БИТОЛА

Наставник од Битола цела година држел настава без да знае дека добил отказ

Наставникот по ликовно образование Стефан Поповски од Битола тврди дека цела учебна година одел на работа, држел настава, пишувал оценки и водел е-дневник, без притоа да знае дека уште во јануари 2025 година формално му бил прекинат работниот однос.Како што објави порталот „Апла“, Поповски бил ангажиран во три училишта за да оформи полн фонд часови, а во подрачното училиште во Горно Оризари при ООУ „Тодор Ангелевски“ Битола одржувал по четири наставни часа неделно.Според неговото сведочење, цело време редовно доаѓал на работа, учествувал во училишни активности, водел електронски дневник, се потпишувал на Наставнички совет и со ученици учествувал на натпревари и ликовни конкурси, без никој да го информира дека не е повеќе на платен список.„Веќе два месеци си ја барам правдата, си ги барам одработените пари и стажот, но добивам пораки дека ако ова стигне во јавноста никогаш повеќе нема да работам во образование. Вчера крајно бев избркан од работа“, изјавил Поповски за „Апла“.Тој тврди дека дури неодамна дознал дека училиштето престанало да му исплаќа плата и стаж уште од 29 јануари 2025 година.Во меѓувреме, како што наведува, продолжил нормално да држи часови.„Имав пристап до е-дневникот, пишував оценки, одев на Наставнички совет, водев евиденција, сè како што прават редовно вработените наставници“, вели Поповски.Според објавените информации, училиштето му доставило решение за престанок на работен однос на кое нема негов потпис, а, како што тврди тој, документот првпат го видел дури сега.Поповски веќе покренува постапка против училиштето, а за случајот е информирано и Основното јавно обвинителство Битола.Градоначалникот на Битола, Тони Коњановски, соопшти дека дал налог до општинскиот инспектор за образование да ги провери наводите.„Доколку се утврди дека се точни и вистинити, ќе покренам постапка за разрешување на директорката на училиштето“, објави Коњановски.

Македонија | пред 8 часа

Влегол додека спиела и ја убил со десетина убоди со нож - ужасни детали за трагедијата во Битола

Основното јавно обвинителство Битола отвори истражна постапка против 33-годишен маж осомничен за убиство при вршење семејно насилство, откако утрово со нож ја убил својата поранешна вонбрачна партнерка.Според обвинителството, станува збор за кривично дело квалификувано според член 123 став 2 точка 2 од Кривичниот законик.„Осомничениот ја лишил од живот неговата поранешна вонбрачна партнерка со која имал четири заеднички малолетни деца“, соопшти обвинителството.Оттаму наведуваат дека осомничениот претходно се осигурал дека таткото на жртвата не е во домот во кој таа живеела, по што влегол во куќата додека жената спиела.„Осомничениот влегол во куќата додека спиела, се доближил до жртвата и ѝ нанел десетина убоди со нож во телото, од кои таа веднаш починала“, наведува обвинителството.Јавниот обвинител до судијата на претходна постапка при Основниот суд Битола доставил предлог за определување мерка притвор.Како причина за притворот се наведува опасноста осомничениот да избега.

Македонија | пред 1 седмица

Полицијата постапува по пријавите за ученикот од Битола кој наводно се заканувал, повикан е родител

