Најнови вести

2 нед.

Охрид СОС алармира: Сеча во зона на строга заштита кај изворите на Црн Дрим

Од здружението Охрид СОС реагираат по објавени фотографии на кои се гледаат исечени стебла и уништена вегетација во подрачјето кај изворите на Црн Дрим во Свети Наум, во рамки на зоната на строга заштита на Националниот парк „Галичица“.„Фотографиите кои ги споделуваме беа објавени утринава. Исечени стебла и вегетација кај изворите на Црни Дрим во Свети Наум, зона на строга заштита во рамките на Националниот парк „Галичица“. Реагиравме до Државниот инспекторат за животната средина, Министерство за животна средина и ПП, општинските инспектори и до Национален парк Галичица, со барање веднаш да се изврши вонреден инспекциски надзор и да се утврди кој ја извршил сечата и зошто, дали е добиено одобрение од паркот и од други надлежни институции, а доколку е извршено без одобрение да се спроведат најстроги санкции кон сторителите“, стои во објавата.

Македонија | пред 2 седмици

2 нед.

(Видео) Хрватски град го освои „Daily Mail“: Плажи, култура и пристапни цени

Британскиот „Daily Mail“ ја истакна Риека како помалку позната јадранска дестинација која привлекува туристи поради пристапните цени, добрата поврзаност и близината на островите Крк, Црес, Раб и Лошињ.Според написот, градот се претставува како идеална база за истражување на северниот Јадран, особено за оние кои сакаат одмор без големи гужви.„На северот на Јадранот, Риека се издвојува како помалку „преувеличен“ приморски град кој нуди море, сонце и плажи, но без големи гужви“, пишува „Daily Mail“.Британските медиуми ја опишуваат Риека како одлична почетна точка за посета на островите, но и како град со поволни цени – каде, како што наведуваат, чаша вино може да се најде веќе од околу 2,5 евра.Посебно се истакнува и културната понуда на градот, кој бил Европска престолнина на културата во 2020 година, по што добил нови содржини, меѓу кои и Музејот на град Риека во обновена барокна палата.Кога станува збор за гастрономијата, се препорачуваат локални специјалитети најчесто со октопод, маслиново масло, лук и самоникнати билки.Риека, според британските новинари, е и одлична база за посета на околните острови. Крк се издвојува како најлесно достапен, Црес нуди диви заливи, Раб е познат по ретки песочни плажи, а Лошињ по делфини, борови шуми и велнес-туризам.

Магазин | пред 2 седмици

2 нед.

Мицкоски на средба со Витакер: Соработката со САД е клучна за регионална стабилност

Премиерот Христијан Мицкоски денеска остварив средба со Метју Г. Витакер, постојан претставник (амбасадор) на Соединетите Американски Држави при НАТО.„На средбата разговаравме за зајакнување на соработката во рамки на Алијансата, актуелните безбедносни предизвици и заедничките приоритети во насока на унапредување на регионалната и глобалната стабилност. Ја истакнавме важноста од континуирана координација, партнерство и заедничко делување во одговор на современите безбедносни закани.Изразив благодарност за силната и континуирана поддршка од страна на Соединетите Американски Држави и ја потврдив нашата посветеност кон вредностите и обврските како членка на НАТО“, истакна Мицкоски.

Македонија | пред 2 седмици

2 нед.

(Видео) Предупредување до граѓаните по силниот земјотрес во Јапонија: „Бидете подготвени за евакуација“

По силниот земјотрес со јачина од 7,7 степени што денеска ја погоди Јапонија, властите упатија апел до населението за зголемена претпазливост во текот на следната недела.Јапонската премиерка Саанае Такаичи побара од граѓаните да „останат во состојба на готовност“ поради зголемен ризик од нови потреси на тлото.Таа истакна дека постои зголемена опасност од последователни земјотреси, па дури и мала можност за разорен мегаземјотрес.„Поради можни последователни земјотреси, ги молиме граѓаните во наредната недела да бидат особено внимателни. Бидете подготвени за итна евакуација и секогаш имајте со себе основни работи за вонредни ситуации“, изјави Такаичи.И покрај предупредувањата, таа истовремено ги повика луѓето да продолжат со своите секојдневни животни и работни активности.Јапонската железничка компанија „East Japan Railway“ соопшти дека повторно е воспоставен сообраќајот на брзите возови на неколку линии кои беа затворени по земјотресот.Се вози повторно на релациите Токио – Хачинохе, како и Токио – Мориока и Фукушима.Сепак, сообраќајот сè уште е прекинат меѓу Мориока и Акита, а одложувања има и на линијата Фукушима – Шинџо.Предупредувањата за цунами во делови од префектурите Ивате, Хокаидо и Аомори се намалени на ниво на совет.Јапонската метеоролошка агенција претходно предупреди на бранови високи до 3 метри по земјотресот во североисточна Јапонија, но подоцна проценките се намалени на околу 1 метар.

Свет | пред 2 седмици

2 нед.

