МАКЕДОНИЈА

Македонија го отвора Европското првенство против светскиот и олимписки шампион Данска

Седумнаесеттото Европско првенство во ракомет за мажи, кое се одржува во Данска, Норвешка и Шведска, официјално започна вчера, а денеска на терен ќе излезе и македонската репрезентација. За Македонија ова е деветто учество на континенталните шампионати, осмо по ред, а најдобриот пласман останува петтото место освоено на ЕП 2012 година.Титулата на шампион ја брани Франција, која со евентуално ново злато би се израмнила со рекордерот Шведска, со по пет европски титули. Македонија е сместена во групата Б и шампионатот го започнува вечерва од 20:30 часот во данскиот град Хернинг, каде ќе се соочи со актуелниот олимписки и светски првак Данска. Вториот натпревар македонските ракометари ќе го одиграат в недела против Португалија од 18 часот, додека во вторник следува дуелот со Романија, исто така од 18 часот. Пласман во следната фаза обезбедуваат двете првопласирани селекции од секоја од шесте групи.Македонија и Данска последен пат се сретнаа во групната фаза на Европското првенство 2022 година, кога Данците славеа со 31-21. Сепак, македонската јавност сè уште го памети триумфот од 33-29 во квалификациите за истото првенство, остварен во Скопје, на дебито на Кирил Лазаров како селектор, што воедно беше еден од ретките порази на Данска во изминатата деценија, како што потсетува Европската ракометна федерација.Селекторот Кирил Лазаров пред почетокот на шампионатот истакна дека неговиот тим влегува во натпреварот без притисок, но со голема желба да се надигрува со најдобрите. Тој оцени дека Данска е најдобрата репрезентација во светот во последните десет години, дека игра пред домашна публика и дека тоа ќе биде огромен предизвик, но нагласи дека Македонија нема што да изгуби и треба да ужива во ваков натпревар. Лазаров посочи дека промената на генерацијата е тежок и долг процес, особено за мала земја како Македонија, но изрази задоволство од напредокот што е направен во изминатите две години и од фактот што тимот веќе покажал дека може да одигра добар натпревар, иако континуитетот на големите турнири останува најголемиот предизвик.Македонската репрезентација во подготовките одигра пет контролни натпревари, на кои забележа три победи, едно реми и еден пораз. Подготовките започнаа во Пореч, каде Хрватска славеше со 26-23, по што следуваше турнирот во Винтертур, на кој Македонија го освои второто место со победи над Бахреин и Украина, како и реми со домаќинот Швајцарија. Генералната проба пред шампионатот беше победата над данскиот прволигаш Митјиланд со 35-27.Шефот на македонската делегација и поранешен репрезентативец Филип Миркуловски оцени дека последната проверка била исклучително корисна за тестирање на тактичките замисли и нагласи дека Македонија е во тешка група, но дека целта е да се изненадат фаворитите. Тој потенцираше дека иако станува збор за млада репрезентација, играчите зад себе имаат повеќе големи турнири и дека овој состав има потенцијал да расте и да постигнува резултати во иднина, како што пренесе Ракометната федерација на Македонија.Од другата страна, Данска, која според ракометните експерти е прв фаворит за златниот медал, со оптимизам влегува во шампионатот. Селекторот Николај Јакобсен изјави дека почетните натпревари секогаш носат одредена трема, но дека искуството и поддршката од околу 15.000 навивачи во арената Јуске Банк Боксен ќе бидат огромен ветер во грб. Тој оцени дека Македонија има млад и талентиран тим, но дека Данска влегува со јасна цел и самодоверба дека, ако игра на своето ниво, ќе биде тешко да биде поразена.Годинешното Европско првенство е прво за Данска без легендите Никлас Ландин, Хенрик Мелгард и Микел Хансен. И покрај тоа, Данците досега на европските првенства имаат освоено осум медали, а Јакобсен, кој е селектор од 2017 година, зад себе има четири светски титули и една олимписка. Македонија, пак, со млад состав и процес на постепена генерациска смена, влегува на шампионатот со амбиција за чекор напред и со надеж дека токму ваквите натпревари се патот кон идни успеси.

