(Видео) Израел депортира околу 170 активисти од хуманитарната флота, меѓу нив се Грета Тунберг и Србинот Огњен Марковиќ

Околу 170 членови на хуманитарната флота денеска биле депортирани од Израел и упатени кон Грција и Словачка, соопшти израелското Министерство за надворешни работи.Меѓу депортираните се и шведската активистка Грета Тунберг и државјанинот на Србија Огњен Марковиќ, пренесува Times of Israel.На фотографиите објавени од израелското министерство се гледаат Тунберг и другите активисти на аеродромот Рамон, на југот на Израел.Покрај нив, депортирани се и активисти од Грција, Италија, Франција, Ирска, Шведска, Полска, Германија, Бугарија, Литванија, Австрија, Луксембург, Финска, Данска, Словачка, Швајцарија, Норвешка, Велика Британија и САД.Во соопштението на Министерството се наведува:Сите законски права на учесниците во оваа акција беа почитувани и така ќе продолжи. Министерството додаде дека „лажните информации кои ги шират учесниците се дел од нивната однапред подготвена кампања на дезинформации.Претседателот на Србија, Александар Вучиќ, изјави вчера дека државата ќе помогне при ослободувањето на Огњен Марковиќ, кого израелските власти го задржаа при пресретнувањето на флотата.Доколку биде потребно, ќе го повикам и израелскиот премиер Бенјамин Нетанјаху за да помогнеме во неговото ослободување, рече Вучиќ.Израелското Министерство за надворешни работи претходно соопшти дека тврдењата за малтретирање на активистите, меѓу кои и Грета Тунберг, се „голема лага“, додека министерот задолжен за затворите Итамар Бен Гвир изјави:Горд сум што со нив се постапува како со терористи.Од друга страна, организацијата за правна помош Adalah соопшти дека бројни активисти пријавиле физичко и психичко малтретирање. Некои од нив изјавиле дека им била скратена храна и вода, додека други сведочеле за грубо постапување на израелските безбедносни сили.

Свет | пред 7 месеци

Ристовска и Гајдова овојпат ги нема: Познати правници и судии во трката за македонски судија во Стразбур

Дваесетина професори, судии, адвокати и правни експерти се најдоа на новата листа кандидати за судија на Европскиот суд за човекови права во Стразбур, дознава „Скопје1“.Меѓу нив, сепак, не се обвинителката Ленче Ристовска и судијката Габриела Гајдова, кои на претходниот конкурс го поминаа првиот филтер, но не добија поддршка од Владата. Третото име од тој круг, адвокатот Јордан Апостолски, кој тогаш стигна до финалната фаза и овојпат повторно аплицирал со истата амбиција — да суди во име на Македонија во судот во Стразбур. Причината за поништувањето на конкурсот, според Владата, беше неисполнување на предвидените услови од страна на кандидатите.На повторениот конкурс се појавија и нови имиња. Меѓу нив е професорот Сашо Георгиевски од Правниот факултет „Јустинијан Први“, кој претходно немаше аплицирано, како и адвокатот Александар Гоџо, правен експерт за ЕУ и меѓународно право, со долгогодишно искуство во областа на криминалистичките истраги.Од поискусните и познати кандидати се издвојува судијата Андреј Димовски од скопскиот Граѓански суд, кој веќе има работно искуство во Европскиот суд за човекови права, како и правникот Велимир Деловски, поранешен асистент во Регистарот на Судот во Стразбур. Своја апликација поднесе и адвокатот Тони Менкиновски, кој беше кандидат и на минатиот конкурс, како и поранешната претседателка на Академијата за судии и јавни обвинители, институција која често е предмет на јавни критики.На листата се најдоа и судијата Али Алиу, заменик-директорот на Академијата Илир Исени, адвокатките Наташа Бошкова и Соња Петрушева, како и Јелена Ристиќ, извршна директорка на Адвокатската комора на Македонија. За истата позиција конкурира и адвокатот Валентин Пепељуговски.Според процедурите, конечната одлука за тројцата кандидати кои ќе ѝ бидат предложени на Владата ја носи Комисијата за селекција, составена од претседателите на Уставниот, Врховниот, Апелациониот и Кривичниот суд, како и директорката на Академијата за судии и јавни обвинители.

