Америка воведува ограничувања за патување за 18 ирански официјални лица

Соединетите Американски Држави најавија воведување визни ограничувања за 18 ирански официјални лица и водечки личности од телекомуникациската индустрија, во рамките на најновите мерки насочени против Техеран, соопшти Државниот департмент. Овој потег доаѓа во време кога односите меѓу Вашингтон и Техеран дополнително се заоструваат, додека паралелно се одвиваат нуклеарни преговори и се засилува американското воено присуство на Блискиот Исток.Американските официјални лица предупредуваат дека евентуален неуспех на дипломатијата би можел да доведе до голема воена операција, која, според порталот Axios, повеќе би личела на отворена војна отколку на ограничени удари како што беа забележани во претходни кризи. Советниците на Доналд Трамп истакнуваат дека претседателот сака да постигне договор, но црвените линии околу иранскиот нуклеарен програм засега остануваат непроменети.Во меѓувреме, американската војска интензивно ги распоредува силите во регионот. На Блискиот Исток се распоредени два носачи на авиони, повеќе воени бродови, дополнителни системи за противвоздушна одбрана и стотици борбени авиони, вклучувајќи F-35, F-22 и F-16, додека голем број транспортни летови доставиле оружје и опрема. Преговорите во Женева меѓу американските и иранските претставници траеја часови, но не донесоа значителен напредок, а Белата куќа му постави рок на Техеран за доставување детално предложение.Доколку дипломатијата не успее, во Вашингтон предупредуваат дека воената опција брзо би можела да стане приоритет.

Свет | пред 2 месеци

Милијардер пред Конгресот: Епстин ме измами и ми украде пари

Водечки демократи го зголемија притисокот пред сослушувањето на милијардерот Лес Векснер во Конгресот, тврдејќи дека тој поседува клучни информации за имотот и злосторствата на Џефри Епстин. Роберт Гарсија, претседател на Одборот за надзор на Претставничкиот дом, истакна дека Векснер бил одговорен за голем дел од богатството на Епстин и дека неговото сведочење може да помогне „да се стави крај на прикривањето“.Во писмената изјава до Конгресот, Векснер рече дека е „среќен што сведочи“ за да разјасни работите. Опишувајќи го односот со Епстин, го нарече „наивен и доверлив“ кон него, но нагласи дека не знаел за злосторствата на Епстин и не учествувал во нив. „Бев измамен од еден преварант светска класа“, напиша Векснер, додавајќи дека жалел што некогаш го запознал.Векснер објасни дека заради посветеноста на бизнисот морал да делегира управување со личните финансии, а на Епстин му ја доверил работата по предлог на Боб Мајстер во 80-тите. Односот завршил откако во 2006. Векснер дознал за правните проблеми на Епстин и неговите злоупотреби, а подоцна открил дека Епстин украл големи суми пари од семејството.Демократите остануваат сомничави. Гарсија рече дека Векснер бил „многу близок“ со Епстин и дека тие поминувале многу време заедно, додавајќи дека Епстин „не би бил толку богат без неговата поврзаност со Векснер“. Слично истакна и демократката Шонтел Браун, повикувајќи на „целосна транспарентност и директни одговори“.Меѓутоа, во Франција се отворија две нови истраги за Епстин, една за сексуално злоставување и една за финансиски злоупотреби, со повик до можни жртви да се пријават.

Свет | пред 2 месеци

Островот Капри воведува нови правила за организирани туристички групи

Островот Капри, едно од најпознатите туристички одредишта во Италија, се соочува со проблем со прекумерен туризам.За време на врвот на сезоната, на Капри дневно пристигнуваат и до 50.000 туристи. Ова повеќекратно го надминува бројот на постојани жители, кој изнесува околу 13.000 до 15.000.Локалната власт воведува нови правила за организирани туристички групи, кои ќе стапат на сила ова лето, со цел да се зачува мирната и ексклузивна атмосфера на островот.Иако Капри со децении е синоним за елеганција и мирен одмор, масовните дневни групи туристи го нарушуваат искуството и за посетителите и за локалното население.Островот уште во педесеттите години на минатиот век вовел правила за однесување на посетителите, вклучувајќи забрана за носење дрвени чевли и пуштање гласна музика.Денес најголем предизвик претставуваат организираните групи, кои често не се доволно тивки и добро организирани, преплавувајќи ги тесните улици и видиковците.Според новите прописи, групите ќе имаат ограничување на бројот на членови до 40 лица кои можат истовремено да слезат на островот. Групите со повеќе од 20 лица нема да смеат да користат разглас, а водичите мора да обезбедат слушалки за членовите на групата.Водичите смеат да користат само дискретен знак или табла за идентификација, додека чадори, знамиња и други впечатливи предмети се забранети. Групите мора да се движат во согласност и да не ја загрозуваат безбедноста и удобноста на другите посетители. Водичите се одговорни да не зафаќаат премногу простор.Жителите и туристичките оператори ја поздравија оваа мерка како чин на одговорност кој придонесува за поугоден живот на островот. Новите правила за организирани групи се сметаат за неопходни алатки за растеретување на критичните зони и за враќање на просторот на пешачките патеки.Овие мерки помагаат на сите посетители, а не само на ВИП гостите. Ограничувањето на бројот на членови на групите им овозможува на сите да уживаат во островот без гужви и непријатности.Градоначалникот додаде дека се работи и на контролирање на пристигнувањето на бродовите во пристаништето Марина Гранде, каде посетителите пристигнуваат пред да се упатат со жичара или автобус кон центарот на островот или кон помирниот Анакапри на западната страна.Капри станува пример како ексклузивната туристичка дестинација може да управува со масовниот туризам преку праведни мерки, штитејќи ја локалната заедница и квалитетот на искуството за туристите.