Спорт | пред 4 месеци

Година без олеснување: Како 2025 ја затекна Македонија неподготвена

Годината што изминува ја остави Македонија во состојба на длабока политичка, институционална и општествена преиспитувачка фаза, обележана од трагедии, политички пресврти, остри судири околу одговорноста и сè погласно незадоволство кај граѓаните. Наместо стабилизација, 2025 година донесе чувство дека државата чекори по тенка линија меѓу формалната демократија и реалниот институционален застој.Најтешкиот и најтрауматичен настан што ја обележа годината беше пожарот во дискотеката „Пулс“ во Кочани, во кој животот го загубија 63 млади лица, а над 200 беа повредени. Трагедијата не само што ја потресе јавноста, туку ја разоткри и целата мрежа на системски пропусти, институционален молк и долгогодишна неказнивост. Објект кој со години работел без минимално-технички услови, без противпожарна заштита и со незаконски реконструкции, стана симбол на држава што реагира дури кога е предоцна. Судскиот процес што следеше, со десетици обвинети – од сопственици, обезбедување и инспектори, до поранешни министри и градоначалници – ја претвори Кочани во лакмус-тест за владеењето на правото. Барањето за неселективна правда стана доминантна порака на јавноста, додека скепсата дали системот ќе ги санкционира вистинските виновници остана присутна.Паралелно со ова, политичката сцена влезе во нова турбулентна фаза. По локалните избори, ВМРО-ДПМНЕ завзеде повеќе општини, додека СДСМ се најде во длабока внатрешна криза, проследена со јавни судири, заминувања на истакнати функционери и отворени обвинувања за авторитарен начин на водење на партијата. Изјави на поранешни функционери дека партијата се оддалечува од своите вредности дополнително ја продлабочија недовербата кај гласачите. Политичкиот дијалог се сведе на меѓусебни обвинувања.Неминовен детал беше дебатата дали ќе ни се населат мигранти. Владата склучи договор со Велика Британија за взаемна соработка, а СДСМ ја отвори темата дали ќе се носат мигранти кои таа земја не ги прифаќа. По еден месец препукувања, а додека граѓаните не знаеја на кого да веруваат - предновогодишната атмосфера ги стиши ривалите.Економската состојба во 2025 година беше обележана со раст на трошоците за живот, стагнација на платите и зголемен притисок врз средната класа. Инфлацијата, иако формално стабилизирана, во пракса се чувствуваше преку високите цени на храната, енергенсите и кириите. Младите сè поотворено зборуваа за иселување, додека недостигот од јасна стратегија за задржување на работната сила остана нерешен проблем.Безбедноста и јавниот ред исто така беа во фокусот на годината. Проектот „Сејф сити“, кој требаше да донесе поголема безбедност преку видео-надзор, се најде на удар на критики дека камерите не можат да ја заменат физичката присутност на полицијата, особено по серијата сообраќајни несреќи и дивеење по улиците. Граѓаните сè почесто поставуваа прашање дали безбедноста се сведува на казни или на реална превенција.На надворешнополитички план, Македонија продолжи да тапка во место во процесот на европска интеграција. И покрај декларативната заложба за ЕУ, конкретен напредок беше речиси незабележлив, а разочараноста кај граѓаните растеше. Чувството дека земјата е заглавена меѓу ветувањата и блокадите стана доминантно расположение.Годината беше обележана и со граѓански реакции и јавен отпор – од протести по трагедии, до бурни реакции на социјалните мрежи за случаи на институционална негрижа, злоупотреби и неправди. Јавниот простор стана место на гласно незадоволство, но и на поделби, со сè помалку доверба дека институциите навистина слушаат.Во текот на цела година, од власта слушавме дека се работи на проекти кои биле во застој, се отвораа делови од автопатот Кичево-Охрид кој се гради повеќе од една деценија, нѐ убедуваа дека утре ќе биде подобро од вчера.На крајот од годината, Македонија не излезе посилна, но излезе поосвестена. 2025 година не беше година на напредок, туку година на разоткривање – на слабостите, на пропустите и на цената што ја плаќаат граѓаните кога системот не функционира. Останува прашањето дали научените лекции ќе се претворат во реформи, или ќе останат само уште една болна статистика во историјата на пропуштени шанси.

Македонија | пред 5 месеци

Радев: Интеграција на Македонија во ЕУ поскоро, но не на сметка на правата на бугарската заедница во земјата

Претседателот на Бугарија, Румен Радев оствари средба со претставници на организациите на бугарската заедница во Македонија од Битола, Охрид, Скопје, Прилеп, Кавадарци и Кочани, соопшти прес-службата на шефот на бугарската држава.Тој изјавил дека вклучувањето на Бугарите во Уставот на Македонија значително ќе го забрза патот на земјата кон Европската Унија и се надева, како што рекол, нашиот југозападен сосед ќе го стори тоа што е можно поскоро за да ги отвори вратите за преговори за полноправно членство.„Должност на секоја демократска држава е ефикасно да ги заштити правата на сите свои граѓани и да го гарантира нивното право на самоопределување. Сите се надеваме дека интеграцијата на Македонија ќе се случи што е можно поскоро, но тоа не може да биде на сметка на правата на бугарската заедница во земјата“, нагласил бугарскиот претседател.Радев изразил надеж дека македонските власти ќе го спроведат европскиот компромис од 2022 година што е можно поскоро и ќе ги вклучат Бугарите во нивниот устав.

Македонија | пред 5 месеци

Одбиен од македонската амбасада – примен во словенечкиот парламент: искрена приказна на студентот Филип Трајковски

Филип Трајковски, млад Македонец кој минатата година заминал на магистерски студии во Словенија, ја сподели својата лична приказна која на најдобар начин ја покажува разликата меѓу институционалната култура дома и надвор од државата.„Во Љубљана затекнав функционален и организиран град со култура и хигиена на завидливо ниво. Ме потсети на тоа што нашите места би можеле да бидат, но не се. Сепак, наместо да барам причини, ќе споделам пример,“ започнува тој во својата објава.Како дел од условите за магистерските студии, Филип требал да одработи задолжителна пракса. Со искрена желба да стекне искуство во рамки на македонските институции, се упатил до Амбасадата на Република Северна Македонија во Љубљана.„Исполнет со ентузијазам и желба за работа, заѕвонив на вратите на амбасадата и се претставив како студент заинтересиран за пракса – без надомест, без барања, само со желба да научам,“ раскажува тој.Но одговорот бил демотивирачки. „Бев информиран дека не знаат дали воопшто е можно такво нешто, а дури и да може – постапката трае пет до шест месеци,“ пишува Филип. Разочаран, но не и изненаден, заминал со мислата дека можеби нема да има можност за пракса.Сѐ се променило кога посетил саем за практиканти на неговиот факултет, каде што единствено словенечкиот парламент нудел пракса соодветна на неговите студии. „Со својот несовршен словенечки се пријавив и разговарав со генералниот секретар Уршула Зоре Тавчар, која го препозна мојот труд и ме покани на прием.“По неколку средби, Филип добил едномесечна пракса во словенечкиот парламент. „Без разлика што сум странски студент, добивам еднаков третман и големо трпение од сите. Никој не ме гледа како помал од себе,“ додава тој.„Сѐ што беше потребно беа валидни документи, неколку средби и желба за соработка. Објавата ја споделувам за да направам споредба – не како критика, туку како потсетник дека можеби не бараме многу, туку премалку очекуваме. Македонија вечна,“ завршува Филип Трајковски.

