ЦИА: Украина не ја таргетирала резиденцијата на Путин

Американската Централна разузнавачка агенција проценила дека Украина не ја таргетирала резиденцијата на рускиот претседател Владимир Путин во неодамнешниот напад со беспилотни летала, и покрај тврдењата што самиот Путин му ги соопштил на американскиот претседател Доналд Трамп во телефонски разговор. Проценката, за која директорот на ЦИА Џон Ратклиф го информирал Трамп, директно го доведува во прашање официјалниот наратив на Кремљ, пренесуваат американски медиуми.Русија во понеделникот јавно ја обвини Украина дека се обидела да ја нападне резиденцијата на Путин, по што Трамп пред новинарите потврди дека рускиот претседател лично му го изнел тоа тврдење. Во тој момент, Трамп изјави дека наводниот напад го вознемирил, нагласувајќи дека „не му се допаѓа“ и дека „не е добро“, додавајќи дека бил „многу лут“. Иако призна дека е можно тврдењето да е неточно, тој истакна дека Путин му рекол оти нападот навистина се случил.По брифингот од страна на директорот на ЦИА, ставот на Трамп очигледно се променил. На социјалната мрежа Truth Social, тој сподели линк до уреднички текст на „Њујорк пост“ во кој се оценува дека Русија е таа што го попречува патот кон мир. Во текстот се наведува дека е иронично Путин, кој води војна со огромни човечки жртви речиси четири години, да очекува посебна осуда за наводен напад врз него, а дополнително се посочува дека таков напад најверојатно воопшто не се случил.Во уредничкиот коментар се потсетува дека украинскиот претседател Володимир Зеленски остро ги негирал обвинувањата, додека портпаролот на Кремљ Дмитриј Песков признал дека Москва не може да обезбеди докази, повикувајќи ја јавноста „да му верува на зборот на Кремљ“, нешто што, како што се наведува, медиумите не се подготвени да го направат.Белата куќа не даде коментар за информациите што ги објавија американските медиуми, додека од ЦИА одбија да ја коментираат проценката.Тврдењата на Путин и американската разузнавачка проценка доаѓаат во чувствителен момент, кога администрацијата на Трамп интензивно работи на обиди за постигнување прекин на војната во Украина. Обвинувањето за напад беше изнесено само еден ден по средбата меѓу Трамп и Зеленски во Мар-а-Лаго, на која американскиот претседател изрази оптимизам за можноста од мировен договор. Дел од европските претставници оценуваат дека изјавите на Путин претставуваат обид да се нарушат мировните напори без директна конфронтација со Трамп. Високата претставничка на Европската Унија за надворешна политика Каја Калас оцени дека станува збор за намерно одвлекување на вниманието.Од Москва, пак, Министерството за одбрана соопшти дека 91 беспилотно летало биле лансирани од северна Украина кон резиденцијата на Путин во близина на Валдај, во Новгородската област. Според нив, повеќе од половина од дроновите биле соборени на стотици километри оддалеченост, без притоа да биде објаснето како е утврдено дека нивната крајна цел била резиденцијата на рускиот претседател. Министерството тврди дека останатите дронови биле пресретнати над регионот Новгород во раните утрински часови и објави мапа со наводни патеки на леталата.Сепак, жителите на градот Валдај не пријавиле никакви звуци од дејствување на противвоздушната одбрана во ноќта меѓу 28 и 29 декември. Аналитичарите посочуваат дека бројка од 91 беспилотно летало би подразбирала масовна и интензивна противвоздушна активност, што би било тешко да остане незабележано од локалното население.

