(Видео) Прошетка покрај Вардар, чист град и нови ветувања: Луна Паркот конечно добива зелено светло, најави Ѓорѓиевски

Синоќа премиерот Христијан Мицкоски и градоначалникот на Скопје Орце Ѓорѓиевски направија ненадејна вечерна прошетка низ центарот на градот, за да видат како изгледа главниот град по најновото големо миење на улиците и кејот на Вардар. Според градоначалникот, резултатот бил „видлив од прв поглед“.Ѓорѓиевски истакна дека главните градски зони, плоштадите и кејот биле полни со луѓе, чисти и уредени, што – како што рече – е слика која, според него, треба да биде секојдневие, а не исклучок. „Скопје изгледа како вистинска метропола“, нагласи тој.Дел од обиколката била и локацијата предвидена за долгоочекуваниот Луна Парк. Ѓорѓиевски најави дека постапката за реализација ќе започне многу скоро, откако подолго време проектот стои во место.„Поминавме низ плоштадот и Градскиот парк – сè беше уредено како што доликува на Скопје. Бевме и кај локацијата на Луна Паркот, за кој се подготвуваат потребните процедури,“ додаде градоначалникот.Ѓорѓиевски откри и дека градот ќе добие донација од 9 милиони денари од една турска општина, средства кои ќе бидат наменети за комплетно осветлување на Камениот мост. За проектот се чека зелено светло од министерот за култура и туризам Зоран Љутков.Во своето обраќање тој се осврна и на проблемот со контејнерите, велејќи дека честите дефекти им создаваат големи трошоци за поправки.

Скопје | пред 5 месеци

(Видео) Јанков од Левица: Скопјани ќе платат 40 милиони дури и да нема снег

Советникот од Левица, Андреа Јанков, на седницата на Советот на Град Скопје предупреди дека предложената Програма за зимско одржување на магистралните и собирните улици за 2025 и 2026 година содржи сериозни нелогичности и финансиски ризици по градскиот буџет.Имено, во програмата се појавува измислен параметар од 4,8 ефективни часа, кој не постои во ниту еден технички стандард и овозможува да се плаќа механизација дури и во услови кога нема би немало снег. Овој модел, како што истакна тој, ќе доведе до трошење на 40 милиони денари за неактивност.Предвидената механизација е недоволна, исто како и количината на сол и не би издржала ни до половина зима.Дополнителен проблем претставува и ангажманот на приватни фирми, кој е опишан без наведени имиња, цени или конкретни обврски, што претставува неприфатливо ниво на непрецизност за документ што треба да гарантира јавна безбедност, па оттука Програмата не нуди безбедност, туку претставува само декларативен текст.Поради овие недостатоци, советничката група на Левица гласаше против програмата, оценувајќи ја како нелогична, паушална и ризична за граѓаните и буџетот на Град Скопје.

Скопје | пред 5 месеци

Во скопски трговски центар: Го следеле, го нокаутирале и му украле 8.800 денари, ојо бара притвор, но едниот избегал

Основното јавно обвинителство Скопје донесе Наредба за спроведување истражна постапка против едно лице за кривично дело – Разбојништво од член 237 став 4 од Кривичниот законик.Делото го извршил заедно со уште едно лице по кое се трага. На 15 ноември, спроти еден трговски центар во Скопје, двајцата следеле еден оштетен. Во еден момент осомничениот со тупаница го удрил оштетениот по главата, а другиот напаѓач му се заканил со боксирач.Претурајќи по јакната на нападнатиот пронашле и одзеле 8.800 денари. Го турнале на земја, го удирале со клоци и се обиделе да му го скршат мобилниот телефон, по што избегале.Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот 43-годишник.

Скопје | пред 5 месеци

(Видео) Атмосферата во Каракас: Мадуро ја пее „Imagine“ на Џон Ленон, а САД распоредуваат воени бродови

Во Каракас викендов се одржа голем митинг на кој претседателот на Венецуела, Николас Мадуро, се обрати пред своите поддржувачи во момент на зголемени тензии со Вашингтон. Американската морнарица распореди носач на авиони и повеќе воени бродови во Карибите, неколку десетици километри од венецуелскиот брег, што во Каракас го толкуваат како можна најава за ескалација.Мадуро, во обид да испрати порака дека Венецуела не сака конфликт, но е подготвена на одбрана, ги повика граѓаните на смиреност и го нагласи своето залагање за мир. За да ја засили својата порака, тој изненадно почна да ја пее легендарната „Imagine“ на Џон Ленон, обраќајќи им се на присутните со зборовите: „Една од нашите најважни цели е мирот. Како што велеше Ленон, нели?“Претседателот се сврте кон својот министер за комуникации, Алфред Назарет, и го праша како точно започнува песната, по што се пушти музиката и толпата се приклучи во пеењето. Мадуро им порача на младите да го разгледаат текстот на композицијата, опишувајќи ја како „универзална химна за мир и надеж“ и оддавајќи почит на Ленон.„Imagine“ е дел од истоимениот албум од 1971 година и денес се смета за една од највлијателните песни во историјата на модерната музика, создадена под силно влијание на идеите на Јоко Оно, која, според Ленон, била коавторка на концептот.Во меѓувреме, тензиите меѓу Каракас и Вашингтон продолжуваат да растат. САД тврдат дека мисијата во Карибите е насочена кон борба против криумчарењето на дрога, но венецуелската влада смета дека тоа е само параван за политички притисок и обид за дестабилизација. Како одговор, Венецуела прогласи највисоко ниво на готовност и нареди мобилизација на своите вооружени сили.Претседателот Доналд Трамп рече дека „деновите на Мадуро се избројани“ и не ја исклучи можноста за воена интервенција, обвинувајќи го венецуелскиот лидер дека дозволува криминалци да преминуваат во САД. Мадуро возврати со порака упатена директно кон американските граѓани: „Војна во Карибите? Не. Војна во Јужна Америка? Не. Мир? Да — мир и стабилност.“Во говорот, тој остро ги осуди и заедничките поморски вежби меѓу американските сили и Тринидад и Тобаго, оценувајќи ги како закана за мирот во регионот.

