ИРАН

Путин нуди помош на Иран за постигнување мир на Блискиот Исток

Рускиот претседател Владимир Путин разговарал со иранскиот претседател Масуд Пезешкијан по неуспехот на американско-иранските преговори во Исламабад, нудејќи ја улогата на Русија како посредник за постигнување мировно решение на Блискиот Исток, пренесува Ал Џезира.Од Кремљ соопштија дека Путин ја истакнал подготвеноста на Москва да помогне во изнаоѓање политичко и дипломатско решение и да посредува во напорите за воспоставување праведен и траен мир.Претходно, повеќечасовните разговори меѓу САД и Иран завршија без договор по повеќе од 21 час преговори. Клучниот спор се однесувал на контролата врз Ормускиот теснец – Вашингтон барал негово целосно отворање, додека Техеран инсистирал да ја задржи контролата.И покрај силното посредување на Пакистан и првичните сигнали за напредок, разговорите пропаднале, а двете делегации ја напуштиле земјата без постигнат договор.

Свет | пред 1 седмица

Американскиот преговарачки тим го напушти Пакистан

Целиот американски преговарачки тим го напушти Пакистан по завршувањето на разговорите со Иран, потврди американски претставник за новинарите кои го следат потпретседателот Џеј Ди Венс, пренесува CNN.Меѓу членовите на делегацијата беа и специјалниот пратеник Стив Виткоф, Џаред Кушнер, како и техничките тимови. Нивното заминување се толкува како знак дека директните преговори нема да продолжат во скоро време, ниту на работно ниво.Потпретседателот Венс изјави дека по 21 час разговори не е постигнат никаков договор и дека американската страна заминува со, како што рече, „последна и најдобра понуда“.Преговорите меѓу САД и Иран, кои беа посредувани од Пакистан, траеле повеќе од 29 часа во различни фази, при што двете страни изразуваа претпазлив оптимизам, но без конечен резултат за прекин на конфликтот.

Свет | пред 1 седмица

Иран: Ормускиот теснец е „целосно под наша контрола“

Заменик-претседателот на иранскиот парламент, Хаџи Бабаеи, изјави дека стратешкиот Ормуски теснец е „целосно“ под контрола на Иран и дека минувањето низ него мора да се плаќа во иранската валута, ријал, пренесува новинската агенција Mehr.Бабаеи нагласи дека планот за теснецот добил едногласна поддршка од 250 пратеници и порача дека овој стратешки пловен пат „под никакви услови не е предмет на преговори“.Тој додаде дека, и покрај санкциите, иранскиот извоз на нафта надминал 1,6 милиони барели и дека, како што рече, нафтата од Иран денес е практично невозможно да се санкционира.Во меѓувреме, тензиите околу теснецот продолжуваат, при што САД соопштија дека нивните сили започнале операции за чистење мини, додека Иран ги негираше наводите за американско поминување низ оваа област.

Свет | пред 1 седмица

Прекинот на интернетот во Иран трае 44 дена

Прекинот на интернетот во Иран трае веќе 44 дена, со што блокадата влегува во седмата недела, соопшти организацијата за мониторинг на интернет NetBlocks. Според нивните податоци, прекинот надминал 1032 часа континуирано траење, што го прави еден од најдолгите вакви случаи во светот.Од NetBlocks предупредуваат дека со ваквата долготрајна цензура се зголемуваат и хуманитарните и економските последици, при што се ограничува комуникацијата на граѓаните и се отежнува секоја форма на организација или мобилизација. Граѓаните без пристап до алтернативи, како сателитската мрежа Starlink, често остануваат целосно отсечени од надворешниот свет.И покрај блокадата, дел од државните функционери и понатаму имаат пристап до интернет и редовно објавуваат содржини поврзани со актуелните случувања. NetBlocks потсетува дека и за време на претходни протести во јануари имало слични прекини на интернет, кои тогаш придонеле за ограничување на протокот на информации за случувањата на терен.