Свет | пред 4 месеци

Трамп го одложи зголемувањето на царините за мебел и кујнски елементи

Американскиот претседател Доналд Трамп донесе одлука да го одложи најавеното зголемување на царините за тапациран мебел, кујнски елементи и елементи за бањи за период од една година. Одлуката е потпишана само неколку часа пред истекот на 2025 година, со што примената на повисоките царински стапки, кои требаше да стапат во сила денеска, се поместува за почетокот на 2027 година, соопшти Белата куќа.Со оваа одлука се стопира планираното поскапување на увезените производи, кое требаше директно да влијае врз увозниците и потрошувачите во Соединетите Американски Држави. Потсетување дека во септември минатата година беа воведени царини од 25 проценти за овие производи, со план тие од почетокот на 2026 година да се зголемат на 50 проценти за кујнските елементи и на 30 проценти за тапацираниот мебел. Со одложувањето, царините засега остануваат на постојното ниво од 25 проценти.Од Белата куќа како причина за одлуката ги наведуваат тековните трговски преговори со меѓународните партнери. Во официјалното соопштение се посочува дека Соединетите Држави продолжуваат со продуктивни разговори со трговските партнери со цел решавање на прашањата поврзани со трговскиот реципроцитет и националната безбедност во контекст на увозот на дрвни производи. Сепак, не е прецизирано зошто одлуката за одложување е донесена токму во последните часови од годината.Одлуката доаѓа во чувствителен момент за администрацијата на Трамп, која се соочува со зголемени критики поради растот на цените и неможноста да се стабилизира инфлацијата. Дел од јавноста и економските аналитичари зголемувањето на цените го поврзуваат токму со царините воведени за широк спектар увозна стока откако Трамп ја презеде функцијата на почетокот на 2025 година. Цените на мебелот веќе претходно пораснаа поради царините за производи од Кина и Виетнам, кои се меѓу најголемите светски извозници во оваа индустрија.И покрај загриженоста кај американските домаќинства, претседателот Трамп и понатаму за инфлацијата ја обвинува претходната администрација на Џо Бајден, тврдејќи дека неговата царинска политика на долг рок ќе доведе до намалување на трошоците за граѓаните.При воведувањето на царините во септември, Трамп како главни аргументи ги наведе заштитата на домашната дрвна индустрија и националната безбедност. Одлуката следеше по истрага спроведена од американското Министерство за трговија за увозот на дрвна граѓа. Во месеците пред тоа, Трамп повеќепати ја критикуваше Канада поради големиот извоз на дрвни производи во САД, оценувајќи дека таквата трговска пракса може да претставува ризик за националната безбедност.

Свет | пред 4 месеци

Утре е Свети Игнат: Народните верувања велат – каков ќе биде 2 јануари, таква ќе биде и целата година

Утре, на 2 јануари, во народниот календар се одбележува празникот Свети Игнат, ден кој, според верувањата, има особено значење за тоа како ќе се одвива годината што следи. Се смета дека од овој ден започнува постепено да се зголемува денот, симболично носејќи нова животна енергија и надеж.Според народните преданија, сè што човек ќе го прави или што ќе му се случува на Свети Игнат ќе биде знак за текот на целата година. Оттука и верувањето дека каков ќе биде 2 јануари – таква ќе биде и годината пред нас.Посебно внимание, според обичаите, се обрнува на првиот човек што ќе влезе во домот. Ако тоа е млад, весел и позитивен човек, се верува дека носи среќа, бериќет и радост. Доколку, пак, прв влезе постара личност, народот верувал дека годината нема да биде поволна.Затоа се советува овој ден да помине во добро расположение, без кавги и нервози, со позитивни мисли и убави дела. Народот верува дека треба да се прави само она што човек би сакал да го следи во текот на целата година – мир, насмевки и спокојство.Како дел од традицијата, се препорачува и пред спиење да се прочита неколку страници од добра книга, со желба, како што велат старите, „умно да тргне годината“. Свети Игнат е и потсетник да не се заборават блиските, да се искаже благодарност и љубов и денот да се исполни со мир и добрина.Во народното верување, 2 јануари е симбол на убав почеток и надеж за спокојна и среќна година.

Македонија | пред 4 месеци

Ѓорѓиевски: Евгенија е првото новородено бебе во Скопје во 2026 година

Малата Евгенија Камчева е првото бебе родено во Скопје во новата 2026 година, соопшти Орце Ѓорѓиевски, нагласувајќи дека нејзиното раѓање претставува силен симбол на надеж и нов почеток за градот.Како што информира, Евгенија се родила точно на полноќ, во моментот кога новата година ги „отворила своите врати“, носејќи радост и оптимизам кај скопјани.„Нов живот, нова надеж и убав симбол за почеток исполнет со радост и вера во иднината“, порача Ѓорѓиевски, посакувајќи ѝ на Евгенија да расте жива и здрава, среќна со своите родители и со живот исполнет со љубов, достоинство и можности.Тој истакна и дека обврска на општеството е да создаде услови во кои секое дете ќе може да сонува, да напредува и да верува, нагласувајќи дека секое новородено дете е заедничка надеж и одговорност.„Нека оваа година биде плодна и бериќетна, година на нови животи, насмевки и радост“, порача Ѓорѓиевски, упатувајќи искрени честитки до мајката Емилија и добредојде до малата Евгенија, како „најубавиот почеток на новата година“.