Лефков: Новата власт во Бугарија може да донесе стабилност во регионот

Миле Лефков, пратеник во Собранието од редовите на ВМРО-ДПМНЕ, беше гостин во денешното издание на регионалната телевизија Њусмакс, каде се осврна на темата за новата влада на источниот сосед на Македонија. Тој вели дека изборите на една суверена држава, според него се секогаш внатрешно прашање на таа држава, и ја честиташе победата на новата влада во Бугарија. Како што вели Лефков, конечно има стабилна Влада кај источниот сосед на земјава. Тој кажа дека патот кон ЕУ не треба да зависи од билатерални спорови, туку од тоа дали земјата ги исполнува реформите, за што кажа дека Владата предводена од ВМРО-ДПМНЕ неуморно работи на истите.„Значајно е да имаме ден стабилен сосед, којшто ќе може да преземе одговорност за своите постапки, затоа што вистинскиот пат кон ЕУ, и тоа сме го кажале, не е преку процесот на билатерални проблеми, туку преку преку процесот на исполнување на реформи кои што се задолжителни од ЕУ и конечно ќе имаме еден стабилен партнер којшто ќе треба да ја преземе одговорноста и да одговара за блокирањето на целиот регион“, вели Лефков.Тој кажа дека владите во современиот свет имаат одговорност кон своите гласачи и населението, но и дека имаат одговорност кон регионот во кој се наоѓаат.,,Бугарија и бугарската Влада, ќе може сега да изберат пат дали ќе значи стабилност во регионот, дали ќе ја продолжи соработката со Република Македонија, на оние полиња на кои што треба да ја продолжи една влада којашто работи и за своите граѓани и за регионот. Притоа мислиме на порвзувањето, на заедничката соработка на многу различни полиња, наместо она со кое што до сега се среќававме тоа се блокади,предизвикување на проблеми“, истакна Лефков.Според него, Владата предводена од ВМРО-ДПМНЕ работи солидно во насока на исполнување на реформската агенда и сите реформи кои се наложени од европскиот пат.,,Бугарската Влада знае дека има солиден партнер во македонската Влада, се надеваме дека и тие ќе бидат на нивото на задачата и нема да влеземе во еден процес на дополнително блокирање. Она што е најважно, е тоа дека европските стандарди, европските критериуми се за доброто на народот, за доброто на сите. Затоа што, на крајот на денот секој граѓанин има корист од поквалитетно управување со јавни финансии, секој има корист од реформа во јавната администрација. Сите граѓани имаат корист од владеење на правото и реформи во судството и сметам дека нашиот источен сосед, како земја членка на ЕУ, со новата Влада треба да ги препознае овие вредности и да работиме на подобрување на поврзаноста, инфрасттруктурата и на сите други полиња на кои што можеме да соработуваме“, заклучи Лефков.

Македонија | пред 2 седмици

2 нед.

Берлин и возврати на Москва: „Нема да не заплашите“

Германското Министерство за надворешни работи упати нота до рускиот амбасадор во Германија, Сергеј Нечаев, поради, како што е наведено, директни закани од Русија кон цели во Германија. Берлин порача дека таквиот притисок е неприфатлив и дека нема да се заплаши.Германското Министерство за надворешни работи соопшти дека руските закани се обид да се ослаби поддршката за Украина и да се тестира единството на Западот, нагласувајќи дека Германија нема да попушти пред притисоците, пишува „Шпигел“.Во соопштението објавено на социјалните мрежи се наведува дека ваквите закани, како и сите форми на шпионски активности во Германија, се „целосно неприфатливи“.Министерството не навело конкретен повод за повикувањето на амбасадорот, но според германскиот весник, потегот е поврзан со минатонеделното соопштение на руското Министерство за одбрана, во кое се упатуваат закани кон европски компании поврзани со Украина.Руското Министерство за одбрана претходно соопштило дека Украина, заедно со европските партнери, планира да го прошири производството на дронови, оценувајќи дека тоа води кон ескалација на воено-политичката ситуација во Европа.

Свет | пред 2 седмици

2 нед.

Џиновска ајкула повторно во Јадранот: Видена кај Истра

Голема ајкула повторно е забележана во Истра, каде мирно пливала во близина на Пунтижела, меѓу закотвени чамци од кои се ловела риба.Станува збор за видот Cetorhinus maximus, најголемата риба во Јадранското Море и втората најголема во светот, која неодамна била видена и кај Музил, објави порталот Истра24.„Големата ајкула, која веќе неколкупати е забележана во околината на Пула, мирно пливаше меѓу закотвени чамци. Иако со импресивна големина, оваа врста се храни со планктон, филтрирајќи ја морската вода со широко отворена уста и не е опасна за луѓето. Доколку имате среќа да ја видите, не ја вознемирувајте“, наведуваат од Истра24.Оваа ајкула неодамна била забележана и кај Црес.Станува збор за втората најголема ајкула во светот, веднаш по кит-ајкулата, и може да достигне должина поголема од 10 метри. Станува збор за миграторен вид кој е целосно безопасен за човекот.Иако е релативно ретка, оваа ајкула постојано е присутна долж источниот брег на Јадранот. Најчесто се забележува во северниот дел, особено во Кварнерскиот Залив.Експертите посочуваат дека токму овој дел од Јадранот е богат со зоопланктон – главниот извор на храна за овој вид ајкула.

Свет | пред 2 седмици

2 нед.

