ГЕРМАНИЈА

Германија без јавен превоз: 100.000 работници на дводневен штрајк

Автобусите, трамваите и возовите низ цела Германија денеска наутро престанаа да сообраќаат откако локалните транспортни работници се одзваа на повикот на синдикатот за јавен сектор Верди да организира дводневен штрајк.Синдикатот се надева дека ќе стекне влијание во преговорите кои се однесуваат на работните услови, особено работното време и работа во смени, додатоци за ноќна и викенд работа и плати. Конкретните барања се разликуваат од сојузна држава до сојузна држава.Преговорите за колективниот договор за плати се однесуваат на околу 150 компании за автобуски, трамвајски и локални железнички услуги со околу 100.000 вработени во сојузни држави низ Германија, вклучувајќи ги градовите Берлин и Хамбург. Некои локални превозници веќе најавија воведување на посебни возни редови.Штрајкот претставува втора акција на национално ниво во тековниот круг на колективни преговори. За време на претходниот штрајк на 2 февруари, локалниот јавен превоз во голем дел од Германија речиси целосно запре.

Свет | пред 1 месец

Мајка во Германија со нож се заканувала на ќерка

Во Бремен, Германија, вчера попладне се случил страшен инцидент кога мајка со нож се заканила на својата деветгодишна ќерка и ѝ нанела повреди. Дејството предизвикало паника кај девојчето, кое во страв побегнало на балконот и се фрлило од првиот кат на зградата, соопшти полицијата. Трагедијата била избегната благодарение на сосед кој успеал да ја фати.Според полицискиот извештај, 62-годишниот сосед ја следел ситуацијата од прозорец и успеал да го фати девојчето во моментот на падот. Девојчето претрпело само полесни повреди. Засега не е познато што ја предизвикало заканата во семејниот стан.Полициските сили кои интервенирале на лице место ја уапсиле 38-годишната мајка. Жената, која има психички проблеми, е сместена на клиничко лекување. Девојчето е згрижено и се наоѓа кај својот татко.

Свет | пред 1 месец

Германија го укинува спорниот закон за греење

Партнерите во владејачката коалиција во Германија се договорија да го повлечат спорниот закон за греење, усвоен од претходната влада, и да им дозволат на граѓаните да продолжат да инсталираат системи за греење на масло и гас.Во 2023 година, Зелените издејствуваа закон според кој поголемиот дел од новите системи за греење мора да користат најмалку 65 отсто енергија од обновливи извори. Јавноста бурно реагираше, а тричлената коалиција се распадна, наведува Reuters. Новата влада на CDU и SPD, предводена од Фридрих Мерц, во коалицискиот договор ветила дека законот ќе биде укинат.„Новата законска регулатива нема да содржи одредби за задолжителна инсталација или замена на постоечките функционални системи за греење“, стои во документот. Тоа значи дека системите на гас и масло ќе можат да се користат и понатаму.Сепак, законот предвидува постепено зголемување на уделот на еколошки прифатливо гориво, како биометан, на најмалку 10 отсто до 2029 година, со дополнително зголемување во три фази до 2040 година.Граѓаните кои сакаат да го заменат стариот систем за греење или да избегнат фосилни горива при изградба на нов објект, ќе можат да сметаат на државна поддршка, најмалку до 2029 година.Германија има за цел да постигне климатска неутралност до 2045 година, но во борбата против климатските промени, градежниот и транспортниот сектор заостануваат. Според проценки, околу 80 отсто од германските домови се греат на ложливо масло или гас. Стручњаците, сепак, предупредуваат дека можеби нема да има доволно биометан за задоволување на побарувачката на домаќинствата.

Свет | пред 1 месец

Германскиот министер за одбрана жестоко го нападна Трамп

Германскиот министер за одбрана Борис Писториус остро го критикуваше американскиот претседател Доналд Трамп, обвинувајќи го дека испратил погрешни сигнали до рускиот лидер Владимир Путин и со тоа ја ослабнал позицијата на Украина во војната.Во интервју за германското радио „Дојчландфунк“, по повод четвртата годишнина од целосната руска инвазија врз Украина, социјалдемократот Писториус, кој според последните анкети важи за најпопуларен германски политичар, изјави дека односот на Трамп кон Кремљ го зајакнал самодовербата на Путин.„За жал, американскиот претседател влијаеше врз текот на војната и врз самодовербата на Путин кога му простре црвен тепих и го пречека како пријател на Алјаска, додека истовремено целосно се откажа од воената поддршка за Украина“, рече Писториус.Трамп и Путин се сретнаа на Алјаска во август 2025 година без присуство на европски лидери, што предизвика загриженост во Европа поради впечатокот дека Вашингтон се обидува да стави крај на војната без учество на Киев и европските сојузници.Американскиот претседател во текот на мандатот повеќепати го менуваше тонот во однос на војната, а на годишнината од инвазијата не објави јавна порака за поддршка на Украина. Писториус ја критикуваше и Белата куќа затоа што прерано ја исклучила можноста за украинско членство во НАТО од преговорите.„Американскиот претседател, за жал и непотребно, многу рано го тргна членството во НАТО од маса. Тоа беше тема што можеше да се искористи како преговарачки инструмент за други прашања“, изјави тој.Ова не е првпат Писториус јавно да ја критикува политиката на Трамп кон Украина. Минатата година тој изјави дека претседателот погрешно го проценил сопственото влијание врз Путин за време на разговорите за прекин на огнот.Најновите изјави доаѓаат неколку дена пред посетата на германскиот канцелар Фридрих Мерц на Вашингтон, каде што најави дека ќе ја претстави „заедничката европска позиција“ за трговијата, откако администрацијата на Трамп одлучи да воведе глобални царини од 15 проценти.