МВР за „Скопје1“ потврди дека СВР Битола постапува по пријавите поврзани со ученикот од основното училиште „Стив Наумов“ во Битола, откако во јавноста се проширија тврдења дека се заканувал на соученици.„Ве известуваме дека СВР Битола презема мерки по насоки на ОЈО Битола во врска со пријава од родители од ОУ ‘Стив Наумов’ од Битола. Во врска со случајот во СВР Битола е повикан родител на детето и се преземаат дополнителни мерки за расчистување на случајот“, велат од МВР за „Скопје1“.Претходно, пораки во родителски групи и објави на социјалните мрежи предизвикаа паника, откако почнаа да се шират тврдења дека ученик од седмо одделение се заканувал дека ќе убива во училиштето.Првичните информации биле дека заканите биле објавени на „ТикТок“, но засега нема доказ за директна закана, ниту објава со експлицитна содржина за напад.Дополнителна вознемиреност предизвикала објава од ученикот на „ТикТок“ во која напишал: „Ќе ги посетам за брзо, 18 мај“, што дел од родителите и учениците го протолкувале како закана.Директорот на училиштето, Никола Пискачев, за „Скопје1“ претходно изјави дека не е утврдена директна закана за убиство.„Ниту една од овие содржини не може да се потврди како директна изјава на ученикот во која експлицитно стои закана од типот дека ќе ги убие соучениците“, изјави Пискачев.Тој посочи и дека случајот е пријавен во полиција, Центар за социјални работи и надлежните институции, а училиштето апелираше за смиреност и внимателност, имајќи предвид дека станува збор за малолетник.

Македонија | пред 2 седмици

Ниту директна закана, ниту список со ученици: порака од седмоодделенец „ќе ве посетам на 18 мај“ предизвика паника во битолско училиште

Пораки во родителски групи и објави на социјалните мрежи предизвикаа паника во Битола, откако почнаа да се шират тврдења дека ученик од седмо одделение во основното училиште „Стив Наумов“ се заканувал дека ќе убива соученици.Првичните информации што се споделувале меѓу родители биле дека заканите биле објавени на „ТикТок“. Но засега, за таква директна закана нема никаков доказ. Нема објава со експлицитна закана, ниту фотографија или снимка од евентуално избришана содржина. Сепак, поради стравот и реакциите во јавноста, ученикот во изминатите денови не посетувал настава.Според јавните објави, вознемиреноста ја предизвикала објава на „ТикТок“ во која седмоодделенецот напишал: „Ќе ги посетам за брзо, 18 мај“. Дел од учениците и родителите ова го протолкувале како закана, по што во битолски групи на Фејсбук почнале да се шират предупредувања.„Некој ученик по име .... од седмо се заканувал дека на 18.05.2026 ќе извршувал убиства во училиштето ‘Стив Наумов’, дали сте запознаени со овој случај“, стои во една од објавите.Директорот на училиштето, Никола Пискачев, за „Скопје1“ вели дека досега не е утврдена ниту една директна закана за убиство.„Ниту една од овие содржини не може да се потврди како директна изјава на ученикот во која експлицитно стои закана од типот дека ќе ги убие соучениците. Сите релевантни објави и содржини се евидентирани од страна на класниот раководител и се предочени на родителите на ученикот“, вели Пискачев.Тој додава дека содржините од социјалните мрежи внимателно се анализираат, но и дека мора да се води сметка за приватноста на ученикот.„Скопје1“ стигна и до јавниот профил на ученикот, каде пред една недела објавил фотографии со текст во кој се жали дека е следен и критикуван од соученици и родители.„Море кидари недораснати тешко мене, со кој учам, тие ќе ми кажуваат што ќе снимам, мене школото ќе ми контролира во мојот приватен живот…“, пишува во една од објавите.Во друга објава од 3 мај, ученикот напишал: „Идржете уште 38 дена на училиште“.Директорот посочува дека ученикот претходно бил префрлен од друго основно училиште во Битола, поради проблеми во класот.„Во текот на оваа учебна година, а особено во второто полугодие, се забележува интензивирање на одредени проблеми. Пријавените закани се оценети како нереални и предимензионирани, но случајот се третира со зголемена внимателност“, додава Пискачев.Од училиштето велат дека случајот е пријавен во полиција, Центар за социјални работи и надлежните инспекторати. Истовремено, посочуваат дека и самиот ученик претходно пријавувал булинг насочен кон него.„Пријавени се одредени ситуации на булинг од негова страна, по кои е постапено од страна на класниот раководител и стручната служба. Сепак, според увид во службените записници, не е констатирано постоење на булинг како официјален наод“, вели директорот.Од училиштето апелираат до јавноста, родителите и учениците да покажат смиреност, разумност и одговорност, со оглед на чувствителноста на ситуацијата и фактот дека станува збор за малолетници.