Македонија | пред 6 месеци

Црна Гора „одлична“, Албанија со „шестка“, а Македонија со „тројка“ во новиот извештај на Европската комисија

Црна Гора повторно го задржа статусот на „најнапреден ученик“ во процесот на проширување на Европската унија, добивајќи „одлична оценка“ во најновиот извештај на Европската комисија за напредокот на земјите кандидати. Албанија е оценета со „шест минус“, Молдавија со „пет плус“, а Украина доби стабилна „петка“ за своите реформи и напредок во усогласувањето со европските стандарди.Црна Гора дури се споменува како потенцијална нова членка на ЕУ уште во 2027 година.Македонија, пак, е оценета со „тројка“ – резултат што покажува ограничен напредок и задржување на речиси исто ниво како минатата година. Во документот, според бриселскиот портал „Политико“, земјата е ставена во групата на држави кои се „задржани на час“, заедно со Србија и Босна и Херцеговина, оценети со „двојка“.Иако Северна Македонија во 2019 година го постигна историскиот договор со Грција и го промени името, процесот на преговори со Европската унија останува блокиран поради нерешениот спор со Бугарија и барањето за уставни измени – односно вклучување на бугарската заедница во Преамбулата на Уставот.Во извештајот се очекува да се констатира одреден економски напредок и целосно усогласување со надворешната и одбранбената политика на Унијата, но генералната оценка останува непроменета – „без значителен напредок во споредба со минатата година“, пренесува „Политико“, повикувајќи се на извори од Европската комисија.Според извештајот, Турција и натаму е опишана како „ученик кој бега од часови“, со оглед дека преговорите со неа се замрзнати уште од 2018 година поради проблеми со владеењето на правото и човековите права.Косово, кое сè уште не е официјален кандидат за членство, останува на маргините на процесот додека не биде признаено од сите земји-членки на ЕУ.Еврокомесарката за проширување Марта Кос треба попладнево да го претстави целиот пакет извештаи пред членовите на Комитетот за надворешни работи на Европскиот парламент. По презентацијата ќе следи расправа посветена на резултатите и предизвиците на земјите кандидати и потенцијални кандидати во нивниот пат кон Европската унија.Европската комисија во документот уште еднаш ја нагласува својата подготвеност да го продолжи процесот на проширување и визијата за „обединета Европа“, но воедно укажува на пропустите и слабостите во спроведувањето на реформите во секоја од државите кандидати.

Македонија | пред 7 месеци

Се менува сопственикот на „Лукоил Македонија“, руската компанија склучи договор со купувач

Рускиот нафтен гигант „Лукоил“ постигна договор со компанијата „Гунвор груп“ за продажба на целиот свој странски имот, вклучително и на „Лукоил интернешнал“, кој е сопственик на македонскиот огранок на компанијата. Како што соопшти „Лукоил“, продажбата е резултат на рестриктивните мерки што неколку држави ги воведоа против компанијата и нејзините подружници.Според информациите на „Ројтерс“, клучните услови на трансакцијата веќе се усогласени меѓу двете страни. „Лукоил“ ја прифатил понудата на „Гунвор груп“ и се обврзал дека нема да преговара со други потенцијални купувачи додека не се финализира процесот.Пред потпишување на конечниот договор и исплатата, „Гунвор груп“ мора да добие одобрение од Канцеларијата за контрола на странски средства при американското Министерство за финансии (ОФАК), институцијата што воведе санкции кон „Лукоил“.Во соопштението на компанијата се наведува дека, доколку е потребно, ќе биде побарано продолжување на постојната лиценца на ОФАК и издавање дополнителни дозволи, со цел да се овозможи непречено работење и банкарско сервисирање до завршување на трансакцијата.„Гунвор груп“ е компанија регистрирана на Кипар, основана во 2000 година од шведскиот милионер Торбјорн Торнквист и рускиот олигарх Генадиј Тимченко, кој подоцна се повлече од сопствеништвото. Денес „Гунвор“ е четвртиот најголем трговец со сурова нафта во светот, со главен фокус на нафта од Америка, но присутен и на пазарите во Африка, Азија и Јужна Америка.По воведувањето на санкциите кон Русија поради војната во Украина, компанијата „Гунвор“ ја прекина трговијата со руската сурова нафта.

