СОБРАНИЕ

Собранието ја помина првата фаза за укинување на техничката влада со 67 гласови „за“

Собранието ја усвои првата фаза од постапката за измени на Законот за Влада, со кои се предвидува укинување на досегашниот модел на техничка или преодна влада што се применуваше во изборни периоди.Со 67 гласови „за“, 13 „против“ и без воздржани, пратениците донесоа одлука за утврдување на потребата од носење на законот по скратена постапка, со што предлогот ја помина првата фаза од законодавната процедура.Со предложените измени се предвидува промена во начинот на организација на изборните процеси и функционирањето на извршната власт, при што се укинува досегашната пракса на формирање технички влади.Од Владата образложуваат дека целта на законското решение е зајакнување на институционалната стабилност, поголема правна сигурност и заштита на јавниот интерес, како и обезбедување поефикасно функционирање на државните институции без, како што се наведува, привремени политички договори што во минатото го отежнувале системот.Во документот се наведува и дека новата правна рамка треба да овозможи порационално користење на јавните средства и постабилен модел на владеење, со цел гарантирање на фер и транспарентен изборен процес.

Македонија | пред 15 часа

Ќе има обид да се укине преодната техничка Влада, СДСМ алармира за „шверцерски“ закон

Собранието ќе ја одржи 98. седница, на чиј дневен ред е и предлогот за изменување на Законот за Владата, со кој се предвидува создавање услови за укинување на моделот на техничка влада.Предлагачот – Владата – во образложението наведува дека измените имаат за цел обезбедување стабилност, правна сигурност и заштита на јавниот интерес, преку заокружување на започнатите реформи. Дополнително, се посочува дека со новото законско решение ќе се воспостави „јасна и применлива правна рамка“ која ќе гарантира фер и транспарентни избори, без потреба од привремени политички решенија.Опозицискиот СДСМ, пак, обвинува дека власта се подготвува за предвремени избори преку, како што велат, „шверцерски измени“ со кои сака да ја укине техничката влада – механизмот што, според нив, обезбедува контрола во изборен период. Од партијата предупредуваат дека ваквиот чекор претставува директен удар врз демократијата и слободните избори и најавуваат дека ќе се спротивстават.Покрај оваа точка, пратениците ќе одлучуваат и за испраќање припадници на Армијата во мисијата на Европската унија „АЛТЕА“ во Босна и Херцеговина, како и за стратешките и финансиските планови на Државната комисија за жалби по јавни набавки за 2026 година.На дневен ред се и повеќе законски измени во второ читање и по скратена постапка, меѓу кои за здравственото осигурување, минералните суровини, концесиите и јавно-приватното партнерство, јавните претпријатија, данокот на додадена вредност и придонесите од задолжително социјално осигурување.Седницата доаѓа во услови на засилена политичка конфронтација околу изборните правила и функционирањето на институциите, со спротивставени ставови дали укинувањето на техничката влада значи реформа или ризик за изборниот процес.

Македонија | пред 20 часа

Предлог-закон: Пратеник да може да има само македонско државјанство

Пратеници од ВМРО-ДПМНЕ поднесоа Предлог-закон за изменување и дополнување на Законот за пратениците, со кој се предвидува услов пратеник да може да биде само лице кое има исклучиво македонско државјанство.Предлогот, кој е доставен по скратена постапка, предвидува дополнување на членот 2, со нови одредби според кои кандидат за пратеник мора „да е државјанин само на Република Македонија“, покрај останатите постојни услови како полнолетство, деловна способност и неосудуваност.Во документот, кој е потпишан од повеќе пратеници, меѓу кои и Антонио Милошоски, се наведува дека целта е да се уредат условите за избор на пратеници и да се прецизираат критериумите за вршење на функцијата.Предлог-законот предвидува и усогласување со Изборниот законик во рок од 30 дена по неговото евентуално стапување во сила, додека примената би започнала со објавување во „Службен весник“.Иницијативата доаѓа во период на засилени политички обвинувања околу поседување странски државјанства кај носители на јавни функции, што повторно ја отвори дебатата за лојалноста и законските ограничувања за избраните претставници.