Свет | пред 1 седмица

Иран најавува брзо обновување на нафтената инфраструктура по нападите

Иран очекува во рок од еден до два месеца да обнови поголем дел од своите постројки за преработка и дистрибуција на нафта, кои беа оштетени во серија напади врз енергетската инфраструктура, пренесува Ројтерс.Властите планираат да ги вратат капацитетите на 70 до 80 проценти од нивото пред нападите. Заменик-министерот за нафта, Мохамад Садек Азимифар, изјави дека поправките веќе се во тек.Според него, дел од рафинеријата Лаван се очекува повторно да започне со работа во наредните десетина дена, додека останатите капацитети постепено ќе се враќаат во функција.

Свет | пред 1 седмица

Први танкери ја напуштаат зоната: Три супертанкери минаа низ Ормускиот теснец

Три супертанкери натоварени со нафта вчера успешно поминаа низ Ормускиот теснец, и покрај неуспехот на преговорите во Исламабад, покажуваат податоците за поморскиот сообраќај.Според информациите, ова се првите бродови што го напуштија Персискиот Залив откако Соединетите Американски Држави и Иран постигнаа договор за прекин на огнот.Во меѓувреме, стотици други танкери сè уште се блокирани во Заливот и очекуваат можност за испловување во текот на двонеделното примирје, што се смета за клучен период за стабилизирање на глобалните испораки на нафта.

Свет | пред 1 седмица

Иран уапси најмалку 50 лица под сомнение за шпионажа

Иранските власти уапсиле најмалку 50 лица под обвинение за платенички активности, објави државната новинска агенција, пренесува Al Jazeera.Уапсените се товарат дека соработувале со Соединетите Американски Држави и Израел, на кои наводно им доставувале информации за чувствителни локации, вклучително и комунални објекти и инфраструктура. За време на акцијата, властите заплениле електронска и сателитска опрема, како и оружје.Ова е последен во низата случаи на апсења поврзани со шпионажа во Иран, по претходниот бран приведувања што следеше по минатогодишниот 12-дневен конфликт со САД и Израел.Според неодамна заострениот закон, на обвинетите за шпионажа во Иран им се заканува смртна казна, како и конфискација на имот.

Свет | пред 1 седмица

Што по пропаднатите разговори? Војна или долги преговори меѓу Иран и САД

Неуспехот на преговорите меѓу САД и Иран во Исламабад ја отвори клучната дилема: што следува – нова дипломатска рунда или враќање кон воена ескалација.Американската делегација, предводена од Џеј Ди Венс, замина без договор по повеќе од 21 час разговори. Главната точка на судир останува иста – нуклеарната програма на Техеран. Вашингтон бара целосно откажување од потенцијал за развој на нуклеарно оружје, додека Иран инсистира на своето право на нуклеарни активности за цивилни цели.Оваа позиција не е нова. Сличен ќорсокак доведе до ескалацијата во февруари, кога по пропаднатите разговори следеше 38-дневна воена кампања. Според американски податоци, биле погодени илјадници цели низ Иран, но наместо да го омекне Техеран, тоа дополнително ја зацврсти неговата позиција.Администрацијата на Доналд Трамп сега се соочува со две неповолни опции. Првата е враќање на долги и комплексни преговори, кои историски траат со години и бараат компромиси од двете страни. Втората е продолжување на конфликтот – сценарио што носи сериозни глобални последици.Клучниот фактор во оваа равенка е Ормутскиот теснец – стратешка точка преку која поминува значителен дел од светската нафта. Техеран веќе го користи како геополитички адут, поврзувајќи го неговото отворање со пошироки барања: укинување санкции, воени отштети и признавање на неговите позиции.Продолжување на војната би значело нов удар врз глобалната економија – раст на цените на енергенсите, инфлација и нарушување на синџирите на снабдување. Веќе се регистрирани сериозни последици на пазарите, што беше една од причините за воведување на привременото примирје.Проблемот е што двете страни влегуваат во следната фаза со чувство дека не изгубиле. САД сметаат дека воено го ослабнале Иран, додека Техеран верува дека ја издржал офанзивата без клучни отстапки.Во такви услови, просторот за компромис е минимален. А токму тоа ја прави следната фаза најризична – бидејќи изборот не е меѓу добри опции, туку меѓу лоши и уште полоши сценарија.