Македонија | пред 7 месеци

Само седум земји беа ЗА продолжување на санкциите кон Куба, меѓу нив и Македонија

Генералното собрание на ОН повторно ѝ даде силна поддршка на Куба, усвојувајќи резолуција со која се повикува на укинување на американското ембарго што е во сила повеќе од шест децении. За документот гласаа 165 земји, против беа седум, меѓу кои и Македонија, а 12 беа воздржани.Против гласаа:САД, Израел, Украина, Унгарија, Македонија, Аргентина, ПарагвајВоздржани беа:Албанија, Босна и Херцеговина, Коста Рика, Чешка, Еквадор, Естонија, Латвија, Литванија, Мароко, Полска, РоманијаРезолуцијата, со ознака A/80/L.6, ја нагласува потребата од „итно запирање на економската, трговската и финансиската изолација на Куба“, воведена од Вашингтон во 1962 година. Иако документот секоја година добива речиси едногласна поддршка, тој има симболично, но не и обврзувачко значење, бидејќи само Конгресот на САД може да ја укине блокадата што е утврдена со федерални закони (Cuban Democracy Act и Helms–Burton Act).Повеќето членки на ОН сметаат дека санкциите се анахронизам од Студената војна и дека го загрозуваат цивилното население, а не власта во Хавана. Куба оцени дека резултатот од гласањето претставува „јасна и гласна порака“ до Вашингтон дека светот бара крај на блокадата и поддршка за правото на Кубанците на економски и социјален развој.

Свет | пред 7 месеци

Температури до 21 степен, можно слаб дожд во североисточните делови

Времето денеска ќе биде променливо облачно со сончеви периоди. Ќе дува слаб до умерен, а долж Повардарието и во источните делови засилен ветер од северен правец. Во североисточните предели се можни слаби локални врнежи од дожд. Максималната дневна температура ќе се движи од 14 до 21 степен.Во Скопје времето ќе биде променливо облачно со сончеви периоди. Ќе дува умерен, а во делови од котлината повремено засилен северен ветер. Максималната температура ќе достигне до 19 степени.Минималните утрински температури се движеа од 2 до 14 степени Целзиусови. Најстудено беше во Лазарополе со 2 степени, а нешто потопло во Берово со 3 и во Маврови Анови и на Попова Шапка со 4 степени. Во Крива Паланка се измерени 6 степени, а истата температура е забележана и во Битола, Охрид, Претор и Крушево. Во Струмица утрово беа измерени 7 степени, а во Тетово, Демир Капија и Виница 8 степени. Во Скопје-Петровец, Велес, Штип и Кавадарци минималната температура изнесуваше 10 степени, во Куманово 11, на Зајчев Рид 12, додека најтопло утрово беше во Гевгелија со 14 степени.

Македонија | пред 7 месеци

Минчев и Дукај: Зајакнување на јавната администрација преку регионална соработка

Министерот за јавна администрација, Горан Минчев, оствари билатерална средба со својот колега, министерот за јавна администрација на Црна Гора, Мараш Дукај, во Скопје.  Целта на оваа средба е зајакнување на билатералната соработка помеѓу двете земји во областа на јавната администрација.Министрите разменија визии и идеи за унапредување на реформските процеси и примена на современи методологии кои ќе придонесат кон создавање на поефикасна, транспарентна и граѓански ориентирана администрација.Реформата на јавната администрација не е само внатрешна обврска, туку и надворешен сигнал, дека нашите институции се подготвени за европските стандарди, за модерно управување и вистински партнерства во регионот. Токму оваа соработка е доказ за тоа, што ја потврдува нашата посветеност кон транспарентност, ефикасност и заемна поддршка на патот кон европската интеграција. изјави министерот Минчев.Во јуни годинава беше потпишан Меморандум за соработка, кој служи како цврста основа за стратешка и континуирана комуникација меѓу двете министерства, овозможувајќи заедничка реализација на проекти и иницијативи поддржани од меѓународни партнери и Европската Унија.Во согласност со стратешката определба за воспоставување на ефикасна, модерна и граѓански ориентирана јавна администрација, ја препознавме важноста на регионалната соработка и размената на најдобри практики во оваа област. Потпишувањето на Меморандумот претставува значаен чекор кон зајакнување на институционалните капацитети и унапредување на партнерските односи.“ додаде министерот Дукај.Министерството за јавна администрација останува посветено на унапредување на меѓународната соработка и градење на партнерства кои придонесуваат за професионални и поефикасни институции.

Македонија | пред 8 месеци

Времето денес: Слаб до умерен јужен ветер со температура до 21 степен

Денес, 28 септември 2025 година, времето ќе биде претежно облачно со повремени локални врнежи од дожд. Попладне и кон крајот на денот, на некои места врнежите ќе бидат пообилни, со количина над 20 литри на метар квадратен. Ќе дува слаб до умерен ветер од југоисточен правец, поизразен долж Повардарието. Максималната температура ќе се движи од 15 до 21 степен.Во Скопје се очекува облачно време со повремени врнежи од дожд. Попладне и кон крајот на денот врнежите во делови од котлината ќе бидат пообилни. Ќе дува слаб до умерен ветер од јужен правец.Најава за наредните денови: Утре ќе има повремен локален дожд, а во вторник времето ќе се преодно стабилизира. Од среда кон крајот на денот се очекува нов влажен и постуден бран со пообилни врнежи од дожд и значително опаѓање на температурите.