Македонија | пред 1 ден

Во Собранието презентирани извештаите на Транспортната заедница за 2025 година

Во Собранието денеска се одржа сесија на Комисијата за европски прашања, на која беа презентирани клучните наоди од Годишните извештаи за 2025 година на Транспортната заедница, информираат од Собранието во соопштение.Претседателот на Комисијата, Антонијо Милошоски, истакнал дека транспортната политика е дел од Кластер 14 и претставува значаен сегмент во евроинтегративниот процес, при што Транспортната заедница ја оценил како важен и стабилен партнер, стои во соопштението.Тој се осврнал и на напредокот на Коридорот 8, посочувајќи дека проектот е во фаза на изградба по надминување на претходните предизвици, се наведува во соопштението.Директорот на Транспортната заедница, Матеј Закоњшек, ги презентирал главните наоди од извештаите, при што дал поширок преглед на состојбите во областите безбедност, дигитализација, развој на инфраструктурата и усогласување на законодавството со стандардите на Европската Унија, информираат од Собранието во соопштението.Посебен акцент бил ставен на потребата од сеопфатно унапредување на транспортниот систем, со фокус на модернизација на железничката мрежа и зајакнување на патната безбедност преку континуирани реформи и институционално јакнење, стои во соопштението.Воедно, Милошоски истакнал дека системот „Безбеден град“ веќе дава позитивни резултати и е во процес на проширување во повеќе градови и општини, при што се очекува намалување на бројот на жртви и подобрување на безбедноста во сообраќајот, се додава во соопштението.Сесијата ја потврдила важноста од континуирана соработка со Транспортната заедница и доследна имплементација на реформите, со цел унапредување на транспортниот сектор и побрза интеграција на земјата во европските транспортни мрежи, информираат од Собранието во соопштението.

Македонија | пред 1 ден

Пред пратениците одлука за нафтената криза во државата

Пратениците денеска треба да одлучуваат за продолжување на кризна состојба поради можни нарушувања во снабдувањето со нафта и нафтени деривати, која според предлогот ќе трае до 20 јули.Одлуката, предложена од Владата и усвоена на последната владина седница, е единствена точка на дневниот ред на 99. собраниска седница закажана за 12 часот. Како причина се наведува ризикот од пореметувања во снабдувањето, што може да има влијание врз енергетската и економската стабилност на државата.Доколку биде изгласана, одлуката ќе стапи во сила од 21 април, по објавувањето во „Службен весник“.

Македонија | пред 6 дена

Собранието го усвои Законот за средно полициско училиште со 61 глас „за“ – започнува од мај 2026

Со 61 глас „за“ и без ниту еден против или воздржан, Собранието синоќа го усвои Законот за средно полициско училиште по скратена постапка.Според законот, новото средно полициско училиште ќе започне со работа од 13 мај 2026 година, во рамки на сегашниот Центар за обука во Идризово, согласно новиот закон за внатрешни работи – Полициска академија. Наставата ќе се одвива според планови и програми утврдени од министерот за образование и наука во соработка со министерот за внатрешни работи, а образовниот процес ќе трае две учебни години (третата и четвртата година средно образование).Учениците кои ја завршиле првата и втората година на средно образование можат да се пријават на конкурс и, доколку ги исполнуваат условите, своето образование да го продолжат во средното полициско училиште. Со ова се продолжува традицијата на училиштето – последната, 24-та генерација, завршила во 2000 година, а сега се очекува формирање на 25-та генерација.За запишување во средното полициско училиште, кандидатите треба:да се државјани на Македонија,да не наполнат 18 години на денот на објавувањето на јавниот повик,активно да го користат македонскиот јазик,да бидат здравствено и психофизички способни,да поминат безбедносна проверка која утврдува дека не постои безбедносен ризик,да обезбедат писмена согласност од родител, старател или законски застапник.Во законот се нагласува дека целта на образованието е подготовка на кадар способен да се справува со безбедносните предизвици со кои се соочува државата и превенција на општествени девијации. Недостигот од формализирано полициско средно образование го отежнувал кариерниот развој во безбедносниот сектор и селекцијата на кадар според специфичните потреби на државата.

Македонија | пред 1 седмица

Парламентот изгласа закон: Возење мотоцикли до 125 см³ со Б категорија

Предлог-законот за измени и дополнувања на Законот за безбедност на сообраќајот на патиштата вчера беше изгласан од мнозинството пратеници во Собранието.Според измените, возач со возачка дозвола од категорија „Б“ ќе може да управува мотоцикли со автоматски менувач од категоријата „А1“ со моторна зафатнина до 125 см³ и сила до 11 kW, доколку ги исполнува следниве услови:да има наполнето 23 години,минимум пет години да поседува важечка возачка дозвола од категорија „Б“,да поседува потврда за завршена 4-часовна теоретска обука.Овие дозволи ќе важат само на територијата на државата. Зголемената употреба на помали моторни возила ќе помогне во намалување на сообраќајниот метеж, ќе ја зголеми проточноста на сообраќајот и ќе придонесе за заштита на животната средина преку намалување на емисиите на штетни гасови.За усогласеност со европските стандарди, се предвидува на самата возачка дозвола да се допише национален код кој ќе овозможи управување мотоцикли од категоријата А1. Слични решенија веќе се применуваат во земјите-членки на Европската Унија, вклучувајќи Шпанија, Грција, Португалија, Франција, Австрија, Чешка, Белгија, Луксембург, Словенија и Полска.На пример, во Италија, возачите со Б категорија можат да управуваат мотоцикли до 125 см³ без дополнителен возачки испит, доколку поседуваат возачка дозвола одреден временски период.Пратеникот Пеце Милевски истакна дека новите законски измени ќе овозможат поголема достапност до работни места, услуги и други активности, особено во урбаните средини каде најчесто се јавува појавата „еден човек – едно возило“.