Свет | пред 1 месец

Сè повеќе лекари од странство во Германија

Во Германија работат сè повеќе лекари од странство. Во 2024 година, 64.000 лекари немале германско државјанство, што е 13 отсто од сите лекари, наведува Федералниот завод за статистика.Десет години претходно, бројот на странски лекари бил 30.000, односно седум отсто.Во општа и стоматолошка медицина, во 2024 година работеле 121.000 лекари од странство, што претставува речиси четвртина од сите лекари. Дел од нив во меѓувреме стекнале германско државјанство.Меѓу оние кои добиле пасош, 42 отсто поминале помалку од десет години во Германија.Во 2024 година биле признати 7.000 странски дипломи. Меѓу нив, 21 отсто биле дипломи на Германци кои студирале медицина во странство – главно за да ги заобиколат германските ограничувања за упис.Најмногу од нив студирале во Австрија или Унгарија.Втората најголема група со признати странски дипломи биле Сиријците. Во 2024 година биле признати 800 сиријски дипломи од општа медицина и 100 од стоматологија.

Свет | пред 1 месец

Германија ќе воведе горна граница за плаќање кеш

Германија ќе воведе горна граница за плаќање кеш, прв пат во јуни 2027 година, како дел од спроведувањето на новата уредба на Европската унија чија цел е спречување перење пари и отежнување на финансирање тероризам.До сега, плаќањата во кеш во Германија не беа ограничени, но тоа се менува со новите правила. Правната основа ја обезбедија Европската унија и Европскиот парламент уште во 2024 година преку пакетот мерки против перење пари (Уредба 2024/1624 и Директива 2024/1640), објавен во Јуни 2024 во Службен весник на ЕУ.Од 10 јули 2027 година, во деловните трансакции со кеш може да се плати најмногу 10.000 евра. Сè што надминува овој износ, мора да се плати преку банкарска уплата, платежни картички или дигитални сервиси за плаќање. Ограничувањето се однесува само на трансакции каде барем едната страна е деловен субјект. На пример, купување автомобил од трговец подлежи на лимитот, додека приватна продажба на автомобил помеѓу две физички лица не е ограничена, ако нема регистрирана дејност.Истиот исклучок важи и за купопродажба на недвижности помеѓу приватни лица, но јавните бележници веќе мора да го евидентираат начинот на плаќање.Дополнително, при плаќања во кеш над 3.000 евра, трговците и давателите на услуги ќе мора да ја проверат и запишат идентитетот на купувачот, што значи дека при купување поскапи производи како часовници, лаптопи или мебел, купувачите ќе треба да покажат лична карта.Во споредба со другите земји членки на ЕУ, Германија се смета за една од последните поголеми економии која воведува вакво ограничување. Во Франција и Шпанија лимитот веќе изнесува 1.000 евра, додека во Грција кеш плаќањето е возможно само до 500 евра. Во некои соседни држави дополнително се намалува достапноста на банкоматите, поттикнувајќи безготовинско работење.

Свет | пред 1 месец

Обилни снежни врнежи го блокираа аеродромот во Минхен – патници на Луфтханза ја поминаа ноќта во авион

Патниците на летот LH2446 на компанијата Луфтханза од Минхен до Копенхаген ја поминаа ноќта во авионот откако летот беше откажан поради обилни снежни врнежи и затворање на аеродромот.Летот беше закажан за петок во 21:30 часот, но по повеќе одложувања целосно беше откажан додека патниците веќе беа качени во авионот Ербас A320neo, кој се наоѓаше на оддалечена позиција на пистата, пренесува германскиот портал T-online.Според пишувањата на медиумите, екипажот ги информираше патниците на секои 30 минути за обидите да се организираат автобуси кои би ги вратиле до терминалот.Околу два часот по полноќ, патниците беа информирани дека аеродромот е затворен и дека нема повеќе возачи на автобуси, па мораа да останат во авионот до утринските часови. Ситуацијата беше дополнително отежната поради конфигурацијата на кабината наменета за кратки летови, со тесни седишта и без ќебиња и перници, додека залихите на храна и пијалоци беа ограничени.Аеродромот во Минхен, едно од главните јазли на Луфтханза, има строга забрана за ноќни летови од полноќ, што дополнително го комплицираше решавањето на ситуацијата. Патниците беа пренесени до терминалот дури во раните утрински часови и пренасочени на други летови за Копенхаген. Првиот утрински лет во 6:40 часот исто така каснеше околу еден час.Од Луфтханза соопштија дека причината за нарушувањето биле обилните снежни врнежи кои довеле до привремено затворање на пистите и дека компанијата жали за непријатностите кои ги претрпеле патниците.

Свет | пред 1 месец

Дали на Германија ѝ пропаѓа големата набавка на дронови поради човек поврзан со Епстин?