Свет | пред 1 седмица

(Видео) Трамп на УФЦ борба додека пропаѓаа преговорите со Иран

Додека клучните мировни преговори меѓу САД и Иран пропаѓаа во Исламабад, американскиот претседател Доналд Трамп присуствуваше на УФЦ настан во Мајами.Трамп пристигнал во арената околу 21 часот по локално време, во придружба на претседателот на UFC, Дејна Вајт, како и членови на неговото семејство. На местото бил пречекан од сенаторот Марко Рубио, додека во близина се наоѓал и американскиот амбасадор во Индија Серхио Гор.Во исто време, разговорите во Пакистан влегувале во критична фаза, по што следела и официјална потврда дека договор не е постигнат. Американската делегација, предводена од потпретседателот Џеј Ди Венс, објави дека преговорите завршиле без резултат.И покрај развојот на настаните, Трамп останал да ги следи борбите до доцна во ноќта, напуштајќи ја арената дури по 23:28 часот.Настанот отвори прашања за тајмингот и приоритетите на американското раководство, во момент кога дипломатските напори за деескалација на конфликтот на Блискиот Исток доживеаја сериозен неуспех.

Свет | пред 1 седмица

Во нападите врз Иран ранети над 2.000 деца

Во американско-израелските напади врз Иран, ранети се 2.115 деца и малолетници, изјави директорот на иранската итна служба Џафар Миадфар, пренесува Ал Џезира.Според официјалните податоци, меѓу повредените има 124 деца помлади од пет години, како и 24 деца на возраст под две години, што укажува на сериозните последици од нападите врз најранливите категории.Дополнително, повредени се и околу 5.000 жени, а најголемиот број напади се регистрирани во повеќе региони низ земјата, вклучително и околу Техеран, како и во покраините Хузестан, Лорестан, Исфахан, Керманшах и Илам.Податоците ги нагласуваат цивилните последици од конфликтот, при што значителен дел од жртвите се деца и жени, во услови на ескалација на воените дејствија на Блискиот Исток.

Свет | пред 1 седмица

Венс: Нема договор со Иран, клучен проблем e нуклеарната програма од која не сакаат да се одречат

Американскиот потпретседател Џеј Ди Венс потврди дека преговорите меѓу САД и Иран во Исламабад завршиле без договор, по повеќе од 21 час интензивни разговори.„Лошата вест е дека не постигнавме договор. И мислам дека тоа е многу полошо за Иран отколку за САД“, изјави Венс, додавајќи дека американската делегација се враќа дома без резултат.Клучната точка на спорот, според него, останува нуклеарната програма на Техеран. Вашингтон барал јасна и недвосмислена обврска дека Иран нема да развива нуклеарно оружје, ниту капацитети што би му овозможиле брзо да дојде до такво оружје.„Тоа е нашата основна црвена линија. Таква посветеност сè уште не видовме“, нагласи Венс.Тој посочи дека, иако делови од иранската нуклеарна инфраструктура се веќе ослабени, клучно е долгорочно гарантирање дека програмата нема да биде обновена.Во меѓувреме, Доналд Трамп остана резервиран за исходот, порачувајќи дека за САД „во секој случај исходот е победа“, алудирајќи на воената позиција на Вашингтон.Од иранска страна, пак, вината за неуспехот се префрла врз САД, со оценка дека американските барања биле „неразумни“ и ја блокирале можноста за напредок.Разговорите, кои беа ретка директна дипломатска средба меѓу двете земји по децении непријателство, оставија зад себе јасна слика: двете страни остануваат на тврдите позиции, а нуклеарното прашање и понатаму е главната пречка за било каков договор.

