравје. Како инспирација го споменал нападот од 14 декември 2012 година во училиште во САД, кога беа убиени 26 лица, меѓу кои и 20 деца.По добиени информации од Амбасадата на САД во Скопје, дека Федералното биро за истраги побарало итно откривање на профилот од кој се испратени заканите, Министерството за внатрешни работи во координација со обвинителството презело мерки за идентификација на сторителот.На 17 февруари 2026 година, полициски службеници од Секторот за борба против тероризам, со асистенција на специјалната антитерористичка единица „Тигар“, извршиле претреси во дом и други простории во Мала Речица.При претресите биле пронајдени и одземени повеќе парчиња огнено оружје и муниција, меѓу кои автоматска пушка АК-47 со две рамки и 40 куршуми калибар 7,62х39 мм, пиштол „М57“ со две рамки и 49 куршуми, пиштол „Чероки“ со две рамки и повеќе од 600 куршуми калибар 9 мм, тактички и борбени елеци, ножеви со различна должина на сечиво, како и електронски уреди кои ќе бидат предмет на вештачење.Против дваесетгодишникот е поднесена кривична пријава за тероризам, додека против второто лице пријава за недозволено поседување и тргување со оружје. Истрагата продолжува под надзор на надлежните обвинителства.

Македонија | пред 1 месец

1 мес.

СДСМ со иронично „извинување“ до Орце Ѓорѓиевски за тендерите

СДСМ со иронична реакција упати „извинување“ до градоначалникот на Скопје, Орце Ѓорѓиевски, откако тој ги демантираше дека чантата на неговата сопруга чини илјадници евра.„Му се извинуваме на Орце Ѓорѓевски што му ја отворивме најболната тема, каде завршуваат парите на граѓаните од тендерите кои ги добиваат двете омилени фирми на власта, Пирамид билдинг и Ленди груп.За два месеци 96 милиони денари или 1,56 милиони евра добиле омилените фирми на Орце и на ВМРО-ОКГ од Град Скопје каде тој е градоначалник.20 милиони денари е тендерот за Пирамид Билдинг со склучен договор на 05.12.2026 година.76 милиони денари е тендерот за Ленди Груп со склучен договор од 28.01.2026 година.Едни исти фирми, на централно и на локално ниво добиваат тендери и ние да им се извиниме?Да не треба да му се извинуваме на Орце и за 56те тендери на Пирамид билдинг, каде е татко му на шефот на Кабинет на Мицкоски, Нелоски?Или да се извинуваме и 74-те тендери на Ленди груп вредни 17.5 милиони евра?Вие да делите тендери и да се луксузирате на грбот на народот со авиони, часовници, чанти а народот кој не може да врзе крај со крај да ви се извинува?Извини Орце, да не се малку тендери, да не треба повеќе?А што се однесува до чантата, следниот пат кога ќе објавуваат слика, прво нека ја проучат разликата од таа што неговата сопруга ја носи на промоцијата со онаа којашто ја објави денеска, очигледна е.Да да, и ние и граѓаните веруваме дека чантата е 944 денари. Веруваме да“, стои во соопштението на СДСМ.

Македонија | пред 1 месец

1 мес.

Француски војник застрелан во глава за време на „игра“ со колеги

Француски војник почина откако бил застрелан во главата за време на „игра“ со колеги на забава во воената болница „Перси“ во Кламар, западно од Париз.Дваесетгодишниот бригадир Александре Ланкбен се здобил со тешки повреди во инцидентот што се случил на 8 февруари, за време на забава со алкохол во болницата „Перси“. Тој им подлегнал на повредите на 14 февруари.Воениот гувернер на Париз, Лоик Мизон, ја потврди веста за неговата смрт, изразувајќи длабоко сочувство до семејството и најблиските и најавувајќи целосна поддршка од вооружените сили. Ланкбен служел во 35. падобранска артилериска бригада со седиште во Тарб и бил ангажиран во рамки на долготрајната операција за внатрешна безбедност „Сентинел“.Според француското обвинителство, четворица војници сместени во болницата таа вечер започнале воена „игра“ што подразбира обид за разоружување на колега и онеспособување на неговото оружје. Иако вообичаено оружјето во вакви ситуации е празно, во конкретниот случај пиштолот бил наполнет. За време на „играта“ бил испукан куршум што го погодил Ланкбен во главата.Тројца војници биле изведени пред суд во Париз на 11 февруари. Еден од нив се товари за насилство со оружје што предизвикало трајна неспособност и за прекршување на наредбите со консумирање алкохол, додека другите двајца се обвинети за ненамерно нанесување тешки телесни повреди поради очигледно и намерно кршење на безбедносните прописи.Тие се сомничат и за изменување на местото на настанот со цел попречување на правдата. Се очекува обвиненијата да бидат преквалификувани по смртта на бригадирот. Истрагата ја презеде криминалистичкиот оддел на департманот О-де-Сен.