Скопје | пред 4 месеци

Ѓорѓиевски: „Вечерва покажавме како се сака Скопје“

Орце Ѓорѓиевски со емотивна порака им ја честиташе Новата година на скопјани, упатувајќи благодарност за, како што наведе, сплотеноста и љубовта кон градот.„Ти се поклонувам, Скопје! Среќна Нова година, мој народе. Да сте здрави, живи и секогаш да останеме вака сплотени“, напиша Ѓорѓиевски во својата објава.Тој истакна дека прославата е доказ за заедништвото и грижата кон градот, потенцирајќи дека токму ваквите моменти ја покажуваат вистинската љубов кон Скопје.„Вечерва покажавме како се сака градот убав. Ви благодарам од срце“, порача Ѓорѓиевски.

Скопје | пред 4 месеци

(Видео) Смртоносна експлозија во Кран Монтана, најмалку 10 загинати

Најмалку десетина лица загинале во експлозија и пожар што избувнаа ноќта во бар во познатиот швајцарски ски-центар Кран Монтана, на прослава на Новата година.Има и повредени лица. Локалните медиуми пак објавија дека бројот на загинати може да биде и поголем.Според полицијата Полицијата, исто така, потврди дека инцидентот не се третира како терористички напад, а болниците се преполни со пациенти со изгореници.Експлозијата се случила околу 1:30 часот по локално време во барот Le Constellation, а причината според Би-Би-Си сè уште не е позната.

Свет | пред 4 месеци

Кипар од денеска го презема претседавањето со Европската унија

Од денес, во наредните шест месеци, Кипар, го презеде ротирачкото претседателство со Советот на ЕУ од Данска.Кипарскиот претседател Никос Христодулидес објави дека приоритетите на претседателството ќе бидат зајакнување на стратешката автономија на ЕУ, почнувајќи од одбраната и безбедноста до енергијата, конкурентноста, миграцијата, достапното домување, како и приближувањето на Унијата кон Блискиот Исток и Источниот Медитеран.Клучни приоритети на претседателствотоПриоритетите вклучуваат и континуирана поддршка за Украина, договор за седумгодишниот буџет на ЕУ за периодот 2028-2034 година и проширување.Кипар ќе го извршува својот шестмесечен мандат на чело на ЕУ дисциплинирано и посветено, но и со „различен начин на размислување“, изјави кипарскиот министер за надворешни работи Константинос Комбос, објави британски Гардијан.„Веруваме дека малите земји во овие ситуации имаат многу да понудат“, изјави Комбос за британскиот весник.

Свет | пред 4 месеци

Новогодишна честитка, струјата поскапе

Од денеска поскапува струјата, од 2,45 отсто во првиот блок до 3,84 проценти во четвртиот блок..Од 1 јануари 2026 година цената на струјата ќе биде повисока за 2,45 отсто во првиот блок, за 2,87 отсто во вториот блок, за 3,32 отсто во третиот и за 3,84 проценти во четвртиот блок, додека евтината тарифа ќе се покачи за 2,5 отсто.Засега останува евтината дневна тарифа во истиот временски тајминг, односно од 13:00 до 15:00 часот.

Македонија | пред 4 месеци

Точно на полноќ во Скопје се роди девојче, првото бебе во Новата година

Во Скопје, точно на полноќ, на 1 јануари 2026 година, на Универзитетската клиника за гинекологија и акушерство во Скопје се роди првото бебе во новата година.Првото новороденче во 2026 е девојче, кое на свет дојде само неколку секунди по влегувањето во новата година, носејќи радост и надеж за нејзиното семејство и медицинскиот тим.Од Клиниката за гинекологија информираат дека и мајката и бебето се во добра здравствена состојба.

