УКРАИНА

Велигденско примирје одбиено: Русија напаѓа со стотици дронови

Украинскиот претседател Володимир Зеленски ја обвини Русија дека наместо да прифати предлог за велигденско примирје, извршила масовни напади со беспилотни летала, лансирајќи стотици дронови врз повеќе региони во Украина.Зеленски повторно ѝ понуди на Русија меѓусебен прекин на нападите врз енергетската инфраструктура.„Ако Русија е подготвена да ги запре ударите врз нашата енергетска инфраструктура, ние ќе возвратиме со истото“, изјави тој, додавајќи дека предлогот веќе бил пренесен преку САД.Минатата недела Зеленски предложи и прекин на огнот за време на Велигден, кој православните верници во Русија и Украина го одбележуваат на 13 април.Во понеделникот, по ноќниот напад врз пристаништето Одеса, во кој загинаа три лица, а најмалку 16 беа повредени, Зеленски оцени дека Русија веројатно нема да го прифати примирјето.„Повеќепати предложивме барем велигденско примирје, но за нив сите денови се исти. Ништо не е свето“, рече тој.Русија тврди дека има целосна контрола врз украинската област Луганск, што Киев го негира. Според руското Министерство за одбрана, нивните сили го презеле целиот регион во Донбас, но украински воен претставник изјави дека мали делови сè уште се под контрола на украинските сили.Во меѓувреме, руското Министерство за одбрана соопшти дека украински дронови нападнале нафтен терминал на Каспискиот нафтоводен конзорциум во јужна Русија, при што бил оштетен пристанишниот дел и се запалиле четири резервоари со нафта. Украинската армија, пак, соопшти дека цел бил друг терминал во пристаништето Новоросијск. Нафтоводот транспортира околу 1% од светската нафта и околу 80% од извозот на Казахстан.Исто така, руски брод со пченица, кој се сметаше за потонат во Азовското Море по напад со дрон, бил пронајден и извлечен до брегот, а бројот на загинати се искачи на три лица, соопшти руската државна агенција ТАСС.

Свет | пред 1 месец

Руски напад со дрон во Никопол: трагедија во центарот на градот

Три лица загинаа, а 12 се повредени во руски напад врз автобус во центарот на Никопол, Украина утрово.Веста ја објави Олександр Ханжа, началник на воената администрација на регионот Дњепропетровск, кој појасни дека нападот бил извршен со дрон. Автобусот се приближувал кон постојката во моментот на нападот, поради што имало луѓе и во возилото и на постојката.„Ова не бил случаен напад. Станува збор за намерен терор врз цивили – луѓе кои едноставно си ги извршувале своите секојдневни обврски“, изјави Ханжа.

Свет | пред 1 месец

Русија ја обвини Украина: „Намерано го нападнаа нафтопроводот Касписки“

Русија денес соопшти дека украински дронови го нападнале црноморскиот терминал на Каспискиот нафтопроводен конзорциум (CPC), преку кој минуваат околу 1,5 отсто од светското снабдување со нафта.Нападот би можел да биде еден од најзначајните украински удари врз руските црноморски постројки од почетокот на војната. Киев во изминатиот месец ја зголеми фреквенцијата на напади врз руската инфраструктура, пишува Reuters.Руското министерство за одбрана соопшти дека Украина ги нападнала товарните објекти на CPC со беспилотни летала. Терминалот CPC Јужна Озерејевка извезува нафта од Казахстан, а меѓу неговите акционери се и американските компании Chevron и ExxonMobil.На веб-страницата на CPC се наведува дека станува збор за проект во кој учествуваат Русија, Казахстан и „водечки меѓународни нафтени и гасни компании“.„Киевскиот режим намерно ги нападна објектите на меѓународната компанија Касписки нафтопроводен конзорциум за да им нанесе максимална економска штета на нејзините најголеми акционери – енергетските компании од САД и Казахстан“, стои во соопштението.Терминалот CPC, сместен југозападно од Новоросијск, обработува 80 отсто од казахстанскиот извоз на сурова нафта.Два извори рекоа за Reuters дека во ноќта кон понеделник во одделен инцидент избувнал пожар на нафтениот терминал Шешарис, удавен околу 15 километри од терминалот CPC.Преку Шешарис вообичаено минуваат помеѓу 600 илјади и 700 илјади барели сурова нафта дневно. Минатата година се извезени 19,8 милиони тони нафтени деривати, пренесува Reuters.