Набавката на дронови-камикази во Германија, вредна 3,5 милијарди долари (2,98 милијарди евра), предизвика сериозна политичка криза поради вмешаноста на технолошкиот милијардер Питер Тил, кој во јавноста често се поврзува со осудениот сексуален престапник Џефри Епстин, јавува Анадолу.Спорниот договор требаше да ја означи првата голема германска набавка на т.н. „лутечка муниција“, но во моментов е под сериозно преиспитување поради улогата на Тил како акционер во производителот „Старк Дифенс“. Германскиот министер за одбрана Борис Писториус побара од компанијата да го разјасни влијанието на Тил пред да биде потпишан договорот, покажувајќи дека Берлин ја зема предвид јавната реакција и безбедносните дилеми.Контроверзиите се продлабочија поради претходните деловни и приватни контакти меѓу Тил и Епстин. Според документи на американското Министерство за правда, тие разменувале електронска пошта и се среќавале во периодот од 2014 до 2019 година, разговарајќи за инвестициски можности. Дополнително, во германската јавност се појавија и наводи дека Епстин посредувал во контакти меѓу Тил и лица поврзани со руски разузнавачки структури, што отвори сериозни безбедносни прашања.Од германското Министерство за одбрана до законодавците е доставен доверлив извештај во кој се наведува дека Тил поседува само пасивен малцински удел преку неговиот фонд „Тил Капитал“, без оперативна контрола врз компанијата. Според документот, мнозинскиот пакет акции е во рацете на основачкиот тим и вработените, додека остатокот е распределен меѓу околу 50 акционери.И покрај уверувањата, дебатата ја засенува планираната набавка на системите „Виртус“ и „Хелсинг HX-2“. „Виртус“ е систем со вертикално полетување кој, според спецификациите, може да пробие тенковски оклоп со дебелина до 80 сантиметри и да биде подготвен за употреба за десет минути. Помалиот „Хелсинг HX-2“, тежок околу 12 килограми, се лансира со катапулт и е наменет за поагилни операции. Двата системи користат напредни алгоритми на вештачка интелигенција за идентификација на цели, но германските власти инсистираат конечната одлука за напад да ја носи човечки оператор.Доколку договорот биде одобрен, тоа ќе претставува пресвртница за Бундесвер, кој за првпат би добил сеопфатни офанзивни способности со беспилотни летала. Опремата е планирана за распоредување во 45-та оклопна бригада, активирана во Литванија во април 2025 година, со цел зајакнување на источниот бедем на НАТО.Министерот Писториус нагласи дека расчистувањето на сопственичката структура е прашање од национална безбедност, додека Зелената партија продолжува со притисокот, предупредувајќи на долгорочните импликации од партнерство со личност од калибарот на Тил. Министерството за одбрана, пак, смета дека ваквиот договор е неминовен чекор во услови на современо војување, но опозицијата предупредува дека стратешките ризици не смеат да се занемарат.

Свет | пред 1 месец

(Видео) Германија донира 600.000 евра опрема за МВР: Моторни возила, термовизиски камери, софтвери, специјални возила за воздухопловната единица

Министерот за внатрешни работи Панче Тошковски денеска во кругот на Министерството за внатрешни работи присуствуваше на церемонија на примопредавање на донација од Сојузна Република Германија, на која присуствуваше и амбасадорот на Германија во Република Северна Македонија, Н.Е. Петра Дрекслер, како и претставници од Канцеларијата за врски на Сојузната полиција на СР Германија.Донацијата, во вкупна вредност од околу 600.000 евра реализирана во претходниот период, опфаќа моторни возила, термовизиски камери, компјутерска опрема и софтвери, специјализирани уреди за проверка на документи, како и специјални возила за воздухопловната единица. Оваа опрема е наменета за унапредување на капацитетите на Министерството во делот на граничното управување, борбата против трговијата со луѓе и криумчарењето мигранти, криминалистичко-разузнавачката анализа и форензичките испитувања.Министерот Тошковски истакна дека донацијата претставува симбол на довербата и силното партнерство меѓу двете земји.„Оваа церемонија не е само формално примопредавање на опрема, туку јасна порака дека Германија стои рамо до рамо со Македонија во заедничката борба против организираниот криминал, во заштитата на нашите граници и во обезбедувањето на сигурноста на граѓаните. Поддршката што ја добиваме не се мери само во материјални средства, туку и во знаење, обуки и размена на искуства, што значи долгорочно зајакнување на капацитетите и професионализација на македонската полиција“, нагласи Тошковски.Тој изрази благодарност до Сојузната полиција на СР Германија и до Амбасадата на Германија во Скопје за континуираната поддршка, посочувајќи дека шесте реализирани обуки за македонските полициски службеници се доказ за стратешката и долгорочна соработка меѓу двете институции.Министерот потенцираше дека ваквата помош претставува значаен придонес во зајакнувањето на институционалните капацитети и унапредувањето на безбедноста, како и во остварувањето на заедничката визија за сигурна, стабилна и европска Македонија.„Со обезбедувањето на техничка опрема ја продолжуваме нашата долгогодишна доверлива полициска соработка. Зајакнувањето на капацитетите на Северна Македонија во делот на граничниот надзор, во борбата против трговијата со луѓе, илегалната миграција и прекуграничниот криминал е во наш заеднички европски интерес. Заедно работиме на јакнење на Европа – денес и во иднина.“, истакна амбасадорката Дрекслер.