Македонија | пред 7 месеци

Починал по пад од 21 метар: Уште една сомнителна смрт на руски бизнисмен

Телото на 87-годишниот Вјачеслав Леонтив, познат руски медиумски магнат и поранешен директор на издавачката куќа „Правда“, било пронајдено под прозорецот на неговиот стан во Москва. Според првичните информации, Леонтив наводно паднал од висина од 21 метар.Руската полиција спроведува истрага, но засега нема докази кои би укажале на насилна смрт.Рускиот новинар Андреј Малгин ја прокоментирал „чудната смрт“ со зборовите:Падовите од прозорци продолжуваат...“„Многу знаеше за ‘партиските пари‘ – издавачката куќа ‘Правда‘ беше најпрофитабилното претпријатие во деловната империја на Централниот комитет на Комунистичката партија на Советскиот Сојуз“, изјавил тој.Истиот извор наведува дека постојат непотврдени информации според кои Леонтив имал здравствени проблеми.Во последните неколку години, во Русија се забележани повеќе мистериозни смртни случаи на високи менаџери и бизнисмени. Последниот таков случај се случил во јули оваа година, кога заменик-претседателот на компанијата Транснефт, 62-годишниот Андреј Бадалов, починал по пад од зграда во елитната московска населба Рубљовка.

Свет | пред 7 месеци

Возачот Васил Јованов бара помала казна, обвинителката Фатиме Фетаи – построга пресуда

Возачот Васил Јованов, кој во мај ја прегази младата Фросина Кулакова на пешачки премин и беше осуден на 12 години затвор, денеска пред Апелациониот суд во Скопје побара неговата казна да биде намалена. Истовремено, вишата јавна обвинителка Фатиме Фетаи побара построга казна за Јованов, оценувајќи дека првостепената пресуда е преблага, пишува „Слободен печат“.Јованов беше спроведен од затворот „Скопје“ и во судницата уште еднаш изрази жалење за трагедијата:„Сакам да изразам најдлабоко каење и искрено сочувство до семејството на загинатата. Имам голема грижа на совест за тоа што се случи и болката што ја предизвикав.“Судијката известител Александра Ристеска информираше дека по предметот пристигнале две жалби – една од Обвинителството за организиран криминал и корупција со барање за повисока казна, и друга од бранителот на Јованов, адвокатот Сашко Дуковски, кој бара казната да биде намалена или случајот вратен на повторно судење.Обвинителката Фетаи побара од Судот да ја одбие жалбата на одбраната и да ја усвои жалбата на обвинителството:„Со вакви возачи, што не почитуваат ниту едно сообраќајно правило, никој не може да се чувствува безбедно. Притоа, против обвинетиот има и други прекршоци, што покажува дека не се одвратил од повторување на делото. Казната мора да гравитира кон горната граница.“Одбраната, пак, инсистираше дека признанието на вина е искрено и треба да биде олеснителна околност.„Признанието се дава со цел да се избегнат долги судења и да се покаже свесност за стореното. Ве молам, видете го видеото неколку минути по настанот и сами ќе процените дека неговото каење не е лажно“, изјави адвокатот Дуковски.Апелациониот суд, по завршување на јавната седница, треба да донесе правосилна одлука за случајот кој предизвика силни реакции во јавноста и повторно го отвори прашањето за казнената политика кон несовесните возачи.

Македонија | пред 7 месеци

Лажни се мејловите и пасвордите кои кружат на интернет од државни институции, лажна е заканата за голем сајбер напад, вели Андоновски