Македонија | пред 1 седмица

Спасовски: Како сопственик на хидроцентрали ќе биде независен регулатор?

Координаторот на пратеничката група на СДСМ, Оливер Спасовски, остро реагираше на собраниската седница посветена на избор на претседател на Регулаторната комисија за енергетика, обвинувајќи дека се врши партизација на институцијата.Спасовски посочи дека изборот не смее да помине без дебата и оцени дека актуелните кадровски решенија се спротивни на претходните ветувања за департизација и системски промени.„Јасно е дека кандидатот е партиски член, но уште посериозен проблем е што истиот се јавува како сопственик на хидроцентрали и компании од енергетскиот сектор, што отвора прашање за независноста на Регулаторната комисија“, рече Спасовски.Тој наведе дека кандидатот е поврзан со повеќе компании од енергетската област, меѓу кои „Алфа инженеринг“, „Екотера“, „Хидронерџи груп“ и „МХЦ Козја река“, како и дека поседува мали хидроцентрали.Според него, ваквата состојба создава ризик од судир на интереси, бидејќи претседателот на Регулаторната комисија одлучува за цената на електричната енергија, што директно може да влијае врз профитите на приватни енергетски субјекти.Спасовски потсети и на претходни ставови на пратеници од власта, кои во минатото барале строги критериуми за избор на членови на Регулаторната комисија, вклучително и услов кандидатите да не бидат поврзани со политички партии.„Ако тогаш тоа не било добро, денес имаме уште полош пример. Ако не гласате против, тогаш сите тие ставови може да ги фрлите“, порача Спасовски, обвинувајќи за недоследност и отсуство на интегритет.

Македонија | пред 2 седмици

Битиќи: Горивата не се само приход за буџетот, туку трошок за економијата

Пратеникот од СДСМ, Фатмир Битиќи, на денешната собраниска седница истакна дека горивата имаат клучна улога во економијата и не смеат да се третираат исклучиво како извор на буџетски приходи.Говорејќи за предлогот за дополнување на Законот за данокот на додадена вредност и намалување на акцизите, Битиќи нагласи дека секое поскапување директно се пренесува врз производството, транспортот и на крајот врз работните места.„Секој денар повеќе потрошен на литар не е само трошок за возилото, тоа е трошок за машините, доставата, извозот и на крајот за работното место“, рече Битиќи.Тој потенцираше дека предложените измени предвидуваат намалување на акцизите кај бензинот и дизелот, со цел да се амортизира ценовниот шок кај енергенсите и да се создаде предвидлива економска рамка.Битиќи ја критикуваше Владата дека пристапот е „реактивен и краткорочен“, посочувајќи дека и самата признала дека акцизата е инструмент за заштита на стандардот, но дека мерките не се доволно системски.Во обраќањето тој изнесе и податоци за состојбата во индустријата, според кои производството бележи пад од 6,6 проценти во јануари 2026 година, додека преработувачката индустрија е во пад од 8 проценти. Дополнително, прометот во индустријата е намален за 9,4 проценти, а бројот на вработени континуирано опаѓа.Според него, во вакви услови акцизата треба да се користи како антиинфлаторен инструмент, бидејќи компаниите немаат простор да ги апсорбираат зголемените трошоци.„Ако не можат да го префрлат трошокот во цената, го намалуваат профитот, а ако ни тоа не е можно – кратат инвестиции, смени и работници“, предупреди Битиќи.Тој повика на поширока политичка поддршка за предложените законски измени, оценувајќи дека станува збор за мерка што директно ја штити економијата и животниот стандард на граѓаните.

Македонија | пред 2 седмици

Одбиен предлогот за ограничување на учеството во странски војни

Предлогот на пратеничката група на Левица за измени и дополнувања на Законот за одбрана не доби поддршка во Собранието, откако пратениците од СДСМ гласаа против, а пратениците од ВМРО-ДПМНЕ не гласаа.Пратеникот и потпретседател на Левица, Реџеп Исмаил, на седницата образложи дека постојното законско решение остава „широк простор“ Владата самостојно да одлучува за учество во воени операции, без директна поврзаност со одбраната на државата.„Собранието треба да ја ограничи Владата, така што армијата ќе се користи само во мисии со меѓународен легитимитет, одобрени од Советот за безбедност на Обединетите нации“, истакна Исмаил.Тој посочи дека членството во НАТО подразбира отстапување на дел од суверенитетот, особено во делот на одбраната, и отвора можност за директно или индиректно вклучување во конфликти.Според него, досегашните интервенции на НАТО – од Југославија, преку Ирак до Либија – покажуваат примери на операции без соодветен мандат или со, како што рече, злоупотребен мандат, што резултирале со нестабилност.Во образложението беше посочено и дека постои ризик од индиректно вклучување во конфликти преку поддршка, како што е испораката на оружје за Украина, што може да има економски, енергетски и безбедносни последици.Со предложените измени, Левица бараше секое учество на армијата во странство да биде строго врзано за меѓународно право и националниот интерес, но предлогот не беше изгласан.