Македонија | пред 1 месец

Мерц: Војната ќе заврши дури кога едната од двете страни ќе биде исцрпена, воено или економски

Германскиот канцелар Фридрих Мерц оцени дека шансите за брз крај на војната во Украина преку преговори се мали.Тој за германските весници НБР и „Рајнфалц“ изјави дека според неговата проценка војната ќе заврши дури кога едната од двете страни ќе биде исцрпена, „било воено или економски“.„Разумот и хуманитарните аргументи нема да го убедат рускиот претседател Владимир Путин. Тоа е горчлива вистина“, рече Мерк.Според неговите зборови, целта на европските напори е „да се спречи руската држава да ја продолжи воената акција и неговото финансирање“, пренесува Шпигел. Мерц истакна дека смета за практично невозможно нормалните односи со Путин некогаш да се вратат.„Кога ќе го погледнам овој режим и овој слеп, лут терор, имам малку надеж“, наведе германскиот канцелар.Според Мерк, руската „владејачка елита“ не може без војна во блиска иднина и мора да ја одржува воената машинерија во функција затоа што немаат план што друго да прават со стотици илјади војници, од кои некои се тешко трауматизирани, кога се враќаат од фронтот.

Свет | пред 1 месец

Секој четврти работодавач во Германија не пријавил работници

Илјадници работодавачи во Германија одбиле да исплатат минимална плата во текот на 2025 година. Тоа го соопшти единицата за финансиска контрола на непријавена работа по инспекцијата на околу 25.000 работодавачи, кога било утврдено дека речиси секој четврти работодавач не пријавил работници.Со инспекцијата било утврдено дека прекршувањето на законот за минимална плата било особено често во угостителството, пренесе Шпигел.Единицата за финансиска контрола на непријавена работа извршила 25.765 пати инспекции кај работодавачи низ цела Германија во 2025 година и покренала постапки во 6.121 случај поради сомнеж за прекршување на законот за минимална плата.Се истакнува дека повеќе од 500 постапки биле покренати против шпедитерски компании, градежни фирми и фризерски и козметички салони.Постапки биле покренати и против работодавачи во областа на такси превозот, продавниците за пијалаци и службите за обезбедување.Месечната бруто минимална плата во Германија за полно работно време минатата година изнесувала 2.161 евро.

Свет | пред 1 месец

Германскиот министер: Го делам разочарувањето што го изрази Рубио

Германскиот министер за одбрана Борис Писториус ги предупреди САД дека спроведувањето еднострани политики во денешниот свет на конкурентни сили нема да донесе резултати, нагласувајќи ја потребата од сојузници и транс-атлантска соработка.На Минхенската безбедносна конференција, Писториус истакна дека ниту САД не можат да дејствуваат самостојно и дека им е потребна „предвидливост“ и „доверливост“ од Европа. Во врска со неодамнешната криза во НАТО, предизвикана од обидот на тогашниот претседател Доналд Трамп да го преземе Гренланд, министерот рече:„Ставувањето под прашање на територијалниот интегритет и суверенитет на членка на НАТО; исклучувањето на европските сојузници од преговори кои се клучни за безбедноста на континентот; сето тоа му штети на нашиот сојуз и ги засилува нашите противници.“Писториус додаде дека ја дели фрустрацијата што претходно ја изрази американскиот сенатор Марко Рубио поради неефикасноста на меѓународните организации во решавањето на конфликти и кризи, но нагласи дека решението е „реформа и оживување“ на тие институции, а не нивно напуштање.Коментаризирајќи ја најновата американска одбранбена стратегија, која ја става Европа во втор план за да се даде предност на одбраната на татковината, безбедноста на западната хемисфера и спротивставувањето на Кина, Писториус изјави дека пристапот е „реалистичен и прагматичен“.За иднината на транс-атлантското партнерство, министерот нагласи потреба од јасна и праведна распределба на товарот:„Европа мора да превземе лидерство во обезбедувањето силни конвенционални сили и да преземе поголема одговорност за своето соседство, додека САД во догледна иднина ќе продолжат да обезбедуваат стратешка и нуклеарна поддршка.“Овој апел доаѓа во момент кога Европа балансира помеѓу зајакнувањето на своите одбранбени капацитети и одржувањето на сојузништвото со САД, додека глобалните сили сè поагресивно го тестираат меѓународниот поредок.

Свет | пред 1 месец

Берлинскиот аеродром затворен поради голомразица: Сите летови стопирани, хаос во воздушниот сообраќај

Берлинскиот аеродром соопшти дека денеска ќе остане затворен поради голомразица и дека не е познато кога ќе продолжат летовите.„Поради временските услови, полетувањата и слетувањата во моментов не се можни“, наведе аеродромот на својата веб-страница, пренесе Ројтерс.Авиокомпаниите мораа да ги одложат или откажат летовите откако снег и леден дожд погодија аеродромот во Берлин во четвртокот.Снег и леден дожд паѓаа во текот на ноќта меѓу среда и четврток, како и вчера наутро во источна Германија, предизвикувајќи нарушувања во патниот и железничкиот сообраќај.