Македонија | пред 4 месеци

Мицкоски заедно со граѓаните на плоштад „Македонија“, на дочек на Новата година

Претседателот на Владата, Христијан Мицкоски, синоќа заедно со граѓаните, ја дочека Новата 2026 година на плоштадот „Македонија“ во Скопје.Премиерот на социјалните мрежи објави порака со која им посака здравје, разбирање и успеси на сите граѓани, нагласувајќи ја важноста од заедништво и позитивна енергија во Новата година.„Заедно со нашиот народ на плоштадот Македонија да ја дочекаме Новата година. Да посакам добро здравје, разбирање и успеси за секој еден човек на нашата Македонија. Среќна Нова година!“, напиша Мицкоски.На дочекот на плоштадот, премиерот беше заедно со градоначалникот на Град Скопје, Орце Ѓоргиевски.

Македонија | пред 4 месеци

Четиринаесет години од смртта на Киро Глигоров

Денеска, 1 јануари, се навршуваат 14 години од смртта на првиот претседател на независна Република Македонија, Киро Глигоров.Глигоров почина на 1 јануари 2012 година во Скопје во својот дом на 94 годишна возраст.Роден е на 3 мај 1917 година во Штип и има активна улога во процесот на осамостојување на државата и нејзиното меѓународно признавање.Во 1991 година Глигоров успеа по мирен пат да ја осамостои Македонија од дотогашната Социјалистичка Федеративна Република Југославија во која самиот Глигоров извршуваше високи државни функции.На 3 октомври 1995 година преживеа атентат со автомобил-бомба поставен на улицата „Македонија“ во непосредна близина на хотелот „Бристол“. По неколкумесечното лекување, на 10 јануари 1996 година Глигоров се врати на својата претседателска должност.Добитник е на бројни домашни и меѓународни награди и признанија.

Македонија | пред 4 месеци

Студено на почетокот на Новата година

Првиот ден во Новата година времето во Македонија е ведро и многу студено, со температури кои на некои места се спуштаат и до минус 13 степени.Во текот на денот времето ќе биде претежно сончево, со слаб до умерен ветер од југозападен правец. Максималните дневни температури ќе се движат од минус 1 до 6 степени.Во Скопје утрото е студено, со минимална температура до минус 8 степени, а преку денот ќе преовладува сончево време со умерен јужен ветер. Максималната температура во главниот град ќе достигне околу 3 степени.Во наредните денови времето ќе биде студено, а петок се очекува променливо облачно време со минимални температури под нулата насекаде низ земјата. Во западните делови ќе има повремени врнежи од снег.Потоа следува период на постепено затоплување, со променлива облачност и повремени локални врнежи од дожд, додека на планините врнежите ќе бидат од снег.

Македонија | пред 4 месеци

Бугарите од денеска плаќаат во евра

Бугарија од денеска 1 јануари 2026 година го усвои еврото како своја платежна валута.Иако еврото е официјална во употреба, следува преоден период. До 31 јануари ќе може да се плаќа и во левови, но трговците ќе мора кусурот да го враќаат исклучиво во евра.Ова е голем исчекор и пресвртница за земјата, за историјата на еврото и за ЕУ како целина.Ова следи по период на интензивни подготовки и напори од страна на Бугарија за исполнување на сите потребни барања, соопшти Европската комисија.Еврото ќе донесе практични придобивки за бугарските граѓани и бизниси. Ќе го олесни патувањето и живеењето во странство, ќе ја зголеми транспарентноста и конкурентноста на пазарот и ќе ја олесни трговијата. Банкнотите и монетите во еврото, исто така, ќе станат опиплив симбол на слободите, придобивките и можностите што ЕУ им ги нуди на своите граѓани за сите Бугари.Комисијата целосно ја поддржа Бугарија во нејзиниот процес на приклучување кон еврото. Со пристапувањето на Бугарија, како 21 земја-членка на ЕУ и повеќе од 357 милиони граѓани на ЕУ ќе ја делат единствената валута на ЕУ и единствениот пазар.Јавната поддршка за еврото во ЕУ и еврозоната останува многу силна, при што големо мнозинство граѓани на ЕУ веруваат дека еврото е добра работа за ЕУ ​​како целина и за нивната земја, како што покажува најновиот Евробарометар.