Свет | пред 5 месеци

Конгресот кон обелоденување на досиејата за Епштајн: Трамп ја промени позицијата и даде зелено светло

Напорите на група американски конгресмени да го забрзаат отворањето на документите поврзани со истрагата за сексуална трговија на финансиерот Џефри Епштајн се во завршна фаза и оваа недела се очекува предлог-законот да добие широка поддршка во Претставничкиот дом. Републиканци кои претходно се спротивставуваа, сега масовно се приклучија зад иницијативата, спротивно на првичниот став на раководството на партијата – и на претседателот Доналд Трамп.Но, Трамп во меѓувреме направи целосен пресврт и јавно ги повика републиканците да гласаат за објавување на документите, откажувајќи се од првичната резерва.Со усвојување на законот, Министерството за правда ќе биде задолжено да ги декласифицира сите материјали поврзани со Епштајн, вклучувајќи ги и комуникациите и документите од истрагата за неговата смрт во федералниот притвор. Информациите што се однесуваат на жртвите или на тековни федерални постапки ќе останат заштитени.„Обезбедивме најмалку сто гласови“, изјави републиканецот Томас Маси. „Се надевам дека ќе собереме мнозинство што нема да може да биде сопренo со вето.“Маси и демократот Ро Хана уште во јули поднесоа специјална петиција што овозможува заобиколување на раководството на Домот и директно ставање на предлог-законот на гласање доколку го поддржи мнозинството пратеници.Трамп ја промени својата позиција откако претседателот на Претставничкиот дом, Мајк Џонсон, изјави дека гласањето за објавување на документите би ставило крај на тврдењата дека Трамп имал каква било врска со Епштајн.„Републиканците треба да гласаат за откривање на досиејата за Епштајн – немаме што да криеме“, напиша Трамп на „Трут Соушл“, додавајќи дека демократите „селективно шират лаги“ за да го намалат ефектот од успесите на Републиканската партија.Интересот околу случајот повторно се разгори поради нови материјали објавени во јавноста, меѓу кои и имејл од 2019 година во кој Епштајн тврдел дека Трамп „знаел за девојките“. Белата куќа возврати дека станува збор за политички мотивирано селективно пуштање документи.Иако двајцата во минатото биле фотографирани заедно, Трамп тврди дека нивните односи се прекинале години пред обвинувањата против финансиерот. Тој дури побара Министерството за правда да ги испита контактите меѓу видни демократи и Епштајн.Трамп никогаш не бил обвинет во врска со случајот, а Епштајн во 2019 година почина во притвор, официјално со самоубиство, додека го чекаше судењето. Финансиерот остави долга листа на влијателни познанства од политиката, бизнисот и светот на славните.

Свет | пред 5 месеци

АХВ затвори 15 локали до училиштата, учениците купувале небезбедна храна

Во засилената инспекциска акција што Агенцијата за храна и ветеринарство (АХВ) ја спроведе во последните десетина дена, затворени се 15 продажни места кои продавале храна со нарушена безбедност, претежно на ученици. Во истиот период биле извршени 445 контроли.Инспекторите заплениле и уништиле 696 килограми производи со сомнително потекло и квалитет, кои биле оценети како небезбедни за употреба.Според АХВ, контролите биле насочени кон дуќани, пекари, мини-маркети и други оператори со храна што се наоѓаат во близината на основни и средни училишта, бидејќи токму овие објекти се најчеста дестинација за учениците.Проверените состојби покажале сериозни неправилности: кај 19 оператори била пронајдена небезбедна храна во продажба, 30 работеле во несоодветни хигиенски услови, а дури 26 воопшто не биле регистрирани во АХВ.Дополнително, 16 оператори немале воспоставено процедури за добра хигиенска и производствена практика, а 32 не ги подложиле вработените на задолжителни здравствено–санирани прегледи. Тројца субјекти не спровеле дезинфекција, дезинсекција и дератизација, седум работеле без исполнети технички услови, а кај уште седум била пронајдена неправилно означена храна.За прекршувањата биле изречени парични казни за 77 оператори, во вкупен износ од 36.470 евра, а издадени биле 103 решенија со задолженија за корекција на состојбите и 23 опомени.

Македонија | пред 5 месеци

Фудбалски судија од Мостар ја застрелал партнерката, па се обидел да се самоубие

Во центарот на Мостар вечерва се случи шокантно убиство што го вознемири целиот град. Жената била застрелана од нејзиниот партнер по драматична потера што започнала во близина на автобуската станица. Од Министерството за внатрешни работи на Херцеговачко-неретванскиот кантон потврдија дека полициските екипи излегле на терен и во моментов го обезбедуваат местото на настанот.Убиецот се обидел да се самоубие, но пиштолот му се заглавил. Набрзо бил уапсен на лице место, а истрагата траела со часови.Напаѓачот, кој е син на познат фудбалер и фудбалски судија, прво ја ранил жената кај автобуската станица, но таа успеала накратко да избега. Во паника се упатила кон блиско кафуле, каде се обидела да побара помош и да ја извести полицијата. Напаѓачот продолжил да ја следи и ја стигнал по неколку десетици метри, по што повторно пукал и ѝ нанел фатални повреди.Потоа, според сведоштва од терен, мажот се обидел да си го одземе животот, но неговото оружје закочило. Полицијата пристигнала многу брзо и го уапсила непосредно покрај телото на жртвата.Неофицијалните информации упатуваат дека осомничениот е Анис Калајџиќ, фудбалски судија со долгогодишна кариера во Првата лига на Федерацијата БиХ и син на поранешен фудбалер и тренер на ФК Вележ. Истите извори тврдат дека дозвола за носење оружје добил неодамна — пред околу еден месец — и дека тогаш го купил и пиштолот што го употребил при убиството.