Македонија | пред 8 месеци

Николоски: Проблемот со радарот стар 27 години го решивме за три дена

Проблем со радар стар 27 години на скопскиот аеродром бил решен за само три дена, изјави заменик-претседателот на Владата и министер за транспорт Александар Николоски за ТВ Сител.Седум години никој не водел сметка за резервни делови, бидејќи уште тогаш престанаа да се произведуваат. Се соочивме со проблем, но благодарение на професионалците успеавме за три дена да го ставиме радарот во функција, рече Николоски.Тој најави дека со одлука на Владата ќе биде задолжен М-НАВ во наредните месеци целосно да го стави во функција новиот радар, со стандардни тестови и проверки.Според Николоски, моментално во функција се три радари – еден за охридскиот аеродром и два за скопскиот – со што е обезбедена целосна безбедност во воздушниот сообраќај.Она што го откривме минатата недела е дека радарот работел на еден канал цели седум години. И покрај тоа што е стар 27 години, а делови не се произведуваат, успеавме да го решиме проблемот што со децении се туркал под тепих, нагласи министерот.

Македонија | пред 8 месеци

Почнуваат изборните кампањи: 309 кандидати за градоначалници во 80 општини и Скопје

Од полноќ започнува 20-дневната кампања за Локалните избори 2025, кои ќе се одржат на 19 октомври, а вториот круг е закажан за 2 ноември.Ова се осмите локални избори од независноста на државата и четврти на кои ќе се избираат и градоначалници и советнички листи во 80 општини и Градот Скопје. На овие избори учествуваат 309 кандидати за градоначалници и 576 кандидатски листи за советници, со вкупно 10.490 кандидати.Според Државната изборна комисија, во Избирачкиот список се впишани 1.832.415 граѓани со право на глас. Меѓу нив има околу 112.000 лица на привремена работа во странство, 2.162 лица кои издржуваат казна затвор или се во притвор и 450 лица од домовите за стари лица.Гласањето ќе се спроведува на 3.480 избирачки места низ земјата. Буџетот за изборите изнесува 9,76 милиони евра, од кои најголем дел се наменети за медиумско покривање и политичко рекламирање.Локалните избори во Македонија се одржуваат на секои четири години во втората половина на октомври. Досега избори се одржале во 1996, 2000, 2005, 2009, 2013, 2017 и 2021 година.

Македонија | пред 8 месеци

Ахмети од Тетово до Мицкоски: „Ќе има поделби, едни со Албанија, едни со Бугарија“

Лидерот на ДУИ, Али Ахмети, синоќа од Тетово му упати остро предупредување на премиерот Христијан Мицкоски, нагласувајќи дека секое скршнување од европскиот пат може да ја подели државата.„Ако не го продолжи Македонија својот пат кон ЕУ, тогаш граѓаните на оваа земја нема да имаат друг избор освен некои да одат со Албанија, а другите со Бугарија!“, изјави Ахмети, а изјавата ја пренесе албанскиот портал „Тетова сот“.Во своето обраќање тој зборуваше и за отворањето на изборниот штаб во Тетово, што, според него, претставува значаен чекор во „историскиот плебисцит“ кој следува.– Денес во Тетово беше нашиот изборен штаб, означувајќи важен чекор во историскиот плебисцит, што нè очекува. Оваа извонредна мобилизација е доказ дека Албанците се обединети, решени и подготвени да ги бранат достоинството, еднаквоста и европската иднина на земјата. Обединувањето на политичките сили во овој сојуз е нашиот најсилен одговор на предизвиците, кои ги сервираат ‘задоцнетите патриоти’. Знаеме дека не е лесен нашиот пат, но нашето единство е гаранција оти никој не може да нè запре. Овој плебисцит не е за една партија, ниту за еден поединец, туку за сите Албанци и за нашата земја – рече Ахмети.

Македонија | пред 8 месеци

„Сите за Палестина“ со барање до Силјановска Давкова: Македонија да ја признае Палестина

Во пресрет на Генералната дебата на 80-то Генерално собрание на Обединетите нации, Иницијативата „Сите за Палестина“ упати писмо до претседателката Гордана Силјановска-Давкова во кое побара Македонија да ја признае палестинската држава и да го осуди геноцидот врз палестинскиот народ.Иницијативата пред се инсистира, претседателката итно да се побара прекин на огнот и влез на хуманитарна помош во Газа што не е дистрибуирана од Израел.Во писмото, Иницијативата бара Македонија да почне да гласа за солидарност со палестинскиот народ на сите понатамошни гласања на ОН, да се воведат санкции, како и да престане со трговијата, културна, образовна и спортска соработка со Израел.

Македонија | пред 8 месеци

(Видео) Македонски туристи поминаа голгота: вчера ги убедуваа да продолжат со автобус за кои тврдеа дека е исправен, сега и сами признаваат дека не бил