Свет | пред 1 седмица

Техеран по неуспешните преговори: „Американските барања се неразумни“

По неуспешната рунда преговори меѓу САД и Иран во Исламабад, Техеран со остар тон ја префрли одговорноста врз Вашингтон, оценувајќи дека американските барања биле „неразумни“.Портпаролот на иранското Министерство за надворешни работи, Есмаил Бакаи, изјави дека никој не очекувал договор во првиот круг, нагласувајќи дека атмосферата од самиот почеток била обележана со недоверба.„Од почеток беше јасно дека нема да има договор веднаш. Станува збор за сложени прашања со многу услови“, рече Бакаи, посочувајќи дека во разговорите биле вклучени и нови теми, меѓу кои и Ормутскиот теснец и пошироки регионални прашања.Од иранска страна порачуваат дека нема притисок за брз договор. Напротив, сигналот од Техеран е дека времето работи во нивна полза.„Не ни се брза“, наведуваат извори блиски до властите, додавајќи дека состојбата во Ормутскиот теснец нема да се промени сè додека не се постигне „разумен договор“.Во меѓувреме, делегацијата на САД предводена од потпретседателот Џеј Ди Венс ја напушти Пакистан без постигнат резултат, што дополнително ги продлабочува неизвесностите околу идните дипломатски чекори.Пораката од Техеран е јасна: без отстапки од американска страна, нема напредок – ниту во преговорите, ниту на терен.

Свет | пред 1 седмица

Пакистан останува медијатор меѓу САД и Иран по неуспешните преговори

По неуспешната рунда разговори меѓу САД и Иран во Исламабад, Пакистан најави дека ќе продолжи да игра клучна посредничка улога во обидите за стабилизирање на ситуацијата.Министерот за надворешни работи Ишак Дар изјави дека Исламабад и во наредниот период ќе биде активен канал за дијалог меѓу двете страни, и покрај тоа што преговорите завршија без конкретен договор.„Пакистан имаше, а ќе има и понатаму улога во посредувањето меѓу Исламската Република Иран и Соединетите Американски Држави“, истакна Дар, нагласувајќи дека комуникацијата не смее да биде прекината.Тој повика двете страни да продолжат да го почитуваат договореното примирје и да покажат политичка волја за напредок.„Неопходно е страните да ја почитуваат обврската за прекин на огнот. Се надеваме дека дијалогот ќе продолжи во позитивен дух, со цел да се постигне траен мир и стабилност во регионот“, додаде Дар.Изјавата доаѓа во чувствителен момент, кога дипломатските напори се соочуваат со застој, а тензиите на Блискиот Исток остануваат високи, што ја прави улогата на посредниците клучна за избегнување нова ескалација.

Свет | пред 1 седмица

Тензиите растат по пропаднатите преговори: Трамп со пораки за Иран и критики кон Европа

По пропаднатите преговори меѓу САД и Иран во Исламабад, американскиот претседател Доналд Трамп се огласи со индиректни, но силни пораки на својата платформа Truth Social.Иако не ги коментираше директно неуспешните разговори, Трамп сподели текст во кој се анализира можноста за поморска блокада како средство за притисок врз Техеран. Во написот, објавен на Just the News од новинарот Џон Соломон, се наведува дека Вашингтон би можел да ја неутрализира иранската контрола врз Ормутскиот теснец преку блокада.Овој тесен поморски коридор е клучна точка за глобалната енергетска безбедност, што секоја ескалација ја прави директна закана за светската економија.Паралелно, Трамп сподели и дел од свој претходен говор во Обединети нации, во кој остро ја критикува Европа. Тој предупредува на, како што ги нарекува, „две кризи“ – енергетиката и имиграцијата – оценувајќи дека тие ја туркаат Европа кон сериозна дестабилизација.„Ги сакам Европа и европските народи, но мразам да гледам како се уништуваат“, наведува Трамп, обвинувајќи ги европските лидери за прекумерна политичка коректност и недостиг на контрола.Објавите доаѓаат во момент на високи геополитички тензии и по неуспехот на дипломатските напори, што дополнително го отвора прашањето дали следува нова фаза на притисок – дипломатски или воен – во односите меѓу Вашингтон и Техеран.