Свет | пред 1 месец

1 мес.

Од Дубаи екстрадиран Флорим Лимани, прва екстрадиција од ОАЕ во Македонија

Лице барано со меѓународна потерница е екстрадирано од Дубаи во Македонија, во прва реализирана екстрадиција од Обединетите Арапски Емирати во земјава.Според информациите од Министерство за внатрешни работи, станува збор за Флорим Лимани (33), кој бил баран за издржување затворска казна во траење од три години и шест месеци за кривично дело „недозволено изработување, држење и тргување со оружје или распрскувачки материи“, казниво по член 396 став 1 од Кривичниот законик.Екстрадицијата е реализирана денеска, а надлежните посочуваат дека станува збор за прв случај во кој лице барано од македонските органи е предадено од Обединетите Арапски Емирати врз основа на меѓународна потерница.

Македонија | пред 1 месец

1 мес.

Дали на Германија ѝ пропаѓа големата набавка на дронови поради човек поврзан со Епстин?

Набавката на дронови-камикази во Германија, вредна 3,5 милијарди долари (2,98 милијарди евра), предизвика сериозна политичка криза поради вмешаноста на технолошкиот милијардер Питер Тил, кој во јавноста често се поврзува со осудениот сексуален престапник Џефри Епстин, јавува Анадолу.Спорниот договор требаше да ја означи првата голема германска набавка на т.н. „лутечка муниција“, но во моментов е под сериозно преиспитување поради улогата на Тил како акционер во производителот „Старк Дифенс“. Германскиот министер за одбрана Борис Писториус побара од компанијата да го разјасни влијанието на Тил пред да биде потпишан договорот, покажувајќи дека Берлин ја зема предвид јавната реакција и безбедносните дилеми.Контроверзиите се продлабочија поради претходните деловни и приватни контакти меѓу Тил и Епстин. Според документи на американското Министерство за правда, тие разменувале електронска пошта и се среќавале во периодот од 2014 до 2019 година, разговарајќи за инвестициски можности. Дополнително, во германската јавност се појавија и наводи дека Епстин посредувал во контакти меѓу Тил и лица поврзани со руски разузнавачки структури, што отвори сериозни безбедносни прашања.Од германското Министерство за одбрана до законодавците е доставен доверлив извештај во кој се наведува дека Тил поседува само пасивен малцински удел преку неговиот фонд „Тил Капитал“, без оперативна контрола врз компанијата. Според документот, мнозинскиот пакет акции е во рацете на основачкиот тим и вработените, додека остатокот е распределен меѓу околу 50 акционери.И покрај уверувањата, дебатата ја засенува планираната набавка на системите „Виртус“ и „Хелсинг HX-2“. „Виртус“ е систем со вертикално полетување кој, според спецификациите, може да пробие тенковски оклоп со дебелина до 80 сантиметри и да биде подготвен за употреба за десет минути. Помалиот „Хелсинг HX-2“, тежок околу 12 килограми, се лансира со катапулт и е наменет за поагилни операции. Двата системи користат напредни алгоритми на вештачка интелигенција за идентификација на цели, но германските власти инсистираат конечната одлука за напад да ја носи човечки оператор.Доколку договорот биде одобрен, тоа ќе претставува пресвртница за Бундесвер, кој за првпат би добил сеопфатни офанзивни способности со беспилотни летала. Опремата е планирана за распоредување во 45-та оклопна бригада, активирана во Литванија во април 2025 година, со цел зајакнување на источниот бедем на НАТО.Министерот Писториус нагласи дека расчистувањето на сопственичката структура е прашање од национална безбедност, додека Зелената партија продолжува со притисокот, предупредувајќи на долгорочните импликации од партнерство со личност од калибарот на Тил. Министерството за одбрана, пак, смета дека ваквиот договор е неминовен чекор во услови на современо војување, но опозицијата предупредува дека стратешките ризици не смеат да се занемарат.

