УНГАРИЈА

Сибигa: По изборите во Унгарија има простор за нов почеток во односите со Украина

Министерот за надворешни работи на Украина, Андриј Сибига, изјави дека по парламентарните избори во Унгарија постојат повеќе приоритетни прашања што треба да бидат решени меѓу двете земји, повикувајќи на отворање на нова фаза на добрососедска соработка.Тој истакна дека меѓу клучните теми се граничната инфраструктура, процесот на европска интеграција на Украина и прашањата поврзани со членството во Европската Унија. Сибига посочи и дека дел од разговорите се однесуваат на унгарската блокада на пристапниот процес на Украина, како и на санкциите и финансиската поддршка од европските институции.Украинскиот министер изрази уверување дека двете држави имаат заедничка европска перспектива, оценувајќи дека резултатите од изборите во Унгарија отвораат можности за унапредување на билатералните односи. Тој додаде дека Киев веќе испратил сигнали за воспоставување контакти на високо ниво и дека е подготвен за брз и конструктивен дијалог.Сибига наведе дека новите политички околности може да придонесат за решавање на повеќе отворени прашања, вклучително и европскиот пат на Украина, како и за зајакнување на економската и инфраструктурната соработка.

Свет | пред 1 месец

Еуфорија во Будимпешта: ‘Бела чао’ одекнуваше по поразот на Орбан

По изборниот пораз на Виктор Орбан, улиците на Будимпешта беа исполнети со славје, а меѓу граѓаните одекнуваше познатата песна „Бела чао“.Песната, која историски се поврзува со отпорот и борбата против авторитарни режими, доби силна симболика во контекст на политичките промени во Унгарија.Собраните граѓани со пеење и аплаузи ја прославуваа победата на опозициската Тиса предводена од Петер Маѓар, која стави крај на долгогодишното владеење на Орбан.Атмосферата во главниот град беше исполнета со еуфорија, со пораки за „нова ера“ и враќање кон европскиот курс.

Свет | пред 1 месец

Филатов: Украинците не треба да се радуваат на поразот на Орбан

Градоначалникот на Дњепар, Борис Филатов, порача дека Украинците не треба да се радуваат на изборниот пораз на унгарскиот премиер Виктор Орбан, оценувајќи дека нема основ за преголем оптимизам во однос на промените во Будимпешта.Филатов наведе дека новата влада предводена од партијата Тиса и Петер Маѓар нема автоматски да значи поповолен пристап кон Украина, туку дека односот кон Киев ќе треба да се потврди преку конкретни политички чекори.Тој истакна дека ставот на новото унгарско раководство кон Украина сè уште не е целосно јасен и дека ќе биде важно да се следат идните одлуки и политики.Филатов исто така повика украинската јавност да не го заборави, како што рече, негативниот однос на досегашната унгарска власт кон Украина во изминатиот период.

Свет | пред 1 месец

Вучиќ ја поздрави победата на Маѓар и изрази благодарност до Орбан

Претседателот на Србија Александар Вучиќ му честиташе на Петер Маѓар, лидерот на партија Тиса, за победата на парламентарните избори во Унгарија. Тој изрази уверување дека соработката меѓу двете земји ќе продолжи и во наредниот период, при што му се заблагодари и на досегашниот премиер Виктор Орбан за неговиот придонес во унапредувањето на односите.Во својата порака, Вучиќ наведе дека очекува натамошно зајакнување на билатералната соработка меѓу Србија и Унгарија, нагласувајќи ја важноста на континуитетот во економските и политичките врски.Односите меѓу Белград и Будимпешта во изминатите години се оценуваат како исклучително блиски, со интензивна соработка во областа на енергетиката, инфраструктурата и европската интеграција. Унгарија е еден од најгласните поддржувачи на побрзо приближување на Србија кон Европската Унија, додека двете земји заеднички реализираат повеќе стратешки проекти, меѓу кои и железничката линија Белград–Будимпешта.Вучиќ во претходни изјави истакнал дека е задоволен од соработката со Орбан и дека ја смета Унгарија за важен партнер во регионот.