До повеќе медиуми во земјава беше испратена електронска порака со заканувачка содржина, во која се најавуваше „голем сајбер напад“ за време на Дигиталниот Самит на Западен Балкан 2025 што се одржа во Скопје. Во пораката бил наведен и список со наводни е-маил адреси и лозинки од државни институции и физички лица.Од Министерството за дигитална трансформација за „Скопје1“ велат дека заедно со засегнатите институции направиле детална анализа на содржината. Резултатите покажале дека огромен дел од наведените адреси биле лажни, со погрешно наведени имиња, домени и податоци кои требало да создадат впечаток на автентичност. Само помалку од 2% од објавените адреси потекнувале од стари, одамна затворени инциденти собрани од различни извори.„Со внимание го следиме целиот процес. Министерството за внатрешни работи презема мерки за справување со настанот, кој има и кривично-правна позадина“, стои во соопштението.Според министерот за дигитална трансформација Стефан Андоновски, станува збор за политички мотивирана сајбер закана чија цел била да се создаде страв и недоверба кај вработените во јавната администрација и кај граѓаните.„Оваа кампања користеше лаги, манипулации и измислици со цел да се наруши довербата во Владата и Министерството за дигитална трансформација, токму во период кога се одржуваше голем регионален настан“, изјави Андоновски, додавајќи дека за време на Самитот не бил забележан ниту еден безбедносен проблем на системите под надлежност на Министерството.Како дополнителна мерка, Владата на предлог на Министерството усвоила Информација за зајакнување на политиките за лозинки на службените е-маил адреси во сите институции. Со тоа, секоја институција е задолжена да воведе високо ниво на безбедност при креирање лозинки, доколку тоа досега не било направено.Воедно, Министерството најави сет обуки за унапредување на сајбер безбедноста во јавниот сектор, со цел превенција и поголема подготвеност во случај на реални сајбер напади во иднина.

Македонија | пред 7 месеци

Пронајдени се телата на хрватските планинари, двајца од нив биле браќа

Телата на планинарите од Хрватска кои исчезнаа вчера во лавината на словенечките Јулиски Алпи се пронајдени, јави словенечкиот медиум 24ur. Неофицијално, двајца од загинатите биле браќа.„Ги пронајдовме двајцата – едниот беше закопан на околу еден метар под снегот, другиот на длабочина од метар и пол. Еден од нив успеавме да го транспортираме во долината со хеликоптер, а сè уште чекаме транспорт за вториот,“ изјави претставник на спасувачките служби.Тој објасни дека теренот е исклучително тежок, со карпеста и стрмна клисура и бројни карпести скокови, што ја отежнало и направило опасна работата на спасувачите.

Свет | пред 7 месеци

(Фото) Младиот човек кој беше пронајден мртов во Љубљана е Стојче Ѓоргиев

Младиот човек, кој во петокот беше пронајден мртов во Љубљана е Стојче Ѓоргиев од кочанското село Грдовци.МНР денеска потврди дека станува збор за македонски државјанин роден 1986 година во Кочани.Неофицијално, како што претходно соопштија словенечките власти, тој бил претепан до смрт.Истрагата е во тек, заради што и не соопштуваат други детали.

Македонија | пред 7 месеци

Татко со нож се заканувал на целото семејство, маж физички ја нападнал поранешната сопруга: Насилства во Ѓорче Петров и во Центар

На 05.10.2025 во 22:00 часот во СВР Скопје, 50-годишна жена од Скопје пријавилa дека околу 20:00 часот во семејниот дом на подрачјето на Ѓорче Петров, таа и нејзината 28-годишна ќерка биле физички нападнати од нејзиниот сопруг М.Ќ.(50) од Скопје, а потоа им се заканувал со остар предмет на нив и на 25-годишниот син. Се преземаат мерки за расчистување на случајот.На 05.10.2025 во 18:10 часот во Полициската станица Кисела Вода е извршен службен разговор со Д.С.(38) од Скопје, постапувајќи по претходна пријава од неговата 39-годишна поранешна сопруга од Скопје дека околу 12:00 часот во домот на подрачјето на Центар физички ја нападнал. По целосно документирање на случајот ќе следува соодветна пријава.

Скопје | пред 7 месеци

Загина 25-годишен патник во тешка сообраќајка кај Кичево

Еден млад човек го загуби животот во тешка сообраќајна несреќа што се случи во неделата изутрина на магистралниот пат Кичево–Охрид, над селото Попоец. Во судар меѓу „нисан навара“ со струшки регистарски ознаки и „бмв“ со албански таблички, загина 25-годишниот Е.Б. од кичевското село Грешница, кој по несреќата бил пренесен во Медицинскиот центар во Кичево, каде што лекарите ја констатирале неговата смрт.На 05.10.2025 околу 06:30 часот во ОВР Кичево е пријавено дека на магистралниот пат Кичево-Охрид, над с.Попоец, се случила сообраќајна несреќа помеѓу патничко возило „нисан навара“ со струшки регистарски ознаки, управувано од Б.С.(26) од с.Дрслајца, струшко и патничко возило „бмв“ со албански национални ознаки, управувано од А.Б.(50) од с.Грешница, кичевско. Во несреќата со тешки телесни повреди се здобил сопатникот од возилото „бмв“ Е.Б.(25) од с.Грешница, кичевско, кој бил пренесен во Медицински центар Кичево, каде што починал.Лекар констатирал смрт, а по наредба на јавен обвинител телото на починатиот е дадено на обдукција. Извршен е увид од јавен обвинител и увидна екипа од ОВР Кичево.

