Мицкоски: Очекувам инфлацијата да биде под 3%

Претседателот на Владата на Република Северна Македонија, Христијан Мицкоски денеска одговарајќи на новинарско прашање во однос на тоа дека Државниот завод за статистика излезе со извештај за инфлацијата и какви се очекувањата за оваа година, изјави: „Во делот на храната, минатата година имаше „божиќна кошничка“, „јануарска кошничка“ и така ќе биде и во април. Инаку ценам дека ќе се движиме во рамките на проекцијата под 3% на ниво на годишна инфлација оваа година. Кога ќе ја споредиме стапката, горе-долу е иста како во регионов. Освен во соседна Србија каде што е 2,2 – 2,3 поради тоа што они имаат мерка, онаа мерка со ограничување на цените на производите. Првиот момент кога ќе ја напуштат таа мерка, тогаш сето ова ќе се нивелира и наеднаш ќе имаат пик, бидејќи ние тоа го видовме една година пред они тоа да го имплементираат и затоа одлучивме преку други механизми да се бориме против инфлацијата. Инаку што се однесува до другите месеци, јас очекувам да бидат под 3%. Да речеме има држави во Европа како што е Романија, каде што инфлацијата во јануари е 9,8%, има Турција каде што е двоцифрена инфлацијата, преку 30%, соседна Бугарија, Хрватска и така натаму, да ги редам, голем број примери во Европа, каде што инфлацијата е многу поголема од таа што е кај нас. Јас очекувам кај нас инфлацијата оваа година на годишно ниво да биде под 3%, односно во рамките на она што го проектираме“, вели Мицкоски.

Македонија | пред 2 месеци

Спасовски реагира оти министрите ги нема на седница: Не може да поставуваме пратенички прашања во ветер

Која е смислата на поставување пратенички прашања, ако министрите од владејачкото мнозинство кои треба да одговараат на прашањата не се присутни на седницата, укажа  координаторот на пратеничката група на СДСМ, Оливер Спасовски, пред почетокот на денешната собраниски седница наменета за поставување прашања од страна на опозицијата. Спасовски посочи дека со своето отсутво, министрите од власта повторно ја избегнаа својата законска и политичка обврска и покажуваат непочитување на Собранието.Спасовски потенцираше дека пратеничките прашања се инструмент за контрола на Владата и отчетност пред јавноста, а не формалност која може да се игнорира кога на министрите не им одговара.„Според деловникот обврската е да се извести на кого ќе му се поставува прашање и кој ќе поставува прашања до опозиција.Во дописот којшто го доставив до вас како претседател, најавено е дека нашата пратеничка Јована Тренчевска, ќе поставува прашање до Бесар Дурмиши, министерот за економија и труд. Истиот проблем кој што го имавме на минатата седница да го игнорира Собранието да не присутвува и кога ќе дојде тука во Собранието да кажува и да се правда колку бил зафатен со приватни работи итн , денеска повторно не е тука. Мислам дека ваков однос кон Собранието најмалку може да има Бесар Дурмиши, од сите тука кои што се присутни. И мислам дека крајно време е да го почитуваме овој институт на пратенички прашања и да бидат министрите тука“, рече Спасовски.Тој нагласи ваквиот однос претставува потценување на институцијата Собрание и бегање од одговорност.„Имате министер, ако не може да министерот имаме заменик министер, ако не може со еден заменик министер дај сменете, ставете два, три заменици министри, бидејќи имаат многу обврски натаму наваму, нека дојдат овде да одговараат на пратенички прашања или пак ако не сте спремни нека кажат слушајте не сме спремни ние да дојдеме да одговараме на пратенички прашања ќе седиме во влада, ќе бидеме на пат, или си имаме други многу поважни работи тоа што е Собрание“, рече Спасовски.Притоа, Спасовски укажа дека не може да се дозволи пратеничките прашања да се сведат на формалност без суштина.„Не може да поставуваме пратенички прашања во ветер. Бесар Дурмиши не е тука, Марјан заменикот не е тука, и сега која е смислата на поставување на пратенички прашања, за да ги одговараат писмено. Па секој ден имаме право да поставуваме писмени прашања, секој ден. И тие кои што ги поставуваме писмени прашања самите на координација реагирате дека не ни се одговараат од страна на министрите. Која е смислата да сето ова го правиме овде, да глумиме дека имаме некаква одговорност или состојба во која што однесувањето на минстрите ќе биде на ниво на одговорноста која што ја носат кон собранието и на овој начин покажуваме сосема поинаков пристап“, рече Спасовски.