Свет | пред 5 месеци

Ноќна стража за ѓубрето, во Скопје се воведува нов режим - по 22 часот не смее да се фрла отпад

Од денеска во главниот град започнува да важи новото правило со кое се ограничува фрлањето отпад после 22 часот – мерка што Град Скопје ја воведува со намера да се стави ред во одлагањето на сметот и да се спречат нерегуларностите околу користењето на контејнерите.Спроведувањето на забраната ќе го надгледуваат комуналните инспектори и редарските служби, кои од утре преминуваат на работа во три смени, покривајќи го теренот непрекинато, 24 часа дневно. На располагање се вкупно 20 комунални инспектори и исто толку редари, кои ќе патролираат низ сите делови на градот.Како што посочуваат од надлежните служби, фокусот ќе биде ставен на проверка на тоа каде и како угостителските објекти и фирмите го оставаат својот отпад.„Штом утре одлуката биде објавена во Службен весник, службениците ќе добијат ново распоредување во тросменска работа. Вклучени ќе бидат сите инспектори и редари, а казните ќе се изрекуваат непосредно на терен“, изјави новиот директор на „Комунална хигиена“, Драги Митковски за Сител.Тој додаде дека доколку се затекне поголема количина несоодветно одложен отпад, ќе се спроведува детална контрола кај фирмите. Казните остануваат непроменети – 50 евра за граѓаните, а од 1.300 до 1.800 евра за правните субјекти.Мерката има за цел да ги спречи угостителските и деловните субјекти да ги полнат контејнерите што се наменети за домаќинствата и да придонесе кон поорганизирано и навремено собирање на сметот низ градот.

Скопје | пред 5 месеци

(Видео) Пронајден и казнет возачот што го загрози сообраќајот на патот Куманово – Крива Паланка

Министерството за внатрешни работи информира дека е пронајден возачот кој денеска со несоодветно однесување го загрози сообраќајот на регионалниот пат Куманово – Крива Паланка, по што против него се преземени соодветни мерки.По објавата на социјалните мрежи, во која се гледа како возач на камион го попречува движењето на останатите учесници во сообраќајот, полициските службеници од СВР Куманово веднаш постапиле и го идентификувале возачот, лицето С.С. од Куманово.Против С.С. е издаден прекршочен платен налог, а дополнително му е наложено да го исчисти коловозот, што било извршено под надзор на полициски службеници.МВР апелира до сите учесници во сообраќајот да се однесуваат одговорно и да ги почитуваат сообраќајните прописи со цел подобра безбедност на патиштата.

Македонија | пред 5 месеци

Трипуновски: Нема потреба од загриженост кај земјоделците, вршиме контрола на 50-тина договори, ќе го информираме Брисел за исходот

„Веднаш по онаа акција која се случи во четвртокот, каде беа приведени повеќе лица вклучувајќи го и директорот, нашиот национален механизам е на стопирање на дел од исплатата на ИПАРД средствата. Тоа е наша брза реакција за да провериме што во суштина се случувало во самата агенција“, изјави министерот за земјоделство, шумарство и водостопанство, Цветан Трипуновски во интервју за Канал 5 телевизија.Трипуновски вели дека Брисел ја поздрави брзата реакција на Владата за да испита што точно се случувало во Платежната агенција.„Сето тоа е искомуницирано со Брисел, и оттаму дадоа позитивна критика за брзата реакција. Со нашата реакција ќе превенираме евентуални други несакани последици. Она што ние како држава ќе го направиме во проверките, ќе биде испратено како извештај до Брисел, за да дефинираме што се случувало“, појасни тој.Министерот Трипуновски посочи дека тука станува збор за девијантно однесување на еден од вработените, а не за системот.Тој додаде дека Агенцијата е поделена на две структури, едниот дел е за национални плаќања, односно субвенции, а другиот дел се однесува на реализација на ИПАРД средствата. Вториот дел во моментов е под национална ревизија.Министерот Трипуновски нагласи дека нема потреба кај загриженост кај земјоделците, бидејќи се врши контрола само на 50-тина договори, а не 450 како што лиферува опозицијата.„Исплатите за субвенциите ќе продолжат тековно, земјоделците не треба да се грижат“, рече Трипуновски и додаде:Инаку се работи за 50-тина предмети кои се од претходно објавени повици да бидат дозавршени, а не како што лиферува опозицијата дека се над 450 апликанти.Трипуновски нагласи дека на последната владина седница е назначен нов директор на Агенцијата.„Дополнително она што е важно, ние веќе на последната владина седница е назначивме и нов директор на самата институција којашто нормално веќе од внатре ќе почне да го движи процесот на самата Агенција, за да нема еден сериозен застој“, заклучи тој.Во однос на прашањето дали постои опасност од дополнително пролонгирање на роковите, доколку ОЛАФ се вклучи во истрагата, Трипуновски информираше:„Ние сме сведоци дека последниве неколку години ОЛАФ беше присутен во Платежната агенција, доаѓа без најава, без какво било претходно известување. Во моментов она што ние сме го преземале како институција согласно нашите надлежности е позитивно поздравено од Брисел. Дали ќе дојде ОЛАФ не знам, меѓутоа она што е наша обврска и ние ќе направиме се е да провериме и да испратиме сумиран извештај до Брисел што е констатирано при истрагата, и мислам дека веднаш потоа ќе продолжиме понатаму со едно тековно работење“.

Македонија | пред 5 месеци

Трипуновски: Не чувствувам одговорност и нема да поднесам оставка, бледи се обидите на опозицијата да ме инволвира во случај за криминал