Свет | пред 1 месец

Победнички говор на Маѓар: „Ова е влада за сите граѓани“

Лидерот на Тиса, Петер Маѓар, по изборната победа упати порака до граѓаните, нагласувајќи дека добиениот мандат е најголем во историјата на изборите.„Благодарам на сите Унгарци дома и низ целиот свет. Огромна чест е што со најголем број гласови досега ни дадовте мандат да формираме влада и во следните четири години да работиме за слободна, европска, функционална и човечна Унгарија“, порача Маѓар.Тој најави дека новата влада ќе биде влада на сите граѓани, без разлика на политичката определба.„Владата на Тиса ќе биде влада на секој Унгарец. Како премиер, секој ден и секој час ќе работам за безбедноста, развојот и благосостојбата на нашата татковина“, истакна Маѓар.Во симболична порака, тој се повика и на историското наследство, наведувајќи дека ќе ја извршува функцијата со одговорноста на првите државници на модерна Унгарија.„Бог нека ми помогне“, заврши новоизбраниот премиер.

Свет | пред 1 месец

Унгарија по Орбан: нова политичка ера и европски пресврт

Поразот на Виктор Орбан има значајни последици надвор од границите на Унгарија, по парламентарните избори на кои убедлива победа однесе опозициската коалиција предводена од Петер Маѓар.Според речиси конечните резултати, коалицијата на Маѓар обезбедила 138 од вкупно 199 пратенички места, со што добива доволно мнозинство за самостојно формирање влада. Партијата на Орбан, Фидес, ќе има околу 55 мандати и преминува во опозиција. Орбан го призна поразот и најави дека неговата партија ќе продолжи да делува од опозициските редови.Маѓар, обраќајќи им се на своите поддржувачи, изјави дека „Унгарците денеска рекоа „да“ на Европа и на слободна Унгарија“, истовремено повикувајќи ги функционерите блиски до досегашната власт да поднесат оставки.Во Брисел, резултатите се дочекани со олеснување, при што претставници на Европската Унија оценија дека Унгарија повеќе нема да биде блокатор на клучни европски одлуки, вклучително и помошта за Украина. Претседателката на Европската комисија, Урсула фон дер Лајен, порача дека Унгарија „се враќа на својот европски пат“.

Свет | пред 1 месец

По победата на Маѓар, Унгарија би можела да добие милијарди евра од ЕУ

Убедливата победа на Петер Маѓар на парламентарните избори во Унгарија ѝ донесе силен мандат на неговата партија Тиса, што ќе ѝ овозможи одврзани раце за спроведување реформи, зајакнување на владеењето на правото и потенцијално одмрзнување на милијарди евра од Европската Унија. Според анализите, двотретинското мнозинство што го обезбеди новата власт се смета за најповолен исход за европските пазари и институции, иако до последен момент важеше за малку веројатно сценарио.Економистите оценуваат дека ваквиот резултат може да поттикне раст на финансиските пазари, но предупредуваат дека оптимизмот е проследен со одредена доза претпазливост. Новата влада ќе мора да ги исполни најавените реформи за целосно да ги почувствува придобивките, особено во однос на одмрзнувањето на европските фондови.Аналитичарите посочуваат дека победата на Тиса претставува пресвртница што ќе му овозможи на Маѓар да владее без значајни ограничувања. Со тоа се отвора можност за демонтажа на политичкиот систем воспоставен од поранешниот премиер Виктор Орбан, како и за спроведување на реформите што ги бара Брисел, вклучително и зајакнување на независноста на судството и зголемување на транспарентноста.Изборите се сметаа за клучни за европските финансиски пазари, имајќи ги предвид долгогодишните тензии меѓу Орбан и Брисел, особено околу прашања како миграцијата и односите со Русија. Новиот лидер најави дека Унгарија ќе се позиционира како силен сојузник на Европската Унија и НАТО, како и дека ќе работи на обновување на нарушените односи со западните партнери.Еден од главните приоритети на новата влада ќе биде деблокадата на средствата од европските фондови, кои беа замрзнати поради нарушувања на демократските стандарди. Сепак, дел од дипломатите и кредитните агенции остануваат скептични дали овие средства ќе бидат исплатени без конкретни резултати и докази за реални реформи.Во меѓувреме, Маѓар веќе побара оставки од високи функционери во правосудството и регулаторните тела, обвинувајќи ги дека се дел од системот воспоставен во изминатите години. Тој најави и решителна борба против корупцијата, како дел од напорите за исполнување на условите на Европската Унија.