Свет | пред 1 месец

Захарова: Јапонија ги нарушува односите со Русија

Токио сè повеќе се вклучува во украинскиот конфликт помагајќи му на киевскиот режим, со што ги нарушува односите со Русија, изјави Марија Захарова, портпаролка на Министерството за надворешни работи на Русија.„Помагајќи му на неонацистичкиот режим на Володимир Зеленски, Јапонија сè повеќе се вплеткува во конфликтот околу Украина, со што нанесува дополнителна штета на односите со Русија, кои сериозно се влошија по вина на Токио“, истакна Захарова во коментар на веб-страницата на руската дипломатска мисија.Според неа, јасно е дека ваквите одлуки не придонесуваат за брзо решение на украинската криза, туку само ги продолжуваат борбените дејствија.Дипломатката потсети дека оружјето кое претставува закана за Русија и нејзините граѓани, како и производните погони што го создаваат во Украина, претставуваат легитимни воени цели за руските вооружени сили.Како што наведе официјалната претставничка на руското МНР, Москва смета дека соработката меѓу Јапонија и Украина во создавање дронови е непријателски потег што им штети на безбедносните интереси на Русија.„Навистина, такви информации постојат. Со оглед на зачестените украински провокации и криминални акции со употреба на беспилотни летала против цивилни цели во Русија, овој потег, очигледно спроведен со поддршка на официјалните власти, го сметаме за отворено непријателски и штетен за безбедносните интереси на нашата земја, вклучително и за заштитата на цивилите“, заклучи Захарова.Претходно, Захарова порача дека секој обид на Токио да организира испорака на оружје за Киев, Русија ќе го смета за непријателски чекор, кој ќе резултира со остар одговор од Москва.

Свет | пред 1 месец

Зеленски: Украинската армија ја запре руската офанзива, најдобра ситуација во последните 10 месеци

Претседателот на Украина Володимир Зеленски изјави дека ситуацијата на фронтот е најдобра од средината на минатата година.Иако војната влегува во својата петта година, борбите продолжуваат долж повеќе од 1.200 километри фронт. Руските сили и понатаму ја исцрпуваат украинската одбрана, но Киев не запира со контраофанзиви. Зеленски посочи дека, земајќи ги предвид окупираните и ослободените територии, Украина моментално е во благ „плус“, ослободувајќи околу 20 квадратни километри, без да прецизира временска рамка.„Офанзивата што ја планираа за март беше осуетена од дејствувањето на нашите вооружени сили. Поради тоа Русите сега ќе ги засилат нападите, но во овој момент не гледаме закана од поголеми размери“, изјави Зеленски.Русија контролира нешто помалку од 20 отсто од територијата на Украина, а според податоци од отворени извори, нејзиното напредување е забавено во 2026 година.„Ситуацијата е сложена, но најдобра во последните 10 месеци“, нагласи Зеленски, повикувајќи се на податоци од украинските и британските разузнавачки служби.Руските сили моментално се групираат во близина на логистичкиот јазол Покровск во Донецката област и кај Хуљајполе во Запорошката област. Украинскиот Генералштаб извести за околу 230 борбени судири во последните 24 часа.Со оглед на тоа што борбите обично се интензивираат со доаѓањето на потопло време, Зеленски истакна дека досегашните дипломатски напори не донеле резултат.

Свет | пред 1 месец

Зошто Зеленски отпатува кај Ердоган

Украинскиот претседател Володимир Зеленски ја потврди подготвеноста Украина да продолжи со следната рунда разговори за завршување на руско-украинската војна по средбата со турскиот претседател Реџеп Тајип Ердоган. Од кабинетот на Зеленски беше соопштено дека Анкара е подготвена да игра „значајна улога“ во постигнување „сигурен мир“ и дека ја поддржува сувереноста и територијалниот интегритет на Украина.Клучната порака од средбата е дека Турција, според изнесеното, е подготвена да биде домаќин на следната рунда преговори меѓу делегации на Украина, Соединетите Американски Држави и Русија. Како можна локација повторно се споменува Истанбул, град кој во минатото веќе беше место на дипломатски контакти поврзани со војната.Во кратка изјава пред медиумите, дадена по средба со вселенскиот патријарх Вартоломеј, Зеленски наведе дека токму Ердоган предлага разговорите да се одржат во Истанбул и дека Украина е подготвена да дојде. Тој додаде дека Киев е подготвен и за средба на лидерско ниво, „во кој било формат“.Турските иницијативи за посредување добија дополнителна тежина и преку дипломатските контакти на Анкара. Во март, турскиот министер за надворешни работи Хакан Фидан, во телефонски разговор со рускиот министер Сергеј Лавров, пренел дека Турција е подготвена да ја организира следната рунда разговори меѓу Русија и Украина.Паралелно со оваа линија, Зеленски ја повика американската преговарачка делегација да дојде во Киев. Во јавноста се појавија и очекувања дека американска делегација би можела да пристигне по Велигден, што отвора можност наредните недели да донесат поинтензивни дипломатски контакти и обиди за придвижување на процесот.