Свет | пред 4 месеци

2026 нека биде година во која ќе бидеме подобри отколку што бевме

Нека Новата 2026 година не дојде само како нов број во календарот, туку како можност да оставиме зад себе сè што нè изморило, нè поделило или нè направило помалку луѓе. Нека биде година во која ќе научиме повторно да слушаме, да разбираме и да се поддржуваме – и како поединци, и како заедница.Посакуваме 2026 да донесе повеќе мир во секој дом, повеќе сигурност во секој чекор и повеќе надеж во секоја одлука. Да имаме здравје што не се зема здраво за готово, храброст да се соочиме со предизвиците и мудрост да препознаеме што навистина вреди.Нека новата година биде помалку бучна со ветувања, а погласна со дела. Помалку тешка со разочарувања, а побогата со мали, човечки радости. Да ни биде година на достоинство, чесност и напредок – личен и заеднички.Среќна и мирна Нова 2026 година.Со надеж дека ќе биде подобра од сите претходни – затоа што ние ќе ја направиме таква.

Македонија | пред 4 месеци

Зошто одбројуваме до Нова година: современ ритуал што создава чувство на заедништво

Одбројувањето од десет до нула во пресрет на доаѓањето на Новата година, иако често се доживува како древна традиција, всушност е релативно нов обичај, вели професорот по културно наследство на Универзитетот во Антверпен, Марк Јакобс.Во изјава за белгиското државно Радио 1, Јакобс објаснува дека со векови луѓето одбројувале денови, но одбројувањето секунди до полноќ е појава која се развила дури во 50-тите или 60-тите години на минатиот век, паралелно со подемот на масовните медиуми.Според него, токму радиото и телевизијата овозможиле луѓето истовремено да одбројуваат, создавајќи заеднички, колективен момент. Значајна улога во ширењето на овој ритуал имале и преносите од „Тајмс Сквер“ во Њујорк, каде што традиционално на полноќ се спушта голема топка – симбол кој прераснал во меѓународен знак за дочекот на Новата година.Јакобс посочува дека одбројувањето претставува класичен обред на премин – симболично збогување со старата и влегување во новата година. Во тие неколку секунди, нагласува тој, границите привремено исчезнуваат, луѓето се чувствуваат рамноправни, улогите се менуваат, а бучавата и спонтаноста стануваат дозволени.Професорот потсетува дека во минатото колективното одбројување било речиси невозможно, бидејќи часовниците често не биле точни, а секундите немале големо значење. Дури со синхронизацијата на времето и развојот на медиумите станало можно милиони луѓе да бројат заедно до истиот момент.Тој исто така нагласува дека 1 јануари не отсекогаш бил почеток на новата година. Во различни историски периоди, годината започнувала на различни датуми – од март, преку Велигден, па сè до Велики петок. Обид за воспоставување ред направил Јулиј Цезар во 46 година п.н.е., со воведувањето на Јулијанскиот календар и 1 јануари како официјален почеток на годината.И покрај тоа, желбата за прослава, според Јакобс, постоела отсекогаш. Уште од 19 век се бележат собири со храна, бучава и славење околу полноќ, слично како и кај другите големи празници. Таа потреба за заедништво и денес е силно присутна, особено за време на Божиќните и новогодишните празници, кога прославите често траат со недели.Целта на сите овие ритуали, заклучува професорот, е чувството на поврзаност меѓу луѓето – чувство кое, барем накратко, ги надминува времето и границите.

Магазин | пред 4 месеци

Граѓаните ќе паркираат бесплатно во Центар за време на новогодишните и божиќните празници

Паркирањето во Општина Центар за време на новогодишните и божиќните празници ќе биде бесплатно за сите граѓани, информираат од ЈП Паркинзи на Општина Центар (ЈП ПОЦ).На 1 јануари 2026 година (четврток), сите паркиралишта со кои стопанисува ЈП ПОЦ ќе бидат без наплата. Редовната наплата за паркирање, како и издавањето договори во Дирекцијата на претпријатието, ќе продолжи на 2 јануари 2026 година (петок), согласно вообичаеното работно време.Бесплатно паркирање е најавено и за време на божиќните празници. На 6 јануари (вторник) и 7 јануари (среда), сите паркиралишта под надлежност на ЈП ПОЦ ќе бидат без наплата за граѓаните. Редовната наплата и административните услуги ќе продолжат на 8 јануари 2026 година (четврток).Од претпријатието информираат дека депото на „Пајак“ службата ќе работи непрекинато, 24 часа дневно, и за време на празниците. Воедно, затворените паркиралишта „Дилајла“, со автоматска наплата, и „Трготекстил“ ќе функционираат според редовниот режим на наплата.Од ЈП Паркинзи на Општина Центар им посакаа на граѓаните среќни новогодишни и божиќни празници.