Македонија | пред 2 месеци

60-годишен маж фатен со поголеми количини тутун без документација

СВР Тетово поднесе кривична пријава против 60-годишниот М.Н. од село Селце, тетовско, поради постоење основи на сомнение за сторено кривично дело „избегнување на плаќање акциза“.На 29.11.2025 година, полициски службеници на подрачјето на СВР Тетово го запреле патничкото возило „фолксваген голф“ управувано од пријавениот. При преглед на возилото, биле пронајдени поголема количина тутунски производи за кои М.Н. не приложил документација за платена акциза, ниту документи за потеклото на стоката.По целосно документирање на случајот, против пријавениот ќе следува соодветна пријава.

Македонија | пред 2 месеци

Тешка повреда на работник во фабрика во Тетово

На 17.02.2026 година во 10:10 часот, во една фабрика во Тетово, при извршување работни задачи, 46-годишниот Б.Н. од Тетово се здобил со тешки телесни повреди.Повредениот веднаш бил пренесен во приватна болница во Скопје за укажување на медицинска помош. На местото на настанот излегле екипа од СВР Тетово и инспектор од Државниот инспекторат за труд, кои извршиле увид и преземаат мерки за целосно расчистување на случајот.

Македонија | пред 2 месеци

По оставката на владата и неуспешните мандати – Бугарија повторно на избори

Бугарија ќе одржи предвремени парламентарни избори на 19 април, откако претседателката Илијана Јотова најави дека ќе потпише указ за распишување на изборите и за назначување на привремена влада.„Ќе издадам указ за назначување на вашиот привремен кабинет и ќе ја чекам вашата заклетва пред Народното собрание. Исто така, ќе издадам указ за одржување парламентарни избори на 19 април“, изјави Јотова на прес-конференција.Минатата недела таа го назначи заменик-гувернерот на Бугарската народна банка, Андреј Ѓуров, за вршител на должноста премиер со задача да предложи состав на техничка влада која ќе ги подготви изборите. Согласно законските одредби, гувернер или заменик-гувернер на централната банка кој ќе ја прифати функцијата премиер мора да поднесе оставка од претходната должност.Новите избори ќе бидат осми парламентарни избори во Бугарија од 2021 година, што дополнително ја нагласува продлабочената политичка нестабилност во земјата-членка на Европската унија и НАТО. Парламентот останува фрагментиран, а повеќекратните обиди за формирање стабилна владина коалиција завршуваа без успех.Претходната влада поднесе оставка на 11 декември, по неколкунеделни улични протести насочени кон нејзините економски политики и, како што наведуваа демонстрантите, неуспехот во борбата против корупцијата.Претседателот Румен Радев спроведе консултации со парламентарните партии и додели три мандати за состав на влада – на коалицијата ГЕРБ-СДС, на „Продолжуваме со промената – Демократска Бугарија“ и на „Алијанса за права и слободи“, но сите мандати беа вратени без договор, што го отвори патот за нови избори.Бугарија, која од 1 јануари се приклучи на еврозоната, се соочува со предизвикот да обезбеди политичка стабилност во услови на економски притисоци и зголемени очекувања од јавноста. Исходот од изборите на 19 април ќе биде клучен за формирање функционална влада по речиси петгодишен период на повторливи изборни циклуси и краткотрајни кабинети.

Свет | пред 2 месеци

Американец запрен од полицијата кај Демир Капија: Не сакал да даде документи, па физички ги нападнал

На 18.02.2026 година околу 02:00 часот, кај наплатната станица Демир Капија, полициски службеници од ОВР Неготино лишиле од слобода 36-годишен државјанин на САД, Р.С.При сообраќајна контрола, Р.С., кој управувал патничко возило „шкода“ со скопски регистарски ознаки, дал на увид сообраќајна и возачка дозвола, но одбил да го покаже документот за лична идентификација. Пријавениот потоа физички ги нападнал полициските службеници.За настанот е известен јавен обвинител, а по целосно документирање на случајот ќе следува соодветна пријава.

Македонија | пред 2 месеци

(Видео) Мицкоски откри каде патувал со државното авионче, со себе не го носел семејството, а често го користел кога се брзал

„Потребите за користење на владиниот возхуохоплов е соодветно на потребите на Владата. Тоа е исто како да го поставите прашањето зошто имате службено возило и зошто секој ден го користите и кој е тој којшто одлучува дека тоа возило ќе ве пренесува од точка а до точка б“ изјави премиерот Христијан Мицкоски.Мицкоски додаде дека информацијата која се пласира во јавноста е погрешна, дека тој само четири пати го користел авионот.„Еднаш на покана на унгарскиот премиер Виктор Орбан, имав билатерална средба. Натаму патував со комерцијален лет до Виена, бидејќи еден од екипажот имаше приватни обврски, немаше можност да ме однесе до дестинацијата. За назад дојдоа ме земаа. Вториот пат бев на покана во Белград, тогаш отидов и се вратив. Третиот пат бев до Хрватска со комерцијален лет на покана на хрватскиот премиер Милановиќ. Мојот годишен одмор кој требаше да трае 3 дена го продолжив за еден ден да трае четири дена, и бидејќи го испуштив авионот, а следниот ден имав неодложни обврски, воздухопловот владин дојде ме зема од Сплит и ме донесе во Скопје. Четвртиот пат бев сега до Тирана и назад. Ви најавувам дека во јуни ќе го користам владиниот авион до Подгорица и истиот ден ќе се вратам“, изјави Мицкоски.