Патници од Македонија со страв се враќале кон Македонија по туристичка посета на Истанбул, бидејќи се појавиле проблеми со исправноста на автобусот. Тие тврдат дека возилото постојано прегревало, а возачот морал да застанува за да се олади моторот. Компанијата „Ганиќ-Ексклузив“ за „Скопје1“признава дека имало проблеми со автобусот, иако ако се слушнат снимките може да се воочи дека претходно претставник оттаму ги убедува патниците да продолжат со истото возило. На крајот, поради инсистирањето, пратиле друг автобус, за да ги врати во Македонија. View this post on Instagram A post shared by Скопје1 / Skopje1.mk (@skopje1mk)„Проблемот е решен“, вели патничката Амела во разговор за кој посочуваат дека е со газдата, а тој и враќа: „Решен е проблемот“. Таа потоа му објаснува: „Не е решен, автобусот не е во ред. Не е само цревото. Од вчера свети сијалицата. Немојте да се силите и заканувате многу. Јас ви кажав, сите овде чекаат“.Од другата страна, газдата им вели: „автобусот е направен“, на што тие враќаат: „Господине, мајсторите кажаа дека автобусот не е исправен! 60 души нѐ дриблате!“.Според патници, на автобусот прво му паднала пластика од тркало, па почнало да мириса и да има чад. Го поправале со часови, смениле водна пумпа и други делови. Ова траело четири часа.„За време на враќање од Истанбул за Македонија непредвидено дојде до пукање на црво и загревање на моторот поради што автобусот не можеше да го продолжи патот. Поради пукање на црево патниците не се доведени до никаков ризик, но поради дефектот автобусот не можеше да продолжи на пат кон Македонија. Веднаш испративме друг исправен автобус од Македонија за да ги земеме патниците. Патниците се веќе во автобус и се враќаат за Македонија. Искрено жалиме за непредвидениот дефект што се случи за време на враќање кон Македонија, и поради тоа што патниците мораа да чекаат додека дојде автобусот што тргна од Македонија, сепак се работи за голема релација и повеќечасовно чекање од страна на патниците“, велат во писмениот одговор на компанијата испратен до „Скопје1“.Патниците ни испратија и снимки на кои се гледа дека автобусот паркиран, и вон-возна состојба. На друга снимка се гледа и чадот кој доаѓа од задниот дел на возилото. Компанијата пак, тврди дека пратиле исправен автобус.„Патување повеќе од 24 часа, прашање е кога ќе се стигне. Газдата на агенцијата ни спушта телефон, не креваше синоќа“, сведочи патничка попладнево.Патниците уште патуваат кон Македонија.

Македонија | пред 8 месеци

„САД ја ценат Македонија како сојузник, ЕУ го поддржува патот кон Унијата“ – честитки за Денот на независноста

„Во текот на три децении изградивме силно партнерство – работејќи заедно во дипломатијата, безбедноста, образованието и културата“, порача Амбасадата на САД во честитката по повод Денот на независноста.Американскиот државен секретар Марко Рубио ја нагласи посветеноста на Вашингтон за продлабочување на соработката со Северна Македонија. „Како сојузник на НАТО, вашето ветување за зголемени трошоци за одбрана ја потврдува вашата посветеност на заедничките безбедносни цели. Правдата, стабилноста и просперитетот ќе продолжат да бидат во срцето на нашите односи“, наведе Рубио.Поддршка дојде и од Брисел. „Цврсто го поддржувам вашиот пат за приклучување кон нашата Унија. Ние сме со вас на секој чекор од тој пат“, напиша европската комесарка за проширување Марта Кос на Икс.Честитка испрати и претседателот на Европскиот совет, Антонио Кошта, кој истакна дека ЕУ останува посветена на европскиот пат на земјата.

Македонија | пред 8 месеци

Како не треба да изгледа EYOF – Македонија покажа „пример“ пред 49 земји!

Со години се подготвуваат олимпијади — зимски, летни, младински, старински... Држави вложуваат стотици милиони, години однапред трешти пропагандна машинерија, се градат сали, села, системи и сјај. А кај нас, Младинската олимпијада мина како месна забава во трета смена. Ни глас, ни трага. Скопје и Куманово ја угостија Европа, 4.000 спортисти од 49 земји, а јавноста дозна од некое стори на Инстаграм и неколку очајни објави на самите натпреварувачи.Медиумите беа обвинети за слабо покривање. Па не можат новинарите да гатаат со гравчиња кога, каде и што се случува. Мора кампања, мора да се вреска, да има билборди, инфо-фрчење, соопштенија, ТВ-спотови, реклами во јавен превоз, сѐ ако сакавме да биде настан, а не трошка во спортски дрес.За „Експо 2027“ во Србија веќе знаат и врапчињата на гранките. А кај нас? Олимписки настан мина со паднат таван во студентски дом, без клима на 45 степени, двајца во еден кревет како во поствоена болница и храна која ги инспирираше спортистите на ТикТок со #worstexperience.Министерството? Рака мијат, велат: „Ние дадовме милион евра на МОК“. Одговорност? Не, тоа е спорт за себе.А велосипедистите од Исланд кои ги удри автомобил на тренинг? Па зошто не тренирале со агенда?! Зарем нашите велосипедисти кога возат 100тина километри, ги следи конвој? Не. Ама не се гости на меѓународна спортска манифестација.Се прашувате колку време се спрема ваков настан? И нема да одиме подалку, нема споредба со САД или Кина!Шаховската олимпијада во Скопје (1972) – години подготовки, посебен комплекс, државен приоритет.Универзијадата во Загреб (1987) – изградено студентско село, нови спортски сали, цела држава се вклучи.Зимската олимпијада Сараево (1984) – пет години подготовки, изградени спортски центри, патишта, инфраструктура.А кај нас? Студентски дом, без клима, без превоз...Каков дочек, таков спомен. А со ваква организација, ќе не паметат и тие што не сакаа.

Коментари | пред 10 месеци

Професорката Чупеска прашува: До кога македонското прашање ќе биде месо за гладните волци ?!