Магазин | пред 2 месеци

Николоски: Автопатот Прилеп - Битола се гради со силна динамика, започнуваме постапка за изградба на автопат и од Фариш до Прилеп и нова обиколница околу градот

Вицепремиерот и министер за транспорт Александар Николоски денеска од Прилеп најави три крупни инфраструктурни проекти за долгорочен развој за општината.Интенизивно се гради автопатот Прилеп - Битола, се започнува постапка за изградба и на нов автопат од Фариш до Прилеп, а во соработка со општината веќе се работи на план за изградба на обиколница, истакна вицепремиерот Николоски."Автопатот Прилеп - Битола се гради со засилена динамика и очекувам годинава да бидат поставени и првите километри асфалт.Второ, градоначалникот амбициозно работи на проектна програма, со цел да се направи обиколница на градот, за тешките возила да не влегуваат во градот, нешто што е ветувано децении наназад. Тој е прв што е решен да прави ваква програма и еве да дадам ветување дека ние како Влада ќе го финансираме целокупно овој проект и овој проект ќе биде реализиран во рамки на неговиот мандат.И трето, во интензивни преговори сме, мислам дека во следните месец до месец и пол ќе видите и активности во Собранието, за она што го ветив, а тоа е од Фариш до Прилеп исто така да одиме со автопатско решение, како Прилеп од двете страни би бил поврзан со автопат", изјави заменик претседателот на Владата, Александар Николоски.На одбележувањето на настанот 100 дена локална власт во Прилеп, вицепремиерот истака дека Владата овозможува сериозна подршка за општината и градоначалникот Проданоски, во насока на економски и инфраструктурен развој на градот."Сакам да му честитам на градоначалникот за успешната работа во овие 100 дена. Таа работа се гледа во сите делови од градот, 100 дена е навистина краток период но може да се види каде ќе се развива општината во следниве четири години и убeден сум дека ова ќе е исклучително успешен мандат. Ние како Влада ќе продолжиме со подршката која што ја дававме во изминатиот период, дали се работи за средства кои директно се префрлаат од буџетот кон општината за да може да реализира инфраструктурни проекти, дали се работи за подршка на стопанството или земјоделието, сето она што сме го ветиле на најдобар можен начин ќе се обидеме да го реализираме" изјави вицепремиерот Николоски.

Македонија | пред 2 месеци

Четворица Јеховини сведоци во Русија осудени на затвор

Четворица Јеховини сведоци минатата недела во Русија добија затворски казни за „екстремистичка дејност“, врз основа на тајно снимени видеа од нивните молитвени состаноци. Од 2017 година, кога Русија ја забрани организацијата, околу 220 членови се затворени.Во првиот случај, во Биробиджан, 61-годишниот Олег Постников доби шест години и два месеца затвор. Тој изјави дека снимките го прикажуваат само нормалното одржување на молитви и барање сила за издржување на прогон, без повици за насилство.Во вториот случај, во Твер, Валериј Толмазов (71), Александар Костјук (53) и Максим Барбазјук (43) добија по шест години затвор. Јаррод Лопес од седиштето на Јеховините сведоци во Њујорк истакна дека тајните агенти длабоко се инфилтрирале во заедниците и селективно ја предавале материјата на истражителите, што ја нагласува контроверзноста на пресудите.

Свет | пред 2 месеци

Клучниот воен проект на ЕУ се претвори во спор за моќ

Европските земји по воени трошоци ги надминаа Русија и Кина, но нивните напори се блокирани од национални интереси и фрагментирана индустрија. Проектот за борбениот авион FCAS, кој го водат Франција, Германија и Шпанија, требаше да создаде авион шеста генерација со вештачка интелигенција и дронови во рој, но се претвори во спор меѓу францускиот Дасо и германско-европскиот Аирбас.Проблемот со проектот ја покажува ширината на фрагментираната европска одбрана: националните компании добиваат предност, што води до високи трошоци, непостандардизирани системи и мал удел за заеднички истражувања. Некои проекти, како британско-италијанско-японскиот авион и развојот на тенкови и проектили, успеваат, но FCAS останува симбол на конфликтот меѓу амбиции и соработка.