Македонија | пред 2 седмици

Родители обвинија седмоодделенец од Битола објавил заканувачки список со соученици и родители на Тик-Ток

Родители на ученици во основно училиште во Битола, обвинуваат дека ученик од седмо одделение објавувал заканувачки содржини на „Тикток“, со имиња на негови соученици и нивни родители, како и датум на извршување на заканите. За ова, досега не е објавен никаков доказ, ниту пак копија од содржината.Случајот предизвикал вознемиреност во целото училиште, кои поднеле претставка до Државниот просветен инспекторат, по што училиштето го известило Министерството за внатрешни работи, Центарот за социјални работи и Подрачното одделение за образование во Битола.На неговата социјална мрежа, има најразлични содржини, но не можат да се најдат експлицитни закани.Поради случајот бил одржан и итен родителски состанок, на кој дел од родителите побарале ученикот да биде преместен од одделението.Од училиштето соопштија дека содржините не биле објавувани во текот на наставата или во училиштето, но дека веднаш постапиле согласно со законските обврски и презеле мерки за заштита и поддршка на учениците.„Апелираме до јавноста за воздржаност од ширење непроверени информации и за почитување на приватноста и достоинството на сите инволвирани лица, особено затоа што станува збор за малолетници“, наведуваат од училиштето.Оттаму додаваат дека ќе продолжат да соработуваат со надлежните институции до целосно расчистување на случајот.Според информациите, родителите на ученикот најавиле дека тој ќе биде префрлен во друго училиште.ос

Македонија | пред 2 седмици

(Видео) Кафеава вода тече од чешма во битолско училиште

Поранешната советничка во Советот на Општина Битола, Габриела Илиевска, објави видео на социјалните мрежи на кое, како што тврди, се гледа чешма во училиштето „Крсте Петков Мисирков“ во битолското село Бистрица, од која тече кафеава вода.Во објавата, Илиевска реагира на состојбата и пишува: „Вода во 21 век во училиште во Битола! Епидемиологот дома е? Твојот човек! Најлошото допрва доаѓа!“На видеото што таа го сподели, се забележува вода со темна, кафеава боја како истекува од чешмата, а на истото пишува дека е снимено на 20 април 2026 година.Засега нема официјална реакција од надлежните институции во врска со видеото и тврдењата.

Македонија | пред 1 месец

Возел без дозвола – приведен битолчанец, уапсен и возач со забрана во Ресен

Возел без возачка дозвола, па заврши во полиција – 36-годишен битолчанец е лишен од слобода по контрола во сообраќајот, информираа од СВР Битола.Случајот се случил на 19 април околу 18 часот на улицата „Кресненско востание“, кога полициски службеници сопреле патничко возило „БМВ“ со битолски регистарски ознаки, управувано од В.Т. (36). При проверката било утврдено дека возел без да поседува важечка возачка дозвола. По целосно документирање на случајот ќе следува соодветна пријава.Во одделен случај истиот ден, околу 17:31 часот на улицата „Борис Кидрич“ во Ресен, полициски службеници од ОВР Ресен го лишиле од слобода Н.С. (48) од Ресен. Тој управувал товарно возило „Форд“ со ресенски регистарски ознаки, иако имал изречена активна мерка забрана за управување со возило од Б категорија.И за овој случај, по целосно документирање, ќе биде поднесена соодветна пријава.

Македонија | пред 1 месец

Малолетник фатен со дрога во Битола, приведени уште две лица

Малолетник е лишен од слобода во Битола откако кај него биле пронајдени дрога и прашкаста материја, информираа од СВР Битола.Станува збор за 16-годишник кој бил приведен на 19 април во 19:50 часот на улицата „Мукос“, при што полицијата пронашла и одзела марихуана и прашкаста материја. По целосно документирање на случајот ќе следува соодветен поднесок.Неколку часа подоцна, во друг случај, на 20 април во 00:50 часот на улицата „Крушевска Република“, полициски службеници ги лишиле од слобода и Ј.З. (37) и А.Т. (33), двајцата од Битола. При преглед кај Ј.З. била пронајдена и одземена марихуана.И за овој случај, по целосно документирање, ќе биде поднесен соодветен поднесок.