Македонија | пред 7 месеци

(Видео) Убиен висок член на Шкаљарскиот клан кај Будва, бил застрелан преку шофершајбната на возилото

Во близина на плажата Трстено кај Будва вчера околу 18 часот беше пронајден мртов 33-годишниот Бобан Сјеклоќа, висок член на ќелијата на Шкаљарскиот клан од Цетиње. Неговото тело било откриено во автомобил „голф“ со регистарски таблички од Подгорица.Пожарникари кои биле повикани поради тоа што возилото излетало од патот го нашле телото, а првичните наоди укажуваат дека тој бил застрелан преку шофершајбната. На местото биле пронајдени неколку чаури. Вишата државна обвинителка Ана Радовиќ потврди дека наредена е судска обдукција и вештачење на запленетите траги.„Жртвата е идентификувана како Б.С. (33). Пронајдени се одреден број траги и чаури кои ќе бидат испитани во Центарот за судска медицина“, изјави Радовиќ.Според извор близок до истрагата, Сјеклоќа со години бил во бегство и важел за значајна алка во структурата на Шкаљаpскиот клан во Цетиње. Специјалното државно обвинителство го товарело за шверц на половина тон кокаин и за учество во ликвидацијата на Андрија Газивода и Перо Мухадиновиќ во 2020 година. Полицијата повеќе пати ја претресувала неговата куќа во Цетиње, но тогаш не го пронашла.За потсетување, Шкаљарскиот и Кавачкиот клан се во судир од крајот на 2014 година, откако исчезнувањето на околу 200 килограми кокаин во Валенсија доведе до поделба на некогашниот заеднички криминален клан на два спротивставени табора.

Балкан | пред 7 месеци

Заев е лидер во сенка на СДСМ – Николоски обвини дека партијата работи за свои елити и за ДУИ

Потпретседателот на ВМРО-ДПМНЕ, Александар Николоски, на денешната прес-конференција изјави дека поранешниот премиер и лидер на СДСМ, Зоран Заев, иако формално се повлече од политиката, сè уште ги „влече конците“ во партијата и е во постојана координација со актуелното раководство.„Јасно е дека ги влече конците и во време на претходниот претседател на СДСМ и премиер, Димитар Ковачевски, и во време на актуелниот претседател на СДСМ, Венко Филипче. Тоа е најдобар доказ дека се во целосна координација и дека лидерот во сенка на СДСМ е токму Зоран Заев“, рече Николоски.Тој посочи дека изјавите на Заев и Филипче се со „ист вординг“, што, како што додаде, укажува на тоа дека се координираат на дневна основа или дека „ист човек им ги пишува говорите и статусите“.„Со тоа што кажа дека ќе мора да внимаваме да не ја повлече државата во провалија, јасно е дека тоа е израз на паника и страв. СДСМ има само една цел – да заштити одредени елити во рамки на партијата“, истакна потпретседателот на ВМРО-ДПМНЕ.Според него, отпорот кон реформите во судството и обвинителството е последната одбрана на тие елити, а СДСМ денес, како што рече, „служи само на Зоран Заев и на ДУИ“.„Човекот кој ги нанесе најголемите национални порази на Македонија, најголемите предавства и во чие време криминалот и корупцијата царуваа, повторно се појавува во кампањата за да им покаже на Филипче и СДСМ кој ја води партијата“, додаде Николоски.Тој повика на „масовна излезност“ на изборите на 19 октомври за, како што рече, „да се стави крај на овие корумпирани елити“.Николоски нагласи и дека „декларацијата која СДСМ ја понуди во Собранието, само неколку дена пред почетокот на кампањата, е доказ за концесии кон источниот сосед“, додавајќи дека документот, според него, „ја пишувал Заев, а ја однел Филипче“.„Понудата на овие избори е јасна – од една страна се Заев, Ахмети и Филипче, а од другата страна се реформите и напредокот што ги почнавме и кои мора да продолжат со засилено темпо, паралелно со силни реформи во судството и обвинителството“, изјави Николоски.