Свет | пред 1 седмица

Папата Лав: „Доста се војни, доста се демонстрации на моќ“

Папата Лав во саботата упати силен апел до светските лидери да го прекинат она што го нарече „лудило на војната“, во време кога високи американски и ирански претставници се состануваат во Пакистан за преговори за завршување на шестнеделен конфликт, јавува Ројтерс.На посебно молитвено бдение во базиликата „Свети Петар“, првиот папа Американец остро го осуди користењето на религиозна реторика за оправдување на војната, истакнувајќи дека „заблудата за семоќ која нè опкружува станува сè понепредвидлива“.Тој директно им се обрати на светските лидери со порака: „Престанете! Време е за мир! Седнете на маса на дијалог и посредување, а не на маса на која се планира ново вооружување.“Папата Лав се осврна и на страдањата на цивилите, цитирајќи писма од деца од воени подрачја кои опишуваат „ужас и нечовечност“, нагласувајќи дека човештвото е сериозно нарушено од тековните конфликти.Тој ја критикуваше и злоупотребата на верата за оправдување на насилството, потсетувајќи на ставовите на Црквата против војната во Ирак во 2003 година и порача: „Доста е од идолопоклонство на себеси и на парите! Доста е од демонстрација на моќ! Доста е од војна!“Папата и претходно изјави дека Бог ги отфрла молитвите на оние кои започнуваат војни, нагласувајќи дека човечката рамнотежа е сериозно нарушена кога религијата се користи за оправдување на конфликти.

Свет | пред 1 седмица

Заврши првата фаза од директните преговори меѓу САД и Иран во Пакистан

Во Пакистан заврши првата фаза од директните преговори меѓу Соединетите Американски Држави и Иран, јавуваат извори блиски до посредничкиот процес.Според истите извори, двете делегации сега разменуваат писмени текстови со цел да се потврди усогласеноста околу денес постигнатите договори, пренесува Ал Џезира.Преговорите се одвиваат како дел од поширок дипломатски процес меѓу двете земји со посредување на пакистанските власти.

Свет | пред 1 седмица

Американската морнарица чисти мини во Ормускиот теснец

Два разарачи на Американска морнарица започнаа операција за расчистување на морски мини во Ормускиот теснец, со цел да се овозможи безбедна пловидба низ еден од најважните светски трговски коридори.Од CENTCOM информираат дека разарачите „USS Frank E. Peterson“ и „USS Michael Murphy“ веќе минале низ теснецот и дејствуваат во Арапскиот Залив како дел од поширока мисија за отстранување на мини, за кои се тврди дека биле поставени од иранската Револуционерна гарда.Командантот на CENTCOM, адмирал Бред Купер, изјави дека се работи на воспоставување нов безбеден пловен коридор, кој наскоро ќе биде споделен со поморската индустрија со цел да се обнови трговскиот сообраќај.Операцијата следува по најавите на Доналд Трамп дека САД ќе започнат со расчистување на теснецот, како дел од напорите за стабилизација по примирјето со Иран.И покрај активностите, безбедносната состојба останува кревка, бидејќи покрај мините, постои ризик и од ракетни напади, што ја отежнува заштитата на бродовите.Според последните податоци, по прогласеното примирје низ теснецот поминале само околу триесетина бродови, што укажува на ограничено обновување на поморскиот сообраќај.

Свет | пред 1 седмица

Израел: Погодивме 4.000 цели во Иран и фрливме 18.000 бомби

Израелските одбранбени сили фрлиле околу 18.000 бомби врз Иран во текот на повеќе од пет недели војна, покажуваат податоците објавени од израелски медиуми, а потврдени од воен портпарол.Според извештаите, израелската војска извршила повеќе од 1.000 бранови воздушни напади, при што биле погодени илјадници цели, вклучително и системи за противвоздушна одбрана, лансери за ракети, постројки за производство на оружје, како и нуклеарни објекти.Од иранска страна, биле испукани околу 650 балистички ракети кон Израел, при што повеќе од половина од нив, според изворите, носеле касетна муниција.Израелските власти соопштија дека во иранските напади загинале 20 цивили, додека на Западен Брег уште четворица Палестинци ги загубиле животите. Повеќе од 7.000 лица се повредени, соопшти Министерството за здравство на Израел.Според податоците, израелската армија извршила над 10.800 поединечни напади врз околу 4.000 цели во Иран. Израел тврди и дека уништил или онеспособил околу 60 отсто од иранските лансери за балистички ракети.Во меѓувреме, се проценува дека Иран на почетокот на конфликтот располагал со околу 2.500 балистички ракети, но дека сега има околу 1.000 кои можат да го достигнат Израел.Според ирански извештаи, во конфликтот започнат на 28 февруари загинале над 3.000 лица, додека независни проценки наведуваат значително повисоки бројки. Хуманитарни организации проценуваат дека илјадници цивили се меѓу жртвите, а стотици илјади објекти се оштетени или уништени во нападите.