Свет | пред 1 месец

Украина нуди безбедносна помош за отворање на Ормускиот теснец

Украина се нуди како безбедносен партнер во напорите за повторно отворање на Ормускиот теснец, откако Иран практично го блокираше сообраќајот на оваа клучна светска енергетска рута. Претседателот Володимир Зеленски изјави дека Киев е подготвен да им помогне на партнерите со оружје проверено во борба и со оперативно искуство стекнато во услови на војна.„Ќе направиме сè што можеме. Нашето искуство во деблокадата на црноморскиот коридор е исклучително важно. Ако нè вклучат, ќе помогнеме“, изјави Зеленски. Со ова, Украина сигнализира амбиција да премине од примател во обезбедувач на безбедносна помош.Ормускиот теснец, кој го поврзува Персискиот Залив со Арапското Море, е една од најважните енергетски рути во светот. Во нормални услови, низ него минува околу една петтина од светската нафта и течен природен гас, со околу три илјади пловила месечно. Но, по заканите и ограничувањата од страна на иранските сили, сообраќајот е драстично намален, што предизвика раст на цените на енергенсите.Кризата отвори и прашања за тоа кој ќе ја преземе водечката улога во обезбедувањето на пловидбата. Додека Соединетите Американски Држави првично сигнализираа подготвеност, подоцна се појавија пораки дека можеби нема директно да интервенираат. Во такви услови, повеќе од четириесет сојузници одржаа состанок за можни решенија, при што Украина се наметна како партнер со конкретни предлози.Според аналитичарите, евентуалната воена операција за отворање на теснецот би се одвивала во три фази: расчистување на мините, неутрализирање на заканите од брегот и заштита на бродовите од напади во реално време. Токму во последната фаза, одбрана од беспилотни летала и проектили, украинското искуство се смета за особено вредно.По блокадата на извозот преку Црното Море, Украина разви асиметричен пристап, користејќи ракети и беспилотни пловни средства за да ја оттурне руската флота и да обезбеди извозни коридори. Овој модел, базиран на масовна употреба на поевтини системи, може да биде применлив и во Ормускиот теснец.Сепак, улогата на Украина би била ограничена. Нејзините капацитети се применливи главно во заштитата на бродовите, но не и во расчистување на мините или уништување на лансирни позиции. Дополнително, географијата на регионот и близината на иранскиот брег ја отежнуваат одбраната, а континуираната потреба од голем број беспилотни системи претставува сериозен предизвик.И покрај тоа, експертите оценуваат дека украинскиот придонес може да помогне во намалување на ризиците и делумно стабилизирање на пловидбата, иако не може целосно да ја елиминира заканата.

Свет | пред 1 месец

(Видео) Хаос во Москва: Украински агенти поставиле бомба, високи офицер бил цел на напад

Руската Федерална служба за безбедност (ФСБ) соопшти дека во Москва спречила терористички напад на висок офицер на полицијата, кој бил цел на планот на Украинската разузнавачка служба (СБУ).Според ФСБ, украински агенти ја поставиле бомбата во багажникот на електричен скутер паркиран во близина на деловен центар, а нападот требало да се активира далечински кога високиот офицер ќе пристигне до влезот на зградата, пренесува РИA Новости.Експлозивот од околу еден и пол килограм бил маскиран како полнач за електрично возило. Импровизираниот експлозив содржел метални делови, „шрафови“ и „матици“, што според ФСБ можело да предизвика голем број жртви.Членови на ФСБ успеале да го спречат нападот и да го запленат експлозивот, а во тек е потрага по лицата кои учествувале во поставувањето на бомбата.

Свет | пред 1 месец

„Ова е злосторство“: критики поради загуби во украински напад

Неуспешниот механизиран напад на украинската единица кај Покровск предизвика сериозни реакции во украинската јавност, со обвинувања за непотребни загуби и лошо раководење со операциите.Еден од најгласните критичари, волонтерот Серхиј Стерненко, остро реагираше по објавувањето на снимки од нападот.„Постапувањето кон нашите луѓе на ваков начин е злосторство и за тоа мора да има одговорност“, напиша Стерненко.Снимките, кои првично се појавија на Телеграм, прикажуваат уништена украинска техника, вклучително и тенк „М1 Абрамс“, борбено возило БМП-2 и оклопно возило М1117, како и удари врз војници на терен.Според достапните информации, нападот се случил на автопатот Е-50, западно од Покровск, во близина на селото Хришине, област која е предмет на борби.Стерненко оцени дека ваквите операции се дел од, како што вели, „системски расипнички пристап“ кој доведува до големи човечки загуби без значајни резултати.„Тоа што им се прави на луѓето во одредени единици не е ништо подобро од руските практики. Ова мора да престане“, додаде тој.Од единицата „Скелија“ реагираа на критиките, потврдувајќи загуба на возила и смрт на двајца војници, но тврдејќи дека операцијата била успешна.„Пешадијата успеа да ја продолжи задачата, а дел од екипажите беа евакуирани“, наведоа од единицата, додавајќи дека биле искористени оклопни возила, дронови и артилериска поддршка.Тензиите дополнително се зголемија откако единицата јавно го предизвика Стерненко да се приклучи и лично да учествува во операциите.Случајот отвори и поширока дебата за начинот на водење на операциите и улогата на врвниот командант Олександр Сирски, кој се соочува со критики за агресивен пристап и директно управување со офанзивните акции.Во меѓувреме, украинските власти најавија ревизија на загубите на бојното поле, додека експертите предупредуваат дека современото војување, со масовна употреба на дронови, значително ја намалува ефикасноста на класичните механизирани напади.