Свет | пред 1 месец

1 мес.

20-годишник од Мала Речица се заканувал за напад со „калашников“, инспирација му било момче од САД кој убил 26 лица

Јавен обвинител од ОЈО ГОКК донесе наредба за спроведување на истражна постапка против дваесет годишен жител на Мала Речица за сторено кривично дело Тероризам.Осомничениот на крајот на месец јануари годинава преку социјалната апликација „Discord“ испратил сериозна закана дека е подготвен да изврши напад со огнено оружје – автоматска пушка АК-47 позната како Калашников, притоа појаснувајќи дека истиот е со нарушено психичко здравје. Инспирација за ваков напад, му бил настан од 14.12.2012 година во САД кога Adam Lanza – 20 годишно момче, во Училиште во САД со автоматка пушка убило 26 лица од кои 20 деца.По добиени информации од Амбасадата на САД во Скопје дека од страна на ФБИ е поднесено барање за итно откривање на „Discord“ профил што се наоѓа во нашата земја, а од каде што се упатени сериозните закани, МВР во координација со ОЈО ГОКК презедоа дејствија за откривање на сторителот. По идентификација и лоцирање на корисничката адреса на 17.2.2026 година под раководство на јавен обвинител од ОЈО ГОКК, полициски службеници од Одделот за сузбивање на организиран и сериозен криминал и асистенција на САЕ Тигар извршија претрес на дом и други простории во Мала Речица.При претресот кај осомничениот се пронајдени и одземени секира, пет ножа со различна должина, телескоп, седум Iphone мобилни телефони и компјутер. Исто така, од таткото на осомничениот е одземен пиштол за кој поседува дозвола и повеќе парчиња муниција. Останатото пронајдено оружје – пиштол и автоматска пушка, дедото на осомничениот ги поседувал без дозвола и за него е поднесена кривична пријава до ОЈО Тетово за кривично дело Недозволено изработување, држење, посредување и тргување со оружје или распрскувачки материи.Јавниот обвинител до судијата на претходна постапка при Основниот суд Скопје достави предлог за определување на мерка притвор против осомничениот. Предлогот е прифатен и со Решение мерката е определена во траење од 30 дена.

Македонија | пред 1 месец

1 мес.

(Видео) Блокиран патот Виница – Берово: Жителите на Блатец на протест против хидроцентрала на Блатешница

Жителите на село Блатец денес искочија на протест на местото Скараница. Тие го блокираа регионалниот пат Виница – Берово, како револт против најавите за изградба на хидроцентрала на реката Блатешница.Тие се противат на изградбата на хидроцентралата на реката Блатешница оти сметаат дека овој проект претставува сериозна закана за природната средина, водоснабдувањето, локалната заедница и идните генерации. Според нив водоводниот систем на Блатец директно зависи од реката Блатешница, а изградбата на хидроцентрала би можела да ја намали количината на вода што пристигнува во водоводот.„Бараме владата да ја поништи концесијата за река Блатешница“, „Реката дише не ја задушувајте“, „Слушнете го народот, не инвеститорот“, „Не ја гасете иднината за профит“, се само дел од пораките кои ги испратија жителите.Претходно жителите од виничкото село Блатец со деноноќна народна стража ја чуваа Блатешка река од изградба на нова мини хидроцентрала.

Македонија | пред 1 месец

1 мес.