Свет | пред 1 месец

Сериозен инцидент во Германија: Кондуктер убиен по расправија за билет

26-годишен грчки државјанин се соочува со обвинување за убиство од небрежност во Германија, откако наводно претепал 36-годишен кондуктер на воз до смрт поради расправија околу билет.Според германскиот весник Bild, инцидентот се случил доцна в понеделник, кога вработениот во железницата се приближил до група од четворица патници на возраст меѓу 20 и 30 години за време на контрола на билети. Осомничениот наводно го нападнал кондуктерот откако бил замолен да го напушти вагонот поради неприкажување валиден билет.Полицијата соопшти дека нападот се случил кратко по заминувањето на возот од станицата. Жртвата претрпела толку сериозни повреди што на лице место била извршена реанимација. Портпаролот на полицијата подоцна потврди дека уапсениот е грчки државјанин без регистрирана постојана адреса во Германија. Одделот за кривични истраги на Kaiserslautern води истрага за убиство.Германските медиуми известија дека, и покрај напорите на лекарите да го спасат, кондуктерот починал во Универзитетската болница во Хомбург еден ден по приемот. Во негова чест, во 16 часот по грчко време, низ сите возови и железнички станици во земјата била одржана минута молчење.

Свет | пред 2 месеци

„Луфтханза“ потврди: Исчезнатата Лаура отпатувала за Германија на денот на исчезнувањето

Авиокомпанијата „Луфтханза“ потврди дека тинејџерката која околу еден месец се водеше за исчезната од Патра, на 8 јануари, денот на нејзиното исчезнување, отпатувала за Франкфурт, Германија.Шеснаесетгодишната Лаура последен пат била видена на 8 јануари во близина на југозападниот град Патра. Полицијата соопшти дека девојката го продала својот мобилен телефон пред да исчезне, со цел да не може да биде лоцирана. Потоа, парите добиени од продажбата ги искористила за да отпатува со такси до Атина. Службениците утврдиле и дека таа ги избришала сите свои профили на социјалните мрежи еден ден пред исчезнувањето.Родителите на девојката, германски државјани кои живеат постојано во Рио, го пријавиле нејзиното исчезнување, по што хуманитарната организација „Smile of the Child“ издаде аларм.Портпаролката на полицијата, Константија Димоглиду, во гостување на државниот радиодифузер ЕРТ претходно во текот на денот изрази незадоволство поради тоа што биле испратени пет барања до авиокомпанијата од 12 јануари наваму, со цел да се утврди дали Лаура патувала со нивен авион, но останале без одговор.Таа рече дека надлежните органи стапиле во контакт со сите авиокомпании што извршуваат летови кон Германија во првите 24 часа, но дека компанијата што го издала билетот „се уште не одговорила“.Димоглиду појасни дека немало наредба од јавен обвинител со која авиокомпанијата би била обврзана да одговори, бидејќи случајот не се однесува на кривично дело, но дека полицијата имала согласност од родителите да побара информации.

Свет | пред 2 месеци

Исчезнатата тинејџерка во Грција отпатувала во Германија на денот на исчезнувањето

Исчезна 16-годишно девојче во Грција. Грчката полиција потврди дека исчезнатата тинејџерка патувала со авион за Германија на првиот ден од нејзиното исчезнување, изјави портпаролката Константија Димоглиду во интервју за државната телевизија ЕРТ.Шеснаесетгодишната Лаура последен пат била видена на 8 јануари во близина на југозападниот град Патра. Полицијата соопшти дека девојката го продала својот мобилен телефон пред да исчезне за да не може да се трага по неа. Парите од продажбата ги искористила за да патува со такси до Атина. Службениците исто така утврдиле дека таа ги избришала профилите на социјалните мрежи еден ден пред исчезнувањето.Нејзините родители, германски државјани кои живеат постојано во Рио, пријавиле дека девојката исчезнала, а организацијата „Smile of the Child“ издаде аларм.Димоглиду рече дека авиокомпанијата не одговорила на барањето на полицијата, и покрај тоа што била информирана дека животот на Лаура бил сметан за ризичен. Таа додаде дека властите контактирале со сите авиокомпании што оперираат летови за Германија во првите 24 часа, но авиокомпанијата што издала билет „се уште не одговорила“.„Ова е нешто што можеше да ни биде соопштено во првите часови“, рече таа, повикувајќи се на фактот дека тинејџерката купила билет и отпатувала истиот ден кога исчезнала.Таа објасни дека нема наредба од јавен обвинител за да се обврзе авиокомпанијата да одговори, бидејќи случајот не се однесува на кривично дело.Димоглиду истакна дека недостатокот на соработка од страна на авиокомпанијата не го попречил истражувањето, кое од самиот почеток ја разгледувало можноста дека девојката отпатувала во странство.Таа додаде дека германските власти се известени за исчезнувањето и дека родителите на Лаура ја бараат.