Скопје | пред 4 месеци

Бугарија од 1 јануари 2026 го воведува еврото

Од 1 јануари 2026 година, Бугарија официјално го воведува еврото како законско средство за плаќање, со што националната валута – левот, заминува во историјата. Поради техничката транзиција кон новата валута, надлежните институции предупредија на привремени прекини во банкарските и платните системи за време на новогодишната ноќ.Како што е најавено, банкарските системи ќе бидат технички ресетирани во периодот меѓу 31 декември и 1 јануари. Во тој временски интервал, плаќањата со платежни картички нема да бидат можни, ПОС терминалите во продавниците и рестораните ќе бидат привремено надвор од функција, а банкоматите нема да издаваат готовина ниту ќе прифаќаат картички.Прекинот во работењето се очекува да трае од околу 21 часот на 31 декември до приближно еден и пол час по полноќ, по што системите постепено ќе бидат повторно активирани, овојпат со новата валута – евро. Поради тоа, граѓаните и туристите се повикуваат навремено да обезбедат доволна количина готовина.Официјалниот курс на конверзија е утврден на 1 евро за 1,95 лева. Со приклучувањето кон Еврозоната, Бугарија станува 21-ва членка на монетарната унија и добива право на учество во Советот на гувернери на Европската централна банка, со што директно ќе учествува во креирањето на монетарната политика на Еврозоната.

Свет | пред 4 месеци

(Видео) Сиднеј ја дочека 2026 година со спектакуларен огномет и засилени безбедносни мерки

Сиднеј денеска влезе во новата 2026 година со традиционален, величествен огномет, но под строги безбедносни мерки, само две недели по трагичниот вооружен напад на еврејска прослава на плажата Бонди, во кој загинаа 15 лица.Во 23 часот по локално време, организаторите одржаа минута молк во чест на жртвите. Мостот Харбор беше осветлен во бела боја, а на неговите пилони беше проектирана менора – симбол на јудаизмот. Градоначалничката на Сиднеј, Кловер Мур, изјави дека по трагичниот крај на годината за градот, новогодишниот дочек треба да биде можност граѓаните да се обединат и со надеж да ја дочекаат мирната и среќна 2026 година.Нападот се случи на 14 декември за време на прославата на Ханука, кога вооружени напаѓачи – татко и син – убија 15 луѓе. Станува збор за најтешкото масовно убиство во Австралија во речиси три децении, кое ја шокираше јавноста и ги засили стравувањата од пораст на антисемитизмот во земјата.Поради безбедносни причини, традиционалните празнични прослави на плажата Бонди годинава беа значително поскромни, а неколку новогодишни настани беа откажани. За време на главниот дочек, на кој обично присуствуваат повеќе од еден милион луѓе, во градот беа распоредени околу 3.000 полицајци, дел од нив и со автоматско оружје.Премиерот на Нов Јужен Велс, Крис Минс, порача дека општеството мора да покаже пркос пред ваквите злосторства и да испрати јасна порака дека тероризмот нема да ги заплаши граѓаните, ниту ќе го промени начинот на живот во градот.

Свет | пред 4 месеци

Охридскиот аеродром конечно легализиран по повеќе од шест децении

Охридскиот аеродром „Св. Апостол Павле“ по повеќе од 60 години конечно е впишан во катастар и доби имотен лист, со што официјално е завршен процесот на негово легализирање. Оваа информација ја соопшти вицепремиерот и министер за транспорт, Александар Николоски, на последниот ден од 2025 година.Како што наведува Николоски, аеродромот кој функционира уште од 1970-тите години, досега немал регулиран имотно-правен статус, што претставувало долгогодишен проблем и пример за негрижа кон државниот капитал.Во текот на изминатата година, тимови од Министерството за транспорт, АД „Аеродроми“, ТАВ, како и од Агенцијата за катастар на недвижности, Државното правобранителство, Управата за имотно-правни работи и други надлежни институции, интензивно работеле на решавање на овој процес и на впишување на аеродромот во катастарските евиденции.Николоски потенцира дека иако во нормални услови ваква постапка не би била вест, поради долгогодишното запоставување, јавноста заслужува да биде информирана за овој значаен чекор.Тој најави дека во наредниот период ќе следат активности за модернизација и реконструкција на Охридскиот аеродром, со цел зголемување на туристичкиот потенцијал и привлекување нови авиолинии и посетители.На крајот, Николоски упати честитка до граѓаните, посакувајќи убава и среќна 2026 година.