Кривична пријава против ексдиректорката на Клиничка болница Битола: оштетила 49.000 евра од здравствениот буџет

СВР Битола, до Основното јавно обвинителство Битола, поднесе кривична пријава против Е.И.(53) од Битола поради постоење основи на сомнение за сторено кривично дело „злоупотреба на службената положба и овластување”.Пријавената, како поранешен директор на Јавна здравствена установа-Клиничка болница Битола, во текот на 2023 година, спротивно на одредбите од Законот за администаривни службеници, Законот за изменување и дополнување на Законот за администаритвни службеници, без согласност од Министерството за финансии и спротивно од Законот на буџети за вработување, без спроведени интерни огласи и согласност и потпис од Секторот за човекови ресурси, за 11 лица вработени како административни службеници во управната зграда во Клиничка болница Битола склучила анекси кон договорите за вработување со цел зголемување на коефициентите на сложеност на работните места и издала решенија за утврдување на висина на плата, односно унапредување во повисок степен без соодветно образование.На тој начин пријавената го оштетила Буџетот на Министерството за здравство, односно Фондот за здравствено осигурување за 49.304 евра до моментот на поднесување на пријавата.На пример, лице вработено како помошник одговорен инжинер за техничко одржување на објекти, каде било предвидено средно образование електротехника или електромашинство, било унапредено лице со академско звање - доктор на науки од областа на индустриски менаџмент и платата му била пресметувана по коефициент на сложеност кој се однесувал за профил доктор на немедицински науки, сродни на дејностите на установата.

Македонија | пред 1 месец

1 мес.

Новинар на „Дојче веле“ уапсен во Турција

Турските власти го привеле во Анкара долгогодишниот дописник на германскиот меѓународен медиум „Дојче Веле“ (ДВ), Аликан Улудaг, под обвинение за „ширење обманувачки информации“ и „навреда на претседателот“, јавува Ројтерс.Според соопштението на Канцеларијата на главниот јавен обвинител во Истанбул, истрагата е покрената по службена должност врз основа на негови објави на социјалната мрежа Икс. Улудaг бил приведен во Анкара, а потоа префрлен во Истанбул каде што треба да биде сослушан од обвинител.Од „Дојче Веле“ потврдија дека нивниот дописник, познат како истражувачки новинар, бил уапсен пред членовите на семејството. Според нивните информации, околу 30 полицајци учествувале во акцијата, при што бил извршен претрес на неговиот дом и одземена информатичка опрема.Обвиненијата, како што наведува ДВ, се однесуваат на објава на Икс од пред околу година и пол, во која тој ги критикувал мерките на турската влада, тврдејќи дека довеле до ослободување осомничени припадници на Исламска држава, како и изнесувајќи наводи за корупција.Директорката на ДВ, Барбара Мазинг, ги оцени обвиненијата како неосновани и побара итно ослободување на новинарот, наведувајќи дека апсењето претставува „намерен чин на заплашување“ и показател за притисоците врз слободата на медиумите во Турција.Меѓународни организации за слобода на медиуми, меѓу кои и „Репортери без граници“, го осудија приведувањето, оценувајќи дека станува збор за дел од поширок процес на судско вознемирување на независни новинари во земјата.

Свет | пред 1 месец

1 мес.

Ѓорѓиевски и даде рок од 24 часа на СДСМ да се извини: Нема да отворам теми за златни визи, станови и згради во Дубаи и Козле