Македонија | пред 2 седмици

Нов закон: Возачите со Б категорија ќе можат да возат мотоцикли до 125 кубици, само треба да имаат четиричасовна обука

Возачите кои поседуваат возачка дозвола од Б категорија ќе можат да управуваат мотоцикли од А1 категорија, но под строго утврдени услови, предвидува новиот предлог за изменување на Законот за безбедност на сообраќајот на патиштата.Како ќе се спроведува обуката и изгледот на потврдата, ќе ги пропишува министерот за внатрешни работи во рок од 15 дена од стапување на сила на законот. Автошколите ќе мораат да издаваат потврда за посетена четиричасовна теоретска обука за сообраќајни правила и прописи и за тоа да го известуваат МВР.Предлогот, поднесен од пратеничката група на ЗНАМ, предвидува дека лицата со Б категорија ќе можат да управуваат мотоцикли со автоматски менувач од А1 категорија, со зафатнина до 125 кубни сантиметри и моќност до 11 киловати.Според нив, правото ќе важи за лица кои имаат наполнето најмалку 23 години, поседуваат возачка дозвола од Б категорија најмалку пет години и имаат завршено задолжителна теоретска обука.Според предлагачите, целта на законските измени е да се поттикне користењето на мотоцикли како поекономично и поефикасно превозно средство во секојдневието, со што би се намалиле сообраќајниот метеж и трошоците за транспорт.

Македонија | пред 3 седмици

Денеска во Собранието седница за пратенички прашања

Во Собранието денеска ќе се одржи 95. пленарна седница, на која на дневен ред е поставување пратенички прашања.Седницата за пратенички прашања се одржува секој последен четврток во месецот, а на премиерот и на министрите прашања први поставуваат пратениците од опозициските партии.Секој последен четврток во месецот се одржува и редовниот брифинг на претседателот на Собранието, Африм Гаши, со новинарите.

Македонија | пред 3 седмици

Ненад Савески избран за државен јавен обвинител, го поддржаа 66 пратеници

Собранието на Република Македонија го избра Ненад Савески за нов државен јавен обвинител.За неговото именување гласаа 66 пратеници, додека 2 беа „против“, а 8 „воздржани“, од вкупно 101 присутен пратеник.Со оваа одлука, Савески ја презема функцијата прв човек на јавното обвинителство, во период кога правосудниот систем е под силен јавен и политички притисок, со очекувања за поголема ефикасност и независност во постапувањето.Неговиот избор беше проследен со жестока политичка дебата во Собранието, во која власта и опозицијата изнесоа спротивставени ставови за состојбите во правосудството и за начинот на избор на обвинителот.

Македонија | пред 1 месец

По 14 години, се бара по третпат да се приспитува убиството кои ги уби децата и рибарот кај Смилковско, овојпат од новиот јавен обвинител

Случајот „Монструм“ повторно ја отвори политичката дебата, откако во јавноста се појавија повици за негово преиспитување, проследени со остри реакции и меѓусебни обвинувања меѓу пратениците.Потпретседателот на ВМРО-ДПМНЕ, Александар Николоски, остро реагираше на изнесените ставови, оценувајќи дека се прави злоупотреба на трагедијата и болката на семејствата кои ги изгубија своите најблиски.„Не можам да поверувам дека во 2026 година вие и претходниот говорник сте единствените кои верувате на тезите на зоран заев од 2015 година, а во 2021 година ги демантираше. Во 2015 година во интервјуа велеше дека овие што се во затвор не се виновни и дека други се виновни, а во 2021 година кажа дека тоа биле лични впечатоци, негови видувања, дека немал податоци, документи и разговори туку се му било врз основа на прашања од новинари, па споделувал видувања и чувства. Со што добри шест години стави во катастрофална состојба членови на семејства кои изгубија деца. Да злоупотребувате судбина на семејства кои ги изгубија најблиските, е срамно“, рече Николоски коментирајќи за случајот „Монструм“ кој беше споменат како еден од слчаите кои треба да се реотвори во 2026 година оти според Халил Снопче бил монтиран.Од друга страна, пратеникот Халил Снопче возврати дека е недозволиво политичарите да се мешаат во правни процеси, но истовремено повика институциите да постапат доколку постојат сомнежи.„Безобразлук е да излезеш и да се мешаш во правни консеквенци како политичар. Тоа што кажал како Заев, не знам. Вие требаше да кажете дека ако има импликации за монтирани процеси, Савески да излезе и да преиспита. Абе истражете го случајот“, рече Снопче.