„Одговорност во моментот треба да даде тој што е фатен на дело за злоупотреба и прекршување на законите. И мислам дека таму ќе се води истрагата до крај, апелирам да биде до крај и сите коишто се евентуално инволвирани во целиот случај да одговараат. Само на тој начин ќе стопираме негативни тенденции, прекршување на закони и девијантни однесувања“, порача министерот за земјоделство, шумарство и водостопанство, Цветан Трипуновски во интервју во дневникот на Канал 5 телевизија.„Јас како ресорен министер ќе продолжам да се борам и ваквите случаи да се санкционираат во целост, само на тој начин ќе можеме да градиме она што постојано го велам, доверба во институциите, што во минатото го немаше“, додаде тој.Трипуновски истакна дека Владата спроведува неселективна борба против криминалот, укажувајќи дека без разлика на политичката припадност секој кој направи злоупотреба мора соодветно да одговара.„Со овој случај гледате дека како сериозна Влада без разлика на партиска припадност, дали е некој сегашен или поранешен функционер, се бориме беспрекорно. Тоа е сериозен пристап на сериозна Влада, што во минатото не беше така“, изјави тој.Министерот Трипуновски упати апел до секој еден граѓанин којшто можеби има за некој друг случај одредени сознанија да алармира, за како што рече тој веднаш да се постапи и санкционира.Трипуновски ги отфрли обвинувањата на опозицијата и порача дека платежната агенција е посебно тело од министерството, додавајќи дека бледи се обидите на СДСМ да го инволвираат во овој случај.„Платежната агенција е посебно тело коешто одговара пред Владата. Значи тука елиминирам секаква поврзаност на Платежната агенција со Министерството. Вие знаете дека Платежната агенција работи согласно акредитирани мерки, согласно насоките од Брисел, согласно процедури, управувани од директор со свој менаџерски тим. Така да сите процеси коишто се внатре во Платежната агенција се водени од самата агенција и тука бледи се нападите на опозицијата да го врзат министерството со Платежната агенција. Така што, тоа што го прават е повеќе за политички поени и видливост во јавноста“, појасни тој.

Македонија | пред 5 месеци

(Фото) Уапсен е осомничениот за терористичкиот напад во Индија

Уапсен е маж које е осомничен за поврзаност со смртоносниот напад со автомобил-бомба во Делхи, во кој минатата недела загинаа осум, а 20 лица беа повредени. Властите соопштија дека автомобилот користен во нападот, што владата го нарече „терористички инцидент“, бил регистриран на името на уапсениот, пренесува BBC.NIA го товари, жител на Кашмир под индиска управа, за уrote со наводниот напаѓач-самоубиец. Експлозијата се случила кај метро станица близу Црвената тврдина. Агенцијата запленила уште едно возило кое се поврзува со напаѓачот и ќе биде дополнително испитано. Досега се испитани 73 сведоци, вклучувајќи повредени лица.Ова е прва ваква експлозија во строго чуваниот Делхи од 2011 година. Нападот се случил во понеделник во 18:52 по локално време, кога бавно возило застанало на семафор и експлодирало. Министерот за внатрешни работи Шах потврдил дека станува збор за бел Hyundai i20. Снимките покажале изгорен автомобил и повеќе уништени возила, меѓу кои авторикша и ризкши.Премиерот Моди го нарече нападот „урота“, а владата вети дека извршителите, нивните соработници и спонзори ќе бидат казнети. Лидерот на опозицијата Рахул Ганди нападот го опиша како „исклучително потресен“.Полицијата истражува можни врски со неодамнешното апсење на седум мажи во Кашмир и со заплената на 2900 килограми експлозив во предградието на Делхи. Црвената тврдина, изградена во 17. век, е една од најпосетените знаменитости и е место каде индиските премиери ги одржуваат говорите за Денот на независноста.

Свет | пред 5 месеци

Украина обезбеди увоз на американски гас од Грција за да ги покрие потребите за време на зимата

Украина обезбеди увоз на американски течен природен гас (ЛНГ) од Грција за да ги покрие зимските потреби од декември до март следната година, изјавија во неделата грчки и украински претставници за време на посетата на претседателот Володимир Зеленски на Атина. Украина ќе увезува гас преку гасовод што минува низ Балканскиот Полуостров за да обезбеди критични количини по руските напади врз енергетската инфраструктура и постројките за производство на гас.Грчката гасна компанија DEPA и украинската државна компанија Нафтогаз во заедничко соопштение наведоа дека договорот стапува во сила од декември. Зеленски на заедничката прес-конференција со грчкиот премиер Киријакос Мицотакис изјави дека испораките ќе започнат во јануари.Грција станува извор на енергетска безбедност„Се зафатуваме со обнова секојпат кога Русите ја уништуваат енергетската инфраструктура и постројките за производство на гас, но тоа навистина бара многу време, напор и опрема. А кога станува збор за гасот, ни е потребен увоз за да ја надоместиме нашата уништена домашна производство“, им изјави Зеленски на новинарите.„Грција станува обезбедувач на енергетска безбедност за вашата татковина“, му порача Мицотакис на Зеленски, додавајќи дека договорот ќе придонесе за независноста на Европа од рускиот гас.Во пресрет на посетата на Грција, Зеленски изјави дека Киев обезбедил две милијарди евра од европските партнери и банки за увоз на гас, со гаранција од Европската комисија, како и од украинските банки.

Свет | пред 5 месеци

(Видео) Фан на Теа Таировиќ направи колут напред и назад, проба да стои на раце – публиката во Скопје во делириум

На концертот на популарната српска пејачка Теа Таировиќ во Скопје, една нејзина обожавателка стана вистинска атракција на вечерта. Во момент на еуфорија, девојката направи колут напред и колут назад, оставајќи ја публиката во неверување и насмевка.Настанот предизвика лавина реакции на социјалните мрежи, каде снимката од акробацијата се споделува со коментари како „ова е вистинска фан љубов“ и „Теа доби конкуренција за сценски настап“.Концертот, кој се одржа во организација на „Балкан Медиа“, уште еднаш потврди дека Теа Таировиќ е меѓу најбараните регионални ѕвезди со оглед на полната сала.Ова не е првпат пејачката да има речиси распродаден настап во Македонија.