Македонија | пред 2 месеци

Тошковски: Одделот за заштита на личности и објекти е столб на институционалната безбедност

Министерот за внатрешни работи Панче Тошковски денеска присуствуваше на одбележувањето на 18 февруари – Денот на формирањето на Одделот за заштита на определени личности и објекти, организациска единица со долгогодишен континуитет и значајна улога во системот на националната безбедност.Во своето обраќање министерот Тошковски истакна дека припадниците на Одделот со децении демонстрираат професионалност, дисциплина и висока подготвеност во извршувањето на задачите, често во сложени и чувствителни околности, при што нивната работа, иако најчесто надвор од вниманието на јавноста, е од суштинско значење за непречено функционирање на институциите и одржување на стабилноста и безбедноста.„Во текот на 2025 година реализирани се обезбедувања на 61 делегација и 153 меѓународни и домашни настани, оценети со највисоки оценки од нашите меѓународни партнери. Тоа е потврда дека македонската полиција стои рамо до рамо со најдобрите и работи согласно највисоките професионални стандарди“, потенцираше министерот Тошковски.Тој нагласи дека во услови на променлива и комплексна безбедносна средина, приоритет на раководството останува континуираното унапредување на условите за работа, вложувањето во обуки, модернизацијата на опремата и јакнењето на институционалната поддршка.Министерот Тошковски упати благодарност до сегашните и поранешните припадници на Одделот за нивната одговорност и професионален пристап, истакнувајќи дека нивната работа претставува значаен дел од вкупниот капацитет на Министерството за внатрешни работи и директно придонесува за зголемување на довербата во институциите.

Македонија | пред 2 месеци

Тинејџер чекал пари, а доби долг од над 3.000 евра: фотографија на лична карта заврши со измама

Осумнаесетгодишник од демиркапиското подрачје пријавил во ОВР Неготино дека станал жртва на злоупотреба на лична карта, откако на негово име бил подигнат кредит во износ од 215.731 денари.Според пријавата, на 17 февруари 2026 година во 09:45 часот било пријавено дека во периодот октомври–ноември 2025 година, лице во Неготино ја земало и фотографирало личната карта на пријавителот. Како што навел, тоа било сторено со изговор дека документот му е потребен за делење пакети за црква, при што му било ветено дека ќе добие паричен надомест.Меѓутоа, младото лице не добило ниту покана за учество во таква активност, ниту ветениот надомест. Подоцна, добило известување од финансиско друштво дека на негово име е подигнат кредит во висина од 215.731 денари.Полицијата презема мерки за расчистување на случајот и утврдување на сторителот.

Македонија | пред 2 месеци

(Видео) Ако се урнеме некаде, ќе стане јасно дека оваа дебата е непотребна, рече Мицкоски и посочи дека нема да се купува нов државен авион

Во изминатите денови, опозицијата ја критикува Владата за планираната набавка на нов воздухоплов, отворајќи широка дебата во јавноста.На денешната прес-конференција, премиерот Христијан Мицкоски изјави дека, иако на лидерска средба со министерот Филипче било договорено дека опозицијата нема да ја критикува Владата за оваа набавка, сепак тие не останале на зборот.Мицкоски додаде дека воздухопловот е во возна состојба и ќе се користи и за хуманитарни цели, нагласувајќи дека дебатата за идни влади и идни премиери е одвишок и не треба да ја загрозува безбедноста на луѓето кои ќе го користат.„„Авионот е во возна состојба, можете да разговарате со лицата кои го управуваат и ти се тие кои иницираа да се обидеме да обезбедиме средства за да набавиме нов воздухоплов.Гледам од опозицијата се создава оваа тема, иако на лидерски средби со претседателот на СДСМ разговаравме и тој рече дека за ова не треба да се критикува Владата бидејќи утре ќе биде друга влада, а возухопловот ќе се користи и за хуманитарни причини. Но гледам дека не си стојат на зборот, и ние ќе се повлечеме од таа набавка и ќе се молиме да останеме живи. Доколку се урнеме некаде и починеме претпоставувам дека ќе им стане јасно на сите дека оваа дебата за некоја идна влада и за некои идни премиери е одвишок“, изјави Мицкоски.“, изјави Мицкоски.