Свет | пред 1 месец

Зеленски со остра порака до Иран: „Нè убивавте, па уште и лажете“

Украинскиот претседател Володимир Зеленски јавно ги заостри тоновите кон Иран, обвинувајќи го Техеран дека има директна улога како соучесник на Русија во војната против Украина. Во настапот тој потсети на серија настани кои, според него, ја обележале „тешката“ и трауматична линија на односите меѓу двете земји.Зеленски се наврати на соборувањето на украинскиот патнички авион „Ukraine International Airlines 752“ во јануари 2020 година над Техеран, кога загинаа сите 176 лица во леталото. Тој рече дека Украина „не им направила ништо“, а сепак, според неговите зборови, Иран го соборил авионот, ги убил патниците и екипажот, а потоа не ја презел одговорноста во целост и не овозможил соодветна истрага и пристап за стручни тимови.Според Зеленски, состојбата дополнително се влошила по почетокот на руската инвазија врз Украина. Тој тврди дека Иран ѝ испорачувал на Русија беспилотни летала „Шахед“, кои, како што нагласи, се користеле во напади врз украински цивили и цивилна инфраструктура.Украинскиот претседател наведе дека се обидел да го запре тоа по дипломатски пат, тврдејќи дека од Иран добил уверувања дека ќе има само една испорака, но дека потоа, според него, следеле нови испораки и „лажни ветувања“.На крајот, Зеленски ја заостри оценката дека поради таквото однесување Иран го смета за одговорен за последиците од војната и го квалификува како соучесник на Русија, со што, според него, Техеран ја преминал границата од политичка позиција во практична помош за агресијата.

Свет | пред 1 месец

Туск жестоко по Трамп: „Ова звучи како план од соништата на Путин“

Полскиот премиер Доналд Туск остро реагираше на најновите изјави на американскиот претседател Доналд Трамп поврзани со НАТО, Русија и војната во Украина, оценувајќи дека таквата насока на политика директно му оди во прилог на Кремљ.„Закана со распад на НАТО, попуштање на санкциите кон Русија, голема енергетска криза во Европа, запирање на помошта за Украина и блокада на заемот за Киев од страна на Орбан – сето тоа изгледа како план од соништата на Владимир Путин“, изјави Туск.Реакцијата доаѓа во момент на засилени тензии меѓу западните сојузници, при што реториката и потезите на Вашингтон предизвикуваат загриженост во дел од европските престолнини за долгорочната стабилност на трансатлантската безбедносна архитектура.Во текстот се наведува дека Трамп повторно го довел во прашање значењето на НАТО, опишувајќи го како „хартиен тигар“ и посочувајќи дека сериозно размислува за можноста САД да излезат од алијансата. Ваквите пораки, според оценките што се пренесуваат, се примени со вознемиреност во Европа, каде НАТО се гледа како клучна гаранција за безбедноста, особено во контекст на руската агресија врз Украина.Дополнително, се посочува дека американската администрација неодамна укинала дел од нафтените санкции кон Русија, образложувајќи го потегот со енергетската криза поврзана со американско-израелската војна против Иран. Во истиот контекст се споменува и притисок врз Киев да прифати компромисни решенија, што, според полските и балтичките грижи, може да ја засили позицијата на Москва.Туск во својата порака го вклучува и унгарскиот премиер Виктор Орбан, наведувајќи ја блокадата на важни финансиски пакети за Украина во рамки на Европската унија како уште еден фактор што ја продлабочува поделбата и ја слабее кохезијата на западниот одговор.Како дополнителен притисок се истакнува и енергетската нестабилност во Европа, која се влошува поради нарушувања на пазарите на нафта и гас и тензии поврзани со Блискиот Исток и Ормутскиот теснец. Според пораката што се пренесува, секое олеснување на санкциите кон Русија или разнишување на сојузништвата би можело дополнително да ја усложни европската позиција.Севкупно, настапот на Туск се толкува како предупредување дека спојот од американски сигнал за повлекување, европски внатрешни блокади и енергетска несигурност создава сценарио во кое Русија би добила стратешка предност.

Свет | пред 1 месец

Трамп ја стега Европа меѓу Иран и Украина: закана со прекин на оружјето ако НАТО не помогне во Ормускиот теснец

Американскиот претседател Доналд Трамп им поставил на европските сојузници остар услов поврзан со Украина и со безбедноста на Блискиот Исток: доколку европските држави не се приклучат на напорите за обезбедување пловност низ Ормускиот теснец, Вашингтон ќе разгледа запирање на испораките на оружје за Украина, тврдат извори запознаени со разговорите.Според истите наводи, Иран практично го затворил теснецот откако САД и Израел кон крајот на февруари ја нападнале земјата, со што била нарушена една од најважните светски енергетски рути низ која поминува околу една петтина од глобалната нафта. Токму затоа, Трамп од европските сојузници побарал поморска поддршка за „деблокирање“ на теснецот и создавање поширока „коалиција на подготвените“.Европските лидери, според наводите, го одбиле барањето, оценувајќи дека е тешко изводливо додека трае конфликтот и дека станува збор за војна која не ја сметаат за своја. Реакцијата од Вашингтон била остар притисок: закана дека САД ќе ја повлечат или ограничат поддршката преку иницијативата на НАТО за набавка на оружје за Украина која ја финансираат европските земји.По ваквиот притисок, на 19 март група држави меѓу кои Франција, Германија и Обединетото Кралство усогласиле итна заедничка изјава со која изразиле подготвеност да придонесат во „соодветни напори“ за обезбедување безбеден премин низ Ормускиот теснец. Иницијативата, според изворите, била поттикната од генералниот секретар на НАТО, Марк Руте, кој инсистирал на брза формулација за да се избегне дополнително заострување со Вашингтон.Во наредните денови следела интензивна дипломатска активност, при што, според наводите, Руте повеќепати разговарал со Трамп и со американскиот државен секретар Марко Рубио. Од британска страна било посочено дека воените разговори со САД за опциите околу теснецот се воделе и пред 19 март, но без јасно да се оспори впечатокот дека поддршката за Украина станала дел од поширока политичка размена.Од Белата куќа, заменик-портпаролката Ана Кели порачала дека Трамп јасно го изразил своето разочарување од НАТО и од дел од сојузниците и дека „САД ќе паметат“. Трамп, пак, јавно повторувал дека европските сојузници не прават доволно за да помогнат во судирот со Иран, додека војната во Украина ја претставувал како претежно европски проблем.Во поширокиот контекст, кризата околу Иран ја зголемила побарувачката за пресретнувачки ракети PAC-3 што се користат во системите „Патриот“ – муниција што е клучна и за противвоздушната одбрана на Украина, но и за одбранбените капацитети на државите во Заливот. Рубио изјавил дека испораките кон Украина преку споменатиот механизам засега не се погодени и дека „ништо не е пренасочено“, но истовремено оставил отворена можност во иднина приоритет да добијат американските потреби доколку се јави недостиг.