Магазин | пред 5 месеци

(Видео) Ќе ве здоболи глава кога ќе чуете каква рутина има милионер кој сака да живее вечно

Американскиот милионер Брајан Џонсон (48) повторно предизвика лавина реакции на интернет со својата екстремна утринска рутина, која ја опиша до најситни детали – и тоа со една цел: да си го продолжи животот. Додека едни ја фалат неговата дисциплина, други иронично забележуваат дека „повеќе се труди да не умре, отколку да живее“.Џонсон, кој се збогати со продажбата на својата компанија Braintree на PayPal, во гостување за подкастот The Burnouts раскажа дека неговиот ден почнува секое утро во 4:30 часот.Од моментот кога ќе стане, го мери односот меѓу мускулната и масната маса, па веднаш потоа спроведува „светлосна терапија“. Следуваат филтрирана вода, десетици суплементи, па строго избалансиран појадок – комбинација од бобинки, протеини, маслиново масло и колаген. До 5:30, веќе ја проверува квалитетата на воздухот во домот и температурата на телото, по што следува интензивен тренинг, кој го нарекува „омилен дел од денот“.Потоа – сауна со мраз, втора рунда светлосна терапија, терапија со ударни бранови, оброк наречен „супер зеленчук“, вежби на висински симулатор и 90-минутна хипербарична терапија со кислород.Рутината на Џонсон предизвика силна дебата на социјалните мрежи. Многумина ја нарекоа опсесија со бесмртноста, додека други иронично коментираа: „Тој поминува четвртина од животот обидувајќи се да го продолжи – наместо да го живее.“„Братот поминува повеќе време не умирајќи, отколку живеејќи“, стои во еден од коментарите.Корисниците на платформите го нарекоа „жив прототип на Black Mirror“, додека некои се запрашаа дали воопшто има време за нешто друго освен биолошка оптимизација.И покрај критиките, Џонсон тврди дека неговиот експеримент носи реални резултати. „Имам срце на 37-годишник и капацитет на белите дробови како 18-годишник,“ изјави тој, додавајќи дека редовно ги следи сите медицински параметри. Сепак, критичарите остануваат скептични: иако неговото тело можеби старее побавно, прашањето е – дали неговиот живот навистина оди напред.

Медиасет | пред 5 месеци

Албанија постигнува рекорд – за една година ги отвора сите преговарачки поглавја со ЕУ

Советот на Европската Унија ја објави агендата на седмата меѓувладина конференција за членството на Албанија, која ќе се одржи утре, на 17 ноември, во Брисел, пренесува „Ора њуз“.Според официјалното соопштение, конференцијата ќе започне во 20:00 часот, со Мари Бјер, министерка за европски прашања, како претседавач. По завршувањето на состанокот, најавена е прес-конференција во 21:20 часот.Во соопштението се наведува дека конференцијата ќе го означи отворањето на Групата 5 „Ресурси, земјоделство и кохезија“, која ги опфаќа следните пет преговарачки поглавја:Поглавје 11: Земјоделство и рурален развојПоглавје 12: Безбедност на храната, ветеринарни и фитосанитарни прашањаПоглавје 13: Рибарство и аквакултураПоглавје 22: Регионална политика и координација на структурни инструментиПоглавје 33: Финансиски и буџетски одредбиАлбанскиот премиер Еди Рама пред два дена го најави одржувањето на конференцијата, нагласувајќи дека ова претставува историски момент за земјата.„Со отворањето на оваа група поглавја, Албанија го постигнува невозможното — финализирање на сите преговарачки поглавја во рок од само 12 месеци. Ова е апсолутен рекорд во европската интеграција,“ изјави Рама.Отворањето на последното поглавје ја става Албанија на чекор поблиску до завршување на техничкиот дел од пристапниот процес и ја позиционира меѓу најбрзо напредувачките кандидати за членство во Европската Унија.

Свет | пред 5 месеци

(Видео) AI хорор од Холивуд: апликација за разговор со починати шокира светот

Поранешниот актер на „Дизни“, Калум Ворти (34), се најде во центарот на жестоки критики поради својата нова апликација 2wai, која им овозможува на корисниците да создадат вештачки аватари на починати блиски лица. Актерот, познат по улогата на Дез Војд во серијата Austin & Ally, ја претстави апликацијата на социјалните мрежи, предизвикувајќи лавина од негативни реакции и дебата за етиката на технологијата што „ги оживува мртвите“.„Што ако можеме повторно да зборуваме со нашите сакани?“Во промотивното видео, Ворти ја опиша апликацијата како „жив архив на човештвото“, поставувајќи го прашањето:„Што ако луѓето што ги изгубивме можат повторно да бидат дел од нашата иднина?“Во рекламата се прикажува бремена жена која преку апликацијата разговара со AI реплика на својата почината мајка. „Дигиталната баба“ потоа му чита приказна на внучето, зборува со него по училиште и се потсетува на сопственото породување. Рекламата завршува со слоганот:„Со 2wai, три минути можат да траат засекогаш.“Корисниците на социјалните мрежи беа едногласни – апликацијата е морбидна. Многумина ја опишаа идејата како „демонска, неетична и дегуманизирачка“.Еден коментатор напиша:„Ако некој се обиде да ме рекреира по смртта, ќе го проколнам.“Други ја нарекоа „најлошата идеја во историјата на технологијата“, додека еден саркастично забележа:„Што ако едноставно престанеме да правиме некромантија со месечна претплата?“Многумина веднаш повлекоа паралела со серијата „Black Mirror“, особено со епизодата Be Right Back, каде вдовица создава дигитална верзија на својот покоен партнер. „Не разбирам каков тип претприемач гледа епизода на Black Mirror и вели: ‘Да, ова е бизнис идеја!’“ – напиша еден твитерџија.Апликацијата, достапна за iOS, создава „HoloAvatar“ – виртуелен лик кој изгледа и зборува како реална личност, врз основа на само троминутен видео-запис. Освен аватари на блиски лица, платформата нуди и готови модели, како личен тренер, астролог или готвач, па дури и аватари на историски личности – како Шекспир и кралот Хенри VIII.Компанијата, сепак, не објасни како со толку малку податоци вештачката интелигенција може реално да ја пресоздаде нечия личност. На прашањата од новинарите не одговорија.Оваа технологија отвора сериозни дилеми – дали е морално да се „оживуваат“ починати лица и кој поседува права над нивниот дигитален идентитет. Корисниците предупредуваат дека компанијата може да ги користи создадените аватари за огласување или комерцијални цели без согласност.„Замислете вашиот дигитален татко ви препорачува намалена цена на грав во маркет“, предупреди еден корисник.Психолозите, пак, стравуваат дека овие „дигитални воскреснувања“ ќе го попречат процесот на жалење и ќе создадат зависност од лажна утеха.Истражувачи од Универзитетот во Кембриџ предупредуваат на појавата на таканаречени „deadbot-ови“ – вештачки копии на починати што можат да предизвикаат психолошка траума. Тие опишуваат сценарија во кои дигиталните „духови“ испраќаат пораки, потсетници или реклами, па дури и комуницираат со деца, уверувајќи ги дека родителот „сè уште е тука“.„Овие услуги носат огромен ризик од анксиозност, особено ако луѓето се соочат со неочекувани дигитални контакти од шокантно верни AI реплики на своите најблиски,“ изјави д-р Томаш Холанек од Кембриџ.