Македонија | пред 7 месеци

(Видео) Сите урбанистички планови за Скопје ќе бидат достапни онлај, ветува Шукова

Кандидатката на СДСМ за градоначалничка на Скопје, Каја Шукова, денеска од Карпош истакна дека решавањето на проблемот со паркирањето и уредувањето на урбанизмот се врвни приоритети во нејзината програма.Таа најави  решенија, како паметни паркинзи со дигитална наплата и информации во реално време, како и зони за паркирање на периферијата поврзани со јавен превоз. Една од мерките во програмата е субвенциониран паркинг преку стратегијата „Скопје за сите“ каде се опфатени семејства со ниски приходи, пензионери, млади невработени и лица со попреченост.„Секој нов урбанистички проект ќе мора однапред да предвиди паркинг, зелени површини и простор за пешаци – не по изградбата, туку како предуслов,“ потенцираше таа.Шукова најави и дека урбанизмот ќе биде целосно транспарентен: сите планови ќе бидат достапни онлајн, со можност граѓаните да даваат свои предлози и коментари.„Ќе донесеме нов, строг и еколошки Генерален урбанистички план и ќе ја изработиме стратегијата ‘Скопје 2050’, која ќе е долгорочна визија за Скопје со мешовити урбани зони и уредени јавни простори,“ додаде таа.Шукова порача дека е време Скопје да се развива плански и во интерес на граѓаните:„Скопје мора да се развива паметно. Не може веќе да се бориме со хаосот. Скопјани заслужуваат многу подобро.“

Скопје | пред 7 месеци

(Видео) Вооружен напаѓач ранил 20-тина луѓе во Сиднеј, стрелал во возила кои минувале на најпрометната улица

На прометна улица во Сиднеј, вооружен напаѓач ранил 20 луѓе, соопшти австралиската полиција.Како што пишуваат медиумите, тој наводно случајно ги таргетирал автомобилите што минувале, вклучително и полициски автомобили, при што испукал помеѓу 50 и 100 истрели, предизвикувајќи паника во областа.Еден маж е во сериозна состојба. Неколку други се однесени во болница. Повеќето од другите жртви се повредени од скршено стакло.Напаѓачот бил уапсен во стан во Сиднеј два часа по пукањето, а веднаш е пренесен во болница откако се здобил со повреди за време на апсењето.Други детали за овој инцидент засега не се соопштени.

Свет | пред 7 месеци

Жител на Кочани е пронајдениот мртов човек во Љубљана, потврди МНР

МНР соопшти дека пронајдениот мртов Македонец во Љубљана е жител на Кочани, роден во 1986 година.Ве информираме дека до Амбасадата на Република Северна Македонија во Љубљана е доставено известување дека во текот на ноќта на 2 октомври 2025 година, животот го загубил македонски државјанин, роден во 1986 година во Кочани.Согласно информациите од словенечката полиција, блиските на починатиот се веќе известени, а случајот го разгледува Секторот за криминалистичка полиција.Амбасадата на Република Северна Македонија во Љубљана е во контакт со семејството на починатиот и со надлежните словенечки институции, со цел обезбедување на потребната конзуларна поддршка и следење на понатамошниот тек на постапката, се наведува во соопштението на МНР.

Македонија | пред 7 месеци

Приватните автобуси не возат по 10 часот, превозниците бараат ЈСП да им подмири долгот

Приватните автобуски превозници во 10 часот ги исклучија од сообраќај своите автобуси. Возниот ред од 5 часот наутро до 10 ќе остане се додека не им биде подмирен долгот од 90 милиони денари од ЈСП.Се исклучивме во 10 часот и ќе работиме така додека не ни биде исплатен целиот долг. Шест месеци е тешко да се работи без приход, а треба да се исплатат плати за вработените, да се платат придонесите за нив  да се купи нафта и да се одржува фирмата. Дополнително и дома треба да се подмират сметките. Ние шест месеци кратиме од приходите на семејствата за да купиме нафта – вели  Момчило Тодоровски  сопственик на компанијата „Радос Компани“.Вкупниот долг на ЈСП кон нив е 170 милиони денари.Тие тврдат дека добиле информација дека Град Скопје веќе префрлил дел од парите во ЈСП, но не знаат каде јавното претпријатие ги потрошило.