По објавата на СДСМ дека чантата на сопругата на градоначалникот на Скопје чини 30.000 евра, на социјалните мрежи се огласи Орце Ѓорѓиевски. Тој побара од партијата во рок од 24 часа да се извинат на нивниот официјален фејсбук профил каде беше објавена информацијата.„СДС, ташната не е реалност, ама златните визи и зградите во Дубаи и Козле, се!СДС повторно докажа дека нема ден без сопствено „лизгање“. Очигледно, тоа им е последната преостаната дисциплина. Во обид да привлечат внимание и барем накратко да го прикријат политичкиот дебакл во кој се наоѓаат, повторно пуштаат лажни вести кои се нивен заштитен знак, стара навика и очајнички обид да останат релевантни.Сето ова можеби ќе беше само уште една евтина манипулација, доколку не продолжија по најниската можна линија, а тоа е мешање на моето семејство.Истата матрица ја гледавме и за време на кампањата, кога мета на анонимни и нереализирани ботови беше мојот син.Денес, без срам и без граници, ја продолжија приказната преку мојата сопруга.Во своето соопштение тврдат дека на вчерашната промоција на отчетот за 100 дена од сработеното таа носела чанта од „луксузен бренд“. Очигледно заборавиле дека денес сè е проверливо и дека граѓаните одамна не се наивни. И, удрија во ѕид. Повторно.Фактите се едноставни и кристално јасни, чантата што ја носи мојата сопруга чини 945 денари купена од македонска продавница. Не 30.000 евра. Туку 945 денари. Толку од нивната сензација и „ексклузива“.Кога не можат да најдат ниту една сериозна замерка за работата на Скопје, кога гледаат дека градот повторно се исправува на нозе и дека резултатите се видливи, тогаш се служат со вакви лаги. Со ниски удари, со фабрикувани приказни и со напади врз семејството, затоа што политика и аргументи одамна немаат.Јас нема да паѓам на нивното ниво и да потсетувам во какви луксузи живеат семејствата на нивните челници и функционери.Нема да отворам теми за златни визи, за станови и згради во Дубаи, во Козле „подарени“ луксузни Q8-ци и слични симболи на нивната лажна скромност.Ќе го задржам нивото на комуникација, иако јавноста многу добро знае кој како живее и од што.За разлика од нив, јас водам скромен живот. Живеам во стан.Возам сопствен автомобил. Ништо повеќе и ништо помалку. И мојот народ тоа го знае.Јас ќе продолжам да работам за моите скопјани. Секој ден и секоја ноќ. Беспоштедно. А тие нека тонат во сопствената мизерија и во лагите со кои со години се обидуваат да опстанат.Барам јавно извинување од СДС во рок од 24 часа, објавено на истата Фејсбук-страница каде што ја пласираа лажната вест, како и во медиумите.Доколку тоа не се случи, ќе поднесам пријава и ќе ги искористам сите правни механизми за заштита на мојот и угледот и честа на моето семејство.Политиката може да биде жестока, но не смее да се води преку лаги, подметнувања и лични дискредитации.Времето на валкани игри, завршува“, вели Ѓорѓиевски.

Скопје | пред 1 месец

1 мес.

Прва екстрадиција од ОАЕ, oсуденик за недозволено тргување со оружје спроведен во земјава

Денеска (20.02.2026) од Дубаи во нашата земја беше екстрадиран Флорим Лимани (33), кој беше баран со меѓународна потерница за издржување затворска казна од три години и шест месеци за сторено кривично дело „недозволено изработување, држење и тргување со оружје или распрскувачки материи”, казниво по чл. 396 ст.1 од КЗ.Ова е прва реализирана екстрадиција на лице од Обединетите Арапски Емирати, кое нашата држава го бара со меѓународна потерница.

Македонија | пред 1 месец

1 мес.

Драма во Битола: Го тепал син му, па го нападнал со секира

Вчера во 11:15 часот во Битола, полициски службеници од СВР Битола го лишија од слобода Ф.В.(41) од Битола поради сомнение за сторени кривични дела „убиство во обид“ и „загрозување на сигурноста“, односно затоа штпо на 18.02.2026 физички го нападнал неговиот син, при што употребил и секира.Додека со него се водел службен разговор во Полициксата станица Битола, тој нападнал полициски службеници и оштетил дел од инвентарот. За настанот е известен јавен обвините и по целосно документирање на случајот, против него ќе следуваат соодветни пријави.

Македонија | пред 1 месец

1 мес.

Сопругата на Ѓорѓиевски демантира: Чантата чини 944 денари, не 30.000 евра, барам јавно извинување