Свет | пред 5 месеци

За овие четири хороскопски знаци зимата ќе биде премногу тешка: ги чекаат големи предизвици

Зимата не носи само студ и кратки денови — таа често буди и внатрешни борби, сомнежи и емоционален замор. Според астролозите, четири хороскопски знаци оваа зима ќе се соочат со особено тежок период – Овен, Рак, Лав и Јарец.Недостатокот на сончева светлина, забавениот ритам и зголемениот стрес ќе ги натераат овие знаци да се соочат со сопствените граници. Но, секој предизвик може да се претвори во лекција — ако знаат како да ја насочат енергијата.Овен – кога силата удира во ѕидВашата енергија е огромна, но зимата ќе ве забави и тоа може да предизвика фрустрација. Ако постојано брзате кон резултати, а телото бара одмор, следува судир со самите себе.Совет: дозволете си пауза. Занимавајте се со нешто креативно — хоби, музика, цртање или едноставно време во природа. Ова ќе ви помогне повторно да ја пронајдете рамнотежата.Рак – борба со тишинатаКратките денови и недостигот на светлина ќе го зголемат чувството на осаменост. Како воден знак, длабоко ја чувствувате секоја промена.Совет: не се повлекувајте во себе. Создадете топла атмосфера во домот, гответе, гледајте филмови со најблиските и не заборавајте дека споделената топлина лечи.Лав – кога светлата се гасатНавикнати сте на внимание и динамика, но зимата може да донесе сомнеж во вашата самодоверба. Без активност и аплауз, Лавот се чувствува исцрпено.Совет: насочете го фокусот кон себе. Нов хоби, личен проект или духовна пракса ќе ви го вратат чувството на моќ и самопочит.Јарец – тежината на одговорностаВашата дисциплина и работна етика се извонредни, но во зима тоа може да стане терет. Ако постојано носите сè на свои плеќи, ризикувате прегорување.Совет: поделете ги обврските, одморете без грижа на совест и потсетете се дека одморот не е слабост, туку нужност. Балансот меѓу приватното и професионалното ќе ви донесе мир.Како да ги надминете зимските предизвициАко сте меѓу овие четири знаци, зимата ќе ви биде тест — но и можност за раст.🌿 Создадете свои ритуали – утринско кафе или чај, прошетка на студениот воздух, бележење мисли.🎨 Бидете креативни – пишувајте, цртајте, гответе, создавајте.💬 Негувајте односи – разговор со пријател или член од семејството е најбрзиот лек против зимскиот замор.

Магазин | пред 5 месеци

Како побрзо да ја исушите облеката во зима: совети за ефикасно сушење без непријатни мириси

Сушењето облека во зимски услови може да биде вистински предизвик — особено кога сончевите денови исчезнуваат, а температурата паѓа под нулата. Со доаѓањето на студениот период, многу домаќинства се соочуваат со проблемот на бавно и неефикасно сушење, особено ако немаат машина за сушење или доволно простор за сушење во затворено.Дополнителен проблем претставува тоа што многумина избегнуваат да го вклучат греењето поради високите трошоци, што може да предизвика појава на влага и непријатен мирис на облеката.Според советите на експертите од Met Matters, постојат неколку едноставни трикови кои можат значително да го скратат времето потребно за сушење:🔹 1. Искористете го утринското сонцеНајдобро време за сушење е утрото, меѓу 10 и 14 часот, кога сончевата светлина има најголем интензитет. Ако временската прогноза најавува кратки периоди без дожд, искористете ги тие моменти и изнесете ја облеката надвор, дури и ако е само за кратко.🔹 2. Додадете дополнителна центрифугаПо завршувањето на перењето, вклучете дополнителен циклус на центрифугирање. Така ќе се отстрани вишокот вода од ткаенината, што ќе го скрати времето за сушење и ќе го намали ризикот од влага во просторијата.🔹 3. Сушење во затворен простор со движење на воздухотДоколку сушите внатре, поставете ја сушилницата близу прозорец или во просторија со добра циркулација на воздухот. Отворете го прозорецот неколку минути за да се раздвижи воздухот и да се намали влажноста.🔹 4. Кратко изложување на сонце и свеж воздухДури и неколку минути надвор можат да направат разлика — сончевата светлина и свежиот воздух го поттикнуваат побрзото испарување на влагата и помагаат да се избегне непријатниот мирис.Со примената на овие практични совети, облеката ќе се суши побрзо, ќе ја задржи свежината и ќе избегнете дополнителни трошоци за греење.

Магазин | пред 5 месеци

Ѕвездите советуваат: Раковите горди, Лавовите креативни, Девиците конечно завршуваат започнато