Македонија | пред 1 месец

Инциденти во Битолско: малолетник нападнат, повеќе возачи пијани зад волан

Во текот на изминатото деноноќие на подрачјето на СВР Битола регистрирани се повеќе инциденти, меѓу кои физички напади и случаи на безобѕирно управување со возило под дејство на алкохол.На 14 април околу полноќ, во Битола, 51-годишен жител пријавил дека неговиот малолетен син бил физички нападнат од четворица малолетници на улицата „Партизанска“, додека бил со свој другар. Се преземаат мерки за расчистување на случајот.Во Прилеп, пак, околу 02:00 часот, полициски службеници лишиле од слобода 47-годишен битолчанец кој управувал возило „хонда“ под дејство на алкохол, при што му биле измерени 1,93 промили алкохол во крвта. Против него ќе следува соодветна пријава.Сличен случај бил евидентиран и во Демир Хисар, каде 47-годишен возач од Битола бил приведен откако управувал возило „поло“ со 2,76 промили алкохол во крвта.Во друг инцидент, 40-годишен битолчанец пријавил дека бил нападнат со дрвен предмет во населбата Стрчин од 18-годишно лице од село Лера.Во Прилеп, пак, при увид на сообраќајна несреќа, бил приведен 73-годишен возач кај кого биле измерени 1,91 промили алкохол во крвта, додека вториот учесник управувал возило без возачка дозвола.По целосно документирање на сите случаи, против инволвираните ќе бидат поднесени соодветни пријави.

Македонија | пред 1 месец

(Видео) Се „крпела“ улица во Битола, а асфалтот е веќе раздробен и распаднат...

Битолскиот советник Иван Чулакоски од независната граѓанска иницијатива Поинаку, заедно со поранешната советничка Габриела Илиевска, јавно реагираа на начинот на кој се санираат оштетувањата на патот кон Битола.Тие на терен покажаа, како што велат, импровизирано „крпење“ на дупки, без основни градежни процедури.„Брзо брзо асфалтираат за да ги покријат дупките, за да не ги кршат службените коли од Скопје. Порано кога ќе крпеа дупки прво го сечеа асфалтот, па ставаа асфалт, па рамнеа. Сега поминаа со камиончето, фрлија со лопата асфалт, еве да видите како изгледа крпеицата. Со наши пари е крпено. Еве како е крпено, на трева е крпено“, изјави Чулакоски.На видеото кое го споделија, се гледа како свежо поставениот асфалт веќе покажува знаци на распаѓање, додека делови од него се поставени врз несоодветна подлога.

Македонија | пред 1 месец

Земјотрес од 4.7 степени во Грција, почувствуван во Битола

Земјотрес кој денеска се случи во Грција ја стресе и Битола.Потрес со јачина од 4.7 степени според Рихтеровата скала е регистриран во соседна Грција, а истиот го почувствувале и во јужните делови на Македонија, особено во пограничните региони.Според податоците од Европско-медитеранскиот сеизмолошки центар (ЕМСЦ), епицентарот на земјотресот бил лоциран на неколку километри од македонско-грчката граница, во близина на регионот на Лерин (Флорина), на длабочина од околу 10 километри.Телеметриската мрежа на Сеизмолошката опсерваторија при Природно-математичкиот факултет во Скопје го регистрираше потресот. Според првичните информации, земјотресот е почувствуван од граѓаните во:Битола и околината (со интензитет од IV степени според Европската макросеизмичка скала – ЕМС-98)Гевгелија и Валандово (со интензитет од III-IV степени)Охрид, Струга и Ресен (со интензитет од III степени)Граѓаните од Битола јавуваат дека потресот траел неколку секунди и предизвикал вознемиреност, особено кај жителите на повисоките катови во станбените згради.