Свет | пред 2 месеци

Штрајк на јавниот транспорт во Германија: автобусите и трамваите запрени

Патниците низ Германија денес се соочија со ледени температури и празни перони, откако десетици илјади работници во јавниот превоз стапија во штрајк по повик на синдикатот Verdi, со што беше запрен автобускиот и трамвајскиот сообраќај во повеќето градови.Verdi, кој ги застапува речиси 100.000 работници во транспортот, повика на штрајк откако минатата недела заглавија преговорите со локалните и државните работодавци за условите на работа. Синдикатот бара пократки смени, подолги паузи за одмор и повисоки плати за ноќна и викенд работа, и покрај тоа што градовите се борат со буџетски ограничувања.Штрајкот ги засегна околу 150 локални транспортни компании во сите 16 германски сојузни држави, вклучувајќи ги Берлин, Хамбург и Бремен.„Една од најголемите координирани акции во локалниот транспорт во последните неколку години, штрајкот започна според планираното“, изјави Серет Кањурт за rbb радио, главен преговарач на Verdi.Следниот круг преговори е закажан за 9 февруари. Тој додаде дека се очекува јавните превозници да се вратат на преговарачката маса. Во Штутгарт, Карлсруе и Фрајбург услугите ќе бидат прекинати цел ден, соопштија синдикалните службеници. Температурите паднаа под нулата во поголемиот дел од земјата, што ја влоши ситуацијата за патниците кои се принудени да бараат алтернативен превоз.И покрај тоа, Deutsche Bahn претходно соопшти дека нивните градски возови S-Bahn во градовите како Берлин, Хамбург, Минхен и Штутгарт, заедно со меѓуградските линии, денес ќе сообраќаат нормално, бидејќи нивните вработени не се членови на синдикатот Verdi. Преговорите меѓу Verdi и здруженијата на работодавците беа напнати, а синдикалните лидери ги обвинуваат локалните власти дека се обидуваат да ги намалат правата и да ги продолжат смените.Во Берлин, преговарачите на Verdi рекоа дека операторите сакаат работниците сами да ги финансираат подобрувањата со одрекување од платено боледување и флексибилно работно време. Следниот круг преговори е закажан за 9 февруари. Синдикалните лидери предупредија дека би можеле да следат дополнителни штрајкови доколку работодавците не понудат значајни отстапки.

Свет | пред 2 месеци

Германски гигант во криза: Се затвораат 20.000 работни места

Германскиот индустриски гигант „Бош“ (Bosch) ги потврди плановите за затворање на 20.000 работни места, откако профитот минатата година речиси се преполови.Објавата укажува на растечкиот притисок врз некогаш доминантниот производствен сектор и дополнително го зголемува притисокот врз политичарите во Берлин да пронајдат решение.Официјалните податоци покажаа дека стапката на невработеност во Германија пораснала на 6,6 проценти – највисоко ниво во последните дванаесет години. Бројот на невработени во јануари надмина три милиони.„Економската реалност се огледува и во нашите резултати“, изјави извршниот директор на „Бош“, Штефан Хартунг, опишувајќи ја 2025 година како „тешка и, во одредени случаи, болна година“ за компанијата, која е водечки добавувач на автомобилски делови.Овој потег доаѓа во услови на сè поголем пад на автомобилската индустрија во земјата, која долго време беше столб на германското производство.Секторот забрзано ги укинува работните места. Студија од 2025 година откри дека само минатата година во Германија биле укинати повеќе од 50.000 работни места во автомобилската индустрија.Падот на германската автомобилска индустрија прерасна во поширок политички тест за владата во Берлин, како и за Европа во целина.Некогаш крунскиот бисер на економијата, индустријата сега се соочува со предизвици поради актуелната политика за електрични возила, трошоците за енергенси и агресивната конкуренција од кинеските производители, пишува „Политико“.Како што добавувачите слабеат, ризикот се поместува од пониски профити кон трајна загуба на конкурентноста.Со порастот на отпуштањата и одложувањето на инвестициските одлуки, владата на канцеларот Фридрих Мерц е под сè поголем притисок од работниците, синдикатите и лидерите на индустријата да ја преиспита германската индустриска стратегија, додека сомнежите се шират во земјата и низ Европа околу способноста на Германија да остане економска сила.

Свет | пред 2 месеци

Германија инвестира многу во борбени дронови, но во Украина тие не ги погодуваа целите

Германија се подготвува да инвестира 267,7 милиони евра во нов систем за борбени беспилотни летала HX-2 од одбранбениот стартап Хелсинг, како дел од поширокиот план за модернизација на Бундесверот. Сепак, податоците од нивната употреба во Украина отвораат сериозни прашања за реалната ефикасност на системот.Според информации на „Политико“, дроновите HX-2 во украинските услови погодиле цел во околу 36 отсто од мисиите, односно во пет од 14 случаи. Во извештаите се наведува дека најголем дел од неуспесите не се должат на руски контрамерки, туку на технички проблеми, меѓу кои нестабилен видео-пренос, ограничувања при насочување и нефлексибилни сензорски системи.Планот на Берлин предвидува набавка на 4.350 дронови HX-2, заедно со симулатори, опрема за обука и техничка поддршка. Хелсинг, пак, јавно ја истакнува нивната употреба во Украина како доказ за сигурноста на системот и наведува дека дроновите се одобрени за борбена употреба и интегрирани во украинскиот воен команден систем.Од компанијата тврдат дека за време на тестирањата во Германија, Обединетото Кралство и на вежби со британската армија во Кенија, HX-2 постигнал стапка на погодок од речиси 100 отсто. Во исто време, Хелсинг предупредува дека украинските податоци се засноваат на „мал двоцифрен број“ распоредени дронови и дека тоа не овозможува сигурна статистичка проценка.Останува нејасно дали дроновите што Германија планира да ги купи се идентични со оние користени во Украина или станува збор за понова верзија. Поради клаузули за доверливост, компанијата одби да открие детали за евентуалните технички разлики.Двајца извори запознаени со процесот на набавки изјавиле за „Политико“ дека германското Министерство за одбрана ги анализира украинските податоци во својата проценка, но официјален коментар засега нема.Договорот е рамковен и предвидува можност за дополнителна набавка на уште 20.000 дронови, што би можело значително да ја зголеми неговата вкупна вредност. Германскиот парламент, кој мора да ги одобри сите воени договори над 25 милиони евра, треба да се изјасни до крајот на февруари.Во меѓувреме, „Блумберг“ објави дека Германија планира дел од пошироката набавка на ваква муниција да ја подели и со друг производител, со цел да избегне зависност од еден добавувач. Случајот повторно ја отвора дилемата со која често се соочува Бундесверот – како да се балансира итната воена потреба со реалните перформанси на скапата нова опрема, особено кога тестирањето доаѓа од активна воена зона.