Македонија | пред 1 месец

Ленче Ристоска беше оттурната и покрај кредбилитетот, рече Зајкова која упати порака до идниот државен обвинител Савески

Пратеничката од ЛДП, Моника Зајкова, во обраќање до јавноста оцени дека изборот на нов јавен обвинител не е само кадровско прашање, туку клучен тест за тоа дали државата конечно ќе обезбеди вистинска правда или ќе продолжи практиката на селективност.Таа посочи дека со години се води иста дебата за правосудството, без суштински промени, и ја критикуваше постапката во која прво се избира обвинител, а потоа се менуваат законските решенија.„Ова е избор кој значи тест за институциите и за тоа дали конечно ќе имаме вистинска правда или ќе продолжи селективната правда“, истакна Зајкова.Според неа, иако формално процедурите биле испочитувани, суштинскиот впечаток е дека Владата ја има клучната улога во изборот.„Повторно се создаде впечаток дека политиката има последен збор таму каде што треба да владее правото“, рече Зајкова.Таа го посочи и случајот со обвинителката Ленче Ристоска, за која оцени дека била оттурната и покрај нејзиниот кредибилитет.„Кога се оттурнуваат професионалци, а се туркаат погодни решенија, довербата кај граѓаните ќе продолжи да паѓа“, додаде таа.Зајкова нагласи дека проблемот не е во поединечни имиња, туку во системот на избор кој, според неа, секогаш остава простор за сомнеж за политичко влијание.Во своето обраќање таа упати порака и до новиот јавен обвинител, Ненад Савески, оценувајќи дека пред него стои голема одговорност.„Не е доволно да сте добар правник, потребна е храброст – да се оттурне политиката од обвинителството, да се отворат предмети што со години стоеле затворени и да се покаже дека законот важи за сите“, истакна Зајкова.Таа порача дека граѓаните не бараат совршен обвинител, туку праведен и независен.„Имате шанса да ја вратите довербата и да покажете дека правдата не е мртва. Или ќе ја ослободите правдата, или ќе останете соучесник“, рече Зајкова.Воедно, таа упати порака и до власта да не се меша во правосудството.„Правдата не е ваша алатка. Институциите не се партиски продолжетоци и секое вмешување ќе биде препознаено и осудено“, нагласи таа.

Македонија | пред 1 месец

Насилниците нема да носат електронска нараквица, жртвите нема да бидат предупредувани - не поминаа измените на законот

Предлог-законот за дополнување на Законот за спречување на насилство врз жени, кој предвидува воведување електронски нараквици за следење на сторителите, не се најде на дневниот ред на Собранието, откако не доби поддршка од мнозинството пратеници.Од вкупно 94 присутни пратеници, само 27 гласаа „за“, додека немаше ниту еден глас „против“ или „воздржан“.Пратеничката Моника Зајкова од ЛДП, една од предлагачите, изјави дека станува збор за идентичен законски текст кој бил предложен и пред една година, но тогаш бил одбиен без образложение.„Овој закон предвидува воведување електронска нараквица за сторителите на насилство, која ќе ја предупредува жртвата доколку сторителот се приближи до нејзината локација. Можеби ако беше усвоен пред една година, ќе значеше едно женско име помалку во црната статистика“, рече Зајкова.Таа нагласи дека предлогот е поднесен по скратена постапка и има превентивна цел, како одговор на зголемените случаи на насилство врз жени во изминатиот период.Според неа, законот нема финансиски импликации, бидејќи вакви уреди веќе постојат во рамки на системот за пробација при Министерството за правда и можат да се стават во функција.„Да ја исправиме грешката од пред една година. Во спротивно, ќе бидеме соучесници, бидејќи не сме превенирале и не сме направиле ништо“, додаде Зајкова.Собранискиот спикер Африм Гаши констатираше дека предлогот не е усвоен.

Македонија | пред 1 месец

(Видео) Груевски и Шекеринска се најдоа помеѓу обвинувањата при изборот на новиот државен обвинител