Свет | пред 1 месец

ЕУ доделува 1,4 милијарди евра на Украина од замрзнати руски средства

Европската Унија ќе ѝ додели на Украина 1,4 милијарди евра финансиска поддршка, средства добиени од каматите на замрзнатиот имот на Русија. Средствата веќе се префрлени на сметките на ЕУ и се наменети за одржување на украинската држава и поддршка на нејзините вооружени сили, јавува European Pravda.Дополнителните приходи од 1,4 милијарди евра потекнуваат од каматите на средствата на замрзнатиот имот на руската централна банка, која е блокирана како дел од санкциите на ЕУ воведени поради руската агресија врз Украина. Имотот останува замрзнат, но каматите не припаѓаат на Русија, па Европската комисија предложи тие да се искористат за поддршка на Украина.„Овие 1,4 милијарди евра ќе бидат насочени таму каде што се најпотребни: за одржување на украинската држава, функционирање на клучните јавни служби и поддршка на храбрите украински вооружени сили. Нашата посветеност на победата и слободата на Украина е непоколеблива“, изјави претседателката на Европската комисија, Урсула фон дер Лејен.Од вкупниот износ, 95% ќе се пренесат преку Механизмот за заемна соработка со Украина (ULCM), кој обезбедува неповратна поддршка за сервисирање на макрофинансиските заеми на ЕУ и заеми од билатерални доверители од Г7. Преку овој механизам Украина може да добие до 45 милијарди евра. Преостанатите 5% од средствата ќе се доделат преку Европскиот инструмент за мир (EPF) за итни воени и одбранбени потреби.Оваа одлука следи по замрзнувањето на рускиот имот во Европа на неодредено време, одобрено од ЕУ во декември 2022 година, со цел да се избегне можен вето од премиерот на Виктор Орбан.

Свет | пред 1 месец

Бугарија влегува во воената индустрија на Украина со 10-годишен договор: ќе произведуваат дронови

Володимир Зеленски објави дека Украина и Бугарија потпишале десетгодишен одбранбен договор со кој ќе започне заедничко производство на дронови и друго оружје.Договорот беше постигнат за време на посетата на привремениот бугарски премиер Андреј Ѓуров на Киев, при што двете земји се договориле да ја продлабочат соработката во воената индустрија.Според Зеленски, станува збор за системско партнерство кое ќе овозможи производство на различни видови оружје, вклучително и беспилотни летала, на територијата на двете држави. Тој нагласи дека долгорочниот карактер на договорот ќе овозможи стабилна и технолошки напредна соработка во време кога дроновите стануваат клучен елемент во современото војување.Бугарија, како членка на НАТО и Европската Унија, има развиена одбранбена индустрија, особено во производство на муниција и оружје од советски тип, што директно одговара на потребите на украинската армија. Во последните години, оваа индустрија бележи значителен раст токму поради војната во Украина.Бугарскиот премиер Ѓуров оцени дека договорот не е само формалност, туку „конкретна обврска за зајакнување на евроатлантската безбедност“, што дополнително ја позиционира Бугарија како важен фактор во снабдувањето и развојот на воени капацитети во регионот.Покрај воената соработка, двете земји работат и на енергетски проекти, вклучително и таканаречениот „вертикален гасен коридор“, кој треба да ја поврзе Грција со земјите од југоисточна Европа.Договорот со Бугарија доаѓа во момент кога Украина паралелно склучува и други безбедносни и одбранбени партнерства, но токму соработката со Софија се издвојува како клучна поради индустрискиот капацитет и геостратешката позиција на земјата.

Свет | пред 2 месеци

Зеленски најави нова ера: Украина потпиша 10-годишни воени договори со заливските држави

Украинскиот претседател Володимир Зеленски изјави дека Украина склучила „историски“ одбранбени договори со земји од Блискиот Исток, со кои се отвора ново поглавје во воено-технолошката соработка.Договорите се потпишани со Катар, Саудиска Арабија и Обединети Арапски Емирати и предвидуваат стратешка соработка во период од десет години. Иако деталите не се јавно објавени, Зеленски откри дека тие вклучуваат и украинско искуство во справување со беспилотни летала.Клучен сегмент од соработката е размената на технологии, при што Украина нуди поевтини системи за пресретнување на дронови, како алтернатива на скапите противвоздушни ракети што ги користат земјите од Заливот.Овие договори доаѓаат во време на засилени безбедносни предизвици во регионот, каде беспилотните летала стануваат сè почесто средство во современите конфликти, што ја прави украинската експертиза особено барана на меѓународниот пазар.