СДСМ во партиско соопштение објави дека сопругата на градоначалникот на Скопје, Орце Ѓорѓиевски, вчера на партиска промоција се појавила со брендирана чанта „Хермес“. Како што велат од партијата оваа чанта, Hermes mini Kelly 2 (20 cm) чини од 28.000 до 33.000 долари.Мартина Ѓорѓиевски на социјалните мрежи објави статус во кој вели дека чантата чини само 944 денари и побара јавно извинување.„Кога се нема аргументи, кога политиката се сведува на политиканство, СДСМ нема да зборува за работите кои се важни за граѓаните, за фактот што е направено за Скопје и Скопјани, туку ќе вмешува семејства, личности кои не се директно во политиката, неретко и нашиот малолетен син и се така за да привлечат внимание. За волја на вистината, фактите се следни. Мојата чанта не е некакви 30 000 долари како што тврди СДС, ниту е Хермес, туку е купена од продавницата на Obuca Metro Македонија, и тоа на попуст за 944 денари. Истата нема никаква врска со брендот Hermès, ниту по потекло, ниту по цена, ниту по вредност, ниту пак носи натпис на брендот. Доколку не веруваат, може да им ја подарам мојата на увид, а може и самите да ја посетат продавницата, има одлични работи за супер ефтини цени за луѓе кои живеат скромен и чесен живот. Има сѐ уште на располагање од истиот модел на поголема варијанта од малата чанта.Обидот преку евтина конструкција да се создаде наратив за „луксуз“ и „аздисаност“ служејќи се со лаги и клевети во најмала рака е безобразно.Не е мое да коментирам политички, но вмешувањето на потесно семејство во отсуство на вистински аргументи и ширење на лажни вести не е политика, туку дно.Барам јавно извинување за изнесените невистини и повлекување на лажните тврдења.Во спротивно, ќе ги искористам сите правни механизми за заштита на честа и угледот.Политиката не смее да се води преку лаги и лични дискредитации“, стои во објавата.

Македонија | пред 1 месец

1 мес.

(Видео) Трендафилов: Синдикалната минимална кошница за февруари золемена за 969 денари

Сојузот на синдикати на Македонија (ССМ) за месец февруари пресмета зголемување на вредноста на минималната потрошувачка кошничка за 969 денари, објави денес претседателот на ССМ, Слободан Трендафилов.„Додека политичарите се пресметуваат на грбот на работниците, вредноста на Синдикалната минимална кошница за месец февруари изнесува 67.382 денари, во споредба со претходниот месец е зголемена за 969 денари, за 2 месеци е зголемена за 1890 денари, а за 24 месеци колку што одбиваат да ја зголемат минималната плата, зголемена е за повеќе од 10.000 денари.Последните денови слушнавме дека политичарите традиционално кога се во опозиција сите ги поддржуваат работниците и се фалат со тоа, а кога се власт се против работниците без исклучок!Но, денеска излезе податокот за просечната плата за 2025 година која е зголемена за 9,6% или за толку ќе се зголемат платите на функционерите затоа што до објавата не ја променија ниту основицата од просечна плата на минимална плата, ниту ги намалија коефициентите на сложеност за 40% !За два месеци работниците се посиромашни за 1890 денари, а тие се фалат дека ќе ја усогласувале минималната плата за 1.666 денари“, вели Трендафилов.

Македонија | пред 1 месец

1 мес.

Давкова: Помилувањето на затворениците не смее да се води од казната, туку од ресоцијализацијата

„Луѓето кои се во затвор не престануваат да бидат човечки суштества, тие имаат право на дигнитет и интегритет, и помилувањето никогаш не смее да се води од казната што е одредена и од природата на делото, зборувам низ уставно-правен аспект, туку да го мери и да го оценува процесот на ресоцијализација во институцијата. Или ако сакате, јас мислам дека сите луѓе, па и кога ќе направат големи грешки во животот и ќе се најдат изолирани, односно ќе го изгубат правото на движење на некој начин, имаат право на втора шанса. Впрочем денеска трендот во ресоцијализацијата оди рака под рака со осовременувањето и очовечувањето на условите во затворите. Нашите затвори сè уште не го исполнуваат овој услов. Често пати сум ги слушала моите колешки колеги кога со право укажуваат дека можеме да се најдеме под удар на Советот на Европа, дури и за елементи на тортура во постапувањето кон луѓето во затворите, низ многу димензии, изјави денеска претседателката Гордана Сиљановска-Давкова во воведното излагање на научно-стручната расправа по предлог-законот за помилување на Правниот факултет „Јустинијан Први“ во Скопје.Добро е што се седна да се изработи нов закон бидејќи, како што рече, актуелниот „не личи на закон, особено ако мора да го читаме низ призма на она што го стори Уставниот суд менувајќи многу одредби“ и оти членовите на комисијата не може да имаат „истражни“ надлежности и да бараат информации од судовите или агенциите и оти во нејзиниот состав не траба да бидат судии, адвокати...