Македонија | пред 2 месеци

Регистрацијата на инфлуенсери ќе се преиспитува: Андоновски и Владата ќе се сретнат до претставници на здружението

Министерот за дигитална трансформација, Стефан Андоновски, на одговор на новинарско прашање во насока на Правилникот на АВМУ за инфлуенсери истакна дека ги разбира нивните барања и истакна дека можни се промени по барање на Здружението на инфлуенсери.„Постои правилник донесен врз основа на измените на законот од 2023 година, кој стапи на сила пред некој месец со којшто се бара задолжителна регистрација на инфлуенсерите. Ги слушнав и коментарите на новото Здружение на инфлуенсери, и мислам дека вреди да се дискутира за овие прашања. Да најавам дека можни се и промени, затоа што не сметаме дека треба ригидно да бараме од креаторите на содржини да се однесуваат исто како и платформите за споделување на тие содржини, односно да бараме толку високи критериуми, од страна на физички лица којшто повремено или постојано се занимаваат со оваа работа’’, појасни Андоновски.„Јас ги споредувам со колумнисти. Ако не бараме високи критериуми за регистрација и еден ригиден пристап кон креаторите на содржина во традиционалните медиуми, не гледам зошто би требало да имале и толку ригиден пристап кон оваа група на луѓе’’.Министерот Андовски истакна и дека неформалниот водич кој беше донесен создал дополнителни недоразбирања.„Беше донесен и еден неформален документ наречен водич, кој донесе дополнителна забуна затоа што станува збор за неформален документ којшто нема правна важност, а се сфати или се презентираше дека е задолжителен за употреба за оваа група на креатори на јавното мислење. Тоа создаде дополнително недоразбирање помеѓу едната и другата страна."Андоновски најави средба со Здружението на инфлуенсери за следната недела, на која ќе се дискутираат сите отворени прашања.

Македонија | пред 2 месеци

Владата најавува засилена борба против сивата економија и мониторинг на цените

Премиерот Христијан Мицкоски порача дека борбата против неформалната економија е прашање на праведност, доверба во системот и еднакви правила за сите, оценувајќи дека станува збор за процес кој мора да биде системски, а не само инспекциски.Говорејќи на конференција посветена на формализирањето на економијата, тој истакна дека сивата економија претставува изгубен приход за државата, но и изгубена можност за повисоки плати, подобро здравство, поквалитетно образование и посигурни пензии. Според него, неформалните текови создаваат нелојална конкуренција и ја рушат довербата во институциите, додека чесните даночни обврзници се ставаат во нерамноправна положба.„Нашата цел е формалната економија да стане попривлечна од неформалната. Да биде полесно, поисплатливо и посигурно да се работи легално“, нагласи Мицкоски.Тој упати благодарност до министерката за финансии Гордана Кочовска Димитриевска за, како што рече, дисциплинираното управување со јавните финансии во услови на глобални економски притисоци и растечки трошоци. Премиерот ја истакна и улогата на Министерството за економија и труд, Управата за јавни приходи и Финансиската полиција во засилените активности за сузбивање на даночните измами и финансискиот криминал.Во рамки на стратегијата за намалување на неформалната економија, Владата најавува дигитализација на процесите преку електронско фактурирање и поврзување на базите на податоци, намалување на административните бариери за регистрација на бизнис, стимулативни мерки за формално вработување и поддршка на микро и мали претпријатија, како и зголемена транспарентност и размена на податоци меѓу институциите.Паралелно со ова, премиерот се осврна и на цените во маркетите, оценувајќи дека глобалните движења и енергетските шокови не смеат да бидат алиби за неоправдани маржи и прекумерни профити.Владата најавува засилен мониторинг на цените на основните прехранбени производи, анализа на трговските маржи, координација со надлежните институции за спречување на евентуални злоупотреби и дијалог со трговците и производителите за стабилизирање на пазарот.„Немаме право да дозволиме нечесноста да биде попрофитабилна од чесноста. Немаме право граѓаните да плаќаат повеќе поради нечии шпекулативни практики“, истакна Мицкоски, додавајќи дека формализирањето на економијата е дел од европскиот пат и модернизацијата на државата.Тој нагласи дека борбата против сивата економија е долгорочен процес, а контролата на цените, според него, претставува заштита на граѓаните, а не популизам. Владата, како што рече, ќе остане цврста кон оние што избегнуваат обврски и кон оние што се обидуваат да профитираат од кризи, со цел воспоставување економија со ред и пазар со јасни правила.