Свет | пред 2 месеци

Масовен штрајк на медицинските работници во Германија

Универзитетските болници во Германија денеска беа зафатени од серија штрајкови во рамки на најновиот бран синдикални активности поврзани со спорот за платите во јавниот сектор. Портпарол на синдикатот Верди информира дека штрајкови се одржуваат во 22 болници, додека протести има и во повеќе градови низ земјата.Од синдикатот нагласуваат дека итната медицинска помош и клучните здравствени услуги и понатаму се обезбедуваат за граѓаните. Во Универзитетската болница во Јена, во источната сојузна покраина Тирингија, околу 300 вработени стапиле во целодневен штрајк, а медицинските сестри, лабораторискиот и техничкиот кадар, како и други вработени, излегоа на улиците за да го изразат својот протест.Штрајковите се одвиваат во услови на заострување на несогласувањата околу платите на вработените во германските сојузни покраини. Верди и Германското здружение на државни службеници бараат зголемување на платите од седум проценти, со минимално покачување од 300 евра. Работодавачите ја одбија понудата, а синдикатите ги обвинуваат дека не изнеле алтернативен предлог.Синдикатот најави штрајк и на универзитетите за утре, при што вработените на универзитетите и во истражувачките институции ќе им се приклучат на протестните акции во повеќе од 60 германски градови. Најавени се и дополнителни предупредувачки штрајкови сè до третиот круг преговори, кој треба да се одржи од 11 до 13 февруари.

Свет | пред 2 месеци

Германија нуди еден милион евра за информации за екстремистите што предизвикаа масовен прекин на струјата во Берлин

Германија објави награда од еден милион евра за информации што би довеле до апсење на осомничените крајно левичарски милитанти, чиј подметнат пожар на почетокот на овој месец предизвика масовен прекин на снабдувањето со електрична енергија во Берлин. Полицијата трага по членовите на групата „Vulkangruppe“, која ја презеде одговорноста за нападот, јавува Euronews.Поради пожарот околу 45.000 домаќинства и 2.200 компании на југозападот на германската престолнина останаа без струја речиси една недела, во средината на зимата. Тоа беше најдолгиот прекин на снабдувањето со електрична енергија во градот од крајот на Втората светска војна. Крајно левата „Vulkangruppe“ во повеќе интернет-објави истакна дека нивната цел била да нападнат индустрија на фосилни горива, а не да предизвикаат прекин на електрична енергија.Германскиот министер за внатрешни работи, најави решителен одговор при објавата на наградата. „Нашите безбедносни служби ќе бидат значително засилени во борбата против левиот екстремизам“, рече тој. „Сметам дека е соодветно да се истакне сериозноста на ситуацијата со награда од ваков размер.“Полицијата ќе започне јавна кампања за собирање информации и промовирање на наградата, вклучувајќи делење летоци и поставување постери во берлинскиот метро.Самопрокламираната Vulkangruppe е активна од 2011 година и извршила повеќе подметнувања на пожари во Берлин и околината.Групата е одговорна и за подметнатиот пожар во 2024 година, кој го запре производството во фабриката на „Тесла“ во Берлин. Прекинот на снабдувањето, предизвикан од пожарот што го погодил високонапонскиот кабелски сноп, откри безбедносни пропусти во клучната инфраструктура на германската престолнина.

Свет | пред 2 месеци

Германија најавува пониски даноци за лекови и повисоки за алкохол и тутун

Касата за задолжително здравствено осигурување на Германија (ДАK) предлага од 2027 година да се зголемат даноците за алкохол и тутун, со цел да се надомести финансискиот недостиг што би произлегол од планираното намалување на данокот на додадена вредност за лекови и медицинска опрема. Како што пренесува агенцијата ДПА, данокот за овие производи треба да се намали од сегашните 19 на седум проценти.Германското Министерство за здравство проценува дека ваквата мерка ќе создаде дефицит во здравствениот фонд, кој би изнесувал повеќе милијарди евра. Со цел стабилизација на финансиите, министерката за здравство Нина Варкен формираше експертска комисија која до март треба да предложи конкретни мерки за одржливост на здравствениот систем.Владата најави дека до крајот на годината ќе изготви предлог за сеопфатна реформа. Претседателот на ДАK, Андреас Шторм, оцени дека работата на комисијата претставува значајна можност за темелно преиспитување и обновување на германската здравствена политика, како и за постигнување поширок општествен консензус околу неопходните промени.