Сиљановска: Оваа иницијатива има цел да создава поактивни, посвесни и поздрави генерации

Во дворот на претседателскиот Кабинет денеска се одржа спортски настан, во организација на Факултетот за физичко образование, спорт и здравје, а со поддршка на претседателката Гордана Сиљановска-Давкова.Настанот е дел од поширока и далекусежна иницијатива чија цел е да се развие, имплементира и евалуира национален модел за промоција на физичката активност, здравите навики и менталното здравје кај децата од 6 до 14 години.Деца од предучилишна возраст, како и ученици од основното и средното образование учествуваа во бројни спортско-рекреативни содржини: физички вежби, тимски игри, музички и танцови изведби, како и атлетска трка што ја донесе натпреварувачката возбуда и радост.При обиколката на групите, распоредени според возраста и интересите, претседателката со особено внимание ги проследи активностите, изразувајќи искрено задоволство од ентузијазмот, посветеноста и позитивната енергија на учесниците.Според неа, иницијативата го покрива не само само образованието, туку има поширока општествена цел: да создава поактивни, посвесни и поздрави генерации.„Она што нè обединува сите е квалитетното образование, физичката култура и доброто здравје“, рече претседателката. За неа, има насушна потреба од поздрав модел на живеење, во којшто младите ќе бидат физички поактивни, подолго ќе престојуваат во природата, третирајќи ја како рамноправен партнер, и кон сопственото здравје ќе се однесуваат како кон највреден личен и социјален капитал. Говорејќи за значењето на физичкото образование, Сиљановска-Давкова нагласи дека спортот истовремено и подеднакво ги зајакнува телото, умот, карактерот и духот. Деканот на Факултетот за физичко образование, спорт и здравје, Влатко Неделковски, поздравувајќи ја идејата на Сиљановска-Давкова, за спортско-културен настан во дворот на Кабинетот, ги образложи мотивите на иницијативата со очекување на добри резултати преку интензивна институционална соработка. За него, основната причина за физичка активност е градењето здрава нација, неопходна не само во нижењето успеси во спортот, туку и како движечка сила на економскиот и севкупниот општествен развој. Деканот очекува дека заедно со експертски групи од Хрватска и Словенија, а во соработка со Бирото за развој на образованието и Министерството за образование и наука, како и Владата, веќе по три години ќе имаме видливи резултати со коишто ќе се гордееме.

Македонија | пред 2 седмици

2 нед.

Лавров со шокантно тврдење: Брисел бара Србија да прати војници

Србија се соочува со директни барања од Брисел да испрати свои трупи против Русија, изјави денеска рускиот министер за надворешни работи Сергеј Лавров на Парламентарното собрание на Организацијата на договорот за колективна безбедност (ОДКБ).Лавров посочи дека ОДКБ е заинтересирана за проширување на соработката со пријателски земји, вклучително и во статус на набљудувачи и партнери, меѓу кои по парламентарна линија ја вброи и Србија, пренесува „Спутник“.„И мислам дека е многу важно тие врски да се одржуваат и зајакнуваат. Бидејќи и Србија се наоѓа на фронтот, на линијата на борба за национална независност и се соочува со директни барања од бирократите во Брисел да заземе антируска политика, па дури и да испрати свои трупи во тој блок кој се заканува дека ќе биде формиран против нашата земја“, истакна Лавров.Тој претходно денеска предупреди дека поради кризата во НАТО, Западот може да формира нов блок со учество на Украина.

Свет | пред 2 седмици

2 нед.

Рецесија на повидок: 250.000 Британци може да останат без работа

Околу четвртина милион луѓе во Велика Британија би можеле да ги загубат работните места до средината на 2027 година поради рецесија предизвикана од војната на САД и Израел против Иран, се наведува во анализа на „Гардијан“.Министерката за економија Рејчел Ривс ги повика банкарските раководители на разговори со цел да се ублажат последиците од рецесијата, додека два извештаи на водечки сметководствени компании укажуваат на сериозноста на економската закана за Обединетото Кралство.Посебен извештај на компанијата „Делоит“ покажува дека финансиските директори на големите британски компании веќе презеле мерки кои веројатно ќе влијаат врз економската активност и вработеноста, пренесува „Гардијан“.EY Item Club соопшти дека очекува британската економија да стагнира во вториот и третиот квартал од годинава, што би можело да ја доведе земјата на работ на рецесија, дефинирана како два последователни квартали на економски пад.Компанијата предвидува дека невработеноста ќе достигне 5,8 проценти до средината на 2027 година, во однос на сегашниот петгодишен максимум од 5,2 проценти, при што речиси 250.000 луѓе би можеле да останат без работа поради кризата на Блискиот Исток.Според анализата, економскиот раст би се преполовил – од 1,4 проценти во 2025 година на 0,7 проценти оваа година, што ќе го прекине позитивниот тренд забележан во февруари, кога растот на БДП бил над очекувањата.„Растечките трошоци за енергија и нарушувањата во синџирите на снабдување би можеле да ја турнат Велика Британија на работ на техничка рецесија до средината на годината. Куповната моќ на потрошувачите ќе биде под притисок, додека поскапото финансирање и неизвесната глобална економска средина дополнително ќе ги забават инвестициите“, изјави главниот економски советник Мет Свонел.Според EY Item Club, инфлацијата во втората половина на 2026 година би можела да достигне речиси 4 проценти – речиси двојно повеќе од целта на Банката на Англија од 2 проценти, додека се очекува монетарните власти да не реагираат веднаш со зголемување на каматните стапки.Извештајот на „Делоит“ покажува дека довербата на финансиските директори во март паднала на најниско ниво од почетокот на пандемијата на КОВИД-19, а како главни ризици се посочени геополитичките настани, растот на цените на енергијата и зголемените трошоци за финансирање.Најголемите грижи кај директорите се цената на енергијата (61 процент), инфлацијата и каматните стапки (61 процент), како и порастот на сајбер напади (60 проценти).Во анализата се наведува дека кризата поврзана со Иран веќе има директно влијание врз растот на цените на енергијата, што дополнително може да влијае врз инфлацијата и монетарната политика, додека во САД се бележи зголемување на сајбер напади поврзани со Иран.Како одговор, британските компании преминуваат кон порестриктивни финансиски стратегии, со фокус на намалување на трошоците, зачувување на ликвидноста и зајакнување на билансите, додека плановите за инвестиции и нови вработувања се намалуваат.Извештајот на Меѓународниот монетарен фонд покажува дека Обединетото Кралство се соочува со најголеми ревизии на прогнозата за раст меѓу земјите од Г7, при што за 2026 година се предвидува раст од 0,8 проценти, наместо претходно очекуваните 1,3 проценти.