Македонија | пред 4 месеци

(Видео) Првите огномети за 2026 година го осветлија Пацификот

Пацифичката држава Кирибати прва ја пречека Новата 2026 година, ставајќи го симболичниот почеток на глобалното новогодишно одбројување. Најголемиот остров во земјата, Киритимати, официјално влезе во новата година во 11 часот по средноевропско време.По Кирибати, од 2025 година се прости и Нов Зеланд. Во Окленд, илјадници граѓани и посетители ја дочекаа Новата година со спектакуларен огномет над Скај Тауер, највисоката зграда во земјата, кој традиционално претставува централна точка на новогодишната прослава.Набргу потоа, Новата 2026 година ја пречекаа и пацифичките островски држави Самоа и Тонга, како и Токелау – територија под управа на Нов Зеланд, лоцирана околу 3.500 километри северно од Окленд. И во овие земји Новата година беше одбележана со јавни прослави и свечена атмосфера, продолжувајќи го глобалниот синџир на новогодишни дочекувања.

Свет | пред 4 месеци

ЈП „Охридски Комуналец“ ги стави во функција новите метачки за одржување на јавната хигиена

Во пресрет на новогодишните празници, ЈП „Охридски Комуналец“ го подигнува нивото на одржување на јавната хигиена со ангажирање на новите комунални машини – метачки, набавени со поддршка на Општина Охрид.Новите метачки веќе се ставени во функција и активно се користат за чистење на јавните површини низ градот. Електричната метачка е наменета за одржување на хигиената во старото градско јадро и централното подрачје на Охрид, додека дизел метачката се користи за чистење на останатите делови од градот.Од ЈП „Охридски Комуналец“ информираат дека со оваа инвестиција значително се подобрува ефикасноста во одржувањето на јавната чистота, со цел граѓаните и туристите празниците да ги дочекаат во почиста и уредена животна средина.

ОО | пред 4 месеци

Каде ќе се слави Новата година: Објавени програмите од градовите, еве кој и каде настапува

Организиран дочек на Новата 2026 година на градските плоштади во Македонија е најавен во Скопје, Кавадарци, Охрид и Кичево, додека во дел од другите градови ќе се одржат алтернативни или дневни празнични програми без централен ноќен дочек.Скопје годинава ќе ја дочека Новата година без традиционален огномет. Градоначалникот Орце Ѓорѓиевски најави дека главниот град се насочува кон поинаков, модерен и семеен концепт на прослава. За музичката програма ќе се погрижат Каролина Гочева, Тамара, Миле Кузмановски, Огнен Здравковски, Лара и Пајак, Два Бона, Куку Леле и Лина Пејовска, кои ќе настапат во рамки на целовечерната програма на плоштадот „Македонија“.И Охрид традиционално ќе организира јавен дочек на Новата година на плоштадот „Свети Климент Охридски“. Забавата ќе започне во 20 часот, а на сцената ќе настапат Влатко Лозановски, Ефто Пупиноски, Ѓоко Танески, како и диџеите Yuxell и Bagzi. На 1 јануари, на истата локација, со почеток во 20 часот, охриѓани ќе имаат можност да уживаат во настапите на групата „Меморија“ и музичкиот состав „Фузија“.Кавадарци, пак, Новата година ќе ја дочека на Градскиот плоштад со настап на Марјан Коцев и неговиот бенд. Програмата ќе започне во 22 часот.Богата предновогодишна програма најави и Општина Крива Паланка, со повеќедневни настани и пладневна журка на 31 декември. Општината, сепак, нема да организира централен јавен дочек во новогодишната ноќ.Општина Кичево најави голем дочек на Новата година на 31 декември пред Домот на културата. Програмата ќе започне со богата детска новогодишна забава, со настапи на „Академија Кристина“, детските ликови Биби и Боби, пристигнување на Дедо Мраз и доделување новогодишни пакетчиња. Вечерната музичка програма, која започнува во 20 часот, ќе вклучи настапи на Ани Малинкова, Елвис Зенкоски, Јасмин Хусоски, Сузана Спасовска, Rozafa Etemi & Black Jack, како и групите „Љубојна“, „Фолтин“, Addicted Band, Phoenix Band, Future Band и други изведувачи.