Свет | пред 2 месеци

(Видео) Руски аналитичар тврди: „Осудени сме на пораз во Украина“

Рускиот воен аналитичар Константин Сивков, кој во 2014 година тврдеше дека Киев ќе падне „за два до три дена“, сега јавно предупредува на можен пораз на Русија во војната против Украина.Сивков, потпретседател на Академијата за геополитички проблеми и резервен капетан од прва класа во руската морнарица, во ново интервју изнесе значително поинаква и песимистичка проценка.„Осудени сме на пораз. Економскиот потенцијал на Западот повеќекратно го надминува рускиот и тој потенцијал веќе се претвора во воена предност“, изјавил Сивков.Тој предупредува дека предноста на Западот особено се гледа во производството на вооружување и беспилотни летала, наведувајќи дека масовните напади со дронови бараат и огромни количини противвоздушни ракети.Според него, Русија се соочува со две опции – или да прифати, како што вели, „понижувачки мир“, или да се обиде да постигне одлучувачка воена победа, за која признава дека во моментот нема капацитет.Војната меѓу Русија и Украина започна во 2014 година со анексијата на Крим и конфликтот во Донбас, а ескалираше во целосна инвазија во 2022 година. Наместо брз колапс на Украина, конфликтот прерасна во долготрајна војна на исцрпување, со сè поголем притисок врз воените и економските ресурси на двете страни.

Свет | пред 2 месеци

Зеленски: Русија му помогнала на Иран во нападот врз американска база, нивните сателити трипати снимале пред ударот

Украинскиот претседател Володимир Зеленски изјави дека Русија споделувала разузнавачки информации со Иран, што наводно помогнало во нападот врз американска воена база во Саудиска Арабија.Во интервју за NBC News, Зеленски тврди дека руските сателити ја снимале базата „Принц Султан“ во три наврати – на 20, 23 и 25 март, по што следел напад на 26 март, во кој биле ранети американски војници и оштетена воена опрема.„Сто проценти сум сигурен дека Русија споделува вакви информации со Иран“, изјави Зеленски, повикувајќи се на податоци од украинските разузнавачки служби. Според него, повтореното сателитско снимање е јасен индикатор за подготовка на напад.Американски претставници потврдиле дека во нападот имало повредени војници, но нагласиле дека станува збор за полесни повреди. Информациите за руско учество, засега, не се независно потврдени.Во меѓувреме, Сергеј Лавров ги отфрли ваквите наводи, иако призна дека Москва има долгорочна воена соработка со Техеран.Зеленски предупредува дека војната на Блискиот Исток ѝ одговара на Москва, посочувајќи дека растот на цените на нафтата и евентуалното олеснување на санкциите може да ѝ донесат дополнителни приходи на Русија.Воедно, тој изрази загриженост дека дел од американската воена помош би можела да биде пренасочена од Украина кон Блискиот Исток, што би ја ослабнало украинската одбрана.Киев, како што нагласи Зеленски, останува подготвен за преговори со Москва, но не и на територија на Русија или Белорусија, кои ги смета за сојузници во конфликтот.

Свет | пред 2 месеци

(Видео) Трет напад неделава: Дронски удар врз клучен руски нафтен терминал

Клучниот руски енергетски терминал во пристаништето Уст-Луга беше погоден во украински напад со беспилотни летала, при што избувна пожар и беше нанесена материјална штета.Информацијата ја соопшти гувернерот на Ленинградската област, Александар Дрозденко, кој наведе дека во текот на нападот биле соборени вкупно 36 дронови над регионот.Станува збор за еден од најважните руски извозни пунктови за нафта, со дневен капацитет од околу 700.000 барели. Според достапните податоци, во текот на 2025 година преку терминалот биле транспортирани околу 32,9 милиони метрички тони нафтени производи.Со терминалот управува Транснефт, клучен играч во руската енергетска инфраструктура.Ова е трет напад врз ова пристаниште во текот на неделата, што укажува на засилена стратегија на Украина за таргетирање на руската енергетска инфраструктура.Нападите врз нафтени терминали и рафинерии се дел од пошироките напори на Киев да ја ослаби економската основа на Москва, односно приходите кои директно ја финансираат воената машинерија на Русија.