Свет | пред 2 месеци

До 6.000 евра субвенции за електрични автомобили: Германија ги отвора вратите и за кинеските производители

Германија повторно го менува курсот кога станува збор за субвенциите за електрични возила и најавува нова програма за поттикнување вредна дури 3 милијарди евра.Целта е јасна – заживување на продажбата на електрични автомобили, која нагло опадна по укинувањето на субвенциите кон крајот на 2023 година.Новиот програм предвидува субвенции во износ од 1.500 до 6.000 евра, во зависност од цената на возилото, приходите на домаќинството и бројот на членови во семејството.Според проценките, буџетот би требало да биде доволен за поддршка на околу 800.000 возила.За разлика од некои други европски земји, Германија нема да прави разлика меѓу домашните и странските производители. Субвенциите ќе бидат достапни за сите брендови, вклучително и за кинеските.Министерот за заштита на животната средина, Карстен Шнајдер, изјави дека нема докази за преплавување на пазарот со кинески возила и дека германските производители се доволно конкурентни.Програмата ќе важи до 2029 година, а апликациите ќе можат ретроактивно да се поднесуваат од 1 јануари 2026 година. Се очекува онлајн-порталот за пријавување да биде пуштен во употреба во мај, додека конечните услови ќе бидат прецизирани подоцна во текот на годината.Најголема корист од субвенциите се очекува да имаат домаќинствата со ниски и средни приходи.Претходниот систем на субвенции беше укинат поради буџетски проблеми, што веќе во 2024 година доведе до пад на продажбата на електрични автомобили од дури 27 проценти.Новиот пакет мерки вклучува и продолжување на даночните олеснувања за електрични возила до 2035 година, што за државата ќе значи околу 600 милиони евра помалку приходи.Сето ова укажува дека новата германска влада се залага за попостепен и пофлексибилен премин кон електромобилност, иако на ниво на Европската Унија сè уште трае дебатата за иднината на забраната на моторите со внатрешно согорување.

Магазин | пред 2 месеци

Германија го протера заменикот на рускиот воен аташе

Германија го повика рускиот амбасадор на информативен разговор поради апсењето на осомничена руска шпионка, а истовремено донесе одлука за протерување на руски дипломат кој, според истрагата, ѝ служел како контакт. Од германското Министерство за надворешни работи порачаа дека ваквото постапување е директен одговор на, како што го оценија, агресивното дејствување на Русија.Министерот за надворешни работи Јохан Вадефул изјави дека Германија нема да толерира шпионажа на своја територија, особено кога во такви активности се вклучени лица со дипломатски статус, нагласувајќи дека ваквите постапки мора да имаат конкретни последици.Германските власти соопштија дека Илона В., германско-украинска државјанка, била уапсена поради сомнение дека шпионирала за руската воена разузнавачка служба ГРУ. Како нејзина контактна точка е наведен заменикот на воениот аташе на Русија во Берлин, на кого осомничената му доставувала информации поврзани со воените активности во Германија, со посебен фокус на состојбите поврзани со војната во Украина.Според истрагата, Илона В. во повеќе наврати му овозможила на рускиот дипломат пристап до различни политички настани користејќи лажен идентитет. Информациите за активностите на Бундесверот ги добивала преку двајца поранешни припадници на германските вооружени сили, против кои исто така е покрената истрага.Германските безбедносни служби наведуваат дека од почетокот на руската агресија врз Украина, Москва значително ги интензивирала своите разузнавачки активности во Германија, особено во рамки на таканареченото хибридно водење војна и шпионажа, што, според Берлин, претставува сериозна закана за националната безбедност.

Свет | пред 2 месеци

Политиката му се заканува на Мундијалот 2026: Германија најавува можен бојкот поради Трамп

Пет месеци пред почетокот на Светското првенство 2026, ФИФА со зголемена загриженост следи неочекуван политички фронт што би можел сериозно да го загрози најголемиот фудбалски турнир во историјата.Станува збор за Мундијал со рекордни 48 репрезентации и три земји-домаќини – Соединетите Американски Држави, Мексико и Канада – но и за контроверзи кои од ден на ден добиваат сѐ поголеми размери.Американскиот претседател Доналд Трамп, кој повторно се врати во Белата куќа, предизвика силни реакции со инсистирањето САД да го анектираат Гренланд, оправдувајќи ја идејата со „прашања од национална безбедност“. Оваа најава ги вклучи алармите во Европа и наиде на остри реакции од Данска, Европската Унија и НАТО.Од Германија пристигна одговор од Јирген Харт, пратеник од Христијанско-демократската унија и близок соработник на канцеларот Фридрих Мерц. Во интервју за „Билд“, Харт изјави дека дури и бојкот на Светското првенство би можел да се разгледа како крајна мерка за притисок врз Трамп да ја преиспита својата позиција околу Гренланд.Иако нагласи дека верува во дипломатско решение, Харт не ја исклучи можноста за симболичен чекор со сериозни последици. Влогот е огромен – Германија, четирикратен светски шампион (1954, 1974, 1990 и 2014), е една од најпрепознатливите фудбалски сили во светот и нејзиното евентуално отсуство би значело милионски финансиски удар за ФИФА и за земјите-домаќини.Во јавната дебата се вклучи и британскиот новинар Пирс Морган, кој на социјалните мрежи провокативно предложи повеќе европски репрезентации – меѓу кои Англија, Франција, Шпанија, Германија, Италија и други – да го суспендираат учеството на Светското првенство додека траат трговските спорови со администрацијата на Трамп.Иако засега сѐ е во рамки на шпекулации, евентуален бојкот би бил вистински земјотрес за организаторите. ФИФА, со Џани Инфантино на чело и со неговите познати блиски односи со Трамп, би се нашла пред одлука со историски размери.

Спорт | пред 2 месеци