Македонија | пред 2 месеци

Кузеска: Криминалната власт веднаш да се откаже од намерата за купување на нов авион, државата не е приватна компанија

Се уште нема одговори колку чинеше луксузирањето на Мицкоски со владиниот авион и кој бил со него. Но, луксузирањето на Христијан Мицкоски врз грбот на граѓаните и летањето со владин авион на Јадранско море го откри неговото вистинското лице и лицето на неговата расипничка власт, вели Богданка Кузеска - портпаролка на СДСМ„До толку се опиени од моќта, од аздисаноста, државата ја сметаат за нивна приватна сопственост, шанса за бизнис и уживање, а граѓаните за поданици кои се тука да им го плаќаат луксузот.Додека народот брои денари до крајот на месецот, работниците се на улиците за поголеми плати, премиерот лета на одмор со владин авион.Владата вели нема пари за плати, одбива да ја покачи минималната плата на 600 евра.Им кратат 40 милиони евра на земјоделците за субвенции, 5 милиони евра од поддршката во спортот.Дури и на лицата со ретки болести им скатија 3 милиони евра!А истовремено планираат да купат нов владин авион вреден околу сто милиони евра.Како со тендерите, 161, 51, 72, вредни милиони евра, како да се колачи.Со сума од околу 100 милиони евра се обезбедува половина од потребните пари за зголемување на минималната плата на 600 евра за работниците.Може да се изградат најмалку 20 нови современи училишта низ државата, 25 градинки, 10 студентски домови со што илјадници студенти би добиле достоинствени услови за живот и студирање.Со парите за еден луксузен авион може да се изградат 3 нови модерни болници или целосно да се реконструираат повеќе постоечки здравствени центри.Може да се изградат 20 згради за социјални станови, десетици километри водоводи и канализации во рурални и урбани средини каде граѓаните со години чекаат основни услови за живот.Но наместо пари за плати, за пензии, за училишта, болници, Владата сака луксузот на Мицкоски да го платат граѓаните.Тоа е приоритетот на оваа тендер коалиција ВМРО-ЗНАМ.Ова е безобразие без граници.Бараме криминалната власт веднаш да се откаже од намерата за купување на нов авион.Државата не е приватна компанија, а народните пари не се играчка за опиена, аздисана и криминална власт“, вели Кузеска

Македонија | пред 2 месеци

Полицијата приведе 16-годишник од Дебреште, возел без положен испит: му го одзеле и возилото

Шеснаесетгодишник од селото Дебреште, општина Долнени, е лишен од слобода откако бил затекнат како управува патничко возило без положен возачки испит.Од СВР Битола информираат дека на 17 февруари 2026 година во 19:20 часот, во селото Ропотово, прилепско, полициски службеници од Полициското одделение Ропотово извршиле контрола во патниот сообраќај и сопреле патничко возило „фолксваген голф“ со прилепски регистарски ознаки.При проверката било утврдено дека возилото го управувал 16-годишник, кој немал положено возачки испит. Возилото е одземено, а по целосно документирање на случајот против него ќе биде поднесена соодветна пријава.

Македонија | пред 2 месеци

Андоновски: Имаме системски пристап кон употребата на Вештачката интелигенција

Министерот за дигитална трансформација, Стефан Андоновски, денеска имаше свое обраќање на меѓународната конференција „AI for Society & Smart Governance“, во организација на Универзитетот „Гоце Делчев“ во Штип, каде што истакна дека вештачката интелигенција, освен што е технолошка тема, претставува и прашање на политики, институционален капацитет и одговорност кон граѓаните.„Во обраќањето нагласив дека клучното прашање не е дали ќе ја користиме, туку како ќе ја користиме. За да има реална примена во јавниот сектор, потребни се јасна рамка, квалитетни податоци и инфраструктура со конкретна имплементација, не само стратегии на хартија“, изјави министерот Андоновски.Тој посочи дека Министерството за дигитална трансформација работи на конкретни чекори за системско воведување на AI во јавниот сектор и креирање основа за одговорна и применлива дигитална трансформација.„Ги потенцирав и конкретните чекори што ги преземаме, а тоа е Националната ИКТ стратегија 2025–2030, подготовката на Националната стратегија за вештачка интелигенција во координација со академијата и институциите, интеграцијата на AI асистент на data.gov.mk, како и иницијативата за Центарот за вештачка интелигенција „Везилка“ за развој на домашни GPU капацитети и модели на македонски јазик“, истакна Андоновски.

Македонија | пред 2 месеци

Семејно насилство во Битола: Жена повредена со нож од сопругот

На 17.02.2026 година, во 09:15 часот, во СВР Битола е пријавено дека 30-годишна жена од Битола била физички нападната од нејзиниот сопруг С.А. Според пријавата, напаѓачот употребил остар предмет, при што ѝ нанел повреди на сопругата.Полицијата презема мерки за целосно расчистување на случајот, а по документирање на настанот ќе следуваат соодветни поднесоци.