Македонија | пред 1 месец

Се урна дел од таванот во салата на Центарот за култура во Битола – настаните откажани

Дел од таванот се урна во големата сала на Центарот за култура во Битола, простор каде што редовно се одржуваат концерти, културни настани и кино-проекции. За среќа, во моментот на инцидентот немало публика или настан во салата.Според информациите од установата, оштетувањето било забележано претходниот ден, по што биле отстранети десетина иверици од таванот за да се спречи поголема опасност.Според директорот на Центарот за култура, Сашо Илковски, веќе се бараат компании кои ќе помогнат во санацијата и дека поправките треба да започнат во наредните денови.По првичните проценки, проблемот најверојатно настанал поради дотраеност на конструкцијата, а не поради прокиснување на покривот. И во минатото имало слични проблеми со плафонот, но тогаш се вршеле само делумни санации.Поради безбедносни причини, сите настани во големата сала се привремено откажани, вклучувајќи кино-проекции и најавен хуманитарен настан.Центарот за култура во Битола е изграден во 1980 година, а објектот во последните години се соочува со повеќе инфраструктурни проблеми кои бараат поголема реконструкција.

Македонија | пред 1 месец

Жена пронајдена почината во стан во Битола

Во Битола, на улицата „Мирка Гинова“, во стан била пронајдена почината 74-годишната В.Д., информираат од Министерство за внатрешни работи.Настанот бил пријавен на 30 март 2026 година во 11:35 часот во СВР Битола, по што на местото излегле полициски екипи и лекар кој констатирал смрт.По наредба на јавен обвинител, телото било дадено на обдукција, при што е утврдено дека станува збор за природна смрт.Увид на местото извршила екипа од СВР Битола.

Македонија | пред 1 месец

Без положен испит управувал „голф“ – приведен жител на Жабени

На 17 март 2026 година во 14:00 часот во селото Кравари, битолско, полициски службеници од СВР Битола го лишиле од слобода М.Х. (32) од селото Жабени.При сообраќајна контрола било сопрено патничко возило „фолксваген голф“ со битолски регистарски ознаки, кое го управувал, при што било утврдено дека не поседува важечка возачка дозвола.По целосно документирање на случајот против него ќе следува соодветна пријава.

Македонија | пред 2 месеци

Жители на Баир протестираат по нападот на четиригодишно девојче од бездомно куче: „Ако нема мерки, ќе го блокираме влезот“

Вчера четиригодишно девојче беше тешко повредено откако било нападнато од куче скитник, кое ја искасало во пределот на лицето. Спроед објавата на Сафет Бајрамов, девојчето било нападнато во дворот, а понападот завршило на операција.Денес жители на населбата Баир во Битола излегоа на протест пред Општинската зграда.Тие побараа од градоначалникот и надлежните служби да го решат проблемот со бездомните кучиња во рок од седум дена, предупредувајќи дека во спротивно ќе го блокираат влезот во општинската зграда.Градоначалникот, изрази жалење за последниот инцидент, повика на дијалог со граѓаните и најави поинтензивна соработка со други надлежни институции за да се најде трајно решение за проблемот.На овој начин, локалната самоуправа се обврза на мерки за контрола на бројот на бездомни кучиња и подобрување на безбедноста на јавните површини.

Македонија | пред 2 месеци

(Вознемирувачки фотографии!) Улично куче нападна 4-годишно девојче во Битола: искасано по лицето, со повреди и на телото

Четиригодишно девојче е тешко повредено откако било нападнато од куче скитник, кое ја искасало во пределот на лицето. Спроед објавата на Сафет Бајрамов, девојчето било нападнато во дворот.„Ве молам за помош ако некој знае некој број од шинтерска служба Битола-Комуналец, денес во дворот влезе куче скитник и ми го нападна внучето 4 годишно, кој знае број уште е тука низ маалата, кој знае дека прати, чупето се наоѓа во болница“, стои во објавата, за потоа да објави „Кучето е фатено, а внуката заврши на операција“.Од фотографиите кои ги објави семејството Бајрамови, јавно, се гледаат повредите на девојчето кое ги има и по рацете и во пределот на градите.Случајот, како што наведуваат, е пријавен и во полиција.Инцидентот предизвика вознемиреност кај жителите од населбата, кои апелираат до надлежните институции да преземат поефикасни мерки за справување со проблемот со уличните кучиња, со цел да се спречат слични случаи во иднина.