Жестока размена на обвинувања се случи меѓу вицепремиерот Александар Николоски и пратеничката на СДСМ, Јована Тренчевска, околу состојбите во правосудниот систем и изборот на нов јавен обвинител.Николоски во својата реплика ја обвини претходната власт дека го контролирала правосудството и штитела партиски кадри.„Претходниот обвинител доби година и пол, ставаше случаи во фиока, не решаваше предмети, не постапуваше и ги штитеше вашите пријатели од поранешното раководство на СДСМ. Кога зборуваме за контрола, сѐ уште најголем дел од судскиот и обвинителскиот совет се контролирани од Струмица, од Зоран Заев“, изјави Николоски.Тој додаде дека, според него, СДСМ нема кредибилитет да зборува за политички прогон, обвинувајќи дека илјадници членови на ВМРО-ДПМНЕ биле предмет на постапки.„Три илјади луѓе од ВМРО-ДПМНЕ ставивте под прогон. Луѓето уште не можат на себе да дојдат. Сменивте обвинители и формиравте СЈО кое заврши како што заврши, со торба со пари“, рече Николоски.Во репликата, тој изнесе и тврдења дека постоеле обиди за, како што рече, политичка пресметка со ВМРО-ДПМНЕ: „Оваа што е генерален секретар на НАТО (Радмила Шекеринска) целта и беше со судска одлука да го затвори ВМРО-ДПМНЕ и да го прогласите за терористичка организација“.На ваквите обвинувања возврати Тренчевска, која оцени дека власта има намера да воспостави контрола врз правосудните институции.„Од вашата реплика очигледно е дека сте загрижени само за Груевски. Да не заборавиме на заробената држава во времето на владеењето на ВМРО. И претходно и сега, вашата цел е да имате контрола врз правосудните органи. Токму поради тоа е нашата загриженост“, изјави Тренчевска.Размената на остри тонови доаѓа во период кога Собранието расправа за изборот на нов државен јавен обвинител, што дополнително ја засилува политичката поларизација околу состојбите во правосудството.

Македонија | пред 1 месец

(Видео) Нема да гласаме „против“ изборот на Савески, а тој е партиски обвинител и нема наша поддршка, рече Тренчевска од СДСМ

Пратеничката од СДСМ, Јована Тренчевска, во Собранието оцени дека изборот на нов државен јавен обвинител не треба да се сведува само на личноста на кандидатот, туку на контекстот и системот во кој тој ќе функционира. Таа кажа дека СДСМ нема да гласа „против“ изборот на предлогот.„СДСМ јасно порачува дека Савески е партиски обвинител на ВМРО-ДПМНЕ. Во мандатот влегува без поддршка на опозицијата. Секое сомнително постапување ќе се смета за директно исполнувње на долгот кон партијата која го избрала“, рече ТренчевскаТаа посочи дека кандидатот Ненад Савески има професионално искуство кое, како што рече, не може да се игнорира, но предупреди дека постои ризик од политичко влијание врз обвинителството.„Не зборуваме против човек, туку против систем кој се гради. Најголемата опасност е намерата обвинителството да стане продолжена рака на политиката“, изјави Тренчевска.Според неа, предлогот за нов Закон за јавно обвинителство содржи одредби кои отвораат простор за, како што оцени, прикриена партизација на институцијата. Таа ги посочи можностите за преземање предмети и оценување на обвинителите како механизми што може да се злоупотребат.„Се создава систем во кој еден човек може да блокира предмети поврзани со афери, под изговор на нестручност“, нагласи Тренчевска.Пратеничката упати и директни прашања до Савески, повикувајќи го да ја гарантира својата независност доколку биде избран.„Дали ќе ги користите овие механизми за да казнувате обвинители кои истражуваат тендери? Дали ќе поднесете оставка ако Владата врши притисок преку буџетот?“, праша таа.Тренчевска додаде дека новиот обвинител ќе треба да покаже дека може да се спротивстави на политичките притисоци и да обезбеди еднаква правда за сите граѓани.„Правдата не смее да биде партиска и контролирана“, порача Тренчевска.

Македонија | пред 1 месец

(Видео) Трите грации се извалкаа повеќе од трите прасиња, ќе морате институционално да расчистите со СЈО, му рече Јаулески на Савески

Пратеникот од ВМРО-ДПМНЕ, Јован Јаулески, во Собранието упати остра порака до кандидатот за нов државен јавен обвинител, Ненад Савески, нагласувајќи дека идниот обвинител ќе има обврска да расчисти со, како што рече, „последиците од СЈО“.Јаулески оцени дека поранешното Специјално јавно обвинителство, кое првично било претставено како симбол на правда, се претворило во „срамно разочарување“.„СЈО беше претставено како историски коректив, а заврши како симбол на изневерена надеж. Тоа е пример како не треба да се работи. Трите грации од СЈО се извалкаа повеќе од трите прасиња, ја изгнасија професијата - обвинител“, изјави Јаулески.Тој додаде дека критиката кон СЈО мора да биде препознаена од новото раководство на обвинителството, со цел да не се повторуваат, како што ги нарече, злоупотребите.Во своето обраќање, Јаулески упати и директно барање до Савески, доколку ја добие функцијата, да обезбеди професионално постапување без политичко влијание.„Нема да ви биде обврска само да ја преземете функцијата, туку да докажете дека предметите се отвораат по индиции и докази, а не по агенда“, рече тој.Пратеникот нагласи дека новиот обвинител ќе мора институционално да воспостави јасна граница меѓу правото и неговата злоупотреба, дури и кога, како што рече, таа доаѓа од самите обвинители.„Ќе имате обврска институционално да расчистите со последиците од СЈО, ова е многу јасно за да се исцрта линија помеѓу правото и злоупотребата на правото. Па макар таа злоупотреба да е направена и од обвинител. За да се заврши со таквото поглавје“, порача Јаулески.