Македонија | пред 2 месеци

Отишол во Малта, доживеал мозочно крварење, семејството се труди да го врати дома: се собираат средства за авионски медицински превоз

На социјалните мрежи се споделува апел за помош за лицето Никола Николовски познат како Томба, кој веќе пет месеци се лекува во болница во Малта по доживеано мозочно крварење, предизвикано од руптура на крвен сад.Според објавата, тој заминал во Малта на работа, но по здравствената состојба што му се влошила, останал хоспитализиран. Неговата состојба во моментов е стабилна, но му претстои подолг процес на рехабилитација.Семејството наведува дека за да може закрепнувањето да го продолжи дома, со своите најблиски, потребен е медицински авионски транспорт до Македонија. Трошокот за ваквиот превоз изнесува 27.000 евра, сума која, како што се наведува, семејството не може самостојно да ја обезбеди.Во апелот се посочува дека Томба е дружељубив човек кој секогаш бил подготвен да помогне, а сега нему му е потребна поддршка. Објавен е и број на трансакциска сметка во „Спаркасе банка“ на име Новка Николовска, преку која може да се донираат средства, со најава дека наскоро ќе бидат објавени и телефонски броеви за донации.Семејството апелира до граѓаните да помогнат и да го споделат повикот, со цел да се соберат потребните средства и Томба да се врати дома.

Македонија | пред 2 месеци

АРМ обезбеди мобилна бања за лицата погодени од поплавите во Кичево

Околу 250 лица, односно 63 домаќинства, привремено се сместени во спортската сала во Кичево, откако вчерашното невреме предизвика излевање на Зајаска Река и сериозни штети. Сепак, условите таму се ограничени, а граѓаните во моментов немаат соодветни услови за одржување на лична хигиена и капење.За да се подобрат условите, во координација со Општина Кичево, Генерал Штабот на АРМ овозможи мобилна бања и техничко возило со топла вода. Со ова, граѓаните погодени од поплавите добија можност за туширање и подобрување на хигиенските услови, додека трае нивното привремено сместување.„Во услови на кризна состојба, солидарноста и брзата поддршка се од клучно значење.Со цел обезбедување подобри и подостоинствени услови за лицата погодени од поплавите кои се привремено сместени во спортската сала „Христо Узунов“, градоначалникот во координација и соработка со Генерал Штабот на АРМ и касарната „Чеде Филиповски-Даме“ овозможи мобилнa бањa за туширање, и тоа: две цистерни, мобилна бања со пресоблекувална, техничко возило опремено со бојлери (за обезбедување топла вода).Општина Кичево упатува искрена благодарност до ГШ на АРМ за брзата реакција и несебичната помош, која значително придонесува за полесно надминување на последиците од поплавите“, информираат од Општина Кичево.

Македонија | пред 2 месеци

Дали мерната станица во „Усје“ може да овозможи онлајн пристап до податоците?

Општина Кисела Вода и граѓанската иницијатива „Стоп за Усје“ влегоа во јавна полемика околу функционирањето и транспарентноста на мерната станица поставена во кругот на цементарницата „Титан-Усје“.Од Општината соопштија дека со изненадување ги примиле обвинувањата изнесени на прес-конференција на иницијативата и најостро ги демантираат, оценувајќи ги како клевети и дезинформации. Според нив, грижата за здравјето на граѓаните е приоритет, а мерната станица работи во интерес на јавноста, при што сите измерени вредности се јавно достапни преку официјалната веб-страница.Општината наведува дека техничките карактеристики на станицата во овој момент не дозволуваат директна интеграција во надворешни апликации, поради што податоците се ажурираат рачно и се објавуваат секојдневно. Воедно, посочуваат дека градоначалничката Бети Стаменкоска Трајкоска остварила средба со претставници на иницијативата веднаш по нивното барање и дека комуникацијата со општинските служби е континуирана. Од локалната самоуправа упатија и јавен повик до иницијативата, заедно со стручен тим, да извршат увид на лице место во точноста на податоците.Од друга страна, „Стоп за Усје“ ги отфрла квалификациите дека станува збор за лични напади или задни намери, наведувајќи дека нивната цел е единствено институциите да преземат одговорност во борбата против загадениот воздух. Според иницијативата, мерниот уред поставен во 2024 година е модел Aeroqual AQS-1, кој, како што тврдат, според спецификациите поддржува онлајн пренос и API, а мери PM10, PM2.5, SO₂ и NOx.Тие прашуваат што значи тврдењето на Општината дека „во овој момент“ не е возможна интеграција, кога, како што наведуваат, производителот на уредот посочува дека овозможува таква функција. Иницијативата додава дека на средбата со градоначалничката не биле разгледувани детални технички аспекти, освен најавата дека со новите станици ќе може да се овозможи надворешно преземање на податоци, наместо досегашното земање преку УСБ од оџакот на цементарницата.„Стоп за Усје“ потенцира дека постои заради, како што наведуваат, уставно загарантираното право на чист воздух и дека наместо меѓусебни обвинувања, очекуваат конкретни чекори за целосна функционалност и транспарентност на мерната станица.Полемиката се одвива во контекст на пошироката јавна дебата за квалитетот на воздухот во Скопје и потребата од поголема достапност и проверливост на податоците за загадувањето.