Македонија | пред 2 месеци

Битолчанец дивеел во казино

На 2 март 2026 година во 01:45 часот во СВР Битола било пријавено нарушување на јавниот ред и мир во казино на улицата „Филип Втори Македонски“.Според информациите, М.С. (38) од Битола со метален предмет оштетил апарат за игри на среќа во објектот.Од полицијата информираат дека се преземаат мерки за целосно расчистување на настанот.

Македонија | пред 2 месеци

Свлечиште ја затвори обиколницата околу Битола, сообраќајот пренасочен низ градот

Од вчера обиколницата околу Битола е затворена за сообраќај поради појава на свлечиште. Сообраќајот се пренасочува низ градското подрачје, а екипите на Ј.П. Македонија Пат работат на расчистување на теренот и нормализирање на сообраќајот.Според информациите, на останатите државни патишта сообраќајот се одвива непречено и по суви коловози.Од 15 ноември 2025 година започна законската обврска за задолжително поседување зимска опрема во возилата, без оглед на моменталните временски услови. Обврската ќе трае до 15 март 2026 година.Интензитетот на сообраќај надвор од градските средини е умерен, а на граничните премини од македонска страна засега нема подолги задржувања за влез и излез од државата.Од АМСМ апелираат на внимателно управување со возилата, прилагодена брзина и почитување на сообраќајната сигнализација, особено на патиштата низ котлини, речни долини и клисури каде е можна појава на одрони. Како поризични се посочуваат делниците Катланово – Велес, Маврово – Дебар – Струга, Виница – Берово и Кочани – Делчево.

Македонија | пред 2 месеци

84-годишна битолчанка остана без 9.600 евра: Ја измамиле дека ќерка и треба да прави операција

На 25.02.2026 во 16:00 часот во СВР Битола, 84-годишна битолчанка пријавила дека била измамена од едно лице за сума од 9.600 евра.Според пријавеното, претходно лицето ѝ се јавило, се претставило како лекар и ѝ кажало дека нејзината ќерка се здобила со скршеници и било потребно да се направи итна операција за што требало да плати.Како што е пријавено, таа ги дала парите на едно лице кое дошло пред нејзината зграда, а откако подоцна се слушнала со нејзината ќерка сфатила дека е измамена.Се преземаат мерки за расчистување на случајот.

Македонија | пред 2 месеци

Нема нови поплави во Тетово и Кичево, нивото на реките и водотеците е во континуирано намалување