Свет | пред 2 месеци

Смртоносни напади меѓу Русија и Украина: загинати цивили од двете страни

Најмалку четири лица загинаа во руските ноќни воздушни напади врз Украина, додека во украински напад на руска територија е убиено дете, соопштија локалните власти од двете земји, во нов бран ескалација на конфликтот.Во јужниот украински град Одеса, според локалните власти, загинале две лица, а најмалку 13 се повредени, откако бил погоден и објект на родилиште.„Немаше апсолутно никаква воена цел таму. Станува збор едноставно за чист тероризам против цивилни животи“, изјави украинскиот претседател Володимир Зеленски.Нападите предизвикале значителна материјална штета, вклучително и на пристанишната инфраструктура во регионот на Одеса, каде биле регистрирани повеќе удари.Според украинските воздухопловни сили, во текот на ноќта Русија лансирала 273 дрона, од кои 252 биле соборени.Во друг напад, во Криви Рог, бил убиен еден маж откако била погодена индустриска постројка, при што избувнале пожари.Во централна Украина, во Полтавската област, едно лице загинало откако дронови погодиле станбена зграда и индустриски објекти.„Секој ваков напад е доказ дека Русија нема намера да ја заврши оваа војна. Затоа, секое попуштање на притисокот врз неа е опасно“, изјави Зеленски.Истовремено, руските власти соопштија дека во украински напад со дрон врз Јарослављ, северно од Москва, загинало дете.Според руските информации, во текот на ноќта биле пресретнати и уништени 155 украински дронови во рускиот воздушен простор.Нападите доаѓаат во контекст на континуирани воздушни операции од двете страни, при што конфликтот, кој трае од февруари 2022 година, продолжува да носи жртви и уништување на цивилна и стратешка инфраструктура.

Свет | пред 2 месеци

Ако Зеленски дојде до нуклеарно оружје, Европа ќе биде првата жртва на уцена, вели Захарова

Портпаролката на руското Министерство за надворешни работи, Марија Захарова, изјави дека Западна Европа би била „првата жртва на уцена“ доколку украинскиот претседател Володимир Зеленски дојде до нуклеарно оружје. Пораката ја поврза со барањата на Киев безбедносните гаранции за Украина да опфатат и прашања поврзани со нуклеарното вооружување.Според Захарова, во вакво сценарио Зеленски, покрај финансиска и воена поддршка, би поставувал услови пред западните земји во насока на, како што таа го опиша, „одржување на својот режим“. Таа оцени дека притисокот би се пренел врз европските држави и дека токму тие би се нашле меѓу првите изложени на ризик.Захарова повтори дека Москва инсистира Украина да има ненуклеарен статус, нагласувајќи дека тоа, според руската позиција, е „принципиелен став“ поврзан со причините за украинската криза.Изјавата доаѓа во контекст на продолжените тензии меѓу Русија и Западот околу моделот на безбедносни гаранции за Украина и долгорочната архитектура на европската безбедност.

Свет | пред 2 месеци

Зеленски пристигна во Доха – нова дипломатска офанзива

Украинскиот претседател Володимир Зеленски пристигна во Доха на работна посета, продолжувајќи ја својата дипломатска турнеја на Блискиот Исток.Според информациите на Катарската новинска агенција, Зеленски бил пречекан на Меѓународниот аеродром во Доха од државниот министер за надворешни работи Мохамед бин Абдулазиз ал-Кулаифи, како и од украинскиот амбасадор во Катар, Андриј Кузменко.„Неговата екселенција, претседателот на Украина Володимир Зеленски, пристигна утринава во Доха на работна посета“, се наведува во соопштението.Посетата следува по неодамнешната посета на Обединетите Арапски Емирати, каде Зеленски разговараше за безбедносна и одбранбена соработка.Се очекува во наредниот период да бидат објавени повеќе детали за агендата и средбите во рамки на посетата.

Свет | пред 2 месеци

Зеленски: Нема услови за трипартитен состанок со САД и Русија

Нема услови за одржување на трипартитен состанок меѓу Украина, САД и Русија, изјави украинскиот претседател Володимир Зеленски, посочувајќи дека безбедносните ограничувања и несогласувањата околу локацијата ги блокираат разговорите.Зеленски нагласи дека комуникацијата со американската страна е континуирана, но дека постојат сериозни пречки за директни средби.„Ние секојдневно разговараме со американската страна, нашиот преговарачки тим разговара со своите колеги. Сепак, постои една потешкотија, се чувствуваме како посредници во овој процес, а не како страна во војната. Зошто? Затоа што сме подготвени да се сретнеме било каде, пожелно во трипартитен формат, но американската страна може само во Америка, а Русија може насекаде, но не во Америка“, изјави Зеленски.Тој посочи дека дополнителен фактор е актуелната безбедносна ситуација.„И засега, поради војната на Блискиот Исток и војната со Иран, Американците, односно тимовите, од безбедносни причини не патуваат во странство“, додаде Зеленски.Поради ваквите околности, засега нема утврден датум за нов трипартитен состанок.

Свет | пред 2 месеци

Руски напад врз Одеса – загинато едно лице, 11 повредени

Едно лице загина, а 11 се повредени, меѓу кои и дете, во руски ноќен напад врз цивилна инфраструктура во Одеса, соопштија украинските власти.Според началникот на Одеската воена администрација, Сергиј Лисак, жртвата им подлегнала на повредите во болница.„Од седум часот, за жал, познато е дека едно лице почина во болница од последиците од здобиените повреди“, напиша Лисак.Тој информираше дека вкупно 11 лица се повредени, вклучително и едно дете, и дека сите добиле неопходна медицинска помош.Според украинските медиуми, руската војска во текот на ноќта извршила масовен напад со дронови врз Одеса, при што на повеќе локации во градот избувнале пожари.Нападот предизвикал значителна штета врз цивилната инфраструктура и дополнително ја влошил безбедносната состојба во регионот.