Македонија | пред 1 месец

1 мес.

Жерновски ќе поднесе претставка до Судскиот совет: Како портпарол на Владата располага со информации за тековен судски процес

Членот на Извршниот одбор на СДСМ, Андреј Жерновски, поднесува претставка до Судскиот совет поради изнесните информации од страна на портпаролката на Владата на Мицкоски, Марија Митева. „Портпаролот на Владата, г-ѓа Митева, јавно соопшти „исход“ од судска постапка која сè уште е во тек.Признавањето како истата поседува информации дека „жалбата против претседателката е одбиена како неоснована“ е крајно сериозно и скандалозно, бидејќи второстепена одлука (од Виш управен суд) сѐ уште не е донесена.Понатаму, преку соопштение, во нов обид да манипулира со јавноста, повторно изнесе податоци поврзани со исходот од сѐ уште незавршената судска постапка, со што направи долнителен прекршок.Она што е уште поскандалозно е фактот дека конкретната судска постапка воопшто и не се води против Владата, туку против Претседателот на државата.Прашањето е едноставно:Како портпарол на Владата располага со информации за тековен судски процес во кој не се јавува како странка во постапка?Како истата располага со информации дека воопшто е донесена првостепена одлука, дека има жалба и дека истата е неоснована, во услови кога воопшто не е донесена второстепена одлука?Ова не се „гласини кои кружат во јавноста“. Тоа може да биде единствено информација добиена директно од самиот суд.Со ова само се потврдува влијанието и недозволивото мешање на извршната во судската власт, спротивно на уставните принципи на владеење на правото и поделба на власта.Поради сериозноста на ситуацијата, поднесувам претставка до Судскиот совет.Политичка и судска одговорност за овој скандал мора да има. И ќе има!“, посочи Жерновски.

Македонија | пред 1 месец

1 мес.

Јаневска: Финансирањето на научни проекти веќе нема да биде проблем, важно е научниците и професорите да сакаат да творат

Првиот том на Македонскиот етимолошки речник е дело од огромно значење за македонскиот јазик, литературата и науката. Целиот проект за прв ваков речник е доказ дека кога државата вложува во наука, а научните работници со посветеност истражуваат и создаваат нови вредности, тогаш имаме значајни и трајни резултати, рече министерката за образование и наука проф. д-р Весна Јаневска на промоцијата на Речникот којшто е еден од научно-истражувачките проекти што беа финансирани во 2025 од буџетски средства. Негов автор е професор д-р Гоце Цветановски, научен советник во Институтот за македонски јазик „Крсте Мисирков“ – Скопје.Јаневска нагласи дека Министерството за образование и наука има полна поддршка од Владата да ги зголемува вложувањата во научни истражувања. Лани со 374 милиони денари беа финансирани 40 научно-истражувачки проекти на државните универзитети и факултети, на научните институти и на МАНУ, а во наредниот период ќе се вложуваат уште повеќе пари во науката и истражувањата.Минатата година буџетот за наука беше речиси двојно поголем од 2024 и изнесуваше 680 милиони денари, а оваа година се обезбедени 773 милиони денари. „Македонија мора да се сврти кон науката ако сакаме да направиме исчекор од досегашниот тек на работите во сите сфери. Премногу долго сме заробени во инерција, навики и модели што не носат напредок. Светот, па и регионот, одат напред со брзи чекори, а ние не смееме да си дозволиме само да ги гледаме“, укажа министерката Јаневска.Финансирањето на издржани научни проекти веќе нема да биде проблем. Заедно со новите закони за високо образование, за научно-истражувачка дејност и за квалитет во високото образование ќе се создаде добра основа за развој на науката и истражувањата и важно е само научниците и професорите да сакаат да творат.

Македонија | пред 1 месец

1 мес.