Македонија | пред 4 месеци

Стјуардеса откри кои се најдобрите седишта во авион за долги летови

Долгите летови во економска класа можат да бидат вистински предизвик, особено кога патникот пред вас ќе го спушти седиштето во текот на целиот лет. Но, според искусна стјуардеса од „Вирџин Атлантик“, изборот на вистинско седиште може значително да го олесни патувањето.Најмирно е над крилатаЗа оние што се плашат од турбуленции, најдобар избор се седиштата сместени над крилата. Таму се чувствуваат најмалку вибрации, бидејќи тоа е делот најблиску до тежиштето на авионот. Во задниот дел турбуленциите се чувствуваат посилно.Каде се спие најдобро?Квалитетот на сон на долг лет зависи од бучавата, местоположбата и движењето на патниците. Затоа, најдобро е да се избере седиште што е подалеку од тоалетите и од кујната, каде што бучавата и светлото почесто пречат.Идеална позиција за побрза услуга и излезЗа патниците кои сакаат побрза услуга и полесно симнување од авионот, стјуардесата препорачува седишта што се наоѓаат околу пет редови од почетокот или пет редови од крајот на кабината.Оние што седат напред почесто го добиваат посакуваниот оброк и побрзо излегуваат по слетувањето. Слична предност имаат и седиштата во задниот дел, бидејќи екипажот најчесто служи од двата краја на кабината.Сепак, треба да се има предвид дека токму во задниот дел турбуленциите се чувствуваат поизразено.

Магазин | пред 4 месеци

Инцидент во скопско Глуво: по вербален конфликт следела физичка пресметка

Во селото Глуво, во скопскиот регион, утрово бил нарушен јавниот ред и мир по претходна расправија која прераснала во физичка пресметка меѓу четири лица, при што бил употребен и тврд предмет.Како што информира Министерството за внатрешни работи, на 30 декември 2025 година во 08:50 часот, во СВР Скопје било пријавено дека по вербален конфликт дошло до тепачка помеѓу М.М.Б. (52) и М.Б. (28), двајцата од селото Глуво, од една страна, и С.Ч. (66) и Б.Ч. (44), двајцата од селото Мирковци, од друга страна.Според пријавеното, во текот на физичката пресметка бил употребен и тврд предмет, по што случајот бил пријавен во полиција. Засега не се соопштуваат детали за евентуални повреди кај учесниците во инцидентот.Од Министерството за внатрешни работи информираат дека по целосно документирање на настанот ќе биде поднесен соодветен поднесок до надлежните институции.

Скопје | пред 4 месеци

Провалил во Центар за дијализа и украл картички, со помошник подигнал 40.300 денари

Полицијата поднесе кривична пријава против две лица поради кражба и неовластена злоупотреба на банкарски платежни картички во Центарот за дијализа во Кочани, при што биле подигнати над 40 илјади денари.Како што соопшти Министерството за внатрешни работи, Одделението за внатрешни работи Кочани поднело кривична пријава против О.С.А. (42) од Штип поради сомнение дека сторил кривично дело „кражба“, како и две кривични дела „оштетување и неовластено навлегување во компјутерски систем“. Дополнително, кривична пријава е поднесена и против Д.Т. (39) од Кочани за продолжено кривично дело „помагање“ во врска со неовластеното навлегување во компјутерски систем.Според наводите од пријавата, на 4 октомври 2024 година, првопријавениот неовластено влегол во просториите на Центарот за дијализа во Кочани и од заклучен шкаф одзел паричник со пари, две банкарски платежни картички и лични документи кои им припаѓале на две вработени лица.Истата вечер, второпријавениот, со помош на украдените платежни картички, извршил повеќе трансакции и подигнал парични средства во вкупен износ од 40.300 денари, со што им овозможил корист за себе и за првопријавениот.Од Министерството за внатрешни работи информираат дека против лицата се преземени законски мерки и дека случајот е целосно документиран и процесуиран до надлежното јавно обвинителство.

Македонија | пред 4 месеци