Свет | пред 2 месеци

Девојката од Украина која барала помош пред маркети во Скопје, ги одбила сите видови понудена помош, објави украинското здружение во земјава

Здружението на Украинците во Република Македонија „Лесја Украинка“ информира дека девојката со мало дете, која се претставува како украинска државјанка и бара милостина во центарот на Скопје, ги одбила сите понудени форми на помош.Од здружението соопштија дека по добиените информации за нејзиното присуство пред маркетите од синџирите КАМ и Тинекс, нивни претставници стапиле во директен контакт со неа и ѝ понудиле сеопфатна поддршка.Во разговорот, како што наведуваат, ѝ биле објаснети можностите за законски престој во земјава, вклучително и добивање дозвола за привремен престој од хуманитарни причини, азил или туристички престој. Понудени ѝ биле и услуги од преведувач, како и помош при подготовка на потребната документација.Дополнително, ѝ било препорачано да стапи во контакт со конзуларниот оддел на Амбасадата на Украина во државата, а ѝ било понудено и посредување за обезбедување сместување, вработување и материјална помош во вид на храна, облека и основни потреби. Од здружението биле подготвени да ѝ обезбедат и СИМ-картичка, бидејќи, како што посочила, немала телефонски број.Во меѓувреме, истиот ден, како што информираат, и други организации понудиле поддршка, меѓу кои хуманитарната организација „Св. Спас“, Црвен крст на град Скопје, како и „Легис“ и „Екрауд“ фондацијата.„Како резултат на тоа, оваа државјанка ги одби сите видови понудена помош. Таа изрази незадоволство што нејзината приказна доби јавност, изјавувајќи дека тоа „ѝ пречи да собира пари“. И покрај ветувањето дека сама ќе купи телефонска картичка и ќе стапи во контакт со претставниците на Здружението, во текот на изминатите два дена таа не се јави“, напишаа од Здружението на Украинци во Македонија.Од „Лесја Украинка“ посочуваат дека ги презеле сите можни чекори за помош и се оградуваат од понатамошната одговорност за нејзината состојба и легалноста на нејзиниот престој, нагласувајќи дека натамошното постапување е во надлежност на институциите.Воедно, упатуваат благодарност до граѓаните за нивната внимателност и апелираат до јавноста да ги информира доколку девојката повторно биде забележана.

Скопје | пред 2 месеци

Лавров: Украина и Иран не се исто

Рускиот министер за надворешни работи Сергеј Лавров во четвртокот изјави дека ситуациите во Иран и Украина се разликуваат, бидејќи, според него, „Киев, заедно со своите западни спонзори, ги прекршил сите меѓународни норми што можело да се прекршат“.Од друга страна, како што рече, Иран „не прекршил никакви меѓународни обврски“.„Која е разликата меѓу ситуацијата во Иран и Украина? Разликата е во тоа што Исламската Република Иран не прекршила никакви меѓународни обврски, вклучително и оние што се однесуваат на иранската нуклеарна програма... Украина, заедно со своите западни спонзори, прекршила сè што можело да се прекрши“, изјави Лавров во интервју за телевизијата „Франс“.Според неговите зборови, во случајот со Украина, Русија предупредувала дека Франција, Германија и други западни земји ја водат ситуацијата кон криза, а исто така предложила склучување договор за безбедносни гаранции со САД и НАТО во декември 2021 година.„Ни беше кажано дека тоа не нè засега и дека Украина ќе влезе во НАТО“, нагласи Лавров.Тој додаде дека за време на преговорите за Украина, лидерите на Европската унија и НАТО се обидувале да ја одвратат американската делегација од договорите постигнати меѓу рускиот и американскиот претседател Владимир Путин и Доналд Трамп во Енкориџ, Алјаска.„Сите наредни преговори по Енкориџ беа отежнати од фактот што ЕУ и раководството на НАТО, пред сè Урсула фон дер Лајен и Марк Руте, на секој начин се обидуваа да ги поткопаат тие разбирања и да ја одвратат американската администрација од договорите што ги поддржавме“, изјави Лавров.Тој додаде дека САД се обидуваат да обезбедат Киев да се согласи со договорите постигнати на самитот во Енкориџ.„Гледам дека американската страна настојува да направи сè за да обезбеди Киев да го прифати договорот што го постигнаа претседателите на Русија и САД на Алјаска“, изјави Лавров.Според него, по реализацијата на тие договори ќе останат уште низа прашања што треба да се решат меѓу Москва и Киев, бидејќи тие не биле сеопфатни.Тој посебно ги спомена прашањата за рускиот јазик и канонската Украинска православна црква, оценувајќи дека без притисок од ЕУ и НАТО не треба да се очекуваат чекори од Киев.Лавров го коментираше и предлогот за распоредување стабилизациски сили во Украина по евентуално примирје, оценувајќи дека тоа би претставувало „отворена окупација на земјата“.„Сега зборуваат дека Западот ѝ ветува на Украина ‘безбедносни гаранции’. Францускиот претседател Макрон повеќепати тврдеше дека тие гаранции, вклучително и распоредување ‘стабилизациски сили’, се решение, што на крај би значело чиста окупација“, заклучи шефот на руската дипломатија.

Свет | пред 2 месеци