Неделeн хороскоп од 17 до 23 ноември 2025 годинаОвенРабота: Неделата ви носи нови идеи и силна желба за напредок. Искористете го моментот за да ги забрзате проектите.Љубов: Отвореноста во комуникацијата ви носи подобра поврзаност, но избегнувајте нагли реакции.Здравје: Потребно ви е повеќе одмор за стабилизирање на енергијата.БикРабота: Добивате шанса да ја зацврстите својата позиција и да расчистите со обврските што ве оптоваруваат.Љубов: Мирен период, но стара несигурност може повторно да се појави.Здравје: Внесувајте повеќе храна богата со растителни влакна.БлизнациРабота: Интензивна недела полна со информации и брзи одлуки – организацијата е клучна.Љубов: Можно е изненадување во односите или порака што ќе ве збунува.Здравје: Намалете го менталниот замор со избегнување на повеќезадачност.РакРабота: Ќе почувствувате зголемена одговорност, но и гордост за своите резултати.Љубов: Топлина и блискост, но важно е да поставите јасни граници.Здравје: Прошетки и лесна рутина ќе ви помогнат да ја ослободите емоционалната напнатост.ЛавРабота: Ве очекува можност за креативен израз и нови соработки.Љубов: Страста е нагласена, но не заборавајте да ги слушате потребите на партнерот.Здравје: Имате енергија во изобилство, но избегнувајте претерување.ДевицаРабота: Успешно завршувате нешто што долго сте го одложувале.Љубов: Односите стануваат постабилни кога ги изразувате чувствата без прекумерна анализа.Здравје: Посветете време на себе-грижа и полесна исхрана.ВагаРабота: Влегувате во фаза на јасност – полесно носите одлуки што ги одложувавте.Љубов: Во односите повторно владеат хармонија и нежност.Здравје: Ви е потребен одмор и повеќе сон.СкорпијаРабота: Ќе напредувате кога ќе ѝ верувате на својата интуиција – поддршката доаѓа од неочекувани страни.Љубов: Длабоки разговори и интензивни емоции го зближуваат односот.Здравје: Посветете внимание на хормоналната рамнотежа и одморот.СтрелецРабота: Активен период со нови можности и понуди – бидете подготвени да преземете иницијатива.Љубов: Искреноста и спонтаните дружења го зајакнуваат односот.Здравје: Лесна физичка активност ќе ви помогне да го задржите фокусот.ЈарецРабота: Сигурно напредувате и преземате водство во важна ситуација.Љубов: Време е за сериозни разговори и продлабочување на довербата.Здравје: Вратете ја редовноста во спиењето и избегнувајте претерана работа.ВодолијаРабота: Вашата оригиналност доаѓа до израз – привлекувате нови соработници и идеи.Љубов: Потребна Ви е слобода, но не заборавајте на нежната комуникација.Здравје: Пазете се од напнатост во вратот и рамената.РибиРабота: Влегувате во креативен период и лесно ги решавате старите проблеми.Љубов: Чувствата се нагласени, но носат убави моменти и поддршка од блиските.Здравје: Ви се потребни повеќе топлина, течности и одмор.

Магазин | пред 5 месеци

Американскиот потпретседател Венс ја брани одлуката на Трамп за средбата со Путин: „Ако сакаш мир, мора да разговараш“

Потпретседателот на Соединетите Американски Држави, Џ. Д. Венс, ја бранеше одлуката на претседателот Доналд Трамп да отвори директни разговори со рускиот лидер Владимир Путин, нарекувајќи ја „важен чекор кон мирот во Украина“.Во интервју за „Фокс њуз“, Венс изјави дека многумина „погрешно ја разбираат суштината на дипломатскиот пристап на претседателот“.„Слушнав толку многу луѓе како го критикуваат претседателот на САД за разговорот со Владимир Путин. Не мора да се согласувате со неговите одлуки, но ако навистина сакате мир – мора да бидете силни, а истовремено подготвени да разговарате со луѓето“, рече Венс во емисијата на Шон Ханити.Тој ја опиша надворешната политика на Трамп како комбинација на пристапот „мир преку сила“ и спремност за преговори со добра волја, додавајќи дека „Вашингтонските медиуми не треба да одредуваат со кого американскиот претседател може да разговара“.„Доктрината на Трамп е јасна – да ја има најсилната војска во светот, да се фокусира на мирот, но без наметнување на дипломатските ограничувања што му ги диктира естаблишментот“, истакна Венс.Средбата меѓу Трамп и Путин во Алјаска во август предизвика остри реакции во Европската унија. Високата претставничка Каја Калас предупреди дека американскиот претседател „паѓа во стапицата на Москва“.И покрај критиките, Белата куќа го оцени состанокот како „позитивен чекор“ кон обновување на мировниот процес меѓу Русија и Украина. Двете страни, и Москва и Вашингтон, го поздравија дијалогот како можен почеток на дипломатско приближување.Самитот планиран за есен во Будимпешта е одложен на неодредено време, но рускиот министер за надворешни работи Сергеј Лавров потврди дека „Москва останува отворена за продолжување на контактите“.Трамп, кој веќе ја напушти стратегијата на претходната администрација за изолација на Русија, продолжи со иницијативи за директен дијалог и ги повика украинските власти да ги обноват преговорите со Москва, кои беа прекинати во пролетта 2022 година.

Свет | пред 5 месеци

Украина во шок: Луксуз, златен тоалет и мито во време на војна

Украинската влада се соочува со најтешкиот корупциски скандал откако Володимир Зеленски е на власт, пишува „Фајненшл тајмс“. Слики од луксузни станови во Киев – меѓу кои и еден со златен тоалет, торби полни со кеш и снимки од високи функционери кои дискутираат за перење пари – ја шокираа јавноста и предизвикаа бран негодување во земјата која се бори во војна.Во центарот на аферата се високи државни службеници обвинети за мито во проекти за енергетска одбрана, токму во време кога граѓаните живеат со секојдневни рестрикции на електричната енергија. Според истрагата на Националното биро за борба против корупцијата (НАБУ) и Специјалното обвинителство за борба против корупцијата (САПО), службеници и бизнисмени примале провизии од 10 до 15 проценти од вредноста на договорите со државната компанија „Енергоатом“.Истражителите тврдат дека низ канцелариите на осомничените поминале над 100 милиони долари нелегални средства, а меѓу главните обвинети е Тимур Миндич, пријател и поранешен деловен партнер на Зеленски, со кого тој ја коосновал продукциската компанија Квартал 95. Миндич, кој истражителите го опишуваат како „коорганизатор на шемата“, побегнал од Украина само неколку часа пред рацијата.Меѓу осомничените се и поранешниот вицепремиер Олексиј Чернишов, обвинет дека примил 1,2 милиони долари и 100.000 евра во готовина, како и министерот за правда Герман Галушченко и министерката за енергетика Свјатлана Гринчук, кои беа разрешени од функциите откако аферата стана јавна.Протечените фотографии и снимки, објавени од независните медиуми, предизвикаа јавен шок и масовно незадоволство, особено поради насловите како „Како пријателите на претседателот ја ограбија земјата за време на војна“.Зеленски првично реагирал со молк, а дури по неколку дена побарал оставки од министрите и вовел санкции кон бизнисмените вклучени во случајот. Активистите, меѓу кои и антикорупцискиот експерт Виталиј Шабунин, го нарекоа неговиот одговор „бавен и половичен“.„Привремена суспензија, дури ни отпуштање... дали тоа е реакција на претседател кој навистина не знаел ништо?“ праша Шабунин.Политичкиот аналитичар Володимир Фесенко смета дека Зеленски се обидува да се дистанцира од аферата и особено од својот долгогодишен пријател Миндич.„Сега Зеленски се дистанцира од луѓето вклучени во случајот, но штетата е веќе направена“, изјави тој.Антикорупциските организации предупредуваат дека аферата може да ја наруши довербата на западните партнери, токму во момент кога Украина се бори за одржување на финансиска и воена поддршка.„Не можеме да дозволиме украинскиот претседател да ги изгуби остатоците од легитимитетот за време на војна. Во спротивно, ризикуваме да ја изгубиме државата“, предупреди економистот и политички коментатор Серхиј Фурса.Аналитичарите проценуваат дека оваа афера може сериозно да го дестабилизира Зеленски, особено ако истрагата открие докази што водат кон неговиот најтесен круг.