Свет | пред 2 седмици

2 нед.

САД ја одобри продажбата на руска нафта: Уште еден месец

Американската влада ја продолжи дозволата за купување санкционирана руска нафта натоварена на танкери за уште еден месец, според документ објавен на страницата на Министерството за финансии.Канцеларијата за контрола на странски средства (OFAC) при американското Министерство за финансии во петокот издаде нова дозвола со која руската нафта и нафтените деривати натоварени на танкери до 17 април може да се купуваат до 16 мај, се наведува во документот.Од дозволата се изземени трансакции со Иран, Куба и Северна Кореја.Вашингтон по третпат од почетокот на американско-израелскиот конфликт со Иран ги суспендира санкциите за руската нафта и нафтените деривати, настојувајќи да го ублажи растот на цените на светските пазари.Првата 30-дневна дозвола за купување руска нафта OFAC ја издаде за Индија на 5 март. Една недела подоцна, дозволата беше проширена и на остатокот од светот, исто така за 30 дена, со рок за завршување на купувањето до 11 април.Новата дозвола е издадена под притисок на азиските држави, пренесува Ројтерс, кои поради нарушувања во снабдувањето од Блискиот Исток побарале од Вашингтон да овозможи набавка од други извори.„Преговорите (со Иран) се забрзуваат, а Министерството за финансии истовремено води сметка нафтата да биде достапна за оние на кои им е потребна“, изјавил портпарол на министерството за Ројтерс.Само два дена претходно, министерот за финансии Скот Бесент изјавил дека Вашингтон нема да ја обнови дозволата за купување руска нафта, ниту да издаде нова дозвола за иранска нафта, која истече во неделата, потсетува Ројтерс.Продолжувањето на дозволата ќе опфати дополнителни 100 милиони барели руска нафта, според наводите на специјалниот пратеник на рускиот претседател Владимир Путин, Кирил Дмитриев, со што ќе се удвои количината на нафта што се тргува со американска дозвола.Во март, купувачите ширум светот примиле 4,4 милиони барели руска нафта дневно, наведува Меѓународната агенција за енергетика (IEA) во својот месечен извештај, што значи вкупно околу 132 милиони барели.Индија увезувала околу два милиони барели дневно, а Кина 1,8 милиони барели дневно, според извештајот за април. Така, на азиските пазари во март пристигнале околу 60 милиони барели во Индија и 54 милиони барели во Кина.Од танкерите, во март на индиско тло биле истоварени околу 22 милиони барели руска нафта, а во Кина околу 14 милиони барели, со што практично биле исчистени залихите што се натрупувале на море од октомври минатата година.

Свет | пред 2 седмици

2 нед.