Детали како марихуаната спакувана во над 200 кутии стигнала од Македонија до Србија

Постапувајќи по поднесена кривична пријава, јавен обвинител од Основното јавно обвинителство за гонење на организиран криминал и корупција донесе Наредба за спроведување на истражна постапка против шест лица, за кои постои основано сомнение дека сториле кривично дело „Неовластено изработување и пуштање во промет на наркотична дрога, психотропни супстанции и прекурсори“. Истражната постапка се темели на докази обезбедени врз основа на документација доставена од Министерството за внатрешни работи, како и од документација од оформен предмет на Јавното обвинителство за организиран криминал на Република Србија добиена преку меѓународна правна помош.Според наводите во наредбата, осомничените, заедно со други засега неидентификувани лица, во неутврден период од 2025 година до крајот на јануари 2026 година, се здружиле со цел неовластена продажба и пуштање во промет на наркотична дрога – кокаин и марихуана. Секој од членовите на групата имал јасно определена улога при преземање, држење и пренесување на наркотичната дрога марихуана, заради нејзина понатамошна неовластена продажба. Двајца од осомничените, за кои српското обвинителство за организиран криминал води постапка, заеднички и по претходен договор со првоосомничениот во овој предмет кој е сопственик на правно лице од Скопје, како и со други неидентификувани лица, организирале набавка на наркотична дрога марихуана и нејзино повеќекратно транспортирање од Република Северна Македонија до Република Србија со товарни возила, заради натамошна продажба.Во декември 2025 година, првоосомничениот им дал насоки на своите вработени за пакување на сув цвет од канабис во вкупна количина од 8.832 килограми, претходно набавен од правно лице од Струмица. Во период од околу две недели, вработените спакувале над 200 кутии, по што првоосомничениот им одобрил колективен одмор. На 13.01.2026 година, во пладневните часови, двајцата ортаци (едниот осомничен во РСМ, а другиот во РС), организирале пренесување на поголема количина сув цвет од канабис со товарни и патнички возила од објектот на правното лице во Скопје до локација во атарот на Свети Николе. Првоосомничениот, заедно со други неидентификувани лица, организирал кутиите да бидат натоварени во возилата и во два наврати пренесени до наведената локација.Во исто време, во атарот на селото Сарамзалино, останатите петмина осомничени на паркинг простор кај локалната црква во селото извршиле претовар на царинета стока од товарно моторно возило со приклучно возило, во друго товарно моторно возило. Потоа, осомничените заминале за Свети Николе каде во испразнетото товарно возило биле натоварени кутиите со сув цвет од канабис. По извршениот утовар, осомничените на кои претходно им беше определен краткотраен притвор со товарното моторно возило и приклучното возило, заедно со уште тројца осомничени со ПМВ, се упатиле кон граничниот премин Табановце и ја напуштиле државата.На 14.01.2026 година, во 03:41 часот, товарното моторно возило се исклучило од автопат и се упатило кон селото Коњух, каде заедно со други неидентификувани лица било извршено растоварање на кутиите со наркотична дрога марихуана во објект на правно лице од Крушевац, претходно обезбеден од осомничени лица за кои Јавното обвинителство за организиран криминал на Република Србија води истражна постапка.Јавниот обвинител оцени дека постојат околности што упатуваат на тоа дека во конкретниот случај целта на притворот не би можела да се оствари со некоја друга мерка за обезбедување присуство, па на судијата на претходна постапка при Основниот кривичен суд Скопје му предложи да донесе решение со кое спрема двајцата осомничени на кои им беше определен краткотраен притвор да биде определена мерка притвор во траење од 30 дена.

Македонија | пред 1 месец

1 мес.

Младите од Блатец на протест: Ќе го блокираат патот Виница – Берово поради хидроцентралата

Младите од село Блатец, најавија дека денес, петок 20 февруари, од 15 до 17 часот излегуваат на протест на местото Скараница. Тие ќе го блокираат регионалниот пат Виница – Берово, како револт против најавите за изградба на хидроцентрала на реката Блатешница.„Ние младите од Блатец не стоиме настрана – работиме, обновуваме и го чуваме своето. Ги реновираме чешмите, ја чуваме природата и ја браниме реката. Да покажеме масовност и заедништво кога се брани татковината“, стои во објавата.Покрај редовните блокади и најавите за денешниот протест, граѓаните објавија и петиција.

Македонија | пред 1 месец