Свет | пред 1 месец

Прва реакција од Русија: Поразот на Орбан ќе го забрза распадот на ЕУ

Распадот на ЕУ ќе се забрза по изборниот пораз на партијата Фидес на унгарскиот премиер Виктор Орбан, изјави Кирил Дмитриев, директор на Рускиот фонд за директни инвестиции. Тој на социјалната мрежа Икс напиша дека развојот на настаните во Унгарија ќе има пошироки последици за Европската унија, додавајќи дека за неколку месеци ќе се покаже дали неговата проценка е точна.Неговата изјава следуваше по коментар на британскиот активист Томи Робинсон, кој оцени дека Унгарија „паднала“ и дека „продолжува падот на Европа“.Лидерот на унгарската опозициска партија Тиса, Петер Маѓар, прогласи победа на парламентарните избори, истакнувајќи дека неговата партија освоила историски резултат. Орбан го призна поразот, оценувајќи дека исходот е „болен“ за неговата партија, но нагласи дека ќе продолжи да делува како опозиција во интерес на државата.

Свет | пред 1 месец

Адвокатот што ја разниша власта со порака до Маѓар: Победата не е доволна без промена

Анонимен адвокат познат под псевдонимот „Видеки Прокатор“, односно „Провинциски адвокат“, кој во јавноста стана препознатлив по разоткривањето на скандалот со помилувањето, испрати порака до Петер Маѓар. Овој истакнат критичар на владејачкиот систем, кого унгарските медиуми го нарекоа „човек од сенка“, целосно се фокусираше на изборите, за кои сметаше дека нема да ги решат само партиите и политичарите. Тој објави дека го затвора својот „политички дневник“, кој го водел од 2014 година, најавувајќи нова фаза од своето јавно делување.Името „Видеки Прокатор“ стана симбол на граѓанска храброст во февруари 2024 година, кога, истражувајќи судски регистри, откри дека тогашната претседателка Каталин Новак му дала помилување на лице вмешано во тежок скандал поврзан со злоупотреба на деца. Ова откритие предизвика силна реакција во јавноста и масовни протести во Будимпешта, по што Новак поднесе оставка, а поранешната министерка за правда Јудит Варга се повлече од јавниот живот.Од политичката криза што следуваше се издвои Маѓар, кој успеа да ја насочи јавната незадоволност и да стане лидер на нов политички правец. „Провинцискиот адвокат“, кој го нарекува „политички гениј“, се наметна како морален глас што го следи и поддржува неговото движење. Во својата последна порака тој изразува поддршка, но и предупредува дека изборната победа не смее да се сведе само на уривање на Виктор Орбан, туку мора да значи создавање нов систем.Со затворањето на својот долгогодишен дневник, анонимниот адвокат најавува ново поглавје, кое, според аналитичарите, може да значи подиректно вклучување во обликувањето на иднината на унгарската политика. Неговата порака е јасна – промените немаат вредност ако не донесат нова визија, а не само замена на постојниот поредок.

Свет | пред 1 месец

Поделени реакции во САД по изборниот пораз на Орбан

Американските демократи го поздравија изборниот пораз на Виктор Орбан, додека сојузниците на претседателот Доналд Трамп и дел од републиканците реагираа поделено на исходот од гласањето во Унгарија. Трамп отворено го поддржуваше Орбан во пресрет на изборите, вклучително и со кратко телефонско обраќање на предизборен митинг, но по 16 години на власт унгарскиот премиер беше поразен од кандидатот од десниот центар, Петер Маѓар, кој се залага за проевропски курс.Американски претставници од двете водечки партии му упатија честитки на Маѓар за победата. Дел од демократите резултатот го толкуваат како најава за претстојните избори во САД. Лидерот на демократското малцинство во Сенатот, Чак Шумер, порача дека „самопрогласените диктатори порано или подоцна ја губат поддршката“, додека Хаким Џефрис оцени дека поразот на Орбан претставува удар за крајната десница.Од републиканскиот табор, сенаторот Роџер Викер изјави дека резултатите покажуваат отфрлање на влијанието на Владимир Путин, со кого Орбан со години одржува блиски односи. Според него, унгарските граѓани самостојно ја избрале својата иднина.Самиот Трамп засега не ги коментираше изборните резултати, иако претходно најави економска поддршка за Унгарија доколку Орбан победи. Од друга страна, некои негови сојузници, меѓу кои и Илон Маск, изразија незадоволство од исходот, тврдејќи дека зад промената стојат структури поврзани со Џорџ Сорос.Поразот на Орбан доаѓа во време на негови долготрајни несогласувања со ЕУ, особено околу војната во Украина и неговите политики, кои често се опишуваат како „нелиберална демократија“.