Скопје | пред 7 месеци

Кривична пријава против висок функционер во МВР – осомничен за злоупотреба на службена положба

Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава до Основното јавно обвинителство Скопје против лице со иницијали Љ.Р., поради сомнение за сторено кривично дело „злоупотреба на службената положба и овластување“ согласно член 353 став 1 од Кривичниот законик.Според пријавата, осомничениот, кој бил помошник на министерот за внатрешни работи и раководител на Одделот за дисциплински и судски постапки, ја злоупотребил својата службена функција со тоа што во повеќе наврати незаконски си исплатувал средства од буџетот на МВР.Во текот на месеците јуни, јули, август, септември, ноември и декември 2023 година, тој одобрил списоци за евиденција на прекувремена работа и бонус плати за вработени во Одделот, при што и самиот фигурирал на тие списоци. Притоа, не постоеле писмени наредби со кои бил задолжен да извршува работни задачи подолго од полното работно време.Со таквите дејствија, според внатрешната контрола, се стекнал со противправна имотна корист во износ од вкупно 116.748 денари – од кои 80.134 денари на име прекувремена работа и 36.614 денари како бонус плата за 2023 година.Средствата биле исплатени на штета на буџетот на Министерството за внатрешни работи.Од МВР соопштуваат дека предметот е доставен до Обвинителството за понатамошна постапка.

Скопје | пред 7 месеци

Во Љубљана е пронајдено безживотно тело на 38-годишен Македонец, неофицијално, бил претепан до смрт

Пронајденото безживотно тело кое во петокот беше пријавено во полицијата на Љубљана е на 38-годишен државјанин на Македонија, потврди портпаролката на полициската управа во Љубљана, Шпела Шкопорц.Неофицијално лицето било претепано до смрт.„Полициските службеници извршиле увид на местото на настанот, наредена е судска обдукција, но причината за смртта сè уште не е разјаснета. Интензивната кривична истрага сè уште е во тек. Надлежното државно обвинителство ќе биде известено за сите наоди“, изјави нивната портпаролка.

Македонија | пред 7 месеци

Алијансата за Албанците: ВЛЕН го отвора патот за српско влијание во стратешкиот енергетски сектор – скандал во МЕПСО

Алијансата за Албанците ја изрази својата најдлабока загриженост и соопшти дека со висока граѓанска и национална одговорност го осудува, како што наведува, „невидениот скандал кој директно ја загрозува енергетската безбедност и институционалниот суверенитет на државата“.Според соопштението, станува збор за одлука на генералниот директор на МЕПСО, Бурим Латифи, кој на 27 август 2025 година потпишал договор за соработка со српската компанија „ИМП-Телекомуникаци ДОО Белград“, со предмет на договорот – набавка на уреди за телеконтрола на 400 kV далекуводот Скопје–Врање.Алијансата наведува дека овој акт, кој на прв поглед може да изгледа како обична техничка процедура, всушност претставува стратешки и политички ризик, претворајќи го едноставниот комерцијален договор во инструмент за проширување на влијанието на „српскиот свет“ врз енергетскиот систем на Северна Македонија, која е членка на НАТО и дел од евроатлантската безбедносна архитектура.Од партијата посочуваат дека српската компанија не е регистрирана како даночен обврзник во Северна Македонија, што, според нив, предизвикува сериозни сомнежи во врска со транспарентноста, законитоста и целите на договорот, чија вредност изнесува 1.463.200 денари (околу 23.791 евра) со вклучен ДДВ.„Надвор од финансискиот аспект, она што го прави овој случај особено алармантен е геополитичката димензија и можниот судир на политички интереси“, се наведува во соопштението.АА дополнително посочува дека Бурим Латифи е братучед на првиот вицепремиер Изет Меџити, претставник на коалицијата ВЛЕН, и дека не може да се исклучи сомнежот дека овој договор е резултат на политичка интервенција и фамилијарна фаворизација, на штета на државниот интерес.Во своето соопштение, партијата поставува неколку прашања:– Како е можно компанија со седиште во Белград, во услови на зголемени геополитички тензии, да биде избрана за проект поврзан со критичната енергетска инфраструктура на земја членка на НАТО?– Дали првиот вицепремиер Изет Меџити официјално или неформално влијаел врз овој процес за да го поддржи својот роднина?– Дали овој договор претставува прв сигнал за пенетрација на „српскиот свет“ во стратешките мрежи на Северна Македонија преку поединци поврзани со коалицијата ВЛЕН?Со оглед на сериозноста на случајот, Алијансата за Албанците бара итна смена на Бурим Латифи од функцијата директор на МЕПСО, отворање независна парламентарна и обвинителска истрага за да се разјаснат околностите на потпишувањето на договорот, можниот судир на интереси и евентуалните политички влијанија, како и поништување на договорот и итен јавен ревизорски надзор на сите слични договори склучени за време на неговиот мандат.„Алијансата за Албанците го смета овој случај за тешко кршење на државниот интерес и обид за поставување темели на српско влијание врз виталните системи на државата преку кревки политички сојузи и клиентелистички врски“, се наведува во соопштението.Од партијата додаваат дека во време кога регионот се соочува со хибридни, геополитички и безбедносни закани, толерирањето на српско влијание во клучните сектори претставува „не само политичка неодговорност, туку и јасно предавство на националните интереси и евроатлантската ориентација на државата“.