По обилните врнежи од дожд, состојбата со поплавите во земјата се стабилизира. Во Кичево продолжува испумпувањето на водата од подрумите, додека во Тетовскиот регион се воведени ограничувања за сообраќај поради лизгави патишта. Евакуираните лица се згрижени и има обезбедена храна, вода и хигиенски средства.„Тетовски регионВо Тетовскиот регион нема нови пријави за излевање на реката Вардар кај село Форино, ниту на останатите водотеци каде што во текот на вчерашниот ден беше евидентирано излевање и поплавување.Во 05:45 часот, поради врнежи од снег, воведени се следните ограничувања во сообраќајот:Забрана за движење на товарни моторни возила на патните правци Гостивар–Стража–Кичево и Гостивар–крак Маврово–Дебар.На патниот правец Тетово–Попова Шапка е воведена забрана за движење на автобуси, додека за останатите патнички моторни возила е задолжителна употреба на зимска опрема.Битолски регионВо Битолскиот регион, преку Единствениот број за итни повици 112 е примена пријава од жител на ул. „Буквски Мост“ за поплавена куќа. Случајот е пријавен во ТППЕ Битола за понатамошно постапување.Нивото на реката Црна Река во село Новаци изнесува 310 см.Во ЕЛС – Долнени утрово е остварен контакт и се очекува интервенција на патниот правец од село Сливје кон село Костинци, кој е во лоша состојба. Активностите ќе се реализираат со механизација од ЈП „Македонија пат“.Кичевски регионНа подрачјето на Кичево нема нови поплавувања на објекти. Состојбата останува непроменета, а нивото на реките и водотеците е во континуирано намалување.250 евакуирани лица се сместени во спортската сала „Христо Узунов“, каде им се обезбедени храна, вода и хигиенски производи.Екипи на ЈП „Комуналец“ и ТППЕ вршат испумпување на водата од подрумите на улиците Прилепска, Пиринска, Први Мај и 29 Ноември“, информират од ЦУК.

Македонија | пред 3 месеци

Битолчанец имал пари само за пудинг откако Битола му исплатила обештетување за земјотресот, па се мисли да им го однесе во Општина

Поранешната советничка во Советот на Општина Битола, Габриела Илиевска, преку објава на социјалните мрежи остро реагираше на висината на исплатените средства за штетите од земјотресот, наведувајќи дека дел од битолчани добиле симболични износи.Илиевска претходно објави дека околу 2.400 граѓани добиле во просек по 700 денари, односно во одредени случаи и по 81 денар, додека, како што тврди, за работата на комисијата за проценка на штетите биле потрошени околу еден милион денари за десет лица. Таа ја доведе во прашање логиката на распределбата на средствата и порача дека на градоначалникот не му се „100 дена“, туку четири години и сто дена на функцијата.Во нова објава, со ироничен тон, таа повика битолчани да купат плик, да ги извадат средствата што ги добиле како надомест и да ги достават на шалтер во Општината, во работно време, алудирајќи дека „очигледно таму повеќе му требаат пари“.Објавата предизвика бројни реакции. Еден жител на Битола, во шеговит тон, напиша дека со парите купил пудинг и праша дали да го однесе него. Илиевска му одговори: „Пробај се. Можеби и пудингот ќе го земат, не можеш да знаеш“.Полемиката повторно ја отвори темата за транспарентноста и критериумите при исплата на надоместоци за штети од природни непогоди, како и за односот меѓу локалната власт и граѓаните.

Македонија | пред 3 месеци

Екссоветничката критикува: Битолчани добија 81 денар за штетите од земјотресот, a комисијата 1 милион

Поранешната советничка Габриела Илиевска на својот Фејсбук профил ја критикува распределбата на средства за штетите од земјотресот, истакнувајќи дека граѓаните добиле минимална компензација, додека како што вели комисијата за проценка на штета добила значително повеќе.„Битолчани добија по 81 денар за штетите од земјотресот.За 2400 оштетени битолчани од земјотресот се одобрени 5% просек по 700 денари, а за комисијата за проценки на штета од земјотреси се потрешени 1 мил денари за дестина души?Лоша математиката, ама гледам крепи Битола уште поќе.И нека му кажат советниците на транспарентниот градоначалник дека не е 100 дена, туку 4 години и сто дена е на функцијата градоначалник!“, вели Илиевска.

Коментари | пред 3 месеци

(Видео) Одземањето на возила на тие кои немаат возачки донесе блокирање на патот Битола-Охрид со запален отпад

Со палење пластика и ѓубре, група граѓани од ромската заедница организираа протест и го блокираа регионалниот пат Битола–Охрид, поради што сообраќајот беше привремено прекинат. Протестот беше проследен со извици „нема правда, нема мир“ и „бараме правда“, а чад од запалениот отпад се забележуваше и од поголема оддалеченост.Според неофицијални информации, причината за протестот е одземањето на возилата на лица кои управувале без положен возачки испит, мерка што стапи во сила со последните измени на Законот за прекршоци. Дел од присутните јавно негодуваа поради, како што велат, високата вредност на одземените автомобили, а на една од снимките од настанот се слуша извикување „5.000 евра кола ми земавте“.Присутните се жалеа на дискриминација, објаснувајќи дека тие немаат завршено училиште за да полагаат за возачка.На местото на протестот биле присутни и полициски службеници, кои ја следеле состојбата. Засега нема официјална информација за приведени лица или за времетраењето на блокадата, ниту пак за евентуални понатамошни мерки.