Настани | пред 1 месец

(Видео) „Обвинителството работи на штета на Албанците“: пратеник испорача барања за случаите „Монструм“ и „Алфа“ да се отворат одново

Пратеникот на Алтернатива, Скендер Реџепи, најави дека ќе апстинира при гласањето за избор на нов државен јавен обвинител, оценувајќи дека обвинителството со години функционирало како селективен инструмент, особено на штета на Албанците.Во своето обраќање во Собранието, Реџепи посочи дека довербата во правосудниот систем е исклучително ниска, а кај Албанците, како што рече, „е нула“.„Обвинителството често било инструмент на селективна правда. Не го велам тоа од политички причини, туку поради реалноста и довербата кај граѓаните“, изјави Реџепи.Тој наведе низа случаи од минатото, од Бит Пазар, Тетовскиот универзитет и Гостивар, до понови предмети како „Монструм“, „Алфа“, случајот со Алмир и настаните во Кочани, за кои тврди дека биле водени со пристап на однапред одредени виновници, наместо со целосно утврдување на фактите.„Неправдата не старее и не смее да се заборави. Таа треба да остане врежана во свеста на институциите и граѓаните“, нагласи тој.Реџепи истакна дека не може да го поддржи кандидатот за јавен обвинител, но нема ни да гласа против, оставајќи простор, како што рече, новиот обвинител да покаже дека може да донесе вистинска правда.„Ќе апстинирам за да му дадам шанса да докаже дека ќе биде обвинител на сите граѓани, а не на власта“, рече Реџепи.Тој додаде дека од новиот обвинител се очекува да ги преиспита чувствителните случаи и да покаже вистинска борба против корупцијата, во насока на европските стандарди.

Македонија | пред 1 месец

(Видео) Зошто Владата го предложила Ненад Савески за шеф на сите обвинители

Заменик-претседателот на Владата, Александар Николоски, образложи зошто Ненад Савески е предложен за нов државен јавен обвинител, нагласувајќи дека правосудниот систем се соочува со сериозен недостиг на доверба кај граѓаните.„Обвинителско-правосудниот систем не влева доверба, а рејтингот на институциите е околу 2 проценти. Граѓаните почесто гледаат неправда отколку правда“, изјави Николоски.Тој посочи дека токму затоа е потребен нов пристап и личност со искуство, која ќе може да придонесе за промена на состојбите. Како кандидат, Владата го предлага Ненад Савески, кој има долгогодишна кариера во правосудството, како обвинител и судија.Според Николоски, Савески ја започнал кариерата во Основниот суд во Гостивар во 2000 година, а подоцна бил стручен соработник, јавен обвинител и судија во Основниот кривичен суд Скопје, во одделот за организиран криминал и корупција.Дополнително, како што истакна, Савески бил дел од повеќе домашни и меѓународни експертски групи, ангажиран во проекти на ОБСЕ, Советот на Европа и други организации, како и во законски реформи и обуки поврзани со кривичната постапка и посебните истражни мерки.„Се работи за човек со сериозна биографија, без дамки во кариерата, кој постојано се дообразува и има меѓународно искуство“, нагласи Николоски.Тој додаде дека Савески говори повеќе јазици и дека е „еден од светлите примери во македонското судство и обвинителство“.Николоски потенцираше дека од новиот јавен обвинител се очекува да донесе резултати и да ја подобри работата на институцијата, но истовремено нагласи дека за тоа е потребна поддршка од целиот обвинителски систем.„Еден човек не може сам. Потребен е тим и координација за да се испорача правда на сите нивоа“, изјави тој, повикувајќи на поддршка за кандидатурата.

Македонија | пред 1 месец

Собранието денес одлучува дали Ненад Савевски ќе биде нов државен јавен обвинител