Во моменти кога повторно се отвораат прашања поврзани со идентитетот, дел од јавноста остро реагира – предупредувајќи дека темата се злоупотребува за политички поени и дефокус. Меѓу нив е и професорката по политички науки Ана Чупеска, која прашува: „Може ли од Владата да ни објаснат зошто на тацна повторно сервираат затворени идентитетски оспорувања?“Може ли од Владата да ни објаснат зошто на тацна повторно сервираат затворени идентитетски оспорувања ?!До кога македонското прашање ќе биде месо за гладните волци ?!Се чини дека,на квази патриотите македонското прашање, секогаш им станува лесна тема - за да ги сокријат своите вистински намери :1. саботирање на стратешките државни интереси2. ова е параван и инструмент за дефокус од неспособноста да се однесуваат во согласнот со државните интереси

Македонија | пред 10 месеци

Европарламентот го изгласа извештајот за Македонија, македонскиот идентитет „исчезна“ од текстот

Со 461 глас „за“, 121 „против“ и 107 „воздржани“, Европскиот парламент денеска го усвои Извештајот за напредокот на Македонија за 2023 и 2024 година, изготвен од специјалниот известувач Томас Вајц, европратеник од Австрија.Документот ги опфаќа клучните реформи и предизвици на земјава на патот кон Европската Унија, но вниманието на јавноста го привлече фактот што во неговата конечна форма се отстранети сите конкретни референци на „македонскиот јазик и идентитет“, кои претходно беа присутни во нацрт-верзијата.Овој потег се оценува како резултат на компромисни преговори меѓу европратениците, а за некои претставува и отстапување од принципиелната поддршка на македонските национални обележја во европскиот контекст.Извештајот содржи препораки за натамошен напредок во владеењето на правото, борбата против корупцијата, реформата на јавната администрација и зајакнување на демократијата, но неговото „чистење“ од чувствителни термини отвора прашања за идниот тон на европскиот дискурс кон Македонија.

Свет | пред 10 месеци

Бојко Борисов подава рака на Македонија, Бугарија задоволна од усвоениот Извештај

Откако денеска беше усвоен Извештајот на Европскиот парламент за напредокот на Македонија без да се спомене во него македонскиот јазик и идентитет, официјална Софија веднаш изрази задоволство од документот.,,Со својата резолуција за извештајот за напредокот на Република Северна Македонија, Европскиот парламент не дозволи тој да биде инструментализиран за потребите на внатрешната политичка дебата на земја-кандидат“, коментираше министерот за надворешни работи Георг Георгиев.Реагираше и лидерот на ГЕРБ, Бојко Борисов.,Драго ми е што гласот на Бугарија беше слушнат.Повторно им подавам рака на нашите пријатели во Северна Македонија да продолжиме напред заедно, врз основа на почитување и спроведување на Договорот за пријателство и добрососедство. Во мене и во лицето на Бугарија, тие секогаш ќе имаат искрен и близок партнер”, изјави Борисов.

Македонија | пред 10 месеци

„Јас сум вистинска горда Македонка, а не лажна како резидентите во Скопје“ - изјава на грчка европратеничка пред гласањето на извештајот

На вчерашната пленарна дебата во Европскиот парламент, што ѝ претходеше на денешното гласање за Извештајот за напредокот на Македонија, грчката европратеничка Афродити Латинопули изнесе навредлива и провокативна реторика, негирајќи го македонскиот јазик и идентитет.„Јас сум вистинска горда Македонка, а не лажна како резидентите во Скопје“, изјави Латинопули од европската група на крајната десница (ECR), додека ги поддржуваше бугарските ставови за историјата, јазикот и националноста на македонскиот народ.Во нејзиниот говор, таа рече:„Дојдовме до точка каде што честа на Македонија и Грција ја бранат Бугарите. Нивната реакција е исправна бидејќи тие знаат дека моменталниот јазик во Скопје е бугарски дијалект и нивната националност е бугарска. Ако сакате мир и добри односи на Балканот, историјата мора да се обнови, инаку пристапот кон ЕУ нема да се случи ниту во нивните соништа. Македонија е една и таа е грчка.“Изјавата предизвика реакции и на социјалните мрежи, особено поради фактот што дојде во момент – токму во пресрет на денешното гласање за Извештајот за Македонија, кој беше усвоен со 461 глас „за“, 121 „против“ и 107 „воздржани“, но во финалната верзија од текстот беа отстранети референците на „македонскиот јазик и идентитет“.Овој развој на настаните дополнително ги отвори прашањата за рамнотежата меѓу политичкиот дијалог во Европскиот парламент и заштитата на националниот и културниот интегритет на земјите-кандидати, како што е Македонија.

Македонија | пред 10 месеци

(Видео) Страшна трагедија во Грција: Загинаа татко и син во судир со камион управуван од Македонец

Две лица – татко и неговиот 13-годишен син – го загубија животот во тешка сообраќајна несреќа што се случи во саботата попладне на стариот магистрален пат Солун – Верија, во близина на делницата меѓу Халкидони и Лудија. Според информациите на грчките медиуми, патнички автомобил со четиричлено семејство под сè уште неразјаснети околности се судрил со камион со македонски регистарски таблички.Несреќата се случила околу 16 часот. 44-годишниот возач на автомобилот починал на самото место, додека неговиот 13-годишен син им подлегнал на повредите кратко по судирот. Во возилото се наоѓале и 43-годишната мајка и нивниот 9-годишен син, кои со тешки повреди биле пренесени во болницата „Гениматас“ во Солун.Возачот на камионот, 34-годишен државјанин на Македонија, не е повреден во несреќата, но е уапсен веднаш по настанот. Против него е поведена истрага, а надлежните органи утврдуваат под кои околности дошло до фаталниот судир.Според роднини на настраданото семејство, тие се враќале од Солун кон своето село Пела кога се случила трагедијата. Веста ја потресе целата локална заедница, а семејството и пријателите се во шок од загубата.