Свет | пред 2 месеци

Вучиќ: Пленковиќ ми рече дека воениот сојуз не е насочен против Србија

Српскиот претседател Александар Вучиќ од Њу Делхи, каде што учествува на четвртиот глобален самит за вештачка интелигенција, изјави дека имал низа важни средби со европски лидери и дека Србија мора да продолжи со напорите за економски раст и стабилност.Тој откри дека разговарал 45 минути со францускиот претседател Емануел Макрон за клучните прашања во Европа, европскиот пат на Србија и актуелната геополитичка состојба. Дополнително, како што наведе, имал долг разговор и со хрватскиот премиер Андреј Пленковиќ, при што станало збор и за воениот сојуз меѓу Загреб, Тирана и Приштина. Според Вучиќ, Пленковиќ нагласил дека тој сојуз не е насочен против Србија.Најдолг разговор, како што посочи, имал со словачкиот претседател Петер Пелегрини.Осврнувајќи се на економската состојба, Вучиќ изјави дека инфлацијата во јануари изнесувала 2,4 проценти и дека е под контрола, односно на ниво што го бара Европа. Додаде дека стапката на раст ќе зависи од ангажманот и работата во наредниот период, порачувајќи дека „ќе мора да се трудат и да се борат“.Говорејќи за инцидентите за време на протестите во Нови Сад, тој ги обвини демонстрантите дека се обиделе да го нарушат секој српски празник и дека нападнале и на Матица српска. Според него, полицијата интервенирала против лица кои рушеле ограда и се однесувале криминално.Вучиќ изјави и дека сè уште нема донесено одлука дали ќе помилува човек кој удрил учесник во блокада, додавајќи дека институциите треба да одговорат кој бил санкциониран за претходните насилни инциденти.На крајот, тој нагласи дека претстојниот ден е важен за претставувањето на Србија, посочувајќи дека индискиот Си-Ен-Ен емитувал 15-минутно интервју со него во ударен термин, што го оцени како значаен успех за земјата.

Свет | пред 2 месеци

Хашим Тачи ги кажа последните зборови пред судот во Хаг

Со завршните зборови на Хашим Тачи, Кадри Весељи, Реџеп Селими и Јакуп Красниќи пред Специјализираните совети во Хаг заврши оваа фаза од судскиот процес против поранешните лидери на ОВК, обвинети за воени злосторства и злосторства против човештвото извршени во 1998 и 1999 година во Косово и северна Албанија.Тачи во своето обраќање истакна дека е „целосно невин“ и побара ослободителна пресуда по сите точки од обвинението. Тој нагласи дека обвиненијата не стојат и дека единствениот противник во тоа време бил режимот на Слободан Милошевиќ, кого го обвини за започнување на војната и за план за истребување на Албанците во Косово.Според обвинението, четворицата се товарат дека имале клучна улога во заеднички злосторнички потфат и ефективна контрола врз единиците на теренот, при што во повеќе од 40 притворни центри биле извршени злосторства врз Срби, Роми и Албанци означени како „соработници“. Обвинителството побара секој од обвинетите да биде осуден на по 45 години затвор.Одбраната, пак, побара ослободителна пресуда, тврдејќи дека вината не е докажана. Весељи изјави дека неговите постапки биле хумани и законити, додека Селими и Красниќи негираа командна одговорност за делата наведени во обвинението.Тачи во својот говор посочи дека во пролетта 1998 година се вратил од Швајцарија во Косово затоа што, како што рече, не можел да остане настрана додека неговото семејство и народ се соочувале со насилство. Тој подвлече дека ОВК не била држава, туку организација која се бранела од агресија, додавајќи дека соработката со НАТО и САД била клучна за исходот на војната и за независноста на Косово.По завршувањето на оваа фаза, предметот е испратен до судискиот совет. Според процедурите, судот има рок од 90 дена да ја донесе пресудата, со можност за продолжување од дополнителни 60 дена, што значи дека конечната одлука се очекува најдоцна до летото 2026 година.

Свет | пред 2 месеци

Уапсени двајца српски државјани во Илок со лажни германски и хрватски лични карти

Двајца државјани на Србија, на возраст од 28 и 26 години, се уапсени во Илок откако полицијата утврдила дека користеле фалсификувани германски и хрватски лични карти, соопшти Полиција на Вуковарско-сремската жупанија.Полициски службеници од Граничната полициска станица во Илок вчера во утринските часови извршиле контрола врз двајцата мажи, при што се посомневале во веродостојноста на документите што им биле приложени. Тие биле приведени во службени простории заради спроведување криминалистичка истрага поради сомнение за фалсификување исправи, како и за утврдување на законитоста на нивниот влез и престој во Хрватска.Со истрагата било потврдено дека личните карти се фалсификувани и дека станува збор за државјани на Србија по кои во Шенгенскиот информативен систем биле издадени предупредувања за забрана за влез во земјите од Европскиот економски простор. Поради таа забрана, како што утврдила полицијата, тие претходно нелегално ја преминале државната граница од Србија во Хрватска, надвор од официјален граничен премин.По завршување на истрагата, осомничените денеска се предадени на притворски надзорник, а против нив до надлежното државно обвинителство е поднесена кривична пријава.