Свет | пред 1 месец

Кој е човекот што го победи Орбан: Подемот на Петер Маѓар

По изборниот пораз на Виктор Орбан, вниманието се насочува кон човекот што го победи – лидерот на Тиса, Петер Маѓар.Маѓар е 45-годишен адвокат кој до неодамна бил дел од системот на власта. Работел на позиции поврзани со државни институции и важел за човек близок до владејачките структури. Во јавноста долго време бил познат и како сопруг на поранешната министерка за правда Јудит Варга, членка на Фидес.Неговиот политички подем започна на почетокот на 2024 година, кога во ек на скандал објави снимка од разговор со Варга, во која таа зборува за наводни интервенции од врвот на власта во обвинителски предмети. Тој потег означи драматичен раскин со системот и му донесе огромно внимание во јавноста.За кратко време, Маѓар ја презеде Тиса и изгради силно опозициско движење, привлекувајќи гласачи разочарани од економската стагнација, растот на трошоците за живот и корупцијата.Во програмата најави враќање на демократските механизми, подобрување на односите со Европската унија и деблокирање на замрзнатите фондови. Меѓу првите чекори се споменува и приклучување кон Европското јавно обвинителство.Сепак, во дел од политиките останува близок до Орбан. Застапува тврд став за миграцијата, се противи на испорака на оружје за Украина и не дава јасни позиции за одредени општествени прашања.Аналитичарите посочуваат дека и покрај разликите, Маѓар и Орбан доаѓаат од сличен политички и идеолошки контекст, што остава отворени прашања за идната насока на Унгарија.Она што е сигурно е дека со победата на Маѓар, земјата влегува во нова политичка фаза по повеќе од една деценија доминација на Орбан.

Свет | пред 1 месец

Нема повеќе криење на Груевски во Будимпешта, вели Филипче по падот на Орбан

Лидерот на СДСМ, Венко Филипче, преку објава на социјалната мрежа Икс реагираше на изборниот пораз на Виктор Орбан во Унгарија, оценувајќи го како крај на, како што наведе, „недемократски режим“.„Вечерва Унгарија рече ДОСТА Е! Недемократскиот режим на Орбан падна – токму како што месеци наназад најавуваме“, напиша Филипче.Тој додаде дека со ова, како што тврди, ВМРО-ДПМНЕ останува без својот „единствен сојузник во ЕУ“, посочувајќи и на прашања поврзани со поранешниот премиер Никола Груевски.Во објавата, Филипче оди чекор подалеку, најавувајќи дека „паѓаат автократските режими“ и дека следни, според него, се Александар Вучиќ и премиерот Христијан Мицкоски.„Време е за демократија. СДСМ ќе ја врати власта во рацете на народот и Македонија конечно ќе ја врати на европскиот пат“, стои во објавата.Реакцијата доаѓа по убедливата победа на Тиса и нејзиниот лидер Петер Маѓар, што предизвика силни политички реакции и во регионот.

Свет | пред 1 месец

Фон дер Лајен: „Унгарија ја избра Европа“

Претседателката на Европската комисија, Урсула фон дер Лајен, испрати силна и симболична порака по изборниот пресврт во Унгарија, нагласувајќи ја европската ориентација на земјата.„Унгарија ја избра Европа. Европа отсекогаш ја избирала Унгарија. Една земја повторно го враќа својот европски пат. Унијата станува посилна“, порача Фон дер Лајен.Изјавата доаѓа по убедливата победа на опозициската Тиса и нејзиниот лидер Петер Маѓар, што се оценува како значаен политички пресврт и сигнал за можна промена во односите меѓу Будимпешта и Брисел.Пораката на Фон дер Лајен се толкува како директна поддршка за новата политичка насока на Унгарија и потенцијално зацврстување на нејзината позиција во рамки на Европската унија.