Свет | пред 5 месеци

Ужас во Штип: 74-годишен маж ја убил соседката со нож и го закопал телото во дворот

Полицијата во Штип расчисти тешко кривично дело кое го потресе градот — 74-годишен маж е осомничен дека со нож усмртил 79-годишна жена, а потоа го закопал нејзиното тело во дворот од својот дом.Според информациите од Министерството за внатрешни работи, СВР Штип во координација со Одделот за криминалистичка полиција при Бирото за јавна безбедност поднесе кривична пријава против Д.А. (74) од Штип поради постоење основи на сомнение за сторени кривични дела „убиство“ и „противправно лишување од слобода“.Се сомничи дека во својот дом во Штип, без нејзина волја, ја држел Б.Н. (79) од истиот град, а потоа со остар предмет ѝ нанел убодни рани од кои починала. Телото на жената, според истрагата, осомничениот го закопал во дворот на куќата.Случајот започнал на 24 октомври 2025 година, кога сестрата на жртвата, Д.О. (84), ја пријавила нејзината исчезнатост. По неколкудневна потрага и собрани сознанија, полицијата добила судска наредба и на 10 ноември извршила претрес во домот на осомничениот. При тоа биле пронајдени предмети и траги од крв, поради што тој бил приведен и задржан во притвор од 96 часа во затворот во Куманово.По дополнително вештачење на доказите и нов распит, Д.А. детално го признал убиството и начинот на кој го извршил злосторството.Телото на убиената жена било пронајдено и по наредба на јавен обвинител дадено на обдукција. Осомничениот е изведен пред судија на претходна постапка кој му одредил притвор во траење од 30 дена.Овој случај предизвика шок и згрозеност кај јавноста, особено поради суровоста и начинот на кој било извршено убиството.

Македонија | пред 5 месеци

Ахмети со поддршка за Хашим Тачи и соборците: „Овие луѓе се сојузници на Америка, не злосторници“

Лидерот на Демократската унија за интеграција (ДУИ), Али Ахмети, изјави дека денеска „со ум и срце“ ќе биде на протестот организиран од Организацијата на војната на Ослободителната војска на Косово (ОВЛ УЧК) во Стразбур, јави Ора њуз.„Овој суд не суди за тоа за што е основан, туку ги суди клеветите на Србија измислени од Русија. Хашими, Кадриу, Реџепи, Јакупи и другите се сојузници на Америка и Косово, и нивното место е во Косово“, напиша Ахмети.Тој оцени дека токму во Стразбур започнала „големата неправда врз ОВК и албанскиот народ“, додавајќи дека поранешните водачи на косовската борба за независност се неправедно обвинети.„Нивната невиност е потврдена од нашите американски и европски пријатели во Хаг. Неправдата мора веднаш да заврши — целиот албански народ се залага за правда и за светоста на нашата ослободителна војна“, порача Ахмети.Протестот во Стразбур започна денеска во 13 часот пред Парламентарното собрание на Советот на Европа, во знак на поддршка за поранешните водачи на Ослободителната војска на Косово кои се во притвор во Хаг.

Свет | пред 5 месеци

(Видео) Јани Бојаџи: 27 април е нечистата совест на македонскиот народ, советите да се заборави минатото е како да ти дадат револвер за да се стрелаш

Режисерот и директор на Алфа телевизија, Јани Бојаџи, во гостување во подкастот „Претрес со Ландов“, остро проговори за настаните од 27 април 2017 година, нарекувајќи ги „нечистата совест на македонскиот народ“.„Дваесет седми април и уставобранителите се нечистата совест на македонскиот народ. Не постои Македонец кој не треба да застане пред огледалото и да си ја види сопствената нечиста совест. И тоа нема врска со партии, нема врска со функции, нема врска со никого,“ рече Бојаџи во емисијата.Тој додаде дека секој граѓанин, без исклучок, ја носи тежината на тој ден, и дека дури и „неродените деца ќе ја наследат таа вина“.„Сите до еден имаме нечиста совест. За жал, дури и нашите неродени деца ќе имаат нечиста совест заради тој проклет настан. Треба да учиме од грешките – а учиме ли? Многу малку,“ изјави Бојаџи.Во продолжение тој остро ја коментираше и, како што ја нарече, „европската логика за потиснување на минатото“, оценувајќи ја како чин на самоуништување.„Идејата на оние кои ни велат: ‘Не се занимавајте со историјата, гледајте во иднината’ – е чин да ти дадат револвер за да сам си стрелаш во слепочницата,“ рече Бојаџи.Одговарајќи на прашањето на Кристијан Ландов околу неговата позната изјава дека „Македонија е детето кое секогаш го лажат“, Бојаџи потврди дека зад неа стои целосно.„Апсолутно. Само оној кој го познава минатото може да ја поднесе сегашноста и да ја предвиди иднината,“ додаде тој.

Студио | пред 5 месеци