Нови правила за странските работници во Хрватска: Строги услови за дозволи

Наскоро стапува на сила нов правилник на Министерството за внатрешни работи, според кој странските работници од трети земји ќе можат да добијат работна дозвола во Хрватска само доколку достават доказ за својата здравствена состојба – здравствена книшка и статус на вакцинација.Правилникот ќе стапи на сила од следната недела, а странските работници кои не се вакцинирани според хрватската програма за вакцинација ќе мора да се вакцинираат, пишува „Нови лист“.Исто така, работодавачот ќе мора да обезбеди доказ за соодветно сместување и да го плати истиот за работникот, што ќе се докажува со договор за работа и задолжителен договор за закуп.Според новите прописи, работниците ќе мора да бидат сместени во станбени единици со најмалку 14 квадратни метри по лице и дополнителни шест квадратни метри за секој нареден работник. Тоа значи дека во стан од 56 квадратни метри ќе можат да се сместат најмногу осум работници.Сместувањето ќе мора да има посебен тоалет, кујна со исправен фрижидер и шпорет, можност за вентилација, мебел и соодветна висина на таванот, како и одвоен простор за мажи и жени, освен ако не се во роднинска врска.Овие одредби укажуваат на условите со кои денес се соочуваат дел од странските работници, кои често живеат во пренатрупани простории без основни хигиенски услови и во нехумани услови.Во иднина, закупнината за сместување ќе смее да изнесува најмногу 30 отсто од нето-платата на работникот, со задолжителен договор во кој ќе биде прецизирана цената и бројот на лица во просторот.Податоците покажуваат дека досега се утврдени 10.765 прекршоци на Законот за странци и се наплатени околу 1,2 милиони евра казни од несовесни работодавачи, најчесто во градежништвото, угостителството и такси-дејноста.За непријавена работа, односно работа без уплата на пензиско осигурување, работодавачите платиле дополнителни 3,2 милиони евра казни.Според Министерството за внатрешни работи на Хрватска, во моментов 105.231 работник од трети земји има важечка работна дозвола во Хрватска, најмногу од Босна и Херцеговина (10.208), потоа од Филипини (9.804), Непал (8.429) и Србија (7.473).Во првиот квартал од оваа година биле издадени околу 47.000 дозволи, што претставува намалување од повеќе од 23 проценти во однос на претходните години.

Свет | пред 2 седмици

2 нед.

Маѓар ги откри првите министри на новата влада

Лидерот на унгарската партија Тиса, Петер Маѓар, ги објави првите седум кандидати за министри во идната влада, по состанокот на пратеничката група на партијата, нагласувајќи дека се во тек завршните консултации за формирање на кабинетот.Според неговите зборови, новата влада ќе има вкупно 16 министри, без формирање „суперминистерства“, при што секој сектор ќе има посебно ресорно министерство, пренесува „Маѓар Немзет“.Маѓар го номинираше Андраш Карман за министер за финансии, Анита Орбан за министерка за надворешни работи и Иштван Капитани за министер за економија и енергетика во новоизбраната влада, како што претходно беше најавено.Десноцентристичката партија Тиса на Маѓар оствари убедлива победа на изборите одржани на 12 април, со што беше ставен крај на 16-годишното владеење на десничарскиот премиер Виктор Орбан.„Веќе неколкупати кажавме – ова е огромен мандат, огромно мнозинство и најмалку толкава одговорност. Ова беше клучната точка на денешниот состанок на парламентарната група, да разговараме со нашите пратеници што значи оваа одговорност и како можеме да ја исполниме 24/7, секој ден во годината“, изјави Маѓар.Тој посочи дека неговата влада би можела да ја преземе власта до 11 мај, откако се очекува да положи заклетва на 9 или 10 мај на конститутивната седница на парламентот.Додаде дека преговорите за формирање на владата сè уште траат и дека во наредните денови ќе бидат објавени и останатите министерски позиции.

Свет | пред 2 седмици

2 нед.

(Видео) Масакр во Луизијана: Маж уби осум деца – ги застрела сопругата и уште една жена

Маж од американската сојузна држава Луизијана застрелал седум од своите деца и уште едно дете во напад врз сопственото семејство, додека бил во процес на разделба со сопругата, која исто така била застрелана и тешко повредена, изјавил роднина.Насилството што се одвивало рано наутро во неделата во две куќи во Шривпорт претставува едно од најсмртоносните масовни пукања во САД во последните години, пишува АП.Напаѓачот, идентификуван како Шамар Елкинс, починал по бегство и полициска потера која завршила со тоа што полицајците отвориле оган кон него.Според официјалните информации, убиените деца – три момчиња и пет девојчиња – биле на возраст од 3 до 11 години. Едно лице скокнало од покривот на куќата и се очекува да преживее.„Не знам што да кажам, срцето ми е скршено“, изјавил началникот на полицијата во Шривпорт, Вејн Смит. „Не можам ни да замислам како може да се случи вакво нешто.“Елкинс и неговата сопруга, идентификувана од семејството како Шаника Елкинс, биле во процес на разделба и требало да се појават на суд во понеделник, изјавила Кристал Браун, роднина на една од повредените жени. Таа додала дека двојката се расправала околу разделбата непосредно пред пукањето.Полицијата соопшти дека пукањето започнало пред зори, кога напаѓачот застрелал жена во куќа јужно од центарот на градот. Потоа се упатил кон друга куќа на неколку улици подалеку, каде почнал да пука врз децата. Меѓу убиените бил и негов внук.Сосетка, која живее две куќи подалеку, изјавила дека нејзината безбедносна камера го снимила осомничениот како бега, заедно со звукот од истрели.Подоцна, кога излегла надвор, видела тело на дете на покривот од куќата.Според локални власти, некои од децата се обиделе да избегаат преку задниот дел од куќата.Полицијата соопшти дека нема информации за претходни пријави за семејно насилство поврзани со напаѓачот.Елкинс служел во Националната гарда на Луизијана од 2013 до 2020 година, без распоредувања, и немал обемно криминално досие. Во 2019 година бил осуден условно поради незаконска употреба на оружје.

Свет | пред 2 седмици

2 нед.