Пратениците во Собранието на Македонија денес треба да гласаат за избор на нов државен јавен обвинител.Ненад Савевски, кој во моментов е судија во Основниот кривичен суд Скопје, беше номиниран од Владата на 10 март, по спроведената постапка во која се пријавија петмина кандидати. Неговата кандидатура следува по оставката на поранешниот државен јавен обвинител Љупчо Коцевски.За да ја преземе функцијата, потребна е поддршка од најмалку 61 пратеник.Роден е во 1976 година и живее во Гостивар. По професија е магистер по правни науки од областа на казненото право, а студиите и магистерските студии ги завршил на Правниот факултет „Јустинијан Први“ при Универзитет „Св. Кирил и Методиј“ во Скопје. Правосудниот испит го положил во 2003 година.Од 2016 година работи како судија во Основниот кривичен суд Скопје, во одделот за организиран криминал и корупција. Претходно, од 2009 до 2016 година бил јавен обвинител во Основното јавно обвинителство, а од 2004 до 2009 година работел како стручен соработник во Основниот суд Гостивар. Кариерата ја започнал како судски приправник во истиот суд.Во својата професионална биографија има и повеќе меѓународни ангажмани, меѓу кои како експерт во ОБСЕ во Македонија, како и во проекти на Советот на Европа и УСАИД. Учествувал и во работни групи за судски и законски реформи и во проекти поврзани со кривичната постапка, притворот и посебните истражни мерки.Покрај судската кариера, Савевски е предавач во Академијата за судии и јавни обвинители и обучувач во програмата HELP на Советот на Европа, како и автор и коавтор на повеќе стручни трудови и публикации од областа на кривичното право и човековите права.На огласот за избор на државен јавен обвинител се пријавија и в.д. обвинителката Анита Тополова-Исајловска, обвинителката Ленче Ристовска, поранешниот претседател на Кривичниот суд Владимир Панчевски и обвинителката Лидија Раичевиќ.Советот на јавните обвинители даде позитивно мислење за четворица кандидати – Тополова-Исајловска, Ристовска, Савевски и Раичевиќ, додека за кандидатурата на Панчевски беше утврдено дека не ги исполнува законските услови во однос на работниот стаж.По оставката на Љупчо Коцевски, функцијата привремено ја извршуваше Анита Тополова-Исајловска како вршител на должност. Според Законот за јавното обвинителство на Северна Македонија, новиот државен јавен обвинител се избира во Собранието со најмалку 61 глас од пратениците.

Македонија | пред 1 месец

На 18 март одлука во Собранието: дали Савески ќе стане државен јавен обвинител

На 18 март во Собранието е закажана седница на која Ненад Савески треба да биде именуван за нов државен јавен обвинител.Савески, досегашен судија од Кривичен суд, беше предложен од Владата на 10 март, а за да биде изгласан од Собранието, потребно е да добие поддршка од 61 пратеник.Тој беше еден од четворицата кандидати за кои Советот на јавни обвинители во февруари годинава даде позитивно мислење. Портпаролката на Владата, Марија Митева, по седницата изјави дека одлуката е донесена по конструктивна дискусија во која се разгледувале сите аспекти на кандидатите – од професионално искуство до личен интегритет.

Македонија | пред 1 месец

Пет комисии ќе заседаваат во Собранието – на дневен ред повеќе законски измени

Во Собранието ќе заседаваат пет комисии - Комисијата за одбрана и безбедност, Комисијата за прашања на изборите и именувањата, Комисијата за економски прашања, труд и енергетска политика, Комисијата за земјоделство, шумарство и водостопанство и Законодавно-правната комисија.Пред членовите на Комисијата за одбрана и безбедност се Предлог законот за изменување и дополнување на Законот за јавните набавки во областа на одбраната и безбедноста, Предлог законот за изменување и дополнување на Законот за безбедност на сообраќајот на патиштата и Предлог законот за изменување и дополнување на Законот за развој, производство и промет на воени стоки, сите по скратена постапка.На дневен ред на Комисијата за прашања на изборите и именувањата се Формирањето Комисија за селекција на кандидати за член на Државната комисија за спречување на корупцијата и Разгледувањето барања за остварување право на плата по престанок на функцијата од поранешен претседател и член на Регулаторната комисија за домување.На Комисијата за економски прашања, труд и енергетска политика е Предлог на законот за изменување и дополнување на Законот за возила, по скратена постапка.Предлог законот за изменување и дополнување на Законот за шумите, по скратена постапка е на Комисијата за земјоделство, шумарство и водостопанство.На дневен ред на Законодавно-правната комисија се Предлог законот за изменување и дополнување на Законот за јавните набавки во областа на одбраната и безбедноста, Предлог законот за изменување и дополнување на Законот за безбедност на сообраќајот на патиштата, Предлог законот за изменување и дополнување на Законот за развој, производство и промет на воени стоки, Предлог законот за изменување и дополнување на Законот за возила и Предлог законот за изменување и дополнување на Законот за шумите, сите по скратена постапка.

Македонија | пред 1 месец

Собранието во четврток ќе одржи комеморативна седница за годишнината од трагедијата во Кочани

Собранието на Република Северна Македонија за 12 март 2026 година ја закажа својата 93. седница, која ќе има комеморативен карактер.Оваа пленарна седница, што ќе се одржи во салата „Македонија“, е посветена на одбележувањето на една година од трагичниот настан во Кочани.Како единствена точка на дневниот ред, комеморацијата претставува официјален чин на оддавање почит кон жртвите и сеќавање на настанот што ја потресе јавноста, со што законодавниот дом директно се вклучува во одбележувањето на оваа тажна годишнина.

Македонија | пред 1 месец