Македонија | пред 7 месеци

Трагедија на Дунав - се превртел чамец, 11 Кинези загинале

Во близина на Бачка Паланка ноќеска се превртел чамец во реката Дунав, при што според неофицијални информации на РТС има загинати лица. Станува збор за 11 кинески државјани.Спасувачките екипи продолжуваат со потрага по уште неколку исчезнати лица, додека полицијата, брзата помош и службите за противпожарна заштита се присутни на терен.Надлежните органи најавија дека ќе ги објават деталите и причините за несреќата по завршувањето на истрагата.

Свет | пред 7 месеци

Трагедија во Словенија: Тројца хрватски планинари загинаа во лавина на Јулиските Алпи

Во лавина на планината Тошќ, на словенечките Алпи, загинаа тројца хрватски планинари. Спасувачките служби веднаш реагирале, додека хрватските власти нудат помош во потрагата и спасувањето.Останатите четворица планинари, кои останале во планинарскиот дом, успеале безбедно да се спуштат до висорамнината Покљука.Иако биле предупредени за влошување на временските услови, тројцата хрватски планинари продолжиле со искачување на Тошќ, каде што настрадале.Според информациите, планинарите кои загинаа потекнувале од околината на Сплит.Хрватскиот премиер Андреј Пленковиќ понуди помош во потрагата и спасувањето, вклучувајќи тимови на Хрватската планинска служба за спасување (HGSS) и хеликоптери. Тој изрази благодарност до словенечките спасувачки служби за нивниот ангажман и активностите кои ги преземаат.

Свет | пред 7 месеци

Заев се врати во политичкиот ринг: ги отфрли обвинувањата за пари од Бугарија – „Очaен обид за одвлекување на вниманието“

Поранешниот премиер Зоран Заев по подолго време се огласи во јавноста, реагирајќи на, како што вели, „невистини, клевети и навреди“ изнесени од актуелниот премиер Христијан Мицкоски.„Небулози, клевети и навреди се методите на Мицкоски со кои сака да се оправда за катастрофата што му ја нанесува на целиот систем и на државата. Неспособноста да испорача макар и еден резултат во која било сфера, залиена со неговата самобендисаност и аздисаност, ќе го турне во политичка провалија. Но, ќе мораме да внимаваме да не ја повлече и државата со себе во таа провалија“, изјави Заев.Тој најостро ги отфрли, како што рече, „лажните обвинувања“ на Мицкоски дека примал пари од поранешен бугарски премиер.„Категорично ги отфрлам лагите и клеветите за наводни ‘куферчиња со пари’ како очаен обид на неспособниот премиер да го пренасочи вниманието од неговите неуспеси кон измислици“, изјави Заев, додавајќи со иронија дека „вистинските експерти за куфери со пари се неговите финансиери“.„Ги видовме на снимките што сами си ги објавија – оние што му ги плаќале сметките за струја во Белата палата, несудени бугарски конзули и осудени криминалци кои се бранат од слобода, пуштени само за да ја напаѓаат опозицијата“, порача Заев.Ова е прво јавно обраќање на поранешниот премиер по подолг период на медиумска тишина, и доаѓа во време на зголемени политички тензии меѓу власта и опозицијата.