Пациентите со ретки болести непречено и во континуитет ја примаат потребната терапија, велат од Министерство за здравство

Министерството за здравство попладнево информира дека прави максимални напори за обезбедување на потребната терапија за пациентите со ретки болести, дека тие непречено и во континуитет ја примаат потребната терапија, вклучувајќи го и лекот за туберозна склероза – „сиролимус“.„Со новиот Закон за лековите се предвидени и побрзи постапки за одобрување и регистрација на лекови преку модернизација на системот, скратување на времето за нивна достапност, како и воспоставување систем за следење на снабдувањето и спречување евентуален недостиг. Исто така, покрај воведување тригодишен модел на јавна набавка како стратешка промена во 2026 година, што е од витално значење за пациентите, истовремено е проширена техничката спецификација со 12 нови лека.Со оваа нова јавна набавка државата ја презема обврската за обезбедување 72 лека, што претставува значајно зголемување на бројот на опфатени лекови во споредба со претходните години, со што директно се зголемува и бројот на пациенти што добиваат бесплатна и современа терапија преку Програмата на МЗ за лекување ретки болести“, пишува во соопштението на Министерството.

Македонија | пред 2 седмици

2 нед.

Не знаевме дека казнуваме згасната фирма наместо „Пулс“, се бранат обвинетите полицајци

„Називот на фирмата беше истакнат на вратата, на бел лист. Си пишуваше ДПТУ Класик ДМ ДООЕЛ Кочани“. Вака обвинетиот полицаец Кире Богатинов, се брани пред судот, откако Обвинителството откри дека казните кои биле за дискотеката „Пулс“ тој и неговите колеги ги пишувале на неактивна фирма.Тој посочи дека истата фирма била заведена и во Централниот регистар, па затоа ја навеле во службените документи. Обвинетите тврдат дека не знаеле дека станува збор за неактивна фирма сè до моментот кога против нив биле поднесени кривични пријави.„За фирмата дека е неактивна дознав кога ми беше поднесена кривична пријава“, рече обвинетиот Александар Темелков, додавајќи дека, според негови сознанија, прекршочна постапка може да се води и за неактивна фирма, освен ако таа не е избришана од регистар.Обвинетиот Горан Лазаров изјави дека ваквата пракса била вообичаена, односно полицијата при контроли се води според називот на фирмата истакнат во објектот. Тој сведочеше дека при контрола во дискотеката „Пулс“ биле затекнати малолетници, а сопственикот Дејан Јованов не сакал да се легитимира.„Лицето за мене е познато. Кога го познаваме од градот со име и презиме, нема потреба дополнително да го идентификуваме“, рече Лазаров.Тројцата полициски службеници се обвинети за злоупотреба на службената положба, бидејќи прекршочните пријави ги воделе на фирма која не била активна, со што, според обвинението, дискотеката „Пулс“ избегнала да ги плати казните за присуство на малолетници.

Македонија | пред 2 седмици

2 нед.

Милошоски: Имам само македонски пасош, СДСМ е „печатар за лаги“

Пратеникот од ВМРО-ДПМНЕ, Антонио Милошоски, ги отфрли обвинувањата на СДСМ дека поседува бугарски пасош и учествувал на изборите во Бугарија, оценувајќи ги како невистини и политичка манипулација.„Да биде јасно: отсекогаш имам само македонски пасош. И ова не е првпат СДСМ и нивните гласноговорници да пласираат вакви невистини“, напиша Милошоски.Тој обвини дека раководството на СДСМ е во сериозен внатрепартиски раздор и наместо да се справи со сопствените проблеми, како што вели, продолжува со напади и дискредитации.„Наместо да понудат решенија за државните предизвици, тие се занимаваат со измислици и очајни обиди за дефокусирање од сопствената одговорност“, наведува Милошоски.Во реакцијата, тој потсети и на предлог-закон од 2021 година, поднесен од пратеничката група на ВМРО-ДПМНЕ, со кој се предвидуваше пратениците да немаат друго државјанство освен македонското, посочувајќи дека тогашното парламентарно мнозинство на СДСМ и ДУИ не го поддржало.Претходно, СДСМ обвини дека повеќе функционери од ВМРО-ДПМНЕ имаат бугарски пасоши и гласале на изборите во Бугарија, поставувајќи прашања за нивниот политички став и очекувања од новата влада во Софија.

Коментари | пред 2 седмици

2 нед.

Албанците нема да бидат заложници, внесете ги Бугарите во Уставот, бара Беџети

Пратеникот од ДУИ, Блерим Беџети, побара итно носење на уставните измени со кои Бугарите би се внеле во Уставот, оценувајќи дека повеќе нема простор за одложување и политички калкулации.„Уставните измени не можат и не смеат повеќе да чекаат. Немаме бескрајно време. Секој ден без одлука е чекор назад и реална цена за државата и за граѓаните“, изјави Беџети.Тој посочи дека, според него, регионот се движи напред, додека Македонија останува заглавена во, како што рече, барање оправдувања.„Ова повеќе не е прашање на време, туку на иднината на нашите деца. Времето на политички калкулации заврши. Албанците немаат време да чекаат и нема повеќе да бидат заложници на политички игри“, нагласи Беџети.Според него, одлуките мора да се носат веднаш, бидејќи секое одложување ќе има долгорочни последици.„Ако сакаме да одиме напред како држава, мора да носиме одлуки сега. Уставни измени сега, не утре“, порача Беџети.Ваквиот став доаѓа во момент кога Владата е претпазлива околу уставните измени, предупредувајќи дека постои ризик од нови блокади во евроинтегративниот процес, додека дебатата за внесување на Бугарите во Уставот останува едно од клучните политички прашања во земјата.