Скопје | пред 2 месеци

ВМРО-ДПМНЕ тврди дека со амандмани го заштитила линеарниот раст на платите

Пратеникот на ВМРО-ДПМНЕ, Бојан Стојаноски, обвини дека во јануари 2024 година тогашната влада на СДСМ и ДУИ поднела пакет законски измени со кои, како што рече, суштински се менувала методологијата за пресметка на платите во јавниот сектор.Стојаноски тврди дека со предложените измени минималната плата требало да биде исфрлена од формулата за пресметка на платите на административните службеници, иако, според него, тоа било дел од колективниот договор потпишан меѓу владата и Сојуз на синдикатите на Македонија. Тој оцени дека таквиот пристап би значел прекин на линеарниот раст на платите и слабеење на заштитниот механизам за работниците, бидејќи секое идно зголемување на минималната плата немало автоматски да се одразува врз останатите примања во јавниот сектор.Според него, дел од измените не биле објавени на ЕНЕР и немало суштинска јавна расправа ниту вистински социјален дијалог во рамки на Економско-социјалниот совет. Стојаноски наведе дека тогашното раководство на ССМ дошло во Собранието и дека, заедно со тогашната опозициска ВМРО-ДПМНЕ, биле поднесени над 40 амандмани со кои, како што тврди, било спречено донесувањето на предложеното решение.Тој посочи дека еден од клучните амандмани бил предлог минималната плата да остане дел од формулата за пресметка, со што би се овозможило линеарно зголемување и на другите плати. „Токму затоа денес платите растат секогаш кога расте минималната плата. Тоа е факт“, изјави Стојаноски.Пратеникот постави прашање зошто, како што рече, се премолчува случувањето од 2024 година и зошто актуелното синдикално раководство не го споменува заедничкото дејствување во Собранието. Според него, разликата меѓу тогашната и сегашната состојба е во тоа што, како опозиција, ВМРО-ДПМНЕ спречувала штетни решенија, а како власт обезбедува системски раст на платите.„Работниците заслужуваат стабилност, предвидливост и целосна вистина, а не селективна меморија и дневнополитички интерпретации“, порача Стојаноски.

Македонија | пред 2 месеци

Руски министер: Странски служби имаат пристап до преписките на војниците на Телеграм

Странските разузнавачки служби можат да имаат увид во пораките што руските војници ги разменуваат преку апликацијата Telegram, изјави рускиот министер за дигитален развој Максуд Шадаев, пренесе новинската агенција Интерфакс.Телеграм, една од најкористените апликации за комуникација во Русија, широко се употребува и од руските сили кои учествуваат во војната во Украина. Истовремено, платформата е под засилен притисок од руските власти, кои ѝ наметнаа ограничувања поради, како што наведуваат, непостапување во бришење екстремистички содржини.„Постојат бројни индиции дека странски разузнавачки агенции имаат пристап до преписките на оваа апликација и дека тие податоци ги користат против руската војска“, изјави Шадаев.Во меѓувреме, рускиот регулатор за комуникации Роскомнадзор соопшти дека ја забавува работата на Телеграм како дел од поширока постапка против апликации во странска сопственост, за кои тврди дека не ги почитуваат руските закони.Кремљ минатата недела потврди дека американската апликација WhatsApp, која е во сопственост на Meta Platforms, е целосно блокирана поради непочитување на локалната регулатива. Руските власти ги повикаа граѓаните да преминат на „националната апликација за размена на пораки“ наречена МАХ, поддржана од државата.Критичарите предупредуваат дека МАХ може да претставува алатка за надзор, додека руските власти ги отфрлаат таквите тврдења.

Свет | пред 2 месеци

Курти бара меѓународен суд за „снајперски туризам“ во Сараево, го спомена и Вучиќ