Свет | пред 2 месеци

(Видео) Мистериозно се најавува „нешто што нема да биде незабележано“ за девет дена, поврзано со Усје

Граѓанската иницијатива „Стоп за Усје“ денеска реализираше герила-акција со која најави дека „на 27 февруари, нешто големо се подготвува“.Акцијата се одржа на пешачкиот премин на раскрсницата кај „Нова Македонија“, каде активистите со транспаренти и диџеј-музика организираа симболична „забава“ на јавен простор, со цел да привлечат внимание кон, како што наведуваат, проблемот со загадувањето.Преку веб-страницата што ја промовираа за време на настанот, од иницијативата ги повикуваат сите заинтересирани граѓани да се приклучат во најавената акција на 27 февруари. Засега не се објавени детали за форматот и содржината на настанот, освен пораката дека станува збор за поголема мобилизација поврзана со нивната кампања.Од иницијативата претходно најавуваа дека ќе продолжат со јавни активности и притисок кон институциите во врска со работењето на цементарницата „Усје“ и мерките за следење на квалитетот на воздухот.Од упавата на „Усје“ пак во повеќе наврати посочија дека постојано прават мерења и дека не се надминати параметрите на загаденост кои се утврдени со законите.

Скопје | пред 2 месеци

(Фото) Ветрот од корен откорна дрво кое падна над автомобили и пешачка патека во Аеродром

Големо дрво паднало пред зграда на булевар „АСНОМ“ број 4, пред влез 1, во населбата Аеродром, во близина на „Три бисери“, информира жителка од овој дел на општината.Според нејзините фотографии, дрвото паднало зад зградата и поради својата големина се протега во два приватни двора, од кои едниот е на приземје од страната кон реката Вардар. Дел од гранките висат и над пешачката патека, што претставува потенцијална опасност за минувачите.Жителите посочуваат дека гранките биле искастрени, но стеблото и останатиот дел од дрвото се оставени пред зградата и во дворовите, без да бидат целосно отстранети.Непознато е дали надлежните можат да постапат, со оглед дка дека тоа е дел од дворот на зградата.

Скопје | пред 2 месеци

Вработена во продавница кај Обровац осомничена дека украла повеќе од 30.000 евра

Полицијата во Задар поднесе кривична пријава против 24-годишна вработена во продавница на подрачјето на Обровац, под сомнение дека во периодот од април до септември минатата година проневерила повеќе од 30.000 евра, задржувајќи за себе делови од дневните пазари.Според наводите на полицијата, осомничената систематски го присвојувала паричниот износ што ѝ бил доверен како вработена, така што наместо да го уплати целокупниот дневен промет, задржувала дел од средствата. Незаконските дејствија, како што е утврдено со криминалистичката истрага, траеле шест месеци, од почетокот на април до крајот на септември 2023 година.Со тоа е предизвикана материјална штета на трговско друштво со седиште во сплитското подрачје. По завршувањето на истрагата, против осомничената е поднесена кривична пријава до надлежното Општинско државно обвинителство во Задар.

Свет | пред 2 месеци

Стојаноска: СДСМ нека ги вратат украдените пари ако сакаат минимална плата

Пратеничката на ВМРО-ДПМНЕ, Дафина Стојаноска, со остри обвинувања реагираше на повиците од СДСМ за обезбедување средства за зголемување на минималната плата, наведувајќи дека парите треба да се обезбедат преку враќање на, како што рече, „испокраденото“ во периодот на нивното седумгодишно владеење.Според Стојаноска, доколку СДСМ самите не ги вратат средствата, тоа ќе се случи преку судски процеси, заедно со, како што посочи, казни затвор. Таа додаде дека, доколку во Буџетот се пронајдат средства за кои опозицијата зборува, тие веднаш би биле пренаменети за хуманитарни цели.Во својата изјава, Стојаноска алудираше дека средствата за минималната плата „може веднаш да се најдат“, наведувајќи локации како делови на Водно, Дубаи и Струмица, со што упати политички обвинувања кон поединци од редовите на СДСМ.Изјавата доаѓа во контекст на засилената политичка дебата околу минималната плата и буџетските приоритети. ССМ бара минималната плата да биде 600 евра.

Македонија | пред 2 месеци

Јапонија вложува 36 милијарди долари во американски проекти за нафта, гас и минерали

Јапонија најави инвестиции од околу 36 милијарди долари во американски проекти за нафта, гас и клучни минерали, како прв бран договори со администрацијата на Доналд Трамп. Договорот го објавија Трамп и јапонската премиерка Санае Такаичи, со цел зајакнување на економската безбедност и намалување на зависноста од Кина. Најголемиот проект е гасна електрана во Портсмут, Охајо, која се најавува како најголема во историјата на САД, со капацитет од 9,2 гигавати годишно. Со неа ќе управува компанијата SB Energy, подружница на јапонската групација СофтБанк груп. Предвидени се и вложувања во терминал за извоз на сурова нафта во Тексас и во фабрика за синтетички индустриски дијаманти.Проектите се дел од поширок пакет од 550 милијарди долари што Јапонија се обврза да ги инвестира според трговскиот договор со САД, во замена за намалување на американските царини за јапонските производи, вклучително и автомобилите. Фабриката за индустриски дијаманти во Џорџија, вредна околу 600 милиони долари, треба да обезбеди американска самостојност во клучен материјал за напредно производство и полупроводници. Трамп изјави дека со тоа ќе се намали зависноста од странски извори, пред сè од Кина, која доминира во производството и преработката на ретки метали.Американскиот министер за трговија Хауард Латник истакна дека Јапонија обезбедува капитал, а САД добиваат стратешка инфраструктура и засилена енергетска позиција.Договорот доаѓа во период на тензии меѓу Токио и Пекинг околу Тајван. И покрај тоа, Јапонија објави раст на извозот од речиси 17 проценти во јануари, делумно благодарение на зголемената трговија со Кина, додека Трамп порача дека „огромниот трговски договор со Јапонија стапи во сила“.