Коментари | пред 2 седмици

2 нед.

Родителите на загинатите во „Пулс“: Додека ние стоиме над гробовите на нашите деца, некој бара полесни услови и удобност

„Здружението на граѓани 16ти Март 2025“ на социјалните мрежи реагираше во врска со барањето на одбраната на Дејан Јованов -Деко, првообвинетиот за пожарот во „Пулс“, кој е сопственик на т.н. дискотека, тој да оди во куќен притвор.„Како семејства на починатите млади лица, ова барање го доживуваме како навреда за нашата болка и понижување на споменот на нашите деца. Додека ние живееме со празни домови, со недопрени соби и со тишина што нè гуши секој ден, наместо одговорност гледаме упорни обиди за бегство од тежината на одговорноста.Особено загрижува фактот што олеснување на мерките веќе е дозволено кај поголем дел од обвинетите, што создава чувство дека оваа трагедија се минимизира и дека човечките животи стануваат споредна работа.Додека ние стоиме над гробовите на нашите деца, некој бара полесни услови. Додека ние секој ден ја преживуваме истата ноќ, некој бара удобност. Дали воопшто се запрашавте – имаа ли нашите деца "олеснителни услови" додека умираа?Имаме доверба дека Јавното обвинителство и судот ќе постапат строго согласно закон и врз основа на докази, и дека нема да дозволат правдата да биде обесмислена со вакви барања.Затоа јавно и директно го прашуваме обвинетиот Дејан Јованов Деко:Со кое лице бараш олеснување на мерките, додека 63 семејства секој ден ја преживуваат истата загуба?Дали навистина сметаш дека твојата здравствена состојба е потешка од празнината што остана во нашите домови?Дали барем еднаш помисли на тие 63 животи кога го поднесуваше ова барање?Дали помисли на повеќе од 200 повредени, кои и денес се борат со последиците?Дали знаеш колку од нас, семејствата на починатите и преживеаните, сè уште живеат со трауми, болка, страв и неизвесност?Што им порачуваш на нашите семејства, на преживеаните, кои секој ден повторно и повторно ја преживуваат истата ноќ?Дали сметаш дека нашата болка е помала од твојата?Дали воопшто може и да ја споредиш?Што значи за тебе човечност, морал, совест и одговорност?Дали имаш храброст да застанеш пред родителите и семејствата на починатите млади лица и пред повредените, и да им погледнеш во очи?Ние не бараме пресуда на улица.Бараме правда во судница.И ќе ја бараме – сè додека не ја добиеме“, стои во објавата.

Македонија | пред 2 седмици

2 нед.

Потпретседателот Венс на пат кон Исламабад со американска делегација

Американскиот потпретседател Џеј Ди Венс, заедно со американска делегација, во наредните часови треба да пристигне во Пакистан, каде ќе се водат разговори поврзани со ситуацијата во Иран, изјави претседателот Доналд Трамп во интервју за New York Post.Трамп додаде дека и самиот би бил подготвен да се сретне со иранските лидери доколку се постигне напредок во разговорите.Од иранска страна, висок функционер изјави дека Техеран позитивно ја разгледува можноста за учество во потенцијални мировни преговори со САД, но конечна одлука сè уште не е донесена. Според него, Пакистан игра важна посредничка улога во обидите да се намалат тензиите и да се обезбеди учество на Иран.Извор вклучен во разговорите посочи дека двонеделното примирје истекува на 22 април во 20 часот според источноамериканско време.Во меѓувреме, односите меѓу САД и Иран остануваат напнати, особено околу Ормускиот теснец, клучен морски премин. Иран ја засили контролата врз сообраќајот во теснецот, додека САД ја продолжуваат блокадата на иранските пристаништа. Двете страни меѓусебно се обвинуваат за прекршување на примирјето.Иранскиот претседател Масуд Пезешкијан повика да се искористат сите можности за намалување на тензиите со Вашингтон, но нагласи дека претпазливоста и недовербата кон САД остануваат „непобитна неопходност“, пренесе државната агенција IRNA.

Свет | пред 2 седмици

2 нед.

Петровска со порака за роденденот на СДСМ: Промената на подобро е неопходна, ако не се промениме, ќе исчезнеме

Пратеничката од редовите на СДСМ, Славјанка Петровска, упати силна порака по повод 35-годишнината од формирањето на партијата, нагласувајќи дека на социјалдемократите им е неопходна итна и длабока трансформација за да опстанат на политичката сцена.„35 години, не се само бројка. СДСМ не се само четири букви. Тоа се многу повеќе, многу поважно. СДСМ е идеологија, илјадници животни приказни, бројни државнички одлуки, креирање добри политики и нивно спроведување, идеологија која спојува различности и почитува поинакви.СДСМ е многу повеќе од статистика и празни фразни.И синото и црвеното носат своја победа, и розата и тупаницата носат порака, носат идеологија, носат подобро утре. Сме губеле, сме победувале, но секогаш сме се менувале, на подобро, се разбира.Промената на подобро е неопходна, суштинска, за да може да успееме, за да победиме, за Македнија. Ако не се промениме, ќе исчезнеме и затоа час поскро да започнеме со трансформација.Среќен роденден, моја СДСМ“, напиша Петровска.