Свет | пред 1 седмица

Белата куќа потврди директна средба меѓу САД и Иран

Белата куќа потврди дека потпретседателот на Соединетите Американски Држави, Џеј Ди Венс, заедно со други американски претставници, остварил директна средба со иранска делегација во Исламабад.Со ова се потврдуваат претходните информации од извори блиски до посредничкиот процес дека американската и иранската страна за првпат започнале директни преговори.Според Асошиејтед прес, овој состанок претставува значаен дипломатски пресврт, имајќи предвид долгогодишниот прекин на директни контакти меѓу двете земји.

Свет | пред 1 седмица

Преговорите меѓу САД и Иран влегоа во стручна фаза

Новинската агенција Тасним објави дека преговорите меѓу Иран и Соединетите Американски Држави влегле во стручна фаза, при што на местото на разговорите беа упатени членови на специјализирани одбори од двете страни.Според извештајот, генералот Мајкл Курила, командант на ЦЕНТКОМ, сепак не е дел од американската преговарачка делегација, и покрај претходните шпекулации.Во разговорите учествуваат потпретседателот на САД Џеј Ди Венс, специјалниот пратеник Стив Виткоф и Џаред Кушнер, зет на претседателот Доналд Трамп.Од иранска страна, во Исламабад пристигнале претседателот на парламентот Багер Калибаф и неговиот тим, во кој се и министерот за надворешни работи Абас Арагчи, како и заменикот на Советот за национална безбедност Али Багери Кани.

Свет | пред 1 седмица

Иран ги објави своите услови за договор со САД

Во Исламабад денеска започнаа преговори на високо ниво меѓу Иран и Соединетите Американски Држави, што претставува прва ваква билатерална средба од Исламската револуција во Иран наваму.Портпаролот на иранското Министерство за надворешни работи, Есмаил Багаеи, изјави дека стабилноста во Либан и поширокиот регион ќе има директно влијание врз исходот од разговорите, кои се одвиваат со посредство на Пакистан.Тој посочи дека иранската делегација, предводена од претседателот на парламентот Багер Калибаф, веднаш по пристигнувањето започнала консултации со пакистанските власти, при што јасно ги изложила своите позиции и барања.„Дипломатијата денес е продолжение на одбраната“, изјави Багаеи, додавајќи дека Иран по речиси 40 дена конфликт влегол во сложена дипломатска фаза.Тој нагласи дека Техеран внимателно го следи почитувањето на примирјето во координација со своите вооружени сили и реагира на евентуални прекршувања. Според него, во првите часови по прогласувањето имало помали инциденти, но тие биле брзо адресирани.Посебен акцент беше ставен на ситуацијата во Бејрут и улогата на Либан како клучен фактор во целиот процес. Багаеи истакна дека примирјето мора да важи за сите фронтови и дека случувањата во Либан директно ќе влијаат врз текот на преговорите.Иран на маса стави рамка од десет точки, која вклучува гаранции за ненапаѓање, задржување на контролата врз Ормускиот теснец, признавање на правото за збогатување ураниум, како и укинување на американските санкции. Дополнително, Техеран бара повлекување на резолуциите против него од Обединетите нации и Меѓународната агенција за атомска енергија, исплата на отштета и повлекување на американските сили од регионот.Преговорите започнаа по одвоени средби на делегациите со пакистанскиот премиер Шехбаз Шариф. Американската делегација ја предводи потпретседателот Џеј Ди Венс, заедно со специјалните пратеници Стив Виткоф и Џаред Кушнер.Во составот на иранската делегација се и министерот за надворешни работи Абас Арагчи и високиот безбедносен функционер Али Багери Кани, додека домаќинот Пакистан е претставен од шефот на дипломатијата Исхак Дар, со поддршка од армискиот генерал Асим Мунир и министерот за внатрешни работи Мохсин Накви.