Свет | пред 2 месеци

Муцунски: Македонија останува целосно посветена на реализација на Коридорот VIII

Денеска, во Тирана, на покана на министерката за Европа и надворешни работи на Република Албанија, Елиса Спиропали, министерот за надворешни работи и надворешна трговија, Тимчо Муцунски, заедно со колегите од Италија, Бугарија и Романија, учествуваше на Министерскиот состанок „Коридор VIII во стратешкиот момент на Европа: Поврзаност, отпорност преку воена мобилност и споделен просперитет преку интеграција“. Состанокот се реализираше како продолжение на инаугуративната сесија одржана во Бриндизи, Италија, на 27 јули 2023 година. Во фокусот на разговорите беа актуелните инфраструктурни проекти што се операционализираат долж Коридор VIII, предизвиците во нивната реализација, како и потребата од засилено политичко внимание и координација.Министрите констатираа дека постои заедничко разбирање оти Коридор VIII треба да функционира како еден прекуграничен систем, а не како серија одвоени национални проекти што запираат на следната државна граница. Беше нагласено дека коридорот претставува стратешка врска меѓу Јадранското и Црното Море и дека во актуелниот геополитички контекст поврзаноста претставува елемент на отпорност и сила. Во своето обраќање, министерот Муцунски ја истакна важноста од целосно вклучување на сите клучни актери, нагласувајќи дека улогата на Италија како значаен фактор на Јадранот и на Романија како клучна држава на Црното Море и во регионалната економија е суштинска за Коридор VIII да стане вистинска европска врска од почеток до крај. Осврнувајќи се на националните обврски, Муцунски потенцираше дека државата, како централна точка на коридорот, останува целосно посветена на неговата реализација. Како значаен исчекор беше посочено потпишувањето на договорот со Бугарија за прекуграничниот железнички тунел во ноември 2025 година. Првата железничка делница на источниот дел е завршена, втората е во изградба, а работите напредуваат и на третата. Во патниот сегмент, целта е целосна автопатска и експресна поврзаност од Ќафасан до Деве Баир до 2029 година. Дополнително, беше истакната и енергетската димензија на коридорот, како и потребата од усогласување на процедурите, граничното управување и олеснувањето на трговијата, со цел новата инфраструктура да биде придружена со модерни и ефикасни стандарди. Посебен акцент беше ставен на искористување на европските финансиски инструменти, вклучително и следната програма „Connecting Europe Facility“, за забрзување на имплементацијата и обезбедување конкретни придобивки за граѓаните и бизнисите. Соговорниците се согласија дека фокусот во наредниот период треба да биде на реализација на финансиски одржливи проекти, координирана прекугранична имплементација и одржување на еднаков интензитет на реализација долж целата траса на Коридор VIII.

Македонија | пред 2 месеци

Шанса за Центар: Вакво чудовиште градот не видел, Советот утре одлучува за поранешната Печатница

Граѓанската иницијатива Шанса за Центар објави дека за локацијата на поранешната Печатница на Нова Македонија утре ќе се одлучува на Седницата на Советот на Општина Центар.„Вакво чудовиште градот не видел, но општината не смогна сили да направи ново решение туку со ʼкорекцииʼ се обидува да го „дотера“. Се смета за грешка една линија која недостасува во планот, ама не е грешка целиот концепт на развој на овој простор. Дали со сите сознанија и искуства во 2026 мора да спроведуваме одлуки од 2012 година?Планерот ТАЈФА ПЛАН го повикуваме јавно да го образложи решението со кое:Површината за градба е 105.000m2, на основа од 5.200 m2 .Согласно правилникот за урбанистичко планирање за таа површина со деловна намена потребни се 1.750 паркинг места, мои може да се обезбедат само со 10 подземни нивоа.Коефициентот на искористеност е k= 17, иако за сите околни градби е 4 или 5Пристапниот пат до влезот за гаражата е залепен до постојните стари објекти без можност за тротоар.Нели урбанистичкото планирање треба да обезбеди уставно загарантирана заштита на јавниот интерес“, велат од Шанса за Центар.