Свет | пред 1 месец

(Видео) Одлучено е: Маѓар нов мандатар, Фидес оди во опозиција, а по улиците се слави

Опозициската Тиса оствари убедлива победа на парламентарните избори во Унгарија, со што нејзиниот лидер Петер Маѓар ќе добие мандат за формирање нова влада.Според податоците со над 77 отсто обработени гласови, Тиса освоила 138 пратенички мандати – 43 од листи и 95 во едномандатни изборни единици, што претставува недостижна предност во парламентот од вкупно 199 пратеници.Владејачката коалиција Фидес-КДНП предводена од Виктор Орбан освои 54 мандати, додека Ми Хазанк има 7 пратеници.Победата на Тиса беше видлива уште од првите резултати, кога партијата водеше со значајна разлика во однос на Фидес, а во текот на вечерта предноста постојано растеше до ниво на апсолутно мнозинство.Изборите беа обележани и со рекордна излезност – до 18:30 часот гласале 77,80 отсто од избирачите, што е највисок одѕив од 1990 година наваму.Системот предвидува избор на 199 пратеници, од кои 106 во едномандатни единици и 93 од партиски листи, при што за влез во парламентот потребен е праг од 5 проценти.Иако конечните резултати ќе бидат потврдени по пребројувањето на гласовите од странство и по евентуални жалби, веќе е јасно дека Петер Маѓар ќе ја преземе власта, означувајќи крај на долгогодишното владеење на Орбан и нова политичка насока за Унгарија.СЛЕДЕТЕ ВО ЖИВО:

Свет | пред 1 месец

Со над две третини преброени гласови, Тиса ја зацврстува доминацијата во Унгарија

Со обработени 72,44 отсто од гласовите, опозициската Тиса ја зацврстува убедливата предност и веќе има 138 пратенички мандати на парламентарните избори во Унгарија.Според најновите податоци, Тиса освоила 43 мандати од листи и 95 во едномандатни изборни единици. Владејачката коалиција Фидес-КДНП бележи значителен пад со 54 мандати (43 од листи и 11 поединечно).Третата политичка сила, Ми Хазанк, има 7 пратеници.Со оглед дека парламентот брои 199 пратеници, Тиса е на чекор до апсолутно мнозинство и целосна контрола врз законодавната власт.Резултатите јасно укажуваат на историски политички пресврт и крај на долгогодишната доминација на власта предводена од Виктор Орбан.

Свет | пред 1 месец

Маѓар: Макрон, НАТО, Вебер ми честитаа за победата

Лидерот на Тиса, Петер Маѓар, објави дека добил честитки од повеќе високи меѓународни лидери по изборната победа во Унгарија.Според неговата изјава, телефонски му честитал францускиот претседател Емануел Макрон, како и претседателот на Европската народна партија Манфред Вебер.Маѓар додаде дека честитки добил и од германскиот канцелар, како и од генералниот секретар на НАТО, што претставува јасен сигнал за вниманието и поддршката од западните сојузници.Овие реакции доаѓаат во момент кога Тиса обезбедува убедлива предност на изборите, што се толкува како значаен политички пресврт и можност за нова насока на Унгарија во односите со Европската унија и меѓународните партнери.

Свет | пред 1 месец

Фидес паѓа на 55 мандати: историски пораз за Орбан, Унгарија со нова политичка реалност

Со обработени 66,69 отсто од гласовите, опозициската Тиса дополнително ја зголемува предноста и веќе има 137 пратенички мандати на парламентарните избори во Унгарија.Според најновите податоци, Тиса освоила 42 мандати од листи и дури 95 во едномандатни изборни единици. Владејачката коалиција Фидес-КДНП значително заостанува со 55 мандати (44 од листи и 11 поединечно).Третата политичка опција, Ми Хазанк, има 7 пратеници, сите добиени преку листи.Со оглед дека во парламентот се избираат вкупно 199 пратеници, Тиса е на чекор до апсолутно мнозинство и целосна контрола врз законодавната власт.Резултатите, иако сè уште не се конечни, веќе укажуваат на драматичен политички пресврт и крај на долгогодишната доминација на власта предводена од Виктор Орбан.