Македонија | пред 2 седмици

2 нед.

(Фото) Пожар во НП Маврово, зафатени 18 хектари шума

Вчера, во 16:30 часот бил забележан пожар на територијата на Националниот парк Маврово, кој зафатил површина од околу 18 хектари. Оттаму информираат дека била опожарена дрвна маса на поединечни стебла од јавор, цреша, слива, како и квалитетна букова шума.„Благодарение на брзата реакција и големата посветеност на службата за заштита на природата, пожарот беше локализиран во 23:00 часот. Интервенцијата продолжи и во раните утрински часови, од 04:00 до 08:00 часот наредниот ден, кога пожарот беше целосно изгаснат.Нашите тимови работеа непрекинато со цел да спречат негово повторно активирање и ширење, заштитувајќи ја богатата флора и фауна и целокупниот екосистем на паркот. Благодарение на нивната пожртвуваност, избегнати се поголеми последици.Апелираме до сите посетители, туристи и локално население да бидат максимално внимателни при движење во природа. Строго се забранува палење оган во шума, фрлање догорчиња од цигари и оставање отпад. Секој невнимателен чекор може да предизвика сериозна штета со долгорочни последици.Националниот парк Маврово континуирано се грижи за заштита и зачувување на природното наследство и останува целосно посветен на својата мисија. Но, за да ја зачуваме природата, неопходна е заедничка одговорност.Да ја чуваме природата – таа ни припаѓа на сите“, стои во објавата.

Македонија | пред 2 седмици

2 нед.

Движење ЗНАМ: Упатуваме искрени честитки до господинот Румен Радев за остварениот изборен резултат

Движењето ЗНАМ за Наша Македонија упатува искрени честитки до господинот Румен Радев, како и до партијата Прогресивна Бугарија за остварениот изборен резултат на парламентарните избори во Република Бугарија. Очекуваме новата Влада да придонесе кон натамошно зајакнување на демократските процеси, владеењето на правото и доследно почитување на европските вредности и стандарди, вклучително и исполнување наКопенхашките критериуми, велат од ЗНАМ.„Движењето ЗНАМ изразува искрена надеж дека во претстојниот период ќе се отвори простор за зрел, отворен и конструктивен дијалог, кој ќе овозможи надминување на отворените прашања меѓу двете држави. Во таа насока, остануваме цврсто посветени на потребата од заштита и унапредување на правата на македонското малцинство во Република Бугарија, како и на целосно почитување на македонскиот идентитет, јазик, историја и културно наследство.Воедно, го реафирмираме ставот на Движењето ЗНАМ за Наша Македонија дека уставни измени со цел внесување на бугарската заедница нема да бидат прифатени без јасни, цврсти и недвосмислени гаранции дека тоа претставува последно условување во процесот на деблокада на европскиот пат на државата.Веруваме дека со политичка зрелост и взаемна почит може да се создаде нова клима на доверба која ќе придонесе за вистинско унапредување на билатералните односи меѓу двете држави. Таквиот развој е од суштинско значење и за стабилноста на регионот, но иза непречено продолжување на европскиот интегративен пат на Република Македонија, како стратешка определба на нашите граѓани.Дијалогот, взаемната почит и принципиелниот пристап остануваат единствениот одржлив пат кон стабилни односи и европска перспектива во која Македонија ќе биде третирана со достоинство и рамноправност“, се вели во соопштението.

Македонија | пред 2 седмици

2 нед.

(Видео) Гори објект во Шуто Оризари, најверојатна причина е стара електрична инсталација

Голем пожар изби денеска во објект во скопската населба Шуто Оризари, објави порталот на ромски јазик „Рома прес“.Според објавата на „Рома прес“, најверојатна причина за пожарот е стара електрична инсталација.Нема информации за повредени и за причинета материјална штета.

Скопје | пред 2 седмици

2 нед.

Трамп: Пакистанскиот генерал не ми препорача ништо во врска со блокадата на Иран

Американскиот претседател Доналд Трамп денеска ги демантираше извештаите дека началникот на пакистанската армија, генерал Асим Мунир, му посочил оти поморската блокада на Иран претставува пречка во преговорите со Техеран.Трамп за американскиот медиум The Hill изјави дека Мунир „не препорачал ништо за блокадата“, со што ги негираше претходните наводи.Демантот следи по тврдењата на пакистански извори пренесени од агенцијата Anadolu Agency, според кои генерал Мунир во телефонски разговор му рекол на Трамп дека блокадата е „пречка во преговорите“ со Иран, на што американскиот претседател наводно одговорил дека ќе го „разгледа советот“.Телефонскиот разговор се одржал пред можниот втор круг преговори меѓу САД и Иран во Пакистан, при што Исламабад продолжува да игра улога на посредник меѓу двете страни.

Свет | пред 2 седмици