Скопје | пред 2 месеци

Со 63 гласа „за“, Гоце Наумовски назначен за нов уставен судија

Професорот од Правниот факултет Гоце Наумовски кој му беше советник на премиерот Христијан Мицкоски на собраниска седница со 63 гласа „за“ е избран за нов судија на Уставниот суд. Против беа седум, а немаше воздржани.Наумовски се најде на списокот на советници на Владата кој беше објавен во јануари минатата година, а како што пишуваше, тој го советувал премиерот за прашања од областа на правото.Тој е редовен професор на катедрата Римско право и предава неколку предмети, Римско право, Право и информатичка технологија, Право на трговски марки и географски називи; Патентно право, Спортско право, Реторика, Интелектуална сопственост, Правна реторика и аргументација.Тој треба да дојде на местото на судијката Јадранка Дабовиќ-Анастасовска, која во декември поднесе оставка од функцијата судија на Уставниот суд. Оставката, како што информираат од Уставниот суд, е поднесена поради здравствени и лични причини.

Македонија | пред 2 месеци

Мицкоски за истрагата за 40 тони марихуана: Се зголемува бројот на лица коишто се замешани

Премиерот Христијан Мицкоски денеска на прес-конференција изјави дека истрагата за случајот со запленетите 40 тони марихуана се проширува, се откриваат нови аспекти и се зголемува бројот на лица вклучени во случајот.„Не би рекол дека нема никој приведен, но да бидеме трпеливи. Да, сега за сега, тоа што е потребно да го споделиме со јавноста, го споделуваме, сепак станува збор за огромна количина, не се наoѓаат секој ден 40 тона марихуана, којшто се резултат на последиците на една несреќна влада, којашто, освен тоа што ја ограбувше државата, својата економска политика ја темелеше на производство на дрога и ја распродаваше државата пред се нејзиниотѕ национален интерес. Е, сега, ние се справуваме со тие остатоци од едно такво несреќно владеење, седум години. Дел од на тоа несреќно управување со владата е и ова што вие го споменавте, овој случај, но да почекаме, ќе споделиме многу брзо со јавноста, како е, што е, кој е, каде е и така натаму, бидејќи се отвараат нови аспекти, нови перспективи, се зголемува бројот на лица коишто се замешани, се отворат нови позиции, нови агли на тоа што се набљудува во целата оваа истрага, така да бидеме трпеливи. Министерството за натрешни работи покажа дека е прилично транспарентно, така што верувајте дека ќе ве информира“, изјави Мицкоски.

Македонија | пред 2 месеци

Костадиновска-Стојчевска ја повика Јаневска да го повлече предлог-законот за високо образование

Пратеничката на СДСМ, Бисера Костадиновска-Стојчевска, на денешната собраниска седница упати прашање до министерката за образование, Весна Јаневска, кое се однесуваше на предлог законот за високо образование и последиците од неговите решенија врз автономијата на универзитетите, квалитетот на образованието и можностите за развој на студентите и академскиот кадар.  Таа се осврна на реакциите од академската заедница кои предупредуваат дека законот премногу ја централизира контролата, се фокусира на процедура и административни прашања, а не ги решава суштинските проблеми како финансии, одлив на млади кадри и слабата поврзаност со пазарот на труд.Во продолжение е интегралното обраќање на Костадиновска-Стојчевска:Министерке,Квалитетот во високото образование мора да биде највисок приоритет не само на надлежниот министер и на владата туку и на сите вклучени во тој степен на образование. И затоа секое законско решение кое го регулира  високото образование мора редовно да се осовременува, но тој процес мора да ги вклучува сите чинители и да се сослушаат сите страни.Откако беше објавен на ЕНЕР предлог законот за високо образование, не стивнуваат реакциите. Дозволете да прочитам неколку од нив:-Закон за високо образование: Борба меѓу универзитетската автономија и политички агенди-Создавањето на нов наставно-научен кадар ќе стане екстремно тешко и -практично невозможно.Усвојувањето на овој Закон би донело далекусежни последици односно „ старомодни, неатрактивни и тесно специјални наставни програми кои не соодветствуваат со реалноста и потребите на пазарот на труд во земјата и светот“.-Европските искуства се прилично јасни: силни универзитети се градат врз реална институционална самоуправа, стабилно финансирање и доверба во академската заедница, а не врз централизирана контрола и административни механизми. Автономијата не е формула во закон, туку начин на функционирање на системот-повторно менување на телата и процедурите, без да се решат суштинските проблеми, ризикуваме да добиеме уште една нормативна реформа без реален ефект врз квалитетот-Наместо стабилен академски развој, системот повторно се враќа во состојба на нормативна транзиција. Системот е за студентот, а не студентот за системот. Ако студентот не почувствува разлика, реформата не успеала“-Фамозниот h-index не е дефинирано ни за кој h-index се работи, иако го има и на WoS, Scopus, google scholar, а притоа не зависи од самиот професор, туку од бројот на цитирања во рамки на една база, на слободен избор на оние кои пишуваат.-законот премногу се фокусира на процедура, а недоволно на суштинските проблеми: недоволното финансирање на научни истражувања, политизацијата на универзитетите, одливот на млади кадри и слабата поврзаност меѓу образованието и пазарот на труд. Без реална поддршка за научно-истражувачка работа и подобрување на статусот на професорите и соработниците, секоја законска промена може да остане „реформа на хартија“.-Во предложениот закон зборот „влада“ се споменува триесет пати, зборот „министерство“ четириесет и два пати, а „министер“ четириесет и четири пати.Се разбира, во сите примери станува збор за моќ што им се дава на овие „именки“ да одлучуваат за прашања за кои во нормалниот свет одлучува академската заедница. Владата и министерот назначуваат членови на Национален совет, на Агенција за квалитет, на одбори и комисии, одлучуваат за буџети, одобруваат вработувања, статути на факултети, датуми на конкурси и уписи, се мешаат каде што треба и не треба, прават севозможни големи и мали нешта… Автономија на универзитетот, што беше тоа?Министерке, дали сметате дека овој предлог навистина ги опфаќа сите профили кои студираат на нашите високо образовни институции?Дали суштински се решаваат проблемите  со тоа што се скратуваат можностите на младите да останат да работата на некоја високообразовна институција?Дали сметате дека предлог законот НЕ дискриминира? Дали сте подготвени да ги сослушате СИТЕ страни? Дали сметате дека закон за високо образование треба да се донесе со сила, со инает, а повторно да останат можностите за “диплома на секое ќоше”? дали сметате дека со вака поставени нешта во високото образование, нема да се продлабочи проблемот со неквалитетните дипломи- додипломски, магистерски, докторски- кои одамна се навлезени во општеството и тие се тие против кои всушност се бориме?На крај, дали ќе го повлечете законот и ќе пристапите кон изработка на нов предлог закон?