Македонија | пред 7 месеци

Снежна бура на Хималаите, стотина туристи се спасени, но не се знае бројот на оние кои уште се во опасност

Бура на Хималаите доведе во опасност стотина туристи, но како што пренесоа кинеските медиуми, најмалку 350 туристи кои останале заглавени по снежната бура на тибетската страна на Монт Еверест се спасени.Спасувачките тимови безбедно ја префрлиле групата во најблиското населено место, Чуданг, пренесе ДПА.Нивните шатори биле делумно оштетени од бурата, а пристапните патишта се блокирани од длабок снег.Сè уште не е познато колку луѓе остануваат заглавени на Монт Еверест.Платформата „Џиму Синвен“ јави дека има жртви на местото на настанот, но засега нема потврдени информации за можни смртни случаи.

Свет | пред 7 месеци

Снемало струја кај бунарите во Лепенец, тоа го предизвикало пукањето на цевката во Влае, водоснабдувањето се стабилизира

Прекин на електричната енергија во регионот кај бунарите на Лепенец бил причина за дефектите на водоводниот систем, соопшти утрово ЈП Водовод и канализација.„Како резултат на прекинот на струја предизвикана е варијација на притисокот на пумпниот систем од бунарите кон градскиот цевковод од каде се дополнува водоснабдителниот систем. Поради тоа настанати се 2 дефекти истовремено на главната водоводна линија Ф-600, како и дефект во шахта на Ф-400 на еден од бунарите. Поради овие дефекти, во неколку населени места од градот дојде до прекин на водоснабдувањето, но по брзата реакција на нашите екипи водоснабдувањето постепено се стабилизира со цел да се избегнат нови појави на дефекти и дополнителни оптоварувања на системот“, се наведува во соопштението.

Скопје | пред 7 месеци

Сузана Турунџиева предупредува: Се злоупотребува името „Медена земја“ и ликот на Атиџе за продавање мед

Сузана Турунџиева на Фејсбук предупредува за злоупотреба на името „Медена земја“ и користење фотографии од Атиџе Муратова без нејзина дозвола. Таа апелира до јавноста да пријавува вакви случаи и потсетува дека Атиџе не продава мед преку посредници или фирми, туку исклучиво лично.Апелирам до сите свесни и одговорни луѓе да пријават злоупотреба на името МЕДЕНА ЗЕМЈА, со користење на фотографии од Атиџе Муратова и потсетувам дека Атиџе не го рекламира и продава нејзиниот мед преку други, трети лица и фирми. Атиџе нема фирма! Медот на Атиџе е оној кој ќе го купите од нејзе лично!Поради се поприсутна злоупотреба на името МЕДЕНА ЗЕМЈА, (МЕДЕНА ПЛАНИНА) "МЕДОТ НА АТИЏЕ" повторно и оваа сезона сакам да ве потсетам дека на пазарот секојдневно се појавуваат многу манипулатори кои го злоупотребуваат нејзиното име и продаваат мед од непознато потекло и квалитет.Напоменувам: Атиџе нема голема количина на мед, нема етикети и сама, со божја помош го продава она што го има. МЕДОТ ОД АТИЏЕ е само оној мед кој сте го купиле лично од неа, или јас сум ви помогнала да го набавите.Се друго е само мед со непознат квалитет, пишува Турунџиева.

Македонија | пред 7 месеци

Голем дел од Скопје вечерва без вода или со слаб притисок поради дефект во Влае

Дел од населбите Ѓорче Петров и Хром вечерва останаа без вода поради сериозен дефект на главната водоводна линија во Влае. Граѓани од околните делови на градот јавуваат дека имаат слаб притисок и проблеми со водоснабдувањето.Од ЈП „Водовод и канализација – Скопје“ потврдија дека дефектот е на цевка со дијаметар од 600 милиметри на улицата Франце Прешерн 100Д и дека без вода ќе остане поголем дел од градот.„Ве известуваме дека поради сериозен дефект на водоводна цевка Ф600 мм на улица Франце Прешерн 100Д во населба Влае, со прекинато водоснабдување ќе биде голем дел од градот, а останатиот дел ќе биде со намален притисок. Водоснабдувањето ќе биде прекинато до завршување на работните активности“, соопштија од претпријатието.Екипи на Водовод се на терен и работат на санација на дефектот. Се очекува водоснабдувањето да биде нормализирано во текот на ноќта.

Скопје | пред 7 месеци