Свет | пред 1 месец

(Видео) Крај на ера, Орбан го призна поразот: „Резултатите се болни, но јасни“

Премиерот на Унгарија, Виктор Орбан, го призна поразот на парламентарните избори, оценувајќи дека резултатите се „болни, но јасни“.Во своето обраќање, Орбан истакна дека одговорноста и можноста за владеење овојпат не им биле дадени, додавајќи дека веќе ѝ честитал на победничката партија.„Резултатите сè уште не се целосни, но се болни за нас и јасни. Му честитав на победникот. Ви благодарам на сите за огромната работа. Никогаш не сме работеле толку многу во една кампања“, изјави Орбан.Тој нагласи дека Фидес успеал да мобилизира околу два и пол милиони гласачи, но тоа не било доволно за победа.Орбан порача дека неговата партија ќе продолжи да ѝ служи на државата од опозиција, додавајќи дека времето ќе покаже какво значење ќе има овој изборен резултат за иднината на земјата.„Ние, како опозиција, ќе ѝ служиме на нашата татковина и на унгарскиот народ“, рече Орбан, означувајќи почеток на нова политичка фаза во Унгарија.

Свет | пред 1 месец

Маѓар прогласи победа, Орбан му честитал: Благодарам, Унгарија

Со обработени 45,71 отсто од гласовите, опозициската Тиса дополнително ја зголемува предноста и веќе има 135 пратенички мандати на изборите во Унгарија.Според најновите податоци, Тиса има 40 мандати од листи и 95 во едномандатни изборни единици. Владејачката коалиција Фидес-КДНП е далеку зад со 57 мандати (46 од листи и 11 поединечно), додека Ми Хазанк има 7 пратеници.Лидерот на Тиса, Петер Маѓар, веќе реагираше на резултатите со кратка порака: „Благодарам, Унгарија“.Тој на социјалните мрежи објави дека премиерот Виктор Орбан телефонски му честитал за победата, што е прв индикатор за признавање на изборниот резултат.Доколку трендот продолжи, Тиса е на чекор до убедливо мнозинство во парламентот од 199 пратеници, што би значело крај на долгогодишната доминација на Фидес и сериозен политички пресврт во земјата.

Свет | пред 1 месец

Со 30% обработени гласови, Маѓар пред Орбан: расте разликата во мандати

Со обработени 29,21 отсто од гласовите, опозициската Тиса дополнително ја зголемува предноста пред владејачката Фидес-КДНП на парламентарните избори во Унгарија.Според најновите податоци, Тиса има вкупно 132 пратенички места – 37 од листи и дури 95 во едномандатни изборни единици. Од друга страна, Фидес-КДНП засега има 59 мандати (48 од листи и 11 поединечно).Третата политичка сила, Ми Хазанк, има 8 пратеници, сите освоени преку листи.Во унгарскиот парламент се избираат вкупно 199 пратеници, што значи дека, доколку трендот продолжи, Тиса е на чекор до убедливо парламентарно мнозинство.Резултатите остануваат прелиминарни, а броењето е во тек

Свет | пред 1 месец

Првични резултати: Орбан губи, Маѓар во предност

Се бројат гласовите од изборите во Унгарија.Според првите пребројани гласови, опозициската партија на Петер Маѓар има предност во мандатите пред владејачкиот Фидес на Виктор Орбан. Изборниот ден помина во знакот на масовна излезност од речиси 78 отсто.Врз основа на првите официјални податоци од 6,56 отсто обработени гласови, опозициската партија Тиса оствари неочекувано убедливо водство во бројот на мандати.Моментална распределба на мандатите: во унгарскиот парламент кој брои вкупно 199 пратенички места, првичните резултати ја покажуваат следната слика:* Тиса: 110 мандати (39 од листите, 71 од поединечните изборни единици)* Фидес–КДНП: 71 мандат (45 од листите, 26 од поединечните изборни единици)* Ми Хазанк (Наша Татковина): 9 мандати (сите од листите)Трендот на овие првични резултати покажува дека Тиса доминира во гласањето по изборни единици (мнозински систем), додека листата на Фидес на Виктор Орбан сè уште има предност кај пропорционалниот систем.Овие избори ќе останат запаметени по исклучително високиот одзив на граѓаните. До 18:30 часот на гласање излегле дури 77,8 отсто од запишаните гласачи, што е за околу 12 проценти повеќе во споредба со изборите пред четири години. Експертите сметаат дека токму високата излезност е резултат на силната мобилизација на гласачите од страна на двете спротивставени страни.Изборниот штаб на партијата Тиса, сместен на брегот на Дунав, директно наспроти зградата на Парламентот, веќе е во еуфорично расположение. Собраните симпатизери и поддржувачи на Петер Маѓар со нетрпение ги очекуваат новите податоци, а атмосферата е како веќе да е прогласена изборна победа.Лидерот на Тиса, Маѓар, во текот на целиот ден беше активен на социјалните мрежи, укажувајќи на неправилности, што според некои аналитичари беше тактика за дополнително мотивирање на гласачите.Се очекува конечните резултати да пристигнат во текот на ноќта, кои ќе потврдат дали Унгарија навистина стои пред историска политичка промена или Фидес ќе успее да ја намали разликата со гласовите од дијаспората и преостанатите изборни единици.