Македонија | пред 2 месеци

Трипуновски: Зголемување од 15% на откупот и продажбата на земјоделски производи во последното тримесечје, споредбено со лани

„Минатата година, следејќи ги сите тримесечја во споредба со 2024 година, и последниот извештај потврди позитивни трендови во земјоделството. Според официјалните податоци, откупот и продажбата на земјоделските производи во последното тримесечје изнесуваат 12,5 милијарди денари, што претставува раст од 15% во однос на истиот период од 2024 година“, истакна министерот за земјоделство, шумарство и водостопанство, Цветан Трипуновски од Струмица. Тој додаде дека растот не се однесува само на откупните и продажните цени, туку и на зголемениот квантитет на земјоделски производи. „Според табелите објавени од Државниот завод за статистика, речиси кај сите земјоделски производи се бележи зголемување на количините. Особено се издвојуваат грозјето, пченицата и јаболката, како и производството во сточарството, особено во свињарството, овчарството и производството на говедско месо“, појасни министерот Трипуновски. Тој додаде дека зголемувањето на количините е забележано и кај останатите земјоделски култури, што претставува значаен показател дека 2025 година може да се оцени како успешна, со зголемен интензитет и на откупот и на извозот на земјоделски производи.

Македонија | пред 2 месеци

МВР доби донација од САД: Најсовремена опрема за единицата за експлозиви

Во рамки на денешните активности во кругот на Министерството за внатрешни работи, министерот Панче Тошковски присуствувше на предавањето на донација од Амбасадата на САД – најсовремена опрема за Единицата за откривање и демонтирање на експлозивни средства.„Оваа донација, вредна околу еден милион евра е уште една потврда за силното стратешко партнерство и пријателството меѓу Македонија и Соединетите Американски Држави. Со оваа високософистицирана опрема која се состои од роботи, бомбашки одела, телескопски манипулативни раце, детектори и рендген уреди за откривање експлозивни средства, фибер-оптички камери, како и специјализирано возило за транспорт, директно вложуваме во заштита на човечки животи и во безбедноста на нашите полициски службеници кои се справуваат со најсложени задачи.Упатувам искрена благодарност до Амбасадата на САД за континуираната поддршка, обуките и довербата што ја даваат на македонската полиција. Продолжуваме заедно да ги јакнеме капацитетите на МВР и да градиме посигурна и побезбедна држава“, вели Тошковски.

Македонија | пред 2 месеци

Минчев: Одговорност, мерит и јасни правила за високото раководство во администрацијата