Премиерот на Косово, Албин Курти, повика на формирање посебен меѓународен суд за истрага и судење за наводните злосторства познати како „Сараево сафари“, односно таканаречен „снајперски туризам“ за време на опсадата на Сараево. Тој изјави дека, според тврдења кои се појавиле во јавноста, во оваа појава се спомнува и улогата на претседателот на Србија, Александар Вучиќ.Курти говореше на Втората меѓународна научна конференција на Институт за воени злосторства на Косово, организирана по повод 18-годишнината од независноста на Косово. Тој посочи дека, според информации што кружат, за време на опсадата на Сараево во почетокот на 1990-тите, поединци наводно плаќале за да пукаат со снајпер врз цивили од ридовите околу градот.„За помала сума пари, од ридовите околу Сараево можело да се пука врз босански цивили во опколениот град. За истрага и судење на злосторствата на ‘Сараево сафари’ потребен е посебен меѓународен суд“, изјави Курти.Тој истовремено повтори дека, според негов став, таканаречената „жолта куќа“ за трговија со органи во Албанија никогаш не постоела и дека станува збор за, како што наведе, хибриден наратив насочен против Ослободителна војска на Косово. Курти оцени дека борбата на поранешните водачи на ОВК, на кои им се суди пред Специјализирани совети за Косово во Хаг, била праведна и неопходна.На конференцијата се обрати и извршниот директор на Институтот, Атдхе Хетеми, кој истакна дека целта е продлабочување на научниот дијалог и пошироко истражување на воените злосторства преку интердисциплинарен пристап.Претседателот на Србија, Александар Вучиќ, во претходни изјави ги отфрли медиумските наводи што го поврзуваат со случајот „Сараево сафари“, оценувајќи ги како политички мотивирани и непроверени информации.Случајот беше актуелизиран од италијанскиот новинар Ецио Гавацени, чие обраќање до обвинителството во Милано доведе до отворање истрага против засега непознати лица за наводно организирање викенд-снајперски тури за време на војната во Босна и Херцеговина.

Свет | пред 2 месеци

Зеленски најави санкции за Лукашенко поради поддршка на руската агресија

Украинскиот претседател Володимир Зеленски објави дека Украина воведува санкции против белорускиот претседател Александар Лукашенко поради неговата улога во подготовката на руската агресија врз Украина, како и за неговото учество во продолжувањето на војната.Веста Зеленски ја објави на социјалните мрежи, пренесе украинскиот портал NV.ua.Зеленски нагласи дека под наредба на Лукашенко, од втората половина на 2025 година, во Белорусија биле распоредени голем број репетитори задолжени за контрола на руските удари со беспилотни летала врз Украина.„Окупаторот не би можел да изведе бројни напади без овие системи“, истакна Зеленски, додавајќи дека ова особено се однесува на напади врз украинските енергетски и инфраструктурни објекти и системи.Тој исто така напомена дека повеќе од 3.000 белоруски компании ја снабдуваат Русија со опрема и компоненти за војната во Украина.„Белорусија продолжува да ја развива инфраструктурата за распоредување ракети со среден дострел ‘Орешник’, чии компоненти исто така ги доставуваше на Русија“, напиша Зеленски.„Александар Лукашенко веќе долго време го разменува суверенитетот на Белорусија за продолжување на својата лична моќ, помагајќи им на Русите да ги заобиколат светските санкции за оваа агресија, активно оправдувајќи ја руската војна, а сега исто така го зголемува своето учество во ескалацијата и продолжувањето на војната. За тоа ќе има посебни последици“, посочи Зеленски.

Свет | пред 2 месеци

(Фото) Приведен српскиот јутјубер кој имаше тешка сообраќајка, возел под дејство на алкохол

Познатиот јутјубер Бојан Симоновиќ, познат како Сими, е приведен откако околу 4 часот наутро предизвикал тешка сообраќајна несреќа во Нови Сад.Според медиумите, по несреќата е утврдено дека тој управувал под дејство на алкохол. Како што пренесува Блиц, тој имал 1,6 промили алкохол во крвта.Несреќата се случила во Булеварот Ослободувања, кога, според сомневањата, ја загубил контролата над автомобилот BMW M4 CS, чија вредност изнесува околу 200.000 евра. Тој удрил во паркирани возила, по што автомобилот запрел.Познатиот адвокат од Нови Сад, Радомир Мунижаба, кој го застапува Сими, потврди за Блиц дека јутјуберот учествувал во сообраќајната несреќа.„За среќа нема повредени лица, но има голема материјална штета, бидејќи станува збор за скап и редок модел BMW M4. Господинот Симоновиќ е приведен од полицијата, а очекувам во текот на денот да биде пуштен на слобода“, изјави Мунижаба.

Магазин | пред 2 месеци

(Видео) Опасност во детската градинка во Гевгелија: Силен ветер ги крена лимовите од кровот

Низ целата територија на Северна Македонија денеска дува засилен ветер.Особено загрижувачка е ситуацијата во Гевгелија, каде кровот на една детска градинка е небезбеден.На објавеното видео се гледа како силниот ветер ги крева лимовите од кровот, што претставува сериозна опасност за граѓаните.Од ЦУК утрово информираа дека е примена пријава дека поради силен ветер летнала лимената конструкција од кровот на СОУ „Јосиф Јосифовски“ во Гевгелија. Според информациите, нема повредени лица.

Македонија | пред 2 месеци