Настани | пред 3 месеци

Тешко повредени тројца пешаци во три сообраќајни несреќи

Во три одделни сообраќајни несреќи на територијата на Скопје, Куманово и Битола, со тешки телесни повреди се здобија тројца пешаци, соопшти Министерството за внатрешни работи.Во Скопје, на крстосницата од улиците „Васил Ѓоргов“ и „Шарски Одреди“, патничко возило „фолксваген фокс“ управувано од З.А. (60) удри во 59-годишната пешачка Б.К. Повредите ѝ биле констатирани во Градската општа болница „Свети Наум Охридски“.Во Битола, на улицата „Смилевски конгрес“, мотоцикл удри во 76-годишната пешачка С.Д., по што возачот го напуштил местото на настанот. С.Д. се здоби со тешки телесни повреди, констатирани во битолската болница.Во Куманово, на улицата „Народна револуција“, патничко возило „даеву тико“ управувано од М.Ј. (23) удри во 67-годишната пешачка С.К., која исто така се здоби со тешки телесни повреди, констатирани во Општа болница – Куманово.Увид на местата на несреќите извршиле екипи на Секторите за внатрешни работи во Скопје, Куманово и Битола.

Македонија | пред 3 месеци

Вонредна состојба на повеќе локации: Поплави и евакуации по обилните врнежи, најкритично во Охрид, Кичево и Битола

Обилните врнежи од дожд предизвикаа сериозни проблеми на повеќе локации низ државата, информира Центарот за управување со кризи во вонредна информација за состојбата до 13:00 часот.Во Охрид и околината регистрирани се поплавени подрумски простории, дворови и неколку објекти во градот. Поради излевање на дел од водотеците, на терен се ангажирани локалната самоуправа и Кризниот штаб, додека екипите на јавните претпријатија „Водовод“, „Нискоградба“ и „Комуналец“ интервенираат за отстранување на водата и санација на последиците.Во Кичево и околните населени места, водата навлегла во подрумските простории и на дел од јавните и приватните површини. Дел од жителите се евакуирани и сместени во привремени објекти, каде им се обезбедени храна, лекови и здравствена заштита. Поплави се забележани и на одредени водотеци и земјоделско земјиште. Општината, Црвениот крст и ЈП „Комуналец“ се вклучени во згрижување на населението и во интервенции на критичните точки, додека екипи на итната медицинска помош ја следат здравствената состојба на евакуираните лица.Во битолскиот регион е забележано значително зголемување на водостојот на локалните реки, со појава на излевања на повеќе места. Поплавени се куќи, дворишта и дел од земјоделските површини. Механизацијата на општините е на терен, а Кризниот штаб ги координира активностите и ги утврдува приоритетите за санација на штетите.Во Тетово и околината има пријави за уривање на потпорни ѕидови, како и локални излевања на водотеци. Полициски екипи вршат увид на погодените локации, додека општинската механизација интервенира за расчистување на свлечиштата и спречување на понатамошни штети.Поплави на локални патни правци и во неколку населени места се регистрирани и во Гостивар и околината. Екипите на ЈП „Комуналец“ работат на санација на поплавената инфраструктура, а механизацијата на Водостопанство е ангажирана за чистење на свлечишта и стабилизирање на теренот.Од ЦУК информираат дека состојбата постојано се следи и дека надлежните служби остануваат на терен сè додека не се нормализира состојбата.

Македонија | пред 4 месеци