Министерот за јавна администрација Горан Минчев денеска се обрати на јавната расправа во рамки на Комисијата за политички систем при Собранието на Република Македонија, посветена на Предлог-законот за високата раководна служба во органите на државната управа и фондовите.Во своето обраќање, министерот Минчев истакна дека реформата на високата раководна служба претставува клучен сегмент од сеопфатната реформа на јавната администрација и дел од пошироката реформска агенда насочена кон изградба на професионална, стабилна и отчетна државна администрација.„Реформата на високата раководна служба не е техничка интервенција во законодавството. Таа е политичка одлука од највисок ранг и одраз на државничка зрелост и одговорност“ нагласи министерот, додавајќи дека начинот на уредување на највисоките управувачки позиции директно влијае врз квалитетот на владеењето, стабилноста на институциите и довербата на граѓаните.Министерот посочи дека со предложеното законско решение првпат се воспоставува кохерентна и унифицирана рамка за именување, мандат, оценување и разрешување на високите раководители, вклучително и директорите, државните секретари, замениците и членовите на управните одбори.„Принципот на мерит, кој со години го споменувавме во декларативна форма, со овој закон станува системско правило. Воведуваме појасни критериуми, јавен повик, структурирана селекција и рангирање, со јасна обврска процесот да биде транспарентен и сеопфатен“ истакна Минчев.Во однос на улогата на извршната власт во процесот на избор, министерот нагласи дека задржувањето на конечната одлука кај Владата е во согласност со уставниот поредок и принципот на политичка одговорност.„Во парламентарна демократија, одговорноста не може да биде апстрактна. Таа мора да има јасен носител. Ова не е отстапување од мерит-системот, туку негово институционално усогласување со демократската легитимност“ посочи министерот.Посебен акцент беше ставен и на реформата на управните одбори, со намалување на нивниот состав на три члена, како и на ограничувањето на институтот „вршител на должност“ кој со новото законско решение станува строго временски ограничен механизам.„Овој закон не создава привилегии, туку поставува одговорности. Тој не концентрира моќ без контрола, туку ја поврзува моќта со отчетност и резултати“ истакна министерот, додавајќи дека целта е воспоставување функционална држава во која секој носител на одлуки јасно знае како е именуван и пред кого одговара.

Македонија | пред 2 месеци

Први притвори во Македонија за запленетата мархуана во Србија: уапсени две лица

По предлог на јавен обвинител од Основното јавно обвинителство за гонење на организиран криминал и корупција, вчера на две лица, кои претходно беа сослушани во својство на осомничени, судијата на претходна постапка при Основниот кривичен суд Скопје им определи мерка краткотраен притвор во траење од 48 часа.„Како резултат на преземените дејствија и анализата на прибраните информации и докази, постојат основи на сомнение дека лицата преземале активности поврзани со запленетите 5 тони марихуана во Република Србија, поради што јавниот обвинител достави образложен предлог за определување краткотраен притвор.Барањето за определување на краткотрајниот притвор е со цел обезбедување на лицата и овозможување на доволно време на јавниот обвинител за преземање на неопходните процесни дејствија и донесување соодветна одлука за понатамошно постапување. Во вакви случаи, особено кога се работи за предмети со поголема сложеност, како и предмети со меѓународен карактер, временските рокови често се ограничени, што ја оправдува примената на оваа мерка.Основното јавно обвинителство за гонење на организиран криминал и корупција продолжува со интензивно постапување во предметот и јавноста ќе биде навремено информирана за понатамошниот тек, согласно законските можности“, велат од обвинителството.

Македонија | пред 2 месеци

Јовановски повикува граѓаните да ги пријават штетите од поплавите во Кичево

Градоначалникот на општина Кичево, Д-р Александар Јовановски ги повика сите граѓани кои претрпеле штета на објекти, предмети или добра во домаќинствата и деловните субјекти да ја пријават штетата.„Во периодот на поплавите што ја зафатија територијата на град Кичево на 14-ти и 15-ти февруари 2026 година, брзата поддршка и солидарноста се од клучно значење за помош на погодените граѓани.За подобрување на условите и обезбедување на подостоинствено сместување на лицата привремено сместени во спортската сала „Христо Узунов“, Општина Кичево, во координација со Генералштабот на АРМ и касарната „Чеде Филиповски-Даме“, овозможи мобилна бања за туширање. Ова вклучува две цистерни, мобилна бања со пресоблекувална и техничко возило со бојлери за обезбедување топла вода.Општина Кичево изразува искрена благодарност до Генералштабот на АРМ за брзата и несебична помош, која значително го олеснува справувањето со последиците од поплавата.Исто така, Општина Кичево ги повикува сите граѓани и правни лица кои претрпеле штета на објекти, предмети или добра во домаќинствата и деловните субјекти да ја пријават штетата. Барањата и сите потребни информации за пријавување на штета може да се подигнат во Архивата на Општина Кичево или да се преземат од веб-страницата“, вели Јовановски.

Македонија | пред 2 месеци

Фатени шест возачи без возачка дозвола, со активна забрана и под дејство на алкохол

Во текот на вчерашниот ден, полициски службеници на целата територија на државата лишија од слобода шест возачи, од кои четири за возење без возачка дозвола, еден со забрана за управување возило од Б категорија и еден под дејство на алкохол.По еден возач во прилепско – малолетник и тројца возачи од тетовско управувале возило без возачка дозвола. Еден возач во Скопје управувал возило иако имал мерка забрана за управување моторно возило од Б категорија и 37-годишна жена управувала возило под дејство на алкохол. Лицата се приведени во полициска станица, а по целосно документирање на случаите ќе бидат поднесени соодветни кривични пријави.Апелираме до сите учесници во сообраќајот да ги почитуваат сообраќајните правила и прописи, да не управуваат возило без положен возачки испит или доколку имаат изречена мерка за забрана за управување или доколку се под дејство на алкохол и сите заеднички да придонесеме за побезбеден сообраќај.

Македонија | пред 2 месеци