Свет | пред 11 месец

(Видео) По 10 години поминати во Австралија, Ненад и Мариа Стојменови решија да се вратат во Стар Караорман - иднината ја планираат во Македонија

По цели 10 години поминати во Австралија, Ненад и Мариа Стојменови решија да го напуштат Мелбурн и да се вратат во татковината. Нивната нова адреса е штипското село Стар Караорман, каде, велат, конечно го пронајдоа тоа што им недостасувало – време за себе и за своите деца.„Таму беше трка со обврски, работа, смени, метеж… Немавме време ниту еден за друг, ниту за децата. Тука, конечно, живееме – не само што опстануваме“, велат Стојменови.

Македонија | пред 11 месец

Битка за идентитетот: Радев и Мицкоски во жесток судир по извештајот на ЕП за Македонија

Полемиката меѓу Скопје и Софија околу идентитетските прашања повторно се разгори, откако Комитетот за надворешни работи на Европскиот парламент (АФЕТ) го усвои извештајот за напредокот на Македонија, подготвен од европратеникот Томас Вајц. Извештајот, кој беше поддржан со 40 гласа „за“, 19 „против“ и 10 „воздржани“, веднаш предизвика реакции и на домашната и на бугарската политичка сцена.Бугарскиот претседател Румен Радев испрати остро писмо до европските институции, во кое го критикува Европскиот парламент поради, како што вели, неприфатливо вклучување во теми од „морална и научна природа“ како што се „јазик“ и „идентитет“, без правна надлежност. Тој предупреди дека Бугарија нема да прифати никакво отстапување од европскиот компромис од 2022 година, и истакна дека правата на Бугарите во Македонија не се предмет за политичко пазарење.– Претставува ризик тоа што се остава простор за слободни толкувања на поимите „македонски јазик“ и „идентитет“, што веќе го гледаме од нашите југозападни соседи – напиша Радев. Тој посочи и на, според него, нерегуларности во процесот на подготовка на извештајот, вклучително и неформални средби меѓу известувачот Вајц и македонски политичари.Паралелно, македонскиот премиер Христијан Мицкоски остро реагираше на обидите во Европскиот парламент да се наметне терминологијата „современ македонски јазик“ и „современ македонски идентитет“, појаснувајќи дека тоа не е само предлог на Европската народна партија, туку заеднички предлог на четири европски политички групи.– Во Брисел вчера видовме обид да се создаде нова нација и нов јазик – модерна македонска нација со модерен македонски јазик. Она што го обвинуваат дека Русија го прави во Украина, вчера се обидоа да го направат на македонскиот народ – изјави Мицкоски, истакнувајќи дека за него тоа не е мала победа, туку „големо разочарување“.Мицкоски порача дека Македонија нема да прифати никакви промени на својот идентитет и јазик и ја повика Бугарија да ги почитува човековите права на македонската заедница на нејзина територија, вклучително и спроведување на пресудите од Европскиот суд за човекови права во корист на организацијата ОМО Илинден Пирин.Тој најави продолжување на борбата и во пленарната седница на Европскиот парламент што ќе се одржи меѓу 7 и 11 јули, но предупреди дека „лицемерието“ на дел од европските политичари може да доведе до опасни паралели со руската политика на негирање на национален идентитет.– Македонија е подготвена за преговори, но само како Македонци, со македонски јазик и идентитет, не како некаква измислена нова нација – истакна Мицкоски.Во меѓувреме, Бугарија најави дека ќе достави „мислење на малцинството“ како дополнение на извештајот, а амандманот за вметнување на зборот „современ“ не беше ставен на гласање поради процедурални причини.Политичката и дипломатската борба околу идентитетските прашања продолжува, а исходот на пленарната седница во Европарламентот ќе биде следната клучна точка во овој сензитивен процес.

Македонија | пред 11 месец

(Видео) Драма на грчка плажа, медицинско лице од Србија спаси петгодишно дете од Македонија

Вистинска драма се одвивала на плажа во Грција во петокот. Четиригодишно девојче од Македонија имало срцев проблем.За среќа на плажата во Неа Врасна бил и медицинскиот техничар од Србија, Саша Костиќ кој со брза интервенција го спасил детето.За „Утро на Прва”, раскажува што се случило.Во моментите кога можела да се случи трагедијата бил на плажата со синот и видел како родителите го изнесуваат девојчето без свест. Му помогнала и колешка, докторка.„Видовме дека детето е во критична ситуација, дека моменти се во прашање.Веднаш почнавме со реанимација”, вели Костиќ.Кога стигнала брза помош, девојчето веќе било во свесна состојба.Тој вели не се размислувава тогаш, го оставил и своето тригодишно дете за да помогне.Родителите на малата Ирина се бескрајно благодарни за помошта која го спасила животот на нивното дете кое сега е во стабилна состојба и за неколку дена ќе излезе од болница.

Свет | пред 11 месец