Свет | пред 1 месец

Рекордна излезност, тесна трка: први бројки од изборите во Унгарија

Според унгарскиот портал Индекс, пристигнаа првите резултати од парламентарните избори во Унгарија, иако обработката на гласовите засега е на ниско ниво.Според податоците на Националната изборна канцеларија, при обработени 2,86 отсто од гласовите, води коалицијата Фидес-КДНП со 48,18 проценти, додека опозициската Тиса има 43,38 проценти.Следуваат Ми Хазанк со 6,12 проценти, додека останатите партии засега се под еден процент.Во однос на распределбата на мандати, при 6,56 проценти обработени гласови, Тиса води со вкупно 110 пратеници (39 листи и 71 во едномандатни единици), додека Фидес-КДНП има 71 мандат (45 листи и 26 поединечни).Изборите веќе влегоа во историјата по рекордната излезност – до 18:30 часот гласале 77,80 проценти од избирачите, што е значително повеќе од досегашниот рекорд од 73,51 проценти, поставен во 2002 година.Резултатите сè уште се прелиминарни и се очекува значајни промени како што ќе напредува пребројувањето.

Свет | пред 1 месец

Маѓар: Илјадници пријави за изборни нерегуларности, ќе следуваат тужби

Лидерот на опозициското движење Тиса, Петер Маѓар, во обраќање до јавноста порача дека денешниот ден во Унгарија претставува „празник на демократијата“, истакнувајќи ја рекордната излезност на гласачите.Тој им се заблагодари на сите граѓани што го искористиле своето право на глас, нагласувајќи дека ваква излезност не е забележана од 1990 година.„Луѓето ја почувствуваа важноста на изборите“, рече Маѓар, додавајќи дека благодарност заслужуваат сите, без оглед за кого гласале.Осврнувајќи се на анкетите, Маѓар потенцираше дека целта на неговата партија не е победа во истражувањата на јавното мислење, туку на изборите. Тој изрази оптимизам за исходот, но нагласи дека станува збор за „внимателен оптимизам“.Маѓар информираше дека Тиса примила илјадници пријави за наводни изборни нерегуларности, од помали до посериозни случаи, најавувајќи дека ќе бидат преземени сите правни чекори.„Секој што сторил изборна измама ќе одговара пред законот“, порача тој.Во своето обраќање, тој им се заблагодари и на повеќе од 50.000 волонтери и набљудувачи, оценувајќи дека нивното присуство е неопходно поради, како што рече, нефункционалноста на системот.На крајот, Маѓар ги повика поддржувачите да останат мирни и достоинствени, демантирајќи информации дека партијата подготвува какви било активности по објавувањето на резултатите.

Свет | пред 1 месец

Петер Маѓар: „Оптимистични сме“

Лидерот на опозициската партија Тиса, Петер Маѓар, изјави дека е оптимист поради високата излезност на изборите во Унгарија, повикувајќи се на најновите податоци и резултати од истражувањата.Тој истакна дека високата излезност покажува оти унгарските граѓани ја сфатиле важноста на овие избори.„Ова стана и ќе продолжи да биде празник на демократијата“, порача Маѓар на свечениот прием на неговата партија Тиса по објавувањето на резултатите.

Свет | пред 1 месец

Највисока излезност во изборната единица на Петер Маѓар

Во будимпештанската изборна единица број 3 е забележана највисока излезност на изборите во Унгарија, која изнесува 85,64 проценти, покажуваат податоците пристигнати непосредно пред 19 часот.Станува збор за една од најследените изборни единици во земјата, во која кандидат е и лидерот на опозициската партија Тиса, Петер Маѓар, а во која гласал и премиерот Виктор Орбан.Кандидат на владејачката партија Фидес во оваа изборна единица е државниот секретар за енергетика, Атила Штајнер.Високата излезност ја истакнува важноста на оваа изборна единица, која се смета за една од клучните во изборниот натпревар.

Свет | пред 1 месец