Свет | пред 1 седмица

Тензии во Ормускиот теснец: Американски воени бродови поминаа, еден се повлече откако Иран се закани дека ќе го гаѓа

Неколку воени бродови на Американска морнарица поминале низ Ормускиот теснец, во потег што дополнително ги зголеми тензиите со Иран.Според американски извори, операцијата не била координирана со Техеран и имала за цел да ја врати довербата кај трговските бродови и да обезбеди слобода на пловидба низ меѓународните води.Од иранска страна, пак, беше соопштено дека еден американски брод се повлекол откако добил предупредување дека ќе биде гаѓан во рок од 30 минути доколку продолжи да се движи кон теснецот. Според Техеран, пораката била пренесена преку посредник од Пакистан.Овие случувања се одвиваат паралелно со мировните преговори меѓу САД и Иран, при што повторното отворање на Ормускиот теснец е една од клучните точки во евентуалниот договор.И покрај најавеното примирје, поморскиот сообраќај низ теснецот останува значително намален, а американски претставници признаваат дека дел од бродовите избегнуваат да минуваат поради безбедносни ризици.Во меѓувреме, Доналд Трамп најави почеток на операции за расчистување на морски мини, со цел нормализирање на пловидбата во овој клучен глобален коридор.

Свет | пред 1 седмица

Трамп: Ги следам цените на ѓубривата среде конфликтот со Иран

Американскиот претседател Доналд Трамп изјави дека внимателно ги следи цените на ѓубривата во контекст на војната со Иран, предупредувајќи дека САД нема да толерираат „вештачко надувување на цените“.Во објава на Truth Social, Трамп порача дека американската администрација ќе реагира против, како што ги нарече, монополи во индустријата за ѓубрива.Темата добива тежина поради ситуацијата со Ормутски теснец – клучен поморски коридор преку кој се транспортира околу една третина од светските количини на ѓубрива, вклучувајќи уреа, амонијак, калиум и фосфати.Според податоци на Обединети нации и Светска трговска организација, од почетокот на конфликтот е забележан значителен пад на испораките на овие производи низ теснецот, што создава дополнителен притисок врз глобалните пазари.Анализите покажуваат дека нарушувањето на транспортот преку Ормутскиот теснец директно се одразува врз цените на храната и земјоделското производство ширум светот.

Свет | пред 1 седмица

Иран во контакт со Либан за почитување на примирјето

Иран соопшти дека е во постојан контакт со Либан со цел да се обезбеди почитување на обврските од договорот за прекин на огнот на сите фронтови.Изјавата ја даде портпаролот на Министерство за надворешни работи на Иран за иранската државна телевизија од Исламабад, каде што се одржуваат разговорите меѓу високи претставници на САД и Иран.Во меѓувреме, либански извори блиски до Хезболах за агенцијата Ројтерс изјавиле дека движењето го поддржува дијалогот што се води во Пакистан, оценувајќи го како исправен пристап наместо одделни разговори што се најавени во Вашингтон.Овие изјави доаѓаат во чувствителен момент, додека дипломатските напори за стабилизација на регионот продолжуваат, а примирјето се смета за кревко.

Свет | пред 2 седмици

Иранците поделени: надеж и недоверба кон примирјето

По најавата за прекин на огнот, реакциите меѓу граѓаните во Иран се поделени – дел гледаат мала надеж за стабилизација, додека други изразуваат длабок скептицизам.Според информации на Al Jazeera, иако постои очекување дека дипломатските напори би можеле да спречат понатамошна ескалација, многумина не веруваат дека примирјето ќе се одржи на подолг рок.Паралелно, кај дел од јавноста постои надеж дека евентуален успешен договор би можел да доведе до олеснување или укинување на меѓународните санкции.Тоа, според граѓаните, би имало значително влијание врз економската состојба во земјата, која со години е под силен притисок.

Свет | пред 2 седмици